| Wednesday, September 12, 2007 |
1:1 Theophil, hmana lehkhaah khan, Isua thiltih leh a zirtir tantirh zawng zawng thu kha ka ziak a ni;
1:2 Thlarau Thianghlim tanpuia a tirhkoh thlante hnena thu a tiam zawha vana hruai chhohva a awm tak ni thlenga thu kha.
1:3 Chu tirhkohte hnenah chuan hrehawm chu a tuar hnuin hriatna tam takin nungin a inentir a, ni sawmli zet an hnenah a inlar a, Pathian ram thu a sawi thin.
1:4 Tin, an awm khawm a pawl ve a, “Jerusalem khua kalsan suh u, Pa thiltiam ka sawi in hriat kha lo nghak rawh u,” a ti tlat a.
1:5 “Johana khan tuiin a baptis thin a, nimahsela ni rei lo tean Thlarau Thianghlimin baptisma in chang ang,” a ti a.
1:6 Tin, anni chuan an rawn inkhawmin a hnenah, “Lalpa, tunah em ni Israelte hnenah ram i pek leh dawn?” an ti a, an zawt a.
1:7 Tin, ani chuan an hnenah, “Pain a hun leh a ni, ama thu thua awma a ruat chu, nangni lo hriat tur a ni lo ve.
1:8 Nimahsela Thlarau Thianghlim chu in chunga a lo thlen hunah thiltihtheihna in la nei ang; tichuan Jerusalem khuaah te, Judai leh Samari ram khaw tinah te, kawlkil thleng pawhin ka thuhretute in ni ang,” a ti a.
1:9 Tin, chung thu chu a sawi zawhin an hmuh reng chungin, vana hruai chhohvin a awm a; tin, chhumin an hmuh phak lohvah a hruai bo ta a.
1:10 Tin, a chhoh laia van lam an en reng laiin mi pahnih, puan var sinin, an kiangah an lo ding a;
1:11 chu mite chuan, “Galili rama mite u, engati nge van lam ena in din reng? He Isua in hnen ata vana hruai chhohva a awm hi, vana a chho in hmu ang bawk hian amah ngei hi a lo kal leh ang,” an ti a.
1:12 Tin, Olivet tlang an tih ata chu Jerusalem khuaah an kir leh ta a; chu mi tlang chu Jerusalem khaw kiang a ni a, Chawlhnia kalna tawk chauh a ni.
1:13 Tin, an luhin, an awmna pindan chungnungah chuan an chho va – Petera leh Johana nen, Jakoba leh Andria nen, Philipa leh Thoma nen, Bartholomaia leh Matthaia nen, Alphaia fapa Jakoba leh Simona, Zelot pawla mi leh, Jakoba fa Juda nen an ni.
1:14 Chungho zawng zawng chu hmeichhia tute emaw leh Isua nu Mari nen, Isua unaute nen, rilru hmunkhata thahnemngai taka tawngtaiin an awm reng a.
1:15 Tin, chung ni chuan unaute zingah Petera a ding a, an za chuan za leh sawmhnih lai an ni a,
1:16 “Unaute u, Thlarau Thianghlimin, Davida kaa, Isua mantute hruaitu Juda thu a sawi lawk kha, kha Pathian Lehkha Thu kha lo thleng reng tur a ni.
1:17 Ani chu kan zinga chhiar tel a ni a, heng rawngbawlah hian chan pawh a nei ve si a.
1:18 (Tin, chu mi chuan a sual manin hmun pakhat a lei a, a bawkkhupin a tla a, a laiah a puak keh a, a ril zawng zawng a chhuak vek a.
1:19 Tin, chung thu chu Jerusalem khuaa awmte zawng zawngin an lo hria a; chutichuan chu hmun chu, anmahni tawngin, ‘Akeldama’ an ti a, chu chu ‘Thisen Hmun’ tihna a ni,)
1:20 Fakna Hla Bu-ah heng thu hi ziak a ni:‘A awmna tihramin awm rawh se, A chhungah tumah awm suh se,’ tih leh, ‘A hotu nihna chu mi dangin chang rawh se,’tih hi.
1:21 ,22 Chutichuan Lal Isua kan zinga lut thin chhuak thina a awm chhung zawnga – Johana baptisma achin, kan hnen ata vana hruai chhohva a awm ni thleng khan – heng min pawl thinte zingah hian mi pakhat a thawhlehna min hriatpuitu atan a awm tur a ni,” a ti a.
1:22 ,21 Chutichuan Lal Isua kan zinga lut thin chhuak thina a awm chhung zawnga – Johana baptisma achin, kan hnen ata vana hruai chhohva a awm ni thleng khan – heng min pawl thinte zingah hian mi pakhat a thawhlehna min hriatpuitu atan a awm tur a ni,” a ti a.
1:23 Tin, mi pahnih an ruat a, pakhat chu Josefa Barsaba an tiha chu, (a hming dang Justa an ti bawk a,) tin, pakhat chu Matthia a ni a.
1:24 ,25 Tin, an tawngtai a, “Nang, Lalpa, mihring zawng zawng rilru hretu, Juda chuan ama awmnaa kal turin heng rawngbawl leh tirhkoh hna a tlawmsan hi, a ai awh turin he mite pahnih hi a tu zawk nge i thlan min hriattir ang che,” an ti a.
1:25 ,24 Tin, an tawngtai a, “Nang, Lalpa, mihring zawng zawng rilru hretu, Juda chuan ama awmnaa kal turin heng rawngbawl leh tirhkoh hna a tlawmsan hi, a ai awh turin he mite pahnih hi a tu zawk nge i thlan min hriattir ang che,” an ti a.
1:26 Tin, ai an ensak a, an ai en chu Matthia chungah a lo tlu a; tichuan ani chu tirhkoh sawm leh pakhatte zingah chuan chhiar tel a ni ta a.
2:1 Tin, Pentikost ni a lo thlenin, an zain hmun khatah an awm khawm vek a.
2:2 Tin, thawklehkhatan van ata ri, thlipui tleh angin a lo thleng ta phut a. Tin, chu chuan an thutna in chu a tikhat ta vek a,
2:3 tin, leite te, amaha insem darhin, mei angin an hnenah a lo inlar ta a. Tin, an chungah chuang theuh va,
2:4 an zain Thlarau Thianghlimin an khat ta vek a, Thlarauvin a tawngtir ang zelin
2:5 Tin, van hnuaia hnam tin zing ata Pathian ngaihsak Judate Jerusalem khuaah an cham a.
2:6 Tin, chu ri chu an hriat veleh mipui an rawn inkhawm a, mi tinin an tawng chu mahni tawng theuhvin an lo hriat avangin an rilruin an lo buai a.
2:7 Tin, an za chuan an mangang a, mak an ti hle a, “En teh u, henga twngte zawng zawng hi Galili rama mi an ni lo vem ni?
2:8 Engtin nge kan zaa kan tawng pianpui anga kan hriat theuh?
2:9 Thenkhat Parthai hnam te, Medai hnam te, Elamitai hnam te kan ni a; thenkhat Mesopotamia rama awm te, Judai rama awm te, Kappadokia rama awm te, Ponto rama awm te, Asia rama awm te,
2:10 Phrugia rama awm te, Pamphulia rama awm te, Aigupta rama awm te, Kurini khaw kiang vela Libua rama awm te kan ni a; thenkhat Rom khaw khual – Judate leh an saphunte nen – kan ni a,
2:11 thenkhat Krit thliarkara mi leh Arab rama mi kan ni si a; nimahsela Pathian thiltih ropuite an sawi, mahni tawng theuhvin kan hriat si hi!” an ti a.
2:12 Tin, an za chuan mak an ti hle mai a, a ngaihna an hre lo va, “Heng hi engtizia nge ni?” an inti a.
2:13 Thenkhatin an nuihsan a, “Uain thar an rui a nih hi,” an ti a.
2:14 Nimahsela Petera chu sawm leh pakhatte nen an ding za a, ani chuan aw ring takin an hnenah a sawi a, “Nangni Judai rama mite u, nangni Jerusalem khuaa awm zawng zawngte u, heng hi hria ula, ka thu pawh ngai rawh u.
2:15 Hengho hi in rin angin an rui lo ve, fehrehsan lai chauh a nih hi.
2:16 Heng hi zawlnei Joelan a sawi kha a ni zawk:
2:17 Pathianin, ‘Ni hnuhnungahte chuan heti hi a ni ang a, Mi zawng zawng chungah ka Thlarau ka leih ang a;Tichuan in fapate, in fanuten ka thu an hril ang a; In tlangvalten inlarnate an hmu ang a, In putarten mumangah an mang ang a;
2:18 A ni, chung niahte chuan ka bawihpate, ka bawihnute chungah pawh, Ka Thlarau ka leih ang a, ka thu an hril ang,
2:19 Tin, chung lam vanah thilmak te, Hnuai lam leiah chhinchhiahna te ka hmuhtir ang a; Thisen te, mei te, meikhu hu te nen:
2:20 Ni thimah a chang ang a, Thla thisenah a chang ang a, Lalpa ni ropui tak leh hmingthang tak chu A lo thlen hmain;
2:21 Tin, heti hi a ni ang a, Tupawh Lalpa hming lam apiang chu an him ang,’ a ti e, a tih kha.
2:22 “Nangni Israel mite u, heng thu hi hre rawh u: Nazaret Isua, Pathianin amah hmangin in zingah thil ropui te, thilmak tak te, chhinchhiahna te a tih khanin a hriat chiantir che u kha; nangni ngeiin chung chu in hre si a:
2:23 kha mi kha Pathian rel tlat leh hriat lawk angin an mantir a, nangnin mi sualte kutin krawsah in khengbet a, in tihlum ta a.
2:24 Kha mi kha, Pathianin thihna phuarnate chu a phelhsak a, a kai tho ta a; amah chu thihna chelh hlen rual a nih loh avangin.
2:25 Tin, Davida chuan a thu a sawi a, ‘Ka hmaah kumkhuain Lalpa chu ka hmu thin a, Ka mangan loh nan ka ding lamah a awm a ni;
2:26 Chuvangin ka thinlung a hlim a, Ka lei pawh a lawm a; Chuvangin ka tisa pawh beisei takin a awm bawk ang.
2:27 Ka thlarau mitthi khuaah i hnutchhiah lo vang a, I mi thianghlim tawihral i phal hek lo vang a,
2:28 Nangin nunna kawngte mi hriattir a Nangin i hmelin lawmin mi tikhat ang,’tiin.
2:29 “Unaute u, chi thlahtu Davida thu hi hlau lovin in hnenah ka sawi thei e; ani zawng a thi a, phum pawh an phum tawh alawm, a thlan pawh tun thlengin kan hnenah a la awm reng a.
2:30 Ani chu zawlnei a ni a, Pathianin a thalbea mi tu emaw a thutphah chungah a thuttir dawn tih chhechhamin a sawi tih a hria a; 31tichuan chung chu a lo hriat lawk reng avangin Krista thawh leh tur thu a sawi a ni, ‘Mitthi khuaa hnutchhiahin a awm hek lo, a ruang pawh a tawih hek lo,’ tiin.
2:32 Chu Isua chu Pathianin a kai tho leh ta reng a ni, chu chu a hretu kan zain kan ni e.
2:33 Pathian kut ding lamah chawimawiin a awm a, Thlarau Thianghlim tiam chu Pa hnen ata a hmu a, in hmuh leh in hriat hi a han leih a nih hi.
2:34 Davida zawng vanah a lawn chho lo a ni, amah ngeiin, Jehovan ka Lalpa hnenah ‘Ka ding lamah thu reng rawh,
2:35 I hmelmate i kephah nghahchhana Ka siam hma loh zawng,’ a ti e, a ti zawk a nih kha.
2:36 “Chutichuan Isua in khenbeha ngei kha, Pathianin Lal leh Krista ni fawmin a siam ta tih Israel hnam tinin hre mawlh rawh se,” a ti a.
2:37 Tin, chung thu chu an hriatin an thinlunga chhun ang an lo ni ta a, Petera leh tirhkoh dangte hnenah chuan, “Unaute u, engtin nge kan tih tak ang?” an ti a.
2:38 Tin, Petera chuan an hnenah, “Sim ula, in sual ngaihdam nan Isua Krista hmingin baptisma chang theuh rawh u; tichuan Thlarau Thianghlim pek hi in hmu ang.
2:39 A tiam kha nangni tan pawh, in fate tan pawh, hla taka mi zawng zawng tan pawh, Lalpa kan Pathianin a hnena a koh apiangte tan a ni e,” a ti a.
2:40 Tin, thu dang tam takin a hrilhfiah a; “Tun lai thangthar bengtla lote lakah hian intihim rawh u,” tiin a fuih a.
2:41 Tin, a thu zawm apiangin baptisma an chang ta a; chu mi niah chuan mi sangthum lai belhchhahin an awm a.
2:42 Tin, tirhkohte zirtirin, inpawlin, chhang phelin, tawngtaiin thahnemngai takin an awm reng a.
2:43 Tin, mi tinin an hlau ta a; tirhkohte chuan thilmak leh chhinchhiahna tam tak an ti a.
2:44 Tin, a ring apiang chuan engkim an intawm hlawm a,
2:45 an rote, an sumte an hralh a, an chakkhai daih lek theuhvin an zaa hnenah chuan an sem thin a.
2:46 Tin, ni tin rilru hmun khatin Pathian biak inah chuan thahnemngai takin an awm thin a, an in lamahte pawh chhang an phel a, hlim tak leh lungawi takin an chaw an ei thin a,
2:47 Pathian an fak a, mi zawng zawng lawmzawngin an awm thin. Tin, a chhandam mek apiangte chu Lalpain ni tin an hnenah a teltir zel thin.
3:1 Tin, Petera leh Johana chu behliang mun hunin tawngtai hun lai chuan Pathian biak ina lut turin an chho va.
3:2 Tin, patling tu emaw a pian tirh ata kebai an rawn zawn a, chu mi chu biak ina lutte hnena kut dawh atan, biak in kawngkhar, Mawi an tih bulah chuan ni tin an muttir thin a ni a;
3:3 chu mi chuan Petera leh Johana Pathian biak ina lut tur chu a hmu a, kut a dawh a.
3:4 Tin, Peteran ani chu a en reng a, Johana pawhin; tin, Peteran, “Min han en rawh,” a ti a.
3:5 Tin, ani chuan an lakah engemaw hmuh a beisei a, a han en a.
3:6 Nimahsela Peteran, “Tangka leh rangkachak engmah ka nei lo; nimahsela ka neih chhun ka pe ang che: Nazaret Isua Krista hmingin kein kal tawh rawh,” a ti a.
3:7 Tin, a kut ding lam a chelh a, a kai tho ta a; tin, thawklehkhatan a kete leh a kheimit ruhte chu a lo chak ta nghal a.
3:8 Tin, ani chu a zuang tho va, a ding a, kein a kal tan ta a. Tin, kea kal kal leh, zuang zuang leh, Pathian fak chung zelin biak inah chuan a lut ve ta a.
3:9 Tin, kea a kal leh Pathian a fak chu mi zawng zawngin an hmu a;
3:10 biak in Kawngkhar Mawi bula kut dawha thu thin kha a ni tih an hria a; a chunga thil thleng chu mak an ti em em a, an buai hle mai a.
3:11 Tin, ani chuan Petera leh Johana chu a chelh reng laiin mi zawng zawngin mak an ti em em a, hulhliap, Solomona ta an tihah chuan an hnenah an lo tlan khawm a.
3:12 Tin, Peteran chu chu a hmuhin, mite chu a bia a, “Nangni Israel mite u, heng hi engati nge mak in tih? Keimahni thiltihtheihna leh Pathian kan ngaihsak avanga ani hi kan kaltir ang em chuan engati nge min en reng?
3:13 Abrahama te, Isaaka te, Jakoba te Pathian, min thlahtute Pathian chuan a Chhiahhlawh Isua a chawimawi ta a nih hi; ani chu in mantir a, Pilatan chhuah a tum pawhin a hmaah in lo duh loh kha.
3:14 Mi Thianghlim leh Fel tak kha in duh lo va, tualthattu kha in hnena pek in ngen ta zawk a.
3:15 Nunna Siamtu chu in that a; nimahsela Pathianin ani chu mitthi zing ata a kai tho leh a; chu chu a hretute kan ni e.
3:16 Tin, ama hming rin avangin a hming chuan he mi in hmuh leh in hriat hi a tichak ta a ni; a ni, amah avangin rinna lo awm hian in zaa mithmuhah a tidam ta viah a nih hi.
3:17 Nimahsela unaute u, in hotute pawhin an at avanga an tih ang khan, in at avangin heng hi in ti a ni tih ka hria e.
3:18 Nimahsela Pathianin zawlnei zawng zawng kaan, a Krista-in hrehawm a tuar tur thu a hriattir lawk kha, khati khan a thlentir ta a ni.
3:19 Chuvangin in sualte thai bo a nih theih nan sim ula, hawi kir leh rawh u, chutichuan Lalpa hnen ata harh unte a lo la thleng thei ang a,
3:20 Krista Isua, in tana a ruat pawh kha, a rawn tir thei ang;
3:21 Amaherawhchu engkim siamthat hun a thlen hma loh zawng vanin ani chu a kawl rih tur a ni; chu mi siamthat tur thu chu Pathianin leilung pian tirh ata a zawlnei thianghlim awmte kain a sawi tawh kha,
3:22 Mosia ngeiin, ‘Lal Pathianin keimah mi siam ang hian in unaute zingah zawlnei pakhat a siamsak ang che u; ani chuan thu zawng zawng in hnena a sawi apiang chu in ngaihthlaksak ang;
3:23 tin, mi tupawh, chu zawlnei thu chu ngaihthlaksak lo apiang mi zing ata tihboral daih an ni ang,’ a tih kha.
3:24 A ni, Samuela awm achin zawlnei zawng zawng, an hnunga mite nen, thu sawi apiang kha, tun lai chanchin hi an hril lawk bawk thin.
3:25 Nangni hi zawlneite leh thuthlung fate in ni asin; Pathianin Abrahama hnenah, ‘I thlah avangin khawvela hnam tin an thawveng ang,’ tiin in thlahtute hnenah a tiam kha.
3:26 Pathianin a Chhiahhlawh chu a ruat a, in sualte hawisantir theuhvin malsawmsak tur che uin, nangmahni hnenah a rawn tir hmasa ber a nih hi,” a ti a.
4:1 Tin, Petera leh Johanan mite hnena thu an sawi lai chuan, puithiamho te, biak in hotu te, 1Saddukaiho te chu an hnenah an lo thleng phut a,
4:2 mi an zirtir leh Isua avnga mitthi zing ata thawhleh thu an hrilh avngin an lungni lo em em a.
4:3 Tin, an man a, tlai lam a nih avangin atuk thlengin tan inah an khung ta a.
4:4 Nimahsela thu ngaithlahote zinga tam takin an awih a; an tam lam pawh patling hlir pawh sangnga lai an tling a.
4:5 Tin, atukah chuan an hotute, upate, lehkhaziaktute,
4:6 Puithiam lalber Ana te, Kaiapha te, Johana te, Aleksandra te, Puithiam Lalber chi zawng zawngte pawh Jerusalem khuaah an awm kham a.
4:7 Tin, Petera leh Johana chu a laiah an dintir a, “Eng tihtheihnain nge, tu hmingin nge heng hi in tih?” an ti a, an zawt a.
4:8 Tichuan Petera chu Thlarau Thianghlimin a khat a, an hnenah, “Mi zawng zawng hotute u, upate u,
4:9 mi chak lo tihthat thu-ah, ‘He mi hi eng vangin nge a lo dam tak?’ tiin vawiinah hian min chhuahchhal chuan,
4:10 nangni zawng zawngin hre rawh u, Israel mi zawng zawng pawhin hre rawh se, Nazareth Isua Krista, kraws-a in khenbeh, Pathianin mitthi zing ata a kaihthawh leh kha, amaha hming ngeiin he mi hi hetah in hmaah damin a ding ta a nih hi.
4:11 Nangni in satute u, in lung paih, a kila lung tangkai ber lo ni ta kha amah hi a ni e.
4:12 Mi dang tuma hnenah chhandamna a awm lo; van hnuaia mihring sak zingah, min chhandam tur hming dang reng a awm lo,” a ti a.
4:13 Tin, Petera leh Johana huaizia chu an hmuhin, lehkha thiam lo, mi mawl tak an ni tih an hriatin mak an ti hle a; Isua hnenah an awm tawh tih an hre ta a.
4:14 Tin, mi an tihdama chu an hnena ding an hmu a, engmah an sawisel thei si lo.
4:15 Chutichuan an rorelna ata an kal hrantir hnuin an inrawn a,
4:16 “Heng mite hi engtin nge kan tih ang? thilmak thang tak an ti tih Jerusalem khuaa awm zawng zawngin fiah takin an hriat tak hi; keini pawhin kan hnial thei si lo.
4:17 Nimahsela mi hnena a puan lehzual theih loh nan, tun achinah tu hnenah mah he hminga thu an sawi lohna turin i vau ang u,” an ti a.
4:18 Tichuan anni chu an ko va, Isua hminga thu sawi tawp loh tur leh zirtir tawp loh tur an ti tlat a.
4:19 Nimahsela Petera leh Johanan an hnenah, “Pathian mithmuhin Pathian thu zawm aiin nangni thu zawm a dik zawk emaw chu ngaihtuah rawh u.
4:20 Keini zawng thil kan hmuh leh kan hriatte kha sawi lovin kan awm thei lo,” an ti a.
4:21 Tin, anni chuan an vau lehzual a, an chhuah ta a, mipui avangin hremna remchang an hmu lo; an thiltih avang khan mi zawng zawngin Pathian an chawimawi si a.
4:22 Thilmaka an tihdama chu kum sawmli aia tam zawk mah a ni si a.
4:23 Tin, Petera leh Johana chu an chhuahin, anmahni pawlte hnenah an va kal a, puithiam lalte leh upaten an hnena an sawi apiang chu an hrilh vek a.
4:24 Chutichuan a ngaithlatute chuan arualin aw ring takin Pathian hnenah, “Lalpa, nang van te, lei te, tuifinriat te, a chhunga awmte zawng zawng Siamtu i ni;
4:25 nangin Thlarau Thianghlimin, min thlahtu i chhiahhlawh Davida kain, heng thu hi i sawi a ni: ‘Jentailte engati nge an thinur kha? Hnam tinin engati nge thil sawt lo an ngaihtuah?
4:26 Khawvel lalten an ep huai huai a, Hotute pawh an pungkhawm a, Lalpa leh a Krista chungah chuan,’ tiin.
4:27 “He khuaah hian i Chhiahhlawh thianghlim i hriak thih Isua chungah khan, Heroda leh Pontia Pilata nen, Jentailte leh Israel mite nen an pungkhawm tak zet a ni,
4:28 i kut leh i rilruin lo thleng tura a ruat lawk apiang kha ti turin.
4:29 Tichuan tunah Lalpa an mi vauziate hi ngai teh; i bawite hi huai takin i thu hriltir la,
4:30 mite tidam turin nangin i kut phar ang che; i chhiahhlawh thianghlim Isua hming avangin chhinchhiahna leh thilmak takte tihtir bawk ang che,” an ti a.
4:31 Tin, an tawngtai zawhin an awmkhawmna chu a lo nghing a, an zain Thlarau Thianghlimin an lo khat a, huai takin Pathian thu an hril ta a.
