| Wednesday, September 12, 2007 |
1:1 Paula, Krista Isuaa nunna awm tiamna thu chu hrilh kawnga Pathian duhzawnga Krista Isua tirhkoh chuan,
1:2 Ka fa duh tak Timothea hnenah: Pathian kan Pa leh Krista Isua kan Lalpa hnen ata khawngaihna te, zahngaihna te, remna te lo awm rawh se.
1:3 ,4 Lawmin ka khah theih nan hmuh che ka duh em em a, i mittui hre rengin achhun azanin bang lovin ka tawngtainaahte chuan ka hriatpui thin che avangin Pathian hnenah lawmthu ka hril a ni, mi thlahtute chena chhia leh tha hriatna thiang tak neia a rawng ka bawl thina hnenah chuan;
1:4 ,3 Lawmin ka khah theih nan hmuh che ka duh em em a, i mittui hre rengin achhun azanin bang lovin ka tawngtainaahte chuan ka hriatpui thin che avangin Pathian hnenah lawmthu ka hril a ni, mi thlahtute chena chhia leh tha hriatna thiang tak neia a rawng ka bawl thina hnenah chuan;
1:5 rinna taktak nangmaha awm chu ka hre reng si a, chu rinna chu atirin i pi Loisii-ah chuan a awm a, i nu Euniki-ah chuan a awm bawk a, nangmahah pawh a awm tih dik takin ka hria.
1:6 Chuvangin, ka kut nghah avnga Pathian thilpek nangmaha awm kha chhem alh turin ka hriatpui che a ni.
1:7 Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a.
1:8 Chutichuan, kan Lalpa thu hriattirna chu zahpui suh la, kei, ama mi tang pawh hi mi zahpui hek suh ang che. Chanchin Tha avanga hrehawm hi Pathian thiltihtheihna angzia ziain mi tuarpui zawk ang che.
1:9 Ani chuan kan thiltih angte ni lovin, ama ruat leh khawngaihna ang zawkin min chhandam a, kohna thianghlimin min ko bawk a; chu khawngaihna chu leilung pian hmain Krista Isuaah chuan min pek a ni tawh,
1:10 nimahsela min chhandamtu Krista Isua inlarna avang hiantunah tihlanin a awm ta. Ani chuan thihna chu a tiboralin Chanchin Thain nunna leh boral theih lohna a tilang ta;
1:11 chu mi Chanchin Tha thu chu hriattir turin tlangaupuituah leh tirhkohvah leh zirtirtuah ruat ka ni.
1:12 Chuvang chuan a ni, heng thil pawh hi ka tuar ni; nimahsela ka zak lo ve; ka rina chu ka hria, a hnena ka kawltir chu, chu mi ni atan chuan a vawng tha thei tih dik takin ka hre bawk a.
1:13 Krista Isuaa awm rinna leh hmangaihna neiin, thu dik dan ka kaa i hriatte kha nei tlat rawh.
1:14 Thil tha i hnena kawltira awm kha, kan chhunga Thlarau Thianghlim awm hianin vawng tha rawh.
1:15 Asia rama awm zawng zawngten mi hawisan tih kha i hria a; an zingah chuan Phugella leh Hermogena an tel a ni.
1:16 Lalpa chuan Onesiphora chhungte hnenah zahngaihna pe rawh se, ani chuan mi tiharh fo va, ka khaidiat bun pawh mi zahpui si lo va;
1:17 Rom khuaa a lo kal lai khan ngun takin mi zawng chhuak ta zawk a ni.
1:18 (Chu mi niah chuan Lalpa hnenah zahngaihna hmu turin Lalpa chuan ani chu ruat rawh se.) Ephesi khuaa rawng a bawl nasatzia kha i hre hle bawk a ni.
2:1 Chutichuan, nang ka fa, Krista Isuaa khawngaihna awmah hian thiltihtheihna neiin awm ang che.
2:2 Tin, hretu tam takte zinga ka kaa thu i hriatte kha, chung chu mi rinawm, mi dangte zirtir chhawng thei tur angte hnenah chuan kawltir rawh.
2:3 Krista Isua sipai tha tak angin hrehawm mi tuarpui rawh.
2:4 Sipaia awm tura thlangtu chu a tihlawm theih nan, sipai tumah indo laiin tun damchhung khawsaknate hian a intihnawk ngai lo va.
2:5 Tin, intihsiaknaahte pawh chuan miin bei mah sela, dan angin a beih loh chuan khumtirin a awm ngai lo va.
2:6 Lo neitu thawk rim chu a rah chang hmasatu a ni tur a ni.
2:7 Ka thusawi hi ngaihtuah rawh; Lalpa chuan kawng engkimah hriat theihna a pe dawn si chia.
2:8 Isua Krista, Davida thlaha mi, ka Chanchin Tha sawi anga mitthi zing ata tho leha kha hre reng rawh;
2:9 chu Chanchin Tha avang chuan thil tisualtu angin phuar khawp hialin hrehawmte ka tuar thin a ni; nimahsela Pathian thu chu phuarin a awm si lo.
