| Wednesday, September 12, 2007 |
1:1 Abrahama thlah, Davida thlah, Isua Krista thlahtute inthlah dân chachin chu:
1:2 Abrahaman Isaaka a hring a; Isaakan Jakoba a hring a; Jakoban Juba leh a unaute a hring a;
1:3 Judan Tamari lakah Pharesa leh Zera a hring a; Pharesan Eroma a hring a; Eroman Arama a hring a;
1:4 Araman Aminadaba ahring a;Aminadaban Nasona a hring a; Nasonan Salmona a hring;
1:5 Salmonan Rahabi lakah Boaza a hring; Boazan Ruthi lakah Obida a hring a; Obidan Jesaia a hring a;
1:6 Jesaian lal Davida a hring a.Tin, Davidan Uria nupui lakah Solomona a hring a;
1:7 Solomonan Rehoboama a hring a; Rehoboaman Abia a hring a; Abian Asa a hring a;
1:8 Asan Jehosaphata a hring a; Jehosaphatan Jehorama a hring a; Jehoraman Uzia a hring a;
1:9 Uzian Jothama a hring a; Jothaman Ahaza a hring a; Ahazan Hezekia a hring a;
1:10 Hezekian Manasea a hring a; Manasean Amona a hring a; Amonan Josia a hring a;
1:11 Babulon lama sala an hruai lai vel khan Josian Jekonia leh a unaute a hring a.
1:12 Tin, Babulon lama sala an hruai hnuin Jekonian Salathiela a hring; Salathielan Zerubabela a hring a;
1:13 Zerubabelan Abiuda a hring a; Abiudan Eliakima a hring a; Eliakiman Azora a hring a;
1:14 Azoran Zadoka a hring a; Zadokan Akima a hring; Akiman Eliuda a hring a;
1:15 Eliudan Eleazara a hring a; Eleazaran Matthana a hring a; Matthanan Jakoba a hring a;
1:16 Jakoban Josefa, Mari pasal chu a hring a; chu mi Mari lakah chuan Isua, Krista an tih hi, a lo piang ta a.
1:17 Chutichuan, chhuan zawng zawng chu, Abrahama atangin Davida thlengin, chhuan sawm leh chhuan li a ni a; Davida atangin Babulon lama sala an hruai thlengin, chhuan sawm leh chhuan li a ni a; Babulon lama sala an hruai atangin Krista thlengin, chhuan sawm leh chhuan li a ni a.
1:18 Tin, Isua Krista lo pian dan chu hetiang a ni: A nu Mari chu Josefa nen an inhual laiin, an inpawl hmain,Thlarau Thianghlimin a raitir tih an lo hre ta a.
1:19 Tichuan, a pasal tur Josefa chu,mi fel tak a ni a,tlang thantir a duh lo va, a rukin bansan a tum a.
1:20 Nimahsela, Chung thu chu a ngaihtuah laiin ngai teh, a mangah Lalpa vantirhkoh a hnenah a lo inlar a, “Josef, nang Davida fapa, i nupui hual Mari chu neih hlau suh;a naupai chu Thlarau Thianghlim laka mi a ni asin. 21Fapa a hring anga a hmingah ISUA i sa ang: ani chuan a mite an thil tihsual lakah a chhandam dawn si a,” a ti a.
1:22 ,23 Tin, Lalpa zawlnei kaah,“Ngai teh, nula thianghlim chu a rai ang a, Fapa a hring ang a, A hmingah Emmanuela an sa ang,” tia a sawi kha a lo thlen theihna turin chung zawng zawng chu a lo awm a ni. (Emmanuela chu, ‘Kan hnena Pathian awm,’ tihna a ni)
1:23 ,22 Tin, Lalpa zawlnei kaah,“Ngai teh, nula thianghlim chu a rai ang a, Fapa a hring ang a, A hmingah Emmanuela an sa ang,” tia a sawi kha a lo thlen theihna turin chung zawng zawng chu a lo awm a ni. (Emmanuela chu, ‘Kan hnena Pathian awm,’ tihna a ni)
1:24 Tichuan, Josefa chu a muhil a tho va, Lalpa vantirhkohvin a hnena thu a pek ang chuan a ti a, a nupui hual chu a nei ta a;
1:25 nimahsela, fapa a hrin hma loh zawng a pawl lo; tin, a hmingah ISUA a sa ta a.
2:1 Tin, lal Heroda a lal laia, Judai rama Bethlehem khuaa Isua a lo pianin ngai teh, khaw chhak lam ata mi fingte Jerusalem khuaah an lo kal a,
2:2 “Khawiahnge Judate lal lo piang chu? Khaw chhak lamah a arsi kan hmu a, amah chibai buk turin kan lo kal a ni,” an ti a.
2:3 Tin, lal Heroda chuan chu chu a hriat veleh a mangang ta a, Jerusalem-a mi zawng zawng pawh an mangang ve a.
2:4 Tichuan, puithiam lalte leh mite lehkha ziaktute zawng zawng a ko khawm a. Krista pianna tur chu a zawt a.
2:5 Tin, anni chuan a hnenah, “Judai rama Bethlehem khuaah; heti hian zawlneiin a ziak kha,
2:6 “Nang, Bethlehem, Judai rama mi, Judai khawpuite zingah i te ber tawp lo! I chhung atangin awptu a lo chhuak dawn si a, Ka mi Israelhote vengtu tur chu,’ tih hi,” an ti a.
2:7 Chu mi hnuah chuan Herodan arukin mi fingte chu a ko va, dilchhut takin arsi lan lai chu a zawt chhuak a.
2:8 Tin, anni chu Bethlehem khuaah a kaltir a, “Kal ta ula, naute thu chu dilchhut takin zawt chhuak rawh u; tin, kei pawhin amah chu chibai ka rawn buk ve theih nan, in hmuh veleh mi rawn hrilh ang che u,” a ti a.
2:9 Tin, lal thu chu an hria a, an kal ta a; tin, ngai teh, khaw chhak lama arsi an hmuh kha, naute awmna chung zawn a thlena a din hma loh zawng, an hmaah a kal zel a.
2:10 Tin, arsi chu an hmuhin an hlim nasa em em a.
2:11 Tin, in chhungah an va lut a, a nu Mari hnena naute chu an hmu a, an bawkkhup a, chibai an buk a; tin, an ro bawmte an hawng a, a hnenah chuan lawman – rangkachak te, beraw te, murra te – an pe a.
2:12 Tin, Heroda hnenah kir leh lo turin an manga hrilha an awm avangin, anmahni khawlamah kawng dangah an haw ta a.
2:13 Tin, an hawn hnuin ngai teh, Lalpa vantirhkoh Josefa hnenah a mangah a inlar a, “Tho la, naute leh a nu hruai la, Aigupta ramah tlan bo rawh, ka hrilh leh hma loh che zawng chutah chuan awm reng ang che; Herodan naute tiboral turin a zawng dawn a ni,” a ti a.
2:14 Tichuan, a tho va, a zan a zanin naute leh a nu chu a hruai a, Aigupta ramah a kal ta a;
2:15 tin, Heroda thih hma loh zawng chutah chuan a awm reng a; Lalpan zawlnei kaah, “Ka fapa chu Aigupta ram atan ka ko chhuak a,” tia a sawi kha a lo thlen theih nan.
2:16 Chutih lai chuan Herodan, mi fingte tihder a nih a inhriat veleh a thinur em em a, mi a tir a, a hun lai tak thu dilchhut taka mi fingte a zawh chhuah ang khan Bethlehem khua leh a vel zawng zawnga, mipa naupang kum hnih achin hnuai lam chu an zain a that ta vek a.
2:17 ,18 Chutih lai chuan zawlnei Jeremian, “Rama khuaah thawm an hria, Tap te, mitthi ngaia chiau vawng vawng te; Rakili chuan a fate a tah a, An awm tawh loh avangin a thlamuan theih loh,” tia a sawi kha a lo thleng ta.
2:18 ,17 Chutih lai chuan zawlnei Jeremian, “Rama khuaah thawm an hria, Tap te, mitthi ngaia chiau vawng vawng te; Rakili chuan a fate a tah a, An awm tawh loh avangin a thlamuan theih loh,” tia a sawi kha a lo thleng ta.
2:19 Nimahsela, Heroda chu a thih hnuin ngai teh, Lalpa vantirhkoh Aigupta ramah chuan Josefa hnenah a mangah a inlar a,
2:20 “Tho la, naute leh a nu hruai la, Israel ramah kal rawh: naute thah tumte kha an thi tawh e,” a ti a.
2:21 Tichuan, a tho va, naute leh a nu chu a hruai a, Israel ramah a lut ta a.
2:22 Nimahsela, Arkeulasa a pa Heroda ai awhin Judai ramah a lal tih a hriatin chuta kal a hlau ta a; tin, a manga hrilha a awm avangin Galili lamah a kal ta daih a,
2:23 khaw pakhat Nazaret an tihah chuan a va awm ta a: “Ani chu ‘Nazaret mi’ an ti ang,” tia, zawlneite kaa an sawi kha a lo thlen theih nan.
3:1 Tin, chung lai chuan Baptistu Johana chuan, “Sim rawh u! van ram chu a hnai tawh e,” tiin, Judai thlalerah thu hrilin a lo kal a.
3:3 (Amah chu a ni, zawlnei Isaian,“Thlalera mi au rawl chuan, ‘Lalpa lamlian sial ula, A kawngte tingil rawh u,’ a ti,” tia a sawia kha.)
3:4 Tin, chu mi Johana chuan sanghawngsei hmul puan a sin a, a kawng chu savun kawnghrenin a hreng a; a chaw chu khaukhuap leh khawizu a ni.
3:5 Chu mi lai chuan Jerusalem khuaa mi te, Judai rama mi zawng zawng te, Jordan lui dung vela mi zawng zawng te an chhuak a, a hnen lamah an kal a,
3:6 an sualte thupha chawiin Jordan luiah chuan, ama hnenah baptisma an chang ta hlawm a.
3:7 Nimahsela, Pharisaite leh Saddukaite tam tak a baptisma chang tura lo kal a hmuh veleh an hnenah, “Rul thlahte u! thinur lo thleng tur hi tlansan turin tuinnge zilh che u?
3:8 Chutichuan, sim hming pu tlain rah rawh u:
3:9 “Abrahama kan thlahtu a ni alawm,’ tiin, inngaihtuah suh u; Pathianin heng lungte hi Abrahama thlahahte a dintir thei e, ka tih che u hi.
3:10 Tun apangin thing bul tinah hreipui an dah tah; chutichuan thing tin rah thaa rah lo aiang an kit a, meiah an paih thin.
3:11 Kei zawngin simna turin tuiin ka baptis thin che u a; nimahsela ka hnunga lo kal tur chu keimah aiin a ropui zawk a, a pheikhawk keng tlak pawh ka ni lo ve. Ani chuan Thlarau Thianghlim leh meiin a baptis ang che u;
3:12 A kutin a sisep a keng a, a hrui a zap fai hliau ang a, zemah chuan a buh a khung ang, a si erawh chu mei mit thei lovin a halral ang,” a ti a.
3:13 Chu mi lai chuan a hnena baptisma chang turin, Galili ram atangin Jordan luiah Johana hnenah Isua a lo kal a.
3:14 Johana erawh chuan, “I mi baptis ka tul zawk si a, ka hnenah i lo kal zawk a ni maw?” tiin, khap a tum a.
3:15 Nimahsela Isuan a hnenah, “Tunah rem ti hram rawh, hetianga felna zawng zawng hlen chhuah hi kan tan a mawi a ni,” tiin a chhang a. Tichuan, rem a ti ta a.
3:16 Tin, Isua baptisma a chan veleh tui atan a chhuak ta nghal a: tin, ngai teh, a tan van a lo inhawng a, Pathian Thlarau chu thuro anga lo chhukin, a chunga lo fu a hmu a.
3:17 Tin, ngai teh, van atangin awin, “Hei hi ka Fapa duh tak, ka lawm em ema chu a ni,” a ti a.
4:1 Chu mi zawhah chuan Isua chu diabola thlema awm turin thlalerah Thlarau hruai luhin a awm ta a.
4:2 Tin, ni sawmli leh zan sawmli a nghei hnuin a ril a lo tam ta a.
4:3 Tin, thlemtu chu a lo kal a, a hnenah, “Pathian Fapa i nih chuan heng lung hi chhanga chang turin thu pe rawh,” a ti a.
4:4 Nimahsela, ani chuan, “ ‘Mihring hi chhang chauhvin an nung lo vang a, Pathian kaa thu tin chhuakin an nung zawk ang,’ tih ziak a ni,” tiin a chhang a.
4:5 Chu mi zawhah chuan diabolan khaw thianghlimah chuan a hruai lut a, Pathian biak in chhip zumah chuan a dah a,
4:6 tin, a hnenah, “Pathian Fapa i nih chuan tla thla rawh, ‘I chung thuah zawng a vantirhkohte chu thu a pe ang a, An kutin an dawm ang chia, Chutilochuan, i kein lung i chhuih hlauh dah ang e, tih ziak a ni si a,” a ti a.
4:7 Isuan a hnenah, “ ‘Lalpa i Pathian fiah suh,’ tih ziak a ni ve bawk e,” a ti a.
4:8 Tin, diabola chuan tlang sang takah a hruai leh a, khawvel ram zawng zawng leh a
4:9 Tin, a hnenah, “Bawkkhupin chibai mi buk la, heng zawng zawng hi ka pe vek ang che,” a ti a.
4:10 Chu veleh Isuan a hnenah, “Setan, kal bo daih rawh! ‘Lalpa i Pathian chibai buk la, ama rawng chauh bawl rawh,’ tih ziak a ni,” a ti a.
4:11 Chu mi hnuah chuan diabola chuan a kalsan ta a. Tin, ngai teh, vantirhkohten a rawng an rawn bawlsak ta a.
4:12 Tin, Johana an man tih Isuan a hriat veleh Galili ramah a kal ta daih a;
4:13 tin, Nazaret khua a kalsan a, Kapernaum khuaah a awm ta reng a, (chu chu Zebulon leh Nephthaleim biala, dil kama awm a ni):
4:14 ,15 Zawlnei Isaia kaah, “Dil lama, Jordan rala, Zebulon ram leh Nephthaleim ram, Jentailte Galili;
4:15 ,14 Zawlnei Isaia kaah, “Dil lama, Jordan rala, Zebulon ram leh Nephthaleim ram, Jentailte Galili;
4:16 Thim hnuaia thute chuan eng nasa tak an hmu a, Thihna hmun leh a hlima thute chungah chuan, Eng a lo chhuak ta a,” tia a sawi kha a lo thlen theih nan.
4:17 Chuta chinah chuan Isuan, “Sim rawh u! van ram a hnai tawh e,” tiin a hril tan ta a.
4:18 Tin, Galili dil kama a len pahin, unau pahnih, Simona (Petera an tih chu) a unau Andria nen, dilah chuan len dengin a hmu a; sangha mantu an ni reng a.
4:19 in, ani chuan an hnenah, “Mi zui rawh u, tichuan mihring mantuah ka siam ang che u,” a ti a.
4:20 Tin, lente chu kalsanin an zui ta nghal a.
4:21 Tin, chuta tangin a kal zel a, unau dang pahnih, Zebedaia fapa Jakoba leh a unau Johana chu, an pa Zebedaia hnenah lawngah an lente siamthain a hmu a; tin, anni chu a ko ta a.
4:22 Tichuan, lawng leh an pa chu an kalsan a, an zui ta nghal a.
4:23 Tin, Isuan an inkhawmna inahte zirtirin, Ram Chanchin Tha chu hrilin, mite zinga natna tinreng leh chak lohna tinreng tidamin, Galili ram zawng zawng a fang vel a.
4:24 Tin, Suria ram zawng zawngah a chanchin a thang ta a; tichuan, mi dam lo zawng zawng, dam lohna leh natna tinreng tuarte, ramhuai mante, thla em ate, zengte, a hnenah an rawn hruai a; a lo tidam hlawm a.
4:25 Galili ram atang te, Dekapoli khua atang te, Jerusalem khua atang te, Judai ram atang te,Jordan ral atangte chuan mipui tam takin amah an zui bawk a.
5:1 Tichuan, mipuite chu a hmuhin tlangah a kal chho va, tin, a thu a, a zirtirte a hnenah an lo kal a;
5:2 tin, thu a sawi a, anmahni a zirtir a.
5:3 “Rilrua retheite chu an eng a thawl e; van ram an ta a ni si a.
5:4 “Lungngaite chu an eng a thawl e, thlamuanin an la awm dawn si a.
5:5 “Thuhnuairawlhte chu an eng a thawl e; lei hi an la rochung dawn si a.
5:6 “Felnaa riltama tuihalte chu an eng a thawl e; an la tlai dawn si a.
5:7 “Mi khawngaih thei takte chu an eng a thawl e; khawngaih an la hlawh dawn si a.
5:8 “Thinlunga thianghlimte chu an eng a thawl e; Pathian an la hmu dawn si a.
5:9 “Remna siamtute chu an eng a thawl e; Pathian faa vuahin an la awm dawn si a.
5:10 “Felna avanga tihduhdah tuar hnute chu an eng a thawl e; van ram an ta a ni si a.
5:11 “Miin keimah avanga an hau che u a, an tihduhdah che u a, dawta sual tinrenga an hek hunah che u, in eng a la thawl ang.
5:12 “Lawm ulangin, nasa takin hlim rawh u; vanah in lawman a awm hnem si a; chutiang bawkin in hmaa zawlnei awmte pawh an tihduhdah thin kha.
5:13 “Lei chi in ni e; nimahsela chi hi a dak tawh chuan engin nge an tihal leh ang? chuta chinah chuan paih chhuaha, mihringte rah mai mai chauhvah lo chuan eng atan mah a tlaktlai lo.
5:14 “Khawvel eng in ni e. Tlang chhipa khaw awm chu thuhruk theih a ni lo.
5:15 Miin Khawnvar halin hrai hnuaiah an dah ngai lo, a dahnaah an dah zawk thin; tichuan in chhunga mi zawng zawng a en thin.
5:16 Chutiang bawkin in eng chu mi mit hmuhin eng rawh se, chutichuan in thil tih thatte an hmu ang a, in Pa vana mi an chawimawi thei ang.
5:17 “Dan thu emaw, zawlneite thu emaw tiboral tura lo kal ka nih ring suh u; tiboral tura lo kal ni lo va, tifamkim tura lo kal ka ni zawk.
5:18 Tih tak meuhvin ka hrilh a che u, lei leh van hi a boral hma loh chuan Dan thu a mi chhun han te tak te emaw, thai han te tak te emaw, pakhat mah a boral tawp lo vang, a zaa a thlen kim hma loh zawng.
5:19 Chutichuan, tupawh heng thupek te ber zingah hian pakhat pawh bawhchhiaa, chutiang ti ve tura mite zirtir apiang chu, van ramah chuan mi te ber an ti ang; amaherawhchu, tupawh zawma, zirtir ve apiang chu, van ramah chuan mi lian an ti ang.
5:20 In felnain lehkhaziaktute leh Pharisaite felna hi a khum loh chuan, van ramah in lut tawp lo vang tih ka hrilh che u a nih hi.
5:21 “Hman laia mite hnenah chuan, ‘Tual thah tur a ni lo,’ an tih leh, ‘Tupawh tual that apiang chu a chung thu rel a ni ang’ tih a nih in hria a.
5:22 Kei erawh chuan ka hrilh a che u, tupawh a unau chunga thinur apiang chu, a chungthu rel a ni ang a; tupawh a unau ‘mi chhawih pa’ ti apiang chu, rorelna sanga a chungthu rel a ni ang; tin, tupawh ‘mi a pa’ ti apiang chu, hremhmun meia kal tlak a ni ang tih ka hrilh a che u.
5:23 Chutichuan, maicham bula i thilpek i hlan lai ngeia, i unauvin i chungah lungnih lohna a nei tih i hriat chhuah leh chuan,
5:24 chuta maicham hmaah chuan i thil pek chu hnutchhiah la, kal langin i unau rem zet la, chu mi hnuah chuan i thilpek chu rawn hlan rawh.
5:25 I khingpui chu kalkawnga in kal dun laiin rem thuai rawh, chutilochuan i khingpui chuan roreltu a mantir ang chia, roreltu chuan tiangkengtu hnenah chuan a pe ang chia, tan inah an khung hlauh dah ang che.
5:26 Tih tak meuhvin ka hrilh a che, Pawisa te pawh i tlak kim hma loh chuan, chuta ta chu i chhuak lo hul hual ang.
5:27 ‘I uire tur a ni lo,’ an ti tih in hre tawh.
5:28 Kei erawh chuan, tupawh ngaih chaka hmeichhe melh apiang chu, a thinlungah a uire tawh reng a ni tih ka hrilh a che u.
5:29 Tin, i mit ding lamin a tihtluk che chuan, kher chhuak la, paih daih rawh; i taksa apuma Gehenna-a paih ai chuan, i taksa peng pakhat boral chu i tan a tha zawk a ni.
5:30 Tin, i kut ding lamin a tihtluk che chuan, tan la, paih daih rawh; i taksa apuma Gehenna-a kal ai chuan, i taksa peng pakhat boral chu i tan a tha zawk a ni.
5:31 “ ‘Tupawh nupui ma apiang chuan inmakna lehkha a hnenah pe rawh se,’ an ti bawk a.
5:32 Kei erawh chuan, tupawh tlangval ngaih vang ni lova, nupui ma apiang chuan, amah chu a uiretir a ni; tih, tupawh mak hnu nei apiang chu a uire a ni tih ka hrilh a che u.
5:33 “Hman laia mite hnenah, ‘Dawtah chhia chham suh la, Lalpa hnenah i chhechhamte chu hlen zawk rawh,’ an ti tih in hre tawh bawk a,
5:34 Kei erawh chuan ka hrilh a che u, chhia reng reng chham suh u; van chhalin chham suh u, chu chu Pathian lalthutphah a ni si a;
5:35 lei chhalin chham hek suh u, chu chu a ke nghahchhan a ni si a; Jerusalem chhalin chham hek suh u, chu chu Lal ropui tak khawpui a ni si a.
5:36 I lu chhalin i chham tur a ni hek lo, pakhat pawh i tivarin, i tidum thei si lo va.
5:37 In thu sawi chu ‘A ni, a ni,’ ‘Ni lo, ni lo’ ni ngawt rawh se; chung aia chuang aliam chu sual laka chhuak a ni.
5:38 “Mit aia mit, ha aia ha’ an ti tih in hre tawh.
5:39 Kei erawh chuan ka hrilh a che u, Mi sual dodal suh u; i biang ding lama bengtu hnenah chuan a lehlam pawh dawh rawh.
5:40 Tin, tupawhin i lakah thupawi siamin, i kawr lak a tum chuan, i puan pawh laktir nghal rawh.
5:41 Tin, mel khat kala phut luitu apiang che hnenah chuan mel hnih kal rawh.
5:42 A diltu che hnenah pe la, i laka puk duhtu chu hawisan suh.
5:43 “I vengte hmangaih la, i hmelma haw rawh,’ an ti tih in hre tawh.
5:44 Kei erawh chuan ka hrilh a che u, in hmelmate chu hmangaih ula, a tiduhdahtu che u chu tawngtaisak rawh u,
5:45 in Pa vana mi fate in nih theih nan; ani chuan mi sualte leh mi thate chungah chuan a ni a chhuahtir thin a, mi felte leh mi fel lote chungah pawh ruah a surtir thin a ni.
