| Wednesday, September 12, 2007 |
1:1 Atirin Thu a awm, Thu chu Pathian hnenah a awm, Thu chu Pathian a ni.
1:2 Chu mi chu atirin Pathian hnenah a awm.
1:3 Engkim azain ama siam a ni;thilsiam zawng zawng hi ama siam loh engmah a awm lo.
1:4 Amahah chuan nunna a awm; chu mi nunna chu mihringte enna a ni a.
1:5 Eng chu thim zingah a lo eng a; thimin chu chu a hre lo.
1:6 Pathian tirh mi pakhat a lo awm a, a hming chu Johana a ni.
1:7 Chu mi chu hriattir turin a lo kal a, eng thu chu hriattir turin; amah avanga mi zawng zawngin an rinna turin.
1:8 Ani chu eng chu a ni lo, eng thu chu hriattir tura lo kal a ni zawk e.
1:9 Eng tak mi tin tieng thin kha a awm a, khawvelah a lo kal mek a ni.
1:10 Ani chu khawvelah a awm, khawvel ama siam a ni, khawvelin amah a hre si lo.
1:11 Amah a mite hnenah a lo kal a, amaha miten an lo lawm si lo.
1:12 Nimahsela amah lawm apiang chu, an hnenah Pathian fate nih theihna tur a pe, a hming ringtute chu;
1:13 chung mite chu thisen hrin an ni lo va, tisa duhzawnga hrin an ni hek lo, mipa duhzawng pawha hrin an ni hek lo, Pathian hrin an ni zawk e.
1:14 Tin, Thu chu tisaah a lo chang a, kan zingah a awm ta a, (Pa fa mal neih ropui angin a ropuizia kan hmu,) khawngaih leh thutakin a khat.
1:15 Johanan a thu a hriattir a, a au va, “ ‘Ka hnunga mi zui tur khan mi lehkhalh tawh a ni, ka hmaa awm tawh reng a nih avangin,’ tia a thu ka sawi kha amah hi a ni,” a ti a.
1:16 A famkimna kan chang theuh, khawngaih chunga khawngaih leh chhawnna nen.
1:17 Dan thu Mosian a pe, khawngaihna leh thutak Isua Krista avangin a lo awm.
1:18 Tuman eng lai mahin Pathian an hmu lo, a Fapa mal neih, Pa angchhunga awm ngei khan a chanchin a hril tawh a ni.
1:19 Tin, Judaten, “Tunge i nih?”tia zawt tura Jerusalem khua ata a hnena puithiamte leh Levia chia mite an tirh lai khan heng hi Johana thu lo hriattir chu a ni:
1:20 tang lovin a inpuang a, “Krista chu ka ni lo ve,” tiin a inpuang a.
1:21 Tin, anni chuan a hnenah, “Tunge i nih le? Elija i ni em?” an ti a, an zawt a. Tin, ani chuan, “Ka ni lo ve,” a ti a. “Zawlnei kha i ni em?” an ti a. Tin, ani chuan, “Ni lo ve,” a ti a, a chhang a.
1:22 Tin, anni chuan a hnenah, “A nih leh, tunge i nih? Min tirtute kan chhan theih nan min hrilh ta che. I chanchin reng engnge i sawi dawn?” an ti a.
1:23 Tin, ani chuan, “ ‘Lalpa kalkawng tirual rawh u,’ tia thlalera autu aw ka ni, Zawlnei Isaia sawi ang khan,” a ti a.
1:24 An mi tirhate chu Pharisaite hnena mi an ni a.
1:25 Tin, anni chuan a hnenah, “Krista tal, Elija tal, zawlnei tal chu i nih si loh chuan engati nge i baptis thin le?” an ti a, an zawt leh a.
1:26 Tin, Johanan an hnenah, “Keiin tuiin ka baptis thin, in zingah mi pakhat in hriatloh a ding a ni.
1:27 ani chu mi zuitu tur chu a ni a, a pheikhawk hrui phelh tlak pawh ka ni lo ve,” a ti a, a chhang a
1:28 Chung thil chu Jordan rala Bethani khuaah, Johana baptisnaah khan an ti a ni.
1:29 Tin, atukah chuan Johanan Isua a hnenah lo kal dawnin a hmu a. Tin, a sawi a, “En teh u, Pathian Beram No, khawvel sual kalpuitu tur saw!
1:30 Saw mi saw a ni, ‘Mi pakhat mi lehkhalh khan mi zui dawn,ka hmaa awm sa reng a ni,’ ka tiha kha.
1:31 Amah chu ka lo hre si lo; nimahsela Israelten amah an hriat theih nan, tuia baptis-in ka lo kal a ni,” a ti a.
1:32 Tin, Johanan a thu a hriattir a, a sawi a, “Thlarau chu thuro angin van atanga chhuk ka hmu a, a chungah a fu reng a.
1:33 Amah chu ka hre si lo va, nimahsela tuia baptis tura mi tirtu khan ka hnenah, ‘Tu chungah pawh Thlarau zuk fua a chunga awm reng i hmuh apiang, amah chu Thlarau Thianghlima baptistu tur chu a ni ang,’ mi ti a.
1:34 Chu chu ka hmu tawh a, he mi hi Pathian Fapa a ni tih ka hriattir tawh,”a ti a.
1:35 Tin, atuk lehah Johana a ding a, zirtirte pahnih nen:
1:36 tin, Isua veivak lai a en a, “En teh u, Pathian Beram No saw,” a ti a.
1:37 Tin, a zirtirte pahnih chuan a thusawi chu an hria a, Isua an zui ta a.
1:38 Tin, Isua a hawi a, an rawn zui a hmu a, an hnenah, “Engnge in zawn?” a ti a. Tin, anni chuan, “Rabbi (chu chu Zirtirtu tihna a ni), khawiah nge i awm?” an ti a.
1:39 Anin an hnenah, :Lo kal ula in hmu ang,” a ti a. Chutichuan an kal a, a awmna chu an hmu a, chu mi ni chuan a hnenah an awm reng a; zanriah chum hun lai a nia.
1:40 Johana thusawi chu hriaa Isua zuitute pahnih chu, a pakhat zawk chu Andria, Simon Petera unau a ni.
1:41 Ani chuan a hmasa berin ama unau Simona a hmu a, a hnenah, “Messia kan hmu ta,” a ti a (chu chu Krista tihna a ni).
1:42 Tichuan Isua hnenah a rawn hruai a. Isuan ani chu a lo en a, “Johana fapa Simona i ni, Kiphaa an vuah ang che,” a ti a (chu chu Petera tihna a ni).
1:43 Tin, atukah chuan Isua chuan Galili rama kal a tum a, Philipa a hmu a, a hnenah, “Mi zui rawh,” a ti a.
1:44 Philipa chu Bethsaida khuaa mi a ni, chu chu Andria leh Petera awmna khua bawk a ni.
1:45 Philipa chuan Nathanaela a hmu a, a hnenah, “A chanchin Mosian Dan Lehkhabua a ziak leh, Zawlneiten an ziak kha, amah chu kan hmu ta, Nazaret Isua, Josefa fapa chu,” a ti a.
1:46 Tin, Nathanaela chuan a hnenah, “Nazaret khuaah thil tha a chhuak thei em ni?” a ti a. Philipa chuan a hnenah, “Lo kal la, en rawh,” a ti a.
1:47 Isuan Nathanaela a hnena lo kal dawnin a hmu a, a chanchin a lo sawi a, “En teh u, Israel mi tak, ngamthlemna reng nei lo saw,” a ti a.
1:48 Nathanaela chuan a hnenah, “Nangin engtin nge mi hriat?” a ti a. Isuan a hnenah,“Philipan a koh hma che a , theipui bula i awm lai khan ka hmu che a sin , a ti a,a chhang a .
1:49 Nathanaelan a hnenah, “Rabbi, Pathian Fapa i ni, Israelte Lalber i nih hi,” tiin a chhang a.
1:50 Isuan a hnenah, “ ‘Theipui bulah ka hmu che asin,’ i hnena ka tih avangin i ring a ni maw? Heng aia thil ropui zawk hi i la hmu ang,” a ti a, a chhang a.
1:51 Tin, Isua vekin a hnenah, “Tih tak meuhvin, tih tak meuhvin ka hrilh a che u, van inhawngah, Pathian vantirhkohte Mihring fapa chungah hian chhuk leh chho in la hmu ang,” a ti a.
2:1 Tin, ni thum niah, Galili rama Kana khuaah lawi chaw a awm a, chutah chuan Isua nu a awm.
2:2 Isua leh a zirtirte pawh lawi chaw eiah an sawm a.
2:3 Tin, uain-in a daih ta lo va, Isua nu chuan a hnenah, “Uain an tlachham ta e,” a ti a.
2:4 Tin, Isuan a hnenah, “Hmeichhia, nanga mi lo hriatsak tur engnge awm? ka hun a la thleng lo ve,” a ti a.
2:5 Tin, a nuin rawngbawltute hnenah, “In hnena a sawi apiang chu ti zel ang che u,” a ti a.
2:6 Tin, Judate silfai dan angin lung tuibel paruk, buk sawmli hmun hnih emaw, hmun thum emaw leng theuh, chutah chuan an hung a.
2:7 Tin, Isuan an hnenah, “Tuibelahte tui tikhat rawh u,” a ti a. Tin, a rawng rualin an tikhat theuh va.
2:8 Tin, an hnenah, “Tunah thal ula, ruaitheh fatu hnenah kalpui rawh u,” a ti a. Tin, an kalpui ta a.
2:9 Tin, ruaitheh fatu chuan tui uain-a lo chang ta chu a tem a, a chhuahna chin a hre lo va, (tui thal rawngbawltute erawh chuan an hria a) nupui nei tura chu a ko ta a,
2:10 a hnenah, “Mi tinin atirin uain tha an dah chhuak thin, tin, a tam deuh an in hnuin a tha lo deuh chu an dah chhuak thin; nang zawngin tun thlengin uain tha i la vawn hi,” a ti a.
2:11 Isuan he a chhinchhiahna tih tantirhna hi Galili ram Kana khuaah chuan a ti a, a ropuizia a lantir ta a; tin, a zirtirte chuan ani chu an ring a.
2:12 Tin, chu mi hnuah chuan Kapernaum khuaah a zuk kal a, amah leh a nu nen, a unaute nen, a zirtirte nen; chutah chuan ni rei lo te an awm a.
2:13 Tin, Judate Kalhlen Kut a hnai tawh a, Isua Jerusalem khuaah a han kal a.
2:14 Tin, Pathian biak ina sebawngte, beramte, thurote zuartuho leh, tangka thlengtuho thu a hmu a.
2:15 Tin, hruihrualin vuakna a siam a, beram leh sebawng azain Pathian biak in atang chuan a hnawt chhuak a, tangka thlengtute tangka chu a leihbua a, an dawhkante a namthluksak bawk a;
2:16 tin, thuro zuartute hnenah chuan, “Heng thil hi heta tangin kalpui rawh u, ka Pa in sumdawnna inah siam suh u,” a ti a.
2:17 (Tin, “I ina ka thahnemngaihin mi ei zo vang,” tih ziak a ni tih, a zirtirte chuan an hre leh ta a.)
2:18 Chutichuan Judaten a hnenah, “Heng thil i tih hi chhinchhiahna engnge min hmuhtir theih?” an ti a, an chhang a.
2:19 Isuan an hnenah, “He in hi tichhia ulang, ni thum chhungin ka tungding leh ang,” a ti a, a chhang a.
2:20 Tin, Judate chuan, “He in hi kum sawmli leh kum ruk sak a ni, nangin ni thum chhungin i tungding ang maw?” an ti a.
2:21 (Nimahsela a taksa in thu sawi a lo ni zawk si.
2:22 Chuvangin, mitthi zing ata a thawhlehin, chu mi thu chu a saiw tawh tih a zirtirten an hre leh ta a; tin, Pathian Lehkha Thu leh Isua thusawi chu an ring ta a.)
2:23 Tin, Kalhlen Kuta Jerusalem khuaa a awm lai chuan a thilmak tithe an hmu a, mi tam takin a hming an ring ta a.
2:24 Nimahsela Isua chu an lakah a ngampa lo, mi zawng zawng a hriata,
2:25 mihring thu tumaha hrilhfiah a ngaih loh avangin; amahin mihring chhunga awm apiang chu a hre si a.
3:1 Tin, Pharisaite zinga mi, a hming Nikodema, Judate hotu pakhat a awm:
3:2 chu mi chu zanah Isua hnenah a lo kal a, a hnenah, “Rabbi, Pathian hnen ata zirtirtua lo kal i ni tih ka hria; Pathian an chunga a awm loh chuan heng thilmak i tih ang hi tuman an ti thei lo vang,” a ti a.
3:3 Tin, Isuan a chhang a, a hnenah, “Tih tak meuhvin, tih tak meuhvin ka hrilh a che, mi tupawh an pian thar loh chuan Pathian ram an hmu thei lo vang,” a ti a.
3:4 Nikodeman a hnenah, “Mi, a tar hnuin engtin nge a pian theih ang? A nu pumah vawi hnih lutin a piang thei em ni?” a ti a.
3:5 Isuan a chhang a, “Tih tak meuhvin, tih tak meuhvin ka hrilh a che, mi tupawh tuiah leh thlarauva an pian loh chuan Pathian ramah an lut thei lo vang.
3:6 Tisaa piang apiang tisa a ni; Thlarauva piang apiang thlarau a ni.
3:7 I pian thar tur ka tih che hi mak ti suh.
3:8 Thli khawiah pawh a duh duhin a tleh thin, a ri i hria e, nimahsela khawi atanga lo kal nge, khawiah nge a kal dawn tih pawh i hre si lo; tupawh Thlarauva piang chu chutiangin an awm,” a ti a.
3:9 Tin, Nikodeman a chhang a, a hnenah, “Chung thil chu engtin nge a awm theih ang?” a ti a.
3:10 Isuan a chhang a, a hnenah, “Israelte zirtirtu i ni si a, chung chu i hre lo maw?
3:11 Tih tak meuhvin, tih tak meuhvin ka hrilh a che, keinin kan hriat chu kan sawi thin, kan hmuh chu kan hriattir thin; nimahsela kan thu hriattir in awih si thin lo.
3:12 Khawvela thil ka hrilh che u mah awih lo che u a, vana thil hrilh che u ila engtin nge in awih ang?
3:13 Vanah tumah an lawn ngai lo, van atanga lo chhuka chauh lo hi chu, Mihring Fapa vana awm hi.
3:14 “Tin, Mosian thlalerah rul a khaikan ang khan, Mihring Fapa hi khaikanin a awm bawk tur a ni;
3:15 tupawh a ring apiangin amah avanga chatuana nunna an neihna turin.
3:16 Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan.
3:17 Khawvel thiam loh chantir turin Pathianin a Fa khawvelah a tir lo, khawvel amah avanga an dam theihna turin a tir a ni zawk e.
3:18 “Tupawh amah ring chu thiam lohvin an awm lo vang, tupawh ring lo chu tun apangin thiam lohvin an awm, Pathian Fapa mal neih hming an rin loh avangin.
3:19 Hei hi thiam lohna a ni, eng khawvelah a lo kal a, nimahsela miten eng aiin thim an duh zawk, an thiltihte a sual avangin.
3:20 Tupawh thil tisual apiangin eng an haw thin, engah pawh an lo kal lo, chutilochuan an thiltihte a lang ang.
3:21 Amaherawhchu tupawh tidik apiang an thiltihte Pathian avanga ti an ni tih a lan nan, engah an lo kal thin,” a ti a.
3:22 Chung hnuah chuan Isua a zirtirte nen Judai ramah an kal a, chutah chuan Isua an hnenah a awm reng a, a baptis thin a,
3:23 Johana pawhin Ainon-ah, Salim khaw kiangah a baptis bawk a, chutah chuan tui a tam avangin; tin, mi an lo kal a, baptisma an chang hlawm a.
3:24 Chutih lai chuan Johana tan inah an la khung si lo va.
3:25 Tin, Johana zirtirte leh Juda pakhat, silfai thu-ah an lo inhnial a.
3:26 Tin, Johana hnenah an lo kal a, a hnenah, “Rabbi, Jordan rala i hnena awm, a thu mi i hriattir khan ngai teh, kha mi khan mi a baptis a, mi zawng zawng a hnenah an lo kal a ni,” an ti a.
3:27 Johanan a chhang a, “Mihringin engmah an nei thei lo, vana mi pek a nih loh chuan.
3:28 ‘Kei, Krista ka ni lo ve, a hmaa mi tirh ka ni,’ ka tih kha, nangni ngei mi hriatpuitu in ni.
3:29 Mo neitu chu a pasal chu a ni; nimahsela moneitu thian, a thu lo ngaichang rengtu chuan moneitu aw a hriat chuan a lawm em em thin; hei ka lawmna a thleng ta a nih hi.
3:30 Ani chu tlatlum tur a ni, kei erawh chu lang tur ka ni.
3:31 “Chung lam atanga lo kal chu mi zawng zawng aia chungnung ber a ni; leia piang chu leia mi a ni a, lei thu a sawi thin, van atanga lo kal chu mi zawng zawng aia chungnung ber a ni.
3:32 A hmuh leh ahriat apiang a hriattir thin a ni; tuman a thu hriattir an awih lo.
3:33 A thu hriattir awih chuanin, ‘Pathian chu mi dik tak a ni,’ tiin a hming nemin a ziak.
3:34 Pathian tirh chuanin Pathian thu a sawi thin; ani chuan teh kherin Thlarau a pe si lo.
3:35 Pain Fa a hmangaih a, a kutah engkim azain a pe tawh.
3:36 Tupawh Fa ring apiangin chatuan nunna an nei tawh; nimahsela tupawh Fa thu awih lo apiangin nunna an nei lo vang a, Pathian thinur an chungah a awm reng zawk a ni,” a ti a.
4:1 Tin, Isuan Johana aiin zirtir tam zawk a siam leh a baptis tih Pharisaiten an hria tih Lalpa chuan a hriat veleh,
4:2 (nimahsela Isua meuh chuan a baptis lo, a zirtirten an baptis zawk thin,)
4:3 Judai ram chu a kalsan a, Galili ramah a kir leh ta a.
4:4 Tichuan Samari ram a kal tlang tur a ni.
4:5 Chutichuan Samari ram khaw pakhat Sukar an tih chu a lo thleng a, Jakoban a fa Josefa hnena hmun a pek kiang kha;
4:6 Jakoba tuichhunchhuah pawh kha chutah chuan a awm. Chutichuan Isua chu a kal hah avangin tuichhunchhuah sirah chuan a thu chawt a: chawfak hun lai a ni a.
