|
| Wednesday, September 12, 2007 |
1:1 Paula, Pathian duhzawnga Krista Isua tirhkoh leh kan unaupa Timothea chuan, Korinth khuaa Pathian kohhranho awmte hnenah, Akaia ram zawng zawnga mi thianghlim awm zawng zawngte hnenah nen :
1:2 Pathian kan Pa leh Lalpa Isua Krista hnen ata khawngaihna leh remna in hnenah awm rawh se.
1:3 Kan Lalpa Isua Krista Pathian leh Pa, khawngaihnate Pa leh thlamuanna zawng zawng Pathian chu fakin awm rawh se.
1:4 Pathianin keimahni min thlamuanna ngeiin hrehawm eng anga awmte pawh chu kan thlamuan ve theihna turin ani chuan kan hrehawmna zawng zawngah min thlamuan thin,
1:5 Krista tuarnate chu kan chunga achuang aliam ang tak hian, kan thlamuanna hi Krista zarah achuang aliam a ni.
1:6 Nimahsela, hrehawma kan awm leh, nangmahni thlamuanna tur leh chhandamna tur a ni a; thlamuana kan awm leh, nangmahni thlamuan vena tur a ni a, chu chuan kan hrehawm tuar bawk hi chhel taka in tuarnaah chuan a thawk thin a ni.
1:7 Tin, hrehawmna chang vete in nih ang hian, thlamuanna chang vete in ni bawk tih kan hriatin kan beiseisakna che u hi a nghet a ni.
1:8 Unaute u, Asia rama kan chunga hrehawm thleng thu kha in hriat loh kan duh lo va, khatia, nasa taka tuar zawh rual lohva, nun reng pawh beisei lo khawp hiala delhbeha kan awm kha.
1:9 A ni, thih mai chauh hmabak tawhin kan inhria a, mahni inring lova, Pathian, mitthi kai thotu chu kan rin zawk theihna tur a lo ni.
1:10 A ni, thih mai chauh hmabak tawhin kan inhria a, mahni inring lova, Pathian, mitthi kai thotu chu kan rin zawk theihna tur a lo ni.
1:11 mi tam tak zara thilpek kan hmuh avangin mi tam takin kan chunga lawmthu an sawi theihna turin nangni pawhin in mi tawngtaisaknaah chuan min tan rualpui ula.
1:12 Kan chhuan chu hei hi a ni, kan chhia leh tha hriatna thu hriattir chu, thianghlimna leh Pathian dikna neiin, tisa finnaah ni lovin, Pathian khawngaihna zawkin khawvelah hian kan chet kha, nangmahni lamah kan che tha lehzual a.
1:13 13,14 In chhiar thina awih pawh in awiha lo kha chu thu dang reng reng in hnenah kan ziak lo; kan Lalpa Isua Ni-ah chuan nangni kan chhuan in ni dawn ang bawkin, keini pawh in chhuan kan ni dawn tih nangni thenkhatin min awihsak ve tak ang khan, a tawp thlengin kan thu chu in awih ka beisei bawk a.
1:14 13,14 In chhiar thina awih pawh in awiha lo kha chu thu dang reng reng in hnenah kan ziak lo; kan Lalpa Isua Ni-ah chuan nangni kan chhuan in ni dawn ang bawkin, keini pawh in chhuan kan ni dawn tih nangni thenkhatin min awihsak ve tak ang khan, a tawp thlengin kan thu chu in awih ka beisei bawk a.
1:15 Tin, chu mi rinna neiin, khawngaihna lehhnih in hmuh theihna turin, in hnenah lo kal hmasa ila,
1:16 nangmahni tlawh pahin, Makedonia ramah kal zel ila, Makedonia ram atangin in hnenah lo let leh ila ka ti a; tin, Judai rama ka kalna turah chuan nangmahni thlahin awm ila, ka ti bawk a.
1:17 Chutichuan, chutiang ka rilruk lai khan ka rilru ngheh lohzia lantir em ni ka ni? A nih loh leh, ka hnenah, "A ni, a ni" tih leh "A ni lo, a ni lo" tih chu awm ve ve turin, thiltih ka tum thin chu tisa angin em ni ka tum?
1:18 Engpawh ni rawh se, Pathian a rinawm angin, nangmahni lamah kan thu hi "A ni" tih leh "A ni lo" tih a ni ve ve si lo.
1:19 Pathian Fapa Isua Krista, a thu kei leh Silvana leh Timothean in zinga kan hrilha kha "A ni" leh "A ni lo" a ni ve ve si lo va, amahah chuan "A ni" tih a awm zawk a ni.
1:20 Pathian thutiamte chu engzat pawh ni se, amahah chuan "A ni" tih chu a awm si a; chutichuan amah avang pawhin "Amen" tih chu a awm a ni, keimahni avanga Pathian ropuina turin.
1:21 Tin, Kristaa nangmahni nena min tinghettu leh keini min thihtu chu Pathian a ni;
1:22 ani chu min chhinchhiahtu leh kan thinlunga zakhamna Thlarau min petu a ni bawk a.
1:23 Nimahsela, ka thlarau chunga hretu atan Pathian ka ko a ni, nangmahni zuah tur che u in a ni, Korinth khuaa ka lo kal tak loh ni.
1:24 In rinna chungah lalna kan nei, ka ti lo va, in lawmna tanpuitu kan ni, ka ti zawk a ni; rinnaa ding in ni si a.
2:1 Nimahsela, keima lam thu-ah zawng hei hi ka lo tum ta tlat a ni, lungngai chung chuan inhnena lo kal leh tawh lo turin.
2:2 Keiin ka tihlungngaih si che u chuan, ka tihlungngaiha vek lo chuan tunge mi tilawmtu ni ang le?
2:3 Chutichuan, kha ngei kha ka ziak a ni, chutilochuan ka lo kal hunah ka lawmna turte lakah chuan lungngaihna ka hmu zawk dah ang e; ka lawmna chu in zaa lawmna a nih ka rinsak hlawm si che u a.
2:4 Mittui tam tak tla chungin thinlung hrehawm leh thlaphang em ema ka ziak a nih kha; chu chu tihlungngaiha in awmna tur a ni lo va, in chunga hmangaihna nasa lehzual ka neih hi in hriat theih zawkna turin a ni.
2:5 Nimahsela, tupawhin mite a tihlungngaih chuan keimah chauh mi tilungngai a ni lo va, (ka tih luattuk lohna turin) in zain a tilungngai hlek theuh zawk che u a ni.