5:46 In hmangaitute chauh in hmangaih hian lawmman engnge in hmuh ang? chhiahkhawntute pawhin chutiangin an ti ve lawm ni?
5:47 Tin, in unaute chauh chibai in buk hian engnge in tih hnem chuan bik? Jentailte pawhin chutiangin an ti ve lawm ni?
5:48 Chutichuan, in Pa vana mi a tha famkim angin in tha famkim tur a ni.
6:1 “In thil tha tihte mi hmuh atan, mihring mithmuha ti lo turin fimkhur rawh u; chutilochuan in Pa vana mi hnenah chuan lawmman in nei lo vang.
6:2 “Chutichuan, mi hnena englo i pekin, mi vervekten mi fak an hlawh theihna tura, inkhawmna inahte, kawtthlerahte an tih thin ang hian, i hmaah tawtawrawt hamtir suh. Tih tak meuhvin ka hrilh a che u, an lawmman chu an hmu zo tawh.
6:3 Nang erawh chuan mi hnena englo i pekin, i kut ding lamin a tih chu i kut vei lamin hre suh se,
6:4 i englo pek chu arukin a awm theih nan; chutichuan, i Pa aruka hmu thintu chuan a rul ang che.
6:5 “Tin, in tawngtaiin, mi vervekte angin in ti tur a ni lo; miin an hmuh theihna `turin, inkhawmna inahte, kawtthler peng takahte, ding chunga tawngtai an ngaina si thin a. Tih tak meuhvin ka hrilh a che u, an lawmman chu an hmu zo tawh.
6:6 Nang erawh chuan i tawngtaiin, i pindan chhungrilah lut la, i kawng khar la, i Pa aruka awm hnenah chuan tawngtai rawh; tichuan, i Pa aruka hmu thintu chuan a rul ang che.
6:7 Tin, in tawngtaiin, Jentailte angin sawi nawn mai mai suh u; an tawng tam avangin hriain an ring a ni.
6:8 Chutichuan, anmahni angin awm suh u; amah in dil hmain in Pa chuan engte nge in mamawh tih a hre reng si a.
6:9 “Chutichuan, nangni chuan hetiang hian tawngtai rawh u :-‘Kan Pa vana mi,I hming zahawm rawh se.
6:10 I ram lo thleng rawh se. I duhzawng vana an tih angin leia mi’n ti rawh se.
6:11 Vawiinah hian kan ei khawpin chaw min pe ang che.
6:12 Kan batte hi min ngaidam ang che. Keini pawhin kan englo bate kan ngaihdam tak ang khan.
6:13 Sual tura thlemnaah min hruai lut suh la, Mi sual lakah chuan min chhandam zawk ang che,’ tiin.
6:14 “Mi an bawhchhiatte in ngaihdam chuan, in Pa vana miin a ngaidam ve ang che u.
6:15 Nimahsela, mite in ngaihdam si loh chuan, in Pain in bawhchhiatte a ngaidam bik lovang.
6:16 “Chaw in nghei hun pawhin, mi vervekte angin ngui hmel pu suh u; anni zawngin mi mithmuha chaw ngheia an lan theihna turin, an hmel an tipawr si thin a. Tih tak meuhvin ka hrilh a che u, an lawmman chu an hmu zo tawh.
6:17 Nang erawh chuan chaw i nghei hunin sahriak thih la, i hmai phih rawh;
6:18 chutichuan i Pa a ruka awm mithmuhah chauh lo chuan, mihring mithmuhah chaw ngheiin i lang lo vang; tichuan, i Pa a ruka hmu thintu chuan a rul ang che.
6:19 “Leia sulrul leh tuiekin a ei chhiatnaah, rukruten an reh pawha an ruknaah hian, in tan rote khawl khawm suh u;
6:20 vanah, sulrul leh tuiekin a ei chhiat lohnaah, rukruten an reh pawha an ruk hek lohnaah chuan, in tan rote khawl khawm zawk rawh u;
6:21 i ro awmna apiangah i rilru pawh a awm ang.
6:22 “Taksa khawnvar chu mit hi a ni; chutichuan I mit a fim chuan I taksa apumin a eng chhuak ang.
6:23 I mit a chhiat erawh chuan I taksa apumin a thim zo vek ang. Chutichuan, I chhunga eng chu thim ni sela, thim chu a va nasa dawn em!
6:24 Tuman hotu pahnih rawng an bawl kawp thei lo; pakhat huain pakhat an duh ang; a nih loh leh, pakhat tannin pakhat an hmusit ang. Pathian leh sum rawng in bawl kawp thei lo ve.
6:25 Chuvangin, ka hrilh a che u, ‘Engnge ka ei ang a, engnge ka in ang aw?’ tiin in nunna thu leh, ‘Engnge ka silhin ka fen ang aw?’ tiin in taksa thu lungkham suh u. Ei tur aiin nunna a thupui zawk lo vem ni? Silhfen aiin taksa pawh a thupui zawk lo vem ni?
6:26 chungleng savate hi en rawh u; buh an tuh lo va, an at hek lo, buh inah an seng lut hek lo; nimahsela in Pa vana mi chuan a chawm si a. Nangni chu anni ai chuan nasa takin in hlu zawk lo vem ni?
6:27 Tin, nangni zingah lungkham avangin tuinnge mahni dung lam tawng khata tisang chuang thei?
6:28 Tin, silhfen thu engahnge in lungkham ni? Ram tuktinpar thanzia hi tha takin ngaihtuah rawh u; hna an thawk lo, la pawh an kai hek lo;
6:29 nimahsela ka hrilh a che u, Solomona meuh pawh a ropuina zawng zawnga a inthuam khan, heng tuktinpar pakhat tluk pawh hian cheiin a awm lo.
6:30 Chutichuan, ram hnim, vawiin anga nung, atuka thuka tuah leh mai tur mah Pathianin chuti kauva a chei chuan, aw nangni rin tlemte u, silhfen a pe zawk em em dawn lo che u em ni?
6:31 Chutichuan, ‘Engnge kan ei ang?’ emaw, ‘Engnge kan in ang?’ emaw, ‘Eng sinin nge kan awm ang?’ emaw tih, lungkham suh u,
6:32 Jentailten chung zawng zawng chu an zawng thin a ni. Chung zawng zawng chu in mamawh tih in Pa vana mi’n a hre reng a ni.
6:33 A ram leh a felna chu zawng hmasa zawk rawh u, tichuan chung zawng zawng chu a pek belhchhah dawn che u nia.
6:34 Chutichuan, atuk atan lungkham suh u, atuk chuan ama tan a lungkham chawp dawn si a. Ni khat atan ni khat hrehawm chu a tawk a ni.
7:1 “Sawisel suh u, sawisela in awm loh nan.
7:2 In sawisel ang bawkin an sawisel ang che u; in tehna ngai bawkin an tehsak leh ang che u.
7:3 Tin, engatinge mahni mita khanchhuk awm chu ngaihtuah si lovin, i unau mita hmawlh te tak te awm chu i hmuh ni?
7:4 Engtin nge i unau hnenah, ‘I mit ata hmawlh te tak te kha mi lak chhuahtir rawh,’ i tih theih ang? ngai teh, nangma mit ngeiah khanchhuk a awm reng si a.
7:5 Mi vervek! I mit ata khanchhuk kha la chhuak hmasa rawh; chutichuan i unau mit ata hmawlh te tak te lak chhuah tur chu fiah takin i hmu ang.
7:6 “Ui hnenahte thil thianghlim chu pe suh u; vawk hmaahte in tuikeplungte paih hek suh u, an chil chhe hlauh ang a, tin, hawiin an tai thler dah ang che u.
7:7 “Dil rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u;
7:8 tupawh a dil apiang chuan an hmu thin a; tupawh a zawng chuan an hmu thin a; tupawh a kik chu an hawnsak dawn a ni.
7:9 A nih leh, nangniho hi tupawh in fapain chhangper dil che u sela, tunge lung pe ang che u?
7:10 a nih leh, sangha dil che u sela, tunge rul pe ang che u?
7:11 Chutichuan, nangni mi sual mahin in fate thil tha pek nachang in hriat chuan, in Pa vana mi chuan a diltute chu thil tha a pe zawk em em dawn lo vem ni?
7:12 “Chutichuan, thil engkim miin in chunga an tiha in duh tur ang apiang chu, mi chungah pawh ti ve rawh u; chu chu Dan thu leh Zawlneite thu a ni reng si a.
7:13 “Kawngka zimah chuan lut rawh u; boralnaa kalna kawngka chu a zau va, a kawng pawh a zau bawk a, chu mi lama lut chu tam pawh an tam hle a ni;
7:14 nunnaa kalna kawngka chu a zim a, a kawng pawh a chep bawk a, a hmutute pawh tlemte an ni.
7:15 Zawlnei derte lakah fimkhur rawh u; chung chu beram vun sinin in hnenah an lo kal thin a, an chhung lamah erawh chuan chinghne koham takte an ni si a.
7:16 Anmahni chu an rahah in hre mai ang. Hruihlingnei kungah grep rah an lo ngai em ni? Lenhlingah pawh theipui an lo ngai em ni?
7:17 Chutiang bawkin thing tha apiang a rah tha thin a; thing chhia erawh chu a rah chhe thin.
7:18 Thing tha a rah chhe thei lo va, thing chhia lah a rah tha thei hek lo.
7:19 Thing tin rah tha lo apiang chu an kit a, meiah an paih thin.
7:20 Chuvangin, anmahni chu an rahah in hre mai ang.
7:21 “ ‘Lalpa, Lalpa’ mi ti nazawng chu van ramah an lut lo vang a; ka Pa vana mi duhzawng titu erawh chu an lut ang.
7:22 Chu mi niah chuan mi tam takin, ‘Lalpa, Lalpa, i hmingin thute kan sawiin, i hmingin ramhuaite kan hnawt chhuakin, i hmingin thil mak tam takte kan ti thin lo vem ni,’ an la ti ang.
7:23 Chu mi hunah chuan, ‘Nangni thil sual tite u, ka hre ngai lo va che u, ka hnen ata kal bo rawh u,’ tiin anni chu ka la hrilh ang.
7:24 “Chutichuan, mi tin heng ka thu hi hriaa zawm apiang chu, mi fing lungpui chunga in satu nen tehkhin tur a ni.
7:25 Ruahte a lo sur a, tuite a lo lian a, thlite a lo tleh a, chu mi in chu a rawn nam sawk sawk a; nimahsela a chim lo va; lungpui chunga rem tlat a nih avangin.
7:26 Tin, mi tin, heng ka thu hi hriaa zawm lo apiang chu, mi a tiauvut chung maia in satu nen tehkhin tur a ni.
7:27 Ruahte a lo sur a, tuite a lo lian a, thlite a lo tleh a, chu mi in chu a rawn nam sawk sawk a; a chim ta a; a sawp chu nasa tak a ni,” a ti a.
7:28 Tin, heti hi a ni a, Isuan chung thu chu a sawi zawh veleh, mipuiten a thu zirtir chu mak an ti hle a; lehkhaziaktute ang lova, thuneihna nei awm taka anmahni a zirtir avangin.
8:1 Tin, tlang ata chu a lo chhuk hnuin mipui tam takin amah an zui ta a.
8:2 Tin, ngai teh, a hnenah phar a lo kal a, “Lalpa, i duh chuan mi tithianghlim thei e,” tiin, chibai a buk a.
8:3 Tin, Isuan a han ban a, a dek a, “Ka duh e, lo thianghlim tawh ang che,” a ti a.Tin, chawplehchilhin a phar chu a lo thianghlim ta nghal a.
8:4 Tin, Isuan a hnenah, “Tumah hrilh lo turin fimkhur ang che; amaherawhchu puithiam hnenah va inentir la, Mosian thilpek tur a ruat kha hlan rawh, an hriat fiahna turin,” a ti a.
8:5 Tin, Kapernaum khuaa a luhin a hnenah sipai za hotu a lo kal a,
8:6 “Lalpa, ka naupang zengin inah a mu reng a, nasa taka tihnatin a awm a ni,” tiin, a ngen chiam a.
8:7 Tin, ani chuan a hnenah, “Ka lo kal ang a, ka tidam ang,” a ti a.
8:8 Tin, sipai za hotu chuan, “Lalpa, ka in chhung i luhna tlak a ni lo ve; thu chauh sawi la, ka naupang a dam mai ang.
8:9 Kei pawh mi thua awm ka ni a, ka hnuaiah sipaite an awm a; chu mi chu, ‘Kal rawh,’ ka tih leh, a kal thin; mi dang hnenah pawh, ‘Lo haw rawh, ka tih leh a lo haw thin; ka bawi hnenah pawh, ‘Hei hi ti rawh,’ ka tih leh, a ti thin,” tiin a chhang a.
8:10 Tin, Isuan chung thu chu a hriatin mak a ti hle a, a zuitute hnenah chuan, "Tih tak meuhvin ka hrilh a che u, Israelte zingah pawh heti ema rinna nasa hi ka hmu lo.
8:11 Ka hrilh a che u, Chhak leh Thlang atangin mi tam tak an lo kal ang a, van ramah chuan Abrahama te, Isaaka te, Jakoba te hnenah an thu ang a;
8:12 ram fate erawh chu pawn thimah chuan hnawh chhuahin an awm ang a; chutah chuan tah leh ha thial chu a awm ang," a ti a.
8:13 Tin, Isuan sipai za hotu hnenah chuan, "Kal tawh rawh i rin angin i chungah lo thleng rawh se," a ti a. Tichuan, naupang chu, chu mi dar ngeiah chuan a lo dam ta a.
8:14 Tin, Isua chu Petera ina a luhin, a nupuia nu chu khawsika mu a hmu a.
8:15 Tichuan, a kut chu a dehsak a, a khawsik chu a reh ta a; tin, a tho va, a rawng a bawlsak ta a.
8:16 Tin, khua a lo tlai lam chuan a hnenah ramhuai mante tam tak an rawn hruai a; tin, thuin ramhuaite chu a hnawt chhuak a, dam lo zawng zawngte chu a tidam bawk a:
8:17 zawlnei Isaian, "Amah ngeiin kan chak lohnate a la a, kan nate a phur a," tia a sawi chu a lo thlen theihna turin.
8:18 Tin, Isuan mipui tam tak a vela a hmuhin, ral lehlama kal turin thu a pe a.
8:19 Tin, lehkhaziaktu pakhat a lo kal a, a hnenah, "Zirtirtu, i kalna apiangah ka zui ang che," a ti a.
8:20 Tin, Isuan a hnenah, "Sihalten kua an nei a, chungleng savate pawhin bu an nei a, Mihring Fapa erawh hi chuan a lu nghahna a nei lo," a ti a.
8:21 Tin, a zirtirte zinga mi dangin, a hnenah, "Lalpa ka pa mi vuitir zet rawh," a ti a.
8:22 Nimahsela, ani chuan a hnenah, "Mi zui rawh; mitthiin anmahni mitthi chu vui rawh se," a ti a.
8:23 Tin, lawngah a chuang a, zirtirte chuan an zui a.
8:24 Tin, ngai the, dil chu nasa takin a lo fawn ta a, chutichuan tui fawnin lawng chu a vur hlup hlup mai a, ani erawh chu a muhil a.
8:25 Tin, a hnenah an lo kal a, an kaitho va, "Lalpa, min chhanhim rawh, kan boral dawn hi le" an ti a.
8:26 Tin, ani chuan an hnenah, "Rin tlemte u, engahnge in hlauh?" a ti a. Chu mi hnuah chuan a tho va, thlite leh dil chu a hau va; tin, a lo reh ta thuap mai a.
8:27 Tin, mite chuan mak an ti hle a, "He mi hi mi engnge a nih, thli leh dil lam pawhin a thu an awi hi?" an ti a.
8:28 Tin, ral leh lam Gadarin mite ram chu a thlenin, ramhuai man pahnih, thlan atanga lo chhuakin, an rawn tawk a; an kawlh em a, chutichuan chu mi kawngah chuan tumah an kal thei lo va.
8:29 Tin, ngai teh, anni chuan, "Pathian Fapa, keini leh nang engnge kan inzawlna? Hun tiam thlen hmain min nghaisa turin hetah i lo kal em ni?" tiin, an au va.
8:30 Tin, an awmna atanga hla feah vawk rual tam tak an tla a.
8:31 Tin, ramhuaite chuan, "Min hnawh chhuah chuan vawk rual kawchhungahte sawn min kaltir ang che," tiin, a hnenah, an ngen a.
8:32 Tin, ani chuan an hnenah, "Kal ta che u," a ti a. Tichuan, an lo chhuak a, vawk kawchhungahte chuan an va lut a: tin, ngai teh, vawk rual zawng zawng chu khamah an tlan chhuk chiam a, dilah an tlan lut a, tuiah chuan an boral ta a.
8:33 Tin, a vulhtute chu an tlan a, khuaah chuan an kal a, engkim an hril ta a, ramhuai mante chunga thil lo thlengte pawh chu.
8:34 Tin, ngai teh, akhuain Isua hmuak turin an lo chhuak a; tin, amah an hmuh veleh an ram ata chhuak turin an ngen chiam a.
9:1 Tin, Isua lawngah a chuang a, dil chu a kan a, a awmna khua chu a thleng a.
9:2 Tin, ngai the, zeng pakhat khuma mu chungin a hnenah an rawn zawn a. Tin, Isuan an rinzia a hmuhin, zeng hnenah chuan, "Ka fa, thlamuang takin awm rawh; I sualte ngaihdam a ni tawh," a ti a.
9:3 Tin, ngai the, lehkhaziaktu thenkhatte chuan an rilruin, "He mi hian Pathian a sawi chhia a nih hi," an ti a.
9:4 Tin, Isuan an ngaihtuahte chu a lo hria a, "Engahnge in thinlunga sual in ngaihtuah ni?
9:5 I sualte ngaihdam a ni tawh,' tih leh, 'Tho la, kein kal tawh rawh,' tih hi, a engnge sawi awl zawk ni?
9:6 Engpawh ni sela, khawvelah Mihring Fapa hian sual ngaihdam theihna a nei tih in hriat nan," a ti a. (zeng hnenah chuan) "Thjo rawh, I khum la la, I inah kal rawh," a ti a.
9:7 Tin, a tho va, a inah a haw ta a.
9:8 Tin, mipuite chuan chu chu an hmuhin, an hlau va, mihringte hnena chutiang thuneihna petu Pathian chu an fak a.
9:9 Tin, Isua chuta tangin a kal zel a, chhiah chawina hmuna thu, mi pakhat, a hming a hmu a: tin, a hnenah, "Mi rawn zui rawh," a ti a. Tichuan, a tho va, a zui ta a.
9:10 Tin, heti hi a ni a, inah chuan chaw a kil laiin, ngai the, chhiahkhawntute leh mi sualte tam tak an lo kal a, Isua leh a zirtirte chu an kilpui hlawm a.
9:11 Tin, Pharisaite chuan chu chu an hmuhin, a zirtirte hnenah chuan, "Engatinge in zirtirtuin chhiahkhawntute leh mi sualte hnena a ei le?" an ti a.
9:12 Nimahsela, Isuan chu chu a hriat veleh, "Mi chakte chuan daktawr an ngai lo va, mi bawrhsawmte zawkin an ngai a ni.
9:13 Chutichuan, 'Inthawina duh lovin khawngaihna ka duh e,' tih hi, a awmzia va zir rawh u; mi fel takte lam tura lo kal ka ni lo va, mi sualte zawk lam tura lo kal ka ni asin," a ti a.
9:14 Chu mi lai chuan Johana zirtirte chu a hnenah an lo kal a, "Engatinge keini leh Pharisaite hian chaw kan nghei zut thin a, I zirtirte lemin an nghei si loh?" an ti a.
9:15 Tin, Isuan an hnenah, "Mo hruaitute hnenah a pasal tur chu a awm chhung zawng, mo hruaitute chuan an sun thei em ni? Nimahsela, a pasal tur chu an hnen ata hruai bo nite a la thleng ang a, chu mi hunah erawh chuan chaw an la nghei ang.
9:16 Tin, tuman puan hlui puan la thlakmar loh themin an bel ngai lo; a bel phuina tur chuan puan chu a kai thler zawk ang, a lo thler nasa lehzual dawn si a.
9:17 Tuman uain thar savun uain peng hluiahte an thun ngai hek lo; chutilochuan savun pengte chu a puak keh a, uain chu a bua a, savun pngte pawh chu a lo chhe thin; uain thar chu savun uain peng tharahte an thun zawk thin a ni, tichuan tha takin a awm ve ve thin," a ti a.
9:18 Chung thu chu an hnena a sawi lai takin, ngai the, hotu pakhat a lo kal a, chibai a buk a, "Ka fanu tunah tak hian a thi a; nimahsela, lo kal la, a chungah I kut nghat la, a lo nung leh ang," a ti a.
9:19 Tichuan, Isua a tho va, a zui ta a, zirtirte pawhin an zui ve a.
9:20 Tin, ngai teh, hmeichhe pakhat, kum sawm leh kum hnih thi puta dam lo a hnungah a lo kal a, a puan hmawr a dek;
9:21 "A puan hmawr chauh pawh dek ila, tidamin ka awm mai ang," tih a rilruk a ni.
9:22 Tin, Isua a hawi a, amah chu a hmu a, "Ka fanu, thlamuang takin awm rawh; I rinna hi I dampui a ni e," a ti a. Tichuan, hmeichhia chu, chu mi dar achinah chuan a lo dam ta a.
9:23 Tin, Isua hotu inah chuan a lut a, phenglawng tumte leh mipui bengchheng mur murte a va hmuh chuan,
9:24 "Chhuak rawh u; naupang chu a thi lo ve, a muhil a ni zawk asin," a ti a. Tin, anni chuan amah chu an nuihsan ta mai a.
9:25 Nimahsela, mipui chu an hnawh chhuah hnu chuan a lut a, a kutah a chelh a, naupang chu a lo tho ta a.
9:26 Tin, chu mi chanchin chu chung ram zawng zawngah chuan a lo thang chhuak ta a.
9:27 Tin, Isua chuta tangin a kal zel a, mitdel pahnihin, "Davida fapa, min khawngaih rawh," tia auvin an zui a.
9:28 Tin, ina a luh chuan, mitdelte chu a hnenah an lo kal a; tin, Isuan an hnenah, "Hei hi ti theiin mi ring em?" a ti a. Anni chuan a hnenah, "Ring e, Lalpa," an ti a.
9:29 Tin, ani chuan an mit a dek a, "In rin angin in chungah thleng rawh se," a ti a.
9:30 Tichuan, an mit chu a lo var ta a. Tin, Isuan an hnenah, "Tuma hriat loh turin fimkhur rawh u," a ti tlat a.
9:31 Nimahsela, anni chu an chhuak a, chu mi ram zawng zawngah chuan a chanchin an tithang ta a.
9:32 Tin, an chhuah lai takin, ngai teh, tawng thei lo ramhuai man pakhat a hnenah an rawn hruai a.
9:33 Tin, ramhuai chu a hnawh chhuah veleh tawng thei lo chu a lo tawng ta a. Tin, mipuite chuan mak an ti hle a, "Israelte zingah hetiang hi an hmungai lo," an ti a.
