|
| Wednesday, September 12, 2007 |
1:1 Paula leh Silvana leh Timothea chuan Pa Pathian leh Lalpa Isua Kristaa I Thessalonika khuaa mi kohhranhote hnenah: Khawngaihna leh remna in hnenah awm rawh se.
1:2 ,3 Kan Pathian leh Pa hmaah chuan rin avanga in thiltihzia te, hmangaih avanga in thawh rimzia te, kan Lalpa Isua Krista beisei avanga in chhelzia te kha theihnghilh lova hre rengin, kan tawngtainaahte chuan in hming lamin, nangmahni zawng zawng avangin Pathian hnenah lawmthu kan hril fo thin a ni.
1:3 ,2 Kan Pathian leh Pa hmaah chuan rin avanga in thiltihzia te, hmangaih avanga in thawh rimzia te, kan Lalpa Isua Krista beisei avanga in chhelzia te kha theihnghilh lova hre rengin, kan tawngtainaahte chuan in hming lamin, nangmahni zawng zawng avangin Pathian hnenah lawmthu kan hril fo thin a ni.
1:4 Unau, Pathian duh takte u, a thlanzia che u kha kanhria a,
1:5 khatia kan Chanchin Tha chu thu chauhva in hnena thleng lova, thiltihtheihna leh Thlarau Thianghlim leh nasa taka rin tlatna nen a lo thlen zawk kha; nangmahni hma sialin in chungah eng ang mi nge kan lo nih tak kha in hre si a.
1:6 Tin, thu chu hrehawm tuar chungin, Thlarau Thianghlima lawmin, in lo pawm a, keimahni leh Lalpa zirtute in lo ni a.
1:7 Chutichuan, Makedonia leh Akaia rama ringtu zawng zawngte tan entawn in lo nih kha.
1:8 Lalpa thu chu nangmahni atangin a thang chhuak ta si a, Makedonia leh Akaia ramah chang ni lovin, hmun tinah pawh Pathian lama in rinzia chu a thang ta a; chutichuan keinin engmah sawi reng a ngai ta lo.
1:9 ,10 Kan tlawh tum che u a min lawmzia te, Pathian nung leh dik tak rawng bawl tur leh a fapa (mitthi zing ata a kaihthawh thinur lo thleng tur laka min chhan chhuaktu Isua kha) van ata lo nghak turin, milem hawisana Pathian lam in hawi tak thute an lo sawi huai huai a ni.
1:10 ,9 Kan tlawh tum che u a min lawmzia te, Pathian nung leh dik tak rawng bawl tur leh a fapa (mitthi zing ata a kaihthawh thinur lo thleng tur laka min chhan chhuaktu Isua kha) van ata lo nghak turin, milem hawisana Pathian lam in hawi tak thute an lo sawi huai huai a ni.
2:1 Unaute u, kan rawn tlawh che u kha a lo thlawn lo tih nangmahni ngeiin in hre si a;
2:2 thlawn ahnekin, chu mi hma chuan in hriat tawh angin, Philippi khuaah chuan hrehawm tuar leh zahthlak taka siama kan awm hnu khan buai em em chung pawhin Pathian Chanchin Tha in hnena sawi turin kan Pathianah chuan kan lo huai tak zawk kha.
2:3 Kan thu hril hi dawta chhuak a ni si lo va, bawlhhlawha chhuak a ni hek lo va;
2:4 Chanchin Tha kawltira awm turin Pathian tha tih mi kan nih ang ngeiin, mihring tilawm tur ang ni lovin; kan thinlung fiahtu Pathian tilawm zawkin thu kan sawi zawk thin a ni.
2:5 Englai mahin fak derna thu emaw, duham khuhna emaw kan hman an hre ngai si lo tih in hriat kha (Pathian min hriatpuitu a ni);
2:6 Krista tirhkoh ka nih avangin mi tan hautak zet ni thei mah ila, mihring lakah, nangni lakah pawh, mi dangte lakah pawh, chawimawina kan zawn an hre ngai hek lo.
2:7 Nu, nau pawmin ama fate a duat angin in zingah nunnem takin kan awm zawk kha.
2:8 Chutiang bawkin kan duhzawng tak in lo nih tak avang khan, kan duh ngawih ngawih che u a, Pathian Chanchin Tha chauh ni lovin, keimahni nun pawh pek hial che u kan peih kha.
