MIZO CLAN

 
MIZORAM #Health Department-ah Promotion buai? (Misual.Com) #UDA candidate list a ‘leak-out’! (Misual.com) #Excise ruihtheih thil man zat (DIPR) #Fanu kaphlumtu in a dam rei ring lo sa (Buannel) #ZONET NATIONAL #Retired army officer, aide arrested for Malegaon blast(NDTV) WORLD #LTTE aircraft bombs Colombo power plant (TOI) # Jennifer Hudson IDs nephew's body; child shot, sources say (LA Times)
Shoutbox

KOHHRAN TIHTUR A NI EM?
Wednesday, September 26, 2007
- Rualchhinga
Nikum lam atang tawh khan Opposition Party leh NGO ang chi Pawl hrang hrangte hian Mizoram Sorkar Pawisa hman danah hian Corruption nasa tak awm nia an hriat thu an sawi nasa hle a, chanchinbuah pawh hetianga Sorkar puhmawhna lampang thuziak a tam em a ni tih chu kan hre theuh awm e. Hemi thu hi Mizorama Kohhran lian ber Presbyterian Kohhran Synod hruaitute pawhin an ngaimawh hle a ni tih a hriat a. Hman deuh khan hetianga Sorkar puhmawhna hi thudik lo anih chuan Sorkar pawh hi ngawi mai lovin thudik tak chu mipui hriatah puang chhuak sela an duh thu leh Opposition leh Pawl thenkhatte pawh thu belhchian dawllo hmanga mipui rilru ti chi-ai lo tura an duh thu an sawichhuak ta hial a ni. Hetianga Kohhran hruaituten an duhdan leh ngaihdan an han sawilan ve hi, mi thenkhat chuan Kohhran hi a inrawlh lohna tura inrawlh anga ngaiin chanchinbu thenkhatah thu an rawn ziak a. Hetianga thu rawn ziaktute hian thil tha hi an duh lo nge, Kohhran hnathawh tur leh tihtur chin hi an hre lo hrim hrim zawk tih hriatthiam a har hle a ni.

Central YMA in ‘ruihhlo do’ kumpuanah an hman tantirh lai khan mi thenkhat chuan YMA hi a kuang lo nawrah an ngaih thu chanchinbuah an ziak kur ngiai nguai anih kha. YMA chuan an tihtur chu an hre khawp mai, khatianga thu rawn ziaktute kha mipui chuan ‘ruihhlo do’ duhlotuah kan ngai mai a ni. Kohhran hruaitute thiltih dan sawiseltute pawh hi mipui chuan thiltha tih duhlotu-ah kan ngaih loh pawhin Corruption pawmzamtuah kan ngai palh ang tih a hlauhawm hle in ka hria. Thuthlung Hlui hunlai pawh khan Zawlneiten an ram mipui sualna leh an lal (Sawrkar) sualnate chu huaisen tak leh thahnem ngai takin an lo sawisel tawh thin a. Pathian rawngbawltu an nih avangin an tihtura Pathianin a hriattir angin thil an ti a ni. An tih loh turah an inrawlh a ni lova. AD 410 vela Barbarian hovin Rome khawpui chhutchhiat vek an tum laia Pope (Rome Bishop) a lo inrawlh ve avanga vawiin thlenga Rome khawpui Historical building-te khu la ding thei an ni a, Pope khan a tih loh tur a lo ti ta em ni le? Pope John Paul II in Poland rama sipai Sawrkarna sawiselin mipui sawrkarna siam vat tura a nawr (appeal), thla khat chhung leka tihhlawhtlin lo ni ta te kha a kuang lo a nawr kan ti dawn em niang? Kristian ram chu ni chiah lo mahse, kristiante dominate ram USA leh Australia-ah te Mercy Killing Bill pass an tum laia Kohhran hruaituten pass lo tura nasa taka an nawr a, kawngzawhna ropui tak tak an huaihawtte kha an tih loh tur ti leh an kuang lo nawrah khawvel mipui hian kan ngai miah lo. Pathian duhdan ang ni lova thil kal reng reng hi Kohhran chuan a ngaimawh a, a duh lo a ni. Political Party mal hamthatna leh mimal hlawkna ringawt ngaihtuah lovin, Kohhran chuan Pathian leh mihringte mithmuha tha leh thianghlim a duh mai a ni zawk e. Arunachal Pradesh-ah Setana Bill an pass dawn khan India rama Kristian zawng zawngten kan protest-a, kawng kan zawh khan keini Kristiante chuan kuang lo nawrah kan inngai lo a ni.

Pathian khawngaihna avangin Mizoram chu Kristian ram tih ngam hial khawpin Kristian kan tam ve a, Kristiante tellovin Sawrkar hian thilsual emaw, thil tha emaw hi a ti ringawt thei lova, kan ramah hian Corruption a nasa anih phawt chuan Mizo Kristiante hi kan corrupt a ni mai a, chu chu Kohhran hian a sawisel lovang maw? Presbyterian Synod hian corruption do kum pawh a lo puang tawh a, a ti zel tur a ni. Mizorama Tlawmngai Pawl zawng zawngte, Political Party zawng zawngte leh Sawrkar ngei pawh hian kawng dik lo kan zawh dawn nia an hriat chuan Kohhran chu a ngawi mai mai thei lovang, a chhan chu sualna avanga ram leh hnam a tlukchhiat mai lonhna tura hruai ngil chu Kohhran chuan Pathian rinchhanin an mawhphurh naah an ngai tlat thin a ni.

posted by zoblog @ 2:34 PM  
1 Comments:
Post a Comment
<< Home
 
About

Name: zoblog
Home:
About Me:
See my complete profile
Previous Post
Archives
Mizo Websites
:bloremizo::buannel::chhawkhlei: :Dmzp::fartuah::hyderabadmizo: :khampat::lawrkhawm::lelte: :misual::mizobooks::mzbloggers: :mizomethodist::mizoramhouse: :mizoramuniversity::mizoserver: :mizoweaving::mumbaimizo: :samaw::sinlungnews::zawlbuk: :zomireunification::zonet::zoram: :zotalk:
© MIZO CLAN by Mizoclan Blog