|
| Wednesday, September 12, 2007 |
1:1 Pathian, hmasanga thlahtute hnena bung tam tak leh kawng tinrenga Zawlneitea thu lo sawitu khan,
1:2 heng ni tawpah hian keimahni hnenah a Fapaah chuan thu a sawi ta. Chu mi chu engkim rochungtuah a ruat a, chu mi pawh chuan khawvelte chu a siam a;
1:3 ani chu a ropuina eng leh, atak anpui ngei leh, ama thiltihtheihna thua engkim tungdingtu niin, sualte a tlenfai hnuin chung lama Ropuibeera ding lamah khian a than thu a;
1:4 vantirhkohte aia hming tha zawk a rochun ang ngeiin an aia ropui zawk a lo ni tawh si a.
1:5 Vantirhkohte zingah tu hnenah nge heng thu hi a sawi ngai le? “Nang zawng ka Fapa i ni e, Vawiin hian ka hring che a ni,” tih leh, “A tan Pa ka ni ang a, Ani chu ka tan Fapa a ni ang,” tih hi.
1:6 Tin, A Fa tira chu khawvela a tirh dawn lai khan heti hian a ti bawk; “Pathian vantirhkohte zawng zawng pawhin Amah chibai buk rawh se,”
1:7 Tin, vantirhkohte chungchang thu-ah chuan hei hi a sawi a ni: “Ani chuan a vantirhkohte chu Thli-ah a chantir thin a, A rawngbawltute pawh meialhah a chantir thin,” tih hi.
1:8 Fapa chungchang thu-ah erawh chuan hei hi a sawi a ni, “Aw Pathian, i lalthutphah chu Chatuanin a awm tur a ni; Dikna lal tiang pawh chu I ram lal tiang chu a ni;
1:9 Felna chu i ngaina a, Bawhchhiatna chu i huat kha; Chuvangin, Pathian, i Pathian chuan, I thiante ai chuan Hlimna hriak a thih nasat tak che hi,” tih leh,
1:10 “Nang, Lalpa, atirin Leilung nghahchhan i phum tawh a, Vante pawh i kut chhuak a ni;
1:11 Chungte chu a la boral ang a, Nang erawh chu awm hlen tur i ni; Tin, chung zawng zawngte chu Silhfen angin a la hlui ang a,
1:12 Puan angin i zial bawk ang a – Silhfen ang maiin, Tichuan a lo danglam tawh ang; Nang erawh chu i pangngai fo va, I kumte pawh a ral lo vang,” tiin.
1:13 Nimahsela, vantirhkohte zingah tu chungchang thu-ah nge hei hi a sawi ngai ni? “I hmelmate i kephah nghahchhana Ka siam hma loh zawng Ka ding lamah thu rawh,” Tih hi.
1:14 Anni zawng zawng chu rawngbawlna thlaraute, chhandamna rochungtu turte tan rawngbawl tura tirh chhuah an ni lo vem ni?
2:1 Chuvangin, benga kan hriatte kha thahnemngai takin kan pawisa lehzual tur a ni, chutilochuan kan tawlh bo hlauh dah ang e.
2:2 Vantirhkohte hmanga thu sawi mah kha a lo ngheh a, bawhchhiatna leh thu awih lohna tinrengte chuan thungrulhna fel tak a hmuh zel si chuan,
2:3 heti kauva chhandamna ropui hi thlahthlam ila, engtin nge kan tlan chhuah theih tehlul ang? Chu mi chhandamna thu chu atira Lalpa hmanga sawi a ni tawh a, a hretute chuan min tihnghehsak a;
2:4 Pathian pawhin chhinchhiahnate leh thilmakte leh thiltihtheihna tinrengte nen, ama duh ang zela Thlarau Thianghlim thil semte nen chuan anni chu a hriatpui a.
2:5 Khawvel lo la awm tur a chanchin kan sawia chu vantirhkohte hnuaiah zawng a dah lo.
2:6 Nimahsela,mi tu emaw chuan khawiah emaw heng thu hi sawiin a hriattir ta zawk; “Mihring hi engnge maw a nih a, i hriat reng thin ni? Mihring fapa pawh hi engnge maw a nih a, i kan thin ni?
2:7 Ani chu vantirhkohte aia hnuaiin i siam rih a; Ropuina leh chawimawina i khumtir a, I kut chhuak chungahte chuan hotuah i siam bawk a;
2:8 A ke hnuaiahte engkim i dah a,” tiin. Chutichuan, engkim a hnuaia a dah avangin a hnuaia dah loh engmah a nei lo. Amaherawhchu tunah zawng engkim a hnuaiah awmin kan la hmu rih lo ve.
2:9 Nimahsela, Isua, vantirhkohte aia hnuaia siam riha chu, thihna tuar avanga ropuina leh chawimawina khumtira awmin kan hmu ta zawk a ni. Pathian khawngaihna zarah thihna chu mi tin a temsakna turin.
2:10 A tan engkim awma a zara engkim awm bawka tan chuan fa tam tak ropuinaa a hruai luh zawngin, an chhandamna siamtu kha tuarnate avanga tihfamkim chu a sawm reng si a.
2:11 Tithianghlimtu leh tihthianghlimate chu an zain Mi Pakhata chhuak an ni si a; chuvangin ani chuan anmahniho chu “Unaute” tih a zak lo ve.
2:12 “Ka unaute hnenah i hming ka hril ang a; Awm khawm zingahte chuan Hla sain ka fak ang che,” tiin.
2:13 Tin,“Amahah ka rinna ka nghat ang,” a ti leh a. Tin, “En teh u, kei leh Pathian mi pek naupangte hi,” a ti leh pek a.
2:14 Tichuan, naupangte hi tisa leh thisen changte an nih hlawm avangin, amah ngei pawhin chung bawk chu a chang ve ta a; thihnain thihna thuneitu (chu chu Diabola a ni) a tihboral theihna tur leh,
2:15 thih hlauh vanga dam chhunga bawiha awm zawng zawngte chu a chhan chhuah theihna turin.
2:16 A tanpui thinte chu vantirhkohte an ni hauh si lo va, Abrahama thlahte an ni, a tanpui zawk thin chu.
2:17 Chutichuan, mite tan sual thupha chawina siamsak turin, Pathian lam thilahte chuan Puithiam Lalber mi lainat thei leh rinawm tak a nih theih nan, engkima a unaute anga lo awm chu a tan a tul reng a ni.
2:18 Amah ngei chuan thlemna tawkin a lo tuar tawh avangin thlemna tawkte chu a tanpui thei a ni.
3:1 Chutichuan, unau thianghlim, van kohna chang vete u, kan thurina Tirhkoh leh Puithiam Lalber, Isua chu, ngaihtuah rawh u;
3:2 Pathian chhungte zawng zawng zingah Mosia a rinawm ang bawk khan, ani chu ruattu lakah chuan a rinawm a ni.
3:3 Chhungkaw puipa chu a chhungte aiin an chawimawi zawk ang ngeiin, ani chu Mosia aiin ropui lehzualna hmu tlaka ruat a ni tawh si a.
3:4 Chhung tin hian puipa tu emaw tal an nei theuh si a; engkim puipa erawh chu Pathian a ni.