2:6 Chutiang mi tan chuan mi tam takin an hrem chu a tawk tawh a ni.
2:7 Chutichuan, hrem leh tawh ahnekin in ngaidamin in thlamuan zawk tur a ni, chutilochuan eng emaw tiin mi chutiang chu a lungngaih lutuknain a lem zo dah ang e.
2:8 Chu mi avang chuan ama lama in hmangaihna chu tinghet turin ka ngen a che u.
2:9 He mi avang pawh hian ka ziak a ni, kawng tinrenga thu in awih leh awih loh ka fiah theihna tur che uin.
2:10 Eng kawngah pawh mi in ngaihdam apiang, kei pawhin ka ngaidam ve a; kei pawhin ka ngaihdam tawh sa chu, engpawh ka lo ngaih dam tawh chuan nangmahni avangin Krista hmaah chuan ka ngaidam a ni;
2:11 chutilochuan Setanan min dinchan khalh dah ang e; a ngamthlemna chu kan hai si lo va.
2:12 Tin, Krista Chanchin Tha hril tura Troas khua ka thlen lai khan, Lalpaah chuan kawng min lo hawnsak na a,
2:13 ka unaupa Tita chu ka hmuh loh avangin ka thlarau lamah chuan muanna reng reng ka nei chuang lo va; chutichuan anni chu tawng thain ka then a, ka chhuak a, Makedonia ramah ka kal ta a.
2:14 Nimahsela, Krista hnehnaa min hruai fotu leh, keimahni hmanga hmun tina amah hriatna rim hriattirtu Pathian hnenah chuan lawmthu awm rawh se.
2:15 Chhandam mekahte leh boral mekahte chuan Pathian tan Krista rimtui kan ni si a;
2:16 pawl khatte tan chuan thihna lakah thihna tur rim kan lo ni a, pawl khatte tan chuan nunna laka nunna tur rim kan lo ni a. Chung ang atan chuan tunge tling zo vang?
2:17 Mi tak takin Pathian thu hi mite buma sumdawn nan an hmang angin keini zawngin kan hmang ve si lo va; tih tak zet zawkin, Pathian tirh zawkin, Pathian mithmuhin Kristaah chuan thu kan sawi thin a ni.
3:1 Mahni insawimawi kan tan leh dawn ta maw? A nih loh leh, in hnena pek tur emaw, in hnen ata emaw sawimawina lehkha, mi thenkhat tan a ngai angin kan tan a ngai ve dawn maw?
3:2 Nangni hi kan lehkha, kan thinlunga ziak, mi zawng zawng hriat leh chhiar chu in ni e:
3:3 Krista lehkha, keimahni min ziaktir, lehkhatuia ziak ni lo, Pathian nung Thlarauva ziak zawk, lung pheka ziak ni lo, tisa thinlung pheka ziak zawk chu in ni tih chiang taka lantir a ni si a.
3:4 Tin, Pathian lamah chutiang rinna chu Krista zara kan neih a ni;
3:5 engpawh keimahni atanga chhuaka ruat turin keimahni ngawtin kan tlin kan ti lo va; kan tlin theihna chu Pathian hnen ata a ni zawk.
3:6 Amah bawk chuan thuthlung thar rawngbawltuahte min tlintir a; a lehkha thu mai rawngbawltuahte ni lovin a thlarau rawngbawltuahte a ni zawk e; lehkha thu mai chuan a tihlum si thin a, thlarau erawh chuan a tinung thin a ni.
3:7 Mosia hmel a ropui avangin Israel fate chuan a hmel an en reng thei lo va (chu ropuina chu a ral ta riai riai a) thihna rawngbawlna lunga hawrawpa ziak mah, chuti khawpa ropuiin a thlen chuan,
3:8 Thlarau rawngbawlna chu engti taka ropuiin thleng ang maw;
3:9 Thiam loh chantirna rawngbawlna mah a ropui chuan, felna rawngbawlna chu ropui lamah chuan a nasa zawk em em tur a ni.
3:10 Tihropuia awm tawha chuan he mi lamah zawng ropuina reng a nei ta si lo, ropuina nasa zawk chuan a khum avangin.
3:11 Ral ta riai riaia mah ropuiin a thlen chuan awm reng tura chu ropuia tuamin a awm zawk em em tur a ni.
3:12 Chutichuan, chutiang beiseina kan neih avngin engkim kan sawi chhuak thin a ni.
3:13 Mosia tih ang khan kan ti lo ve; ani chuan ral ta riai riai ral tawpna chu Israel fate chuan an en reng lohna turin a hmai chu hmaikhuhnain a khuh a:
3:14 an rilru erawh chu tihkhauhvin a awm ta zawk a; vawiin thleng pawh hian thuthlung hlui chu an chhiarin khuhna pangngai chu hlim lohvin a awm reng si a, chu khuhna chu Kristaah chuan tihbovin a awm ta a.
3:15 Nimahsela, vawiin thleng hian Mosia Lehkhabu an chhiar apiangin an thinlungah chuan khuhna a awm thin.
3:16 imahsela, an thinlung chu Lalpa lama a hawi tik apiangin khuhna chu lak bo a ni tawh ang.
3:17 Tin,Lalpa chu Thlarau chu a ni a; Lalpa Thlarau awmna apiangah chuan zalenna a awm thin.
3:18 Chutichuan,keini chu kan zain hmai khuh lovin darthlalang anga Lalpa chhun enin, ropuina atanga ropui zelin, chu mi anpui ngeia awm turin tihdanglamin ka awm thin, Lalpa (Thlarau) ata chu kan hmuh ang zelin.
4:1 Chu mi avang chuan khawngaihna kan hmuh ang zela he rawngbawlna hi kan neih avangin kan dawl lo va;
4:2 thil zahthlak inthupte chu kan malmak ta zawk a, ngamthlemna thu kan hmang lo va, Pathian thu mi bum nan kan hmang hek lo; thutak hriattirin Pathian mithmuhin mi tin chhia leh tha hriatna mit kan intluntir zawk thin a ni.
4:3 Nimahsela, kan Chanchin Tha hi khuhin a awm chuan boral mekahte hian a ni, khuha a awm ni;
4:4 Krista, Pathian anpui, a ropuizia Chanchin Tha eng chuan anmahni a chhun en theih lohna turin chungahte chuan he khawvel pathian hian ring lote rilru a tidel ta a.
