|
| Wednesday, September 12, 2007 |
1:1 Jakoba, Pathian leh Lalpa Isua Krista bawihin, Hnam Sawm leh Hnam Hnih darhte chu chibai a buk e.
1:2 ,3 Ka unaute u, in rinna fiahna chuan chhelna a siam tih hriain, thlemna tinreng in tawh hunin lawman hlirah ngai rawh u.
1:3 ,2 Ka unaute u, in rinna fiahna chuan chhelna a siam tih hriain, thlemna tinreng in tawh hunin lawman hlirah ngai rawh u.
1:4 Tin, engmah tlachham lova in famkim a, in puma in him theih nan chhelna chuan thawk famkim rawh se.
1:5 In zingah tupawhin finna a tlakchham chuan mi zawng zawng hnena hau lo leh ui lova pe thintu Pathian chu dil rawh se, chutichuan a hnenah pek a ni ang.
1:6 Nimahsela, ringhlel hauh lovin rinna neiin dil rawh se, ringhleltu chu tuifinriat fawn thli chhem len leh vawrh ang a ni si a.
1:7 ,8 Chutiang mi, rilru bulbal nei lo, a thil tih zawng zawng nghet lo mi chuan Lalpa hnenah engmah hmuh inring suh se.
1:8 ,7 Chutiang mi, rilru bulbal nei lo, a thil tih zawng zawng nghet lo mi chuan Lalpa hnenah engmah hmuh inring suh se.
1:9 Unau daikilkara mi chu chawimawia a awm avangin lawm rawh se;
1:10 hausa erawh chu tihtlawma a awm avangin lawm rawh se; hlobet par angin a la ral mai dawn si a.
1:11 Ni a lo chhuah a, thli lum tak a lo tlehin hlobet a tivuai a; tin, a par chu a rem a, a awm dan mawizia chu a boral thin; chutiang bawkin mi hausa chu a kalnaah chuan a lo vuai dawn si a.
1:12 Thlemna tuar hram hramtu chu a eng a thawl e; fiaha a awm hnuin nunna lallukhum, Lalpan amah hmangaihtute hnena a tiam chu a hmu dawn si a.
1:13 Tuman thlemna an tawh laiin, “Pathian thlem ka ni,” ti suh se; Pathian chu sual thlem rual a ni lo, amah pawhin tumah a thlem ngai lo.
1:14 Mi tin mahni chaknaa hruai bo leh hipa an awm chuan thlemna an tawk a ni zawk e.
1:15 Tin, chakna chuan no a pai a, sual a hring thin a; tin, sual chuan a lo puitlinin thihna a hring thin.
1:16 Ka unau duh takte u, bumin awm suh u.
1:17 Thilpek tha leh thilpek famkim zawng zawng chu chung lam atangin engte Pa hnen ata, a lo chhuk thin a ni, amahah chuan danglamna leh herna hlim reng reng a awm thei lo.
1:18 A thil siamte hmahruaitu ang kan lo nih theih nan ama duhzawngin thutak lakah chuan min hring a ni.
1:19 Unau duh takte u, chung chu in hria e; nimahsela mi tinin ngaihthlak chuh sela, thusawi chuh lo sela, thin tinel rawh se:
1:20 mihring thinurnain Pathian felna chu a siam si lo.
1:21 Chuvangin, bawlhhlawh zawng zawng leh sual khat liam chu dah bo ula, thu tuh, in thlarau chhandam thei chu thuhnuairawlh takin pawm rawh u.
1:22 Nimahsela, thu ngaithlatute mai ni lovin zawmtute lo ni zawk rawh u, chutilochu mahni inbum in lo ni dah ang e.
1:23 Tupawh thu ngaithlatu nia zawmtu ni si lo chu mi, darthlalanga a pianpui hmai ngun taka inen ang chu a ni, a kal bo va, mi eng ang nge a nih a intheihnghilh nghal si thin.