9:34 Pharisaite erawh chuan, "Ramhuai lal avangin a ni, ramhuaite a hnawh chhuah thin ni," an ti a.
9:35 Tin, Isuan an inkhawmna inahte zirtirin, Ram Chanchin Tha chu hrilin, dam lohna tinreng leh natna tinrengte tidamin, khaw lian leh khaw tete zawng zawng a fang zel a.
9:36 Chutichuan, mipuite chu a hmuhin, vengtu nei lo beramte anga hrehawm leh darha an awm avangin, a khawngaih ta em em a.
9:37 Tichuan, a zirtirte hnenah chuan, "Buh seng tur a tam hle si a, nimahsela a thawktute an tlem; chutichuan, a buh seng tura thawktu turte tir turin buh Neitupa hnenah chuan ngen rawh u," a ti a.
10:1 Tin, a zirtir sawm leh pahnihte chu a ko va, anmahni hnawh chhuah theihna turin,ramhuai bawlhhlawhte chunga thuneihna a pe a; dam lohna tinreng leh natna tinreng tihdam theihna turin thuneihna a pe bawk a.
10:2 Tin, tirhkoh sawm leh pahnihte hming chu heng hi a ni: A hmasa berah chuan Simona (Petera an tih) leh a unau Andria te; Zebedaia fapa Jakoba leh a unau Johana te;
10:3 Phillipa leh Bartholomaia te; Thoma leh chhiahkhawntu Matthaia te; Alphaia fapa Jakoba leh Thaddaia te;
10:4 Kanana mi Simona leh a mantirtu Juda Iskariota te hi.
10:5 Chung sawm leh pahnih chu Isuan a tir chhuak a, an hnenah heti hian thu a pe a: "Jentailte kawngah kal suh ula, Samari mite khua reng rengah pawh lut suh ang che u;
10:6 amaherawhchu Israel hnam beram bote hnenah chuan kal zawk ang che u.
10:7 Tin, in kalin, 'Van ram chu a lo hnai,' tiin, hril zel ang che u.
10:8 Dam lote tidam ula, mitthite kaitho ula, pharte tithianghlim ula, ramhuaite hnawt chhuak ang che u; athlawnin in hmu a, athlawnin pe ang che u.
10:9 In kawnghrenah te chuan rangkachak tangka emaw, tangka emaw, dar tangka emaw keng suh ula,
10:10 zinna atan ipte emaw, kawr pahnih emaw, pheikhawk emaw, tiang emaw keng hek suh u; hnathawktu chu a ei tur hmu tlak a ni si a.
10:11 "Tin, khaw lianah emaw, khaw teah emaw in luhna apiangah, a thleng tlak mi tur che u zawng chhuak ula, in chhuah leh hma loh chuan chutah chuan thleng reng ang che u.
10:12 Tin, inah chuan in luh dawnin chibai buk ang che u.
10:13 Tin, ina mite chu chibai buk tlak an nih chuan, in thlamuanna thu chu an chungah lo thleng rawh se; an tlak loh erawh chuan, in thlamuanna thu chu in chungah lo kir leh rawh se.
10:14 Tin, tupawh lawm lo che ua, in thu pawh ngaithla lo apiang, chu mi in atan emaw,chu mi khua ata emaw in chhuah hun chuan, in kephaha vaivut chu thing thla ang che u.
10:15 Tih tak meuhvin ka hrilh a che u. Ngaihtuah niah chuan, chu mi khuate ai chuan Sodom leh Gomorra ram tuar tur chu a zia a awm zawk ang.
10:16 "Ngai teh u, chinghne zinga beram awm angin ka tirh che u hi; chutichuan rul anga fing, thuro anga pawikhawih lovin awm ang che u.
10:17 Nimahsela, mihring lakah chuan fimkhur rawh u; roreltuhote an mantir dawn si che u a, inkhawmna inahte an vua ang che u a;
10:18 a ni, keimah avangin hotute leh lalte hmaah, anmahni leh Jentailte hriattirna turin, an la hruai ang che u.
10:19 Nimahsela, an mantir hunah che u chuan, 'Engtinnge, eng thu nge ka sawi ang?' tiin, lungkham suh ang che u; in sawi tur chu a hun takah chuan a hriattir dawn si che u a.
10:20 A sawitu chu nangni in ni dawn si lo va, in Pa Thlarauvin nangmahniah a sawi zawk dawn a ni.
10:21 "Tin, tihhlum turin unaupa leh unaupa an inmantir ang a, pa pawhin a fa a mantir bawk ang; fate pawhin an nu leh an pate an do vang a, an tihhlumtir bawk ang.
10:22 Keima hming avangin mi zawng zawng huat in ni ang; nimahsela a tawp thlenga tuar peih apiang chu, chu mi ngei chu chhandamin a awm ang.
10:23 "Chutichuan, he khuaah hian an tihduhdah hunah che u, khaw dangah tlansan ang che u; tih tak meuhvin ka hrilh a che u. Mihring Fapa a lo kal hmain Israel khuate chu in fang chhuak lo vang.
10:24 "Zirtir a zirtirtu chungah a awm lo; bawi pawh a pu chungah a awm hek lo.
10:25 Zirtir chu a zirtirtu anga lo awm leh, bawi chu a pu anga lo awm chu, a tawk e. In neitupa mah 'Beelzebula,' an tih chuan, a chhungte chu an va ti dawn nasa em!
10:26 "Chutichuan, anmahni chu hlau suh ang che u; lang lo tura thuhruk engmah a awm si lo, hriat loh tura zep pawh engmah a awm hek lo.
10:27 Thima ka hrilh che u hi engah sawi ang che u; beng bula in hriat hi in chunga chuangin tlangaupui ang che u.
10:28 "Tin, taksa tihluma thlarau tihlum thei lotute chu hlau suh ula; Gehena-a thlarau leh taksa tiboral theitu erawh chu hlau zawk ang che u.
10:29 Chawngzawng pahnih dar tangka pakhatah an hralh thin lo vem ni? Nimahsela, an zinga pakhat mah in Pa lovin leiah a tla lo vang.
10:30 In samzaite lam pawh hi chhiar vek a ni asin.
10:31 Chuvangin, hlau suh u; chawngzawng tam tak aiin in hlu zawk a ni.
10:32 "Chutichuan, mite hmaa mi tan apiang, ka Pa vana mi hmaah ka tan ve ang.
10:33 Nimahsela, tupawh mite hmaa mi phat apiang, ka Pa vana mi hmaah ka phat ve ang.
10:34 "Khawvelah hian rem lentir tura lo kal emaw mi ti suh u; rem lentir tura lo kal ka ni lo va, khandaih lentir tura lo kal ka ni zawk.
10:35 Mi, a pa dotir turin, fanu a nu dotir turin, mo a pi dotir turin lo kal ka ni asin.
10:36 Mi a hmelmate chu ama chhungte zinga mi ngei an ni ang.
10:37 Tupawh a nu emaw, a pa emaw keimah aia hmangaih zawk chu, ka mi ni tlak a ni lo; tupawh a fanu emaw, a fapa emaw keimah aia hmangaih zawk pawh, ka mi ni tlak a ni lo.
10:38 Tupawh a kraws pua mi zui lo chu, ka mi ni tlak a ni lo.
10:39 Tupawh a nunna hmu chuan a chan ang a; keimah avanga a nunna chan chuan a hmu ang.
10:40 "Tupawh a lawm che u chu, mi lawm a ni a, tupawh mi lawm chu mi tirtu lawm a ni.
10:41 Tupawh zawlnei chu zawlnei a nih avanga lawm chuan, zawlnei lawmman a hmu ang a; tupawh mi fel chu mi fel a nih avanga lawm chuan, mi fel lawmman a hmu ang.
10:42 Tin, tupawh heng mi te tak zinga pakhat hnenah hian, Zirtir a nih avanga tui vawt no khat chauh pawh pe apiang chuan, tih tak meuhvin ka hrilh a che u, an lawmman chu an chan tawp lo vang," a ti a.
11:1 Tin, heti hi a ni a, Isuan a zirtir sawm leh pahnihte chu, thu a pek zawh veleh, chuta tang chuan an khuaahte zirtir leh thuhril turin a kal ta a.
11:2 ,3 Tin, Johanan Krista thiltihte chu tan inah chuan a lo hriatin, a hnenah, "Lo kal tura chu i ni nge, mi dang kan la ngai ang?' tiin, a zirtirte a palaitir a.
11:3 ,2 Tin, Johanan Krista thiltihte chu tan inah chuan a lo hriatin, a hnenah, "Lo kal tura chu i ni nge, mi dang kan la ngai ang?' tiin, a zirtirte a palaitir a.
11:4 Tin, Isuan an hnenah, "Kal leh ta ulang, thil in hmuh leh in hriat hi Johana hnenah va hrilh rawh u;
11:5 mitdelte an mit a lo var ta, kebaite kein an lo kal ta, pharte an lo thianghlim ta, bengngawngte pawh an beng a lo var ta, mitthite pawh kaihtawhin an awm ta, pachhiate pawhin Chanchin Tha hrilh an dawng ta.
11:6 Tin, tupawh ka chunga lungnih lohna hmu lo chu an eng a thawl e," tiin a lo chhang a.
11:7 Chung mite chu an hawn veleh, Isuan mipui hnenah chuan Johana thu a sawi ta a, "Eng en turin nge thlalera in kal chhuah kha? Luang thli chhem nghin maw?
11:8 A nih loh leh, eng en tur berin nge in kal chhuah kha? Puan nem sin maw? Ngai rawh u, puan nem sinte chu lal inahte asin an awm.
11:9 A nih loh leh eng vang berin nge in kal chhuah kha? Zawlnei en turin maw? A nih ngei kha, ka ti a che u, zawlnei ai pawha ropui zawk,
11:10 'En teh u, ka tirhkoh i hmaan ka tir a ni.Ani chuan i hmaah i kawng a siam ang,' ti a, a chanchin an ziaka kha, he mi hi a ni
11:11 Tih tak meuhvin ka ti a che u, Hmeichhe hrin zingah Baptistu Johana aia ropui zawk an la chhuak ngai lo; nimahsela van rama mi te deuh pawh ani ai chuan an ropui zawk si a.
11:12 Baptistu Johana awm achin tun thlengin, van ram chuan beih vakna a tawk thin a, a bei vakte chuan an pawng lak thin.
11:13 Zawlneite zawng zawng leh Dan thu chuan, Johana a lo awm thleng khan an hril lawk thin a ni.
11:14 In awi duh zawngin, chu chu Elija, lo kal tura chu a ni.
11:15 Tupawh hriatna tura beng nei chuan hre rawh se.
11:16 "Nimahsela, tun lai chhuante hi eng nen nge ka tehkhin ang? Naupang dawr hmunahte thua, an thiante auva,
11:17 'Phenglawng kan tumsak che u a in lam si lo va.'Kan tap vak a, awm in inchum si lo," tiate ang hi an ni.
11:18 "Johana chu a lo kal a, a eiin a in lo va, 'Ramhuai a zawl a nih hi,' an ti a.
11:19 Mirhing Fapa a lo kal a, a eiin a in a, 'En teh u, chaw heh mi, uain heh mi, chhiahkhawntute leh mi sualte thian saw!," an ti si a. Finna chu a thiltih atangin a dikzia a lang a ni.
11:20 Tin,an sim loh avangin,a thilmak tih tamna ber khuate chu a hau ta a;
11:21 "Korazin, i chung a pik e! Bethsaida, i chung a pik e! nangmahnia thil mak tak tithe kha Tura leh Sidon khuaa tih ni sela, saiip puan sina vut zinga thuin an sim tawh ang.
11:22 Nimahsela, ka ti a che u, ngaihtuah niaah chuan nangni tuar ai chuan, Tura leh Sidon khaw tuar tur chu a zia a awm zawk ang.
11:23 Tin, nang Kapernaum, van thlengin chawimawi i ni dawn em ni? Mitthi khaw thlengin i zuk kal dawn asin; nangmaha thil mak tak tithe kha Sodom khuaa tih ni sela, tun thlengin a la awm reng ang.
11:24 Nimahsela, ka ti a che u, ngaihtuah niah chuan, i tuar ai chuan Sodom ram tuar tur chu a zia a awm zawk ang," a ti a.
11:25 Chu mi lai chuan Isuan a bia a, "Aw ka pa, lei leh van Lalpa, nangin mi fing leh mi bengvarte hnenah heng thu hi i zep a, nausente hnena i puan avang hian ka fak a che.
11:26 A ni, ka Pa, chutiang tih chu i ngaihin a tha a ni.
11:27 Ka pain thil engkim mi kawltir tawh; Pa lo chuan tumahin Fapa hi an hre lo; Fapa leh an hnena Fapain a puan duhnate chauh lo chuan tuman Pa chu an hre hek lo.
11:28 "Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u.
11:29 Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi: tichuan, in thlarau tan chawlhna in hmu ang.
11:30 Ka nghawngkawl chu a nuam a, ka phur pawh a zang a ni," a ti a.
12:1 Chu mi lai chuan Isua chu Chawlhniah buh hmunah te a kal tlang a; a zirtirte chu an ril a tam a, buh vuite an thliak a, an ei ta a.
12:2 Tin, Pharisaiten chu chu an hmuhin, a hnenah, "En teh, i zirtirten Chawlhniah tih thiang lo chu an tih hi," an ti a.
12:3 Ani erawh chuan an hnenah, "Davida a riltam laia a thiante nena an thil tih kha in chhiar lo vem ni?
12:4 Khatia Pathian ina a luh a, amah leh a thiante ei thian loh, puithiamte chauh ei thian changdah chu an ei thu kha?
12:5 A nih leh, Chawlhniin Pathian biak ina puithiam awmte chuan, Chawlhni an bawrh pawhin an thiam zel tih Dan thuah chuan in chhiar lo vem ni?
12:6 Engpawh ni sela, Pathian biak in aia ropui zawk hetah a awm tih ka hrilh a che u.Nimahsela,
12:7 'Inthawina duh lovin khawngaihna ka duh e,' tih hi, a awmzia lo hre tawh ni ula chu, mi thiamte chu thiam loh in chantir lo tur.
12:8 Mihring fapa hi Chawlhni Lal a ni si a," a ti a.
12:9 Tin, chuta tang chuan a kal a, an inkhawmna inah a va lut a.
12:10 Tin, ngai teh, mi pakhat kut zeng a lo awm a. Tin, an hek theih nan. "Chawlhniin tihdam a thiang em?" tiin, Isua an zawt a.
12:11 Tin, ani chuan an hnenah, "Nangni zingah tupawhin beram pakhat nei ula, chu chu Chawlhniin khuarkhurumah tla ang sela, tunge chelhin kai chhuak lo vang che u?
12:12 Beram pakhat ai chuan mihring pakhat chu a va hlu zawk em! Chuvangin, Chawlhniah tihthat a thiang e," a ti a.
12:13 Chu veleh, chu mi hnenah chuan, "I kut phar rawh," a ti a. Tichuan, a phar a, a lehlam angin a dam ta viah a.
12:14 Chutichuan, Pharisaite chu an chhuak a, amah an tihboral theih dan tur ngaihtuahin an inrawn a.
12:15 Nimahsela, Isuan chu chu a hriatin chuta tang chuan a kal bo ta a. Tin, mi tam takin amah an zui a, an zain a lo tidam vek a,
12:16 a chanchin puan loh tur an hnenah a ti tlat a:
12:17 ,18 Zawlnei Isaian, "En teh u, ka chhiahhlawh, ka thlan, Ka duh tak, ka rilruin a lawm em ema hi; A chungah ka thlarau ka dah ang a, Tichuan, Jentailte hnenah rorelna thu a hril ang.
12:18 ,17 Zawlnei Isaian, "En teh u, ka chhiahhlawh, ka thlan, Ka duh tak, ka rilruin a lawm em ema hi; A chungah ka thlarau ka dah ang a, Tichuan, Jentailte hnenah rorelna thu a hril ang.
12:19 A hnial lo vang a, a au hek lo vang a, Kawtthlerahte pawh tuman a aw an hre hek lo vang.
12:20 Hneh tura rorelna a tirh chhuah hma loh zawng Luang sawp a titliak fithla lo vang a, La khu pawh a timit lo vang.
12:21 Ama hming chu Jentaite chuan an beisei chhan ang," tia a sawi kha a lo thlen theihna turin.
12:22 Chu mi lai chuan, mitdel tawng thei lo ramhuai man pakhat a hnenah an rawn hruai a; tin, ani chuan a lo tidam a, chutichuan tawng thei lo chu a lo tawng theiin, a lo hmu thei ta a.
12:23 Tin, mipuiho zawng zawng chuan mak an ti hle a, "He mi hi Davida fapa chu a ni lawm ni?" an ti a.
12:24 Nimahsela, Pharisaiten chu chu an hriat veleh, "He mi hian ramhuai lal Beelzebula avang lo chuan ramhuaite a hnawt chhuak lo vang," an ti a.
12:25 Tin, Isuan an ngaihtuahte chu a lo hria a, an hnenah, "Khawii ram pawh mahni indo apiang an boral thin; khawii khua pawh, chhung khat pawh, mahni indo apiang an ding khawchhuak lo vang.
12:26 Tin, Setanan Setana vek a hnawh chhuah chuan mahni indo a ni ang asin; a ram chu engtin nge a din chhuah ang le?
12:27 Tin, kei Beelzebula avanga ramhuaite hnawt chhuak thin ka lo nih chuan, in faten tu vangin nge an lo hnawh chhuah thin le? Chuvangin, anni chu nangmahni ngaihtuahtu turte an ni ang.
12:28 Amaherawhchu, kei Pathian Thlarau avanga ramhuaite hnawt chhuak thin ka nih chuan, Pathian ram in hnenah a lo thleng tawh a ni ang.
12:29 Chuti a nih si loh chuan, miin mi chak chu a phuar hmasak zet loh chuan, engtin nge mi chak ina lutin a sum a laksak theih ang? Chu mi hnuah erawh chuan a in chu a ramsak mai ang.
12:30 Tupawh ka lama tang lo chu, mi do a ni; tupawh mi lak khawmpui lo chuan, a tidarh a ni.
12:31 "Chuvangin, ka ti a che u, mi an sualna tinrengah leh an Pathian sawichhiatna tinrengah chuan, ngaihdam an ni ang: Thlarau meuh sawichhiatna erawh chu ngaihdamsak a ni lo vang.
12:32 Tin, tupawh mihring Fapa sawisel apiangte chu, an sawiselna chu ngaihdamsak a ni ang; tupawh Thlarau Thianghlim meuh sawisel apiang erawh chu, an sawiselna chu tun dam chhungah pawh, hun lo la thleng turah pawh ngaihdamsak a ni lo vang.
12:33 "Thing chu a tha, a rah pawh a tha, in tih loh vek leh, thing chu a chhia, a rah pawh a chhia, ti law law rawh u; thing chu a rahah a hriat si a.
12:34 Rul thlahte u, nangnin, sual reng chungin, engtin nge thu tha in sawi theih ang? Thinlunga khat liam chu kain a sawi thin asin.
12:35 Mi tha chuan a ro bawk tha ata thil thate a theh chhuak thin a, mi sual chuan a ro bawk chhia ata thil chhiate a theh chhuak thin.
12:36 Tin, ka hrilh a che u, mitten thu lawi lo an sawi apiang, chu thu chu Rorel niah chuan an sawi fiah a la tul ang.
12:37 I thu chuan thiam a chantir ang chia, i thu vek chuan thiam loh a chantir bawk dawn che asin," a ti a.
12:38 Chu mi lai chuan lehkhaziaktute leh Pharisaite zinga mi tuten emaw an bia a, a hnenah, "Zirtirtu, I hnen ata chhinchhiahna hmuh kan duh e," an ti a.
12:39 Ani erawh chuan an hnenah, "Chhuan sual tak leh uire hmang takte chuan chhinchhiahna an zawng a, nimahsela, zawlnei Jona chhinchhiahna chauh lo chu, an hnenah chhinchhiahna reng reng pek a ni lovang:
12:40 Jona chu ni thum leh zan thum nghapui kawchhunga a awm ang khan, Mihring Fapa hi ni thum leh zan thum lei kawchhungah a awm bawk dawn a ni.
12:41 Ninevi khuaa mite chu ngaihtuah hunah chuan, tun lai chhuante hnenah hian an ding ve ang a, thiam loh an chantir ang, Jona thu hrilh avangin an sim si a; ngai teh u, Jona aia ropui zawk hetah hian a awm asin.
12:42 Chhim lam lalnu kha ngaihtuah hunah chuan, tun lai chhuante hnenah hian a tho ve ang a, thiam loh a chantir ang; Solomona fin ngaithla tur mahin kawlkil ata a lo kal si a; ngai teh u, Solomona aia ropui zawk hetah hian a awm asin.
12:43 "Tin, ramhuai bawlhhlawh chu mi kawchhung ata a chhuahin, chawlhna zawngin tui awm lohna hmunahte a vak a vak a, a hmu thin si lo va.
12:54 Tin, 'ka chhuahna inah khan ka kir leh mai ang,' a ti a; tin, a va thlen chuanin, ruaka, phiah faia, cheimawiin a hmu a.
12:45 Chu veleh a va kal a, amah aia sual zawk ramhuai dang pasarih a rawn hruai a, chutah chuan an lut a, an awm reng thin a; chu mihringa awmze hnuhnung chu, a hmasa aiin a lo tha lo zawk thin a ni. Chutiang bawkin tun lai chhuan sual takte chungah hian a la awm ang," tiin a chhang a.
12:46 Mipuite hnena thu a la sawi lai chuan, ngai teh, a nu leh a unaute chu amah biak tumin pawnah an ding a.
12:47 Tin, mi pakhatin a hnenah, "Ngai teh, i nu leh i unaute biak tum chein pawnah sawn an ding reng e," a ti a.
12:48 Ani erawh chuan a hrilhtu hnenah chuan, "Ka nu chu tunge ni? Ka unaute pawh chu tutenge ni?" tiin a chhang a.
12:49 Tin, a zirtirte lamah a kut a phar a, "En teh u, ka nu leh ka unaute hi!
12:50 Tupawh ka Pa vana mi duhzawng ti apiang chu ka unaute, ka farnu te, ka nu te an ni asin," a ti a.
13:1 Chu mi ni chuan Isua chu in ata a kal chhuak a, dil kamah chuan a thu a.
13:2 Tin, a hnenah mipui tam takte an rawn inkhawm a, chutichuan lawngah a chuang a, a thu a; mipui zawng zawng tiauphovah an ding a.
13:3 Tin, tehkhin thuin thu tam tak an hnenah a sawi a: "Ngai teh u, buh chi thehtu buh chi thehin a feh a;
13:4 tin, a theh laiin a then kawng dungah a tla a, savaten an rawn tlan zo ta a.
13:5 Tin, a then pialtlep lei pan hmunah a la a; lei a chhah loh avangin a to ta nghal a;
13:6 Nimahsela, ni a lo tlangsan deuhvin em vuaiin a lo awm a, zung a neih loh avangin a rawp ta mai a.
13:7 Tin, a then hnimhlingnei zingah a tla a, hnim chu a lo to sang a, a dip ral ta a.
13:8 Tin, a then lei thaah a tla a, thenkhat a leh za te, thenkhat a leh sawmruk te, thenkhat a leh sawmthum tein a lo rah ta a.