4:5 Mahni thu kan hril si lo va, Krista Isua chu Lalpa a nih kan hril zawk thin a, keini pawh Isua avanga in bawih kan nih kan hril bawk thin.
4:6 Isua Krista hmelah chuan Pathian ropuizia hriatna eng chu min pe turin, "Thim ata eng a eng chhuak ang," titu Pathian chuan kan thinlungte hi a chhun eng ta si a.
4:7 Nimahsela, thiltihtheihna nasatzia chu keimahni hnena mi ni lovin, Pathian ta a nih theih zawkna turin chu ro chu hlum belahte kan vawng a ni.
4:8 Lehlam lehlama neksawrin kan awm a, nimahsela kan thaw a ipik si lo; mangangin kan awm a, nimahsela kan bei a dawng si lo;
4:9 tihduhdahin kan awm a, nimahsela kalsanin kan awm si lo; vuak thlukin kan awm a, nimahsela tihboralin kan awm si lo;
4:10 kan taksaah hian kumkhuain Isua thihna chu kan pu zel thin a, Isua nunna pawh kan taksaah hian a lan theih nan.
4:11 Keini mi nungdama la awmte hi Isua avnga thi tura mantirin kan awm fo va, Isua nunna pawh kan tisa thi theiah hian a lan theih nan.
4:12 Chutichuan, keimahniah hian thihnain a thawk thin a, nangniah erawh chuan nunnain a thawkzawk thin a ni.
4:13 Amaherawhchu, "Ka ring a, chuvangin thu ka sawi a ni," tih ziak ang khan, chu mi rinna rilru ngei puin keini pawhin kan ring ve a, chuvangin thu kan sawi bawk a;
4:14 Lalpa Isua kaithotu chuan keini pawh Isua hnenah min kaitho ve dawn a, nangmahni nen min dintir dawn tih kan hre si a.
4:15 Engkim nangmahni thatna tur a ni si a, khawngaihna chu mi tam zawk zara tihpuna awmin, Pathian ropuina turin lawmthu nasa tak a sawitir theih nan.
4:16 Chu mi avangin kan dawl lo va, kan pawn lam mihring hi lo awngrawp telh telh mah sela, kan chhung lam mihring chu ni tin siam thar zelin a awm zawk a ni.
4:17 Kan hrehawm nep tak, tun mit khap kar chhung chauhva awm tur hian ropuina nasa tak chatuan atan min siamsak nasa tulh tulh a ni;
4:18 thil hmuh theihte hi en lovin, thil hmuh theih lohte chu kan en zawk si a; thil hmuh theihte rei lo te atan a ni a, thil hmuh theih lohte erawh chu chatuan atan a ni si a.
5:1 Kan awmna leia in hi thiat mah sela, vanah, in kuta sak loh, chatuana awm tur, Pathian hnen ata in nghet chu kan nei tih kan hre si a.
5:2 Van ata kan awmna tur sin thuah chk em emin he mi inah hian kan rum tak meuh meuh si thin a;
5:3 chutianga sinin awm ila saruakin kan lo awm lo vang.
5:4 Keini he awmnaa awmte hi rit phurin kan rum tak zet si a, sin lova awm kan duh vang a ni lo va, sin thuaha awm kan duh vang a ni zawk, thi thei hi nunna lem zawhin a awm theih nan.
5:5 Tin, chu mi ngei atana min buatsaihtu chu Pathian a ni, zakhamna Thlarau min petu kha.
5:6 Chutichuan, taksaa kan awm chhung hian Lalpa hnenah kan awm lo tih hriain, kumkhuain muang takin kan awm thin;
5:7 (hmu theia kal lovin, rinnain kan kal zawk si a;)
5:8 muang takin kan awm, ka ti, taksaa awm lova Lalpa hnena awm kan duh zawk.
5:9 Chuvangin, awm ila, awm suh ila, ama lawmzawng mi nih kan tum tlat thin a ni.
5:10 Mi tinin taksaa thil tithe, a chhia a thain, kan tih ang zela kan hmuh theuh theihna turin, Krista rorelna thutphah hmaah chuan tihlanin kan awm vek tur a ni si a.
5:11 Chutichuan, Lalpa tih nachang hriain mihringte chu kan thlem thin a, Pathian hnenah erawh chuan lantirin kan awm a; nangmahni chhia leh tha hriatnaah pawh lantira kan awm ka beisei.
5:12 In hnenah kan insawi mawi leh a ni lo va, thinlung lam ni lova, alang lam mai chhuangtute chu eng emaw chhanna tur in neih theihna turin keimahni lamah chhuan chhan siam che uin kan sawi zawk a ni e.
5:13 Kan at leh, Pathian tan a ni a; kan fin leh, nangni tan a ni si a.
5:14 Krista hmangaihna chuan min tir lui a ni; heti hian kan ngaihtuah: Mi zawng zawng thih aiin mi pakhat a thi a, chuvangin mi zawng zawng chu an thi a ni;
5:15 tin, a nungte chu anmahni tan an nun tawh loh va, an thih aia thia tholeha tan chuan an nun tawh zawkna turin a ni, mi zawng zawng thih aiin a thih ni.
5:16 Chu mi avang chuan tun achinah hian keini zawngin tisa lamah chuan tumah kan hre tawh lo vang; tisa lamah Krista chu lo hre tawh mah ila, tunah zawng kan hre leh tawh lo ve.
5:17 Chu mi avang chuan tupawh Kristaa a awm chuan thil siam thar a lo ni a; thil hluite chu a ral ta a; ngai teh u, a lo thar ta.
5:18 Nimahsela, engkim Pathian hnen ata chhuak a ni a; ani chuan Krista avangin amah nen inremin min siam a, inremna rawngbawl hna min pe a;
5:19 khatia, Pathianin Kristaah chuan khawvel hi amah nen inremin a siama an bawhchhiatnate chu bawhchhiatnaa ruatsak lovin, inremna thu min kawltir kha.
5:20 Chutichuan, Krista aia palai kan ni a, Pathianin keimahni min hmangin a ngen chiam che u tih theih a ni; "Pathian nen lo inrem rawh u," tiin Krista aiah kan ngen che u a ni.
5:21 Amahah chuan Pathian felna kan lo nih theihna turin, sual reng reng hre lo chu Pathianin keimahni avangin sualah a siam a.
6:1 Tin, Pathian khawngaihna chu sawtpui lova in hmuh lohna turin, amah thawhpuiin ka ngen chiam a che u.
