MIZO CLAN

Nimina Ngopa Jubilee Hall a inkhawm neih hi Pu Lalneihkunga Khawbung AIR Programme Executive in a kaihruai a, khuallian Pu Tlanthanga, State Information Commissioner chuan thu sawiin India ram mipui hamthatna turin sorkarin department hrang hrang kaltlangin hma a la a, Department thenkhat chuan an hmalakna te hi mipui hrilhhriat an duh lova, kan thil tihte miin an hriat kan hlau a nih chuan keimahni hi kan dik tawk lo tihna a ni. Sorkar department hmalak dan leh sum hmadan te miin hriat duha an nih a nih chuan department in an pe ngei tur a ni a, an pe duh lo a nih chuan chu Officer chu a Corrupt tihna a ni. Right to information hi ram hmasawnna atana hmanraw tha tak a ni. Tute pawhin sorkar hmalakna hriat duha kan zawt a nih hian midang tih hmingchhiatna a ni lova, democracy sorkar ah chuan mipuiin roreltu tur kan thlang a, lal kan thlang lo, kan rawngbawl tura kan thlan a ni, Kohhran te pawh mipui thawhlawm tling khawma kal a ni a, mipuiten an sum hman dan an hre duh a nih chuan an hrilh tur a ni. Chutiang bawkin sorkar pawh hi mipuiin chhiah kan pek tlingkhawm atanga kal a ni a, kan chhiah tling khawm atang chuan hmasawnna tur ruahmanna hrang hrang a duang ta a, chu an hmalakna mipui hriat an phal lo a nih chuan Pen daw thei an hmang tihna a ni.

A sawi zelnaah Pu Tlana chuan RTI hi mimal intih hmingchhiatna tur a ni lova, ram hmasawnna atana hmalakna pawimawh atana duan a ni a ti. RTI chungchangah harsatna nei in awm emaw, hriat chian duh nei in awm emaw a nih chuan kan Aizawla Office New Capital, Khatla ah in rawn zawt fiah thei reng ang a ti bawk.

Hawnna Programme hman zawh hian mi thiam thlan chhuah ten Technical Session ah mipuite hmasawnna tura sorkar hmalak dante an sawi a, Loneitute tana tuilak dan ER.Lalro-tluanga DAE, Champhaiin a sawi a, Thing tlang mite hnena Power pek chungchang Er.L.Pa-chuau EE P&E Champhai, Tui in tur pek kawnga hmalak dan Er. Lalza-khama SDO PHE Ngopa leh Pu C.Thangchhuana Health Dept. a MEM in mitin hriselna tura sorkar laipui hmalak dan te a sawi bawk.

Niminpiah ang bawkin niminah pawh Hall khat tlatin mipui an kalkhawm a, zawhna leh chhanna hun hman a niin zaithiamten mipui an awi reng bawk.


-------------------------------------------------------------------------

Zothangpuia (36) S/o Biakliana(L) chu nimin zing dar 6:00 vel khan an mahni chenna In, New Saron Vengah mitliamn natna avangin a boral a, Nimin tlai khan Veng-thlang thlanmualah vuiliam nghal a ni.
Champhaiah Ha Daktawr a rawn thleng tawh a, Joining report pe fel tawhin Leave lak leh phawt a, Thla thara hna thawh a tum niin thu kan dawng.
Assam a tuilian ala zia-awm hleih theih loh avang in Borkhola Bottling Plant atangin Gas phurh chhuah theih ani lova, tun dinhmunah Aizawlah pawh Gas hi sem tur a awm lo a ni.Hei vang hian Champhai tan Gas a harsa rih dawn a, LPG hmang tute renchem taka karkhat chhung gas hmang turin thawktuten mipuite an hriattir.
Official Meeting pawimawha Aizawla zin Champhai Dist. Bawrhsap Pu TV.Fambawl chuan nimin khan Champhai alo thleng leh ta.
CHANEM-a Community Information Centre chu mumal taka kal chhohpui mek a ni a, Internet hmang duh ten Office hun chhungin man chawia hman theih reng a ni. Hetihlai hian Mizo-ram CIC hrang hranga thawkte chu hunrei tak hlawh an lak theih loh avangin karleh lam atang khian sorkar hnathawk dang ang bawka nawrh an tum niin kan thudawn na chuan a sawi.
Kahrawt Branch KTP in Champhai Dist. Telephone Directory siamthar leh chhut belh chu a lo thleng leh ta a, Beaulah Book Store, Awmpui phei leh Vengthlang YMA Run ah lei tur a awm. Mi 100 chuang thun belh a nih bakah tihsual palh siam that a ni.

