|
| Wednesday, September 12, 2007 |
1:1 Nunna Thu atir ata awm kha, kan bengin kan hriat kha, kan mitin kan hmuh kha, kan en reng a, kan kuta kan dap kha, chu mi chanchin chu;
1:2 (chu mi Nunna chu a lo lang ta a, kan lo hmu a, kan hriattir bawk a, chu chatuan Nunna, Pa hnena awm kan hnena lo lang chu kan hrilh che u a nih hi;)
1:3 chu mi kan hmuh leh kan hriata chu in hnenah kan hrilh ve che u a nih hi, nangni pawhin min pawl ve theih nan; keini min pawlna chu Pa leh a Fapa Isua Krista pawlna a ni tawh reng si a.
1:4 Tichuan, kan lawm a famkim theih nan heng thute hi kan ziak a nih hi.
1:5 Tin, thuchah a hnen ata kan hriata in hnena kan hrilh chhawn tur che u chu hei hi a ni: Pathian chu eng a ni a, amahah chuan thim reng reng a awm lo.
1:6 Thima awm siin, “Amah ka pawl,” kan tih chuan dawt kan sawi a ni, thutak pawh chu kan zawm lo;
1:7 amaherawhchu amah chu engah a awm angin keini pawh enga awm kan nih chuan kan inpawl tlang a, tin, a Fapa Isua thisenin kan sual zawng zawng min tlenfaisak thin a ni.
1:8 “Sual ka nei lo,” kan tih chuan mahni leh mahni kan inbum a, thutak chu keimahniah a awm lo a ni.
1:9 Kan sualte thupha kan chawi chuan kan sualte ngaidam tur leh kan fel lohna zawng zawng tlengfai turin amah chu a rinawmin a fel a ni.
1:10 “Thil ka tisual lo,” kan tih chuan amah chu dawtheiah kan siam a, a thu pawh keimahniah a awm lo a ni.
2:1 Ka naute u, thil in tihsual loh nan heng thu hi in hnenah ka ziak a nih hi. Tin, tupawhin thil a tihsual chuan Pa hnena mi sawipuitu, Isua Krista mi fel chu kan nei e;
2:2 ani chu kan sualte thupha chawina a ni; keimahni sual chauh ni lovin, khawvel zawng zawng sual thupha chawina pawh a ni.
2:3 Tin, a thupekte pawm kan nih chuanin chu miah chuan amah kan hria tih kan inhria e.
2:4 A thupekte pawm si lovin, “Amah ka hria,” titu chu mi dawthei a ni, thutak amahah a awm lo.
2:5 Tupawh a thu pawm erawh chu amahah chuan Pathian a hmangaihna a famkim tak zet tawh a ni. Amahah kan awm tih he miah hian kan inhria a ni.
2:6 “Amahah ka awm reng thin,” titu chu ama awm ang bawk khan a awm ve tur a ni.
2:7 Duh takte u, thupek thar zawng in hnenah ka han ziak lo va; thupek hlui, atir ata in neih kha ka ziak zawk a ni. Chu thupek hlui chu in thu hriat tawh hnu kha a ni.
2:8 Nimahsela, thupek thar ziak ka ni bawk ang chu, (chu chu amahah leh nangmahniah a lang a ni,) thim chu a bo mek avang leh eng taktak chu tunah a lo en tak avang hian.
2:9 Mahni unau haw si a, “Engah ka awm,” titu chu tun thleng pawhin thimah a la awm reng a ni.
2:10 Mahni unau hmangaihtu chu engah chuan a awm reng a, amahah chuan tlukna reng a awm lo.
2:11 Mahni unau hawtu erawh chu thimah a awm a, thimah a vak bawk a ni; thimin a mit a tihdel tawh avangin a kalna pawh a hre thin lo.
2:12 Naute u, ama hming avanga in sualte ngaihdam a nih tak avangin in hnenah ka ziak a nih hi.