6:2 "Hun lawmawmah ka ngaithla che a,Chhandamna ni-ah ka tanpui che," a ti si a. Ngai teh u, tun hi hun lawmawm chu a ni a; ngai teh u, tun hi chhandamna ni chu a ni.
6:3 Kan rawngbawl hna hi an dem lohna turin eng kawngah mah tluk phahna tur reng reng kan siam lo va;
6:4 Pathian rawngbawltute angin engkimah mi mit tlungin kan awm zawk thin, nasa taka chhelnaah te, hrehawmnaah te, neksawrnaah te, hnawhchepnaah te,
6:5 vuaknaah te, lung in tannah te, buainah te, thawhrimnaah te, mutmawhnaah te, chaw ngheinaah te,
6:6 thianghlimnaah te, hriatnaah te, dawhtheihnaah te, ngilngeihnaah te, Thlarau Thianghlimah te, hmangaihna tak takah te,
6:7 thutak thuah te, Pathian thiltihtheihnaah te; ding lam leh vei lama felna hriamhreitein,
6:8 ropuina leh chawimawi lohnain, hming sawichhiat leh hming sawithatin; tihdertu angin, mi dik tak ni siin;
6:9 mi hriat tham loh angin, hmingthang tak siin; thi lek lek angin, ngai teh u, kan nung si; thunun angin, tihhlum si lohvin;
6:10 lungngai angin, nimahsela lawm fo siin; rethei angin, nimahsela mi tam tak tihausa siin; engmah nei lo angin, nimahsela engkim ngah siin.
6:11 Aw, Korinth-a mite u, kan thinlung pawh phawrh vekin in hnenah thu kan sawi a,
6:12 kan inhawng a, nangni erawh chu in inhawng ve si lo.
6:13 Tichuan, in chunga kan tih ang bawk khan nangni pawh kan lakah inhawng ve turin fate ngenin kan ngen a che u.
6:14 Ring lo mite nen rual lo taka nghawngkawl bat dunin awm suh u; suahsualna leh felnain engnge intawmna an neih? A nih loh leh thim leh engin engnge inpawlna an neih?
6:15 Beliara leh Krista pawhin engnge inngeihna an neih? A nih loh leh ring lo leh ringtu chuan engnge chan dun an neih?
6:16 Milemte leh Pathian biak in pawhin engnge inremna an neih? Keini zawng Pathian nung biak in kan ni si; Pathianin," Anmahniah ka awm ang a, Anmahniah ka leng bawk ang; Tin, an Pathian ka ni ang a, Anni pawh ka mite an ni ang," a tih ang khan.
6:17 Chuvangin, " 'An zing ata lo chhuak ula, Ahrangin awm rawh u, Thil bawlhhlawh reng reng pawh dek suh u,' Lalpan a ti," chutichuan, " 'Ka lawm ang che u a,
6:18 In tan Pa ka ni ang a, Nangni pawh ka tan fanu fapa in ni ang,' Lalpa Engkimtitheia chuan a ti,"
7:1 Chutichuan, duh takte u, chung thutiam chu kan neih avangin, tisa leh thlarau bawlhhlawhna zawng zawngah i intifai ang u, Pathian tih dek chunga thianghlimna tifamkimin.
7:2 In thinlungah hmun mi kian rawh u; tu chungah mah kan tisual lo va, tumah kan tikhawlo lo va, tumah kan dinchan khalh lo ve.
7:3 Chu chu thiam loh chantir tur che uin ka ti a ni lo ve; thih leh thi tlang a, dam leh dam tlang turin kan thinlungah hian kan vawng che u tih hman lawkah khan ka sawi kha.
7:4 Nangni lamah chuan ka tawng ngamzia hi a nasa a, ka chhuanzia che u hi a nasa a ni; thlamuannain ka khat a, kan hrehawmna zawng zawngah chuan hlimin ka khat liam a.
7:5 Makedonia ram kan thlen pawh khan kan tisain muanna reng reng a nei chuang lo va, lehlam lehlamah chuan tihhrehawmin kan awm ta zawk a; pawn lamah insualnate a awm a, chhung lamah hlauhnate a awm a.
7:6 Nimahsela inngaitlawmte thlamuantu Pathian chuan, Tita lo kalna chuan min thlamuan ta a;
7:7 a lo kalna chauh chuan a ni lo va, in lunglenzia te, in tahzia te, ka chunga in thahnemngaihzia te min hrilhin, nangmahnia a thlamuanna pawh chuan min thlamuan ta a ni; chutichuan ka lawm lehzual ta a.
7:8 Ka lehkha thawn khan tilungngai che u mah ila ka inchhir ta lo; atirah erawh kha chuan ka inchhir a ni, kha lehkha thawn khan a tilungngai che u tih ka hriat avangin; nimahsela rei lo te chauh a nih kha.
7:9 Tunah chuan ka lawm a ni, tihlungngaiha in awm avang a ni lo va, simna tura in lungngaih avang a ni zawk e. Keimahni avanga engmah in chan lohna turin Pathian duhzawng anga tihlungngaihin in awm si a.
7:10 Pathian duhzawnga lungngaihna chuan chhandamna tura simna a thlen a, chu chu inchhirawm lo tak a ni. Khawvel lungngaihna erawh chuan thihna a thlen zawk a ni.
7:11 Ngai teh mah u, Pathian duhzawnga tihlungngaiha in awmna chuan thil lak urhsunna te, pawi khawih ve lo in ni tih lantir duhna te, sual huatna leh sual hlauhna te, min ngaihna leh thahnemngaihna te, sual titu thunun zel tura inpeihna te a neihtir tak che u hi.
7:12 Chutichuan, in hnenah ziak mah ila, a sual titu avang khan ka ziak ta lo va, a sual tuartu avang khan ka ziak hek lo, kan chunga in thahnemngaihzia Pathian mithmuha inhnena hriattira a awm theihna turin ka ziak zawk a ni.
7:13 Chuvangin, thlamuanin kan awm ta reng a; keimahni thlamuanna chauh lovah pawh, Tita lawmna avangin kan lawm nasa lehzual a, nangni zawng zawngin a rilru in tihharhsak tak avangin.
7:14 A hnenah eng kawngah pawh nangmahni chhuang che u mah ila, ka mualpho si lo va; mualpho ahnekin engkim in hnena thu taktaka kan sawi thin ang khan, Tita hmaa kan chhuan chu thu taktak a lo ni ta ngei a.
