|
| Wednesday, September 12, 2007 |
1:1 Paula, Pathian min Chhandamtu leh Krista Isua kan Beiseina ruat anga Krista Isua tirhkoh chuan:
1:2 Rinnaa ka fa tak tak Timothea hnenah : Pathian kan Pa leh, Krista Isua kan Lalpa hnen ata, khawngaihna te, zahngaihna te, remna te lo awm rawh se.
1:3 Makedonia ram ka pan dawn laia ka ngen che ang khan tunah pawh Ephesi khuaa awm reng turin ka ngen a che. Chuta mi thenkhat chuan zirtirna dik lo an thehdarh a, ti tawh lo turin hrih rawh.
1:4 Thawnthu mai mai leh thlahtute hming chhui sen loh chhui bansan rawh se; chung chuan rinnaa Pathian lama intihsawtna thlen lovin inhnialna mai mai a thlen zawk si a.
1:5 Thinlung thianghlim leh chhia leh tha hriatna thiang leh rinna dik tak atanga lo chhuak hmangaihna neih theih nan chu chu ti ka ni.
1:6 Mi thenkhatte an kal kawi avangin chu chu an pensan a, thu lawi lo sawina lamah an kal ta a;
1:7 an thusawi awmzia leh paukhauh taka an thu hrilh chanchin chu hre si lovin, Dan zirtirtute nih an duh thin a ni.
1:8 Dan chu a tha a ni tih kan hre si, miin a hman that phawt chuan.
1:9 Heng hi hria sela: Dan hi mi fel tak tana siam a ni lo va, dan pawisa loho leh dan bawhchheho tan te, Pathian ngaihsak loho leh mi sualho tan te, mi thianghlim loho leh Pathian zah loho tan te, pate thattuho leh nute thattuho tan te,mihring thattuho tan te,
1:10 ,11 inngaihhmangho tan te, mawngkawhurho tan te, mihring ruk hmangho tan te, dawtheiho tan te, chhechham derho tan te leh fak tlak Pathian Chanchin Tha ropui zirtirna dik ka hnena kawltir ang ni lova, thil dang reng awm apiangte tan pawh chuan siam a ni zawk e.
1:11 ,10 inngaihhmangho tan te, mawngkawhurho tan te, mihring ruk hmangho tan te, dawtheiho tan te, chhechham derho tan te leh fak tlak Pathian Chanchin Tha ropui zirtirna dik ka hnena kawltir ang ni lova, thil dang reng awm apiangte tan pawh chuan siam a ni zawk e.
1:12 ,13 Mi tichaktu Krista Isua kan Lalpa hnenah chuan lawmthu ka sawi a ni, hmanah sawichhetu leh tiduhdahtu leh sawisatu ni mah ila, rinawma mi ngaiha, a a rawngbawltua mi ruat tak avang hian; nimahsela ring lo chunga hre lova ti ka nih avangin a ni, zahngaihna ka lo hmuh ni;
1:13 ,12 Mi tichaktu Krista Isua kan Lalpa hnenah chuan lawmthu ka sawi a ni, hmanah sawichhetu leh tiduhdahtu leh sawisatu ni mah ila, rinawma mi ngaiha, a a rawngbawltua mi ruat tak avang hian; nimahsela ring lo chunga hre lova ti ka nih avangin a ni, zahngaihna ka lo hmuh ni;
1:14 tin, kan Lalpa khawngaihna chu rinna leh Krista Isua hmangaihnain nasa takin a liam ta.
1:15 “Krista Isua mi sualte chhandam turin khawvelah hian a lo kal,” tih hi a rinawmin a pawm tlak em em a ni; an zinga mi sual ber ka nih hi.
1:16 Nimahsela he mi avang hian a ni, zahngaihna ka hmuh ni, Isua Krista chuan mi sual ber keimahah hian a dawhtheihzia zawng zawng a lantir theih nan; tun achina chatuana nunna hmu tura amah la ring turte kawhhmuhna turin.
1:17 Lalber chatuana awm, chhe thei lo, hmuh theih loh, Pathian taka chauh chu chatuana chawimawi leh ropuiin awm rawh se. Amen.