4:32 Tin, a ringtu mipuite chu rilru hmun khat leh ngaihtuah hmun khatin an awm a: an zinga pakhat mahin an sum neih, “Ka ta bik a ni,” an ti lo; thil zawng zawng an intawm zawk thin.
4:33 Tin, tirhkohte chuan awihawm takin Lal Isua thawh leh thu an hriattir thin a; an zaa chungah khawngaihna nasa tak a awm a.
4:34 Tin, an zingah pawh tlachham tumah an awm lo; ramte, inte nei apiangin an hralh a, an thil hralhte chu a man an rawn keng a,
4:35 tirhkohte ke bulah an dah thin a; an chakkhai daih tawk theuhvin an sem theuh thin a.
4:36 Tin, Josefa, tirhkohten Barnaba an tiha chu, (chu mi hming awmzia chu, “Thlamuanna Fa,” tihna a ni a,) Levia chi, Kupra thliarkara mi a ni a,
4:37 a lo neih chu hralhin a man a rawn keng a, tirhkohte ke bulah a dah ta a.
5:1 Nimahsela mi pakhat a hming Anania, a nupui Saphiri nen an awm a; Anania chuan ram a hralh a,
5:2 a nupui hriatin a man a then a zep ta a; tin, a then a rawn keng a, tirhkohte ke bulah chuan a dah a.
5:3 Nimahsela Peteran, “Anani, Thlarau Thianghlim bum tur leh, ram man a then zep turin engati nge Setanan i thinlung a tihkhah le?
5:4 A awm chhung zawng khan i ta a ni reng lo vem ni? i hralh hnu pawh khan i thu thuin a awm lo vem ni? Engti nge heng thu hi i rilrua i ngaihtuah? Mihring bum i ni lo ve, Pathian bum i ni zawk e,” a ti a.
5:5 Tin, Anania chuan chung thu chu a hriat veleh a tlu a, a thi ta a; tin a hria apiangin an hlau ta em em a.
5:6 Tin, tlangvalhote chu an tho va, an tuam a, an zawn chhuak a, an phum ta a.
5:7 Tin, darkar thum lai emaw chinah chuan a nupui chu, thil awmzia chu hre lovin a lut a.
5:8 Tin, Peteran a hnenah, “Mi hrilh rawh, ram chu heti zat chauhvin maw in hralh?” a ti a. Tin, ani chuan, “Aw, heti zat chauh hian a ni,” a ti a.
5:9 Tin, Peteran a hnenah, “Engati nge Lalpa Thlarau fiah nan in inthurual ni? Ngai teh! I pasal phumtute kephah chu kawngka bulah a lo awm ta, nang pawh an zawn chhuak ang che,” a ti a.
5:10 Tin, thawklehkhatan a ke bulah chuan a tlu ta nghal a, a thi ve ta a; tin, tlangvalhote chu an lo lut a, ani chu thiin an rawn hmu a, an zawn chhuak a, a pasal kiangah chuan an phum ta a.
5:11 Tin, kohhranhote zawng zawng leh chung thu hria apiangte chuan an hlau ta em em a.
5:12 Tin, mi zingah Pathianin tirhkohte kutin chhinchhihna leh thilmak tam tak a ti thin. Tin, anniho chu an zain rilru hmun khatin Solomona Hulhliapah chuan an inkhawm thin a.
5:13 Mi dang erawh chu tumah an zingah an tel ve ngam ta lo va; nimahsela miin anniho chu an fak si thin.
5:14 Tin, a ring tharho hmeichhia leh mipa tam takin Lalpa hnenah chuan an rawn belhchhah lehzual thin a;
5:15 chutichuan mi damlote pawh kawtthlerahte an zawn chhuak a, khumahte, awngphahahte an muttir a, Petera kal pahin a hlim talin athen azar a hliah theih nan, an ti a.
5:16 Tin, Jerusalem khaw kiang vel khua ata mipuite pawh chu damlote, ramhuai bawlhhlawh sawisakte rawn hruaiin an lo kal khawm a; chungte pawh chu an lo dam ta theuh va.
5:17 Tin, Puithiam Lalber leh a thiante zawng zawng an lo thawk a (chung a thiante chu Saddukai pawl an ni a,) an itsik em em a,
5:18 tirhkohte chu an man a, vantlang tan inah an khung ta a.
5:19 Nimahsela zanah Lalpa vantirhkoh pakhatin kawngkharte chu a rawn hawng a, a hruai chhuak a,
5:20 “Pathian biak inah va ding ula, mi hnenah heng Nunna thu zawng zawng hi va sawi rawh u,” a ti a.
5:21 Tin, chu thu chu an hriatin khawvar hun lai velin Pathian biak inah chuan an va lut a, an zirtir ta a.Nimahsela Puithiam Lalber leh a thiante chu an lo kal a, roreltuho leh Israel thlahte upaho zawng zawng an ko khawm a, tirhkohte chu rawn hruaitir turin tan inah chuan mi an tir a.
5:22 Nimahsela tiangkengtute chu an va kal a, tan inah chuan anni chu an hmu si lo; tichuan an kir leh a,
5:23 “Tan in chu him taka inkharin, a vengtute pawh kawngkhar bulah dingin kan hmu si a; nimahsela kan han hawng a, a chhungah tumah kan hmu si lo!” tiin an hrilh a.
5:24 Tin, Pathian biak in hotu leh puithiam lalten, chung thu chu an hriatin, “Heng hi eng ti takin puang ang maw?” tiin an thu-ah chuan an mangang ta em em a.
5:25 Tin, mi pakhat a lo kal a, an hnenah, “Ngai teh u, tan ina mi in khungte khan Pathian biak inah dingin mi an zirtir ka ti!” tiin a rawn hrilh a.
5:26 Tichuan hotu chu tiangkengtute nen chuan an va kal a, vantlang an hlauh avangin tlang takin an rawn hruai a, chutilochuan lunga den an hlau va.
5:27 Tin, an rawn hruai thlen chuan roreltuho hmaah chuan an dintir a. Tin, Puithiam Lalber chuan an hnenah.
5:28 “He hming hian zirtir loh tur kan tih tlat tawh che u kha; hre rawh u, in thu zirtirin Jerusalem khua in tihkhah vek tawh hi, chu mi tihhlum bul chu tumtir min tum a nih hi le,” tiin a chhal a.
5:29 Nimahsela Petera leh tirhkohte chuan “Mihring thu aiin Pathian thu kan zawm zawk tur a ni.
5:30 Nangnin Isua thingah khai kangin in tihhlum kha, min thlahtute Pathianin a kai tho leh ta a ni.
5:31 Amah ngei kha Pathianin Lalah leh Chhandamtua awm atan a ding lamah a chawimawi ta a, Israelte sual simtir tur leh ngaidam turin.
5:32 Chung thu chu a hretute kan nih hi; Thlarau Thianghlim, Pathianin a thu zawm apiangte hnena a pek kha, a hretu a ni ve bawk a,” an ti a, an chhang a.
5:33 Tin, anni chuan chung thu chu an hriatin an thin a khei ta em em a, tihhlum an tum ta a.
5:34 Nimahsela roreltute zingah chuan a hming Gamaliela, Pharisai, Dan hretu, mi zawng zawng zinga hmingthang tak mi pakhat chu a ding a, chu mite chu chhuahtir rih tur thu a pe a.
5:35 Tin, roreltute hnenah chuan “Nangni Israel mite u, he mite chunga in thil tih tum hi fimkhur rawh u.
5:36 Tun hma pawh kha, Theoda, ‘Mi lian ka ni,’ tiin a lo awm a; chu mi hnenah chuan mi tam tak, zali lai an lo pakai a; ani chu tihhlumin a awm ta a; a thu zawm apiang an zain an darh ta vek a, engmah an ni tawh lo.
5:37 Chu mi awm hnu-ah chuan hming ziak lai khan, Galili rama mi Juda kha a lo awm leh a; a hnenah mi thenkhat a hip leh a; nimahsela ani pawh chu a thi ta a, a thu zawm apiangte chu an zain an darh ta vek mai a.
5:38 Chuvangin tunah ka ti a che u, heng mite hi tawk suh ula, awm mai rawh se; heng an thiltih tum leh an thiltih hi mihring tihchhuah mai a nih chuan a boral ang;
5:39 amaherawhchu Pathian tihchhuah a nih chuan anmahni in tiboral thei lo vang; chutilochuan Pathian do in lo ni hlauh dah ang e,” a ti a.
5:40 Tin, a sawi chu rem an ti ta a; tichuan tirhkohte chu an ko va, an vel a; an velh zawhin, Isua hminga thu sawi loh tur ti tlatin an thlah ta a.
5:41 Chutichuan roreltute zing ata an kal chhuak a, chu Hming avang chuan mualpho tuar tlaka ruat an nih avangin an lawm hle a.
5:42 Tin, ni tin Pathian biak inah leh anmahni inahte, “Isua chu Krista a ni,” tiin zirtir leh hrilh an bang chuang lo.
6:1 Tin, chung laia zirtirho an pun an pun lai chuan, an ni tin thil semah anmahni hmeithaite an ngaihsak thin loh avangin Grik Judate chu Hebraite chungah an lo phunnawi ta a.
6:2 Tin, sawm leh pahnihte chuan zirtir mipuite chu an ko va, “Pathian thu hril bansanin, dawhkanahte rawng kan bawl chuan a tha lo vang.
6:3 Chutichuan unaute u, in zingah Thlarau leh fina khat mi hmingtha hlir pasarih thlang rawh u, anni chu heng thil reltu atan hian kan siam ang;
6:4 keini erawh chu tawngtai leh thu rawngbawlin kan awm leh tlat zel ang,” an ti a.
6:5 Chung thu chuan mipui zawng zawng chu a tilawm a; tichuan Stephana, rinna leh Thlarau Thianghlima khat nen, Philipa nen, Prokora nen, Nikanora nen, Timona nen, Parmena nen, Nikola, Judate saphun Antiokei khuaa mi nen an thlang a;
6:6 chu mite chu tirhkohte hmaah an dintir a; tin, anni chuan an tawngtai a, an chungah an kut an nghat a.
6:7 Tin, Pathian thu chu a lo darh a; Jerusalem khuaah zirtirteho an pung ta em em a; puithiamte zingah pawh mi tam takin rinna chu an awih ta a.
6:8 Tin, Stephana chu ngilneihna leh thiltihtheihnain a khat a, mi zingah thilmak leh chhinchhiahna ropui tak a ti thin a.
6:9 Nimahsela Sal Chhuakho te, Kurini khuaa mi te, Aleksandria khuaa mi te inkhawmna an tiha mi, mi thenkhat leh Kiliki rama mi te, Asia rama mi te inkhawmnaa mi, mi thenkhatte chu an lo thawk a, Stephana chu an rawn hnial a.
6:10 Nimahsela a finna leh a sawipuitu Thlarau chu an letthla thei ta lo va.
6:11 Tin, mite an tham a; chu mite chuan, “Mosia leh Pathian a sawichhiat kan hria,” an ti a.
6:12 Tin, mite, upate, lehkhaziaktute an fuihpawrh a, Stephana an bei a, an man a, roreltute hnenah an hruai a;
6:13 tin, hretu derte an siam a, chu mite chuan, “He mi hian he in Thianghlim leh Dan hi a sawichhe fo thin a;
6:14 he Nazaret Isua hian he in hi a thiat ang a, Mosia dan min pekte kha a tidanglam dawn tih a sawi kan hria,” an ti a.
6:15 Tin, roreltuho thute zawng zawng chuan Stephana an en reng a, a hmel chu vantirhkoh hmel angin an hmu a.
7:1 Tin, Puithiam Lalber chuan, “Heng thu hi a dik em?” a ti a.
7:2 Tin, Stephana chuan, “Unaute u, pate u, ngai teh u, min thlahtu Abrahama, Haran khuaa a awm hmaa Mesopotamia rama a awm lai khan, Ropuina Pathian chu a hnenah a rawn inlar a,
7:3 a hnenah, ‘I khaw lam leh i chiteho zing ata chhuak la, ram ka la entir tur che lamah kal rawh,’ a ti a.
7:4 Tin, ani chu Kaldaiho ram ata a kal chhuak a Haran khuaah a va awm ta a; tin, a pa a thih hnuin chuta tangin hei tuna in awmna khaw lamah hian Pathianin a pem luhtir a.
7:5 Tin, hetah hi chuan engmah hmun luah tur, a ke nghahna tham pawh a pe lo va; nimahsela amah leh a hnua a thlahte thlenga ro turin pek a tiam a, fa a la neih hma pawhin.
7:6 “Tin, Pathianin hetiangin a sawi: ‘A thlahte mi ram lamah kum zali an thang ang a, min bawihah an siam ang a, an tiduhdah bawk ang,’ tiin.
7:7 Tin, Pathian in ‘A bawihtu turte hnam chu keimahin ka la ngaihtuah ang a, tin, chu mi zawhah chuan an lo chhuak ang a, he mi hmunah hian ka rawng an la bawl ang,’ a ti bawk a.
7:8 Tin, Pathianin a hnenah serhtan thu kha a thlung a; chutichuan Abrahama chuan Isaaka a hring a, a ni riat niah a serh a tan a; tin, Isaaka chuan Jakoba a hring a, tin, Jakoba chuan chi thlahtu sawm leh pahnihte kha a hring a.
7:9 “Tin, chi thlahtute khan Josefa an itsik a, Aigupta ram lamah an hralh a; nimahsela Pathian a hnenah a awm a,
7:10 a hrehawm tuar zawng zawngah a chhan chhuak zel a, Aigupta ram lal Pharaoa pawh a khawngaihtir a, mi fing tak a ni tih a hriattir bawk a; tichuan ani chuan Aigupta ram leh a ina mi zawng zawng chungah hotuah a siam ta a.
7:11 “Tin, Aigupta leh Kanaan ram zawng zawngah chuan tam a lo tla a, hrehawm nasa tak a lo thleng ta a; min thlahtute chuan ei tur reng reng an hmu ta lo va.
7:12 Nimahsela Jakoba chuan Aigupta ramah buh a awm tih a hriat veleh min thlahtute chu a tir chhuak a; chu chu an kal tantirhna ber a ni.
7:13 Tin, an kal vawi hnihnaah chuan Josefa chu a unaute hnenah chuan a inhriattir a; tin, Josefa unaute chu Pharaoa an hriattir ta a.
7:14 Tin, Josefan a pa Jakoba leh a unau zawng zawng a kohtir a; anmahni chu sawmsarih leh panga an ni a.
7:15 Tichuan Jakoba chu Aigupta ramah a zuk kal a; tin, ani leh min thlahtute chu an thi ta a,
7:16 Sukem khua an zawn thleng a, Abrahaman Sukem khuaa Hamora fapate laka thlan a tangka suma a leiah khan an zalh ta a.
7:17 “Tin, Pathianin Abrahama hnena thu a tiam kha a thlen hun chu a lo thlen dawnin, mite chu Aigupta ramah chuan an lo pung a, an lo tam ta deuh deuh va,
7:18 Josefa hre lo lal dang a lo awm thleng khan.
7:19 Chu mi chuan kan chite a ngamthlem a, min thlahtute chu a tiduhdah a, an nausente nung lo turin a paih chhuahtir thin a.
7:20 Chu mi lai chuan Mosia a lo piang a, a hmel a tha em em mai a; a pa inah thla thum an chawm a;
7:21 tin, an paih chhuahin Pharaoa fanuin a la a, ama fa atan a chawm ta a.
7:22 “Tin, Mosia chu Aigupta rama mite finna zawng zawng an zirtir a, a thu-ah leh a thiltihah a ropui em em a.
7:23 Tin, ani chu kum sawmli a tlin dawn laiin a unau, Israela thlahte chu kan a tum a.
7:24 Tin, an zinga mi pakhat tihretheih tuar lai a hmu a, a chhan a, tihduhdah tuartu phuba chu a la a, Aigupta mi chu a tihlum ta a.
7:25 Mosia chuan ama kutin Pathianin anmahni a chhanhim tih a unauten an hria emaw a ti a, nimahsela an hre si lo.
7:26 Tin, a tukah an zinga mi pahnih an insual laiin an hnenah a lo thleng a, ‘Pute u, unau in ni alawm; engati nge dik lo taka in intih?’ tiin rem a tum a.
7:27 Nimahsela a thenawm chunga kawhmawhbawltu zawk chuan Mosia a nam kiang a, ‘Kan chungah hotuah leh roreltuah tuin nge siam che?
7:28 Nimina Aigupta mi i tihhlum ang khan mi tihhlum i tum a ni maw?’ a ti a.
7:29 Tin, chu mi thu avang chuan Mosia a tlan bo va. Midian ramah a thang reng a, chutah chuan fapa pahnih a nei a.
7:30 “Tin, kum sawmli a vei hnuin Sinai Tlang thlalerah, hnimbukah, mei alh zingah vantirhkoh pakhat a hnenah a lo inlar a.
7:31 Tin, Mosian a hmuh chuan a thil hmuh chu mak a ti em a; tin, a en tura a va hnaih laiin Lalpa awin,
7:32 ‘Kei i thlahtute Pathian ka nih hi, Abrahama Pathian, Isaaka Pathian, Jakoba Pathian chu,’ a lo ti a. Tichuan Mosia chu a khur a, a en ngam ta lo va.
7:33 Tin, Lalpa chuan a hnenah, ‘I kephah ata i pheikhawk kha phelh rawh; i dinna hmun kha lei thianghlim a ni e.
7:34 Aigupta rama ka mi awmte chu an hrehawmzia ka hmu reng asin, an rum pawh ka hre reng a, anmahni chhanhim turin ka lo chhuk ta a ni. Hawh teh, Aigupta ramah ka tir ang che,’ a ti a.
7:35 “Chu Mosia, ‘Hotu leh roreltuah tuin nge siam che?’ tia an hnar chu, hnimbuka vantirhkoh a hnena inlar khan a pui a, Pathianin amah ngei chu hotu leh chhanhimtu ni fawm turin a tir a ni.
7:36 Ani chuan Aigupta ramah te, Tuifinriat Senah te, thlalerah te chuan kum sawmli chhungin thilmak leh chhinchhiahnate a hmuhtir zet a, anmahni a hruai chhuak ta a.
7:37 “Israela thlahte hnena, ‘Pathianin keimah mi siam ang hian, in unaute zinga mi zawlnei pakhat a siamsak ang che u,’ titu kha a ni, chu Mosia chu.
7:38 Chu mi chu thlalera mi pung zinga Sinai tlanga a betu vantirhkoh hnenah leh min thlahtute hnena awm kha a ni; chu mi chu min pek chhawn tura thu nungte chu latu kha a ni;
7:39 ,40 min thlahtute chuan a thu an zawm duh lo va, an hnar a, Arona hnenah, ‘Kan hma hruai turin pathiante min siamsak rawh; he Mosia Aigupta ram ata min hruai chhuaktu lah hi a chanchin kan hre ta si lo va,’ tiin an rilrute chu Aigupta ram lamah a let leh ta a.
7:40 ,39 min thlahtute chuan a thu an zawm duh lo va, an hnar a, Arona hnenah, ‘Kan hma hruai turin pathiante min siamsak rawh; he Mosia Aigupta ram ata min hruai chhuaktu lah hi a chanchin kan hre ta si lo va,’ tiin an rilrute chu Aigupta ram lamah a let leh ta a.
7:41 Tin, chung lai chuan sebawng no lem an siam a, a lem chu ran talhin an bia a, anmahni kut chhuak chungah chuan an hlim ta a.
7:42 Chutichuan Pathianin a hawisan a, vana arsiho chibai an buk theihna turin anmahni a ensan ta a; Zawlnei lehkhabua, ‘Israel chite u, thlalerah khan kum sawmli chhungin Sa talh leh ran talhin kei mi bia em ni?
7:43 Moloka puan in leh pathian Rephana arsi pawh chu, Chibai buk turin a lem in siamte kha, In zawn zawk thin a; Chuvangin Babulon khaw piah lamah Ka hruai bo ang che u,’ tih ziak ang kha.
7:44 “A lem a hmuh anga siam tura Mosia hrilhtuin a ruat ang khan, min thlahtuten thlalerah khan hriattirna puan in chu an nei a.
7:45 Chu bawk chu min thlahtute thleh leh pawhin an nei chhawng zel a, Pathianin min thlahtute hmaa Jentail a hnawh chhuahteho ram an luah lai khan Josua luh rualin an luhpui a; Davida lo awm thleng khan chutah chuan a awm ta reng a.
7:46 Chu Davida chu Pathian mithmuhin duhsak tlakin a awm a, Jakoba Pathian tan awmna siamsak a dil a.
7:47 Nimahsela Solomonan in chu a saksak ta zawk a ni.
7:48 Nimahsela Chungnungbera chu kuta sak inahte a awm ngai lo; zawlnei chuan:
7:49 Lalpain, ‘Van ka thutphah a ni a, Lei ka kephah nghahchhan a ni: In eng angin nge mi saksak ang? Ka chawlhna hmun pawh engnge ni?
7:50 Keima kutin heng thil engkim hi ka siam lo vem ni?’ a ti e, tia a sawi ang khan.
7:51 “Mi tihmawh, thinlung leh beng tan lohte u, kumkhuain Thlarau Thianghlim in dodal fo ve; in thlahtute tih ang zel khan in ti thin.
7:52 In thlahtuten zawlneite zingah tunge an tihduhdah loh ni? Mi Fel tak lo kal tur thu hril lawktute kha an tihlum a; chu Mi Takzet chu mantirtu leh thattute nangmahni hi tunah in ni asin –
7:53 Dan, vantirhkohte pek chhawn kha, hmu zeta zawm si lote u!” a ti a.
7:54 Tin, chung thu chu an hriatin an thin a khei ta a, Stephana chungah chuan an ha an thial a.
7:55 Nimahsela ani chu Thlarau Thianghlima khat a ni a, van lam a en tlat a, Pathian ropuizia leh Pathian ding lama Isua ding a hmu a;
7:56 “Ngai teh u, van inhawngte ka hmu a, Pathian ding lama Mihring Fapa ding pawh ka hmu,” a ti a.
7:57 Chutichuan anni chu aw ring takin an au va, an beng an hup a, rual takin an bei chiam a,
7:58 khua ata chu an hnawt chhuak a, lungin an deng a, a hretute chuan tlangval pakhat a hming Saula ke bulah chuan an puante an dah hlawm a.
7:59 Chutichuan Stephanan “Lal Isu, ka thlarau la ang che,” tia Lalpa a koh laiin lungin an deng ruih ruih a.
7:60 Tin, a thingthi a, aw ring takin a au va, “Lalpa, hei an thil tihsual hi an chungah mawh phurhtir suh ang che,” a ti a. Tin, chu thu chu a sawi zawh veleh a muhil ta a. Saula pawh chuan a thih chu a remti a.
8:1 Tin, chu mi ni chuan kohhran, Jerusalem khuaa awmhote chu nasa takin an tiduhdah tan ta a; tichuan tirhkohte chauh lo chu Judai leh Samari ram khaw tinah an darh ta vek a.
8:2 Tin, Pathian ngaihsak tuten emaw Stephana chu an phum a, nasa takin an tah a.
8:3 Saula erawh chuan kohhranhote a tiduhdah em em a, in tinah a lut a, ahmei apain a hnuk chhuak a, tan inah a khung thin.
8:4 Tin, a darhte chu khaw tinah an kal a, thu chu an hril zel a.
8:5 Tin, Philipa chu Samari khuaah a zuk kal a, an hnenah Krista thu a tlangaupui a.