7:15 Tin, in zaa a thu in awihzia te, hlau leh khur chunga amah in lawmzia te chu hre rengin, a thinlung chu nangmahni lamah a cheng nasa lehzual ta a ni.
7:16 Kawng tinrengah in chunga ka muan avangin ka lawm a ni.
8:1 Tin, unaute u, Makedonia rama kohhranho pawlte zinga Pathian khawngaihna pek chu kan hriattir dawn a che u;
8:2 khatia hrehawma fiahna nasa tak chunga an hlimna liam leh nasa taka an retheihna chu a liam a, an thilphalna nasa taka a chan takzia kha.
8:3 3,4 Khawngaihna, mi thianghlimte rawngbawla tel ve chu, nasa taka min dil chiamin, an theih tawkin, a ni, an theih tawk aia liam pawh, anmahni duh thu ngeiin an pe tih ka hriatpui asin.
8:4 3,4 Khawngaihna, mi thianghlimte rawngbawla tel ve chu, nasa taka min dil chiamin, an theih tawkin, a ni, an theih tawk aia liam pawh, anmahni duh thu ngeiin an pe tih ka hriatpui asin.
8:5 Chu pawh chu kan rin loh ang takin an ti a, Pathian duhzawngin anmahni ngei Lalpa hnenah leh keini hnenah an inpe hmasa te te a ni;
8:6 Chutichuan, hmana a lo tih tan tawh avang khan he khawngaihna pawh hi nangmahnia ti zo nghal turin Tita chu kan ngen ta hial a.
8:7 Chutichuan, engkim - rinna te, thusawi thiamna te, hriatna te, thahnemngaihna zawng zawng te, min hmangaihnate - in ngah ang hian chu khawngaihna pawh chu in ngah theih nan taihmak chhuah rawh u.
8:8 Thu pe lamin ka sawi lo va, mi dang thahnemngaihnain in hmangaihna takzia pawh chu fiah turin ka sawi zawk a ni.
8:9 Kan Lalpa Isua Krista khawngaihna chu, a retheihna avanga in lo hausak theihna turin hausa mah sela nangmahni avang ngeiin a lo retheih tak kha in hre si a.
8:10 Tichuan, chu miah chuan ka ngaih dan ang a ni ka sawi ni, chu chu in tan a tha si a, kum khat a ni tawh, a tan hmasatute in ni a, in ti tan chauh pawh ni lovin, duh pawh in duh tan ta bawk
8:11 Chutichuan duh turin inpeihna a awm ang khan, in neih ang zela hlenna pawh a awm theihna turin, tunah zawng ti hlen tawh rawh u.
8:12 Inpeihna chu a awm phawt chuan, mi a neih loh pui ni lovin, a neih angzia zela a pek chu lawm tlak a ni si a.
8:13 Mi dang an rim loh va, nangni in rimna turin ka ti a ni lo va,
8:14 inchawhrual nan, in neih liam chu tun lai hian an tlakchham phuhrukna a lo nih a, an neih liam pawh in tlakchham phuhrukna a lo la nih ve thung theihna turin ka ti zawk a ni; chutichuan chawhrualna a lo awm thei ang:
8:15 "A chhar tam chuan achuangin a nei lo va, a chhar tlem chuan a tlachham hek lo," tih ziak ang kha.
8:16 Tin, in chunga ka thahnemngaihna ang Tita thinlunga pe thintu Pathian hnenah chuan lawmthu awm rawh se.
8:17 Ani chuan kan ngenna chu a pawm ngei a; nimahsela kan ngen avang chauh ni lovin, amah ngei chu thahnemngai tak a ni a, ama duh thlan ngeiin in hnena kal turin a chhuak dawn a ni.
8:18 Tin, a hnenah unaupa kan tir ve dawn a, ani chu Chanchin Tha kawnga an fak thu kohhranho pawl zawng zawngah a thang chhuak a;
8:19 chuti chauh pawh a ni lo va, Lalpa ropuina tur leh kan inpeihzia entir tura a rawng kan bawl he khawngaihna thu-ah hian kan hnena khaw fang ve tura kohhranho pawlte ruat ve reng a ni bawk a.
8:20 A rawng kan bawl he thilpek kawngah hian tuman min dem lohna turin kan fimkhur a;
8:21 Lalpa ngaih chauhvah ni lovin mihring ngaih pawha thil mawi kan ngaihtuah lawk thin a ni.
8:22 Tin, an hnenah kan unaupa kan kaltir ve dawn a, ani chu kawng tam takah thahnemngai tak a ni tih vawi tam tak kan fiah tawh a, tunah phei chuan a rin em em che u avangin thahnem a ngai nasa lehzual ta a ni. Tita hi chu ka thian leh nangmahni lama ka hnathawhpui a ni a; tin, kan unaute hi chu kohhranho pawlte tirhkoh, Krista ropuina chu an ni.
8:24 Chu mi avang chuan in hmangaih tih hriatna leh, kan chhuanna che u hriatna chu kohhranho pawlte hmaah chuan an hnenah tilang rawh u.
9:1 Mi thianghlimte rawngbawl thu zawng in hnena ka ziak a ngai lo ve;
9:2 in inpeihzia chu ka hre si a, chu mi kawng thu-ah chuan, "Kum khat a ni tawh, Akaia ram chu inbuatsaihin an awm ta," tiin Makedonia rama mite hnenah ka chhuang thin che u a; chutichuan in thahnemngaihna chuan an zinga mi tam tak a chawk harh ta a.
9:3 Nimahsela, chu mi kawng thu-ah chuan ka chhuanna che u chu engmah lo a lo nih lohna turin unaute hi ka kaltir dawn a, ka sawi ang taka inbuatsaihin inlo awm theih nan;
9:4 chutilochuan Makedonia rama mi tuten emaw mi lo zui hlauhvin, inbuatsaih lova an rawn hmuh che u chuan, keini (nangni kan ti lo) he kan rinna che u kawngah hian kan mualpho dah ang e.
9:5 Chuvangin, unaute hi in hnena lo kal hmasa a, tlang taka thilpek in tiam lawk kha lo siam lawk tura ngen tulin ka ring a ni, chu mi ngei chu lak luih ang lo va, tlang taka pek ang zawkin peih saa a lo awm nan.
9:6 maherawhchu chutiang kawngah chuan theh tlem chuan a at tlem bawk ang a, theh tam chuan a at tam bawk ang.