1:18 Ka fa Timothe, hmana i chanchin an hrilh lawk thute ang khan, chu zilhna thu chu ka kawltir a che, chung chuan indona tha chu i do theih nan;
1:19 rinna leh chhia leh tha hriatna thiang tak pawm tlatin; mi thenkhatten chung chu paih thlain rinna kawngah chuan lawng keh angin an keh chhe ta.
1:20 Chung zingah chuan Humenaia leh Alexsandra an tel a; Pathian sawichhiat loh an zir theih nan anni chu Setana ka pe a ni.
2:1 Chutichuan, atir berin, thil dil tawngtaina te, tawngtaina hrim hrim te, tawngtaisakna te, lawmthu sawina te mi zawng zawng tan siamsak turin ka fuih a che;
2:2 lalte leh thuneitute zawng zawng tan pawh; Pathian ngaihsak leh zahawm taka inrema thlamuanga kan khawsak theih nan.
2:3 Chu chu min chhandamtu Pathian ngaihin a thain, a lawm tlak a ni;
2:4 ani chuan mi zawng zawng chhandama awmah leh thutak hriaah a duh a ni.
2:5 Pathian pakhat chauh a awm a, Pathian leh mihring inkara Palai pakhat chauh a awm bawk a, amah chu mihring a ni, Krista Isua,
2:6 mi zawng zawng tlan nana inpea chu: chu chu a hun tak zela hriattirin a awm tur a ni;
2:7 chu mi ti turin tlangaupuituah leh tirhkohva ruat ka ni; (thu taktak ka sawi a, ka daw lo ve;) rinna leh thutaka Jentailte zirtirtua ruat ka ni.
2:8 Chutichuan, mipahovin hmun tinah kut thianghlim pharin, thinrim lo leh inhnial lovin tawngtai sela ka duh a ni.
2:9 Chutiang bawkin hmeichheho pawh inthlahdah lo leh inbel lutuk lovin, thuam inchawih tawkin inchei sela, sam phiarin emaw, rangkachakin emaw, tuikeplungin emaw, puan man tam tak taktein emaw inchei lovin;
2:10 amaherawhchu (hmeichhia, Pathian ngaihsak intite chu inphu tawkin) thil tihthatin inchei sela ka duh.
2:11 Hmeichhiain thu awih tlatin ngawi rengin zir rawh se.
2:12 Amaherawhchu, hmeichhiain zirtir zawng ka phal lo, mipa chunga thu neih ka phal hek lo, ngawi rengin awm zawk rawh se.
2:13 Adama chu siam hmasak a ni a, chu mi hnuah Evi chu siam a ni a.
2:14 Tin, Adama chu bumin a awm lo va, hmeichhia erawh chu bumin a awm a, bawhchhiatnaah a tlu ta a.
2:15 Nimahsela, rinna leh hmangaihna leh thianghlimna neiin, rilru fel tak nena an awm fo chuan fa hrin avangin chhandamin an awm ang.
3:1 “Tupawh Kohhran hotua tan duh chuan hnathawh tha a duh a ni,”tih hi a dik a ni.
3:2 Chutichuan, Kohhran hotu chu sawiselbo, nupui pakhat nei, insum thei, rilru dik tak, mi fel, mi lawm dan thiam, zirtir thiam,
3:3 uain ruih hmang lo, mi velh hmang lo, mi nunnem ni zawk tur, kawhmawhbawl lo, tangka sum ngaina lo,
3:4 zahawm taka fate kilkawia mahni inchhung khawsak rel fel thiam mi ni tur a ni;
3:5 (miin ama in chhung khawsak mah a rel fel thiam si loh chuan Pathian Kohhranho engtin nge a enkawl theih ang?)
3:6 Ring thar mi ni tur a ni lo, chutilochuan chapovin a awm ang a, diabola thiam loh channa chu a chang ve dah ang e.
3:7 Chung lo pawh chu pawn lama mite fakin a awm bawk tur a ni, chutilochuan sawichhiata awmin diabola thangah a awk dah ang e.
3:8 Chutiang bawkin Kohhranho rawngbawltute chu mi zahawm an ni tur a ni; kamtam te, uain heh te, hlepna bawlhhlawha duham mi te an ni tur a ni lo;
3:9 chhia leh tha hriatna thiangin rinna thuruk chu pawm mi an ni zawk tur a ni.
3:10 Tin, chungte pawh chu fiahin awm hmasa rawh se, chu mi hnuah sawiselbo an lo nih chuan Kohhranho rawngbawl lam hna thawk rawh se.