8:6 ,7 Tin, ramhuai bawlhhlawhte chu mi tam tak an manate kawchhung ata aw ring taka auva an chhuah avang leh zeng leh kebai tam takte pawh an lo dam tak avangin, mipuiten a thu an hriata a thilmak tithe an hmuhin, Philipa thusawi chu rilru hmunkhatin an ngaihsak a,
8:7 ,6 Tin, ramhuai bawlhhlawhte chu mi tam tak an manate kawchhung ata aw ring taka auva an chhuah avang leh zeng leh kebai tam takte pawh an lo dam tak avangin, mipuiten a thu an hriata a thilmak tithe an hmuhin, Philipa thusawi chu rilru hmunkhatin an ngaihsak a,
8:8 Tin, chu mi khuaah chuan nasa takin an lawm ta a.
8:9 Tin, a hming Simona, mi pakhat a awm a; ani chuan, “Mi lian ka ni,” tiin hmanah chu mi khuaah chuan dawi hmangin Samari khuaa mite mak ti takin a siam thin a;
8:10 mi zawng zawng chuan mi chhe ber atangin lal ber thlengin, “He mi hi Pathian thiltihtheihna, Ropui an tih kha, a nih hi,” tiin a thu an ngaihsak hlawm thin a.
8:11 A dawi hmangin rei tak mak ti taka a siam thin avangin a thu an ngaihsak thin a ni.
8:12 Nimahsela anni chuan Pathian ram chanchin tha leh Isua Krista hming chanchin tha Philipa hrilh chu an awih veleh ahmei apain baptisma an chang ta a.
8:13 Tin, Simona meuh pawhin a awih ve ta a; tin, baptisma a chan zawhin Philipa hnenah a awm reng a, chhinchhiahna leh thilmak nasa tak tithe a hmu a, mak a ti hle mai thin a.
8:14 Tin, tirhkoh Jerusalem khuaa awmte khan Samari khuaa mitten Pathian thu an awih tih an hriatin, an hnenah Petera leh Johana chu an tir a;
8:15 chu mite chu an zuk thlen chuan Thlarau Thianghlim an hmuh theih nan an tawngtaisak a.
8:16 Chu mi hma chuan an zingah tuma chungah a la thleng lo; Lal Isua hmingin baptisma an chang chauh a la ni.
8:17 Tin, tirhkohte chuan an chungah an kut an nghat a, Thlarau Thianghlim an hmu ta a.
8:18 ,19 Tin, tirhkohte kut nghah avanga Thlarau Thianghlim pek a ni tih Simonan a hmuhin, “Hetiang thuneihna hi mi pe ve rawh u, tu chungah pawh kut ka nghahna apiangin Thlarau Thianghlim an hmuh ve nan,” tiin an hnenah tangka pek a tum ta a.
8:19 ,18 Tin, tirhkohte kut nghah avanga Thlarau Thianghlim pek a ni tih Simonan a hmuhin, “Hetiang thuneihna hi mi pe ve rawh u, tu chungah pawh kut ka nghahna apiangin Thlarau Thianghlim an hmuh ve nan,” tiin an hnenah tangka pek a tum ta a.
8:20 Nimahsela Peteran a hnenah, “I tangka hi i boral rualin boral ve rawh se, Pathian thilpek tangka suma lei i tum avangin.
8:21 Heng thu-ah hian i tel ve lo ve, chan pawh i nei hek lo; i rilru Pathian ngaihin a fel lo ve.
8:22 Chuvangin, i sual hi sim la, Lalpa hnenah tawngtai rawh, chutichuan i rilrua i ngaihtuah hi a ngaidam mahna che.
8:23 Awhna sual nasa tak phuarin i awm tih ka hria e,” a ti a.
8:24 Tin, Simonan, “In thil sawi hi engmah ka chunga a thlen loh nan nangnin Lalpa hnenah mi tawngtaisak rawh u,” a ti a, a chhang a.
8:25 Chutichuan anni chuan Lalpa thu chu an hriattira an sawi zawhin, Jerusalem khuaah an haw leh a; Samari rama mite khaw tam tak hnenah Chanchin Tha chu an hril zel a.
8:26 Tin, Lalpa vantirhkoh pakhatin Philipa chu a bia a, “Tho la, chhim lama Jerusalem khua atanga Gaza khaw zuk chhun kawngah khan kal rawh; chu mi kawng chu thlalerah a kal tlang a ni,” a ti a.
8:27 Tichuan a tho va, a kal ta a.Tin, ngai teh, Ethiopia rama mi pakhat, Ethiopia lalnu Kandaki hnuaia mi tilreh lal tak, a ro zawng zawng enkawltu, Jerusalem khuaah Pathian be turin a han kal a;
8:28 a haw lam chuan a tawlailira thu chungin zawlnei Isaia lehkhabu a chhiar zel a.
8:29 Tin, Thlarau chuan Philipa hnenah, “Saw tawlailir saw va hnaih la, va pawl rawh,” a ti a.
8:30 Tin, Philipa chu mi tilreh hnenah chuan a va tlan a, zawlnei Isaia lehkhabu a chhiar a hria a, “I chhiar kha a awmzia i hria em?” a ti a.
8:31 Tin, ani chuan, “Tuma mi hrilhfiah lohvin engtin nge ka hriat thei ang?” a ti a. Tin, a hnena thu chhuak turin Philipa chu a sawm ta a.
8:32 Tin, Pathian Lehkha a chhiar lai chu hei hi a ni: “Talh turin beram angin ani chu an hruai a; Beram no a hmul mettu hmaa a ngawi reng angin Ani pawhin a ka a ang lo;
8:33 A tlawm laiin a chungah thu rel an phal lo; A thlahte chanchin tuin nge la hril ang? Khawvel atangin a nun an laksak si a,” tih hi.
8:34 Tin, mi tilreh chuan Philipa a bia a, a hnenah, “Zawlneiin heng thu hi tu thu nge a sawi, ama thu nge mi dang thu? ka zawt a che,” a ti a.
8:35 Tin, Philipa chuan a sawi a, chu Pathian Lehkha thu chu a bulah a tan a, a hnenah Isua thu a hrilh a.
8:36 Tin, kalkawnga an kal laiin tui eng emaw an thleng a; tin, mi tilreh chuan, “En teh, heta hi tui a awm, baptisma channa tur engin nge mi dal kher?” a ti a.
8:38 Tin, tawlailir chu a dintir a, an pahnihin, Philipa leh mi tilreh chu tuiah chuan an zuk kal dun a; tin, Philipa chuan ani chu a baptis ta a.
8:39 Tin, tui ata an chhuah chhoh veleh Lalpa Thlarau chuan Philipa chu a la bo ta a; tin, mi tilreh chuan ani chu a hmu leh ta lo, hlim taka a kal tak zel avangin.
8:40 Nimahsela Philipa chu miin Azota khuaah an hmu leh ta a; tin, a kal tlang a, Kaisari khaw thlengin khaw tinah Chanchin Tha chu a hril zel a.
9:1 Saula erawh chuan Lalpa zirtirho a vau thu leh thah a tum thu a la chhak chhuak ta cheu va, Puithiam Lalber hnenah a kal a,
9:2 Damaska khuaa inkhawmna in zawng zawnga mite hnena pek turin lehkhate a dil a, Kawnga mi chu tupawh a hmuh chuan hmeichhia pawh, mipa pawh, Jerusalem khuaah phuar chunga a rawn hruai theihna turin.
9:3 Tin, a kal laiin, Damaska khua a thlen dawnin, thawklehkhatan eng, van ata a velin a lo eng ta phut a; tin, leiah a tlu a, a hnenah, “Saula, Saula, nangin engati nge mi tihduhdah hi?” tiin aw a hria a.
9:5 Tin, ani chuan, “Lalpa, tunge i nih?” a ti a. Tin, Lalpa chuan, “Isua, i tihduhdah hi ka ni e;
9:6 nimahsela tho la, khua-ah lut rawh, tichuan i tihtur an lo hrilh ang che,” a ti a.
9:7 Tin, a hnena kal vete chu dang rengin an ding a, aw zawng an hre na a, nimahsela tumah an hmu si lo va.
9:8 Tin, Saula chu lei ata chu a tho va; tin, a han meng a, engmah a hmu thei ta lo va; tichuan a kutah an kai a, Damaska khuaah an hruai lut a.
9:9 Tin, ni thum khaw hmu lovin a awm a, engmah a eiin a in lo va.
9:10 Tin, Damaska khuaah chuan a hming Anania zirtir pakhat a awm. Tin, Lalpa chuan mumang angin a hnenah, “Anani” a ti a. Tin, ani chuan, “En teh, Lalpa, heta hi ka awm,” a ti a.
9:11 Tin, Lalpa chuan a hnenah, “Tho la, kawtthler, Ngil an tihah chuan kal la, Juda inah, Tarsa khuaa mi, a hming Saula zawt chhuak rawh; ngai teh, a tawngtai mek a ni a;
9:12 a hming Anania mi pakhat luta a mit tivar turin a chungah kut nghatin a hmu tawh e,” a ti a.
9:13 Tin, Anania chuan, “Lalpa, chu mi chu Jerusalem khuaa i mi thianghlimte chunga a tihsual tamzia thu mi tam tak kaah ka hria a ni!
9:14 tin, hetah pawh i hming lam apiang phuarna turin puithiam lalte hnen ata thu a hmu reng asin,” a ti a, a chhang a.
9:15 Nimahsela Lalpa chuan a hnenah, “Kal mai rawh; Jentailte, lalte, Israela thlahte hnena ka hming put luh nana ka bel ruat a ni alawm;
9:16 ka hming avangin hrehawm engtia nasa nge a tuar tur amah ka la hriattir dawn a ni,” a ti a.
9:17 Tin, Anania chu a va kal a, inah a lut a; tin, a chungah a kut a nghat a, “Ka nau Saul, i mit varna tur leh, Thlarau Thianghlim khata i awm theih nan, Lalpa, i lo kalna kawnga i hnena inlar Isua khan mi rawn tir a ni,” a ti a.
9:18 Tin, thawklehkhatan a mit ata phuhlip ang a tla ta nghal a, a mit a var leh ta a; tin, a tho va, baptisma a chang ta a.
9:19 Tin, chaw a ei a, a harh leh ta a.Tin, Damaska khuaa zirtirho awmte hnenah chuan ni engzat emaw lai a awm a.
9:20 Inkhawmna inahte chuan Isua chu Pathian Fapa a nihzia thu a tlangaupui ta nghal a.
9:21 Tin, a thu hretu zawng zawng chuan mak an ti hle a, “He mi hi Jerusalem khuaa he hming lamtute tiduhdah thin kha a ni lo vem ni? Chung mite chu puithiam lalte hnena phuar chunga hruai, a rawn kalchhan a nih kha,” an ti a.
9:22 Saula erawh chu a lo chak lehzual a, chu mi chu Krista a ni tak zet tih a hrilhfiah a, Damaska khuaa Juda awmte chu a tidang hiau thin a.
9:23 Tin, ni rei tak hnuah chuan Saula tihlum turin Judate chu an inrawn a;
9:24 nimahsela ani chuan an phiar chu a lo hre ta a. Tin, tihlum turin kulh kawngka tinah chuan achhun azanin an chang thin a.
9:25 Nimahsela a zirtirten ani chu an hruai a, zanah kulh tukverhah bawmin an thlak thla ta a.
9:26 Tin, Saula chuan Jerusalem khua a thlen veleh zirtirhote chu pawl a tum a; anni erawh chuan an zain ani chu an hlau va, zirtir a ni ve tih an ring lo va.
9:27 Barnaba erawh chuan ani chu a hruai a, tirhkohte hnenah chuan a rawn kalpui a, kalkawngah Lalpa a hmuha a biakzia te, Damaska khuaa Isua hminga huai taka thu a hrilzia te pawh chu an hnenah a sawi ta a.
9:28 Chutichuan Saula chu Jerusalem khuaah chuan an hnenah lut thin chhuak thinin a awm ta a,
9:29 Lalpa hmingin huai takin thu a hril thin a. Tin, Grik Judate hnenah thu a sawi a, a hnial a; anni erawh chuan ani chu tihhlum an tum a.
9:30 Tin, unaute chuan chu chu an hriatin Kaisari khuaah an hruai chhuk a, Tarsa khuaah an tir ta daih a.
9:31 Chutichuan kohhranhote chu Judai ram velah te, Galili ram velah te, Samari ram velah te chuan an nghet deuh deuh va, muang takin an awm ta a; tin, Lalpa tih dekin, Thlarau Thianghlim thlamuanin an awm a, an lo pung ta telh telh a.
9:32 Tin, Peteran khawvel a fan pahin Ludda khuaa mi thianghlim awmte hnenah a zuk kal bawk a.
9:33 Chutah chuan mi pakhat a hming Ainia, a zen avanga kum riat khuma mu reng a hmu a.
9:34 Tin, Petera chuan a hnenah, “Aini, Isua Krista chuan a tidam a che; tho la, i awngphah zial rawh,” a ti a. Tichuan a tho ta nghal a.
9:35 Tin, Ludda khua leh Saron phaia awmte zawng zawng chuan Ainia chu an hmu a, Lalpa lam an hawi ta hlawm a.
9:36 Tin, Joppa khuaah a hming Tabithi zirtir pakhat a awm a, (A Greek hming chu Dorki a ni a, ‘sazuk la’ tihna a ni.) chu hmeichhia chuan thil tihthat leh thilpek a ngah hle a.
9:37 Tin, chung lai chuan a dam lo va, a thi ta a; tin, an bualfai a, pindan chungnungah an zalh a.
9:38 Tin, Ludda khua chu Joppa khaw kiang a nih avangin zirtirteho chuan Petera chutah chuan a awm tih an hria a, “Rei rial lovin kan hnenah lo kal ang che,” tia ngen chiam turin a hnenah mi pahnih an tir a.
9:39 Tin, Petera chu a tho va, an hnenah a kal ve ta a. Tin, a thlen veleh pindan chungnungah chuan an hruai a; hmeithai zawng zawng chu a kianga dingin Dorki an hnena a awm laia a kawr siam te, a puan siamte entir chungin an tap hlawm a.
9:40 Nimahsela Petera chuan an zain a chhuahtir vek a, a thingthi a, a tawngtai ta a; tin, a ruang lam a hawi a, “Tabith, tho rawh,” a ti a. Tichuan a mit a han meng a, Petera chu a hmuh veleh a thu ta hlawl a.
9:41 Tin, Petera chuan a kut a pe a, a kai tho ta a; tin, mi thianghlimte leh hmeithaite chu a ko va, damin a kawhhmuh a.
9:42 Tin, chu chu Joppa khua zawng zawng chuan an hre ta vek a; mi tam takin Lalpa chu an ring ta a.
9:43 Tin, Petera chu ni tam tak Joppa khuaah Simona, savun siamtu inah a cham reng a.
10:1 Tin, Kaisari khuaah a hming Kornelia mi pakhat a awm a, Itali pawl an tih, chu mi pawla sipai za hotu a ni a,
10:2 Pathian ngaihsak mi a ni a, a chhungte zawng zawng nen Pathian an tih thin a, mite hnenah thil tam tak a pe thin a, Pathian hnenah pawh a tawngtai fo va.
10:3 Chu mi chuan behliang mun hun lai velah mumang angin fiah takin Pathian vantirhkoh pakhat a hnenah luta, “Korneli,” tiin a hmu a.
10:4 Tin, Kornelia chuan ani chu a lo en reng a, a hlau va, “Lalpa, engnge ni?” a ti a. Tin, ani chuan a hnenah, “I tawngtainate leh i thilpek thute kha hriat reng turin Pathian hmaah a thleng chho ta a.
10:5 Tunah Joppa khuaah mite tir la mi pakhat Simona, Petera an tiha chu, han hruaitir rawh;
10:6 savun siamtu Simona hnenah a thleng a ni, a in chu tuifinriat kamah a awm,” a ti a.
10:7 Tin, vantirhkoh a betu chu a kal veleh, Kornelia chuan a chhiahhlawhte zinga mi pahnih leh a rawngbawl fote zinga Pathian ngaihsak sipai pakhat a ko va;
10:8 tin, thu zawng zawng chu an hnenah a hrilh zawhin Joppa khuaah chuan a tir ta a.
10:9 Tin, atukah an kal laia khaw kiang an thlen dawnin, Petera chu tawngtai turin chawfak hun laiin, in chungah a lawn chho va;
10:10 tin, a ril a lo tam a, chaw ei a duh ta a; nimahsela ei tur an siam lai chuan englovin a zel ta a.
10:11 Tin, van inhawngin englo bawm, puan lian tak ang, a kil lia hlina leia uai thlain a hmu a;
10:12 chu mi chhungah chuan fuliafa leh rannung leh chungleng sava tinrengte an awm a.
10:13 Tin, a hnenah awin, “Peter, tho rawh; talh la, ei rawh,” a rawn ti a.
10:14 Nimahsela Petera chuan, “Lalpa, ni lo ve; thiang lo leh bawlhhlawh engmah reng ka ei ngai lo ve,” a ti a.
10:15 Tin, aw chuan a vawi hnihnaah, “Pathianin a tihthiaghlim tawh chu nangin thiang lo ti suh,” a ti a.
10:16 Chutiang hlirin vawi thum a lo awm a: tin, bawm chu vana khai chhohvin a awm leh ta nghal a.
10:17 Tin, Petera chuan mumang anga a hmuh chu a ngaihna hre lova a mangan laiin Kornelia mi tirhte chuan Simona in chu an lo zawt chhuak tawh a, kawngkhar bulah an lo ding a,
10:18 an au va, Simona, Petera an tiha chu, chutah chuan a thlen leh thlen loh an zawt a.
10:19 Tin, Petera chuan a mumang ang thu chu a ngaihtuah laiin Thlarauvin a hnenah, “Ngai teh, mi pathumin an zawng a che.
10:20 Chutichuan tho la, chhuk la, engmah ringhlel lovin anmahni zui rawh; anni chu ka tirh an ni e,” a ti a.
10:21 Chutichuan Petera chu, chu mite hnenah chuan a chhuk a, an hnenah, “In zawn hi ka ni e; engnge in rawn kal chhan?” a ti a.
10:22 Tin, anni chuan, “Vantirhkoh thianghlim pakhatin, Kornelia, sipai za hotu, mi fel tak, Pathian tih, Juda hnam zawng zawng zinga mi hmingtha hnenah chuan i thusawi a hriat nan, a inah nangmah ko tur chein a hrilh a ni,” an ti a.
10:23 Chutichuan mite chu a ko lut a, a riahtir ta a. Tin, atukah chuan Petera chu a tho va, an hnenah a kal a, Joppa khuaa mi unau tute emaw pawh a hnenah an kal ve a,
10:24 Tin, atuk lehah Kaisari khuaah chuan an lut ta a. Tin, Kornelia chuan a laichinte leh a thian duh berte ko khawmin, anni chu a lo nghak reng a.
10:25 Tin, Petera chu a luh dawn lai takin Kornelia chuan a lo hmuak a, a ke bulah a bawkkhup a, Pathian chibai buk angin a buk a.
10:26 Nimahsela Petera chuan ani chu a kai tho va, “Ding rawh, kei pawh mihring ka ni alawm,” a ti a.
10:27 Tin, a hnenah thusawi chungin a lut a, mi tam tak awm khawm chu a va hmu a.
10:28 Tin, an hnenah, “Juda miin hnam dang pawl leh an hnena kal a thian lohzia nangnin in hria a ni; nimahsela tumah thiang lo leh bawlhhlawh ka tih tur a ni lo tih Pathianin mi hriattir a ni.
10:29 Chuvangin mi rawn koh veleh khan hnial lovin ka lo kal ta a nih hi. Tichuan ka zawt a che u, engnge mi rawn koh chhan le?” a ti a.
10:30 Tin, Kornelia chuan, “Ni li a ni ta, tun hun ang thleng hian ka inah, behliang mun hun tawngtainaah ka tawngtai a; tin, ngai teh, mi pakhat puan eng tak sinin ka hmaah a lo ding a,
10:31 ‘Korneli, i tawngtaina kha hriatin a awm ta, mi hnena i thilpekte pawh kha Pathianin a hre reng a.
10:32 Chuvangin Joppa khuaah mi tir la, Simona, Petera an tiha chu, i hnenah ko rawh; ani chu tuifinriat kamah savun siamtu Simona inah a thleng a ni,’ a ti a.
10:33 Chuvangin i hnenah mi ka rawn tir ta nghal a ni; i lo kal hi a tha e. Chutichuan Lalpan thu a pek apiang che hre turin tunah Pathian mithmuhin kan zain hetah kan awm a nih hi,” a ti a.
10:34 Tin, Petera chuan a sawi a: “Pathianin mi duhsak bik a nei lo tih dik takin ka hria e;
10:35 nimahsela hnam tin zingah tupawh amah tiha fel taka ti apiang a lawmzawng mi an ni thin.
10:36 Ani chuan thlamuanna Chanchin Tha Isua Krista kaa hrilin, Israela thlahte hnenah thu a thawn a, (Isua chu mi zawng zawng Lal a ni a)
10:37 Johanan a tlangaupui thin baptisma zawhah khan, thu, Galili ram atanga lo thang tana Judai ram zawng zawnga thang chhuak kha, nangnin in hre bawk alawm;
10:38 Nazaret Isua chungchang thu kha, khatia Pathianin ani chu Thlarau Thianghlim leh thiltihtheihnaa a vurzia kha; ani chuan mi chunga titha leh diabola tihduhdah zawng zawng tidamin a fang vel thin a, Pathian a hnenah a awm avangin.
10:39 Judate ramah leh Jerusalem khuaa a thiltih zawng zawng hretute kan ni e; ani chu thinglerah khaiin an tihlum ta a.
10:40 Pathianin ani chu ni thum niin a kai tho leh a, fiah takin a entir a,
10:41 amaherawhchu mi zawng zawng hnenah a ni lo, Pathianin hretua a ruat lawkate hnenah chauh a ni, - keimahni, mitthi zing ata a thawh leh hnua a hnena eia barte hnenah hian.
10:42 Ani chu mitthite leh mi nungte chunga Roreltua Pathian ruat chu a ni tih, mi hnena tlangaupui leh hriattir turin Pathianin thu min pe a ni.
10:43 Tupawh amah chu ring apiang a hming avangin sualte ngaihhnathiamin an awm ang tih, heng a chanchin hi zawlnei zawng zawngin an hriattir thin kha,” a ti a.
10:44 Tin, Peteran chung thu chu a sawi lai tak chuan thu hretute zawng zawng chungah chuan Thlarau Thianghlim a lo thleng ta a.
10:45 Tin, Serhtanho zinga ringtute Petera rawn zui apiang chuan Thlarau Thianghlim pek chu Jentailte chungah pawh leih a nih avangin mak an ti hle a;
10:46 tawng hriat lohtea thu sawiin Pathian fakin an hre si a. Tin, Peteran a bia a,
10:47 “Heng mite, keimahni anga Thlarau Thianghlim hmu ve hi baptisma an chan loh nan miin tui hman an khap thei em ni?” a ti a.
10:48 Tichuan isua Krista hminga baptisma chan tur thu a pe a. Chung zawhah chuan ni engzat emaw chamah an ngen a.
11:1 Tin, Judai rama tirhkoh leh unau awmte chuan Jentailte pawhin Pathian thu an zawm tih an hre ta a.
11:2 Tichuan Petera chu Jerusalem khua a thlen chhoh veleh Serhtanhoten a hnenah,
11:3 “Serhtanlote inah i lut a, an hnenah i ei vei a,” an ti a, an kalh a.