4:7 Tin, Samari hmeichhe pakhat tui chawiin a lo kal a. Isuan a hnenah, “In tur mi pe rawh,” a ti a.
4:8 (A zirtirte lah chu ei tur leiin khuaah an kal tawh si a.)
4:9 Chutichuan Samari hmeichhia chuan a hnenah, “Nang Juda mi i ni si a, kei Samari hmeichhia ka ni si a, engtizia nge ka hnena in tur mi dil?” a ti a. (Judaten Samari mite engah mah an hmang ngai si lo.)
4:10 Tin, Isuan a chhang a, a hnenah, “Pathian thilpek leh, ‘In tur mi pe rawh,’ i hnena titu hi hria la chu, nangin a hnenah i dil zawk tur a ni a, tin, anin tui nung a pe tawh tur che a ni,” a ti a.
4:11 Tin, hmeichhia chuan a hnenah, “Ka pu, khaina engmah i nei si lo va, tuichhunchhuah a thuk vei nen, khawi ata nge tui nung chu i hmuh?
4:12 Kan pu Jakoba aiin i ropui zawk em ni? Ani chuan he tuichhunchhuah hi min pe a, amah pawhin a in a, a fapate, a rante nen,” a ti a.
4:13 Tin, Isuan a chhang a, a hnenah, “Tupawh he tui in apiang an tuihal leh ang;
4:14 tupawh an hnena ka pek tur tui in apiang erawh chu kumkhuain an tuihal lo vang, keiin an hnena tui ka pek tur chu an kawchhungah tui hna a lo awm ang a, chatuana nun thlengin a chik chho vang,” a ti a.
4:15 Tin, hmeichhia chuan a hnenah, “Ka pu, chu tui chu mi pe rawh, ka tuihal loh nan leh, heng thleng thlenga tui chawi tura ka lo kal thin loh nan,” a ti a.
4:16 Tin, Isuan a hnenah, “I pasal va ko la, hetah lo haw leh ang che,” a ti a.
4:17 Tin, hmeichhia chuan a hnenah, “Pasal ka nei hlei nem,” a ti a, a chhang a. Isuan a hnenah, “ ‘Pasal ka nei hlei nem’ i tih hi i tidik e;
4:18 pasal panga i nei tawh, tuna mi i neih hi i pasal a ni lo reng a ni, he thu hi i tidik e,” a ti a.
4:19 Hmeichhia chuan a hnenah, “Ka pu, zawlnei i ni tih ka hre ta.
4:20 Keini thlahtute chuan he tlangah hian Pathian chibai an buk thin; nimahsela nangni zawngin, ‘Mihringin Pathian chibai an bukna hmun tur chu Jerusalem khuaah a awm,’ in ti thin,” a ti a.
4:21 Tin, Isuan a hnenah, “Hmeichhia, ka thu awih rawh, he tlangah kher lo pawh, Jerusalem khuaah kher lo pawh Pa chibai in buk hun a thleng dawn ta.
4:22 Nangnin in hriat loh chibai in buk thin; keini zawngin kan hriata chu chibai kan buk thin. Chhanhimna Judate hnen ata a lo chhuak dawn si a.
4:23 Chutichuan a hun a thleng dawn ta, tunah pawh a thleng tawh mek, chu mi hunah chuan Pathian chibai buktu taktakten thlarau leh tih tak zetin Pa chibai an buk ang, Pain chutiang mi chu a chibai buktu turin a zawng a ni.
4:24 Pathian chu Thlarau a ni; a chibai buktuten thlarau leh tih tak zetin chibai an buk tur a ni,” a ti a.
4:25 Tin,hmeichhia chuan a hnenah, “Messia, Krista an tih chu a lo kal dawn tih ka hria, ani chu a lo kal hunah engkim min la hrilh ang,” a ti a.
4:26 Tin, Isuan a hnenah, “Keimah a betu che hi amah chu ka ni asin,” a ti a.
4:27 Tin, chutih lai chuan a zirtirte chu an lo kal a, hmeichhia a bia chu mak an ti hle a; nimahsela tuman, “Engnge i zawn? Engati nge hmeichhia i biak?” pawh an ti lo.
4:28 Tin, hmeichhia chuan a tuibel a kalsan a, khuaah a kal a, mite hnenah,
4:29 “Ka thil tih apiang min hrilh zeltu mi pakhat a awm a, lo kal ula, en teh u; Krista a ni thei awm em?” a ti a.
4:30 Tin, anni chu khua ata chu an lo chhuak a, a hnen lam an pan ta a.
4:31 Chu mi hlanin zirtirte chuan a hnenah, “Zirtirtu ei rawh,” an ti chiam a.
4:32 Nimahsela ani chuan an hnenah, “Chaw, in hriat loh ei tur ka nei e,” a ti a.
4:33 Tin, zirtirte chu an inbia a, “A ei tur miin an rawn kensak em ni chu le?” an inti a.
4:34 Tin, Isuan an hnenah a sawi a, “Mitirtu duhzawng tih leh, a hna thawh zawh tur hi ka chaw a ni.
4:35 Nangnin, ‘Buh sengna tur thla li a la awm,’ in ti lawm ni? Ngai rawh u, ka hrilh a che u, dak ulang lote en rawh u, tun apangin seng turin a eng a ni.
4:36 A attuin hlawh a hmu thin a, chatuana nun thlenga awm turin rah a seng thin, a tuhtu leh a attu an lawm dun theih nan.
4:37 ‘Pakhatin a tuh thin a, mi dangin a at thin,’ tih thu hi, chu miah chuan a dik hle a ni.
4:38 In thawhrim loh at turin ka tirh che u kha; mi dangin an thawk a, nangnin an thawhsa chu in chhunzawm a ni,” a ti a.
4:39 Tin, hmeichhia chuan, “Ka thiltih apiang mi hrilh zel,” ti a, a hriattir thu avang khan, chu mi khuaa awm Samari mi tam takin Isua an ring ta a.
4:40 Chutichuan Samari mite chu Isua hnenah an lo kal a, an hnena awmah an ngen chiam a; tichuan chutah chuan ni hnih a cham a.
4:41 Tin, mi dang tam takin ama thu avangin an ring ve ta a:
4:42 tin, anni chuan hmeichhe hnenah chuan, “Tunah zet chuan i thu sawi avanga ring kan ni ta lo; keimahni ngeiin a thu kan hria a, he mi hi khawvel Chhandamtu a ni ngei tih kan hre ta,” an ti a.
4:43 Tin, chu mi ni hnih hnuah chuan chuta tangin a chhuak a, Galili ramah a kal ta a.
4:44 Isua ngeiin, zawlnei chu ama khaw lamah chuan chawimawiin a awm ngai lo tih a hriattir si thin a.
4:45 Chutichuan Galili ram a lo thlenin Galili rama miten an lo lawm a, Jerusalem khuaa kut laia a thiltih zawng zawng an hmuh avang khan; anni pawh chu kutnaah chuan an kal ve si a.
4:46 Tin, Galili rama Kana khua, tui uain-a a chantirna kha a lo thleng leh a. Tin, upa tu emaw a awm a, a fapa Kapernaum khuaah a dam lo va.
4:47 Tin, Isua Judai ram ata Galili ramah a lo kal tih a hriat veleh a hnenah a han kal a, a fapa zuk tidam turin a ngen chiam a, a thi lek lek si a.
4:48 Tin, Isuan a hnenah, “Chhinchhiahnate leh thilmakte in hmuh loh chuan in ring tawp lo vang,” a ti a.
4:49 Tin, upa chuan a hnenah, “Ka pu, ka fa thih hmain lo chhuk ta che,” a ti a.
4:50 Tin, Isuan a hnenah, “Haw leh ta mai rawh, i fapa chu a dam tawh e,” a ti a. Tin, chu mi chuan Isuan a hnena thu a sawi chu a ring a, a kal ta a.
4:51 Tin, a kal chhuk lai mekin a bawihten an lo hmuak a, “I fapa chu a dam ta,” an lo ti a.
4:52 Tin, ani chuan an hnenah a dam tirh lai a zawt a. Tin, anni chuan a hnenah, “Niminah ni her chauhvin a khawsik a reh ta a ni,” an ti a.
4:53 Chutichuan a pain Isuan a hnenah, “I fapa chu a dam tawh e,” a tih lai tak chu a ni tih a hre ta a; tin, amah leh a chhungten an zain an ring ta a.
4:54 Chu chu Isuan a chhinchhiahna tih a vawi hnihna a ni, Judai ram ata Galili rama a lo kalin.
5:1 Chung thil hnuah chuan Judate kut pakhat a awm a; Isua Jerusalem khuaah a han kal a.
5:2 Tin, Jerusalem-ah chuan beram kawngkhar kiangah dil a awm a, chu chu Hebrai tawngin Bethesda an ti a, hulhliap panga a nei nghe nghe a.
5:3 Chungah chuan damlo te, mitdel te, kebai te, zengte tam tak an mu hlawm a*.
5:5 Tin, chutah chuan kum sawmthum leh kum riat na mi tu emaw a awm a.
5:6 Tin, Isuan a mu chu a hmu a, chutiangin rei tak a awm tawh tih a hria a, a hnenah, “Tihdam i duh em?” a ti a.
5:7 Tin, mi damlo chuan, “Ka pu, tui a fawnin dila mi dahtu ka nei lo va, ka kal chhungin mi dangin mi pen thlak khalh thin,” a ti a, a chhang a.
5:8 Tin, Isuan a hnenah, “Tho la, i awngphah la la, kein kal tawh rawh,” a ti a.
5:9 Tin, thawklehkhatan chu mi chu a dam ta nghal a,a awngphah chu a la a,a kal ta a. Chu mi ni chu Chawlhni a ni a.
5:10 Chutichuan Judaten a dam taa hnenah chuan, “Chawlhni a nih hi, i awngphah i lak a thiang lo ve,” an ti a.
5:11 Tin, ani chuan an hnenah, “Mi tidamtu ngeiin ka hnenah, ‘I awngphah la la, kein kal tawh rawh,’ mi ti a ni,” a ti a, a chhang a.
5:12 Tin, anni chuan a hnenah, “ ‘I awngphah la la, kein kal tawh rawh,’ i hnena titu chu tunge ni?” an ti a, an zawt a.
5:13 Nimahsela a dama chuan tunge a nih a hre lo va, chutah chuan mipui an awm avangin Isua a kal bo ta si a.
5:14 Nakinah chuan Isuan ani chu Pathian biak inah a hmu a, a hnenah, “Ngai rawh, i dam tak hi, thil tisual leh tawh su, chutilochuan thil tha lo lehzual i chungah a lo awm dah ang e,” a ti a.
5:15 Tin, chu mi chu a va kal a, Judate hnenah chuan a tidamtu chu Isua a ni tih a hrilh a.
5:16 Chutichuan Chawlhnia chung thilte chu a tih avangin Judaten Isua an tiduhdah ta a.
5:17 Nimahsela Isuan anni chu a bia a, an hnenah, “Ka Pain tun thleng pawhinhna a thawk reng a ni, kei pawhin ka thawk ve a ni,” a ti a.
5:18 Chutichuan Judaten tihhlum an tum lehzual a, Chawlhni a bawhchhiat avang chauh pawh a ni lo va, Pathian ama Paah a vuah a, Pathian tluka a insiam avang pawhin a ni.
5:19 Tin, Isuan an hnenah, “Tih tak meuhvin, tih tak meuhvin ka hrilh a che u, Fapain mahniin engmah a ti thei lo, Pa thiltih a hmuhchauh lo chu; thil a tih ang apiang chu, Fapa pawhin a ti ve thin.
5:20 Pain Fapa a hmangaih a, a thiltih apiang a hnenah a entir thin; heng aia thiltih ropui zawk hi a hnenah a la entir ang, mak in tih atan.
5:21 Pain mitthite a kai tho va, a tinung thin angin, Fapa pawhin a duh apiang a tinung thin.
5:22 Pain tuma thu a relsak ngai lo, thu zawng zawng Fapa a reltir ta zawk;
5:23 mi zawng zawngin Pa an zah angin, Fapa pawh an zahna turin. Tupawh Fapa zah lo chu, Pa a tirtu pawh chu zah lo a ni.
5:24 “Tih tak meuhvin, tih tak meuhvin ka hrilh a che u, tupawh ka thu hriaa mi tirtu ring chuan, chatuana nunna a nei tawh, thiam lohvin a awm lo va, thihna ata a chhuak a, nunnaah a lut ta zawk a ni.
5:25 Tih tak meuhvin, tih tak meuhvin ka hrilh a che u, a hun a thleng dawn ta, tunah pawh a thleng tawh mek, chutih hunah chuan mitthiten Pathian Fapa aw an hria ang a, a hria apiang an nung ang.
5:26 Pain mahnia nun a nei ang bawkin Fapa pawh mahnia nun neiin a siam:
5:27 tin, Mihring Fapa a nih avangin a hnenah rorel tur thu a pe.
5:28 “Heng hi mak ti suh u, a hun a thleng dawn ta, chutih hunah chuan thlana awm zawng zawngin a aw an hria ang a, an chhuak vek ang;
5:29 thil tha titute chu nunna changing an tho leh ang a, thil sual titute chu thiam loh changing an tho leh ang.
5:30 “Keimahin engmah ka ti thei lo: benga ka hriat ang zelin ro ka rel thin; ka rorel chu dik tak a ni, keima thu thuin awm ka tum lo va, mi tirtu thu thu zawka awm ka tum thin avangin.
5:31 Mahni chanchin hriattir ila, ka thu hriattir a dik lo vang.
5:32 Ka chanchin hriattirtu chu mi dang a ni; ani chuan ka chanchin a hriattir chu a dik tih ka hria.
5:33 “Nangnin Johana hnenah mi in tir a, tin, ani chuan thutak chanchin a lo hriattir kha.
5:34 Thu hriattir ka pawm erawh chu mihring thu a ni lo, nimahsela in damna turin heng thu hi ka sawi a nih hi.
5:35 Chu Johana chu khawnvar alh tak leh eng tak chu a ni, a engah chuan hlim rih in duh kha.
5:36 “Nimahsela hriattirna ka neih hi Johana hriattirna thu ai khan a ropui zawk a ni: Pain thiltih zawh tura mi pek, ka thiltih ngei hian Pain mi tir tih ka chanchin a hriattir a ni.
5:37 Pa mi tirtu pawh chuan ka chanchin a hriattir tawh. Nangnin eng tikah mah a aw in hre ngai lo va, a hmel pawh in hmu ngai hek lo.
5:38 A thu pawh in rilruah in pai reng lo, a tirha hi in rin loh avangin.
5:39 Pathian Lehkha in chhiar ngun thin, a chhungah chatuana nunna awmin in rin avangin: chung Lehkha chu ka chanchin hriattirtu chu a ni si a.
5:40 Nimahsela nunna nei turin ka hnenah in lo kal duh si lo.
5:41 “Mihring chawimawina ka zawng lo.
5:42 Nangni ka hria a che u, Pathian hmangaihna in rilruah in nei lo ve.
5:43 Ka Pa hmingin ka lo kal a nih hi, nangnin mi lawm si lo: mi dang mahni hmingin lo kal sela, ani chu in lawm ang.
5:44 Nangni inchawimawi tawn lawm te u, engtin nge in rin theih ang? Pathian tak chauhva chhuak chawimawina chu in zawng si lo.
5:45 Keiin Pa hnena ka hek che u ring suh u: in hektu chu pakhat a awm, in rin Mosia hi.
5:46 Mosia in rin chuan kei pawh mi ring tawh tur in ni; ani chuan keima chanchin asin a ziak ni.
5:47 Nimahsela a thu ziak chu in rin si loh chuan engtin nge ka thu in rin ang?” a ti a.
6:1 Chung thil hnuah chuan, Isua chu Galili dil, Tiberi dil an tih ral lehlamah chuan a kal ta a.
6:2 Tin, damlote chunga chhinchhiahna a tihte chu an hmuh avangin mipui tam takin amah an zui a.
6:3 Tin, Isua chu tlangah chuan a kal chho va, chutah chuan a zirtirte hnenah a thu a.
6:4 Tin, Kalhlen Kut (Judate kut chu) a hnai tawh a.
6:5 Tin, Isua a dak a, mipui tam takin a hnen lam rawn panin a hmu a, Philipa hnenah, "Hengho ei tur chhang khawi ata nge kan lei ang?” a ti a.
6:6 Chung thu chu amah fiah nan a sawi a ni, a tih tur chu amahin a hre reng si a.
6:7 Tin, Philipa chuan a hnenah, “Mi tinin tlemtea an chan theuh tur pawh, duli zahnih man chhangin a daih lo vang,” a ti a, a chhang a.
6:8 Tin, a zirtirte zinga pakhat Simon Petera unau Andria chuan a hnenah,
6:9 “Barli chhangper panga leh sangha pahnih nei mipa naupang pakhat hetah a awm; nimahsela mi heng zozai zingah hian chung chu eng tham nge ni ang?” a ti a.
6:10 Tin, Isuan, “Mite chu thuttir rawh u,” a ti a. Tin, chu mi hmunah chuan hlobet tam tak a awm. Chutichuan patlingte chu an thu a, an tam lam chu sangnga lai an ni a.
6:11 Tin, Isuan chhangperte chu a la a, lawmthu a sawi zawhin a thuhote hnenah chuan a sem a, chutiang bawkin sanghate pawh chu an duh tawkin a sem bawk a.
6:12 Tin, an kham hnuin, a zirtirte hnenah chuan, “Engmah bo lo turin a bang nawite char rawh u,” a ti a.
6:13 Chutichuan an char a, Barli chhangper panga eitute ei bang nawite chuanin bawmrang sawm leh pahnih an tikhat a.
6:14 Tin, mite chuan chhinchhiahna a tih chu an hmuh veleh, “He mi hi zawlnei, khawvela lo kal tur kha a lo nih ngei hi,” an ti a.
6:15 Chutichuan amah chu lala siam tura man luih tumin an lo kal dawn tih Isuan a hria a, tlangah amah chauhvin a kal hrang leh ta a.
6:16 Tin, khua a lo tlai lam chuan a zirtirte chu dilah chuan an zuk kal a;
6:17 lawngah an chuang a, dilah chuan Kapernaum khua an pan a. Tin, khua a thim ta a, Isua lah chu an hnen a la thleng si lo.
6:18 Thlipui nasa tak a tleh avangin tui a fawn sang telh telh si a.
6:19 Tin, fing sawmhnih leh fing nga emaw, fing sawmthum emaw an kar chuan Isua chu dil chungah chuankea kala lawng rawn hnaihin an hmu a, an hlau va.
6:20 Nimahsela ani chuan an hnenah, “Keimah ka ni alawm, hlau suh u,” a ti a.