3:11 Chutiang bawkin hmeichhiate pawh mi zahawm an ni tur a ni, hektute ni lovin, insum thei leh engkima rinawm an ni tur a ni.
3:12 Kohhranho rawngbawltute chu an fate leh anmahni in chhung khawsak rel felin nupui pakhat nei ni rawh se.
3:13 Kohhranho rawngbawl lam hna thawk tha tawhte chuan dinna tha tak leh Krista Isuaa rinna kawngah chuan huaina nasa tak an insiam si thin a.
3:14 Rei lo te chinah i hnenah lo kal beiseinain heng thu hi i hnenah ka ziak a ni;
3:15 nimahsela ka la awm rei tak dahin Pathian chhungte zinga mi engtia awm tur nge an nih i hriat theih nan ka ziak a ni; Pathian chhungte chu Pathian nung Kohhranho, thutak ban leh innghahna chu an ni.
3:16 Tin, Pathian ngaihsakna thuruk chu hnial rual lohvin a ropui a ni: “Tisaa lo langa, Thlarauva thiam changa, Vantirhkohte hmuha, Jentailte zinga tlangaupuia, Khawvelah hian mite rina, Ropuinaa hruai chhoh taka chu.”
4:1 ,2 Nimahsela, nakin hunah chuan mi thenkhatte chu, mi dawtheite vervekna avangin hruaibona thlaraute leh ramhuaite zirtirna thu ngaihsakin rinna chu an la bansan ang tih Thlarau chuan chiang takin a sawi a. Chung mi dawtheite chu anmahni chhia leh tha hriatna ngeia thir linga deh ang an ni a,
4:2 ,1 Nimahsela, nakin hunah chuan mi thenkhatte chu, mi dawtheite vervekna avangin hruaibona thlaraute leh ramhuaite zirtirna thu ngaihsakin rinna chu an la bansan ang tih Thlarau chuan chiang takin a sawi a. Chung mi dawtheite chu anmahni chhia leh tha hriatna ngeia thir linga deh ang an ni a,
4:3 inneih an khap thin a, englo ei turte (thutak hriaa ringtuten lawmthu sawia pawm tura Pathianin a siamte chu) ei loh tur an ti thin.
4:4 Pathian thilsiam tinreng hi a tha si a, lawmthu hrila pawm a nih tawh phawt chuan engmah duh loh tur a ni lo;
4:5 Pathian thu leh tawngtainain tihthianghlim a ni tawh si a.
4:6 Chungte chu unaute i hriattir chuan Krista Isua rawngbawltu tha tak, rinna leh zirtirna tha tun thlenga i la zawm thua chawm i ni ang.
4:7 Amaherawhchu, Pathian zah lohna leh pitarte thawnthu mai mai duh suh. Tin, Pathian ngaihsak turin insawizawi rah:
4:8 taksa insawizawi na hi sawt zawng a sawt ve bawk a; Pathian ngaihsakna erawh hi chuanin nunna tuna awm sa leh la awm leh tur pek tiamna a neih avangin kawng tinrengah a sawt a ni.
4:9 He thu hi a rinawmin a pawm tlak em em a ni.
4:10 Chutichuan, Pathian nung chu kan rin avangin kan thawk rim a, kan bei hram hram a ni si a; ani chu mi zawng zawng Chhandamtu a ni a, a ringtute Chhandamtu a ni deuh ber mai.
4:11 Chung thu chu pe la, zirtir rawh.
4:12 I naupanna tumahin ngainep suh se; thusawi kawngah te, chetze kawngah te, hmangaih kawngah te, rinna kawngah te, thianghlimna kawngah te ringtute tihhmuhtu ni zawk ang che.
4:13 Ka lo kal hma loh zawng chhiar te, thu hrilh te, zirtir te bei uar rawh.
4:14 Nangmaha awm thilpek, hrilh lawk anga upahote kut nghata Pathianin a neihtir che kha thlahthlam suh.
4:15 Mi zawng zawng hnena i sawtna a lan theih nan chung thilahte chuan taima la, chungah chuan inhmang zo rawh.
4:16 Nangmah leh i zirtirnaah chuan fimkhur la; chung thil tiin awm reng rawh; chutiang tiin nangmah leh i thu ngaithlatute chu i chhandam dawn zuk nia.