2:13 Pate u, amah, atir ata awm renga chu in hriat avangin in hnenah ka ziak a nih hi. Rawltharte u, mi sual chu in ngam tak avangin inhnenah ka ziak a nih hi.Naute u, Pa chu in hriat avangin in hnenah ka ziak a nih kha.
2:14 Pate u, amah, atir ata awm renga chu in hriat avangin in hnenah ka ziak a nih kha. Rawltharte u, in chak a, Pathian thu nangmahniah a awm reng a, mi sual chu in ngam tak avangin in hnenah ka ziak a nih kha.
2:15 Khawvel hi hmangaih su ula, khawvela thil awmte pawh hi hmangaih hek suh u. Mi tupawhin khawvel hi a hmangaih chuan Pa a hmangaihna amahah a awm lo.
2:16 Khawvela thil awm zawng zawng, tisa chakna te, mit chakna te, dam chhung ropuina lem te hi Paa chhuak a ni lo va, khawvela chhuak a ni zawk si a.
2:17 Khawvel hi a chaknate chawpin a boral mek a ni, Pathian duhzawng titu erawh chu kumkhuain a awm reng ang.
2:18 Naute u, hun hnuhnung ber chu a ni ta e, Krista dodaltu a lo kal ang tih in hriat ang khan, tunah pawh Krista dodaltu tam tak an lo chhuak ta; chuvang chuan hun hnuhnung ber a ni ta tih kan hria e.
2:19 Anni chu kan zing atangin an chhuak a, nimahsela keimahni mi tak an ni lo ve; keimahni mi tak ni sela kan hnenah an awm ve zel tur a ni si a; nimahsela an zain keimahni mi tak an ni lo vek tih a lan fiah theih nan min chhuahsan ta a ni.
2:20 Mi Thianghlim hnen ata hriak thihna in dawng a, chu chu in zain in hria e.
2:21 Thutak chu in hriat loh avangin ka ziak a ni lo, in hriat avang leh Thutakah dawt engmah a chhuah ngai loh avangin ka ziak zawk a ni.
2:22 sua chu Krista a ni tih awih lotu aliama dawthei tunge awm? Krista dodaltu chu Pa leh Fapa awih lotu hi a ni.
2:23 Tupawh Fapa awih lo chuan Pa pawh a pawm chuang lo; Fapa awihtu erawh chuan Pa pawh a pawm a ni.
2:24 Nangni zawngin atir ata in hriata kha nangmahniah awmtir reng rawh u. Chu mi atir ata in hriata chu nangmahnia a awm reng chuan nangni pawh Fapaah leh Paah chuan in awm reng ang.
2:25 Tin, hei hi a ni amah ngeiin thil min tiama kha – chatuana nunna hi.
2:26 Chung nangmahni hruai bo tumtute thu chu in hnenah ka ziak a ni.
2:27 Nangni zawng ama hnen ata hriak thihna in hmuh kha nangmahniah a awm reng a, tuma zirtir in ngai lo ve; ama hriak thihna chuan thil zawng zawng thu a zirtir zawk che u avang leh dik tak a ni a, dawt pawh a nih loh avangin, chu mi chuan a zirtir che u ang khan amahah awm reng rawh u.
2:28 Chutichuan, naute u, amahah awm reng rawh u; tichuan amah chu lo inlar mah sela, a lo kalin a hmaah zak lovin huai takin kan awm thei ang.
2:29 Amah chu mi fel a ni tih in hriat chuan mi tupawh felna ti chu ama hrin a ni tih in hria e.
3:1 Ngai teh u, Pain min hmangaihna chu a va nasa em! “Pathian faahte” min vuah tak hi; chutiang chu kan ni reng e. He mi avang hian khawvelin min hre lo a ni, amah chu an hriat loh avangin.
3:2 Duh takte u, tunah hian Pathian fate kan ni a, engtin nge kan la awm dawn tih erawh chu a la lang rih lo ve; amah a lo inlar chuan amah angin kan awm dawn tih zawng kan hria, amah chu a awm pangngai ang takin kan hmu dawn si a.
