MIZO CLAN

Aw, ni e, i ram a zim em a ni. Tiin inhnem mah ila ka ngaithiam thei thlawt lo. Helai ka bial te tak te ah hian ka hriatna hi a va chhuanawm lo tak em!

'A dik alawm! I khawvel dai hi a zim em a ni. Mi fate angin zirna leh thiamna sang nei turin i thlen chin a tawi si a, a awm ve tho alawm' tiin ka rilru lehlam chu a'n thle kawi chhe chhaw a, mahse thiam ka in chantir thei tlat lo. Engvang maw? Ka thatchhiat vang leh ka dawihzep vangah ka puh tho tho.

Engemaw ni teh lek ni? Min mawlh tlat mai. Rilrua thil a luh laklawh laia ziah loh lah hian a bo hnuah chhut chhuah leh a harsa phian roh si a. Ziak ve hlawl mai teh ang. Tute emaw chuan min deu ngei ang. A dik alawm. Min deu rawh se. Deu tlak reng ka ni asin. Ka zahpui lek lek a. Oh!! Ka zahpui ang maw? ka nihna ni miau hek si ale...

'Chhuan tur ka nei lo,' tiin hla thu mawi tak tak an chhepkual thin maw? Kei tehlul hian ka nei lo lehzualin ka hre thin. Engkima engkimah hian inchhuanna tur ka neih pakhat mah ka hriat loh avangin hian Pa Pathian hian min siam fuh ka ti letling zaw phian zuk nia.

Awle, mihring hian kawng kan nei theuh a, ka line tur ni awm ang chu a awm ve ang. Mahse eng ber nge? Eng kawng hi nge ka zawh dawn? 'Sweet 16 ka ni reng dawn' ti ang maia rilru hahchawl renga awm chuan miten min liam san zung zung si a. Hun hi nghak mah ila.. hun hian min nghak ve si lo.

Thian han kawm ila, kan hriat loh leh man phak loh thu an sawi a..., khuti lam an tih dek dek chuan ka bo nghal hu mai si. Oh!! ka theih tawkah chuan helai tualchhung thila ka phak tawk angah chuan ka lo in la 'bright' ve e! ka tia... ka hriatchian poh leh ka mawl si. Mawlna hian min zem chiai a, ka aa chiai ni ta berin ka hria.

'Mi aa chu a ngawih reng chuan mifingah chhiar a ni thin' tia thufingin a sawi hi ka thlawp thei tlat lo. Ka ngawichawi a, ka ngawi melh melh a, ka aa melh melh ni berin ka hria. Khawvel ram zauvah hian hma lam sut tur ka nei a... ka su ngei dawn a... ka duh emaw, duh lo emaw, khawvel hmasawn chak tak rual hian kal ve ngei a ngai dawn. Chumi tur chuan ke ka han chhep dawn a... ka zam thin. Oh!! hriat tur hi a va tam tak em! Ka kal ve bek bek anga... ka tlin tawk.. Ka phak tawkah tuman min lo hmusit suh se. Ni love. Min hmusit rawh se. Ka chantawkah ka lungawi mai loh zawngin... mahni nihna thupa fing anga lang thiam mi ka ni ve tlat lo.

Hei le.. ka kal tan mek e... ka kawngah eng pawh lo ding rawh se... ka kal em em ang. Ka tum alawm. Ka thei ve alawm. A harsa pawh a ni thei. A hrehawm bik pawh a ni mahna. Ka kal khawp ang. Ka la hre ve khawp ang. Engtikni-ah emaw chuan an nuih rualin ka la nui ve anga. Engtikni-ah emaw chuan an phun rualin ka phun ve tawh ang. Chutih hunah chuan 'over' tel miah lovin inrintawkna ka nei ve tawh anga. Zamna reng reng a bo tawh ang. A va nuam dawn em!