MIZO CLAN

 
MIZORAM #Health Department-ah Promotion buai? (Misual.Com) #UDA candidate list a ‘leak-out’! (Misual.com) #Excise ruihtheih thil man zat (DIPR) #Fanu kaphlumtu in a dam rei ring lo sa (Buannel) #ZONET NATIONAL #Retired army officer, aide arrested for Malegaon blast(NDTV) WORLD #LTTE aircraft bombs Colombo power plant (TOI) # Jennifer Hudson IDs nephew's body; child shot, sources say (LA Times)
Shoutbox

Marka
Wednesday, September 12, 2007
1:1 Pathian Fapa Isua Krista Chanchin Tha thlen tantirhna chu,
1:2 Zawlnei Isaia lehkhabuah, “Ngai teh, ka tirhkoh i hmaah ka tir a, Ani chuan i kawng a siam ang”
1:3 Thlalera mi au rawl chuan, ‘Lalpa lamlian sial ula, A kawngte tingil rawh u,’ a ti,” tia, ziak ang khan,
1:4 Johana, thlalera baptistu kha, thiltihsual ngaihdam nan simna baptisma thu hrilin a lo chhuak a.
1:5 Tin, Judai rama mi zawng zawng leh Jerusalem khuaa mi zawng zawngte an chhuak a, a hnen lamah an kal a, an sualte thupha chawiin Jordan luiah chuan a hnenah baptisma an chang ta hlawm a.
1:6 Tin, Johana chu sanghawngsei hmul puanin a inthuam a, a kawng savun kawnghrenin a hreng a, a chaw chu khaukhuap leh ram khawizu a ni.
1:7 Tin, “Ka hnungah keimah aia ropui zawk a lo kal mek a ni; kuna a pheikhawk hrui phelh tlak pawh ka ni lo ve.
1:8 Kei zawngin tuiin ka baptis thin che u a; ani erawh chuan Thlarau Thianghlimin a baptis ang che u,” tiin a hril a.
1:9 Tin, chung niahte chuan heti hi a lo ni a, Isua chu Galili rama nazaret khua atangin a lo kal a, Jordan luiah chuan johana hnenah baptisma a chang ta a.
1:10 Chu veleh tui ata a chhuahin, van inhawnga Thlarau thuro anga a chunga lo chhuk a hmu a.
1:11 Tin, “Nang ka Fapa duh tak i ni a, i chungah ka lawm em am a ni,” tiin van atangin aw a lo chhuak a.
1:12 Tin, Thlarau chuan ani chu thlalerah a tir chhuak ta nghal a.
1:13 Tichuan Setana thlem chungin thlalerah chuan ni sawmli a awm a, ram sa zingahte a awm a; vantirhkohte chuan a rawng an bawlsak a.
1:14 Tin, Johana an man hnuin, Isua, Pathian Chanchin Tha hrilin, Galili ramah a lo kal a,
1:15 “Hun chu a lo thleng ta a, Pathian ram pawh a lo hnai ta; sim ula Chanchin Tha hi ring rawh u,” a ti zel a.
1:16 Tin, Galili dil kam chu a hrut laiin Simona leh Simona unau Andria chu dilah chuan len dengin a hmu a; sangha mantu an ni reng a.
1:17 Tin, Isuan an hnenah, “Mi zui rawh u, tichuan mihring mantuah ka siam ang che u,” a ti a.
1:18 Tin, lente chu kalsanin an zui ta nghal a.
1:19 Tin, thui lo te a kalin Zebedaia fapa Jakoba leh a unau Johana chu a hmu a, chu mite chu len siamthain lawngah bawk an awm a.
1:20 Tin, ani chuan anni chu a ko ta nghal a; tichuan an pa Zebedaia chu inhlawhfa an rawihte hnenah chuan lawngah an kalsan a, an zui ta a.
1:21 Tin, Kapernaum khuaah an va lut a; tin Chawlhniah chuan inkhawmna inah a lut a, a zirtir ta nghal a.
1:22 A thu zirtir chu mak an ti hle a; lehkhaziaktute ang lova, thuneihna nei awm taka anmahni a zirtir avangin.
1:23 Tin, an inkhawmna inah chuan ramhuai bawlhhlawh pai mi pakhat a lo awm a;
1:24 ani chuan, “Nazaret Isu, keini leh nang engnge kan inzawlna awm? Min tiboral turin i lo kal em ni? Nang ka hria a che, Pathian mi thianghlim i ni e,” tiin a au chhuak ta nghal a.
1:25 Tin, Isuan a hau va, “Ngawi la, a chhung ata lo chhuak rawh,” a ti a.
1:26 Tin, ramhuai bawlhhlawh chu, amah sawisaa ring taka auvin a chhung ata a lo chhuak ta a.
1:27 Tin, an zain mak an ti em em a, chutichuan, “Hei hi engnge ni le? zirtirna thar a nih hi le! Ramhuai bawlhhlawhte pawh thu nei takin thu a pe a, a thu an awi zel hi le,” tiin an inhnial a.
1:28 Tin, Galili ram vel zawng zawngah ram tinah a chanchin a thang ta nghal a.
1:29 Tin, inkhawmna in ata chu an chhuahin, Jakoba leh Johana nen Simona leh Andria inah chuan an lut ta nghal a.
1:30 Tin, Simona nupuia nu chu khawsikin a na a, a lo mu a; tichuan a chanchin chu Isua an hrilh ta nghal a;
1:31 tin, ani chuan a kut a va chelh a, a kaitho ta a; tichuan a khawsik chu a reh a, an rawng a bawlsak ta a.
1:32 Tin, tlai lamah ni a tlak hnu chuan, damlo zawng zawng leh ramhuai mante a hnenah an rawn hruai a.
1:33 A khuain kawngkhar bulah chuan an lo awm khawm ta mup a.
1:34 Tin, mi tam tak nat tinrenga nate chu a ti dam a, ramhuai tam tak a hnawt chhuak bawk a; ramhuaite chuan amah chu an hriat avangin an tawng a phal lo.
1:35 Tin, zingah khawvar hma daihin a tho va, a chhuak a, thlaler hmunah a va kal a, chutah chuan a tawngtai a.
1:36 Tin, Simona leh a thiante chuan a hnungah an zui ta a;
1:37 tin, ani chu an va hmuh chuan a hnenah, “Mi zawng zawngin an zawng che asin le,” an ti a.
1:38 Tin, ani chuan an hnenah, “Hmun dangah khaw hnaiahte chuan i kal ang u, chungahte pawh chuan thu ka hrilh theihna turin; chu chu ka rawn chhuah chhan a ni si a,” a ti a.
1:39 Tichuan thu hrila ramhuaite hnawt chhuak zelin Galili ram zawng zawnga an inkhawmna inahte a lut zel a.
1:40 Tin, a hnenah phar a lo kal a, “I duh chuan mi tithianghlim thei e,” tiin a hmaah thingthiin a ngen chiam a.
1:41 Tin, ani chuan a lo khawngaih em em a, a han ban a, a dek a, “Ka duh e, lo thianghlim tawh ang che,” a ti a.
1:42 Tichuan chawplehchilhin a phar chu a lo reh ta nghal a, a lo thianghlim ta a.
1:43 ,44 Tin, Isua chuan, “Tuma hnena engmah sawi lo turin fimkhur ang che; amaherawhchu puithiam hnenah va inentir la, i inthen nan Mosian thil a ruatte kha hlan rawh, anhriat fiahna turin,” a ti tlat a, a kaltir ta nghal a.
1:44 ,43 Tin, Isua chuan, “Tuma hnena engmah sawi lo turin fimkhur ang che; amaherawhchu puithiam hnenah va inentir la, i inthen nan Mosian thil a ruatte kha hlan rawh, anhriat fiahna turin,” a ti tlat a, a kaltir ta nghal a.
1:45 Nimahsela ani chu a chhuak a, chu mi chanchin chu nasa taka tlangaupuiin a puang darh ta a: chutichuan Isua chu alangin khuaah a lut thei ta lo va, thlaler hmunahte a awm ta zawk a; tin, hmun tin ata a hnenah an lo kal thin a.
2:1 Tin, ni eng emaw zat lai hnuah Kapernaum khuaa a lo luh lehin, inah chuan a awm tih thu a lo thang ta a.
2:2 Tichuan kawngka bulah pawh awmna reng awm lo khawp hialin mi tam tak an lo awm khawm ta a; tin, an hnenah thu a hril ta a.
2:3 Tin zeng pakhat, mi paliina zawn, a hnenah an rawn hruai a.
2:4 Tin, mipui avanga a kiang hnaia an lo kal theih loh avangin a awmna in chung chu an thiat ta a; tin, an reh pawh zawhin a awngphah chu a chunga mi zeng mu chawp chuan an zuk thlak a.
2:5 Tichuan Isuan an rinzia chu a lo hmuhin zeng hnenah chuan, “Ka fa, i sualte ngaihdam a ni tawh e,” a ti a.
2:6 Tin, lehkhaziaktu thenkhatte chu chutah chuan an thu a,
2:7 “He mi hian engati nge hetiang thu a sawi ni? Pathian a sawichhia a nih hi; mi pakhat, Pathian chauh lo chuan, tuin nge sualte ngaidam thei ni?” tiin an thinlungin an ngaihtuah a.
2:8 Tin, Isuan an rilruin chutiangin an ngaihtuah tih a rilruin a lo hre ta nghal a, an hnenah, “Chung thu chu engati nge in thinlunga in ngaihtuah ni?
2:9 Zeng hnenah hian, ‘I sualte ngaihdam a ni tawh,’ tih leh, ‘I awngphah lal la, kein kal tawh rawh,’ tih hi a engnge sawi awl zak?
2:10 Engpawh ni sela, khawvelah Mihring Fapain sual ngaihdam theihna a nei tih in hriat nan,’ “(zeng hnenah chuan)
2:11 “Tho la, i awngphah la la, i inah kal rawh, ka ti a che,” a ti a.
2:12 Tichuan ani chu a tho va, a awngphah chu a la ta nghal a, an zaa mithmuhin a kal chhuak ta a; chutichuan an zain mak an ti hle a, “Hetiang reng reng hi kan la hmu ngai lo,” tiin Pathian an fak ta a.
2:13 Tin, a chhuak leh a, dil kamah chuan a kal ta a; tin, mipui zawng zawng chu a hnenah an va kal a, a lo zirtir ta a.
2:14 Tin, a kal pahin, Levia, Alphaia fapa chu chhiah chawina hmuna thu a hmu a, a hnenah, “Mi rawn zui rawh,” a ti a. Tin, a tho va, a zui ta a.
2:15 Tin, heti hi a ni a, Isua chuan Levia inah chuan chaw a kil a, chhiahkhawntute leh misual tam takin Isua leh a zirtirte chu an kilpui hlawm a; an tam hle si a, amah chu an zui ve bawk thin a.
2:16 Tin, Pharisaite zinga lehkhaziaktute chuan Isuan mi sual leh chhiahkhawntute a kilpui an hmuhin, a zirtirte hnenah chuan, “Engtizia nge chhiahkhawntute leh mi sualte hnenah a eia a in le?” an ti a.
2:17 Tin, Isuan chu chu a lo hria a, an hnenah chuan, “Mi chakte chuan daktawr an ngai lo va, mi bawrhsawmte zawkin an ngai a ni; mi fel takte lam tura lo kal ka ni lo va, mi sualte zawk lam tura lo kal ka ni,” a ti a.
2:18 Tin, Johana zirtirte leh Pharisaite chuan chaw an nghei a; tin, mi an lo kal a, Isua hnenah chuan, “Engati nge Johana zirtirte leh Pharisai zirtirte chuan chaw an nghei thin a, i zirtirte lemin an nghei ve thin loh?” an ti a.
2:19 Isuan an hnenah, “Mo hruaitute hnenah a pasal tur chu a awm chhung zawng mo hruaitute chuan chaw an nghei thei em ni? A pasal tur chu an hnena a awm chhung zawng an nghei thei lo vang.
2:20 Nimahsela a pasal tur chu an hnen ata hruai bo nite a la thleng ang a, chu mi niah erawh chuan an la nghei ang.
2:21 “Tuman puan hlui, puan la thlakmar loh themin an bel ngai lo; bel ang sela, a bel phuina tur chuan a kai tet zawk ang a, a thar chuan a hlui chu a kai tet ang a, a lo thler nasa lehzual ang.
2:22 Tin, tuman uain thar, savun uain peng hluahte an thun ngai lo; thun ang sela, uain chuan savun pengte chu a tawn puak ang a, uain leh savun pengte chu a boral ve ve ang; uain thar chu savun uain peng tharahte an thun zawk thin a ni,” a ti a.
2:23 Tin, heti hi a ni a, Isua chu Chawlhniah chuan buh hmunahte a kal tlang a; tin, a zirtirte chuan an kal pahin buh vuite chu an thliak ta a.
2:24 Tin, Pharisaite chuan a hnenah, “en the, engati nge Chawlhnia tihthiang lo chu an tih ni?” an ti a.
2:25 Tin, ani chuan an hnenah, “Davida leh a thiante an tlakchhama an riltam laia a thiltih kha in chhiar lo vem ni?
2:26 Khatia Abiathara Puithiam Lalber a nih lai a, Pathian ina a luh a, puithiamte chauh lo chuan ei thian loh chhangdah chu a ei a, a thiante hnena a pek ve thu kha?” a ti a.
2:27 Tin, amah vekin an hnenah chuan, “Chawlhni hi mihring tana siam a ni a, mihring hi Chawlhni tana siam a ni lo;
2:28 Chutichuan, Mihring Fapa hi Chawlhni chungah lam pawh hian Lal a ni,” a ti a.
3:1 Tin, inkhawmna inah chuan a lut leh a: chutah chuan mi pakhat kut zeng a lo awm a.
3:2 Tin, amah an hek theih nan Chawlhniin a tihdam dawn leh dawn loh an mitmei a.
3:3 Tin, anin kut zeng hnenah chuan, “Lo ding chhuak rawh,” a ti a.
3:4 Tin, an hnenah chuan, “Chawlhniah hian tihthat nge thiang, tichhiat? chhandam nge thiang, tihhlum?” tiin a zawt a. Nimahsela an ngawi ta reng a.
3:5 Tin, an thinlung sakzia chu pawi tihsak em emin, thinur chunga anmahni a en vel hnuin, chu mi hnenah chuan, “I kut phar rawh,” a ti a. Tin, a han phar chhuak a, a kut chu a dam ta a.
3:6 Tin, Pharisaite chu an chhuak a, amah an tihhlum theihnazia tur ngaihtuahin Heroda pawla mite nen chuan an inrawn ta nghal a.
3:7 Tin, Isua chu a zirtirte nen dil lamah chuan an kal bo va; tin, Galili ram atangin mipui tam takin an zui ta a.
3:8 Tin, a thiltih ropuizia chu an hriatin Judai ram atang te, Jerusalem khua atang te, Idumai ram atang te, Jordan ral atang te, Tura leh Sidon khaw vel atangtein mipui tam tak a hnenah an lo kal ve a.