2:9 Unaute u, kan thawh hahzia leh kan thawh rimzia kha in hre reng e; in zingah tumah kan tihhautak lohna tur che uin achhun azana thawkin, Pathian Chanchin Tha kan hrilh thin che u kha.
2:10 Nangni ringtute chunga thianghlim tak leh fel tak leh demawm lo taka kan awmzia kha min hriatpuitute in ni, Pathian nen.
2:11 ,12 Ama ram leh ropuinaa ko luttu che u Pathian mi ni tlaka in awm theihna turin, pain ama fate chunga a tih angin, fuih leh thlamuan leh hriattir che uin, in chung theuhva kan tihzia kha in hre si a.
2:12 ,11 Ama ram leh ropuinaa ko luttu che u Pathian mi ni tlaka in awm theihna turin, pain ama fate chunga a tih angin, fuih leh thlamuan leh hriattir che uin, in chung theuhva kan tihzia kha in hre si a.
2:13 He mi avang hian bang lovin Pathian hnenah lawmthu kan hril bawk thin, Pathian thu kan hnen ata in hriat, in pawm lai khan, mihring thu pawmin in pawm lo va, Pathian thu pawmin in pawm zawk avang kha; chu chu Pathian thu a ni reng a, nangni a ringtute chhunga thawk bawk thina chu a ni.
2:14 Nangni, unaute u, Judai rama Pathian kohhran pawl Krista Isuaa awmte zirtu in lo nih kha, anni chuan Judate lakah an tuar angin, nangni pawhin nangmahni rma mite lakah in tuar ve bawk si a.
2:15 Chung Judate chuan Lalpa Isua leh zawlneite pawh an that a, keini pawh min hnawt chhuak a, Pathian an tilawm lo va, mi zawng zawng an kalh thin;
2:16 chhandam an nih theihna tura Jentailte hnena thu hrilh min khap si thin; an sual tawp khawk a thleng ta a, thinurna chu an chungah a lo tla ta nge nge a ni.
2:17 Nimahsela, unaute u, rei lo te atan nangmahni nen thinlung lama inthen lova, hmel lam chauhva inthena kan awm rih avangin, chak tak chunga in hmel hmu turin kan bei nasa lehzual thin a ni;
2:18 in hnena lo kal kan tum tlat si a, kei Paula ngei pawh hian vawi hnih lai lo kal ka tum nghe nghe tawh a, nimahsela Setanan min dal thin a ni.
2:19 kan beiseina emaw, kan hlimna emaw, kan lallukhum chhuan emaw engnge ni le? A lo kal hunah kan Lalpa Isua hmaah chuan nangmahni ngei in ni dawn lawm ni?
2:20 Nangmahniho hi kan chuan leh kan hlimna in ni asin.
3:1 Chutichuan, kan tuar zawh tak loh chinah chuan Atheni khuaah keimahni chauh hnutchhiahin awm ila tha kan ti a,
3:2 Timothea, kan unaupa, Krista Chanchin Tha lama Pathian rawngbawltu hi, tinghet tur che u leh in rinna kawnga thlamuan tur che uin, kan rawn tir a ni,
3:3 heng hrehawm tuarnate avang hian tumah an nghin lohna turin, hengte hi tuar turin ruat kan ni tih nangmahni ngeiin inhre si a.
3:4 In hnena kan awm lai khan hrehawm tuar tur kan ni tih kan hrilh lawk ngei che u kha; chutiang ngei chuan a thleng tawh a, chu chu in hriat kha.
3:5 Chu mi avang chuan kan tuar zawh tak loh hnuin, thlemtu chuan a thlem thlu hlauh ang che u a, kan thawh rimna chu athlawn dah ang e, tiin in rinzia ka lo hriat theihna turin mi ka rawn tir a ni.
3:6 Nimahsela, Timothea chu in hnen atangin tunah kan hnen a lo thlen hian, hmuh che u kan chak ang bawkin min hmuh chak em emin khawngaih takin min hre reng fo tih thu leh in rinna leh in hmangaihna chanchin lawmawm tak min rawn hawn a;
3:7 chu mi avang chuan unaute u, kan manganna leh hrehawmna zawng zawngah, in rinna avangin in chungah thlamuang takin kan awm ta.