11:4 Nimahsela Petera chuan a bul atangin indawt ziahin an hnenah a hrilhfiah a:
11:5 “Joppa khuaah tawngtaiin ka awm a; tin, englovin mi zel a, mumang angin englo bawm, puan lian tak ang, a kil lia hlina van ata uai thla ka hmu a; ka kiangah ngei mi rawn hnaih a;
11:6 tin, chu chu ka en reng a, ka ngaihtuah a, leia mi fuliafate, ram sate, rannungte leh chungleng savate ka hmu a.
11:7 Tin, awin, ‘Peter, tho rawh; talh la, ei rawh’ mi tiin ka hre bawk a.
11:8 Nimahsela keiin, ‘Lalpa, ni lo ve; thiang lo leh bawlhhlawh engmah reng ka kaah a lut ngai lo,’ ka ti a.
11:9 Nimahsela van ata aw chuan a vawi hnihnaah, ‘Pathianin a tihthianghlim tawh chu nangin thiang lo ti suh,’ tiin mi chhang a.
11:10 Chutiang hlirin vawi thum a lo awm a; tin, engkim chu vanah khai chhohvin a awm leh ta a.
11:11 Tin, ngai teh u, mi pathum Kaisari khua ata ka hnenah an rawn tir a, kan awmna kawtah chuan an lo ding reng tawh a.
11:12 “Tin, Thlarauvin tumah thlei bik lova anmahni zui turin mi tir a. Heng unau paruk pawh hian mi zui ve a, mi inah chuan kan lut a;
11:13 tin, ani chuan kan hnenah, a ina vantirhkoh ding a hmuhzia leh, vantirhkoh chuan a hnena, ‘Joppa khuaah mi tir la, Simona, Petera an tiha chu han hruaitir rawh;
11:14 ani chuan thu a hrilh ang chia, chu mi thuin nang leh i chhungte chu chhandamin in awm ang,’ a tihzia pawh min hrilh a.
11:15 Tin, thu ka sawi tirhin, Thlarau Thianghlim kan chunga a lo thlen tirh lai ang bawk khan an chungah a lo thleng ta a.
11:16 Tin, Lalpa thu, ‘Johanan tuiin mi a baptis thin kha; amaherawhchu nangni zawng Thlarau Thianghlimin baptisma in la chang ang,’ a tihziate kha ka lo hre chhuak leh ta a.
11:17 Chutichuan, Lalpa Isua Krista an rin veleh, Pathianin thilthlawnpek min pek ang kha an hnena a pek ve ahnuin kei tehlul hi Pathian hnial rual em ka nih?” a ti a.
11:18 Chung thu chu an hriatin an ngawi ta a, “Chuti a nih chuan Pathianin Jentailte pawh nung atan sim a phal ta a nih tak chu,” tiin Pathian an fak ta a.
11:19 Tin, Stephana avanga an tihduhdaha darhte kha, Phoiniki ram te, Kupra thliarkar te, Antiokei khua te thlengin an kal a, Judate hnenah chauh lo chuan tu hnenah mah thu chu an hril lo zel a.
11:20 Nimahsela an zinga a then chu Kupra thliarkar leh Kurini khuaa mite an ni a, chu mite chuan Antiokei khua chu an thlenin Grikte hnenah pawh thu an sawi a, Lalpa Isua Chanchin tha chu an hrilh ve ta a.
11:21 Tin, Lalpa kutin anmahni a tanpui a; mi tam takin an ring a, Lalpa lam chu an hawi ta hlawm a.
11:22 Tin, an chanchin thu chu Jerusalem khuaa kohhran awmte bengah chuan a lo lut ta a: chutichuan Antiokei khaw thleng chuan Barnaba chu a tir chhuak ta a.
11:23 Tin, ani chu a va thleng a, Pathian khawngaihzia chu a hmuh chuan a lawm hle a, thahnemngai taka Lalpa vuan reng turin an zain a fuih ta a.
11:24 Barnaba chu mi tha tak a ni a, Thlarau Thianghlim leh rinnaa khat a ni. Tin, mi tam takin Lalpa hnenah an tel belhchhah ta a.
11:25 Tin, Barnaba chu Saula zawng turin Tarsa khuaah a kal a;
11:26 tin, a hmuh chuan Antiokei khuaah chuan a rawn hruai a. Tin, kum khat zet kohhrante inkhawmnaah chuan an tel ve thin a, mi tam tak an zirtir bawk thin a. Antiokei khuaah chuan a ni, zirtirteho chu “Kristian” an tih hmasak ber ni.
11:27 Tin, chung lai chuan zawlnei tute emaw Jerusalem khua atangin Antiokei khuaah chuan an zuk kal a.
11:28 Tin, an zinga mi pakhat, a hming Agaba, a ding a, khawvel zawng zawngah tam nasa tak a tla dawn tih Thlarau hrilhin a hriattir a; chu tam chu Klaudia lal laiin a lo thleng ta a.
11:29 Tichuan zirtirteho chuan an theih tawk theuhvin, Judai rama unau awmte hnenah chuan chhawmdawlna tur thawn a tum a;
11:30 chu chu an ti ta ngei a, Barnaba leh Saula kutah chuan upate hnenah an thawn ta a.
12:1 Tin, chutih lai vel chuan Lal Herodan kohhrante zinga tute emaw tihduhdah tumin a kut a lek ta a.
12:2 Tin, Jakoba, Johana unau chu, khandaihin a sathlum a.
12:3 Chu chuan Judate a tilawm tih a hriatin Petera pawh chu man a tum leh zel a. (Chung nite chu chhang dawidim telh loh ni a ni.)
12:4 Tin, a man hnuah chuan tan inah a khung a, sipai pawl li, pali theuh zelin a ven chhawktir a; Kalhlen Kut zawhin mi zawng zawng hnenah hruai chhuah a tum a.
12:5 Chuvangin Petera chu tan inah chuan a awmtir rih a; nimahsela kohhranhovin ama tan, thahnemngai takin Pathian hnenah an tawngtaisak thin a.
12:6 Tin, Heroda chuan a hruai chhuah dawnin, chu mi zan takah chuan Petera chu sipai pahnih inkarah khaidiat pahnih bunin a muhil a; a vengtute pawh kawngkhar bulah an awm a, tan in chu an veng a.
12:7 Tin, ngai teh, Lalpa vantirhkoh pakhat a kiangah a lo ding a, ripah chuan eng eng emaw a lo eng a; tin, Petera nakah a beng harh a, “Tho thuai rawh,” a ti a. Tin, a khaidiatte chu a kut ata a tla ta a.
12:8 Tin, vantirhkoh chuan a hnenah, “Puan veng la, i pheikhawk bun rawh,” a ti a. Tin, ani chuan chutiangin a ti a. Tin, vantirhkoh chuan a hnenah, “I puan bat tha la, mi zui rawh,” a ti a.
12:9 Tin, Petera chu a chhuak a, a zui ta a; vantirhkoh chetzia chu atak a ni tih a hre lo va, mumanga a hmuh emaw a ti zawk a.
12:10 Tin, vengtu tawntirh leh a dawttu an pelh hnu chuan pawn chhuahna tur thir kawngkhar chu an va thleng a, chu chu an tan a inhawng chawp ta a; tin, an chhuak a, kawtthler pakhat an pel a; tin, vantirhkoh chuan a kalsan ta nghal a.
12:11 Tin, Petera chuan a harh veleh, “Lalpain a vantirhkoh a tir chhuak a, Heroda kuta mi leh Juda mite beiseina zawng zawng ata mi chhandam tih tunah dik takin ka hre ta,” a ti a.
12:12 Tin, a inngaihtuah zawhin, Johana, Marka an tih, chu mi nu Mari inah chuan a va kal a; chutah chuan tawngtaiin mi tam tak an lo awm khawm a.
12:13 Tin, sumhmun kawngkhar a kik veleh, a hming Rodi nula pakhat, chhang turin a va kal a.
12:14 Tin, Petera aw a hriat veleh a lawm avangin kawng chu hawng lovin a tlan lut leh ta zawk a, Petera kawngkhar bulah a ding tih a va hrilh a.
12:15 Nimahsela anni chuan a hnenah, “I a ta a nih hi,” an lo ti a. Ani erawh chu, “Tih tak zet a ni,” tiin a tang talh a. Tin, anni chuan, “A vantirhkoh a nih chu,” an ti a.
12:16 Nimahsela Petera chuan a kik fo va; tin, an han hawn chuan amah chu an hmu a, mak an ti hle a.
12:17 Chutichuan ani chuan an ngawihna turin kutin a zap a, Pathianin tan in ata amah a hruai chhuahziate chu a hrilh ta a. Tin, “Heng thu hi Jakoba leh unaute va hrilh rawh u,” a ti a. Tin, a chhuak a, dang lamah a kal ta a.
12:18 Tin, ni a chhuah veleh sipaihote chu, “Petera khawiahnge a awm tak?” tiin buai namenin an buai lova.
12:19 Tin, Heroda chuan a zawng a, a hmu si lo va, a vengtute chu a chhuahchhal a, tihhlum turin thu a pe ta a. Tin, Heroda chu Judai ram ata Kaisari khuaah a zuk kal a, chutah chuan a awm reng a.
12:20 Tin, Tura leh Sidon khuaa mite chungah chuan a lungni lo em em a; tin, anni chuan Blasta, lal khum vengtu chu, an thianah an siam a, thu khat vuain a hnenah an lo kal a, an khaw lamin lal khaw lama pur chaw thin an nih avangin rem an ngen a.
12:21 Tin, a ni tiam niin Heroda chuan lal puan a sin a, lalthutphahah a thu a, an hnenah thu a sawi a.
12:22 Tin, mi zawng zawng chuan, “Pathian aw a nih hi, mihring aw a ni lo ve,” an ti a, an au thin a.
12:23 Tin, ani chuan Pathian hnenah chawimawina chu a pek loh avangin Lalpa vantirhkohvin chawplehchilhin a man a, rulhutin a ei a, a thi ta a.
12:24 Pathian thu erawh chu a darh a, a pung ta zel a.
12:25 Tin, Barnaba leh Saula chuan rawng chu an bawl zawhin, Jerusalem khua ata chu an kir leh ta a, Johana, Marka an tiha chu an hnenah an hruai a.
13:1 Tin, Antiokei khuaa kohhranho awmte zingah chuan thu hriltute leh zirtirtute an awm; chung chu Barnaba te, Sumeona Nigera an tih te, Kurini khuaa mi Lukia te, lal Heroda unau tur Manaina te, Saula te an ni.
13:2 Tin, Lalpa rawng an bawl a, chaw an nghei laiin Thlarau Thianghlimin, “Barnaba leh Saula hi anmahni ka ruat chhan ti turin mi tihhransak rawh u,” a ti a.
13:3 Chutichuan chaw an ngheia an tawngtai zawh chuan an chungah kut an nghat a, an kaltir ta a.
13:4 Chutichuan Thlarau Thianghlim tirh chhuahin an kal a, Selukai khuaah an chhuk a, chuta tangin Kupra thliarkarah lawngin an kal a.
13:5 Tin, Salamis khuaa an awm laiin Juda inkhawmna inahte Pathian thu an hril thin a; Johana pawh kha an rawng bawl turin an hruai ve a.
13:6 Tin, thliarkar chu Paphos khaw thlengin an fang chhuak a, dawithiam, zawlnei der, Juda mi pakhat an hmu a, a hming chu Barisua a ni a.
13:7 Chu mi chu lal aiawhtu, Serjia-Paula, mi fing tak hnena awm a ni a. Chu lal aiawhtu chuan Barnaba leh Saula chu a ko va, Pathian thu hriat a tum a.
13:8 Nimahsela, Eluma, (Barisua hming dang awmzia hi Dawithiam a ni a,) chu mi chuan lal aiawhtu chu rin lohtir tumin anni chu a lo dodal a.
13:9 Chutichuan Saula, (Paula an tih bawk chu,) Thlarau Thianghlimin a khat a, ani chu a en reng a,
13:10 “Nang mi bum leh huatthlalak tinrenga khat pa, nang diabola fapa, nang fel tinreng malmak pa, Lalpa kawng fel takte hi tihchhiat i bang lo vang maw?
13:11 Hre rawh, tunah Lalpa kut i chungah a tla a nih hi, i mit a lo del ang a, khaw eng i hmu rih lo vang,” a ti a. Tichuan chum leh thimin amah a bawh ta nghal a, kuta kaitu tur zawngin a vak a vak a.
13:12 Tin, lal aiawhtu chuan chu thiltih chu a hmu a, Lalpa zirtir thu chu mak a ti hle a, a ring ta a.
13:13 Tin, Paula chu a hote nen chuan Paphos khua atang chuan lawngin an kal a, Pamphulia rama Perga khua an thleng a; tin, Johana khan anni chu a kalsan a, Jerusalem khuaah a kir leh ta a.
13:14 Nimahsela anni chu Perga khua ata an kal zel a, Pisidia rama Antiokei khua an thleng a; tin, Chawlhniin inkhawmna inah an lut a, an thu a.
13:15 Tin, Dan Lehkhabu leh Zawlneite Lehkhabu chhiar zawhin, inkhawmna in hotuten an hnenah mi an tir a, “Unaute u, mite fuihna thu eng emaw in neih chuan sawi rawh u,” an ti a.
13:16 Tin, Paula a ding a, kutin a zap a, a sawi a: “Israel mite leh Pathian tihtute u, ngai teh u.
13:17 Heng Israel chite Pathian hian min thlahtute a thlang a, mi Aigupta rama an thang lai khan a chawimawi a, chungnung kutin chuta tang chuan a hruai chhuak ta a.
13:18 Tin, kum sawmli lai thlalerah khan an thiltihte chu a en thei reng a.
13:19 Tin, Kanaan rama hnam sarih a tihtlawm zawh hnu khan an ram chu luah turin a pe zel a,
13:20 kum zali leh kum sawmnga chhung zawng khan. Chung hnuah chuan roreltute a pe thin a, zawlnei Samuela thleng khan.
13:21 “Tin, chu mi hnuah chuan lal an dil a; tichuan Pathianin, Saula, Kisa fa, Benjamina chia mi kha, an hnenah a pe a, kum sawmli chhung atan.
13:22 Tin, ani chu a sawm bo hnu khan an lal atan Davida a siam ta a: Pathianin chu mi thu chu hriattirin, ‘Davida, Jesaia fa, ka thinlung ang pu mi ka char ta, ani chuan ka duhzawng ang apiang a ti ang,’ a ti a.
13:23 “Chu mi thlahte zingah chuan Pathianin, thutiam ang zelin, Israelho hnenah Chhandamtu Isua a rawn thlen a:
13:24 a lo kal hmain Johanan simna baptisma thu Israel mi zawng zawng hnenah a lo hrilh te te a.
13:25 Tin, Johanan a rawngbawlna a zawh dawn lai khan, ‘Nangnin tu-ah nge mi ruat? Ani chu ka ni lo ve. Nimahsela ngai teh u, ka hnu-ah mi tu emaw a lo kal dawn a ni, kei hi zawng a kephaha pheikhawk phelh tlak pawh ka ni lo ve,’ a ti a.
13:26 “Unaute u, Abrahama thlaha fate u, in zinga Pathian tih zawng zawngte u, keimahniho hnenah hian heng chhandamna thu hi min rawn thawn chhuak a nih hi.
13:27 Jerusalem khuaa awmten an hotute nen, ani chu an hriat loh avang leh zawlneite thu, Chawlhni apianga chhiar thin kha, an hriat hek loh avangin, ani chu thiam loh chantirin, chu mi thu chu an hlen ta a.
13:28 A thihna khawp meuh a chungah engmah an hmuh loh pawhin Pilata hnenah tihhlum an ngen a.
13:29 Tin, a thu zawlneiten an ziak lawk zawng zawng kha a hlen zawhin thing ata chu an la thla a, thlanah an zalh ta a.
13:30 Nimahsela Pathianin mitthi zing ata a kai tho leh ta a;
13:31 tin, Galili ram ata Jerusalem khuaa ama ruala chho vete hnenah chuan ni rei tak chhungin a inlar thin a; chung mite chu tunah hian mi hnenah a thuhretute an ni e.
13:32 Keini pawhin thlahtute hnena thutiam kha a chanchin lawmawm kan rawn hrilh che u hi,
13:33 khatia Pathianin Isua a kaihthawhah khan, kan fate hnenah hian chung chu a hlen a ni; Sam pahnihnaah, ‘Ka Fapa i ni e, vawiinah hian ka hring a che,’ tih ziak ang bawk khan.
13:34 Tawihna hmuna kal leh lo turin Pathianin ani chu mitthi zing ata a kaihthawh turzia thu chu heti hian a sawi, ‘Davida hnenah khawngaihna ka tiam tlatte kha nangmah ka pe ang che,’ tiin.
13:35 Chuvangin Hla dangah, ‘I Mi Thianghlim chu tawihral i phal lo vang,’ a ti bawk a.
13:36 Davida zawng, Pathian rorelsak angin a dam rualpuite rawng a bawl zawhah khan a muhil a, a thlahtute hnenah an zalh a, a tawihral tawh alawm;
13:37 Pathian kaihthawh erawh kha chu a tawihral loh kha.
13:38 “Chutichuan unaute u, hre rawh u; amah avang chuan sual ngaihhnathiamna thu in hnenah hrilh a nih hi;
13:39 tupawh a ring apiang engkimah ama thiam chantirin an awm, chungah chuan Mosia danin thiam chantirin in awm thei lo ve.
13:40 Chuvangin fimkhur rawh u, chutilochuan zawlneite lehkhabua an sawi kha in chungah a lo thleng dah ang e,
13:41 ‘Hmusittute u, en rawh u, Mak ti ula, boral rawh u; In dam chhung hian thil kawng khat ka tih hi, Chu thil chu miin hrilh che u mah sela In awih tawp lo vang,’ tih kha,” a ti a.
13:42 Tin, an chhuahin Chawlhni lehah chung thu chu sawi leh atan an ngen a.
13:43 Tin, inkhawmhote chu an tin veleh Judate leh an saphun Pathian ngaihsak zinga mi tam takin Paula leh Barnaba chu an zui zel a; anni chuan an lo bia a, Pathian khawngaihnaah chuan awm reng turin an fuih a.
13:44 Tin, Chawlhni lehah chuan akhua thawin Pathian thu ngaithla turin an rawn inkhawm a.
13:45 Nimahsela Judaten mipuite chu an hmuh veleh an itsik em em mai a; Paula thusawi chu an hnial kalh a, an sawt hle a.
13:46 Tin, Paula leh Barnaba chuan huai takin an sawi chhuak a, “Pathian thu hi nangmahni hnenah sawi hmasak tur reng a ni; nimahsela in hnar kir a, chatuana nung tlak lova in inruat tak ahnuin, hre rawh u, Jentailte lam kan hawi ta ve ang.
13:47 Chutiang chuan Lalpain thu min pe a ni, ‘Jentailte tiengtuah ka ruat a che, Kawlkil thlenga Chhandamtua i awm theihna turin, tih ziak ang khan,” an ti a.
13:48 Tin, Jentailte chuan chung thu chu an hriatin an lawm a, Pathian thu an chawimawi a, tin, chatuana nung tura ruat apiang chuan an ring ta a.
13:49 Tin, Lalpa thu chu, chu mi ram khawvelah chuan a darh ta a.
13:50 Nimahsela Judate chuan hmeichhe zahawm Pathian ngaihsakte leh khuaa upahote chu an fuih a, Paula leh Barnaba chu an tihduhdahtir a, an ram ata an hnawt chhuak ta a.
13:51 Tin, anni chuan an chungah an kephaha vaivut an thing thla a, Ikonion khua an thleng a.
13:52 Tin, zirtirhote chu lawmna leh Thlarau Thianghlimin an khat hlawm a.
14:1 Tin, Ikonion khuaah chuan Judate inkhawmna inah an lut dun a, thu an sawi thin a, chutichuan Juda leh Grik tam tak pawhin an ring ta hial a.
14:2 Nimahsela ring duh lo Judaten Jentailte an fuih pawrh a, unaute chu an huattir a.
14:3 Chuvangin Lalpaah huai taka thu sawiin chutah chuan rei fe an awm a, ani chuan chhinchhiahna leh thilmakte an kuta tihtirin, a khawngaih thu a hriattir thin a.
14:4 Nimahsela khuaa mipuite chu an inkhing ta a; a thenin judate chu an tan a, a thenin tirhkohte chu an tan a.
14:5 Tin, Jentailte, Judate, an hotute nen chuan tirhkohte chu zahthlak taka siam leh lunga den tuma an beih dawn lain,
14:6 anni chuan an lo hria a, Lukaoni ram vekah chuan Lustra leh Derbe khuaahte leh a vel ramahte an tlan bo va;
14:7 chungah chuan Chanchin Tha an hril zel a.
14:8 Tin, Lustra khuaah chuan ke zeng tu emaw a thu thin a, a pian tirh ata kebai reng a ni a, kein a kal ngai lo va.
14:9 Chu mi chuan Paula thusawi a ngaithla a; tin, Paula chuan ani chu a en reng a, damna turin rin a nei tih a hria a,
14:10 aw ring takin, “I kein ding ngil rawh,” a ti a. Tin, ani chu a zuang tho va, kein a kal ta a.
14:11 Tin, mipuiten Paula thiltih chu an hmuh veleh Lukaoni tawngin, ring takin, “Pathiante chu mihring angin kan hnenah an lo chhuk ta a nih hi!” an ti a.
14:12 Tin, Barnaba chu ‘Jupita’ an ti a, Paula chu thusawitu zawk a nih avangin, ‘Merkuria’ an ti a.
14:13 Tin, Jupita, a biak in daipawna awm chu, a puithiamin sebawngpate leh pangpar thihruite, kawngkhar kiangahte a rawn la a, mipuite nen chuan biak nan talh an tum ta a.
14:14 Nimahsela tirhkoh Barnaba leh Paula chuan chu chu an hriat veleh an puan an pawt thler a, mipui zingah chuan an zuang lut a, an au va,
14:15 “Pute u, heng thil hi engah nge in tih? Keini pawh in nungchang ang pu mihring kan nih hi; heng thil lawilote hi in hawisan a, van te, lei te, tuifinriat te, an chhunga awm zawng zawng nena siamtu Pathian nung hnenah chuan in lo pakaina turin Chanchin Tha kan rawn thlen che u a nih hi.
14:16 Chu Pathian chuanhman laiin hnam tin mahni kawng theuh zawh a phal thin a,
14:17 nimahsela amah hriattirna awm lovin a insiam lo, chutin thil a ti tha thin a, van ata ruahte leh kum that kumte a pe che u a, in rilru ei tur leh lawmnain a tikhah thin che u kha,” an ti a.
14:18 Tin, chung thu chuan mipuiten anmahni biak nana ran an talh tur chu an khap zo ta hram hram a.
14:19 Nimahsela Antiokei leh Ikonion khuaa mi Juda tute emaw chutah chuan an lo kal a, mipuite chu an thlem thlu ta a; tichuan Paula chu lungin an deng a, thia an rin avangin khua ata chu an hnuk chhuak ta a.
14:20 Nimahsela zirtirhote chu a vela an din laiin, a lo tho va, khuaah chuan a lut leh ta a.
14:21 Tin, chu mi khuate hnenah chuan Chanchin Tha an hrilh a, zirtir tam tak an siamhnuin Lustra khuaah te, Ikonion khuaah te, Antiokei khuaah te an kir leh zel a,
14:22 “Hrehawm tam tak tuarin Pathian ramah kan lut tur a ni reng a ni,” tiin zirtirhote rilru an tinghet a, rinnaah chuan awm reng turin an fuih zel a.