3:3 Tupawh ama chunga chu mi beiseina chu nei apiangin amah a thianghlim angin a intithianghlim thin.
3:4 Tupawh thil tisual apiangin dan pawh a bawhchhe thin; sual chu dan bawhchhiatna a ni si a.
3:5 Amah chu sualte la bo turin a lo lang tawh tih in hria e; amahah chuan sual engmah a awm si lo va.
3:6 Tupawh amaha awm reng chuan thil a tisual lo; tupawh thil tisual chuan amah chu a hmu lo va, hriat pawh a hre hek lo.
3:7 Naute u, tuma bumin awm suh u; felna titu chu a fel a ni, amah a fel ang bawkin.
3:8 Thil tisualtu chu diabolaa chhuak a ni; diabola chuan atir ata thil a tisual si a, Pathian Fapa lo lan chhan ber chu diabola hnathawhte a tihboral theih nan a ni.
3:9 Tupawh Pathian hrin chuan Pathian chi amahah a awm reng avangin thil a tisual thin lo; Pathian hrin a nih avangin thil a tisual thei hek lo.
3:10 He miah hian Pathian fate leh diabola fate a hriat a ni; tupawh felna ti lo chu Pathiana chhuak a ni lo, a unau hmanaih lova pawh chu Pathiana chhuak a ni hek lo.
3:11 Hei hi atir ata thuchah in hriat kha a ni si a, kan inhmangaih tawn theuh tur a ni, tih hi;
3:12 Kaina, mi sual laka mi, mahni unau thattu ang khan awm lovin. Eng vangin nge a thah tak le? Ama thiltihte a sual a, a unau thiltihte a fel avangin.
3:13 Unaute u, khawvelin an huat che u chuan mak ti suh u.
3:14 Unaute kan hmangih avangin thihna ata kan chhuak a, nunnaah kan lut tawh tih kan hria e. Tupawh hmangaihna nei lo apiang thihnaah a la awm reng a ni.
3:15 Tupawh a unau hua chu tualthat a ni; tualthattu tumah chatuana nunna pai reng reng an awm lo tih in hre si a.
3:16 He miah hian hmangaihna engnge a nih kan hria, amah chuan kan tan a nunna a pek tak avangin; keini pawhin unaute tan kan nunna kan pe ve tur a ni.
3:17 Nimahsela, tupawhin khawvel sum neiin a unau tlachhamin hmu sela, ani chu lainat si suh sela, Pathian hmangaihna chu amahah engtin nge a awm ang?
3:18 Naute u, thu chauhvin i hmangaih suh ang u khai, lei chauhvin i hmangaih hek suh ang u, thiltih leh tih tak zetin ni zawk rawh se.
3:19 ,20 Chu miah chuan thutaka mi kan ni tih kan inhria ang a, kan rilruin thiam loh min chantirna kawngah chuan ama mithmuh ngeiah kan rilru kan thlem dai bawk ang; Pathian chu kan rilru aiin a ropui zawk a, engkim a hre si a.
3:20 ,19 Chu miah chuan thutaka mi kan ni tih kan inhria ang a, kan rilruin thiam loh min chantirna kawngah chuan ama mithmuh ngeiah kan rilru kan thlem dai bawk ang; Pathian chu kan rilru aiin a ropui zawk a, engkim a hre si a.
3:21 Duh takte u, kan rilruin thiam loh min chantir loh chuan Pathian lamah kan huai a ni;
3:22 tichuan a thupekte kan zawm a, a mithmuha thil lawmawm kan tih thin avangin, kan dil apiang a hnen ata kan hmu zel thin a ni.
3:23 Tin, a thupek chu hei hi a ni, a Fapa Isua Krista hming ring ila, aman thu min pek angin inhmangaih tawn bawk ila.
3:24 A thupekte zawm chu amahah a awm reng a, amah pawh chu amahah a awm reng bawk a ni. Tin, he miah hian amah chu keimahniah a awm reng tih kan hria, Thlarau min pekah hian.
