|
| Wednesday, September 12, 2007 |
1:1 Simon Petera, Isua Krista bawih leh tirhkoh chuan Isua Krista kan Pathian leh chhandamtu felna avanga rinna hlu tak kan chan ang chang vete hnenah:
1:2 Pathian leh kan Lalpa Isua hriatnaah chuan in chungah khawngaihna leh remna tihpunin awm rawh se.
1:3 Ama ropuina leh thatna zara min kotu, a chanchin hriat avangin a Pathian thiltihtheihnain nunna leh Pathian ngaihsakna lam kawngah chuan thil zawng zawng min pe si a.
1:4 Chung zarah chuan a thutiam hlu tak leh ropui nasa takte chu min pe a ni; chutichuan chakna avanga khawvela chhiatna lo awm hi tlan chhuahsan tawhin, chung thutiam hlu tak leh ropui nasa takte avang chuan Pathian nungchang in tawmpui ve thei ang.
1:5 A ni, chu mi avang tak chuan taihmak reng reng chhuahin, in rinnaah chuan thatna telh ula, in thatnaah chuan hriatna telh ula,
1:6 in hriatnaah chuan insumna telh ula, in insumnaah chuan chhelna telh ula, in chhelnaah chuan Pathian ngaihsakna telh ula,
1:7 In Pathian ngaihsaknaah chuan unaute hmangaihna telh ula, in unaute hmangaihnaah chuan hmangaihna telh rawh u.
1:8 Chung chu in ta a nih a, a pun zel si chuan kan Lalpa Isua Krista hriatna kawngah hian thatchhe lo leh rah lo lovin a siam thin che u a ni.
1:9 Tupawh chung thil nei lo chu mitdel a ni a, hnai tea mi chauh a hmu thei a, a hman lai sualte tlenfaisakna chu a theihnghilh ta si a.
1:10 Chuvangin, unaute u, a kohna leh a thlanna che u chu tinghet turin taihmak chhuah lehzual rawh u; chung chu in tih zawngin engtikah mah in tlu lo vang;
1:11 chutichuan Isua Krista kan Lalpa leh Chhandamtu chatuan rama luh theihna chu an pe ngei dawn si che u a.
1:12 Chuvangin, chung thil chu hriain thutak in hnena awmah chuan in nghet na a, chung thil chu hriattir che u ka inpeih fo vang.
1:13 Tin, he bawktea ka awm chhung zawng hian nangmahni hriatpuiin chawh harh fo che u tha ka ti a ni;
1:14 kan Lalpa Isua Kristan mi hriattir ang khan ka bawkte dah bo hun chu a thleng thuai ang tih ka hre si a.
1:15 A ni, ka kal chhuah hnuin chung thil chu in hriat reng fo theih nan ka bei ang.
1:16 Kan Lalpa Isua Krista thiltihtheihzia leh a lo kal lehna thu chu ka hriattir lai che u khan, thawnthu fing taka ngaihtuah chhuah maite zawm kan ni lo va, a ropuina hmutute kan ni zawk asin.
1:17 Ani chuan Pa Pathian hnen ata chawimawina leh ropuina a hmu a, chu mi lai chuan ropuina nasa tak atang chuan hetiang aw hi a hnenah a lo thleng a: “Hei hi ka Fapa duh tak, ka lawm em ema chu a ni,” tiin.
1:18 Tin, tlang thianghlimah chuan a hnena kan awm lai khan chu aw chu van atangin a lo chhuak keimahni ngeiin kan hria a ni.
1:19 Tin, hril lawkna thu nghet lehzual chu kan nei a ni, khua a lo var a, varparh arsi chu in thinlunga a lo chhuah hma loh zawng chu chu khawnvar hmun thima eng an ngaihsak anga in ngaihsak chuan in titha ang.
1:20 Pathian Lehkhaa thu hril lawk reng reng hi mahniin hrilhfiah tur a ni lo tih hre hmasa phawt ula.
1:21 Thu hrilh lawk reng reng hi mihring thua chhuak a ni ngai si lo a, miten Thlarau Thianghlim tirhin Pathian hnen ata an sawi zawk thin a ni.
2:1 Nimahsela, mite zingah chuan zawlnei derte pawh an lo chhuah kha, chutiangin in zingah pawh zirtirtu derte an la awm ang, anni chuan anmahni leitu Lalpa meuh chu phatsanin, mi tichhe thei rin hrannate arukin an rawn luhpui ang a, mahni chungah chawplehchilha boralna an thlentir ang.
