| Wednesday, September 12, 2007 |
1:1 Isua Krista thu puan chhuah, Pathianin a bawihte hriattir atan a hnena a pek, thil lo awm lawk tur thu chu; tin, chu chu a vantirhkoh hmangin a bawih Johana a rawn hriattir a;
1:2 chu Johana chuan Pathian thu leh Isua Krista hriattirna thu, a thil hmuh zawng zawngte thu chu a hriattir a.
1:3 He hrilh lawkna bu thu chhiartu leh ngaithlaa a chhunga thu ziak pawmtute chu an eng a thawl e; a hun chu a hnai tawh si a.
1:4 ,5 Johana chuan Asia rama kohhran pasarihte hnenah chuan: Awm meka leh awm tawha leh lo la awm tura hnen atang te, a lalthutphah hmaa Thlarau pasarih awmho hnen atang te, Isua Krista, thu hretu rinawm tak, mitthi zing ata piang hmasa bera leh leia lalte roreltute hnen atang te chuan, khawngaihna leh remna in hnenah awm rawh se. Min hmangaiha a thinsenin kan sualte lak ata min tlan chhuak a,
1:5 ,4 Johana chuan Asia rama kohhran pasarihte hnenah chuan: Awm meka leh awm tawha leh lo la awm tura hnen atang te, a lalthutphah hmaa Thlarau pasarih awmho hnen atang te, Isua Krista, thu hretu rinawm tak, mitthi zing ata piang hmasa bera leh leia lalte roreltute hnen atang te chuan, khawngaihna leh remna in hnenah awm rawh se. Min hmangaiha a thinsenin kan sualte lak ata min tlan chhuak a,
1:6 khua leh tuiah leh a Pathian leh a Pa lama puithiama min siamtu hnenah, a ni, ama hnen ngeiah ropuina leh rorelna chu chatuanin awm rawh se. Amen.
1:7 Ngai teh u, ani chu chhumte nen chuan a lo kal dawn e; mit tinrengin a hmu ang a, a chhuntute ngei pawh khan; khawvela hnam zawng zawngin amah an tah bawk ang. A ni, Amen.
1:8 “Kei Alpha leh Omega ka ni,” Lalpa Pathian, awm meka leh awm tawha leh lo la awm tura, Engkimtitheia chuan a ti a ni.
1:9 Kei Johana, in unaupa leh, Isuaa hrehawmna te, khua leh tui te, chhelnate tawmpuitu che u hi, Pathian thu avang leh Isua hriattirna thu avangin Patmos thliarkar an tihah chuan ka awm a,
1:10 Lalpa niah chuan Thlarauvin ka lo awm a,tin, ka hnung lamah tawtawrawt ri ang, aw ring takin,
1:11 “I thil hmuh tur chu lehkhabuah ziak la, kohhranho pawl sarihte hnenah Ephesi khuaah te, Smurna khuaah te, Pergamos khuaah te, Thuatira khuaah te, Sardis khuaah te, Philadelphia khuaah te, Laodikei khuaah te chuan thawn rawh,” a tih ka hria a.
1:12 Tin, mi biakna aw chu hmuh tumin ka han lehhawi ta a. Tin, ka han lehhawi chuan rangkachak khawnvar dahna pasarih ka hmu a;
1:13 khawnvar dahna zingah chuan mi tu emaw mihring fa ang, ke ler thlenga puan sin, a awma rangkachak kawnghrena inhreng ka hmu bawk a.
1:14 Tin, a lu leh a sam chu beram hmul angin a var a, vur ang maiin; a mitte chu meialh ang a ni a;
1:15 a kephahte chu dar tle mi ang a ni a, rawh tuina meia rawh thianghlim tawh ang maiin; a aw chu tui tam tak ri ang mai a ni.
1:16 Tin, a kut dinglam chuan arsi pasarih a keng a; a ka atang chuan khandaih hriam tawn hriam tak a chhuak a; a hmel chu ni sat vang lai tak ang a ni.
1:17 Tin, amah chu ka hmuh veleh thi ang derin a ke bulah ka tlu ta a. Tin, ani chuan a kut ding lam chu ka chungah nghatin ka hnenah, “Hlau suh ang che; kei Hmasabera leh Hnuhnungbera leh,
1:18 Mi Nunga chu ka ni, ka lo thi a, nimahsela ngai teh, kumkhua atan ka nung leh ta a ni. Thihna leh Mitthi Khaw chabite chu ka nei bawk a.
1:19 “Chutichuan, i thil hmuh tawhte leh thil awm mekte leh tun hnua thil lo awm turte thu chu ziak rawh;
1:20 ka kut ding lama arsi pasarih awm i hmuhte leh rangkachak khawnvar dahna pasarihte thuruk chu. Arsi pasarih chu kohhran pasarihte tirhkoh an ni a;khawvar pasarih chu kohhran pasarihte chu an ni a.
2:1 “Ephesi khuaa kohhranho tirhkoh hnenah chuan heti hian ziak rawh: ‘A kut ding lama arsi pasarih kenga, rangkachak khawvar dahna pasarih zinga vei veia khan heng thu hi a sawi a ni;
2:2 I thiltihte, i thawh rimzia leh i chhelzia te, mi sualte i ngaihtheih lohzia te ka hria. Tirhkoh ni si lova tirhkoh intite chu i fiah bawk a, dawthei an ni tih i lo hre tawh a;
2:3 chhelna i nei bawk a, ka hming avangin i tuar tawh a, i chau si lo va.
2:4 Nimahsela, demna che ka nei a ni, i hmangaihna hmasa ber kha i ban tak avangin.
2:5 Chutichuan, i tluksan tak chu hre reng la, simin, atira i thiltihte kha ti leh rawh, chutilochuan i hnenah ka lo kal ang a, i sim loh zawngin i khawnvar dahna kha a hmun ata ka sawn ang.
2:6 Nimahsela, hei hi i thatna chu a ni, Nikola ho thiltihte i huat hi; chu chu kei pawhin ka haw ve a ni.
2:7 Thlarauvin kohhranho hnena thu a sawi hi beng nei chuan hre rawh se. A hnehtu apiang Pathian Paradis-a Nunna Thinga mi ka eitir ang, a ti e,’ tiin.
2:8 “Tin, Smurna khuaa kohhranho tirhkoh hnenah chuan heti hian ziak rawh:'Hmasabera leh Hnuhnungbera,thia lo nung leh taa khan heng thu hi a sawi a ni:
2:9 I hrehawmzia te, i pachhiatzia te (nimahsela i hausa si a), Juda tak ni lova, Setana inkhawmna in ho ni zawk si a, Juda intihoten an sawichhiat dan che ka hria.
2:10 I tuar turte hi hlau suh:ngai teh, fiaha in awm theih nan diabola chuan in zinga mi thenkhat tan inah a khung dawn che u a ni; tin, ni sawm hrehawm in tuar ang. Thih thlengin rinawmin lo awm rawh, tichuan nunna lallukhum ka pe ang che.
2:11 Thlarauvin kohhranho hnena thu a sawi hi beng nei chuan hre rawh se. A hnehtu apiang thih hnihna chuan engmah a tih lo vang, a ti e’ tiin.
2:12 “Tin, Pergamos khuaa kohhranho tirhkoh hnenah chuan heti hian ziak rawh: 'Khandaih hriam tawn hriam tak neia khan heng thu hi a sawi a ni:
2:13 I awmna, Setana thutphah awmna kha ka hria:tin, ka hming i vawng tlat a, ka thu hretu Antipa, Setana awmnaa in zinga an thah, ka mi rinawm tak awm lai meuh pawh khan mi rinna hi i phatsan lo bawk a.
2:14 Nimahsela, tlemin demna che ka nei, khata Balaama zirtirna thu pawm tute emaw in awmpui avang khan; ani chuan milem biakna sa an eina tur leh an inngaihna turin Balaka chu Israela thlahteho hmaah tlukna dah a zirtir kha.
2:15 Nang pawhin Nikola ho zirtirna thu chutiang bawka pawm tute emaw i awmpui bawk a ni.
2:16 Chutichuan, sim rawh; chutilochuan i hnenah ka lo kal thuai ang a, ka khandaih chuanin anmahni ka rawn do vang.
2:17 Thlarauvin kohhranho hnena thu a sawi hi beng nei chuan hre rawh se.A hnehtu apiang hnen ngeiah chuan manna thuhruk zinga mi ka pe ang a, lung var pawh ka pe ang, chu mi lunga hming thar ziak nen; chu hming chu a changtu chauh lo chuan tuman an hre lo, a ti e’ tiin.
2:18 “Tin, Thuatira khuaa kohhranho tirhkoh hnenah chuan heti hian ziak rawh: ‘Pathian Fapa, mit meialh ang neia, a kephahte dar tle mi anga khan heng thu hi a sawi a ni:
2:19 I thiltihzia te, i hmangaihzia te, i rinzia te, i rawngbawlzia te,i chhelzia te ka hria, i thiltih hnuhnung berte chu atira mi ai khan a nasa zawk tih ka hre bawk.
2:20 Nimahsela, demna che ka nei, hmeichhia Jezebeli, Zawlneinu intii kha i ngaihtheih avangin; ani chuanka bawihte chu inngaih leh milem biakna thil ei zirtirin a hruai bo bawk thin a ni.
2:21 Tin, simna turin a hnenah hun bi ka tuk a, nimahsela mi ngaih a chin chu a sim duh lo.
2:22 Ngai teh, amah chu khumah ka paih dawn a ni; a uiretute pawh chu, a thiltih chinte chu an simsan loh zawngin hrehawm nasa takah ka paih bawk dawn.
2:23 A fate chu hriin ka tihlum bawk ang a; tichuan kei rilru leh thinlung entu ka ni tih kohhranho zawng zawng chuan an hria ang; tin, in thiltih ang zelin ka pe theuh ang che u.
2:24 Nimahsela, nangni, Thuatira khuaa mi dang awm, chu zirtirna thu pawm lova, Setana thil thuk an tithe hre lo apiang hnenah chuan phur rit dang reng ka bel lo vang che u, ka ti a ni.
2:25 In neih sa erawh kha chu ka lo kal hma loh chuan vawng tlat rawh u.
2:26 ,27 Tichuan, a hnehtu apiang leh a tawp thlenga ka thiltihte pawmtu apiang, keiin ka Pa laka ka hmuh ang bawk hian, chu mite chu hnam tin chungah thu ka neihtir ang; tin, anni chuan belvawtu belte keh sawm depa a awm angin thir tiangin an ro an relsak ang.
2:27 ,26 Tichuan, a hnehtu apiang leh a tawp thlenga ka thiltihte pawmtu apiang, keiin ka Pa laka ka hmuh ang bawk hian, chu mite chu hnam tin chungah thu ka neihtir ang; tin, anni chuan belvawtu belte keh sawm depa a awm angin thir tiangin an ro an relsak ang.
2:28 Tin, varparh arsi chu anmahni ka pe ang.
2:29 Thlarauvin kohhranho hnena thu a sawi hi beng nei chuan hre rawh se, a ti e,’ tiin.
3:1 “Tin, Sardis khuaa kohhranho tirhkoh hnenah chuan heti hian ziak rawh:‘Pathian Thlarau pasarih leh arsi pasarih neia khan heng thu hi a sawi a ni: I thiltihziate ka hria, thi reng si a, nung hming i put hi.