1:25 Amaherawhchu, tupawh dan famkim, zalenna dan hi bih a, chutianga awm reng a, ngaithla a, theihnghilh leh mai thintu ni lo va, zawma hna thawk fo thintu ni zawk chu, chu mi chu a thil tihah malsawmin a awm ang.
1:26 Tupawh sakhaw ngaihsak nia inringa a lei veng tha si lo va, mahni thinlung inbum zawk chu, chu mi sakhaw biak dan chu engmah a ni lo ve.
1:27 Kan Pathian leh Pa mithmuha sakhaw biak dan thianghlim leh sual tel lo chu hei hi a ni, fahrah leh hmeithaite an hrehawm laia kan leh khawvel bawlhhlawh kai lova insiam thin hi.
2:1 Ka unaute u, kan Lalpa Isua Krista, Ropuina Lalpa chu ring chungin, mi thlei bik nei suh u.
2:2 In inkhawmna inah mi rangkachak zungbun bun, puan mawi tak sin lo lut sela, tin, mi rethei puan chhe tak sin lo lut bawk sela;
2:3 tin, puan mawi tak sin chu in ngaihsak a, a hnenah chuan, “Nang he hmun thaah hian thu rawh,” in tih a, tin, mi rethei hnenah chuan, “Nang chu sawtah sawn ding la, a nih loh leh ka ke nghahchhan hrulah hian thu rawh,” in tih chuan,
2:4 in rilruah thlei bik neiin ngaihtuahna sual pua sawiseltute in lo ni dawn lawm ni?
2:5 Ka unau duh takte u, ngai teh u, Pathianin he khawvel thila retheite hi rinnaa hausa tur leh, amah hmangaihtute hnena a tiam ram chu luahtu turahte a ruat lo vem ni?
2:6 Nangni zawngin mi rethei chu in timualpho ta zawk a ni. Mi hausate chu a tiduhdahtu che u leh rorelna ina hnuk lut thintu che u chu an ni lawm ni?
2:7 Hming zahawm tak in put hi sawichhetute chu an ni lawm ni?
2:8 Nimahsela Pathian Lehkha Thu, “Nangmah i inhmangaih angin i vengte i hmangaih tur a ni,” tih lal dan hi in zawm chuan in ti tha e;
2:9 amaherawhchu mi thlei bik in neih chuan in tisual a ni, Danin bawhchhetu-ah a chantir si che u a.
2:10 Tupawhin Dan zawm kim mah sela, kawng khata a tihsual si chuan a zaah chuan thiam loh changin a awm tawh a ni.
2:11 “Uire suh,” titu chuan, “Tual that suh,” a ti bawk si a. Chutichuan uire lo mah la, tual i thah si chuan Dan bawhchhetu i ni reng reng tawh a ni.
2:12 Chuvangin,zalenna dana rorelsak turate angin thu sawi ula, thil ti bawk rawh u.
2:13 Mi chunga khawngaihna nei lo chu khawngaihna tel lovin rorelsakin a awm ang; khawngaihna hi rorelna aiin a chungnung zawk a ni.
2:14 Ka unau te u, miin, “Rinna ka nei,” ti mah sela, thiltih a neih si loh chuan engnge sawt ang? Chutiang rinna chuan amah a chhandam thei ang em ni?
2:15 Unaupa emaw, unaunu emaw, saruaka awmin an ni tin chaw tlachham sela,
2:16 tin, in zinga tuin emaw an hnenah, “Thlamuang takin kal ula, lum tak leh puar takin awm rawh u,” ti ula, taksa tana thil chakkhai chu in pek si loh chuan engnge sawt ang?
2:17 Chutiang bawkin rinna chu thiltih nei lovin amah chauhvin a awm chuan thi a ni.
2:18 A ni, mi tuin emaw, “Nangin rinna i nei a, keiin thiltih ka nei a ni; i rinna chu i thiltih tel lovin mi entir rawh, tin, keiin ka thiltihin ka rinna ka entir ang che.
