| Wednesday, September 12, 2007 |
1:1 ,2 Kha thil kan zinga lo thleng, atir ata a hmutute leh thu rawngbawltuten keimahni min hrilh ang khan, mi tam takin ziak an tum ta a;
1:2 ,1 Kha thil kan zinga lo thleng, atir ata a hmutute leh thu rawngbawltuten keimahni min hrilh ang khan, mi tam takin ziak an tum ta a;
1:3 chuvangin Theophil tha ber, a bul ata engkim fel takin ka chhui a, indawt zelin i tan ziak ila a tha ang, ka ti a ni;
1:4 hmana thu an zirtir che kha dik tak a ni tih i hriat theih nan.
1:5 Judai ram lal Heroda a dam laiin, Abija pawla mi a hming Zakaria puithiam pakhat a awm a; chu mi chuan Arona thlah zinga mi nupuiah a nei a, a hming chu Elizabeti a ni.
1:6 An pahnihin Pathian mithmuhin fel takin an awm a, sawiselbovin Lalpa thupek leh a dan zawng zawng zawmin an awm thin.
1:7 Nimahsela Elizabeti a chin avangin fa an nei lo, an pahnihin upa tak an ni si a.
1:8 Tin, heti hi a ni a, a pawlte tih dan ang zela Pathian hmaa puithiama a chet laiin,
1:9 puithiam dan angin Lalpa biak ina luh leh englo rimtui hal a chang a.
1:10 Tin, englo rimtui hal hun laiin mipui chu an zain pawnah an tawngtai a.
1:11 Tin, Lalpa vantirhkoh pakhat englo rimtui halna maicham ding lama dingin a hnenah a inlar a.
1:12 Tin, Zakarian a hmuh veleh a mangang a, hlauh pawh a hlau va.
1:13 Nimahsela vantirhkoh chuan a hnenah, “Zakari, hlau suh, i dil kha a hria asin, i nupui Elizabetin fapa a hrinsak ang che, a hmingah Johana i sa tur a ni.
1:14 Tin, nang i hlimin i lawm ang a; amah a pianin mi tam tak an lawm bawk ang.
1:15 Lalpa ngaihin mi lian a ni ang a, uain leh zu reng reng a in loving; a nu pum chhung atang rengin Thlarau Thianghlimin a lo khat ang.
1:16 Israela thlahte tam tak Lalpa an Pathian hnen lamah a hawitir leh ang.
1:17 Tin, pate thinlung chu fate lama hawitir tur te, mi tihmawhte chu mi fel tak finna lama hawitir tur te, Lalpa tana mi lo inpeih tur tea buatsaih turin Elija rilru leh a thiltihtheihna puin Lalpa hmaan a kal ang,” a ti a.
1:18 Tin, Zakarian vantirhkoh hnenah chuan, “Chu chu engtin nge ka hriat ang? kei putar ka ni a, ka nupui pawh pitar a ni si a,” a ti a.
1:19 Tin, vantirhkoh chuan a chhang a, a hnenah, “Gabriela, Pathian hmaa ding thin ka ni a; a be tur che leh, chung thu tha chu hrilh tur chein rawn tirh ka ni.
1:20 Ngai rawh, ka thu sawite a hun taka lo thleng tur chu i awi loh avangin chung thil chu a lo thlen hma loh zawng i ngawi reng ang a, tawng pawh i tawng thei lo vang,” a ti a.
1:21 Tin, vantlangho chuan Zakaria chu an lo nghak a, Pathian biak in chhunga a awm rei avang chuan mak an ti hle a.
1:22 Tin, a lo chhuah chuan an hnenah thu a sawi thei ta lo va; tichuan biak inah thlarau inlar a hmu a ni tih an hre ta a; tin, an hnenah a zaizir fo va, tawng thei lovin a awm ta reng a.
1:23 Tin, heti hi a ni a, a rawngbawlna hun ni bi chu a kim veleh chuan a inah a haw ta a.
1:24 ,25 Tin, chu mi hnuah chuan a nupui Elizabeti chu a lo rai ta a, “Mi hnena ka hming chhia chhilh nan Lalpan mi hmuhin heti hian mi tihsak ta,” tiin thla nga a biru a.
1:25 ,24 Tin, chu mi hnuah chuan a nupui Elizabeti chu a lo rai ta a, “Mi hnena ka hming chhia chhilh nan Lalpan mi hmuhin heti hian mi tihsak ta,” tiin thla nga a biru a.
1:26 Tin, a thla ruknaah chuan Pathianin vantirhkoh Gabriela chu Galili rama khaw pakhat Nazaret an tihah chuan, nula thianghlim pakhat hnenah a tir a,
1:27 chu nula chu Davida thlaha mi a hming Josefa nupui hual a ni a; nula hming chu Mari a ni.
1:28 Tin, vantirhkoh chu a hnenah a lut a, “Chibai, Vohbik! Lalpa i hnenah a awm,” a ti a.
1:29 Tin, chu mi thusawi avang chuan a mangang ta em em a, “Engtiziaa chibai mi buk nge ni ang?” tiin a inngaihtuah a.
1:30 Tin, vantirhkoh chuan a hnenah, “Mari, hlau suh; Pathian ngaihsakzawng i ni e.
1:31 Ngai rawh, i rai ang a, fapa i hring ang a, a hmingah chuan Isua i sa tur a ni.
1:32 Ani chu mi lian a la ni ang a, Chungnungbera Fapa an ti ang; Lal Pathianin a hnenah a thlahtu Davida thutphah chu a pe ang a;
1:33 Jakoba thlahte chungah chatuanin a lal ang a, a ramin kin ni a nei lo vang,” a ti a.
1:34 Tin, Marin vantirhkoh hnenah chuan, “Chung chu engtin nge ni ang? mipa ka nei si lo,” a ti a.
1:35 Tin, vantirhkoh chuan a chhang a, a hnenah, “Thlarau Thianghlim i chungah a lo thleng ang a, Chungnungbera thiltihtheihnain a hliahkhuh ang che; chuvangin mi thianghlim lo piang tur pawh chu Pathian Fapa an ti ang.
1:36 Tin, ngai teh, i lichinnu Elizabeti pawhin a tar hnuin mipa a pai ta; a ching an tih thin kha, tun thla hi a thla rukna a ni tawh.
1:37 Pathian thu chhuak reng reng thil tithei lovin a awm lo vang,” a ti a.
1:38 Tin, Marin, “Ngai teh, Lalpa bawinu ka ni, i thu ang zelin ka chungah thleng rawh se,” a ti a. Tin, vantirhkoh chuan a kalsan ta a.
1:39 Chung lai chuan Mari chu a tho va, thingtlangah, Judai rama khaw pakhatah chuan a kal ta thuai a;
1:41 tin, Zakaria inah a lut a, Elizabeti chibai a buk a.
1:41 Tin, heti hi a ni a, Elizabetin Mari chibai buk chu a hriat veleh, a pum chhunga naute chu a che a; tin, Elizabeti chu Thlarau Thianghlimin a lo khat ta a;
1:42 tin, aw ring takin a au va, “Nang chu hmeichhia azawnga engthawl i ni, i rila rah pawh a engthawl a ni.
1:43 Ka Lalpa nu, ka hnena i lo kal hi engtizia nge ni le?
1:44 Ngai teh, i chibai buk thawm ka benga a luh veleh, a lawm avangin naute ka pum chhungah a che a ni.
1:45 A ringnu pawh a eng a thawl a ni, a hnena Lalpain thu a sawi kha a thleng dawn si a,” a ti a.
1:46 Tin, Marin, “Ka nun hian Lalpa a chawimawi e,
1:47 Ka thlarau pawh mi chhandamtu Pathian chungah a lawm ta em em a.
1:48 A bawinu hnam tlawmzia a hmu a, a khawngaih a; Ngai rawh, tun achinah thangthar zawng zawngin nihlawh mi ti dawn a ni.
1:49 Mi chak khan ka chungah thil ropui tak mi tihsak a, A hming pawh a thiang hlim a ni.
1:50 A tihtute chu thangthar thlengin a khawngaih zel thin.
1:51 A banin a tha chakzia a entir a, Mi chapote chu an inngaihtuahnain a tidarh ta a.
1:52 An thutphaha lal thute chu a hnuk thla a. Hnam tlawmte chu a chawimawi ta a.
1:53 Riltamte chu thil tha takin a tipuar a, Hausate chu kutruakin a kal botir ta a.
1:54 Kan thlahtute hnena a sawi ang khan,
1:55 Abrahama leh a thlahte chu chatuana a khawngaih turzia hriat reng nan, A chhiahhlawh Israelte chu a chhawmdawl ta a,”a ti a.
1:56 Tin, Mari chu thla thum lai a hnenah a awm a, a in lamah a haw leh ta a.
1:57 Tin, Elizabeti nau hrin chu a lo hun ta a; tichuan fapa a rawn hring a.
1:58 Tin, a vengte leh a laichinte chuan Lalpan a khawngaih em em tih an lo hria a, an lawmpui a.
1:59 Tin, heti hi a ni a, a ni riat niah chuan nausen serh tan turin an lo kal a; a hmingah a pa hming vek zakaria bawk sak an tum a.
1:60 Tin, a nu’n, “Ni lo ve, ani zawng Johana sak zawk tur a ni,” a ti a, a chhang a.
1:61 Tin, annin a hnenah, “I laichinte zingah he hming pu hi tumah an awm hlei nem,” an ti a.
1:62 Tin, a pa hnenah chuan zaizirin, “a hmingah engnge sa ila i duh?” an ti a.
1:63 Tin, lehkha ziakna phek a dil a, “A hming Johana a ni e,” tiin a ziak a. Tin, an zain mak an ti hle a.
1:64 Tin, chawplehchilhin a ka leh a lei chu a lo inphelh a, Pathian fakin a lo tawng chhuak ta nghal a.
1:65 Tin, an vela awmte zawng zawng chuan an hlau ta a. Tin, chung thu chu Judai ram thingtlang zawng zawngah a thang vel ta a.
1:66 Tin, a hria apiangin an rilruah lungkhamah an nei a, “Chu nausen chu engtin tak la awm ang maw?” an ti a; Lalpa kutin amah a tanpui si a.
1:67 Tin, a pa Zakaria chu Thlarau Thianghlimin a lo khat a, a sawi lawk a,
1:68 “Lalpa, Israela Pathian chu fakin awm rawh se, A mite chu a rawn tlawh a, tlanna a siamsak a,
1:69 A chhiahhlawh Davida chhungte zingah chuan Chhandamna ropui tak min siamsak a;
1:70 (Leilung pian tirh ata a zawlnei thianghlimte kaa a sawi ang khan)
1:71 Kan dote lakah leh min hawtute zawng zawng laka chhandamna chu;
1:72 Kan thlahtute khawngaih nan leh A thuthlung thianghlim hriat reng nan;
1:73 Kan thlahtu Abrahama hnenah chhia a chham kha,
1:74 ,75 Kan dote lakah kan him a,Kan dam chhung zawng a mithmuha thianghlim leh fel taka awm a,Hlau lova a rawng min bawltir tur thu kha.
1:75 ,75 Kan dote lakah kan him a,Kan dam chhung zawng a mithmuha thianghlim leh fel taka awm a,Hlau lova a rawng min bawltir tur thu kha.
1:76 A ni, Taite, nang hi Chungnungbera zawlnei an ti ang che; A kawngte siam turin Lalpa hmaah i kal dawn si a;
1:77 Kan Pathian thinlunga khawngaihna avangin
1:78 An sualte ngaihdam nan A mite hnenah chhandamna thu hriattir turin. Chu mi avang chuan chung lam atangin ni chhuakin min rawn tlawh ang,
1:79 Thim zingah leh thihna hlima thute en tur leh Thlamuanna kawnga kan ke pentir turin,” a ti a.
1:80 Tin, nausen chu a lo thang lian deuh deuh va, a rilru lam a lo nghet ta telh telh a, Israelte hnena a rawn inlar hma loh zawng thlalerah a awm reng a.
2:1 Tin, chung lai chuan heti hi a ni a, Kaisara Augustan khawvel zawng zawng hming ziak tur thu a pe a.
2:2 (chu chu Suria rama Kurinia, Ram Awptu a nih laia hming ziak hmasa ber chu a ni).
2:3 Tichuan mi zawng zawng chu an hming ziak turin anmahni khua theuhvah an kal a.
2:4 ,5 Tin, Josefa pawh, Davida chhungte leh a thlah a nih avangin, Galili rama Nazaret khua atangin, Mari a nupui hual rai teuh chung nen chuan hming ziak turin, Judai rama Davida khua Bethlehem an tihah chuan an kal ta a.
2:5 ,4 Tin, Josefa pawh, Davida chhungte leh a thlah a nih avangin, Galili rama Nazaret khua atangin, Mari a nupui hual rai teuh chung nen chuan hming ziak turin, Judai rama Davida khua Bethlehem an tihah chuan an kal ta a.
2:6 Tin, heti hi a ni a, chuta an awm laiin a hrin a lo hun ta a.
2:7 Tin, a fa tirah mipa a hring a; puanin an tuam a, khualbuka an len ve tak loh avangin ran chaw pekna thlengah a muttir a.
2:8 Tin, chu mi ram vekah chuan beram vengtute an awm a, zanah an beramho an veng a, phulah an riah chilh a.
2:9 Tin, Lalpa vantirhkoh pakhat an kiangah a lo ding a, Lalpa ropuinain an vel chu a rawn chhun eng a; tichuan an hlau ta em em a.
2:10 Tin, vantirhkoh chuan an hnenah, “Hlau suh ulang, ngai rawh u, mi tin ta tur chanchin tha lawmawm em em ka rawn thlen che u a ni.
2:11 Vawiinah hian in tan Davida khuaah Chhandamtu a piang ta, Lal Krista chu.
2:12 Tin, hei hi in tan chhinchhiahna tur a ni; nausen puana tuam, ran chaw pekna thlenga mu in hmu ang,” a ti a.
2:13 Tin, thawklehkhatah vantirhkoh hnenah chuan vana miho mipui an lo awm ta chiam a, Pathian an fak a.
2:14 “Chungnung brah Pathian ropui takin awm rawh se, Lei chunga a awm em em mihringte hnenah rem thu leng rawh se,” an ti a.
2:15 Tin, heti hi a ni a, vantirhkohte chuan vana an kalsan veleh, beram vengtute chuan, “Tunah Bethlehem khaw thlengin kal ila, Lalpan thu min hrilh lo thleng chu i en ang u,” an inti a.
2:16 Tichuan an kal thuai thuai a, Mari nen, Josefa nen, ran chaw pekna thlenga nausen mu nen chuan an hmu a.
2:17 Tin, an va hmuh chuan nausen chanchin thu vantirhkohvin a hrilh kha an sawi vel a.
2:18 Tin, a hria apiang chuan beram vengtute thusawi chu mak an ti hle a.
2:19 Mari erawh chuan thusawi zawng zawng chu a rilruin a ngaihtuah a, a vawng reng a.
2:20 Tin, beram vengtute chuan vantirhkoh hrilh ang ngeia engkim an hmuha an hriat avangin, Pathian chawimawi leh fak chung zelin an kir leh ta a.
2:21 Tin, a serh tanna tur ni riat a lo tlin chuan a hmingah chuan, chhula a awm hma renga vantirhkohvin a sak tawh sa, Isua an sa a.
2:22 ,23,24 Tin, Mosia dan anga an inthen ni a lo thlen chuan, ani chu (Lalpa Dan thua, “Mipa fa chhul keu apiang chu Lalpa tana ruat an ti ang,” tia ziak ang khan) Lalpa hnena hlan tur leh, Lalpa Dan thua ziak angin thuro tuak khat emaw, parva no pahnih emaw talh turin Jerusalem khuaah an han hruai a.
2:23 ,22,24 Tin, Mosia dan anga an inthen ni a lo thlen chuan, ani chu (Lalpa Dan thua, “Mipa fa chhul keu apiang chu Lalpa tana ruat an ti ang,” tia ziak ang khan) Lalpa hnena hlan tur leh, Lalpa Dan thua ziak angin thuro tuak khat emaw, parva no pahnih emaw talh turin Jerusalem khuaah an han hruai a.
2:24 ,23,22 Tin, Mosia dan anga an inthen ni a lo thlen chuan, ani chu (Lalpa Dan thua, “Mipa fa chhul keu apiang chu Lalpa tana ruat an ti ang,” tia ziak ang khan) Lalpa hnena hlan tur leh, Lalpa Dan thua ziak angin thuro tuak khat emaw, parva no pahnih emaw talh turin Jerusalem khuaah an han hruai a.
2:25 Tin, ngai teh, Jerusalem khuaah chuan mi pakhat a hming Sumeona a awm; chu mi chu mi fel tak leh Pathian ngaihsak tak a ni a, Israelte thlamuantu tur chu a nghak reng a, a chungah Thlarau Thianghlim a awm a.
2:26 Tin, Lalpa Krista chu a hmuh hma loh chuan a thi lo vang tih Thlarau Thianghlimin a lo hriattir tawh reng a.
2:27 Tin, Thlarau hriattirin Pathian biak inah chuan a va lut a; nausen Isua chu a nu leh a pain Dan pangngai anga a chunga tihsak tura an rawn hruai luh lai chuan,
2:28 ani chuan a lo kuangkuah a, Pathian a fak a.
2:29 “Lalpa, tunah, i thu ang zelin I bawi hi thlamuang takin I kaltir dawn a;
2:30 I chhandamna mi tin hmuha i siam kha
2:31 Ka mitin a hmu ta e;
2:32 Jentailte hnena i eng puang chhuak tur leh I mi Israelte ropuina tur chu,” a ti a.
2:33 Tin, nausen thu a sawi chu a nu leh a pa chuan mak an ti hle a.
2:34 Tin, Sumeonan anni chu mal a sawm a, a nu Mari hnenah, “Ngai rawh, he naupang hi Israel zinga mi tam tak tiral tur leh din chhuahtir tura ruat a ni, miin an sawisel tur chhinchhiahna nen –
2:35 a ni, nanga thinlung pawh ngunhnamin a la chhun tlang ang – mi tam takin an thinlunga an ngaihtuahte chu a lan nan,” a ti a.
2:36 Tin, mi pakhat, a hming Anni, zawlnei, Phanuela fanu, Asera hnama mi a awm a, (ani chu tar tak a ni a, a tawn tirh pasal hnenah kum sarih a awm a,
2:37 tin, kum sawmriat leh kum li zet a hmeithai a,) ani chuan Pathian biak in kalsan lovin achhun azanin chaw ngheitea tawngtaiin Pathian a be thin.
2:38 Tin, chu mi lai tak chuan ani chu a lo kal a, Pathian hnenah lawmthu a sawi a, Jerusalem khaw tlan beisei apiangte hnenah chuan Isua chanchin a sawi bawk a.
2:39 Tin, Lalpa dan ang zela thil zawng zawng an tih zawhin, Galili rama anmahni khua Nazaret-ah chuan an haw leh ta a.
2:40 Tin, nausen chu a lo sei lian deuh deuh va, a lo chak telh telh a, finin a khat ta a, Pathian khawngaihna a chungah a awm bawk a.
2:41 Tin, kum tinin, Kalhlen Kut hunin a nu leh a pa chu Jerusalem khuaah chuan an kal thin a.
2:42 Tin, ani chu kum sawm leh kum hnih a nihin kut dan pangngaiin an han kal a;
2:43 tin, an tiak a, an haw laiin naupang Isua chuan Jerusalem khuaah a awm san a; a nu leh a pa chuan an hre si lo va.
2:44 Chutichuan an pawl zingah a awm emaw an ti a, ni khat an kal hman a, an laichinte leh an hmelhriatte zingah an zawng a.
2:45 Tin, an hmuh loh avangin zawng chung zelin Jerusalem khuaah an kir leh ta a.
2:46 Tin, heti hi a ni a, ni thum chinah chuan Pathian biak inah, zirtirtute zinga thua an thu lo ngaithlaa lo zawtin an hmu ta a.
2:47 Tin, a thu hria apiang chuan a hriatzia leh a chhanzia chu mak an ti hle a.
2:48 Tin, a nu leh a pa chuan amah chu an hmuhin mak an ti hle a; tichuan a nuin a hnenah, “Ka fa, engati nge hetia min tih? Ngai teh, i pa leh keiin thlaphang takin kan zawng che a ni,” a ti a.
2:49 Tin, ani chuan an hnenah, “Engah nge mi zawn ni? ka Pa ina ka awm tur in hre lo vem ni?” a ti a.
2:50 Tin, an hnena a thusawi chu a ngaihna an hre lo va.
2:51 Tin, an hnenah a kal thla a, Nazaret khua chu a zu thleng a, an thu zawmin a awm a. Tin, a nu chuan chung thil zawng zawng chu a rilruah a vawng reng a.
2:52 Tin, Isua chu a fing deuh deuh va, a lo lian telh telh a, Pathian leh mihring duhsakin a awm deuh deuh va.
3:1 Tin, Tiberia Kaisara a lal achin kum sawm leh kum nga kumah (Pontia Pilata chu Judai Ram awptu a ni a, Heroda chu Galili ram lal a ni a, a unau Philipa chu Iturea leh Trakonitis ram lal a ni a, Lusania chu Abilene ram lal a ni a,
3:2 Ana leh Kaiapha chu Puithiam Lalberte an ni a.) thlalerah Zakaria fapa Johana nenah chuan Pathian thu a lo thleng a.
3:3 Tin, ani chu Jordan lui kam vel ram tinah a kal a, thil tihsual ngaihdam nan simna baptisma thu a hril zel a;
3:4 zawlnei Isaia thu buah “Thlalera mi au rawl chuan, ‘Lalpa lamlian sial ula A kawngte tingil rawh u,
3:5 Kawr tin chhun khah a ni vek ang a, Tlang tin, mual tin, tihhniam a ni bawk ang; Kawng kawite a lo ngil ang a,Kawng bumbohte a lo rual bawk ang;
3:6 Tin, mi zawng zawngin Pathian chhandamna chu an hmu ang,’ a ti,” tih ziak ang kha.
3:7 Tin, ani chuan baptisma chang tura a hnena mipui lo chhuakte hnenah chuan, “Rul thlahte u, thinur lo thleng tur hi tlansan turin tuin nge zilh che u?
3:8 Chutichuan sim hming pu tlakin rah rawh u, ‘Abrahama kan thlahtu a ni alawm’ in rilruin ti mai suh ang che u; Pathianin heng lungte hi Abrahama thlahahte a dintir thei e, ka tih che u hi.
3:9 Tun apangin thing bul tinah hreipui an dah ta, chutichuan thing tin rah thaa rah lo apiang an kit a, meiah an paih thin,” a ti a.
3:10 Tin, mipuite chuan a hnenah, “Engnge kan tih tur le?” an ti a, an zawt a.
3:11 Tin, ani chuan an hnenah, “Tupawh kawr pahnih nei chuan a nei lo hnenah pe rawh se; tupawh ei nei chuan chutiang bawkin ti rawh se,” a ti a, a chhang a.
