|
| Wednesday, September 12, 2007 |
1:1 Paula, tirhkoh (mihringte tirh chhuah ni lovin, mihring zarah ni hek lovin, Isua Krista leh mitthi zing ata a kai thotu, Pa Pathian zarah a ni zawk) leh,
1:2 ka hnena unau awm zawng zawngte chuan Galatia rama kohhranhote hnenah,
1:3 Pa Pathian leh kan Lalpa Isua Krista hnen ata khawngaihna leh remna in hnenah awm rawh se:
1:4 ani chuan kan Pathian leh kan Pa remtihzawngin tun lai khawvel sual tak lakah hian min chhan chhuah theih nan kan sualte aiah amah a inpe ta;
1:5 Pathian hnenah chuan ropuina chatuanin awm rawh se. Amen.
1:6 Krista khawngaihna zara a kotu che u kha chuti thuta Chanchin Tha hrang lama in pakaisan hi mak ka ti a ni;
1:7 chu chu Chanchin Tha a ni ve si lo; nangmahni tibuaiin, Krista Chanchin Tha tihdanglam duh tute emaw an awm mai a ni a.
1:8 Nimahsela, keimahniin emaw, van atanga lo chhuk vantirhkoh pawhin emaw, Chanchin Tha kan hrilh che u lo kha chu Chanchin Tha dang reng lo hrilh che u sela, anchhe dawngin awm rawh se.
1:9 Hmana kan sawi ang khan tunah ka sawi leh dawn a ni, “Chanchin Tha in pawma lo kha chu, Chanchin Tha dang tupawhin hrilh che u sela, anchhe dawngin awm rawh se,”
1:10 Mihring tihlawm nge ka tum, Pathian tihlawm? Mi zinga tlaktlum tum ka ni em ni? Ni ila, Krista bawih ka ni lo vang.
1:11 Chutichuan, unaute u, ka Chanchin Tha hrilh kha mihring lam thu a ni lo tih ka hriattir a che u.
1:12 Mihring hnen ata hmu ka ni hek lo, mi mi zirtir ka ni hek lo, Isua Krista inlarna avanga hmu ka ni zawk si a.
1:13 Judate sakhaw biak danah chuan hman laia ka awm dan chu in hre tawh si a, khatia Pathian Kohhranho nasa taka tiduhdahin ka tihbuai thin kha;
1:14 tin, mi thlahtute thurochhiah chunga thahnem ka ngaih nasat bik avangin Judate sakhaw biak dan kawngah chuan ka chite zinga ka rualpui tam takte ka lehpel ta a.
1:15 Tin, ka nu pum chhung atanga mi tihrangtu leh a khawngaihna avanga mi kotu Pathian chuan,
1:16 Jentailte zinga a Chanchin Tha ka hrilh theih nan a Fapa chu ka hnena a inlartir lai khan, tumah rawn lovin,
1:17 tirhkoh ka nih hmaa tirhkoh lo ni tawhte hnenah Jerusalem khuaa han kal hek lovin, Arabia ramah ka kal bo ta nghal zawk a; tin, Damaska khuaah ka kir leh ta a.
1:18 Tin, kum thum a vei hnuin Kipha kan turin Jerusalem khuaah kan han kal a, a hnenah ni sawm leh ni nga ka cham a,
1:19 Tirhkoh dangte erawh chu Lalpa unau Jakoba chauh lo chu tumah ka hmu lo va.
1:20 (Ngai teh mah u! In hnena thu ka ziakte hi Pathian mithmuhah pawh ka daw lo ve.)
1:21 Chu mi hnuah chuan Suria leh Kilikia ramahte ka lo kal a.
1:22 Nimahsela,Judai ram kohhranho Kristaa awmte hmelhriat ka la ni lo ta fo va.
1:23 “Hmana min tiduhdahtu khan hmana rinna thu a tihkhawloh thin kha tunah a hril ta zawk a ni,” tih mi sawi chauh an hria a.
1:24 Tin, keimah avangin Pathian an chawimawi ta a.
2:1 Tin, kum sawm leh kum li a vei hnuin Tita pawh chu hruai vein Barnaba rualin Jerusalem khuaah ka han kal leh a.
2:2 Tin, hriattirna avangin ka han kal a, Jentailte zinga Chanchin Tha ka tlangaupui thin hi anmahni ka han hrilh a; nimahsela mi lian deuhte chu ahrangin ka hrilh a, chutilochuan athlawnin ka tlan hlauh dah ang e, a nih loh leh, tlan thlawn ka lo ni dah ang e.