6:21 Chutichuan lawngah chuan chuantir an duh ta a; tin, chawplehchilhin lawng chuan an pan khawmual chu an thleng ta nghal a.
6:22 Atukah chuan dil ral lehlama mipui dingte chuan, lawng pakhat lo chu lawng dang a awm lo va, Isua chu a zirtirte hnenah lawngah chuan a chuang ve lo va, a zirtirte anmahni chauhvin an kal tih an hria a.
6:23 (Nimahsela Lalpan lawmthu a sawi hnua chhang an eina hmun kiangah khan, Tiberi khua atangin lawng tete a lo thleng si a.)
6:24 Chutichuan,mipui chuan Isua leh a zirtirte chu an awm ta lo tih an hriatin, anni pawh lawng teahte chuan an chuang a, Isua zawngin Kapernaum khua an lo thleng a.
6:25 Tin, dil rala an rawn hmuhin a hnenah, “Rabbi, engtikah nge he lam i lo thlen?” an ti a.
6:26 Tin, Isuan an hnenah, “Tih tak meuhvin, tih tak meuhvin ka hrilh a che u, chhinchhiahnate in hmuh avanga mi zawng in ni lo va, chhangper in ei puar avang khan a nih zawk hi.
6:27 Chaw dangral mai umin phe phe suh u, chatuana nun thlenga awm reng tur chaw, Mihring Fapain a pek tur che u chu, umin phe zawk rawh u; Pa Pathian chuan ani chu a chhinchhiah tawh si a,” a ti a, a chhang a.
6:28 Tin, anni chuan a hneh, “Pathian hna kan thawh theih nan thil engnge kan tih tur?” an ti a.
6:29 Tin, Isuan an hnenah, “Pathian hnathawh chu hei hi a ni, a mi tirh hi ring ula,” a ti a, a chhang a.
6:30 Tin, anni chuan a hnenah, “Chhinchhiahna engnge i tih ang, kan hmuha kan rin theihna tur chein? Thil engnge i tih ang?
6:31 Kan thlahtuten thlalerah manna kha an ei thin, ‘Van atang chuan an hnenah chhang ei tur a pe,’ tih ziak angin,” an ti a.
6:32 Tin, Isuan an hnenah, “Tih tak meuhvin, tih tak meuhvin ka hrilh a che u, van atanga chhang in hmuh kha Mosia pek che u a ni lo, ka Pa erawh chuan van atangin chhang tak a pe che u a nih hi.
6:33 Pathian chhang chu van atanga lo chhuka khawvel hnena nun petu hi a ni,” a ti a.
6:34 Tin, anni chuan a hnenah, “Lalpa, chu chhang chu kumkhuain min pe rawh,” an ti a.
6:35 Tin, Isuan an hnenah, “Kei hi nunna chhang chu ka ni; tupawh ka hnena lo kal chu a ril a tam lo vang, tupawh mi ring chu engtikah mah a tuihal lo vang.
6:36 Nimahsela nangnin mi hmuh pawhin mi ring si lo tih ka hrilh che u kha.
6:37 Pain mi pek zawng zawng ka hnenah an lo kal vek ang; tupawh ka hnena lo kal chu ka hnawt chhuak tawp lo vang.
6:38 Mahni duhzawng ti turin van atanga lo chhuk ka ni lo va, mi tirtu duhzawng ti tura lo chhuk ka ni zawk e.
6:39 Hei hi mi tirtu duhzawng chu a ni, anin mi pek zawng zawng engmah hloh lo ila, ni kin niah chuan kai tho zawk ila.
6:40 Tin, hei hi ka Pa duhzawng a ni, tupawh Fa hmu a, ring apiangin chatuana nunna nei sela; tin, keiin ni kin niah chuan ani chu ka kai tho vang,” a ti a.
6:41 Tin, “Van atanga chhang lo chhuk chu ka ni,” a tih avangin Judate chu a chungah an phunnawi a.
6:42 “He mi hi Josefa fa, Isua a ni lo vem ni, a nu leh pa pawh kan hriat hi? ‘Van atanga lo chhuk kan ni,’ eng ti tiha ti nge ni le?” an ti a.
6:43 Tin, Isuan an hnenah, “Phun phunnawi suh u.
6:44 Pa mi tirtuin a hip loh chuan tumah ka hnenah an lo kal thei lo vang; tin, keiin ni kin niah chuan a lo kala chu ka kai tho vang.
6:45 Zawlneite lehkhabuah, ‘Pathian zirtirin an awm vek ang,’ tih ziak a ni. Mi tin Pa thu hriaa zir apiang chu ka hnenah an lo kal thin.
6:46 Tumahin Pa an hmu ngai ka ti lo, Pathian hnena lo chhuaka chauh lo chuan; ani chuan Pa chu a hmu.
6:47 Tih tak meuhvin, tih tak meuhvin ka hrilh a che u, tupawh a ring chuan chatuana nunna an nei tawh a ni.
6:48 Kei hi nunna chhang ka ni.
6:49 In thlahtuten thlalerah manna kha an ei na a, an thi a.
6:50 Hei hi van atanga chhang lo chhuk chu a ni, miin a eia a thih loh nan.
6:51 Kei hi van atanga chhang nung lo chhuk chu ka ni, tupawhin he chhang hi a ei chuan chatuanin a nung reng ang, a ni, khawvel nun nana ka pek tur chhang chu ka tisa hi a ni,” a ti a.
6:52 Chutichuan Judate an inhnial a, “He mi hian engtin nge a tisa ei turin min pek theih ang?” an ti a.
6:53 Tin, Isuan an hnenah, “Tih tak meuhvin, tih tak meuhvin ka hrilh a che u, Mihring Fapa tisa in ei a, a thisen in a in bawk loh chuan, nangmahniin nunna nei hek lo che u.
6:54 Tupawh ka tisa eia ka thisen in chuan chatuana nunna a nei tawh, tin, ni kin niah chuan ani chu ka kaitho vang.
6:55 Ka tisa hi chaw tak a ni a, ka thisen hi in tur tak a ni si a.
6:56 Tupawh ka tisa eia ka thisen in chu, keimahah a awm reng thin, kei pawh amahah ka awm reng thin.
6:57 Pa nung chuan mi tir a, Pa zara nung ka ni ang bawkin, tupawh mi ei chu keima zarah ani pawh a nung ang.
6:58 Hei hi van atanga chhang lo chhuk chu a ni; chi thlahtute chuan chhang an ei a, an thi ang kha a ni lo, tupawh he mi chhang hi ei chu chatuanin a nung reng ang,” a ti a.
6:59 Chung thu chu inkhawmna inah a sawi a, Kapernaum khuaa a zirtir lai khan.
6:60 Chutichuan a zirtirte a then tam takin chu chu an hriatin, “Hei hi thu khirh tak a ni, tunge dawngsawng thei ang?” an ti a.
6:61 Chutichuan chu mi thu-ah chuan a zirtirte an phunnawi tih Isuan a rilruin a hria a, an hnenah, “He thu hian a tilungni lo che u elo?
6:62 Mihring Fapa hi hmana a awmna ngaia lawn chhova in hmuh chuan, engtin nge in tih ang le?
6:63 Tinungtu chu thlarau a ni, tisa chu engmahah a tlaktlai lo; in hnena thu ka sawite hi thlarau a ni, nunna pawh a ni.
6:64 Nimahsela in zingah a then ring lo in awm e,” a ti a. (Isuan a ring lotute leh a mantirtu tur chu a tir ata a hre reng si.)
6:65 Tin, amah vek chuan, “Chuvangin a ni, in hnenah, ‘Pain a puih loh chuan tumah ka hnenah an lo kal thei lo vang,’ ka tih kha ni,” a ti a.
6:66 Chu veleh chuan a zirtirte a then tam tak an kal bo va, amah an pawl leh ta lo va.
6:67 Chutichuan Isuan sawm leh pahnihte hnenah chuan, “Nangni pawhin kal bo in duh ve em?” a ti a.
6:68 Tin, Simon Peteran a hnenah, “Lalpa, tu hnenah nge kan kal ang? Nangin chatuana nunna thu i nei alawm.
6:69 Nang Pathian mi thianghlim chu i ni tih kan awih ta a, hriat pawh kan hria e,” a ti a, a chhang a.
6:70 Tin, Isuan an hnenah, “Nangni sawm leh pahnihte hi keima thlan inni lawm ni? In zinga mi pakhat diabola a ni leh nghal vei nen,” a ti a.
6:71 (Iskariot Simona fapa Juda, sawm leh pahnihte zinga tel vea thu kha a sawi a ni,ani chu a mantirtu tur a ni si a.)
7:1 Chu mi zawhah chuan Isuan Galili ram a fang a; Judaten amah tihhlum an tum avangin Judai ram chu a fang duh lo va.
7:2 Tin, Judate Bawkte Kut chu a hnai tawh a.
7:3 Chutichuan a unauten a hnenah, “Heta tangin Judai ramah va kal rawh, i zirtirte pawhin i thiltih hi an hmuh theih nan.
7:4 Tuman arukin thil engmah an ti lo, mahni hmingthan duh siin. Heng thilte hi i tih tak zet chuan khawvel hnenah inentir rawh,” an ti a.
7:5 (A unaute pawh chuan amah an ring si lo va.)
7:6 Tin, Isuan an hnenah, “Ka hun a la thleng lo; nangni hun erawh chu kumkhuain a thleng reng a ni.
7:7 Khawvelin nangni an haw thei lo a che u, kei erawh chu mi haw thin, an thiltihte a sual tih ka hrilhfiah thin avangin.
7:8 Nangni kutnaah han kal rawh u, kei zawng tun kutah hian ka han kal dawn rih lo ve, ka hun a la thlen loh avangin,” a ti a.
7:9 Tin, chung thu chu an hnenah a sawi a, Galili ramah a la awm reng a.
7:10 Nimahsela a unaute chu kutnaa an chhoh tak hnu chuan ani pawh vantlang hriat lohvin, aruk angin a han kal ve a.
7:11 Tin, Judaten kutnaah chuan ani chu an zawng a, “Khawiah nge a awm?” an ti a.
7:12 Tin, a chungah mipuite zinga mi an phunru sup sup a, a thenin, “Mi tha a ni e,” an ti a; thenkhatin, “Hnai lo ve, mipui a bum zawk thin a ni,” an ti a.
7:13 Nimahsela Judate an hlauh avangin tuman a chungchang thu an sawi lang lo.
7:14 Tin, kut vang lai takin Isua Pathian biak inah a han kal a, a zirtir a.
7:15 in, Judaten, “He mi hian zir ngai lovin engtin nge lehkha a thiam?” an ti a, mak an ti hle a.
7:16 Tin, Isuan anni chu a chhang a, “Ka thu zirtir hi ka ta a ni lo va, mi tirtu ta a ni zawk.
7:17 Tupawh ama duhzawng tih duh chuan, ka thu zirtir hi Pathian tihchhuah nge keima phuahchawpa ka sawi a hria ang.
7:18 Tupawh mahni phuahchawp thu sawi chu, mahni mawina zawng a ni; a tirtu mawina zawng erawh chu, chu mi chu mi tak zet a ni, amahah chuan dik lohna reng a awm lo.
7:19 Mosian Dan chu in hnenah a pe lo che u em ni? Nimahsela in zingah tumahin Dan chu in zawh si lo. Nangnin engati nge mi tihhlum in tum?” a ti a.
7:20 Tin, mipui chuan, “Ramhuai zawl i nih hi; tuin nge tihhlum tum che?” an ti a, an chhang a.
7:21 Tin, Isuan a chhang a, a hnenah, “Thil pakhat ka tih kha nangni zawng zawngin mak in tih hi.
7:22 He mi avang a ni, Mosian serhtan thu kha a pek che u a, (Mosia tihchhuah a ni si lo va, thlahtute tihchuah a ni zawk si a,) Chawlhni pawha mi serh in tan thin ni.
7:23 Mosia Dan bawhchhiat loh nan Chawlniah pawh mipain a serh a tantir si chuan, keiin Chawlhnia mi ka tihdam tak viah avangin ka chungah in thinur bik maw?
7:24 A lan angin ngaihtuah suh ula, fel takin ngaihtuah zawk rawh u,” a ti a.
7:25 Tin, Jerusalem khuaa mi thenkhatin, “He mi hi tihhlum an tuma chu a ni lawm ni?
7:26 En teh u, alangin thu a sawi a, a hnenah engmah an sawi si lo. Amah hi Krista a ni tih hotuten an hre ta tak zet em maw ni aw?
7:27 He mi hi a pianna chin lam kan hre si a, Krista erawh chu a lo thlen hunah chuan a pianna chin tuman an hre loving,” an ti a.
7:28 Chuvang chuan Isuan Pathian biak ina a zirtir pahin a au va, “Nangnin mi hria e, ka pianna chin pawh in hria e. Nimahsela mahni thua lo kal ka ni lo, mi tirtu hi mi tak zet a ni, ani chu in hre si lo.
7:29 Kei erawh chuan ani chu ka hria; a hnen atanga lo chhuak ka ni a, ani chuan mi tir a ni si a,” a ti a.
7:30 Chutichuan ani chu man an tum a, nimahsela a hun a la thlen loh avangin tuman an khawih si lo.
7:31 Mipui a then tam tak erawh chuan ani chu an ring a, “Krista chu a lo thlen hunah, he mi tih aia tam zawk thilmak a rawn ti ang em ni?” an ti a.
7:32 Tin, Pharisaiten a chunga mipui phunrukna thute chu an hria a; tichuan puithiam lalte leh Pharisaiten a man turin tiangkengtute an tir ta a.
7:33 Tin, Isuan, “Rei lo te in hnenah ka awm rih zet ang a, mi tirtu hnenah ka kal ang.
7:34 Nangnin mi zawng ang a, mi hmu si lo vang; ka awmnaah pawh in lo kal thei lo vang,” a ti a.
7:35 Tin, Judate an inbia a, “Kan hmuh loh turin he mi hi khawiah nge a kal dawn? Grikte zinga Pem darhho hnena kalin Grikte chu a zirtir dawn em ni ang?
7:36 ‘Nangnin mi zawng ang a, mi hmu si lo vang a; ka awmnaah pawh in lo kal thei lo vang,’ a tih hi, eng a tihna nge ni ang?” an ti a.
7:37 Tin, kut tiak dawn ni, ni ropui berah chuan Isua a ding a, a au va, “Tupawh a tuihal chuan ka hnenah lo kal sela in rawh se.
7:38 Tupawh mi ring chu Pathian Lehkha sawi angin tui nung luite a pumah a luang chhuak ang,” a ti a.
7:39 (Chung thu chu a ringtuten Thlarau an neih tur thu a sawi a ni; Thlarau chu pek a la ni rih lo, Isua chu chawimawia a la awm loh avangin.)
7:40 Chutichuan mipui zinga thenkhatin chung thu chu an hriatin, “Hei hi zawlnei chu a nih tak hi,” an ti a.
7:41 Thenkhatin, “Hei hi Krista chu a ni,” an ti a. Thenkhat erawh chuan, “Khaw nge Krista chu Galili rama a lo chhuah tehlul ang?
7:42 Krista chu Davida thlahte zingah, Davida awmna khua Bethlehemah chhuak tur a ni tih Pathian Lehkhain a sawi lo vem ni?” an ti a.
7:43 Chutichuan amah avangin mipui chu an inthen a, an inkhing ta a.
7:44 Thenkhat chuan man an duh a, nimahsela tuman an khawih si lo.
7:45 Tin, tiangkengtute chu puithiam lalte leh Pharisaite hnenah an lo kal leh a; tin, anni chuan an hnenah, “Engati nge in rawn hruai loh?” an lo ti a.
7:46 Tiangkengtute chuan, “Sawtiang rengin miin thu an sawi ngai lo,” an ti a, an chhang a.
7:47 Tin, Pharisaite chuan an hnenah, “Nangni pawh bumin in awm ve ta elo?
7:48 Hotute leh Pharisaite zinga mi reng reng amah ring an awm tawh em ni?
7:49 Heng Dan hre lo mipuite tehchai hi anchhe dawng an ni asin,” an ti a, an chhang a.
7:50 Nikodema, hmana Isua hnena lo kal kha, an zinga tel ve a ni a, an hnenah,
7:51 “Ama ka ngeia a thu hriat leh a thiltih hriat hmain kan danin mi thiam loh a chantir ngai em ni?” a ti a.
7:52 Anni chuan a hnenah, “Nang pawh chu Galili mi i ni ve elo? Zawng la, Galili ramah chuan zawlnei tumah chhuak tur an awm lo tih hre ta che,” an ti a, an chhang a.
7:53 Tin, mi tin mahni in theuhvah an kal ta a.
8:1 Isua erawh chu Oliv tlangah a kal ta zawk a.
8:2 Tin,zingah Pathian biak inah a lut leh a, mi zawng zawng a hnenah an lo kal a; tin, ani chu a thu a, anmahni a zirtir a.
8:3 Tin, lehkhaziaktute leh Pharisaiten hmeichhe pakhat a uire lai an man an rawn hruai a; tin, a laiah an dintir a,
8:4 Isua hnenah, “Zirtirtu, he hmeichhia hi a uire lai an man a ni, a uire lai takin.
8:5 Dan Lehkhabuah, Mosian hetiang mi hi lunga den hlum thu min pe a; nangin engtin nge i ngaih?” an ti a.
8:6 Chu thu chu amah fiah nan an ti a, a hekna tur an hmuh theih nan. Chutichuan Isua a kun a, a kut zungin leiah a ziak a.
8:7 Tin, an zawh sek sek avangin ani chu a tho va, an hnenah, “In zinga sual nei lo apiangin amah chu lungin deng hmasa rawh se,” a ti a.
8:8 Tin, a kun leh a, a kutzungin leiah a ziak leh a.
8:9 Tin, anni chuan a thusawi chu an hriatin, upa berin a tan a, a tawp thlengin, pakhat khatin an relh chhuak ta zel a; chutichuan Isua chauh a awm ta a, hmeichhia a laia a awmna ngaia awm nen khan.
8:10 Tin, Isua a tho va, a hnenah, “Hmeichhia, khawiah nge an awm tak? Tuman thiam loh an chantir na che nge?” a ti a.
8:11 Tin, ani chuan, “Lalpa, tuman mi chantir lo ve,” a ti a. Tin, Isuan, “Kei pawhin thiam loh ka chantir lo va che; kal la, tun hnuah tisual leh tawh suh,” a ti a.
8:12 Tin, Isuan an hnenah thu a sawi leh a, “Kei khawvel entu ka ni; tupawh mi zui chu thimah a leng tawp loving a, nunna eng a nei zawk ang,” a ti a.