3:12 Tin, chhiahkhawntute pawh baptisma chang turin an lo kal a, a hnenah, “Zirtirtu, engnge kan tih tur?” an ti a.
3:13 Tin, ani chuan an hnenah, “An relsak ang che u aliam chu va phut suh u,” a ti a.
3:14 Tin, sipaite pawhin a hnenah, “Keini pawhin engnge kan tih tur?” an ti a, an zawt a. Tin, ani chuan an hnenah,“Tumah tiduhdahin va hek suh u; in hlawh tawk apiangah lungawi rawh u,” a ti a.
3:15 Tin, mitten an beisei a, mi zawng zawngin Johana chung thu an thinlung ah, “Krista a lo ni mial dah law maw?” tia an ngaihtuah laiin,
3:16 Johana chuan a chhang a, an zaa hnenah, “Kei zawngin tuiin ka baptis thin che u a; nimahsela keimah aia mi ropui a lo kal dawn e,a pheikhawk hrui phelh tlak pawh ka ni love,ani chuan Thlarau Thianghlim leh meiin a baptis ang che u,
3:17 a kutin a sisep a keng a, a hrui zah fai hliauna tur leh a zema a buh khungna turin; a si erawh chu mei mit thei lovin a halral ang,” a ti a.
3:18 Tin, fuihna thu dang tam takin mite hnenah Chanchin Tha a hril thin a.
3:19 Nimahsela, lal Heroda chu a nau nupui Herodi chung thu-ah leh a thil tihsual zawng zawng chungah chuan Johanan a zilhhau avangin
3:20 a thil tihsual zawng zawng belhchhahin ani chu tan inah a khung ta a.
3:21 Tin, heti hi a ni a, mi zawng zawngin baptisma an chan zawhin, Isua pawhin baptisma a chang a, a tawngtai a, van a lo inhawng a,
3:22 Thlarau Thianghlim chu taksa puin thuro angin a lo chhuk a, a chungah a fu ta a; tin, van atangin aw a lo chhuak a, “Nang ka fapa duh tak i ni; i chungah ka lawm em em e,” a ti a.
3:23 Tin, Isuan a zirtir tantirh lai khan amah chu kum sawmthum lai a ni tawh, mi ngaih chuan Josefa fapa a ni a. Chumi chu Helia fa a ni a,
3:24 chu mi chu Matthata fa a ni a, chu mi chu Levia fa a ni a, chu mi chu Melkia fa a ni a, chu mi chu Janna fa a ni a, chu mi chu Josefa fa a ni a,
3:25 chu mi chu Mattathia fa a ni a, chu mi chu Amoia fa a ni a, chu mi chu Nahuma fa a ni a, chu mi chu Eslia fa a ni a, chu mi chu Nggaia fa a ni a,
3:26 chu mi chu Maatha fa a ni a, chu mi chu Mattathia fa a ni a, chu mi chu Semeia fa a ni a, chu mi chu Joseka fa a ni a,chu mi chu Joda fa a ni a .
3:27 chu mi chu Joana fa a ni a, chu mi chu Hrisa fa a ni a, chu mi chu Zerubabela fa a ni a, chu mi chu Salathiela fa a ni a, chu mi chu Neria fa a ni a,
3:28 chu mi chu Melkia fa a ni a, chu mi chu Addia fa a ni a, chu mi chu Kosama fa a ni a, chu mi chu elmadama fa a ni a, chu mi chu Era fa a ni a,
3:29 chu mi chu Isua fa a ni a, chu mi chu Eliezara fa a ni a, chu mi chu Jorima fa a ni a, chu mi chu Matthata fa a ni a, chu mi chu Levia fa a ni a,
3:30 chu mi chu Sumeona fa a ni a, chu mi chu Juda fa a ni a, chu mi chu josefa fa a ni a, chu mi chu Jonama fa a ni a, chu mi chu Eliakima fa a ni a,
3:31 chu mi chu Melea fa a ni a, chu mi chu Menna fa a ni a, chu mi chu Mattatha fa a ni a, chu mi chu Nathana fa a ni , chu mi chu Davida fa a ni a,
3:32 chu mi chu Jesaia fa a ni a, chu mi chu Obeda fa a ni a, chu mi chu Boaza fa a ni a, chu mi chu Salmona fa a ni a, chu mi chu Nasona fa a ni a,
3:33 chu mi chu Aminadaba fa a ni a, chu mi chu Arama fa a ni a, chu mi chu Esroma fa a ni a, chu mi chu Pharesa fa a ni a, chu mi chu Juda fa a ni a,
3:34 chu mi chu Jakoba fa a ni a, chu mi chu Isaaka fa a ni a, chu mi chu Abrahama fa a ni a, chu mi chu Tera fa a ni a, chu mi chu nahora fa a ni a,
3:35 chu mi chu Seruga fa a ni a, chu mi chu Reuva fa a ni a, chu mi chu Pelega fa a ni a, chu mi chu Ebera fa a ni a, chu mi chu Sela fa a ni a,
3:36 chu mi chu Kainana fa a ni a, chu mi chu Arpaksada fa a ni a, chu mi chu Sema fa a ni a, chu mi chu Nova fa a ni a, chu mi chu Lameka fa a ni a,
3:37 chu mi chu Mathusela fa a ni a, chu mi chu Enoka fa a ni a, chu mi chu Jareda fa a ni a, chu mi chu Mahalalela fa a ni a, chu mi chu Kainana fa a ni a,
3:38 chu mi chu Enosa fa a ni a, chu mi chu Setha fa a ni a, chu mi chu Adama fa a ni a, chu mi chu Pathian fa a ni a.
4:1 ,2 Tin, Isua chu Thlarau Thianghlimin a khat a, Jordan lui atangin a kir leh a, diabola thlem chungin thlalerah ni sawmli Thlarau hruaiin a awm a.
4:2 ,1 Tin, Isua chu Thlarau Thianghlimin a khat a, Jordan lui atangin a kir leh a, diabola thlem chungin thlalerah ni sawmli Thlarau hruaiin a awm a.
4:3 Tin, chung ni chuan engmah a ei lo; tin, a tawpah chuan a ril a lo tam ta a. Tin, diabola chuan a hnenah, “Pathian Fapa i nih chuan he lung hi chhanga chang turin thu pe rawh,” a ti a.
4:4 Tin, Isuan a hnenah, “ ‘Mihring hi chhang chauhvin an nung lo vng,’ tih ziak a ni,” a ti a, a chhang a.
4:5 Tin, a hruai chho va, mit khap kar lovah khawvel ram zawng zawng a entir a.
4:6 Tin, diabola chuan a hnenah, “Heng zawng zawng chunga thuneihna leh a ropuina hi ka pe ang che; ka hnena pek a ni tawh si a, ka duh apiang hnenah ka pe bawk thin a ni.
4:7 Chutichuan chibai mi buk la, a zain i ta a ni vek ang,” a ti a.
4:8 Tin, Isuan a hnenah, “ ‘Lalpa i Pathian chibai buk la, ama rawng chauh bawl rawh,’ tih ziak a ni,” a ti a, a chhang a.
4:9 Tin, diabola chuan Jerusalem khuaah a hruai a, Pathian biak in chip zumah chuan a dah a, tin, a hnenah, “Pathian Fapa I nih chuan heta tang hian tla thla rawh;
4:10 ‘Nangmah humhim tur chein I chung thu-ah zawng A vantirhkohte chu thu a pe ang,’ tih leh,
4:11 ‘An kutin an dawm ang chia Chutilochuan i kein lung i chhuih hlauh dah ang e,’Tih ziak a ni si a,” a ti a.
4:12 Tin, Isuan a hnenah, “ ‘Lalpa i Pathian fiah suh,’ tih a ni e,” tiin a chhang a.
4:13 Tin, diabolan a thlemna tur tinrenga a thlem zawh chuan a remchan hun atan a kalsan ta a.
4:14 Tin, Isua chu Thlarau thiltihtheihna puin Galili ramah a haw leh ta a; tin, a chanchin chu, chu mi vel ram tinah chuan a thang ta a.
4:15 Tin, an inkhawmna inahte a zirtir zel a, mi zawng zawng fakin a awm a.
4:16 Tin, a sei lenna khua Nazaret chu a lo thleng a; tin, Chawlhnia a tih dan pangngaiin inkhawmna inah a lut a, chhiar turin a ding a.
4:17 Tin, zawlnei Isaia lehkhabu chu a hnenah an pe a. Tin, lehkhabu zial chu a phelh a, he thu ziakna lai hi a chhar a,
4:18 “Riangvaite hnenah Chanchin Tha hril tura mi ruat avangin Lalpa Thlarau chu ka chungah a awm; Ani chuan salte hnena chhuahna thu leh, Mitdelte hnena mitvar neih lehna thu sawi tur te, Tihduhdah tuarte chhuahtirna tur te,
4:19 Lalpa lungawi kum thu sawi tur tein, Mi tir a ni,” tih hi.
4:20 Tin, lehkhabu chu a zial a, rawngbawltu a pe leh a, a thu ta a. Tin, inkhawmna ina mi zawng zawng mit chu a chungah a fu a.
4:21 Tin, an hnenah, “He Pathian Lehkha Thu hi vawiinah hian in hriatah a lo thleng ta,” tiin a sawi tan a.
4:22 Tin, an zain amah an fak a, a kam chhuak kawngaih thute chu mak an ti hle a. Tin, “He mi hi Josefa fapa a ni lo vem ni?” an ti a.
4:23 Tin, ani chuan an hnenah, “Nangnin he tehkhin thu hi, ‘Daktawr, nangmah intidam rawh,’‘Kapernaum khuaa i thiltih kan lo hriat apiang kha, hetah nangma khaw lamah pawh hian ti rawh,’ tiin min la hrilh dawn ngei nak hi,” a ti a.
4:24 Tin, amah vekin, “Tih tak meuhvin ka hrilh a che u, zawlnei tumah mahni khaw lama miin an lawm ngai lo.
4:25 Chutichuan dik takin ka ti a che u, Elija dam laia kum thum leh thla ruk van a pin a, khawvela tam nasa tak a lo tlak khan, Israel ramah hmeithai tam tak an awm a;
4:26 nimahsela an zingah tuma hnenah Elija tirh a ni lo va, Sidon ram lama Sarepta khuaa hmeichhe pakhat hmeithai hnenah chauh tirh a ni zawk kha.
4:27 Tin, zawlnei Elisa dam lai pawh khan Israel ramah phar tam tak an awm a; nimahsela an zingah tumah tihthianghlimin an awm lo va, Naamana, Suria rama mi chauh tihthianghlimin a awm tak zawk kha,” a ti a.
4:28 Tin, inkhawmna ina mi zawng zawng chuan chung thu chu an hriat veleh, an lo thinur em em a,
4:29 an tho hlawm a, khua ata chu an nam chhuak a, paih thlak turin an khaw awmna kham kovah chuan an hruai ta a.
4:30 Nimahsela ani chu an karah a kal tlang a, a kal ta zel mai a.
4:31 Tin, Galili rama khaw pakhat, Kapernaum-ah chuan a zuk kal ta a. Tin, Chawlhniin mite a zirtir a;
4:32 tin, thu nei taka a sawi avangin a thu zirtir chu mak an ti hle a.
4:33 Tin, inkhawmna inah chuan ramhuai bawlhhlawh thlarau pai mi pakhat a lo awm a; ani chu aw ring takin
4:34 “A! Nazaret Isu, keini leh nang engnge kan inzawlna awm? min tiboral turin i lo kal em ni? Nang ka hria a che, Pathian Mi Thianghlim i ni e,” tiin a au chhuak a.
4:35 Tin, Isuan a hau va, “Ngawi la, a chhung ata lo chhuak rawh,” a ti a. Tin, ramhuai chuan a laiah a titlu zet a, tina lovin a chhung ata chu a lo chhuak ta a.
4:36 Tin, an zain mak an ti hle a, “Hei hi eng thu nge ni le? Thu nei tak leh thil tithei takin ramhuai bawlhhlawhte thu a pe a, an chhuah hi,” tiin an inbia a.
4:37 Tin, chu mi vel ram khaw tinah a chanchin a thang ta a.
4:38 Tin, a tho va, inkhawmna in ata chu a chhuak a, Simona inah a lut ta a. Tin, Simona nupuia nu chu nasa takin a khua a lo sik a, tichuan a tan an lo ngensak a.
4:39 Tin, a kiangah a ding a, khawsik chu a hau va, a reh ta a; tin, a tho ta nghal a, an rawng a bawlsak ta a.
4:40 Tin, ni tlak dawn laiin natna hrang hranga na, dam lo nei apiangin a hnenah an rawn hruai a; tin, an zaa chungah chuan a kut a nghat theuh va, a tidam ta zel a.
4:41 Tin, ramhuaite pawh, “Pathian Fapa i ni,” tia auvin mi tam tak kawchhung ata an lo chhuak a. Tin, anmahni a hau va, Krista a ni tih an hriat avangin an tawng a phal lo.
4:42 Tin, khawvar veleh a chhuak a, thlaler hmunah a kal a, tin, mipuite chuan an zawng a, a hnenah an lo kal a, anmahni a kalsan loh nan chelh an tum a.
4:43 Nimahsela ani chuan an hnenah, “Khaw dangate pawh Pathian ram Chanchin Tha ka hril tur a ni, chu mi avang chuan tirh ka ni si a,” a ti a.
4:44 Tichuan Galili rama inkhawmna inahte thu a hril a.
5:1 Tin, heti hi a ni a, mipuiin Pathian thu an ngaihthlak a, amah an bawr huai huai laiin, ani chu Gennesaret dil kamah chuan a ding a;
5:2 tin, dil kamah chuan lawng pahnih awm a hmu a, nimahsela sangha mantute chu an chhuak a, an lente an su a.
5:3 Tichuan lawng pakhat Simona ta zawkah chuan a chuang a, a hnenah vaukam ata tlema tawlh luh deuh a dil a. Tin, a thu a, lawng atang chuan mipuite chu a zirtir ta a.
5:4 Tin, thusawi a ban chuan Simona hnenah, “Li thuk lam pan la, sangha man turin in lente deng rawh,” a ti a.
5:5 Tin, Simonan a hnenah, “Zirtirtu, rim takin zankhuain kan bei a, engmah kan man lo va, nimahsela i thuin lente ka deng leh ang e,” a ti a, a chhang a.
5:6 Tin, an han den chuan sangha tam tak an khuh a, an lente chu a chat pheuh pheuh va.
5:7 Tin, lawng danga an pawlpui awmte chu anmahni rawn pui turin kutin an hui a. Tin, an lo kal a, lawng pahnih chu pil lek lek khawpin an chhung khat ve ve a.
5:8 Tin, Simon Peteran chu chu a hmuh chuan Isua khup kiangah a bawkkhup a, “Lalpa, mi kalsan rawh, mi sual ka nih hi,” a ti a.
5:9 An sangha man chu ani leh a thianten mak an ti hle si a.
5:10 Simona pawl vek Zebedaia fapa Jakoba leh Johana pawhin mak an ti hle bawk a. Tin,Isuan Simona hnenah, “Hlau suh, tun hnuah zawng mihring i man tawh ang,” a ti a.
5:11 Tin, an lawngte chu vaukamah an hruai kai a, engkim kalsanin amah chu an zui ta a.
5:12 Tin, heti hi a ni a, khaw pakhata a awm laiin ngai teh, mi pakhat phar bawm hi a awm a, ani chuan Isua a lo hmu a, lei siin a bawkkhup a, “Lalpa, i duh chuan mi tithianghlim thei e,” a ti a, a ngen chiam a.
5:13 Tin, ani chuan a han ban a, a dek a, “Ka duh e, lo thianghlim tawh ang che,” a ti a. Tin, chawplehchilhin a phar chu a lo reh ta nghal a.
5:14 Tin, a hnenah, “Tumah hrilh suh, amaherawhchu puithiam va inentir la, i inthen nan Mosia ruat angin hlan rawh, mite hriattirna turin,” a ti tlat a.
5:15 Nimahsela a chanchin thu chu a thang lehzual sauh va; mipui tam tak a thu hriat duh leh an nate tihdam duhin an rawn inkhawm chiam a.
5:16 Nimahsela ani chu thlalerahte a kal hrang a, a tawngtai thin a.
5:17 Tin, heti hi a ni a, chung lai chuan ni khat chu a zirtir a. Tin, a kiangah Pharisaite leh dan zirtirtute thuin an awm a, chungte chu Galili leh Judai ram khaw tin atang leh Jerusalem khua atanga lo chhuak an ni a; tin, mi tihdam nan Lalpa thiltihtheihna chu a hnenah a awm.
5:18 Tin, ngai teh, khum chawpin zeng pakhat an rawn zawn a; a hmaa dah turin zawn luh an tum a.
5:19 Tin, mipui avang chuan zawn luhna reng an hmu lo va, in chungah an lawn chho va, in chung atang in a lai takah, Isua hmaah, a khum chawpin an puh thlaktira.
5:20 Tin, an rinzia chu a lo hmuhin a hnenah chuan, “Mihring, i sualte ngaihdam a ni tawh e,” a ti a.
5:21 Tin, lehkhaziaktute leh Pharisaite chuan, “Pathian sawichhia hi tunge maw a nih le? Pathian chauh lo chuan tuin nge sualte ngaidam thei ni?” tiin an ngaihtuah a.
5:22 Chutichuan Isuan an ngaihtuah chu a hria a, an hnenah chuan, “In thinlungah engnge in ngaihtuah?
5:23 ‘I sualte ngaihdam a ni tawh,’ tih leh ‘Tho la, kein kal tawh rawh,’ tih hi a engnge sawi awl zawk ni?
5:24 Engpawh ni sela, khawvelah Mihring Fapa hian sual ngaihdam theihna a nei tih in hriat nan,” a ti a, (zeng hnenah chuan) “Tho la, i khum la la, i inah kal rawh; ka ti a che,” a ti a.
5:25 Tichuan an mithmuhah a tho ta nghal a, a mutna chu a la a, Pathian fak chung zelin a inah a haw ta a.
5:26 Tin, an zain mak an ti hle a, Pathian an fak a, “Vawiinah chuan thil mak tak kan hmu a ni,” an ti a, an hlau ta em em a.
5:27 Tin, chung zawhah chuan a chhuak a, chhiah chawina hmuna thu, chhiahkhawntu pakhat a hming Levia a hmu a; tin, a hnenah, “Mi rawn zui rawh,” a ti a.
5:28 Tichuan engkim a kalsan a, a tho va, a zui ta a.
5:29 Tin, Levia chuan a inah Isua tan ruai ropui tak a theh a; tichuan chhiahkhawntute, mi dangte nen, mi tam takin anmahni an kilpui hlawm a.
5:30 Tin, Pharisaite, an lehkhaziaktute nen chuan a zirtirte chungah an phunnawi a, “Engati nge chhiahkhawntute leh mi sualte hnena in ei a, in in le?” an ti a.
5:31 Tin, Isuan an hnenah, “Mi hriselte chuan daktawr an ngi lo va, mi bawrhsawmte zawkin an ngai a ni.
5:32 Mi fel takte lam tura lo kal ka ni lo va, mi sualte lama simtir tura lo kal ka ni zawk,” a ti a, a chhang a.
5:33 Tin, annin a hnenah, “Johana zirtirten chaw an nghei fo va, an tawngtai thin;Pharisai zirtirte pawhin chutiang bawkin an ti thin; nimahsela i zirtirte hianan eiin an in thin,” an ti a.
5:34 Isuan an hnenah, “Mo hruaitute hnena a pasal tur chu a awm chhung zawng mo hruaitute chu in ngheitir thei thin em ni?
5:35 nimahsela a pasal tur chu an hnen ata hruai bo nite a la thleng ang a, chu mi niah erawh chuan an la nghei ang,” a ti a.
5:36 Tin, an hnenah tehkhin thu pawh a sawi a:“Tuman puan thar pawt thlain puan hlui an bel ngai lo, bel ang sela, a thar chu an titet ang a, a thar them leh a hlui chu a inpawl bawk hek lo vang.
5:37 Tin, tuman uain thar savun uain peng hluiahte an thun ngai lo, thun ang sela, uain thar chuan savun pengte chu a tawn puak ang a, a bua ang a, savun pengte pawh chu a lo chhia ang.
5:38 Uain thar chu savun uain peng tharahte an thun zawk tur a ni.
5:39 Tin, tuman uain rei in zawhin a thar an duh ngai lo; ‘A rei a tha zawk,’ an ti si a,” a ti a.
6:1 Tin, heti hi a ni a, Chawlhni vawi khat chu, buh hmunahte a kal tlang a; a zirtirte chuan buh vuite chu an thliak a, an kutphahin an nuai fai a, an ei a.
6:2 Tin, Pharisai tute emaw chuan, “Engati nge Chawlhnia tih thiang lo chu in tih ni?” an ti a.
6:3 Tin, Isuan a chhang a, “Davida a riltam laia a thiante nena an thiltih kha, khang angte pawh kha in chhiar lo vem ni?
6:4 Khatia Pathian ina a luh a, puithiamte chauh lo chuan ei thian loh chhangdah chu a lak a, a ei a, a thiante hnena a pek ve thu kha,” a ti a.
6:5 Tin, amah vekin an hnenah chuan, “Mihring Fapa hi Chawlhni Lal a ni,” a ti a.
6:6 Tin,heti hi a ni a, Chawlhni dangah chuan inkhawmna inah a lut a, a zirtir a; tin, chutah chuan mi pakhat kut ding lam zeng a lo awm a.
6:7 Tin, lehkhaziaktute leh Pharisaite chuan a hekna tur an hmuh theih nan, Chawlhniin a tih dam dawn leh dawn loh an mit mei a .
6:8 Nimahsela anin an rilru chu a hria a, kut zeng hnenah chuan, “Tho la, a laiah ding chhuak rawh,” a ti a. Tin, a tho va, a ding chhuak ta a.
6:9 Tin, Isuan an hnenah, “Chawlhniah hian tihthat nge thiang, tihchhiat? chhandam nge thiang, tihhlum? Ka zawt a che u,” a ti a.
6:10 Tin, an za chuan a en vel a, a hnenah, “I kut phar rawh,” a ti a. Tin, a phar a, a kut chu a dam ta a.
6:11 Chutichuan an thin tawtin an puak keh lek lek a, Isua chunga an tihzia tur an inrawn ta a.
6:12 Tin, heti hi a ni a, chung lai chuan a chhuak a, tawngtai turin tlangah a kal a, Pathian hnenah a tawngtai zankhua a.
6:13 Tin, khawvar veleh a zirtirte chu a ko va; an zing ata sawm leh pahnih a thlang a, an hmingah pawh tirhkoh a vuah a:
6:14 chungte chu Simona (Petera an vuah bawk kha) leh a unau Andria te, Jakoba leh Johana te, Philipa leh Bartholomaia te,
6:15 Matthaia leh Thoma te, Alphaia fapa Jakoba te, Simona, Zelota an vuah te,
6:16 Jakoba fapa Juda te, mi vervek Juda Iskariota te an ni.