2:3 Nimahsela, Tita ka hnena awm pawh chu Grik mi ni mah sela, serh tan luihsakin a awm ta lo va;
2:4 chu chu unau der, aruka an hruai luhte avang a ni; chungte chu bawiha min siam theih nan Krista Isuaah chuan zalenna kan neih hi enthla turin arukin an lut a.
2:5 Nimahsela, Chanchin Tha thutak chu in hnena a awm reng theih nan darkar khat te pawh intulutin an thu kan zawm lo va.
2:6 Tin, mi lian deuhva an ruatate lakah chuan (eng ang mi pawh ni sela, ka tan engmah a lem chuang lo; Pathianin tumah a thlei bik lo va;) mi lian deuhva an ruatate chuan engmah mi belhchhah chuang si lo va;
2:7 chutih ahnekin serhtante Chanchin Tha Petera hnena kawltira a awm angin, serhtan lohte Chanchin Tha ka hnena kawltirin a awm tih an hria a.
2:8 (Serhtante tirhkoh ni turin Petera tana thawhsaktu ngei chuan Jentailte tirhkoh ni turin ka tan pawh mi thawhsak si a;)
2:9 khawngaihna mi peka chu an hriat pawhin Jakoba te, Kipha te, Johana te, bana an ruatate chuan keini Jentailte hnena kal tur leh anni zawng serhtante hnena kal turin kei leh Barnaba chu inpawlna kut ding lamte min pe ta zawk mah a.
2:10 Retheite kan hriat reng chauh an duh, chu tak chu tih ka tum tlat reng thina a ni.
2:11 Tin, Kipha chu Antiokei khuaa a lo kal laiin demawm taka a awm avangin a hmaichhan ngeiah ka dodal a.
2:12 Mi tute emaw Jakoba hnen ata an lo kal hma chuan ani chuan Jentailte hnenah chaw a ei thin a: nimahsela an lo thlen veleh serhtan mite chu a hlauh avangin tel leh ta lovin a intihrang ta si a.
2:13 Juda dangte pawh an vervek ve ta hlawm a, chutichuan Barnaba meuh pawh an vervekna hruai bovin a awm ta hial a.
2:14 Nimahsela, Chanchin Tha thutak angin an awm fel lo tih ka hriatin, Kipha hnenah an zaa hmaah, “Nang Juda mi i ni a, Juda anga awm lovin Jentail angin i awm si a. Engtizia nge Jentailte chu Judate anga awm luihtir kher i tum?” ka ti a.
2:15 Keini zawng Jentail mi sualte ni lovin Juda mi renga piang kan ni a –
2:16 nimahsela Dan thiltihte avangin mi thiam changing a awm lo va, Isua Krista rin avang chauhvin thiam changing a awm zawk tih kan hre si a – keini pawhin Dan thiltih avang ni lovin, Krista rinna avanga thiam changa kan awm theih nan Krista Isua chu kan ring a ni; dan thiltihte avangin mihring reng reng thiam changing an awm dawn si lo.
2:17 Kristaah thiam changa awm kan tum chung khan keini ngei pawh mi sual kan lo nih hlauh si chuan Krista chu sual rawngbawltu a lo ni em ni? Hnai lo ve.
2:18 Ka thil thiatte kha ka sak leh si chuan bawhchhetu ka nih ka inhriattir mai a ni ang.
2:19 Pathian lam kawnga ka lo nun theih nan kei zawng Dan avangin Dan lam kawngah ka thi tawh si a.
2:20 Krista hnenah khenbehin ka awm ta; nimahsela ka nung a ni; keimah erawh chu ka ni tawh lo. Krista chu keimahah a nung zawk a ni; tin, tunah tisaa ka nung hi rinnaa nung ka ni – Pathian Fapa, mi hmangaiha ka aia inpetu rinnaah chuan.
2:21 Pathian khawngaihna chu ka bawh bo lo ve, Dan avanga felna a awm si chuan Krista chu athlawnin a thi a ni ang.
3:1 Aw Galatia rama mi a te u, tuin nge dawi che u? in mithmuh ngeiah Isua Krista chu khenbehin chiang taka lantir a nih tehlul nen.