3:5 Tin, chu mi hnua thu la sawi turte hriattir nan Mosia chu Pathian chhungte zawng zawng zinga rawngbawltuah zawng a rinawm ngei a;
3:6 Krista erawh chu Pathian chhungte chunga Fapaah a rinawm a ni. A chhungte chu keimahni kan ni, atawp thlengin kan huaina leh kan beisei chhuanna hi nghet taka kan vawn tlat phawt chuan.
3:7 Chutichuan, Thlarau Thianghlim sawi ang bawkin: “Vawiin hian a aw in hriat chuan,
3:8 Thlalera thlemna nia An tihvui lai ang khan, In thinlung tikhauh suh u;
3:9 chutah chuan in thlahtute chuan Mi fiahin mi thlem a, Kum sawmli chhunga Ka thiltihte chu an hmu a;
3:10 Chutichuan, chu mi chhuanho chungah ka lungni lo va, ‘An thinlungin an ngai sual fo thin a. Ka kawngte pawh an hre lo,’ ka ti a,
3:11 Ka thinura ka chhechham ang khan Ka chawlhnaah chuan an lut lo vang,”tiin.
3:12 Unaute u, fimkhur rawh u, chutilochuan Pathian nung chu bansan turin in zingah tu chhungah pawh rin lohna thinlung sual a lo awm dah ang e.
3:13 “Vawiin” an tih chhung hian ni tinin infuih tawn zawk rawh u, chutilochuan in zinga mi tupawh hi sual bumnaa tihkhauhvin in awm dah ang e.
3:14 Krista changtute kan lo ni ta si a, kan rin chhan tantirhna kha a tawp thlengin nghet taka kan vawn tlat phawt chuan,
3:15 “Vawiin hian a aw in hriat chuan An tihvui lai ang khan In thinlung tikhauh suh u,” an tih chhung zawng hian.
3:16 A nih leh tute nge ni, hre reng sia tivui kha? Aigupta ram atanga Mosia hruaia chhuak zawng zawng kha an ni lo vem ni?
3:17 Tin, tute chungah nge ni, kum sawmli chhunga a lungnih loh kha? Tisualtu, an ruang thlalera tlu tate chungah khan a ni lo vem ni?
3:18 Tin, thu awih lote hnenah chauh lo chuan tu hnenah nge a chawlhnaa lut lo tura chhechhama a tiam ni?
3:19 Chutichuan, rin lohna avangin an lut thei ta lo tih kan hria a ni.
4:1 Chuvangin, i hlau vang u, chutilochuan a chawlhnaa luhna thutiama la awm reng siin, in zingah tupawh tling lo angin inlo awm mial dah ang e.
4:2 An hnena hrilh a nih ang bawk khan Chanchin Tha kan hnenah hrilh a ni ngei si a; nimahsela an thu ngaihthlak chuan anmahni a tisawt si lo, ngaithlatu taktakte nen rinna zawmin an awm loh avangin.
4:3 Keini ring tawhte hi chu chawlhnaah chuan kan lut mek a nih hi. “Ka thinura ka chhechham ang khan Ka chawlhnaah chuan an lut lo vang,” a tih ang khan; leilung pian tirh ata hnate chu thawh zawh a ni tawh na a.
4:4 Khawii hmunah emaw ni sarih ni thu hetiangin a sawi asin, “Tin, ni sarih ni-ah chuan Pathian chuan a hnathawh zawng zawng a chawlhsan ta a,” tiin.
4:5 Tin, he hmunah hian, “Ka chawlhnaah chuan an lut lo vang,” a ti leh a.
4:6 Chutichuan, thenkhat chu mi chawlhnaah chuan an la luh tur thu a la awm avang leh, hmana Chanchin Tha hrilh dawngtute chu awih loh vanga an luh tak loh avangin,
4:7 rei tak hnu khan Davidaah chuan, “Vawiin hian,” tiin ni eng emaw a ruat nawn leh a ni, “Vawiin hian a aw in hriat chuan In thinlung tikhauh suh u,” tia a hmaa ka sawi ang khan.
4:8 Josua chuan anniho chu a chawlhtir tawh si zawngin, chu mi hnuah chuan ni dang thu chu a sawi lo vang.
4:9 Chutichuan, Pathian mite tan chuan Chawlhnia chawlhna a la awm ta fo va.
4:10 Tupawh Pathian chawlhnaa luta chawl ve tawh chuan Pathian tih ang khan a hnathawhte chu a chawlhsan ve thin.
4:11 Chutichuan, tumah chu mi awih loh entirna anga awma an tluk loh nan chu chawlhnaa lut tur chuan thahnem i ngai ang u.
4:12 Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thling phel hrang khawp hialin a chhun thei a,thinlunga ngaihtuah leh tumte hi a hre nghal thei a ni.
4:13 Thil siam ama mithmuha lang lo reng reng a awm lo; kan chanchin kan thlenna tura mithmuhah chuan engkim saruak leh inhawng sain a awm zawk a ni.
4:14 Tichuan, vanahte kal tlang tawh Puithiam Lalber ropui tak, Isua, Pathian Fapa chu kan neih avangin kan thurin hi i pawm tlat ang u.
4:15 Puithiam Lalber,kan chak lohnate min hriatpui thei lo nei kan ni si lo; keimahni anga kawng tinrenga thlemna tawk tawh, sual erawh chu sual lo, nei kan ni zawk e.
4:16 Chutichuan, zahngaihna kan hmuh theihna tur leh, puih kan ngaih huna tanpuina khawngaihna kan hmuh theihna turin, khawngaihna lalthutphah chu huai takin i hnaih ang u.
5:1 Puithiam Lalber apiang, sualte avanga thilpek leh inthawinate an hlan kawp theihna tura mihring zinga mi lak hrana lo awmin, Pathian lam thilahte chuan mihringte tan ruat an ni si thin:
5:2 chungte chuan engmah hre lote leh kawng bote chungah zai an dawh thei thin a ni, anmahni ngei pawh chak lohna hual velin an awm ve bawk avangin.
5:3 Tin, chu mi avang chuan mite tan an hlansak angin anmahni tan ngei pawh sualte avangin hlan ve lo thei an ni lo.
5:4 Tin, tuman chu mi chawimawina chu mahniin an inbel ngai lo, Arona anga Pathian koh an nih si loh chuan.
5:5 Chutiang bawkin Krista pawh chu Puithiam Lalbera siam turin mahni a intiropui lo ve,“Nang zawng ka Fapa i ni e, Vawiin hian ka hring a che,”tia a hnena sawitu khan a tiropui ta zawk a ni;
5:6 “Nang zawng, Melkisedeka awm dan anga Chatuana Puithiam i ni e,” tia hmun danga a sawi ang bawk khan.
5:7 Ani chuan a tisa put lai niahte khan, thihna laka amah chhandam theitu hnenah chuan nasa taka au leh mittui tla chungin tawngtainate leh dilnate a hlan a, a tih dek thin avangin ngaihthlakin a awm bawk a;
5:8 Fapa meuh pawh ni mah sela a thil tuarahte chuan thu awih a zir ta a ni;
5:9 tichuan tihthatfamkima lo awmin, a thu awih zawng zawngte tan chatuana chhandamna bulpui a lo ni ta;
5:10 Melkisedeka awm dan anga Puithiam Lalberah Pathianin a vuah a.