6:17 Tin, an rualin a kal chhuk a, hmun zawlah a ding a, a zirtirte mipui tam tak nen, Judai ram zawng zawng ata leh Jerusalem khua ata leh, Tura leh Sidon khaw lama tuifinriat kam ata mi tam tak nen; chungho chu a thu ngai duh leh an nate intihdam duhin an lo kal a ni;
6:18 Tichuan ramhuai bawlhhlawh sawisakte pawh an lo dam ta a.
6:19 Tin, a hnen ata thiltihtheihna a chhuak a, mi tin a tihdam avangin mipui zawng zawng chuan amah deh an tum a.
6:20 Tin, a dak chhuak a, a zirtirte chu a en a. “Nangni rethei te u, in eng a thawl e; Pathian ram in ta a ni si a.
6:21 “Nangni tuna riltamte u, in eng a thawl e; in la tlai dawn si a, “Nangni tuna tapte u, in eng a thawl e; in la nui dawn si a.
6:22 “Mihring Fapa avanga miten an huat che u a, an tuithlara an hau che u a, in hming a tha lo tiin an paih bo der hunah in eng a la thawl ang.
6:23 Chu mi niah chuan lawm ulang, hlimin zuang rawh u; ngai teh u, vanah in lawman a awm hnem si a; chutiang bawkin an thlahtuten zawlneite chunga an tih thin kha.
6:24 “Amaherawhchu nangni mi hausate u, in chung a pik e; in thlamuanna in hmu tawh si a.
6:25 “Nangni tuna tlaipuarte u, in chung a pik e; in ril a la tam dawn si a. “Nangni tuna nuite u, in chung a pik e; lungngaiin in la tap dawn si a.
6:26 “Mi zawng zawngin an fak hunah che u in chung a la pik ang, chutiang bawkin an thlahtuten zawlnei derte chunga an tih kha.
6:27 “Ka thu ngaitute u, ka hrilh a che u, In hmelmate chu hmangaih ula, a hua che u chu an thatna tur ti ula,
6:28 anchhe lawhtu che u chu malsawmsak ula, a sawisatu che u chu tawngtaisak rawh u.
6:29 “Biang lehlama bengtu che chu lehlam pawh dawh rawh; tin i puan laksaktua hnenah chuan i kawr lak pawh hnial suh.
6:30 “A diltu apiang che hnenah pe rawh; tin, i sum laksaktu che hnenah chuan dil leh tawh suh.
6:31 “Tin, miin in chunga an tiha in duh tur ang zelin mi chungah pawh ti ve rawh u.
6:32 “Tin, in hmangaitute chauh in hmangaih hian, lawm engnge in hlawh ang? mi sualte pawhin an hmangaitute chu an hmangaih thin asin.
6:33 Tin, in chunga thate chungah chauh in that hian, lawm engnge in hlawh ang? mi sualte pawhin chutiang bawkin an ti thin asin.
6:34 Tin, hmuh leh beiseina hnen chauhva thil in puktir hian, lawm engnge in hlawh ang? mi sualte pawhin a ngai veka hmu leh turin mi sualte hnenah an puktir thin,
6:35 Amaherawhchu in hmelmate hmangaih ula, an thatna tur ti ula, puktir rawh u, beidawng hauh lovin; tichuan in lawmman a tam ang a, Chungnungbera fate in ni bawk ang; ani chuan mi lawm nachang hre lote leh mi sualte a khawngaih thin.
6:36 In Pain mi a khawngaih angin mi khawngaih ve rawh u.
6:37 “Sawisel suh u, chutichuan sawiselin in awm loving; tumah thiam lovah ruat suh u, chutichuan thiam lohvin in awm lo vang; ngaidam rawh u, chutichuan ngaihdamin in awm ang;
6:38 pe rawh u, chutichuan pekin in awm ang, thahnemngai taka the a, beng muk a, sawi muk a, liam zawih zawihin, inmal chungah an pe ang che u. In tehna ngai bawkin an tehsak leh dawn si che u a,” a ti a.
6:39 Tin, an hnenah tehkhin thu a sawi a, “Mitdelin mitdel vek a hruai thei ang em? an pahnihin khuarkhurumah an tla dun lo vang em?
6:40 Zirtir chu a zirtirtu chungah a awm lo; nimahsela mi tin an zir zawhin an zirtirtu angin an awm ang.
6:41 “Tin, engati nge mahni mita khanchhuk awm chu ngaihtuah si lovin, i unau mita hmawlh te tak te awm chu i hmuh ni?
6:42 Mahni mita khanchhuk awm chu hmu si lovin, i unau hnenah, ‘Unau, i mita hmawlh te takte awm kha mi lak chhuahtir rawh,’ engtin nge i tih theih le? Mi vervek! I mit ata khanchhuk kha la chhuak hmasa rawh, chutichuan i unau mit ata hmawlh te tak te lak chhuah tur chu fiah takin i hmu ang.
6:43 “Thing tha reng reng rah chhiaa rah a awm lo; thing chhia lah rah thaa rah a awm hek lo.
6:44 Thing tin anmahni rah theuhvah a hriat a ni. Miin hruihlingnei kungah theipui an lo ngai lo, nghardai kungah grep rah an lo ngai bawk hek lo.
6:45 Mi tha chuan a thinlung ro bawm tha ata thil thate a theh chhuak thin a; mi sual chuan a thinlung ro bawm chhia ata thil chhiate a theh chhuak thin; a thinlunga khat liam chu a kain a sawi thin a ni si a.
6:46 “Tin, nangnin eng atan nge, ka thu zawm si lo va, ‘Lalpa, Lalpa,’ mi tih thin?
6:47 Mi tin ka hnena lo kal a, ka thu hriaa zawm apiang chu tu ang nge an nih ka hriattir ang che u:
6:48 In satu, thuk taka lai a, lungpui chunga lungphum rema ang chu an ni; tin, tui a lo lenin, tuizangkhauhvin chu mi in chu a khawh a, a tinghing thei lo va, a sak ngun avangin.
6:49 Amaherawhchu hriaa zawm lo chu, lung phum lova, lei chung maia in satu ang chu a ni; tin, tuizangkhauhvin chu chu a khawh a, a chim ta nghal a; chu mi in sawp chu nasa tak a ni,” a ti a.
7:1 Tin, mite beng hriata a thu zawng zawng a sawi zawhin Kapernaum khuaah a lut a.
7:2 Tin, sipai za hotu tu emaw a bawih duh tak a dam lo va, a thi lek lek a.
7:3 Tichuan, Isua chanchin a hriat veleh a bawih rawn tidam tura ngen chiam turin a hnenah Judaho upate a tir a.
7:4 Tin, anni chu Isua hnenah an va thleng a, thahnemngai takin an ngen chiam a, “Ani hi hei hi i tihsak tlak a ni e;
7:5 kan hnamte a hmangaih a, kan inkhawmna in pawh aman min saksak a ni,” an ti a.
7:6 Tichuan Isua chu an hnenah a kal ta a. Tin, in a thlen dawn dawnin, sipai za hotu chuan a hnenah a thiante a tir a, “Lalpa, lo kal harsa suh, ka in chhung i luhna tlak a ni lo ve;
7:7 chuvangin i hnena lo kal tlak pawh niin ka inring lo va; thu chauh sawi la, ka naupang a dam mai ang.
7:8 Kei pawh mi thua awm ka ni a, ka hnuaiah sipaite an awm a; chu mi kha mi chu, ‘Kal rawh,’ ka tih leh, a kal thin; mi dang hnenah pawh, ‘Lo haw rawh,’ ka tih leh, a lo haw thin; ka bawih hnenah pawh, ‘Hei hi ti rawh,’ ka tih leh, a ti thin,” a ti a.
7:9 Tin, Isuan chung thu chu a hriatin amah chu mak a ti hle a, a hawi a, mipui a zuitute hnenah chuan, “Ka hrilh a che u, Israelte zingah pawh heti ema rinna nasa hi ka hmu lo,” a ti a.
7:10 Tin, a mi tirhte chu inah an haw leh a, bawih chu damin an hmu ta a.
7:11 Tin, rei lo tean khaw pakhat Nain an tihah chuan a kal a; a zirtirte leh mipui tam tak a hnenah an kal ve a.
7:12 Tin, kulh kawngkhar kianga a thlenin, ngai teh, mitthi an rawnzawn chhuak a, a nu fapa neih chhun a ni a, a nu chu hmeithai a ni si a; an khuate tam tak chu a hnenah an awm a.
7:13 Tin, Lalpa chuan hmeithai chu a hmuh veleh, a khawngaih em em a, “Tap suh,” a ti a.
7:14 Tin, a va hnaih a, hlang chu a khawih a; tichuan a zawntute chu an ding ta a. Tin, “Rawlthar, Tho rawh, ka ti a che,” a ti a.
7:15 Tin, mitthi chu a thu chhuak a, a lo tawng ta a. Tin, Isua chuan a nu hnenah a pe ta a.
7:16 Tin, mi zawng zawngin an hlau va, Pathian an fak a, “Kan zingah zawlnei ropui tak a lo awm ta a ni,” an ti a, “Pathianin a mite a rawn tlawh ta a ni,” an ti bawk a.
7:17 Tin, chu mi chungchang thu chu Judai ram zawng zawngah leh a kiang vel ram tinah a thang chhuak ta a.
7:18 Tin, Johana zirtirte chuan chung thu zawng zawng chu Johana an hrilh a.
7:19 Tichuan Johanan a zirtirte pahnih a ko va, Lalpa hnenah chuan a tir a, “Lo kal tura chu i ni nge, mi dang kan la ngai ang?” tiin.
7:20 Tin, mite chu a hnenah an lo thlen chuan, “Baptistu Johanan, ‘Lo kal tura chu i ni nge, mi dang kan la ngai ang?’ tiin i hnenah min tir a ni,” an ti a.
7:21 Tin, chung lai tak chuan Isuan nate, hripui veite, ramhuai mante tam tak a tidam a, mitdel tam takte pawh an mit a tivar a.
7:22 Tin, an hnenah, “Kal leh ta ulang, thil in hmuh leh in hriat hi Johana va hrilh rawh u; mitdelte an mit a lo var ta, kebaite kein an lo kal ta, pharte an lo thianghlim ta, bengngawngte pawh an beng a lo var ta, mitthite kaihthawhin an awm ta, pachhiaten Chanchin Tha hrilh an dawng ta.
7:23 Tin, tupawh ka chunga lungnih lohna hmu lo chu an eng a thawl e,” a ti a, a chhang a.
7:24 Tin, Johana tirhkohte chu an hawn hnuin Isuan mipui hnenah chuan Johana thu a sawi ta a, “Eng en turin nge thlalera in kal chhuah kha? Luang thli chhem nghin maw?
7:25 A nih loh leh, eng en tur berin nge in kal chhuh kha? Puan nem sin maw? Ngai rawh u, puan ropui sin leh mi nuamsate chu lal inahte asin an awm.
7:26 A nih loh leh, eng en tur berin nge in kal chhuah kha? Zawlnei maw? A nih ngei kha, ka ti a che u, Zawlnei ai pawha ropui zawk –
7:27 ‘En teh, ka tirhkoh i hmaan ka tir a ni, Ani chuan i hmaah i kawng a siam ang,’ tih, a chanchin an ziaka kha, he mi hi a ni.
7:28 Hmeichhe hrin zingah Johana aia ropui zawk an awm lo; nimahsela Pathian rama mi te deuh pawh ani ai chuan an ropui zawk, ka ti a che u,” a ti a.
7:29 Tin, mi zawng zawngin an hriatin, chhiahkhawntute nen, Johana baptisma lo chang tawh an ni a, Pathian an thiam a.
7:30 Pharisaite leh dan hretute erawh chu a hnenah baptisma lo chang tawh an ni ve lo va, anmahni tan Pathianin rem a ruatsak kha an duh lo.
7:31 Chutichuan Isua vekin, “Tun lai chhuante hi eng nen nge ka tehkhin ang le? eng ang nge nih pawh an nih?
7:32 Naupang, dawr hmuna thu a, ‘Phenglawng kan tumsak che u a, in lam si lo va; kan tap vak a, in tap si lo va,’ tia inauvate ang hi an ni.
7:33 Baptistu Johana chu a lo kal a, chhang a ei lo va, uain pawh a in lo va, nangnin ‘Ramhuai azawl a nih hi,’ in ti a.
7:34 Mihring Fapa a lo kal a, a eiin a in a, nangnin, ‘En teh u, chaw heh mi, uain heh mi, chhiahkhawntute leh mi sulte thian saw!’ in ti si a.
7:35 Nimahsela Finna chu a rah atangin a dikzia a lang a ni” a ti a.
7:36 Tin, Pharisaite zinga mi pakhatin a hnena chaw eiah a sawm a. Tin, Pharisai inah chuan a lut a, chaw a kil a.
7:37 Tin, ngai teh, chu mi khuaa hmeichhe sual pakhat awm chuan, Pharisai inah chaw kilin a thu tih a hriat veleh alabasta bawmin hriak rimtui a rawn keng a,
7:38 a hnungah a kephah bulah chuan tap chungin a ding a, a mittuiin a kephah a lo far huh a, a samin a hru a, a kephah chu a fawp ngawih ngawih a, hriak rimtui chuan a chulh a.
7:39 Tin, a sawmtu Pharisai chuan chu chu a hmuh chuan a rilruin, “He mi hi zawlnei a nih chuan a dektu hmeichhia hi tunge a nih, mi eng ang nge a nih hriat awm tak lah ni, mi sual a ni sia,” a ti a.
7:40 Tin, Isuan a hnenah, “Simon, i hnenah thu kam khat sawi tur ka nei,” a ti a, a chhang a. Tin, ani chuan, “Sawi ta che, Zirtirtu,” a ti a.
7:41 Tin, Isuan, “Tangka puktirtu tuin emaw leiba pahnih a nei a; pakhatin duli zanga a ba a, pakhatin sawmnga.
7:42 Tin, rulhna an nei lo va, a ngaihhnathiam ve ve a. Chutichuan chu mite chuan a tuin nge ani chu hmangaih zawk ang?” a ti a.
7:43 Simona chuan, “A ngaihhnathiam zual zawka chuan niin ka ring,” a ti a, a chhang a. Tin, anin a hnenah, “I ti dik e,” a ti a.
7:44 Tin, hmeichhe lam chu a hawi a, Simona hnenah chuan, “He hmeichhia hi i hmu em? I inah ka lo lut a, nangin ka kephah silna tur tui mi pe lo va, ani erawh hi chuan a mittuiin ka kephah a tihuh a, a samin a hru a ni.
7:45 Nangin fawh reng reng mi fawp lo; ani erawh hi chuan ka lo luh tirh ata ka kephah fawh a bang lo.
7:46 Nangin ka lu-ah hriak mi thih lo; ani erawh hi chuan ka kephahah hriak rimtui a chulh.
7:47 Chuvangin ka ti a che, A sual tam tak kha ngaihdamin a awm ta; ani pawhin a hmangaih ta em em a nih hi; amaherawhchu ngaihdam tlem chuan, tlemin a hmangaih thin,” a ti a.
7:48 Tin, hmeichhe hnenah chuan, “I sualte ngaihdam a ni ta,” a ti a.
7:49 Tin, a chaw kilpuiten, “Sualte pawh ngaidam hi tunge maw ni le?” an inti a.
7:50 Tin, anin hmeichhe hnenah chuan, “I rinna hi chhandam i nih phah a ni, thlamuang takin kal rawh,” a ti a.
8:1 Tin, heti hi a ni a, nakin deuhvah chuan Isuan thu hril leh Pathian ram Chanchin Tha thlen chungin khaw lian leh khaw te te a fang zel a, a hnenah sawm leh pahnihte chu an awm a,
8:2 hmeichhia tute emaw ramhuai zawl dam leh te leh na dam lehte nen. Chung hmeichhiate chu Mari, a kaw chhung ata ramhuai pasarih chhuak Magdalini an tih te,
8:3 Heroda sum enkawltu Chuza nupui Johani te, Susani te, mi dang tam tak te nen an ni; chungte chuan mahni neihin an rawng an bawlsak thin.
8:4 Tin, mipui tam tak an rawn inkhawm a, khaw tina mi a hnena an lo kalin, tehkhin thuin thu a sawi a:
8:5 “Buh chi thehtu a buh chi thehin a feh a; tin, a theh laiin a then kalkawng dungah a tla a, miin an rap a, chungleng savaten an tlan zo ta a.
8:6 Tin, a then pialtlep chungah a tla a; tin, a tiah veleh a hnawn loh avangin a rawp ta mai a.
8:7 Tin, a then hnimhlingnei zingah a tla a, hnim chuan a to rualpui a, a dip ral ta a.
8:8 Tin, a then lei thaah a tla a, a lo to va, a leh zain a rah ta a,” a ti a. Tin, chung thu chu a sawi laiin a au va, “Tupawh hriatna tura beng nei chuan hre rawh se,” a ti a.
8:9 Tin, a zirtirte chuan a hnenah, “He tehkhin thu hi eng tihna nge ni?” tiin an zawt a.
8:10 Tin, ani chuan, “Pathian ram thurukte chu nangni hriat zawng phal a ni a, mi dang hnenah erawh chuan tehkhin thu chauhvin sawi a ni; hmu mah sela, hmu lo an nih theih nan, bengin hre mah sela, a ngaihna an hriat theih loh nan.
8:11 “Tehkhin thu kha hei hi a ni:Buh chi chu Pathian thu a ni.
8:12 Tin, kawng dunga mi chu thu hre tawhte hi an ni; tin, diabola chu a lo kal a, an awih loh va, chhandam an nih theih loh nan an rilru ata chu a laksak thin.
8:13 Tin, pialtlep chunga mi chu heng mi hi an ni:an hriat veleh thu chu lawm taka pawmte hi; nimahsela zung reng an nei lo – rei lo te chauh an awih a, thlem hunin an bansan leh thin.
8:14 Tin, hnimhlingnei zinga tla chu heng mi hi an ni; an hriat hnuin an kal a, dam chhung khawsak lungkhamnate, hausaknate, nawmsaknate chuan a dip a, an rah puitling thin lo a ni.
8:15 Lei thaa mi erawh chu heng mi hi an ni:rilru fel leh thain thu an hria a, an vawng reng a, chhel takin an rah thin.
8:16 “Tuman khawnvar halin belin an khuh lo, khum hnuaiah pawh an dah lo; a lut apiangin a eng an hmuh theih nan a dahnaah an dah zawk thin a ni.
8:17 Puang lo tura zep engmah a awm si lo va, hriat loh tur leh lang lo tura thuhruk engmah a awm hek lo.
8:18 Chutichuan eng angin nge in hriat fimkhur rawh u; tupawh a nei apiang an pe belhchhah ang a; tupawh a nei lo apiang neia an inruat chhun pawh an laksak ang,” a ti a.
8:19 Tin, a nu leh a unaute chuan Isua lam an rawn pan a, nimahsela mipui avang chuan a kiang an thleng thei si lo.
8:20 Tin, “I nu leh i unaute nangmah hmuh tumin pawnah sawn an ding reng e,” tiin an hrilh a.
8:21 Tin, ani chuan an hnenah, “Heng Pathian thu hriaa awihte hi ka nu leh ka unaute an ni e,” a ti a, a chhang a.
8:22 Tin, heti hi a ni a, chung lai chuan ni khat chu lawngah a chuang a, a zirtirte nen; tin, an hnenah, “Dil ral lehlamah sawn i kai ang u,” a ti a. Tichuan lawng chu an phelh a, an kal ta a.
8:23 Tin, an kal laiin Isua a lo muhil ta a; tin, dilah chuan thlipui a lo tleh chhuk phut a, an lawng chu tuiin a khat dawn a, hlauhthawnawm takin an awm ta a.
8:24 Tin, a hnenah an va kal a, an kaitho va, “Zirtirtu, zirtirtu, kan boral dawn hi le,” an ti a. Tin, ani chu a lo harh a, thli leh tuifawn chu a hau ta a; tin, a bang a, a reh ta mai a.
8:25 Tin, an hnenah, “Khawiah nge in rinna?” a ti a. Tin, an hlau va, mak an ti hle a, “He mi hi tunge ni le? thli leh tui lam pawh thu a pe a, an awih hi?” an inti hlawm a.
8:26 Tin, Galili ram zawna Gerasin mite ram chu an thleng a.
8:27 Tin, khawmuala a chhuahin, khuaa mi ramhuaiman tuin emaw a rawn tawk a; chu mi chu rei tak puan reng reng sin lovin a awm a.inah reng pawh a awm lova, thlanahte a awm zawk thin a.
8:28 Tin, Isua a hmuh veleh a au va, a hmaah a bawkkhup a, aw ring takin, “Isu, Pathian Chungnungbera Fapa, kei leh nang engnge kan inzawlna awm? mi nghaisa lul suh ang che, ka ngen a che,” a ti a.
8:29 (Isuan ramhuai bawlhhlawh chu, chu mi kawchhung ata chu chhuak turin thu a lo pe tawh si a. Chu mi chu ramhuai chuan a man fo thin a ni; mitten khaidiat leh kawl an buntir a, an veng reng thin a; nimahsela a phuarnate a tichat a, ramhuaiin thlalerahte a hnawt chhuak thin).
8:30 Tin, Isuan, “I hming engnge ni?” tiin a zawt a. Tin, ani chuan, “Nuaia,” a ti a, (a kawchhunga ramhuai tam tak an luh avangin).
8:31 Tin, leilawta kal thu an hnena pe lo turin Isua hnenah an ngen a.
8:32 Tin, chutah chuan tlangah vawk rual tam tak an tla a; tin, a hnenah vawk kawchhungahte luh theihna thu an ngen a. Tin, ani chuan thu a pe a.
8:33 Tin, ramhuaite chu mi kawchhung ata an chhuak a, vawk kawchhungahte an lut a; tin, vawk rual chu khamah an tlan chhuk chiam a, dilah an tlan lut a, tui hakin an thi ta a.
8:34 Tin, a vulhtute chuan chu thil awmzia chu an hmu a, an tlan a, khuaah leh lovahte chuan an sawi a.
8:35 Tin, “Engnge lo ni ta?” ti a, en turin an chhuak hlawm a; tin, Isua hnen an lo thleng a, ramhuai chhuahsan hnua chu puan sina rilru pangngai puin, Isua ke bula thu an rawn hmu a; tichuan an hlau ta a.
8:36 Tin, a hretute chuan ramhuai man a tihdamzia thu chu chungho chu an lo hrilh a.
8:37 Tin, a vel Gerasin mite rama mi zawng zawng chuan an hlauh em em avangin, ani chu an hnen ata kal bo turin an ngen a; tin, lawngah a chuang a, a kir leh ta a.