3:9 Tin, mipui avang chuan a tan lawngleng lo ruatsak turin a zirtirte a hrilh a, “Chutilochuan mi nek huai huai dah ang e,” a ti a.
3:10 Mi tam tak a tidam tawh si a; chutichuan na nei apiangin amah an deh theihna turin an bawh huai huai a.
3:11 Ramhuai bawlhhlawhte pawhin amah chu an hmuh apiangin a hmaah bawkkhupin, “Nang Pathian Fapa chu i ni,” tiin an au thin a.
3:12 Tin, ani chuan a chanchin chu puan loh tur an hnenah a ti tlat zel a.
3:13 Tin, tlangah chuan a han kal a, amahin a duhzawng apiangte chu a ko va; tin, anni chu a hnenah an han kal a.
3:14 ,15 Tin, a hnena an awm theih nan leh thu hril tur leh ramhuaite hnawh chhuahna thu nei tura a tirh chhuah theih nan, sawm leh pahnih a ruat a.
3:15 ,14 Tin, a hnena an awm theih nan leh thu hril tur leh ramhuaite hnawh chhuahna thu nei tura a tirh chhuah theih nan, sawm leh pahnih a ruat a.
3:16 Chungte chu Simona, Petera a vuah te,
3:17 Zebedaia fapa Jakoba leh Jakoba unau Johana te, (chu mite chu ‘Boanergea’ a vuah a, chu chu ‘Khawpuiri Fate’ tihna a ni.)
3:18 Andria te, Philipa te, Bartholomaia te, Matthaia te, Thoma te, Alphaia fapa Jakoba te, Thaddaia te, Kanana mi Simona te,
3:19 a mantirtu Juda Iskariota te an ni.
3:20 Tin, inah a va lut a. Tin, mipui chu an lo kal khawm leh a, chutichuan chhang takngial pawh an ei thei ta lo va.
3:21 Tin, a chhungte chuan chu chu an hriatin, “A a a nih chu le,” tiin amah man tumin an thawk a.
3:22 Tin, lehkhaziaktute Jerusalem khua atanga lo chhukte chuan, “Beelzebula a zawl a nih hi,” an ti a, “Ramhuai lal avangin alawm ramhuaite a hnawh chhuah thin ni,” an ti bawk a.
3:23 Tin, Isua chuan lehkhaziaktute chu a ko va, tehkhin thuin an hnenah, “Setanan Setana vek engtin nge a hnawh chhuah theih?
3:24 Ram pawh mahni a indo chuan, chu mi ram chu a ding chhuak thei lo vang.
3:25 Chhung khat pawh mahni an indo chuan, chu mite chhung chu an ding chhuak thei lo vang.
3:26 Setana pawh mahni indovin a inkhin si chuan a ding chhuak thei lo vang a, a boral mai zawk ang.
3:27 Tuman mi chak ina lutin a sum chu an laksak thei thin lo, mi chak chu an phuar hmasak zet loh chuan; chu mi hnuah erawh chuan a in chu an ramsak mai ang.
3:28 Tih tak meuhvin ka hrilh a che u. Mihring fate hi an sualna zawng zawngah leh Pathian sawichhiatna kawngah engah pawh an sawichhiatnaahte chuan ngaihdam an ni ang;
3:29 tupawh Thlarau Thianghlim meuh sawichhia erawh chuan engtikah mah ngaihdamna a hmu lo vang a, chatuan sualna kawngah chuan thiam lohvin a lo awm zawk ang,” a ti a.
3:30 (“Ramhuai bawlhhlawh a zawl a ni,” an tih avang khan chu chu a sawi a ni.)
3:31 Tin, a nu leh a unaute chu an lo kal a, pawnah an ding a, amah kovah mi an tir a.
3:32 Tin, a velah chuan mipui an lo thu hlawm a; tin, a hnenah chuan, “Ngai teh, pawnah sawn i nu leh i unauten an zawng a che,” an ti a.
3:33 Tin, ani chuan an hnenah, “Ka nu leh ka unaute chu tute nge ni?” tiin a chhang a.
3:34 Tin, a kiang vela thute chu a han en vel a, “En teh u, ka nu leh ka unaute hi!
3:35 Tupawh Pathian duhzawng ti apiang chu, chu mite ngei chu ka unaute, ka farnute, ka nute an ni asin,” a ti a.
4:1 Tin, dil kamah chuan a zirtir leh ta a. Tin, mipui tam tak mai a hnenah an rawninkhawm a, chutichuan dilah chuan lawngah a chuang a, a thu a; mipuiho zawng zawng chu dil kama khawmualah chuan an awm a.
4:2 Tin, tehkhin thuin thu tam tak a zirtir a; a zirtirnaah chuan an hnenah,
4:3 “Ngaithla ula, en teh u; buh chi thehtu buh chi theihin a feh a;
4:4 tin, heti hi a lo ni a, a theh laiin a then kalkawng dungah a tla a, savaten an rawn tlan zo ta a.
4:5 Tin, a then pialtlep chung lei pan hmunah a tla a; lei a chhah loh avangin a to ta nghal a;
4:6 nimahsela ni a lo tlangsan deuhvin em vuaiin a lo awm a, zung a neih loh avangin a rawp ta mai a.
4:7 Tin, a then hnimhlingnei zingah a tla a, hnim chu a lo to sang a, a dipral ta a, rah reng reng a rah ta lo va.
4:8 Tin, a then lei thaah a tla a, a to va, a thang lian a, a rah ta a; sawmthum te, sawmruk te, za tein a pung ta hlawm a,” a ti a.
4:9 Tin, amah vekin, “Tupawh hriatna tura bengnei chuan hre rawh se,” a ti a.
4:10 Tin, fianriala a awm laiin sawm leh pahnihte leh a thuihruai dangte chuan tehkhin thute chu an zawt fiah a.
4:11 Tin, ani chuan an hnenah, “Pathian ram thuruk chu nangni hriat zawng phal a ni a, pawna mite tan erawh chuan engkim tehkhin thua tih a ni;
4:12 chutichuan, ‘Hmuh zawng an hmu thei na a, hriat erawh chu an hriat theih lohna tur leh, beng zawngin an hre thei na a, a ngaihna erawh chu an hriat theih lohna turin, chutilochuan an hawi kir leh ang a, ngaihdam an lo ni hlauh dah ang e,’” a ti a.
4:13 Tin, amah vekin an hnenah chuan, “He tehkhin thu hi in hre thei lo maw? Chuti a nih chuan engtin nge tehkhin thu dang zawng zawngte chu in hriat hleih ang?
4:14 Buh chi thehtu chuan thu chu a theh a ni.
4:15 Tin, kawng dunga thu thehnate chu heng hi an ni: thu an hriat veleh Setana chuan an rilrua thu theh chu a laksak nghal thin.
4:16 Tin, chutiang bawkin pialtlep chunga theh chu heng hi an ni: thu anhriat veleh lawm taka pawm nghalte hi;
4:17 nimahsela anmahniah chuan zung reng an nei lo va, rei lo te chauh an awm a; chu mi hnuah chuan thu avanga hrehawmna emaw, tihduhdahna emaw a lo awm veleh an tlu nghal mai thin.
4:18 Tin, mi dangte chu hnimhlingnei zinga theh chu an ni a: chungte chuan thu chu an hre tawh a,
4:19 nimahsela, khawvel lungkhamnate, hausakna bumna te, thil dang chaknate chu a lo luhin, thu chu a dip a, rah lovin a lo awm thin.
4:20 Tin, lei thaa theh chu heng hi an ni: thu chu hriaa, pawma, a leh sawmthum te, a leh sawmruk te, a leh za tea rahte hi an ni,” a ti a.
4:21 Tin, amah vekin an hnenah chuan, “Khawnvar chu a dahnaa dah lova, hrai hnuaiah emaw, khum hnuaiah emaw dah turin an rawn la ngai em ni?
4:22 Puang lo tura zep engmah a awm si lo va, lang lo tura thuhruk engmah a awm hek lo.
4:23 Tupawhinhriatna tura beng an neih chuan hre rawh se,” a ti a.
4:24 Tin, amah vekin an hnenah chuan, “In ngaihthlak chu engnge a nih fimkhur rawh u; in tehna ngai bawkin an tehsak ang che u a, an pe tam zawk mah ang che u.
4:25 Tupawh a nei chu an pe belhchhah ang a; tupawh a nei lo chu a neih chhun pawh an laksak ang,” a ti a.
4:26 Tin, amah vekin, “Pathian ram chu hetiang hi a ni: miin leiah hian chi theh sela,
4:27 zanah muhilin chhunah tho thin sela, chi chu, a zia a hriat lohvin, lo tiakin lo thang sela; chutiang chu a ni.
4:28 Lei hian amahin rah a chhuah thin; a tir berah a kung, chu mi hnuah chuan a vui; tin, chu mi hnu lehah a vuiah chuan buh fang pum chu.
4:29 Nimahsela, rah chu a lo hmin hunin, buh lak a lo hun tak avangin, favah chu a phawrh nghal thin,” a ti a.
4:30 Tin, amah vekin, “Pathian ram chu engtin nge kan tehkhin ang? a nih loh leh, eng tehkhin thuin nge kan tehkhin ang?
4:31 Antam chi fang khat leia an thehin, leia chi zawng zawng aiin te ber mah sela,
4:32 a theh hnuah erawh chuan a lo tiak a, thlai zawng zawng aiin a lo lian ta zawk a, zar lian tak takte a lo nei a, chutichuan chungleng savate chu a bukah chuan an riak thei thin; chutiang chu a ni,” a ti a.
4:33 Tin, chutiang tehkhin thu tam tak chuan an hriat theih tawk tawkin thu chu an hnenah a sawi thin a.
4:34 Nimahsela, tehkhin thu lovin an hnenah thu a sawi ngai lo; amaha zirtirte hnenah erawh chuan fianrialah engkim a hrilhfiah thin a ni.
4:35 Tin, chu mi ni vekah chuan khua a lo tlai lamin, ani chuan an hnenah, “Ral lehlamah sawn i kai ang u,” a ti a.
4:36 Tichuan, mipuite chu kalsanin, amah chu a awm pangngai ang chuan lawngah chuan an kalpui ta nghal a. Lawng dangte pawh a hnenah a awm a.
4:37 Tin, thlipui nasa tak a lo tleh a, tuifawnte chu lawngah chuan a lo fawn lut hlawp hlawp a, chutichuan lawng chu a lo khat dawn ta mai a.
4:38 Tin, ani chu lukham chu khama muhilin, lawng mei lamah chuan a awm a. Tin, an kaitho va, a hnenah chuan, “Zirtirtu, kan boral hi pawi i ti lo vem ni?” an ti a.
4:39 Tin, ani chu a lo harh a, thli chu a hau va, dil hnenah pawh chuan, “Ngawi la, awm hle hle rawh!” a ti a. Tin, thli chu a bang a, a lo reh ta thup mai a.
4:40 Tin, ani chuan an hnenah, “engati nge chuti ema in hlauh ni le? Rinna reng in la nei lo a ni maw?” a ti a.
4:41 Tin, hlauh namenin an hlau ta lo va, “He mi hi tunge ni le, thli leh dil lam pawhin a thu an awi hi?” an inti hlawm a.
5:1 Tin, dil ral, Gerasin mite ram chu an lo thleng a.
5:2 Tin, lawng ata a chhuah hnu chuan mi pakhat, ramhuai bawlhhlawh pai, thlan atanga lo chhuakin a rawn tawk ta nghal a;
5:3 chu mi chuan thlanahte chuan awmna a nei thin a, tumahin khaidiat pawhin an phuar thei tawh lo va;
5:4 kawlte leh khaidiatte pawhin an phuar fo tawh si a; nimahsela khaidiatte chu a pawt chat a, kawlte pawh chu a tisawm thin a; tumahin an tidawl zo hek lo.
5:5 A chhun a zanin thlanahte leh tlangahte chuan a au a au thin a, lungte pawhin a inzai fo thin.
5:6 Tin, hla tak atangin Isua chu a hmuh veleh a tlan a, chibai a va buk a;
5:7 tin, aw ring taka auvin, “Isu, Pathian chungnungbera Fapa, kei leh nang engnge kan inzawlna awm? Mi nghaisa lul lo turin Pathian hmingin ka ngen chiam a che,” a ti a.
5:8 (Isua chuan a hnenah “Nang, ramhuai bawlhhlawhpa, mihring chhung ata hi chhuak rawh,” a lo ti tawh si a.)
5:9 Tin, ani chuan, “I hming engnge ni?” tiin a zawt a. Tin, anin a hnenah, “Ka hming chu Nuaia a ni, tam tak kan ni si a,” a ti a.
5:10 Tin, chu mi ram ata chu anmahni tir chhuak lo turin Isua hnenah a ngen ta chiam a.
5:11 Tin, chuta tlang pangah chuan vawk rual tam tak an tla a.
5:12 Tin, ramhuai bawlhhlawhte chuan, “Vawk kawchhungahte sawn min luhtir rawh, anmahnia kan luh theih nan,” tiin a hnenah an ngen a.
5:13 Tin, ani chuan thu a pe a. Tichuan ramhuai bawlhhlawhte chu an chhuak a, vawk kawchhungahte chuan an lut a; tichuan vawk rual chu (sanghnih lai an ni a) khamah an tlan chhuk chiam a, dilah an tlan lut ta a; tin, dilah chuan tui hakin an thi ta a.
5:14 Tin, a vulhtute chu an tlan a, khuaah leh lovahte chuan an sawi a. Tin, “Engnge lo ni ta?” tia en turin an lo kal hlawm a.
5:15 Tin, Isua hnen an lo thleng a, ramhuaiman, nuaia mana kha, puan sin a, rilru pangngai pua thu an rawnhmu a; tichuan an hlau ta a.
5:16 Tin, a hretute chuan ramhuai mana chunga thil thlenzia leh vawk chanchinte chu chungho chu an lo hrilh a.
5:17 Tin, chunghote chuan ani chu an ram ata chhuak turin an ngen ta a.
5:18 Tin, lawnga a chuan dawn lai takin ramhuai man hnua khan Isua hnena awm reng a ngen a.
5:19 Nimahsela Isuan a phal lo va, a hnenah, “I inah i thiante hnenah hawl la, Lalpan i tan thil a tihsak che hi a ropuizia leh a khawngaihzia che hi va hrilh rawh,” a ti ta zawk a.
5:20 Tichuan a kal a, Dekapoli khuaahte chuan Isuan a tan thil a tihsak ropuizia chu a tlangaupui ta a; tin, mi zawng zawng chuan mak an ti hle a.
5:21 Tin, Isua chu lawnga ral lehlama a lo kai leh chuan mipui tam tak a hnenah an lo kal khawm a; tin, ani chu dil kamah a awm a.
5:22 Tin, inkhawmna in hotute zinga mi pakhat, a hming Jaira chu a lo kal ; Isua a hmuh veleh a ke bulah a bawkkhup a,
5:23 “Ka fanu naupang te a thi lek lek a; a lo harha a lo dam theih nan lo kala a chunga i kut nghat turin ka ngen a che,” tiin a ngen chiam a.