9:7 Mi tinin ui chunga pe lovin, pek loh theih loh anga ngaia pe hek lovin, an thinlunga an tum ang zelin pe theuh rawh se; Pathian chuan hlim taka petu a ni a hmangaih ni.
9:8 Tin, Pathianin khawngaihna tinreng in chungah a vur thei a ni; chutichuan nangnin engkimah a tawk zet nei fovin, hnathawh tha tinreng atan in ngah thei ang;
9:9 "A sem darh a; Retheite hnenah a pe a; A felna chu kumkhuain a awm reng," tih ziak ang kha.
9:10,11 Tin, thilphalna tinreng, keimahni avanga Pathian hnena lawmthu sawina siamtu chu nei tura engkima tihhausaka awmin, thehtu hnena chi petu leh ei atan chhang petu chuan in theh tur chi chu a pe che uin a tihpunsak ang che u a, in felna rahte chu a tihhlawksak bawk ang che u.
9:12 He chhawmdawlna rawngbawlna hian mi thianghlimte tlakchhamnate chu a phuhruksak chauh pawh a ni si lo va, Pathian hnena lawmthu sawina tam taka changing a luang liam bawk a ni;
9:13 he rawngbawlna hian a fiahna che u avangin, Krista Chanchin Tha lama in thurin in zawmzia avang leh, anmahni tan leh mi zawng zawng tan thawhlawmnaa in thilphalzia avang hian Pathian an tiropui thin asin;
9:14 anmahni ngei pawhin in chunga Pathian khawngaihna nasa em em avangin, in tan tawngtaisak chungin an ngai hle che u a ni.
9:15 A thilpek sawi hleih theih loh avangin Pathian hnenah lawmthu awm rawh se.
10:1 Tin, kei Paula, in zinga in mithmuha thuhnuairawlh taka awm a,in hnena awm loh veleha nangmahni lam zuam si thina ngei hian, Krista zaidamna leh nunnemnain kan ngen a che u;
10:2 a ni, in hnena ka awm hunah thenkhat, tisa anga awma min ruatte chunga huai taka awm ka tum ngamna ang hian ka zuam lohna tur che uin ka ngen a che u.
10:3 Tisaah awm mah ila, tisa indo angin kan indo lo va,
10:4 (keini inralthuamnate chu tisaa mi a ni si lo va, kulhpui nghet takte thiatna tura Pathian zarah thil ti thei tak a ni zawk,)
10:5 hnialnate leh thil sang tinreng Pathian hriatna dal tura sang taka siamte chu thiatin, ngaihtuahna tinreng Krista thu awihna salah kan hruai a;
10:6 in thu awihzia a famkim hunah chuan thu awih lohna zawng zawng phuba la turin kan inpeih bawk a.
10:7 In mithmuha thil awmte chu a ni, in en thin ni. Tupawhin Krista ta nia a inrin chuan hei hi mahniin ngaihtuah leh rawh se, amah chu Krista ta a ni ang bawkin keini pawh kan nih ve hi.
10:8 Kan thuneihna (nangmahni thiat nan ni lo va, nangmahni siam that zawk nana Lalpan min pek hi) chhuang nasa lehzual mah ila ka mualpho dawn si lo va;
10:9 ka lehkha thawnte chuan tihhlauh che u tum anga ka lan loh nan chu chu ka ti a ni.
10:10 "A lehkha thawnte chu a ritin a khauh va, a taksa lam erawh chu a awm nem a, a tawng pawh a sitawm a ni," an ti si a.
10:11 "A lehkha thawnte chu a ritin a khauh va, a taksa lam erawh chu a awm nem a, a tawng pawh a sitawm a ni," an ti si a.
10:12 Thenkhat mahni insawimawite zingah chuan kan inchhiar tel ngam lo va, anmahni nen kan intehkhin ngam hek lo; amaherawhchu anni zawng mahni leh mahni intehin, mahni leh mahni intehkhinin rilru nei lovin an awm.
10:13 Keini erawh zawng kan tehna tawk aliamah chuan kan uang lo vang a, Pathianin bial min chantir a, chu tehna ang zel chuan kan uang zawk ang, nangmahni pawh bial hial tura tehna chu.
10:14 Bial phak loh pui bial che u angin kan huam zau lutuk si lo; Krista Chanchin Tha hrilin in khaw thleng pawhin kan lo kal kha:
10:15 kan tehna tawk liama mi, mi dang thawh rimte chu kan chhuang lo va; in rin a than angzia zelin, kan bial chin ang zelah, in zingah nasa taka tihlenin kan awm ang tih beiseina kan nei zawk a,
10:16 buatsaih sa kawng thu-ah chuan mi dang bial chhuang lovin, in piah lam ram thleng pawha Chanchin Tha kan hrilh theih nan.
10:17 Nimahsela, "A chhuang apiangin Lalpa chu chhuang rawh se,"
10:18 Mahni insawi mawi chuan fak a hlawh si lo va, Lalpan a sawi mawi chuan fak a hlawh zawk a ni.
11:1 Ka at deuhnaah hian nangnin mi dawhtheih ka va duh em! A ni, dawh pawh mi dawhthei ngei chhap e.
11:2 Pathian thiknain asin ka thik che u ni; Krista hnenah chuan nula thianghlim angin ka pek theihna tur che uin, pasal pakhat ka hualsak si che u a.
11:3 Nimahsela, rul chuan a ngamthlemnain Evi a bum ang khan Krista lama takna leh thianghlimna ata chu eng emaw tiin in rilru chu an tikhawlo dah ang e, tih ka hlauthawng a ni.
11:4 Kan hrilh che u a ni lo, Isua dang hrila in hnena lo kal apiang in lo ngai thei a, thlarau in chan ngai loh chu in chang a, Chanchin Tha dang in pawm ngai loh chu in pawm duh zel mai maw!
11:5 Chung tirhkoh lian berte chu eng kawngah mah tluk loh ka inring lo asin.
11:6 Thusawiah zawng tawng hmang thiam mah su ila, hriatnaah chuan chutiang ka ni lo; a ni, engkimah, mi zawng zawng zingah, nangmahni lama kan lantir kha.
11:7 A nih loh leh, Pathian Chanchin Tha athlawn ngawta ka hrilh a, chawi sana in awm theihna tura ka intihhniam khan thil ka tisual a lo ni maw?
11:8 In zinga ka thawh lai khan Kohhran dangten min chhawmdawl a, nangni pui turin anni chu ka tihek a.