8:38 Tin, ramhuai chhuahsan hnua erawh kha chuan Isua hnena awm reng a ngen a.
8:39 Nimahsela Isuan, “I inah haw la, Pathianin i tan thil a tihsak che hi a ropuizia va hrilh rawh,” tiin a kaltir ta a. Tichuan a kal a, khawpui chhung zawng zawngah chuan Isuan a tan thil a tihsak ropuizia chu a tlangaupui a.
8:40 Tin, Isua a lo kir leh chuan mipuiin amah an lawm a; amah lo nghak reng an ni hlawm si a.
8:41 Tin, ngai teh, mi pakhat a hming Jaira, inkhawmna in hotu chu a lo kal a, Isua ke bulah a bawkkhup a, a ina kalah a ngen a,
8:42 fanu mal kum sawm leh kum hnih emaw lai tur a nei a, chu mi chu thi chhawnga a lum reng avangin. Tin, Isua a kal laiin mipuihovin an nek huai huai a.
8:43 Tin, hmeichhe pakhat kum sawm leh kum hnih thi putin a dam lo va, a sum neih zawng zawng chu daktawrte lakah a dek ral zo tawh a, tumahin an tidam thei tawh si lo va;
8:44 chu mi chu a hnungah a lo kal a, a puan hmawr a dek a; chawplehchilhin a thi put chu a lo reh ta nghal a.
8:45 Tin, Isuan, “Mi dek kha tunge ni?” a ti a. Tin, “Kei chu ka ni lo,” an ti theuh va, Petera leh a thianten, “Zirtirtu, mipui hovin an nek huai huai chia, an chil huai huai che alawm,” an ti a.
8:46 Nimahsela Isuan, “Tuin emaw zawng mi dek a ni, thiltihtheihna ka chhung ata a chhuak tih ka hre nghe nghe asin,” a ti a.
8:47 Tin, hmeichhia chuan a inthup theih loh a hria a, khur chungin a lo kal a, a hmaah a bawkkhup a, a deh chhan leh chawplehchilha a dam tak nghalzia chu mi zawng zawng hmuhah chuan a sawi ta a.
8:48 Tin, ani chuan a hnenah, “Ka fanu, i rinna i dampui a ni e, thlamuang takin kal rawh,” a ti a.
8:49 A la tawng lai mekin inkhawmna in hotu in ata chu mi pakhat a lo kal a, “I fanu a thi ta, zirtirtu hi tihah duh suh,” a ti a.
8:50 Isua erawh chuan chu thu chu a hriat chuan, “Hlau suh, ring mai rawh, chutichuan a dam leh ang,” a ti a, a chhang a.
8:51 Tin, in chu a va thlen chuan Petera te, Johana te, Jakoba te, naupang nu leh pate chauh loh chu tumah luh ve a phal lo.
8:52 Tin, an zain an lo tap tuar tuar a, an awm an chum an chum a; chutichuan ani chuan, “Tap suh u, a thi lo ve, a muhil a ni zawk,” a ti a.
8:53 Tin, a thi tawhin an hre reng si a, an nuihsan ta mai a.
8:54 Isua erawh chuan a kut a chelh a. “Chemte, tho rawh,” a ti a, a ko va.
8:55 Tin, a thlarau chu a lo kir leh a, a tho ta nghal a; tin, englo ei tur pek thu a pe a.
8:56 Tin, a nu leh a pa chuan mak an ti hle a; nimhsela ani chuan a thiltih chu tumah hrilh lo turin a ti tlat a.
9:1 Tin, Isuan sawm leh pahnihte chu a ko khawm a, ramhuai zawng zawng chunga thiltihtheihna leh thuneihna leh nate tihdam theihna a pe a.
9:2 Tichuan Pathian ram thu hril tur leh damlote tidamturin a tir chhuak ta a.
9:3 Tin, an hnenah, “Zinna atan tiangte emaw, ipte emaw, chhang emaw, tangka emaw engmah keng suh u; kawr pahnih pawh nei suh u.
9:4 Tin, in thlenna in apiangah thleng reng zel ang che u.
9:5 Tin, a lawm lo apiang che u chu chu mi khua ata in chhuah hun chuan anmahni hriattirna turin inkephaha vaivut chu thing thla ang che u,” a ti a.
9:6 Tichuan an kal ta a, khua an fang zel a, ram tinah Chanchin Tha an hril a, mi an tidam zel a.
9:7 Tin, lal Herodan a thiltih zawng zawng chu a lo hre ta a; thenkhatin, “Johana kha a nung leh ta a nih hi,” an tih a,
9:8 thenkhatin, “Elija a lo inlar ta a nih hi,” an tih avangin a mangang ta a.
9:9 Tin, Herodan, “Johana chu a lu ka tan tawh kha; nimahsela heti kauva a thu ka hriat thina hi tunge ni?” a ti a. Tin, amah chu hmuh a tum ta a.
9:10 Tin, tirhkohte chu an lo hawn lehin, a hnenah an thiltihte an hrilh a. Tin, ani chu anmahni hruaiin Bethsaida khua an tihah chuan a kal hrang ta a.
9:11 Nimahsela mipuiho chuan an hria a, an zui zel a; tin, ani chuan anni chu a lo lawm a, Pathian ram thu a hrilh a, tihdam ngai apiang a tidam a.
9:12 Tin, khua chu a lo tlai dawn ta a; tin, sawm leh pahnihte chu an lo kal a, a hnenah, “Kan kiang vel khuaahte leh lovahte kalin, thlen in leh ei tur an hmuh theihna turin mipui hi kaltir ta che; hei thlaler hmuna awm kan ni si a,” an ti a.
9:13 Ani erawh chuan anhnenah, “Nangmahnin ei tur pe rawh u,” a ti a. Tin, anni chuan, “Heng mi zawng zawng tan hian ei tur kan va leisak loh chuan, chhangper panga leh sangha pahnih chauh lo chu engmah kan nei lo,” an ti a.
9:14 (Patling hlir pawh sangnga emaw lai an ni si a.) Tin, a zirtirte hnenah, “Apawl pawlin thuttir rawh u, sawmnga lai zelin,” a ti a.
9:15 Chutiangin an ti a, an thuttir ta vek a.
9:16 Tin, chhangper panga leh sangha pahnih chu a la a, van lam enin mal a sawm a, a phel a, mipui hmaa hlui turin a zirtirte hnenah chuan a pe a.
9:17 Tin, an ei a, an puar ta vek a; tin, an ei bang nawite chu bawmrang sawm leh pahnih an rut khat a.
9:18 Tin, heti hi a ni a, Isuan amah chauhva a tawngtai laiin a zirtirte chu a hnenah a awm a; an hnenah, “Mipuiten tunge a ni mi tih?” tiin a zawt a.
9:19 Tin, anni chuan, “ ‘Baptistu Johana a ni,’ an ti chia; nimahsela thenkhat erawh chuan, ‘Elija a ni,’ an ti chia; thenkhatin, ‘Hman lai zawlnei tua emaw a tho leh ta a ni,’ an ti che,” tiin an chhang a.
9:20 Tin, ani chuan an hnenah, “A nih leh, nangnin tunge a ni mi tih?” a ti a. Tin, Peteran, “Pathian Krista chu,” tiin a chhang a.
9:21 Tin, chu mi thu chu tumah hrilh loh tur ti tlatin thu a pe a;
9:22 “Mihring Fapa hian thil tam tak a tuar tur a ni a, upate, puithiam lalte, lehkhaziaktute duh lohvin a awm tur a ni a, thahin a awm tur a ni a, ni thum niah kaihthawhin a awm bawk tur a ni,” a ti a.
9:23 Tin, amah vekin, mi zawng zawng hnenah, “Tupawhin mi zui a duh chuan mahni hrehawm pawisa lovin, ni tin a kraws puin mi zui rawh se.
9:24 Tupawh a nun humhim duh apiangin a chan ang a; tupawh keimah avanga a nun chan apiangin, chu mi ngei chuan a humhim ang.
9:25 Miin khawvel hi a pumin nei sela, intiboralin emaw intichhe si sela, a tan engnge sawt ang?
9:26 Tupawh keimah leh ka thu zahpui apiang, Mihring Fapa hian ama ropuina nen, a Pa ropuina nen, a vantirhkoh thianghlimte ropuina nen a lo kal hunah chuan chu mi chu a rawn zahpui ang.
9:27 Dik takin ka hrilh a che u, heta dingho a thente hi, Pathian ram an hmuh hma loh chuan thihna tem tawp lo tur an awm,” a ti a.
9:28 Tin, heti hi a ni a, chung thusawi achin ni riat emaw laiah, Isuan Petera te, Johana te, Jakoba te chu a hruai a, tawngtai turin tlangah a kal chho va.
9:29 Tin, a tawngtai laiin a hmel awmzia chu a lo danglam a, a silhfente chu a lo var a, mi enkhalh theiin a lo awm ta a.
9:30 Tin, ngai teh, mi pahnih amah nen an inbia a, chu mite chu Mosia leh Elija an ni a;
9:31 ropuinaa inthuamin an inlar a, Jerusalem khuaa a thih tleitlakna tur thu an sawi a.
9:32 Petera leh a thiante erawh chu an muthlu a; tin, an harh veleh a ropuizia leh a hnena mi pahnih ding chu an hmu ta a.
9:33 Tin, heti hi a ni a, chu mite chuan Isua an then dawn laiin, Peteran Isua hnenah, “Zirtirtu, kan tan heta awm hi a tha e; bawkte pathum kan khawh ang e, i tan pakhat, Mosia tan pakhat, Elija tan pakhat,” a ti a – a thusawi pawh hre lovin.
9:34 Tin, chung thu chu a sawi laiin chhum a lo zing a, anmahni a hliah ta a; chhumah chuan an luh laiin an hlau va.
9:35 Tin, chhumah chuan aw a lo chhuak a, “Hei hi ka Fapa, ka thlana chu a ni, ama thu ngai rawh u,” a ti a.
9:36 Tin, aw chu a reh veleh Isua chu amah chauhvin an hmu ta a. Tin, an ngawi reng a, chung lai vel chuan an thil hmuh chu tumah engmah an hrilh lo.
9:37 Tin, heti hi a ni a, atukah tlang ata chu an chhuk hnu chuan mipui tam takin amah chu an lo hmuak a.
9:38 Tin, ngai teh, mipui zingah chuan mi pakhat a au a, “Zirtirtu, ka fapa en turin ka ngen a che, ka fapa neih chhun a ni si a.
9:39 Ngai teh, ramhuaiin a man thin a, a au chhuak thut thin:tichuan a chilphuante tla khawpin a sawisa thin a, nasa taka tihthitlinin a kalsan tawk thin.
9:40 Tin, i zirtirte hnenah hnawt chhuak turin ka ngen a; an thei si lo va,” a ti a.
9:41 Tin, Isuan, “Thangthar rinna nei lova tihmawhte u, eng chen nge in hnenah ka awm ang a, ka ngaihtheih ang che u? I fapa chu hetah rawn hruai rawh,” a ti a, a chhang a.
9:42 Tin, a lo kal laiin ramhuai chuan a titlu vak a, nasa takin a sawisa ta a. Nimahsela Isuan ramhuai bawlhhlawh chu a hau va, naupang chu a tidam a, a pa hnenah chuan a kaltir leh ta a.
9:43 Tin, mi zawng zawngin Pathian ropuizia chu mak an ti hle a. Chutichuan mi zawng zawng chuan a thiltih zawng zawng chu mak an tih lai chuanin, Isuan a zirtirte hnenah chuan,
9:44 “Chung thu chu in bengah lut rawh se:Mihring Fapa hi mihringte kuta mantirin a awm dawn si a,” a ti a.
9:45 Nimahsela a thusawi chu a ngaihna an hre lo va, an hriat theih loh nan a inthup a ni, chu mi thusawi chanchin chu amah lah an zawt ngam si lo va.
9:46 Tin, “Kan zingah tunge ropui ber ang?” tiin an lo inhnial a.
9:47 Tichuan Isuan an rilrua an ngaihtuah chu a hria a, naupang te a kai a, a sirah a dintir a,
9:48 an hennah, “Tupawh ka hming avanga he naupang te hi lawm apiang chu keimah mi lawm an ni ang; tupawh kei mi lawm apiang chu mi tirtu lawm an ni ang; in zavia zinga te ber hi a ni, ropui ni,” a ti a.
9:49 Tin, Johana chuan, “Zirtirtu, tu emaw i hminga ramhuaite hnawt chhuak kan hmu a, kan zuinaah che a tel ve loh avangin ka khap ta asin le,” a ti a, a chhang a.
9:50 Isua erawh chuan a hnenah, “Khap tawh suh u, tupawh nangni dodal lo chu in lama tang an ni si a,” a ti a.
9:51 Tin, heti hi a ni a, amah hruai chhoh a hun dawnin, Jerusalem khuaa kal tumin a hawi tlat a,
9:52 a hmaah zualkote a tlantir a; tin, an kal a, amah lo buatsaihsak turin Samari mite khaw khatah an lut a.
9:53 Tin, a mitmei chu Jerusalem khaw lam pana a lan avangin amah an lo lawm lo.
9:54 Tichuan a zirtir Jakoba leh Johana chuan chu chu an hriat veleh, “Lalpa, hengho kan vek nan hian van ata mei ko thla ila rem i ti em?” an ti a.
9:55 Ani erawh chu a han hawi a, a kamkhat a.
9:56 Tin, khaw dangah an kal ta a.
9:57 Tin, kalkawnga an kal laiin tuin emaw a hnenah, “I kalna apiangah ka zui ang che,” a ti a.
9:58 Tin, Isuan a hnenah, “Sihalten kua an nei a, chungleng savate pawhin bu an nei a,Mihring Fapa erawh hi chuan a lu nghahna a nei lo,” a ti a.
9:59 Tin, mi dang hnenah, “Mi zui rawh,” a ti a. Nimahsela ani chuan, “Lalpa, ka pa mi vuitir zet rawh,” a ti a.
9:60 Isua erawh chuan a hnenah, “Mitthiin anmahni mitthi chu vui rawh se; nang chuan Pathian ram thu va hril darh zawk rawh,” a ti a.
9:61 Tin, mi dang pawhin, “Lalpa, ka zui ang che; amaherawhchu ka ina mite tawng thain mi thlahtir zet rawh,” a ti a.
9:62 Tin, Isuan a hnenah, “Tupawh leilehnaa kut nghata hnung lam en chu, Pathian rama mi ni tlak a ni lo ve,” a ti a.
10:1 Tin, chu mi zawhah chuan Lalpan mi dang sawmsarih a ruat a, a kalna tur khaw tinah leh hmun tinah, a hmaah pahnih zelin a tir a.
10:2 Tin, an hnenah, “Buh seng tur a tamhle a, nimahsela a thawktute an tlem; chutichuan a buh seng tura thawktu turte tir turin buh Neitupa hnenah chuan ngen rawh u.
10:3 “Kal rawh u; ngai teh u, chinghne zinga beram no awm angin ka tirh che u hi.
10:4 Tangka ip te, ipte te, pheikhawk te keng suh ula, kalkawngah tumah chibai buk suh u.
10:5 Tin, in luhna in apiangah a hmasa berin, “He inah hian thlamuanna thleng rawh se,” ti ang che u.
10:6 Tin, chutah chuan thlamuan fa a awm chuan in thlamuanna thu chu a chungah a awm reng ang; a awm loh erawh chuan in chungah a lo kir leh ang.
10:7 Chu mi in hlirah chuan awm reng ula, an pek apiang che u eiin bar ang che u; hnathawktu chu hlawh hmu tlak a ni a. In tinah kal lawr suh ang che u.
10:8 “Tin, khua in luhna apiangah an lawm che u chuan an hlui apiang che u chu ei ang che u;
10:9 an khuaa damlo awmte pawh tidam ula, an hnenah, ‘Pathian ram in kiangah a thleng ta,’ ti ang che u.
10:10 Khua in luhna apiangah an lawm loh che u erawh chuan, an kawtthlerah kal chhuak ula,
10:11 ‘In khaw vaivut kan kephaha kai pawh hi in chungah kan tahfai hi; nimhsela Pathian ram in kiangah a lo thleng ta tih hi hre rawh u,’ ti ang che u.
10:12 Ka ti a che u, chu mi niah chuan chu mi khuate tuar tur ai chuan Sodom khaw tuar tur chu a zia a awm zawk ang.
10:13 “Korazin, i chung a pik e! Bethsaida, I chung a pik e! Nangmahnia thilmak tak tithe kha Tura leh Sidon khuaa tih ni sela, saiip puan sina vut zinga thuin an sim daih tawh ang.
10:14 Nimahsela ngaihtuah niah chuan nangni tuar tur ai chuan Tura leh Sidon khaw tuar tur chu a zia a awm zawk ang.
10:15 Tin, nang Kapernaum, van thlengin chawimawi i ni dawn em ni? Mitthi khaw thlenga nam thlak asin i nih dawn.
10:16 “Tupawh nangni thu ngai chu keima thu ngai a ni e; tupawh a duh lo che u chu kei mi duh lo a ni e; tupawh kei mi duh lo chu mi tirtu duh lo a ni e,” a ti a.
10:17 Tin, sawmsarihte chu lawm takin an lo hawng a, “Lalpa, ramhuaite pawh i hming avangin kan thu thuin an awm,” an ti a.
10:18 Tin, ani chuan an hnenah, “Tek anga Setana van atanga a lo tla kha ka hmu asin.
10:19 Ngai teh u, rulte, khawmualkaikuangte rah theihna thu ka pe che u a; engmahin a tina tawp lo vang che u.
10:20 Nimahsela ramhuaite in thu thuin an awm avang hian lawm suh u; vana in hming ziak a nih avangin lawm zawk rawh u,” a ti a.
10:21 Tin, chu mi lai tak chuan Isua chu Thlarau Thianghlimah a lawm em em a, “Aw ka Pa, lei leh van Lalpa, nangin mi fing leh mi bengvarte hnenah heng thu hi i zep a, nausente hnena i puan avang hian ka fak a che; a ni, ka Pa, chutiang tih chu i ngaihin a tha a ni.
10:22 Ka Pain engkim mi kawltir tawh, Fapa chu tunge a nih, Pa lo chuan tuman an hre lo; Pa pawh chu tunge a nih, Fapa leh an hnena Fapain a puan duhnate chauh lo chuan tuman an hre lo,” a ti a.
10:23 Tin, zirtirte lam a hawi a, arukin, “In thil hmuhte hi a hmuhna mitte chu a vannei e!
10:24 Ka ti a che u, zawlnei tam tak leh lal tam takte pawhin in thil hmuhte hi hmuh an chak thin a, nimahsela an hmu si lo; benga in hriatte pawh hi hriat an chak thin a, nimahsela an hre si lo a ni,” a ti a.
10:25 Tin, ngai teh, dan hretu tu emaw a ding a, amah fiah nan, “Zirtirtu, chatuana nun neihna turin engtin nge ka tih ang?” a ti a.
10:26 Tin, ani chuan a hnenah, “Dan lehkhabuah engnge ziak ni? chutah chuan engnge i chhiar thin?” a ti a.
10:27 Tin, ani chuan, “Lalpa i Pathian chu i thinlung zawng zawngin, i thlarau zawng zawngin, i chakna zawng zawngin, i rilru zawng zawngin i hmangaih tur a ni,’ ‘Nangmah i inhmangaih angin i vengte pawh i hmangaih tur a ni,’ tih hi,” a ti a, a chhang a.
10:28 Tin, ani chuan a hnenah, “I chhang dik zet mai e; chutichuan ti la, i nung ang,” a ti a.
10:29 Ani erawh chuan thiam inchantir a tum a, Isua hnenah, “A nih leh, ka vengte chu tunge ni?” a ti a.
10:30 Isuan a chhang a, “Tu emaw Jerusalem khua atangin Jeriko khuaah a zuk kal dawn a, suamhmangte a tawk hlauh va, chu mite chuan a silhfen an hlihsak vek a, an vaw nek a, thi lek lekin an kalsan ta a.
10:31 Tin, puithiam tu emaw chu mi kawngah chuan a zuk kal kher a, a hmuh veleh kawng sir lehlamah a hel ta mai a.
10:32 Tin, chutiang bawkin Levia chi mi pakhat pawh chu mi hmun chu a lo thleng a, a hmuh veleh kawngsir lehlamah a hel ve ta mai a.
10:33 Amaherawhchu Samari rama mi tu emaw a zin kalin a awmna chu a lo thleng a, a hmuh veleh a khawngaihem em a.
10:34 A hnenah a va kal a, a pemahte chuan hriak leh uain a leih a, a tuam a, ama sa chungah a chuantir a, khualbukah a kalpui a, a enkawl ta a.
10:35 Tin, atukah chuan duli pahnih a phawrh a, khualbuk vengtu hnenah a pe a, 'Lo enkawl la, he mi baka i sen zawng chu ka lo kir leh hunah ka rawn rul leh ang che,’ a ti a.
10:36 “Chu mite pathum zingah chuan suamhmangho tawka vengte chu tu ber nge nia i rin?” a ti a.
10:37 Tin, ani chuan, “A khawngaihtu chu,” a ti a. Tin, Isuan a hnenah, “Nang pawh chu ang bawk chuan va ti ve rawh,” a ti a.
10:38 Tin, an zin pahin khaw engah emaw a lut a; tin, hmeichhe pakhat a hming Marthiin a lo thleng a.
10:39 Chu mi chuan laizawn pakhat a nei a, a hming chu Mari a ni a, chu mi chu Lalpa ke bulah a thu a, a thu a ngaithla a.
10:40 Marthi erawh chu rawngbawl ngawtin a buai hle a; tichuan a hnenah a lo kal a, “Lalpa, ka laizawnnun keimah chauh rawngbawl tura mi thlahthlam hi pawi i ti lo vem ni? Mi pui turin ti rawh khai,” a ti a.
10:41 Tin, Lalpan, “Marthi, Marthi, thil tam tak i ngaihtuah a, i buai a nih hi:
10:42 thil pakhat chauh a pawimawh e; Marin chan tha chu a thlang a, chu chu laksak tur a ni lo ve,” a ti a, a chhang a.
11:1 Tin, heti hi a ni a, Isua khawii hmunah emaw a tawngtai a, a tawngtai zawh chuan a zirtir mi pakhatin a hnenah, “Lalpa, tawngtai dan Johanan a zirtirte a zirtir ang khan min zirtir ve ta che,” a ti a.
11:2 Tin, ani chuan an hnenah, “In tawngtai chuan heti hia ti ang che u,‘Kan Pa, I hming zahawm rawh se. I ram lo thleng rawh se.
11:3 Ni tin kan ei khawpin chaw min pe ang che.
11:4 Kan sualte min ngaidam ang che,Keini pawhin kan englo bate zawng zawng kan ngaidam thin a ni.Thlemnaah min hruai lut suh ang che,’ a ti a.