3:2 Inveng la, i thil la neih thi lek lekte chu tinung leh rawh; i thiltihte reng ka Pathian mit tlung zovin ka hmu si lo.
3:3 Chutichuan, i thu dawn leh ngaihthlakte kha hre reng la, pawm la, sim rawh. I inven loh zawngin rukru angin ka lo kal ang a, eng hunah nge ka rawn phawk dawn che i hre dawn si lo.
3:4 Nimahsela, Sardis khuaah khan an puante tibawlhhlawh lo hming tlem te i nei a ni; anni chu puan var sinin, ka hnenah an leng ve thin ang; chutiang ti tlak an ni si a.
3:5 A hnehtu apiang chutiangin puan varte sintir an ni ang; tin, Nunna Bu ata an hming chu ka thai bo tawp lo vang a, ka Pa hmaah leh a vantirhkohte hmaah chuan an hming ka tan zawk ang.
3:6 Thlarauvin kohhranho hnena thu a sawi hi beng nei chuan hre rawh se, a ti e,’ tiin.
3:7 “Tin, Philadelphia khuaa kohhranho tirhkoh hnenah chuan heti hian ziak rawh: ‘Mi thianghlima, mi dik taka, Davida chabi neia, tuma khar loh tura hawnga tuma hawn loh tura khara khan heng thu hi a sawi a ni:
3:8 I thiltihte ka hria, chakna tlemte chauh i nei a, chutichung pawhin ka thu i pawm a, ka hming pawh i phat lo va, tuma khar theih loh i hmaah kawngka ka hawng e.
3:9 Ngai teh, Setana inkhawmna in ho zinga mi, Juda tak ni lova, dawt sawia Juda intite zinga mi chu ka tir dawn a ni; ngai teh, i ke bulah chibai ka rawn buktir ang a, ka hmangaih che tih ka hriattir bawk ang.
3:10 Ka chhelna thu i pawm avang khan leia awmte fiah tura khawvel zawng zawng chunga fiahna hun lo thleng tur lakah chuan kei pawhin ka humhim ang che.
3:11 Ka lo kal thuai dawn e; tuman i lallukhum chu an laksak loh nan che i thil neih sa kha vawng tlat rawh.
3:12 A hnehtu apiang chu ka Pathian biak inah chuan banah ka siam ang a, chuta tang chuan an chhuak tawh lo vang; tin, anmahniah chuan ka Pathian hming nen, ka Pathian khua, Jerusalem Thar, ka Pathian hnena mi van atanga lo chhuk tur hming nen, ka hming thar nen ka ziak ang.
3:13 Thlarauvin kohhranho pawlte hnena thu a sawi hi beng nei chuan hre rawh se, a ti e,’ tiin.
3:14 “Tin, Laodikei khuaa kohhranho tirhkoh hnenah chuan heti hian ziak rawh: ‘Amena, thu hretu rinawm leh dik taka, Pathian thil siam bula khan heng thu hi a sawi a ni;
3:15 I thiltihziate ka hria, i vawh hek loh va, i lum hek loh hi; i vawh emaw i lum emaw ka duh a ni.
3:16 Chutichuan, lum si lova, vawt si lova, i lum chang chang avangin ka ka ata ka chhak chhuak dawn a che.
3:17 Ka hausa a, sum ka ngah a, engmah ka tlachham lo ve, i tih avang leh nang mi rethei, khawngaihthlak, pachhia, mitdel, saruak chu i ni tih i inhriat loh avangin;
3:18 i lo hausak theih nan rangkachak meia tihthianghlim te, puan i sin theih nan leh i saruak zahmawh chu a lan loh nan puan var te, i hmuh theih nan i mita hnawihah mit na hlo te ka hnena mi lei turin ka rawn a che.
3:19 Ka hmangaih apiangte chu ka zilhhauvin ka thunun thin; chutichuan thahnem ngai la, sim rawh.
3:20 Ngai teh, kawngkhar bula dingin ka kik hi; tupawhin ka aw hriaa kawng a hawn chuan a hnenah ka lut ang a, a hnenah zanriah ka ei ang a, ani pawhin ka hnenah a ei bawk ang.
3:21 A hnehtu apiang ka lalthutphahah ka hnenah ka thuttir ang, kei pawhin ka hneh a, ka Pa hnenah a lalthutphaha ka thu ang khan.
3:22 Thlarauvin kohhranho pawlte hnena thu a sawi hi beng nei chuan hre rawh se, a ti e,’ tiin,” a ti a.
4:1 Chung thil hnuah chuan ka han en a, tin, ngai teh, vanah kawngkhar inhawng ka hmu a; tin, aw ka hriat hmasak, tawtawrawt ri anga mi bia khan, “Hetah lo chho rawh, tichuan tun hnua thil lo awm turte chu ka entir ang che,” a ti a.
4:2 Tin, chawplehchilhin Thlarauvin ka lo awm ta nghal a; tin, ngai teh, vanah lalthutphah a lo inhung a, chu mi thutphahah chuan mi pakhat a lo thu bawk a.
4:3 Tin, a thua chu jaspi leh sardion lung ang maiin a lang a; tin, lalthutphah velah chuan chhimbal, ena smaragdin lung ang a zam a.
4:4 Tin, lalthutphah velah chuan lalthutphah sawmhnih leh pali a awm a; tin, lalthutphahahte chuan upa sawmhnih leh pali puan var sina thu ka hmu a; rangkachak lallukhumte an khum a.
4:5 Tin, lalthutphah atang chuan kawlphe te, aw te, khawpui ri te a lo chhuak dur dur a. Tin, meichher pasarih lalthutphah hmaah chuan a alh a, chung chu Pathian Thlarau pasarih kha an ni a;
4:6 tin, lalthutphah hmaah chuan darthlalang tuifinriat ang krustal lung ang mai a awm a; tin, lalthutphah laiah leh lalthutphah velah chuan Thilnung pali, hma lam leh hnung lam mita khat an awm a.
4:7 Tin, Thilnung pakhatna chu sakeibaknei ang a ni a. Thilnung pahnihna chu sebawng no ang a ni a, Thilnung pathumna chuan mihring hmel ang a pu a, Thilnung palina chu mupui thlawk lai ang a ni a.
4:8 Tin, Thilnung pali chu thla paruk theuh nei, an vel leh an chhunga mita khat an ni. Tin, “Lalpa Pathian, Engkimtitheia, Awm tawha leh awm meka leh lo awm tura chu, A thianghlim e, a thianghlim e, a thianghlim e,” tiin chhun leh zan an chawl ngai lo.
4:9 Tin, Thilnungte chuan lalthutphaha thua chatuana nung renga chu an tihropuia an chawimawia lawmthu an hrilh apiangin,
4:10 ,11 upa sawmhnih leh palite chu lalthutphaha thua hmaah chuan an bawkkhup ang a, chatuana nung renga chu chibai an buk ang a, “Nang, kan Lalpa leh kan Pathian, Ropuina te, chawimawina te, thiltihtheihna te chu Hmu tlak i ni e; Nangin engkim i siam a, I duh avnga awm leh siam A ni bawk si a,” tiin an lallukhumte chu lalthutphah hmaah chuan an dah ang.
4:11 ,10 upa sawmhnih leh palite chu lalthutphaha thua hmaah chuan an bawkkhup ang a, chatuana nung renga chu chibai an buk ang a, “Nang, kan Lalpa leh kan Pathian, Ropuina te, chawimawina te, thiltihtheihna te chu Hmu tlak i ni e; Nangin engkim i siam a, I duh avnga awm leh siam A ni bawk si a,” tiin an lallukhumte chu lalthutphah hmaah chuan an dah ang.
5:1 Tin, lalthutphaha thua kut ding lamah chuan lehkhabu, chhung lam leh pawn lama ziak, chhinchiahna pasariha chhinchhiah tlat ka hmu a.
5:2 Tin, vantirhkoh chak tak, aw ring taka, “Tunge lehkhabu hi hawnga a chhinchhiahnate hi phelh tlak awm?” tia, tlangauvin ka hmu bawk a.
5:3 Chutichuan, vanah te, leiah te, lei hnuaiah te pawh lehkhabu chu hawng thei tumah an awm lo va, a chhung lam en thei pawh an awm hek lo.
5:4 Tin, lehkhabu hawng leh a chhung lam pawh en tlak tumah an awm loh avangin ka tap ta zawih zawih a.
5:5 Tin, upa zinga pakhat chuan ka hnenah, “Tap suh; ngai teh, Sakeibaknei, Juda hnama mi, Davida Bulpui khan lehkhabu chu hawng tur leh a chhinchhiahna pasarih phelh turin a hneh ta,” a ti a.
5:6 Tin, lalthutphah leh Thil nung palite laiah upate lai bawkah chuan Beram No talh tawh hnu ang, ki pasarih leh mit pasarih nei ding ka hmu a, chung mitpasarihte chu Pathian Thlarau pasarih, lei chung zawng zawnga tirh chhuahte chu an ni.
5:7 Tin, ani chu a lo kal a, lehkhabu lalthutphaha thua kut ding lam ata chu a la ta a.
5:8 Tin, lehkhabu chu a lak veleh Thilnung pali leh upa sawmhnih leh palite chu, tingtang leh rangkachak berhbu rimtuia khat keng theuhvin Beram No hmaah chuan an bawkkhup ta hlawm a; chung rimtuite chu mi thianghlimte tawngtaina a ni.
5:9 ,10 Tin, “Nang, lehkhabu chu laa, A chhinchhiahnate phelh tlak i ni e; Talhin i awm tawh a, Chi tina mi te, tawng tina mi te, Mi tina mi te, hnam tina mi te, Pathian tan i thisenin i lei a, Kan Pathian tan khua leh tuiah leh, Puithiamahte i siam ta si a; Tin, leiah chuan ro an rel a,” tiin hla thar an sa a.
5:10 ,9 Tin, “Nang, lehkhabu chu laa, A chhinchhiahnate phelh tlak i ni e; Talhin i awm tawh a, Chi tina mi te, tawng tina mi te, Mi tina mi te, hnam tina mi te, Pathian tan i thisenin i lei a, Kan Pathian tan khua leh tuiah leh, Puithiamahte i siam ta si a; Tin, leiah chuan ro an rel a,” tiin hla thar an sa a.
5:11 Tin, ka han en a; tin, lalthutphah leh Thilnungte leh upate velah chuan vantirhkoh tam tak aw ka hria a; an tam lam chu a singa sing hmun sing tam tak leh, a sanga sang hmun sang tam tak an ni;
5:12 chungte chuan aw ring takin, “Beram No talh tawha hi Thiltihtheihna te, hausakna te, finna te, Chakna te, chawimawina te, ropuina te, Malsawmna te hmu tlak a ni e,” an ti a.
5:13 Tin, van leh lei chung leh lei hnuai leh tuifinriat chunga thil siam tinreng awmte leh, chungho chhunga awm zawng zawngten, “Lalthutphaha thua leh, Beram No hnenah chuan, Malsawmna te, chawimawina te, Ropuina te, rorelna te, Chatuanin awm rawh se,” an tih ka hre bawk a.
5:14 Tin, Thilnung palite chuan, “Amen,” an ti a. Upate pawh chuan bawkkhupin chibai an buk ta a.