8:13 Chutichuan Pharisaiten a hnenah, “Mahni thu hriattir i ni; i thu hriattir a dik lo ve” an ti a.
8:14 suan an hnenah, “Mahni thu hriattir mah ila, ka thu hriattir a dik a ni; keiin ka lo chhuahna leh ka kalna tur chin pawh ka hria e; nangni zawngin ka lo chhuahna leh ka kalna tur chin pawh in hre si lo.
8:15 Nangnin tisa angin in sawisel thin; kei zawngin tumah ka sawisel lo.
8:16 A ni, sawisel mah ila ka sawiselna a dik ang; keimah chang ka ni lo va, kei leh Pa mi tirtu kan ni zawk si a.
8:17 A ni, in Dan Lehkhabuah pawh, ‘Mi pahnih thu a dik,’ tih ziak a ni bawk alawm.
8:18 Kei hi mahni thu hriattirtu ka ni, Pa mi tirtu chuan ka thu a hriattir bawk,” a ti a, a chhang a.
8:19 Tin, anni chuan a hnenah, “I Pa khawiah nge?” an ti a. Isuan, “Nangnin kei min hre lo, ka Pa pawh in hre lo; kei mi hriat chuan ka Pa pawh in hria ang,” tiin a chhang a.
8:20 Chung thu chu Pathian biak inah a zirtir pahin, thawhlawm dahna hmunah a sawi a; tuman amah an man si lo, a hun a la thlen loh avangin.
8:21 Tin, ani chuan an hnenah, “Ka kal bo dawn hi, nangnin mi zawng ang a, in sual nei rengin in thi ang; ka kalna turah in lo kal thei lo vang,” a ti leh a.
8:22 Tin, Judaten, “ ‘Ka kalna turah in lo kal thei lo vang,’ a tih hi, a intihlum dawn em ni?” an ti a.
8:23 Tin, ani chuan an hnenah, “Nangni hnuai lama chhuak in ni; kei zawng chung lama chhuak ka ni; nangni he khawvela chhuak in ni; kei zawng he khawvela chhuak hi ka ni lo.
8:24 Chuvangin in hnenah,‘In sual nei rengin in thi ang,’ ka tih kha; ani chu ka ni tih in awih loh chuan in sual nei rengin in thi mawlh ang,” a ti a.
8:25 Tin, anni chuan a hnenah, “Tunge maw i nih leh?” an ti a. Isuan an hnenah, “Atir ata in hnena ka sawi thin kha.
8:26 Nangni chungchang thu-ah hian thil tam tak sawi tur leh ngaituah tur ka nei; engpawh ni rawh se, mi tirtu chu mi dik tak a ni; a hnena thu ka hriat apiang khawvel hnenah ka hrilh hi,” a ti a.
8:27 Pa thu an hnenah a sawi tih an hre lo.
8:28 Chutichuan Isua vekin, “Nangnin Mihring Fapa hi in khaikan hnuah, ani chu ka ni tih leh, keiin mahni thuin thil engmah ka ti lo va, Pain mi hrilh ang zelin heng thu hi ka sawi zawk a ni tih in lo la hria ang.
8:29 Mi tirtu chu ka hnenah a awm a, mi thlahthlam lo ve; a thil lawmzawng apiang ka tih fo avangin,” a ti a.
8:30 Tin, chung thu chu a sawi laiin mi tam takin amah chu an ring ta a.
8:31 Chutichuan Isuan a ringtu Judate hnenah chuan, “Ka thua in awm reng chuan ka zirtirte in ni tak tak ang.
8:32 “Tin thutak in hria ang a, thutak chuan bawih a ban ang che u,” a ti a.
8:33 Tin, anni chuan a hnenah, “Abrahama thlahte kan ni asin, tun thlengin tuma bawihah kan awm ngai lo, ‘Bawih a ban ang che u,’ eng ti tiha i ti nge ni?” an ti a,an chhang a.
8:34 Tin, Isuan an hnenah, “Tih tak meuhvin, tih tak meuhvin ka hrilh a che u, tupawh thil tisual apiang, sual bawih a ni.
8:35 Bawih chu kumkhuain inah a awm reng lo; fapa erawh chu kumkhuain a awm reng thin.
8:36 Chutichuan Fapain bawih a ban che u chuan in chhuak tak meuh ang.
8:37 Abrahama thlahte in ni tih ka hria e; ni mah ula, mi thah in tum si, ka thuin in rilrua awmna a neih loh avangin.
8:38 Keiin ka Pa hnena thil ka hmuh chu ka sawi thin; nangni pawhin in pa hnena thil in hriat chu in ti thin,” a ti a.
8:39 Tin, anni chuan a hnenah, “Kan pa Abrahama a ni,” an ti a, an chhang a. Tin, Isuan an hnenah, “Abrahama fate in nih chuan Abrahama thil in ti ang chu.
8:40 Nimahsela tunah mi thah in tum si. Pathian hnena thutak ka hriat hrilhtu che u ka ni asin; Abrahama zawngin hetiangin a ti lo ve.
8:41 Nangni zawngin in pa thil chu in ti thin,” a ti a. Tin, anni chuan a hnenah, “Inuirea hrin kanni lo ve, Pa pakhat chauh kan nei, Pathian chu,” an ti a.
8:42 Isuan an hnenah, “Pathian in Pa a nih chuan nangnin mi hmangaih ang chu; Pathian hnena chhuak leh a hnen ata lo kal ka ni si a; keima thua lo kal ka ni hek lo, amahin mi tir zawk a ni.
8:43 Engati nge ka tawng awmzia in hriat loh? Ka thu in dawnsawn theih loh avang a ni.
8:44 Nangni zawng in pa diabola hnena chhuak in ni a, in pa duhzawng tih in duh a ni. Ani chu atir ata tualthat a ni, thutakah a awm lo, a chhungah thu tak reng a awm loh avngin. Dawt thu a sawiin ama tihchhuah a sawi a ni thin; dawthei a ni si, dawt pa pawh a ni.
8:45 Thutak ka sawi avangin nangnin mi ring lo a ni.
8:46 In zingah tuin nge sual kawngah thiam loh mi chantir thei awm? Thutak ka sawi pawhin nangnin engati nge mi rin loh?
8:47 Pathian hnena chhuak chuan Pathian thu a pawm thin; he mi avang hian in pawm lo a ni, Pathian hnena chhuak in nih loh avangin,” a ti a.
8:48 Tin, Judate chuan a hnenah, “Samari mi, ramhuai zawl i ni kan tih kha kan tidik zet lo vem ni?” an ti a, an chhang a.
8:49 Isuan, “Ramhuai zawl ka ni lo ve; ka Pa ka chawimawi a ni zawk e, nangnin ka hming in tihchhiat hi.
8:50 Nimahsela mahni mawina zawng ka ni lo; a zawngtu leh a ngaihtuahtu mi pakhat a awm a ni.
8:51 Tih tak meuhvin, tih tak meuhvin ka hrilh a che u, miin ka thu a zawm chuan kumkhuain thih ni hmel a hmu lo vang,” a ti a.
8:52 Tin, Judaten a hnenah, “Ramhuai zawl i ni tih tunah kan hre ta. Abrahama a thi tawh, zawlneite nen, nangin, ‘Miin ka thu a zawm chuan kumkhuain thihna a tem lo vang,’ i ti si a.
8:53 Kan thlahtu Abrahama aiin i ropui zawk em ni? Ani pawh a thi tawh, zawlneite pawh an thi tawh; tuah nge i insiam ni?” an ti a.
8:54 Tin, Isuan, “Mahni inchawimawi ila ka mawi engah mah a ni lo: ‘Kan Pathian,’ in tih ka Pa chu mi chawimawitu a ni;
8:55 nangnin amah in hre si lo; kei erawh chuan amah ka hria; ‘Amah ka hre lo,’ ti ila, nangmahni anga dawthei bawk ka ni ang: chutichuan amah ka hria a, a thu pawh ka zawm thin.
8:56 In thlahtu Abrahama kha, ka ni hmu tur a nih avngin a hlim em em thin, tin, a hmu ngei a, a lawm hle a,” a ti a, a chhang a.
8:57 Tin, Judate chuan a hnenah, “Nang kum sawmnga pawh la ni lo pui che, Abrahama i hmu em ni?” an ti a.
8:58 Isuan an hnenah, “Tih tak meuhvin, tih tak meuhvin ka hrilh a che u, Abrahama awm hma pawhin ka awm,” a ti a.
8:59 Chutichuan a den nan lung an char a; nimahsela Isua a biru a, Pathian biak in ata chu a chhuak ta a.
9:1 Tin, Isuan a kal pahin a pian tirh ata mitdel pakht a hmu a.
9:2 Tin, a zirtirten a hnenah, “Rabbi, mitdel saa a pian hi tuin nge thil tisual, he mi hian nge a nu leh a pain?” an ti a, an zawt a.
9:3 Isuan, “He mi hian a tisual hek lo, a nu leh a pain an tisual hek lo; Pathian hnathawh a chunga a lanna tur a nih zawk hi.
9:4 Chhun a nih laiin mi tirtu hna kan thawk tur a ni; zan a nih dawn tak hi, chu mi hunah chuan tuman hna an thawk thei lo vang.
9:5 Khawvela ka awm chhungin khawvel entu ka ni,” a ti a, a chhang a.
9:6 Chutianga a sawi zawh chuan leiah chil a chhak a, chil chuanin hlum a siam a, tin hlum chu a mitah a hnawih a,
9:7 tin, a hnenah, “Siloam dilah va sil rawh,” a ti a. (Siloam chu “Tirh” tihna a ni.) Tin, a va kal a, a sil a, mitvarin a lo haw leh ta a.
9:8 Chutichuan a vengte leh hmana a kutdawh hmu thinten, “He mi hi thu chunga kutdawh thina kha a ni lo vem ni?” an ti a.
9:9 Mi dangin, “Ani kha a nih hi,” an ti a. Mi dangin, “A ni lo ve, a anpui a nih zawk hi,” an ti a. Ani chuan “Kha kha ka ni,” a ti a.
9:10 Tin, anni chuan a hnenah, “I mit engtin nge a lo var le?” an ti a.
9:11 Ani chuan, “Isua an tih khan hlum a siam a, ka mitah a hnawih a, ‘Siloam dilah va kal la, sil rawh,’ mi ti a, chutichuan ka va kal a, ka sil a, mitvarna ka hmu ta a nih hi,” a ti a.
9:12 Tin, anni chuan a hnenah, “Ani chu khawiah nge a awm?” an ti a. “Ka hre lo,” a ti a.
9:13 Tin, chu mi hmaa mitdela chu Pharisaite hnenah an hruai a.
9:14 Tin, Isuan hlum a siam a, a mit a tihvar ni kha Chawlhni a ni a.
9:15 Chutichuan Pharisaiten a mit a lo var tak danzia an zawt leh a. Ani chuan an hnenah, “Ka mitah hlum a dah a, ka sil a, ka hmu thei ta mai a ni,” a ti a.
9:16 Tin, Pharisai thenkhatin, “Chu mi chu Chawlhni a puithu loh avangin Pathian hnena chhuak a ni lo vang,” an ti a. Thenkhat erawh chuan “Mi sualin engtin nge hetiang thilmak a tih theih ang?” an ti a. Tin, an inthen a, an inkhing ta a.
9:17 Tin, mitdel hnenah chuan, “I mit a tihvar kha nang eng angin nge amah chu i ngaih?” an ti leh a. Tin, ani chuan, “Zawlnei a ni,” a ti a.
9:18 Nimahsela Judaten a mit lo var taa nu leh pa chu an koh hma loh chuan mitdel a ni thin a, a mit a lo var ta tih a chungchang thu chu an awih lo va.
9:19 Tin, a nu leh a pa hnenah, “He mi hi in fapa, mitdel saa piang a ni in tih kha a ni em? Engtin nge tunah a hmuh theih tak le?” tiin an zawt a.
9:20 Tin, a nu leh a pa chuan, “Hei hi kan fapa a ni tih kan hria;
9:21 nimahsela engtin nge tunah hian a lo hmuh theih tak hi kan hre lo, a mit tivartu pawh kan hre hek lo; amah zawt rawh u; patling a ni alawm; ama thu chu aman sawi ang hmiang,” an ti a, an chhang a.
9:22 Judate an hlauh avangin a nu leh a pa chuan chung thu chu an sawi a ni; Judaten, chung hma pawh chuan tupawhin, “Ani chu Krista a ni,” tia a tan chuan inkhawmna in a hnawng ang tih an remti tlang si a.
9:23 Chuvang chuan a ni, a nu leh apa chuan, “Patling a ni alawm, amah zawt rawh u,” an tih ni.
9:24 Chutichuan mitdel chu an ko nawn leh a, a hnenah, “Pathian fak rawh u, kha mi kha zawng mi sual a ni tih kan hria e,” an ti a.
9:25 Tin, ani chuan, “Mi sual a ni nge ni lo ka hre lo, kawng khat ka hria, tun hma khan ka mit a del a, tunah ka hmuh theih tak hi,” a ti a, a chhang a.
9:26 Tin, anni chuan a hnenah, “I chungah engtin nge a tih? I mit engtin nge a tihvar?” an ti a.
9:27 Tin, ani chuan an hnenah, “Nichinah khan ka hrilh che u kha, in hre duh si lo; engati nge in hriat leh duh tak ni? Nangni pawh a zirtirte nih ve in duh elo?” tiin a chhang a.
9:28 Tin, anni chuan an hau va, “Nang hi ama zirtir i ni a, keini zawng Mosia zirtirte kan ni asin.
9:29 Pathianin Mosia a bia tih kan hria, he mi teh chai hi khawia lo chhuak nge a nih kan hre hrep lo ve,” an ti a.
9:30 Tin, chu mi chuan an hnenah, “Chu tak chu a ni a makna chu, khawia lo chhuak nge a nih in hriat loh va, ka mit a tihvar miau si hi.
9:31 Pathianin mi sual thu a ngaithla thin lo tih kan hria; nimahsela tupawhin Pathian a ngaihsak a, a duhzawng a tih chuan Pathianin ani chu a ngaithla thin.
9:32 Khawvel awm tirh ata tuman mitdel saa piang mit an tivar leh tih an hre ngai lo.
9:33 He mi hi Pathian hnena chhuak a nih loh chuan engmah a ti thei lo vang,” a ti a, a chhang a.
9:34 Tin, anni chuan a hnenah, “Nang sual lailet dera piang i ni alawm, nangin min hrilh vei em ni?” an ti a, an chhang a. Tichuan ani chu an hnawt chhuak ta a.
9:35 Tin, an hnawt chhuak tih Isuan a lo hria a; tin, a zawng chhuak a, “Pathian Fapa i ring em?” a ti a.
9:36 Tin, ani chuan, “Ka pu, ani chu tunge ni, ka rin theih nan?” a ti a, a chhang a.
9:37 Isuan a hnenah, “Ani chu i hmu tawh reng alawm, a betu mek che hi a ni alawm,” a ti a.
9:38 Tin, ani chuan, “Lalpa, ka ring e,” a ti a, chibai a buk a.
9:39 Tin, Isuan, “Rorel turin he khawvelah hian lo kal ka ni, mitdelte chu an mit a lo varna tur leh, mitvarte chu an mit a lo delna turin,” a ti a.
9:40 Tin, a hnena Pharisai awmte chuan chung chu an hria a, a hnenah, “Keini pawh hi mitdel kan ni ve elo?” an ti a.
9:41 Tin, Isuan an hnenah, “Mitdel in nih chuan sual in nei lo vang; nimahsela, ‘Kan hmu thei e,’ tunah in ti si a, chuvangin in sual a awm reng a ni.
10:1 “Tih tak meuhvin, tih tak meuhvin ka hrilh a che u, tupawh beram huanga kawngkhara lut lova, dang lama lawn lut chu,chu mi chu englo ruk hmang leh suam hmang a ni e.
10:2 Tupawh kawngkhara lut erawh chu beram vengtu a ni.
10:3 Kawngkhar vengtuin ani chu a lo hawnsak thin a; beramten a aw an hre thin a;ama beramte chu an hmingah a ko theuh va, a hruai chhuak thin a.
10:4 A ta zawng zawng a chhuahtir veleh, an hma a hruai a, beramte chuan amah an zui thin a, a aw an hre si a.
10:5 Mi dang zawng an zui lo vang a, an tlan bosan zawk ang: mi dangte aw zawng an hriat loh avangin,” a ti a.
10:6 Chu tehkhin thu chu Isuan an hnenah a sawi a; nimahsela eng thu nge an hnenah a sawi tih an hre si lo.
10:7 Chutichuan Isuan an hnenah a sawi leh a, “Tih tak meuhvin, tih tak meuhvin ka hrilh a che u, kei hi beram kawngkhar chu ka ni.
10:8 Ka hmaa lo kal zawng zawngte kha ruk hmangte,suam hmangte an ni vek a;nimahsela beramte chuan an thu an awih lo.
10:9 Kei kawngkhar chu ka ni; tupawh keimahah a luh chuan humhimin a awm ang a, a lutin a chhuak ang a, a ei tur a hmu bawk ang.
10:10 Ruk hmang chu, ru tur leh tihlum tur leh tichhe tur lo chuan a lo kal lo; kei zawng nun an neih nan, tam taka an neih nan, lo kal ka ni.
10:11 Kei beram vengtu tha ka ni; beram vengtu thain beramte tan a nun a pe thin.
10:12 Inhlawhfa, beram vengtu tak ni lova, beramte a ta ni lova chuan chinghne lo kal a hmuhin beramte a tlansan thin; tin, chinghnia chuan beramte a she a, a tidarh thin;
10:13 inhlawhfa a ni a, beramte a ngaihsak loh avangin a tlan bo thin a ni.
10:14 ,15 Kei zawng beram vengtu tha ka ni; Pain mi hriat leh keiin Pa ka hriat ang hian ka ta ka hria a, ka ta pawhin mi hria a ni; tin, beramte tan chuan ka nun ka pe.
10:15 ,14 Kei zawng beram vengtu tha ka ni; Pain mi hriat leh keiin Pa ka hriat ang hian ka ta ka hria a, ka ta pawhin mi hria a ni; tin, beramte tan chuan ka nun ka pe.
10:16 Tin, he beram huanga mi lo hi, beram dang ka nei; anni pawh ka la rawn hruai tur a ni, ka aw pawh an hria ang; chutichuan pawl khatin an awm ang a, a vengtu pakhat nen.
10:17 “He mi avangin Pain mi hmangaih a ni, lak leh tura ka nun ka pek dawn avang hian.
10:18 Tuman mi laksak lo vang, keima thu thuin ka pe zawk dawn a ni. Pe thei ka ni, la leh thei pawh ka ni. He thupek hi ka Pa hnenah ka hmu a ni,” a ti a.