5:11 Chu mi chanchinah chuan thu tam tak sawi tur kan nei a, hrilhfiah pawh a harsa, in beng a lo chhet tak avangin.
5:12 A hun ngaihtuah zawngin zirtirtu ni tawh hial awm in ni na a, Pathian thu bul ber A Aw B te chu zirtir in ngai leh ta a, chaw rum ni lova hnute la ngai mi ang in lo nih tak hi.
5:13 Hnute ring apiang chuan felna thu-ah hian hriatna an nei si lo, nausen an nih avangin.
5:14 Chaw rum erawh chu puitlingte tan a ni, chungte chuan an hman fo avangin, chhia leh tha fiah turin an hriat theihnate chu an sawizawi tawh.
6:1 ,2 Chutichuan, Krista thu bul hril tawh lovin puitlin lam i pan ang u; thiltih thi simna te, Pathian lama rinna te, baptismate leh, kut nghah leh, mitthi thawh lehna leh, chatuana rorelna kawng lam zirtirna te lungphum chu phum leh tawh lovin.
6:2 ,1 Chutichuan, Krista thu bul hril tawh lovin puitlin lam i pan ang u; thiltih thi simna te, Pathian lama rinna te, baptismate leh, kut nghah leh, mitthi thawh lehna leh, chatuana rorelna kawng lam zirtirna te lungphum chu phum leh tawh lovin.
6:3 Pathianin rem a tih chuan chu chu kan ti ngei ang.
6:4 Tin, vawi khat rilru tihvara, van thilpek tema, Thlarau Thianghlim chantira,
6:5 Pathian thu tha leh hun lo la awm tura thiltihtheihna tem tawh zeta
6:6 tluksante kawng thu zawng – chu mite chu an simna turin siam thar leh rual a ni lo, Pathian Fapa chu anmahni tan khengbet nawn leha timualpho an nih avangin.
6:7 Lei, a chunga ruahtui tla thin lo dawng tawh a, thawhsakate tana thlai ei tlak chhuahtu chu Pathianin mal a sawm thin.
6:8 Amaherawhchu, hnimhlingnei leh buarte a chhuah chuan makin a lo awm a, anchhe dawng thaw a lo ni thin a, a tawpah chuan hal a tawk thin.
6:9 Nimahsela, duh takte u, chutiang thu sawi mah ila, nangni zawngin chutiang thil aia thil tha zawk, chhandamnaa tel thilte chu in tih kan ring a che u.
6:10 In hnathawh leh a hming chunga hmangaihna in lantir, mi thianghlimte rawng in lo bawl, tun thleng pawha in la bawl cheu chu theihnghilh turin Pathian chu mi fel lo a ni si lo va.
6:11 Nimahsela, tawp thlenga beiseina famkim hmu turin in taihmak pangngai ang khan taihmak chhuah theuh fo ula kan ti em em mai;
6:12 chutichuan in inthlahdah lovang a, rinna leh nghah peihna vanga thutiamte rochung tawhte zirho in ni zawk ang.
6:13 Pathianin Abrahama hnena thu a rawn tiam lai khan,amah aia ropui zawk chhala chhia a chham theih loh avangin amah leh amah inchhalin,
6:14 “Mathei lovin mal ka sawmsak ngei ngei ang chia, tih pawh ka tihpunsak ngei ngei ang che,” tiin chhia a chham ta a.
6:15 Chutichuan, chhel taka a tuar chhuah hnuin thil tiam chu a hmu ta ngei a.
6:16 Mihringte hian an aia ropui zawk chhalin chhia an chham thin a ni; an inhnialna tinrengah pawh tihnghehna turin chhechham hi tihtawpna a ni thin.
6:17 Pathian chuan a thutiam dawngtu turte hnenah a thu a thlak mai mai dawn lo tih chiang taka tihlan a duh a, chhechhamin a tinghet a.
6:18 Pathian daw rual a nih lohna thil danglam thei lo pahnih avangin, keini inchhanhim nan kan hmaa beiseina dah chu chelh tura tlante hian, fuihna nasa tak kan neih theihna turin.
6:19 Chu beiseina chu nunna thirchakaiah kannei a, rinawm leh nghet tak a ni, puanzar chhunga mi-ah pawh chuan a lut a;
6:20 chutah chuan Isua, Melkisedeka awm dan anga chatuana Puithiam Lalber lo ni tawhin, kan tan hmahruaituah a lo lut ta a.
7:1 Chu Melkisedeka, Salem lal, Pathian Chungnungbera Puithiam, Abrahama lalho that haw, lo hmuaka malsawmtu,
7:2 Abrahaman engkimah sawma pakhat a pek ve bawka kha, puithiamah a awm reng fo si a. A hming awmzia hrilhfiahin a hmasa berah Felna Lal a ni a, a dawt lehah Salem Lal a ni bawk (chu chu Remna Lal tihna a ni),
7:3 ani chu pa nei lovin, nu nei lovin, chi thlahtute chanchin nei lovin, awm tan ni nei lovin, nun tawp pawh nei hek lovin Pathian Fapa anga siam a ni zawk.
7:4 Tichuan, chi thlahtu Abrahaman a ral lak tha apiang zinga mi sawma pakhat a peka chu, chu mihring ropuizia chu ngaihtuah teh u.
7:5 Levia thlahte zinga puithiam hna chang apiangte chuan Dan thu angin mite lakah sawma pakhat lak tur thu an hmu ngei a ni, chu chu an unaute lakah a ni, chungho chu Abrahama thalbea chhuak ni mah sela;
7:6 amaherawhchu an zinga a thlahtute chhui tel ve lohva khan Abrahama lakah sawma pakhat a la a, thutiamte vawngtu chu mal a sawm ta bawk a.
7:7 Nimahsela, hnial rual lohvin a te zawk chu ropui zawka malsawmsakin a awm thin.
7:8 Tin, hetah hian mihring thi thinte hian sawma pakhat an hmu thin a, chutah erawh chuan ‘a nung reng’ tia a thu an hriattira chuan a hmu a ni.
7:9 Tin, Levia, sawma pakhat la thintu mah hian, Abrahama kutah khan sawma pakhat a pe tawh, tih theih a ni;
7:10 Melkisedekan a lo hmuah lai khan a pa thalbeah a la awm si a.
7:11 Tichuan, Leviaho puithiam nihna avanga famkimna hmuh theih a nih chuan (chu mi hnuaiah chuan miten Dan thu an lo hmu si a), Arona awm dan anga ruat lovin, Melkisedeka awm dan anga puithiam dang lo awm hi engnge a la ngaihna?
7:12 Puithiam nihna chu a lo danglam tak avangin Dan thu chu tihdanglam ve a lo ngai reng a ni.
7:13 Heng a thu an sawia hi hnam hrang mi a ni si a, chu mi hnam zinga mi chu tumah maichamah chuan an che ngai lo.
7:14 Kan Lalpa chu Juda hnam zinga lo chhuak a ni tih a lang fiah si a, chu mi hnam thu-ah chuan Mosian puithiamho kawng thu engmah a sawi lo.