6:1 Tin, Beram No chuan chhinchhiahna pasarih zinga pakhat chu a han phelh lai ka hmu a, tin, Thilnung palite zinga pakhat chuan khawpui ri ang maiin, “Lo kal rawh,” a tih ka hria a.
6:2 Tichuan, ka han en a, tin, ngai teh, sakawr var ka hmu a; a chunga chuang chuanin thalngul a keng a; tin, a hnenah chuan lallukhum an pe a; tin, hneh chung leh hneh zel turin a chhuak ta a.
6:3 Tin, chhinchhiahna pahnihna chu a han phelh veleh Thilnung pahnihna chuan, “Lo kal rawh,” a tih ka hria a.
6:4 Tichuan, sakawr dang, a sen mi, a lo chhuak leh a; tin, a chunga chuang hnenah chuan lei ata inremna laksak theihna leh mi inthahtir theihna an pe a; tin, a hnenah khandaih lianpui an pe bawk a.
6:5 Tin, chhinchhiahna pathumna chu a han phelh veleh Thilnung pathumna chuan, “Lo kal rawh,” a tih ka hria a. Tichuan, ka han en a, tin, ngai teh, sakawr dum ka hmu a; a chunga chuang chuanin bukna a keng a.
6:6 Tin, Thilnung palite lai atang chuan aw ang reng hian, “Duliin buhpui tehkhawng khat, duliin barli tehkhawng thum; hriak leh uain erawh chu tichhe suh,” a tih ka hria.
6:7 Tin, chhinchhiahna palina chu a han phelh veleh Thilnung palina aw chuan, “Lo kal rawh,” a tih ka hria.
6:8 Tichuan, ka han en a, tin, ngai teh, sakawr dang ka hmu a; a chunga chuang hming chu Thihna a ni; tin, Mitthi Khuaan a rawn zui a. Tin, khandaih te, tam te, hri te, leia sakawlhtea tihlum turin chu mite hnenah chuan lei hmun lia thena hmun khat chunga thuneihna an pe a ni.
6:9 Tin,chhinchhiahna pangana chu a han phelh veleh maicham hnuaiah chuan Pathian thu avang leh an pawm hriattirna thu avanga thahte thlarau chu ka hmu a;
6:10 tin, anni chuan aw ring takin, “Aw Lalpa, mi thianghlim leh dik tak, eng chen nge rorel lovin leia awmte chungah kan thisen chhuahna phuba chu la lova i awm dawn le?” tiin an au va.
6:11 Tin, an hnenah chuan puan var an pe theuh va; tin, an bawihpuite leh an unaute anmahni ang bawka thah turte chu an thah kim hma loh chuan an la nghak rih tur a ni tih an hrilh a.
6:12 Tin, chhinchhiahna parukna chu a han phelh lai ka en reng a, tin, lir nasa takin a lo nghing ta a; tin, ni chu sahmul saiip puan angin a lo dum a, thla pawh chu apumin thisen angin a lo awm ta a;
6:13 tin, vana arsite chu theipui kung thlipuiin a nuaia a helte a til ang maiin leiah a tla ta.
6:14 Tin, van chu lehkhabu zial mi ziala a bo angin a bo ta a; tin, tlang leh thliarkar tinreng chu an awmna ata sawnin an awm ta hlawm a.
6:15 Tin, leia lal te, mi lian te, sipai hotu ber te, mi hausa te, mi chak te,bawih leh bawih lo tinrengte chu pukah leh tlanga lungpuiah chuan an biru a:
6:16 tin, tlangte leh lungpuite hnenah chuan, “Min delh ula, lalthutphaha thua hmel lakah leh Beram No thinurna lakah min hliah rawh u;
6:17 an thinurna ni ropui tak chu a lo thlen tak hi; tichuan tunge ding thei ang i le?” an ti a.
7:1 Chu mi hnuah chuan khawmualah leh tuifinriatah leh thing reng rengah chuan thli reng a tleh loh nan, lei thli pali chu chelhin lei kil lia ding vantirhkoh pali ka hmu a.
7:2 Tin, vantirhkoh dang, Pathian nung chhinchhiahna kenga ni chhuahnaa chho ka hmu bawk a; tin, ani chuan vantirhkoh pali, khawmual leh tuifinriat tihchhiat theihna pekate hnenah chuan aw ring takin,
7:3 “Kan Pathian bawihte chu an chala kan chhinchhiah hma loh zawng khawmua leh,tuifinriat leh, thingte chu tichhe rih suh u,” tiin a au va.
7:4 Tin, an chhinchhiah zat chu ka lo hria a, Israela thlahte hnam tina mi 1,44,000 an chhinchhiah tawh a ni.
7:5 Juda hnama mi 12,000 Reubena hnama mi 12,000 Gada hnama mi 12,000
7:6 Asera hnama mi 12,000 Naphtalia hnama mi 12,000 Manasea hnama mi 12,000
7:7 Simeona hnama mi 12,000 Levia hnama mi 12,000 Isakara hnama mi 12,000
7:8 Zebuluna hnama mi 12,000 Josefa hnama mi 12,000 Benjamina hnama mi 12,000 an chhinchhiah tawh.
7:9 Chung hnuah chuan ka han en a, tin, ngai teh, mipui tam tak tuma chhiar sen loh, hnam tin zinga mi te, chi tin zinga mi te, mi tin zinga mi te, tawng tin zinga mi te puan var sina tumkau kengin, lalthutphah hmaah leh Beram No hmaa ding ka hmu a;
7:10 tin, chungte chuan aw ring takin, “Kan Pathian lalthutphaha thua hnenah leh, Beram No hnenah chhandamna,” tiin an au va.
7:11 Tin, vantirhkoh zawng zawngte chu lalthutphah leh upate leh Thilnung palite velah chuan dingin an awm a; lalthutphah hmaah chuan bawkkhupin,
7:12 “Amen:Malsawmna te, ropuina te, finna te, Lawmthu sawina te, chawimawina te, Thiltihtheihna te, chakna te, Chatuanin kan Pathian hnenah awm rawh se,” Amen. tiin Pathian chibai an buk a.
7:13 Tin, upa zinga pakhat chuan ka hnenah, “Heng puan var sinte hi tute nge ni a, khawi atanga lo kal nge an nih?” tiin mi bia a.
7:14 Tin, kei chuan a hnenah, “Ka pu, nangman i hria alawm,” ka ti a. Tin, anin ka hnenah, “Heng hi hrehawm nasa tak ata chhuakhote kha an ni a, an puante Beram No thisena suin an tivar ta a.
7:15 Chuvangin, Pathian thutphah hmaah an awm a ni; tin, achhun azanin a biak inah chuan a rawng an bawl thin; tin, lalthutphaha thua chuan an chungah a puan in chu a zar ang.
7:16 An riltam leh tawh lo vang a, an tuihal leh tawh hek lo vang; niin a em hek lo vang a, lum reng reng pawhin a tihrehawm hek lo vang.
7:17 Beram No, lalthutphah laia awm chu an vengtu a ni ang a, nunna tuikhurahte a hruai ang; Pathianin an mit ata mittui zawng zawng a hru fai tawh ang,” a ti a.
8:1 Tin, chhinchhiahna pasarihna chu a han phelh veleh, dar chanve lai van chu a reh thuap a.
8:2 Tin, Pathian hmaa vantirhkoh pasarih ding thinte chu ka hmu a; tin, an hnenah tawtawrawt pasarih an pe a.
8:3 Tin, vantirhkoh dang a lo kal a, rangkachak rimtui halna bawm kengin maicham kiangah chuan a ding ta a:tin, lalthutphah hmaa rangkachak maicham chunga mi thianghlim zawng zawng tawngtainate belhchhahna turin, englo rimtui tam tak a hnenah an pe a.
8:4 Tin, englo rimtui khu chu vantirhkoh kut ata Pathian hmaah a chho ta a, mi thianghlimho tawngtainate nen chuan.
8:5 Tin, vantirhkoh chuan englo rimtui halna bawm chu a la a, maichama meiin a tikhat a, leiah a paih thla ta a; tichuan khawpui ri te, aw te, kawlphe te, lirnghing te a lo awm ve ta nghal a.
8:6 Tin, vantirhkoh pasarih, tawtawrawt pasarih kengte chu ham turin an inbuatsaih ta a.
8:7 Tin, a hmasa ber chuan a han ham a; tichuan rial leh mei, thisen nena inpawlh a lo awm ta nghal a, chung chu leiah paih thlakin a awm ta; tichuan lei hmun thuma thena hmun khat chu a kangral ta a, thingte pawh hmun thuma thena hmun khat chu a kangral a, hlobet hring zawng zawngte pawh a kangral ta bawk a.
8:8 Tin, vantirhkoh pahnihna chuan a han ham a; tichuan tlang lian pui meia kang lai ang tuifinriatah an paih thla a; tichuan tuifinriat hmun thuma thena hmun khat chu thisenah a lo chang ta a;
8:9 tuifinriata thil siam, nun neite chu, hmun thuma thena hmunkhat chu an thi ta bawk a; lawngte pawh hmun thuma thena hmun khat chu tihchhiat a ni ta bawk a.
8:10 Tin, vantirhkoh pathumna chuan a han ham a; tichuan arsi lian pui meichher anga alh, van atangin a lo tla a, lui hmun thuma thena hmun khat leh tuikhurte chu a delh ta a;
8:11 chu arsi hming chu Sai a ni a; tui hmun thuma thena hmun khat chu saiah a lo chang ta; tichuan chu tui chu an in a, mi tam tak an thi a, a lo khak tak avangin.
8:12 Tin, vantirhkoh palina chuan a han ham a; tichuan ni hmun thuma thena hmun khat, thla pawh hmun thuma thena hmun khat, arsite pawh hmun thuma thena hmun khat chu tihchhiat a ni ta a; chungho hmun thuma thena hmun khat chu a thimna tur leh, chhun chu hmun thuma thena hmun khat a en lohna turin; zan pawh chutiang bawkin a ni.
8:13 Tin, ka han en a, mupui vanlaizawla thlawkin aw ring takin, “vantirhkoh pathum tawtawrawt la ham tur, chu mi ri lo la awm turte avang chuan leia awmhote chung a pik e, a pik e, a pik e!” a tih ka hria a.
9:1 Tin, vantirhkoh pangana chuan a han ham a; tichuan arsi van atanga leia tla sa, ka hmu a; tin, leilawt khuarkhurum chabi chu a hnenah an pe a.
9:2 Tin, ani chuan leilawt khuarkhurum chu a hawng a; tichuan khuarkhurum ata chu meikhu, rawh tuina mei nasa tak khu ang a chhuak chho va; tin, khuarkhuruma meikhu avang chuan ni leh boruak chu a lo thim ta a.
9:3 Tin, meikhu zing atang chuan khaute leiah a lo chhuak a. Tin, leia khawmualkaikuangten thiltihtheihna an nei ang hian, an hnenah thiltihtheihna an pe a.
9:4 Tin, an chala Pathian chhinchhiahna nei lo mihringte chauh lo chu, leia hlobet te, thil hring reng reng te, thing reng reng te pawh tihchhiat loh tur tih an hrilh a.