2:19 Pathian chu pakhat a ni tih i ring a ni maw? I ti tha e; ramhuaite pawhin an ring a, an khur thin asin,” a ti ang.
2:20 Aw mi lawilopa, thiltih tel lova rinna mai chu engmah a ni lo tih i hre duh em le?
2:21 Min thlahtu Abrahama chuan a fapa Isaaka maicham chunga a hlan lai khan thiltih avangin thiam a chang a ni lawm ni?
2:22 Rinna chuan a thiltih nen a thawk dun a, tin, thiltih avangin a rinna chu a famkim ta tih i hria e.
2:23 Pathian Lehkha Thu, “Abrahama chuan Pathian a ring a, chu rinna chu a felnaah ruat a ni,” tih thu kha a lo hlawhthling a, tichuan Pathian Thianah vuahin a awm ta a.
2:24 Rinna avang ngawt ni lovin, thiltih avang zawkin miin thiam a chang thin tih in hre ta.
2:25 Chutiang bawkin Rahabi nawhchizuar pawh khan tirhkohte kha a lo lawm a, kawng danga a hawntir lai khan thiltih avangin thiam a chang a ni lawm ni?
2:26 Thlarau tel lovin taksa chu thi a ni, chutiang bawkin thiltihte tel lovin rinna pawh chu thi a ni.
3:1 Ka unaute u, in zinga mi tam tak hi zirtirtuahte lo awm suh u, zirtirtuin rorelna nasa lehzual kan tawk ang tih kan hre si a.
3:2 Kan zain thil tam tak kan tisual fo thin. A thusawia tisual ngai lo mi chu,mi puitling a ni a, a taksa pum pawh veng thei mi a ni.
3:3 Ngai teh u, kan thu an awih theih nan sakawr kaahte thirbarh kan barh chuan an taksa pum pawh kan kaiher thin.
3:4 Ngai teh u, lawngte pawh hi a lian hle a, thli na tak chhem Lenin a awm thin na a, nimahsela a tihertu chuan a kaltir duhna lam apiangah tihherna te tak tein a tiher thin.
3:5 Chutiang bawkin lei pawh hi taksa peng te tak te a ni a,nasa takin a uang thin. Ngai teh u, mei te tak tein thing a va tikang nasa em!
3:6 Tin, lei hi mei a ni; kan taksa pengte zinga khawlohna hlawm chu lei hi a ni; chu chuan taksa apumin a tibawlhhlawh a, pianpui tawlailir chu a tikang a, amah chu hremhmun tihkan a ni.
3:7 Sa chi tinreng te, sava chi tinreng te, rannung chi tinreng te, tuifinriata mi chi tinreng te hi khawi ngam theih an ni si a, mihringte khawi ngamin an awm bawk a:
3:8 amaherawhchu lei hi tumahin an khawi ngam thei lo a ni; thihna hlova khat, sual awmhle hle thei lo a ni.
3:9 Chu chuan Lalpa leh Pa kan fak thin a; chu vek chuan Pathian anga siam mihringte chu anchhia kan lawh bawk thin a ni.
3:10 Ka hmun khat atangin fakna leh anchhe lawhna a chhuak thin. Ka unaute u, chung thil chu chutiang ni tur a ni lo ve.
3:11 Tuikhur hian hna hmun khatah tui tui leh tui tui lo a tichhuak thin em ni?
3:12 Ka unaute u, theipui kungah oliv thei a rah thei em ni? A nih loh leh grep hruiah theipui a rah thei em ni? Chutiang bawkin chi khur hian tui al lo a tichhuak thei hek lo.
3:13 In zingah tunge finga thu hre thei awm? Thuhnuairawlh tak leh fing takin a thiltihte awm dan thatin entir rawh se.