2:2 Tin, mi tam takin an hurna lam thiltihte chu an ching ve ang a, anmahni avangin kawng dik tak chu sawichhiat a ni ang.
2:3 Tin, sum awh avangin dawt thuin sumdawn nan an hmang ang che u; nimahsela hmana an chunga thu rel tawh chu a la ding reng a, anmahni tiboraltu tura pawh a muhil lo ve.
2:4 Vantirhkohten thil an tihsual lai khan Pathianin a zuah lo va, hremhmunah a paih a, rorelsaka khek turin khuarkhurum thimah a khung zawk si a;
2:5 tin, amah ngaihsak lote awmna khawvelah khan tui tiletin hman lai khawvel chu a zuah lo va, nimahsela Nova, felna thu hriltu chu, mi dang pasarih nen a chhandam ta a;
2:6 tin, Sodom leh Gomorra khuate chu amah ngaihsak lo, la awm turte entirnaah a hmang a, vuta chantirin, tiboralin thiam loh a chantir ta a;
2:7 tin, Lota, mi fel, mi sualte awm dan hur tak avanga lungngai em ema chu a chhandam ta a;
2:8 (chu mi fel chu an zinga a awmin, a mitin a hmu a, a bengin a hria a, dan lo anga an thiltihte chuan a rilru fel chu ni tin a intina em em si thin a;)
2:9 Lalpa chuan amah ngaihsaktute chu thlemna ata chhan chhuah dan leh fel lote chu rorel ni atan chuan hrem chunga khek dan a hria;
2:10 chakna bawlhhlawh kawng tisa anga awm leh rorelsakna hmusittute lek phei chu rorel ni atan hrem chunga khek dan a hre lehzual a ni. Athuai leh tihmawh an ni a, ropuinate an sawichhiat pawhin an khur ngai lo;
2:11 vantirhkoh, chakna leh thiltihtheihna nei zawkte mahin Lalpa hmaah chuan an chung thu relsakin an sawichhiat si loh kha.
2:12 Nimahsela, heng nungcha ngaihtuahna nei lo, mana tihboral tura sa chauhva piangte ang hian, thil an hriat lohte chu sawichhiain, anmahni chhiatnain an chhe ngei ang,
2:13 thil tihsual mana thil sual tuarin. Chhuna ruaitheh buai nuam ti mi an ni a. In hnena ruai an thehin, anmahni inbumna ruaitheh an nih avangin bawlhhlawh kaite leh tihkhawlohnate an ni a;
2:14 mit uirea khat, sual ban thei lote an nei a; mi nghet lote an thlem thlu a; awh hmang thinlung an pu a; anchhe dawng fate an ni a;
2:15 Bosara fapa Balaama, thil tihsual hlawh ngainatu kawng chu an zawh tawh avangin kawng dik chu an kalsan a, an vak bo ta a;
2:16 nimahsela ani chu a bawhchhiatna avangin zilhhauvin a awm ta a; sabengtung tawng thei lo chu mihring tawngin a lo tawng a, zawlnei atna chu a khap a ni.
2:17 Chung chu tuikhur tui awm lo leh chhum thlipui chhem len an ni; chungte tan chuan thim chhah mup chu ruat a ni tawh.
2:18 Thu lawilo pawr tak taka sawiin suala awmte zing ata tlan chhuak mekte chu tisa chaknaah hurnain an thlem thlu si thin.
2:19 Anmahni chu chhiatna bawih ni chung rengin mite chu bawih chhuah thu an tiam thin a; mi ngamtu apiangin chu mi ngei chuan bawihah a siam thin a ni.
2:20 Lalpa leh Chhandamtu Isua Krista an hriat avangin khawvel bawlhhlawhnate an tlan chhuahsan hnuin chu mi vekah chuan an tan leh a, ngamin an awm leh si chuan an awmze hnuhnung chu atir ai chuan a lo chhe ta zawk a ni ang.
2:21 Kawng fel chu hriat hnua thupek thianghlim an hnena kawltir chu hawisan ai chuan kawng fel chu hre lo sela an tan a tha zawk tur a ni si a.
2:22 “Ui ama luak lamah a kir leh a, vawkpui inbualfai tawh pawh chirhdiakah inbual turin a kir leh a,” tih thufing tawi dik tak ang thu chu an chungah a lo awm ta a ni.