7:15 ,16 Tin, Melkisedeka anga puithiam dang, tisa thupek Dan thu anga siam mi ni lo, nun tawp nei lo thiltihtheihna anga siam zawk mi a lo awm dawn chuan kan thu sawi kha nasa takin a fiah lehzual ang;
7:16 ,15 Tin, Melkisedeka anga puithiam dang, tisa thupek Dan thu anga siam mi ni lo, nun tawp nei lo thiltihtheihna anga siam zawk mi a lo awm dawn chuan kan thu sawi kha nasa takin a fiah lehzual ang;
7:17 “Nang zawng, Melkisedeka awm dan anga, Chatuana Puithiam i ni e,” tih hriattir a ni si a.
7:18 A chak loh leh a sawt lohna avangin thupek awm hmasa chu paihin,
7:19 (Dan thu chuan engmah a tifamkim si lo,) beiseina tha zawk, Pathian kan hnaihna thin hi hruai luhin a lo awm ta hlauh zawk a ni.
7:20 ,21 Tin, chhechham loh a nih loh avangin (anni zawng chhechham lova puithiama siam an ni si a; ani erawh chu, “ ‘Nang zawng chatuana Puithiam i ni e,’ tiin, Lalpan chhia a chham a, a lamlet tawh loving,” tia a hnena sawitu kut khan chhechhama Puithiama siam a ni zawk),
7:21 ,20 Tin, chhechham loh a nih loh avangin (anni zawng chhechham lova puithiama siam an ni si a; ani erawh chu, “ ‘Nang zawng chatuana Puithiam i ni e,’ tiin, Lalpan chhia a chham a, a lamlet tawh loving,” tia a hnena sawitu kut khan chhechhama Puithiama siam a ni zawk),
7:22 chuti bawka nasa chuan Isua chu thuthlung tha zawk tihnghehpuitu a lo ni ta.
7:23 Tin, anni zawng thih avnga awm hlen an thulh thin avngin puithiama siam an tam ngei a; 24ani erawh chu chatuana a awm reng avangin a Puithiam nihna chu thlak theih rual lohvin a nei ta zawk a ni.
7:25 Chutichuan, amaha Pathian hnena lo kalte chu a tawpkhawk thlengin a chhandam thei bawk a ni, anmahni tawngtaisak turin chatuana a nun reng avangin.
7:26 Chutiang Puithiam Lalber mi thianghlim, depde lo, bawlhhlawh kai lo, mi sualte laka awm hrang, vante aia chungnung zawka siam tawh neih chu kan tan a awm reng si a.
7:27 Ani chuan chung Puithiam Lalberte hlan ang chuan ni tin, mahni sual avanga inthawina hlan hmasak zeta, chu mi hnua mite sual avanga hlan a ngai lo ve; chu chu vawikhatah a lo titlingtla ta nghal si a, mahni a inhlan chawp lai khan.
7:28 Dan thu chuan mihring chak lohna neite chu puithiam lalberah a ruat thin a; chhechham thu, Dan thu hnua lo awm erawh chuan Fapa, chatuan atan tihfamkim tawha chu a ruat zawk a ni.
8:1 ,2 Tichuan, kan thusawite zingah hian a pawimawh ber chu hei hi a ni: Chutiang Puithiam Lalber, vanahte khian Ropuibera lalthutphah ding lama han thua Hmun Thianghlim leh biak buk taktak mihring sak ni lo, Lalpa sak zawka rawngbawltu chu kan nei tih hi.
8:2 ,1 Tichuan, kan thusawite zingah hian a pawimawh ber chu hei hi a ni: Chutiang Puithiam Lalber, vanahte khian Ropuibera lalthutphah ding lama han thua Hmun Thianghlim leh biak buk taktak mihring sak ni lo, Lalpa sak zawka rawngbawltu chu kan nei tih hi.
8:3 Puithiam Lalber apiangte chu thilpek leh inthawinate hlan turin ruat an ni si a; chutichuan he Puithiam Lalber pawh hian eng emaw tal hlan tur neih a ngai a ni.
8:4 Leiah hian lo awm sela chuan puithiam reng a ni lo vang, Dan thu ang zela thilpek hlantute lo awm sa an awm avangin.
8:5 Chungte chuan van thilte chu a lem leh a hlim rawng an bawl thin a,Mosian biak buk a sak dawn laia Pathian hrilha a awm ang khan; “Tlanga entawn tur chu an entir che ang khan engkimsiam turin fimkhur rawh,”a tih kha.
8:6 Tunah erawh chuan thuthlung tha lehzual palai a nih angzia zelin rawngbawl hna tha zawk a lo chang ta, chu thuthlung chu thutiam tha zawk chungahte siam a ni.
8:7 Thuthlung hmasa chu sawisel bo ni se, thlun nawn a ngai lo tur.
8:8 Anmahni demin heng hi a sawi si a.“Ngai teh, ni te a lo thleng dawn e, Lalpan a ti, Chung niahte chuan Israela chhungte leh, Juda chhungte hnenah chuan thuthlung thar ka siam ang:
8:9 An thlahtute Aigupta ram atanga hruai chhuak tura An kuta ka chelh nia An hnena ka thlun ang kha ni lovin; Ka thuthlungah chuan an awm reng si lo va, Tichuan anni chu ka ngaihsak ta lo a ni, Lalpan a ti.
8:10 Chung ni hnuah chuan Israela chhungte hnena Thu ka thlun tur chu heng hi a ni, Lalpan a ti; An rilruah ka thupekte ka dah ang a, An thinlungah ka ziak bawk ang a,Tin, anni tan Pathian ka ni ang a, Keia tan anni chu ka mite an ni bawk ang;
8:11 Tin, mi tinin ‘Lalpa chu hre rawh’ tiin, Mahni tualkhatpui leh, Mahni unau an zirtir dawn tawh lo va; A te ber atangin a lian ber thlengin, An zain mi hre theuh tawh dawn a ni.
8:12 An bawhchhiatnaahte zah ka ngai ang a, An sualte pawh ka hre reng dawn tawh si lo,” tiin.
8:13 “Thuthlung thar,” tiin a sawi avang khan a hmasa chu a tihlui ta a ni. Tichuan lo hluia lo upa tawh chu a ral dawn dawn a ni.
9:1 Tin, thuthlung hmasa pawh khan Pathian rawngbawl dante leh a hmun thianghlim, he khawvela hmun thianghlim chu a nei a.
9:2 Biak buk an siam a, a tawntirh chu khawnvar dahna te, dawhkan te, chhangdah te awmna a ni; chu chu Hmun Thianghlim an ti a ni.
9:3 Tin, puanzar pahnihna piahah chuan biak buk, hmun Thianghlim Ber an tih chu a awm a;
9:4 chu miah chuan rangkachak rimtui halna bawm leh thuthlunna bawm rangkachaktia luan chu a awm a, chu mi thuthlunna bawm chhungah chuan Manna awmna rangkachak bel te, Arona tiang lo chawr te, thuthlunna lung phekte a awm a;
9:5 a chung lamah zahngaihna thutphah hliahin, ropuina Cherubte an awm bawk a; chung thute chu tunah zawng akip akawiin kan sawi thei lo vang.