5:24 Tichuan Isua a hnenah a va kal a; tin mipui tam takin an zui a, an nek huai huai a.
5:25 Tin, hmeichhe pakhat kum sawm leh kum hnih thi putin a dam lo va,
5:26 daktawr tam tak lakah nasa takin a tuar tawh a, a neih zwng zawng pawh a dekral zo tawh a, thathnem ahnekin a lo zual zawk mah a;
5:27 chu mi chuan Isua chanchin thute chu a lo hria a, a hnunga mipui zingah chuan a lo kal a, a puan chu a dek a.
5:28 “A puan chauh pawh dek ila, tihdamin ka awm mai ang,” tih a rilruk a ni.
5:29 Tin, chawplehchilhin a thi put chu a reh ta nghal a, a na chu tihdam a ni tih a taksaah a inhre ta a.
5:30 Tin, Isua chuan a chhung ata thiltihtheihna chhuak thin chu a chhuak tih a lo hria a, mipui zingah chuan a hawi vel ta nghal a, “Tunge ka puante dek kha?” a ti a.
5:31 Tin, a zirtirte chuan a hnenah, “Mipuiin an nek huai huai che hi i hmu si a, ‘Tunge mi dek?’ engtiziaa ti nge i nih leh?” an ti a.
5:32 Tin, ani chuan chu mi titu chu hmuh tumin a en vel a.
5:33 Chutichuan hmeichhia chuan a chunga thil a tihsak chu hriain, hlau leh khur chungin a lo kal a, a hmaah bawkkhup a, a hnenah thu dik takin a hrilh ta vek a.
5:34 Tin, ani chuan a hnenah, “Ka fanu, i rinna hi i dampui a ni e, thlamuang takinkal la, i natna ata chu lo dam hlen tawh ang che,” a ti a.
5:35 A la tawng lai mekin inkhawmna in hotu in ata chu mi an lo kal a, “I fanu a thi ta; engah nge zirtirtu hi i la tihhah cheu dawn?” an ti a.
5:36 Isua erawh chuan an thu sawi chu bengkhawn lovin, inkhawmna in hotu hnenah chuan, “Hlau suh, ring mai rawh,” a ti a.
5:37 Tin, Petera te, Jakoba te, Jakoba unau Johana te chauh lo chu tumah amah zui ve a phal ta lo va.
5:38 Tin, inkhawmna in hotu in chu an va thleng a, Isua chuan an lo buai mur mur leh an lo tap tuar tuar a, an lo chiau vak vak chu a hmu a.
5:39 Tin, a va luh chuan an hnenah, “engati nge in bengchhena in tah ni? naupang chu a thi lo ve, a muhil a ni zawk,” a ti a.
5:40 Tin, anni chuan an nuihsan ta mai a. Ani erawh chuan an zain a hnawt chhuak a, naupang nu leh pa leh a hnena awmte chu a hruai a, naupang awmnaah chuan a va lut a.
5:41 Tin, naupang kut chu a chelh a, a hnenah chuan, “Talitha Kumi!” a ti a, (chu chu “Chemte, tho rawh, ka ti a che,” tihna a ni.)
5:42 Tin, hmeichhe naupang chu a lo tho va, a kal thei ta nghal a; amah chu kum sawm leh kum hnih mi a ni tawh reng a. Tin, anni chuan mak tih namenin mak an ti lo va.
5:43 Tin, anin an hnenah, “Hei hi tuman hre suh se,” a ti tlat a; tin, ei tur pek tur thu a pe a.
6:1 Tin, chuta ta chu a chhuak a, a awmna khaw lam chu a thleng ta a; a zirtirte chuan an zui zel a.
6:2 Tin, chawlhni a lo ni a, inkhawmna inah a zirtir ta a; tin, mi tam tak a thu hriate chuan, “He mi hian heng thute hi khawi ata nge a hriat ni? He mi hnena finna pek hi eng finna nge ni? A kutin heti kauva thilmak a tih hi engtizia nge ni?
6:3 He mi hi Mari fapa, Jakoba te, Josea te, Juda te, Simona te unaupa, thingrem siamtu kha a ni lo vem ni?” A farnute pawh hetah kan hnena awm an ni lo vem ni?” an ti a, mak an ti hle a. Tichuan a chungah an lungni ta lo va.
6:4 Tin, Isuan an hnenah, “Zawlnei chu ama khaw lamah te, ama laichin zingah te, ama inah te chauh lo chuan chawimawi lohvin a awm ngai lo,” a ti a.
6:5 Tin, mi damlo tlemte chunga kut nghata a tihdam chauh lo chu, chutah chuan thil mak reng a ti thei lo va.
6:6 An rin loh avangin mak a ti hle a. Tin, zirtir chung zelin khuate chu a fang vel a.
6:7 Tin, sawm leh pahnihte chu a ko va, pahnih zelin a tir chhuak ta a; ramhuai bawlhhlawhte chunga thuneihna a pe bawk a.
6:8 Tin, an zinna atan tiang chauh lo chu engmah – chhang pawh, ipte pawh, an kawnghrena tangka pawh – ken loh tur a ti tlat a;
6:9 pheikhawk erawh chu bun tur a ti a; “Kawr pahnih ha suh u,” a ti bawk a.
6:10 Tin, amah vekin an hnenah, “Khawiah pawh in thlenna inah chuan, chuta ta in chhuah hma loh chu thleng reng ang che u.
6:11 Tin, khawii khua pawhin an lawm loh che u a, in thu an ngaihthlak lohna apiangah, chuta tanga in chhuah hun chuan anmahni hriattirna turin in kephah hnuaia vaivut kai chu thing thla ang che u,” a ti a.
6:12 Tichuan an kal chhuak a, simna tur thu an hrilh a;
6:13 ramhuai tam tak pawh an hnawt chhuak a, dam lo tam tak pawh hriak an hnawih a, an tidam bawk a.
6:14 Tin, lal Heroda chuan a lo hria a, a hming chu a lo thang ta si a; “Baptistu Johana kha mitthi zing ata a lo tho leh ta a, chuvangin chung thiltihtheihnate chuan amahah a thawk a nih chu,” a ti a.
6:15 Mi dang erawh chuan, “elija a nih chu,” an ti a; mi dangin, “Zawlnei a nih chu, zawlneite zinga pakhat ang kha,” an ti a.
6:16 Heroda erawh chuan a lo hriatin, “Johana, a lu ka tana ngei kha, a lo tho leh ta a nih chu,” a ti a.
6:17 Heroda ngei chuan a unau Philipa nupui Herodi avangin mi a tir chhuak a, Johana chu a mantir a, tan inah phuar chungin a lo khung tawh si a; Herodi chu nupuiah a lo nei tawh si a;
6:18 Johana chuan Heroda hnenah, “I unau nupui i neihsak hi a thiang lo a ni,” a lo ti tawh bawk a ni.
6:19 Chuvngin Herodi chuan amah chu a hal riau va, tihhlum a chak a; nimahsela a thei si lo va.
6:20 Herodan Johana chu mi fel leh thianghlim tak a ni tih a hriat avangin amah chu a hlau va, a humhim tlat si a; a thu a ngaihthlak chuan a mangang hle thin a; nimahsela lawm takin a ngaithla si thin.
6:21 Tin, Herodan a pian champhaphak niah chuan a mi ropuihote, sipai hotu lianhote, Galili rama mi lianhote tana zana ruai a theh laiin hun remchang a lo awm ta a.
6:22 Herodi fanu ngei chu a lo lut a, a lam a, Heroda leh a chaw kilpuite chu a tilawm ta a; tichuan lal chuan hmeichhe naupang hnenah chuan, “I duh apiang mi dil rawh, ka pe ang che,” a ti a.
6:23 “Engpawh mi dil apiang chu, ka ram chanve hial pawh ka pe ang che,” tiin a hnenah chhia a chham bawk a.
6:24 Tin, ani chu a chhuak a, a nu hnenah chuan, “Engnge ka dil ang?” a va ti a. Tin, ani chuan, “Baptistu Johana lu le,” a lo ti a.
6:25 Tin, ani chu hmanhmawh takin lal hnenah chuan a va lut ta nghal a, “Thlengin Baptistu Johana lu i mi pek nghal ka duh a ni,” tiin a dil a.
6:26 Tin, lal chu a lungngai ta em em mai a, nimahsela a chhechhamte leh a chaw kilpuite avang chuan a lo hnial duh lo va.
6:27 Tin, lal chuan a vengtu sipai pakhat a tir ta nghal a, a lu rawn lak tur thu a pe a. Tin, ani chuan tan inah chuan a lu a va tan a,
6:28 a lu chu thlengin a rawn la a, hmeichhe naupang hnenah chuan a pe a; tin, hmeichhe naupang chuan a nu hnenah a pe a.
6:27 Tin, a zirtirte chuan an hriat veleh a ruang chu an va hlawm a, thlanah an zalh ta a.
6:30 Tin, tirhkohte chu Isua hnenah an rawn inkhawm a, engkim, an thiltih apiang leh an zirtir apiang an hrilh a.
6:31 Tin, ani chuan an hnenah, “Nangmahniho ngwtin thlaler hmunah ahrangin lo kalula, chawl rih rawh u,” a ti a. (Mi tam tak an insul zut zut a, chaw takngial pawh an ei hman si lo va.)
6:32 Tichuan thlaler hmun panin lawngin an va kal hrang ta a.
6:33 Tin, mitten an kal lai chu an hmu a, mi tam takin anmahni chu an hria a, khaw tin ata chutah chuan kein an tlan khawm a, an lo lehkhalh ta a.
6:34 Tichuan ani chu vukama a chhuah chuan mipui tam tak a hmu a, vengtu nei lo beramte ang an nih avangin a khawngaih ta em em a, thu tam tak a zirtir ta a.
6:35 Tin, khua chu a lo tlai ta hle a, zirtirte chu a hnenah an lo kal a, “Hei hi thlaler hmun a ni a, khua pawh a tlai tawh si a;
6:36 anniho hi kan kiang vel lovah leh khuaahte kalin, an ei tur eng emaw tal an lei theih nan kaltir ta che,” an ti a.
6:37 Ani erawh chuan an hnenah, “Nangmahnin ei tur pe rawh u,” tiin a chhang a. Tin, anni chuan a hnenah, “Chhang duli zahnih man va leiin ei tur kan pe em ni ang?” an ti a.
6:38 Tin, ani chuan an hnenah, “Chhangper engzat nge in neih? han en teh u,” a ti a. Tin, an neih chin an hriat veleh, “Panga, sangha pahnih nen,” an ti a.
6:39 Tin, ani chuan an vaiin hlobet hring chungah chuan apawl zelin thuttir turin an hnenah thu a pe a.
6:40 Tin, atlarin zakhat te, sawmnga te zelin an thu ta hlawm a.
6:41 Tin, ani chuan chhangper panga leh sangha pahnih chu a la a, van lam enin mal a sawm a, chhangperte chu a phel a, an hmaa hlui turin a zirtirte hnenah chuan a pe a; sangha pahnih pawh chu mi zawng zawng zingah a sem bawk a.
6:42 Tin, an vaiin an ei a, an puar ta hlawm a.
6:43 Tin, chhang nawi leh sangha nawite chu bawmrang sawm leh pahnih an rut khat a.
6:44 Chhangper eitute chu patling hlir pawh sangnga an ni a.
6:45 Tin, amah ngeiin mipui chu a tintir vel chhungin ral lehlama Bethsaida khuaa lo kal hmasa turin a zirtirte chu lawngah a chuan luihtir ta nghal a.
6:46 Tin, anni chu a tintir hnu chuan tawngtai turin tlangah chuan a kal ta a.
6:47 Tin, khua a lo tlai lamin, lawng chu dil lai takah chuan a lo awm a, ani chu amah chauhvin khawmualah chuan a awm a,
6:48 Tin, an lawng karah chuan an mangangin a hmu a, (thliin a ni lo lamah a nem si a). khawfing chah dawn lai velin dil chungah kea kalin an lam a rawn pan a; anmahni kal pelh a tum a.
6:49 Nimahsela anni chuan amah chu dil chunga kea a kal an han hmuh chuan hmuithla emaw an ti a, an au ta vak mai a,
6:50 an vaiin amah an hmu a, an thlaphang hle a. Nimahsela ani chuan anmahni a be ta nghal a, anhnenah, “Thlamuang takin awm rawh u; keimah ka ni alawm; hlau suh u,” a ti a.
6:51 Tin, lawngah chuan an hnenah a chuang chho ve ta a, thli chu a bang ta mai a. Tin, mak chu an ti rilru hle a;
6:52 chhang thu chu a ngaihna an hre thiam si lo va, an thinlung a sak si a.
6:53 Tin, ral lehlam an kai chuan Genesaret ram khawmual an thleng a, vaukamah chuan lawng chu an thlung a.
6:54 Tin, lawng ata an chhuah hnu chuan mitten ani chu an lo hre ta nghal a,
6:55 chu mi ram vel zawng zawngah an tlan ta sup sup a, a awm tih an hriatna apiangah damlote an awngphaha mu chungin an zawn vel ta ruai a.
6:56 Tin, khaw teahte, khaw lianahte, lovahte, khawiah pawh a luhna apiangah damlote chu dawr hmunahte an muttir hlawm a, a puan hmawr tal deh theih an dil chiam a; tin, amah dek apiang chu an dam ta zel a.
7:1 Tin, Pharisaite leh lehkhaziaktute zinga mi tute emaw, Jerusalem khua atanga lo kalte chu a hnenah an rawn inkhawm a.
7:2 Chunghote chuan a zirtir thenkhatte kut bawlhhlawha chhang an ei an lo hmu tawh a. (‘Bawlhhlawh’ tih hi ‘sil loh’ tihna a ni.).
7:3 (Pharisaite leh Judaho zawng zawng chuan upate thurochhiah chu an pawm tlat avangin an kut ngun taka an sil loh chuan an ei ngai si lo va.
7:4 Tin, dawr hmun atanga an hawn pawhin an inbual loh chuan an ei ngai lo. Tin, thu dang tam tak pawm tlat tura an dawn chhawnte chu a awm, no te, bel te, dar bel te sil angte hi.)
7:5 Chutichuan Pharisaite leh lehkhaziaktute chuan, “Engati nge i zirtirte upa thurochhiah ang zela awm lova, kut bawlhhlawhin chhang an ei thin ni?” tiin an zawt a.
7:6 Tin, ani chuan an hnenah, “Isaia hian nangni mi vervekte thu hi a lo hril lawk dik zet mai. ‘He miteho hian an kain mi chawimawi a, An thinlung erawh chuan mi hlat si a.
7:7 Engpawhni sela, an zirtirnaa mihring thupekte an zirtir avangin An mi biak thin hi athlawn mai mai a ni,” tih ziak ang hian.
7:8 Pathian thupekte chu thlahthlamin mihring thurochhiah chu in vuan tlat a nih hi,” a ti a.
7:9 Tin, amah vekin an hnenah, “Nangmahni thurochhiahte chu in pawm theihna turin Pathian thupekte in duh lo hi rem in hre zet mai e!