3:8 Tunah chuan kan nung ta, Lalpaa in din ngheh phawt hi chuan.
3:9 ,10 In hmel kan hmuh theihna tur leh, in rina lama in tlakchhamna kan phuhruksak theihna tur che uin achhun azana nasa taka tawngtaiin kan Pathian hmaah in chunga kan hlimna zawng zawng avang hian nangmahni lam thu-ah Pathian hnenah eng lawmthu nge kan hrilh ve thung theih ang le aw?
3:10 ,9 In hmel kan hmuh theihna tur leh, in rina lama in tlakchhamna kan phuhruksak theihna tur che uin achhun azana nasa taka tawngtaiin kan Pathian hmaah in chunga kan hlimna zawng zawng avang hian nangmahni lam thu-ah Pathian hnenah eng lawmthu nge kan hrilh ve thung theih ang le aw?
3:11 Tichuan, kan Pathian, kan pa ngei chuan kan Lalpa Isua pawhin in hnen lamah min hruai rawh se.
3:12 Tin, nangmahni lama hmangaihna kan ngah angin, nangmahni lamah inhmangaih tawnna leh mi zawng zawng lamah hmangaihna chu Lalpa chuan tihpunsakin tihngahsak che u rawh se:
3:13 chutichuan kan Lalpa Isua, a mi thianghlim zawng zawngte nena a lo kal hunah, kan Pathian leh kan Pa hmaah in thinlungte thianghlimna kawngah sawiselbovin a tinghet thei ang che u.
4:1 Chutichuan, unaute u, a tawp berah chuan in awm dan tur leh Pathian in tihlawm dan tur (tuna in awm dan ang hi), kan hnen ata in lak ang khan in ngah lehzualna turin Lalpa Isuaah chuan kan ngenin kan fuih che u a ni.
4:2 Lalpa Isua zarah chuan eng thute nge kan pe che u kha in hre si a.
4:3 Pathian duhzawng, in thianghlimna tur chu hei hi a ni, inngaih bansan ula;
4:4 ,5 Pathian hre lo Jentailhote anga hur kawng chak lovin, thianghlim leh chawimawiin mahni bel vawng thiam theuh ula;
4:5 ,4 Pathian hre lo Jentailhote anga hur kawng chak lovin, thianghlim leh chawimawiin mahni bel vawng thiam theuh ula;
4:6 chu mi kawngah chuan tuman bawhchhiain a unau chungah thil tha lo ti suh sela; Lalpa chu chung ang thil titu zawng zawng phuba latu a nih avangin – keini pawhin kan hrilh lawkin kan hriattir tawh che u ang khan.
4:7 Pathianin bawlhhlawh turin min ko si lo va, thianghlimah min ko zawk a ni.
4:8 Chuvangin, a pawisa lotu chuan mihring pawisa lo a ni lo va, Pathian, a Thlarau Thianghlim pe thintu che u chu a pawisa lo a ni zawk.
4:9 Amaherawhchu, unaute hmangaih kawng thu chu ziaksak in ngai lo ve, inhmangaih tawn turin nangmahni ngei Pathian zirtirin in awm si a.
4:10 Makedonia ram puma unau zawng zawngte chungah pawh chutiang chuan in ti a, nasa lehzuala ti zel turin kan ngen a che u.
4:11 Kan hrilh ang ngei che u khan phili ruai lovin mahni hna theuh nei tlatin mahni kut ngei hmangin hna thawk rawh u;
4:12 tichuan miten an ngaisang ang che u a, engmah tlakchham in nei lo ang.
4:13 Nimahsela, unaute u, mi dang beiseina reng nei lote anga in lungngaih loh nan, muhilte chanchin in hriat loh kan duh lo ve.
4:14 Isua a thi a, a tho leh ta tih kan rin si chuan Isuaa muhil tawhte chu Pathianin ama rualin a rawn hruai ve bawk ang.
4:15 Hei hi Lalpa thuin in hnenah kan sawi a ni. Keini Lalpa lo kal thlenga nunga lo la awm rengate hian muhil tawhte chu kan lehkhalh tawp lo vang, tih hi.