3:2 Hei chauh hi in hnen ata lo hriat ka duh. Dan thiltihte avangin nge Thlarau chu inhmuh, in ngaihthlaka in rin avangin?
3:3 Heti emin in a maw? Thlarauva tan tawh siin tisain in zo dawn em ni?
3:4 Thil chuti zozai chu sawtpui lovin in tuar em ni? Sawtpui lo ni tak tak ta ang sela.
3:5 Tin, in hnena Thlarau petu che u leh in zinga thilmak titu chuan Dan thiltihte avangin nge a tih, in ngaihthlaka in rin avangin?
3:6 Abrahaman Pathian a ring a, tin,chu rinna chu a felnaa ruat a ni ang khan.
3:7 Chutichuan, hre rawh u, rinnaa awmte, chung nge chu Abrahama fate an ni.
3:8 Tin, Pathian Lehkha Thu chuan, Pathianin rinna avangin Jentailte thiam a chantir dawn tih hre lawkin, “Nangmahah chuan hnam tin malsawmsakin an awm ang,” tiin Abrahama hnenah Chanchin Tha chu a hrilh lawk kha.
3:9 Chutichuan, rinnaa awmte chu Abrahama rinawma nen chuan malsawmsakin an awm ve thin a ni.
3:10 Dan thiltiha awm apiangte chu anchhe hnuaiah an awm si a; “Dan lehkhabua thu ziak zawng zawng anga ti tura awm reng lo apiang chu anchhe dawngin an awm thin,” tiin ziak a ni si a.
3:11 Tin, Pathian mithmuhin tumah reng Dan avanga thiam chang an awm lo tih a lang reng a ni. “Mi felte chu rinnain an nung ang,” tih a ni si a;
3:12 tin, Dan chu rinnaa mi a ni lo, “Chung anga titu chu chungah chuan a nung ang,” tih a ni zawk e.
3:13 Krista chu kan aia anchhe dawng lo niin, Dan anchhe lak ata min tlan chhuak ta; ( “Thinga khaikan apiang chu anchhe dawng an ni,” tih ziak a ni si a;)
3:14 chutichuan Abrahama chunga malsawmna chu Krista Isuaah chuan Jentailte chungah a lo awm thei ang a, tichuan rinna avangin Thlarau tiam chu kan hmu thei ang.
3:15 Unaute u, mihring angin ka sawi hi, mihring thuthlung pawh ni mah sela, tihngheh tawh hnuin an phelh ngai lo va,belh pawh an belhchhah ngai hek lo.
3:16 Tin, Abrahama hnenah a ni, thu chu tiamin a awm ni, a chi thlah hnenah pawh. Mi tam tak chung thu sawi angin, “Chi thlahte hnenah pawh,” a ti lo va;mi pakhat chung thu sawi angin, “I chi thlah hnenah pawh,” a ti a ni zawk e, chu chu Krista chu a ni.
3:17 Tin, heti hian ka ti a ni: Thuthlung, Pathian lo tihngheh tawh chu, Dan kum zali leh kum sawmthum hnua lo awm tawh khan, thutiam chu engmah lova siamin a tibo lo ve.
3:18 Roluah tur chu Dan avang a nih chuan thutiam avang a ni tawh si lo vang; nimahsela Pathianin thutiam avangin a ni, Abrahama hnenah a pek ni.
3:19 A nih loh leh, engtiziaa Dan chu awm nge ni le? Bawhchhiatna hi sual a nih tilang fiah tura thutiam belhchhahna a ni a, Thutiamin Chi Thlah a tih lo kal hmaa hman tur, vantirhkohte hmanga palai kuta pek a ni.
3:20 Tin, palai reng reng mi pakhat lakah palai a ni ngai lo ve, Pathian erawh chu pakhat a ni.
3:21 A nih loh leh, Dan chuan Pathian thutiamte chu a dodal em ni le? Hnai lo ve, Dan mi tinung thei reng pekin a awm tawh si chuan, felna chu Dan avangin a awm ngei tur a ni.
3:22 Nimahsela, Isua Krista rin avanga thiltiam chu a ringtute hnena pek a nih theih nan Pathian Lehkha thu chuan sual hnuaiah engkim a kharkhip ta vek a.
3:23 Nimahsela, rinna a lo thlen hma khan, rinna la lang tur atan kharkhipa, Dan hnuaia ven kan nih kha.
3:24 Chutichuan, rinna avanga thiam kan chan theihna turin Dan chu Krista hnen lama min kaihruaitu a lo ni a.