5:1 Putar deuhte hau suh la, pa angin thlem zawk rawh; rawlthar deuhte chu unau angin;
5:2 pitar deuhte chu nu angin; nula deuhte chu thianghlim takin farnu angin.
5:3 Hmeithai, hmeithai taktakte chu chawimawi rawh.
5:4 Nimahsela, hmeithai tupawhin fate emaw, tute emaw nei sela, chungte chuan anmahni in chhung lamah Pathian ngaihsaka awm leh anmahni hringtute chungah that ve thung zir zet rawh se; chu chu Pathian lawmzawng a ni si a.
5:5 Hmeithai taktak mahni chauhva awm chuan Pathian chungah beiseina a nei tlat a, achhun azanin dil leh tawngtaiin a awm fo thin a.
5:6 Amaherawhchu,hmeithai mahni nawmna ngawta inpe chu a dam lai pawhin a thi a ni.
5:7 Sawiselbova an awm theih nan chung thu pawh chu pe rawh.
5:8 Tupawh mahni chhungkhat lainate ngaihsak lo va, mahni chenpui chhungte ngei pawh ngaihsak lo chuan rinna an phatsan a ni, ring lo mi aiin an sual zawk.
5:9 ,10 Hmeithai chu kum sawmruk achin hnuai lama mi ni lova, mi pakhat nupui ni tawha thil tha tih kawnga mi faka a awm chuan hmeithaia ziak theih a ni – fate lo chawmtlei tawha mikhualte lo thleng tawha mi thianghlimte ke lo sil tawha mi mangangte lo chhawmdawl tawha thil tha tinreng taima taka a lo tih tawh phawt
5:10 ,9 Hmeithai chu kum sawmruk achin hnuai lama mi ni lova, mi pakhat nupui ni tawha thil tha tih kawnga mi faka a awm chuan hmeithaia ziak theih a ni – fate lo chawmtlei tawha mikhualte lo thleng tawha mi thianghlimte ke lo sil tawha mi mangangte lo chhawmdawl tawha thil tha tinreng taima taka a lo tih tawh phawt
5:11 Hmeithai la nula deuhte erawh chu ziak duh su; An chakna avanga Krista lamah an lo ngheh lohvin pasal neih an duh leh mai thin.
5:12 An thu tiam an bawhchhia a, an thiam lo a ni.
5:13 Tin, chu lo pawh chu in tinah an leng lawr a, thatchhiat pawh an ching thin a; thatchhiat chang pawh ni lovin, thu sawi loh tur sawiin kamtam leh mite thiltih relsak an ching bawk thin a ni.
5:14 Chutichuan, hmeithai la nula deuhte chuan pasal nei sela, fate nei sela, in chhung khawsak rel sela, sawiselna tur remchang reng hmelma chu hmuhtir suh sela ka duh a ni.
5:15 Tunah pawh mi thenkhat chuan Setana lam panin an pensan ta si a.
5:16 Ringtu hmeichhiain hmeithai awmpui nei sela, anni chu amah chuan chhawmdawl mai rawh se, kohhranho chu tihbuaiin awm suh se, hmeithai, belh tur nei lote chu an chhawmdawl theih nan.
5:17 Kohhran upa rorel thate chu a leh hniha chawimawi tlaka ngaih ni rawh se, thuhril leh zirtirnaa thawk rimte chu chawimawi tlaka ngaih lehzual ni rawh se.
5:18 Pathian Lehkha Thu chuan, “Sebawngpain buh a chil laiin a hmui phuar suh ang che,” a ti a. “Hnathawktu chu a hlawh hmu tlak a ni,” a ti bawk a.
5:19 Kohhran upa an hekna chu hretu pahnih emaw pathum emaw kaa mi lo chu pawm suh.
5:20 Thil tisualtute chu mi zawng zawng hmaah zilhhau rawh, mi dangte pawhin an hlauh ve theih nan.
5:21 Heng thu hi thleithlak bik nei lovin, thlei bik neia engmah ti lovin, Pathian leh Krista Isua leh vantirhkoh thlante mithmuhin zawm turin thahnemngai takin ka hriattir a che.
5:22 Tuma chungah kut nghat thut suh la, mi dang sualnaahte chuan tel hek suh; intithianghlim reng rawh.
5:23 Tui chauh in mi ni tawh suh la, i pum avang leh i dam loh fo avangin uain tlem te hmang thin ang che.