7:10 Mosian, “I nu leh i pa chawimawi rawh,’ ‘Tupawh a nu emaw, a pa emaw sawichhia apiang chu thi mawlh rawh se,’ a ti si a;
7:11 nangni erawh chuan heti hian in ti thin, ‘Miin, a nu emaw, a pa emaw hnenah, I mi chhawrna tur hi Korban a ni tawh, a tih chuan,’ (chu chu ‘Pathian hnena pek,’ tihna a ni a)
7:12 a nu tan emaw, a pa tan emaw engmah tihsak in phal tawh thin lo;
7:13 mi hnena in thurochhiah pek chhawn hianin Pathian thu hi in bawh bo thin a ni; chutiang thil chu tam tak in ti thin,” a ti a.
7:14 Tin, mipuite chu a ko leh a, an hnenah, “In zain ka thu hi ngaithla theuh ula, lo ngai thiam rawh u:
7:15 mihring pawn lam ata a kawchhunga luta amah tibawlhhlawh thei engmah a awm lo; mihring kawchhung ata lo chhuakte chu mihring tibawlhhlawhtu a ni zawk e,” a ti a.
7:17 Tin, mipuihote chu ina a luhsan hnuin, azirtirte chuan tehkhin thu chu amah an zawt fiah ta a.
7:18 ,19 Tin, ani chuan an hnenah, “Nangni pawh chuti ema hriatna nei lo in ni maw? Engpawh pawn lam ata mihring kawchhunga lut apiang, a thinlung chhunga lut lovin, a pum chhunga luta dailenaa a chhuah zawk avangin amah chu a tibawlhhlawh thei lo tih in hre lawm ni?” a ti a. (Chu chu ei tur tinreng ei a thiang a tihna a ni.)
7:19 ,18 Tin, ani chuan an hnenah, “Nangni pawh chuti ema hriatna nei lo in ni maw? Engpawh pawn lam ata mihring kawchhunga lut apiang, a thinlung chhunga lut lovin, a pum chhunga luta dailenaa a chhuah zawk avangin amah chu a tibawlhhlawh thei lo tih in hre lawm ni?” a ti a. (Chu chu ei tur tinreng ei a thiang a tihna a ni.)
7:20 Tin, amah vekin, “Mihring kawchhung ata lo chhuak chuan, chu ngei chuan mihring a tibawlhhlawh thin a ni.
7:21 Kawchhunga mi, mihring thinlung atangte chuan ngaihtuahna sualte a lo chhuak si thin; inngaihna te, rukrukna te, tualthahna te,
7:22 uirena te, awhna te, sualna te, bumna te, hurna te, itsikna te, sawichiatna te, chapona te, atna te hi;
7:23 chung thil sual zawng zawngte chu kawchhung atangin a lo chhuak a, mihring chu a tibawlhhlawh thin,” a ti a.
7:24 Tin, a tho va, chuta tang chuan Tura leh Sidon bialah a kal ta a; tin, inah a lut a, tuma hriat a duh lo va; nimahsela a inthup thei si lo.
7:25 Chutichuan hmeichhe pakhat, fanu naupang te, ramhuai bawlhhlawh pai nei chuan a chanchin a lo hria a, a ke bulah a va bawkkhup ta nghal a.
7:26 Hmeichhia chu Grik mi a ni a, pianna lamah chuan Suro-Phoiniki mi a ni a. Ani chuan a fanu kawchhung ata ramhuai hnawt chhuak turin a ngen a.
7:27 Tin, ani chuan a hnenah, “Fate chu lo puar hmasa rawh se; fate chhang laksaka uite hnena paih chu a mawi lo ve,” a ti a.
7:28 Ani chuan a hnenah, “Lalpa, nih zawng a ni a, nimahsela dawhkan hnuaia uite pawhin fate chhang nawite chu an ei thin alawm,” tiin a chhang a.
7:29 Tin, ani chuan a hnenah, “I thu sawi avang chuan kal tawh le; ramhuai chu i fanu kawchhung ata a chhuak tawh e,” a ti a.
7:30 Tin, a inah chuan a va hawng a, a fa chu ramhuai lo chhuahsan tawh a, khuma mu a va hmu ta a.
7:31 Tin, Tura ram atangin a chhuak leh a, Sidon khua tlawhin Dekapoli ram kal tlang zelin Galili dil chu a thleng ta a.
7:32 Tin, mi pakhat bengngawng, tawng pawh tawng fiah thei lo, a hnenah an rawn hruai a, a chunga a kut nghat turin an ngen a.
7:33 Tin, ani chuan mipui zing ata amah chauh chu a hruai hrang a, a kut zungtangte chuan a beng kuate a khawih a, tin chil a chhak a, a lei a dehsak a;
7:34 tin, van lam enin a thaw huai a, a hnenah, “Ephatha,” a ti a. (Chu chu “Lo inhawng rawh,” tihna a ni.)
7:35 Tichuan a bengte chu a lo inhawng a, a lei phuarna pawh chu a lo inphelh a, fiah takin a tawng thei ta a.
7:36 Tin, ani chuan an hnenah, tumah hrilh loh tur a ti tlat a; nimahsela khap nasat veleh an tlangaupui zual zawk mah thin a.
7:37 “Ani chuan engkim tha takin a ti a; bengngawngte a tihvarsak a, tawng thei lote pawh a titawng thin,” an ti a, mak an ti nasa em em a.
8:1 Chung niahte chuan mipui tam tak an lo awm leh a, ei tur engmah an neih loh lai chuan ani chuan a zirtirte chu a ko va, an hnenah,
8:2 “Mipuiho hi tunah ni thum ka hnenah an awm tawh a, ei tur engmah an neih loh avangin ka khawngaih em em a ni;
8:3 chaw ngheia an ina ka hawntir chuan kawng lakah an chau dawn si a; thenkhatte phei chu an lo kalna a hla hle si a,” a ti a.
8:4 Tin, a zirtirte chuan, “Miin heta thlalerah hian khawia chhangin nge hengho hi an tihtlai theih ang?” tiin amah an chhang a.
8:5 Tin, ani chuan, “Chhangper engzat nge in neih?” tiin anni chu a zawt a. Tin, anni chuan, “Per sarih,” an ti a.
8:6 Tin, mipuiho chu leia thu turin thu a pe a; tin, chhangper pasarih chu a la a, lawm thu a sawi zawhin a phel a, an hmaa hlui turin a zirtirte hnenah a pe a; tin, mipuihote hmaah chuan an hlui ta a.
8:7 Nghate tlem te an nei bawk a; tin, ani chuan mal a sawmsak a, chungte pawh chu an hmaa hlui turin thu a pe a.
8:8 Tichuan an ei a, an puar ta hlawm a; an ei bang nawi pawh chu bawm sarih an rut khat a.
8:9 Anni chu sangli lai an ni a; tin, ani chuan anni chu a tintir ta a.
8:10 Tin, ani chu a zirtirte hnenah lawngah chuan a chuang ta nghal a, Dalmanutha ram chu a thleng ta a.
8:11 Tin, Pharisaite an lo chhuak a, amah fiah nan, a lakah van ata chhinchhiahna zawngin ani chu an hnial ta a.
8:12 Tin, ani chu a rilruin nasa takin a rum a, “Engati nge tun lai chhuante hian chhinchhiahna an zawn?Tih tak meuhvin ka hrilh a che u, tun lai chhuante hnenah hian chhinchhiahna reng reng pek a ni lo vang,” a ti a.
8:13 Tin, anni chu a kalsan a, lawngah chuan a chuang leh a, ral lehlamah a kal ta a.
8:14 Tin, a zirtirte chuan chhang an ken theihnghilh a, chhang tlang khat chauh lo chu lawngah chuan chhang dang reng an nei si lo va.
8:15 Tin, ani chuan an hnenah, “Pharisaite dawidim leh Heroda dawidim lakah chuan inveng ula, fimkhur rawh u,” a ti tlat a.
8:16 Tin, anni chuan, “Chhang kan nei hauh lo,” tiin an inngaihtuah a.
8:17 Tin, Isuan chu chu a lo hria a, an hnenah “Engati nge chhang in neih loh avanga in inngaihtuah ni? Tunah pawh in rilruin in la hre lo fo maw? a ngaihna pawh in la hre lo maw? in thinlung chu in tisak ta em ni?
8:18 Mit nei siin in hmu lo vem ni? beng nei siin in hre lo vem ni? in hre reng lo vem ni?
8:19 Sangnga zinga chhangper panga ka phel lai khan a nawi kha bawmrang engzat nge in ruh khah?” a ti a. Tin, anni chuan a hnenah, “Sawm leh pahnih,” an ti a.
8:20 Tin, sangli zinga pasarih ka phel lai khan, a nawi kha bawm engzat nge in ruh khah?” a ti a. Tin anni chuan a hnenah, “Bawm sarih,” an ti a.
8:21 Tin, ani chuan an hnenah, “Tunah pawh a ngaihna in la hre lo fo maw?” a ti a.
8:22 Tin, Bethsaida khua chu an lo thleng a. Tin, a hnenah mitdel an rawn hruai a, amah dek turin an ngen a.
8:23 Tin, ani chuan mitdel kut chu a chelh a, khua ata a kai chhuak a; tin, a mitah chil a chhak a, a chunga a kut a nghah zawhin, “Khua i hmu thei em?” tiin a zawt a.
8:24 Tin, a han dak chhuak a, “Mihring ka hmu a, thing kal ang maiin ka hmu si,” ti a.
8:25 Tin, a mitah chuan a kut a nghat leh a; tin, ani chuan a en reng a, a lo dam ta mai a, engkim fiah takin a hmu thei ta a.
8:26 Tin, Isua chuan, “Khuaah pawh hian lut suh ang che,” tiin a inah a hawntir ta a.
8:27 Tin, Isua leh a zirtirte chu an kal chhuak a, Philipa Kaisari khawperahte chuan an kal a; tin, kal pahin a zirtirte hnenah, “Miten tunge a ni mi tih?” tiin a zawt a.
8:28 Tin, anni chuan, “ ‘Baptistu Johana a ni,’ an ti chia; mi dangin ‘Elija a ni, an ti chia; thenkhat erawh chuan, ‘Zawlnei tua emaw a ni,’ an ti che,” tiin an hrilh a.
8:29 Tin, ani chuan an hnenah, “A nih leh nangnin tunge a ni mi tih?” tiin a zawt a, Petera chuan a hnenah “Krista chu i ni,” tiin a chhang a.
8:30 Tin, ani chuan a chanchin tumah hrilh loh tur a ti tlat a.
8:31 Tin, Mihring Fapa chuan thil tam tam a tuar tur te, upate, puithiam lalte, lehkhaziaktute duh lohva a awm tur te, tihhluma a awm tur te, ni thum china a thawhleh tur te chu anmahni a zirtir tan ta a.
8:32 Chung thu chu chiang takin a sawi a ni a. Tin, Petera chuan ani chu a hruai hrang a, a zilh ta a.
8:33 Ani erawh chu a lehhawi a, a zirtirte chu a en a, “Setan, ka hnungah kal rawh, Pathian thilte ngaihtuah lovin, mihring thilte i ngaihtuah zawk a nih hi,” tiin Petera a zilh ta a.
8:34 Tin, mipuiho chu a zirtirte nen a ko va, an hnenah, “Tupawhin mi zui a duh chuan, mahni hrehawm pawisa lovin, a kraws puin mi zui rawh se.
8:35 Tupawh a nun humhim duh apiangin a chan ang a; tupawh keimah avang leh Chanchin Tha avanga nun chan apiangin a humhim ang.
8:36 Miin khawvel hi apumin nei sela, a nun chan si sela, a tan engnge sawt ang?
8:37 Miin a nun aiah engnge a pek theih ang?
8:38 Tupawh tun lai chuan uire leh thil tihsual hmangte zinga keimah leh ka thu zahpui apiang, Mihring Fapa hian, vantirhkoh thianghlimte nena a Pa ropuinaa inthuama a lo kal hunah chuan, chu mi chu a rawn zahpui ve thung ang,” a ti a.
9:1 Tin, amah vekin an hnenah, “Tih tak meuhvin ka ti a che u, heta dingho a thente hi, Pathian ram thiltihtheihna nena lo thleng an hmuh hma loh chuan thihna tem tawp lo tur an awm,” a ti a.
9:2 Tin, ni ruk achinah chuan Isuan Petera te, Jakoba te, Johana te chu a hruai a, ahrangin tlang sang takah anmahni chauh a kal chhohpui a; an hmaah chuan a hmel awmzia chu a lo danglam ta a.
9:3 Tichuan a silhfente chu leia puan sutu reng rengin an suk var theih loh khawp hiala var hlakin a lo tle ta sur a.
9:4 Tin, Elija leh Mosia chu an hnenah an rawn inlar a, Isua nen an inbe ho va.
9:5 Tin, Peteran Isua a bia a, “Rabbi, kan tan heta awm hi a tha e; bawkte pathum kan khawh ang e, i tan pakhat, Mosia tan pakhat, Elija tan pakhat,” a ti a.
9:6 (An hlauh em em avangin sawi tur ahleih pawh an hre si lo va.)
9:7 Tin, anmahni hliahin chhum a lo zing ta a; tin, chhumah chuan aw a lo chhuak a, “Hei hi ka Fapa duh tak a ni, ama thu ngai rawh u,” a ti a.
9:8 Tin, an han en vel thuai a, anmahni hnena Isua chauh lo chu tumah an hmu ta lo va.
9:9 Tin, tlang ata chu an chhuk laiin, Mihring Fapa, mitthi zing ata a thawhleh hnuah chauh lo chuan an thil hmuhte chu tumah hrilh loh tur a ti tlat a.
9:10 Tichuan, chu thu chu an vawng reng a, “Mitthi zing ata thawhleh chu eng tihna nge ni ang?” tiin an inzawt thin a.
9:11 Tin, annin a hnenah, “engtiziaa lehkhaziaktuten, ‘Elija a lo kal hmasa tur a ni,’ ti nge an nih?” tiin an zawt a.
9:12 Tin, ani chuan an hnenah, “Elija chu a lo kal hmasa dawn reng a, engkim a siamtha dawn a ni; thil tam tak tuarin mi hmuhsitin a awm tur a ni tih, Mihring Fapa chanchin engtiziaa ziak nge an nih?
9:13 Nimahsela, ka hrilh a che u, Elija chu a lo kal tawh reng a ni, tin, a chanchin an ziak ang ngei khan a chungah an duh duhin an ti tawh reng bawk a,” a ti a.
9:14 Tin, zirtirte hnen an zuk thlenin, an vela mipui tam takte leh lehkhaziaktuten an lo hnial lai an zuk hmu a.
9:15 Tin, mipui zawng zawng chuan amah an hmuh veleh chuan mak an ti hle a, a hnenah an tlan nghal a, chibai an va buk hlawm a.
9:16 Tin, ani chuan an hnenah, “Anniho nen eng thu nge in inhnial?” tiin a zawt a.