3:25 Nimahsela, tunah rinna a lo thlen hnu hian, kaihruaitu hnuaiah kan awm tawh lo ve.
3:26 Krista Isua rin avangin Pathian fate in ni vek si a;
3:27 in zinga Kristaa baptisma chang apiangte kha Krista chuan in inthuam tawh si a.
3:28 Chutah chuan Juda mi a awm theih loh va, Grik mi pawh a awm theih hek loh, chutah chuan bawih a awm theih lo va, bawih lo pawh a awm theih hek loh, chutah chuan mipa leh hmeichhia pawh a awm theih loh; Krista Isuaah chuan in zain pumkhat in ni si a.
3:29 Tin, Krista ta in nih chuanin Abrahama thlah, thutiam anga roluahtu turte in ni.
4:1 Nimahsela, heti hian ka ti a ni: Roluahtu tur chu engkim chungah hotu ni mah sela, naupang a la nih chhung zawng bawih nen engah mah a danglam chuang lo ve;
4:2 a pa ruat hun chu a lo thlen hma loh chuan vengtu leh enkawltute hnuaiah a awm zawk a ni.
4:3 Chutiangin keini pawh naupang kan nih lai khan, khawvel zirtirna dik lo hnuaiah bawihah kan awm;
4:4 ,5 Nimahsela a hun bi a lo kim khan fa nihna kan hmuh theih nan Dan hnuaia awmte chu tlan turin Pathianin a Fapa, hmeichhe hrin, Dan hnuaia lo piangin a tir chhuak ta a.
4:5 ,4 Nimahsela a hun bi a lo kim khan fa nihna kan hmuh theih nan Dan hnuaia awmte chu tlan turin Pathianin a Fapa, hmeichhe hrin, Dan hnuaia lo piangin a tir chhuak ta a.
4:6 Tin, fa in nih avangin Pathianin a Fapa Thlarau chu, “Abba!(Ka pa!)” tia auvin kan thinlungah a rawn tir a.
4:7 Chutichuan, bawih i ni tawh lo va, fa i ni zawk e: tin, fa i nih chuan Pathian zara roluahtu tur i ni.
4:8 Nimahsela, khang Pathian inhriat loh lai khan, an pianzia reng pawha Pathian ni hlei lote bawih in ni a.
4:9 Tuna Pathian in lo hriat hnu hi zawngin–ni lo, Pathian mi hriat in lo nih hnu hian tih tur a ni zawk e, - khawvel zirtirna dik lo engmah ni hlei lo, a bawiha awm leh in chakate lamah chuan engtiziaa hawi kir lehnge in nih?
4:10 Ni te, thla te, hun te, kum te in serh thin.
4:11 In tan tha ka seng thlawn dah law maw tih ka hlauhsak a che u.
4:12 Unaute u, ka ngen a che u, keimah angin awm rawh u, kei pawh nangmahni angin ka awm si a. Ka pawi engmah in khawih lo.
4:13 Chanchin Tha in hnena ka hril hmasak tum kha ka tisa chak lohna avang a ni tih in hre si a.
4:14 Tin, ka tisaa in tan thlemna awm chu in hmusit lo va, in ten hek lo; Pathian vantirhkoh angin, Krista Isua ang maiin mi lawm tak zawk kha.
4:15 Vannei in intihna kha khawiah nge ni ta le? Tih theih phei chu ni sela nangnin in mitte kher chhuakin mi pe tawh ang tih ka hriatsak che u asin.
4:16 Chutichuan, thu dik tak ka hrilh che u avangin in hmelma ka lo ni ta em ni?
4:17 Tha lamah ni hauh si lovin thahnemngai takin an zawng chhuak thin che u a; a ni, anmahni in zawn theih nan pawn lama khar hnan che u an duh a ni.
4:18 Thu tha lamah erawh chuan eng lai pawhin thahnemngai taka zawna awm fo hi a tha a ni, in hnena ka awm lai chauh ni lovin.
4:19 Ka naute u, Krista chu nangmahniah siam puitlina a awm hma loh chuan nau veiin ka vei leh che u hi.
4:20 A ni, tun lai hian in hnena awma ka aw tihdanglam ka chak theihzia mai chu; in chungthu-ah ka mangang si a.
4:21 Dan hnuaia awm duhte u, mi hrilh rawh u,Dan thu chu in ngaithla thin lawm ni?