2:10 Chuvangin, Krista Isuaa awm chhandamna chu chatuana ropuina nen an hmuh ve theihna turin, Thlante avang chuan engkim ka tuar thin.
2:11 He thu hi a rinawm a ni: “A thihnaah kan thih tawh si chuan, A nunnah kan nung bawk ang;
2:12 Kan tuar chuan, A rorelnaah ro kan rel ang; Amah kan phatsan chuan, Ani pawhin min phatsan ang;
2:13 Keini rinawm lovin awm mah ila, Ani chu rinawmin a awm reng a ni; Amah leh amah a inphat thei si lo va,” tih hi.
2:14 Chung thu chu hriatpui la, thu mai mai chunga an inhnial loh nan Lalpa mithmuhah thahnemngai takin hriattir rawh, chu chu engmah a sawt lo va, a ngaithlatute tan boralna a ni zawk thin.
2:15 Hnathawktu, thutak thu fel taka hmang chu zak tur a ni lo angin, Pathian ngaiha thaa inentir turin thahnem ngai rawh.
2:16 Amaherawhchu, Pathian zah lo lam thu sawi mai mai chu hawisan thin ang che; chutiang mite chu Pathianngaihsak lohna lamah an nasa lehzual ang a,
2:17 an thu pawh chuan pan chhe ei angin a ei zel ang; an zingah chuan Humenaia leh Phileta an tel a ni;
2:18 chung mite chuan, “Thawhlehna chu tunah pawh a ni tawh daih,” tiin thutak kawng chu an kal kawisan a, mi thenkhatte rinna an tibo thin a.
2:19 Nimahsela, Pathian lungphum nghet chu a la ding reng a, he chhinchhiahna hi a nei a: “Lalpa chuan ama tate chu a hria,” tih leh, “Lalpa hming lam apiang chuan sual kalsan rawh se,” tih hi.
2:20 Nimahsela, in ropuiah hian bungbel, rangkachak leh tangkaruaa siam mi chauh a awm lo va, thing leh belleia siam mite pawh a awm thin a; thenkhatte ngaihhlut tur a awm bawk a, thenkhatte chu ngaihhlut loh tur a awm bawk a.
2:21 Chuvangin, chung thil laka mi a inthiarfihlim chuan bungbel thianghlim, Lalpa hman tlak, hnathawh tha tinrenga inpeih sa, ngaihhlut tur mi a ni ang.
2:22 Nimahsela, tleirawl chaknate chu tlansan la, thinlung thianghlima Lalpa lam apiangte zingah chuan felna te, rinna te, hmangaihna te, remna te um ve rawh.
2:23 Amaherawhchu, indonate a hring thin tih hriain, inhnialna atthlak leh fing lovahte chuan tel duh suh.
2:24 Lalpa bawih chuan do tur a ni si lo va, mi zawng zawng chungah zaidamin, zirtir thiamin, sual chungah dawhtheiin,
2:25 do tura insiamte chu thuhnuairawlh takin a zirtir zawk tur a ni; chutichuan Pathianin thutak chu an hriat famkim nan a simtir hlauhvin,
2:26 Pathian duhzawng ti atan Lalpa bawihin a manin, Diabola thang ata an chhuak thei mahna.
3:1 Tin, hei hi hre rawh, ni hnuhnungahte chuan hun khirh takte a lo awm ang.
3:2 Mi, mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thu awih lo te, lawm nachang hre lo te, thianghlim lo te,
3:3 hmangaihna pianpui nei lo te, huaikawmbawl te, hektu te, insum thei lo te, mi kawlhsen te, tha duh hauh lo te,
3:4 vervek te, thuhnudawn lo te, inngaihlu te, Pathian hmangaih aia mahni lawmna mai hmangaih zawktu te an ni dawn si;
3:5 Pathian ngaihsak anna an nei ang a, nimahsela a thiltihtheihna chu an awih lo vang; chung ang chu hawisan rawh.
3:6 Chung ang zinga mite chu inahte luta sual rit phur hmeichhe a deuhte sala man thintute kha an ni si, chutiang hmeichhiate chu chkna tinrenga hruai bo,
3:7 zir fo sia thutak hre phak ngai lo an ni.
3:8 Tin, Jannia leh Jambrian Mosia an dodal ang khan, chung mite pawh chuan thutak hi an dodal thin; rilru chhe tawh, rinna kawngah chuan Pathian duh lohzawng mi an ni.
3:9 Nimahsela, chung aliam chu an ti lo vang, an atzia mi zawng zawng hnenah a lo lang dawn si a, Jannia leh Jambria atzia a lo lang ang khan.
3:10 Nang erawh chuan ka zirtirna te, ka awm dan te, ka thil tum te, ka rinna te, ka dawhtheihna te, ka hmangaihna te, ka chhelna te,
3:11 mi mi tihduhdahna te, ka tuarna te i hre hle mai; Antiokei khuaah te, Ikonion khuaah te, Lustra khuaah te ka chunga thil thleng leh tihduhdah ka tuarnate kha; chung zawng zawngah chuan Lalpa chuan mi chhandam ta si a.