3:14 Nimahsela in thinlungah itsikna nasa tak leh inelna in neih chuan, thu dik uan khum suh ula, thu dik dodalin dawt sawi hek suh u.
3:15 Chu finna chu chung lam atanga lo chhuk chu a ni lo va, khawvel leh taksa chakna leh ramhuaia mi a ni zawk e.
3:16 Initsikna leh inelna awmnaah chuan buaina leh thiltihsualna tinreng a awm thin.
3:17 Chung lam atanga finna lo chhuak erawh chu atirin a thianghlim phawt a, chu mi hnuah chuan inrem a duh a, a nunnem a, a tihnuam a, khawngaihna leh rah thain a khat a, thlei bik a nei lo va, a vervek lo a ni.
3:18 Felna rah chu remna siamtute tan remnain tuh a ni.
4:1 In zinga indona leh inhnialnate hi khawi atanga lo chhuak nge ni? In taksa pengahte indona siam thintu, in duhzawng atangte chuan lo chhuak a ni lo vem ni?
4:2 In chak a, in nei si lo va: tual in that a, in awt a, in nei thei si lo va: in inhnial a, in indo va; in dil loh avangin in nei lo va;
4:3 in dil a, in dil dik loh avangin in hmu lo, in nawmsak nan hman in tum si a.
4:4 Nangni uirenute u, khawvel thian nihna hi Pathian hmelma nihna a ni tih in hre lo vem ni? Chutichuan tupawh khawvel thian nih duh apiang chuan Pathian hmelmaah a insiam thin a ni.
4:5 A nih loh leh, “Thlarau keimahnia a chentir chuan thik khawp hialin min duh a ni,” tih hi, Pathian Lehkha Thuin engmah lovin sawiin in ring em ni?
4:6 Nimahsela, khawngaihna tam lehzual a pe thin; chuvangin Pathian Lehkha Thuin, “Pathianin mi chapote a dodal a, inngaitlawm te erawh chu khawngihna a pe thin,” a ti a ni.
4:7 Chutichuan, Pathian thu thuin awm rawh u; amaherawhchu Diabola dodal rawh u, tichuan a tlan bosan ang che u.
4:8 Pathian hnaih rawh u, tichuan anin a hnaih ang che u. Mi sualte u, in kutte silfai rawh u; rilru bulbal nei lote u, in thinlung tithianghlim rawh u.
4:9 Hrehawm ula, lungngai ula, tap rawh u; in nuih lungngaihah chang sela, in hlim nguiah chang rawh se.
4:10 Lalpa mithmuhin inngaitlawm rawh u, tichuan a chawimawi ang che u.
4:11 Unaute u, insawichhe tawn suh u. Tupawhin a unau a sawichhiatin emaw, a uanu a sawiselin emaw, Dan a sawichhiain Dan a sawisel a ni; nimahsela Dan i sawisel chuan Dan zawmtu i ni lo va, roreltu i ni zawk e.
4:12 Dan petu leh roreltu pakhat chauh a awm, chhandam theia tiboral theia chu; nang thenawmte sawiseltu chu tunge maw i nih le?
4:13 Tunah ngai teh u khai, nangni, “Vawiinah emaw, naktukah emaw, chu mi khawpuiah chuan ka kal ang a, chutah chuan kum khat kan va thang ang a, kan sum dawng ang a, hlawkna kan hmu ang,” titute u.
4:14 Naktukah chuan engnge lo awm dawn in hre si lo. In nunna chu engnge ni? Chhum rei lo te lo lang a, ral leh ta mai thin ang hi in ni si a.
4:15 Chutichuan, “Lalpan rem a tih chuan kan dam ang a, chu mi kha mi kan ti ang,” in ti tur hi a ni.
4:16 Nimahsela, in uannate hi in chhuang zawk si a, chutiang chhuanna zawng zawng chu sual a ni.
4:17 Chutichuan, tupawh thil tha tih tur hriaa ti si lo chu a tan sual a ni.