9:6 Tin, chung thilte chu chutianga siam a lo ni a, Puithiamhovin Pathian rawng bawlin biak buk tawntirhah chuan an lut fo thin a;
9:7 a dawttuah erawh chuan Puithiam Lalber chauh kum tin vawi khat, thisen keng lo lovin a lut thin; chu chu mahni tan leh mite sual atan a hlan thin.
9:8 Thlarau Thianghlimin hei hi a hriattir a: Hmun Thianghlim luhna kawng chu a la lang rih lo ve, biak buk tawntirh chu a la din chhung chuan tih hi;
9:9 chu chu tun lai tehkhinna hi a ni; chu mi ang zelin thilpek leh inthawinate pawh an hlan thin, chungte chuan chhia leh tha hriatna kawngah chuan a betu chu a tifamkim thei lo;
9:10 chung chu (ei tur te, in tur te, sil tur hrang hrangte nen) tisa lam dante chauh siamthat hun hma atan ruat chu a ni.
9:11 Nimahsela, Krista chu thil tha, lo awm turahte Puithiam Lalbera lo kalin, biak buk, kuta sak loh, (chu chu heng thil siam zinga mi a ni lo tihna a ni,) ropui leh famkim zawk kal tlangin,
9:12 kan tan chatuana tlanna hmu tawhin kelte leh bawng note thisen vang ni lovin, ama thisen vang zawkin Hmun Thianghlimah chuan vawi khatah a lo lut tlingtla ta nghal a.
9:13 Kel leh bawngpate thisen leh bawngla vap, mi bawlhhlawh chung theh mahin tisa thiang khawpa a tihthianghlim si chuan,
9:14 Krista, chatuana Thlarau zara hmelhem lova Pathian hnena inhlana thisen chuan Pathian Nung rawng bawl turin in chhia leh tha hriatna chu thiltih thite lakah chuan a va tithianghlim nasa dawn em!
9:15 Tin, he mi avang hian, ani chu thuthlung thar palai a ni, thuthlung hmasa hnuaia bawhchhiatnate lak ata tlan nan mi a lo thih tak avangin kohvate chuan chatuana roluah tur thutiam chu an chang thei ang.
9:16 Thurochhiah awmna apiangah a chhiahtu thihna awm ve lo thei a ni si lo.
9:17 Mi an thih hnuin thurochhiahin thu a nei si thin, a chhiahtu la dam chhung erawh chuan thu reng a nei lo.
9:18 Chutichuan, thuthlung hmasa pawh kha thisen lovin an tinghet lo.
9:19 ,20 Dan thu ang zelin thupek apiang chu Mosian mi zawng zawng a hrilh hnuin, “Hei hi Pathianin in hnena a pek tlat thuthlung thisen a nih hi,” tiin bawng note leh kelte thisen chu, tui nen, sapsen nen, husop nen a la a, lehkhabu ngei leh mi zawng zawng pawh chu a theh a ni.
9:20 ,19 Dan thu ang zelin thupek apiang chu Mosian mi zawng zawng a hrilh hnuin, “Hei hi Pathianin in hnena a pek tlat thuthlung thisen a nih hi,” tiin bawng note leh kelte thisen chu, tui nen, sapsen nen, husop nen a la a, lehkhabu ngei leh mi zawng zawng pawh chu a theh a ni.
9:21 Chu lo pawh chu, biak buk leh rawngbawlna hmanrua zawng zawng chu chutiang bawkin thisen chuain a theh ta bawk a.
9:22 Tin, Dan thu zawngin engkim thaw mai hi thisena tihthianghlimin a awm thin a, thisen chhuah lohvin ngaihdamna reng a awm lo.
9:23 Chutichuan, vana thil awm angte chu chung chuan tihthianghlimin a awm tur reng a ni, van thil taktakte erawh chu chung aia inthawina tha zawktein tihthianghlimin a awm tur a ni.
9:24 Krista chu kuta sak hmun thianghlim, atak anpuiah chuan a lut si lo va; tunah Pathian hmaah kan aia ding turin vanah ngei a lut ta zawk a;
9:25 nimahsela Puithiam Lalber chu kum tinin mahni thisen lo, thisen keng chunga Hmun Thianghlima a lut thin angin,ani chu mahni inhlan fo turin a lut hek lo;
9:26 chuti ni suh sela, leilung pian tirh achin vawi tam tak a tuar tawh tur a ni; nimahsela tun lai hun tawpah hian inthawi nana inhmang chawpin sual tihbo nan vawi khatah a lo lang ta nahgl a ni.
9:27 Tin, mihring tan vawi khat thih ruat a ni chu mi hnuah chuan rorelna a awm ang;
9:28 chutiang bawkin Krista pawh mi tam tak sualte kalpui tura vawi khat hlana awm tawhin, chhandamna hmu tura amah lo nghaktute hnenah chuan sual tel lovin vawi hnihnaah a lo lang leh ang.
10:1 Dan thu chuan thil tha, lo awm turte anpui tak nei lovin, a thla chauh a neih 0avangin, kum tina inthawina pangngai a hlan fote chuanin a lo hnaite chu engtikah mah an tifamkim thei dawn si lo.
10:2 Chuti ni suh sela, a betute chu vawi khata tihthianghlim nghala lawmin, sual inhriatnate an neih loh avangin hlan an bang tawh daih dawn lawm ni?
10:3 Nimahsela, chung inthawinaah chuan kum tinin sualte hriat lehna a lo awm fo zawk thin.
10:4 Bawngpate leh kelte thisen chuan sualte tibo thei rual a ni si lo. Chutichuan, khawvela a luh laiin “Inthawina leh thil hlan i duh lo va, Ka tan taksa mi buatsaihsak zawk a:
10:6 Halrala pumpeknaahte leh, Sual tana inthawinaahte chuan Lawmna reng i nei lo.
10:7 Chu veleh chuan keiin, ‘Aw Pathian, ngai teh, (Lehkhabu zialah chuan ka thu ziak a ni a) I duhzawng ti turin ka lo kal e,’ ka ti a,” a ti a.
10:8 A chhakah hian, “Inthawina te, thil hlan te, halrala pumpekna te, sual tana inthawina te i duh lo va, chungah chuan lawmna i nei hek lo,” a ti a, (chungte chu Dan thu anga hlan a ni a,)
10:9 chu veleh chuan, “Ngai teh, i duhzawng ti turin ka lo kal e,” a lo ti ta a. A pahnihna hi a tundin theihna turin a hmasa chu a la bo ta a ni.
10:10 Chu mi duhzawng chuan Isua Krista taksa vawi khata hlan nghal vang khan tihthianghlimin kan awm ta.
10:11 Tin, Puithiam tinrengin kawla ni chhuak chhiara rawngbawlin, sualte engtik maha tibo thei lo inthawina pangngai hlan fovin an ding thin;
10:12 ani erawh hi chu chatuan atan sualte tana inthawina pakhat chauh a hlan hnuin, Pathian ding lamah a han thu ta zawk a;
10:13 chuta chin chu a hmelmate a kephah nghahchhana siam an nih hma loh zawng a nghak reng a.
10:14 Thil hlan pakhat chauhvin tihthianghlim tawhte chu chatuan atan a tifamkim tawh si a.