13:9 Tupawh beng nei chuan hre rawh se," a ti a.
13:10 Tin, zirtirte chu an lo kal a, a hnenah, "Engatinge an hnenah tehkhin thuin i sawi?" an ti a.
13:11 Tin, ani chuan a chhang a, an hnenah, "Van ram thuruk chu nangni hriat zawng phal a ni a, anni hriat erawh chu phal a ni lo.
13:12 Tupawh a nei apiang an pe belhchhah ang a, an nei teuh vang; nimahsela, tupawh a nei lo apiang chu, an neih chhun pawh an laksak ang.
13:13 Chutih avang chuan tehkhin thuin an hnenah ka sawi a ni; hmu mah sela an hmuh thin loh va, bengin hre mah sela an hriat thin loh va, a ngaihna pawh an hriat thin loh avangin.
13:14 Tin, Isaia thu sawi lawk kha an chungah a lo thleng a nih hi: "Beng zawngin in hre na ang a, a ngaihna erawh chu in hre tawp lo vang; Hmuh zawng in hmu na ang a, hriat erawh chu in hre tawp lo vang;
13:15 He chite thinlung hi a lo chawlawl ta a,An bengte a lo ngawng deuh va, An maimitchhing bawk a, 'Chutilochuan, kan mitin kan hmu ang a, Kan bengin kan hria ang a, Kan thinlungin kan hre bawk ang a, Kan hawi kir leh ang a, Anin min tidam hlauh dah ang e,' an ti a, a tih kha.
13:16 "Nangni mit erawh chu a vannei a ni, a hmuh thin avangin; in beng pawh a vannei a ni, a hriat thin avangin.
13:17 Tih tak meuhvin ka hrilh a che u, zawlnei tam takte leh mi fel tam takte pawhin in thil hmuhte hi hmuh an chak a, nimahsela an hmu si lo; in thil hriatte pawh hi hriat an chak a, nimahsela an hre si lo.
13:18 "Chutichuan, buh chi thehtu tehkhin thu chu hre rawh u.
13:19 Tupawhin ram thu chu benga a lo hriat a, a ngaihna a hriat si lo chuanin, mi sual chu a lo kal a, a thinlunga theh sa chu a chhuhsak thin. Chu mi chu kawng dunga theh chu a ni.
13:20 Tin, pialtlep hmuna theh chu, thu chu hriaa lawm taka pawm nghal thin hi a ni;
13:21 nimahsela amahah chuan zung a awm lo va, rei lote chauh a awm a; tin, thu avang chuan hrehawmna emaw, tihduhdahna emaw a lo awm veleh a tlu nghal mai thin.
13:22 Tin, hnimhlingnei zinga theh chu, thu hretu a ni a, nimahsela, khawvel lungkhamna leh hausakna bumna chuan thu chu a dip a, rah lovin a lo awm thin.
13:23 Tin, lei tha chunga theh chu, thu chu benga hriaa a ngaihna hre bawk hi a ni; chu mi chu a rah ngei a, thenkhat a leh za te, thenkhat a leh sawmruk te, thenkhat a leh sawmthum tein a pung thin," a ti a.
13:24 Tehkhin thu dang an hnenah a sawi leh: "Van ram chu, mi a lova chi tha thehtu nen chuan tehkhin a ni,
13:25 nimahsela mi an muthilh hlanin a hmelma a lo kal a, buh zingah chuan buh lem a theh a, a kal bo leh ta a.
13:26 Tin, buh chu a lo to va, a lo vuih chuan, buh lem chu a lo lang ve ta a.
13:27 Tin, in neitu bawite chu an lo kal a, a hnenah chuan, 'Ka pu, i lovah chi tha i theh lo vem ni? Buh lem saw khawi ata lo awm nge ni le?' an ti a.
13:28 Tin, ani chuan an hnenah, "Chu chu hmelmain a lo ti ta a nih chu" a ti a. Tin, bawite chuan a hnenah, "A nih leh chung chu va la khawm mai ila rem i ti em?" an ti a.
13:29 Ani erawh chuan, 'Ti lo ve; buh lem chu in lak khawmzawngin buh chu in pawt tel hlauh dah ang e.
13:30 Buh seng thlengin to za rawh se; tin, buh seng hunah chuan buh attute hnenah, Buh lem chu la khawm hmasa zet ula, hal turin tei rawh u; buh erawh chu ka buh inah seng lut rawh u, ka la ti ang e,' a ti a," a ti a.
13:31 Tehkhin thu dang an hnenah a sawi leh a: "Van ram chu antam chi fang khat miin a lak a, a lova a theh ang chu a ni a;
13:32 chu chu chi zawng zawng aiin a te ber a; nimahsela a lo to san hunah chuan thlaite ai chuan a lian zawk a, thing a lo ni thin a, chutichuan chungleng savate chu an lo kal a, a zarahte chuan an riak thin a," a ti a.
13:33 Tehkhin thu dang an hnenah a sawi leh a: "Van ram chu, dawidim hmeichhiain a laka, chhangphut tehkhawng thum zingah a zaa a thawk vek thlenga a phuma ang chu a ni," a ti a.
13:34 Chung zawng zawng chu Isuan tehkhin thuin mipuite hnenah a sawi a, tehkhin thu lovin an hnenah engmah a sawi lo: zawlneiin,"Tehkhin thuin ka ka ka ang ang a,Leilung pian tirh ata thil inthup chu Ka sawi chhuak ang," tia a sawi kha a lo thlen theihna turin.
13:36 Chu mi lai chuan mipuite chu a kalsan a, inah chuan a lut ta a, tin, a zirtirte chu a hnenah an lo kal a, "Lova buh lem tehkhin thu kha min hrilhfiah rawh," an ti a.
13:37 Tin, ani chuan a chhang a, "Chi tha thehtu chu Mihring Fapa hi a ni a;
13:38 lo chu khawvel hi a ni a; chi thate chu ram fate an ni a; buh lemte chu mi sual fate an ni a;
13:39 hmelma, a thehtu chu, diabola a ni a; buh seng chu khawvel tawpna tur a ni; buh attute chu vantirhkohte an ni.
13:40 Chutichuan, buh lemte chu an la khawm a, meiin an hal ang hian khawvel tawpnaah chuan a la awm ang.
13:41 Mihring Fapa hian a vantirhkohte chu a tir chhuak ang a, a ram ata tihsualtirtute leh thil tisualtute zawng zawng chu an thiar chhuak ang a,
13:42 rawhtuina meiah chuan an paih ang; chutah chuan tah leh ha thial chu a awm ang.
13:43 Chu mi hunah chuan mi felte chu an Pa ramah chuan ni angin an eng tawh ang. Beng nei chuan hre rawh se.
13:44 Van ram chu lova ro phum ruk ang a ni; chu chu miin a hmu a; a thukru a, a lawm avangin a neih zawng zawng chu a va hralh a, chu lo chu a lei ta a.
13:45 Tin, van ram chu sumdawng mi tuikeplung tha tak zawngtu ang chu a ni leh a;
13:46 tin, ani chuan tuikeplung hlu tak pakhat a hmu a, a neih zawng zawng chu a va hralh a, a lei ta a.
13:47 "Tin, van ram chu lenkhang, tuifinriata dena, chi tinreng fun khawmna ang chu a ni leh pek a.
13:48 Chu chu a khah veleh a kamah an hnuk chhuak a; tin, an thu a, a tha zawng chu bawmah an la khawm a, a chhia erawh chu an paih a.
13:49 Khawvel tawp hunah chuan chutiang bawkin a awm ang; vantirhkohte chu an lo chhuak ang a, mi fel zing ata mi sualte chu an hlir ang a,
13:50 rawh tuina meiah chuan an paih ang; chutah chuan tah leh ha thial chu a awm ang," a ti a.
13:51 Isua vekin an hnenah, "Chung zawng zawng chu in hria em?" a ti a. Anni chuan a hnenah, "Hria e," an ti a.
13:52 Tin, ani chuan an hnenah, "Chuti a nih chuan, lehkhaziaktu van ram kawng zirtira awm apiang chu, in neitu, a ro bawm ata thil tharte leh thil hluite phawrh chhuak thintu ang chu a ni," a ti a.
13:53 Tin, heti hi a ni a, Isuan chung tehkhin thute chu a sawi zawh veleh chuta tang chuan a kal ta a.
13:54 Tin, a awmna khaw lam chu a thleng a, an inkhawmna inah chuan anmahni a zirtir ta a, chutichuan mak an ti hle a, "He mi hian he finna leh heng thilmak tihtheihnate hi khawi ata nge a hmuh?
13:55 He mi hi thingrem siamtu fapa kha a ni lo vem ni? A nu chu Mari an tih hi a ni lo vem ni? A unaute pawh Jakoba, Josefa, Simona, Juda an tithe hi an ni lo vem ni?
13:56 A farnute pawh kan hnena awm an ni vek lo vem ni? He mi hian khawi ata tehlul nge heng zawng zawng hi a hmuh ni?" an ti a.
13:57 Tichuan, a chungah an lungni ta lo va. Nimahsela, Isuan an hnenah, "Zawlnei chu ama khaw lamah leh ama inah chauh lo chuan, chawimawi lohvin a awm ngai lo," a ti a.
13:58 Tin, an rin loh avangin chutah chuan thilmak tam a ti lo.
14:1 Chu mi lai tak chuan lal Heroda chuan Isua chanchin chu a lo hria a,
14:2 a chhiahhlawhte hnenah, "Chu chu Baptistu Johana kha a nih chu; mitthi zing ata a tho leh ta zuk nia; chuvangin chung thiltihtheihnate chuan amahah a thawk a nih chu," a ti a.
14:3 (Heroda chuan a unau Philipa nupui Herodi avangin Johana chu a man a, a phuar a, tan inah a lo khung tawh a ni;
14:4 Johana chuan a hnenah, "Ani i neih hi a thiang lo ve," a tihsak avangin.
14:5 Tin, Johana chu tihhlum a tumin mipui a hlau va, zawlneia an ruat avangin.
14:6 Nimahsela, Heroda pian champhaphak ni chu a lo thlenin Herodi fanu chu a laiah a lam a, Heroda chu a tilawm ta a.
14:7 Chu mi avang chuan a dil apiang pe turin chechhamin a tiam ta a.
14:8 Tin, ani chuan a nu fuihin, "Hetah hian thlengin Baptistu Johana lu mi pe rawh," a ti a.
14:9 Tin, lal chu a lungngai ta a; nimahsela a thutiamte leh a chaw kilpuite avang chuan pek tur thu a pe a,
14:10 tichuan mi a tir a, tan ina Johana lu chu a tantir a.
14:11 Tin, a lu chu thlengin an rawn la a, hmeichhe naupang hnenah chuan an pe a; ani chuan a nu hnenah a kalpui ta a.
14:12 Tin, zirtirte chuan a ruang chu an va hlawm a, an phum a; tin, Isua an va hrilh a.)
14:13 Tin, Isuan chu chu a hriatin, chuta ta chu lawngin thlaler hmunah a kal hrang ta a. Nimahsela, mipuite chuan an hriat veleh khua atangte chuan kea kalin an zui ta a.
14:14 Tichuan ani chu vaukama a chhuah chuan mipui tam tak a hmu a, a khawngaih em em a, an dam lote a tidam a.
14:15 Tin, tlai lam a lo nihin zirtirte chu a hnenah an lo kal a, "Hei hi thlaler hmun a ni a, khua pawh a lo tlai ta si a; khuaahte kalin an tan ei tur an lei theihna turin mipuite hi kaltir ta che," an ti a.
14:16 Isua erawh chuan an hnenah, "An kal bo a ngai lo ve; nangmahnin ei tur pe rawh u," a ti a
14:17 Tin, anni chuan a hnenah, "Hetah chhangper panga leh sangha pahnih chauh kan nei a ni," an ti a.
14:18 Tin, ani chuan, "Hetah ka hnenah han la rawh u," a ti a.
14:19 Tin, hlobet chunga thu turin mipuite chu thu a pe a, chhangper panga leh sangha pahnih chu a la a, van lam enin mal a sawm a, a phel a, chhangperte chu zirtirte hnenah a pe a, tin, zirtirte chuan mipuite hnenah an pe a.
14:20 Tin, an vaiin an ei a, an puar ta hlawm a; an ei bang nawi pawh chu bawmrang sawm leh pahnih an rut khat a.
14:21 A eitute chu, hmeichhia leh naupang tiam lovin, patling hlir pawh sangnga lai an ni a.
14:22 Tin, mipuite chu a tintir vel chhungin, a kal hmaa ral lehlama lo kal hmasa turin, zirtirte chu lawngah a chuan luihtir ta nghal a.
14:23 Tin, mipuite chu a tintir hnuin, tawngtai turin tlangah chuan a han kal hrang a; tin, tlai lam a lo nihin chutah chuan amah chauhvin a awm ta a.
14:24 Lawng erawh chu dil lai takah a awm tawh a; thliin a ni lozawngin a nem avangin tuifawnin a vawrh a vawrh ta a.
14:25 Tin, khawfing chah dawn laiin, dil chungah kea kalin an hnen lam a rawn pan a.
14:26 Tin, khawfing chah dawn laiin, dil chungah kea kalin an hnen lam a rawn pan a. Tin, zirtirte chuan amah chu dil chunga kea a kal an han hmuh chuan, "Hmuithla a nih saw!" tiin an thlaphang a, hlauvin an au ta vak mai a.
14:27 Nimahsela, Isuan anmahni a be ta nghal a, "Thlamuang takin awm rawh u; keimah ka ni alawm; hlau suh u," a ti a.
14:28 Tin, Peteran a chhang a, "Lalpa, nang iI nih chuan tui chunga i hnena lo kal thu mi pe rawh," a ti a.
14:29 Tin, ani chuan, "Lo kal ta che," a ti a. Petera chu lawng ata a chhuk a, Isua hnen lam panin tui chungah chuan kein a kal a.
14:30 Nimahsela, thli tleh chu a hmuhin a hlau va; tin, a pil dawn a, "Lalpa, mi chhandam rawh," tiin a au ta a.
14:31 Tin, Isuan a ban ta nghal a, amah chu a chelh a, a hnenah, "Nang rin tlem, engah nge i rinhlelh le?" a ti a.
14:32 Tin, lawnga an chuan chuan thli chu a bang ta mai a.
14:33 Tin, lawnga awmte chuan, "Pathian Fapa i lo nih tak zet hi," tiin, amah chibai an buk a.
14:34 Tin, ral leh lam an kai chuan Gennesaret ram khawmual an thleng ta a.
14:35 Tin, chu mi hmuna mite chuan amah an hriat veleh, chu mi kiang vel ram zawng zawngah chuan mi an tir a, dam lo zawng zawng chu a hnenah an rawn hruai a;
14:36 tin, a puan hmawr tal deh theih an dil chiam a; tin, a dek apiang chu an lo dam ta zel a.
15:1 Chu mi lai chuan, Jerusalem khua atangin Pharisaite leh lehkhaziaktute Isua hnenah an lo kal a,
15:2 "Engatinge i zirtirten upate thuro chhiah chu an bawhchhiat thin? Chhang an eiin an kut an sil ngai si lo va," an ti a.
15:3 Tin, ani chuan an hnenah, "Nangni pawhin engatinge in thurochhiah avanga Pathian thupek in bawhchhiat ni?
15:4 Pathianin, 'I nu leh i pa chawimawi rawh,' 'Tupawh a nu emaw a pa emaw sawichhia apiang chu thi mawlh rawh se,' a ti si a.
15:5 Nangni erawh chuan, 'Tupawh a nu emaw, a pa emaw hnena I mi chhawrna tur hi Pathian hnena pek a ni tawh, ti apiang chuan,
15:6 a nu leh a pa a chawimawi tur a ni lo ve,' in ti thin a. Tichuan, in thurochhiah avangin Pathian thu chu in bawh bo ta a nih hi.
15:7 Vervekte u, Isaia hian in chungchang thu a lo hril lawk dik zet mai.
15:8 "He miteho hian an kain mi chawimawi a, An thinlung erawh chuan mi hlat si a.
15:9 Engpawh ni sela, an zirtirnaah mihring thupek an zirtir avangin An mi biak thin hi athlawn mai a ni,' tiin," a ti a, a chhang a.
15:10 Tin, mipui chu a ko va, an hnenah, "Ngaithla ula, lo ngai thiam rawh u;
15:11 Kaa lut chu mihring tibawlhhlawhtu a ni lo va; kaa chhuak chu, chu ngei chu mihring tibawlhhlawhtu a ni zawk e," a ti a.
15:12 Chu mi lai chuan a zirtirte an lo kal a, a hnenah, "Pharisaiten kha thu kha an hriata an lung nih loh kha i hria em?" an ti a.
15:13 Ani erawh chuan, "Kung zawng zawng ka Pa vana mi phun loh chu pawh chhuahin a awm ang.
15:14 Anni chu pawisa suh u; hruaitu mitdel an ni. Tichuan, mitdelin mitdel vek a hruai chuan khuarkhurumah an tla dun ang," a ti a, a chhang a.
15:15 Tin, Peteran a hnenah, "Tehkhin thu kha min hrilhfiah ta che," tiin a chhang a.
15:16 Tin, ani chuan, "Tun thlengin nangni pawh hriatna nei lovin in la awm cheu maw?
15:17 Kaa lut apiang chu pumah a tla thla a, dailennaa paih chhuahin a awm tih in hre lawm ni?
15:18 Kaa chhuakte erawh chu thinlungah a lo chhuak a ni; chung ngei chuan mihring a tibawlhhlawh thin a ni.
15:19 Thinlungah hian ngaihtuahna sualte tualthahnate, uirenate, inngaihnate, rukruknate, heknate, sawichhiatnate a lo chhuak si thin a;
15:20 Chung chu mihring tibawlhhlawhtu a ni; kut sil lova chaw ei erawh chuan mi a tibawlhhlawh lo ve," a ti a.
15:21 Tin, Isua chuta ta chu a chhuak a, Tura leh Sidon bialah a kal ta a.
15:22 Tin, ngai teh, chung ram ata chu Kanaan hmeichhe pakhat a lo chhuak a, “Lalpa, Davida Fapa, mi khawngaih rawh; ka fanu ramhuaiin a man tlat a ni,” tiin, a au va.
15:23 Ani eawh chuan kam khat mahin a chhang lo. Tin, a zirtirte chuan, “Kan hnungah a au a au si a, kaltir mai ta che,” tiin an rawn ngen a.
15:24 Ani erawh chuan, “Israel hnam beram bo hnenah lo chuan tirh ka ni lo ve,” a ti a, a chhang a.
15:25 Nimahsela, hmeichhia chu a lo kal a, “Lalpa, mi pui rawh a,” tiin, chibai a buk a.
15:26 Tin, ani chuan, “Fate chhang laksak a, uite hnena paih chu mawi lo ve,” a ti a, a chhang a.
15:27 Ani chuan, “Lalpa, nih zawng a ni a; nimahsela, uite pawhin an pu dawhkan ata chhang nawi tla chu an ei thin alawm,” a ti a.
15:28 Chu veleh Isua chuan a hnenah, “Hmeichhia, i rin a nasa em mai; i duh ang takin i chungah awm rawh se,” a ti a, a chhang a. Tichuan, a fanu chu, chu mi achinah chuan a lo dam ta mai a.
15:29 Tin, Isua chuta ta chu a kal a, Galili dil kiang a lo thleng a; tin, tlangah chuan a chho va, chutah chuan a thu ta a.
15:30 Tin, mipui tam tak, kebaite, mitdelte, tawng thei lote, piangsualte rawn hruaiin a hnenah an lo kal a, a ke bulah an dah a; tin, a lo tidam ta hlawm a.
15:31 Chutichuan, mipui chuan tawng thei lote chu lo tawnga, piangsualte chu lo thaa, kebaite chu kea kala, mitdelte chu hmu theia an hmuhin mak an ti hle a; tichuan Israelte Pathian chu an fak ta a.
15:32 Tin, Isuan a zirtirte chu a ko va, “Mipuiho hi tunah ni thum ka hnenah an awm tawh a, ei tur engmah an neih loh avangin ka khawngaih em em a ni; chaw ngheiin ka kaltir duh lo ve, chutilochuan kawng lakah an chau dah ang e,” a ti a.
15:33 Tin, zirtirte chuan a hnenah, “Mipui heti zozai puarna khawp chhangper chuti zozai thlalerah khawi ata nge kan hmuh ang?” an ti a.
15:34 Tin, Isuan an hnenah, “Chhangper engzat nge in neih?” a ti a. Tin, anni chuan “Per sarih, nghate tlemte nen,” an ti a.
15:35 Tin, ani chuan leia thu turin mipui chu thu a pe a.
15:36 Tin, chhangper pasarih leh sanghate chu a la a, lawm thu a sawi a, a phel a, zirtirte hnenah a pe a, tin, zirtirte chuan mipuite hnenah an pe a.
15:37 Tin, an vaiin an ei a, an puar ta hlawm a; an ei bang nawi pawh chu bawm sarih an rut khat a.
15:38 A eitute chu, hmeichhia leh naupang tiam lovin, patling hlir pawh sangli an ni a.
15:39 Tin, mipuite chu a tintir hnuin lawngah a chuang a, Magadan ram a lo thleng a.
16:1 Tin, Pharisaite leh Saddukaite an lo kal a, amah fiah nan van ata chhinchhiahna anmahni entir turin an dil a.
16:2 Nimahsela ani chuan, an hnenah, “Tlai lam a lo nihin ‘Khua a tha dawn a ni ang, kawl a sen em mai,’ in ti thin a.
16:3 Tin, zingah chuan ‘Vawiin chu khua a chhe dawn a ni ang, kawl a sen a, khua a dur em mai,’ in ti thin a. Van awmzia in hre fiahthiam si a, nimahsela hun chhinchhiahnate hi in hre fiah thei lo.
16:4 Chhuan sual tak leh uire hmang takte chuan chhinchhiahna an zawng a, nimahsela, Jona chhinchhiahna chauh lo chu an hnenah chhinchhiahna reng reng pek a ni lo vang,” a ti a, a chhang a. Tin, anmahni a kalsan a, a kal ta daih a.
16:5 Tin, zirtirte chu ral leh lam an thlen chuan chhang an lo ken theihnghilh a.
16:6 Tin, Isuan an hnenah, “Pharisaite leh Saddukaite dawidim lakah chuan inveng ula, fimkhur rawh u,” a ti a.
16:7 Tin, anni chuan, “Chhang kan keng hauh lo,” tiin an inngaihtuah a.
16:8 Tin, Isuan chu chu a hria a, “Rin tlemte u, engati nge chhang in neih loh avanga in inngaihtuah ni?
16:9 Tunah pawh in rilruin in la hre lo fo maw? Mi sangnga chhangper pangaa hrai leh in bawmrang ruh khah zat kha, in hre reng lawm ni?
16:10 Mi sangli chhangper pasariha hriaa in bawm ruh khah zat pawh kha?
16:11 Chhang thu in hnenah ka sawi lo tih engtizia nge in hriat loh? Pharisaite leh Saddukaite dawidim lakah erawh chuan fimkhur rawh u,” a ti a.
16:12 Chu veleh chhang dawidim lakah fimkhur turin a tir lo va, Pharisaite leh Saddukaite zirtirna laka fimkhur turin anmahni a tir zawk tih an lo hre ta a.