5:1 Mi hausate u, ngai teh u khai! In chunga hrehawm lo thleng dawn mek avang chuan tap ula, chiau vak vak rawh u.
5:2 In rote a chhe ta a, in puante sulrulin a ei zo ta.
5:3 In rangkachak leh in tangkate a tuiek zo ta a; a tuiek chu in thiam lohzia hriattirna a ni ang a, in tisa chu mei kan angin a ei ang. Ni hnuhnungah chuan ro in khawl khawm a nih hi.
5:4 Ngai teh u, in lova buh ata inhlawhfate hlawh, tihdera in pek loh kha; a au va, a attute mangang au thawm pawh chu Mipuite Lalpa bengah a lo lut ta a.
5:5 Khawvelah hian nuamsa takin in awm a, in inkhawhral mai mai a; inthah niin in thinlung in titlai a.
5:6 Mi fel chu thiam loh in chantir a,in that ta a; ani chuan a dodal lo a che u.
5:7 Chutichuan, unaute u, Lalpa lo kal hma loh zawng chhel takin awm rawh u. Ngai teh u, lo neitu chuan ruah tui tla hmasa leh hnuhnung chu a hmuh hma loh chuan chhel takin lei rah hlu tak chu a nghak thin.
5:8 Nangni pawh chhel takin awm rawh u; in thinlung tinghet rawh u; Lalpa lo kalna chu a hnai tawh si a.
5:9 Unaute u, thiam loh changa in awm loh nan, inphun suh u; ngai teh u, Roreltu chu kawngka bulah a ding reng a ni.
5:10 Unaute u, Lalpa hming thusawitu zawlneite chu, tuar dan leh chhel dan kawngah chuan entawn atan hmang rawh u.
5:11 Ngai teh u, tuartute chu engthawl kan ti a; Joba chhelzia chu in hria a, Lalpan a tawpa a tihzia pawh kha in hmu bawk a, Lalpa chu khawngaihnain a khahzia leh zah a ngaih theihzia pawh kha.
5:12 Nimahsela, ka unaute u, engpawh ti mah ula chhia chham suh u; van chhalin emaw, lei chhalin emaw, thil dang reng reng chhalin emaw chhia chham suh u; “Ni” in tih chu “Ni” ni sela, “Ni lo” in tih chu “Ni lo” ni rawh se; chutilochuan thiam loh changin in awm ang.
5:13 In zingah thil tha lo tuar an awm em? Tawngtai rawh se. Hlim an awm em? Fakna hla sa rawh se.
5:14 In zingah damlo an awm em? Kohhran upa kohtir sela, anin Lalpa hminga hriak hnawihin a chungah tawngtai rawh se;
5:15 tin, rinnaa tawngtaina chuan damlo chu a chhandam ang a, Lalpa chuan ani chu a kai tho vang; tin, thil a lo tihsual tawh chuan ngaihdamsak a ni ang.
5:16 Chutichuan, tihdama in awm theih nan in sualte thupha chawi tawn ula, intawngtaisak tawn thin rawh u. Mi fel tawngtaina chuan thil nasa tak a ti thin.
5:17 Elija chu keimahni nungchang ang pu mihring bawk a ni a, ani chuan ruah sur loh nan thahnemngai takin a tawngtai a; tin, kum thum leh thla ruk chhung zawng lei chungah ruah a sur ta lo va.
5:18 Tin, a tawngtai leh a, vanin ruah a surtir a, leiin a rahte a rawn chhuahtir ta a.
5:19 Ka unaute u, in zinga mi tupawh thutak atang chuan bo sela, tin, tuin emaw hawi kirtir sela,
5:20 mi sual a kawng bona ata hawi kirtirtu chuan thihna ata a thlarau a chhandam ang a, sual tam tak a khuhsak bawk ang tih inhre rawh se. |
posted by zoblog @ 11:07 AM  |
|
|
|
|
|