10:15 ,16 Tin, Thlarau Thianghlim pawh chuan min hriattir bawk a:
10:16 ,15 Tin, Thlarau Thianghlim pawh chuan min hriattir bawk a:
10:17 “An sualte leh an bwhchhiatnate Ka hre reng tawh lo vang,” a ti si a.
10:18 Tichuan chutiangte ngaihdamna apiangah chuan sual tan thil hlan a awm tawh lo a ni.
10:19 ,20 Chutichuan, unaute u, kawng min ruatsak, kawng thar leh nungah chuan, puanzar chu (chu chu a taksa tihna a ni) kal tlangin, Isua thisen avang chuan Hmun Thianghlimah khan luh kan huam avang leh,
10:20 ,19 Chutichuan, unaute u, kawng min ruatsak, kawng thar leh nungah chuan, puanzar chu (chu chu a taksa tihna a ni) kal tlangin, Isua thisen avang chuan Hmun Thianghlimah khan luh kan huam avang leh,
10:21 Pathian chhungte chunga Puithiam ropui tak kan neih avngin
10:22 kan thinlunga chhia leh tha hriatna tha lo chu theh faisaka awma kan taksa pawh tui fima buala awmin, rinna famkim neia thinlung tak zet puin i hnaih ang u.
10:23 Kan beisei thurin hi a nghin lohna turin i pawm tlat ang u, thutiamtu chu a rinawm si a;
10:24 tin, hmangaih leh thil tha tiha inchawk tho turin inngaihtuah tawn ang u;
10:25 thenkhat tih dan anga kan inkhawmte bansan lovin, infuih tawn zawk ang u; ni chu lo hnai telh telha in hriatin infuih tawn nasa lehzual sauh rawh u.
10:26 Thutak hriatna famkim chu kan chan hnua thil kan tihsual luih si chuan sualte tana inthawina a awm tawh hauh lo vang a,
10:27 rorelna hlauhawm tak lo thleng tur leh dotute kang ral tur thinurna mei kan hmabak a ni mai.
10:28 Mosia Dan thu pawisa lo mi chu hretu pahnih pathum emaw thuin, lainatna tel lovin an thi thin.
10:29 Pathian Fapa rap beta, thuthlung thisen amah tihthianghlimna chu thil narana ruat a, khawngaihna Thlarau tivuitu chu, chu mi ai chuan eng tia hremna nasa zawk nge tuar tlaka ruat tur nia inngaih?
10:30 “Phuba reng reng keima lak tur a ni, keiman ka thungrul ang,” tih leh, “Lalpa chuan a mite a ngaihtuah ang,” ti lehtu chu kan hre si a.
10:31 Pathian nung kuta tluk chu thil rapthlak tak a ni.
10:32 Nimahsela, hmana tihena in awm hnua tuarna buai nasa tak in tuar lai nite kha hre leh rawh u;
10:33 kawng khatah chuan hmuhsit leh hrehawmte pawh tuarin ennawma siamin in awm a, kawng khatah chuan chutianga hmana awmte chu tuarpuitute in lo ni a.
10:34 Kawl bunte chu in lainat a, sum tha zawk, awmhlen bawk tur chu mahniin in nei tih hriain in sum laksakte pawh lawm takin in lo tuar ta bawk si a.
10:35 Chutichuan, in rinna lawmman chu paih bo suh u, lawmman ropui tak a nei dawn si a.
10:36 Pathian duhzawng in tih hnuin thiltiam chu in hmuh theih nan chhelna in ngai asin.
10:37 Rei lo te achinah Lo kal tura chu a lo kal dawn si a, Rei a ril tawh lo vang.
10:38 Nimahsela ka mi fel chu Rinnain a nung ang: A hnungtawlh erawh chuan, Ka rilruin amahah chuan lawmna reng a nei lo vang.
10:39 Nimahsela, keini zawng boral tura hnungtawlh pawla mi kan ni lo va; nunna humhim tura rinna nei pawla mi kan ni zawk.
11:1 Tin,rinna hi thil beiseite awm ngeia hriatna,thil hmuh lohte hriatfiahna a ni.
11:2 Chu miah chuan upahote khan fak an hlawh si a.
11:3 Rinnain a ni khawvelte hi Pathian thua siam a ni tih kan hriat ni, chutichuan thil hmuh theihte hi thil lang theitea siam a ni lo.
11:4 Rinnain Abela chuan Kaina ai chuan inthawina tha zawk Pathian hnenah a hlan a,chu mi avang chuan mi fel a ni tih hriattirna a hlawh a, Pathianin a thilpekte kawngah chuan thu a hriattir a; tin, chu mi rinna avang chuan ani chuan thi tawh hnuin thu a la sawi ta fo a ni.
11:5 Rinnain Enoka kha thihna hre lo tura lak bovin a awm a; tin, Pathianin a lak bo avangin hmuh theih a ni ta lo va; lak bova a awm hmain Pathian lawmzawng mi a ni tih an hriattir tawh reng a.
11:6 Nimahsela, rinna lovin ama lawmzawng mi nih rual a ni lo; Pathian hnena lo kal chuanin, ani chu a awm tih leh zawngtute hnena lawmman pek hmang a ni tih rin tur a ni.
11:7 Rinnain Nova chu thil lo la lang lote kawng thu-ah Pathian hrilha lo awmin, Pathian tih dekin, a chhungte chhandam nan lawng a tu a; chu chuanin khawvel chu thiam loh a chantir ta a, rinna avanga felna awm chu rochungtu a lo ni bawk a.
11:8 Rinnain Abrahama chu kohva a awm lai khan a rochun tur hmuna lut turin kal chhuah thu a pawm ta a;tin,a kalna tur lam pawh hre lovin a kal chhuak ta a.
11:9 Rinnain ram tiamah khan mi rama cham ang maiin a lo cham ta reng a, thutiam hmuhkhat a rochunpui tur Isaaka leh Jakobate nen chuan puan inahte an awm a;
11:1 0khua lungphumte nei mi, Pathian relbawl leh siam chu a nghk reng si a.
11:11 Rinnain Sari ngei pawhin, a tiamtu chu rinawma a ruat avangin, tar hnu tawhin chi pai theihna a hmu a,
11:12 Chutichuan, mipa pakhat lakah (ani chu mitthi ang a ni si a) vana arsite anga tam, tuifinriat kama tiau vaivut chhiar sen loh anga tam an lo chhuak ta a.
11:13 Chung zawng zawngte chu rinna neiin an thi ta a, thiltiamte chu chang lovin; nimahsela chung chu hla tak atanga hmuin chibai an lo buk tawh a, leiah hian mikhual leh khualzin mai an ni tih an inhriattir tawh bawk a.
11:14 Chutiang thu sawite chuan anmahni ram tur an zawng tih an tilang si a.
11:15 Tin, an chhuahna ram chu lungkham sela chuan hawnna remchang an hmu tawh ngei tur a ni.
11:16 Nimahsela, tunah zawng ram tha lehzual chak an lo ni a, chu chu vana mi a ni; chutichuan Pathianin an Pathian tiha awm chu a zak lo ve; an tan khua lam a lo buatsaihsak tawh si.