10:19 Chung thu avang chuan Judate an inthen a, an inkhing leh a.
10:20 A then tam takin “Ramhuai a zawl a, a a a nih hi; engati nge a thu in ngaihthlak?” an ti a.
10:21 A thenin, “Heng thu hi ramhuai zawl thusawi a ni lo ve. Ramhuaiin mitdel mit a tivar thei em ni?” an ti a.
10:22 Tin, Jerusalem khuaa Inpumpek Kut lai a ni a, chu chu thlasik lai a ni.
10:23 Tin, Isua Pathian biak inah, Solomona hulhliapah a vei a vei a.
10:24 Tin, Judate a velah an lo kal a, a hnenah, “Eng chen nge tuilairapin min siam dawn? Krista i nih chuan fiah takin min hrilh rawh,” an ti a.
10:25 Isuan an hnenah, “Ka hrilh tawh che u kha, in awih si lo; ka Pa hminga thil ka tih hi, heng hian ka chanchin a hriattir a nih hi.
10:26 Nimahsela in awih si lo, ka beram zinga mi in nih loh avangin.
10:27 Ka beramten ka aw an hre thin, kei pawhin anni chu ka hria, anni chuan mi zui thin;
10:28 an hnenah chatuana nunna ka pe a; kumkhuain an boral lo vang a, tuman ka kut ata mi chhuhsak hek lo vang.
10:29 Anni mi petu, ka Pa chu, mi zawng zawng aia ropui ber a ni a; tuman Pa kut ata chu an chhuhsak thei lo vang.
10:30 Kei leh Pa chu pumkhat kan ni,” tiin a chhang a.
10:31 Tin, Judate chuan a denna turin lung an char leh a.
10:32 Tin, Isuan anni chu a bia a, “Pa hnena chhuak hnathawh tha tam tak ka entir che u a, khang hnathawhte zingah khan hna eng avang khan nge lunga mi den dawn hi?” a ti a.
10:33 Judate chuan a hnenah, “Hna tha chungah lungin kan den dawn loh che hi; Pathian i sawichhiat chungah leh, nang, mihring ni si a, Pathiana i insiam avang zawk hian a ni,” tiin an chhang a.
10:34 Isuan an hnenah, “In Dan Lehkhabuah ‘Pathiante in ni ka ti,’ tih ziak a ni lo vem ni?
10:35 Pathian thu thlennate mah pathianho an tih chuan, (Pathian Lehkha Thu ban theih a ni si lo va,)
10:36 Pain a ruat a, khawvela a tirha chungah hian, ‘Pathian Fapa ka ni,’ ka tih avangin, ‘Pathian i sawichhia,’ in ti a ni maw?
10:37 Ka Pa hna thawk ka nih loh chuan mi ring suh u.
10:38 Amaherawhchu thawk ka nih chuan kei mi ring lo mah ula, hnathawhte tal hi ring rawh u; Pa keimahah a awm tih leh, kei Paah ka awm tih in hriata in rin nan,” a ti a,a chhang a.
10:39 Chutichuan ani chu man an tum leh a, nimahsela an kut ata a chhuak a,
10:40 Jordan lui ralah, Johanan atira mi a baptisma lamah khan a kal bo leh a, chutah chuan a awm ta reng a.
10:41 Tin, mi tam tak a hnenah an lo kal a; “Johanan chhinchhiahna engmah zawng a ti lo va; nimahsela Johanan he mi chungchang thu a sawi apiang kha a lo dik hle hi,” an ti a.
10:42 Tin, chutah chuan mi tam takin amah an ring ta a.
11:1 Tin, mi pakhat, Mari leh a laizawn Marthi awmna khua Bethani-a mi, Lazara, damlo a awm a.
11:2 (Mari, hriak rimtui Lal hnawiha a sama a ke hrutu kha, kha mi nuta Lazara a ni, damlo chu.)
11:3 Tin, a farnuten Isua hnenah, “Lalpa, ngai teh, i hmangaih kha a dam lo ve,” tiin mi an tir a.
11:4 Tin, Isuan chu chu a hria a, “He na hi thihna tur a ni lo, Pathian mawi nan a ni zawk e, Pathian Fapa chu he mi avang hian a la mawina turin,” a ti a.
11:5 Tin, Isuan Marthi te, a laizawn te, Lazara te a hmangaih a.
11:6 Chuvangin a dam lo tih a hriatin a awmna ngaiah ni hnih a la awm ta cheu va.
11:7 Tin, chu mi hnuah chuan a zirtirte hnenah, “Judai ramah i kal leh ang u,” a ti a.
11:8 Tin, zirtirte chuan a hnenah, “Rabbi, hman lawkah khan Judaten lunga den an tum che kha; chuti pawhin chutah chuan i kal leh bawk dawn em ni?” an ti a.
11:9 Tin, Isuan, “Chhunah darker sawm leh pahnih a awm lo vem ni? Mi, chhuna a len chuan a pai ngai lo, he khawvel eng hi a hmuh avangin.
11:10 Amaherawhchu mi, zana a len chuan a pai thin, amahah chuan eng a awm loh avangin,” a ti a, a chhang a.
11:11 Chung thu chu a sawi a; tin, chu mi hnuah chuan an hnenah, “Kan thian Lazara chu a muhil ta a; a muhil kai harh turin ka kal dawn a ni,” a ti a.
11:12 Chutichuan zirtirte chuan a hnenah, “Lalpa, a muthilh tawh chuan a dam leh ang chu,” an ti a.
11:13 (Isuan a thih thu a sawi a ni a; nimahsela anni chuan a chawlh chhunga a muthilh thu a sawi emaw an ti a.)
11:14 Chutichuan Isuan fiah takin an hnenah a sawi a, “Lazara a thi a ni.
11:15 Chuta ka awm lo chu ka lawmsak a che u, in rin theih nan; nimahsela a hnenah i kal ang u,” a ti a.
11:16 Tin, Thoma, Phira an tih chuan a zirpuihote hnenah, “A thihnaa thi ve turin i kal ve ang u,” a ti a.
11:17 Chutichuan Isuan a thlenin, ni li thlanah a lo awm tawh tih a hria a.
11:18 Bethani khua chu Jerusalem khaw kiang a ni a, fing sawm leh fing nga laia hla a ni;
11:19 tichuan an nuta thih chunga tithlamuang turin Judateho tam tak Marthi leh Mari hnenah an lo kal a.
11:20 Tin, Marthi chuan Isua a lo kal dawn tih a hriat veleh a hmuak a; Mari erawh chu inah a la thu reng a.
11:21 Tin, Marthi chuan Isua hnenah, “Lalpa, heta awm ni la chu ka nuta a thi lo tur.
11:22 Tunah pawh Pathian hnena i ngen apiang Pathianin a pe ang che tih ka hria e,” a ti a.
11:23 Isuan a hnenah, “I nuta a tho leh ang,” a ti a.
11:24 Marthi chuan a hnenah, “Ni kin nia thawhlehnaah chuan a tho leh ang tih ka hria e,” a ti a.
11:25 Tin, Isuan a hnenah, “Kei hi thawhlehna leh nunna chu ka ni; tupawh mi ring chu thi mah sela a nung reng ang;
11:26 nung apiangin mi ring chu kumkhuain an thi lo vang; chu thu chu i ring em?” a ti a.
11:27 Ani chuan a hnenah, “Ring e, Lalpa, Krista, Pathian Fapa, khawvela lo kal tura chu i ni tih ka ring e,” a ti a.
11:28 Tin, chu thu chu a sawi zawh veleh a kal a, a laizawn Mari chu arukin a ko va, “Zirtirtu hetah a awm a, a ko va che,” a ti a.
11:29 Tin, ani chuan chu chu a hriat veleh a tho thuai a, a hnenah a va kal a.
11:30 (Isua chu khuaah a la lut lo va, Marthiin a va hmuah laia a awmna ngaiah a la awm a.)
11:31 Tin, in chhunga a thlamuantu a awmpui Judate chuan Mari a tho thuai a, a chhuak an hmuh veleh, thlanah tap turin a kal dawn emaw an ti a, an zui a.
11:32 Tin, Mari chuan Isua awmna chu a va thleng a, a hmuh veleh a ke bulah a bawkkhup a, a hnenah, “Lalpa, heta awm ni la chu, ka nuta a thi lo tur,” a ti a.
11:33 Tin, Isuan Mari tap leh a rawn zuitu Judate tap chu a hmu a, a rilruin a rum a, a lungngai a,
11:34 “Ani chu khawiah nge in zalh?” a ti a. Anni chuan a hnenah, “Lalpa, lo kal la, en teh,” an ti a.
11:35 Isua a tap ta a.
11:36 Tin, Judate chuan, “En teh u, Lazara hi a va lo hmangaih em ve e!” an ti a.
11:37 Nimahsela thenkhat chuan, “He mi, mit del mit tivartu hian he mi pawh hi a thih lohtir thei lo vem ni?” an ti a.
11:38 Tin, Isua chu a rilruin a rum leh a, thlan chu a thleng ta a. Chu thlan chu puk a ni a, a kawngkaah chuan lung pakhat a awm.
11:39 Isuan, “Lung hi chawi sawn rawh u,” a ti a. A thia farnu Marthi chuan a hnenah, “Lalpa, tunah zawng a uih tawh ang, a thihna ni li a ni tawh si a,” a ti a.
11:40 Isuan a hnenah, “I rin chuan Pathian ropuizia i hmu ang, ka ti lo che em ni?” a ti a.
11:41 Chutichuan lung chu an chawi sawn a. Tin, Isua a vanvadak a, “Ka Pa, ka thu i ngaihthlak avangin i chungah ka lawm e.
11:42 Kumkhuain ka thu i ngaithla thin tih ka hre reng a ni; nimahsela mipui din vel avangin chu chu ka ti a ni, nangin mi tir tih an rin theih nan,” a ti a.
11:43 Tin, chutia a tawng zawh veleh chuan aw ring takin, “Lazar, lo chhuak rawh,” a ti a, a au va.
11:44 Tin, mitthi chu a kut a ke thlan puana tuam chungin a lo chhuak ta a, a hmai pawh inhrukna puana tuam a ni a. Isuan an hnenah, “Phelh ula, kaltir rawh u,” a ti a.
11:45 Chuvang chuan Mari lenpuitu, Isua thiltih hmu Judate chuan a then tam takin Isua an ring ta a.
11:46 Nimahsela a then Pharisaite hnenah an v kal a, an hnenah Isua thiltihte chu an hrilh a.
11:47 Chutichuan puithiam lalte leh Pharisaite chuan roreltuho an ko khawm a, “Engtin nge kan tih ang? He mi hian thilmak tam tak a ti si a.
11:48 Hetianga kan thlahthlam chuan mi zawng zawngin amah an ring ang a, tin, Roma mite an lo kal ang a, kan hmuh leh kan chite hi min laksak ang,” an ti a.
11:49 Tin, an zinga mi pakhat Kaiapha, chu mi kuma Puithiam Lalber chuan an hnenah, "Nangnin engmah in hre hauh lo,
11:50 kan chi zawng zawng boral lohna turin mi zawng zawng aia mi pakhat thih, in tan a tha tih in ngaihtuah bawk lo,” a ti a.
11:51 (Chu thu chu ama phuahchawpin a sawi lo, chu mi kum chuan Puithiam Lalber a ni a, an chite aia Isua a thih tur thu a sawi lawk a ni zawk e.
11:52 Chu mi chite ai chauh chuan a ni lo, Pathian fa khawvela darhte zawng zawng pawl khata a hruai khawmna tur pawhin a ni bawk.)
11:53 Chutichuan chu mi ni achin chu, amah tihlum turin an inrawn thin a.
11:54 Chuvangin Isua chu Judate zingah alangin a leng leh ta lo va, chuta tangin thlaler dep lama khaw pakhat Ephraim an tihah chuan a va kal ta zawk a; chutah chuan zirtirte nen chuan an awm ta reng a.
11:55 Tin, Judate Kalhlen Kut chu a hnai tawh a, mi tam tak inthian turin, ram ata, Kalhlen Kut hmain, Jerusalem khuaah an han kal a.
11:56 Chutichuan Isua an zawng a, Pathian biak inah ding chungin an inbia a, “engnge in rin? Kutnaah a lo kal lo vang maw?” an inti a.
11:57 Puithiam lalte leh Pharisaiten amah chu an man theih nan tupawhin a awmna an hriat chuan puan tur a ni tih thu an pe tawh si a.
12:1 Tin, Kalhlen Kutna tur ni ruk a la awmin, Isuan mitthi zing ata a kaihthawh Lazara awmna Bethani khua kha a lo thleng a.
12:2 Tin, chutah chuan amah atan zan ruai an theh a; Marthiin rawng a bawl a, Lazara erawh chu a chawhlui kilpuitu pakhat a ni a.
12:3 Tin, Marin buk zatve spiknard hriak rimtui to tak a rawn keng a, Isua kete a chulh a, a samin a kete chu a hru a; tichuan chu hriak rim chuan in chu a khat ta rum rum a.
12:4 Nimahsela Iskariot Juda, a zirtir pakhat, a mantirtu tur chuan,
12:5 “He hriak rimtui hi engati nge duli zathuma hralhin mi retheite hnena an pek zawk loh?” a ti a.
12:6 (Mi retheite a ngaihsak vanga chu thu chu sawi a ni lo; rukru a ni a, tangka ip a kawl a, a chhunga dah chu a lak thin vang zawk a ni.)
12:7 Tin, Isuan, “Mi phum ni atan khek rawh se.
12:8 Mi retheite chu kumkhuain in hnena awm an ni alawm; kei erawh chu kumkhuaa in hnena awm tur ka ni lo,” a ti a.
12:9 Tin, Isua chutah chuan a awm tih Juda hnamchawmten an lo hre ta a; tin, an lo kal a, Isua chauh rawn kal chhan an ni lo va, mitthi zing ata a kaihthawh Lazara pawh kha hmuh duh fawmin an ni bawk.
12:10 Tin, puithiam lalte chu Lazara pawh tihlum turin an inrawn a;
12:11 amah avanga Judate tam takin an pakaisan a, Isua an rin thin avangin.
12:12 A tukah chuan kutnaa lo kal mipui tam takin,Isua Jerusalem khuaah a lo kal dawn tih an hriatin,
12:13 tum kaute an keng a, a hmuak turin an va chhuak a, “Hosana, Lalpa hminga Israel Lal lo kal chu fakin awm rawh se,” tiin an au va.
12:14 Tin, Isuan sabengtung no a hmu a, a chungah a chuang a;
12:15 “Hlau suh, Zion fanu; En teh, i Lal chu, Sabengtung no chunga chuangin, A lo kal dawn e,” tih ziak ang khan.
12:16 Chung chu atirin a zirtirten an hre lo va; nimahsela Isua chawimawia a awm hnuah chuan a chanchinah chung thu chu ziak a ni tih leh, a chungah chung thil chu an lo ti nge tih an lo hre ta a.
12:17 Tin, Lazara, thlan ata a koh chhuah a, mitthi zing ata a kaihthawh laia a hnena mipui awmte khan, a thu chu an hriattir ta zel a.
12:18 Chu mi avang chuan a ni, mipuite pawh chuan amah chu an va hmuah ni, chu thilmak chu a ti tih an hre si a.
12:19 Chutichuan Pharisaite chuan, “Hre rawh u, engmah in tih theih loh hi; en rawh u, khawvelin amah an zui tak hi,” an ti a.
12:20 Tin, kutnaa Pathian chibai buk tura han kalte zingah Grik tute emaw an awm a;
12:21 tin, chungte chu Galili rama Bethsaida khuaa mi Philipa hnenah chuan an lo kal a, a hnenah, “Ka pu, Isua hmuh kan duh e,” an ti a, an ngen a.
12:22 Philipa chuan Andria a rawn hrilh a; tin, Andria leh Philipa chuan Isua an rawn hrilh a.
12:23 Tin, Isuan a chhang a, an hnenah, “Mihring Fapa chawimawia a awm hun chu a thleng tawh.
12:24 Tih tak meuhvin, tih tak meuhvin ka hrilh a che u, buh fang leia a tlak lohva, a thih loh chuan a mal chauhvin a awm reng thin; a thih erawh chuan tam takin a rah thin.
12:25 Tupawh a nun thlahlel chuan a hloh thin; tupawh he khawvelah hian a nun ngaitlawm chuan chatuana nunna tur a vawng reng ang.
12:26 Tupawhin ka rawng a bawl chuan mi zui rawh se; ka awmnaah ka rawngbawltu pawh a awm ang: tupawhin ka rawng a bawl chuan ani chu Pain a chawimawi ang.
12:27 “Tunah ka rilru a mangang e; engnge ka sawi ang aw? ‘Ka Pa, he mi hun lakah hian mi chhandam rawh,’ ka ti ang em ni? Engpawh ni sela, he mi tur hi, he mi hun thleng hianka awm chhan a ni.
12:28 Ka Pa, i hming chawimawi rawh,” a ti a. Chutichuan van atangin aw a lo chhuak a, “Ka chawimawi tawh, ka chawimawi leh bawk ang,” a ti a.
12:29 Tin, mipui a kianga dingte chuan chu chu an hria a, “Khawpui a ri a ni,” an ti a; mi dangten, “Vantirhkohvin amah a bia a ni,” an ti a.
12:30 Isuan a chhang a, “chu aw chu ka tana lo chhuak a ni lo, nangmahni tan a ni zawk e.
12:31 Tunah he khawvel hi ngaihtuah lai a ni; tunah he khawvel lal hi paih chhuah a ni ang.
12:32 Tin, kei, lei ata khaikanin ka awm chuan mi zawng zawng keima hnenah ka hip ang,” a ti a.
12:33 Chu thu chu a thihzia tur hriattir nan a sawi a ni.
12:34 Tin, mipui chuan a hnenah, “Krista chu chatuanin a awm reng dawn tih Dan Lehkhabuah kan hria e; nangin, ‘Mihring Fapa khaikanin a awm tur a ni,’ eng ti tiha ti nge i nih? Chu Mihring Fapa chu tunge ni?” an ti a, an chhang a.
12:35 Tin, Isuan an hnenah, “Eng hi rei lo te in zingah a la awm rih e. Eng in neih chhung hian leng rawh u, thimin a nan loh nan che u; tupawh thima leng chuan a kalna chin a hre thin lo.
12:36 Eng in neih chhung hian eng hi ring rawh u, eng fate in lo nih theih nan,” a ti a. Chung thu chu Isuan a sawi a; tin, a kal a, an hmuh loh turin a biru ta a.