9:17 Tin, mipui zinga mi pakhatin a hnenah, “Zirtirtu, ka fapa, ramhuai tawng thei lo pai i hnenah ka rawn hruai a;
9:18 a manna apiangah a titlu vak thin a; tichuan, a chilphuante a tla a, a hate a thial a, a cher telh telh thin a; tichuan, i zirtirte hi hnawtchhuak turin ka ti a; an thei si lo va,” tiin a chhang a.
9:19 Tin, ani chuan an hnenah, “Chhuan rinna nei lote u, eng chen nge in hnena ka awm ang a, eng chen nge ka ngaihtheih ang che u? amah chu ka hnenah rawn hruai rawh u,” tiin a chhang a.
9:20 Tin, amah chu Isua hnenah an rawn hruai a; tin, ramhuai chuan ani chu a hmuh veleh naupang chu nasa takin a sawisa ta nghal a; tichuan leiah a tlu a, chilphuan tla zawih zawihin a tal ta awrh awrh a.
9:21 Tin, ani chuan a pa hnenah, “Hetianga a lo awm tanna hi eng chen nge ni tawh?” tiin a zawt a. Ani chuan, “A naupan lai ata tawh a ni;
9:22 tichuan, amah tiboral turin vawi tam tak meiah te, tuiahte pawh a nam thlu tawh a; nimahsela nangin eng emawti tala i tih theih chuan min khawngaih la, min pui ang che,” a ti a.
9:23 Tin, Isuan a hnenah, “I theih chuan a maw! ringtu atan chuan engkim tih theih a ni asin,” a ti a.
9:24 Tichuan naupang pa chuan, “Ka ring e, ka rinhlelhnaah hian mi pui ang che,” tiin a au chhuak ta nghal a.
9:25 Tin, Isuan mipui an lo tlan khawm mek a hmuhin, ramhuai bawlhhlawh chu a hau va,a hnenah, “Nang ramhuai tawng thei lo leh bengngawng, thu ka pe a che, a chhung ata lo chhuak la, lut leh tawh suh,” a ti a.
9:26 Tichuan a au chhuak a, nasa taka a sawisak zawhin a lo chhuak ta a; tin, naupang chu thi ang maiin a lo awm ta a, chutichuan mi tam zawk chuan, “A thi a ni,” an ti a.
9:27 Isua erawh chuan a kut a chelh a, a kaitho va; tin, a lo tho ta mai a.
9:28 Tin, Isua chu ina a va luh chuan a zirtirten, “Engati nge keinin kan hnawh chhuah theih loh le?” tiin fianrialah an zawt a.
9:29 Tin, ani chuan an hnenah, “Hetiang hi tawngtai chauh lo chuan engtin mah a chhuak thei lo,” a ti a.
9:30 Tin, chuta ta chu an kal chhuak a, Galili ram chu an kal tlang a, tuma hriat a duh lo va.
9:31 A zirtirte chu a zirtir si a, an hnenah, “Mihring Fapa hi mihringte kuta mantirin a awm tur a ni a, an tihlum bawk ang a; tin, an tihhlum hnu ni thum achinah a tho leh ang a,” a ti a.
9:32 Nimahsela a thusawi chu a ngaihna an hre lo va, amah lah chu an zawt ngam si lo va.
9:33 Tin, Kapernaum khua chu an lo thleng a; tin, in chhungah chuan a awm laiin an hnenah, “Kawngah khan eng thu nge in inhnial le?” tiin a zawt a.
9:34 Nimahsela kawngah chuan, “Kan zingah tunge ropui ber ang?” tiin an lo inhnial tawh avangin an ngawi ta reng a.
9:35 Tin, ani chu a thu a, sawm leh pahnihte chu a ko va, an hnenah, “Tupawhin hmasa ber nih a duh chuan mi zawng zawng aiin hnuhnung berah a awm tur a ni a, mi zawng zawng rawngbawltuah a awm bawk tur a ni,” a ti a.
9:36 Tin, naupang te a kai a, an zingah a dintir a; tin, a kuangkuah a, an hnenah,
9:37 “Tupawh ka hming avanga hetiang naupang te pakhat pawh lawm apiang chu keimah mi lawm an ni ang; tupawh kei mi lawm apiang chu, kei mi lawm an ni lo vang a, mi tirtu lawm an ni zawk ang,” a ti a.
9:38 Johana chuan a hnenah, “Zirtirtu, tu emaw i hminga ramhuaite hnawt chhuak kan hmu a; min zui ve loh avangin kan khap ta asin le,” a ti a.
9:39 Isua erawh chuan, “Khap tawh su u; tumah ka hminga tilmak ti sia mi sawichhe nghal thei an awm lo a ni.
9:40 Tupawh min dodal lo chu kan lama tang an ni si a.
9:41 Tupawh Krista mi in nih avanga tui no khat in tur pe apiang che u chu, tih tak meuhvin ka hrilh a che u, a lawmman tur chu a chan tawp lo vang.
9:42 “Tin, tupawh heng mi ringtu mi tete zinga pakhat pawh titlu apiang chu, an nghawngah buh rawt sawmna lung lianpui awrhtirin tuifinriatah thlak sela, an tan a tha zawk tur a ni.
9:43 Tin, i kutin a tihtluk che chuan tan mai rawh; kut pahnih neia Gehenna-a mei mit thei lova kal ai chuan, piangsuala nunnaa luh i tan a tha zawk e;
9:44 Kut ziak bu thenkhatah chuan chang 44 thu, "Chutah chuan an lungte chu a thiin, an mei chu tihmihin a awm ngai lo," hi a chuang.
9:45 Tin, i kein a tihtluk che chuan, tan mai rawh; ke pahnih neia Gehenna-a paih ai chuan, kebaia nunnaa luh i tan a tha zawk e;
9:46 Kutziak bu thenkhatah chuan chang 46 thu, "Chutah chuan an lungte chu a thiin, an mei chu tihmihin a awm ngai lo," hi a chuang.
9:47 ,48 Tin, i mitin a tihtluk che chuan kher chhuak mai rawh; mit khing hnih neia Gehenna, an lung thih ngai lohna leh mei mih ngai lohnaa paih ai chuan, mit khing khat neia Pathian rama luh i tan a tha zawk e.
9:48 ,47 Tin, i mitin a tihtluk che chuan kher chhuak mai rawh; mit khing hnih neia Gehenna, an lung thih ngai lohna leh mei mih ngai lohnaa paih ai chuan, mit khing khat neia Pathian rama luh i tan a tha zawk e.
9:49 Mi tin meia alin an awm dawn si a.
9:50 Chi hi a tha e; nimahsela, chi pawh hi a dak tawh chuan engin nge an tihal leh ang? Nangmahni ngeiah chi nei ula, inngeih rawh u,” a ti a.
10:1 Tin, a tho va, chuta tang chuan Judai ramah leh Jordan ralah a kal ta a; tin, mipuihote chu a hnenah an rawn inkhawm leh a, tichuan a tih dan pangngaiin a zirtir leh a.
10:2 Tin, Pharisai thenkhat a hnenah an lo kal a, amah fiah nan, “Miin nupui mak a thiang em?” tiin an zawt a.
10:3 Tin, ani chuan an hnenah, “Mosian engtin nge thu a pek che u?” tiin a chhang a.
10:4 Tin, anni chuan, “Mosia chuan inmakna lehkha ziakin mak a phal thin a ni,” an ti a.
10:5 Nimahsela Isuan an hnenah, “In thinlung khauh avngin asin chu thupek chu a ziaksak che u ni.
10:6 Nimahsela leilung piantirh atang chuan, ‘Anni chu hmeichhia leh mipaah a siam a ni,’
10:7 Chu mi avang chuan ‘Mipain a nu leh a pa a kalsan ang a, a nupui a vuan ang;
10:8 tichuan an pahnih chuan tisa pumkhat an lo ni tawh ang,’ chutichuan pahnih an ni tawh lo va, tisa pumkhat an ni tawh zawk a ni.
10:9 Chutichuan Pathianin a zawm tawh chu mihringin then suh se,” a ti a.
10:10 Tin, inah chuan a zirtirte chuan chung thu chu amah an zawt leh a. Tin, ani chuan an hnenah, “Tupawh a nupui maa mi dang nei apiang chuan a nupui chu a uiresan a ni;
10:12 ani pawh chuan a pasal a then a, mi dang a neih chuan a uire a ni bawk,” a ti a.
10:13 Tin, a deh atan a hnenah naupang tete an rawn hruai a; tin, zirtirte chuan an lo hau va.
10:14 Nimahsela Isuan chu chu a hmuhin a lungni lo em em a, zirtirteho hnenah chuan,“Naupang tete ka hnenah han kaltir ula, hnar suh u; Pathian ram chu hetiang mite ta a ni si a.
10:15 Tih tak meuhvin ka hrilh a che u, tupawh Pathian ram chu naupang tein a lawm anga lawm lo apiang a chhungah an lut tawp lo vang,” a ti a.
10:16 Tin, anmahni chu a kuangkuah a, an chungah a kut nghatin mal a sawmsak ta a.
10:17 Tin, kal tura a chhuah laiin mi pakhat a lamah a lo tlan a, a hmaah a thingthi a, a hnenah, “Zirtirtu tha, chatuana nunna ka chan theih nan engtin nge ka tih ang?” tiin a zawt a.
10:18 Tin, Isuan a hnenah, “Engati nge tha mi tih? mi pakhat chauh lo chu tumah tha an awm lo, chu chu Pathian a ni.
10:19 Thupekte chu i hria alawm – ‘Tual that suh, Uire suh, Ru suh, Dawtin hek suh, Bum suh, I nu leh i pa chawimawi rawh,’ tithe hi,” a ti a.
10:20 Tin, ani chuan a hnenah, “Zirtirtu, chung thu zawng zawng chu ka naupan tet ata ka zawm thin,” a ti a.
10:21 Tin, Isuan amah chu a en a, a hmangaih ta a, a hnenah, “Kawng khat i la bak e; kal la i neih apiang hralh la, pachhiate hnenah pe rawh, chutichuan vanah ro i nei ang; tin, lo kal la, mi zui ang che,” a ti a.
10:22 Amaherawhchu chung thu chungah chuan a hmel a lo dur ta khup a, lungngai takin a kal bo ta a; sum tam tak nei mi a nih avangin.
10:23 Tin, Isuan a en vel a, a zirtirte hnenah chuan, “Sum ngahte tan Pathian rama luh a va harsa dawn em!” a ti a.
10:24 Tin, a zirtirte chuan a thusawi chu mak an ti hle a. Isua erawh chuan a chhang leh a, an hnenah, “Naute u, sum ringte tan Pathian rama luh a va harsa thin em!
10:25 Mi hausa Pathian rama luh aiin sanghawngsei, hriau benga luh tlang a awl zawk,” a ti a.
10:26 Tin, anni chuan mak an ti nasa em em a, a hnenah, “a nih leh, tunge chhandam ni thei ang le?” an ti a.
10:27 Isuan anni chu a en a, “Chu chu mihring tan tih rual loh a ni lo; Pathian nen engkim tih theih a ni si a,” a ti a.
10:28 Peteran a hnenah, “Ngai teh, keinin engkim kalsanin kan zui ta chia,” tiin a han sawi tan a.
10:29 Isua chuan, “Tih tak meuhvin ka hrilh a che u, tupawh keimah avang leh Chanchin tha avanga in emaw, unaupate emaw, farnute emaw, nu emaw, pa emaw, fate emaw, ramte emaw kalsan tawh phawt chu,
10:30 tun dam chhung la la hian, inte, unaupate, farnute, nute, fate, ramte a leh zain, tihduhdahnate nen, hmu lo tur tumah an awm lo; hun lo la thleng tura chatuana nunna nen.
10:31 Nimahsela mi tam tak hmasa bera awmte chu hnuhnung berah an lo awm ang a, hnuhnung berte pawh hmasa berah an la awm ang,” a ti a.
10:32 Tin, Jerusalem khuaa chho turin kawngah an awm a; Isua chuan an hma a hruai a; anni chuan mak an ti hle a; a rawn zuitute chuan an hlau va. Tin, ani chuan sawm leh pahnihte chu a hruai hrang leh a,
10:33 “Ngai teh u, Jerusalem khuaah kan chhoh dawn hi; Mihring Fapa hi puithiam lalte leh lehkhaziaktute hnenah mantirin a awm dawn a ni; tin, anni chuan thi turin a chungah thu an titlu ang a, Jentailte hnenah an pe ang;
10:34 tin, anni chuan nuihza siam nan an hmang ang a, chil an chhak ang a, an vua ang a, an tihlum ang; tin, ni thum chinah a tho leh ang,” tiin a chunga thil lo thleng turte chu an hnenah a hrilh ta a.
10:35 Tin, Zebedaia fapa Jakoba leh Johana chuan ani chu an rawn hnaih a, a hnenah “Zirtirtu, i hnena kan dil tur apiang che chu i mi tihsak kan duh e,” an ti a.
10:36 Tin, ani chuan an hnenah, “In tan engnge tihsak che u ila in duh le?” a ti a.
10:37 Tin, anni chuan a hnenah, “I ropuinaah chuan, i ding lamah pakhat, i vei lamah pakhat min thuttir ang che,” an ti a.
10:38 Isua erawh chuan an hnenah, “In dil chu in hre lo a ni. Ka no in tur chu in in thei em ni? ka baptisma chan tur pawh in chang thei em ni?” a ti a.
10:39 Tin, anni chuan a hnenah, “Thei e,” an ti a. Tin, Isuan an hnenah, “Ka no in tur chu in in ang a, ka baptisma chan tur pawh chu in chang ve ang;
10:40 nimahsela ka ding lamah emaw, ka vei lamah emawa thut tur thu chu keia pek tur a ni lo va, an buatsaihsakate tan a ni zawk ang,” a ti a.
10:41 Tin, sawmte chuan chu chu an lo hriatin Jakoba leh Johana chungah chuan an lungni ta lo em em a.
10:42 Isua erawh chuan anniho chu a ko va, an hnenah, “Jentailte chunga roreltua an ruatte chu an chungah an lal em em thin a, an mi liante chuan an chungah thu an nei em em bawk thin tih in hria.
10:43 Nimahsela, nangni zingah zawng chutiang a ni lo vang; tupawh in zinga mi lian nih duh apiang chu in rawngbawltuah a awm zawk tur a ni,
10:44 tupawh in zinga hmasa ber nih duh apiang chu mi zawng zawng chhiahhlawhah a awm bawk tur a ni.
10:45 Mihring Fapa meuh pawh rawngbawlsaka awm turin a lo kal lo va, rawngbawl tur leh mi tam tak tlan nana a nun pe zawk turin a lo kal a ni si,” a ti a.
10:46 Tin, Jeriko khua an lo thleng a, tin, Isua Jeriko atang chuan a zirtirhote leh mipui tam tak nen a chhuah laiin kutdawt mitdel, Timaia fapa Bartimaia chu kawng sirah a lo thu a.
10:47 Tin, Nazaret Isua a ni tih a hriat veleh, “Isu, Davida Fapa, mi khawngaih rawh,” tiin a au ta a.