11:17 Rinnain Abrahama chu fiaha a awm khan Isaaka chu a hlan a;
11:18 “Isaaka-ah hian i thlahte chhui an ni ang” tih Pathian thutiam dawngtu chuan a fapa mal neih chhun chu a hlan a ni;
11:19 mitthi pawh Pathian chuan a kai tho thei ang tih a ring a, thi hnu nung leh ang maiin a hmu kir leh ta reng a ni.
11:20 Rinnain Isaaka chuan thil lo la thleng turte thu-ah pawh Jakoba leh Esauva mal a sawmsak a.
11:21 Rinnain Jakoba chuan a thih dawn lai khan Josefa fate chu mal a sawm ve ve a; a tiang hmawr rinchhanin Pathian a be bawk a.
11:22 Rinnain Josefa chuan a thih a lo hnaih khan Israela thlahte chhuah tur thu a sawi a; a ruhte kawng thu-ah thu a pe bawk a.
11:23 Rinnain Mosia a pian lai khan, nausen hmel tha tak a ni an tih avangin, thla thum chhung a nu leh a pa thurukin a awm a; lal thupek pawh an hlau lo.
11:24 Rinnain Mosia chuan a lo puitlin hnu khan Pharaoa fanua fapaa vuah a duh lo va;
11:25 rei lo te atan sual nawmna hlimpui ai chuan Pathian mite nena tihduhdah tuar a thlang ta zawk a;
11:26 Krista an hmuhsitna chu Aigupta ram rote ai chuan sum ropui zawkah a ruat a; lawmman pek tur chu a thlir thin avangin.
11:27 Rinnain lal thinurna chu hlau lovin Aigupta ram a kalsan a, hmuh theih lova chu a hmuh avngin a tuar tan tan a ni.
11:28 Rinnain Kalhlen Kut leh thisen theh kha a siam a, fa tir tiboraltu chuan anmahni a tawh lohna turin.
11:29 Rinnain khawmuala kal angin Tuifinriat Senah khan an kal kai a; Aiguptahovin chu chu tih an tum ve a, lem zawhin an awm ta a.
11:30 Rinnain Jeriko khaw kulh kha ni sarih an hual hnuin a chim ta a.
11:31 Rinnain Rahabi nawhchizuar kha awih loho zingah chuan a boral ve ta lo, enthlatute chu tlang taka a lawm avangin.
11:32 Tin, engnge ka la sawi cheu vang? Gideona thu te, Baraka thu te, Samsona thu te, Jephthaa thu te leh Davida thu te, Samuela thu te, zawlneiho thu te hril ila, hunin mi daih dawn si lo va;
11:33 chungte chuan rinnain ramte an la a, thil fel an ti a, thutiamte an chang a, sakeibaknei khate an tihchihsak a,
11:34 mei thiltihtheihna an timit a, khandaih hriam lam an pumpelh a, chak lohna ata chak taka siamin an awm a, indonaah chuan mi hrat khawkheng an lo ni a, hnam dang indo pawlte an tlanchhiattir a.
11:35 Hmeichhiaten an mitthite tho leh an hmu a, mi dngte pawh saisakin an awm a, thawhlehna tha lehzual an chan theihna turin chhan chhuah an duh lo va;
11:36 mi dangte pawhintihnawmnah leh vuakte an tuar a, a ni, chu lo pawh chu, kawlbun leh tan ina khungte an tawk bawk a;
11:37 lunga denin an awm a, thingzainaa zai bunin an awm a, thlemna an tawk a, khandaiha sahhlumin an awm a; beram vun leh kel vun sinin an vakvai a; rethei takin, hrehawm takin, tihduhdahin an awm a;
11:38 (chungho tan chuan khawvel hi awmna tlak a ni lo) thlalerah te, tlangah te, pukah te, khuarkhurumah te an vak an vak thin a.
11:39 Tin, chung zawng zawngte chuan rinna avnga fak lo hlawh tawhin, thiltiam chu an chang lo va,
11:40 keini tel lova anni chu tihfamkima an awmloh nan Pathianin keimahni kawng thu-ah thil eng emaw tha lehzual a buatsaih tawh avangin.
12:1 ,2 Chutichuan, chhumpui nasa tak ang thlirtuten min hual vel avng hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u. Ani chuan a hmaa hlimna awm avang chuan mualphona chu ngainepin kraws chu a tuar a, Pathian lalthutphah ding lamah khian a han thu ta a.
12:2 ,1 Chutichuan, chhumpui nasa tak ang thlirtuten min hual vel avng hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u. Ani chuan a hmaa hlimna awm avang chuan mualphona chu ngainepin kraws chu a tuar a, Pathian lalthutphah ding lamah khian a han thu ta a.
12:3 In thlarau lamah in inthlahdah a, in lo hah loh nan, anmahni chung tha lo turin mi sualte chutianga hnialkalhna tuartu chu ngaihtuah teh u khai.
12:4 Sual dovin thisen chhuak khawpin in la tang lo va:
12:5 fuihna thu, fate zilh anga zilna che u kha, in lo theihnghilh ta e.“Ka fa, Lalpa thununna chu ngainep suh la, A zilhhauva i awmin inthlahdah hek suh;
12:6 Lalpa chuan a hmangaih chu a thunun thin a, Fa a lawm apiang chu a vaw thin asin ni,” tih hi.
12:7 In tuar hi nangmahni thunun nan a ni; fate chunga tih angin Pathianin in chungah a ti a nih hi; pa thunun loh fa tu nge awm ngai le?
12:8 Fa zawng zawng hlawh thin thununna chu hlawh lova in awm erawh chuan fa tak ni lovin, sawn in ni a ni ang asin.
12:9 Chu lo pawh chu min thunun turin kan tisa pate kan neih kha, chungte chu kan zah si a; chu mi aia nasa zawkin, an nunna turin thlaraute Pa thu thuin kan awm dawn lawm ni?
12:10 Anni chuan ni rei lo te, tha an tih ang zelin min thunun ngei tak a, ani erawh chuan a thianghlimna chu kan chan ve theih nan, kan thatna turin min thunun zawk a ni.
12:11 Tin, thununna reng reng hi tuar lai chuan lawmawmin a lang lo va, lungchhiatthlakin a lang zawk thin, tuar hnuah erawh chuan chu mia sawizawia awmte tan chuan rah thlamuanawm tak felna chu a chhuahsak thin.
12:12 Chutichuan, kut uai thlate chu char rawh u, khup zawite nen;
12:13 tin, kebai chu tihpelhsawlh lohva, tihdamin a awm zawk nan, in kete tan kawng ngilte siam rawh u.
12:14 Mi zawng zawng nena inremna leh thianghlimna um rawh u, chu mi thianghlimna lovin tuman Lalpa an hmu lo vang:
12:15 Fimkhur rawh u, Pathian khawngaihna ata in bo dah ang e, khakna zung eng emaw lo chawra tibuai che uin,chu chuan mi tam tak chu tihbawlhhlawhin an awm ang a,
12:16 inngaih hmang emaw, Esauva anga Pathian zah lo mi emaw an lo awm dah ang e. Ani chuan a fa tir nihna chu chaw vawi khat eiah a hralh a.