11:5 Tin, amah vekin an hnenah, “In zingan tuin emaw thian nei sela, zan laiah a hnena kalin, ‘Thiana, chhangper pathum mi puktir rawh;
11:6 Ka thian zinin mi rawn tlawh a, a hmaa hlui tur engmah ka nei si lo,’ ti sela;
11:7 in chhunga miin, ‘Mi tibuai suh; tunah zawng kawng khar a ni a, ka fate pawh ka hnenah khumah an mu tawh a; thovin ka va pe thei lo va che,’ tiin chhang sela –
11:8 ka ti a che u, a thian a nih avangin thovin a va pe lo na a, a dil ngut ngut avangin thovin a duh zat apiang a va pe ang.
11:9 “Chutichuan ka ti a che u, dil rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u.
11:10 Tupawh a dil apiang chuan an hmu thin a, tupawh a zawng chuan an hmu thin a, tupawh a kik chu an hawnsak dawn a ni.
11:11 Nangniho zinga pa hi, a fapain chhangper dil sela, tunge lung pe ang? a nih leh, sangha dil sela, tunge sangha aiah rul pe ang?
11:12 A nih leh, artui dil sela, khawmualkaikuang a pe ang em ni?
11:13 Chutichuan nangni mi sual mahin in fate thil tha pek nachang in hriat chuan, in Pa vana mi chuan a diltute chu Thlarau Thianghlim a va pe dawn em!” a ti a.
11:14 Tin, Isuan ramhuai tawngtheilo pakhat a hnawt chhuak a. Tin, heti hi a ni a, ramhuai chu a chhuah veleh tawngtheilova chu a lo tawng ta a; tichuan mipuihovin mak an ti hle a.
11:15 Nimahsela a then chuan, “Ramhuai lal Beelzebula avangin alawm ramhuaite a hnawh chhuah thin ni,” an ti a.
11:16 Tin, a thenin amah fiah nan van ata hriatna an dil a.
11:17 Ani erawh chuan an ngaihtuahte chu a lo hria a, an hnenah, “Khawii ram pawh mahni indo apiang an boral thin; chhungkhat pawh mahni indo chu an boral thin.
11:18 Setana pawh mahni a indo chuan, a ram engtin nge a din chhuah ang? – ‘Beelzebula avangin ramhuaite a hnawt chhuak,’ min ti si a.
11:19 Tin, kei hi Beelzebula avanga ramhuaite hnawt chhuak thin ka lo nih chuan in faten tu vangin nge an lo hnawh chhuah thin le? Chuvangin anni chu nangmahni ngaihtuahtu turte an ni ang.
11:20 Amaherawhchu, kei hian Pathian kutzung avanga ramhuaite hnawt chhuak thin ka nih chuan Pathian ram in hnenah a lo thleng tawh a ni ang.
11:21 “Mi chak chuan hriam famkim kenga a in a ven chhung zawng, a sum chu him takin a awm reng thin;
11:22 nimahsela a aia chak zawkin a rawn bei a, a hneh hun chuan a inrinna ralthuam famkim chu a chhuhsak a, a sum a laksak chu a sem darh thin.
11:23 Tupawh ka lama tang lo chu mi do a ni; tupawh mi lak khawmpui lo chuan a tidarh a ni.
11:24 “Ramhuai bawlhhlawh chu mi kawchhung ata a chhuahin chawlna zawngin tui awm lohna hmunahte a vak a vak thin a; tin, chawlhna reng reng a hmu lo va, ‘Ka chhuahna inah khan ka kir leh mai ang,’ a ti a;
11:25 tin a va thlen chuanin phiah faia cheimawiin a hmu a.
11:26 Chu veleh a va kal a, amah aia sual zawk ramhuai dang pasarih a rawn hruai a, chutah chuan an lut a, an awm reng thin a; chu mihringa awmze hnuhnung chu a hmasa aiin a lo tha lo zawk thin a ni,” a ti a.
11:27 Tin, heti hi a ni a, chung thute chu a sawi laiin mipui zingan hmeichhia tu emaw a lo au chhuak a, a hnenah, “I paina pum chu a hamtha e, i hnute hnek pawh,” a ti a.
11:28 Ani erawh chuan, “A ni, nimahsela Pathian thu hriaa zawmte hi mi hamtha an ni zawk e,” a ti a.
11:29 Tin, mipuite chu a hnena an rawn inkhawm laiin Isuan, “Tun lai chhuante hi chhuan sual an ni; chhinchhiahna an zawng a; nimahsela Jona chhinchhiahna chauh lo chu an hnenah chinchhiahna reng reng pek a ni lo vang.
11:30 Jona chu Ninevi khuaa mite tan chhinchhiahna a lo ni ang khan, Mihring Fapa pawh tun lai chhuante tan hian chhinchhiahna a la ni ang.
11:31 “Chhim lam lalnu kha ngaihtuah hunah chuan tun lai chhuante hnenah hian a tho ve ang a, thiam loh a chantir ang; Solomona fin ngaithla tur mahin kawlkil ata a lo kal si a; ngai teh u, Solomona aia ropui zawk hetah hian a awm asin.
11:32 “Ninevi khuaa mite chu ngaihtuah hunah chuan tun lai chhuante hnenah hian an ding ve ang a, thiam loh an chantir ang, Jona thuhril avangin an sim si a; ngai teh u, Jona aia ropui zawk hetah hian a awm asin.
11:33 “Tuman khawnvar an halin in hnuai pukah an dah ngai lo, hrai hnuaiah an dah ngai hek lo,mi lutte chuan a eng an hmuh theih nan a dahnaah chuan an dah zawk thin a ni.
11:34 “I taksa khawnvar chu i mit a ni; i mit a fim chuan i taksa pawh apumin a eng chhuak thin; a chhiat erawh chuan i taksa pawh a thim zo vek thin.
11:35 Chutichuan i chhunga eng awm chu thim a lo ni dah law maw fimkhur rawh.
11:36 Chutichuan taksa hi khawi lai mah thim lova apuma a en chhuah chuan, khawnvar eng nasa takin a en che angin a eng chhuak vek ang,” a ti a.
11:37 Tin, a sawi laiin Pharisai pakhatin amah chu a hnena chaw eiah a sawm a; tichuan a lut a, chaw a kil a.
11:38 Tin, Pharisai chuan a chaw kil chu a hmuhin, chaw ei hmaa kut a sil lo chu kam a ti hle a.
11:39 Tin, Lalpa chuan a hnenah, “Nangni Pharisaiten no leh thleng pawn lam chu in silfai thin tak a; in kawchhung lam erawh chu hlepruk leh sualin a khat si a.
11:40 Mi ate u, pawn lam siamtuin chhung lam pawh a siam lo vem ni?
11:41 Nimahsela a chhunga thil awm chu mi rethei hnena pek atan hmang rawh u; tichuan ngai teh u, in tan engkim a thianghlim tawh a ni.
11:42 “Nangni Pharisaite u, in chung a pik e! Pudina te, pardi te, thlai tinreng te sawma pakhat in pe thin a, felna leh Pathian hmangaihna chu in ngaihthah si thin; nimahsela chung chu asin in tih tur ni, a dangte chu tih thulh chuang lovin.
11:43 Nangni Pharisaite u, in chung a pik e! Inkhawmna inah thutphah tha berte leh dawr hmuna chibai bukte in ngaina si thin a.
11:44 In chung a pik e! Thlan tih hriat loh, a chunga hre lova mi an kal thinna ang chu in ni e,” a ti a.
11:45 Tin, dan hretu pakhatin a hnenah, “Zirtirtu, heng thu i sawi hi keini pawh min hau i nih hi,” a ti a, a chhang a.
11:46 Tin, ani chuan, “Dan hretute u, nangni pawh in chung a pik e! Thil phurh hrehawm takte mite in bel thin a, nangni chuan phurte chu in kut zungtang pakhat pawhin in khawih ngai si lo.
11:47 In chung a pik e! Zawlneiho thlan inte in sa thin a, in thlahtute thah an ni si a.
11:48 Chutichuan in thlahtute thiltihte chu in hriatpuiin in remtihpui a ni; annin an that a, nangnin an thlan inte in sa si a.
11:49 Chuvangin Pathian finna pawhin, ‘An hnenah zawlneite leh tirhkohte ka tir ang a, a then an that ang a, a then an tiduhdah ang;
11:50 ,51 chutichuan Abela thisen chhuah achin Zakaria, maicham leh biak in inkara thia thisen chhuak thleng khan ,zawlnei zawng zawng thisen , leilung pian tirh ata chhuak chu,tunlai chhuante chungah hian phuba an la thei ang,’ a tih kha. A ni, ka hrilh a che u, tun lai chhuante chungah hian phuba an la ang.
11:51 ,50 chutichuan Abela thisen chhuah achin Zakaria, maicham leh biak in inkara thia thisen chhuak thleng khan ,zawlnei zawng zawng thisen , leilung pian tirh ata chhuak chu,tunlai chhuante chungah hian phuba an la thei ang,’ a tih kha. A ni, ka hrilh a che u, tun lai chhuante chungah hian phuba an la ang.
11:52 Nangni dan hretute u, in chung a pik e! Finna chabi chu in kal bopui a; nangni lah in lut si lo va, mi lut tur pawh in khap si a,” a ti a.
11:53 Tin, chuta ta a chhuah chuan lehkhaziaktute leh Pharisaite chuan amah chu an tai ta ran a, thu tinreng an sawi luihtir a,
11:54 a tawng sual hlauhva man tumin an chang reng a.
12:1 Chutih chhunga mipui sang tam tak inrap nul nul khawp hial an rawn inkhawm chuan, Isuan a hmasa berin a zirtirte hnenah, “Pharisaite dawidim, vervekna lakah chuan fimkhur rawh u.
12:2 Lang lo tura thuhruk engmah a awm si lo; hriat loh tura zep pawh engmah a awm hek lo.
12:3 Chuvangin thima in sawi apiang kha engah an la hria ang a; pindan chhungrila beng bula in thusawi kha in chunga chuangin an la tlangaupui ang.
12:4 Tin, ka thiante u, ka hrilh a che u, ‘Taksa tihlum a, chu mi hnua engmah dang ti leh thei tawh lote chu hlau suh ang che u,
12:5 Amaherawh chu tunge in hlauh tur ka hrilh lawk ang che u:A tihhlum hnu pawha Gehena- a paih theihna thu neia chu hlau rawh u; a ni, ka hrilh a che u, amah mawlh chu hlau rawh u.
12:6 Chawngzawng panga dar tangka pahnihah an hralh thin lo vem ni? nimahsela an zinga pakhat mah Pathianin a hmaih ngai si lo.
12:7 In samzaite lam pawh hi chhiar vek a ni asin. Hlau suh u; chawngzawng tam tak aiin in hlu zawk a ni.
12:8 “Tin, ka hrilh a che u, mite hmaa mi tan apiang Pathian vantirhkohte hmaah Mihring fapain a tan ve ang.
12:9 Nimahsela mite hmaa mi phat chu Pathian vantirhkohte hmaah phat a ni ve ang.
12:10 Tin, Mihring Fapa sawisel apiangte chu an sawiselna chu ngaihdamsak a ni ang;Thlarau Thianghlim meuh sawichhia erawh chu a sawichhiatna chu ngaihdamsak a ni lo vang.
12:11 “Tin, inkhawmna ina mite, lalte, hotute hmaa an hruai hunah che u chuan ‘Engtin nge, eng thuin nge ka chhan ang, eng thu nge ka sawi ang,’ tiin lungkham suh ang che u;
12:12 chutih hun takah chuan engnge in sawi tur rem, Thlarau Thianghlimin a hrilh ang che u,” a ti a.
12:13 Mipui zinga tuin emaw Isua hnenah, “Zirtirtu, ka u hnenah, ro mi sem ve turin hrilh rawh,” a ti a.
12:14 Nimahsela ani chuan a hnenah, “Mihring, nangni chungah tuin nge roreltuah leh sum semtuah mi siam?” a ti a.
12:15 Tin, an hnenah, “Fimkhur ula, awhna reng reng lakah chuan inveng rawh u; sum ngah hi mihring dam chhan a ni lo ve,” a ti a.
12:16 Tin, an hnenah tehkhin thu a sawi a:“Mi hausa tu emaw a lo a hlawk em em a;
12:17 tichuan a inngaihtuah a, ‘Engtin nge ka ti ang aw? ka buh leh bal dah khawmna ka nei si lo va,’ a ti a.
12:18 Tin, ‘Heti hian ka ti the ang; ka buh inte ka thiat ang a, a aia lianin ka sa ang a; chutah chuan ka buh leh ka sum zawng zawng ka dah khawm ang.
12:19 Tin, ka thlarau hnenah, ‘Thlarau, kum tam tak chhung atan sum tam tak i khawl hi; chawl la, eiin bar la, hlim takin awm rawh ka ti ang,’ a ti a.
12:20 Nimahsela Pathianin a hnenah, ‘Mi a, zaninah hian i thlarau an laksak dawn che a ni; i thil dehchhuahte kha tu ta nge ni ta ang le?’ a ti a.
12:21 Mahni tana sum khawla Pathian lama ngah si lo chu, chuti chu a ni thin,” a ti a.
12:22 Tin, a zirtirte hnenah, “Chuvangin ka hrilh a che u, ‘Engnge ka ei ang aw?’tiin in nunna thu leh, ‘Engnge ka silhin ka fen ang aw?’ tiin in taksa thu lungkham suh u.
12:23 Ei tur aiin nunna a thupui zawk a ni, silhfen ai pawhin taksa a thupui zawk a ni.
12:24 Choakte hi ngaihtuah rawh u, buh an tuh hek lo, an at hek lo, zem te, buh in te pawh an nei lo; nimhsela Pathianin a chawm si a; nangni chu savate ai chuan in hlut zawkzia mai chu!
12:25 Tin, nangni zingh lungkham avangin tuin nge mahni dung lam tawng khata tisang chuang thei?”
12:26 He mi te mah ti thei lo che u a, engati nge thil dang in lungkham thin?
12:27 “Tuktinpar thanzia hi ngaihtuah rawh u; hna an thawk lo, la pawh an kai hek lo; nimahsela ka hrilh a che u, Solomona meuh pawh a ropuina zawng zawnga a inthuam khan heng tuktinpar pakhat tluk pawh hian cheiin a awm lo.
12:28 Chutichuan ram hnim, vawiin anga nung, atuka thuka tuah leh mai tur mah, Pathianin chuti kauva a chei chuan, aw, nangni rin tlem te u, chu mi ai chuan silhfen a va pe dawn che u em!
12:29 “Tin, in ei tur te, in in tur te zawng suh u; tuilairap angin awm pawh awm suh u.
12:30 Khawvela hnam tinin chung thil zawng zawng chu an zawng thin a ni; chung chu in mamawh tih in Pain a hre reng si a.
12:31 Ama ram zawng zawk rawh u, tichuan chung thil pawh chu a pek belhchhah dawn che u nia.
12:32 Pawl tlemte u, hlau suh u; ram pek che u hi in Pa lawmzawng tak a ni.
12:33 “In neih apiang hralh ula, mi retheite hnenah pe rawh u; vanah rukru kal lohnaah, sulrul ei chhiat lohnaah chuan tangka ip hlui thei lo te, sum ral thei lo te insiam rawh u.
12:34 In ro awmna apiangah in rilru pawh a awm dawn si a.
12:35 “Puan veng rengin, in khawnvar pawh alh rengin awm ula;
12:36 miin an pu lawi chaw ei a lo haw huna kawngkhar a rawn kik veleh a, lo hawn thei nghal tura an lo nghak reng ang hian awm rawh u.
12:37 An pu a lo kal hunah bawih lo nghak reng a hmuhate chu an eng a thawl ang;tih tak meuhvin ka hrilh a che u, ani chuan a puan a rawn veng ang a, anmahni chu chaw kilin a thuttir ang a, an rawng a rawn bawl ang.
12:38 Zan laiah emaw, thawh hunah emaw a lo kal a, chutianga a rawn hmuh chuan chu bawihte chu an eng a thawl ang.
12:39 Amaherawhchu hei hi hre rawh u, rukru a lo kal hun tur in neituin hria sela, a veng ang a, a in a rehpawhtir lo vang.
12:40 Nangni pawh inring rengin awm rawh u, in rin loh hunah Mihring Fapa a lo kal dawn si a,” a ti a.
12:41 Tin, Peteran, “Lalpa, he tehkhin thu hi keimahni chauh nge mi hrilh, mi zawng zawng?” a ti a.
12:42 Tin, Lalpan, “Sum enkawltu rinawm, fing tak, a puin a hun apianga an chaw chan tur semsak turin a chhungte chunga hotua a siam tur chu tu ber nge ni ang le?
12:43 A pu a lo kal hunah bawih chutiang tia a rawn hmuha chu a eng a thawl ang.
12:44 Dik takin ka hrilh a che u, a neih zawng zawng chunga hotuah a siam ang.
12:45 Amaherawhchu chu bawih chuan a rilruin, ‘Ka pu a lo kal lawk dawn lo ve,’ tiin bawihnute, bawihpate lo vel sela, eiin barin lo rui ta sela,
12:46 chu bawiha pu chu a rin loh niah, a hriat loh laiin a lo kal ang a, bung hnihah rawn chhuah ang a, mi rinawm lote chan ang a chantir ang.
12:47 Bawih, a pu duhzawng hre reng chunga lo inring si lo va, a pu duhzawng ang pawha ti lo chu vawi tam tak an vua ang.
12:48 Amaherawhchu hre lo chunga vuakna khawp thil ti chu vawi tlem te an vua ang. Tupawh tam tak an peka hnenah chuan tam tak an phut ang; tupawh tam tak an kawltira hnenah chuan tam deuh an phut ang.
12:49 “Khawvelah mei thlak thla tura lo kal ka ni; tunah pawh kang tawh pang sela, ka va ti em!
12:50 Nimahsela baptisma chan tur ka nei, chu mi tleitlak hma loh chu ka thaw a va ipik em!
12:51 Khawvela rem lentir tura lo kal emaw mi ti elo? Hnai lo ve, ka hrilh a che u, do lentir tura lo kal zawk ka ni;
12:52 tun hnuah chuan chhung khatah mi panga an indo vang, pathumin pahnih, pahnihin pathum.
12:53 An indo vang a, pain a fapa, a fapain a pa; a nuin a fanu, a fanuin a nu; a piin a mo, a movin a pi,” a ti a.
12:54 Tin, mipui hnenah pawh chuan, “Thlang lama chhum chhuak in hmuh chuan, ‘Ruah a sur dawn,’ in ti nghal thin a; tin, a lo ni ngei thin.
12:55 Tin, chhim thli tleh in hriat chuan, ‘Thaw a sa dawn e,’ in ti thin a; tin, a lo ni ngei thin.
12:56 Nangni vervekte u, khawvel leh van awmzia pawh in hre fiah thiam si a, engati nge tun lai thil hi in hriat fiah thiam loh ni?
12:57 Engati nge nangmahnin a fel chu in ngaihtuah loh?
12:58 “Tin, roreltu hmaa i khingpui nen inkal hunin, kal pahin a lakah fihlimna mawlh zawng hram rawh; chutilochuan roreltu hmaah a hruai lui ang chia, roreltu chuan mi man hotu a mantir ang chia, mi man hotu chuan tan inah a khung hlauh dah ang che.
12:59 Ka hrilh a che, dar tangka dere te pawh i tlak kim hma loh chuan, chuta ta chu i chhuak lo hul hual ang,” a ti a.
13:1 Tin, chutih lai tak chuan tute emaw an lo awm a, chu mite chuan Galili rama mi, Pilatan an thisen an Pathian biakna sa talhte zinga a telh sakate chanchin chu Isua an hrilh a.
13:2 Tin, ani chuan an hnenah, “Chu Galili rama mite chu, chutiang thil an tuar avangin Galili rama mi zawng zawng aiin mi sual bik niin in ring em ni?
13:3 Ni suh e, ka hrilh a che u, nangni pawh in sim loh chuan chutiang bawkin in boral vek ang.
13:4 Tin, Siloam in sangin mi sawm leh pariat a delhhlumte pawh kha, Jerusalem khuaa awmte zawng zawng aiin mi sual bik niin in ring em ni?
13:5 Ni suh e, ka hrilh a che u, nangni pawh in sim loh chuan chutiang bawkin in boral vek ang,” a ti a, a chhang a.
13:6 Tin, he tehkhin thu hi a sawi a:“Tuin emaw a grep huanah theipui phun pakhat a nei a; tin, a kungah chuan a rah a rawn zawng a, pakhat mah a hmu lo a.
13:7 Tichuan grep hrui enkawltu hnenah, ‘Ngai rawh, kum thum chhung hian he theipui kungah hian a rah ka va zawng thin a, pakhat mah ka hmu si lo; kit rawh; enga tinge hmun pawh awha a awm reng ni?’ a ti a.
13:8 Tin, ani chuan a hnenah, “Ka pu, kumin tal hi awm sela, a velin ka lai ang a, ekin ka vur rih ang a;
13:9 chu mi achina a rah chuan a tha ang, a rah loh erawh chuan kit mai ang che,’ a ti a,” a ti a.
13:10 Tin, chawlhniin ani chuan inkhawmna in pakhatah a zirtir a.
13:11 Tin, ngai teh, kum sawm leh kum riat ramhuai man chak loh vei hmeichhe pakhat a awm; chu mi chu a kun reng a, amah chuan a ding ngil thei tawp lo va.
13:12 Tin, Isuan a hmuh veleh a ko va, a hnenah, “Hmeichhia, i chak lohna chuan a thlah ta a che,” a ti a.
13:13 Tin, a chungah a kut a nghat a; tichuan thawklehkhatan a ngil ta nghal a, Pathian a fak ta a.
13:14 Tin, Isuan Chawlhnia mi a tihdam avangin inkhawmna in hotu chu a thinur a, mipui chu a bia a, an hnenah, “Mihring hnathawhna tur ni ruk a awm alawm; chu mi chhungin lo kal ula, intidam rawh u, Chawlhnia lo kal lovin,” a ti a.
13:15 Lalpa erawh chuan a hnenah, “Nangni vervekte u, Chawlhniin mahni sebawng emaw, sabengtung emaw a chaw eina ata phelhin, tui in turin in hruai chhuak theuh thin a ni lo vem ni?
13:16 He hmeichhia hi Abrahama fanu a ni si a, ngai teh u, Setanan kum sawm leh kum riat a man reng hi, Chawlhniah pawh he mi phuar hi han phelhsak lohzia em ni?” a ti a, a chhang a.
13:17 Chung thute chu a sawi laiin a hmelmate zawng zawng chu an zak ta a; mipui erawh chu a thil ropui tih zawng zawng avangin an lawm vek a.
13:18 Chutichuan ani chuan, “Pathian ram chu eng ang nge ni? Eng chen nge the pawh ka tehkhin ang?
13:19 Antam chi fang khat miin a laka a huana a theha ang chu a ni; chu chu a lo to va, thing a lo ni a, chungleng savate chu a zarahte chuan an riak a,” a ti a.
