| Wednesday, September 12, 2007 |
1:1 Lal Daria lal kum hnihna, a thlarukna, chumi thla ni hmasa berah chuan, zâwlnei Hagaia kuta LALPA thu chu, Sealtiela fapa Judai ram awptu Jerubabela hnênah leh Jehozadaka fapa Puithiam lalber Josua hnênah a lo theng a, heti hian a ti:
1:2 Sipaihote LALPA chuan heti hian a ti, hêng mite hian, LALPA in sak hun tur chu a lo la thleng lo ve, an ti e, tiin.
1:3 Tin, zâwlnei Hagaia kutah LALPA thu a lo thleng a;
1:4 He in hi a ram reng laia nangni, in chungthuah neitea in chên hi a hun em ni? Tiin.
1:5 Tûnah zawng sipaihote LALPA chuan heti hian a ti:i kawngte chu chhût ngun rawh u.
1:6 Tam tak in chîng a, tlêmte in seng si; in ei a in tlai si lo; in in a in kham silo; in sin a, in lum chuang si lo; inhlawhfa chuan ip pawpa thlâk atân mai a hlawh a ni.
1:7 Sipaihote LALPA chuan heti hian a ti: In kawngte chhût ngun rawh u.
1:8 Tlângah kal chho ula, thing han la ula, in chu sa rawh u; chu chu ka lâwm ang a, chawimawiin ka awm ang, LALPAN a ti.
1:9 Hmuh teuh in beisei a, ngaiteh u, tlêmte a lo ni; inah in rawn thlen a, ka lo chhêm bo va. Eng vâng nge ni? Tih hi sipaihote LALPA thu chhuak a ni. Nangni inlam pan theuhva in tlân haw thuai thîna ka in chu a ram dêr avâng a ni.
1:10 Chuvâng chuan vânin daifîm tla tûr a hrênsak che u a, lei chuan a rah a hrênsak bawk che u a ni.
1:11 Lei chungah te, tlâng chungah te, buh chungahte, uain chungah te, hriak chungah te, lei atanga thil lo chhuak chungah te, mihring chungah te, ran chungah te, kuta thawhchhhuah zawng zawng chungah te khua ka tikhêng a ni e.
1:12 Tichuan Seatiela fapa Zerubabela leh Jehozadaka fapa puithiam lalber Josua leh mi la awmchhun zawng zawngte chuan LALPA an pathian aw leh LALPA an pathianin a tirh anga zâwlnei Hagaia thu chu an bengkhawn ta a; mite chuan LALPA chu a hmai hmaah chuan an tih ta a.
1:13 Tichuan, mite hnêna LALPAthuchah hmang chuan LALPA tirhkoh Hagaia chuan a sawi a, in hnênah ka awm a ni, tih hi LALPA thu chhuak a ni, tiin.
1:14 Zerubabela rilru leh Jehozadaka fapa, puithiam Lalber Josua rilru leh mi la awm chhun zawng zawngte rilru chu a chawk tho ta a; tichuan an lo kal a, sipaihote LALPA an pathian inah chuan hna an thawk ta a;
1:15 Lal Daria lal kum hnihna, a thla rukna, chumi thla ni sawmhnih leh ni linaah chuan.
2:1 Thla sarihna, chumi thla ni sawmhnih leh ni khatnaah zâwlnei Hagaia kutah LALPA thu a lo thleng a:
2:2 Seatiela fapa, Judai ram awptu Zerubabela hnênah leh mi la awm chhunte hnênah chuan heti hian sawi ta che, a ti a.
2:3 He in hi a hmâa a ropui lai hmu in zingah tunge la awm? Tûnah hian eng ang in nge in hmuh le? In mit hmuh ah eng tham mah a ni lo lâwm ni?
2:4 Aw Jerubabel, tûnah chuan huai takin awm rawh, tih hi LALPA thu chhuak a ni; Aw puithiam lalber Josua, Jehozadaka fapa, nangpawh chak takin awm rawh; tin, nangni he rama mi zawng zawngte u, chak takin awm bawk rawh u, tih hi LALPA thu a chhuak a ni; thawk rawh u, in hnênah ka awm si a, tih hi Sipaihote LALPA thu chhuak a ni:
2:5 Aigupta ram atanga in lo chhuah laia thu ka thlun pui che u ang khân in zîngah ka thlarau a la chêng reng a ni, hlau suh u.