4:22 Heti hian ziak a ni si a: “Abrahaman fapa pahnih a nei a, pakhat chu bawihnu lakah, pakhat chu bawih lonu lakah.
4:23 Nimahsela, bawihnu laka mi chu tisa dan angin a piang a, bawih lonu laka mi erawh chu thutiam avangin a piang a ni,” tih hi.
4:24 Chung thu chu tehkhinna a ni; chung hmeichhiate chu thuthlung pahnih an ni; pakhat chu Sinai Tlanga mi, bawih ni tura fa hringtu chu; chu chu Hagari a ni.
4:25 Tin, Hagari hi Arabia rama Sinai Tlang chu a ni a, Jerusalem tun laia awm nen hian ang khat an ni, a fate nen bawihah an awm si a.
4:26 Chung lam Jerusalem erawh chu bawih a ni lo va, chu ngei chu keini nu a ni.
4:27 “Nang, ching, fa hring ngai lo, hlim rawh, Nang, nau vei ngi lo, au chhuak rawh; Pasal nei mi ai chuan, khawhar nu chuan Fate a nei tam zawk si,” tih ziak a nih kha.
4:28 Tichuan, unaute u, keini hi, Isaaka ang khan, thutiam fate kan ni.
4:29 Nimahsela, chu mi lai chuan tisa dana lo piang chuan Thlarau dana lo piang chu a tiduhdah ang khan, tunah pawh chutiang bawk a ni.
4:30 Nimahsela, Pathian Lehkha Thuin engtin nge a sawi? “Bawihnu chu, a fapa nen hnawt chhuak rawh; bawihnu fapa chuan bawih lonu fapa chu ro a luahpui dawn si lo,” a ti a.
4:31 Chutichuan, unaute u, bawihnu laka fate kan ni lo va, bawih lonu laka fate kan ni zawk.
5:1 Bawih ni lo turin Krista chuan min chhuahtir kha, chutichuan ding nghet ula, bawih nghawngkawlah chuan tang leh tawh suh u.
5:2 Ngai teh u, kei Paulan in hnena ka sawi hi, serh in tantir chuan Krista chu in tan engmah sawtna a ni lo vang.
5:3 A ni, Dan thu zawng zawng zawm tura batu an ni tih serh tantir apiang hnenah ka hriattir leh a nih hi.
5:4 Nangni Dana thiam chan tumte u, Krista nen in inthen ta: khawngaihna chu in tluksan ta.
5:5 Keini zawngin Thlarau zarah rinnain felna beiseina kannghak si a.
5:6 Krista Isuaah chuan serh tan engmah a sawt lo, serh tanloh pawh engmah a sawt hek lo; rinna, hmangaihnaa thawh erawh chu a sawt a ni.
5:7 Tha takin in tlan thin kha le; thutak chu in zawm loh nan tuin nge dal ta che u?
5:8 He thlemna hi a kotu che u hnen ata a ni lo ve.
5:9 Dawidim tlem tein chhang hlawm chu apumin a fan chhuak thin.
5:10 Rilru danglam in pu lovang tih Lalpaah chuan ka ring tlat a; tibuaitu che u chu atua pawh ni sela, a chunga rorelna chu a la tuar ang.
5:11 Unaute u, kei hian serh tan thu hril ni ila tihduhdah ka ni cheu dawn em ni? Chuti ni se Kraws thu kan hril hian buaina a siam lo tur.
5:12 Tibuaitute che u chu intan fithla law law sela ka duh a ni.
5:13 Nangni unaute u, bawih ni lo turin koh in ni si a; nimahsela in bawih nih lohna chu tisa tana remchangah hmang suh ula, hmangaihnain rawng inbawlsak tawn theuh zawk rawh u.
5:14 “Nangmah i inhmangaih angin i vengte i hmangaih tur a ni,” tih thu kamkhatah hian Dan thu zawng zawng chu a famkim tawh a ni si.
5:15 Nimahsela, in inseh a, in inei tawn si chuan in intihboral tawn loh nan fimkhur rawh u.
5:16 Chutichuan, hei hi ka ti a ni: Thlarau vah awm rawh u, tichuan tisa chakna chu in zawm dawn lo nia.
5:17 Tisa hian Thlarau dona lam a chak thin, Thlarau pawhin tisa dona lam a chak bawk si thin; thil tih in tumte chu in tih theih loh nan chungte chu an inkalh si.