16:13 Tin, Isua chu Philipa Kaisari bial chu a lo thlen chuan a zirtirte hnenah “Miten Mihring Fapa hi tunge a ni an tih?” tiin a zawt a.
16:14 Tin, anni chuan, “Thenkhatin, ‘Baptistu Johana a ni,’ an ti a; thenkhatin, ‘Elija a ni,’ an ti; thenkhatin, ‘Jeremia emaw zawlnei tua emaw a ni,’ an ti,” an ti a.
16:15 Ani chuan an hnenah, “A nih leh, nangnin tunge a ni mi tih?” a ti a.
16:16 Tin, Simon Peteran, “Krista, Pathian nung Fapa chu i ni,” a ti a, a chhang a.
16:17 Tin, Isuan a hnenah, “Simon Bar-Jona, i eng a thawl e; tisa leh thisen in a hriattir che a ni si lo va, ka pa vana miin a hriattir zawk che a ni.
16:18 Tin, nang Petera i ni tih ka hrilh bawk a che; he lungpui chungah hian ka kohhranho ka rem chho ang a, Mitthi Khaw kulh kawngkharte chuan chu chu an ngam lo vang.
16:19 Van ram chabite ka pe ang chia, lei chungah engpawh i phuar apiang vanah phuar a ni ang a; lei chungah engpawh i phelh apiang vanah phelh a ni ang,” a ti a, a chhang a.
16:20 chu mi zawhah Krista a ni tih tumah hrilh lo turin zirtirte chu a ti tlat a.
16:21 Chu mi achinah chuan Isuan Jerusalem khuaa a kal turzia te, upate, puithiam lalte, lehkhaziaktute laka thil tam tak a tuar turzia te, tihhluma a awm turzia te, ni thum nia kaihthawha a awm turziate chu a zirtirhote a hriattir tan ta a.
16:22 Tin, Petera chuan ani chu a hruai hrang a, “Lalpa, Pathianin khawngaih che rawh se; chung chu i chungah a thleng tawp lo vang,” tiin a zilh ta a.
16:23 Ani erawh chu a hawi a, Petera hnenah chuan, “Setan, ka hnungah kal rawh; ka tan tlukna i ni e; Pathian thilte ngaituah lovin mihring thilte i ngaihtuah zawk a nih hi,” a ti a.
16:24 Tin, Isuan a zirtirte hnenah, “Tupawhinmi zui a duh chuan mahni hreawm pawisa lovin, a kraws puin mi zui rawh se.
16:25 Tupawh a nun humhim duh apiangin a chan ang a; tupawh keimah avanga a nun chan apiangin a humhim ang.
16:26 Miin khawvel hi a pumin nei sela, a nun chan si sela, a tan engnge sawt ang? A nih loh leh, miin a nun aiah engnge a pek ang?
16:27 Mohring Fapa hi a vantirhkohte nen, a Pa ropuinaa inthuamin a lo kal dawn si a; chu mi hunah chuan mi tin an thiltih ang zelin a rul theuh vang.
16:28 Tih tak meuhvin ka ti a che u, heta dingho a thente hi, Mihring Fapa a rama lo kal an hmuh hma loh chuan, thihna tem tawp lo tur an awm,” a ti a.
17:1 Tin, ni ruk achinah chuan Isuan Petera te, Jakoba te, a unau Johana te a hruai a, ahrangin tlang sang takah a kal chhohpui a;
17:2 an hmaah chuan ahmel awmzia chu a lo danglam ta a; a hmai ni angin a lo eng a, a silhfente chu eng angin a lo var ta a.
17:3 Tin, ngai teh, Mosia leh Elija chu amah nen inbiain an hnenah an inlar a.
17:4 Tin, Peteran Isua a bia a, “Lalpa, kan tan heta awm hi a tha; i duh chuan hetah hian bawkte pathum ka khawh ang; i tan pakhat, Mosia tan pakhat, Elija tan pakhat,” a ti a.
17:5 A la sawi lai mekin, ngai teh, chhum var takin anmahni a rawn hliah ta a; tin, ngai teh, chhum atang chuan awin, “Hei hi ka Fapa duh tak, ka lawm em ema chu a ni; ama thu ngai rawh u,” a ti a.
17:6 Tin, zirtirte chuan chu chu an hriatin an tlu bawkkhup a, an hlau ta em em a.
17:7 Tin, Isuan anni chu a rawn dek a, “Tho ula, hlau suh u,” a ti a.
17:8 Tin, an dak chhuak a, Isua chauh lo chu tumah an hmu ta lo va.
17:9 Tin, tlang ata chu an chhuk laiin, Isuan an hnenah, “Mihring Fapa hi mitthi zing ata a thawh leh hma loh zawng in thil hmuh kha tumah hrilh suh u,” tiin thu a pe ta a.
17:10 Tin, a zirtirte chuan a hnenah, “Lehkhaziaktuten, ‘Elija a lo kal hmasa tur a ni,’ engtiziaa ti nge an nih le?” tiin an zawt a.
17:11 Tin, ani chuan, “Elija chu a lo kal dawn reng a ni, engkim a siam tha bawk ang.
17:12 Nimahsela ka hrilh a che u, Elija chu a lo kal tawh reng a ni, amah chu an hre lo va, a chungah an duh duhin an ti ta zawk a. Chutiang bawkin Mihring Fapa pawh hian an lakah a tuar ve dawn a ni,” a ti a, a chhang a.
17:13 Chu veleh, zirtirte chuan Baptistu Johana thu an hnenah a sawi a ni tih an lo hre ta a.
17:14 Tin, mipui hnen an lo thlenin, mi pakhat a hnenah a lo kal a, a hmaah thingthiin,
17:15 “Lalpa, ka fapa saw khawngaih ang che, thla em at a ni a, a tuar nasa em mai; vawi tam tak meiah a tlu thin a, vawi tam tak tuiah a tlu bawk thin a ni.
17:16 Tin, i zirtirte hnenah ka rawn hruai a, an tidam thei si lo va,” a ti a.
17:17 Tin, Isuan “Chhuan rinna nei lova tihmawhte u, eng chen nge in hnenah ka awm ang a, eng chen nge ka ngaihtheih ang che u? amah chu ka hnenah hian rawn hruai rawh u,” a ti a, a chhang a.
17:18 Tin, Isuan ramhuai chu a hau va, a chhung ata a chhuak ta a; chu mi dar achinah chuan naupang chu a lo dam ta a.
17:19 Chu mi hnuah chuan zirtirte chu ahrangin Isua hnenah an lo kal a, “Engati nge keinin kan hnawh chhuah theih loh?” an ti a.
17:20 Tin, ani chuan an hnenah, “In rin tlem avangin. Tih tak meuhvin ka hrilh a che u, antam mu fangkhat ang rin in neih chuan, he tlang hnenah hian, ‘Heta tangin sawtah sawn va insawn rawh,’ in ti ang a, a insawn mai ang; in tan tih theih loh reng engmawh a awm lo vang,” a ti a.
17:22 Tin, Galili rama an rawn inkhawm laiin, Isuan an hnenah, “Mihring Fapa hi mihringte kuta mantirin a awm dawn a ni,
17:23 tin, an tihlum ang a; tin, ni thum niah chuan kaihthawhin a awm ang,” a ti a. Tichuan an lungngai ta em em a.
17:24 Tin, Kapernaum khua chu an lo thlenin Pathian biak in tangka khawntute chu Petera hnenah an lo kal a, “In zirtirtuin biak in tangka chu a pe ve thin lawm ni?” an ti a.
17:25 Ani chuan, “Pe ve thin e,” a ti a. Tin, ina a va luh chuan Isuan a hnenah, “Simon, engtin nge i ngaih? leia lalten chhiah emaw, sum neih man emaw, tu lakah nge an lak thin? an fate lakah nge, mi hrang lakah?” tiin a lo sawi khalh a.
17:26 Tin, Peteran, “Mi hrang lakah,” a tih veleh, Isuan a hnenah, “Chuti a nih si chuan fate chu an awl a ni ang chu.
17:27 Nimahsela nang dilah va kal la, nghakuai chiah la, sangha lo chhuak hmasa chu man rawh; tin, a ka I keu veleh cheng hnih I hmu mai ang; chu chu la la, kei leh nang atan an hnenah pe rawh, chutilochuan anni chu kan tilungni lo dah ang e,” a ti a.
18:1 Chu mi lai tak chuan zirtirte chu Isua hnenah an lo kal a, “Van ramah tunge ropui ber ang le? An ti a.
18:2 Tin, ani chuan naupang te a ko va, an zingah a dintir a,
18:3 “Tih tak meuhvin ka ti a che u, in lamlet a, naupang te ang in lo nih loh chuan, van ramah in lut tawp lo vang.
18:4 Chutichuan, tupawh he naupang te anga inngaitlawm apiang, chu mi chu van ramah chuan a ropui ber ang.
18:5 Tin, tupawh ka hming avanga hetiang naupang te pakhat lawm apiang chu keimah mi lawm an ni ang.
18:6 Amaherawhchu, tupawh heng mi ringtu mi tete zinga pakhat pawh titlu apiang chu, an nghawngah buh rawt sawmna lung lianpui awrhtirin tuifinriat thuk laiah thlak daih sela an tan a sawt zawk ang.
18:7 “Tluknate avangin khawvel chung a pik e! tluknate chu lo awm tur reng zawng a ni a; nimahsela tlukna awmtirtu chung chu a pik e!
18:8 Tin, i kutin emaw, i kein emaw a tihtluk che chuan, tan la, paih daih rawh; kut pahnih emaw, ke pahnih emaw neia kumkhaw meia paih ai chuan, piangsualin emaw, kebaiin emaw nunnaa luh i tan a tha zawk e.
18:9 Tin, i mitin a tihtluk che chuan kher chhuak la, paih daih rawh; mit khing hnih neia Gehenna meia paih ai chuan, mi khing khat neia nunnaa luh i tan a tha zawk e.
18:10 “Heng mi tete zinga pakhat pawh hi hmusit lo turin fimkhur rawh u; an vantirhkohten vanah ka Pa vana mi hmel chu an hmu fo thin tih, ka hrilh che u hi.
18:12 “Engtin nge in ngaih? Mi tupawhin beram za nei sela, an zinga pakhat vak bo sela, sawmkua leh pakuate chu hnutchhiaha, tlanga han kalin, a bo chu a zawng lo vang em ni?
18:13 Tih tak meuhvin ka hrilh a che u, a hmuh leh hlauh chuan, sawmkua leh pakua vak bo lote chungah ai chuan, a chungah a lawm zawk ang.
18:14 Chutiang bawkin heng mi tete zinga pakhat boral pawh hi in Pa vana mi duhzawng a ni lo ve.
18:15 “Tin, i unauvin i chungah thil tisual sela, kal la, amah leh nangmah chauhva hriatah a sualnaah chuan zilh ang che; a ngaihthlak che chuan i unau chu i hneh a ni tawh ang.
18:16 A ngaihthlak loh che erawh chuan, mi dang pakhat emaw pahnih emaw i hnenah hruai ang che, chutichuan thu tinreng chu hretu pahnih emaw, pathum emaw kaa tihngheha a awm theih nan.
18:17 Tin, anni pawh chu a ngaihthlak duh loh chuan kohhranho hnenah thlen ang che; tin, kohhranho pawh a ngaihthlak duh loh chuan, ani chu i tan Jentail leh chhiahkhawntu ang ni rawh se.
18:18 Tih tak meuhvin ka hrilh a che u, lei chungah engpawh in phuar apiang, vanah phuar a ni ang a; lei chungh engpawh in phelh apiang, vanah phelh a ni ang.
18:19 Tih tak meuhvin ka hrilh leh a che u, lei chungah hian in zinga mi pahnih an thil dil kawnga an thurual chuan, ka Pa vana mi tihsakin an awm ang.
18:20 Mi pahnih emaw pathum emaw ka hminga an inkhawmna apiangah chuan an zingah ka awm si thin a,” a ti a.
18:21 Chu mi lai chuan Petera a lo kal a, a hnenah, “Lalpa, ka unauvin vawi engzat nge ka chungah thil tisual sela ka ngaihdam tur? Vawi sarih thlengin em ni ang?” a ti a.
18:22 Isuan a hnenah, “ ‘Vawi sarih thlengin,’ ka ti lo va che. ‘Vawi sarih hmun sawmsarih thlengin,’ ka ti zawk che a ni.
18:23 “Chu mi avang chuan, van ram chu, lal ber tu emaw a bawite hnena sum chanchin tihfel tum nen chuan, tehkhin a ni.
18:24 Tin, a han tihfel tan chuan mi pakhat talent singkhat ba, a hnenah an rawn hruai a.
18:25 Tin, pek tur a neih loh avangin, a pu chuan, amah nen, a nupui nen, a fate nen, a neih zawng zawng nen hralha rulh tur thu a pe a.
18:26 Chutichuan bawi chuan, ‘Ka pu, ka chungah zahngai rih la, a zain ka pe vek ang che,’ tiin bawkkhupin chibai a buk a.
18:27 Tichuan chu bawia pu chuan a khawngaih ta em em a, a thlah a, a bat chu a ngaidam ta a.
18:28 Nimahsela, chu bawi chu a kal chhuak a, a bawipuite zinga pakhat a duli za ba a va hmu a; tin, a man a, ‘I bat kha mi pe rawh,’ tiin, a hrawkah a rek a.
18:29 Chutichuan a bawipui chu a bawkkhup a, ‘Ka chungah zahngai rih la, ka la pe ang che,’ tiin a ngen chiam a.
18:30 Nimahsela, a duh lo va; a bat chu a tlak hma loh zawng tan inah a va khung ta a.
18:31 Chutichuan, a bawipuite chuan a thiltih chu an hmuhin, an lungngai em em a, a thiltih zawng zawng chu an pu an va hrilh ta a.
18:32 Chu veleh a pu chuan a ni chu a ko va, a hnenah, ‘Bawi sual, mi dil chiam avang khan i bat zawng zawng kha ka ngaidam che a ni a;
18:33 ka khawngaih che ang khan nang pawhin i bawipui chu i khawngaih ve tur a ni lawm ni?” a ti a.
18:34 Tin, a pu chu a thinur ta a, a bat zawng zawng a tlak hma loh zawng nghaisatute hnenah a pe ta a.
18:35 Mi tinin thinlung taka in unaute inngaihdam loh chuan ka Pa vana mi pawhin chutiang bawkin in chungah a ti ve ang,” a ti a.
19:1 Tin, heti hi a ni a, Isuan chung thu chu a sawi zawh veleh, Galili ram ata a chhuak a, Jordan lui rala Judai ramah chuan a va kal a;
19:2 tin, mipui tam takin an zui a; chutah chuan anmahni chu a tidam ta a.
19:3 Tin, Pharisaite a hnenah an lo kal a, amah fiah nan, "Eng vang pawhin miin a nupui mak a thiang em?" an ti a.
19:4 Tin, ani chuan, "Atir ata an siamtu khan hmeichhia leh mipaa a siam leh,
19:5 ‘He mi avang hian mipain a nu leh a pa a kalsan ang a, a nupui a vuan ang; tichuan an pahnih chuan tisa pum khat an lo ni tawh ang,’ a ti tih in chhiar lo vem ni?
19:6 Chutichuan pahnih an ni tawh lo va, tisa pumkhat an ni tawh zawk a ni. Chuvangin Pathianin a zawm tawh chu mihringin then suh se," a ti a. a chhang a.
19:7 Anni chuan a hnenah, "A nih leh, engati nge Mosian inmakna lehkha peka mak tur thu a pek si?" an ti a.
19:8 Ani chuan an hnenah, "Mosian in thinlung khauh avangin asin in nupuite mak a phal ni; nimahsela atir ata chutiang a ni si lo.
19:9 Kei chuan ka ti a che u, ‘Tupawh tlangval ngaih vang ni lova, nupui maa mi dang nei apiang chu, a uire a ni; mak hnu nei apiang pawh a uire a ni," a ti a.
19:10 Zirtirte chuan a hnenah, "Nupui kawngah mipa thu chutiang a nih si chuan inneih hi a tha lo ve," an ti a.
19:11 Ani erawh chuan an hnenah, "Chu thu chu mi nazawngin an pawm thei lo ve, a pekate chauh lo chuan,
19:12 Mi tilreh, an nu pum chhung ata chutianga piang rengte an awm a; mi tilreh, mihring kuta rehte an awm bawk a; mi tilreh, van ram avanga tilreha insiam chawpte an awm bawk a. Tupawh a pawm thei apiangin pawm rawh se," a ti a.
19:13 Chu mi lai chuan a chunga a kut a nghaha a tawngtaisak turin, a hnenah naupang tete an rawn hruai a; tin, zirtirte chuan an lo hau va,
19:14 Isua erawh chuan, "Naupang tete ka hnenah han kaltir ula, hnar suh u; van ram chu hetiang mite ta a ni si a," a ti a.
19:15 Tin, an chungah a kut a nghat a, chuta ta chu a kal ta a.
19:16 Tin, mi pakhat a hnenah a lo kal a, "Zirtirtu, chatuana nunna ka neih theih nan thil tha engnge ka tih ang?" a ti a.
19:17 Tin, ani chun a hnenah, "Thil tha thu engah nge mi zawh?" Tha chu pakhat chauh a awm; engpawh ni sela, nunnaa luh i duh chuan thupekte chu zawm rawh," a ti a.
19:18 Tin, ani chuan a hnenah, "A eng ber hi maw?" a ti a. Tin, Isuan, "Tual I that tur a ni lo; I uire tur a ni lo; I ru tur a ni lo; Dawtin I hek tur a ni lo;
19:19 I nu leh i pa chawimawi rawh,’ tithe leh, ‘Nangmah i inhmangaih angin i vengte i hmangaih tur a ni,’ tih hi," a ti a.
19:20 Tlangval chuan a hnenah "Chung thu zawng zawng chu ka zawm thin; engnge ka la bak?" a ti a.
19:21 Isuan a hnenah, "Tha famkima awm i duh chuan, kal la, i neih chu hralh la, pachhiate hnenah pe rawh, chutichuan vanah ro i nei ang; tin, lo kal la, mi zui ang che," a ti a.
19:22 Tlangval erawh chuan chu thu chu a hriatin lungngai takin a kal bo ta a, sum tam tak nei mi a nih avangin.
19:23 Tin, Isuan a zirtirte hnenah chuan, "Tih tak meuhvin ka hrilh a che u, mi hausa tan van rama luh chu harsa tak a ni.
19:24 Tin, ka hrilh leh a che u, mi hausa Pathian rama luh aiin sanghawngsei hriau benga luh tlang a awl zawk," a ti a.
19:25 Tin, zirtirten chu chu an hriat chuan mak an ti nasa em em a, "Tunge chhandam ni thei ang le?" an ti a.
19:26 Tin, Isuan anni chu a en a, an hnenah, "Chu chu mihring tan tih rual a ni lo va; Pathian nen erawh chuan engkim tih theih a ni," a ti a.
19:27 Tin, Petera’n a hnenah, "Ngai teh, keinin engkim kalsanin kan zui ta chia; engnge kan hmuh ang le?" a ti a, a zawt a.
19:28 Tin, Isuan a hnenah, "Tih tak meuhvin ka hrilh a che u, Siamtharnaah chuan, Mihring Fapa a ropuina thutphata a thut hunah, nangni mi zuituteho hi, Israel hnam sawm leh hnam hnihte chu ngaihtuahin, lalthutphah sawm leh pahnihah in la thu ve ang.
19:29 Tin, mi tin inte emaw, unaute emaw, farnute emaw, pa emaw, nu emaw, fate emaw, ramte emaw ka hming avanga kalsan apiang chuan a leh za an hmu ang a, chatuana nunna an la chang bawk ang.
19:30 "Nimahsela, mi tam tak, hmasa bera awmte chu, hnuhnung berah an la awm ang a; hnuhnung berte pawh hmasa berah an la awm ang.
20:1 “Van ram chu, in neitupa a grep huana hnathawktute ruai tura zinga chhuaka ang chu a ni si a.
20:2 Tin, ani chuan hnathawktute nen chuan ni khata duli hlawha an inrem veleh a grep huanah chuan a tir ta hlawm a.
20:3 Tin, feh reh san lai velin a va chhuak a, mi dang dawr hmuna ding mai maite a hmu a;
20:4 tin, an hnenah, ‘Nangni pawh grep huanah va kal ve tawh u, a mawi tawk apiang ka pe ang che u,’ a ti a. Tichuan an kal ta a.
20:5 Tin, chawfak hun lai velah leh behliangmun hun lai velah chuan a va chhuak leh a, chutiang bawkin a ti leh a.
20:6 Tin, pahmei zanriah chhum hun lai velah chuan a va chhuak a, mi dang dingte a hmu a; tin, an hnenah, ‘Engati nge nilengin heta in din mai mai ni?’ a ti a.
20:7 Anni chuan a hnenah, ‘Tuman min rawih loh avangin,’ an ti a. Ani chuan an hnenah, ‘Nangni pawh grep huanah va kal ve tawh u,’ a ti a.
20:8 “Tin, khua a lo tlai lam chuan, grep huan neitupa chuan, a sum enkawltu hnenah, ‘Hnathawktute kha ko la, a hnuhnung bera tanin a hmasa ber thlengin an hlawh pe rawh,’ a ti a.
20:9 Tin, pahmei zanriah chhum hun lai vela a rawihte chu a lo kal chuan duli an hmu theuh va.
20:10 Tin, a hmasa berte chu an lo kal chuan, hmuh tam deuh an inring a; nimahsela anni pawh chuan duli bawk an hmu theuh va.
20:11 ,12 Tin, an han dawn chuan, ‘Heng hnuhnung berte hian darkar khat chauh an thawk a, keini chhun hrehawm leh thawsa tuartute tlukin i siam si,’ tiin, in neitupa chungah chuan an phunnawi ta a.
20:12 ,11 Tin, an han dawn chuan, ‘Heng hnuhnung berte hian darkar khat chauh an thawk a, keini chhun hrehawm leh thawsa tuartute tlukin i siam si,’ tiin, in neitupa chungah chuan an phunnawi ta a.
20:13 “Ani erawh chuan, an zinga mi pakhat hnenah, ‘Thiana, i chungah engmah ka tisual hlei nem; duli hlawhah kan inrem lo vem ni?
20:14 I ta kha la la, kal mai rawh; nangmah ka pek che ang bawk kha he hnuhnung ber hnenah hian ka pe duh a ni.
20:15 Ka ta na na na chu ka duh duha ka tih a thiang lo vem ni? A nih loh leh kei ka that avangin nangin i itsik em ni? tiin a chhang a.
20:16 Chutiangin, hnuhnung berte chu a hmasa berte an la ni ang, hmasa berte pawh chu a hnuhnung berte an la ni ang,” a ti a.
20:17 Tin, Isua Jerusalem khuaa a han chhoh laiin zirtir sawm leh pahnihte chu a hruai hrang a, kalkawngah chuan an hnenah,
20:18 “Ngai teh u, Jerusalem khuaa kan chhoh dawn hi; Mihring Fapa hi puithiam lalte leh lehkhaziaktute kuta mantirin a awm dawn a ni; tin, anni chuan thi turin a chungah thu an titlu ang a,
20:19 nuihza siam nana hman tur leh vuak tur leh kraws-a khenbeh turin Jentailte hnenah an pe ang; tin, ni thum nia kaihthawhin a awm ang,” a ti a.