10:48 Tin, mi tam takin ngawi turin an hau va; nimahsela ani chuan, “davida Fapa, mi khawngaih rawh,” tiin a au zual sauh va.
10:49 Tin, Isua a ding a, “Amah chu han ko the u,” a ti a. Tin, mitdel chu an ko va, a hnenah chuan, “Thlamuang takin awm la, tho rawh; a ko va che,” an ti a.
10:50 Tin, ani chuan a puan a paih a, a zuang tho va, Isua hnenah a kal a.
10:51 Tin, Isuan amah chu a lo bia a, “I chungah engtia ka tih nge i duh?,” a ti a. Tin, mitdel chuan a hnenah, “Rabboni, hmuh theih ka duh,” a ti a.
10:52 Tin, Isuan a hnenah, “Kal tawh rawh, i rinna hi i dampui a ni e,” a ti a. Tichuan a hmu thei ta nghal a, kalkawngah chuan Isua a zui ta a.
11:1 Tin, Jerusalem khua an thlen dawna Oliv tlanga Bethphage leh Bethani khaw kiang an thlenin, a zirtirte zinga mi pahnih a tir a,
11:2 an hnenah, “In hma zawn khuaah sawn va kal ta ula; tin, in luh tiring sabengtung no thlun, tuma la chuan ngai lohna in va hmu mai ang; chu chu phelh ula, han kairawh u.
11:3 Tin, tupawhin, ‘Kha kha engah nge in tih?’ an tih che u chuan, ‘Lalpain a duh a ni,hetah a rawn dah tir leh thuai ang e,’ ti ang che u,” a ti a.
11:4 Tin, an kal ta a, kawtthlerah kawngkhar pawn lama sabengtung no thlun an va hmu a; tin, chu chu an phelh ta a.
11:5 Tin, chuta ding tute emaw chuan an hnenah, “Sabengtung no kha engah nge in phelh?” an ti a.
11:6 Tin, anni chuan Isua sawi ang tak khan an hnenah an sawi a; tichuan an kal an phal ta a.
11:7 Tin, sabengtung no chu Isua hnenah an rawn kai a, a chungah chun an puante an phah a; tichuan a chungah a chuang ta a.
11:8 Tin, mi tam takin kalkawngah chuan an puan an phah a; mi dangin lova mi chhawl satin an phah bawk a.
11:9 Tin, a hma lama kalte leh a hnung lama rawn zuite chuan, “Hosanna! Lalpa hminga lo kal chu fakin awm rawh se,
11:10 Ram lo thleng tur, kan Pa Davida ram chu chawimawiin awm rawh se. Chungnung berah khian Hosanna! tiin an au va.
11:11 Tin, Jerusalem khuaa Pathian biak inah chuan a va lut a; tin, engkim a en vel zawh chuan tlai lam pawh a lo ni ta a, a chhuak a, sawm leh pahnihte nen Bethani-ah an kal ta a.
11:12 Tin, atukah chuan Bethani atanga a chhuah hnuin a ril a lo tam ta a.
11:13 Tin, theipui kung hnah nei hla takah a han hmu a, “A rah ka hmu dah law maw,” tiin a va kal a; tin, a va thlen chuanin a hnah chauh lo chu engmah a hmu lo va; theipui rah hun a ni lo reng a.
11:14 Tichuan, Isuan thing chu a bia a, “Tun achinah kumkhuain i lakah tuman rah ei tawh suh se,” a ti a. A zirtirhote chuan chu chu an hria a.
11:15 Tin, Jerusalem khua chu an thleng a, Pathian biak inah chuan a va lut a, biak ina englo zuartute leh leitute chu a hnawt chhuak ta a, tangka thlengtuho dawhkante leh thuro zuarho thutphahte pawh chu a nam thluksak bawk a;
11:16 Tin, Pathian biak inah chuan tumahin bungrual an ken tlang a phal ta lo bawk a.
11:17 Tin, an hnenah chuan, “‘Ka in chu hnam tin tan tawngtaina in an ti ang,’ tih ziak a ni lo vem ni? Nangni erawh chuan suamhmangte pukah in siam zawk hi,” tiin a zirtir ta a.
11:18 Tin, puithiam lalte leh lehkhaziaktute chuan chu chu an hria a, amah an hlauh avangin a tihboralna turzia an zawng a; mipui zawng zawng chuan a zirtirna chu mak an ti hle si a.
11:19 Tin, tlai lam apiangah khawpui ata chu a kal chhuak thin a.
11:20 Tin, zinga an kal pahin theipui kung chu a zung thlenga thi zo vekin an hmu ta a.
11:21 Tichuan Peteran a lo hre chhuak leh a, a hnenah chuan, “Rabbi, en teh! Theipui kung anchhia i lawh kha a thi zo ta,” a ti a.
11:22 Tin, Isuan an hnenah, “Pathian ring rawh u.
11:23 Tih tak meuhvin ka hrilh a che u, tupawh he tlang hnenah hian, ‘Lo insawn la, tuifinriatah lo inpaih rawh,’ tia, a rilruaa ringhlel lova a sawi chu a lo thleng ngei ang tih ring apiangin an sawi ang apiang chu an hmu ang.
11:24 Chuvngin ka ti a che u, engkim in tawngtaia in dil apiang chu hmu tawhah inngai ula, tichuan in hmu ang.
11:25 Tin, tawngtaia in din hun apiangin tu chungah pawh thupawi eng emaw in neih chuan ngaidam rawh u; in Pa vana mi pawhin in bawhchhiatnate chu a nagihdam theihna tur che uin,” a ti a, a chhang a.
11:27 Tin, Jerusalem khua chu an thleng leh a; tin, Pathian biak ina a len laiin puithiam lalho te, lehkhaziaktuho te, upaho te chu a hnenah an lo kal a,
11:28 a hnenah chuan, “tu thuin nge heng thil hi i tih? Heng thil hi ti turin tuin nge thu pe che?” an ti a.
11:29 Tin, Isuan an hnenah, “Kei pawhin thu kam khat ka zawt ve ang che u; mi chhang ula, tichuan tu thuin nge heng thil hi ka tih ka hrilh ang che u.
11:30 Johana baptisma kha vana mi thu nge, mihring thu? mi chhang rawh u,” a ti a.
11:31 Tin, an inngaihtuah a, “ ‘Vana mi thu,’ kan tih chuan, ‘Engah nge a thu in awi loh le?’ min ti si ang a,
11:32 “Mihring thu,’ kan ti emaw chu ni ang?” an ti a. Nimahsela mipui chu an hlau va; mi zawng zawngin Johana chu zawlnei taktakah an ruat hlawm si a.
11:33 Tichuan Isua an chhang a, “Kan hre lo,” an ti a. Tin, Isuan an hnenah, “Kei pawhin tu thuin nge heng thil hi ka tih ka hrilh bik lo vang che u,” a ti a.
12:1 Tin, tehkhin thuin an hnenah a sawi ta a: “Tuin emaw grep huan a siam a, palin a hung vel a, gep sawrna tur khur a lai a, in sang a sa a, lo enkawltute hnenah thlawhhlawh turin a pe a, ram dangah a kl ta a.
12:2 Tin, a lawh hun chuan huana rah chu a chanai lo enkawltute hnen ata la turin lo enkawltute hnenah chuan a bawi pakhat a tir a.
12:3 Tin, chu mi chu an lo man a, an vel a, kutruakin an kaltir leh ta a.
12:4 Tin, bawi dang an hnenah a tir leh a; chu pawh chu lungin an deng a, a lu-ah an lo tipem a, zahthlak takin an lo sawisa a.
12:5 Tin, bawi dang a tir leh pek a; chu mi chu an lo tihlum a. Bawi dang tam tak pawh – thenkhat an vel a, thenkhat an lo tihlum a.
12:6 Tin, pakhat, fapa duh tak a la nei a; ‘Ka fapa hi chu an zah ang,’ tiin ani chu a hnuhnung berah an hnenah a tir a.
12:7 Nimahsela chung lo enkawltute chuan, ‘He mi hi roluahtu tur a ni; i that ang u khai! tichuan a roluah tur hi kan ta a ni mai ang,’ an inti a.
12:8 Tichuan ani chu an lo man a, an tihlum a, grep huan ata chu an theh chhuak ta a.
12:9 Chutichuan huan neitupa chuan engtin nge a rawn tih ang? Lo enkawltute chu a rawn tiboral ang a, huan chu mi dangte a pe ang.
12:10 He Pathian Lehkha thu hi in chhiar lawm ni?‘In satute lung duh loh kha, ‘Chu ngei chu a kila lung tangkai ber a lo ni ta.
12:11 Chu chu Lalpa tih a ni a,Kan mithmuhah a mak a ni,’tih hi,” a ti a.
12:12 Tin, amah chu man an tum ta a, nimahsela mipui chu an hlau va; chu tehkhin thu chu anmahni demin a sawi tih an hre si a. Tichuan amah chu an kalsan a, an kal bo ta a.
12:13 Tin, a thusawia man turin Pharisaite leh Heroda pawla mi tute emaw a hnenah an tir a.
12:14 Tichuan anni chu an lo thlen chuan a hnenah, “Zirtirtu, mi dik tak i ni a, pawisak chuan tumah i nei lo tih kan hria, tumah thlei bik lovin, tih tak zetin Pathian kawng thu i zirtir thin a ni; Kaisara hnena chhiah chawi hi a thiang nge thiang lo?
12:15 Kan pe ang nge pe lo vang?” an ti a. Ani erawh chuan an vervekzia chu hriain, an hnenah, “engah nge mi fiah? Duli mi han lak ula, ka lo en ang e,” a ti a.
12:16 Tin, an rawn la a. Tin, ani chuan an hnenah, “Hei hi tu lem leh tu hming nge ni?” a ti a. Tin, anni chuan, “Kaisara,” an ti a.
12:17 Tin, Isuan an hnenah, “Kaisara thilte chu Kaisara hnenah pe ula, Pathian thilte chu Pathian hnenah pe ta che u,” a ti a. Tichuan mak an ti nasa em em a.
12:18 Tin, Saddukaiho, thawhlehna a awm lo tite chu a hnenah an lo kal a; a hnenah,
12:19 “Zirtirtu, Mosian, ‘Tupawh a unaupain fa nei lovin a nupui thihsan sela, a unaupa chuan a nupui chu rochungin a uanupa tan chi a thlahsak tur a ni,’ tiin min ziaksak a ni.
12:20 Aw le, sal sarih an awm a; a upa berin nupui a nei a, chi thlah lovin a thi a.
12:21 Tichuan a phanihna chuan a rochung a, chi thlah lovin a thi leh bawk a; a pathumna chuan chutiang bawkin.
12:22 Tichuan sal sarihte chu chi reng reng thlah lovin an thi zel a. A hnuhnung beran hmeichhia pawh chu a thi ta a.
12:23 Thawhleh hunah chuan a tu bera nupui nge ni ang? an pasarih chuan nupuiah an nei theuh si a,” tiin an zawt a.
12:24 Isuan an hnenah, “He mi avang hian a ni lawm ni, in ngaih sual thin, Pathian Lehkha Thu leh Pathian thiltihtheihna in hriat loh avang hian?
12:25 Mitthi zing ata an thawhlehin nupui pasal an innei dawn tawh lo va, vana vantirhkohte ang an ni dawn tawh zawk a ni.
12:26 Tin, mitthite kaihthawha an awm tur thu chu – Mosia lehkhabua hnim buk thuah khan, Puithiamin, ‘Kei Abrahama Pathian, Isaaka Pathian, Jakoba Pathian ka ni,’ ti a, a biakzia kha in chhiar lo vem ni?
12:27 Ani chu mitthi Pathian a ni lo va, mi nung Pathian a ni zawk; in ngai sual nasa hle a ni,” a ti a.
12:28 Tin, lehkhaziaktute zinga mi pakhat a lo kal a, an inhnial chu a lo ngaithla a, Isuan anniho chu tha takin a chhang tih a hria a, a hnenah, “Thupek zawng zawngah eng hi nge ropui ber?” tiin a zawt a.
12:29 Isuan, “A ropui ber chu hei hi a ni; ‘Israelhote u, ngai teh u, Lalpa kan Pathian chu Lalpa pakhat chauh a ni a;
12:30 Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tur a ni,’ tih hi.
12:31 A dawttu chu hei hi a ni, ‘Nangmah i inhmangaih angin i vengte pawh i hmangaih tur a ni,’ tih hi. Heng aia thupek ropui zawk reng reng hi a awm lo,” tiin a chhang a.
12:32 Tin, lehkhaziaktu chuan a hnenah, “A ni tak e, zirtirtu, amah chu pakhat chauh a ni a, amah lo chu tumah dang an awm lo va,
12:33 Amah chu thinlung zawng zawnga, hriatna zawng zawnga, chakna zawng zawnga hmangaih a, mahni inhmangaih anga vengte hmangaih hi pumhal thilpek leh inthawina zawng zawng aiin a tha zawk em em tih hi i sawi dik zet mai,” a ti a.
12:34 Tin, fing takin a chhang tih Isuan a hriatin, a hnenah chuan, “Pathian ram I hlat lo ve,” a ti a. Chu mi chinah chuan tuman thu reng reng an zawt ngam ta lo.
12:35 Tin, Isuan Pathian biak inah chuan a zirtir laiin anmahni a bia a, “Krista chu Davida fapa a ni tih lehkhaziaktuten engtiziaa sawi thin nge an nih?
12:36 Davida ngeiin, Thlarau Thianghlimin, Lalpa chuan, ka Lalpa hnenah ‘I hmelmate i ke nghahchhana ka siam hma loh zawng Ka ding lamah thu rawh,’ a ti, a ti a.
12:37 Davida ngei chuan ani chu ‘Lalpa,’ a ti si a, khawiah nge a fapa a nih ang?” a ti a.Tin, vantlangho chuan lawm takin a thu an ngaithla a.
12:38 in, a zirtirnaah chuan, “Lehkhaziaktute lakah fimkhur rawh u; anni chuan kawr fual haa len an duh thin a, dawr hmunah chibai buk te,
12:39 inkhawmna inah thutphah tha ber te, ruaithehnaah hmun tha ber te an ngiat thin a :
12:40 hmeithai sum an ei a, tlang bum nan rei tak an tawngtai thin; chungho chuan thiam loh an chang nasa lehzual ang,” a ti a.
12:41 Tin, thawhlawm bawm zawnah chuan a thu a, thawhlawm bawma mipuiho tangka thlakzia chu a en a; mi hausa tam takin hnem tak ang thlak a.
12:42 Tin, hmeithai rethei te a lo kal a, dar tangka dere pahnih a thlak a (chu chu pawisa pakhat hu a ni.)
12:43 Tin, Isua chuan a zirtirte a ko va, an hnenah, “tih tak meuhvin ka hrilh a che u, thawhlawm bawma thlaktu zawng zawng ai hian he hmeithai rethei te hian a thlak tam zawk.
12:44 Heng zawng zawng hian an neih liama mi an thlak a ni; ani erawh hi chuan a duh lai tak, a neih chhun tak, a intunnunna tur zawng zawng chu a thlak vek a ni,” a ti a.