5:18 Nimahsela, Thlarau hruaia in awm chuan Dan hnuaiah chuan in awm lo ve.
5:19 Tin, tisa thiltihte chu a lang fiah a ni; chung chu heng hi a ni: inngaihna te, bawlhhlawhna te, hurna te,
5:20 milem biakna te, dawithiamna te, huatna te, inhauna te, thikna te, thinurna te, inkhinna te, awm hranna te, rin hranna te,
5:21 itsikna te, zu ruihna te, zu hmun hlimna te, chutiangte chu: chung kawngah chuan tun hmaa, “Chutiang thil tih hmangte chuan Pathian ram an chang lo vang,” tia ka hrilh lawk che u ang khan ka hrilh lawk che u hi.
5:22 Thlarau rah erawh chu hmangaihna te, hlimna te, remna te, dawhtheihna te, ngilneihna te, thatna te, rinawmna te,
5:23 thuhnuairawlhna te, insumtheihna te a ni zawk e; chutiang kalhzawngin Dan thupek reng a awm lo ve.
5:24 Tin, Krista Isua mite chuan tisa chu, a sual ngaihtuahna leh a chaknate chawpin an khengbet ta.
5:25 Thlarauva nung kan nih chuan Thlarauvah vek i awm leh bawk ang u.
5:26 Incho tawna initsik tawnin i inngaihlu suh ang u.
6:1 Unaute u, mi, sual engpawh a tih lai phawkin awm sela, nangni thlarau mite u, “Thlemna ka tawk ve dah ang e,” tia inveng tha chungin chutiang mi chu thuhnuairawlh takin tungding leh rawh u.
6:2 In ritphurhte chu inchhawk tawn rawh u, chutichuan Krista dan thu chu in zawm a ni ang.
6:3 Mi, engmah ni si lovin, mi lian deuhva a inruat chuan a inbum chawp mai a ni si.
6:4 Mi tinin mahni thiltih fiah theuh zawk rawh se, chu mi hunah chuan mi dang chung ni lovin, mahni chung chauhvah chhuan tur a nei ang.
6:5 Mi tinin mahni phur an phur theuh dawn si a.
6:6 Tin, thu zirtir dawngtu chuan thil tha zawng zawng zirtirtu hnenah pe ve rawh se.
6:7 Bumin awm suh u; Pathian chu hmuhsit zia a ni lo ve; miin a theh apiang, chu mi vek chu a seng bawk dawn si a;
6:8 Mahni tisa lama thehtu chuan tisaa mi chhiatna a seng ang a; Thlarau lama thehtu erawh chuan Thlarauva mi chatuana nunna a seng dawn a ni.
6:9 Tichuan thil tha tih i ning suh ang u; kan inthlahdah loh zawngin a hun takah chuan kan seng dawn si a.
6:10 Chutichuan remchang hun kan neihzia ang zelin mi zawng zawng chungah thil tha i ti ang u, rinna chhungte zinga mi chungah i ti deuh ber ang u.
6:11 Keima kut ngeiin in hnenah lehkha hraw pui puia ka ziak hi en rawh u.
6:12 Tisaa hmel intihmawi duh apiangten serhtana awm turin an tir lui thin che u a ni; engmah dang vang a ni lo va, Krista kraws avanga tihduhdah an tuar loh nan chauh a ni.
6:13 Serhtante meuh pawh chuan Dan thu an zawm chuang si lo va, in taksaah chhuan tur an neih theih nan serh tantir che u an duh mai a ni.
6:14 Kei erawh chuan kan Lalpa Isua Krista kraws lo chu ka chhuan loh turzia mai chu, chu mi zarah chuan khawvel hi ka tan khenbehin a awm ta, kei pawh khawvel tan khenbehin ka awm a ni.
6:15 Siam thar lehna lo chu serh tan hi engmah a ni lo va, serh tan loh pawh engmah a ni hek lo.
6:16 Tin, chu mi dan anga awm apiangte chungah chuan remna leh khawngaihna awm rawh se, Pathian Israelte chungah pawh.
6:17 Tun achinah hian tumahin mi tibuai tawh suh se; ka taksaah hian Isua chhinchhiahnate ka pu si a.
6:18 Unaute u, Lalpa Isua Krista khawngaihna in thlarau hnenah awm rawh se. Amen. |
posted by zoblog @ 11:29 AM  |
|
|
|
|
|