9:5 Tin, an hnenah chuan mihringte chu tihlum em lova, thla nga tihrehawm zawk turin thu an pe a; an tihhrehawmzia chu khawmualkaikuangin mi a seha a tihrehawm ang hi a ni.
9:6 Chung niah chuan miten thihna an zawng ang a, an hmu hauh si lo vang; thih an chak ang a, nimahsela thihna chuan a tlansan ang.
9:7 Tin, khaute pianzia chu sakawr indo na tura peih sa ang an ni; lallukhum ang mai rangkachak ang an khum a, an hmai pawh mihring hmai ang a ni.
9:8 Tin, hmeichhe sam ang hi sam an nei a, an hate pawh chu sakeibaknei ha ang a ni.
9:9 Tin, thir awmphaw ang hi awmphaw an nei a; tin, an thla zah ri chu indona tawlailir ri, sakawr tam tak indo tura tlan dur dur ri ang a ni.
9:10 Tin, khawmualkaikuang mei ang hianmei an nei a, sehna pawh; tin, anmeiah chuan a ni, thla nga chhunga an mihring tihnat theihna chu a awm ni.
9:11 Leilawt tirhkoh chu an chunga lalberah an nei a, Hebrai tawngin a hming chu Abaddona a ni a,Grik tawng erawh chuan a hming chu Apolluona (Tiboraltua) a ni.
9:12 Chungpikna hmasa ber chu a reh tawh a, ngai teh, tun hnuah Chungpikna pahnih a la awm leh ang.
9:13 Tin, vantirhkoh parukna chuan a han ham a; tichuan Pathian hmaa rangkachak maicham ki atangte chuan aw ka hria a,
9:14 chu aw chuan vantirhkoh parukna, tawtawrawt keng hnenah chuan, “Euphrates luipuia vantirhkoh pali phuarte kha phelh rawh,” a ti a.
9:15 Tichuan, chu mi darkar leh ni leh thla leh kum atan chuan, mihring hmun thuma thena hmun khat tihlum tura buatsaih tawh vantirhkoh palite chu an phelh ta a.
9:16 Tin, sipai sakawr chung chuangho chu an tam lam chu sing hlira hmun singhnih an ni tih an sawi ka hria.
9:17 Tin, inlarnaah chuan sakawr leh an chunga chuanghote chu hetiangin ka hmu a ni, mei leh huakintho leh kat ang hi awmphaw an nei a; tin, sakawr lute chu sakeibaknei lu ang hi a ni a, an ka atang chuan mei leh meikhu leh katte a chhuak a.
9:18 Chu mi hremna pathum chuanin mihring hmun thuma thena hmun khat an tihlum ta a – mei leh meikhu leh kat an ka atang chhuak khanin.
9:19 Sakawrte thiltihtheihna chu an kaah leh an meiah a ni a awm nian meite chu rul ang a ni si a, lute a nei bawk a; chu chuan a ni mi an tihnat thin ni.
9:20 Tin, mihring, chung hremnaa tihhlum bangte chuan ramhuaite leh rangkachak milem te, tangka milem te, dar milem te, lung milem te, thing milem te, engmah hmu thei hlei lo, hre thei hlei lo, kal thei hlei lote chu an biak tawh lohna turin an kuta thiltihte chu an sim chuang lo;
9:21 an tual thahte pawh, an dawi hmante pawh, an inngaihte pawh, an rukrukte pawh an sim chuang hek lo.
10:1 Tin, vantirhkoh chak tak dang pakhat chhuma inthuam, van atanga lo chhuk ka hmu a; a luah chuan chhimbal chu a zam a; a hmai chu ni ang a ni a, a kete chu mei ban ang a ni;
10:2 tin, a kutah chuan lehkhabu te tak te hawn sa a keng a; tin, a ke ding lamin tuifinriat a rap a, a vei lamin khawmual a rap a;
10:3 tin, sakeibaknei hahum angin aw ring takin a au ta a! tin, a au zawh chuan khawpui ri pasarihte chuan an aw an chhuah ta a.
10:4 Tin, khawpui ri pasarihte chuan an aw an chhuah veleh ka ziak dawn a; tichuan “Khawpui ri pasarihte thusawi chu zep tlat la, ziak suh,” tiin van atangin aw ka hre ta a.
10:5 Tin, vantirhkoh, tuifinriat leh khawmuala ding ka hmuha chuan a kut ding lam chu van lamah a phar a,
10:6 chatuana nung renga, van, a chunga thil awmte nen, lei, a chunga thil awmte nen, tuifinriat, a chhunga thil awmte nena siamtu chu chhalin, “Hun a awm tawh lo vang;
10:7 nimahsela, vantirhkoh pasarih thawm a awm hunah a ham dawn tepin, Pathian thuruk chu a kim tawh ang, a bawih zawlnei hnena a chanchin tha hrilh ang khan,” a ti a.
10:8 Tin, van ata aw ka hriat khan mi be leh a, “Tuifinriat leh khawmuala ding vantirhkoh kuta lehkhabu hawn sa saw va la rawh,” a tih ka hria a.
10:9 Tin, vantirhkoh hnenah chuan ka va kal a, a hnenah, “Lehkhabu te tak te kha mi pe rawh,” ka ti a. Tin, ani chuan ka hnenah, “La la ei zo vek rawh, tichuan i pum chu a tikha ang a, i kaah erawh chuan khawizu angin a thlum ang,” a ti a.
10:10 Tin, vantirhkoh kut ata lehkhabu te tak te chu ka la a, ka ei zo vek a; tichuan, ka kaah chuan khawizu angin a thlum a; nimahsela ka ei zawh veleh ka pum chu a kha zo ta a.
10:11 Tin, ka hnenah, “Mi tam tak te, hnam tam tak te, tawng tam tak te, lal tam tak te chungchang thu I hril leh ang,” an ti a.
11:1 Tin, luang, tiang ang hi mi a pe a, tichuan tuin emaw, “Tho la, Pathian biak in, maicham nen a chhunga betute nen teh rawh.
11:2 Biak in pawn lama hung chhung kawtlai erawh chu teh tel suh, chu chu Jentailte hnena pek a ni tawh si a; anni chuan Khaw Thianghlim chu thla sawmli leh thla hnih an rapbet ang:
11:3 Tin, ka thu hretu pahnihte hnenah chuan thu ka pe ang a, tichuan saiip puan sinin ni 1,260 chhung zawng thu an hril ang,” a ti a.
11:4 Chung chu oliv thing pahnih leh khawnvar dahna pahnih khawvel Lal hmaa dingte chu an ni.
11:5 Tin, anni chu tupawhin tihnat an tum chuan anka atangin mei a lo chhuak a, an hmelmate chu a kangral thin. Tin, tupawhin anni chu tihnat tum ang sela, chutiang bawka tihhlumin an awm tur a ni.
11:6 Chungte chuan an thu hrilh chhung zawng ruah sur lo tura van tihpin theihna an nei; an duh hun apianga thisena chantir turin tuite chungah thu a nei a,khawvel hi hremna tinrenga hrem turin thu an nei bawk a.
11:7 Tin, an hriattirna thu chu an hrilh zawh huna leilawt atanga sakawlh lo chhuak chho tur chuan anmahni a do vang a, a hneh ang a, a tihlum ang.
11:8 Tin, an ruang chu khaw ropui kawtthlerah chuan a awm reng ang a; chu khaw ropui chu thlarau lam thu-ah chuan Sodom leh Aigupta an ti a ni, chutah bawk chuan an Lalpa chu khenbehin a awm kha.
11:9 Tin, mite zinga mi te, chite zinga mi te, tawngte zinga mi te, hnamte zinga miten ni thum leh a chanve an ruangte chu an en ang a, an ruangte chu thlana phum an phal lo vang.
11:10 Tin, an thih avangin leia awmte chu an lawm ang a, hlimna an siam ang a, lawmnate an inthawn bawk ang; zawlnei pahnihte chuan leia awmte chu an tihhrehawm thin avangin.
11:11 Tin, ni thum leh a chanve hnuah chuan Pathian hnen ata nunna thaw chu an chhungah a lo lut a, an kein an ding ta a; tichuan a hmutute chuan an hlau ta em em a.
11:12 Tin, an hnenah, “Hetah hian lo chho rawh u,” tia van atanga aw ring tak an hria a. Tichuan, chhum zingah chuan vanah an chho ta a; an hmelmate chuan an hmu reng a.
11:13 Tin, chu mi lai tak chuan lir nasa takin a lo nghing a, khua chu hmun sawma thena hmun khat a chim ta a, lirnghingah chuan mi 7,000 an thi a; tin, a bakte chuan an hlau va, van Pathian chu an chawimawi ta a.
11:14 Chungpikna pahnihna chu a reh tawh a, ngai teh, Chungpikna pathumna chu a lo awm lawk dawn e.
11:15 Tin, vantirhkoh pasarihna chuan a han ham a, tichuan, “Khawvel ram chu kan Lalpa leh a Krista ram a lo ni ta, ani chuan chatuanin ro a rel ang,” tiin,vanah chuan aw ring takte a lo chhuak ta nghal a.
11:16 Tichuan, Pathian hmaa an lalthutphaha upa sawmhnih leh pali thute chu an bawkkhup a,
11:17 “Aw Lalpa Pathian, Engkimtithei, awm mek leh awm tawh, i thiltihtheihna ropui tak chu laa ro i rel avangin lawmthu kan hrilh a che.
11:18 Hnamte chu an thinur a, tin, i thinur chu a lo thleng ve thung a, mitthi ro relsak hun leh i bawih zawlneite hnenah te an lawmman pek hun leh lei tichhetute tihchhiat ve thung hun chu a lo thleng bawk a,” tiin Pathian chibai an buk a.
11:19 Tin, vana Pathian biak in chu an hawng a, tichuan a biak inah chuan a thuthlunna bawm chu a lo lang ta a; tin, kawlphe te, aw te, khawpui ri te, lirnghing te, rial nasa tak te a lo awm ta nghal a.
12:1 Tin, thilmak ropui tak vanah a lo lang ta a; hmeichhia nia inthum, a ke hnuaia thla awm, arsi sawm leh pahniha siam lallukhum khum a lo awm a;
12:2 ani chuan nau a pai a; nau vei nain a sahram a.
12:3 Tin, thilmak dang vanah a lo lang leh a; ngai teh, drakon sen lian pui, lu sarih leh ki sawm nei, lallukhum pasarih khum a lo awm a.
12:4 A mei chuan van arsi hmun thuma thena hmun khat chu a hnuk a, leiah a paih thla ta a; tin, a hrin huna a nau chu a lem theih nan drakon chu hmeichhe nau hring tur hmaah chuan a ding reng a.
12:5 Tin, fapa, hnam zawng zawng chunga thir tianga rorel tur a hring a; tin, a fa chu Pathian hnenah leh a lalthutphahah chuan lak chhohvin a awm ta a.
12:6 Tin, hmeichhia chu thlalera Pathian buatsaih hmun a neihnaah chuan a tlan bo va, chutah chuan ni 1,260 an chawm theihna turin.
12:7 Tin, vanah chuan indona a lo awm a; Mikaela leh a vantirhkohte chuan drakon chu an do va; drakon leh a tirhkohte pawh chuan an do ve a;
12:8 nimahsela, an hneh ta lo va, an hmun chu vanah a awm ta bawk hek lo.