13:20 Tin, “Pathian ram chu eng nen nge ka tehkhin ang?” a ti leh a,
13:21 “Dawidim hmeichhiain a laka chhangphut tehkhawng thum zingah a zaa a thawh vek thlenga a phuma ang chu a ni,” a ti a.
13:22 Tin, ani chuan zirtir chung zela Jerusalem khaw lam panin, khaw lian leh khaw tete a tlawh zel a.
13:23 Tin, tuin emaw a hnenah, “Chhandamte chu tlem te em an nih?” a ti a.
13:24 Tin, ani chuan an hnenah, “Kawngka zimah chuan luh tum hram rawh u; ka hrilh a che u, mi tam takin luh an tum ang a, an lut thei si lo vang.
13:25 In neitu a thawh a, kawng a khar hnu chuan nangnin pawna dingin, ‘Lalpa, kawng min hawnsak rawh,’ tiin kawngkhar in rawn kik hunah, anin, ‘Khawii lama mi nge in nih ka hre lo a che u,’ tiin a chhang ang che u a;
13:26 chutih hunah chuan nangnin, ‘I hmuhah pawh kan eiin kan bar tawh kha, kan kawtthlerahte pawh i zirtir thin kha,’ in la ti ang a;
13:27 tin, anin, ‘Ka hrilh a che u, khawii lama mi nge in nih ka hre lo; nangni thil sual ti zawng zawngte u, ka hnen ata kal bo vek rawh u,’ a la ti ang.
13:28 “Abrahama te, Isaaka te, Jakoba te, zawlnei zawng zawngte chu Pathian ram chhunga awm in hmuh a, nangni pawna hnawh chhuah in nih in inhriat hunah, chutah chuan tah leh ha thial chu a awm ang.
13:29 Tin, chhak leh thlang, chhim leh hmar atangin an lo kal ang a, Pathian ramah an lo thu ang.
13:30 Tin, ngai teh u, hnuhnung berte pawh hmasa bera awm tur an awm a, hmasa berte pawh hnuhnung bera awm tur an awm,” a ti a.
13:31 Chutih lai tak chuan Pharisai tute emaw an lo kal a, a hnenah, ‘Chhuak la, heta ta kal bo rawh; Herodan tihhlum che a duh em em a ni,” an ti a.
13:32 Tin, ani chuan an hnenah, “Chu sihal hnenah chuan he thu hi va sawi rawh u;‘Ngai rawh, vawiinah nen, naktukah nen, ramhuaite ka hnawt chhuak ang a, nate pawh ka tidam ang a, atuk lehah ka zo vang.
13:33 Engpawh ni rawh se, vawiinah nen, naktukah nen, atuk lehah nen ka kal zel tur a ni; Jerusalem khaw pawn lamah zawlnei thih theih a ni lo ve,” a ti a.
13:34 “Aw Jerusalem, Jerusalem! Zawlneiho thattu, i hnena an rawn tirhte lunga lo denghlumtu! Arpuiin mahni note a thla hnuaia awp khawm a tum ang in I fate vawi eng zat nge awp khawm ka tum kha! Nimahsela in duh si lo.
13:35 En teh u, in in chu aruaka hnutchhiah che uin a awm ta. Ka hrilh a che u,‘Lalpa hminga lo kal chu a eng a thawl e,’ in tih hma loh chuan mi hmu leh tawh lo vang,” a ti a.
14:1 Tin, heti hi a ni a, Chawlhniin Pharisai hotu pakhat ina chaw ei tura a kal chu an enthla reng a.
14:2 Tin, ngai teh, a hmaah chuan dam lo vung mi tu emaw a awm.
14:3 Tichuan Isuan dan hretute leh Pharisaite chu a bia a, an hnenah, “Chawlhniin tihdam a thiang nge thiang lo?” a ti a.
14:4 Anni erawh chu an ngawi reng a. Tin, ani chuan damlo chu a chelh a, a tidam a,a kaltir ta a.
14:5 Tin, an hnenah, “Nangni zingan in sabengtung emaw, sebawng emaw tuichhunchhuahah lo tla sela, Chawlhni pawhin tunge hnuk chhuak nghal lo vang che u?” a ti a.
14:6 Chung thu chu an chhang thei lo leh bawk a.
14:7 Tin, an mi sawmten thutphah tha ber an thlan thinzia a hmu a, an hnenah tehkhin thu a sawi ta a;
14:8 “Lawi chaw ei turin tuin emaw a sawm hunah che chuan thutphah tha berah thu suh ang che; chutilochuan i aia mi tha zawk a lo sawm hlauh ang a,
14:9 tichuan a sawmtu che chuan, ‘He mi thutna tur hi kian rawh,’ a rawn ti ang chia; tin, nang zak takin thutphah tha lo berah i thu leh si tur a ni.
14:10 An sawm hunah che chuan thutphah tha lo berah va thu zawk ang che; chutichuan a sawmtu che a lo kal hunah i hnenah, ‘Thiana, thutphah tha deuvah thu rawh,’ a ti thei ang che. Chutichuan i chaw kilpuite mithmuhah chuan chawimawiin i awm ang.
14:11 Inngaihlu apiang an tlawm ang a; inngaitlawm chu chawimawiin an awm ang,” an hnenah a ti a.
14:12 Tin, a sawmtu hnenah pawh chuan, “Chhunah emaw, zanah emaw ruai i theh hunin i thiante, i unaute, i laichinte, i veng hausate chu sawm suh ang che; chutilochuan an sawm ve leh ang chia, an rul leh kher ang che.
14:13 Ruai i theh hun chuan pachhiate, piangsualte, kebaite, mitdelte sawm zawk ang che;
14:14 tichuan chung ang chuan rulhna tur che an neih loh avangin i eng a thawl ang; mi felte thawhleh hunah rulh leh i ni dawn si a,” a ti a.
14:15 Tin, a chaw kilpui tuin emaw chung thu chu a hria a, a hnenah, “Pathian rama chaw ei tur chu an eng a thawl e,” a ti a.
14:16 Tin, ani chuan a hnenah, “Mi tuin emaw zanah ruai ropui takin a theh a, mi tam tak a sawm a;
14:17 tin, a ei hun chuan a mi sawmte hnenah, ‘Lo kal rawh u, tunah engkim peih a ni ta e,’ ti turin a bawih a tir a.
14:18 Tin, an zain thu khat vuain chhuanlam an nei vek a. A hmasa berin a hnenah, ‘Lo ka lei ta a, a enin ka kal a tul a ni; mi khawngaih la mi han phatsak ang che,’ a ti a.
14:19 Tin, mi dangin, ‘Sebawng tuak nga ka lei ta a, a chhia a tha fiahin ka kal dawn a, mi khawngaih la mi han phatsak ang che,’ a ti a.
14:20 Tin, mi dangin, ‘Nupui ka nei ta a, chuvangin ka kal thei lo,’ a ti a.
14:21 Tin, bawih chuan a pu hnenah chung thu chu a va hrilh a. Tin, in neitu chu a thinur a, a bawih hnenah chuan, “Chhuak la, kawtthlerahte, kawmkarahte kal thuai thuai la, pachhiate, piangsualte, mitdelte, kebaite hetah rawn hruai lut rawh,” a ti a.
14:22 Tin, bawih chuan, ‘Ka pu, i thu mi pek ang khan ka ti tawh a, nimahsela hmun a la chuang ta fo,’ a ti a .
14:23 Tin, a puin bawih hnenah chuan, ‘Chhuak la, lamlianahte, daiahte kal la, ka in khah nan mi han thlem lut hram rawh.
14:24 Ka hrilh a che, mi ka sawmte khan pakhat mahin ka ruaitheh an ei lo vang,’ a ti a,” a ti a.
14:25 Tin, mipui tam tak a hnenah an kal ve a; tichuan ani chu a hawi a, an hnenah,
14:26 “Tupawh ka hnena lo kal chuan, a pa te, a nu te, a nupui te, a fa te, a unau te, a farnu te, ama nun nen lam pawh a huat loh chuan ka zirtir a ni thei lo vang.
14:27 Tupawh mahni kraws pua mi zui lo apiang chu ka zirtir a ni thei lo vang.
14:28 “Nangni zingah tupawhin in sang sak tum ula, atirin thuin sak zawhna khawp sum in neih leh neih loh hre turin, a man tur chin tunge chhut lo vang che u?
14:29 ,30 Chutilochuan lung phum tawh zeta, a sak zawh theih loh chuan a en apiangin, ‘He mi hian in a rel ting a, a sa zo thei si lo,’ tiin an nuihsan dah ang e.
14:30 ,29 Chutilochuan lung phum tawh zeta, a sak zawh theih loh chuan a en apiangin, ‘He mi hian in a rel ting a, a sa zo thei si lo,’ tiin an nuihsan dah ang e.
14:31 “Tin, lal tuin nge lal dang do tura a kal dawnin, atirin thuin, mi singhnih nena amah do tura lo kal chu, mi singkhat nen a tawh ngam dawn leh dawn loh mi rawn lo vang?
14:32 Chuti a nih loh vek leh, lal dang chu hla taka a la awm laiin inremna lam thutiam dil turin palai a tir ang.
14:33 Chutiang bawkin nangni zingah hian tupawh a neih zawng zawng kalsan lo apiang chu ka zirtir a ni thei lo vang.
14:34 “Chi hi a tha e; nimahsela chi pawh a dak tawh chuan engin nge an tihal leh ang?
14:35 Lei tan a tha lo vang, ek dur tan pawh a tha hek lo vang; miin an pai chhuak thin. Tupawh hriatna tura beng nei chuan hre rawh se,” a ti a.
15:1 Tin, chhiahkhawntute leh mi sualte zawng zawngin a thu hre turin a kiang an rawn pan a.
15:2 Tin, Pharisaite leh lehkhaziaktute chuan, “He mi hian mi sualte a pawl a, an hnenahte chaw a ei ve thin,” tiin an phunnawi ve ve a.
15:3 Tichuan anin an hnenah he tehkhin thu hi a sawi a:
15:4 “Nangni zingah tupawhin beram za nei ula, an zinga pakhat hloh ang ula, thlalerah sawmkua leh pakuate chu hnutchhiahin a bo chu in hmuh leh hma loh zawng tunge zawng lo vang che u?
15:5 Tin, in hmuh leh chuan lawm takin in kokiah in pu thin.
15:6 Tin, in in thlen veleh in thiante leh in vengte in ko khawm a, an hnenah, ‘Mi lawmpui rawh u, ka beram bo kha ka hmu leh ta e,’ in ti thin.
15:7 Ka hrilh a che u, chutiang bawkin mi fel sawmkua leh pakua sim chuan tur nei lote ai chuan mi sual pakhat sim chungah hian vana mi an lawm zawk ang.
15:8 “Tin, hmeichhia tupawh duli sawm neiin pakhat hloh ang sela, khawnvar hala in phiatin, a hmuh leh hma zawng tunge ngun takin zawng lo vang?
15:9 Tin, a hmuh leh chuan a thiante leh a vengte a ko khawm a, ‘Mi lawmpui rawh u, ka duli hloh kha ka hmu leh ta e,’ a ti thin.
15:10 Ka hrilh a che u, chutiang bawkin Pathian vantirhkohte hmaah chuan mi sual pakhat sim chungah an lawm thin a ni.
15:11 “Tin, mi tuin emaw fapa pahnih a nei a;
15:12 tin, a naupang zawk chuan a pa hnenah, ‘Ka pa, ro ka chanai mi pe rawh,’ a ti a. Tichuan a sum chu an hnenah a sem ta a.
15:13 Tin, ni rei lo te achinah a fapa naupang zawk chuan a chanai zawng zawng chu a la khawm vek a, khaw lam hla takah a kal ta a, chutah chuan nuam lutukin a awm a, a sum chu a khawral ta mai mai a.
15:14 Tin, a dehral zawh veleh, chu khaw lamah chuan tam nasa tak mai a lo tla a; ei tur a lo tlachham ta a.
15:15 Tichuan chu mi khaw lam mi mi pakhat a va bel a; chu mi chuan vawk chaw pe turin a lo lamah a tir a.
15:16 Tin, englo kawm vawkin an eite chuan intihpuar a duh em em a; tuman engmah an pe si lo.
15:17 “Tin, a inhriat chhuah veleh, ‘Ka pa hnena inhlawhfate chaw ei sen lohva nei an tam vei nen, kei lah chu hetah riltamin ka thi dawn si a!
15:18 Ka tho vang a, ka pa hnenah ka kal ang a, a hnenah, Ka pa, vana mi chungah leh nangma mithmuhin thil ka tisual e;
15:19 i fapaa vuah tlak ka ni ta lo ve; i hnena inhlawhfa pakhat angin mi siam ve rawh, ka ti ang,’ a ti a.
15:20 “Tichuan a tho va, a pa hnenah a kal ta a. Chutichuan hla taka a la awm laiin a pain a lo hmu a, a khawngaih em em a, a tlan a, a ir a chuktuah a, a fawp ngawih ngawih a.
15:21 Tin, a hnenah a fapain, ‘Ka pa, vana mi chungah leh nangma mithmuhin thil ka tisual e; i fapaa vuah tlak ka ni ta lo ve,’ a ti a.
15:22 Nimahsela a pa chuan a bawihte hnenah, ‘Puan tha ber kha han la thuai ula, han sintir rawh u; a kutah zungbun te, a kehphahah pheikhawk te buntir rawh u;
15:23 sebawng no thau tak kha han la ula, talh rawh u, hlim takin i ei ang u;
15:24 he ka fapa hi a thi a, a lo nung leh ta a nih hi; a bo va, kan hmu leh ta a nih hi,’ a ti a. Tichuan hlim takin an awm tan ta a.
15:25 “Tin, a fapa upa zawk chu lovah a awm a; tin, in a lo thlen dawn chuan englo tum ri leh lam thawm a hre ta a.
15:26 Tichuan chhiahhlawh pakhat a ko va, ‘Chu engnge ni ta?’ tiin a zawt a.
15:27 Tin, ani chuan a hnenah, ‘I nau a lo hawng a, him takin a hmuh leh avangin i pain sebawng no thau tak kha a talh a ni,’ a ti a.
15:28 Tin, a thinur a, a lut duh ta lo va; tin, a pa a lo chhuak a, a thlem a.
15:29 Nimahsela ani chuan a pa hnenah, ‘Ngai rawh, kumkhaw hei leh chen hi ka chawm chia, i thu lah hi ka awih lo ngai si lo va; ka thiante nena hlimna ka siamna turin kelte pawh mi pe ngai si lo va;
15:30 nimahsela hei i fapa, nawhchizuarte hnena i sum eiral vektu hi a lo haw veleh ama tan sebawng no thau tak kha i talhsak vei a,’ a ti a, a chhang a.
15:31 “Tin, ani chuan a hnenah, ‘Ka fapa, ka hnena awm reng i ni alawm, ka neih zawng zawng hi i ta a ni e.
15:32 Hlim tak leh lawm taka awm tur a ni reng alawm; he i nau hi a thi a, a lo nung leh ta a; a bo va, kan hmu leh ta a ni si a,’ a ti a,” a ti a.
16:1 Tin, Isuan a zirtirte hnenah he thu pawh hi a sawi a:“Mi hausa tuin emaw sum enkawltu a nei a; chu mi chuan a sum a khawhralsak mai mai kawngah a hnenah an hek a.
16:2 Tichuan ani chuan amah chu a ko va a hnenah, ‘I chungchang thu ka hriat hi engtizia nge ni? I sum enkawl chanchin mi ziah vek rawh; tun achinah sum enkawltuah i tang thei tawh lo vang,’ a ti a.
16:3 Tin, sum enkawltu chuan a rilruin, ‘Ka puin ka sum enkawl mi ban dawn hi engtin nge ka tih ang aw? lei laih ka peih si lo va, kut dawh lah chu ka zak si a.
16:4 Sum enkawla mi ban huna an ina mi awmtir nan ka tihzia tur ka hre ta,’ a ti a.
16:5 Tichuan a pu sum batute chu a ko theuh va, a hmasa ber hnenah chuan, ‘Ka pu lakah engzat nge i bat?’ a ti a.
16:6 Ani chuan, ‘Hriak tehkhawng zakhat,’ a ti a. Tin, ani chuan a hnenah, ‘I lehkha la la, thu thuai la, sawmnga ziak rawh,’ a ti a.
16:7 Tin, mi dang hnenah,‘Nang engzat nge i bat?’ a ti a. Ani chuan, ‘Buh tehkhawng zakhat,’ a ti a. Tin, ani chuan a hnenah, ‘I lehkha la la, sawmriat ziak rawh,’ a ti a.
16:8 Tin, a pu chuan sum enkawltu fel lo chu a rem hriat avangin a fak ta a; eng fate aiin he khawvel fate hi an tun lai kawngah chuan an fing zawk a ni.
16:9 “Ka hrilh a che u. Sum lemin in tan, thiante siam rawh u; sum a boral huna chatuana awmnaah chuan an awmtir nan che u.
16:10 Tupawh tlemte chunga rinawm chu tam tak chungah pawh a rinawm thin; tupawh tlemte chunga rinawm lo chu tam tak chungah pawh a rinawm lo thin a ni.
16:11 Sum lem chungah mah in rinawm loh chuan tuin nge sum tak chu kawltir ang che u?
16:12 Mi dang ta chungah mah in lo rinawm tawh loh chuan nangmahni ta chu tuin nge pe ang che u?
16:13 Chhiahhlawh tumahin hotu pahnih rawng an bawl kawp thei lo; pakhat huain pakhat a duh ang, a nih loh leh, pakhat tannin pakhat a hmusit ang. Pathian leh sum rawng in bawl kawp thei lo ve,” a ti a.
16:14 Tin, Pharisai tangka ngaihlute chuan chung thu zawng zawng chu an hria a, an nuihsan a.
16:15 Tichuan ani chuan an hnenah, “Mi mithmuha intifel mai in ni e; nimahsela Pathianin in rilru a hre si a; mihring zinga an chawimawi chu Pathian mithmuhin tenawm tak a ni si.
16:16 Dan leh zawlneite thu chu Johana lo awm thleng khan a awm a; chu mi achinah chuan Pathian ram Chanchin Tha hi an hril a, mi tin an lut lui theuh va.
16:17 Nimahsela Dan thu chhun han te tak te bo ai pawhin van leh khawvel boral a awl zawk e.
16:18 “Tupawh nupui ma a, nupui dang nei apiang a uire a ni; tupawh mi nupui mak nei apiang a uire a ni.
16:19 “Tin, mi hausa tu emaw a awm, puan sen duk leh puan zai sin tak a sin a, ni tin nuamsa takin a awm thin;
16:20 tin, a hming Lazara kutdawh pakhat pan bawm khah luk, a kawngkhar bulah an muttir thin a,
16:21 mi hausa dawhkana ei nawi tla chu ei a duh a; uite lah chuan a pante an lo liahsak thin a.
16:22 Tin, heti hi a ni a, kutdawh chu a thi a, vantirhkohten an kalpui a, Abrahama angchhungah an dah a. Mi hausa pawh chu a thi a, phumin a awm ta a.
16:23 Tin, mitthi khuaah chuan na tak tuar reng rengin a awm a, a han vanvadak a, hla taka Abrahama a angchhunga Lazara awm nen a hmu ta a.
16:24 Tin, a au va, ‘Ka pa Abraham, mi khawngaih la, Lazara kha han tir rawh, a kut zung hmawr tuiah chiah sela, ka lei tihdaihna turin; he mei alhah hian ka na em em a ni,’ a ti a.
16:25 “Nimahsela Abrahaman, ‘Ka fapa, nangin i dam lai khan thil tha i chang a, chutiang bawkin Lazaran thil tha lo a chan kha hre ta che; nimahsela tunah ani zawng hetah thlamuang takin a awm a, nang zawng i na a nih kha.
16:26 Heng lo pawh hi, heta tanga nangni hnena kal tumte chu an kal theih lohna tur leh tumah khata tanga keini hnena an lo kai theih lohna turin, keini leh nangni inkarah hian leikak nasa tak an siam tlat a ni,’ a ti a.
16:27 “Tin, ani chuan, ‘A nih leh ka pa, ani chu ka pa ina kaltir tur talin ka ngen a che;
16:28 pianpui mipa panga ka nei si a; he na awmnaah hian an lo kal ve dah ang e, thahnemngai takin hrilh the se,’ a ti a.
16:29 Abrahama erawh chuan, ‘Mosia leh zawlneite an nei alawm; chu mite thu chu ngai rawh se,’ a ti a.
16:30 Tin, ani chuan, ‘Ka pa Abraham, ni lo ve; mitthi zinga mi meuh an hnenah kal zawk sela an sim ang,’ a ti a.
16:31 Tin, ani chuan a hnenah, ‘Mosia leh zawlneite thu an ngaih loh chuan mitthi zinga mi tho leh mah sela an awih chuang lo vang,’ a ti a,” a ti a.
17:1 Tin, Isuan a zirtirte hnenah, ‘Tluknate hi awm lo thei a ni lo; nimahsela tlukna awmtirtu chung chu a pik e!
17:2 Heng mi tete zinga pakhat pawh tihtluk ai chuan, a titlutu tur nghawngah chuan buh rawt sawmna lung awrhtirin, tuifinriatah thlak sela, a tan a tha zawk tur a ni.
17:3 “Fimkhur rawh u:I unauvin thil a tihsual chuan zilh rawh; a inchhir chuan ngaidam rawh.
17:4 Ni khatah i chungah vawi sarih thil tisualin, vawi sarih, ‘Ka inchhir e,’ tia i lama a lo hawi leh chuan i ngaidam tur a ni,” a ti a.
17:5 Tin, tirhkohte chuan Lalpa hnenah, “Kan rin tiphui deuh vang che,” an ti a.
17:6 Tin, Lalpa chuan, “Antam mu fang khat ang rin in neih chuan he thingtheihmu kung hnenah hian, ‘Lo inphawi la, tuifinriatah lo inphun rawh,’ in ti ang a,in thu a awih mai ang.
17:7 “Nimahsela nangni zingah tupawhin lei letin emaw, beram vengin emaw bawih nei ula, a lo sul hawn veleh, ‘Chaw rawn kil nghal rawh,’ tunge lo ti ang che u?
17:8 ‘Ka ei tur mi siamsak la, puan veng la, ka ei ka bar zawh hma loh chu ka rawng mi bawl rawh; chu mi hnuah chuan nangin I eiin I bar ang chu,’ tunge lo ti zawk lo vang che u?
17:9 In thu ang a a tih avangin in bawih hnenah lawmthu in hrilh ngai em ni?
17:10 Chutiang bawkin nangni pawhin in hnena thupek zawng zawng anga in tih hnuin, ‘Bawih thahnem lo kan ni e; kan tih tur reng a ni kan tih ni,’ ti rawh u,” a ti a.
17:11 Tin, heti hi a ni a, Jerusalem khuaa an kal dawnin, Samari leh Galili ram chu a kal pel a.