3:12 A ni, tupawh Krista Isuaa Pathian ngaihsaka awm tum apiang chuan tihduhdahnate an tuar bawk ang.
3:13 Mi sual leh tihdertute erawh chu mi bum leh buma awmin an sual zual deuh deuh ang.
3:14 ,15 Nimahsela, nang zawng, tu hnena zir nge i nih leh, Krista Isuaa rinna awm avang chuan chhandamna hmu khawpa tifing thei che Lehkha Thianghlimte chu i naupan tet ata hre tawh i ni tih hriain, i thil zir leh i thil hriat chianahte chuan awm reng rawh.
3:15 ,14 Nimahsela, nang zawng, tu hnena zir nge i nih leh, Krista Isuaa rinna awm avang chuan chhandamna hmu khawpa tifing thei che Lehkha Thianghlimte chu i naupan tet ata hre tawh i ni tih hriain, i thil zir leh i thil hriat chianahte chuan awm reng rawh.
3:16 Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te a sawt bawk a ni;
3:17 Pathian mi chu hna tha tinreng thawk tura kim taka inthuamin a famkim theih nan.
4:1 Pathian mithmuh leh mi nung leh mitthi ngaihtuahtu tur Krista Isua mithmuhah chuan a inlarna leh a ram chhalin, thahnemngai takin ka hriattir a che:
4:2 Thu chu hril rawh; a hunah te, a hun lovah te pawh bei zel rawh; dawh thei taka zirtir chungin an thiam loh hriattir la, zilh la, fuih rawh.
4:3 Zirtirna dik an ngaih peih loh hun a la thleng dawn si; an bengte a zat avangin anmahni duhzawng angin zirtirtute an hnenah an khawm zawk ang a,
4:4 an bengte chu thutak lamah an chhungawng ang a, thawnthu lam panin an peng tawh ang.
4:5 Nang erawh chu engkimah fimkhur la, hrehawm tuar la, Chanchin Tha hriltu lam hna thawk la, i rawngbawlna kha hlen rawh.
4:6 Kei zawng tunah pawh hlanin ka awm mek a ni si a,ka chhuah hun a thleng tawh e.
4:7 Intihsiakna tha chu ka bei zo tawh a, ka tlansiakna kawng ka hlen tawh a, rinna chu ka vawng reng tawh a ni;
4:8 tunah chuan felna lallukhum chu ka tan dahin a awm tawh a, chu chu Lalpa ngaihtuahtu fel tak chuan chu mi ni-ah chuan mi pe ang; ka hnenah chauh ni lovin, a inlarna ngai apiangte hnenah pawh.
4:9 Rang takin ka hnenah lo kal hram rawh;
4:10 Dema chuan tun lai khawvel hi a ngainat avangin mi kalsan a, Thessalonika khuaah a kal ta si a; Kreskea chu Galatia ramah a kal ta a, Tita chu Dalmatia ramah a kal ta bawk a.
4:11 Luka chauh ka hnenah a awm ta a. Marka kha sawm la, han hruai ve rawh, ani chu rawngbawl lamah ka tan a tangkai si a.
4:12 Tukika zawng Ephesi khuaah ka tir ta.
4:13 I lo kal hunah Troas khuaah Karpa hnena kawrfual ka hnutchhiah kha, lehkhabute nen khan rawn keng la, savun lehkha mawlh kha rawn keng ang che.
4:14 Aleksandra, dar chhun thiam kha, ka chungah a sual em em thin a ni, Lalpa chuan a thiltih ang zelin a thungrul ang;
4:15 a lakah khan nang pawh fimkhur rawh, kan thu a dodal nasa em si a.
4:16 Ka thiamna thu ka sawi hmasak tum chuan tumah rengin mi tanpui lo va, mi thlahthlam ta vek zawk a ni; a mawh chu phurin awm hlawm suh se.
4:17 Chanchin Tha keimah avanga hrilh kimin a awm theih nan leh Jentailte zawng zawng chuan an hriat theih nan, Lalpa chuan mi tan a, mi tichak ta zawk a ni; tin, sakeibaknei kaa mi kha chhan chhuahin ka lo awm ta a ni.
4:18 Lalpa chuan sualna zawng zawng lakah mi chhan chhuak ang a, a van ramah chuan him takin mi thlen ang; amah chu chatuana ropuiin awm rawh se. Amen.
4:19 Priski leh Akuila, Onesiphora chhungte nen khan, chibai mi buksak ang che,
4:20 Erasta chu Korinth khuaah chuan a awm ta reng a, Trophima erawh chu Mileti khuaah dam lovin ka kalsan ta a.
4:21 Thlasik hmain lo kal hram hram ang che.
4:22 Eubula te, Pudea te, Lina te, Klaudii te unau zawng zawngte nen chibai an buk a che.
4:22 Lalpa chu i thlarau hnenah awm rawh se. Khawngaihna in hnenah awm rawh se. |
posted by zoblog @ 11:16 AM  |
|
|
|