12:9 Tin, drakon lian pui, rulpui tar Diabola leh Setana an tih, khawvel zawng zawng bumtu chu an paih thla ta a; leiah an paih a, a tirhkohte pawh an paih thla tel ve a.
12:10 Tin, vanah chuan aw ring takin, “Tunah chuan kan Pathian chhandamna leh thiltihtheihna leh ram chu a lo thleng ta,a Krista thuneihna nen;kan unaute hektu, kan Pathian hmaa achhun azana hek thintu chu an paih thla ta si a.
12:11 Nimahsela, Beram No thisen avang leh an hriattirna thu avangin ani chu an hneh a ni, thih ngam khawpin an nunna an ngainep bawk a.
12:12 Chuvangin, aw, vante leh a chhunga awmte u, lawm rawh u! Lei leh tuifinriat chung a pik e! Diabola chuan hun tlem te chauh a nei tih a inhriat avanga thinur em ema in hnena a lo chhuk tak avangin,” a tih ka hria.
12:13 Tin, drakon chuan leia paih thlak a ni tih a inhriat veleh fapa hringtu hmeichhia chu a tiduhdah ta a.
12:14 Tichuan, thlalera a hmunah chuan a thlawh luh theih nan hmeichhia chu mupui lian tak thla khing hnih an pe a, chutah chuan rulpui hmuh phak lohvah hun khat leh a chanve chhung zawng an chawm ang.
12:15 Tin, rulpui chuan tuiin a len botir theih nan hmeichhe hnungah chuan lui ang mai hian a ka ata tui a pik chhuak a.
12:16 Nimahsela, leiin hmeichhia chu a tanpui a, lei chuan a ka a ang a, drakon-in a ka ata a pik chhuah lui chu a lem zo ta a.
12:17 Tichuan, drakon chu hmeichhe chungah chuan a lo thinur a, a thlah la awm Pathian thupekte zawma Isua hriattirna thu pawmte chu do turin a kal ta a.
13:1 Tichuan, tuifinriat tiauphovah chuan a ding ta a. Tin, Sakawlh ki sawm leh lu sarih nei tuifinriata lo chhuak ka hmu a, a kiahte chuan lallukhum sawm a awm a, a luahte chuan Pathian sawichhiatna hmingte a awm bawk a.
13:2 Tin, ka Sakawlh hmuh chu keite ang a ni a; a kete chu savawm ke ang a ni a, a ka chu sakeibaknei ka ang a ni; tin,drakon chuan a hnenah a thiltihtheihna leh a lalthutphah leh thuneihna nasa tak a pe a.
13:3 Tin, a lu pakhat chu thihpui khawp hiala hliam angin ka hmu a; nimahsela a thihpui khawp hial tura hliam chu a dam ta a, tichuan leia mi zawng zawngin Sakawlh chu mak an ti a, an zui a.
13:4 Tin, Sakawlh hnenah chuan a thuneihna chu a pek avangin drakon chu Pathian chibai bukin an buk a; tin, “Sakawlh ang hi tunge awm a, tunge do thei awm?” tiin sakawlh pawh chu an buk bawk a.
13:5 Tin, uanna leh Pathian sawichhiatna thusawina ka a hnenah pek a ni a, thla 42 che turin thu pek a ni bawk a.
13:6 Tichuan, Pathian sawichhiain a ka a ang ta a, a hming leh a awmna vana awmhote chu sawichhe turin.
13:7 Tin, mi thianghlimte a do leh a hneh phal a ni a, chi tinreng te, mi tinreng te, tawng tinreng te, hnam tinreng te chunga thuneihna a hnenah pek a ni bawk a.
13:8 Tichuan, leia awm zawng zawng, leilung pian tirha talh tawh Beram No Nunna Bua hming ziak loh apiang chuan Pathian chibai bukin an buk ang.
13:9 Tupawhin beng an neih chuan hre rawh se.
13:10 Tupawh sala awm tur chu salah an awm ang, tupawh khandaiha thi tur chu khandaiha tihhlum a ni ang. Hetah hian mi thianghlimte chu chhel tak leh rinawm taka an awm a tulzia a lang.
13:11 Tin, Sakawlh dang laia lo chhuak ka hmu a; beram no ki ang ki pahnih a nei a,drakon tawng angin a tawng a.
13:12 Sakawlh hmasa zawk thuneihna zawng zawng kha a mithmuhah a hmang a. Lei leh a chunga awm zawng zawngte chu Sakawlh hmasa zawk, thihpui khawp hial tura hliam dam leha chu chibai a buktir bawk a.
13:13 Tin, mihring mithmuhah van atanga leia mei tlaktir thei khawp hialin thilmak ropui tak a ti thin. 14Leia awmte hnenah Sakawlh, khandaiha hliam hnu la dama chawimawi nan amah lem an siam tur a ni tih sawiin, Sakawlh mithmuha thilmak ti tura thu a hmuh, chung thilmak avang chuan leia awmte chu a bum bawk a.
13:15 Tin, Sakawlh lem chu a tawng theihna tur leh Sakawlh lem chibai buk lo apiang a tihhlumtir theih bawkna turin Sakawlh lem hnenah chuan thawkna pek phal a ni.
13:16 Tin, mi zawng zawng alian atein, ahausa aretheiin bawih leh bawih lo pawh, an kut ding lamah emaw an chalah emaw chhinchhiahna a neihtir hlawm a;
13:17 chhinchhiahna – Sakawlh hming emaw a hming nambar emaw – neite chauh lo chuan tuman engmah an lei leh an hralh theih loh nan.
13:18 Hetah hian fin a tulzia a lang. Chhut thiam chuan Sakawlh nambar chu chhut rawh se; mihring nambar a ni si a; a zat chu 666 a ni.
14:1 Tin, ka han en a, tin ngai teh, Beram No Zion Tlanga ding leh an chala a hming leh a Pa hming ziak, mi 1,44,000 a hnenah ka hmu a.
14:2 Tin,van atanga englo ri,tui tam tak ri ang leh khawpui ri nasa tak ri ang ka hria a; tin, ka ri hriat chu tingtang kaituten an tingtang kaih ri ang a ni a;
14:3 lalthutphah hmaah leh Thilnung pali leh upate hmaah chuan hla thar ni awm tak hi an sa a; tin, lei ata tlan tawh mi 1,44,000 te chauh lo kha chuan tuman chu hla chu an zir thei lo.
14:4 Chung chu hmeichhe laka intibawlhhlawh lote chu an ni; nula thianghlim ang an ni si a. Chung chu Beram No a kalna apianga zuitute chu an ni. Chung chu Pathian tan leh Beram No tan rah hmasa ber ni turin mihring zing ata tlan an ni.
14:5 An kaah dawt a chhuah reng miin an hre ngai lo; sawiselbo an ni si a.
14:6 Tin, leia awmte hnenah leh hnam tinreng te, chi tinreng te, tawng tinreng te, mi tinreng te hnena tlangaupui tura chatuana Chanchin Tha nei vantirhkoh dang vanlaizawla thlawk ka hmu a;
14:7 tin, ani chuan aw ring takin, “A rorel hun chu a lo thlen tak avangin Pathian chu hlau ula, chawimawi rawh u; van te, lei te, tuifinriat te, tuihna te siamtu chu chibai buk rawh u,” a ti a.
14:8 Tin, vantirhkoh dang a pahnihna chuan, “Babulon khaw ropui, a mi ngaih chin vanga thinurna uain hnam zawng zawng intirtu chu a tlawm ta, a tlawm ta,” tiin a rawn zui a.
14:9 Tin, vantirhkoh dang a pathumna chuan aw ring takin, “Tupawhin Sakawlh leh a lem chibai bukin an chalah emaw an kutah emaw chhinchhiahna an neih chuan,
14:10 chu mite ngei chuan Pathian thinurna uain, a thinurna nova engmah pawlh lova siam chu an in ang a, vantirhkoh thianghlimte mithmuh leh Beram No mithmuhah chuan mei leh kata nghaisakin an awm bawk ang.
14:11 Tin, chung mite nghaisakna meikhu chu chatuanin a chho vang a; sakawlh leh a lem chibai buktute, a hming chhinchhiahna nei apiangte pawh chuan achhun azanin chawlh reng an nei lo vang,” tiin anni chu a rawn zui a.
14:12 Mi thianghlim, Pathian thupek awihtute leh Isua zuitu rinawmte tan hetah hian chhel a tulzia a lang.
14:13 Tin, van atangin awin, “Heti hian ziak rawh:Tun hnuah chuan mitthi, Lalpaa thite chu an eng a thawl ang; Thlarauvin, a ni, an thawhrimnate chu an chawlhsan tawh ang:an thiltihte chuan a rawn zui ve dawn si a, a ti e,” a tih ka hria.
14:14 Tin, ka han en a, tin, ngai teh, chhum var ka hmu a; tin, chhum chungah chuan mihring fapa ang tak hi rangkachak lallukhum khuma favah hriam tak kenga thu ka hmu bawk a.
14:15 Tin, vantirhkoh dang, Pathian biak in atangin a lo chhuak a, chhum chunga thu hnenah chuan aw ring takin, “I favah kha phawrh la, at rawh; ah a hun tawh si a; lei buh khu a ngui tawh khu,” a ti a.
14:16 Tichuan, chhum chunga thu chuan a favah chu leiah a thlak a, lei buh chu an at ta a.
14:17 Tin, vantirhkoh dang vana Pathian biak in atangin a lo chhuak leh a,ani pawh chuan favah hriam tak a keng bawk a.
14:18 Tin, vantirhkoh dang, mei chunga thuneitu chu maicham atangin a lo chhuak leh a; tin, ani chuan aw ring takin, “I favah hriam tak kha phawrh la, leia grep hrui rah bawrte khu zuk at rawh; grep rahte khu a hmin tuah tawh khu,” tiin favah hriam tak kengtu chu a au va.
14:19 Tichuan, vantirhkoh chuan a favah chu leiah a thlak a, leia grep rah chu a at a, grep sawrna khur zau tak, Pathian thinurna grep sawrna khurah chuan a theh lut a.
14:20 Tin, khaw pawn lama grep sawrna khurah chuan an rap sawr a, tichuan, grep sawrna khur atang chuan thisen a lo chhuak a, fing 1,600 chen, nghawng thlenga thuk a ni.
15:1 Tin, vanah chhinchhiahna dang, ropui tak leh mak tak ka hmu a, vantirhkoh pasarih hremna pasarih kengte chu; chu chu hremna hnuhnung berte a ni, chungah chuan Pathian thinurna chu a kin tawh si a.
15:2 Tin, darthlalang, mei nena inpawlh tuifinriat ni awm tak ka hmu a; sakawlh te, a lem te, a hming nambar te hneha lo chhuakte chu Pathian tingtang kenga, darthlalang tuifinriat kama ding ka hmu bawk a.
15:3 Tin, Pathian bawih Mosia hla leh Beram No hla,“Aw Lalpa Pathian, Engkimtithei,I thiltihte chu a ropuiin a mak a; Nang, hnam tin Lalber,I kawngte chu a felin a dik a ni.
15:4 Aw Lalpa, tunge i hming zah lo vang a, Chawimawi lo vang? Nang chauh i thianghlim si; I thiltih felte chu tihlan a nih tawh avangin, Hnam tinrengin chibai an rawn buk ang che,” tih hi an sa a.