4:1 Duh takte u, thlarau nazawng ring suh u, amaherawhchu thlaraute chu Pathian laka mi an ni nge ni lo fiah rawh u; thu hriltu der tam tak khawvelah an lo chhuah tak avangin.
4:2 He miah hian Pathian Thlarau chu in hria ang: thlarau engpawh Isua Krista tisaah a lo chang tih tan chu Pathian laka mi a ni;
4:3 thlarau engpawh Isua tan lo chu Pathian laka mi a ni lo ve; chu chu Krista dodaltu thlarau, lo kal tur in hriata kha a ni e; tunah pawh khawvelah a awm tawh reng a ni.
4:4 Naute u, Pathian hnen ata in ni a, chung chu in ngam tawh e; nangmahnia awma chu khawvela awma ai chuan a ropui zawk avangin.
4:5 Anni chu khawvela mi an ni a; chuvangin khawvela mi angin an tawng a, khawvelin an thu an ngaithla thin a ni.
4:6 Keini Pathian laka mi kan ni a, Pathian hretu chuan kan thu a ngaithla thin a; Pathian laka mi lo chuan kan thu a ngaithla thin lo. Chungah chuan thlarau dik tak leh thlarau dik lo kan hria a ni.
4:7 Duh takte u, i inhmangaih tawn theuh ang u; hmangaihna hi Pathian laka chhuak a ni si a; mi tin hmangaihna nei apiang Pathian hrin an ni tawh a, Pathian an hre bawk a.
4:8 Hmangaihna nei lo chuan Pathian a hre lo; Pathian chu hmangaihna a ni si a.
4:9 He miah hian Pathian hmangaihna kan chungah a lo lang ta, amah avanga kan nun theihna turin Pathianin a Fapa neih chhun khawvela a rawn tirhah hian.
4:10 He miah hian hmangaihna a awm, keimahnin Pathian kan hmangaih ka ti a ni lo va, amahin min hmangaih a, kan sualte thupha chawina ni turin a Fapa a rawn tir ka ti a ni zawk e.
4:11 Duh takte u, Pathianin chuti kauva min hmangaih chuan keini pawh kan inhmangaih tawn theuh tur a ni.
4:12 Tuman eng lai mahin Pathian an hmu ngai lo. Kan inhmangaih tawn chuan Pathian keimahniah a awm reng ang a, a hmangaihna pawh keimahniah a famkim bawk ang.
4:13 Amaha kan awm reng leh amah chu keimahniah a awm reng tih he miah hian kan hria, a thlarau min pek tawh avang hian.
4:14 Tin, Pain Fapa chu khawvel Chhandamtua awm turin a rawn tir tih kan hmu tawh a, kan hriattir a ni.
4:15 Tupawh, “Isua Pathian Fapa a ni,” tia tan apiang chu, amahah chuan Pathian a awm reng a, ani pawh chu Pathianah a awm reng bawk a ni.
4:16 Pathianin keimahnia hmangaihna a neih chu kan hria a, kan ring bawk a ni. Pathian chu hmangaihna a ni; hmangaihnaa awm reng chu Pathianah a awm reng a, Pathian pawh amahah a awm reng a ni.
4:17 He miah hian kan chungah hmangaihna a famkim tawh, rorel nia hlau lova kan awm theihah hianin; ama awm anga khawvelah hian kan awm avangin.
4:18 Hmangaihnaah chuan hlauhna reng a awm lo: hmangaihna famkimin hlauhna a hnawt chhuak zawk thin a ni, hlauhnaah chuan hremna a awm si a; a hlautu chu hmangaihnaah a la famkim lo a ni.
4:19 Amahin min hmangaih hmasak avangin kan hmangaih a ni.
4:20 Miin, “Pathian ka hmangaih e,” tiin a unau haw si sela, amah chu dawthei a ni; a unau a hmuh tawh renga mah a hmangaih loh chuan Pathian a hmuh ngai lohva chu engtin nge a hmangaih theih ang?