13:1 Tin, Pathian biak in ata chu a kal chhuah laiin a zirtirte zinga mi pakhatin a hnenah, “Zirtirtu, en teh, a lung leh a inte hi a ropui the a nia!” a ti a.
13:2 Tin, Isuan a hnenah, “Heng in nasa tak hi i hmu maw? tihchim lohva lung intiang reng reng hetah a awm lo vang,” a ti a.
13:3 Tin, Oliv Tlanga Pathian biak in zawna a thut laiin Petera te, Jakoba te, Johana te,Andria te chuan a hnenah,
13:4 “Chung chu engtikah nge a lo awm ang? chung zawng zawng chu a thlen dawn hunah chhinchhiahna engnge awm ang? min hrilh rawh,” tiin an zawt ru a.
13:5 Tin, Isuan an hnenah, “Tuman an tihder loh nan che u fimkhur rawh u.
13:6 Mi tam tak ‘Krista chu ka ni,’ tiin keima hming chhalin an lo kal ang a, mi tam tak an tihder ang.
13:7 Tin, indo thu leh indo thu thangte in hriat hunin mangang suh ang che u; chung chu a lo thleng tur reng a ni; nimahsela tawpna chu a la ni rih lo vang.
13:8 Hnam hrang leh hnam hrang an indo vang a, ram hrang leh ram hrang an indo vang a; hmun hrang hrangah lirte a nghing ang a; tam te a tla ang. Chung chu nau vei tantirhna a ni.
13:9 “Nimahsela, fimkhur rawh u; roreltute an mantir dawn che u a; inkhawmna inahte an vua ang che u a; keimah avangin hotute leh lalte hmaah anmahni hriattirna turin in la ding bawk ang.
13:10 Tin, Chanchin Tha hi hnam zawng zawng hnena hrilh hmasak tur a ni.
13:11 Tin, an hruai che u a, an mantir hunah che u chuan, ‘Engnge ka sawi ang,’ tiin ngaihtuah lawk suh u; a hun takah chuan a hriattir che u apiang, chu ngei chu sawizawk rawh u; a sawitu chu nangni in ni dawn si lo va. Thlarau Thianghlim a ni Zawk ang.
13:12 Tin, tihhlum turin unaupa leh unaupa an inmantir ang a, pa pawhin a fa a mantir bawk ang; fate pawhin an nu leh an pate an do vang a, an tihhlumtir bawk ang.
13:13 Keima hming avngin mi zawng zawng huat in ni ang; nimahsela a tawp thlenga tuar peih apiang chu, chu mi ngei chu chhandamin a awm ang.
13:14 “Nimahsela titiautu tenawm chu a din lohna tura ding inhmuh hunah, (a chhiar apiangin a awmzia hre rawh se) chu mi hunah chuan Judai rama awmte chu tlangahte tlan bo rawh se;
13:15 tin, in chunga awm chu chhuk suh se, a ina englo chuh turin lut hek suh se;
13:16 tin, lova awm chu a puan chuh turin kir leh suh se.
13:17 Chung ni chuan raite leh nauno pawmte chung chu a pik ang.
13:18 Tin, chung chu thlasika a lo thlen loh nan tawngtai rawh u.
13:19 Chung ni chu hrehawmna ni a ni dawn si a, chutianga nasa reng reng chu Pathian siam leilung pian tirh ata tun thlengin a la awm ngai lo va, engtikah mah a loawm leh tawh hek lo vang.
13:20 Tin, Lalpan chung nite chu titawi suh sela mihring reng reng damin an chhuak lo vang; nimahsela mi thlan, a ruatate avang chuan nite chu a titawi a ni.
13:21 “Tin, chutih hunah chuan tupawhin, in hnenah, ‘En teh u! sawta saw,’ emaw an tih chuan awi suh ang che u;
13:22 Krista derte leh zawlnei derte an lo chhuak dawn si a, chung chuan chhinchhiahna leh thilmakte an ti ang, thei ang sela, thlante meuh pawh an tihder theih nan.
13:23 Nangni erawh chu fimkhur rawh u, ngai teh u, engkim ka hrilh lawk tawh che u hi.
13:24 “Nimahsela chung ni a, chung hrehawmna hnuah chuan, ni tihthimin a awm ang a, thla a eng tawh lo vang a,
13:25 van atangin arsite an lo tla ang a, vana thiltihtheihna awmte chu tihnghin a ni ang.
13:26 chutih hunah chuan Mihring Fapa hi thiltihtheihna nasa tak leh ropuina nasa tak nen chum zinga lo kal an hmu ang.
13:27 Chu mi hunah chuan vantirhkohte chu a tir chhuak ang a, a thlante chu kawl kil li ata – lei tawp atanga van tawp thlengin – a lawr khawm ang.
13:28 “Tichuan theipui kungah hian a tehkhin thu zir rawh u: A tang a lo no va, a hnah a lo chawr chuan nipui a thaw dawn tih in hre thin;
13:29 chutiang bawkin nangni pawhin chung chu a lo thleng in hmuh hun chuan amah chu a lo hnai tawh a, kawngka bul ngeiah a awm tih hria ang che u,
13:30 Tih tak meuhvin ka hrilh a che u, chung zawng zawng chu a thlen hma loh zawng tun lai chhuante hi an ral lo vang.
13:31 Lei leh van a ral ang a, ka thu erawhchu a ral lo vang.
13:32 “Nimahsela chu mi ni leh a dar thu chu Pa chauh lo chuan tuman, vana vantirhkohte pawhin, Fapa pawhin an hre lo.
13:33 “Fimkhur ula, inring renga awmin tawngtai rawh u; a hun chu in hre si lo va.
13:34 Mi, a in kalsan a, a bawite chu thu neihtir a, an hnathawh tur pe theuhva, kawngkhar vengtu pawh inrin tur thu pe zeta ram hla taka zin ta daih ang a ni.
13:35 Chutichuan inring rengin awm rawh u; in neitupa lo haw hun tur chu tlai lamah nge, zanah nge, ar khuanah nge, zingah nge a nih dawn in hre si lo;
13:36 chutilochuan a lo haw phutin, muhilin a rawn hmu hlauh dah ang che u.
13:37 Tin, in hnena ka sawi hi mi zawng zawng hnena sawi ka ni. Inring rengin awm rawh u,” a ti ta a.
14:1 Tin, ni hnih chinah chuan Kalhlen Kut leh Chhang Dawidim telh loh Kut a awm dawn a; puithiam lalte leh lehkhaziaktute chuan amah chu ngamthlema man a, an tihhlum theihna turzia an zawng an zawng a;
14:2 nimahsela, “Kut chhung chuan ni suh se, chutilochuan vantlang zingah buaina a lo awmhlauh dah ang e,” an ti a.
14:3 Tin, Bethani khuaa phar Simona inah chuan a awm laia chaw a kil laiin, hmeichhe pakhat alabasta bawma spiknard hriak rimtui to tak kengin a lo kal a, a bawm chu a tikeh a, a lu-ah a leih a.
14:4 Nimhsela, thenkhat chu an tinur ta hlawm a, “eng atan nge hriak rimtui hi a tihboral mai mai ni?
14:5 He hriak hi duli zathum aia tam zawka hralh a, mi rethei te hnena pek theih a ni si a,” an ti a. Tichuan a chungah chuan an phunnawi ta a.
14:6 Isua erawh chuan, “Engmah tih suh u; engah nge in tihbuai ni? ka chungah hian thil tha tak a ti a ni.
14:7 Mi retheite chu kumkhuaa in hnena awm an ni a, in duh hun apiangin anni chu in khawngaih thei si a; kei erawh chu kumkhuaa in hnena awm tur ka ni lo.
14:8 A tih theih tawk a ti a ni; ka taksa hi phum turin a lo hnawih lawk a nih hi.
14:9 Tichuan tih tak meuhvin ka hrilh a che u, khawvel zawng zawngah khawiah pawh Chanchin Tha an hrilhna apiangah he hmeichhe thiltih pawh hi amah hriat rengna turin an sawi ve zel ang,” a ti a.
14:10 Tin, Juda Iskariota, sawm leh pahnihte zinga mi pakhat khan, Isua chu an hnena a mantir theih nan puithiam lalte hnenah a va kal a.
14:11 Tin, anni chuan a hriat veleh an lawm hle a, a hnenah tangka pek an tiam ta a. Tichuan a mantirna turzia remchang a zawng ta a.
14:12 Tin, chhang dawidim telh loh ni, ni hmasa ber, Kalhlen Kutna beram no an talh thinna niah chuan a zirtirten a hnenah, “Kalhlen Kut chaw i ei theihna turin khawiah nge va buatsaih ila I duh?” an ti a.
14:13 Tichuan a zirtirte zinga mi pahnih a tir a, an hnenah, “Khawpuiah va lut ula, chutah chuan mipa bela tui puin a tawk ang che u a; amah chu zui ang che u.
14:14 Tin, a luhna apiangah chu in neitupa hnenah chuan, ‘Zirtirtu chuan, Ka zirtirteho nen Kalhlen Kut chaw kan eina tur, ka mikhual pindan chu khawiah nge? A ti e,’ ti ang che u.
14:15 Tichuan amah ngei chuan pindan chungnung zau tak, bungraw awm sa peih diam, a entir ang che u; chutah chuan kan tan buatsaih ang che u,” a ti a.
14:16 Tin, zirtirte chu an chhuak ta a, khawpuiah chuan an va lut a, an hnena a sawi ang takin an hmu a; tin, Kalhlen Kut chaw chu an buatsaih ta a.
14:17 Tin, khua a lo tlai lam chuan ani chu sawm leh pahnihte nen an va kal ta a.
14:18 Tin, an kil a, an ei laiin Isuan, “Tih tak meuhvin ka hrilh a che u, in zinga mi pakhat, ka hnena ei ve ngei hian mi mantir ang,” a ti a.
14:19 Tin, an lungngai ta hle a, a mal malin a hnenah, “Keimah em ni?” an ti ta theuh va.
14:20 Tin, ani chuan an hnenah, “Sawm leh pahnihte zinga mi pakhat, thlenga mi chiahpuitu hi a ni.
14:21 Mihring Fapa hi a chanchin an ziak ang tak khan a kal dawn a ni; nimahsela Mihring Fapa mantirtu tur mihring chung chu a pik e! Chu mihring chu piang suh sela a tan a tha zawk ang,” a ti a.
14:22 Tin, an ei laiin Isuan chhang a la a, mal a sawmsak zawhin a phel a, an hnenah a pe a, “La rawh u; hei hi ka taksa a ni,” a ti a.
14:23 Tin, no a la a, lawmthu a sawi zawhin an hnenah a pe a; tichuan an zain an in ta theuh va.
14:24 Tin, ani chuan an hnenah, “Hei hi ka thisen, mi tam tak tana chhuak tur, thuthlunna chu a ni.
14:25 Tih tak meuhvin ka hrilh a che u, Pathian rama a thar ka in ni a thlen hma loh zawng grep hrui raha mi ka in leh tawh lo vang,” a ti a.
14:26 Tin, hla an sak zawhin an chhuak a, Oliv tlangah chuan an kal ta a.
14:27 Tin, Isuan an hnenah, “In zain lungni lovin in la awm vek ang, ‘Beram vengtu chu ka vua ang a, beramte chu an darh ang,’ tih ziak a ni si a.
14:28 Nimahsela ka thawhleh hnuin Galili ramah in hmaah ka kal ang,” a ti a.
14:29 Petera erawh chuan a hnenah, “An zain lungni lovin awm mah sela, kei zawng ka awm lo vang,” a ti a.
14:30 Tin, Isuan a hnenah, “Tih tak meuhvin ka hrilh a che, vawiinah, zanin la laah hian, ar vawi hnih a khuan hmain, nangin vawi thum mi phat ang,” a ti a.
14:31 Ani erawh chuan nasa takin, “I thihnaah chuan thi ve dawn mah ila ka phat tawp lo vang che,” a ti chiam a. Tin, chutiang bawk chuan an ti ta theuh va.
14:32 Tin, Gethsemane an tih hmun chu an thleng a; tin, ani chuan a zirtirte hnenah, “Ka tawngtai chhung zawng hetah hian lo thu rawh u,” a ti a.
14:33 Tin, Petera te, Jakoba te, Johana te chu a hruai a, nasa takin a thlaphangin a lo mangang ta em em a.
14:34 Tichuan an hnenah, “Ka rilru a lungngai em em a, thihna khawp hial a ni; hetah hian awm ula, inring reng rawh u,” a ti a.
14:35 Tin, tlemin hma lamah a va kal hlek a, leiah a bawkkhup a, theih ni sela, chu mi hun chuan amah pel turin a tawngtai a.
14:36 “Abba! (Ka pa!) engkim i ti thei a; he no hi ka hnen ata la sawn rawh; nimahsela keia thu ni lovin nangma thu thu ni zawk rawh se,” a ti a.
14:37 Tin, a lo kal a, anniho chu muhilin a rawn hmu a; tichuan Petera hnenah, “Simon, i muhil a ni maw? Darkar khat pawh inring rengin i awm thei lo maw?
14:38 Thlemnaa in luh loh nan inring rengin tawngtai rawh u. Thlarau zawngin a peih a, tisa erawh chu a chak lo a ni,” a ti a.
14:39 Tin, a va kal leh a, a thusawi ngai sawiin a tawngtai leh a.
14:40 Tin, a lo let leh chuan anniho chu muhilin a rawn hmu leh a, an mut a chhuak hle si a; chhan ngaihna pawh an hre lo va.
14:41 Tin, a lo kal vawi thumnaah chuan an hnenah, “Tunah zawng muhil ula, chawl tawh rawh u! A tawk tawh e; a hun chu a lo thleng ta; ngai teh u, Mihring Fapa hi mi sualte kutah an mantir dawn hi.
14:42 Tho ula, i kal ang u; en teh u, mi mantirtu tur chu a lo hnaih tak hi,” a ti a.
14:43 Tin, a la sawi lai mekin Juda, sawm leh pahnihte zinga mi pakhat chu a lo thleng ta nghal a, ama rual chuan puithiam lalte leh lehkhaziaktute leh upate hnen ata mipuiho, khandaih leh talhtum kengin an lo thleng bawk a.
14:44 Tin, a mantirtu tur chuan, “Ka fawh apiang chu amah a ni ang; man ula, fel takin hruai bo ang che u,” tiin chhinchhiahna tur a lo hrilh lawk tawh diam a.
14:45 Tichuan a thlen veleh amah a va pan ta nghal a, “Rabbi!” tiin a fawp ta ngawih ngawih a.
14:46 Tin, ani chu an chelh a, an man ta a.
14:47 Tin, a kianga dingte zinga mi tuin emaw a khandaih a phawi a, Puithiam Lalber bawi chu a sat a, a beng a sah thlaksak a.
14:48 Tin, Isuan anniho chu a bia a, an hnenah, “Khandaihte, talhtumte kengin suamhmang man tur ang rengin mi man turin in lo chhuak a ni maw?