11:9 Tin, in hnena ka awm a, ka tlakchham lai khan tumah ka tihautak lo va; unaute chu Makedonia ram ata an lo kalin ka tlakchhamna chu mi rawn phuhruksak si a; engkimah nangmahni tihautak lovin ka insiam kha, khatiang khan ka insiam zel ang.
11:10 Krista thutak keimaha a awm ang hian, Akaia ram lama he ka chhuanna hi tuman mi tihrehsak lo vang.
11:11 Eng vangin nge? Ka hmangaih loh che u avang em ni? Pathianin a hria.
11:12 Nimahsela, remchanna hmu duhte lak ata remchanna chu ka sah chah theihna turin ka tih thin hi ka ti zel ang; an chhuannaah chuan keimahni awm ang hian an lo awm theih nan.
11:13 Mi chutiangte chu Krista tirhkohva insiam chawpa, tirhkoh derte, hnathawktu mi bum hmangte an ni si a.
11:14 Chu chu a mak lo ve; Setana meuh pawh eng tirhkohvah a insiam chawp si thin a.
11:15 Chuvangin, a rawngbawltute pawh chu felna rawngbawltuah insiam chawp mah sela thil mak a ni lo ve; chungho tawpna chu an thiltih ang zelin a ni ang.
11:16 Ka sawi leh ang, tuman mi aah mi ruat suh se; nimahsela mi ruat vek chuan, kei pawhin tlem tala ka chhuan ve theih nan mi a angin mi dawh rawh u.
11:17 Ka sawi hi Lalpa thu angin ka sawi lo va, ka chhuan rinna hian a ang takin ka sawi zawk a ni.
11:18 Mi tam takin tisa anga an chhuan avangin kei pawhin ka chhuang ve the ang.
11:19 Nangni zawng le mi fing in nih avangin mi ate chu lungawi takin in dawh si thin a.
11:20 Miin bawihah siam che u sela, ei zo duak che u sela, salah man che u sela, mahni inchawimawi sela, in hmaiah beng che u sela in dawh si thin a.
11:21 Kan lo chak ta lo angin insitin ka sawi a ni. Nimahsela, tupawhin eng kawngah pawh an ngam apiang (a takin han sawi ta ila) kei pawhin ka ngam.
11:22 Hebrai mite an ni maw? Kei pawh ka ni. Israel mite an ni maw? Kei pawh ka ni. Abrahama thlahte an ni maw? Kei pawh ka ni.
11:23 Krista rawngbawltute an ni maw? (mi a angin han sawi ta ila) Ka ni zawk mah; thawh rimnaahte nasa lehzualin, tan ina tannaahte nasa lehzualin, vuaknaahte hleihluak takin, thihnaahte vawi tam tak.
11:24 Judate lakah vuakna vawi khata vawi sawmli tling lo vawi nga ka tawk a;
11:25 vawi thum tianga vuakin ka awm a, vawi khat lunga denin ka awm a, vawi thum lawng chhiatna ka tawk a, zan khat leh ni khat tuifinriatah ka awm a;
11:26 khaw fannaahte vawi tam tak, luite laka hlauhawmahte, suamhmangte laka hlauhawmahte, ka chipuite laka hlauhawmahte, Jentailte laka hlauhawmahte, khawpuia hlauhawmahte, thlalera hlauhawmahte, tuifinriata hlauhawmahte, unau derte zinga hlauhawmahte;
11:27 thawhhahna leh thawhrimnaah te, mutmawhnaahte vawi tam tak; riltam leh tuihalnaah te, chaw ngheinaahte, vawi tam tak khawsik leh saruaka awmnaah te.
11:28 Heng pawn lam thil ka sawi bakah hian Kohhranho zawng zawng ka ngaihtuahna, ni tin mi delh rengtu hi a awm bawk a.
11:29 Mi chak lote ka tuarpui lo ngai em ni? Mi an tlukin ka vei lo ngai em ni?
11:30 Chhuang tur ka nih vek chuan ka chak lohna lam thilte a ni ka chhuan ang.
11:31 Lalpa Isua Pathian leh Pa, kumkhuaa engthawla awma chuan dawt ka sawi lohzia a hria e.
11:32 Damaska khuaah khan lal Areta hnuaia roreltu chuan mi man turin Damaska mite khawpui chu a ventir a;
11:33 tin, tukverhah kulh hrulah chuan bawkin mi thlak a, tichuan a kut ata ka relhru hlen ta a.
12:1 Ka chhuang reng reng tur a ni. That zawng a tha lo va, nimahsela Lalpa hnen ata inlarna leh hriattirna thu ka sawi kai teh zel ang.
12:2 Kristaa mi pakhat ka hria, chu mi ngei chu kum sawm leh kum li a ni ta (taksain emaw a awm ka hre lo, taksa lovin emaw a awm ka hre hek lo; Pathianin a hria) van thumna meuhvah khian lak chhohvin a awm a.
12:3 Tin, chu mi ngei chu (taksain emaw a awm, taksa lovin emaw ka hre lo; Pathianin a hria)
12:4 Paradis-a lak chhohva a awm leh thu sawi hleih theih loh, mihring sawi thian lohte chu a hria tih ka hria.
12:5 Mi chutiang chu ka chhuang ang; nimahsela ka chak lohna lo chu mahni ka inchhuang lo vng.
12:6 Chhuang duh mah ila mi a ka ni lo vng, thu taktak ka sawi dawn si a; nimahsela ka insum ang, chutilochuan tupawhin mi hmuh ang leh ka laka thu an hriat ang aiin mi ngai ropui zawk dah ang e.
12:7 Tin, hriattirnate chu a nasat em em avanga ka inngaihhlut lutuk loh nan tisaah hling mi pe a ni, Setana tirhkoh kut thak hnawih nana mi hmangtu tur chu; chutilochuan ka inngaihlu lutuk dah ang e.
12:8 Chu mi chungchang thu-ah chuan mi kiansan theih nan Lalpa chu vawi thum ka dil a.
12:9 Tin, ani chuan ka hnenah, "Ka khawngaihna i tan a tawk e; ka thiltihtheihna hi chak lohnaah asin tihfamkimin a awm ni," a ti ta a. Chutichuan Krista thiltihtheihna chu ka chunga a awm theih nan lawm em emin ka chak lohnate hi ka chhuang tawh zawk ang.
12:10 Chuvangin, Krista avangin chak lohnaahte, chhiatnaahte, neksawrnaahte, tihduhdahnaahte, hnawhchepnaahte ka lawm thin a ni; ka chak loh apiangin a ni ka chak thin ni.