15:5 Chung hnuah chuan ka han en a, tin, vana hriattirna biak buk pindan chhungnung chu an hawng a,
15:6 tichuan, pindan chhungnung atang chuan hremna pasarih keng vantirhkoh pasarihte chu, puan thianghlim var tak sinin, an awma rangkachak kawnghrena inhrengin an lo chhuak a.
15:7 Tin, Thilnung pali zinga pakhat chuan, vantirhkoh pasarihte hnenah chuan, Pathian chatuana nung renga thinurnaa khat rangkachak berhbu pasarih a pe a.
15:8 Tin, pindan chhungnung chu Pathian ropuina leh a thiltihtheihna khuin a khat ta a; vantirhkoh pasarihte hremna pasarih chu a reh hma loh zawng, pindan chhungnungah chuan tumah an lut thei lo.
16:1 Tin, pindan chhungnung atang chuan aw ring takin, vantirhkoh pasarihte hnenah chuan, “Kal ula, Pathian thinurna berhbute chu leiah leih baw rawh u,” a tih ka hria a.
16:2 Tin, a hmasa ber chu a kal a, a berhbu chu leiah a leih bua a; tichuan, Sakawlh chhinchhiahna neite leh a lem chibai bukte chungah chuan, pan chhe na takah a chang ta a.
16:3 Tin, a pahnihna chuan a berhbu chu tuifinriatah a leih bua a; tichuan, mitthi thisen angin thisenah a chang ta a; chutichuan thil nung tinreng tuifinriata awmte chu an thi ta vek a.
16:4 Tin, a pathumna chuan a berhbu chu luiahte leh tuikhurahte a leih bua a; tichuan, thisenah a chang ta a.
16:5 Tin, tui vantirhkoh chuan, “Nang Mi Thianghlim, hetianga ro i rel avang hian, nang awm mek leh awm tawh, i fel e.
16:6 Anni chuan mi thianghlimte leh zawlneite thisen an chhuah a, tin, nangin in tura thisen vek i pek thung hi; in tlak an ni reng e,” a tih ka hria.
16:7 Tin, maicham chuan, “A ni, aw Lalpa Pathian, Engkimtithei, i rorelte chu a dikin a fel a ni,” a tih ka hria.
16:8 Tin, a palina chuan a berhbu chu niah a leih bua a; tichuan, ni chu meia mihring em ut turin thiltihtheihna an pe a.
16:9 Chutichuan, mite chu sa tak em uhin an awm a, chung hremna chunga thuneitu Pathian hming chu an sawichhia a, amah chawimawi turin an sim chuang lo.
16:10 Tin, a pangana chuan a berhbu chu sakawlh lalthutphahah a leih bua a; tichuan, a ram chu a lo thim ta vek a; tin, an nat avangin an lei an seh a,
16:11 an nate leh an pante avangin van Pathian chu an sawichhia a; an thiltihte chu an sim chuang lo.
16:12 Tin, a parukna chuan a berhbu chu tuipui, Euphrates-ah chuan a leih bua a;tichuan, ni chhuahna lam atanga lal lo kal turte tana kawng chu peih sa a lo nih theih nan, a tui chu a kangchat ta a.
16:13 Tin, drakon ka atang leh sakawlh ka atang leh zawlnei der ka atang chuan, thlarau bawlhhlawh pathum, chungu ni awm tak lo chhuak ka hmu a;
16:14 chung chu ramhuai thlarau, thilmak ti thinte an ni; anni chu Pathian Engkimtitheia ni ropuia indonaa hruai khawm turin, khawvel zawng zawnga lalte hnenah an kal a,
16:15 (Ngai teh, rukru angin ka lo kal dawn e; inringa puan veng chu a eng a thawl e, chutilochuan saruakin a leng ang a, a zahmawh an hmu dah ang e;)
16:16 hmun pakhat Hebrai tawnga Har-Magedon an tihah chuan an hruai khawm ta a.
16:17 Tin, a pasarihna chuan a berhbu chu boruakah a leih bua a; tichuan, pindan chhungnung atangin Lalthutphah ata,“A kin ta,”tiin aw ring tak a lo chhuak a.
16:18 Tin, kawlphe te, aw te, khawpui ri te a lo awm ta a; lir pawh nasa takin a lo nghing a, leia mihring awm achin chutianga nasa reng reng a la awm ngai lo, lirnghing chuti kauva nasa leh ropui chu.
16:19 Tichuan, khaw ropui chu hmun thumah a lo inthen a, hnam tin khuate chu a lo chim a; tin, a thinur nasatna uain no chu a hnena pek turin, Babulon khaw ropui chu Pathian hmaah hriat rengin a lo awm ta a.
16:20 Tin, thliarkar tinreng a bo ta vek a, tlangte pawh a awm ta lo va.
16:21 Tin, rial lian tak talent tluk laia rit theuh, van atangin mihringte chungah a tla a:tin, mihringte chuan riala hremna avang chuan Pathian an sawichhe ta a; chu hremna chu a nasa em em si a.
17:1 Tin, vantirhkoh pasarih, berhbu pasarih kengte zinga pakhat chuan mi bia a, “Hawh teh, tui tam taka thu nawhchizuar ropui tak hremna chu ka entir ang che;
17:2 leia lalte chuan ani chu an ngai thin a, leia awmte pawh chu a mi ngaih chinna uain chuan hrai ruihin an awm thin,” a ti a.
17:3 Chutichuan, ani chuan Thlarauvin thlalerah mi kalpui a; tin, Pathian sawichhiatna hminga khat, lu sarih leh ki sawm nei, sakawlh sen tak chunga chuang hmeichhia ka hmu a.
17:4 Chu hmeichhia chuan puan senduk leh sen lar a sin a, rangkachak leh lung man tam leh tuikeplungin a inchei a, rangkachak no, thil tenawm, a mi ngaih chinna thil bawlhhlawha khat a keng a,
17:5 a chalah chuan thuruk, “Babulon Khaw Ropui, Leia Nawhchizuarte leh Thil Tenawmte Nu,” tia hming ziak a awm a.
17:6 Tin, chu hmeichhia chu mi thianghlimte thisen leh Isua martarho thisena rui ka hmu a. Ka hmuh veleh mak ka ti em em mai a.
17:7 Tichuan, vantirhkoh chuan ka hnenah,“Eng vangin nge mak i tih kha? Hmeichhia leh a phurtu sakawlh, lu sarih leh ki sawm nei thuruk chu ka hrilh ang che.
17:8 Sakawlh i hmuh kha a awm tawh zet a, a awm leh ta lo va; tin, leilawt atangin a lo chhuak chho vang a, boralnaah a kal ang. Tin, leia awmte, leilung pian tirh ata Nunna Bua hming ziak lohte chuan, sakawlh chu an hmuh hunah a awm tawh zet a, a awm leh ta lo va, a lo kal leh dawn chu mak an la ti ang.
17:9 Hetah hian fin thiam a tulzia a lang. Lu sarihte chu hmeichhe thutna tlang sarihte chu an ni.
17:10 Lal pasarih pawh an ni a; pangate chu an tlawm ta a, pakhat chu a la awm a, pakhat chu a lo la awm rih lo va;a lo awm hunah chuan rei lo te a awm tur a ni.
17:11 Tin, sakawlh awm tawh zet a, awm leh ta lova ngei pawh kha a pariatna a ni a, pasarihte zinga mi kha a ni nghe nghe a, boralnaah a la kal ang.
17:12 Tin, ki sawm i hmuhte kha lal sawm, ram la nei lote an ni a; darkar khat chhung erawh chu sakawlh nen lal thuneihna an la chang ang.
17:13 Chung chuan thu khat vuain an thiltihtheihna leh thuneihna chu sakawlh an pe ang.
17:14 Chung chuan Beram No chu an do vang a, tin, Beram No chu hotute Hotu leh lalte Lal a nih avangin anni chu a hneh ang a; tin, a hnena awm, kohva te, thlana te, rinawma te chuan an hneh bawk ang,” a ti a.
17:15 Tin, amah vek chuan ka hnenah, “Nawhchizuar thutna tui i hmuhte kha, mi te, mipui te, hnam te, tawng te a ni a.
17:16 Ki sawm i hmuh leh sakawlh ngei chuan nawhchizuar chu an hua ang a, engmah nei lo leh saruakin an siam ang a,a sa pawh an ei ang a, meiin an halral ang.
17:17 Pathian thute chu a thlen hma loh chuan a duhzawng an tihna tur leh, thu khat an lo vuakna tur leh, an ram chu sakawlh hnenah an pekna turin Pathianin an thinlungah a tir si a.
17:18 Tin, i hmeichhe hmuh kha khaw ropui, leia lalte chunga roreltu chu a ni,” a ti a.
18:1 Chung hnuah chuan vantirhkoh dang, thuneihna nasa tak neiin van ata lo chhuk ka hmu a; a ropuinain lei chu a en ta vek a.
18:2 Tin, ani chuan aw ring takin, “Babulon khaw ropui chu a tlawm ta, a tlawm ta,ramhuaite awmna leh thlarau bawlhhlawh tinreng kulhbing leh sava bawlhhlawh leh tenawm tinreng kulhbing a lo ni ta.
18:3 A mi ngaih chin vanga thinurna uain chu hnam zawng zawngin an in tawh si a; leia lalte chuan ani chu an ngai thin a, leia sumdawngtute chuan a nawmsak bawl lutukna chu an hausak phah thin,” tiin a au va.
18:4 Tin, van atangin aw dangin heti hian a sawi ka hria :“Ka mite u, a sualnaahte in tel lohna tur leh, a hremnate in hmuh ve lohna turin, a chhung ata chhuak rawh u.
18:5 A sualnate chuan van pawh a tawng ta hial a, Pathianin a thiltih fel lote pawh chu a hre reng si a.
18:6 Anin a pek ang ngei khan pe thung ula, a thiltihzia ang zel chu a leh hnihin thungrul ula, a chawhpawlhna novah chuan a tan aleh hnihin chawhpawlhsak rawh u.
18:7 A intihropui leh a intihnawmsakzia ang zel khan nghaisain tilungngai thung rawh u; a rilru chuan, ‘Lalnuah ka thu a ni, hmeithai reng ka ni lo va, lungngaihna ka hmu hauh lo vang,’ a ti si a.
18:8 Chuvangin, ni khat chauhvah a hremna – thih te, lungngaih te, tam te chu – a lo thleng vek ang; meia halralin a awm bawk ang; a roreltu, Lalpa Pathian chu a chak si a.
18:9 ,10 “Tin, leia lal, a ngai thintute leh a nawmsak bawlpui thintute chuan a kang khu chu an thlir hunah chuan, ‘Babulon khaw ropui, khaw nghet chu a chung a pik e, a pik e! Darkar khat chauhvah i chungah rorelna chu a lo thleng ta si,’ tiin nghaisakna a tuar chu hlauh vanga hla taka ding a, a chunga tapin an awm an inchum ang.
18:10 ,9 “Tin, leia lal, a ngai thintute leh a nawmsak bawlpui thintute chuan a kang khu chu an thlir hunah chuan, ‘Babulon khaw ropui, khaw nghet chu a chung a pik e, a pik e! Darkar khat chauhvah i chungah rorelna chu a lo thleng ta si,’ tiin nghaisakna a tuar chu hlauh vanga hla taka ding a, a chunga tapin an awm an inchum ang.