4:16 Lalpa ngei chu au thawm nen, vantirhkoh chungnung ber aw nen, Pathian tawtawrawt ri nen, van atangin a lo chhuk dawn si a; tin, Kristaa thi tawhte chu an tho hmasa ang a;
4:17 chu mi hnuah chuan keini nunga lo la awm rengate hi boruakah Lalpa hmuak turin anmahni rualin chhum zingahte khian lak chhohvin kan awm ang; chutichuan kumkhuain Lalpa hnenah kan awm tawh ang.
4:18 Chuvangin, heng thu hian inthlamuan tawn rawh u.
5:1 Amaherawhchu, unaute u, a hun leh a ni kawng thute reng ziaksak che u in ngai lo ve.
5:2 Lalpa Ni chu zanah rukru angin a lo thleng dawn tih nangmahni ngeiin chiang takin in hre si a.
5:3 “Muanna leh himna,” tia an sawi lai takin hmeichhe nau vei angin chawp leh chilha boralna an chungah a thleng ang a, an pumpelh tawp lo vang.
5:4 Nimahsela, unaute u, nangni zawng chu mi Ni chuan rukru ang a nanna tur che uin thimah in awm lo ve;
5:5 eng fate leh ni fate in ni vek si a; zana mi kan ni lo va, thima mi kan ni hek lo.
5:6 Chuvangin, mi dangte angin i muhil suh ang u khai, i mengin i ngaihven zawk ang u.
5:7 Muhilte chu zanah a ni, an muthilh thin ni; zu ruite pawh chu zanah a ni, an ruih thin ni.
5:8 Nimahsela, keini zawng chhuna mi kan nih avang hian rinna leh hmangaihna awmphaw chu hain, chhandam beiseina chu lukhuma hmangin i ngaihven zawk ang u.
5:9 Pathianin thinurna tuar tur ni lovin, kan Lalpa Isua Krista zara chhandamna hmu tur zawkin min ruat a ni si a;
5:10 kan men pawhin kan muthilh pawhin amah nena kan nun tlan theih nan ani chu kan thih aiin a thi a ni.
5:11 Chuvangin, infuih tawnin, intisawt tawn theuh rawh u, in tih reng thin ang hian.
5:12 ,13 Nimahsela, unaute u, in zinga thawkrim leh, Lalpaa in hotua awm leh, zilhtute che u chu hre tur leh, an hnathawh vanga hmangaiha ngaihlu em em turin kan ngen che u a ni. Inremin awm rawh u.
5:13 ,12 Nimahsela, unaute u, in zinga thawkrim leh, Lalpaa in hotua awm leh, zilhtute che u chu hre tur leh, an hnathawh vanga hmangaiha ngaihlu em em turin kan ngen che u a ni. Inremin awm rawh u.
5:14 Tin, unau te u, kan ngen a che u, dan ang lova awmte chu zilh ula, rilru tete chu fuih ula, chak lote chu tanpui ula, mi zawng zawng lakah dawhthei takin awm rawh u.
5:15 Tuman tu sual pawh suala thungrul lo turin fimkhur rawh u; in thil intihsak tawnna lamah leh, mi zawng zawng chunga in tihsakna lamah pawh, a tha apiang um fo zawk rawh u.
5:16 Lawm fo ula;
5:17 bang lovin tawngtai ula;
5:18 engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a.
5:19 Thlarau chu timit suh ula;
5:20 thu hrilte hmusit suh u;
5:21 engkim fiah zawk ula: a tha apiang pawm tlat ula;
5:22 sual tinreng lakah inthiarfihlim rawh u.
5:23 Tin, remna Pathian ngei chuan in pumin tithianghlim che u rawh se; tin, in thlarau leh, in rilru leh, in taksa chu kan Lalpa Isua Krista lo kal hunah chuan sawiselbovin apuma humhimin awm rawh se.
5:24 A kotu che u chu a rinawm a, tih pawh a ti bawk ang.
5:25 Unaute u, min tawngtai sak rawh u.
5:26 Unau zawng zawngte chu fawh thianghlimin chibai mi buksak rawh u.
5:27 He lehkha hi unau zawng zawng hnenah chuan chhiar turin Lalpa hmingin ka ngen a che u.
5:28 Kan Lalpa Isua Krista khawngaihna chu in hnenah awm rawh se. |
posted by zoblog @ 11:25 AM  |
|
|
|
|
|