12:37 An hmaah chutiang thilmak tam tak ti mah sela, amah an ring si lo:
12:38 ‘Lalpa kan thusawi tuin nge ring? Lal kut pawh tu hnenah nge a lan?’ tih, Zawlnei Isaia thusawi kha a thlen nan.
12:39 He mi avang hian a ni an rin theih loh, Isaian,
12:40 ‘Aman an mit a tidel a, An thinlung a tia a; Chutilochuan an mitin an hmu dah ang a, An thinlungin an hre dah ang a, Tin, an hawi kir leh dah ang a, Keiin anni ka tidam dah ang e, tih, a sawi leh avang hian.
12:41 Isaian a ropuizia a hmuh leh a chanchin thu a sawi avangin chung thu chu a sawi a ni.
12:42 Nimahsela hotute a then tam takin Isua an ring ta a; amaherawhchu Pharisaite avangin an inpuang lo, chutilochuan inkhawmna in hnawngin an awm ang;
12:43 Pathian hnena ropuina ai chuan mihring hnena ropuina an duh zawk si a.
12:44 Tin, Isua a au va, “Tupawh mi ring chu kei mi ring a ni lo, mi tirtu ring a ni zawk e.
12:45 Tupawh mi hmu chu mi tirtu hmu a ni.
12:46 Entua khawvela lo kal ka nih hi, tupawh mi ring apiang thima an awm reng loh nan.
12:47 Tupawh ka thusawi hriain, awih lo mah sela, keiin thiam loh ka chantir lo: khawvel thiam loh chantir tura lo kal ka ni lo va, khawvel chhanhim tura lo kal ka ni zawk si a.
12:48 Tupawh mi duh lova, ka thusawite vawng lo chuan thiam loh chantirtu pakhat a nei a ni, ka thusawi kha, kha mi thu ngei khan, ni kin niah chuan amah chu thiam loh a la chantir ang.
12:49 Keimaha phuahchawpin ka sawi si lo; Pa mi tirtu chuan ka sawi tur leh ka hrilh tur hi thu mi pe zawk a ni.
12:50 Ama thupek chu chatuana nunna a ni tih ka hria; chuvang chuan thu ka sawi hi, Pa mi hrilh ang zelin ka sawi a ni,” a ti a.
13:1 Tin, Kalhlen Kut hmain Isuan he khawvel hi chhuahsana Pa hnena a kal hun a thleng tawh tih a hria a, amaha mi khawvela awm a hmangaih thinte chu a tawp thleng pawhin a hmangaih reng a.
13:2 Tin, zanriah ei laiin, (chu mi hma pawhin diabolan Simona fapa Iskariot Juda chu Isua mantir a rilruktir a,)
13:3 Isuan, - Pain a kutah thil engkim a vawntir te, Pathian hnena lo chhuak a nih te, Pathian hnena a kal dawn te hre reng chungin –
13:4 a zanriah chaw kil chu a tho va, a puante a dah a, inhrukna puan a la a, a veng a.
13:5 Tin, maihunah tui a bun a, zirtirte ke a sil ta a, inhrukna puan a ven chuan an hru zel a.
13:6 Chutichuan Simon Petera hnenah a lo kal a. Ani chuan, “Lalpa, nang emin ka ke i sil dawn em ni?” a ti a.
13:7 Isuan a hnenah, “Ka thiltih hi tunah i hre lo; nimahsela nakin hnuah i la hria ang,” a ti a, a chhang a.
13:8 Peteran a hnenah, “Ka ke i sil tawp lo vang,” a ti a. Isuan a hnenah, “Ka sil loh che chuan ka hnenah engmah chan i nei lo vang,” a ti a.
13:9 Simon Peteran a hnenah, “Lalpa, chuti a nih chuan ka ke chauh ni lovin, ka kut leh ka lu pawh le,” a ti a.
13:10 Isuan a hnenah, “Inbual tawh chu a ke lo chu sil a ngai lo, a fai var alawm; nangni in fai e – in za erawh chuan a ni lo,” a ti a.
13:11 (A mantirtu tur chu a hre si a; chuvangin, “In za chuan in fai lo,” a ti a ni.)
13:12 Chutichuan an ke a sil a, a puante a lak a, a thut leh chuanin an hnenah, “In chunga ka thiltih hi engtihna nge ni in hria em?
13:13 Nangnin Zirtirtu leh Lalpa mi ti thin; in tidik e, ka ni nge reng a.
13:14 Kei Lalpa leh Zirtirtu mahin in ke ka sil chuan nangni pawhin in ke in insilsak tur a ni.
13:15 In chunga ka tih ang hian nangni pawhin in tih vena turin ka tihhmuh che u a ni si a.
13:16 Tih tak meuhvin, tih tak meuhvin ka hrilh a che u, bawih a pu aiin a ropui lo; irhkoh pawh a tirtu aiin a ropui hek lo.
13:17 Chung thil chu in hriat chuan ti ula in eng a thawl ang.
13:18 In zaa thu ka sawi lo ve; ka thlante chu ka hria, nimahsela chu chu, ‘Ka chhang eituin A ke artui ka chungah a lek ta,’ tih Pathian Lehkha Thu kha a lo thlen theihna tur a ni.
13:19 Tun achinah a lo thlen hmain ka hrilh che u hi, a lo thlen hunah kei, amah kha ka ni tih in rin theihna turin.
13:20 Tih tak meuhvin, tih tak meuhvin ka hrilh a che u, tupawh ka tirh apiang lawm chu, keimah mi lawm a ni; tupawh kei mi lawm chu, mi tirtu lawm a ni,” a ti a.
13:21 Isuan chutianga a sawi zawhin a rilruin a mangang a, “Tih tak meuhvin, tih tak meuhvin ka hrilh a che u, in zinga mi pakhatin mi mantir ang,” tiin a hriattir ta a.
13:22 Tin, zirtirte chuan a tih bik an hre lo va, an inen hlawm a.
13:23 Tin, a zirtirte zinga mi pakhat Isuan a hmangaiha chu dawhkan sirah Isua angchhungah bawkin a awm a.
13:24 Tin, Simon Peteran chu mi hnenah chuan, “Tu thu ber nge a sawi, min hrilh teh,” tiin a zaizir a.
13:25 Tin, ani chu a awmna ngaiah a awm a, Isua awm nghengin a lo thle phei a, a hnenah, “Lalpa, tu ber nge ni?” a ti a.
13:26 Tin, Isuan, “Chhang them ka chhiahsaka ka peka chu a ni ang,” a ti a, a chhang a. Chutichuan chhang them chu a chiah hnuin a la a, Iskariot Simona fapa Juda hnenah chuan a pe a.
13:27 Tin, chhang them chu a pek hnu chuan Setana a chhungah a lut ta nghal a. Chutichuan Isuan a hnenah, “I tih tur chu ti thuai rawh,” a ti a.
13:28 (Tin, dawhkan sira mite chuan tuman engtiziaa ti nge a nih an hre lo.
13:29 Thenkhatin, Juda chuan tangka ip a vawn avangin, “Isuan, ‘Kut atan thil kan chakkhai apiang lei rawh,’ a ti emaw, ‘Mi retheite hnenah englo pek tur,’ a ti emaw,” an ti a ni.)
13:30 Tin, ani chuan chhang them chu a la a, a chhuak ta nghal a; chu mi lai chu zan a ni a.
13:31 Chutichuan a chhuah hnuin Isuan a sawi a, “Tunah chuan Mihring Fapa chawimawiin a awm ta, amah avangin Pathian pawh chawimawiin a awm a ni.
13:32 Pathianin amahah chuan ani chu a chawimawi ang, a chawimawi nghal ang.
13:33 Naute u, rei lo te in hnenah ka la awm rih e. Nangnin mi zawng ang; tin, Judate hnenah, ‘Ka kalna turah in lo kal thei lo vang,’ tih ka sawi ang khan, tunah chuti bawkin in hnenah ka sawi hi.
13:34 “Thupek thar ka pek che u hi, inhmangaih ula; keiin ka hmangaih ang che u hian nangni pawh inhmangaih ula.
13:35 In inhmangaih chuan mi zawng zawngin ka zirtirte in ni tih chu miah chuan an hria ang,” a ti a.
13:36 Simon Peteran a hnenah, “Lalpa, khawiah nge i kal dawn?” a ti a. Isuan, “Ka kalna turah nangin tunah mi zui thei lo vang; nakin hnuah erawh chuan mi zui ang,” a ti a,a chhang a.
13:37 Peteran a hnenah, “Lalpa engati nge tunah pawh ka zui theih loh vang che? Nangmah avangin ka nun ka paih ang,” a ti a.
13:38 Isuan, “Keimah avangin i nun i paih ang maw? Tih tak meuhvin, tih tak meuhvin ka hrilh a che, nangin vawi thum mi phat hma loh chuan ar a khuang lo vang.
14:1 “In thinlung mangang suh se; Pathian in ring e, kei pawh mi ring ve rawh u.
14:2 Ka Pa inah awmna tam tak a awm a, a awm loh chuan ka hrilh tawh tur che u a ni; intan hmun siaminka kal dawn hi.
14:3 Tin, in tanhmunka han siam chuan ka lo kir leh ang a, ka hnenah ka la ang che u; ka awmnaah nangni pawh in awm theih nan.
14:4 Ka kalna tur a kawng chin in hria e,” a ti a.
14:5 Thoman a hnenah, “Lalpa, i kalna tur chin kan hre lo asin, a kawng engtin nge kan hriat ang?” a ti a.
14:6 Isuan a hnenah, “Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo.
14:7 Kei mi hria ni ula, ka Pa pawh in hre tawh tur; tun achinah amah in hria e, amah in hmu tawh bawk,” a ti a.
14:8 Philipan a hnenah, “Lalpa, Pa chu keini min hmuhtir ta che, chutichuan kan tan a tawk ang,” a ti a.
14:9 Isuan a hnenah, “Philip, hei leh chen hi in hnenah ka awm a, chuti pawhin mi hre lo maw? Tupawh mi hmu chu Pa hmu a ni. ‘Pa chu keini min hmuhtir rawh,’ eng ti tiha i ti nge ni?
14:10 Kei Paa ka awm leh Pa keimahah a awm tih i awih lo vem ni? In hnena thu ka sawi hi keima phuahchawpin ka sawi lo; Pa keimahah a awm reng a, a thil a ti zawk thin a ni.
14:11 Kei Paa ka awm leh Pa keimahah a awm tih mi ring rawh u; a nih loh leh, thiltih avang tal hian mi ring rawh u.
14:12 Tih tak meuhvin, tih tak meuhvin ka hrilh a che u, tupawh mi ring chuan thil ka tithe hi ani pawhin a ti ve ang; heng aia thil ropui pawh hi a la ti ang, Pa hnenah ka kal dawn avangin.
14:13 Tin, ka hmingin engpawh in dil apiang chu ka ti zel ang, Pa, Fapa avanga chawimawia a awm theih nan.
14:14 Nangnin ka hmingin engpawh mi dil chuan chu chu ka ti zel ang.
14:15 “Nangnin mi hmangaih chuan ka thupekte chu in zawm ang.
14:16 Tin, Pa ka dil ang a, ani chuan Thlamuantu dang a pe ang che u, chatuana in hnena awm turin;
14:17 chu chu Thlarau dik tak a ni; khawvelin chu mi chu an nei thei lo, amah an hmuh lohva an hriat hek loh avangin; nangnin ani chu in hria e, in hnenah a awm reng si a, nangmahniah chuan a awm dawn a ni.
14:18 Fahrahin ka kalsan lo vang che u; in hnenah ka lo kal leh ang.
14:19 Rei lo deuh chinah khawvelin mi hmu leh tawh lo vang; nimahsela nangni zawngin mi hmu ang; keimah ka nun avangin nangni pawh in nung ve ang.
14:20 Chu mi niah chuan kei ka Paa ka awmte, nangni keimaha in awm te, kei nangmahnia ka awmte in hria ang.
14:21 Tupawh ka thupekte neia zawm chu mi hmangaihtu a ni; tupawh mi hmangaih chu ka Pain a hmangaih ang, kei pawhin ani chu ka hmangaih ang a, a hnenah ka inlar ang,” a ti a.
14:22 Tin, Juda (Iskariota lo zawk) chuan a hnenah, “Lalpa, keini hnenah i inlar ang a, kahwvel hnena i inlar si lo tur chu, engati nge?” a ti a.
14:23 Isuan a chhang a, a hnenah, “Miin mi hmangaih chuan ka thu a zawm ang a; ka Pain ani chu a hmangaih ang a, a hnenah kan lo kal ang a, a hnenah kan awm reng ang.
14:24 Tupawh mi hmangaih lo chuan ka thu a zawm lo; thu inhriatte hi ka ta a ni lo, Pa mi tirtu ta a ni zawk e.
14:25 In hnena ka la awm chhung hian heng thu hi ka hrilh che u hi.
14:26 Tin, Thlamuantu, Thlarau Thianghlim, Pain ka hminga a rawn tirh tur khan, chu mi chuan engkim a zirtir ang che u a, inhnena ka sawi zawng zawng a hriat chhuahtir leh ang che u.
14:27 “Thlamuanna ka hnutchhiah a che u; keima thlamuanna ka pe a che u; khawvelin a pek angin ka pek loh che u hi. In thinlung mangang suh se, hlauh pawh hlau suh se.
14:28 ‘Ka kal bo dawn a, in hnenah ka lo kal leh ang,’ ka tihzia che u kha in hre tawh e. Nangnin mi hmangaih ni ulang Pa hnena ka kal dawn avangin in lawm tur a ni; pa chu keimah aiin a ropui zawk si a.
14:29 Tunah a lo thlen hma hianka hrilh tawh che u hi, a lo thlen huna in rin nan.
14:30 In hnenah thu ka sawi leh tawh mang lo vang, khawvel lal a lo kal dawn si a, ani chuan keimahah engmah reng a nei lo;
14:31 nimahsela keiin Pa ka hmangaih leh, Pain thu mi pek ang zelin thil ka ti tih khawvelin an hriatna tur a nih hi. Tho rawh u, heta ta i chhuak ang u.
15:1 “Kei grep hrui taktak ka ni, ka Pa a huan enkawltu a ni.
15:2 Ka zawmpui peng rah lo apiang a paih thin a; a rah apiang a tithianghlim thin, a rah tam lehzual nan.
15:3 In hnena ka thusawi avang chuan tunah pawh in thianghlim tawh pang a ni.
15:4 Keimahah awm reng rawh u, kei pawh nangmahniah ka awm reng ang. Peng chu grep hruia a awm reng loh chuan amahin a rah thei lo ang bawkin, nangni pawh keimahah in awm reng loh chuan in rah thei lo vang.
15:5 Kei grep hrui chu ka ni, nangni a pengte chu in ni; tupawh keimaha awm renga kei pawh amaha ka awm rengna chu, chu mi chu tam takin a rah thin; keimah lovin engmah in ti thei si lo.
15:6 Mi keimaha a awm reng loh chuan peng anga paih chhuahin a awm a, a vuai thin; tin, an fawm a, meiah an paih a, a kang thin.
15:7 Nangni keimaha in awm reng a, ka thu nangmahnia a awm reng bawk chuan in duh apiang dil rawh u, in tan tihin a awm zel ang.
15:8 He mi avangin ka Pa chu chawimawiin a awm thin, tam taka in rah hian; chutichuan ka zirtirte in ni ang.
15:9 “Pain mi hmangaih ang bawkin kei pawhin ka hmangaih che u hi; ka hmangaihin awm reng rawh u.
15:10 Nangnin ka thupekte in zawm chuan ka hmangaihin in awm reng ang; keiin ka Pa thupekte ka zawm a, a hmangaihin ka awm reng ang bawk hian.
15:11 Ka lawm nangmahnia a awm reng nan leh, in lawm a kim nan, heng thu hi in hnenah ka sawi hi.
15:12 Hei hi ka thupek a ni, keiin ka hmangaih che u ang bawkin nangni inhmangaih ula.
15:13 Mihringin a thian aia a nun a paih aliama hmangaihna nasa zawk tuman an nei lo.
15:14 Thu ka pek apiang che u in tih chuan ka thiante in ni ang.
15:15 Bawih ka ti leh tawh lo vang che u; a pu thiltih bawihin a hre si lo; thiante ka ti tawh zawk ang che u; Pa hnena thil ka hriat zawng zawng in hnenah ka puang tawh si a.
15:16 Nangnin mi thlang lo, keiman ka thlang zawk che u a, va rah tur leh in rah awm reng turin ka ruat bawk a che u; ka hminga Pa hnena in dil apiang a pekna tur che u in.
15:17 “In inhmangaih theih nan heng thu hi ka pe a che u.
15:18 “Khawvelin a huat che u chuan, a huat hma che u pawhin keimah mi hua tih in hria e.
15:19 Nangni khawvela mi ni ula, khawvelin amaha mi a hmangaih tur; khawvela mi in ni si lo va, khawvela mi ka thlan chhuah zawk che u avang hian khawvelin a hua che u a ni e.
15:20 ‘Bawih a pu aiin a ropui lo,’ tih thu ka hrilh tawh che u kha hre reng rawh u. Annin kei mi tihduhdah tawh chuan nangni pawh an tiduhdah ang che u; ka thu an zawm tawh chuan nangni thu pawh an zawm ang.
15:21 Nimahsela heng thil zawng zawng hi ka hming avangin in chungah an ti ang, mi tirtu an hriat loh avangin.
15:22 Kei lo kalin anhnenah thu sawi suh ila, sual an nei lo tur; tunah erawh zawng an sual chhuanlam tur an nei ta lo a ni.
15:23 Tupawh kei mi hua chuan ka Pa pawh a hua a ni.
15:24 Thil, mi dang tuma tih ngai lohte an zingah ti suh ila, sual an nei lo tur; tunah erawh zawng annin kei leh ka Pa kan pahnihin min hmu tawh a, huat pawh min haw tawh a ni.
15:25 Engpawh ni rawh se, an Dan Lehkhabuah, ‘Annin enga khawlawi lovin mi hua,’ tih thu ziak kha a lo thlenna turin an ti a nih hi.
15:26 “Tin, Pa hnen ata Thlamuantu in hnena ka tirh tur, Paa chhuak Thlarau dik tak chu a lo thlen hunah, ani chuan ka thu a hriattir ang;
15:27 nangni pawhin in hriattir bawk ang, atir ata ka hnena in awm avangin.
16:1 “Tihlungnihlohva in awm lohna turin heng hi in hnenah ka sawi tawh hi.
16:2 inkhawmna inahte an hnawntir ang che u a; a ni, tupawh a tihlum tur che u apiangin Pathian chungah thil tha tiin an inhria ang, chutiang hun chu a thleng dawn.