18:11 “Tin, leia sumdawngtute chu a chunga tapin an lungngai a, tuman an sum an lei tak loh avangin.
18:12 An sumte chu rangkachak te, tangka te, lung man tam te, tuikeplung te, puan zai sin te, puan sen duk te, maimaw puan te, puan sen lar te nen; thing rimtui tinreng te, saingho bungbel tinreng te, thing hlu tak tak leh dar leh thir leh sailungvara siam bungbel tinreng te nen;
18:13 thakthing te, englo rimtui te, englo rimtui hal mi te, hriak rimtui te, beraw te, uain te, oliv hriak te, chhangphut dip tak te, buh te, sebawng te, beram te nen; sakawr te, tawlailir te, bawih te nen; mihring nunna te nen a ni.
18:14 Rah i thinlungin a chakte chuan a kal bosan chia, thil tuihnai leh mawi zawng zawng chuan a boralsan chia, tuman an hmu leh tawh tawp lo vang.
18:15 15-17 “Chung thila sumdawngtu, amah avanga lo hausate chuan, ‘Khaw ropui, puan zai sin leh puan sen duk leh puan sen lar sina, rangkachak leh lung man tam leh tuikeplunga incheii chu a chung a pik e, a pik e! Darkar chanve chauhvah sum chuti zozai chu engmah lo a lo nih tak hi,’ tiin tap leh lungngai chungin a nghaisakna hlauh vangin hla takah an ding ang. “Tin, lawng hotu apiang te, lawnga kal thin apiang te chu hla taka dingin,
18:16 15-17 “Chung thila sumdawngtu, amah avanga lo hausate chuan, ‘Khaw ropui, puan zai sin leh puan sen duk leh puan sen lar sina, rangkachak leh lung man tam leh tuikeplunga incheii chu a chung a pik e, a pik e! Darkar chanve chauhvah sum chuti zozai chu engmah lo a lo nih tak hi,’ tiin tap leh lungngai chungin a nghaisakna hlauh vangin hla takah an ding ang. “Tin, lawng hotu apiang te, lawnga kal thin apiang te chu hla taka dingin,
18:17 15-17 “Chung thila sumdawngtu, amah avanga lo hausate chuan, ‘Khaw ropui, puan zai sin leh puan sen duk leh puan sen lar sina, rangkachak leh lung man tam leh tuikeplunga incheii chu a chung a pik e, a pik e! Darkar chanve chauhvah sum chuti zozai chu engmah lo a lo nih tak hi,’ tiin tap leh lungngai chungin a nghaisakna hlauh vangin hla takah an ding ang. “Tin, lawng hotu apiang te, lawnga kal thin apiang te chu hla taka dingin,
18:18 a kang khu chu thlir chungin, ‘He khaw ropui tluk hi khawii khua nge awm ang?’ tiin an au va.
18:19 Tin, tap leh lungngai chungin, ‘A muk avanga tuifinriata lawng neitute hausakna khaw ropui chu a chung a pik e, a pik e! Darkar khat chauhvah engmah lo a lo nih tak hi!’ tia auvin, an lu vaivutin an theh a.
18:20 “Aw, van leh nangni mi thianghlimhote, tirhkohhote, zawlneihote u lawm rawh u, ani chuan in chunga ro a relna chuan Pathianin a chungah ro a rel ve tak hi,” tiin.
18:21 Tin, vantirhkoh chak tak hian buh rawt sawmna lung lian pui ang hi lung a la a, tuifinriatah a paih thla a, “Babulon khaw ropui chu hetianga nasa hian paih thlak a ni ang a, tuman an hmu leh tawh tawp lo vang.
18:22 Tingtang kaituho te, englo tum thiamho te, phenglawng tumtuho te, tawtawrawt puho te thawm pawh i chhungah an hre leh tawh tawp lo vang a; them thiam kawng reng rengah themthiam reng pawh i chhungah an hmu leh tawh tawp lo vang a;
18:23 khawnvar pawh i chhungah a eng tawh tawp lo vang a; pasal leh mo thawm pawh i chhungah an hre tawh tawp lo vang; i sumdawngtute chu leia mi liante an ni si a; i dawtin hnam zawng zawng bum an nih kha.
18:24 A chhungah zawlneihote, mi thianghlimhote, leia thah zawng zawngte thisen chu an hmu a,” a ti a.
19:1 Chung hnuah chuan vanah mipui tam takte aw ring tak ni awm tak hian,“Halleluia,chhandamna te,ropuina te.thiltihtheihna te kan Pathian ta a ni;
19:2 a rorelnate chu a dikin a fel a ni; ani chuan nawhchizuar ropui tak, a mi ngaih chin vanga lei tikhawlotu chu ro a rel a, a bawihte thisen chhuak phuba chu a kuta a lak tak hi,” a tih ka hria a.
19:3 Tin, “Halleluia,” an ti leh a. Tin, a khu chu chatuanin a chho vang.
19:4 Tin, upa sawmhnih leh pali leh Thilnung palite chu an bawkkhup a, “Amen; Halleluia,” tiin, Pathian, lalthutphaha thu chu chibai an buk a.
19:5 Tin, lalthutphah atangin aw a lo chhuak a, “Nangni a bawih zawng zawng, a zahtu mi lian leh mi tete u, kan Pathian chu fak rawh u,” a ti a.
19:6 Tin, mipui tam tak aw ang leh, tui tam tak ri ang leh, khawpui nasa tak ri angin, “Halleluia, Lalpa kan Pathian Engkimtitheia chuan ro a rel tak hi.
19:7 Hlim takin lawm ila, amah i chawimawi ang u, Beram No nupui neih chu a hun ta si a, a nupui pawh a inpeih tawh,” a tih ka hria.
19:8 Puan zai sin fai tak var tak sin an phal a, puan zai sin chu mi thianghlimte thiltih fel a ni si a.
19:9 Tin, “ ‘Beram No nupui neihna ruaitheha sawmte chu an eng a thawl e,’ tiin ziak rawh,” mi ti a. Tin, ka hnenah,“Heng thu hi Pathian thu tak a ni,”a ti a.
19:10 Tichuan, Pathian chibai buka buk turin a ke bulah ka bawkkhup a. Tin, ani chuan ka hnenah, “Heti chuan ti suh khai; kei chu nangmah leh i unau, Isua hriattirna thu pawmte bawihpui ka ni alawm; Pathian chibai buk zawk rawh; Isua hriattirna thu chu thu hrilhna thlarau a ni si a,” a ti a.
19:11 Tin, van inhawng ka hmu a; tin, ngai teh, sakawr var leh a chunga chuang, Rinawma leh Diktaka an tih chu ka hmu bawk a; ani chuan fel takin ro a rel a, mi a do thin.
19:12 A mitte chu meialh ang a ni a, lallukhum tam tak a khum a, tin, hming ziak, amah chauh lo chuan tumahin an hriat loh a nei a.
19:13 Puan thisen kai a sin a; a hmingah chuan “Pathian Thua” an ti a.
19:14 Tin, vana sipaihote chuan puan zai sin var tak fai tak sinin, sakawr var chungahte chuangin an zui a.
19:15 Tin, a ka atangin khandaih hriam tak a chhuak a, chu chu hnam tin a sahna tur a ni; tin, thir tiangin an ro a rel ang a; Pathian Engkimtitheia thinur nasatna grep sawrna khurah chuan a rap sawr ang.
19:16 Tin, a puanah leh a malpuiah chuan “Lalte Lal leh Hotute Hotu,” tia hming ziak a awm a.
19:17 ,18 Tin, niah khian vantirhkoh ding ka hmu a; tin, ani chuan vanlaizawla sava thlawk zawng zawng hnenah chuan aw ring takin, “Lal sa te, sipai hotu sa te, mi chak sa te, sakawr leh a chunga chuang sa te, mi zawng zawng – bawih leh bawih lo, alian ate pawh – an sa in ei theihna turin, Pathian ruai ropui tak thehnaah chuan rawn inkhawm rawh u,” tiin a au va.
19:18 ,17 Tin, niah khian vantirhkoh ding ka hmu a; tin, ani chuan vanlaizawla sava thlawk zawng zawng hnenah chuan aw ring takin, “Lal sa te, sipai hotu sa te, mi chak sa te, sakawr leh a chunga chuang sa te, mi zawng zawng – bawih leh bawih lo, alian ate pawh – an sa in ei theihna turin, Pathian ruai ropui tak thehnaah chuan rawn inkhawm rawh u,” tiin a au va.
19:19 Tin, sakawlh te, leia lalho te, an sipaiho te, sakawr chunga chuang kha do tur leh a sipaiho do tura an inkhawm ka hmu a.
19:20 Tin, sakawlh chu an man a, zawlnei der – sakawlh chhinchhiahna nei leh a lem chibai buktute a bum thinna thilmak a mithmuha titu kha – an man tel a; an pahnih chuan kata kang mei dilah chuan a nung chungin an paih a;
19:21 mi dangte chu sakawr chunga chuang khandaih, a ka atanga chhuak khan sahhlum an ni ta a; sava zawng zawngte chu an sate eiin an puar ta vek a.
20:1 Tin, vantirhkoh, leilawt chabi leh khaidiat lian pui kengin, van ata lo chhuk ka hmu a.
20:2 Tin, drakon, rulpui tar chu (chu chu Diabola leh Setana a ni) a man a, kum sangkhat atan a phuar a,
20:3 leilawtah chuan a paih lut a, a khar khum a, kum sangkhat chu a vei hma loh chuan hnam tin a bum leh tawh lohna turin a char hnan ta a; chu mi hnuah chuan rei lo te atan chhuah leh rih tur a ni.
20:4 Tin, lalthutphahte ka hmu a, a chungah mi an thu a, a hnenah chuan rorelna an pe a; tin, Isua hriattirna thu avang leh Pathian thu avanga lu tante thlarau leh, Sakawlh leh a lem chibai buk lo va, an chalah emaw an kutah emaw chhinchhiahna nei lote thlarau chu ka hmu bawk a; chungho chu an lo nung a, kum sangkhat atan Krista nen rorelin an awm a.
20:5 Mitthi dangte erawh chu kum sangkhat chu a vei hma loh chuan an la nung rih lo va. Chu chu thawhlehna hmasa ber chu a ni.
20:6 Thawhlehna hmasa bera telte chu an engthawlin an thianghlim a ni; chungho chungah chuan thih hnihna chuan thu reng a nei lo va, Pathian leh Krista puithiamte an ni ang a, amah nen kum sangkhat rorelin an awm zawk ang.
20:7 Tin, kum sangkhat chu a vei hunah chuan, Setana chu a tanna ata chu chhuahin a awm ang a,
20:8 lei kil lia hnam te, Goga leh Magoga chu buma indonaa hruai khawm turin a kal chhuak ang; chungho tamzia chu tuifinriata tiauvut ang mai an ni.
20:9 Tin, lei vang lam dapin an kal chho va, mi thianghlimte riah hmun leh khaw duhawm tak chu an hual ta a; tin, van atangin mei a lo tla a, anni chu a kangral ta a.