20:20 Chu mi lai chuan Zebedaia fapate nu chu a fapate hruaiin, a hnenah a lo kal a, chibai a buk a, thil eng emaw a dil a.
20:21 Tin, ani chuan a hnenah, “Engnge i duh?,” a ti a. Tin, anin a hnenah, “Heng ka fapate pahnih hi I ramah, I ding lamah pakhat, I vei lamah pakhat an thut theihna turin thu pe ang che,” a ti a.
20:22 Isua erawh chuan, “In dil chu in hre lo a ni. Ka no in tur chu in in thei em ni?” a ti a, a chhang a. Annin a hnenah, “Thei e,” an ti a.
20:23 Ani chuan an hnenah, “Ka no chu in in ngei ang; nimahsela ka ding lam leh vei lama thut tur thu chu keia pek tur a ni lo va, ka Pa buatsaihsakate tan a ni zawk ang,” a ti a.
20:24 Tin, sawmte chuan chu chu an lo hriatin unau pahnihte chungah chuan an thinur ta a.
20:25 Isua erawh chuan anniho chu a ko va, “Jentailte chunga roreltute chu an chungah an lal em em thin a, an mi liante chuan an chungah thu an nei em em bawk thin tih in hria.
20:26 Nimahsela, nangni zingah zawng chutiang a ni lo vang; tupawh in zinga mi lian nih duh apiang chu in rawngbawltuah a awm zawk tur a ni;
20:27 tupawh in zinga hmasa ber nih duh apiang chu in chhiahhlawhah a awm bawk tur a ni;
20:28 Mihring Fapa hi rawngbawlsaka awm turin a lo kal lo va, rawngbawl tur leh mi tam tak tlan nana a nun pe tur zawka a lo kal ang khan,” a ti a.
20:29 Tin, Jeriko khua ata an chhuah laiin, mipui tam takin amah chu an zui a.
20:30 Tin, ngai teh, mitdel pahnih kawng sira thu chuan Isua a kal tih an hriat veleh, “Lalpa, Davida fapa, min khawngaih rawh,” tiin an au va.
20:31 Tin, mipui chuan ngawi turin an hau va; nimhsela, anni chuan, “Lalpa, Davida fapa, minkhawngaih rawh,” tiin an au lehzual a.
20:32 Tin, Isua a ding a, anmahni a ko va, “In chungah engtia ka tih nge in duh?” a ti a.
20:33 Anni chuan a hnenah, “Mit var kan duh,” an ti a.
20:34 Tichuan, Isuan a khawngaih em em a, an mit a dek a; tichuan an hmu thei ta nghal a, amah chu an zui ta a.
21:1 Tin, Jerusalem khua an thlen dawnin, Bethphage khua, Oliv Tlang chu an thlen chuan Isuan zirtirte pahnih a tir a,
21:2 an hnenah, “In hma zawn khuaah sawn va kal ta ula, sabengtung thlun, a kianga a no nen, in hmu mai ang; phelh ula, ka hnenah han kai rawh u.
21:3 Tin, tupawhin in hnenah engpawh an sawi chuan, ‘Lalpain a duh a ni,’ in ti ang a, tin ani chuan a rawn tir nghal mai ang,’ a ti a.
21:4 ,5 "En teh, i Lal chu, thuhnuairawlh takin, Sabengtung chungah – sabengtung no chung ngeia – chuangin I hnenah a lo kal dawn e,’ tiin, Zion fanu chu hrilh rawh,”tia, zawlnei kaa a sawi kha a lo thlen theihna turin chung chu a lo awm ta a ni.
21:5 ,4 "En teh, i Lal chu, thuhnuairawlh takin, Sabengtung chungah – sabengtung no chung ngeia – chuangin I hnenah a lo kal dawn e,’ tiin, Zion fanu chu hrilh rawh,”tia, zawlnei kaa a sawi kha a lo thlen theihna turin chung chu a lo awm ta a ni.
21:6 Tichuan zirtirte chu an va kal a. Isuan an hnena thu a pek ang ngeiin an ti a,
21:7 sabengtung leh a no chu an rawn kai a, a chungah chuan an puante an phah a, ani chuan a chuan chhan ta a.
21:8 Tin, mipui zinga a tam zawkin kalkawngah chuan an puante an phah a; mi dangin thinga mi chhawl an sat a, kalkawngah an phah bawk a.
21:9 Tin, mipui a hma lama kalte leh a zuite chuan, “Davida fapa hnenah Hosanna! Lalpa hminga lo kal chu fakin awm rawh se Chungnung berah khian Hosanna!” tiin an au va.
21:10 Tin, Jerusalem khuaa a lo luh chuan, akhuain, “He mi hi tunge ni?” tiin an phu ta mur mur a.
21:11 Tin, mipuiho chuan, “He mi hi Zawlnei Isua, Galili rama Nazaret khuaa mi chu a ni,” an ti a.
21:12 Tin, Isua Pathian biak inah chuan a va lut a, biak ina englo zuartute leh leitute zawng zawng chu a hnawt chhuak a, tangka thlengtuho dawhkante leh thuro zuarho thutphahte pawh chu a nam thluksak a;
21:13 an hnenah, “ ‘Ka in chu tawngtaina in an ti ang,’ tih ziak a ni; nangni erawh chuan suamhmangte pukah in siam zawk thin a ni,” a ti a.
21:14 Tin, Pathian biak inah chuan mitdelte leh kebaite a hnenah an lo kal a; anmahni a tidam a.
21:15 Nimahsela, puithiam lalte leh lehkhaziaktuten a thil mak tithe leh biak ina “Davida fapa Hosanna!” tia naupang aute chu an hmuhin an lungni lo em em a,
21:16 a hnenah, “Hengho thu sawi hi i hria em?” an ti a. Tin, Isuan an hnenah, “Hria e; ‘Nausente leh hnute hne laite kaa chhuak chuanin Fakna I tithafamkim ta,’ tih hi in chhiar ngai lo vem ni?” a ti a,
21:17 Tin, anni chu a kalsan a, khawpui ata chu a chhuak a, Bethani-ah a kal a; chutah chuan a riak ta a.
21:18 Tin, zingah khawpui lama a kir leh laiin a ril a lo tam ta a.
21:19 Tin, kawng sirah chuan theipui kung a hmu a, a va pan a, a hnah chauh lo chu engmah a hmu lo va. Tin, a hnenah, “Kumkhuain lo rah tawh suh ang che,” a ti a. Tin, theipui chu a vuai ta nghal mai a.
21:20 Tin, zirtirte chuan chu chu an hmuhin, “Engtizia nge theipui hi a vuai tak nghal mai?” tiin mak an ti hle a.
21:21 Tin, Isuan an hnenah, “Tih tak meuhvin ka hrilh a che u, rinna in neih a, in rinhlelh loh chuan, theipui chunga tih ang chang hi in ti lo vang a, he tlang hnenah pawh hian, ‘Lo insawn la, tuifinriatah lo inpaih rawh,’ in tih ang chuan a lo awm ang.
21:22 Tin, engkim ring chunga tawngtaia in dil apiang chu in hmu ang,” a ti a, a chhang a.
21:23 Tin, Pathian biak ina a luh hnu a, a zirtir lai chuan puithiam lalte leh vantlang upate chu a hnenah an lo kal a, a hnenah, “Tu thuin nge heng thil hi I tih? Tuin nge thu pe che?” an ti a.
21:24 Tin, Isuan an hnenah, “Kei pawhin thu kam khat ka zawt ve ang che u, chu chu mi hrilh chuan, tu thuin nge heng thil hi ka tih ka hrilh ve ang che u.
21:25 Johana baptisma kha, khawia mi thu nge ni? Vana mi thu nge, mihring thu?” a ti a, a chhang a. Tin, an inngaihtuah a, “ ‘Vana mi thu,’ kan tih chuan, ‘Engah nge a thu in awi loh leh?’ min ti si ang a.
21:26 Tin, ‘Mihring thu,’ kan tih chuan, mipui chu kan hlau si; mi zawng zawngin Johana chu zawlneiah an ruat si a,” an ti a.
21:27 Tichuan, Isua an chhang a, “Kan hre lo,” an ti a. Ani pawh chuan an hnenah, “Kei pawhin tu thuin nge heng thil hi ka tih ka hrilh bik lo vang che u.
21:28 “Nimahsela, nangnin engtin nge in ngaih? Mi tu emawin fapa pahnih a nei a. Pakhat hnenah chuan a va kal a, ‘Ka fa, vawiinah grep huanah va thawk rawh,’ a ti a.
21:29 Ani chuan, ‘Ka duh lo,’ a ti a, a chhang a; nimahsela, nakinah a rilru chu a lo lamlet a, a kal ta a.
21:30 Tin, pakhat hnenah pawh chuan a va kal a, chutiang bawkin a va ti a. Tin, ani chuan, ‘Lalpa, ka kal ang e,’ a ti a, a chhang a; nimahsela a kal ta si lo va.
21:31 Chu mite pahnih chuan a tu zawk chuan nge an pa duhzawng ti le?” a ti a. Anni chuan, “A hmasa zawk chuan,” an ti a. Isuan an hnenah, “Tih tak meuhvin ka hrilh a che u, chhiahkhawntute leh nawhchizuarte chuan Pathian ramah an luh khalh dawn che u a nih hi.
21:32 Johana chu felna kawngah chuan inhnenah a lo kal a, amah chu in ring si lo va; chhiahkhawntute leh nawhchizuarte erawh chuan amah chu an ring a; nangnin chu chu in hmuh hnu pawhin amah chu in rin theihna turin in lamlet chuang si lo va.
21:33 “Tehkhin thu dang ngaithla rawh u: Mi tu emaw, in neitu a awm a, chu mi chuan grep huan a siam a, palin a hung vel a, grep sawrna khur a lai a, in sang a sa a; tin, lo enkawltute hnenah thlawhhlawh turin a pe a, ram dangah a kal ta a.
21:34 Tin, a rah lawh a hun dawn chuan a rah la turin lo enkawltute hnenah a bawite a tir a.
21:35 Tin, lo enkawltute chuan a bawite chu an lo man a, pakhat an vua a, pakhat an tihlum a, pakhat lungin an deng a.
21:36 Tin, bawi dang, a hmasa pawl aia tam zawk a tir leh a; anniho chungah pawh an hmaa mite an tih ang bawkin an lo ti leh a.
21:37 Chu mi hnuah erawh chuan, ‘Ka fapa hi chu an zah ang,’ tiin a fapa chu an hnenah a tir a.
21:38 Nimahsela lo enkawltute chuan a fapa chu an lo hmuh veleh, ‘He mi hi roluahtu tur chu a ni; i that ang u khai! a roluah tur hi i neihsak ang u,’ an inti a.
21:39 Tichuan, ani chu an man a, grep huan ata chu an theh chhuak a, an tihlum ta a.
21:40 Chutichuan grep huan neitupa a lo kal hunin chung lo enkawltute chungah chuan engtin nge a rawn tih ang le?” a ti a.
21:41 Anni chuan a hnenah, “Chung mi sualte chu hrehawm takin a tiboral ang a, grep huan chu lo enkawltu dang, a lawh hun apianga a rahte chu a hnena pe zeltu turte hnenah, thlawhhlawh turin a pe ang,” an ti a.
21:42 Isuan an hnenah, “Pathian lehkha a, ‘In satute lung duh loh kha, ‘Chu ngei chu a kila lung tangkai ber a lo ni ta. Chu chu Lalpa tih a ni a, Kan mithmuhah a mak a ni,’ tih hi in chhiar ngai lo vem ni?
21:43 Chu mi avang chuan, ‘Pathian ram chu in hnen ata laksak a ni ang a, a rah chhuah tur hnam hnenah pek a ni ang,’ tih ka hrilh a che u.
21:44 Tin, chu mi lung chunga tlu chu a keh sawm ang; a delh phei chu a rawt dip ang,” a ti a.
21:45 Tin, puithiam lalte leh Pharisaite chuan a tehkhin thute chu an hriatin anmahni chung thu a sawi tih an hre ta a.
21:46 Tin, amah chu man an tum a; nimahsela mipuite chu an hlau si a, zawlneia an ruat avangin.
22:1 Tin, Isuan anmahni a bia a, an hnenah tehkhin thuin a sawi leh a,
22:2 ”Van ram chu lal tuemaw a fapa tana lawi chaw siam nen chuan tehkhin a ni.
22:3 Tin, lawi chaw eia a sawmte chu ko turin a bawite a tir a, nimahsela an lo kal duh lo va.
22:4 Tin, ani chuan, ‘Ka sawmte hnenah, Ngai teh u, ka ruai chu ka peih ta; ka sebawngpate leh ka ran chawm thaute ka talh a, engkim peih a ni ta e; lawi chaw ei turin lo kal tawh rawh u, ti rawh u,’ tiin bawi dangte a tir leh a.
22:5 Nimahsela, an lo ngaihsak lo va, an kal ta mai a, pakhat chu a lovah a kal a, pakhat chu a sumdawnnaah;
22:6 mi dangte chuan a bawite chu an man a, zahthlak takin an siam a, an tihlum ta mai a.
22:7 Chutichuan, lal chu a thinur ta a; a sipaihote a tir a, chung tualthattute chu a tiboral a, an khua pawh a halsak ta a.
22:8 “Tin, a bawite hnenah chuan, ‘Lawi chaw peih a ni ta, ka sawmte erawh kha chu ei tlak an ni lo.
22:9 Chutichuan, kawng peng thuamahte kal ula, mi in hmuh apiang lawi chaw ei turin sawm rawh u,’ a ti a.
22:10 Tichuan, chung bawite chu an chhuak a, kawngahte chuan an va kal a, an hmuh apiang mi sual leh mi thate pawh an hruai khawm ta vek a; tichuan lawi chaw pindan chu mi sawmtein an lo khat ta a.
22:11 “Nimahsela, lal chu mi sawmte en tura a lo luh chuanin, inneihna puan sin lo mi pakhat chutah chuan a hmu a;
22:12 tichuan, a hnenah, ‘Thiana, eng tizia nge ni inneihna puan lovin hetah i lo luh le?’ a ti a. Tin, ani chu a ngawi reng a.
22:13 Tin, lal chuan a bawite hnenah, ‘A kut leh a ke phuar ula, pawn lam thimah paih chhuak rawh u; chutah chuan tah leh ha thial a awm ang,’ a ti a.
22:14 “Sawmte chu tam tak an ni a, thlante erawh chu tlemte an ni,” a ti a.
22:15 Chu mi lai chuan Pharisaite chuan a thu sawia an man theihnazia tur an va inrawn a.
22:16 Tin, an zirtirte, Heroda pawla mite nen, a hnenah an tir a, chu mite chuan, “Zirtirtu, mi dik tak i ni a, tih tak zetin Pathian kawng thu i zirtir thin a, pawisak chuan tumah i nei lo tih kan hria e; tumah thlei bik i nei si lo va.
22:17 Chutichuan, engtin nge i ngaih? Min hrilh teh khai! Kaisara hnena chhiah chawi hi a thiang nge thiang lo?” an ti a.
22:18 Nimahsela, Isuan an sualzia chu a lo hria a, “Vervekte u, engah nge mi fiah?
22:19 Chhiah tangka chu mi entir rawh u,” a ti a. Tin, a hnenah duli an rawn la a.
22:20 Tin, ani chuan an hnenah, “Hei hi tu lem leh tu hming nge ni?” a ti a.
22:21 Anni chuan a hnenah “Kaisara,” an ti a. Tin, ani chuan an hnenah, “A nih ahnu, Kaisara thilte chu Kaisara hnenah pe ula, Pathian thilte chu Pathian hnenah pe ta che u,” a ti a.
22:22 Chung chu chu an hriatin mak an ti hle a, amah chu an kalsan a, an kal ta daih a.
22:23 Chu mi ni vek chuan Saddukaiho, thawhlehna a awm lo tite chu a hnenah an lo kal a; a hnenah,
22:24 “Zirtirtu, Mosian, ‘Mi, fa nei lovin thi sela, a unaupain a nupui chu neiin a unaupa tan chi a thlahsak tur a ni,’ a ti a.
22:25 Aw le, kan zingah sal sarih an awm a; a upa berin nupui a nei a, a thi a, tin, chi a thlah loh avangin a nupui chu a unaupa rochun turin a hnutchhiah a;
22:26 chutiang bawkin pahnihna chuan a ti a, pathumna chuan a ti bawk a, pasarihna thlengin an ti theuh va.
22:27 Tin, an zaa an thih hnuah chuan hmeichhia pawh chu a thi ta a.
22:28 Chutichuan, thawh leh hunah chuan an pasarihte zingah tu nupui ber nge ni ang? an zain an nei theuh si a,” tiin an zawt a.
22:29 Isuan an hnenah, “Pathian Lehkha Thu leh Pathian thiltihtheihna inhriat loh avangin in ngai sual thin a ni.
22:30 Thawhlehnaah chuan nupui pasal an innei dawn tawh lova, vana vantirhkohte ang an ni dawn zawk asin.
22:31 ,32 Tin, mitthi thawhlehna thu chu – Pathianin, ‘Kei Abrahama Pathian, Isaaka Pathian, Jakoba Pathian ka ni,’ tia in hnena a sawi kha in chhiar lo vem ni? Pathian chu mitthi Pathian a ni lo va, mi nung Pathian a ni zawk,” a ti a, a chhang a.
22:32 ,31 Tin, mitthi thawhlehna thu chu – Pathianin, ‘Kei Abrahama Pathian, Isaaka Pathian, Jakoba Pathian ka ni,’ tia in hnena a sawi kha in chhiar lo vem ni? Pathian chu mitthi Pathian a ni lo va, mi nung Pathian a ni zawk,” a ti a, a chhang a.
22:33 Tin, mipuite chuan chu chu an hriatin a thu zirtir chu mak an ti hle a.
22:34 Pharisaite erawh chuan Isuan Saddukaite chu a hnial dang tih an hriatin an inkhawm ta a.
22:35 ,36 Tin, an zinga mi pakhat, dan hretuin, “Zirtirtu, Dan thuah chuan eng thupek hi nge ropui ber?” tiin amah fiah nan thu a zawt a.
22:36 ,35 Tin, an zinga mi pakhat, dan hretuin, “Zirtirtu, Dan thuah chuan eng thupek hi nge ropui ber?” tiin amah fiah nan thu a zawt a.
22:37 Tin, ani chuan a hnenah, “Lalpa, i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tur a ni,’ tih hi.
22:38 Chu chu thu pek ropui leh pawimawh ber a ni.
22:39 Tin, a dawttu, a anpui chu hei hi a ni, ‘Nangmah i inhmangaih angin i vengte pawh i hmangaih tur a ni,’ tih hi.
22:40 Chung thupek pahnihah chuan dan thu leh zawlneite thu zawng zawng a inkhaikhawm vek a ni,” a ti a.
22:41 Tin, Pharisaite chu an inkhawm lai chuan, Isuan anmahni chu thu a zawt a,
22:42 “Krista chu engtin nge in ngaih? Tu fapa nge ni?” a ti a. Anni chuan a hnenah, “Davida fapa,” an ti a.
22:43 ,44 Ani chuan an hnenah, Davidan,‘Lalpa chuan, ka Lalpa hnenah, I hmelmate i kephah hnuaia ka dah hma loh zawng Ka ding lamah thu rawh, a ti,’ tiin, eng tiziain nge Thlarauvin ani chu ‘Lalpa’ a tih le?
22:44 ,43 Ani chuan an hnenah, Davidan,‘Lalpa chuan, ka Lalpa hnenah, I hmelmate i kephah hnuaia ka dah hma loh zawng Ka ding lamah thu rawh, a ti,’ tiin, eng tiziain nge Thlarauvin ani chu ‘Lalpa’ a tih le?
22:45 Davidan ani chu ‘Lalpa’ a tih si chuan, engtin nge a fapa a nih theih?” a ti a.
22:46 Tin, tuman kam khat mahin an chhang thei lo va, chu mi ni achin chu tuman thu dang reng reng an zawt ngam tawh hek lo.
23:1 Tin, Isuan mipuite leh a zirtirte hnenah thu a sawi a,
23:2 “Lehkhaziaktute leh Pharisaite chu Mosia thutphahah chuan an thu thin a,
23:3 chuvangin an hrilh apiang che u chu ti ula, zawm zel ang che u; an thiltih ang erawh chu ti ve suh ang che u, sawi zawng an sawi thin a, an ti si thin lo a ni.
23:4 Phur rit hrehawm takte an siam a, mite an bel thin a, anmahni erawh chuan an kut zungtang pawhin an tisawn duh lo.
23:5 An thiltih zawng zawng chu mihring hmuh aan a ni, an tih zawk thin ni, an thil bun leh khimte chu an tihlai a, an puan hmawr fem an tibuk thin a,
23:6 ruaithehnaah hmun tha ber te, inkhawmna inah thutphah tha ber te,
23:7 dawr hmuna chibai buk te, miten ‘Rabbi’ an tih te an ngaina si thin a.
23:8 “Nangni erawh chu ‘Rabbi’ tihin awm suh u; in zirtirtu chu pakhat chauh a ni a, nangni zawng zawng chu unau in ni si a.
23:9 Tin, lei chungah hian tumah ‘Ka pa’ ti suh u; in Pa chu pakhat chauh a ni, vana mi khi.
23:10 ‘Hruaitute’ tihin awm hek suh u, in hruaitu chu pakhat chauh a ni, Krista chu.
23:11 In zinga ropui ber chu in rawngbawltuah a awm zawk tur a ni.
23:12 Tupawh inngaihlu apiang an tlawm ang a, tupawh inngaitlawm apiang chawimawiin an awm ang.
23:13 “Nimahsela nangni lehkhaziaktu leh Pharisai vervekte u, in chung a pik e! van ram kawng chu mite in kharsak si thin; nangni lah in lut si lo va, mi lut turte pawh luh in phal thin hek lo.
23:15 Nangni lehkhaziaktu leh Pharisai vervekte u, in chung a pik e! saphun pakhat pawh siam turin tuifinriat leh khawmual in kal hual si a, tin, chutianga a lo awm veleh ani chu nangmahni leh hnihin Gehena fapaah in siam thin.
23:16 “Nangni, hruaitu mitdel, ‘Tupawh Pathian bik in chhala chhechham apiang, chu chu engmah a ni lo; tupawh Pathian biak ina rangkachak chhala chhechham apiang erawh chuan hlen tur a ni,’ tite u, in chung a pik e!
23:17 Nangni mi a, mitdelte u! A engnge ropui zawk, rangkachak nge, Pathian biak in, rangkachak tithianghlimtu chu?
23:18 Tin, ‘Tupawh maicham chhala chhechham apiang, engmah a ni lo; a chunga thilpek awm chhala chhechham apiang erawh chuan hlen tur a ni’ in ti.
23:19 Nangni mitdelte u! A engnge ropui zawk, thilpek nge, maicham, thilpek tithianghlimtu chu?
23:20 Chutichuan, tupawh maicham chhala chhechham apiang chuan maicham leh a chunga awm zawng zawng chhalin chhia a chham thin.
23:21 Tupawh Pathian biak in chhala chhechham apiang chuan, Pathian biak in leh a chhunga cheng chu chhalin chhia a chham thin.
23:22 Tupawh van chhala chhechham apiang chuan, Pathian thutphah leh a chunga thu chhalin chhia a chham thin.