3:1 Duh takte u, tuna in hnena ka ziak hi ka lehkha thawn pahnihna a ni a, a pahnihin in rilruah ngaihtuahna thianghlim chawk tho turin heng thilte hi hriat nawntirna tur che uin ka ziak a ni.
3:2 Zawlnei thianghlimte thusawi lawk leh in tirhkohte kaah Lalpa leh Chhandamtu thupek chu in hriat rengna turin;
3:3 hei hi hre hmasa ula, ni hnuhnungahte chuan nuihsantute chu anmahni chakna anga awmin, nuihsan chungin an lo kal ang a,
3:4 “A lo kal lehna thutiam chu khawiah nge? Siam tirh atangin engkim a awm pangngai angin chi thlahtute muthlilh ni ata tawh kha a la awm zel alawm,” an la ti ang.
3:5 Heng hi an haider lui si thin: Pathian thuin hman laiin vante a lo awm a, lei pawh tui ata leh tui zingah awm khawmin a lo awm a;
3:6 chungah chuan chu mi laia khawvel awm chu tuiin a chim a, a boral ta, tih hi;
3:7 nimahsela tunah vante leh lei awmte hi chu mi thu avang vek chuan Pathian ngaihsak lo mite rorel leh boral ni atana dahin hal tura khek a ni.
3:8 Nimahsela, duh takte u, he thu kamkhat hi theihnghilh suh u, Lalpa ngaih chuan ni khat hi kum sangkhat ang a ni a, kum sangkhat pawh ni khat ang a ni, tih hi.
3:9 Mi thenkhatin muanga an ruat angin Lalpa chu a thutiam kawngah chuan a muang lo ve; tuma boral duh lova, mi zawng zawng lo sim duhin, nangmahni lamah a dawhthei a ni zawk e.
3:10 Nimahsela, Lalpa ni chu rukru angin a lo thleng ngei ang, chu mi niah chuan vante chu nasa taka riin a boral ang a, thil bulte chu meia emralin a awm tawh ang a, lei leh a chhunga hnathawh awmte hi a kangral ang.
3:11 ,12 Chung thilte chu chutianga boral vek tur a ni tih in hriat avangin Pathian ni lo thlen hun tur chu beisei leh thahnemngai taka duhin, awm dan thianghlim leh Pathian ngaihsak kawngah chuan mi eng ang nge in nih tur le? Chu mi ni a thlen avangin vante lo kangin a boral ang a, thil bulte pawh chu meia em tuiin a awm tawh ang.
3:12 ,11 Chung thilte chu chutianga boral vek tur a ni tih in hriat avangin Pathian ni lo thlen hun tur chu beisei leh thahnemngai taka duhin, awm dan thianghlim leh Pathian ngaihsak kawngah chuan mi eng ang nge in nih tur le? Chu mi ni a thlen avangin vante lo kangin a boral ang a, thil bulte pawh chu meia em tuiin a awm tawh ang.
3:13 Nimahsela, a thuthiam ang chuan van tharte leh lei thar, a chhunga felna awmte chu kan beisei a ni.
3:14 Chuvangin, duh takte u, chutiang thilte chu in beisei avangin bawlhhlawh kai lo leh sawiselbovin, thlamuang taka in awm a hmuh theih nan che u, taihmak chhuah rawh u.
3:15 Tin, kan Lalpa dawhtheihzia chu chhandamnaah ruat rawh u; kan unaupa duh tak Paula pawhin a hnena finna pek ang zela in hnena a ziak ang khan;
3:16 a lehkha thawn zawng zawngah chuan chung thu chu sawiin, chutiang bawkin a ziak a ni; chungah chuan thu hriat har takte a awm a, chung chu mi fing lo leh mi nghet loten Pathian Lehkha Thu dang an ngai kawi angin an ngai kawi a, mahni leh mahni an intihboral phah thin.
3:17 Chutichuan, duh takte u, nangnin chung thu chu in lo hriat lawk avangin fimkhur rawh u, chutilochuan mi sualte dik lohnaa hruai bova awmin in nghet tha lai in tlu dah ang e.
3:18 Amaherawhchu, kan Lalpa leh Chhandamtu Isua Krista khawngaihna leh hriatnaah chuan lo thang lian rawh u. Tunah leh chatuan thlengin ama hnenah chuan ropuina awm rawh se. Amen. |
posted by zoblog @ 11:04 AM  |
|
|
|
|
|