14:23 Tin, kohhran pawl tinah chuan upate an ruatsak a, chaw nghei chunga tawngtai zawhin an rin Lalpa hnenah chuan an kawltir zel thin a.
14:24 Tin, Pisidia ram chu an fang chhuak a, Pamphulia ram chu an thleng a.
14:25 Tin, Perga khuaa thu an hril zawhin Attalia khuaah an zuk kal a;
14:26 chuta tang chuan lawngin an chhuak a, Antiokei khua chu an lo thleng leh ta a, chu chu an thil tih zawh tak chu ti tura unauten Pathian khawngaihna kawltira an chhuahna kha a ni.
14:27 Tin, an thlen hnuin kohhranhote chu an ko khawm a, Pathianin anmahni hmanga thil a tih zawng zawngte leh, Jentailte tana rinna kawngkhar a hawnsakziate chu an hrilh a.
14:28 Tin, zirtirhote hnenah chuan reife an awm ta a.
15:1 Tin, mi tte emaw Judai ram ata an lo chhuk a, “Mosia dan anga serh in tantir loh chuan chhandam in ni thei lo vang,” tiin unaute chu an zirtir a.
15:2 Chutichuan Paula leh Barnaba chu anmahni nen inhnial namena an inhnial loh va, an inkhin tlat avangin, Paula leh Barnaba chu an zinga tute emaw nen, chu thubuai chungah chuan Jerusalem khuaa tirhkohte leh upate hnenah chho turin an ruat a.
15:3 Chutichuan kohhrante chuan an han thlah a, anni chuan Jentailte hawi kir lehzia thu chu hril zelin, Phoiniki ram leh Samari ram an fang chhuak ta a; tichuan unaute zawng zawng an tilawm em em a.
15:4 Tin, Jerusalem khua chu an han thlen chuan kohhranhote, tirhkohte, upate chuan an lo lawm a, tin, Pathianin anmahni hmanga thil a tih zawng zawngte chu an hrilh a.
15:5 Nimahsela Pharisai pawla mi ring ve tute emaw an tho va, “Jentailte chu an serh tan tur a ni, Mosia dan awih pawh an hnenah tiam kher tur a ni,” an ti a.
15:6 Tin, tirhkohte leh upate chu, chu mi thu chu ngaihtuah turin an inkhawm a.
15:7 Tin, an inhnial chiam hnuin Petera a tho va, an hnenah : “Unaute u, Jentailten keima kaa Chanchin Tha thu hriaa awih tura Pathianin hmana in zing ata mi ruatzia kha in hria e.
15:8 Tin, rilru hretu Pathianin keini min pek ang bawk khan Thlarau Thianghlim an hnenah pe vein an chungah a lawm tih a hriattir a;
15:9 tin, keini leh anni thlei bik lovin rinin an rilru a tithianghlim a.
15:10 Chutichuan min thlahtu leh keini zawh tawh loh nghawngkawl kha tunah zirtirhote chunga nghah tumin engati nge Pathian fin in hnial kalh le?
15:11 Anmahni rin ang bawk hian keini pawhin Lalpa Isua khawngaihna avanga chhandam tur niin kan inring si a,” a ti a.
15:12 Tichuan mipui zawng zawng chu an ngawi reng a, Barnaba leh Paulan Pathianin anmahni hmanga Jentailte zinga chhinchhiahna leh thilmak a tih thu kha an hrilh chhung zawng an ngaithla a.
15:13 Tin, an sawi zawhin Jakoban a sawi ve thung a: “Unaute u, ka thu ngaithla rawh u,
15:14 Pathianin ama hming pu atan an zing ata mite la chhuak turin Jentailte a kan tan tirh dan thu chu Sumeona hian a sawi ta a.
15:15 Tin, chung thu leh zawlneite thu hi a inhmeh a ni:
15:16 ‘Chung zawhah chuan ka kir leh ang a, Davida bawkte chim kha ka siam leh ang a, A chhe lai apiang pawh ka rem chho leh ang;
15:17 Mi dang, Jentail zawng zawng ka hming mi tawmhote chuan, Lalpa an zawn nan Chu bawkte chu ka tungding ang’ tiin.
15:18 Khawvel siam tirh ata heng thu hriattir thintu Lalpa chuan a ti e, tih ziak hi.
15:19 “Chuvangin heti hian ka ruat a ni, Jentailte zinga Pathian lam hawite chu tihrehawm lo ila,
15:20 milem biakna thil bawlhhlawh ei te, inngaih te, sa rehhlum leh thisen eite banna turin an hnenah lehkha thawn zawk ila ka ti ber a ni.
15:21 Mosian hman lai ata tawh khaw tinah a thu tlangaupuitu a nei thin si a, inkhawmna inahte Chawlhni apiangin a thu chu chhiar a nih thin kha,” a ti a.
15:22 Tin, tirhkohte, upate, kohhran zawng zawngte nen chuan, an pawla mi thlana Paula leh Barnaba hnenah Antiokei khuaa kaltir tha an ti a; an thlante hming chu Juda (Barsaba an tih) leh Sila an ni a, chu mite chu unaute zinga hotu deuh an ni a.
15:23 Tin, hetiangin an ziak a, an kutah an thawn a. “Tirhkohte leh unaute zinga upaten Antiokei khua te, Suria ram te leh Kilikia rama Jentail unau awmte chibai an buk e.
15:24 “Kan pawl zinga mi tuten emaw thu sawiin an tibuai che u a, in rilru an timangang tih kan hria e, an hnenah thu engmah kan pe si lo va.
15:25 ,26 Chuvangin thu khat vuaa kan inkhawmin, kan duh tak Barnaba leh Paula, Lalpa Isua Krista hming avanga thih dawn lote kal rual hian mi thlante in hnena rawn kaltir ve tha kan ti a.
15:26 ,25 Chuvangin thu khat vuaa kan inkhawmin, kan duh tak Barnaba leh Paula, Lalpa Isua Krista hming avanga thih dawn lote kal rual hian mi thlante in hnena rawn kaltir ve tha kan ti a.
15:27 Chutichuan Juda leh Sila kan rawn tir a nih hi, anni pawhin heng thu bawk hi tawngkain an hrilh ang che u.
15:28 Thlarau Thianghlim leh keinin, heng thu pawimawh lo hi chu, phurrit zual in chungah nghat lo ila a tha kan ti;
15:29 milem biakna sa ei te, sa thisen ei te, sa rehhlum ei te, inngaih te bang ula kan ti; heng hi in ban chuan in tan a tha ang. Dam takin awm rawh u,” tiin.
15:30 Chutichuan an tirhin an kal a, Antiokei khua an thleng chhuk a; tin, mipui chu an ko khawm a, lehkha chu an pe a;
15:31 tin, an chhiar zawhin thlamuanna thu avang chuan an lo lawm ta hle a.
15:32 Tin, Juda leh Sila chu zawlnei an ni bawk a, thu tam takin unaute chu an thlamuan a, an tinghet a.
15:33 Tin, chutah chuan rei deuh an awm hnuin, anmahni tirtute hnena hawng leh turin unaute chuan thlamuang takin anchhuahtir leh ta a*.
15:35 Paula leh Barnaba erawh chu Antiokei khuaah chuan Lalpa thu zirtir leh hrilin an awm reng a, mi dang tam takte nen.
15:36 Tin, ni eng emaw zat hnuah chuan Paulan Barnaba hnenah, “Tunah kal leh ila, khaw tina Lalpa thu kan hrilhna apianga unau awmte kha kan zel ila, an awm dan i en ang,” a ti a.
15:37 Tin, Barnaban Johana (Marka an tih chu) an hnenah hruai a tum a,
15:38 Paula erawh chuan ani chu an hnena hruai tha a ti lo, Pamphulia ramah anmahni a kirsan a, hnathawhnaa an hnena a kal ve tak loh avang khan.
15:39 Tichuan nasa takin an lo inhnial ta a, chutichuan an inthen a, Barnaban Marka chu a hnenah a hruai a, Kupra thliarkar lamah lawngin a kal ta a.
15:40 Paula erawh chuan Sila a thlang a, unauten Lalpa khawngaihnaa an kawltir hnuin a kal chhuak ta a.
15:41 Tin, kohhran pawlte chu tinghet zelin Suria leh Kilikia ram a fang chhuak ta.
16:1 Tin, Derbe khuaah leh Lustra khuaah chuan a kal bawk a; tin, chutah chuan a hming Timothea zirtir pakhat a awm; ani chu ring ve Juda hmeichhe fapa a ni a, a pa erawh chu Grik a ni;
16:2 Lustra leh Ikonion khuaa unau awmte chuan ani chu an fak thin a.
16:3 Paulan ani chu an hnena kal veah a duh a; tichuan chu mi lama Juda awmte avang chuan a serh a tansak a, a pa chu Grik a ni tih an hre vek si a.
16:4 Tin, khaw tinah an kal pahin Jerusalem khuaa tirhkoh leh upa awmte thu rel kha zawm atan unaute hnenah an pe zel a.
16:5 Chutichuan kohhran pawlte chu rinnaah chuan an nghet ta a, ni tin an pung ta deuh deuh va.
16:6 Tin, Thlarau Thianghlimin Asia rama thu hril a khap avangin Phrugia leh Galatia ram chu an fang chhuak ta a;
16:7 tin, Musia ram kiang an thlenin Bethunia rama luh an tum a, nimahsela Isua thlarauvin a phal si lo va.
16:8 Chutichuan Musia ram chu an pel a, Troas khuaah an chhuk ta a.
16:9 Tin, zanah Paulan mumang angin Makedonia rama mi mi pakhat dingin, “Makedonia ramah lo kai la, min pui rawh,” tia ngen chiamin a hmu a.
16:10 Tin, chu mang chu a man zawh veleh Makedonia ramah chuan kal kan tum ta nghal a, an hnena Chanchin Tha hrilah Pathianin min ko tih kan hria a.
16:11 Tin, Troas khua ata lawngin kan chhuak a, tluang takin Samathraki khuaah kan kal a, atukah chuan Neapoli khuaah kan kal leh a;
16:12 tin, chuta tang chuan Philippi khuaah kan kal a, chu mi khua chu Makedonia rama khaw pakhat a ni a, chu mi bialah chuan khaw pawimawh ber a ni a, Rom khuaa mi pemte khua a ni. Chu mi khuaah chuan ni tam deuh kan cham a.
16:13 Tin, Chawlhniin kulh kawngkhar pawn lamah lui kamah tawngtaina hmun nia kanrinah chuankan kal a; tin, kan thu a, hmeichhe lo kal khawmhote hnenah chuan thu kan sawi a.
16:14 Tin, a hming Ludi, puan sen duk zuartu, Thuatira khua a mi, Pathian betu hmeichhe pakhatin kan thu a hria a, tin, Paula thusawi zawm turin Lalpa chuan a thinlung a tivar ta a.
16:15 Tin, amah leh a chhungten baptisma an chan zawhin, “Lalpa ring tak zeta mi ruat chuan ka inah lo thleng rawh u,” tiin min ngen chiam a, min chelh ta a.
16:16 Tin, tawngtaina hmunah chuan kan kal laiin, nula tu emaw ramhuai aienthiam zawlin min tawk a, ani chuan a ai en avangin a pute chu sum tam tak a hmuhtir thin a.
16:17 Chu mi chuan Paula leh keini min zui a, “Heng mi chhandamna kawng hrilhtu che u hi, Chungnungber Pathian bawih an nih hi,” tiin a au va.
16:18 Chutiang chuan ni rei tak a ti thin a. Chutichuan Paula chu a lungni ta lo va, a hawi a, ramhuai hnenah chuan, “Isua Krista hmingin a kawchhung ata chhuah thu ka pe a che,” a ti a. Tin, chutih lai tak chuan a chhuak ta nghal a.
16:19 Tin, a pute chuan an sum hmuhna a bo tih an hriatin, Paula leh Sila chu an man a, hotute hmaah dawr hmunah an hnuk lut a.
16:20 Tichuan thu reltute hnenah an hruai a, “Heng mite hi Judate an ni a, kan khua an tibuai em em a,
16:21 dan eng emaw kan lawm leh zawm thiang lote hi an hril thin a, Rom mi kan ni si a,” an ti a.
16:22 Chutichuan mipuite pawh chu tirhkohte bei turin an lo thawk ve a, thu reltute chuan an puante an phih hlihsak a, tianga vuak thu an pe a.
16:23 Tin, vawi tam tak an vuak zawhin tan inah an khung a, a vengtu hnenah him taka ven tur an ti tlat a;
16:24 chuti kauva thu an pek avangin ani chuan rip chhungnungah a khung a, an keahte chuan thing kawl a buntir tlat a.
16:25 Nimahsela zan laiah Paula leh Sila chuan Pathian hnenah an tawngtai a, hla an sa a, mi tangten an ngaithla a;
16:26 tin, thawklehkhatah lir nasa takin a lo nghing a, chutichuan tan in lungphumte lam chu a nghing a; tin, kawngkhar zawng zawng a inhawng nghal a, mi tin kawl bunte chu a lo inphelh ta vek a.
16:27 Tin, a vengtu chu a muhil a lo harh a, tan in kawngkharte chu inhawngin a hmu a, mi tangte chu an tlan bo emaw a ti a, a khandaih a phawi a, a intihhlum dawn a.
16:28 Nimahsela Paula chu aw ring takin a au va, “Engmah intih suh; kan zain hetah kan la awm vek alawm,” a ti a.
16:29 Tin, a vengtu chuan khawnvarte a lam a, a zuang lut a, hlauva khur chungin Paula leh Sila hmaah a bawkkhup a;
16:30 tin, anni chu a hruai chhuak a, “Pute u, chhandama awm turin engnge ka tih tur?” a ti a.
16:31 Tin, anni chuan, “Lalpa Isua ring la, tichuan chhandamin i awm ang, nang leh i chhungte nen,” an ti a.
16:32 Tin, a hnenah leh a ina awm zawng zawngte hnenah chuan Lalpa thu an sawi a.
16:33 Tin, chu mi zanah, chu mi lai la la chuan a hruai a, an vuakna vualte chu a silfai a; tin, ani leh a chhungte zawng zawng chuan baptisma an chang ta nghal a.
16:34 Tin, a inah a hruai chho va, ei tur a hlui a, tin, Pathian an rin avangin, ani chu a chhungte zawng zawng nen an hlim ta em em a.
16:35 Tin, ni a chhuahin, thu reltute chuan, “Kha mite kha chhuah rawh,” tiin mi mantute an tir a.
16:36 Tin, tan in vengtu chuan Paula hnenah an thu a hrilh a, “Thu reltute chuan chhuah tur che uin mi an rawn tir a ni; chuvangin tunah lo chhuak ula, thlamuang takin kal rawh u,” a ti a.
16:37 Nimahsela Paula chuan an hnenah, “Rom mi kan ni si a, kan thiam leh thiam loh hre lovin vantlang mithmuhin min vua a, tan inah min khung a; tunah hian arukin min hnawt chhuak dawn vei a ni maw? a ni tawp lo vang; anmahni ngei lo kal sela min rawn hruai chhuak rawh se,” a ti a.
16:38 Chutichuan mi mantute chuan chung thu chu thu reltute hnenah chuan an hrilh a. Tin, Rom mi an ni tih an hriat chuan an hlau ta a;
16:39 tin, an va kal a, an thlem chiam a, an hruai chhuak a, khua ata chu kal bovah an ngen a,
16:40 Tin, tan in ata chu an chhuak a, Ludi inah chuan an lut a; tin, unaute chu an hmu a, an thlamuan a, an chhuak ta a.
17:1 Tin, Amphipoli khua leh Apollonia khua an kal pel a, Thessalonika khua an thleng ta a, chutah chuan Judate inkhawmna in a awm a;
17:2 tin, Paula a dan pangngaiin an hnenah a lut a, Chawlhni vawi thum Pathian Lehkha Thu atangin khun taka chhutpuiin,
17:3 Krista chu hrehawm tuar tur reng a nihzia te, mitthi zing ata pawh tho leh tur reng a nihzia te chu a hrilhfiah a, a tilang thin a; “He Isua, a thu ka hrilh che u hi, amah hi Krista chu a ni,” a ti bawk thin a.
17:4 Tichuan an zinga thenkhat chu thlemthlukin an awm a, Paula leh Sila chu an pawl ta a; Pathian ngaihsak Grik mipui tam tak leh hmeichhe puipa tam takte nen.
17:5 Nimahsela Judaten an huphurh a; dawr hmuna mi sual thatchhia tute emaw an hnenah an hruai a, mipui an ko khawm a, khua zawng zawng chu an chawk buai a; Jasona in an rawn thawng a, vantlang hnena hruai chhuah tumin.
17:6 Tin, anni chu an hmu lo va, Jasona leh unau dang tute emaw khaw hotute hnenah an hnuk lut a, an au va, “Khawvel chawk buaitute kha hetah pawh an lo kal a,
17:7 Jasona hian a lo thleng vei a; hengho zawng zawng hi, ‘A hming Isua, lal dang a awm,’ tiin Kaisara thu kalhin an awm thin a ni,” an ti a.
17:8 Tin, mipui leh khaw hotute chuan chung thu chu an han hriat chuan an buai ta a;
17:9 tin, Jasona leh mi dangte hnen ata chu an aia hren tur englo an la a, an chhuah ta a.
17:10 Tin, unaute chuan azan azanin Paula leh Sila chu Beroia khuaah an kaltir ta nghal a; chutah an va thlen chuan Judate inkhawmna inah an lut a.
17:11 Chuta mite chu Thessalonika khuaa mi ai chuan an lo tha zawk a, chutichuan rilru lawm takin thu chu an pawm a, an thusawi chu a dik leh dik loh hriat nan ni tin Pathian Lehkhaah an zawng thin a;
17:12 Chutichuan chungho chuan mi tam takin an ring ta a; Grik hmeichhe zahawm te leh mipate pawh duaiin an ring ta lo bawk a.
17:13 Nimahsela Thessalonika khuaa Judahote chuan Paulan Beroia khuaah Pathian thu a hril tih an hriat veleh chutah pawh chuan an va kal a, mipuite an fuih pawrh a, an tibuai leh ta a.
17:14 Chutichuan unauten tuifinriat thlenga kal turin Paula chu an tir chhuak ta nghal a. Sila leh Timothea erawh chu chutah chuan an la awm reng a.
17:15 Tin, Paula hruaitute chuan Atheni khaw thlengin an hruai a; tin, Sila leh Timothea chu theihtawpa a hnena kal thuaina tur thuchah sinin an haw ta a.
17:16 Tin, Paulan Atheni khuaah anni chu a lo nghah lai chuan, khua chu Pathian lema khatin a hmu a, a rilruin a helh ta a.
17:17 Chutichuan inkhawmna inah Judate leh Pathian ngaihsakte a hnial thin a, dawr hmunah pawh chuta lo awm apiangte chu ni tin a hnial bawk thin.
17:18 Tin, Epikuria mi leh Stoik mi zinga mi fing tute emaw pawhin ani chu an rawn hnial a. A thenin, “He mi kamtam hian engnge sawi a tum?” an ti a. A thenin, (Isua thu leh Thawhlehna thu a hril avangin,) “Ram dang pathiante thu hriltu a ni awm e,” an ti a.
17:19 Tin, ani chu an chelh a, Areopagi-ah chuan an rawn hruai a, a hnenah, “He zirtirna thar i sawi thin hi min hriattir thei ang em?
17:20 Thil mak eng emaw kan bengahte i rawn thlen a ni; chutichuan heng thil awmzia hi hriat kan duh e,” an ti a.
17:21 Atheni khuaa mi zawng zawng chu, an khuaa mikhual awmte pawh, an hman chang apiangin thu thar tawh phawt chu sawiin emaw, a ngaithla talin emaw an awm chawt thin reng a ni.
17:22 Tin, Paula chu, Areopagi lai takah chuan a ding a, a sawi a. “Nangni Atheni khuaa mite u, engkimah sakhaw ngaihsak tak mi ni ni tih ka hria e.
17:23 Ka len paha in chibai bukate ka en laiin, maicham pakhat, a chungah, ‘Hriat Loh Pathian tan’ tia ziak ka hmu a ni. Chutichuan hre lova chibai in buk thina kha, chu mia thu chu ka hrilh che u a nih hi.
17:24 Pathian, khawvel leh a chhunga thil zawng zawng siamtu chu lei leh van lal a nih avangin kuta sak inahte a awm lo va;
17:25 thil tlachham angin mihring kuta rawngbawlsakin a awm hek lo, amah ngei chu engkim hnena nunnate, thawknate leh thil zawng zawngte petu a ni zawk e.
17:26 Tin, lei chung zawng zawnga awm turin bul hmun khat vekin hnam tin mi a siam a, an tan hun bite a ruat a, an awmna rite pawh a khamsak a,
17:27 Pathian an zawn a, an dap an dap a, an hmuh mial theih nan; nimahsela ani chuan min hlat lo theuh si a.
17:28 Amah avangin kan nung, kan che, kan awm a ni si a; nangmahni hlaphuahthiam tute emaw pawhin, ‘Keini pawh a thlahte kan ni si,’ tia an sawi ang khan.
17:29 Chutichuan Pathian thlahte kan nih ahnuin, Pathian pangti chu rangkachak te, tangka te, lung te mihring themthiam leh remruata chherte ang hi emaw tih, kan rin tur a ni lo ve.
17:30 Chutichuan Pathianin kan hriat loh laite a haider thin a; nimahsela tunah hian ram tina mi zawng zawng sim tur thu a pe ta a ni, ni a tiam avangin;
17:31 chu mi niah chuan a mi ruata chu, leia mite fel takin a ngaihtuahtir ang; chu chu Pathianin amah chu mitthi zing ata kai thovin, mi zawng zawng hnenah a hriattir tawh a ni,” tiin.
17:32 Tin, mitthi zing ata thawhlehna thu chu an hriat veleh a thenin an nuihsan a; a thenin, “He thu hi i hnenah kan la ngaithla leh ang e,” an ti a.
17:33 Chutichuan Paula chu an zing ata a chhuak ta a.
17:34 Nimahsela mi tute emaw a hnenah an tel ta tlat a, an ring ta a; chung zinga thenkhat chu Areopagi-a mi Dionusia leh hmeichhe pakhat a hming Damari leh an hnena mi dangte nen chuan an ni.
18:1 Chung thil hnuah chuan Paula chu Atheni khua ata chu a chhuak a, Korinth khuaah a kal ta a.
18:2 Tin, a hming Akuilia Juda pakhat a hmu a, chu mi chu Ponto rama piang a ni a, Klaudian Juda zawng zawng Rom khua ata chhuah thu a pek avangin a nupui Priskili nen Itali ram ata lo kal hlim an ni a.
18:3 Tin, Paula chu, chu mite hnenah chuan a thleng ta a, tin, an hnathawh ang thawk a nih avangin anmahni a hrawn a, an hnenah a thawk ve thin a; an hnathawh chu puan in siam a ni a.
18:4 Tin, Chawlhni apiangin inkhawmna inah khun takin thu a hril thin a, Judate leh Grikte chu thlem thluk a tum thin a.
18:5 Tin, Sila leh Timothea chu Makedonia ram ata chu an lo chhukin, Paula chu thu hril chauhvin a awm ta a, Isua kha Krista chu a ni tih Judate hnenah a hrilhfiah thin a.