23:23 “Nangni lehkhaziaktu leh Pharisai vervekte u, in chung a pik e! pudina te, mohuri te, zira te chu sawmah pakhat in pe thin a, dan thu pawimawh zawk – felna te, khawngaihna te, rinawmna te chu – in ngaihthah si thin; nimahsela, chung chu asin in tih tur ni, a dangte chu tih thulh chuang lovin.
23:24 Nangni hruaitu mitdel, thosi thlifaia sanghawngsei lem si thinte u!
23:25 “Lehkhaziaktu leh Pharisai vervekte u, in chung a pik e! no leh thleng pawn lam in silfai a, a chhung erawh chu hleprukna leh insum lohnain a khat si a.
23:26 Nang Pharisai mitdel, no leh thleng chhung lam chu silfai hmasa rawh, a pawn lam pawh a lo fai theihna turin.
23:27 “Lehkhaziaktu leh Pharisai vervekte u, in chung a pik e! Thlan hnawih var, pawn lam mawi taka lang, a chhung lam erawh chu mitthi ruhte leh bawlhhlawh tinrenga khat angte chu in ni asin.
23:28 Nangni pawh chutiang takin pawnlamah chuan mihring mithmuhin fel takin in lang thin a, in chhung lamah erawh chuan vervekna leh sualnain in khat si a.
23:29 “Nangni lehkhaziaktu leh Pharisai vervekte u, in chung a pik e! Zawlneiho thlan inte in sa a, mi fel thlante pawh in cheimawi a,
23:30 Kan pute dam lai khan lo awm ve mah ila, zawlneite thisen an chhuahnaah chuan kan tel ve lo vang,’ in ti thin.
23:31 Chutichuan, zawlneiho thattute fa in ni tih in inhriattir a ni.
23:32 In pute tehkhawng chu tikhat nghal mai rawh u.
23:33 Rulte u, rul thlahte u, Gehenna rorelna chu engtin nge in pumpelh theih ang?
23:34 “Ngai teh u, chu mi avang chuan in hnenah zawlneite, mi fingte, lehkhaziaktute ka rawn tir dawn; thenkhat in tihlum ang a, kraws-ah in khengbet ang, thenkhat in inkhawmna inahte savunhruiin in vua ang a, khaw tinah in tiduhdah zui zel ang;
23:35 chutichuan, Abela mi fel tak thisen atangin, Pathian biak in leh maicham inkara Barakia fapa Zakaria in thaha thisen thleng khan, lei chunga mi fel thisen an chhuah zawng zawng chu nangmahni chungah a lo la thleng thei ang.
23:36 Tih tak meuhvin ka hrilh a che u, chung zawng zawng chu tun lai chhuante chung hian a lo la thleng ang.
23:37 “Aw Jerusalem, Jerusalem! Zawlneiho thattu, i hnena an rawn tirhte lunga lo denghlumtu, arpuiin a note a thla hnuaia a awp khawm angin i fate vawi engzat nge awp khawm ka tum kha! Nimahsela in duh si lo.
23:38 En teh u, in in chu a ruaka hnutchhiah che u in a awm ta.
23:39 Ka hrilh a che u, ‘Lalpa hminga lo kal chu fakin awm rawh se,’ in tih hma loh chuan, tun achinah mi hmu leh dawn tawh lo a nih hi,” a ti a.
24:1 Tin, Isua Pathian biak in ata a chhuak a, a kal dawn a. Tin, a zirtirte chu Pathian biak inte entir turin a hnenah an lo kal a.
24:2 Ani erawh chuan an hnenah, “Heng zawng zawng hi in hmu maw? tih tak meuhvin ka hrilh a che u, tihchim lohva lung intiang reng reng hetah a awm lo vang,” a ti a, a chhang a.
24:3 Tin, Oliv Tlangah chuan a thut laiin zirtirte chu anmahni chauhvin a hnenah an kal a, “chung chu engtikah nge a lo awm ang? i lo kal lehna leh khawvel tawpna chhinchhiahna chu engnge ni ang? min hrilh rawh,” an ti a.
24:4 Tin, Isuan a chhang a, an hnenah, “Tuman an tihder loh nan che u fimkhur rawh u.
24:5 Mi tam takin, ‘Krista chu ka ni,’ tiin keima hming chhalin an lo kal ang a, mi tam tak an tihder dawn si a.
24:6 Tin, indo thu leh indo thuthang in la hria ang; in mangan loh nan fimkhur rawh u; chung chu a lo thleng tur reng a ni; nimahsela tawpna chu a la ni rih lo vang.
24:7 Hnam hrang leh hnam hrang an indo vng a, ram hrang leh ram hrang an indo vang a; hmun hrang hrangah tamte a tla ang a, lirte a nghing ang.
24:8 Chung zawng zawng chu nau vei tantirhna a ni.
24:9 “Chu mi hunah chuan hrehawm tuar turin an mantir ang che u a, an tihlum ang che u; ka hming avnginhnam zawng zawng huat in ni ang.
24:10 Chu mi hunah chuan mi tam tak an tlu ang a, an inmantir tawn ang a, an inhaw tawn ang.
24:11 Zawlnei der tam tak pawh an lo chhuak ang a, mi tam tak an tihder ang,
24:12 Tin, sual a la pun dawn avangin mi tam zawk hmangaihna chu a la dai ang.
24:13 Nimhsela, a tawp thlenga tuar peih apiang chu, chu mi ngei chu chhandamin a awm ang.
24:14 Tin, he ram Chanchin Tha hi hnam zawng zawng hriattirna turin khawvel zawng zawngah hrilhin a awm ang; chu mi zawhah chuan tawpna chu a lo thleng ang.
24:15 “Chutichuan, titiautu tenawm, zawlnei Daniela sawia kha, hmun thianghlima dinga in hmuh hunah chuan (a chhiar apiangin a awmzia hre rawh se)
24:16 Judai rama awmte chu tlangahte tlan bo rawh se;
24:17 in chunga awm chu a ina englo chuh turin chhuk suh se;
24:18 tin, lova awm chu a puan chuh turin kir leh suh se.
24:19 Chung ni chuan raite leh nau no pawmte chung chu a pik ang.
24:20 Tin, in tlan bo hun tur chu thlasikah emaw, Chawlhniah emaw a lo thlen loh nan tawngtai rawh u;
24:21 chu mi hunah chuan hrehawm nasa tak a awm dawn si a; chutianga nasa reng reng chu leilung pian tirh ata tun thlengin a la awm ngai lo va, awm pawh engtikah mah a lo awm leh tawh hek lo vang.
24:22 Tin, chung nite chu tihtawi ni suh sela mihring reng reng damin an chhuak lo vang; nimahsela, thlante avang chuan chung nite chu tihtawi a ni ang.
24:23 “Chutih hunah chuan tupawhin in hnenah, ‘En teh, Krista chu heta hi a awm,’ emaw, ‘Heta hi,’ emaw, an tih chuan awi suh ang che u.
24:24 Krista derte leh zawlnei derte an lo chhuak dawn si a, chung chuan thei ang sela thlante meuh pawh an tihder theih nan chhinchhiahna leh thilmak ropui takte an ti ang. 25Ngai teh u, ka hrilh lawk tawh che u hi.
24:26 Chutichuan, in hnenah, ‘Ngai teh u, thlalerah a awm,’ an tih che u chuan, kal chhuak suh u; ‘Pindan chhungrilahte a awm,’ an tih che u chuan, awi duh suh u.
24:27 Kawl, chhak lamah a lo phe chhuak a, thlang lam thleng pawhin a lang thin a, Mihring Fapa lo kal lehna chu chutiang chu a ni dawn si a.
24:28 “Khawiah pawh saruang awmna apiangah mulukawlhte pawh an awm khawm ang.
24:29 “Nimahsela, chung ni hrehawm hnu lawkah chuan ni tihthimin a awm ang a, thla a eng tawh lo vang a, van atangin arsite a lo tla ang a, van thiltihtheihnate chu tihnghin a ni ang;
24:30 chutih hunah chuan Mihring Fapa chhinchhiahna chu vanah a lang ang. Chu mi hunah chuan leia chi tinin an awmte an inchum ang a, Mihring Fapa hi thiltihtheihna leh ropuina nasa tak nen van chum chunga lo kal ang hmu ang.
24:31 Tin, a vantirhkohte chu, tawtawrawt ri nasa tak nen a tir chhuak ang. Anni chuan a thlante chu kawl kil li ata – van tawp atanga a tawp lehlam thlengin – a lawr khawm ang.
24:32 “Tichuan, theipui kungah hian a tehkhin thu zir rawh u” A tang a lo no va, a hnah a lo chawr chuan nipui a thaw dawn tih in hre thin;
24:33 chutiang bawkin nangni pawhin chung zawng zawng chu in hmuh hun chuan amah chu a lo hnai tawh a, kawngka bul ngeiah a awm tih hria ang che u.
24:34 Tih tak meuhvin ka hrilh a che u, chung zawng zawng chu a thlen kim hma loh zawng tun lai chhuante hi an ral lo vang.
24:35 Lei leh van a ral ang a, ka thu erawh chu a ral lo vang.
24:36 “Nimahsela, chu mi ni leh a hun thu chu Pa chauh lo chuan tuman, vana vantirhkohte pawhin, Fapa pawhin an hre lo.
24:37 “Tin, Nova dam lai ang bawk kha Mihring Fapa lo kal lehna chu a ni ang.
24:38 Chung ni tuilet hmate chuan Nova lawnga a luh ni thlengin an eiin an bar a, nupui pasal an innei thin;
24:39 tui a lo let a, an zaa a lak bo vek hma loh chuan engmah an hre lo va; Mihring Fapa lo kal lehna chu chutiang bawk a ni ang.
24:40 Chu mi hunah chuan lovah mi pahnih an awm ang a; pakhat chu kal bopuiin a awm ang a, pakhat chu hnutchhiahin a awm ang.
24:41 Hmeichhe pahnih buh rawt sawmnaah chuan buh rawt sawmin an awm ang a, pakhat chu kal bopuiin a awm ang a, pakhat chu hnutchhiahin a awm ang.
24:42 “Chutichuan ngaihven rawh u, eng niah nge in Lalpa a lo kal dawn in hre si lo.
24:43 Nimahsela, hei hi hre rawh u, rukru a lo kal hun tur in neituin hria sela, a veng ang a, a in a reh pawhtir lo vang.
24:44 Chuvangin, nangni pawh inring rengin awm rawh u, in rin loh hunah Mihring Fapa a lo kal dawn si a.
24:45 “Bawi rinawm, fing tak, a puin a hun apianga an chaw chan tur semsak turin a chhungte chunga hotua a siama chu, tu ber nge ni ang le?
24:46 A pu a lo kal huna bawi chutiang tia a rawn hmuh a chu a eng a thawl ang.
24:47 Tih tak meuhvin ka hrilh a che u, a neih zawng zawng chungah hotuah a siam ang.
24:48 Amaherawhchu bawi sual chuan, a rilruin, ‘Ka pu a lo kal lawk dawn lo ve,’ tiin,
24:49 a bawipuite lo vel ta sela, mi ruite hnenah eiin bar sela,
24:50 chu bawia pu chu a rin loh niah, a hriat loh laiin a lo kal ang a,
24:51 bung hnihah a rawn chhuah ang a, mi vervekte chan ang a chantir ang; chutah chuan tah leh ha thial chu a awm ang.
25:1 “Chu mi hunah chuan van ram chu nula thianghlim sawm an khawnvar kenga mo neitu hmuak tura chhuakte nen chuan tehkhin a ni tawh ang.
25:2 An zinga mi panga an a a, panga an fing.
25:3 A ate chuan an khawvarte an kenin, a tui an keng tel si lo va;
25:4 a fingte erawh chuan an khawnvarte an keng a, an umte chuan a tui an keng tel bawk a.
25:5 Tin, mo neitu chu a lo kal har avangin an zain an muthlu a, an lo muhil ta a.
25:6 Tin, zan lai takah chuan, ‘Ngai teh u, mo neitu chu a lo kal e! A hmuak turin lo chhuak r’u khai!’ tiin au thawm a lo awm ta a.
25:7 Chu veleh chuan nula thianghlimho chu an tho vek a, an khawnvarte chu an buatsaih a.
25:8 Tin, a ate chuan, a fingte hnenah, ‘In khawnvar tui kha min pe ve rawh u; kan khawnvarte a thi dawn e,’ an ti a.
25:9 Nimahsela, a fingte chuan, ‘Keini leh nangni tan a daih lo vang e; a zuartute hnenah kal ula lei ve zawk rawh u,’ tiin an chhang a.
25:10 Tin, lei tura an kal bo hlan chuan mo neitu chu a lo thleng ta a; tichuan, a peihte chu amah nen lawi chaw eiin an lut a; tin, kawng chu an khar ta a.
25:11 Chu mi hnuah chuan nula thianghlim dangte pawh chu an lo thleng a, ‘Ka pu, ka pu, min hawnsak rawh!’ an ti a.
25:12 Ani erawh chuan, ‘Tih tak meuhvin ka hrilh a che u, ka hre lo che u a ni,’ a ti a, a chhang a.
25:13 “Chutichuan, ngaihven rawh u, a ni leh a hun chu in hre si lo va.
25:14 “Mi, ram danga kal dawn a, ama bawite kova, a sumte an hnena kawltir ang chu a ni si a.
25:15 Bawi pakhat hnenah talent nga a pe a, bawi dang hnenah talent hnih a pe a, bawi dang hnenah talent khat a pe a; an tih theih tawk tur ang zel theuhvin a pe a; tichuan a kal ta a.
25:16 Tin, talent nga dawngtu chu chung chuan a va sumdawng ta nghal a, talent nga dang a dek chhuak ta a.
25:17 Chutiang bawkin talent hnih dawngtua pawh chuan talent hnih dang a dek chhuak ta a.
25:18 Talent khat dawngtu erawh chu a va kal a, lei a lai a, a pu tangka chu a thukru ta zawk a.
25:19 “Tin, rei tak hnuah chung bawiho pu chu a lo haw a, an hnenah a sum chanchin a tifel a.
25:20 Tichuan, talent nga dawngtu a lo kal a, talent nga dang a rawn keng a, ‘Ka pu, nangin talent nga mi kawltir kha; en teh, talent nga dang ka dek chhuak e,’ a ti a.
25:21 A pu chuan a hnenah, ‘Bawi tha leh rinawm, i titha e; tlemte chungah i rinawm a, tam tak chungah ka awmtir ang che; i pu lawmnaah lut rawh,’ a ti a.
25:22 Tin, talent hnih dawngtu pawh chu a lo kal a, ‘Ka pu, nangin talent hnih mi kawltir kha; en teh, talent hnih dang ka dek chhuak e,’ a ti a.
25:23 A pu chuan a hnenah, ‘Bawi tha leh rinawm, i titha e; tlemte chungah i rinawm a, tam tak chungah ka awmtir ang che; i pu lawmnaah lut rawh,’ a ti a.
25:24 “Tin, talent khat dawngtu pawh chu a lo kal a, ‘Ka pu, mi ti kher kher i ni tih ka hria a che; i tuh lohnaah pawh i at thin a, i tihdarh lohnaah pawh i seng thin a ni;
25:25 tichuan, ka hlau va, ka va kal a, i talent kha leiah ka thukru a; en teh, i ta ngai kha i hmuh leh hi,’ a ti a.
25:26 a pu chuan a hnenah, ‘Bawi sual leh zawmthawpa, ka tuh lohnaah pawh ka at a, ka tihdarh lohnaah pawh ka seng thin tih i hria maw?
25:27 Chuti a nih ahnu, ka tangka chu sumdawngtute hnenah lo dah tawh tur i ni, chutichuan, ka lo haw hian ka ta hi a pung nen ka hmu leh tur a ni.
25:28 Tichuan, a talent khat kha laksak ula, talent sawm neitu hnenah pe rawh u.
25:29 Tupawh a nei apiang an pe belhchhah ang a, a lo ngah ang; tupawh a nei lo apiang erawh chu a neih chhun pawh an laksak ang.
25:30 Tin, bawi thahnem lo kha pawn lamah thimah chuan paih chhuak rawh u; chutah chuan tah leh ha thial chu a awm ang,’ a ti a, a chhang a.
25:31 “Amaherawhchu, Mihring Fapa hi chu, a vantirhkohte zawng zawng nen, a ropuinaa inthuama a lo kal hunah chuan, a ropuina thutphahah a thu ang a;
25:32 a hmaah chuan hnam tin an inkhawm ang a: beram vengtuin kel zing ata a beramte a hlir angin anniho chu a hlir ang a;
25:33 beramte chu a ding lamah a dah ang a, kelte erawh chu a vei lamah a dah ang.
25:34 “Chu mi hunah chuan Lalber chuan a ding lama mite hnenah chuan, ‘Ka pa voh bikte u, lo kal ula khawvel siam tantirh ata in tana ram buatsaih chu chang rawh u;
25:35 ka ril a tamin nangnin ei tur mi pe a; ka tui a halin in tur mi pe a; mikhual ka nihin mi thleng a;
25:36 saruak ka nihin puan mi sintir a; ka dam lohvin mi kan a; tan ina ka awmin ka hnenah in lo kal si a,” a la ti ang.
25:37 “Chu mi hunah chuan mi felte chuan, ‘Lalpa, engtikah nge riltamin kan hmuh chia ei tur kan pek che? tuihalin kan hmuh chia in tur kan pek che?
25:38 Engtikah nge mikhuala kan hmuh chia kan thlen che? Saruaka kan hmuh chia puan kan sintir che?
25:39 Engtikah nge dam lovin emaw tan inah emaw kan hmuh chia i hnena kan lo kal?’ tiin an la chhang ang.
25:40 Tin, Lalber chuan an hnenah, ‘Tih tak meuhvin ka hrilh a che u, Heng ka unau te berte zinga mi pakhat chunga in tih chu ka chunga ti in ni,’ tiin a la chhang ang.
25:41 “Chu mi zawhah chuan, a vei lama mite hnenah pawh chuan, ‘Anchhe dawngte u, kumkhaw mei, diabola leh a tirhkohte tan an buatsaihah chuan mi kal bosan rawh u;
25:42 ka ril a tamin nangnin ei tur mi pe lo va; ka tui a halin in tur mi pe lo va;
25:43 mikhual ka nihin mi thleng lo va; saruak ka nihin puan mi sintir lo va; dam lo leh tan ina ka awmin mi kan si lo,’ a la ti ang.
25:44 Chu mi hunah chuan anni pawhin, ‘Lalpa, engtikah nge riltamin emaw, tuihalin emaw, mikhualin emaw, saruakin emaw, dam lovin emaw, tan inah emaw kan hmuh chia, rawng kan bawlsak loh che? Tiin an la chhang ang.
25:45 Tin, ani chuan an hnenah, ‘Tih tak meuhvin ka hrilh a che u. Heng mi te berte zinga mi pakhat chunga in ti lo chu ka chunga ti lo in ni,’ tiin a la chhang a.
25:46 “Tin, chung chu kumkhaw hremnaah an kal ang a; mi felte erawh chu kumkhaw nunnaah an kal ang,” a ti a.
26:1 Tin, heti hi a ni a, Isuan chung thu zawng zawng chu a sawi zawin a zirtirte hnenah,
26:2 “Ni hnih achinah Kalhlen Kut a lo awm dawn tih in hria a, Mihring Fapa hi khenbeh turin an mantir dawn a ni,” a ti a.
26:3 Chu mi lai chuan Puithiam Lalber Kaiapha an tiha in hual chhung kawtlaiah chuan puithiam lalte leh vantlang upate chu an inkhawm a;
26:4 Isua chu ngamthlema man a, an tihhlum theihna turin an inrawn a.
26:5 Nimahsela, “Kut chhung chuan ni suh se, chutilochuan vantlang zingah buaina a lo awm dah ang e,” an ti a.
26:6 Tin, Isua Bethani khuaah, phar Simona inah chuan a awm laiin,
26:7 hmeichhe pakhat alabasta bawma hriak rimtui to tak kengin, a hnenah a lo kal a, a chaw kil laiin a luah a leih a.
26:8 Nimahsela, zirtirte chuan chu chu an hmuhin an thinur a, “Eng atan nge hetia a tihboral mai mai ni?
26:9 He hriak hi man tam taka hralh a, mi retheite hnenah pek theih a ni si a,” an ti a.
26:10 Isua erawh chuan chu chu a hriatin an hnenah, “Hmeichhia hi engah nge in tihbuai ni? ka chungah hian thil tha tak a ti a ni.
26:11 Mi retheite chu kumkhuaa inhnena awm an ni alawm, kei erawh chu kumkhuaa in hnena awm tur ka ni lo.
26:12 He hriak rimtui ka taksaa a leih hi, phum tura mi buatsaih turin a ti a nih hi.
26:13 Tih tak meuhvin ka hrilh a che u, khawvel zawng zawngah khawiah pawh he Chanchin Tha hi an hrilna apiangah he hmeichhe thiltih pawh hi amah hriat rengna turin an sawi ve zel ang,” a ti a.
26:14 Chu mi hnuah chuan sawm leh pahnihte zinga mi pakhat, Juda Iskariota an tiha chu, puithiam lalte hnenah a kal a.
26:15 “Amah chu ka mantir ang che u a, engnge min pek ang?” a ti a. Tin, tangka sawmthum an buksak ta a.
26:16 Chu mi chinah chuan mantirna remchang a zawng ta a.
26:17 Tin, chhang dawidim telh loh ni, ni hmasa berah chuan zirtirte chu Isua hnenah an lo kal a, “Kalhlen Kut chaw eina turin khawiah nge buatsaihsak che ila i duh?” an ti a.
26:18 Tin, ani chuan, “Khawpuiah tuemaw hnenah kal ula, a hnenah, ‘Zirtirtu chuan, Ka hun a hnai ta a; ka zirtirte nen Kalhlen Kut i inah kan kut ang e, a ti e,’ va ti ang che u,” a ti a.
26:19 Tin, Isuan an hnena a tih angin zirtirte chuan an ti a; Kalhlen Kut chaw chu an buatsaih ta a.
26:20 Tin, khua a lo tlai lam chuan zirtir sawm leh pahnihte nen chaw an kil a;
26:21 tin, an ei laiin ani chuan, “Tih tak meuhvin ka hrilh a che u, in zinga mi pakhat hian mi mantir ang,” a ti a.
26:22 Tin, an lungngai ta em em a, a hnenah, “Lalpa, keimah em ni?” an ti ta theuh va.
26:23 Tin, ani chuan, “Thleng mi zenpuitu ngei chuan mi mantir ang.
26:24 Mihring Fapa hi a chanchin an ziak ang tak khan a kal dawn a ni; nimahsela Mihring Fapa mantirtu tur mihring chung chu a pik e! chu mihring chu piang suh sela a tan a tha zawk ang,” tiin a chhang a.
26:25 Tin, a mantirtu tur Juda chuan a chhang a, “Rabbi, keimah em ni?” a ti a. Ani chuan a hnenah, “Ni e,” a ti a.
26:26 Tin, an ei laiin Isuan chhang a la a, mal a sawmsak a, a phel a; tin, zirtirte hnenah chuan a pe a, “La ula, ei rawh u; hei hi ka taksa a ni,” a ti a.
