|
| Wednesday, September 12, 2007 |
1:1 Juda, Isua Krista bawih leh Jakoba unau chuan Pa Pathiana hmangaih, Isua Krista tana khek, kohvate hnenah chuan:
1:2 Khawngaihna te, remna te, hmangaihna te in chungah tihpunin awm rawh se.
1:3 Duh takte u, kan chan tlan chhamdamna thu in hnena ziak ka tum hram hram laiin, mi thianghlimte hnena rinna vawikhat kawltir lamah chuan thahnemngai taka beia fuih tur che uin in hnenah lehkha ziak a tul tih ka lo hria a.
1:4 Mi tute emaw aruka lut an awm si a, hman laia he thiam lohna chang tura ruatate chu; chung chu Pathian ngaihsak lo mite an ni a, kan Pathian khawngaihna chu hurnaah an chantir a, kan hotu leh kan Lalpa neih chhun, Isua Krista chu an awih lo bawk a.
1:5 Tin, engkim vawi khat hre vek mah ula, Lalpa chuan Aigupta ram atangin mite a chhan chhuah a, chu mi hnuin a ring lote chu a tihboralzia kha hriat nawntir che u ka duh a ni,
1:6 Tin, vantirhkohte anmahni tirhkoh nihna pawm lova, an awmna pangngai kalsan zawkte chu, ni ropui rorelna atan thim hnuaiah chatuan phuarnaa phuar chungin a khek a ni.
1:7 Sodom leh Gomorra, an kiang vela khuate nen, chutiang bawkin inngaihnaa inpumpekin awm loh loha an awm avangin, chatuan meia hremna tuarin, hriattir nana tar chhuahin an awm ang khan.
1:8 Nimahsela, chung mite pawh chuan chutiang bawkin an mumang avangin an tisa chu an tibawlhhlawh a, Lalpa thuneihna chu an pawisa lo va, ropuinate an sawichhia a.
1:9 Nimahsela, Mikaela, vantirhkoh chungnung ber mah khan diabola nen an inbei a, Mosia ruang thua an inhnial laiin diabola chung thu relsakin a sawichhe ngm lo va, "Lalpan hau zawk che rawh se," a ti ta zawk a.
1:10 Chung mite erawh chuan thil an hriat loh apiang an sawichhe thin a; tin, ngaihtuahna nei lo ramsate neih ang pianpui hriatna an neih an zawm thinte chuan anmahni an intichhe thin.
1:11 An chung a pik e! Kaina kawng chu an zawh a, hlawh hmu turin Balaama sual kawngah chuan an tlan vak vak a, Kora hnialnaah chuan an boral tak kha.
1:12 Chungte chuan in hnenah ruai an thehin inhmangaihna ruaithehnaah chuan lungpui tui chim vekte chu an ni a, hlauh nachang hre lo, beram vengtu mahni inchawmte an ni; chhum tui pai lo, thli chhem lente an ni; favanga thing, rah lo, vawi hnih thi tawh, zung chawpa pawhchhuahte an ni;
1:13 tuifinriat fawn invawrh, mahni mualphona phuan chhuakte an ni; arsi vak vak, chatuana thim chhah mup kheksakate chu an ni a.
1:14 ,15 Tin, chu mite hnenah pawh chuan Enoka, Adama atanga pasarihna chuan a hril lawk a, "Ngai teh u, mi zawng zawng chunga rorel tur leh Pathian ngaihsak lote zawng zawng Pathian ngaihsak lohna hna Pathian ngaihsak lo chunga an thawh zawng zawng kawngah leh Pathian ngaihsak lo mi sualten a chungah thu khauh tak an sawi zawng zawng kawnga thiam loh chantir turin Lalpa chu a mi thianghlim singkhatte nen a lo kal a ni," tiin.
1:15 ,14 Tin, chu mite hnenah pawh chuan Enoka, Adama atanga pasarihna chuan a hril lawk a, "Ngai teh u, mi zawng zawng chunga rorel tur leh Pathian ngaihsak lote zawng zawng Pathian ngaihsak lohna hna Pathian ngaihsak lo chunga an thawh zawng zawng kawngah leh Pathian ngaihsak lo mi sualten a chungah thu khauh tak an sawi zawng zawng kawnga thiam loh chantir turin Lalpa chu a mi thianghlim singkhatte nen a lo kal a ni," tiin.
1:16 Chungte chu phunnawitu leh sawiseltute an ni a, anmahni chakna ang zelin an awm a, an kate pawhin uan thu pawr tak a sawi a, hlawkna duh vangin mi an ngaina thin a ni.
1:17 Nimahsela,duh takte u, nangni zawngin kan Lalpa Isua Krista tirhkohten thu an hrilh lawkte kha hre reng rawh u.
1:18 "Hun hnuhnungah chuan Pathian ngaihsak lo lam anmahni chakna ang zela awmin, nuihsantute an la lo awm ang," tih in hnena an sawiziate kha.
1:19 Chung mite chu tisa mi, Thlarau nei lo, pawl hrangte siamtu chu an ni.
1:20 Nimahsela, duh takte u, nangni zawngin in rin chhan thianghlim ber chungah chuan nangmahni leh nangmahni inrem chhovin, Thlarau Thianghlimah tawngtaiin,
1:21 chatuan nunna neihtirna khawp kan Lalpa Isua Krista khawngaihna chu nghak chungin, Pathian hmangaihnaah chuan invawng tha rawh u.
1:22 Thenkhat ringhlela awmte chu khawngaih rawh u;
1:23 thenkhat mei ata la chhuak thuai ula, chhandam rawh u; thenkhat an tisa bawlhhlawh kaina silhfen lam pawh chu tenin, hlau chungin khawngaih rawh u.
1:24 Tichuan, in tluk loh nana veng thei che u leh a ropuina hma taka nasa zeta hlimin bawlhhlawh kai lova dah theitu che u,
1:25 kan Chhandamtu Pathian taka chauh hnenah chuan kan Lalpa Isua Krista avangin, hun reng awm hmaah leh tunah leh chatuan thlengin chawimawina te, ropuina te, rorelna te, thuneihnate awm rawh se. Amen. |
posted by zoblog @ 10:59 AM  |
|
|
|
|
|