12:11 Ka lo a ta a nih hi: nangnin a lo thei lovah mi siam a ni; kei chu nangmahni mi chawimawi tur ka ni asin, engmah ni mah suh ila, eng kawngah pawh tirhkoh lian berte chu ka tluk lo si lo.
12:12 Tirhkoh nih chhinchhiahnate chu chhelna tinreng neiin, chhinchhiahnate, thilmakte, thiltihtheihnatein in zinga tih a nih tak tak kha.
12:13 Eng kawngah nge ni, kohhran pawl dangte aia hnuai zawka siama in awmna chu? Keimah ngei hian ka tihhautak loh che u kawngah khan a nih nghal loh chuan. Chu mi dik lohnaah chuan mi ngaidam rawh u.
12:14 Ngai teh u, hei hi in hnena lo kal turin ka inpeih a vawi thumna tur a ni; tin, ka tihautak lo vang che u, in ta chu zawng ka ni si lo va, nangmahni a ni, ka zawn zawk che u ni; faten nu leh pate tan an khawl khawmsak tur a ni lo va, nu leh paten fate tan an khawl khawmsak zawk tur a ni si a.
12:15 Tin, kei zawngin in thlarau tan lawm em emin ka hmangral ang a, inhmangral vekin ka awm bawk ang. Achuang aliama ka hmangaih che u avang khan, keiin hmangaihna tlem zawk ka dawn phah a ni maw?
12:16 Amaherawhchu, kei chuan ka tihautak lo che u ni ta sela; nimahsela mi vervek reng reng lo niin, ngamthlemin ka man che u a lo ni.
12:17 In hnena ka tirhte zingah khan tu emaw tal hmangin ka hlawk phah che u em ni?
12:18 Tita chu ka fuih a, ama rualin unaupa chu ka tir a ni. Tita chuan hlawk phahna reng reng a nei che u em ni? Rilru hmunkhat pua leng dun kan ni lo vem ni? Hniak hnung inzui chiah kan ni lawm ni?
12:19 In hnena kan thiamthu sawiah min lo ngai reng a ni awm a. Kristaah chuan Pathian mithmuhah a ni, thu kan sawi ni. Nimahsela duh takte u, engkim hi nangmahni siam thatna tur a ni.
12:20 Ka lo kal hunah eng emaw tiin ka duh anga ka rawn hmuh loh che u a, kei pawh in duh angin mi hmu lo dah ang, tih leh, eng emaw tiin inhauna te, initsikna te, thinurna te, inkhinna te, inrelna te, sesea thu lak te, inngaihhlut lutukna te, buaina te a lo awm dah ang,
12:21 tih leh, ka lo kal hunin ka Pathianin in zingah mi timualpho leh pekin, tun hma lama thil tisualtute zinga thil bawlhhlawh tih te, inngaih te, hur te chinga sim si lo mi tam takte chu ka tah dah ang e tih ka hlau asin.
13:1 Hei hi in hnena ka lo kal a vawi thumna tur a ni. Hretute pahnih emaw pathum emaw kaah chuan thu tinreng tihnghehin a awm ang.
13:2 2,3 Ka sawi lawk tawh a, tin, Krista keimaha thusawi thintu chu fiahna in zawn avangin, vawi hnihnaa in hnena ka awm laia ka sawi ang khan, tunah in hnena awm lovin tun hma lama thil tisualtute hnenah leh mi dang zawng zawng hnenah ka sawi lawk leh dawn, 'Ka lo kal leh chuan ka zuah lo vang,' tih hi; ani chu nangmahni lamah a chak lo lo va, in zingah thil ti thei tak a ni zawk a ni.
13:3 2,3 Ka sawi lawk tawh a, tin, Krista keimaha thusawi thintu chu fiahna in zawn avangin, vawi hnihnaa in hnena ka awm laia ka sawi ang khan, tunah in hnena awm lovin tun hma lama thil tisualtute hnenah leh mi dang zawng zawng hnenah ka sawi lawk leh dawn, 'Ka lo kal leh chuan ka zuah lo vang,' tih hi; ani chu nangmahni lamah a chak lo lo va, in zingah thil ti thei tak a ni zawk a ni.
13:4 Ani chu chak lohna avangin khenbehin a awm a ni a, nimahsela Pathian thiltihtheihna avangin a nung ta reng a ni. Keini pawh amahah chuan kan chak lo a ni, nimahsela nangmahni lama Pathian thiltihtheihna avangin a hnenah kan nung ve ang.
13:5 Rinnaah chuan in awm emaw, nangmahni ngei inchhin thin ula; nangmahni ngei in fiah thin rawh u. A nih loh leh, nangmahniah Isua Krista chu a awm tih nangmahni ngeiin in hre fiah lo vem ni? Duh loh in nih nghal loh chuan.
13:6 Keini erawh chu duh lohvin kan awm lo tih in la hriain ka ring.
13:7 Tin, thil reng reng in tihsual lohna turin Pathian hnenah kan dil thin a; chu chu keini hi duhawma kan lan theihna tur a ni lo va, nangnin a mawi apiang in tih theih nan a ni zawk, keini chu duh loh angin awm mah ila.
13:8 Thutak tan tur lo chuan thutak do turin engmah kan ti thei lo a ni.
13:9 Keini kan chak loh lai pawha nangni in chak hian kan lawm thin asin; hei hi kan dil bawk thin, nangmahni that famkimna tur hi.
13:10 Chuvang chuan tichhe tur ni lova, siam tha tur zawka Lalpan thuneihna mi pek ang zel khan, in hnena ka awm huna na taka ka zilh loh nan che u, in hnena ka awm loh lai hian heng thu hi ka ziak a ni.
13:11 A tawp berah chuan unaute u, lawm takin awm rawh u. Tihthat famkimin awm ula; thlamuang takin awm ula, rilru hmunkhat pu ula, lungrual takin awm rawh u; tichuan hmangaihna leh remna Pathian chu in hnenah a awm dawn zuk nia
13:12 Fawh thianghlimin chibai inbuk rawh u.
13:13 i thianghlim zawng zawngte hian chibai an buk a che u.
13:14 Lalpa Isua Krista khawngaihna te, Pathian hmangaihna te, Thlarau Thianghlim pawlna te chu in zaa hnenah awm rawh se. |
posted by zoblog @ 11:30 AM  |
|
|
|
|
|