20:10 Tin,anmahni bumtu Diabola chu sakawlh leh zawlnei der awmna, mei leh kat dilah chuan an paih ta a; tichuan chatuanin achhun azana nghaisakin an awm ang.
20:11 Tin, lalthutphah lianpui var tak leh a chunga thu chu ka hmu a, a hma ata chu lei leh van an tlan bo va, an tan hmun reng a awm ta lo va.
20:12 Tin, mitthite, alian atein, lalthutphah hmaa ding ka hmu a; tin, lehkhabute an hawng a; tin, lehkhabu dang, Nunna Bu chu an hawng bawk a; tin, mitthite chu lehkhabutea ziak an thiltih ang zela relsakin an awm ta a.
20:13 Tuifinriat chuan a chhunga mitthi awmte chu a chhuahtir a, Thihna leh Mitthi khua chuan an chhunga mitthi awmte chu an chhuahtir bawk a; tin, mi tin an thiltih ang zela relsakin an awm ta a.
20:14 Tin, Thihna leh Mitthi Khuate chu mei dilah an paih a. Chu chu thih hnihna chu a ni – mei dil chu.
20:15 Tu hming pawh Nunna Bua ziak an hmuh loh chuan mei dilah an paih bawk a.
21:1 Tin, van thar leh lei thar ka hmu a; van hmasa leh lei hmasa chu an boral tawh a, tuifinriat pawh a awm tawh lo a ni.
21:2 Tin, khaw thianghlim Jerusalem thar chu, mo a pasal ela a inchei anga peih diamin Pathian hnena mi van ata lo chhuk ka hmu bawk a.
21:3 Tin, lalthutphah atangin aw ring takin, “Ngai teh, Pathian bawkte chu mihring zingah a lo awm ta,Ani chu an hnenah a awm ang a,Anni chu a mite an ni ang a, Pathian ngei chu an hnenah a awm ang a, An Pathian a ni bawk ang;
21:4 An mit ata mittui zawng zawng a hrufai ang a;Thihna a awm leh thei tawh lo vang a, Lungngaih te, tah te, nat te pawh A awm leh tawh hek lo vang; Thil hmasate chu a ral ta,” a tih ka hria.
21:5 Tin,lalthutphaha thu chuan, “Ngai teh, thil engkim ka siam thar e,”a ti a. Tin, “Ziak rawh, heng thu hi a rinawmin a dik si a,” a ti a.
21:6 Tin, ka hnenah, “A lo thleng ta. Kei Alpha leh Omega, a Bul leh a Tawp ka ni. Tuihal apiang hnenah chuan Nunna Tuikhura mi athlawnin ka pe ang.
21:7 Hnehtu apiang chuan chung chu an luah ang a, kei an Pathian ka ni ang a, anni chu ka fate an ni ang.
21:8 Amaherawhchu, mi dawih te, ring lo te, tenawm te, tualthat te, inngaih ching te, dawithiam te, milem bia te, dawthei zawng zawngte chantur chu mei leh kata kang dilah chuan a awm ang; chu chu thih hnihna chu a ni,” a ti a.
21:9 Tin, berhbu pasarih keng, hremna hnuhnung ber pasarih sin vantirhkoh pasarih zinga pakhat chu a lo kal a; ani chuan, “Hawh teh, mo, Beram No nupui chu kan entir ang che,” tiin mi bia a.
21:10 ,11 Tin, ani chuan Thlarauvin tlang lian pui sang takah mi kalpui a, Jerusalem khaw thianghlim chu Pathian ropuina neiin, Pathian hnena mi van ata lo chhuk mi entir a. A enzia chu lung man tam ber ang, jaspi lung ang mai hi a ni a, krustal lung angin a tle a ni;
21:11 ,10 Tin, ani chuan Thlarauvin tlang lian pui sang takah mi kalpui a, Jerusalem khaw thianghlim chu Pathian ropuina neiin, Pathian hnena mi van ata lo chhuk mi entir a. A enzia chu lung man tam ber ang, jaspi lung ang mai hi a ni a, krustal lung angin a tle a ni;
21:12 kulh nasa tak sang tak a nei a; kawngkhar sawm leh pahnih a nei a, kawngkhar bulahte chuan vantirhkoh sawm leh pahnih an awm a; chung kawngkharah chuan hming ziak a awm bawk a, chung chu Israela thlahte hnam sawm leh hnam hnih hmingte chu a ni a;
21:13 chhak lam pangah kawngkhar pathum, hmar lam pangah kawngkhar pathum, chhim lam pangah kawngkhar pathum, thlang lam pangah kawngkhar pathum a awm a.
21:14 Tin, chu khaw kulh chuan lungphum sawm leh pahnih a nei a, chungah chuan Beram No tirhkoh sawm leh pahnihte hming a chuang a.
21:15 Tin, mi betu chuan khua leh a kawngkharte leh a kulh chu tehna turin rangkachak luang a keng a.
21:16 Khua chu inbial velin a awm a, a dung lam chu a vang lam chen a ni; khua chu luang chuan a the a, fing 12,000 a ni. A dung lam leh a vang lam leh a san lam chu a inang a ni.
21:17 Tin, a kulh chu a teh leh a, mihring teh dan pangngaiin (chu chu vantirhkoh teh dan pangngai chu a ni) tawng 144 a ni.
21:18 Tin, a kulh chu jaspi lunga siam a ni; khua chu darthlalang thianghlim ang maia rangkachak thianghlima siam a ni.
21:19 Chu khaw kulh lung phumte chu lung man tam chi tinrenga cheimawi a ni. Lungmawi hmasa ber chu jaspi lung a ni a; a pahnihna chu sapphir lung a ni a; a pathumna chu kalkidon lung a ni a; a palina chu smaragdin lung a ni a;
21:20 a pangana chu sardonuk lung a ni a; a parukna chu sardion lung a ni a; a pasarihna chu kruso lung a ni a; a pariatna chu birul lung a ni a; a pakuana chu topazi lung a ni a; a sawmna chu krusopra lung a ni a; a sawm leh pakhatna chu huakintho lung a ni a; a sawm leh pahnihna chu amethusto lung a ni a.
21:21 Tin, kawngkhar sawm leh pahnih chu tuikeplung sawm leh pahnih a ni; kawngkhar zawng zawng chu tuikeplung pakhat theuhva siam a ni; tin, chu khaw kawtlai chu rangkachak thianghlim a ni, darthlalang entlang theih ang mai hi.
21:22 Tin, a chhungah chuan biak in reng ka hmu lo va; Lalpa Pathian Engkimtitheia leh Beram No chu an biak in an ni si a.
21:23 Tin, chu khua chuan a en turin ni a ngai lo va, thla pawh a ngai hek lo; Pathian ropuina chuan a en a, an khawnvar chu Beram No a ni si a.
21:24 Tin, hnam tin a engah chuan an awm ang a; leia lalte chuan an ropuina an la lut ang.
21:25 Tin, a kawngkate chu chhunah an khar tawp lo vang, chutah chuan zan reng a awm dawn si lo va.
21:26 Tin, hnam tin ropuina leh chawimawina an la lut ang a.
21:27 Tin, thil bawlhhlawh reng a lut hauh lo vang a, thil tenawm tite leh dawt hmangte pawh an lut hek lo vang; Beram No Nunna Bua hming an ziakte chauh an lut ang.
22:1 Tin, ani chuan a kawtlai lai taka nunna tui lui, krustal lung anga tle, Pathian leh Beram No lalthutphaha lo chhuak mi entir a.
22:2 Tin, lui kam tuakah chuan Nunna Thing, chi hrang sawm leh pahniha rah, thla kipa rah a awm a; chu thing hnahte chu hnam tin tihdamna tur a ni.
22:3 Tin, anchhia reng reng a awm leh tawh lo vang a, Pathian leh Beram No lalthutphah chu a awm tawh zawk ang; tichuan a bawihte chuan a rawng an bawl ang a,
22:4 a hmel an hmu ang a, a hming chu an chalah a chuang bawk ang.
22:5 Tin, zan a awm leh tawh lo vang a; khawnvar eng leh ni eng an ngai lo vang a; Lalpa Pathian chuan anmahni a en dawn si a; tichuan chatuanin ro an rel ang.
22:6 Tin, ani chuan ka hnenah, “Heng thu hi a rinawmin a dik a ni; tichuan, Lalpa, zawlneite thlarau Pathian chuan, thil lo thleng lawk turte chu a bawihte hnena entir turin, a vantirhkoh a tir a ni.
22:7 Tin, ngai teh, ka lo kal thuai dawn e. He lehkhabu hrilh lawkna thu pawm apiang an eng a thawl e,” a ti a.
22:8 Tin, kei Johana, heng thil zawng zawng hmutu leh hretu chu ka ni. Tin, ka hriata ka hmuh chuan, heng thil mi entirtu vantirhkoh ke bulah Pathian chibai buka buk turin ka bawkkhup a.
22:9 Tin, ani chuan ka hnenah, “Heti chuan ti suh khai; kei chu nangmah leh i unau zawlneite leh, he lehkhabu thu pawmtute bawihpui ka ni alawm. Pathian chibai buk zawk rawh,” a ti a.
22:10 Tin, ani chuan ka hnenah, “He lehkhabu hrilh lawkna thute hi zep suh; a hun chu a lo thleng dawn tawh si a. tihbawlhhlawhin awm reng rawh se; mi fel chu tihfelin awm reng rawh se; mi thianghlim chu tihthianghlimin awm reng rawh se.
22:12 Ngai teh, ka lo kal thuai dawn e; mi tin an thiltih ang zela pek turin ka lawmman ka hnenah a awm a.
22:13 Kei Alpha leh Omega, a Hmasaber leh a Hnuhnungber, a Bul leh a Tawp ka ni.
22:14 Nunna Thing chungah chuan thu an neih theihna tur leh, kawngkaah chuan khuaa an luh theihna tura insu faite chu an eng a thawl e.
22:15 Pawnah chuan ui te, dawithiam te, inngaih ching te, tualthat te, milem bia te, dawt ngaina leh dawt hmang apiangte chu an awm a.
22:16 “Kei Isua hian kohhranho pawlte tan heng thu hi inhnena hriattir turin, ka vantirhkoh chu ka rawntir a ni. Davida bulpui leh a thlah, arsi eng tak,varparh chu ka ni,” a ti a.
22:17 Thlarau leh mo chuan, “Lo kal rawh,” an ti a. A hria apiangin “Lo kal rawh,” ti rawh se. Tuihal apiang lo kal rawh se; a duh apiangin nunna tui hi athlawnin la rawh se.
22:18 He lehkhabu hrilh lawkna thu hria apiang ka hriattir e. Tupawhin heng thu hi a belhchhah chuan, he lehkhabua hremna ziakte hi Pathianin a chungah a belhchhah ve ang;
22:19 tin, tupawhin he hrilh lawkna lehkhabu thua mi thu a lak bo chuan, he lehkhabua ziak Nunna Thing leh Khaw Thianghlima a chan chu Pathianin a la bo ve ang.
22:20 Heng thu hriattirtu hian, “A ni, ka lo kal thuai dawn e,” a ti a.Amen, Lo kal ta che, Lalpa Isu.
22:21 Lalpa Isua khawngaihna chu mi thianghlimte hnenah awm rawh se. Amen. |
posted by zoblog @ 10:58 AM  |
|
|
|