26:27 Tin, no a la a, lawm thu a sawi a, an hnenah a pe a, “In zain in rawh u;
26:28 hei hi ka thisen, sualte ngaihdam nana mi tam tak tana chhuak tur, thuthlunna chu a ni.
26:29 Nimahsela ka hrilh a che u, ka Pa ramah nangmahni nena a thar ka in ni a thlen hma loh zawng tun achinah grep hrui raha mi hi ka in leh tawh lo vang,” a ti a.
26:30 Tin, hla an sak zawhin an chhuak a. Olive Tlangah chuan an kal ta a.
26:31 Tin, Isuan an hnenah, “Zaninah hian in zain ka chung thuah lungni lovin in awm vek ang; ‘Beram vengtu chu ka vua ang a, beram rual chu an darh ang,’ tih ziak a ni si a.
26:32 Nimahsela, ka thawhleh hnuin Galili ramah in hmaah ka kal ang,” a ti a.
26:33 Petera erawh chuan a hnenah, “An zain i chung thuah lungni lovin awm mah sela kei zawng lungni lovin ka awm tawp lo vang,” tiin a chhang a.
26:34 suan a hnenah, “Tih tak meuhvin ka hrilh a che, zaninah hian ar a khuan hmain, nangin vawi thum mi phat ang,” a ti a.
26:35 Peteran a hnenah, “I thihnaah chuan thi ve dawn mah ila ka phat tawp lo vang,” a ti a. Chutiang bawkin zirtirte zawng zawng chuan an ti ta theuh va.
26:36 Chu mi zawhah chuan Isua anniho nen hmun pakhat Gethsemane an tih chu an thleng a; tin, ani chuan a zirtirte hnenah, “Sawta ka va tawngtai chhung zawng hetah hian lo thu rawh u,” a ti a.
26:37 Tin, Petera leh Zebedaia fapate pahnih chu a hruai a, a lungngaiin a lo mangang ta em em a.
26:38 Tin, an hnenah, “Ka rilru a lungngai em em a, thihna khawp hial a ni; hetah hian awm ula, mi venpui rawh u,” a ti a.
26:39 Tin, tlemin hma lamah a va kal hlek a, a bawkkhup a, “Aw ka Pa, a theih chuan he no hian mi pel lul rawh se; nimahsela keima thu ni lovin, nangma thu thu ni zawk rawh se,” tiin a tawngtai a.
26:40 Tin, zirtirte hnenah chuan a lo kal a, anni chu muhilin a rawn hmu a, tichuan Petera hnenah, “E khai! Nangin darkar khat pawh mi venpui thei lo a ni maw?
26:41 Thlemnaa in luh loh nan inring rengin tawngtai rawh u; thlarau zawngin a peih a, tisa erawh chu a chak lo a ni,” a ti a.
26:42 Tin, vawi hnihnaah a va kal a, a tawngtai leh a, “Aw ka Pa, ka in lohva hei hian mi pelh theih lul loh chuan nangma thu thu ni rawh se,” a ti a.
26:43 Tin, a lo kal leh a, anniho chu muhilin a rawn hmu leh a, an mut a chhuak hle si a.
26:44 Tin, a kalsan leh a, a vawi thumnaah a thu sawi ngai sawiin a tawngtai leh a.
26:45 Chu mi zawhah chuan zirtirte hnenah a lo kal leh a, an hnenah, “Tunah zawng muhil ula, chawl tawh rawh u! Ngai teh u, a hun chu a lo thleng ta a, Mihring Fapa hi mi sualte kutah an mantir dawn hi.
26:46 Tho ula, i kal ang u; en teh u, mi mantirtu tur chu a lo hnaih tak hi,” a ti a.
26:47 Tin, a la sawi lai mekin Juda, sawm leh pahnihte zinga mi pakhat chu a lo thleng ta a, ama rual chuan puithiam lalte leh lehkhaziaktute leh upate hnen ata mipui tam tak khandaih leh talhtum kengin an lo thleng bawk a.
26:48 Tin, a mantirtu tur chuan chhinchhiahna tur a lo hrilh lawk diam a, “Ka fawh apiang chu amah a ni ang, man ang che u,” tiin.
26:49 Tichuan Isua chu a va pan ta nghal a, “Chibai, Rabbi!” tiin a fawp ta ngawih ngawih a.
26:50 Tin, Isuan a hnenah, “Thiana, i rawn kal chhan chu ti rawh,” a ti a. Chu veleh Isua chu an chelh a, an man ta a.
26:51 Tin, ngai teh, Isua hote zinga pakhat chuan a kutin a ban a, a khandaih a phawi a, Puithiam lalber bawi chu a sat a, a beng a sah thlaksak a.
26:52 Tin, Isuan a hnenah, “I khandaih kha a dahnaah dah leh rawh, khandaih ruaitute zawng zawng chu khandaih vekah an thi dawn si a.
26:53 Tunah pawh vntirhkoh sangruk hmun sawm leh hmun hnih aia tam zawk mi rawn tirhsak turin ka Pa hnenah ngen thei lovin mi ring em ni le?
26:54 Nimahsela ngen ang ila, engtin nge Pathian Lehkha Thu-hetianga a lo awm tur thu hi-a thlen theih ang le?” a ti a.
26:55 Chu mi lai tak chuan Isuan mipuite hnenah chuan, “Khandaihte, talhtumte kengin suamhmang man tur ang rengin mi man turin in lo chhuak a ni maw? Pathian biak inah ni tin zirtirin ka thu thin a, mi man si lo va.
26:56 Nimahsela zawlnei lehkha thute chu a lo thlen theihna turin heng zawng zawng hi a lo awm ta a nih hi,” a ti a. Chu mi lai chuan zirtirte zawng zawng chuan amah chu an thlahthlam a, an tlan bo ta vek a.
26:57 Tin, Isua mantute chuan Puithiam Lalber Kaiapha in a, lehkhaziaktute leh upate awm khawmnaah chuan ani chu an hruai ta a.
26:58 Nimahsela Peteran hla tak atangin amah chu a zui a, Puithiam Lalber in hual chhung kawtlai thlengin; tin, a va lut a, a tawpna hmu turin chhiahhlawhte zingah a thu ve a.
26:59 Tin, amah an tihhlum theihna turin puithiam lalte leh roreltuho zawngzawng chuan Isua hekna an zawng a;
26:60 hretu der tam tak lo kal mah sela, an hmu si lo. Nakinah erawh chuan mi pahnih an lo kal a,
26:61 “He mi hian, ‘Pathian biak in hi thiat a, ni thum chhunga sa leh thei ka ni,’ a ti e,” an ti a.
26:62 Tichuan Puithiam Lalber chu a ding chhuak a, a hnenah, “Engmahin i chhang lo maw? Heng hian an hekna che hi engtizia nge ni?” a ti a.
26:63 Isua erawh chu a ngawi reng a. Tin, Puithiam Lalber chuan a hnenah, “Pathian nung chhalin thu ka pe a che, Krista Pathian Fapa chu i ni emaw? min hrilh rawh,” a ti a.
26:64 Isuan a hnenah, “Ni e. Nimahsela ka hrilh a che, tun hnuah Mihring Fapa hi thiltihtheihna ding lama thu a, van chhum chunga lo kal in la hmu dawn a ni,” a ti a.
26:65 Tin, Puithiam Lalber chuan a silhfente a pawt thler a, “Pathian a sawichhe ta; hretu dang engah nge kan ngaih tawh ang? Ngai teh u, Pathian a sawichhiatzia chu tunah in hre tawh e.
26:66 Engtin nge in ngaih?” a ti a. Anni chuan, “Thi tlak a ni,” tiin an chhang a.
26:67 ,68 Tin, a hmaiah chil an chhak a, an hnek a; thenkhat chuan, “Nang Krista, tuin nge beng che? min hrilh rawh,” tiin an beng a.
26:68 ,67 Tin, a hmaiah chil an chhak a, an hnek a; thenkhat chuan, “Nang Krista, tuin nge beng che? min hrilh rawh,” tiin an beng a.
26:69 Tin, Petera chu pawnah, in hual chhung kawtlaiah chuan a thu a; tin, nula pakhat hnenah a lo kal a, “Nang pawh Isua Galili rama mi hnena awm kha i nih hi,” a ti a.
26:70 Ani erawh chuan, “I thu sawi chu ka hre hauh lo mai,” tiin an zaa hmaah a pha a.
26:71 Tin, sumhmuna a va chhuah veleh nula dangin ani chu a hmu a, chuta awmte hnenah chuan, “He mi pawh hi Isua Nazaret mi hnena awm kha a nih hi,” a ti a.
26:72 Tin, “Chu mihring chu ka hre lo,” tiin chhechhamin a pha leh a.
26:73 Tin, rei lo te achinah a kianga dingte chuan, Petera hnenah, “Nang pawh an zinga mi i ni ngei mai, i tawngah a hriat alawm,” an ti a.
26:74 Tin, ani chuan, “Chu mihring chu ka hre lo,” tiin anchhia inlawhin chhia a chham ta a. Tin, ar a khuang ta nghal a.
26:75 Tin, Petera chuan Isuan, “Ar a khuan hmain nangin vawi thum mi phat ang,” a tih thu kha a lo hre leh ta a. Tin, a chhuak a, a tap ta zawih zawih a.
27:1 Tin, zing a lo nih chuan puithiam lalte leh vantlang upate zawng zawng chu Isua tihlum turin a chung thuah an inrawn a;
27:2 tin, an phuar a, an hruai a, Ram Awptu Pilata hnenah an pe ta a.
27:3 Tin, Juda a mantirtu khan Isua thiam loh an chantir tih a hriat veleh a inchhir a, tangka sawmthum kha puithiam lalte leh upate hnenah chuan a rawn la leh a,
27:4 “Mi thiam thisen ka mantir kha thil ka lo tisual a ni,” a ti a. Anni erawh chuan, “Chu chu kan tan engnge pawi ang? Nangin i tih tihin ti rawh,” an tihsan a.
27:5 Tin, ani chuan tangka chu hmun thianghlimah chuan a paih lut a, a kal bo va; a va inawkhlum ta a.
27:6 Tin, puithiam lalte chuan tangkate chu an la a, “Hei hi thawhlawm bawma dah a thiang lo ve, thisen man a ni si a,” an ti a.
27:7 Tichuan an inrawn a, mikhualte phumna turin Belvawtu hmun chu an lei ta a.
27:8 (Chuvangin a ni, chu mi hmun chu tun thlenga ‘Thisen Hmun’ an tih tak ni.)
27:9 ,10 Chu mi lai chuan Zawlnei Jeremian,“Tin, tangka sawmthum, An chhiara man,Israel thlah, tuten emaw an chhiara man chu,An la a,Lalpan min tiam angin Belvawtu hmun man atan an pe a,” tia a sawi kha a lo thleng ta a ni.
27:10 ,9 Chu mi lai chuan Zawlnei Jeremian,“Tin, tangka sawmthum, An chhiara man,Israel thlah, tuten emaw an chhiara man chu,An la a,Lalpan min tiam angin Belvawtu hmun man atan an pe a,” tia a sawi kha a lo thleng ta a ni.
27:11 Tin, Isua chu ram Awptu hmaah chuan a ding a. Tin Ram Awptu chuan “Judate lal i ni em?” tiin a zawt a. Tin, Isuan a hnenah, “Ni e,” a ti a.
27:12 Tin, puithiam lalte leh upaten an hek laiin engmahin a chhang lo va.
27:13 Tichuan Pilatan a hnenah, “An hekna zozai che hi i hre lo em ni?” a ti a.
27:14 Tin, kam khat mahin a chhang lo va; chutichuan Ram Awptu chuan mak a ti hle a.
27:15 Tin, Ram Awptuin kut niah chuan mi tang pakhat, an duh apiang, mipuite chu a chhuahsak thin a.
27:16 Tin, chu mi lai chuan mi tang hmingthang tak, Barabba an tih chu an nei a.
27:17 Chutichuan an rawn inkhawm chuanin Pilatan an hnenah, “Tunge chhuahsak che u ila in duh? Barabba nge, Isua, Krista an tiha chu?” a ti a.
27:18 (Itsikna avangin ani chu an mantir tih a hre si a.)
27:19 Tin, rorelna thutphahah chuan a thutlaiin a nupuiin, “Kha mi fel tak chungah khan engmah ti suh; vawiinah hian amah avangin mumangah thil tam tak ka tuar a ni,” tiin a chah a.
27:20 Tin, puithiam lalte leh upaten Barabba dila Isua tiboral turin mipuite chu an thlem a.
27:21 Ram Awptu erawh chuan anniho chu a bia a, “Anni pahnih chu a tu zawk nge chhuahsak che u ila in duh” a ti leh a. Tin, anni chuan, “Barabba,” an ti a.
27:22 Pilatan an hnenah, “Isua, Krista an tih hi, engtin nge ka tih tak ang le?” a ti a. An zain, “Ani chu Kraws-ah khenbehtir rawh,” an ti a.
27:23 Tin, ani chuan, “Engah maw? Engnge a tihsual ni?” a ti a. Nimahsela anniho chu, “Kraws-ah khenbehtir rawh,” tiin an au chiam a.
27:24 Tichuan Pilatan engmah a ti thei lo va, a lo buai deuh deuh zawk dawn tih a hriatin, tui a la a, mipuiho hmaah chuan a kut a sil a, “He mi fel thisenah hian ka thiang e; nangnin in tih tihin ti rawh u,” a ti a.
27:25 Tin, vantlang zawng zawng chuan, “A thisen chu keimahni chungah leh kan fate chungah awm rawh se,” tiin an chhang a.
27:26 Chu mi zawhah chuan Barabba chu a chhuahsak a; Isua erawh chu a vua a, kraws-a khenbeh turin a pe ta a.
27:27 Chu mi zawhah chuan Ram Awptu sipaite chuan Isua chu lal inah an hruai lut a, an pawla mi zawng zawng a hnenah an ko khawm a.
27:28 Tichuan a puante an hlihsak a, puansen an sintir a.
27:29 Tin, hling lukhum an phiar a, an khumtir a, a kut ding lamin luang an kentir a; a hmaah an thingthi a, “Chibai, Judate lal!” tiin nuihza siam nan an hmang a.
27:30 Tin, amah chu chil an chhak a, luang chu an laksak a, a luah chuan an vua a.
27:31 Tin, nuihza siam nan an hman zawhin puan chu an hlihsak a, ama puante chu an sintir leh a, kraws-a khenbeh turin an hruai ta a.
27:32 Tin, an kal chhuah laiin, Kurini khuaa mi, a hming Simona an hmu a; chu mi chu a kraws pu turin an man a.
27:33 Tin, Golgotha an tih hmun an lo thlenin, (chu chu ‘Lu ruh hmun’ tihna a ni),
27:34 uain thur, englo kha nena pawlh, a in turin an pe a; nimahsela a tem veleh a in duh ta lo va.
27:35 Tin, kraws-a an khenbeh zawhin thum vawrin a silhfente chu an insem a.
27:36 Tin, chutah chuan an thu a, an veng a;
27:37 a hekna, “He Mi hi Isua Judate Lal a ni” tia ziak, a lu chungah an bel a.
27:38 Tin, ama rual chuan suamhmang pahnih an khengbet ve a, a ding lamah pakhat, a vei lamah pakhat.
27:39 ,40 Tin, mi vei apiangte chuan an lu thingin, “Nang Pathian biak in thiata ni thuma sa lehtu, intidam rawh; Pathian Fapa i nih chuan kraws ata kha lo chhuk ta che,” tiin an tiel a.
27:40 ,39 Tin, mi vei apiangte chuan an lu thingin, “Nang Pathian biak in thiata ni thuma sa lehtu, intidam rawh; Pathian Fapa i nih chuan kraws ata kha lo chhuk ta che,” tiin an tiel a.
27:41 Chutiang bawkin puithiam lalte chuan lehkhaziaktute nen tielin,
27:42 “Mi dang mah a tidam thin a, mahni a intidam thei si lo. Israel lal a ni alawm tunah hian kraws ata chu lo chhuk ang hmiang, tichuan amah chu kan ring ang.
27:43 Pathian a ring alawm, amah hi a duh chuan tunah hian chhandam rawh se; ‘Pathian Fapa ka ni,’ a ti si a,” an ti a.
27:44 Suamhmang an khenbeh vete pawh chuan chutiang bawkin an tiel a.
27:45 Tin, chawfak hun achin behliang mun hun thlengin khawvel a lo thim ta vek a.
27:46 Tin, behliang mun hun lai vel chuan Isua chu aw ring takin, “Eloi, Eloi, lama sabakthani?”tiin a au chhuak a. (chu chu “Ka Pathian, ka Pathian, engah nge mi kalsan?” tihna a ni.)
27:47 Tin, a kianga ding thenkhatte chuan chu chu an hriatin, “He mi hian Elija a ko a ni,” an ti a.
27:48 Tin, an zinga mi pakhat a tlan ta nghal a, spanj a la a, uain thurin a chiah khat a, tiangah a tar a, a han intir a.
27:49 Tin, mi dangte chuan, “Awm rawh se; amah la thla turin Elija a lo kal emaw i en ang u,” an ti a.
27:50 Tin, Isua chu aw ring takin a au leh a, a thlarau a thlah ta a.
27:51 Tin, ngai teh, Pathian biak in puanzar chu a chung lam atangin a hnuai lam thlengin a lo thler chhuak ta a; tin, lirte a lo nghing a, lungpuite a lo khi chat a;
27:52 thlante a lo inhawng a; mi thianghlim muhil tawhte taksa tam tak pawh kaihthawhin an awm ta a;
27:53 chungte chu a thawhleh hnuah chuan thlan ata lo chhuakin khaw thianghlimah chuan an lut a, mi tam tak hnenah an inlar ta a.
27:54 Tin, sipai za hotu leh a hnena Isua venga awm vete chuan lirnghing leh thil awmziate chu an hmuhin an hlau ta em em a, “He mi hi Pathian Fapa a ni ngei mai,” an ti a.
27:55 Tin, chutah chuan hmeichhe tam tak, a rawngbawlsak chung zela Galili ram atanga Isua rawn zuitute chu an awm a, hla takah an thlir a;
27:56 chung zingah chuan Mari Magdalini te, Mari, Jakoba leh Josea nu te, Zebedaia fapate nu te an tel a.
27:57 Tin, tlai lam a lo nih chuan mi hausa, a hming Josefa, Arimathai khuaa mi a lo kal a, amah ngei pawh chu Isua zirtir a ni bawk a;
27:58 chu mi chu Pilata hnenah a va kal a, Isua ruang chu a dil a. Tin, Pilatan pe turin thu a pe a.
27:59 Tichuan Josefa chuan ruang chu a la a, puan zai sin fai takin a tuam a,
27:60 ama thlan thar, lung a kerkuakah chuan a zalh a; thlan kawngkaah chuan lung lian tak a lum a, a kal ta a.
27:61 Tin, chutah chuan Mari Magdalini leh Mari dang chu an awm a, thlan hma zawnah chuan an thu a.
27:62 Tin, atukah chuan (chu chu Inrinni zawh tuk a ni) puithiam lalte leh Pharisaite chu Pilata hnenah an awm khawm huai a.
27:63 “Ka pu, chu tihdertu chuan a dam lai khan, ‘Ni thum chinah ka tho leh ang,’ a ti tih kan hre reng a.
27:64 Chutichuan thlan chu ni thum ni thlenga veng tha turin thu pe rawh; chutilochuan a zirtirte chuan amah chu an va ru hlauh ang a, vantlang hnenah, ‘Mitthi zing ata a tho leh ta a ni,’ an ti dah ang e; tichuan tihderna hnuhnung zawk chu a hmasa ai khan a tha lo lehzual ang,” an ti a.
27:65 Pilatan an hnenah “Vengtu sipaite in nei alawm; kal ula, in theih ang apiangin ven thattir ta che u,” a ti a.
27:66 Chutichuan vengtu sipaite nen an va kal a, thlan chu an ven thattir a, lung chu an chhinchhiah a.
28:1 Tin, chawlhni tlai takah, ni sarih ni hmasa ber tura khua a var dawnin Mari Magdalini leh Mari dang chu thlan en turin an kal a.
28:2 Tin, ngai teh, lir nasa takin a lo nghing a; Lalpa vantirhkoh van ata a lo chhuk a, lung chu a rawn lum sawn a, a chungah a thu ta a.
28:3 A hmel awmzia chu kawlphe ang a ni a, a silhfen chu vur angin a var a;
28:4 amah an hlauh avangin vengtute chu an khur a, mitthi ang maiin an lo awm ta a.
28:5 Tin, vantirhkoh chuan hmeichhiate chu a bia a, an hnenah, “Nangni chuan hlau suh u. Isua, an khenbeha kha, in zawng tih ka hria e.
28:6 Hetah a awm tawh lo ve; a sawi ang ngeiin a thawhleh tawh kha. A mutna hmun hi rawn en teh mah u.
28:7 Tin, kal thuai ula, a zirtirte hnenah, ‘Mitthi zing ata a tho leh ta a ni; ngai teh u, Galili ramah in hmaah a kal e; chutah chuan amah chu in hmu ang,’ tiin hrilh rawh u. Ngai teh u, ka hrilh tawh che u hi,” a ti a.
28:8 Tin, hlau leh lawm em em chungin thlan atang chuan an kal thuai thuai a, a zirtirte hrilh turin an tlan ta a.
28:9 Tin, ngai teh, Isuan anni chu a tawk a, “Chibai u,” a ti a. Tichuan anni chuan a kephahte chu an va vuan a, chibai an buk a.
28:10 Tin, Isuan an hnenah, “Hlau suh u, kal ta ula, Galili rama kal turin ka unaute va hrilh rawh u; chutah chuan mi hmu ang,” a ti a.
28:11 Tin, an va kal lai chuan, vengtu sipai thenkhat chu khawpuiah an va lut a, thil awmzia zawng zawng chu puithiam lalte hnenah an va hrilh a,
28:12 Tin, upate nen an inkhawm a, an inrawn zawhin sipaite hnenah chuan tangka tam tak an pe a,
28:13 “Zanah, kan muthilh hlanin, a zirtirte chu an lo kal a, amah an ru ta a ni,’ ti ang che u.
28:14 Tin, Ram Awptu in chu chu a lo hriat chuan amah chu kan thlem ang a, lungkham lovin kan siam ang che u,” an ti a.
28:15 chutichuan tangka chu an la a, an hrilh ang zel chuan an ti ta a; tichuan tun thlengin chu mi thu chu Judate zingah an la sawi huai huai a ni.
28:16 Nimahsela, zirtir sawm leh pakhatte chu Galili ramah, Isuan tlang a ruatsakah chuan an kal a.
28:17 Tin, amah an hmuh chuan chibai an buk a; thenkhat erawh chuan an ringhlel a.
28:18 Tichuan, Isua chu an hnenah a lo kal a, anniho chu a bia a, “Lei leh vana thuneihna zawng zawng ka hnenah pek a ni tawh.
28:19 Chutichuan kal ula, hnam tina mi zirtirahte siam ula, Pa leh Fapa leh Thlarau Thianghlim hmingah chuan baptis ula,
28:20 thu ka pek zawng zawng che u pawm turin zirtir rawh u. Tin, ngai teh u, kei kumkhuain, khawvel tawp thleng pawhin, inhnenah ka awm zel ang,” a ti a. |
posted by zoblog @ 11:37 AM  |
|
|
|