18:6 Nimahsela an dodala an sawtin Paulan a puan a thing a, an hnenah, “In thihna mawh chu nangmahniin phur ang che u; kei zawng ka hul a ni e; tun achinah Jentailte hnenah ka kal ang,” a ti a.
18:7 Tin, chuta ta chu a kal a, a hming Tita Justa mi pakhat inah a lut a, chu mi chuan Pathian a be thin a; a in pawh chu inkhawmna in nen a inzawm a ni.
18:8 Tin, Krispa, inkhawmna in hotu chuan a chhungte zawng zawng nen Lalpa an ring a, Korinth khuaa mitam tak pawhin an hria a, an ring ve a, baptisma an chang ta a.
18:9 Tin, zanah Lalpan Paula hnenah chuan mumang angin, “Hlau suh la, ngawi lovin thu sawi zel rawh;
18:10 kei I hnenah ka awm alawm, tina tur chein tuman I chungah kut an thlak lo vang; he khuaah hian mi tam tak ka nei si a,” a ti a.
18:11 Tin, Paula chu chutah chuan an zingah Pathian thu zirtirin kum khat leh thla ruk a awm ta a.
18:12 Tin, Galliova Akaia rama lal aiawha a awm laiin Judaten rual takin Paula an bei a, rorelna thutphah hmaah an hruai a,
18:13 “He mi hrep hian Dan lo anga Pathian be turin mi a thlemthlu thin a ni,” an ti a.
18:14 Tin, Paulan a chhan dawnin, Galliovan Judate hnenah chuan “Judate u, heng hi thil dik lo thu emaw thiltih sual emaw tal ni sela, mathei lovin ka ngaihsak ang che u a;
18:15 nimahsela thute, hmingte, in dan chung thute mai a nih chuan nangmahnin rel zawk rawh u; kei zawngin chutiang thu chu ngaihtuah ka duh lo ve,” a ti a.
18:16 Tin, rorel thutphah atang chuan anni chu a hnawt bo ta a.
18:17 Tin, Grik mi zawng zawngin inkhawmna in hotu Sosthena an man a, rorel thutphah hmaah chuan an vua a, Galliova chuan chung an thiltih chu engah mah a ngai lo va.
18:18 Tin, chu mi hnuah chuan Paula chu ni rei tak a la cham reng a; chu mi zawh chuan unaute chu tawng thain a then a, chuta ta chu Suria ram lamah lawngin a kal ta a, a hnenah Priskili leh Akuila chu an kal ve bawk a; Paulan thutiam a neih avangin Kenkriai khuaah a lu a met zet a.
18:19 Tin, Ephesi khua chu an thleng a, chutah chuan anni chu a hnutchhiah ta a; ani erawh chu inkhawmna inah a lut a, Judate hnenah khun takin thu a sawi rih a.
18:20 Tin, rei deuh chamah an ngen a, nimahsela a remti lo va,
18:21 “Pathianin a phal chuan in hnenah ka lo kal leh ang,” tiin tawng thain a then a, Ephesi khua ata chu lawngin a kal ta a.
18:22 Tin, lawng ata chu Kaisari khuaah a chhuak a, Jerusalem khuaah a han kal a, kohhranhote chu chibai a buk a; tin, chu mi zawhah chuan Antiokei khuaah a zuk kal ta a.
18:23 Tin, chutah chuan rei ngial a awm hnuin a kal leh a, zirtirho zawng zawng tinghetin Galatia ram leh Phrugia ram chu a fang chhuak vek a.
18:24 Tin, Juda pakhat, a hming Appollova, Aleksandria khuaa piang, mi fing tak, Ephesi khuaah chuan a zuk kal a; ani chuan Pathian Lehkha Thute a hre nasa em em a.
18:25 Chu mi chu Lalpa Kawng thu zir tawh a ni a, rilrua thahnemngai tak a nih avangin Isua chanchin chu ngun takin a hril a, a zirtir thin a, Johana baptisma thu chauh a hre si a.
18:26 Tin, inkhawmna inah huai takin thu a sawi tan ta a. Chutichuan Priskili leh Akuila chuan a thusawi an hriatin an inah an hruai a, a hnenah Pathian Kawng thu fel lehzualin an hrilhfiah ta a.
18:27 Tin, ani chuan Akaia rama kal kai a tum veleh unauten an fuih a, amah an lo lawmna turin zirtirhote hnenah lehkha an ziaksak a; tin, a thlen chuanin Pathian khawngaihna avanga ringtute chu, nasa takin a pui a;
18:28 vantlang hriatin Judate chu nasa takin a tidang a, Pathian Lehkha Thu hmangin Isua kha Krista chu a ni tih a hriattir thin a.
19:1 Tin, Paula chuan khaw chhak bial a fang chhuak zet a, Apollova Korinth khuaa a awm hlan khan Ephesi khua chu a thleng a, zirtirho tute emaw a hmu a;
19:2 tin, ani chuan an hnenah, “In rin tirh lai khan Thlarau Thianghlim in chang em?” a ti a. Tin, anni chuan a hnenah, “Chang lo, Thlarau Thianghlim a awm tih reng hriat pawh kan hre lo,” an ti a.
19:3 Tin, ani chuan, “Eng baptismaah nge in chan le?” a ti a. Anni chuan, “Johana baptismaah,” an ti a.
19:4 Tin, Paula chuan, “Johana kha chuan mi hnenah, ‘Mi rawn zuitu tur (Isua) chu in la ring tur a ni,’ tiin simna baptismain a baptis thin a nih kha,” a ti a.
19:5 Tin,chu thu chu an hriat veleh Lalpa Isua hmingin baptisma an chang ta a.
19:6 Tin, Paulan an chungah a kut a nghat a, Thlarau Thianghlim chu a chungah a lo thleng ta a; tichuan tawng hriat lohtein thu an sawi a, Pathian thu pawh an hril ta a.
19:7 An za chuan patling sawm leh pahnih lai an ni.
19:8 Tin, Paula chu inkhawmna inah a lut thin a, thla thum lai huai takin thu a sawi a, Pathian ram kawng thu-ah chuan mi a hnial a, mi a thlemthlu thin a.
19:9 Nimahsela a then an tihmawh a, an awih duh loh va, mipui hmaah Kawng chu an sawichhiat veleh chuan, ani chuan anmahni a kalsan a, zirtirhote chu a kai hrang a, ni tinTuranna zirtirna inah mi a hnial thin a.
19:10 Chutiang hlirin kum hnih lai a ti a; chutichuan Asia rama awm zawng zawng Judate leh Grikte pawhin Lalpa thu chu an hre ta hial a.
19:11 Tin, Pathianin Paula kutin thilmak namen a tihtir lo va;12chutichuan a taksa ata inhrukna puante emaw, fenthuahte emaw damlote hnenah an rawn keng a, an nate a reh thin a, an kawchhung ata ramhuaite pawh an chhuak thin a.
19:13 Tin, thiam zuara vak vak Juda mi tuten emaw, “Paulan a thu a tlangaupui thin Isua hmingin kan vau a che,” tiin ramhuai paite chungah Lalpa Isua hming an lam vei thin a. 14Tin, Juda mi puithiam lal pakhat, Skeva chuan chutiang ti ve thin fapa sarih a nei a. 15Nimahsela ramhuaiin an hnenah, “Isua ka awih e, Paula pawh ka hria e, nangni erawh chu tunge maw in nih le?” a ti a, a chhang a.
19:16 Tin, ramhuai pai chuan a rawn zuan a, an za chuan a hneh a, a ngam ta zawk a, chutichuan chu mi in ata chu saruak leh inhliamin an tlan chhuak ta hial a.
19:17 Chutichuan Ephesi khuaa awm zawng zawng, Judate leh Grikte hnenah pawh, chu mi thu chu a thang ta a; tichuan an zain an hlau va, Lalpa Isua hming a lian ta a. 18Tin, ringhote pawh chu a then tam tak an lo kal a, an thiltihte thupha an chawi a, an inpuang ta a. 19Dawihmang a then tam tak pawhin an lehkhabute an rawn la khawm a, mi zawng zawng mithmuhah an hal ta a, tin, a man an chhut a, cheng singnga niin an hria.20Chuti kauva nasa chuan Lalpa thu chu a darh a, a hneh ta zel a.
19:21 Tin, chung zawhah chuan Paulan, Makedonia ram leh Akaia ram chu fan chhuah riha Jerusalem khuaa kal a rilruk a, “Chuta ka kal zawh chuan Rom khua ka tlawh bawk tur a ni,” a ti a. 22Chutichuan a rawngbawltu pahnih, Timothea leh Erasta chu Makedonia ramah a kaltir zet a, ani erawh chu Asia ramah a awm rih a.
19:23 Tin, chung lai vel chuan Kawng avang chuan mi buai namenin an buai ta lova.
19:24 Mi pakhat, a hming Demetria, tangkarua chhera tangkaruaa Diani lem siamtu chuan, a siam thiamte hnenah inhlawhfakna tam tak a pe thin a;
19:25 chu mi chuan anni chu a ko khawm a, an hnathawh ang thawktute nen; tin, an hnenah, “Pute u, he hna hi kan hausakna a ni tih in hria e.
19:26 Hetah Ephesi khua chauhvah hian ni lovin, Asia ram khawvel zawng zawng thawah pawh he Paula hian, ‘Kuta siam pathiante hi pathian an ni lo,’ tiin mi tam tak a thlemthlu a, a pakaitir zo tawh a ni tih nangni ngei pawhin in hmuin in hre bawk a: 27chutichuan kan hnathawh a lan ang tih a hlauhawm chauh hi a ni lo va, pathiannu ropui tak Diani biak in pawh hi an rawn ngai tlawm ang a, Asia rama mi zawng zawng leh khawvela miin an biak thin hi, a ropui tehlul nen, a tlawm ang tih a hlauhawm bawk a ni,” a ti a.
19:28 Tin, chung thu chu an hriat veleh an thinur ta em em a, “Ephesi khuaa mi Diani hi ropui tak a ni!” tiin an au va.
19:29 Tichuan akhuain an buai ta vek a, Gaia leh Aristarka, Makedonia rama mi, Paula hnungzuitute chu an man a, arualin ennawm inah an tlanpui chiam a.
19:30 Tin, Paulan mipui zinga luh a tum chuan zirtirhoten an phal lo va.
19:31 Tin, Asia ram hotu berte zinga thenkhat tute emaw Paula thiante an ni a, a hnenah mi an tir a, ennawm inah chuan lut lui lo turin an thlem chiam a.
19:32 Tin, awmkhawmhote chu an buai a, mi tam zawkin an inkhawm chhan pawh an hre lo va, chuvangin thenkhat thu pakhatin an au va, thenkhat thu dangin an au va.
19:33 Tin, mipui zinga mi thenkhatin Aleksandra chu an thiamna thu sawi dan tur chu an hrilh a, Judaten ani chu mi hma lamah an nam phei a. Tin, Aleksandra chuan a kutin a zap a, mi zawng zawng hnenah chuan an thiamna thu sawi a tum a.
19:34 Nimahsela ani chu Juda mi a ni tih an hriat veleh, darkar hnih lai aw rual takin, “Ephesi khuaa mi Diani hi ropui tak a ni!” ti hlirin an au an au va.
19:35 Tin, khaw lehkhaziaktuin mipui chu a uidaih zawh chuan, “Ephesi khuaa mite u, Diani ropui tak biak in leh van atanga milem tla kha, Ephesi khuaa mite hi a vengtu in ni tih tunge hre lo awm ni?
19:36 Chutichuan heng thu hi hnial rual a nih loh ahnuin, in ngawi reng tur a ni, thu dawn lovin engmah in ti tur a ni lo.
19:37 Heng mi, heta in rawn hruaite hi, biak in suamhmangte an ni hek lo, kan pathiannu sawichhetu lah an ni hek lo.
19:38 Chutichuan Demetria leh a thian themthiamte pawhin tu lakah pawh thupawi an neih chuan, thupawi sawina inte chu hawn sa a ni alawm, lal aiawhtute pawh an awm a; inchhal rawh se.
19:39 Thil dang pawi nei reng in nih chuan inkhawm pangngaiah an rem ang.
19:40 Vawiinah bengchhen avang hian chhal hlauhawmin kan awm tak hi a bul awm si lovin; chuti chu a ni si a he inkhawm chhan hi engmah kan sawi theih dawn loh hi,” a ti a.
19:41 Tin, chutiang thu a sawi zawh chuan awmkhawmhote chu an tintir ta a.
20:1 Tin, bengchheng chu a reh zawhin, Paulan zirtirhote a kohtir a, a fuih a, tawng thain a then a. Makedonia rama kal turin a chhuak ta a.
20:2 Tin, thu tam taka zirtirhote fuih zelin chu mi ram chu a fang chhuak a, Grik ram a thleng ta a.
20:3 Tin, chutah chuan thla thum a thang hnuin Suria ram lamah lawngin a kal dawn a, judaten amah an phiar avangin Makedonia ramah hawn tlang a tum leh ta zawk a.
20:4 Tin, Purrha fapa Sopata, Beroia khuaa mi te, Thessalonika khuaa mi Aristarka leh Sekunda te, Derbe khua mi Gaia te, Timothea te, Asia rama mi Tukika leh Trophima te a hnenah Asia ram thlengin an kal ve a.
20:5 Chungho chuan kan hma an hruai a. Troas khuaah chuan min lo nghak reng a.
20:6 Keini erawh chu chhang dawidim telh loh ni zawng zawng hnuah chuan Philippi khua ata chu lawngin kan chhuak a, ni nga chinah Troas khuaah an hnen kan thleng a; chutah chuan ni sarih kan cham a.
20:7 Tin, ni sarih ni hmasa berah chuan chhang phel tura kan awm khawm laiin, Paulan atuka kal a tum avangin an hnenah khun takin thu a hril a; zan lai thlengin thu a sawi zel a.
20:8 Tin, pindan chungnung kan awm khawmnaah chuan khawnvar tam tak a awm a.
20:9 Tin, a hming Eutuka, tlangval pakhat tukverhah chuan a thu a, a lo muthlu a lo muthlu a. Tin, Paulan thu a sawi rei tak avangin ani chuan a mutchhuak a tuar ta lo va, in chhawng thumna atang chuan a tla ta a, a thiin an char a.
20:10 Nimahsela Paula a chhuk a, a chungah a bawh a, a pawm a, “Thlaphang suh u, a hnuk a lo la chat lo ve,” a ti a.
20:11 Tin, Paula a chho leh a, chhang chu a phel a, chaw a ei a, rei tak, khawvar thleng hialin an hnenah thukhawchang a sawi a, chu mi hnuah chuan a kal ta a.
20:12 Tin, rawlthar chu damin an hruai a, thlamuan namenin an thlamuang ta lo va.
20:13 Tin, keini erawh chu lawngah kan lo kal tawh a, Assi khaw pan turin lawng chuan kan lo chhuak hmasa a, chutah chuan Paula chu lo chuantir kan tum a; ani chuan kea lo kal a tum avangin chutiangin aman a ruat reng a ni a.
20:14 Tin, Asia khuaa mi rawn fin chuan kan chuantir ta a, Mitulini khua kan thleng a.
20:15 Tin, chuta tang chuan lawngin kan kel leh a, atukah chuan Kia thliarkar zawn kan thleng a; tin, atuk lehah Sami thliarkar kan tlawh a; tin atuk lehah chuan Meliti khua kan thleng leh a.
20:16 Tin, Paulan Asia rama awm rei a duh loh avangin Ephesi khua chu lawngin pelh a tum sa reng a ni, a theih chuan Jerusalem khuaah Pentikost ni nan a tum a, a kal hmanhmawh a ni.
20:17 Tin, Meliti khua atang chuan Ephesi khuaah mi a tir a, kohhran upahote a hnenah a kohtir a.
20:18 Tin, a hnen an lo thlenin ani chuan an hnenah :
20:19 thuhnuairawlh ber chung leh, Judaten mi phiar avanga mittui tla leh, thil hrehawm ka chunga tlate tuar chungin, Lalpa rawng ka bawl thin kha;
20:20 khati khan a sawt tur thu in hnenah engmah hrilh ka tim lo va, vantlang zingah te, in tinah te ka zirtir thin che u a,
20:21 Judate leh Grikte hnenah pawh Pathian lama rilru lamlet thu leh, kan Lalpa Isua Krista lam rin tur thu ka hriattir thin kha.
20:22 Tin hre rawh u, tunah hian rilrua kal lo thei lo va ka inhriat avangin, Jerusalem khuaah ka kal dawn hi, chutah chuan ka chunga thil lo thleng tur chin ka hre lo ve;
20:23 Thlarau Thianghlimin, ‘Phuarna leh hrehawmnain a hmuak a che,’ tiin khaw tinah mi hriattir thin, chung chauh chu ka hria a ni.
20:24 Nimahsela ka tlansiakna kawng ka hmabak hlen tur leh, Pathian khawngaihna Chanchin Tha hriattir tur, Lalpa Isua hnenah kha mi rawngbawl hna ka hmuh kha thawk zo phawt ila, ka nun pawh thlakhlelh tlakah ka ruat lo ve.
20:25 “Tin, hre rawh u, nangni zawng zawng, Pathian ram thu tlangaupui zela ka vah ka vah thinnate hian ka hmel in hmu leh tawh lo vang tih ka hria e.
20:26 Chuvangin mi zawng zawng thisenah ka hul a ni tih vawiinah hian ka hriattir a che u.
20:27 Pathian rel zawng zawng azain in hnenah hrilh ka tim loh kha.
20:28 Pathian kohhranho, ama thisena a leite chu chawm turin nangmahni leh in hote zawng zawng chungah chuan fimkhur rawh u, Thlarau Thianghlimin an chunga hotuah a siam che u hi.
20:29 Ka kal hnuin chinghne kawlhte in zingah an lo lut ang a, pawlho chu an zuah lo vang tih ka hria e.
20:30 In zinga mi ngei pawh hi, zirtirhote in hnena pakaitir turin thu hran sawi in lo la awm ang.
20:31 Chuvangin ngaihven rawh u; kum thum meuh, mittui tla chunga, achhun azana mi tin zilh ka ban loh kha hre reng rawh u.
20:32 “Tunah hian Pathian leh a khawngaihna thu-ah ka kawltir a che u, chu chuan a siam lian thei che u a, mi rilru thianghlimte zingah ro chan a neihtir thei bawk a che u.
20:33 Tuma tangkate, rangkachakte, silhfente ka awh ngai loh kha.
20:34 He kutte hian keimah leh ka thiante chakkhai a deh chhuah thin kha nangni ngeiin in hria e.
20:35 Engkim ka tih apiangah ka tihhmuh thin che u kha, chutianga thawk rim chung leh, Lalpa Isua thu hre reng chungin mi chak lote in tanpui tur a ni; amah ngeiin, ‘Englo lak aiin pekin lukhawng a nei zawk,’ a tih kha,” a ti a.
20:36 Tin, chutiang thu chu a sawi zawh chuan a thingthi a, an zain a tawngtaipui a.
20:37 Tin, an za chuan an tap zawih zawih a, Paula chu pawmin an fawp ngawih ngawih a,
20:38 a hmel an hmuh leh tawh loh tur thu a sawi chu an lungngaihna ber a ni. Tin, lawng thleng chuan amah an thlah ta a.
21:1 Tin, anni nen chuan kan inthen a, lawngin kan chhuak a, chu mi hnuah chuan ngil takin Koi thliarkar kan thleng a, tin, atukah Rodi thliarkar kan thleng leh a, chuta tangin kan kal zel a, Patara khua kan thleng a;
21:2 tin, Phoiniki rama kai tur lawng pakhat kan hmu a, kan chuang a, kan kal ta zel a.
21:3 Tin, Kupra thliarkar kan hmu a, vei lam chhawnin kan pel a, Suria ram lamah kan kal zel a, Turi khuaah chuan khawmualah kan chhuak ta rih a; chutah chuan lawnga bungrua thiar chhuah tur a ni a.
21:4 Tin, zirtirhote kan zawng chhuak a, chutah chuan ni sarih kan cham a; tin, anni chuan Thlarau hrilhin, Paula hnenah Jerusalem khua tlawh loh tur an ti a.
21:5 Nimahsela chung ni zawhah chuan kan chhuak a, kan kal ta a, unaute chuan an zain, an nupui fanaute nen daipawn thlengin min thlah a; tin, tuifinriat kamah chuan kan thingthi a, kan tawngtai a.
21:6 Tin, “Dam takin,” kan inti a, lawngah chuan kan chuang a; anni erawh chu an inah an haw leh ta a.
21:7 Tin, Turi khua ata lawnga kan kal zawh chuan Ptolemai khua kan thleng a,unaute chibai kan buk a, an hnenah ni khat kan cham a.
21:8 Tin, atukah chuan kan chhuak a, Kaisari khua kan thleng a; tin, Chanchin Tha hriltu Philipa inah kan lut a, ani chu pasarihte zinga pakhat a ni a, a hnenah kan cham a.
21:9 Chu mi chuan fanu pali a nei a, nula thianghlim an ni a, Pathian thu an hril thin a.
21:10 Tin, chutah chuan ni tam tak kan cham a, chu mi lai chuan Judai ram ata a hming Agaba zawlnei pakhat a lo chhuk a.
21:11 Tin, kan hnenah a lo kal a, Paula kawnghren a la a, a kete, a kutte amahin a inphuar a, tin, “ ‘Jerusalem khuaa Judate chuan hetiang hian he kawnghren neitu hi an phuar ang a, Jentailte kutah an pe bawk ang,’ Thlarau Thianghlimin a ti e,” a ti a.
21:12 Tin, chung thu chu kan hriat veleh keini leh chu mi khuaa mite chuan Paula chu Jerusalem khuaa han kal lo turin kan ngen chiam a.
21:13 Tin, Paula chuan a chhang a, “Eng in ti nge ni, in tah in tah a, ka lung in tihchhiat? Lalpa Isua hming avang chuan Jerusalem khuaa phuar chang ka huam lova, thih pawh ka huam asin,” a ti a.
21:14 Tin, thlem rual a nih loh ahnu chuan, “Lalpa thu thu ni rawh se,” kan ti a, kan bang ta a.
21:15 Tin, chu mi hnuah chuan kan bungrua kan siam a, Jerusalem khuaah kan han kal a.
21:16 Kaisari khuaa mi zirtirho tute emaw kan hnenah an kal ve a, anni chuan a hming Mnasona, zirtir hmasa pawl, Kupra thliarkara mi pakhat kan thlen in pa tur chu an hruai ve a.
21:17 Tin, Jerusalem khua kan thlen chuan unauten hlim takin min lo lawm a.
21:18 Atukah chuan Paula hovin Jakoba hnenah kan lut a; chutah chuan kohhran upate zawng zawng pawh an awm a.
21:19 Tin, Paulan anmahni chibai a buk zawhin, a rawngbawlna hmanga Pathianin Jentailte zinga thil a tihtir apiang chu akip akawiin a sawi a.
21:20 Tin, unaute chuan chung thu chu an hriatin Pathian an chawimawi a; tin, Paula hnenah chuan, “Unaupa, Judate zinga ringtute tamzia i hmu a; an zain Dan chungah thahnem an ngai bawk a;
21:21 tin, nangin Jentailte zinga Juda awmte zawng zawng hnenah chuan an fate serh tan loh tur leh dan anga awm loh tur, tiin Mosia thlauhthlakna tur i zirtir thin tih mi kaah i thu hi an hria a.
21:22 Engtin nge ni ta ang le? I lo thleng tih an hre dawn ngei si a.