14:49 Pathian biak inah ni tin zirtirin in hnenah ka awm thin a, mi man si lo. Nimahsela Pathian Lehkha Thu chu a lo thlen theihna tur a nih hi,” a ti a.
14:50 Tin, an zain amah chu an thlahthlam a, an tlan bo ta vek a.
14:51 Tin, tlangval tuin emaw, puan zai sin chauh inbelin amah chu a zui a; tin, ani chu an lo man a;
14:52 nimahsela a puan zai sin chu a kalsan a, saruakin a tlan bo ta a.
14:53 Tin, Isua chu Puithiam Lalber hnenah an hruai a; tin, ama rual chuan puithiam lalte, upate, lehkhaziaktute zawng zawng an lo kal khawm a.
14:54 Tin, Peteran hla tak atangin amah chu a zui a, Puithiam Lalber in hual chhung kawtlai thlengin; tin, chhiahhlawhte zingah mei lum aiin a thu ve a.
14:55 Tin, Isua an tihhlum theihna turin puithiam lalte leh roreltuteho zawng zawng chuan amah hekna an zawng a; an hmu si lo va.
14:56 Mi tam takin dawtin an hek a, nimahsela an hekna thu chu a inhmu thei si lo.
14:57 Tin, tute emaw an ding a, dawtin an hek a,
14:58 “He mi hian, ‘He Pathian biak in kuta sak hi ka thiat ang a, ni thum chhungin biak in dang, kuta sak loh mi, ka sa ang,’ a tih kan hria,” an ti a.
14:59 Nimahsela chuti pawh chuan an hekna thu pawh chu a inhmu thei chuang lo.
14:60 Tin, Puithiam Lalber chu a laiah a ding chhuak a, Isua hnenah, “Engmahin i chhang lo maw? Heng hian an hekna che hi engtizia nge ni?” tiin a zawt a.
14:61 Ani erawh chu a ngawi reng a, engmahin a chhang lo. Puithiam Lalber chuan a hnenah, “Krista, Engthawla Fapa chu i ni em?” tiin a zawt leh a.
14:62 Tin, Isuan, “Ni e; Mihring Fapa hi Thiltihtheihna ding lama thu a, van chhum zinga lo kal in la hmu dawn a ni,” a ti a.
14:63 Tin Puithiam Lalber chuan a silhfente a pawtthler a, “Hretu dang engah nge kan ngaih tawh ang?
14:64 Pathian a sawichhiat zia in hre tawh a; engtin nge in ngaih?” a ti a. Tin, an zain ani chu thi tlakah an ruat hlawm a.
14:65 Tin, a thenin amah chu chil an chhak ta pang a, a hmai an tuam a, an hnek a, a hnenah, “Sawi rawh,” an ti a. Tin, chhiahhlawhte chuan an chelh pahin an beng sawk sawk a.
14:66 Tin, Petera chu hnuai lama in hual chhung kawtlaiah chuan a awm laiin Puithiam Lalber rawngbawltu nula zinga pakhat a lo kal a;
14:67 Petera mei lum ai chu a hmu a, a en a; “Nang pawh hi Isua, Nazaret mi hnena awm kha i nih hi,” a ti a.
14:68 Ani erawh chuan, “I thu sawi chu ka hre hauh lo mai, a ngaihna reng pawh ka hre hek lo,” tiin a pha a. Tin, sumhmunah chuan a va chhuak a; tichuan ar a khuang ta a.
14:69 Tin, nula chuan a hmu a, a kianga dingte hnenah chuan, “He mi hi an zinga mi a ni,” a ti leh ta a.
14:70 Nimahsela a pha leh a. Tin, rei lo te achinah a kianga dingte chuan Petera hnenah, “An zinga mi i ni ngei mai, Galili rama mi i ni si a,” an ti a.
14:71 Ani erawh chuan, “Chu mihring in sawia chu ka hre lo,” tiin anchhia inlawhin chhia a chham ta a.
14:72 Tin, ar khuan vawi hnihna chu a khuang ta nghal a. Tin, Petera chuan Isuan a hnena, “Ar vawi hnih a khuan hmain nangin vawi thum mi phat ang,” a tih thu kha a lo hre chhuak leh ta a. Tin, chu chu a ngaihtuahin a tap ta a.
15:1 Tin, zing a lo nih veleh puithiamte chu upate leh lehkhaziaktute leh roreltuho zawng zawng nen an inrawn a, Isua chu an phuar a, an hruai a, Pilata hnenah an pe ta nghal a.
15:2 Tin, Pilata chuan a hnenah, “Judate lal i ni em?” tiin a zawt a. Tin, ani chuan a hnenah, “Ni e,” tiin a chhang a.
15:3 Tin, puithiamte chuan kawng tam takin an hek a.
15:4 Tichuan Pilatan a zawt leh a, a hnenah, “Engmahin i chhang lo maw? Ngai rawh, an hekna che zozai hi!” a ti a.
15:5 Isua erawh chuan engmahin a chhang ta lo va; chutichuan Pilatan mak a ti hle a.
15:6 Tin, Pilatan kut niah chuan mi tang pakhat an ngen apianga chu a chhuahsak thin a.
15:7 Tin, mi pakhat Barabba an tih chu, helte zingah phuarin a lum reng a, chung chuan helnaah chuan tual an that a ni.
15:8 Tin, mipuiho an han chho va, an tan a tihsak thin anga ti turin an ngen ta a.
15:9 Tin, Pilatan a chhang a, an hnenah, “Judate lal hi chhuahsak che u ila in duh em?” a ti a.
15:10 (Puithiam lalten itsikna avangin an rawn hruai tih a hre si a)
15:11 Nimahsela puithiam lalte chuan mipuiho chu Barabba chhuahsak zawk dil turin an fuih pawrh a.
15:12 Pilata chuan an hnenah, “Judate lal in tiha hi engtin nge ka tih tak ang le?” tiin a chhang leh a.
15:13 Tin, anniho chu, “Krawsah khengbet rawh,” tiin an au leh a.
15:14 Tin, Pilata chuan an hnenah, “Enga maw? Engnge a tihsual ni?” a ti a. Nimahsela anniho chu, “Krawsah khengbet rawh,” tiin an au chiam a.
15:15 Tichuan Pilatan mipuiho tihlungawi a duh a, Barabba chu a chhuahsak ta a; tin, Isua chu a vuak zawhin kraws-a khenbeh turin a pe ta a.
15:16 Tin, sipaite chuan in hual chhung kawtlai, Praitorion an tihah chuan amah chu an hruai lut a, an pawla mi zawng zawng an ko khawm a.
15:17 Tichuan puan sen duk an sintir a, hling lukhum an phiar a, an khumtir a.
15:18 Tin, “Chibai, Judate lal!” tiin chibai an buk ta a.
15:19 Tin, a lu-ah chuan luangin an vua a, chil an chhak a, thingthiin chibai an buk a.
15:20 Tin, nuihza siam nan an hman zawhin puan sen duk chu an hlip a, ama puan an sintir leh a, kraws-a khenbeh turin an hruai chhuak ta a.
15:21 Tin, mi veivak pakhat, ram lam ata lo kal, a kraws pu turin an man a – Simona, Kurini khuaa mi, Aleksandra leh Rufa pa chu.
15:22 Tin, Isua chu Golgotha hmunah an hruai a, (chu chu “Lu ruh hmun,” tihna a ni.)
15:23 Tin, uain, murra nena pawlh an pe a, nimahsela a la duh lo va.
15:24 Tin, kraws-ah an khengbet a, an chan theuh tur hriat nan thum vawrin a silhfente chu an insem a.
15:25 Tin, Isua an khenbeh chu fehrehsan lai a ni a.
15:26 Tin, a hekna lehkha a chung lamah an ziak a, “JUDATE LAL” tiin.
15:27 Tin, ama rual chuan suamhmang pahnih an khengbet ve a; a ding lamah pakhat, a vei lamah pakhat.
15:29 Tin, mi vei apiangte chuan an lu thingin “Ehei! nang Pathian biak in thiata ni thuma sa lehtu,
15:30 intidam la, kraws ata kha lo chhuk ta che,” tiin an tiel a.
15:31 Chutiang bawkin puithiam lalte chuan lehkhaziaktute nen anmahni zingah tielin, “Mi dang mah a tidam thin a, mahni a intidam thei si lo.
15:32 Kan hmuha kan rin theih nan, Krista, Israel lal chu, tunah hian kraws ata chu lo chhuk ang hmiang,” an ti a. Tin, ama ruala khenbeh vete chuan ani chu an hau va.
15:33 Tin, chawfak hun a lo nih chuan behliang mun hun thlengin khawvel a lo thim ta vek a.
15:34 Tin, behliang mun hun lai chuan Isua chu aw ring takin, “Eloi, Eloi, lama sabakthani?” tiin a au chhuak a, (chu chu “Ka Pathian, ka Pathian, engah nge mi kalsan?” tihna a ni.)
15:35 Tin, a kianga ding thenkhatte chuan chu chu an hriatin, “Ngai teh u, Elija a ko a ni,” an ti a.
15:36 Tin, mi pakhat a tlan a, spanj uain thura chiah khatin, tiangah a tar a, a han intir a.“Awm rawh se, amah la thla turin Elija a lo kal emaw i en ang u,” a ti a.
15:37 Tin, Isua chu aw ring takin a au va, a thlarau a thlah ta a.
15:38 Tin, Pathian biak in puanzar chu a chung lam atangin a hnuai lam thlengin a lo thler chhuak ta a.
15:39 Tin, a hma zawna sipai za hotu ding chuan a thlarau chutianga a thlah a hmuh chuan, “He mi hi Pathian Fapa a ni ngei mai,” a ti a.
15:40 Tin, hmeichhiate pawh hla taka thlirin an awm a; chung zingah chuan Mari Magdalini te, Mari, Jakoba te leh Josea nu te, Salomi te an tel a,
15:41 (chung chu Galili rama a awm lai a, amah zuia a rawng bawlsak thinte chu an ni), hmeichhe dang tam tak, Jerusalem khuaa ama ruala chho vete chu an tel bawk a.
15:42 Tin, khua a lo tlai lam chuan Inrinni a nih avangin (chu chu Chawlhni hmaa ni hi a ni),
15:43 Josefa, Arimathai khuaa mi, roreltu zahawm, Pathian ram beisei ve mi bawk, a lo kal a, huai takin Pilata hnenah a lut a, Isua ruang chu a dil ta a.
15:44 Tichuan Pilatan chutia a thi ta thuai chu mak a ti hle a, tichuan sipai za hotu chu kovin, a thihna a rei tawh emaw tih a zawt a.
15:45 Tin, sipai za hotu kaa a hriat chuan, a ruang chu Josefa hnenah a pe a.
15:46 Tin, ani chuan puan zai sin a lei a, amah chu a la thla a, puan zai sin chuan a tuam a, thlan, lung kerkuakah a zalh a, thlan kawngkaah chuan lung a lum ta a.
15:47 Tin, Mari Magdalini leh Josea nu Mari chuan an zalhna chu an hmu reng a.
16:1 Tin, Chawlhni chu a lo ral chuan Mari Magdalini te, Mari Jakoba nu te, Salomi te chuan amah hnawih tura an va kal theih nan englo rimtui an lei a.
16:2 Tin, ni sarih ni hmasa berah, zing takah, ni chhuah hnuin thlan chu an va thleng a.
16:3 Tin, “Thlan kawngka ata lung chu tuin nge min lum sawnsak ang aw?” an intih lai mekin,
16:4 an han dak a, lung chu lum sawn sain an hmu ta a, a lian hle si a.
16:5 Tin, thlan chhungah an lut a, tlangval pakhat puan var sin, ding lam panga thu an hmu a; an mangang ta a.
16:6 Tichuan ani chuan an hnenah, “Mangang suh u; Isua, Nazaret mi an khenbeh kha, in zawng a ni awm a, a tho leh ta; hetah a awm tawh lo; en teh u, an zalhna hi!
16:7 Nimahsela kal ula, a zirtirte leh Petera hnenah chuan, ‘Galili ramah in hmaah a kal dawn a; in hnena a sawi ang ngei khan chutah chuan in hmu ang,’ tiin hrilh rawh u,” a ti a.
16:8 Tichuan an lo khurh a, an lo mangan tak avangin, an chhuak a, thlan atang chuan an tlan ta vang vang a; an hlauh avangin tuma hnenah engmah an sawi lo.
16:9 Tin, ni sarih ni hmasa ber zinga a thawhleh chuan Mari Magdalini, a kawchhung ata ramhuai pasarih a hnawh chhuaha hnenah khan a inlar hmasa ber a.
16:10 Tin, ani chu Isua awmpui thinte hnenah a va kal a, mitthi ngaia an tap lai chu a hrilh ta a.
16:11 Nimahsela anni chuan a nung leh a, hmuh pawh a hmu tih an hre na a, an awi si lo.
16:12 Tin, chu mi hnuah chuan an zinga mi pahnih ram lam pana an kal laiin hmel danglam puin an hnenah a inlar leh a.
16:13 Tin, anni chuan zirtir dangte an va hrilh a, anni thu pawh chu an awi chuang lo.
16:14 Tin, chu mi hnu lehah chuan chaw an kil laiin sawm leh pakhatte hnen ngeiah a inlar a, a thawhleh hnua a hmutute thu chu an awi loh avangin an rin loh leh an thinlung sak kawngah chuan a zilhhau ta a.
16:15 Tin, an hnenah, “Khawvel zawng zawngah kal ula, thil siam zawng zawng hnenah chuan Chanchin Tha hi hril rawh u.
16:16 A ringa baptisma chang chu chhandamin an awm ang a; a ring lo erawh chu thiam loh changin an awm ang.
16:17 Tin, heng chhinchhiahnate hian ringtute chu a zui zel ang: Ka hmingin ramhuaite an hnawt chhuak ang a, tawng thartein an tawng ang a;
16:18 rulte kutin an la ang a; thihna tur engpawh in mah sela engmah an ti lo vang a; damlote chungah an kut an nghat ang a, an dam zel ang,” a ti a.
16:19 Chutichuan, Lal Isua chu, an hnena thu a sawi zawh chuan vana hruai chhohvin a awm a. Pathian ding lamah a han thu ta a.
16:20 Tichuan anni chu an kal chhuak a, ram tinah thu an hril ta a, Lalpan anmahni a thawhpui a, a zuitu chhinchhiahnate chuanin thu chu a tinghet zel a. Amen.
posted by zoblog @ 11:37 AM  
0 Comments:
Post a Comment
<< Home
 
About

Name: zoblog
Home:
About Me:
See my complete profile
Previous Post
Archives
Mizo Websites
:bloremizo::buannel::chhawkhlei: :Dmzp::fartuah::hyderabadmizo: :khampat::lawrkhawm::lelte: :misual::mizobooks::mzbloggers: :mizomethodist::mizoramhouse: :mizoramuniversity::mizoserver: :mizoweaving::mumbaimizo: :samaw::sinlungnews::zawlbuk: :zomireunification::zonet::zoram: :zotalk:
© MIZO CLAN by Mizoclan Blog