2:6 Sipaihote LALPA chuan heti hian a ti si a, vawikhat chu reilo teah vân te leh leite leh tuifinriat te leh khawmualte ka ti nghîng ang.
2:7 Hnam tinreng ka ti nghîng ang a, hnam tinrêng thil duhzâwngte chu a lo thleng ang a, he in hi ropuinain ka ti khat ang, sipaihote LALPA chuan a ti.
2:8 Tangkarua hi ka ta a ni a, rangkachak hi ka ta a ni, tih hi sipaihote LALPA thu chhuak a ni.
2:9 He in ropuina hnuhnûng zâwk hi a hmasa ai khân a nasa zâwk ang, sipaihote LALPA chuan a ti: tin, hehmunah hian remna ka thlen ang, tih hi sipaihote LALPA thu chhuak a ni.
2:10 Daria lal kumhnihna, thla kuana, ni sawmhnih leh ni linaah chuan zâwlnei Hagaia kutah LALPA thu hetiang hian a lo thleng a.
2:11 Sipaihote LALPA chuan heti hian a ti: puithiamte chu dân heti hian zâwt teh,
2:12 Tuin emaw a kawrfual hmâwrah sa thianghlim fûn sela, a kawrfual hmâwr chuan chhang emaw thil chhum kawi emaw, uain emaw, hriak emaw, ei tûr rêng rêng emaw lo khawih ta sela, a thianghlim ang em? Tiin. Puithiamte chuan, Thianghlim lo vang, tiin an chhang a.
2:13 Tin, Hagaia chuan, mitthi ruang khawih avânga mi bawrhbângin hêng thil a enga pawh hi lo khawih ta sela, a bawrhbâng ang em? A ti a, Puithiamte chuan, bawrhbâng ang tiin an chhâng a.
2:14 Tin, Hagaia chuan heti hian a chhâng taa: he mite hi chutiang tak chu an ni a, he hnam hi chutiang tak chuan ka hmâah an awm, tih hi LALPA thu chhuak a ni;' an kutchhuak tinreng pawh chutiang bawk chu a ni a, chuta an thil hlân pawh chu a thianghlim lo a ni.
2:15 Tûn atangin nakin hnu thlengin LALPA biak inah lungin chherchhuan hmâ, tûn hma lam kha ngaihtuah ang che u:
2:16 khâng hun lai zawng zawng khân buh tehkhâwng sawmhnih tling âwm tak chhûn khâwmnaa mi a lo kalin sawmhnih chauh a lo tling thîn.
2:17 In thawh chhuah zawng zawngah rona te, ngêtna te leh rial tein ka hrem che u a; nimahsela ka lam in hawi chuang lo, tih hi LALPA thu chhuak a ni.
2:18 He thla kuana, ni sawmhnih leh ni lina, vawin ni atang hian nakin hnu thlengin, tûn hmalam kha ngaihtuah ang che u, LALPA biakin lungphûm ni atang khân ngaihtuah rawh u.
2:19 A chi chu buh inah a la awm em ni? Grêp hrui te, theipui kûng te, pawmgranet te leh olive thing te chu a la rah lo; vawiin ni atang hian mal ka sawm ang che u.
2:20 Tin, LALPA thu chu, chumi thla, ni sawmhnih leh nilinaah chuan Hagaia hnênah a lo thleng nawn leh a;
2:21 Hetiang hian Judai ram awptu Zerubabela hnênah chuan sawi rawh: kei chuan lei leh vân ka ti nghîng thîn: ram lalthutphahte chu ka paihthla ang a, hnamte ram chakna chu ka tichhia ang;
2:22 tawlailîrte leh a chunga chuangte chu ka ti tlu ang a, sakawrte leh a chunga chuangte chu mitin mahni unau te khandaihin an tlu ang.
2:23 Chumi nîah chuan, aw Zerubabel ka chhiahhlawh, Seatiela fapa, ka chelh ang che,sipaihote LALPA thu chhuak chuan a ti; hming nemna zungbun angah ka siam bawk anag che, LALPA thu chhuak chuan a ti; nang ka thlang tawh si che a ni, Sipaihote LALPA thu chhuak chuan a ti," tiin. |
posted by zoblog @ 11:49 AM  |
|
|
|