16:3 Chung thil chu an ti ang, Pa leh kei min hriat loh avangin.
16:4 Heng thu hi in hnenah ka sawi tawh hi, a hun a lo thlen hunah, ka hrilh tawh che u tih in hriat lehna turin. Heng thil hi atir ata ka la hrilh lo reng che u a ni, in hnena ka la awm avangin.
16:5 Tunah erawh zawng mi tirtu hnenah ka kal dawn a ni; nangniho tuman, ‘Khawiah nge i kal dawn?’ tiin mi zawt si lo.
16:6 Heng thu in hnena ka sawi avangin in thinlung chu lungngaiin a khat thlu hial ta zawk a.
16:7 “Nimahsela thu dik tak ka hrilh a che u; ka kal in tan a tha e; ka kal loh chuan Thlamuantu chu in hnenah a lo kal dawn si lo; ka kal erawh chuan in hnenah ka rawn tir ang.
16:8 Ani chu a lo thlen chuan sual thu-ah te, fel thu-ah te, rorel thu-ah te khawvel an thiam loh a
16:9 sual thu-ah te thiam loh an chang ang, kei mi rin loh avang hian;
16:10 fel thu-ah te thiam loh an chang ang; Pa hnenah ka kal dawn a, nangnin mi hmuh leh dawn tawh loh avang hian;
16:11 rorel thu-ah te thiam loh an chang ang, he khawvel lal hi thiam lohva a tluk tawh avang hian.
16:12 “In hnenah thusawi tur tam tak ka la nei cheu va, nimahsela tunah zawng in tlin rih lo vang.
16:13 Nimahsela amah, Thlarau dik tak chu, a lo thlen hun chuan thutak zawng zawngah chuan a hruai lut ang che u: amaha phuahchawpin thu a sawi dawn si lo; thu a dawn apiang chu a hril zawk ang; thil lo thleng turte pawh a hriattir ang che u.
16:14 Ani chuan mei mi chawimawi ang; ka taa mi a la ang a, in hnenah a hriattir dawn si che u a.
16:15 Pa-in thil a neih zawng zawng ka ta a ni; chuvang, ‘Ka taa mi a la ang a, in hnenah a hriattir ang che u,’ ka tih hi.
16:16 “Rei lo teah nangnin kei mi hmu lo vang a; rei lo teah bawk nangnin kei mi hmu leh ang,” a ti a.
16:17 Tin, a zirtirte thenkhatin, “Kan hnena a thusawi hi engnge ni, ‘Rei lo teah nangnin kei mi hmu lo vang a, rei lo teah bawk nangnin kei mi hmu leh ang,’ a tih leh, ‘Pa hnena ka kal dawn avangin,’ a tih hi?” an inti a.
16:18 Tin, anni vek chuan, “Hei, ‘Rei lo te,’ a tih hi eng tihna nge ni? A thusawi hi a ngaihna kan hre lo,” an ti a.
16:19 Tin, amah zawh an duh tih Isuan a hria a, an hnenah, “ ‘Rei lo teah nangnin kei mi hmu lo vang a, rei lo teah bawk nangnin kei mi hmu leh ang,’ tia hei ka thusawi hi in inzawt maw?
16:20 Tih tak meuhvin, tih tak meuhvin ka hrilh a che u, nangni in mittui a tla ang a, in tap vak bawk ang a, khawvel erawh chu an lawm ang; nangni in lungngai ang a, nimahsela in lungngaih chu lawmah a chang ang.
16:21 Hmeichhiain nau a veiin a lungngai thin, a hun a thlen tawh avangin; nimahsela nau a hrin veleh a thlaphan chu a hre leh tawh thin lo, khawvela mihring lo piang chu a lawm avangin.
16:22 Tin, tunah nangni in lungngai e; nimahsela ka hmu leh ang che u a, in thinlung a lawm ang , in lawm chu tuman an laksak lo vang che u.
16:23 Chu mi niah chuan nangnin engmah kei mi zawt lo vang. Tih tak meuhvin, tih tak meuhvin ka hrilh a che u, Pa hnenah engpawh in dil chuan, keima hmingin a pe ang che u.
16:24 Tun thlengin ka hmingin engmah in la dil lo; dil rawh u, tichuan in hmu ang, in lawm a kimna turin.
16:25 “Chung thu chu athawiin in hnenah ka sawi tawh; a hun a thleng dawn, chu mi hunah huan in hnenah athawiin ka sawi leh tawh lo vang a, fiah takin Pa chanchin ka hrilh zawk ang che u.
16:26 Chu mi niah chuan keima hmingin thil in dil ang; tin, ‘Pa hnenah keiin ka ngensak ang che,’ ka ti lo a che u;
16:27 Pa ngeiin a hmangaih si che u a, nangnin kei mi hmangaih a, Paa chhuak ka ni tih mi rin vangin.
16:28 Kei, Pa hnen ata lo chhuaka khawvela lo kal ka ni; khawvel kalsana Pa hnena hawng leh ur ka ni,” a ti a.
16:29 Tin, zirtirten, “Ngai teh, tunah zawng fiah takin thu i sawi a, athawi reng rengin i sawi tak loh hi.
16:30 Nangin engkim i hria a, tuma zawh che i ngai lo tih tunah kan hre ta; he mi avang hian Pathian hnen ata lo chhuak i ni tih kan awih e,” an ti a.
16:31 Tin, Isuan a chhang a, an hnenah, “Tunah chuan in awih ta maw?
16:32 Ngai rawh u, a hun a thleng dawn, a ni, a thleng tawh mek, chu mi hunah chuan mahni in theuhvah in darh vek ang a, keimah chauhvin mi thlahthlam ang; nimahsela Pa ka hnenah a awm avangin mahni chauhvin ka awm si lo.
16:33 Heng thu hi in hnenah ka sawi tawh hi, keimahah hian in thlamuanna turin. Khawvelah hian hrehawmin in awm thin; nimahsela thlamuang takin awm rawh u, keiin khawvel ka ngam ta,” a ti a.
17:1 Chung thu chu Isuan a sawi a; tin, vanvadakin, “Ka Pa, a hun a thleng ta; i Fapa chawimawi rawh, Fapain a chawimawi nan che;
17:2 khatia mi zawng zawng chunga thuneia i siam khan, a hnena i pek apiangte chu chatuana nunna a pek theih nan.
17:3 Hei hi chatuana nunna a ni, nang Pathian tak chauh leh I tirh Isua Krista hriat hi.
17:4 Nangin thil tihtur mi pek kha ka ti zo va, khawvelah ka chawimawi tawh a che.
17:5 Aw ka Pa, khawvel awm hmaa i hnena mawina ka neih khan, tunah nangma hnen ngeiah mi chawimawi rawh.
17:6 “Nangin khawvel zinga chhuak mite kei mi pek hnenah khan i hming ka tilang ta; anni chu i ta an nih kha, nangin anni chu kei mi pe a ni; anni chuan i thu an zawm ta a.
17:7 Nangin thil kei mi pek apiang, i hnena chhuak a ni tih tunah an hre ta.
17:8 Nangin thu mi pekte kha an hnenah ka pe tawh si a; chung chu an vawng a, i hnena chhuak ka ni tih dik takin an hre ta a, nangin mi tir tih pawh an awi ta.
17:9 “An tan ka ngensak hi; khawvel tana ngensak ka ni lo, nangin mi pekteho tan zawk a ni; i ta an ni si a.
17:10 Thil zawng zawng ka ta apiang i ta a ni e, i ta chu ka ta a ni e; anmahni avangin chawimawiin ka awm thin.
17:11 Tin, kei zawng khawvelah ka awm tawh lo vang, hengho erawh hi chu khawvelah an awm ang, kei i hnenah ka lo haw dawn ta. Ka Pa thianghlim, nangin kei mi pekteho hi i hmingin hum rawh, pumkhat an nih theih nan, keimahni ang bawk hian.
17:12 “An hnena ka awm chhung khan, nangin kei mi pekteho hi i hmingin ka hum thin; anni chu ka veng a, an zingah pakhat mah an boral lo, boral fapa lo kha chu; Lehkha Thu kha a lo thlenna turin.
17:13 Nimahsela tunah i hnenah ka lo haw dawn ta; khawvelah heng thu hi ka sawi a ni, ka lawm anmahnia an neih kimna turin.
17:14 I thu an hnenah ka pe ta e; tin, khawvelin anni chu an hua a, khawvela mi an nih loh avangin, kei khawvela mi ka ni lo ang bawk hian.
17:15 “Nangin anni chu khawvel ata i lak chhuah tura ngen ka ni lo va, mi sual lakah chuan i hum tur ka ti zawk a ni.
17:16 Anni chu khawvela mi an ni lo, kei khawvela mi ka ni lo ang bawk hian.
17:17 Anni chu thutakin tithianghlim rawh, i thu chu thutak a ni.
17:18 Nangin khawvela kei mi tir ang khan, kei pawhin anni chu khawvelah ka tirh hi.
17:19 Anmahni avangin ka intithianghlim a ni, anni pawh thutaka an thianghlimna turin.
17:20 “Henghote tan chauh hian ngensak ka ni lo, an thu avanga kei mi la ring turte tan pawh ngensak ka ni bawk e;
17:21 an zaa pumkhat an nihna turin; ka Pa, nang keimaha i awm leh, kei nangmaha ka awm ang bawk hian, anni pawh keimahnia an awmna turin; nangin kei mi tir tih khawvelin an awih theihna turin.
17:22 Tin, nangin ropuina mi pek kha keiin anmahni ka pe ta; anni chu pumkhat an nihna turin, keini pumkhat kan ni ang bawk hian;
17:23 kei anmahniah, nang keimahah, anni pumkhata an awm a, an famkim theihna turin; nangin kei mi tir tih leh, mi hmangaih angin anni hi i hmangaih tih, khawvelin an hriat theihna turin.
17:24 Ka Pa, nangin kei mi pekte hi ka awmnaa ka hnena awmah ka duh; nangin mi pek ka ropuina kha an hmuhna turin; leilung pian hma pawhin nangin mi hmangaih tawh si a.
17:25 Aw ka Pa, fel tak, khawvel zawngin an hre lo chia, kei erawh chuan ka hriat che kha; hengho pawh hian nangin kei mi tir tih an hriat kha.
17:26 Tin, an hnenah i hming ka hriattir a, ka hriattir leh fo vang; nangin kei mi hmangaihna kha anmahniah a awm a, kei pawh anmahnia ka awm theihna turin,” a ti a.
18:1 Isuan chung thu chu a sawi zawhin a zirtirte nen an chhuak a, Kidron luikawr an kan a; chutah chuan huan a awm a, chu miah chuan an lut a, amah leh a zirtirte nen.
18:2 Tin, a mantirtu Juda pawh chuan chu mi hmun chu a hria; Isua chu a zirtirte nen chutah chuan a leng fo si a.
18:3 Chutichuan Juda chuan sipai pawl nen, puithiam lalte leh Pharisaite hnena awm tiangkengtute nen a hruai a, khawnvarte, meichherte, hriamte kengin chutah chuan an lo kal a.
18:4 Isuan a chunga thil thleng tur zawng zawng chu a hre reng a, a va chhuak a, an hnenah, “Tunge in zawn?” a ti a.
18:5 Anni chuan a hnenah, “Nazaret Isua,” an ti a, an chhang a. Isuan an hnenah, “Keimah hi ka ni,” a ti a. Tin, a mantirtu Juda pawh chu an zingah a ding a.
18:6 Tin, “Keimah hi ka ni,” a tih veleh an hnungtawlh a, leiah an tlu hlawm a.
18:7 Tin, ani chuan an hnenah, “Tunge in zawn?” a ti a, a zawt leh a. Tin, anni chuan, “Nazaret Isua,” an ti a.
18:8 Tin, Isuan, “Keimah hi ka ni tih ka hrilh che u alawm; nangnin kei mi zawng in nih chuan hengho hi thlah tha rawh u,” a ti a, a chhang a.
18:9 (A thusawi, “Nangin kei mi pekteho pakhat mah ka hloh ral lo,” a tih kha a thlen nan.)
18:10 Tin, Simon Peteran khandaih a vawng a, a phawi a, Puithiam Lalber bawih a sat a, a beng ding lam a sah thlaksak a. (Bawih hming chu Malka a ni a.)
18:11 Tichuan Isuan Petera hnenah, “Khandaih kha a paiah khung rawh; Pain no kei mi pek hi ka in lo vang em ni?” a ti a.
18:12 Chutichuan sipai pawl nen, an hotu lalber nen, Judate tiangkengtute nen chuan Isua an man a, an phuar a,
18:13 Ana hnenah an hruai hmasa a, Kaiapha puzawn a nih avangin. Kaiapha chu, chu mi kum chuan Puithiam Lalber a ni a.
18:14 Kaiapha chu, “Mi zawng zawng aia mi pakhat thih a tha,” tia Judate rawtpuitu kha a ni.
18:15 Tin, Simon Peteran Isua a zui a, a zirtir dang pakhat nen. Chu mi zirtir chu Puithiam Lalber hmelhriat a ni a, Puithiam Lalber in hual chhung kawtlaiah Isua hnenah a lut ve a;
18:16 nimahsela Petera chu pawnah kawngkhar bulah a ding reng a. Chutichuan zirtir dang, Puithiam Lalber hmelhriata chu a va chhuak a, kawngkhar vengtu a bia a, Petera a hruai lut a.
18:17 Tin, kawngkhar vengtu nula chuan Petera hnenah, “Nang pawh he mi zirtirte zinga tel ve i ni em?” a ti a. Ani chuan, “Ka ni lo,” a ti a.
18:18 Tin, bawihte leh tiangkengtute chu chutah chuan an ding hlawm a, a vawh avangin meihawlin mei an chhem a, a lum an ai a; Petera pawh an hnenah a tel a, ding chungin mei lum a ai ve a.
18:19 Tin, Puithiam Lalber chuan Isua chu a zirtirte chanchin leh a zirtirzia thu a zawt a.
18:20 Isuan a chhang a, a hnenah, “Khawvel mi hnenah, vantlang hriatin thu ka sawi thin kha; inkhawmna in leh Pathian biak in, Juda zawng zawng awm khawmnaahte chuan ka zirtir fo thin kha, arukin engmah ka sawi lo.
18:21 Engati nge kei mi zawh? An hnena ka thu sawizia chu ka thu hretu zawt rawh; ngai rawh, chung chuan ka thusawi chu an hria alawm,” a ti a.
18:22 Chu chu a sawi veleh a kianga ding tiangkengtu pakhatin Isua a beng a, “Puithiam Lalber heti hian i chhang maw?” a ti a.
18:23 Isuan a hnenah, “Thu sual sawi ka nih chuan ka sualna mi hriattir rawh; nimahsela thu tha ka sawi pawhin engah nge mi ben?” a ti a, a chhang a.
18:24 Tin, Ana chuan phuar chungin Puithiam Lalber Kaiapha hnenah a tir a.
18:25 Tin, Simon Peteran dingin mei lum a ai a. Tin, “Nang pawh a zirtir zinga tel ve i ni em?” an ti a. Ani chuan, “Ka ni lo,” tiin a pha a.
18:26 Tin, Puithiam Lalber bawih pakhat, Petera beng sah thlaka laichin chuan, “A hnenah huanah khan ka hmu lo che em ni?” a ti a.
18:27 Tichuan Petera a pha leh a; tin, ar a khuang ta nghal a.
18:28 Tin, Isua chu Kaiapha in atang chuan lal inah an hruai leh a; zing a ni a; tin, anni zawng lal inah an lut lo, an luh zawngin an bawlhhlawh ang a, Kalhlen Kut chaw an ei thei lo vang.
18:29 Tin, Pilata an hnenah a va chhuak a, an hnenah, “He mi chungah hian thupawi engnge in neih?” a ti a.
18:30 Anni chuan a hnenah, “He mi hi mi sual ni suh sela i hnenah kan rawn hruai lo vang,” an ti a, an chhang a.
18:31 Tin, Pilata chuan an hnenah, “Nangnin hruai ulangin, in dan angin a thu rel rawh u,” a ti a. Judate chuan a hnenah, “Keini thuin tumah tihhlum dan a ni lo,” an ti a.
18:32 (A thihzia tur thu, Isuan a sawi anga a thlen nan.)
18:33 Chutichuan Pilata chu a inah a lut leh a, Isua a ko va, a hnenah, “Judate lal i ni em?” a ti a.
18:34 Isuan, “Hei hi nangma rilru puak chhuaka i sawi nge, mi dangin an hrilh che, ka chungchang thu hi?” a ti a, a chhang a.
18:35 che a nih hi; thil engnge i tih?” a ti a, a chhang a.
18:36 Isuan, “Ka ram chu he khawvela mi hi a ni lo; ka ram chu he khawvela mi hi nisela, ka thuihruaiten an bei ang, Judate hnena peka ka awm loh nan; nimahsela ka ram zawng heta mi hi a ni lo,” a ti a, a chhang a.
18:37 Tin, Pilatan a hnenah, “Chu, lal i ni elo?” a ti a. Isuan, “Ni e, lal ka ni asin. Thutak hriattir hi ka pian chhan leh khawvela ka rawn kal chhan a ni. Tupawh thutaka mi apiangin ka thu an pawm thin,” a ti a.
18:38 Pilatan a hnenah, “Thutak engnge ni?” a ti a. Tin, chu thu chu a sawi zawh veleh, Judate hnenah a va chhuak leh a, an hnenah, “Engmah a sualna ka hmu lo.
18:39 Nimahsela Kalhlen Kutah mi pakhat ka chhuahsak tur che u dan in nei; chutichuan Judate lal hi chhuahsak che u ila in duh em?” a ti a.
18:40 Tin, anni chu an au leh a, “He mi hi chu ni suh se, Barabba kha ni zawk rawh se,” an ti a. Barabba chu suam hmang a ni.
19:1 Tin, chutih lai chuan Pilatan Isua a hruai a, a vua a.
19:2 Tin, sipaite chuan hling lukhum an phiar a, an khumtir a, puan sen duk an sintir bawk a;
19:3 tin, a kiangah an lo kal a, “Chibai! Judate Lal!” an ti a, an beng a.
19:4 Tin, Pilata chu a chhuak leh a, an hnenah, “En teh u, engmah a sualna ka hmu lo tih in hriat nan, in hnenah ka rawn hruai chhuah hi,” a ti a.
19:5 Tin, Isua chu hling lukhum leh puan sen duk chu sin chungin a lo chhuak a. Tin, Pilatan an hnenah, “En teh u, mihringa hi!” a ti a.