17:12 Tin, khaw engah emaw a luh dawnin, mi, phar hlir, sawmin an tawk a; chu mite chu hla takah an ding a;
17:13 tin, aw ring takin, “Isu, zirtirtu, min khawngaih rawh,” an ti a.
17:14 Tin, ani chuan anmahni chu a han hmuh chuan an hnenah, “Puithiamte hnenah va inentir rawh u,” a ti a. Tin, heti hi a ni a, an kal lai chuan an lo thiang ta hlawm a.
17:15 Tin, an zinga pakhatin a dam ta tih a inhriat veleh, aw ring taka Pathian fak chungin a kir leh ta a;
17:16 tin, a ke bulah a bawkkhup a, a lawmthu a sawi a; chu mi chu Samari mi a ni nghe nghe a.
17:17 Tichuan Isuan a chhang a, “Mi sawm kha in lo thiang ta a ni lawm ni? Pakuate kha khawiah nge?
17:18 he awze mi mai hi Pathian fak tura lo kir leh a nih?” a ti a.
17:19 Tin, a hnenah “Tho la, kal rawh; i rinna hi i dampui a nih hi,” a ti a.
17:20 Tin, Pharisaiten Pathian ram lo thlen hun tur an zawh avangin an hnenah, “Pathian ram chu hmuh theihin a lo thleng lo ve;
17:21 ‘En teh u, heta hi!’ emaw, ‘Sawta saw!’ emaw an ti hek lo vang; ngai teh u, Pathian ram chu in zingah a awm a ni,” a ti a, a chhang a.
17:22 Tin, zirtirte hnenah chuan, “Mihring Fapa dam lai nite hi ni khat tal hi in hmuh duh nite a la awm ang, nimahsela in hmu tawh si lo vang.
17:23 Tin, in hnenah, ‘En teh u, sawta saw!’ ‘En teh u, heta hi!’ an ti ang che u; kal chhuak suh ula, anni chu zui hek suh u;
17:24 van hnuai lehlama kawl a pheta van hnuai lehlam thlenga a eng thin ang hian, Mihring Fapa hi a lo kal niin a awm dawn si a.
17:25 Nimahsela chu mi hma chuan thil tam tak a tuar tur a ni a, tun lai chhuante duh lohin a awm bawk tur a ni.
17:26 “Nova dam laia thil awmzia ang khan, Mihring Fapa a lo kal leh nite chuan a awm bawk ang.
17:27 Nova lawnga a luh a, tui a lo let a, an zaa a tihhlum tak vek ni kha a thlen hma loh zawng, an eiin an bar a, nupui pasal an innei thin a.
17:28 “Chutiang bawkin Lota dam laiin a lo awm; an eiin an bar a, an leiin an hralh a, an chingin an sa thin a;
17:29 nimahsela Sodom khua ata Lota a chhuah ni chuan van atangin mei leh kat a sur a, an zain a tihlum ta vek a.
17:30 Chutiang bawkin Mihring Fapa hi a rawn inlar ni chuan a awm ang.
17:31 Chu mi niah chuan tupawh a sum in chhunga awm a, amah in chunga awm chu chuh turin chhuk suh se; lova awm chu hawng bawk suh se.
17:32 Lota nupui hre reng rawh u.
17:33 “Tupawh a nun humhimna zawng apiangin a chan ang a, tupawh a nun chan apiangin a humhim ang”.
17:34 “Ka hrilh a che u, chu mi zanah chuan khum pakhatah mi pahnih an awm ang a, pakhat chu kal bopuiin a awm ang a, pakhat chu hnutchhiahin a awm ang.
17:35 Hmeichhe pahnih buh rawt sawmin an awm ang a, pakhat chu kal bopuiin a awm ang a, pakhat chu hnutchhiahin a awm ang,” * a ti a.
17:37 Tin, anni chuan a hnenah “Lalpa khawiah maw?” an ti a, an chhang a.Tin, ani chuan an hnenah, “Saruang awmna apiangah mulukawlhte pawh an awm ang,” a ti a.
18:1 Tin,beidawng lovin an tawngtai fo tur a ni tih hriattirna turin an hnenah tehkhin thu a sawi a:
18:2 “Khaw engah emaw roreltu pakhat a awm a, chu mi chuan Pathian a hlau lo va, mihring lah a ngaihsak hek lo;
18:3 tin, chu mi khuaah chuan hmeithai pakhat a awm a; ani chu, ‘Ka khingpui chungah phuba mi laksak rawh,’ tiin a hnenah a kal fo va.
18:4 Tin, ani chuan rei fe a duh lo va; nimahsela nakinah chuan a rilruin, ‘Pathian hlau lovin mihring ngaihsak lo mah ila,
18:5 he hmeithai hian mi tihbuai avangin a phuba ka laksak teh mai ang, chutilochuan a lo kal fo hian mi la tihah hrep dah ang e,’ a ti a,” a ti a.
18:6 Tin, Lalpa vekin, “Roreltu fel lo thu sawi chu hre rawh u.
18:7 An chungah zaidawh rih mah sela a mi thlan, achhun azana amah kotute phuba chu Pathianin a laksak lo vang em ni?
18:8 Ka hrilh a che u, an phuba a laksak thuai ang. Nimahsela Mihring Fapa hi a lo kal hun chuan khawvelah hian rinna a rawn hmu ang em ni?” a ti a.
18:9 Tin, mi fel tak nih inring a, mi dang zawng zawng hmusit thin tute emaw hnenah chuan he tehkhin thu pawh hi a sawi a:
18:10 “Mi pahnih Pathian biak inah tawngtai turin an han kal a; pakhat chu Pharisai a ni a, pakhat chu chhiahkhawntu a ni.
18:11 Pharisai chu a ding a, amah chauhvin heti hian a tawngtai a:‘Pathian, mi dang anga hleprute, fel lote, uirete ka nih loh avang leh, he chhiahkhawntu ang pawh hi ka nih loh avangin i chungah ka lawm e.
18:12 Chawlhkar khat apiangah vawi hnih chaw ka nghei thin a; ka neih apiang sawmah pakhat ka pe thin,’ a ti a.
18:13 Chhiahkhawntu erawh chu hla takah a ding a, van lam pawh a dak ngam lo va,‘Pathian, kei mi sual hi mi khawngaih rawh,’ tiin a awm a inchum a inchum ta zawk a.
18:14 “Ka hrilh a che u, a hmasa aiin chu mi zawk chu thiam changing a inah a kal chhuk ta a.Inngaihlu apiang an tlawm ang a, inngaitlawm chu chawimawiin an awm ang,” a ti a.
18:15 Tin, a deh atan a hnenah an nausente pawh an rawn hruai a; zirtirte erawh chuan chu chu an hmuh veleh an lo hau va.
18:16 Nimahsela Isuan anni chu a ko va,“Naupang tete ka hnenah han kaltir ula,hnar suh u; Pathian ram chu hetiang mite ta a ni si a.
18:17 Tih tak meuhvin ka hrilh a che u, tupawh Pathian ram chu naupang tein a lawm anga lawm lo apiang a chhungah an lut tawp loving,” a ti a.
18:18 Tin, hotu tuin emaw a hnenah, “Zirtirtu tha, chatuana nunna channa turin engtin nge ka tih ang?” tiin a zawt a.
18:19 Tin, Isuan a hnenah, “Engati nge tha mi tih? mi pakhat chauh lo chu tumah tha an awm lo, chu chu Pathian a ni.
18:20 Thupekte chu i hria alawm – ‘Uire suh, Tual that suh, Ru suh, Dawtin hek suh, I nu leh i pa chawimawi rawh,’ tihte hi,” a ti a.
18:21 Tin, ani chuan, “Chung thu zawng zawng chu ka naupan tet ata ka zawm zel thin,” a ti a.
18:22 Tin, Isuan chu chu a hriatin a hnenah, “Tunah pawh kawng khat i la bak e; i neih zawng zawng hralh la, pachhiate hnenah sem rawh, chutichuan vanah ro i nei ang; tin, lo kal la, mi zui ang che,” a ti a.
18:23 Ani erawh chuan chung thu chu a hriatin, a lungngai ta em em a, a hausak em avangin.
18:24 Tichuan Isuan amah chu a en a, “Sum ngahte chu Pathian rama luh a va harsa dawn em!
18:25 Mi hausa Pathian rama luh aiin sanghawngsei, hriau benga luh tlang a awl zawk a ni,” a ti a.
18:26 Tin, chu thu hriate chuan, “A nih leh, tunge chhandam ni thei ang le?” an ti a.
18:27 Ani erawh chuan, “Mihring tih rual loh hi Pathian tih theih a ni,” a ti a.
18:28 Tin, Peteran, “Ngai teh, keinin kan in leh lo kalsanin kan zui ta chia,” a ti a.
18:29 Tin, ani chuan an hnenah, “Tih tak meuhvin ka hrilh a che u, tupawh Pathian ram avanga in emaw, nupui emaw, unaute emaw, nu leh pa emaw, fate emaw kalsan tawh phawt chu,
18:30 tun dam chhung la la hian a aia tam zawk hmu lo tur tumah an awm lo, hun lo la thleng tura chatuana nunna nen,” a ti a.
18:31 Tin, sawm leh pahnihte chu a hnenah a hruai hrang a, an hnenah, “Ngai teh u, Jerusalem khuaa kan chhoh dawn hi; zawlnei thu ziak zawng zawng kha Mihring Fapa chungah hian a thleng ang.
18:32 Jentailte hnenah an pe ang a, nuihza siam nan an hmang ang a, zahthlak takin an siam ang a, chil an chhak ang;
18:33 tin, an vua ang a, an tihlum ang; tin, ni thum niin a tho leh ang,” a ti a.
18:34 Tin, chung thu reng reng chu a ngaihna an hre lo va; thusawi chu an lakah thupin a awm a, eng sawi nge a nih pawh an hre lo va.
18:35 Tin, heti hi a ni a, Jeriko khua a thlen dawnin, mitdel tu emaw kawng sirah kut dawhin a lo thu a;
18:36 chu mi chuan mipui kal thawm a hria a, engtizia nge ni ta tih a zawt a.
18:37 Tin, anni chuan Nazaret Isua a kal a ni tih an hrilh a.
18:38 Tichuan ani chu, “Isu Davida Fapa, mi khawngaih rawh,” tiin a au ta a.
18:39 Tin, a hmasate chuan ngawi turin an hau va; nimahsela ani chu, “Davida Fapa, mi khawngaih rawh,” tiin a au zual sauh va.
18:40 Tichuan Isua a ding a, a hnena han hruai turin thu a pe a; tin, a kiang a lo thlen chuan,
18:41 “I chungah engtia ka tih nge i duh?” a ti a, a lo zawt a. Tin, ani chuan, “Lalpa, hmuh theih ka duh,” a ti a.
18:42 Tin, Isuan a hnenah, “Hmu thei tawh ang che, i rinna hi i dampui a ni e,” a ti a.
18:43 Tin, thawklehkhatan a hmu thei ta nghal a, Pathian fak chung zelin amah chu a zui ta a; tin, mi zawng zawng chuan chu chu an hmuhin Pathian an fak a.
19:1 Tin, Isua Jeriko khuaah a lut a, a chhun pelh dawn a.
19:2 Tin, ngai teh, mi pakhat a hming Zakaia a awm a; chu mi chu chhiahkhawn hotu a ni a, amah pawh a hausa hle a.
19:3 Tin, Isua chu mi eng ang nge a nih hmuh a tum a; mipui avngin, amah lah a tawi si a, a hmu thei lo va.
19:4 Tichuan a tlan khalh a, a en turin theipui kungah a lawn a; chu mi kawng chu a rawn zawh tur a ni si a.
19:5 Tin, Isua chu, chu mi hmun a thlen chuan a dak a, a hnenah, “Zakai, lo chhuk thuai rawh; vawiinah i inah ka thleng tur a ni,” a ti a.
19:6 Tin, hmanhmawh takin a chhuk a, hlim takin amah chu a thleng ta a.
19:7 Tin, chu chu an hmuh veleh an zain, “Mi sual hnena thleng turin a luh tak saw,” an ti a, an phunnawi a.
19:8 Tin, Zakaia chu a ding a, Lalpa hnenah chuan, “Ngai teh, Lalpa, ka sum zatve pachhiate hnenah ka pe ang a; tin, tu lakah pawh thil engpawh lo hlepru ila, a leh liin ka rul leh ang,” a ti a.
19:9 Tin, Isuan Zakaia chung thu a sawi a, “Vawiinah he inah hian chhandamna a lo thleng ta, ani pawh Abrahama fapa a ni si a.
19:10 Boralte zawnga chhandam turin Mihring Fapa hi a lo kal a ni reng a ni,” a ti a.
19:11 Tin, chung thute chu an ngaihthlak laiin, Jerusalem khua a hnaih tak avang leh Pathian ram lo lang nghal tur nia an rin avangin tehkhin thu a sawi tel a.
19:12 Chutichuan heng thu hi a sawi a:“Mi tha tu emaw ram awpna thu laa lokir leh turin khaw lam hla takah a kal a.
19:13 A kal dawnin a bawihte sawm a ko va, an hnenah rangkachak tangka sawm a pe a, an hnenah, ‘Ka lo thlen leh hma loh zawng hei hian lo sumdawng rawh u,’ a ti a.
19:14 Nimahsela a khuaten an hua a, ‘He mi hi kan lal atan kan duh lo ve,’ ti turin a hnungah palai an tlantir ve a.
19:15 “Tin, heti hi a ni a, ram awpna thu chu a lak a, a lo kir leh chuan a bawih, tangka a pekate chu, an peipun chin hriat nan a kohtir a.
19:16 Tin, a hmasa ber chu a lo kal a, ‘Ka pu, i rangkachak tangka kha sawmin a pung e,’ a ti a.
19:17 Tin, ani chuan a hnenah, ‘Bawih tha, i ti tha e; tlemte chunga i rinawm avangin khaw sawm chungah hotuah awm rawh,’ a ti a.
19:18 Tin, a dawttu chu a lo kal a, ‘Ka pu, i rangkachak tangka kha pangain a pung e,’ a ti a.
19:19 Tin, ani chuan ani hnenah pawh chuan, ‘Nang pawh khaw panga chungah hotuah awm rawh,’ a ti a.
19:20 “Tin, mi dang a lo kal a, ‘Ka pu, en teh, hei i rangkachak tangka kha! Thlan hrukna puanin ka vawng reng a ni;
19:21 mi vin tak i nih avangin ka hlau che a ni; i dah loh pawh i la thin a, i tuh loh pawh i at thin si a,’ a ti a.
19:22 “Tin, ani chuan a hnenah, ‘Bawih sual, i tawngka chhuak ngeiin ka thiam lo vang che. Mi vin tak ka nih a, ka dah loh pawh ka lak thin a, ka tuh loh pawh ka ah thin i hria maw?
19:23 A nih ahnu, engati nge ka tangka hi sumdawng ina i dah loh? tichuan ka hawnin a pung nen ka thing tur a ni,’ a ti a.
19:24 Tin, a kianga dingte hnenah, ‘A rangkachak tangka kha laksak ula, rangkachak tangka sawm neitu hnenah pe rawh u,’ a ti a.
19:25 Tin, anni chuan a hnenah, ‘Ka pu, ani zawngin rangkachak tangka sawm a nei alawm,’ an ti a.
19:26 ‘Ka ti a che u, a nei apiang an pe belhchhah ang a, a nei lo chu a neih chhun pawh an laksak ang.
19:27 Nimahsela heng mi dotute, an lal atana mi duh lote hi, rawn hruai ula, ka hmaah that rawh u,’ a ti a,” a ti a.
19:28 Tin, chutiang thu a sawi zawh chuan Jerusalem khaw lam pan chhovin hma a hruai a.
19:29 Tin, heti hi a ni a, Bethphage leh Bethani khaw kiang, Oliv tlang an tih chu, a thlen chuan zirtirte zinga mi pahnih a tir a,
19:30 “In hma zawn khuaah sawn va kal ta ula; chutah chuan in luh tirhin sabengtung no thlun, tuma la chuan ngai lohna in va hmu ang; chu chu phelh ula, han kai rawh u.
19:31 Tin, tupawhin, ‘Engah nge in phelh?’ tia an zawh che u chuan, heti hian sawi ang che u,‘Lalpain a duh a ni,’ tiin,” a ti a.
19:32 Tin, a tirhte chu an kal ta a, an hnena a sawi ang ngeiin an va hmu a.
19:33 Tin, sabengtung no chu an phelh lai chuan a neituten an hnenah, “Sabengtung no kha engah nge in phelh?” an ti a.
19:34 Tin, anni chuan, “Lalpain a duh a ni,” an ti a.
19:35 Tichuan Isua hnenah an rawn kai ta a, tin, sabengtung no chungah chuan an puante an phah a, a chungah Isua an chuantir a.
19:36 Tin, a kalna tur kawngah chuan an puante an phah zel a.
19:37 ,38 Tin, an thlen dawn hnaihin, Oliv tlang liam dawnah chuan, zirtir mipui zawng zawng chuan a thilmak tih zawng zawng an hmuh avangin an lawm a, aw ring takin, “Lalpa hminga Lal lo kal chu fakin awm rawh se, vanah remthu leng sela, chungnung berah khian ropuina awm rawh se!” tiin Pathian an fak ta a.
19:38 ,37 Tin, an thlen dawn hnaihin, Oliv tlang liam dawnah chuan, zirtir mipui zawng zawng chuan a thilmak tih zawng zawng an hmuh avangin an lawm a, aw ring takin, “Lalpa hminga Lal lo kal chu fakin awm rawh se, vanah remthu leng sela, chungnung berah khian ropuina awm rawh se!” tiin Pathian an fak ta a.
19:39 Tin, mipui zinga Pharisai thenkhatin a hnenah, “Zirtirtu, i zirtirte hi zilh rawh,” an ti a.
19:40 Ani erawh chuan, “Ka hrilh a che u, hengte hi an ngawih reng chuan lungte tal an au chhuak tur a ni,” a ti a, a chhang a.
19:41 Tin, a thlen dawn ruaiin khua chu a hmu ta a, a tah chhan a,
19:42 “Aw, nang lul hian tun chhung hian thlamuanna tur thu hi lo hre teh hram la! nimahsela tunah zawng i hmuh loh nan a inthup tawh si a.
19:43 ,44 I ralten i velin lei kulh an siam ang a, an hual ang chia, i velin chhuah theih lohvin an awm chhan ang chia, i chhunga i fanaute, nangmah nen leiah an paih vak ang che, i chhunga lung intiang reng reng an zuah lo vang; an fan lai che i hriat loh avangin chutiang nite chu i chungah a lo la thleng ang,” tiin.
19:44 ,43 I ralten i velin lei kulh an siam ang a, an hual ang chia, i velin chhuah theih lohvin an awm chhan ang chia, i chhunga i fanaute, nangmah nen leiah an paih vak ang che, i chhunga lung intiang reng reng an zuah lo vang; an fan lai che i hriat loh avangin chutiang nite chu i chungah a lo la thleng ang,” tiin.
19:45 Tin, Pathian biak inah chuan a va lut a, englo zuartute chu a hnawt chhuak ta a;
19:46 an hnenah, “Ka in chu tawngtaina in a ni ang,’ tih ziak a ni; nangni erawh chuan suamhmangte pukah in siam zawk hi,” a ti a.
19:47 Tin, ni tin Pathian biak inah chuan a zirtir thin a. Tin, puithiam lalte leh, lehkhaziaktute leh vantlang zinga hotu deuhten, amah tihboral an tum a;
19:48 nimahsela mitten a thu an ngaihthlak kham theih loh avangin a tih dan tur an hre thei lo a ni.
20:1 Tin, ni khat chu heti hi a ni a, Pathian biak ina mite a zirtir a, Chanchin Tha a hrilh laiin,puithiam lalte leh lehkhaziaktute chu upate nen, a hnenah an lo kal thut a;
20:2 tin, a hnenah, “Tu thuin nge heng thil hi i tih? Tuin nge thu pe che? min hrilh rawh,” tiin an zawt a.
20:3 Tin, ani chuan an hnenah, “Kei pawhin thu kam khat ka zawt ve ang che u; mi hrilh rawh u.
20:4 Johana baptisma kha vana mi thu nge mihring thu?” a ti a, a chhang a.
20:5 tin, an inngaihtuah a, “ ‘Vana mi thu,’ kan tih chuan, ‘Engah nge a thu in awih loh?’ min ti si ang a.
20:6 Tin, ‘Mihring thu,’ kan tih chuan mi zawng zawngin lungin min deng ang; Johana chu zawlnei a nih an ring si a,” an ti a.
20:7 Tichuan an chhang a, “Khawi lam zawk thu nge ni kan hre lo,” an ti a.
20:8 Tin, Isuan an hnenah, “Kei pawhin tu thuin nge heng thil hi ka tih ka hrilh bik lo vang che u,” a ti a.
20:9 Tin, vantlang hnenah he tehkhin thu hi a sawi ta a:“Tuin emaw grep huan a siam a,lo enkawltute hnenah thlawhhlawh turin a pe a, rei tak thang turin ram dangah a kal ta a.
20:10 Tin, a lawh hun chuan huana rah chu a chanai an lo pek turin lo enkawltute hnenah chuan bawih pakhat a tir a; nimahsela lo enkawltute chuan an lo vel a, kut ruakin an kaltir leh ta a.
20:11 Tin, bawih dang a tir leh a; chu pawh chu an lo vel leh bawk a, zahthlak takin an siam a, kut ruak vekin an kaltir leh ta a.
20:12 Tin, a pathumna a tir leh pek a; chu mi pawh chu an lo tisil a, an paih chhuak ta a.
20:13 “Tin grep huan neitupa chuan, ‘Engtin nge ka tih ang aw? Ka fapa duh tak ka tir mai ang, ani hi an lo zah mahna,’ a ti a.
20:14 Nimahsela lo enkawltute chuan ani chu an lo hmuh veleh, ‘He mi hi ro luahtu tur chu a ni; i that ang u, chutichuan a ro kan tan a ni ang,’ tiin an inrawn a.
20:15 Tichuan grep huan ata chu an theh chhuak a, an tihlum ta a. Chutichuan grep huan neitupa chuan an chungah engtin nge a rawn tih ang?
20:16 Lo enkawltute chu a rawn tiboral ang a, huan chu mi dangte a pe ang,” a ti a. Tin, chu chu an hriatin, “Chung em chu thleng suh se!” an ti a.
20:17 Nimahsela ani chuan anniho chu a en a, “He thu an ziak hi engnge ni le? ‘In satute lung duh loh kha, Chu ngei chu a kila lung tangkai ber a lo ni ta,’ tih hi.
20:18 Tupawh chu mi lung chunga tlu apiang an keh sawm ang; a delh lek phei chu a rawt dip ang,” a ti a.