21:23 Chuvangin i hnena kan sawi ang hian ti ang che: Thutiam nei mipa pali kan hnenah an awm;
21:24 chung mite chu hruai la, an hnenah inthian fai ve la, an lu an meh theih nan an tan sum seng rawh; chutichuan mi zawng zawngin mi kaa i thu an hriat apiang kha, tih tak a ni lo tih an hria ang a, nangmah ngei pawh Dan zawhin fel takin i awm ve zawk tih an hre dawn nia.
21:25 Jentailte zinga ringtute chungchang thu zawng, milem biakna thil ei kawngah te, sa thisen ei kawngah te, sa rehhlum ei kawngah te, inngaih kawngah te an inthiarfihlim tur a ni, tiin kan rel a, kan ziak tawh kha,” an ti a.
21:26 Tin, atukah chuan Paulan mipate chu a hruai a, an hnenah a inthian fai ve a, Pathian biak inah chuan a lut a, an tana sa talh theuh tur a peksak hma loh chuan inthen faina ni an nei rih dawn tih puithiam hnenah a hrilh lawk a.
21:27 Tin, ni sarih chu a tlin dawn ruaiin Asia rama Judate chuan Paula chu Pathian biak inah chuan an hmu a, mipui zawng zawng an fuihpawrh a, ani chu an man a.
21:28 an au va, “Israel mite u, min pui rawh u! He mi hi ram tinah mi zawng zawng hnenah, Juda mi te, Dan te, he in te sawichhetu kha a nih hi; chu lo pawh, Pathian biak inah hian Grik mite pawh a luhpui a, he in thianghlim hi a tibawlhhlawh tawh a ni,” an ti a.
21:29 (Chu mi hmain khuaah chuan Ephesi khuaa mi Trophima chu a hnenah an hmu a, Paulan chu mi chu Pathian biak inah a luhpui an ring a ni.)
21:30 Tin, akhuain an phu ta mur mur a, mite chu an tlan khawm a; Paula an man a, Pathian biak in ata an hnuk chhuak a; kawngte chu an khar ta nghal a.
21:31 Tin, ani chu tihhlum an tum lai chuan Jerusalem khuaa mi zawng zawng an buai tih thu chu sipai pawl hotu lal ber hnen a han thleng a.
21:32 Tin, ani chuan sipaite leh sipai za hotute a hruai ta nghal a, an hnenah a tlan chhuk a; tin, anni chuan hotu lal ber leh sipaite chu an hmuh veleh Paula vuak an bang ta a.
21:33 Tin, hotu lal ber chuan a rawn hnaih a, Paula chu a chelh a, khaidiat pahnih buntir thu a pe a; tunge a nih a, engnge a tih a zawt a.
21:34 Tin, mipui zingah chuan a then thu khatin an au va, a then thu dangin an au va; tin, bengchheng avangin a ziazang a hre thei lo va, kulhbinga hruai luh thu a pe a,
21:35 Tin, Paulan kailawn a thlen laiin mipuiin an beih nasat avangin sipaiten ani chu an chawi kang zel a;
21:36 mi zawng zawngin, “Tiboral rawh u,” tia auvin an zui huai huai si a.
21:37 Tin, Paula chu kulhbingah chuan an hruai luh dawn laiin, ani chuan sipai hotu lal ber hnenah chuan, “I hnenah thu kamkhat ka sawi thei ang em?” a ti a. Tin, ani chuan, “Grik tawng i hria elo?
21:38 Hmana mite fuihpawrha mihring philhmangho sangli thlalera hruai chhuaktu Aigupta rama mi kha i ni lo vem ni?” a ti a.
21:39 Paula erawh chuan, “Juda mi, Kilikia rama Tarsa khuaa mi ka ni, khaw namena awm ka ni lo; mi khawngaih la, mi zawng zawng hnenah thu mi hrilhtir rawh,” a ti a.
21:40 Tin, a remtih veleh Paula chu kailawnah chuan a ding a, mi zawng zawng ngawih nan a kutin a zap a; tin, an ngawih thuap veleh Hebrai tawngin an hnenah :
22:1 “Unaute u, pate u, tunah in hnenah ka thiamna thu ka hrilh dawn che u hi ngaithla rawh u,” a ti a.
22:2 Tin, Hebrai tawngin an hnenah thu a sawi tih an hriat veleh an ngawi lehzual a; tin, ani chuan,
22:3 “Juda mi ka ni, Kilikia rama Tarsa khuaa piang ka ni, nimahsela he khuaah hian Gamaliela ke bulah chuan zira sei lian ka ni, min thlahtute Dan awmze khermei tak chu zir thina awm ka ni, vawiina nangmahni zawng zawng ang tak hian, Pathian tana thahnem bawk thin ka ni.
22:4 Tin, he Kawnga mite hi tihlum hial khawpin ka tiduhdah thin a, ahmei apain ka phuar a, tan inah ka khungtir thin a.
22:5 Puithiam Lalber leh upate zawng zawng pawhin chung thu chu mi hriatpui thei e, an hnen ata pawh unaute pek atan lehkha ka hmuh kha; tin, Damaska khuaa awm apiang an hrem atan, phuar chunga Jerusalem khuaa hruai turin ka kal kha.
22:6 “Tin, ka kal a, Damaska khaw kiang kan thlen chuan chawfak hun laiin, thawklehkhatan van ata eng nasa tak ka velan a lo eng ta phut a;
22:7 tin, leiah ka tlu a, ka hnenah, “Saula, Saula, nangin engati nge mi tihduhdah hi?” tiin aw ka hria a.
22:8 Tin, keiin, ‘Lalpa, tunge i nih?’ tiin ka chhang a. Tin, ani chuan ka hnenah, ‘Nazaret Isua, i tihduhdah hi ka ni,’ a ti a.
22:9 Tin, ka thiante chuan eng chu an hmu na a, mi betu aw erawh chu an hre lo.
22:10 Tin, keiin, ‘Lalpa, engnge ka tih ang?’ ka ti a. Tin, Lalpa chuan ka hnenah, ‘Tho la, Damaska khuaah lut rawh, thil zawng zawng i tih tura ruat apiang an hrilh ang che,’ a ti a.
22:11 Tin, chu eng ropui avang chuan khua ka hmu thei ta lo va, ka thianten kutin min kai a, Damaska khuaah ka lut ta a.
22:12 “Tin, mi pakhat, Anania, Dan kawnga Pathian ngaihsak leh chuta Juda awmte zawng zawng hnena hmingtha chu,
22:13 ka hnenah a lo kal a, ka kiangah a ding a, ka hnenah, ‘Ka nau Saul, mit var nei rawh,’ mi ti a. Tin, chu mi lai tak chuan amah ka han hmu ta a.
22:14 Tin, ani chuan, ‘Min thlahtute Pathianin a duhzawng hriaah leh Mi Feltaka chu hmu a, a tawngka hriaah pawh a ruat tawh che a.
22:15 I hmuh leh i hriat thu-ah khan mi zawng zawng hnenah ama thu hretu i ni ang.
22:16 Tin, engati nge i la awm reng le? Tho la, ama hming lam chungin baptisma chang la, i sualte tlengfai ta che,’ mi ti a.
22:17 “Tin, Jerusalem khuaah hian ka hawn leh hnuin Pathian biak ina ka tawngtai laiin englovin mi zel a;
22:18 tin, ‘Hmanhmawh la, Jerusalem khua ata chhuak rawh; ka chanchin i hrilh tur chu an pawm dawh loh hi,’ a mi tih lai ka hmu a.
22:19 “Tin, keiin, ‘Lalpa, inkhawmna in tina a ringtu che apiang, tan inah ka khung a, ka vuak thin kha an hre si a;
22:20 tin, i thu hretu Stephana thisen an chhuah lai khan kei pawh a kiangah ka ding a, ka lo remti a, a tihlumtute puante ka veng hlawm bawk a ni,’ ka ti a.
22:21 “Tin, ani chuan, ‘Kal rawh, heta tangin hla taka Jentailte hnenah ka tir zawk ang che,’ mi ti ta a,” a ti a.
22:22 Tin, chu thu thleng chuan an ngaithla a; tin, aw ring takin, “Mi hetiang nek hi khawvel ata tiboral rawh u; nung tui a ni lo ve,” an ti ta a.
22:23 Tin, an au va, an puante an hlip a, an paih a, vaivut an vanvawrh a;
22:24 chutichuan sipai hotu lal ber chuan Paula chu kulhbing chhunga hruai luh thu a pe a, a chungah chuti ema an au chhan chu hriat nan vuak chunga chhal turin a ti a.
22:25 Tin, savun hruia an phuar belhbawm zawhin, Paulan a kianga ding sipai za hotu hnenah chuan, “Rom mi reng reng in vaw thei em ni, thiam l oh chantir hnu pawh ni leh nghal si lo?” a ti a.
22:26 Tin, sipai za hotu chuan chu chu a hriat veleh, sipai hotu lal ber hnenah chuan a kal a. “I thil tih tur hi fimkhur teh khai! He mi hi Rom mi a lo ni e,” a ti a, a hrilh a.
22:27 Tin, sipai hotu lal ber chu a lo kal a, a hnenah, “Rom mi i ni maw? Mi hrilh rawh,” a ti a. Tin, ani chuan, “Ni e,” a ti a.
22:28 Tin, sipai hotu lal ber chuan, “Chu mi khuaa mi ni turin kei zawngin tangka tam tak ka seng asin,” a ti a, a chhang a. Tin, Paula chuan, “Kei zawng Rom mi renga piang ka ni,” a ti a.
22:29 Tichuan nghaisa chunga chhal tumte chuan ani chu an kalsan ta nghal a; sipai hotu lal ber pawhin Rom mi a ni tih a hriat chuan a hlau va, a phuar avangin a hlau bawk a.
22:30 Tin, atukah Judaten chuan eng vangin nge Paula an hek tih hriat fel tumin, sipai hotu lal ber chuan ani chu a phelh a, puithiam lalte leh roreltu zawng zawngte inkhawm tur thu a pe a, Paula a hruai chhuak a, an hmaah a dintir ta a.
23:1 Tin, Paula chuan roreltute chu a en reng a, “Unaute u, vawiin thlengin Pathian mithmuha tha lama ka hriat apiang tiin ka awm thin e,” a ti a.
23:2 Tin, puithiam Lalber Anania chuan Paula kianga dingte hnenah a kaa bensak tur a ti a.
23:3 Tin, Paula chuan a hnenah, “Nang lung pal hnawih varpa, Pathianin a beng zawk ang che; nang, Dan anga mi ngaituah turin i thu a, Dan lo anga mi ben tur i ti vei a ni maw?” a ti a.
23:4 Tin, a kianga miten, “Pathian Puithiam Lalber i hau vei maw?” an ti a.
23:5 Tin, Paulan, “Unaute u, Puithiam Lalber a ni tih ka hre lo a ni; ‘I chipuite hotu chungah thu tha lo sawi suh,’ tih pawh ziak a ni si a,” a ti a.
23:6 Tin, Paulan a then Saddukaite, a then Pharisaite an ni tih a lo hriatin roreltute zingah chuan a au va, “Unaute u, Pharisai ka ni, Pharisai fapa pawh ka ni; mitthi thawhleh beiseina thu-ah chhuahchhalin ka awm a nih hi,” a ti a.
23:7 Tin, chu chu a sawi zawh chuan Pharisaite leh Saddukaite an lo inhnial a, roreltute chu an inkhing ta a.
23:8 (Saddukaihoten, “Mitthi thawhlehna reng a awm lo, vantirhkohte, thlaraute pawh a awm hek lo,” an ti thin; Pharisaihote erawh chuan chu mi kawng pahnih chu a awm tih an awih si a)
23:9 Tichuan nasa takin an buai ta a; Pharisaite lama mi lehkhaziaktute thenkhat an ding a, an hnial a, “He mi hi engmah a sualna kan hre lo ve; thlarau pawhin vantirhkoh pawhin ani hi bia pawh ni sela, engnge pawi ang?” an ti a.
23:10 Tin, an inhnial nasat deuh deuh avangin sipai hotu lal ber chuan Paula an pawh sawm a hlau va, sipaite hnenah, zuk kala an zing ata kulhbinga han hruai chho lui turin a ti a.
23:11 Tin, azanah chuan Lalpa chu Paula kiangah a ding a, “Thlamuang takin awm rawh, Jerusalem khuaa ka thu i hriattir ang bawk hian Rom khuaah pawh i hriattir tur a ni,” a ti a.
23:12 Tin, ni a chhuahin Judate an tangrual a, Paula an thah hma loh zawng engmah eia bar lo turin chhia an inchham a.
23:13 Chu mi thu phiartute chu sawmli aia tam an ni.
23:14 Tin, anni chu puithiam lalte leh upate hnenah an kal a, “Paula kan thah hma loh zawng engmah tem lo turin chhia kan chham ta vek a ni.
23:15 Chuvangin nangnin, roreltute nen a thu fel lehzuala ngaihtuah tum angin, in hnena hruai thla turin sipai hotu lal ber hnenah pehhel deuhvin han sawi rawh u; in kiang hnai a thlen hma pawhin, keini amah that turin kan inpeih reng e,” an ti a.
23:16 Nimahsela Paula farnua fapain an chan thu chu a lo hria a, kulhbingah chuan a va lut a, Paula chu a va hrilh a.
23:17 Tin, Paula chuan sipai zahotu pakhat a ko va, “He tlangval hi hotu lal ber hnenah chuan hruai rawh; a hnenah thu eng emaw sawi tur a nei a ni awm e,” a ti a.
23:18 Chutichuan sipai hotu lal ber hnenah chuan a va hruai a, “Paula, mi tang khan mi ko va, he tlangval hi i hnena rawn hruai turin mi tir a, i hnenah thu eng emaw sawi tur a nei a ni awm e,” a ti a.
23:19 Tin, sipai hotu lal ber chuan a kutah a chelh a, a kal hranpui a, arukin, “Engnge mi hrilh tur i neih chu?” tiin a zawt a.
23:20 Tin, ani chuan, “Paula thu chu fel lehzual deuhva i ngaihtuah tur angin naktukah roreltute hnena hruai chhuk turin Judaten dil che an remti tlang a.
23:21 Nimahsela an thu lo awih suh ang che; an zinga mi sawmli aia tamin an chang reng a, chu mite chuan amah an thah hma loh chu engmah eia bar lo turin chhia an chham a; tunah hian i thu nghakin inpeih sain an awm reng a ni,” a ti a.
23:22 Tin, sipai hotu lal ber chuan tlangval chu a kaltir a, “Heng thu hi mi lo hriattir tawh tih tumah hrilh suh ang che,” a ti tlat a.
23:23 Tin, sipai za hotu pahnih a ko va, “Zan mut reh hunah Kaisari khaw thlenga kal turin sipai zahnih nen, sakawr chung chuang mi sawmsarih nen, fei keng mi zahnih nen siam rawh u,” a ti a;
23:24 tin, Ram Awptu Felika hnenah chuan him taka an thlentir theih nan Paula an chuantirna turin sate lo siam tur a ti bawk a.
23:25 Tin, hetiangin lehkha a ziak a:
23:26 “Klaudia Lusian Felika, Ram Awptu tha ber chibai a buk e.
23:27 “He mi hi Judaten an man a, an thah dawn laiin an hnenah sipaite hruaiin ka kal a, Rom mi a ni tih ka hria a, ka chhan chhuak ta a.
23:28 Tin, an hekna chhan hriat ka duh a, an roreltute hnenah ka hruai chhuk a;
23:29 chutichuan an dan thu engahte emaw hek a ni tih ka hria a, nimahsela an hekna thu-ah thihna leh phuarna khawp meuh turin engmah ka hre si lo.
23:30 Tin, Judaten amah an chang tih miin mi hriattir veleh i hnenah ani hi ka rawn tir ta nghal a ni, a hektute pawh a chunga thupawi an neih apiang i hmaa sawi turin thu ka pe bawk a,” tiin.
23:31 Chutichuan sipaite chuan a thupek ang chuan Paula chu azan azanin an hruai a, Antipatri khua an thlenpui a.
23:32 Tin, atukah chuan sakawr chung chuang mite chu a hnena kal zel turin an kirsan a, kulhbingah chuan an kal leh ta a;
23:33 tin, anni chu Kaisari khua chu an thleng a, Ram Awptu hnenah lehkha chu an pe a, Paula pawh a hmaah an dintir a.
23:34 Tin, Ram Awptu chuan a chhiar zawhin Paula awmna ram a zawt a. Tin, Kilikia rama mi a ni tih a hriat veleh,
23:35 “A hektu che pawh chu an lo thlen hunah i thupawi ka ngaihtuah ang,” a ti a. Tin, Heroda inah ven tur thu a pe a.
24:1 Tin, ni nga chinah puithiam Lalber Anania a lo thleng chhuk a, upa tute emaw nen, a hming Tertulla thusawi thiam pakhat nen; tin, Paula chunga thupawi chu Ram awptu hnenah an sawi a.
24:2 Tin, Paula chu an koh chhuah hnu chuan Tertulla chuan amah a hek tan a : “Felik tha ber, nangmaha zarah thlamuang em emin kan awm avang leh, i enkawl avanga he chite tan hian sualte khap thatin a awm thin avangin,
24:3 kumkhuain khawiah pawh lungawi takin kan lawm thin.
24:4 Amaherawhchu i tan ninawm lutuk nih ka duh lo va, i nunnemnain thu kamkhat erawh chu min ngaihthlaksak turin ka ngen a che.
24:5 He mi hi mi huatthlala tak, khawvela Judateho zawng zawng chawk buaitu leh Nazaret mite pawla an tupa ber pakhat a nih kan hria a;
24:6 Pathian biak in tihbawlhhlawh a tum bawk a; chuvangin kan man a,*
24:8 nangmah ngeiin chhuahchhalin kan hekna thil zawng zawng hi ama lakah i hre thei ang,” a ti a.
24:9 Tin, Judate pawh chuan, “Chung thu chu chutiang chu a ni,” tiin an tanpui ve a.
24:10 Tin, Ram Awptu chuan thu sawi tura Paula chu kuta a zah veleh Paula chuan, “Nang kum tam tak he chite rorelsaktu hi i nih ka hriat avangin lawm takin ka thiamna thu ka sawi dawn hi.
24:11 Jerusalem khuaah Pathian be turin ka han kal achin chu ni sawm leh ni hnih lo liam a la ni lo vang tih I la hre thei ang;
24:12 Pathian biak inah pawh, inkhawmna inahte pawh, khuaah pawh tumah ka hnial leh mipui ka fuihpawrh annin mi hmu hek lo;
24:13 tunah pawh an mi hekna thu hi i hriatah a bul an chhui chhuak thei hek lo vang.
24:14 Nimahsela he thu hi i hnenah ka inpuang ang, ‘pawl hrang’ an tih Kawng dan angin min thlahtute Pathian ka be thin. Dan leh Zawlneite Lehkhabua ziak zawng zawng ringin;
24:15 tin, mi felte leh fel lote thawhlehna a awm ang tih Pathian lamah ka beisei a, henghote pawh hian chung chu an awih ve bawk si a;
24:16 chu mi avang chuan Pathian hnen lamah leh mihring hnenah pawh rilru sual lo mawlh hi vawn fo ka tum thin.
24:17 Tin, kum tam tak hnuah hian ka chipuite hnenah thilpek tur leh sa talh tur rawn kengin ka lo kal a;
24:18 tin, chung thil ka pek lai chuan mipui tel lovin, bengchheng lovin, Pathian biak inah thianghlimin mi hmu a.
24:19 Nimahsela chutah chuan Asia rama mi Juda tute emaw an awm kha, chungte chuan ka chungah thu an neih chuan hetah hian i hmaa awmin mi hek tur a ni.
24:20 A nih loh leh, heng mite ngei hian roreltute hmaa ka din lai khan, ka tihsual engnge an hmuh sawi rawh se,
24:21 he thu kamkhat avang hian a nih nghal loh chuan, an zinga dingin, ‘Mitthi thawhlehna thu-ah ka awm a nih hi,’ ka tih kha,” a ti a, a chhang a.
24:22 Tin, Felika chuan Kawng thu chu a lo hre hle tawh a, “Sipai hotu lal ber Lusia chu a lo thlen chhuk hunah in thu ka la rem ang,” tiin, thu chu a dah ta rih a.
24:23 Tin, Paula chu a duat deuh va, a thiante rawngbawlsak khap lova, ventir turin sipai za hotu hnenah chuan thu a pe a.
24:24 Tin, ni eng zat emaw chinan Felika chu a lo kal leh a, a nupui Drusilli, Juda hmeichhia nen, Paula chu a kohtir a, Krista Isua rinna thu chu a ngaithla a.
24:25 Tin, Paula chuan felna thu te, insum thute, rorelna lo la awm tur thute khun taka a hrilh laiin Felika chuan hlauhawm a ti em a, “Kal leh ta rih tawh, hun remchang ka neih hunah ka ko vang che,” a ti a.
24:26 Paulan tangka a pek a beisei bawk a, chuvangin a ko zing deuh va, a be thin a ni.
24:27 Nimahsela kum hnih a vei hnuin Porkia Festan Felika chu a thlak ta a; tin, Felika chuan Judate zingah hmingthat a duh a, Paula chu phuar sain a hnutchhiah ta a.
25:1 Chutichuan, Festa chuan ram chu a awp ta a; tin, ni thum chinah Kaisari khua atang chuan Jerusalem khuaah a han kal a.
25:2 Tin, puithiam lalte leh Juda puipate chuan a hnenah Paula chung chang thu chu a chhe lamin an lo hriattir a.
25:3 Jerusalem khuaa han hruaitir turin khawngaihna an lo ngen chiam bawk a; kalkawnga lo chana thah an tum a.
25:4 Nimahsela Festa chuan, “Paula chu Kaisari khuaah an veng reng a ni, kei pawh rei lo tean ka haw dawn e.
25:5 Chuvangin chu mi chuan sualna a neih chuan in zinga thu nei apiangin mi zui chhuk sela, hek rawh se,” a ti a, a chhang a.
25:6 Tin, an zingah chuan ni riat emaw, ni sawm emaw lo liam chu a cham lo va, Kaisari khuaah a haw thla ta a; tin, atukah chuan rorelna thutphahah a thu a, Paula chu rawn hruai turin thu a pe a.
25:7 Tin, ani chu a lo thlen chuan Jerusalem khuaa mi Juda lo chhukte chu a velah an ding a, a chungah thupawi tam tak rit tak tak an sawi an sawi a, abul erawh chu an chhui chhuak thei si lo va;
25:8 tin, Paula chuan a thiamna thu a sawi a, “Judate Dan chungchangah te, Pathian biakin thu-ah te, Kaisara chungahte pawh thil reng reng ka tisual lo ve,” a ti a.
25:9 Nimahsela Festa chuan Judate zinga hmingthat a duh a, Paula hnenah chuan, “Jerusalem khuaa han kal a, khitah ka hmaa heng thu hi rel i duh em?” a ti a, a chhang a.
25:10 Paula erawh chuan, “Kaisara rorelna thutphah hmaa ro mi relsakna turah hian ka din hi; Judate chungah thil engmah ka tisual lo, nang pawhin chu chu i hre chiang hle si a.
25:11 Mi sual ka nih a, thihna khawp meuh thil ti ka nih chuan thih pawh ka hnial lo ve; nimahsela heng ho mi hekna thil hi abul engmah a awm loh chuan tumahin an hnenah mi pe thei lo vang. Kaisara hnenah ka thlen ang,” a ti a.