19:6 Tin, puithiam lalte leh tiangkengtute chuan amah an hmuh veleh an au va, “Kraws-ah khengbet rawh, kraws-ah khengbet rawh,” an ti a. Pilatan an hnenah, “Nangnin kalpui ula, kraws-ah khengbet rawh u; kei zawngin engmah a sualna ka hmu si lo,” a ti a.
19:7 Judate chuan a hnenah, “Kan dan kawng khat a awm, chu mi dan ang zelin Pathian Fapaa a insiam avangin a thi tur a ni,” an ti a, an chhang a.
19:8 Tin, Pilatan chu thu chu a hriatin a hlau lehzual a;
19:9 a inah a lut leh a, Isua hnenah, “Khawi lama mi nge i nih?” a ti a. Nimahsela Isuan a chhang lo.
19:10 Tin, Pilatan a hnenah, “Nangin kei mi be lo vei maw? Thlah thei che ka ni, kraws-a khengbet thei che ka ni tih i hre lo vem ni?” a ti a.
19:11 Isuan, “Chung lam atanga pek i nih loh chuan ka chungah hian ti theih reng reng i nei lo vang; chuvangin i hnena mi petu khan sual a phur zual a ni,” a ti a.
19:12 Chu mi achin chu Pilatan thlah a tum a; nimahsela Judate an au va, “He mi hi i thlah chuanin Kaisara thian i ni lo vang; tupawh lala insiam apiang Kaisara do an ni,” an ti a.
19:13 Tin, Pilatan chung thu chu a hriat veleh, Isua a hruai chhuak a, a hming Lungrem, - Hebrai tawng erawh chuan Gabbatha an ti, - chu mi hmunah chuan rorelna thutphahah a thu a.
19:14 (Tin, chu mi ni chu Kalhlen Kut Inrinni a ni a, tukthuan ei hun lai a ni.) Tin, ani chuan Judate hnenah, “En teh u, in Lal hi!” a ti a.
19:15 Tin, anni chu an au va, “Tiboral rawh, tiboral rawh, kraws-ah khengbet rawh,” an ti a. Pilatan an hnenah, “In Lal hi kraws-ah ka khengbet ang maw?” a ti a, Puithiam lalten, “Kaisara lo chu lal dang kan nei lo,” an ti a, an chhang a.
19:16 Chutichuan Pilatan kraws-a khenbeh turin amah chu an hnenah a pe ta a. Chutichuan Isua chu an hruai ta a.
19:17 Tin, ani chuan mahni tana kraws puin ‘Lu ruh hmun,’ an tih, Hebrai tawnga Golgotha an tih chu, chu mi hmun thleng chuan a va chhuak a;
19:18 chutah chuan kraws-ah an khengbet a, mi dang pahnih nen, a sir tuakah pakhat ve vein, a laiah Isua.
19:19 Tin, Pilatan lehkha a ziak a, kraws ler lamah a bel a. ‘Nazareth Isua Judate Lal,’ tiin a ziak a ni.
19:20 Tin, chu lehkha chu Judate a then tam takin an chhiar a; Isua kraws-a an khenbehna hmun chu khawpui kiang a ni a; Hebrai tawng te, Rom tawng te, Grik tawngtein ziak a ni si a.
19:21 Chutichuan Judate puithiam lalte chuan Pilata hnenah, ‘Judate Lal’ tiin ziak suh; ‘Judate Lal ka ni, a ti,’ tiin ziak rawh,” an ti a.
19:22 Pilatan, ‘Ka ziak kha ka ziak zo tawh,” a ti a, a chhang a.
19:23 Tin, sipaiten Isua chu kraws-a an khenbeh zawh chuan a silhfente an la a, phel liah an siam a, sipaiten phel khatin an chang theuh va; a kawr an la bawk a. Kawr chu thui loh kawr a ni a, a nghawng ata apumin tah vek a ni;
19:24 chuvangin anni chuan, “I pawt thler suh ang u, tu ta ber tur nge thum i vawr zawk ang u,” an inti a. (Pathian Lehkha Thu, “Ka silhfente an insem a, Ka kawr atan thum an vawr a,” tih a thlenna turin). Chung thil chu sipaiten an ti a.
19:25 Tin, Isua kraws kiangah a nu leh a nu laizawn, Mari, Klopa nupui leh Mari Magdalini an ding a.
19:26 Tin, Isuan a nu leh a zirtir a hmangaih kha a kianga ding a hmu a, a nu hnenah, “Hmeichhia, en teh, i fapa kha!” a ti a.
19:27 Tin, zirtir hnenah chuan, “En teh, i nu kha!” a ti a. Tin, chuta chin chu, chu zirtir chuan ama inah ani chu a hruai ta a.
19:28 Chu mi hnuah chuan Isuan thil engkim tunah a kim tawh tih a hria a, Pathian Lehkha Thu kha a thlen nan, “Ka tui a hal e,” a ti a.
19:29 Chutah chuan bel pakhat uain thura khat an hung a, chutichuan spanj pakhat chu uain tura chiah khatin, husop tiangah an tar a, a hmuiah an han thlen a.
19:30 Tin, Isuan uain thur chu a lo in zawh chuan “A kin ta” a ti a. Tin, a lu a kun a, a thlarau a thlah ta a.
19:31 Tin, Inrinni a nih avangin ruangte chu Chawlhnia kraws-a a awm reng loh nan, (chu Chawlhni chu ni ropui a ni si a,) Judaten Pilata hnenah an kete tihtliaha an ruang kalpuiah an ngen a.
19:32 Tin sipaite chu an lo kal a, a hnena kraws-a an khenbeh mi tawntirh leh mi pakhat chu an kete an titliak a;
19:33 nimahsela Isua kiangah an lo kal a, a thi tawh reng tih an hria a, a kete an titliak ve lo va;
19:34 nimahsela sipaite zinga mi pakhatin a nakah feiin a chhun a, tichuan thisen leh tui a chhuak ta nghal a.
19:35 A hmutu chuan a hriattir tawh, (a thu hriattir a dik a ni; a sawi dik tih a inhria,) nangni pawhin in rinna turin.
19:36 Pathian Lehkha Thu, “A ruh pakhat mah tihtliah a ni lo vang,” tih, thlenna turin chung thil chu a lo awm ta.
19:37 Tin, Pathian Lehkha Thu dangin, “An chhuna chu an la en ang,” a ti bawk a.
19:38 Tin, chung thil tih hnuah chuan Josefa, Arimathai khua mi, Isua zirtir a ni a, nimahsela Judate a hlauh avnga aruka awm a ni a, ani chuan Isua ruang chu kalpui atan Pilata hnenah a dil a; tin, Pilatan a phal a. Chutichuan a lo kal a, a ruang chu a kalpui ta a.
19:39 Tin, Nikodema, atira zana a hnena lo kal kha, murra leh aloe inpawlh sa buk sawmnga lai sinin a lo kal ve a.
19:40 Tin, Isua ruang chu an la a, Judate inphum dan angin englo rimtuite nen chuan puan zai sinin an tuam a.
19:41 Tin, kraws-a an khenbehna hmunah chuan huan pakhat a awm a; huanah chuan tumah la zalhna ngai loh thlan thar pakhat a awm.
19:42 Tin, Judate Inrinni a nih avangin, thlan chu an kiang lawk a ni si a, chutah chuan Isua chu an zalh ta a.
20:1 Tin, ni sarih ni hmasa berah, zingah, khua a la thim laiin, Mari Magdalini chu thlanah chuan a va kal a, lung chu thlan ata lak sawnin a hmu a.
20:2 Chutichuan a tlan a, Simon Petera leh zirtir dang Isuan a hmangaiha hnenah chuan a lo kal a, an hnenah, “Thlan ata kha Lalpa chu an kal bopui ta, an dahna chin ka hre si lo,” a ti a.
20:3 Chutichuan Petera chu a chuak a, zirtir dang nen chuan, tin, thlan lam an pan a.
20:4 Tin, an tlan dun a; zirtir dang chuan Petera a tlan khalh a, thlan chu a thleng hmasa a.
20:5 Tin, a kun a, a bih a, puan zai sinte chu awm rengin a hmu a; nimahsela a chhungah a lut lo.
20:6 Tin, Simon Petera pawhin a hnungah a rawn um thleng a, thlan chhungah a lut a; puan zai sinte chu awm reng leh,
20:7 a lua inhrukna puan awm chu, puan zai sinte zinga awm lovin, zial sain hmun hranga awm a hmu a.
20:8 Chutichuan zirtir dang thlan thleng hmasaa pawh chu a lut ve a, a hmu a, a awih a.
20:9 Mitthi zing ata a tho leh tur a ni tih Pathian Lehkha Thu kha an la hre si lo.
20:10 Chutichuan zirtirte chu anmahni inah an haw leh ta a.
20:11 Nimahsela Mari chu pawnah thlan kiangah tap chungin a ding a; tichuan tap chungin a kun a, thlan chhung chu a bih a;
20:12 tin, vantirhkoh pahnih puan var sinin, Isua ruang zalhna hmunah chuan, pakhat a lu lamah, pakhat a ke lamah thu a hmu a.
20:13 Tin, anni chuan a hnenah, “Hmeichhia, engati nge i tah?” an ti a. Ani chuan an hnenah, “Ka Lalpa an kal bopui a, an dahna chin ka hriat loh avangin,” a ti a.
20:14 Tin, chutia a sawi veleh a hnung lam a hawi a, Isua ding a hmu a, Isua a ni tih a hre si lo va.
20:15 Isuan a hnenah, “Hmeichhia, engati nge i tah? Tunge i zawn?” a ti a. Ani chuan huan enkawltu emaw a ti a, a hnenah, “Ka pu, amah heta ta i kalpui a nih chuan i dahna chin mi hrilh ang che, chutichuan ka la ang,” a ti a.
20:16 Isuan a hnenah, “Mari,” a ti a. Ani chu a hawi a, a hnenah Hebrai tawngin, “Rabboni,” a ti a; (chu chu Zirtirtu tihna a ni a.)
20:17 Tin, Isuan a hnenah, “Mi vuan tawh suh; tun thleng pawhin Pa hnenah ka la lawn chho lo a ni; amaherawhchu ka unaute hnenah va kal la, an hnenah, ‘Ka Pa, in Pa, a Pathian, in Pathian hnenah ka lawn chho dawn,’ a ti e, ti rawh,” a ti a.
20:18 Mari Magdalini chu a va kal a, zirtirte hnenah, “Lalpa chu ka hmu ta,” a ti a, a hnena thu a sawiziate pawh chu a hrilh a.
20:19 Tin, chu mi ni, ni sarih ni hmasa berah, khua a lo tlai lamin, Judate hlauh avanga zirtirte awmna kawngkharte chu an khar hnu chuan, Isua an zingah a lo ding a, an hnenah, “In chungah thlamuanna awm rawh se,” a ti a.
20:20 Tin, chu chu a sawi zawh chuan a kut leh a nak an hnenah a entir a. Tin, Lalpa chu an hmuh chuan zirtirte chu an lawm ta a.
20:21 Tin, Isuan an hnenah, “In chungah thlamuanna awm rawh se; Pain kei mi tir ang bawkin ka tirh che u hi,” a ti leh a.
20:22 Tin, chung thu chu a sawi zawhin an chungah a thaw a, an hnenah “Thlarau Thianghlim nei rawh u; tu sual pawh in ngaihdam apiang ngaihdam a ni ang;
20:23 tu sual pawh in ngaihdam loh apiang ngaihdam loh a ni ang,” a ti a.
20:24 Tin, Isua a lo kal lai khan sawm leh pahnihte zinga tel ve Thoma, Phira an tih chu, an hnenah a awm ve lo va.
20:25 Chutichuan zirtir dangte chuan a hnenah, “Lalpa chu kan hmu ta,” an ti a. Nimahsela ani chuan an hnenah, “A kuta thir khenna serte kha ka hmuh a, thir khenna serahte chuan ka kutzung ka khawih luh a, a naka ka zen meuh loh chuan ka ring lo vang,” a ti a.
20:26 Tin, ni riat hnuah, a zirtirte chu in chhungah an awm leh a, Thoma pawh an hnenah a awm ve a. Tin, Isua a lo kal a, kawngte chu khar a ni si a, an zingah a lo ding ta a, an hnenah, “In chungah thlamuanna awm rawh se,” a ti a.
20:27 Tin, Thoma hnenah chuan, “I kutzungin han khawih la, ka kutte en rawh; i kut han ban la, ka nakah zen rawh; ring lovin awm suh la, ring rawh,” a ti a.
20:28 Thomah a hnenah, “Ka Lalpa leh ka Pathian i ni,” a ti a, a chhang a.
20:29 Isuan a hnenah, “Nang chuan mi hmuh avangin i ring a ni; hmu lova ring apiang te chu an eng a thawl e,” a ti a.
20:30 Tin, Isuan zirtirte hmaah chuan chhinchhiahna dang tam tak a ti teuh va, chung chu he lehkhabuah hian ziak a ni lo;
20:31 nimahsela heng hi Isua chu, Krista, Pathian Fapa a ni tih in rinna tur leh, in rin a, a hminga nun in neihna turin ziak a ni.
21:1 Chu mi hnuah chuan Tiberia dilah Isua a zirtirte hnenah a inlar leh a; heti hian a inlar:
21:2 Simon Petera te, Thoma (Phira an tih) te, Galili rama Kana khuaa mi Nathanaela te, Zebedaia fapa pahnihte leh a zirtir dang pahnihte an awm khawm a.
21:3 Simon Petera chuan an hnenah, “Sangha manin ka kal dawn e,” a ti a. Anni chuan a hnenah, “Keini pawh i hnenah kan kal ve ang,” an ti a. Tin, an kal chhuak a, lawngah an chuang a; chu mi zan chuan engmah an man lo.
21:4 Tin, khawfing chahin Isua tiauphovah a ding a; nimahsela zirtirte chuan Isua a ni tih an hre si lo.
21:5 Tin, Isuan an hnenah, “Naute u, ei tur engilo in nei em?” a ti a. Anni chuan a hnenah, “Nei lo,” an ti a, an chhang a.
21:6 Tin, ani chuan an hnenah, “Lawng sir ding lamah khan len deng ulang in hmu ang,”a ti a. Tin, an deng a, sangha tam avangin an hnuk chhuak zo ta lo va.
21:7 Chutichuan, zirtir Isuan a hmangaiha khan, Petera hnenah, “Lalpa a nih saw,” a ti a. Chutichuan Lalpa a ni tih Simon Peteran an hriat veleh a kawr a veng a, (saruaka awm a ni si a,) dilah a zuang thla ta a.
21:8 Nimahsela zirtir dangte chuan lawng te tak te chuan len, sangha chawpa hnuk chungin an rawn pan a, (khawmual atangin an hla si lo va, tawng zahnih emaw lek a ni a.)
21:9 Tin, khawmuala an chhuah veleh, chutah chuan meihawla mei chhem an hmu a, a chunga sangha leh chhangper rawh nen.
21:10 Tin, Isuan an hnenah, “Tunah in sangha man kha a then han la rawh u,” a ti a.
21:11 Chutichuan Simon Petera a va chuang a, len chu sangha lian pui puia khatin khawmualah a hnuk chhuak a, za leh sawmnga leh pathum a ni; chuti zozai chu awm mah sela len chu a tet si lo.
21:12 Tin, Isuan an hnenah, “Tukthuan lo ei rawh u,” a ti a. Tin, zirtirte zingah tumahin a hnenah, “Tunge i nih?” tiin an zawt ngam lo, Lalpa a ni tih an hre reng a.
21:13 Tin, Isua a lo kal a, chhangper chu a la a, an hnenah a pe a, sanghate pawh chu chutiangin a pe bawk a.
21:14 Chu chu Isua mitthi zinga ata a thawhleh hnua a zirtirte hnena a inlar a vawi thumna a ni.
21:15 Tin, tukthuan an ei zawhin, Isuan Simon Petera hnenah chuan, “Simon, Johana fapa, hengte ai hian nangin kei mi hmangaih zawk em?” a ti a. Ani chuan a hnenah,“Aw, Lalpa; ka ngaina che tih i hria e,” a ti a. Ani chuan a hnenah, “Ka beram note chawm rawh,” a ti a.
21:16 Tin, a vawi hnihnaah a hnenah, “Simon, Johana fapa, nangin kei mi hmangaih em?” a ti leh a. Ani chuan a hnenah, “Aw, Lalpa, ka ngaina che tih i hria e,” a ti leh a. Ani chuan a hnenah, “Ka beramte enkawl rawh,” a ti a.
21:17 Tin, a vawi thumnaah chuan a hnenah, “Simon, Johana fapa, nangin kei mi ngaina em? a ti a. Tin, a vawi thumnaah, “Nangin mi ngaina em?” a hnena a tih avang chuan Petera a lungngai a, a hnenah, “Lalpa, engkim i hria a, ka ngaina che tih i hria e,” a ti a. Isuan a hnenah, “Ka beramte chawm rawh.
21:18 Tih tak meuhvin, tih tak meuhvin ka hrilh a che, i naupan lai khan i taiah i inhreng a, i duhna apiangah i kal thin a; nimahsela i upat hunah i kutte i phar ang a, mi dangin an hrensak ang chia, i duh lohna lamah an kai ang che,” a ti a.
21:19 (Chung thu chu engtiziaa thiin nge Pathian a chawimawi ang tih hriattir nan a sawi a ni.) Tin, chu chu a sawi zawhin, a hnenah, “Mi zui rawh,” a ti a.
21:20 Tin, Petera chu a hawi a, Isuan zirtir a hmangaih, zanriah ei laia a awm nghenga lo thle phei a, “A mantirtu tur che chu tu ber nge ni?” titua khan a rawn zui a hmu a.
21:21 Tin, Peteran a ni chu a hmu a, Isua hnenah, “ Lalpa he mi hian e nge a tih ang?”,a ti a.
21:22 Isuan a hnenah, “Ka lo kal leh thlenga awm rengah phei duh ila, chu chu enga i hman tur nge ni? Nangin mi zui mai rawh,” a ti a.
21:23 Chutichuan chu zirtir chu thi lo turin a thu chu unaute zingah chuan a thang ta a; nimahsela Isuan a thi lo vang tih a hnenah a sawi si lo, “Ka lo kal leh thlenga awm rengah phei duh ila, chu chu enga i hman tur nge ni?” a ti mai a ni si a.
21:24 Chu zirtir chu heng thu hriattirtu leh ziaktu hi a ni; a thu hriattir hi dik tak a ni tih kan hria e.
21:25 Tin, heng lo hi Isua thiltih a dang tam tak a la awm, chung chu ziak fai vek ni dawn sela, lehkhabu ziak tur zawng zawng chu khawvelah pawh hian lengin ka ring lo. |
posted by zoblog @ 11:35 AM  |
|
|
|