5:24 Mi thenkhat sual chu a langsar a, an tuar nghal bawk thin, thenkhat erawh chu a lang lawk lem lo va.
5:25 Chutiang bawkin thil tha tih lang nghal a awm a, lang nghal rih lo mah se thup hlen theih a ni lo.
6:1 Pathian hming leh a zirtirna thu sawichhiata a awm loh nan, bawih nghawngkawl bat apiangte chuan anmahni pute engkimah chawimawi tlakah ngai rawh se.
6:2 Tin, ringtu pu neite chuan unau an nih avangin ngainep suh se, amaherawhchu sawtna hmutute chu ringtu leh duh takte an nih avangin an rawng bawlsak lehzual rawh se.Chung thu chu zirtir la, fuih rawh.
6:3 Mi tupawhin zirtirna dang a zirtir a, thutak (Kan Lalpa Isua Krista thu chu) leh Pathian ngihsak lam zirtirna a awih loh chuan
6:4 ani chu a chapo va, engmah a hre lo va, hriat ahnekin inhnial leh thu kalh kawngah chuan a a ta zawk a ni. Chung atang chuan awhna te, insualna te, sawichhiatna te, tha lo lama rinna te,
6:5 hnialhratna te a chhuak thin a; chutiang hnialhrat mite chu rilru chhe nei leh thutak nei lo mi, Pathian ngaihsak hi hlawkna emaw titu an ni.
6:6 Pathian ngaihsakna hi lungawina tel zawngin hlawkna nasa tak a ni reng a ni.
6:7 Khawvelah hian engmah kan luhpui si lo va, engmah kan chhuahpui thei bawk hek lo.
6:8 Nimahsela, ei tur leh silh tur neiin chungh chuan kan lungawi ang.
6:9 Amaherawhchu, hausak tumte chu thlemnaah te, thangah te, atthlak leh tikhawlo thei duhna tam takah te an tlu lut thin, chung duhnate chuan chhiatna leh boralnaah chuan mite a tipil thin.
6:10 Tangka sum ngainat hi sual tinreng bul a ni si a; chu chu thenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a.
6:11 Nimahsela, nang, Pathian mi, chung thilte chu tlansan la, felna te, Pathian ngaihsakna te, rinna te, hmangihna te, dawhtheihna te, thuhnuairawlhna te um zel rawh.
6:12 Rinna intihsiakna tha chu bei la, chatuan nunna chu vuan rawh; chu mi chang turin koh i ni a; hretu tam takte mithmuhah tanna tha chu i tan tawh kha.
6:13 Pathian, thil engkim tinungtu leh Krista Isua, Pontia Pilata hmaa tanna tha tantu mithmuhah chuan thu ka pe a che;
6:14 kan Lal Isua Krista rawn inlar leh hma loh chuan thupek kha thianghlim tak leh sawiselbova pawm turin.
6:15 Chu inlarna chu a hun takah chuan fak tlak Thuneitu tak chauh, lalberte Lalber, lalte Lal chuan a entir ang;
6:16 amah chauh chuan thih theih lohna a nei a, hnaih theih rual loh engah chuan a awm a, amah chu tumahin an hmu ngai lo va, hmuh pawh an hmu thei hek lo; ama hnenah chuan chatuana chawimawina leh thiltihtheihna awm rawh se. Amen.
6:17 He mi khawvela hausate hi chapo lo tur leh sum rinawm lovah hian an beiseina nghat lova, thil zawng zawng lawmna tura tam taka min petu Pathian chungah chuan nghat zawk turin zilh rawh;
6:18 thil tha ti turin, thil tha tih ngah turin, thil phala thawhlawm peih turin,
6:19 nunna, nunna taktak chu an vawn theih nan, hun lo thleng tur atan chuan lungphum tha tak an tana khawl khawm turin fuih rawh.
6:20 Aw Timothe, i hnena kawltira awm chu vawng tha rawh. Pathian zah lo lam thu sawi mai mai leh, dik lo taka “Finna” an vuah hnialna hi hawisan rawh.
6:21 Chu chu thenkhatten nei emaw intiin rinna kawng chu an kal kawisan ta a. Khawngaihna i hnenah awm rawh se. |
posted by zoblog @ 11:17 AM  |
|
|
|
|
|