25:12 Tin, Festa chuan a rorelpuite a biak rawn zawhin, “Kaisara hnenah thlen i tum vei a, Kaisara hnenah i kal mawlh ang chu,” tiin a chhang a.
25:13 Tin, ni eng zat emaw chinah chuan lal Agrippa leh Berniki chu Kaisari khua an lo thleng a, Festa chibai an buk a.
25:14 Tin, ni tam tak chutah chuan an cham avangin Festa chuan Paula thupawi chu lal hnenah chuan a sawi a, “Felika khan mi tang tu emaw a hnutchhiah a;
25:15 Jerusalem khuaa ka awm lai khan puithiam lalte leh Juda upaten a chungchang thu mi hrilh a, thiam loh chantir an ngen a.
25:16 Tin, keiin an hnenah, ‘An heka leh a hektute an inhmatawn a, an hekna kawngah a thiamna thu sawi vena remchang a hmuh hma loh chuan mi reng reng hrem tura thlah hi Rom khuaa mi dan a ni lo ve,’ tiin ka chhang a.
25:17 Tin, heta an lo thlenin, rei rial lovin atukah chuan rorelna thutphahah ka thu a, chu mi chu han hruai turin thu ka pe a.
25:18 Tin, a hektute an din laiin, ka rin ang rengin a chungah sualna thupawi engmah reng an sawi si lo va;
25:19 an sakhaw dante leh Isua, mi pakhat thi tawh, Paula chuan, ‘A nung leh a ni,’ tiin a sawi a, chutih avang chuan a chungah thubuaite an nei a lo ni zawk a.
25:20 Tin, keiin chung thute chu ngaihtuah ngaihna reng ka hre lo va, Jerusalem khuaa kala khita a chung thu chu relsak a duh leh duh loh ka zawt a.
25:21 Nimahsela Paula chuan Lalber rela khek a ngen ta zawk a, chuvangin Kaisara hnena ka kaltir theih hma loh chuan veng turin thu ka pe a,” a ti a.
25:22 Tin, Agrippa chuan Festa hnenah chuan, “Kei pawh chu mi thusawi chu ngaihthlak ka lo duh fo reng a ni,” a ti a. Tin, ani chuan, “Naktukah a thusawi i ngaithla ang chu,” a ti a.
25:23 Chutichuan atukah chuan Agrippa leh Berniki chu ropui takin an lo kal a, thusawina inah an lo lut a, sipaite hotu liante nen, khuaa mi tha deuh deuhte nen; tin, Festa thuin Paula an rawn hruai luhtir a.
25:24 Tin, Festa chuan, “Lal Agrippa leh heta kan zinga awm zawng zawngte u, he mi in hmuh hi a ni, a chungchang thua Judate zawng zawngin an zain nung tawh lo tur, tia auva Jerusalem khuaah leh heta mi biakna kha.
25:25 Nimahsela thihna khawp meuhvin engmah a ti lo tih ka hria a; tin, amahin Lalber hnena thlen a tum avangin tirh ka tum a ni;
25:26 nimahsela a thu mumal engmah ka lal hnenah ziak tur ka hre si lo va. Chuvangin in hmaah ka rawn hruai chhuah hi, Lal Agripp, nangma hmaa rawn hruai bik deuh ka ni e, chhuahchhal zawha eng emaw tal ziak tur ka hmuh theih nan.
25:27 Mi tang, Lalber hnena tirha a chunga an hekna thu hriat teltir loh chu atthlak niin ka hre si a,” a ti a.
26:1 Tin, Agrippa chuan Paula hnenah chuan, “I thiamna thu i sawi thei e,” a ti a. Tin, Paula chuan a kut a phar a, a thiamna thu a sawi a;
26:2 “Lal Agripp, Judaten mi hekna zawng zawnga ka thiamna thu vawiinah hian I hmaa ka sawi dawn avang hian lawmin ka inhria;
26:3 hei hi ka lawmna ber a ni, Judate zingah dan leh thubuai zawng zawng kawnga I fin ngawt avangin: chuvangin muang taka mi ngaihthlaksak turin ka ngen a che.
26:4 Atira ka naupan lai ata ka chite zingah leh Jerusalem khuaa ka awm dan kha Juda zawng zawngin an hria e;
26:5 atir ata ka chanchin an hria e, khatia kan sakhaw pawl khermei ber dan pangngaia Pharisaia ka awm kha, an duh chuanin mi sawipui thei a ni.
26:6 Tin, Pathianin min thlahtute hnena thu a tiam kha beisei kawng thu-ah hetah tunah rorelsaka ka din hi;
26:7 chu thutiam chu kan hnam sawm leh hnam hnihin, achhun azanin Pathian rawng thahnemngai taka bawlin hmuh an beisei thin. Aw lalpa, chu mi beisei thu avang chuan Judaten mi hek a nih hi.
26:8 “Pathianin mitthite a kai tho tih hi engati nge awihawm lova in ruat ni?
26:9 Kei pawhin Nazaret Isua hming kalh lamin thil tam tak ti ila thain ka lo ring thin a.
26:10 Chu ang chu Jerusalem khuaah ka ti bawk thin a; tin, puithiam lalte hnenah thu ka hmu a, mi thianghlimte zinga mi tam tak tan inahte ka khung bawk thin a; tin, an tihhlum laiin tihhlum remti lamah ka tang bawk thin a.
26:11 Tin, inkhawmna in tinah ka hrem fo va, Isua thu sawttir ka tum hram thin a; tin, an chungah ka kawlh em em a, ram dang khaw thleng pawhin ka tiduhdah thin a.
26:12 “Chutiang ti turin puithiam lalte thu hmu leh an tirhna lehkha kengin Damaska khuaah ka kal a;
26:13 tin, e, lalpa, ka kal laiin chawfak hun a ni a, van ata eng eng emaw, ni eng aia eng zawk, keimah leh ka kalpuite velah engin ka hmu a.
26:14 Tin, kan zain leiah kan tlu a, Hebrai tawngin, ‘Saula, Saula, nangin engati nge mi tihduhdah ni? Chhunna tiang khen i tan a na e,’ mi tiin aw ka hria a.
26:15 “Tin, keiin, ‘Lalpa tunge i nih?’ ka ti a. “Tin, Lalpa chuan, ‘Isua, I tihduhdah hi ka ni;
26:16 nimahsela tho la, ding rawh; heng I thil hmuhte leh I hnena ka la inlarna tur thilte nen, chu mi rawngbawlah leh hretua siam tur chein I hnenah ka rawn inlar a nih hi;
26:17 mi zawng zawng leh Jentailte kut ata ka chhanhim ang che; an mit tivar turin an hnenah ka tirh che hi,
26:18 chutichuan thim chu eng lamah an hawisan ang a, Setana thuneihna chu Pathian lamah an hawisan ang, sual ngaihhnathiamna an hmuh nan leh mi rin avanga thianghlim tawhte zinga ro chan an neih nan,’ a ti a.
26:19 “Chuvangin lal Agripp, vana mi inlara chu ka hnial lo va,
26:20 atirin Damaska khuaa mite hnenah, chu mi hnuah chuan Jerusalem khuaa mite hnenah te, Judai ram tina mite hnenah te, Jentailte hnenah te pawh, sim hming pu tlaka thil ti a, sima Pathian lam an hawina turin ka hril zawk thin a ni.
26:21 Chung avang chuan a ni, Judaten Pathian biak inah mi mana tihhlum mi tum tak ni.
26:22 Nimahsela Pathian hnen atanga tanpuina ka hmuh avangin vawiin thlengin mi tete leh mi liante hnena thu hriattirin ka la awm reng a, zawlneite leh Mosian lo thleng tur an tih thu chauh lo chu thu dang sawi lovin;
26:23 khatia Krista-in hrehawm a tuar ang a, tin, mitthi zing ata a thawh leh avangin mi zawng zawng hnenah leh Jentailte hnenah pawh eng hmuhtirtu hmasa ber a ni ang, an tih thu kha,” a ti a.
26:24 Tin, chutianga a thiamna thu a sawi laiin Festa chuan, aw ring takin, “Paula, I a a ni; I zir tamnain a tia che a nih hi,” a ti a.
26:25 Nimahsela Paula chuan, “Festa tha ber, ka a lo asin; thu dik tak leh thu fing tak ka sawi zawk a nih hi.
26:26 Heng thu hi lal hian a hria alawm, a hnenah pawh hlau lovin ka sawi hi; heng thil hi engmah a hnenah zep a ni lo tih dik takin ka hria e; heng hi in kila tih a ni si lo.
26:27 Lal Agripp, zawlneite thu I awih em? I awih tih ka hria e,” a ti a.
26:28 Tin, Agrippa chuan Paula hnenah, “Rei lo te chauh thlema Kristiana mi siam I tum a nih hi!” a ti a.
26:29 Tin, Paula chuan, “Rei sela, rei suh sela, nang chauh ka ti lo, vawiina ka thu hretu zawng zawng pawh hi, keimah anga awm atan Pathian hnenah ka dil a ni, kawlte hi erawh chu bun ve lovin,” a ti a.
26:30 Tin, lal nen, Ram Awptu nen, Berniki nen, an hnena thute nen chuan an tho hlawm a;
26:31 tin, an kal hrang a, an inbia a, “He mi hian thihna leh kawl bunna khawp meuh thil engmah a lo tih loh hi,” an ti a.
26:32 Tin, Agrippan Festa hnenah, “He mi hian Kaisara hnena thlen lo tiam tawh suh sela chuan a chhuak mai tur,” a ti a.
27:1 Tin, Itali rama lawnga kan kal tur thu an tihtluk veleh, Paula leh mi tang dang tute emaw Awgusta pawla mi sipai za hotu a hming Julia an kawltir a.
27:2 Tin, Adramuttini khaw lawng, Asia ram tuifinriat kama khaw awmte tlawh turah chuan kan chuang a, tuifinriatah kankal ta a; Makedonia rama mi Aristarka, Thessalonika khuaa mi kan hnenah a awm a.
27:3 Tin, atukah Sidon khua kan tlawh a. Tin, Julia chuan Paula a titha hle a, intiharh turin a thiante hnenah a lentir a,
27:4 Tin, chuta tangin tuifinriatah kan kal leh a, thliin a ni lo lamah min nem avangin Kupra thliarkar phen thli up lamah kan tlan a.
27:5 Tin, Kilikia ram leh Pamphulia ram dep tuifinriat kan pelh hnuin, Lukia rama Mura khua kan thleng a.
27:6 Chutah chuan sipai za hotu chuan Aleksandria khaw lawng Itali ram tlawh tur chu a hmu a; chu miah chuan min chuantir a.
27:7 Tin, ni rei tak zawi zawiin kan kal a, Knidos khaw zawn harsa takin kan thleng hram hram a, thliin min hnar avangin Salmoni hrula Kret thliarkar phen thli up lamah kan tlan a;
27:8 tin, harsa takin vaukam kan hrut a, Litengsawl Mawi an tih hmun chu kan thleng ta a; chu mi kiangah chuan Lasai khua a awm.
27:9 Tin, ni tam tak a ral tawh avang leh, lawnga kal a hlauhawm tawh avangin, (Chaw Nghei ni chu a lo pel tawh si a,) Paula chuan anni chu a zilh a,
27:10 an hnenah, “Pute u, lawnga tuna kal hi chhiatna leh boralna nasa tak a thleng dawn tih ka hria e, a sum leh lawng chungah chauh ka ti lo va, keimahni chungah pawh ka ti a ni,” a ti a.
27:11 Nimahsela sipai za hotu chuan Paula thusawiai chuan lawngpu leh lawng neitu thu a awih zawk a.
27:12 Tin, thlasik tuar nan litengsawl chu a rem loh avangin a tam zawkin, chuta tanga tuifinriata kal chhuaha Phoiniki khua thlen hrama chuta thlasik tuar an rawtpui a; Phoiniki chu Kret thliarkara litengsawl pakhat a ni, hmar chhak leh chhim chhak chhawng a ni.
27:13 Tin, chhim thli chu zawi zawia a lo tleh veleh chuan, an duhzawng an hmu emaw an ti a, thirchakai chu an khai chhuak a, Kret thliarkar kam chu an hrut an hrut a.
27:14 Nimahsela rei lo te achinah khawmual lam atang chuan thli na tak a lo tleh chhuk ta a, chu thli chu Eurakuilo an ti thin a.
27:15 Tin, lawng chu a rawn nam fuh a, thli lam a hawi theih loh veleh kan thlah ta a, min len min len ta mai a.
27:16 Tin, a hming Klaudi thliarkar te tak te phen thli up lamah kan tlan a, harsa takin lawngleng kan hum thei hram a;
27:17 tin, an kaih chhuah hnuin chhanna hruite an hmang a, lawng hnuai lamah an la vet a, an phuar a; tin, puanzarna engkim an titlu a, chutilochuan litengsawl Surti an tiha len luh an hlau va, chutichuan min len min len ta a.
27:18 Tin, atukah tuifawnin min vawrh nek avang chuan lawnga bungrua chu tuiah an paih tan ta a.
27:19 Tin, atuk lehah anmahni kut meuhvin lawng bungrua an paih chhuak leh ta a.
27:20 Tin, ni rei tak, ni pawh, arsi pawh a lang lo va, thlipui namenin min nuai lo va, nun reng kan beisei tawh lo.
27:21 Tin, chaw ei lova rei tak an awm hnuin, Paula an zingah a ding a, “Pute u, Kret thliarkarah khan phelh lovin, ka thu kha awiha heng chhiat leh boralna hi thlen lo tur in ni na a le.
27:22 Nimahsela tunah pawh hian thlamuang taka awm turin ka fuih a che u; in zingah tumahin nunna in hloh dawn lo ve, lawng erawh hi chu a bo dawn a ni.
27:23 A ta ka ni a, a rawng ka bawl thin Pathian kha, chu mi vantirhkoh pakhat nizan khan ka kiangah a lo ding a, ka hnenah,
27:24 ‘Paula, hlau suh, Kaisara hmaah i ding tur a ni; tin, ngai rawh, lawnga i hnena kal zawng zawngte pawh hi Pathianin a pe a che,’ mi ti a ni.
27:25 Chuvangin pute u, thlamuang takin awm rawh u; Pathian ka ring e, mi hrilh ang zelin a awm dawn.
27:26 Nimahsela thliarkar engah emaw min len chhuak tur a ni,” a ti a.
27:27 Tin, Adria tuifinriatah thliin lehlam lehlamah min len min len a, zan sawm leh zan li a tlin zan chuan, zan laiah emaw, lawng mite chuan khawii khawmual emaw thleng dawnin an inhria a;
27:28 chutichuan tui thuk lam an teh a, hlam sawmhnih niin an hria a; tin, rei lo tean an teh leh a, hlam sawm leh hlam ngain an hria a.
27:29 Tin, lawng mei lamah thirchakai pali an thlaka, chutilochuan lung chhe hmunah min len chhuak hlauh dah ang e, tih an hlau va; tin, khawvar hlan an nghakhlel hle mai a.
27:30 Tin, lawng mite chuan lawnghnar lamah thirchakaite thlak tur anga tiderin, lawngleng chu tuifinriatah an thlak a, lawng chu tlansan an tum a,
27:31 chu mi laiin Paula chuan sipai za hotu leh sipaite hnenah chuan, “Hengho hi lawnga an awm reng loh chuan in him thei lo vang,” a ti a.
27:32 Tichuan sipaite chuan lawngleng hruite chu an zai chat a, an thlah ta a.
27:33 Tin, khawvar dawn lai chuan Paulan mi zawng zawng chu chaw eiah a tir a, “Vawiin hi ni sawm leh ni li a ni tawh, engmah ei lovin in nghak a, in nghei reng a ni.
27:34 Chuvangin chaw ei atan ka tir chiam a che u; in damna tur a nih hi; in zingah tumah a samzai pakhat mah a boral lo vang,” a ti a.
27:35 Tin, chu thu chu a sawi zawhin chhang a la a, mi zawng zawng hmaah Pathian hnenah lawmthu a sawi ta a; tin, a phel a, a ei tan ta a.
27:36 Tin, anni pawh thlamuang takin an awm a, chaw an ei ve ta a.
27:37 Tin, lawnga mi chu kan zain zahnih leh sawmsarih leh paruk kan ni a.
27:38 Tin, an ei kham chuan buh chu tuifinriatah an paih a, lawng an tizang deuh va.
27:39 Tin, ni a chhuah chuan khawmual chu khawii lai nge a nih an hre lo va; nimahsela khawii litengsawl emaw tiaupho nei an hmu a, chu mi chungah chuan, an theih chuan, lawng tlan chhuahtir an tum a.
27:40 Tin, thirchakai thlunnate chu an zai chat a, tuifinriatah an hnutchhiah a; chu mi rualin karherna phuarnate chu an phel a, hma lam puanzar chu thli chhem tur ziain an hnuk chho va, thiaupho chu an pan ta a.
27:41 Nimahsela tuizangkhauh pahnih intawhna hmunah kan lut hlauh va, lawng chu lei an suttir ta a; tichuan lawn ghnar lam chu a tang ta tlat a, tihchet zawh lohvin a awm reng a, a mei lam erawh chu tuifawn a nasat avangin a kehsawm tan ta a.
27:42 Tin, sipaiten mi tangte chu tihhlum an rawt a, chutilochuan tui hleuh kaite an awm ang a, an tlanbo vang tih an hlau va.
27:43 Nimahsela sipai za hotu chuan Paula chhanhim a duh a, an thil tum chu a khap a; tui hleuh thiam apiang tuifinriatah zuan thlaka khawmual lo kai hmasa tur leh,
27:44 mi dang chu, a then thingphek chungahte, a then lawng bungraw dang chungahte kai turin thu a pe a. Chutiang chuan an zain khawmualah him takin an kai ta vek a.
28:1 Tin, kan kai zawh chuan thliarkar hming chu Meliti a ni tih kan lo hre ta a.
28:2 Tin, awze miten khawngaih namenin min khawngaih lo va; ruah a lo sur avang leh a vawh avangin mei an chhem a, kan zain min lo lawm a.
28:3 Tin, Paula chuan thing tel khat a fawm a, meiah a tuah a, a sat avangin rul a lo chhuak a, a kutah a chu a, a bet reng a.
28:4 Tin, awze mite chuan rannung a kuta inkhai reng chu an hmuhin, “He mi hi tualthat a ni phawt e, tuifinriat atangin tlan chhuak mah sela Phubalatua chuan a nun a awih tawh lo a nih hi,” an ti a.
28:5 Nimahsela ani chuan rannung chu meiah a thing thla a, engmah a ti lo va.
28:6 Anni erawh chuan a vun emaw thawklehkhata thia a tluk nghal an ring a; tin, rei tak an nghak reng a, engmah a ti lo tih an hriat chuan an rilru an lamlet a, “Pathian a nih hi,” an ti ta zawk a.
28:7 Tin, chu mi hmun kiangah chuan chu mi thliarkara lal ber a hming Publia ram a awm; chu mi chuan min lo lawm a, ni thum lawm takin min thleng a.
28:8 Tin, Publia pa khawsik leh santen veiin a lo mu reng a; tin, Paula a hnenah a lut a, a tawngtai a, a chungah a kutte a nghat a, a tidam ta a.
28:9 Chu chu a tih zawh chuan chu mi thliarkara mi dang na nei apiang chu an lo kal a, an dam ta hlawm a;
28:10 chu mite chuan nasa takin min chawimawi a; tin, kan kal dawn chuan kan chakkhai apiang lawngah an dah hlawm a.
28:11 Tin, thla thum chinah, a hming Phir, Aleksandria khaw lawng, thlasika thliarkara awm tawh, chu mi lawngah chuan kan kal ta a.
28:12 Tin, Surakus khua kan tlawh a, chutah chuan ni thum kan cham a.
28:13 Chuta tangin kan kal kual a, Region khua kan thleng a; tin, ni khat chinah chhim thli a lo tleh a, atuk lehah Puteoli khua kan thleng leh a;
28:14 chutah chuan unaute kan hmu a, an hnena ni sarih chaman min thlem a; chutiang chuan Rom khaw lamah kan kal ta zel a.
28:15 Tin, unauten kan chanchin an hriat veleh chuta tang chuan Appia Dawr leh Khualbuk Pathum chinah min hmuak turin an lo kal a; Paulan chu mite chu a hmuh chuan Pathian hnenah lawmthu a sawi a, a muang ta a.
28:16 Tin, Rom khuaa kan luh chuan Paula chu a vengtu sipai hnenah amah chauhva awm an phal a.
28:17 Tin, ni thum chinah Paula chuan Judate hotu deuh apiang a ko khawm a; tin, an rawn inkhawmin an hnenah, “Unaute u, mi zawng zawng leh min thlahtute dan chunga engmah ka tih loh pawhin Jerusalem khua atangin Rom mite hnenah mi tantir a ni.
28:18 Tin, anni chuan mi chhuahchhal zawhin thihna khawp meuh ka chungah engmah a awm loh avangin thlah mi tum a.
28:19 Nimahsela Judaten chu chu an hnial avngin Kaisara hnena thlen lo thei ka ni ta lo va; nimahsela ka chite hekna neia ti ka ni lo ve.
28:20 Chung kawngah chuan nangmahni hmuhah leh biak atan ka ko che u a ni; Israelte beisei ka tawmpui avanga he khaidiat hi bun ka ni si a,” a ti a.
28:21 Tin, anni chuan a hnenah, “I chanchin Judai ram ata lehkhatein kan hmu hek lo, unaute tumahin heta lo kalin i chungah thupawi engmah an puang hek lo, sawi pawh an sawi hek lo.
28:22 Amaherawhchu he pawl hi ram tinah sawichhiat an ni si a, nangin engtin nge i ngaih hriat kan duh e,” an ti a.
28:23 Tin, ni an tiam a, chu mi niah chuan a thlen inah a hnenah mi tam tak an lo kal a; zing atangin tlai lam thlengin an hnenah chu thu chu a hrilhfiah a, Pathian ram thu a hriattir a, Mosia Dan Lehkha thu leh Zawlneite Lehkhabu thuin Isua lamah anmahni a thlem a thlem a.
28:24 Tin, a thenin a thusawi chu an ring a, a thenin an ring lo va.
28:25 Tin, an inngeih ta lo va, Paulan thu kamkhat a sawi zawhin an kal chhuak ta a. A thusawi chu hei hi a ni; “Thlarau Thianghlimin zawlnei Isaia kaan in thlahtute hnena a sawi kha, a dik ngawt mai,
28:26 He chite hnenah hian va sawi rawh: Beng zawngin in hre na ang a, a ngaihna erawh in hre tawp lo vang; Hmuh zawng in hmu na ang a, hriat erawh chu in hre tawp lo vang;
28:27 He chite thinlung hi a lo chawlawl ta a, An bengte a lo ngawng deuh va, An maimichhing bawk a, ‘Chutilochuan kan mitin kan hmu ang a, Kan bengin kan hria ang a, Kan thinlungin kan hre bawk ang a, Kan hawi kir leh ang a, Anin min tidam hlauh dah ang e,’ an ti a, a tih kha.
28:28 Chutichuan Pathian chhandamna thu hi Jentailte hnena thawn a ni tih hre rawh u, anni zawngin ngaih pawh an ngaithla ang,” a ti a.*
28:30 Tin, Paula chu kum hnih pumhlum ama in hawhah a awm a, a hnena lut apiang a lawm thin a.
28:31 Pathian ram thu a hrilh a, Lal Isua Krista thu pawh huai takin a zirtir thin a, tumahin amah an khap si lo va. |
posted by zoblog @ 11:35 AM  |
|
|
|