4:21 Ama hnen ata he mi thupek hi kan nei, “Tupawhin Pathian a hmangaih chuan a unau pawh a hmangaih bawk tur a ni,” tih hi.
5:1 Tupawh Isua hi Krista a ni tih ring chu Pathian hrin a ni; tupawh a hringtu hmangaih chuan a hrina pawh a hmangaih thin.
5:2 He miah hian Pathian fate kan hmangaih tih kan hria, Pathian kan hmangaih a, a thupekte kan zawm hian.
5:3 Pathian kan hmangaihna chu hei hi a ni, a thupekte kan zawm hi; a thupekte chu a khirh si lo va.
5:4 Pathian hrin tawh phawt chuan khawvel a ngam zel si a; hei hi a ni, khawvel hneha ngamna chu, kan rinna hi.
5:5 Isua hi Pathian Fapa a ni tih ringtu chauh lo chuan tuin nge khawvel ngam thin le?
5:6 He mi hi a ni, tui leh thisena lo kala chu, Isua Krista hi; tui chauhvah ni lovin, tuiah leh thisenah a ni zawk e.
5:7 Hriattirtu chu Thlarau hi a ni, Thlarau chu thutak a nih avangin.
5:8 Hriattirtu chu pathum an awm, Thlarau leh tui leh thisente chu; chung pathum chu an inthurual a ni.
5:9 Mihring hriattirna mah kan pawm chuan Pathian hriattirna chu a ropui zawk si a; Pathian hriattirna chu hei hi a ni, “Ka Fapa chanchin ka hriattir tawh,” tih hi a ni si a.
5:10 Pathian Fapa ringtu chuan mahniah hriatna a nei a ni, Pathian ring lo tu chuan amah chu dawtheiah a siam a ni, Pathianin a Fapa chanchin a hriattir a rin loh avangin.
5:11 Hriattirna chu hei hi a ni, Pathianin chatuana nunna min pe a, chu mi nunna chu a Fapaah a awm a ni.
5:12 Fapa chu neitu chuan nunna chu a nei; Pathian Fapa nei lotu chuan nunna chu a nei lo.
5:13 Chatuana nunna in nei tih in inhriat theih nan nangni Pathian Fapa hming ringtute hnenah heng thu hi ka ziak a ni.
5:14 Hei hi ama chunga kan huaina chu a ni, engpawh a duhzawng anga kan dil chuan anin min ngaihthlaksak thin hi;
5:15 tichuan engpawh kan dil apiang min ngaihthlaksak tih kan hriat chuan a hnena kan thil dila chu kan hmu tawh tih kan hria a ni.
5:16 Tupawhin a unau thihna khawp ni lo sual tiin hmu sela, a dilsak ang a, tichuan Pathianin a diltu hnenah chuan thihna khawp ni lo sual titute tan chuan nunna a pe ang. Thihna khawp sual a awm a; chutiang lamah chuan a dilsak tur ka ti a ni lo ve.
5:17 Fel lohna zawng zawng hi sual a ni; thihna khawp ni lo sual pawh a awm bawk a ni.
5:18 Tupawh Pathian hrin chuan thil a tisual lo tih kan hria e; Pathian Hrina khan amah chu a hum reng a, mi sual chuan tawh pawh a tawk thei lo reng a ni.
5:19 Tin, Pathian laka mi kan nih leh khawvel pumhlum hi mi sual thu thuin a awm tih kan hria e.
5:20 Tin, Pathian Fapa chu a lo kal a, Mi Diktak chu hre thei turin hriat theihna min pe tih kan hre bawk a; tin, keini, a Fapa Isua Kristaa kan awm hian, Mi Diktakah chuan kan awm a ni. Ani chu Pathian dik tak a ni a, chatuana nunna pawh a ni.
5:21 Naute u, milem lakah inthiarfihlim rawh u. |
posted by zoblog @ 11:03 AM  |
|
|
|
|
|