12:17 Chu mi hnuah chuan malsawmna chu rochun a duh pawhin, mittui tla chungin thahnemngai takin zawng mah sela, rilru lamletna remchang a hmuh loh avangin paihin a awm ta tih in hre si a.
12:18 ,19 Nangni zawng tlang khawih theih, meia kang te, chhum dum te, thim te, thlipui te, tawtawrawt rikna te, thusawi thawm awmna te kha thleng in ni si lo va; (chu thawm hretute chuan thu dang reng an hnena sawi tawh lo turin an ngen a,
12:19 ,18 Nangni zawng tlang khawih theih, meia kang te, chhum dum te, thim te, thlipui te, tawtawrawt rikna te, thusawi thawm awmna te kha thleng in ni si lo va; (chu thawm hretute chuan thu dang reng an hnena sawi tawh lo turin an ngen a,
12:20 “Sa lam pawhin tlang chu khawih sela, lunga den hlumin a awm tur a ni,” tih thupek kha an tuar thei ta si lo va;
12:21 an thil hmuh pawh chu a hlauhawm em em a, chutichuan Mosian, “Ka hlauvin ka khur nasa em em a,” a tih hial kha)
12:22 Zion tlang te, Pathian nung khua, van Jerusalem te, chhiar sen lohho vantirhkoh inkhawmpui te,
12:23 fa tir vana hming chuang kohhranho hnen te, Pathian, mi zawng zawng ngaihtuahtu hnen te, mi fel tihthatfamkimho thlarau hnen te,
12:24 Isua, thuthlung thar palai hnen te, thisen theh, Abela thisen aia thu tha zawk sawitu hnen te thleng in ni zawk.
12:25 Thusawitu chu in lo duh lo dah ang e, fimkhur rawh u. Leia anmahni zilh lawktu kha an duh loh maha hremna an pumpelh si loh chuan, keini, van atanga min zilh lawktu hawisantute hian kan pumpelh lo lehzual ang.
12:26 Chu mi lai chuan a aw khan lei hi a tinghing a; nimahsela tunah hian, “Vawi khat chu lei chang ni lovin, van pawh ka la tinghing leh ng,” tiin a tiam ta zawk a.
12:27 Tin, “Vawi khat chu ka la tinghing leh ang,” tih hian, thil nghing lote chu a awm reng theihna turin, thil lo nghingte chu thil siamte ang maiin sawn bovin a awm dawn tih a hriattir a ni.
12:28 Chutichuan, ram tihnghin rual loh kan chan avang hian khawngaihna i nei ang u, chu mi zarah chuan zah leh tih dek chungin Pathian lawmzawng rawng kan bawl thei dawn zuk nia;
12:29 Kan Pathian hi mi kanralhmang mei a ni si a.
13:1 Unau inhmangaihna hi awm zel rawh se.
13:2 Mikhualte chungah hmangaih chhuah theihnghilh suh u; chutiang tiin thenkhattenhre lovin vantirhkohte an lo thleng si a.
13:3 Phuara awmte chu phuar ni ve angin hre reng ula; hrehawm tuarte chu taksaa awm ve bawk in nih avangin hre reng rawh u.
13:4 Mi zawng zawng zingah inneih hi chawimawiin awm sela, khum pawh tihbawlhhlawh lovin awm rawh se; inngaite leh uirete chu Pathian in a ngaihtuah dawn si a.
13:5 In rilru putzia chu tangka ngainatna tel lo ni rawh se; in thil neih chhun chungahte chuan lungawi rawh u; amah ngeiin, “Engtikah mah ka thlahthlam tawp lo vang chia, kal pawh ka kalsan tawp lo vang che,” a ti si a.
13:6 Chutichuan, huai takin, “Lalpa chu mi tanpuitu a ni, Ka hlau lo vang; Mihringin engnge mi tih theih ang?” kan ti thin a ni.
13:7 In hotu, Pathian thu lo hrilhtute che u chu hre reng ula, an awm dana thil chhuak chu ngaihtuahin an rin dan zir rawh u.
13:8 Isua Krista chu niminah nen, vawiinah nen, kumkhua pawhin a pangngaiin a awm fo vang.
13:9 Zirtirna tinreng leh zirtirna mak tak len bovin awm suh u; thinlung hi khawngaihnaa tihngheha a awm chu a tha si a, ei turtea tihngheha awm lovin; chutiang kawng lungkhamte chuan chungah chuan sawtna an hmu chuang lo.
13:10 Keini zawngin maicham kan nei a, chu mi-ah chuan biak buk rawngbawltute chuan an ei tur a ni lo.
13:11 Ran, a thisen Puithiam Lalberin Hmun Thianghlima sual tana hlana a luhpui thina ruangte chu daipawnah an hal thin si a.
13:12 Chutichuan, Isua pawhin, ama thisen ngeia mite chu a tihthianghlim theihna turin kulh kawngkhar pawn lamah chuan a lo tuar ta a.
13:13 Chutichuan, amah an hmuhsitna chu phurin daipawnah a hnen lamah i kal chhuak ang u.
13:14 Hetah hian khaw hmun nghet kan nei si lo va, khaw lo la awm tur chu kan zawng zawk a ni.
13:15 Tichuan, ama zarah chuan faka inthawina hi Pathian hnenah i hlan fo vng u, chu chu a hming tanna hmuite rah chu a ni.
13:16 Nimahsela, thil tihthat leh thilphal hi theihnghilh suh u; chutianga inthawina chungah chuan Pathian a lungni em em si a.
13:17 In hotute thu awih ula, an thu thuin awm rawh u; chanchin sawi tur an nih avangin, lungngai chunga sawi lova, hlim chunga an sawi theihna turin in thlarau an vensak thin che u a ni; lungngai chunga sawi chu in tana pawi tur a ni si a.
13:18 Min tawngtaisak rawh u; engkimah fel taka awm tumin, chhia leh tha hriatna thiang tak kan nei tih dik takin kan inhre si a.
13:19 Tin, rang deuhva in hnena tirh lehin ka awm theih nan, chu chu ti turin ka ngen lehzual sauh che u a ni.
13:20 Tin, remna Pathian, beram Vengtu ropui tak,kan Lalpa Isua chatuana thuthlunna thisenzara mitthi zing ata hruai chhuak lehtu khan,
13:21 a mithmuha a lawmzawng ang apiang Isua Krista zarah keimahniah thawkin, a duhzawng ti turin thil tha tinreng kawngah tifamkim che u rawh se; Isua Krista hnenah chuan ropuina chatuanin awm rawh se. Amen.
13:22 Nimahsela, unaute u, ka ngen a che u, fuihna thu hi ngaithei hram hram rawh u: in hnenah thu tlem te ka ziak si a.
13:23 Kan unaupa Timothea kha an chhuahtir ta tih lo hre ve rawh u; a lo kal hma deuh chuan amah nen kan rawn hmu ang che u.
13:24 In hotute zawng zawng leh mi thianghlimte zawng zawng kha chibai mi buksak ang che u. Itali rama mite hian chibai an buk a che u.
13:25 In zaa hnenah khawngaihna awm rawh se. Amen. |
posted by zoblog @ 11:10 AM  |
|
|
|
|
|