-------------------------------------------------------------------------
September 24( Thawhtanni) khan Hnahlan khuaa Children Park leh Inbualna In, DGAR MCA Project hnuaia siam thar chu Hnahlan VCP in Ribbon chep chatin a hawng a. A hawnna inkhawm 25th Assam Rifles in a buatsaih ah hian Hnahlan mipui thahnem tak an tel a ni. Hnahlan naupangte hnenah a lawmna pualin Chithlum mum sem a ni. Hawnna inkhawm neih zawh hian Children Park leh Bathroom hi Assam Rifles hotuten Hnahlan mipui kutah an hlan nghal a ni. He Children Park ah hian naupang intihhlimna tur hmanraw hrang hrang dah a ni.
-------------------------------------------------------------------------
Hnampa Mahatma Gandhi piancham denchhenin October 2-8 chhungin Mizoram pumah Faina Hapta hman a ni leh dawn a, Champhai Town ah chuan he Hapta denchhen hian Veng, Insitutions, Sorkar office leh Mimal Fai bik te hnenah lawmman 1-na atanga 3-na thlengin siam a ni leh dawn. Champhai Town chhunga veng hrang hrangte fai leh thianghlim taka invawng turin District Cleanliness Committee Chairman, Champhai DC ni bawkin a ngen.
-------------------------------------------------------------------------
October ni 3 atanga neih tan tur District Rural Sports Tournament neih tur atan V/C hrang hrangte an inpuahchah tan ta. Hetah hian Item 10 hmangin inel a ni ang a, tel thei turte chu September ni 30 ral hmaa DSYO Office a in report tura tih an ni. Sikul naupang tam zawk an tel theih nan Principal leh Headmaster te chu an naute tel tir phal turin ngen an ni a, Individual Item bikah VC khat atangin mi 2 zel tel theih a ni a, Team Game ah team khat zel tel theih a ni ang. Inelna tur Item hrang hrangte chu:
Archery (Boys & Girls) Volleyball (Boys & Girls)
Athletics (Boys & Girls) Hockey (Boys & Girls)
Weight Lifting (Boys & Girls) Football (Boys)
Tug of War (Boys) Wrestling (Boys)
Insuknawr (Boys Inbuan (Boys)

-------------------------------------------------------------------------
Mizo Idol Top 5 a tling, Champhai tlangval Lallawm-puia Fanai tana thilpek tlingkhawm te chu nimin khan Aizawl ah ken thlak a ni a, thilpek a tam tham deuh avangin Tangka fai chauh Pu Lalnunmawia NGO Chairman in a keng thla a, thilpek dangte chu Pu Zohlira Jt.YMA President In ah dahkhawm a niin Lallawmpuia a rawn hawn huna lo hlan atan dah that rih a ni a, nimin thleng khan thilpek hlantu an la awm zel a, a duh apiang tan pek theih zel a ni bawk e
-------------------------------------------------------------------------
Lalhmingsanga S/o Lallawmzuala, vengsang Govt. Champhai High School a Class X zirlai chu kum 2006-07 session-a Mathematics leh Science Subject-a a tihthat avangin naktuk hian Vana Pa Hall Aizawlah proficiency Award hlan a ni dawn. Lalhmingsanga hian hetiang lawmman hi a zawna tum thum a dawnna tur a ni
-------------------------------------------------------------------------
Directorate of School Education a Physical Education Wing bul tumin Zirtirtu thlan bikte tan Residential Physical Education Training nimin atang khan Govt. Champhai College ah neih tan a ni. He training hian September ni 28 thleng a awh dawn. Nimin chhun dar 10:00 khan Training hawnna inkhawm hi neih a niin Pu S.T.Zaduna, SDEO in he Residential Training hi a hawng.
-------------------------------------------------------------------------
Nimin khan SSA Champhai District buatsaihin an huam chhunga Early Childhood Care & Education Centre (ECCE)-a thawktu (Volunteer) pualin SSA Training Hall, Buangtlang Vengah tunkar zirtawpni thleng awh tur training chu tan a ni ta a.
He training hawnna inkhawm Pu H.Lalhming-hlua, Dy DPC, SSA Champhai kaihhruai ah hian thu sawiin training hawngtu Pu R.Lalthanmawia, DPC chuan mihring reng reng hi kan nihna anga kan inpawm dan hi kan nihphung a ni fo thin a ni a ti a. Zirna kawnga a bultanna Pre-Primary chu a pawimawh em avangin hnam changkang apiangin an ngai pawimawh thin a, chuvangin sorkar pawhin ngai pawimawhin tunah hian heng hmuna zirtir hna kalpuitu te tan hian training hi buatsaih a ni a ti. Zirtirtute hi ram siamtu leh ram dinhmun tha neih kawnga mipawimawh ber an ni a, chuvangin zirtirtute chuan nasa lehzualin kan thawh a tul a, inpekna thuk tak nen kan hna kan thawh a tul a ni a ti.
Pu H.Lalhminghlua pawhin thuchah sawiin, training nei turte chu an thil zir tur ngun taka zir turin a chah a. Miten min tehna ber chu kan sakhua leh NGO lama kan inpekna lam ni lovin, kan nitin eizawnna kawnga kan hnathawh danah a ni fo thin a; chuvangin kan hnathawhna kawngah rinawmna leh taimakna nen kan thawh a tul a ni tiin kalkhawmte chu a chah bawk a ni.
SSA Champhai District hnuaiah hian ECCE Centre, Primary School 26 leh ICDS nena an thawhdunna hnuaiah Centre 17, an vaiin 43 a awm a. He training ah hian Champhai District chhunga SSA hnuaia ECCE Centre 43 awm zing atangin thawktu (Volunteer 43) an tel thei a ni.
-------------------------------------------------------------------------
District Level Committee for Computer Education for School Children chu vawiin chawhnu dar 2:00 hian DC Office Chamber-ah an thukhawm dawn.
District Level Committee for Computer Education for School Children, Champhai District Committee chu hetiang hian siam thar a ni :-
Chairman : TV. Fambawl, DC Champhai
Member-te
1) Project Director, DRDA Champhai
2) District Education Officer, Champhai
3) Principal, Govt. Champhai College
4) District Agriculture Officer, Champhai
5) Executive Engineer, PWD, PHE, P&E
6) DLAO Champhai
7) President MJA Champhai
8) ADC(P) DC Office, Champhai, Member Secy
9) Head Assistant, DC Office, Champhai
-------------------------------------------------------------------------
Mizoram sorkar ruahman na anga LAD in khaw tin chhiarpui/ chhinchhiahna (Village Census Record ) VC te kal tlanga a siam tirna lawmman a lo thleng a, V/C ten nimin atang khan LAD Office atangin an la chhuak hlawm.