20:19 Tin, chutih lai tak chuan lehkhaziaktute leh puithiam lalten man an tum a; nimahsela mipui chu an hlau va; chu tehkhin thu chu anmahni demin a sawi tih an hre si a.
20:20 Tin, amah chu Ram Awptu rorelna leh thuneihnaa thlen atan, a thusawi sual la turin an chang reng a, enthlatu, mi tha anga awm derte chu an tir a.
20:21 Anni chuan a hnenah, “Zirtirtu, dik takin thu i sawiin i zirtir a, tumah thlei bik lovin tih tak zetin Pathian kawng thu i zirtir thin kan hria e;
20:22 Kaisara hnena chhiah kan chawi a thiang nge thiang lo?” tiin an zawt a.
20:23 Nimahsela ani chuan an ngamthlem a ni tih a hria a,
20:24 an hnenah, “Duli mi entir rawh u,” a ti a. “Tu lem leh tu hming nge chuang hi?” a ti a. Tin, anni chuan, “Kaisara,” an ti a.
20:25 Tin, ani chuan an hnenah, “A nih ahnu, Kaisara thilte chu Kaisara hnenah pe ula, Pathian thilte chu Pathian hnenah pe ta che u,” a ti a.
20:26 Tichuan mipui hmaa a thusawi sual lak tur an hmu lo va; a chhanna chu mak an ti hle a, an ngawi reng a.
20:27 Tin, Saddukai, thawhlehna a awm lo tite zinga mi tute emaw a hnenah an lo kal a;
20:28 a hnenah, “Zirtirtu, Mosian tupawh a unaupain nupui nei sela, fa nei lovin thi sela, a unaupain a nupui rochungin a unaupa tan chi a thlahsak tur a ni tih, min ziaksak a ni.
20:29 Aw le, sal sarih an awm a; a upa berin nupui a nei a, fa nei lovin a thi a.
20:30 A pahnihna chuan a rochung a;
20:31 a pathumna chuan a rochung leh a; chutiang theuhvin pasarihte chu fa nei lovin an thi zel a.
20:32 Chu mi hnuah chuan hmeichhia pawh chu a thi ta a.
20:33 Chutichuan thawhleh hunah chuan a tu bera nupui nge ni ang? An pasarih chuan nupuiah an nei theuh si a,” tiin an zawt a.
20:34 Tin, Isuan an hnenah, “He khawvel mite hi nupui pasal an innei thin;
20:35 nimahsela chung huna tel tlakah leh mitthi zing ata thawhlehnaa tel tlaka ruat apiangte chu, nupui pasal an innei dawn tawh lo ve;
20:36 thih pawh an thi leh thei dawn tawh lo a ni, vantirhkohte tlukin an awm dawn si a; thawhlehna fate an nih avangin Pathian fate an ni ang.
20:37 Mitthi kaihthawhin an awm tur tih Mosia pawhin, Hnim Buk thuah, Lalpa chu ‘Abrahama Pathian, Isaaka Pathian, Jakoba Pathian,’ a tih lai khan a hriattir kha.
20:38 Ani chu mitthi Pathian a ni lo va, mi nung Pathian a ni zawk e; ani ngaih chuan mi zawng zawng an nung vek si a,” a ti a.
20:39 Lehkhaziaktu tuten emaw, “Zirtirtu, i sawi dik zet mai,” an ti a, an chhang a.
20:40 Thu dang an zawt ngam tawh si lo.
20:41 Tin, ani chuan an hnenah, “Krista chu Davida fapa a ni tih engtiziaa sawi thin nge an ni?
20:42 ,43 Fakna Hla Buah Davida ngeiin, Lalpa chuan ka Lalpa hnenah, I hmelmate i ke nghahchhana ka siam hma loh zawng Ka ding lamah thu rawh,’ a ti, a ti a.
20:43 ,42 Fakna Hla Buah Davida ngeiin, Lalpa chuan ka Lalpa hnenah, I hmelmate i ke nghahchhana ka siam hma loh zawng Ka ding lamah thu rawh,’ a ti, a ti a.
20:44 Chutichuan Davidan ani chu, ‘Lalpa’ a ti si a, engtin nge a fapa a nih theih le?” a ti a.
20:45 Tin, mi zawng zawng hriatin a zirtirte hnenah,
20:46 “Lehkhaziaktute lakah fimkhur rawh u; anni chuan kawr fual haa len an duh thin a, dawr hmunah chibai bukte, inkhawmna inah thutphah tha berte, ruaithehnaah hmun tha berte an ngaina thin a,
20:47 hmeithai sum an ei a, tlang bum nan rei tak an tawngtai thin; chungho chuan thiam loh an chang nasa lehzual ang,” a ti a.
21:1 Tin, a dak chhuak a, mi hausaten thawhlawm bawma an thawhlawm thlak lai a hmu a.
21:2 Tin, hmeithai rethei te tu emaw dar tangka dere pahnih rawn thlak a hmu bawk a.
21:3 Tichuan, “Tih tak zetin ka hrilh a che u. Heng zawng zawng ai hian he hmeithai rethei te hian a thlak tam zawk;
21:4 heng zawng zawng hian an neih liama mi thawhlawmah an thlak a ni; ani erawh hi chuan a duh lai tak, a intunnunna tura a neih chhun te a thlak vek a ni,” a ti a.
21:5 Tin, tuten emaw Pathian biak in thu, lung tha tak leh thilpek khawma an cheimawizia chu an sawi laiin, ani chuan,
21:6 “Heng in thil hmuh hi tihchim lohva lung intiang reng reng hetah a awm lo vang; chutiang ni chu a la thleng ang,” a ti a.
21:7 Tin, anni chuan a hnenah, “Zirtirtu, chung chu engtikah nge a lo awm ang le? chung chu a lo thlen dawn hunah chhinchhiahna engnge awm ang?” tiin an zawt a.
21:8 Tin, ani chuan, “An tihder loh nan che u fimkhur rawh u. Mi tam takin, ‘Krista chu ka ni,’‘A hun a thleng dawn ta e,’ tiin keimah hming chhalin an lo kal ang; chu mite chu zui suh u.
21:9 Tin, indo thu leh buai thu in hriat hunin hlau suh ang che u; chung chu a thleng hmasa tur reng a ni, tawpna erawh chu a thleng nghal rih lo vang,” a ti a.
21:10 Tin, an hnenah, “Hnam hrang leh hnam hrang an indo vang a, ram hrang leh ram hrang an indo vang a;
21:11 lir nasa takin a nghing a nghing ang a, hmun hrang hrangah tamte a tla ang a, hrite a leng bawk ang a; van atangin thil hlauhawmte leh chhinchhiahna nasa takte a lo awm ang.
21:12 Nimahsela chung thil zawng zawng thlen hma chuan an man ang che u a, inkhawmna inah leh tan inah hruaiin an tiduhdah ang che u a, keima hming avangin lalte leh hotute hmaah an hruai ang che u.
21:13 In thiam channa a la ni hlei hlei ang.
21:14 Chutichuan chhanna tur ngaihtuah lawk lo turin in rilruah intinghet rawh u;
21:15 in hmelma zawng zawngin an dodala an hnial theih lohna tur ka leh finna ka pe dawn si che u a.
21:16 Tin, in nu leh in pate, in unaute, in laichinte, in thiante pawhin an mantir ang che u; a then an tihhlumtir ang che u.
21:17 Keima hming avangin mi zawng zawng huat in ni ang.
21:18 Nimahsela in samzai khat pawh a boral lo vang.
21:19 In chhelin in nun in chhanhim ang.
21:20 “Nimahsela sipaihoten Jerusalem khua an hual in hmuh hunah, a boral dawn tih hria ang che u.
21:21 Chutih hunah chuan Judai rama awmte chu tlangahte tlan bo rawh se; a chhunga awm te chuan chhuahsan rawh se; rama awmte chu a chhungah lut suh se.
21:22 Chung ni chu phuba lak ni a ni e, thu an ziak zawng zawng a lo thlen theihna turin.
21:23 Chung ni chuan raite leh nauno pawmte chung a pik ang, khawvelah hian hrehawm nasa tak a thlen dawn avang leh he chite chungah hian thinurna a thlen dawn avangin.
21:24 Tin, khandaihah an thi ang a, hnam tin hnenah sala hruaiin an awm ang; tin, Jentailte ni a kin hma loh zawng Jerusalem khua chu Jentailte rah behin a awm ang.
21:25 “Tin, niah te, thlaah te, arsiah te chhinchhiahna a awm ang a; tuifinriat rum leh a fawn avangin leiah pawh hnam tin hrehawmna leh manganna a thleng ang;
21:26 hlabar avang leh khawvela thil lo thleng tur chu ngaihtuah avangin mite an thidang ang; van thiltihtheihnate chu a nghing dawn si a.
21:27 Chutih hunah chuan Mihring Fapa hi thiltihtheihna leh ropuina nasa tak nen chhum zinga lo kal an hmu ang.
21:28 Tin, chung thil chu a lo thlen tirhin, en chho ula, dak chhuak rawh u; in tlanna tur chu a hnaih tak avangin,” a ti a.
21:29 Tin,an hnenah tehkhin thu a sawi a:“Theipui kung leh thing zawng zawng en rawh u;
21:30 a chawr no veleh chu chu in hmu a, nipui a lo thaw dawn tih mahniin in hre thin.
21:31 Chutiang bawkin nangni pawhin chung chu a lo thleng in hmuh hun chuan Pathian ram a lo hnai tawh tih hria ang che u.
21:32 Tih tak meuhvin ka hrilh a che u, thil zawng zawng a thlen kim hma loh zawng tun lai chhuante hi an ral lo vang.
21:33 Lei leh van a ral ang a, ka thu erawh chu a ral lo vang.
21:34 “Amaherawhchu fimkhur rawh u, chutilochuan ei puar lutuk nen, zu ruih nen, dam chhung khawsak ngaihtuah nen, in rilru a khat lutuk hlauh ang a, chu mi ni chuan thang awk angin thawklehkhatan in chungah a lo thleng phut ang.
21:35 Chutiang tak chuan lei chung zawng zawnga awmte chungah chuan a thleng theuh dawn a ni.
21:36 Chutichuan chung thil lo thleng tur zawng zawng chu pumpelh tlakah leh Mihring Fapa hmaa ding tlaka ruat in nih theihna turin, eng lai pawhin tawngtai chungin ngaihven rawh u,” a ti a.
21:37 Tin, ni tin Pathian biak inah a zirtir thin a; zan tin a chhuak a, Oliv tlang an tihah chuan a riak thin a.
21:38 Tin, zingah a thu ngaithla turin mi zawng zawng Pathian biak inah a hnenah an lo kal thin.
22:1 Tin, chhang dawidim telh loh kut, Kalhlen Kut an tih chu a hnai ta a.
22:2 Tin, puithiam lal leh lehkhaziaktute chuan a tihhlumnazia an zawng a, vantlang an hlau si a.
22:3 Tin, sawm leh pahnihte zinga tel, Juda Iskariota an tiha chhungah chuan Setana a lut a.
22:4 Tichuan ani chu a va kal a, an hnena a mantir theihna turzia puithiam lalte leh hotute chu a va rawn a.
22:5 Tin, anni chu an lawm hle a, a hnenah tangka pek an tiam ta a.
22:6 Tin, ani chuan a remti a, mipui awm loh hlana mantirna remchang a zawng ta a.
22:7 Tin, chhang dawidim telh loh ni, Kalhlen Kutna beram no talna tur ni chu a lo thleng ta a.
22:8 Tichuan Isuan, Petera leh Johana chu, “Kalhlen Kut chaw kan ei turin min va buatsaihsak rawh u,” tiin a tir a.
22:9 Tin, anni chuan a hnenah, “Khawiah nge va buatsaih ila i duh?” an ti a.
22:10 Tin, ani chuan an hnenah, “Ngai teh u, khawpuia in luhin, mipa, bela tui puin a tawk ang che u a; a luhna inah zui lut ang che u.
22:11 Tin, in neitupa hnenah chuan, ‘Zirtirtuin, ka zirtirteho nen Kalhlen Kut chaw kan eina tur, mikhual pindan chu khawiah nge? a ti a che,’ ti ang che u.
22:12 Tichuan ani chuan pindan chungnung zau tak, bungraw awm sa, a entir ang che u; chutah chuan buatsaih ang che u,” a ti a.
22:13 Tin, an kal ta a, an hnena a sawi ang takin an hmu a; tin Kalhlen Kut chaw chu an buatsaih ta a.
22:14 Tin, a ei a lo hun chuan ani chuan chaw a kil a, a tirhkohte chuan an kilpui ve a.
22:15 Tin, an hnenah, “Ka thil tuar hmain he Kalhlen Kut chaw hi eipui che u ka duh em em a ni.
22:16 Ka hrilh a che u, hei hi Pathian rama a taktak a nih hma loh zawng, ka ei leh tawh dawn lo a ni,” a ti a.
22:17 Tin, no a la a, lawmthu a sawi zawhin, “Hei hi la ula, insem rawh u;
22:18 ka hrilh a che u, tun achinah Pathian ram a lo thlen hma loh zawng grep hrui rah tui hi ka in leh tawh dawn lo a ni,” a ti a.
22:19 Tin, chhang a la a, lawmthu a sawi zawhin a phel a, an hnenah a pe a, “Hei hi ka taksa, in aia pek tura chu a ni; mi hriat reng nan hei hi ti thin rawh u,” a ti a.
22:20 Tin, zanriah ei zawhin chutiang bawkin no chu a la a, “He no hi ka thisena thuthlung thar chu a ni, in aia chhuak tura chu.
22:21 “Nimahsela ngai teh u, mi mantirtu tura kut chu ka hnenah dawhkan chungah a awm si a.
22:22 Mihring Fapa hi an ruat angin a kal dawn a ni; nimahsela a mantirtu tur mihring chung chu a pik e!” a ti a.
22:23 Tin, annin, “Kan zingah chutiang thil ti tur chu tunge ni ang le?” tiin an inzawt ta a.
22:24 Tin, an zingah tu ber nge ropui bera a ruat tih thu-ah inhnialna a lo chhuak a.
22:25 Tin, ani chuan an hnenah, “Jentailho lalte chu an chungah an lal thin a; an chunga thu neitute chu ‘Nu leh pa’ an ti thin.
22:26 Nimahsela nangni zawng chutiang in ni lo vang; in zinga ropui ber chu nau zawk angin awm sela, lal ber chu rawngbawltu angin awm zawk rawh se.
22:27 Tunge ropui zawk, chaw kiltu nge rawngbawltu? Chaw kiltu a ni lo vem ni? Nimahsela kei zawng in zingah rawngbawltu angin ka awm hi.
22:28 “Thlemna ka tawh chhung zawng nangni mi awmpuitu in ni a;
22:29 ,30 tichuan ka rama ka dawnkana in eia in bar theihna turin, ka Pain ram mi ruatsak angin ram ka ruatsak che u a ni; tichuan Israel hnam sawm leh hnam hnih rorelsakin lalthutphahah in la thu ang.
22:20 ,29 tichuan ka rama ka dawnkana in eia in bar theihna turin, ka Pain ram mi ruatsak angin ram ka ruatsak che u a ni; tichuan Israel hnam sawm leh hnam hnih rorelsakin lalthutphahah in la thu ang.
22:31 “Simon, Simon, ngai teh, Setanan buh thlei anga a thlei theihna tur che uin, nangniho hi a dil che u asin;
22:32 nimahsela i rin a bo loh nan ka tawngtaisak che a ni; i hawi kir leh hunah nangin i unaute tinghet ang che,” a ti a.
22:33 Tin, ani chuan a hnenah, “Lalpa, i hnenah chuan tan inah leh thihnaah pawh kal ve ka huam asin,” a ti a.
22:34 Tin, ani chuan, “Peter, ka hrilh a che, i mi hriatnaah hian vawi thum i phat hma loh zawng vawiinah hian ar a khuang lo vang,” a ti a.
22:35 Tin, an hnenah, “Tangka ip lova, ipte lova, pheikhawk lova ka tirh chhuah che u khan thil reng reng in tlachham em?” a ti a. Tin, anni chuan, “Chham lo,” an ti a.
22:36 Tin, ani chuan an hnenah, “Tunah erawh chuan tupawh tangka ip nei chuan keng rawh se, ipte nen; tupawh khandaih nei lo chuan a puan hralh sela lei rawh se.
22:37 Ka hrilh a che u, ‘Ani chu mi sual zingah an chhiar tel ta,’ tih ziak kha ka chungah a lo thleng tur a ni; ka chungchang thute kha a thleng zo dawn ta e,” a ti a.
22:38 Tin, anni chuan, “Lalpa, en teh, hei khandaih pahnih a awm,” an ti a. Ani chuan an hnenah, “A tawk e,” a ti a.
22:39 Tin, ani chu a chhuak a, a dan pangngaiin Oliv tlangah chuan a kal ta a; zirtirtepawhin an zui a.
22:40 Tin, a hmun chu a va thlen chuan an hnenah, “Thlemnaa in luh loh nan tawngtai rawh u,” a ti a.
22:41 Tin, lung den phak chinah emaw a va kal hrang ta a; tin, a thingthi a, a tawngtai a,
22:42 “Ka Pa, rem i tih chuan he no hi ka hnen ata la sawn rawh; nimahse keia thu ni lovin, nangma thu thu ni zawk rawh se,” a ti a.
22:43 Tin, van atangin vantirhkoh pakhat a tiharh turin a hnenah a rawn inlar a.
22:44 Tin, a thlaphang em em a, thahnemngai lehzualin a tawngtai a; a thlan chu thi far lian tak angin leiah a far a.
22:45 Tin, a tawngtai zawha a thawhin, zirtirte hnenah chuan a lo kal a, an lungngaih avangin an lo muhil a hmu a;
22:46 tin, an hnenah, “engati nge in muthlilh? thlemnaa in luh loh nan tho ula, tawngtai rawh u,” a ti a.
22:47 Tin, a la sawi lai mekin, ngai teh, mipui an lo kal a, sawm leh pahnihte zinga tel Juda an tih chuan an hma a rawn hruai a; tin, fawh tumin Isua a rawn pan a.
22:48 Nimahsela Isua chuan a hnenah, “Juda, Mihring Fapa hi fawpin I mantir dawn em ni?” a ti a.
22:49 Tin, a vela mite chuan thil lo thleng tur chu an hriatin, “Lalpa, khandaihin kan sat ang em?” an ti a.
22:50 Tin, an zinga tuin emaw Puithiam Lalber bawih chu a sat a, a beng ding lam a sah thlaksak a.
22:51 Isua erawh chuan, “A tawk e,” a ti a. Tin, a beng chu a dek a, a tidam ta a.
22:52 Tin, Isuan a hnena lo kal puithiam lalte, Pathian biak in hotute leh upate hnenah chuan,“Khandaihte, taltumte kengin suamhmang man tur ang rengin, in lo chhuak a ni maw?
22:53 Pathian biak ina in hnena ni tin ka awm laite khan mi man tumin mi ban si lo va; nimahsela tun hi in chet hun a ni e, thim thu neihna nen,” a ti a.
22:54 Tin, an man a, an hruai a, Puithiam Lalber inah chuan an hruai lut ta a. Tin, Peteran hla tak atangin a zui a.
22:55 Tin, in hual chhung kawtlaiah mei an chhem a, an thu khawm a, Petera chu an zingah a va thu ve a.
22:56 Tin, mei enga a thut laiin nula tuin emaw a hmu a, a melh reng a, “He mi pawh hi a hnena awm kha a nih hi,” a ti a.
22:57 Ani erawh chuan, “Hmeichhia, ani chu ka hre lo ve,” tiin a pha a.
22:58 Tin, nakin deuhvah mi dangin a rawn hmu leh a, “Nang pawh an zinga mi i nih hi,” a ti a. Petera erawh chuan, “Mihring, ka ni lo ve,” a ti a.
22:59 Tin, darkar khat lai chinah chuan mi dangin, “He mi pawh hi a hnena awm kha a ni ngei mai; Galili rama mi a ni alawm” a ti tlat a.
22:60 Tin, Peteran, “Mihring, i thusawi chu ka hre lo ve,” a ti a. Tin, thawklehkhatan, a tawng lai tak chuan ar a khuang ta nghal a.
22:61 Tin, Lalpa chu a hawi a, Petera chu a en a. Tin, Petera chuan Lalpan, “Vawiinah hian ar a khuan hmain vawi thum mi phat ang,” a hnenah a tih thu kha a lo hre chhuak leh ta a.
22:62 Tin, a chhuak a, a tap ta zawih zawih a.
22:63 Tin, Isua chelhtuten nuihza siam nan an hmang a, an vua a.
22:64 Tin, a mit an tuam a, “Sawi rawh, tunge vua che?” tiin an zawt thin a.
22:65 Tin, thu dang tam tak pawhin an sawichhiain an hau va.
22:66 Tin, khawvar veleh vantlang upaho, puithiam lalte leh lehkhaziaktute chu an rawn inkhawm a, an rorelnaah chuan an hruai a,
22:67 “Krista i nih zet chuan min hrilh rawh,” an ti a. Tin, ani chuan an hnenah, “Hrilh che u mah ila in awih lo vang;
22:68 zawt che u mah ila in chhang lo vang.
22:69 Nimahsela tun achinah chuan Mihring Fapa hi Pathian thiltihtheihna ding lamah a thu tawh ang,” a ti a.
22:70 Tin, an zain, “Nang hi Pathian Fapa chu i ni em ni le?” an ti a. Tin, ani chuan an hnenah, “Ni e,” a ti a.
22:71 Tin, anni chuan, “Eng hriatna dang nge kan ngaih tawh ang? Keimahni ngeiin ama ka chhuak kan hre tawh alawm,” an ti a.
23:1 Tin, pungho zawng zawng chu an tho va, Isua chu Pilata hnenah an hruai ta a.
23:2 Tin, “He mi hian kan chite a tikhawlo va, Kaisara hnenah chhiah chawi a khap a,Krista, lal, a intih kan hria e,” tiin an hek ta a.
23:3 Tin, Pilatan a hnenah, “Judate lal i ni em?” tiin a zawt a. Tin, ani chuan a hnenah, “Ni e,” a ti a, a chhang a.
23:4 Tin, Pilatan puithiam lalte leh mipuite hnenah chuan, “He mi chungah hian engmah sual ka hmu lo ve,” a ti a.
23:5 Nimahsela anni chuan, “Galili ramah a tan a, he mi hmun thleng hian, Judai ram khaw tinah zirtirin mi zawng zawng a chawk hnawk thin a ni,” tiin an bei lehzual sauh va.
23:6 Tin, Pilatan chu chu a hriatin, chu mi chu Galili rama mi a nih leh nih loh a zawt a.
23:7 Tichuan Heroda biala mi a ni tih a hriat veleh Heroda hnenah a tir ta a; chung lai chuan ani pawh chu Jerusalem khuaah a awm bawk a.
23:8 Tin, Herodan Isua a hmuh chuan a lawm em em a; a chanchin a hriat avangin, hman ata tawh hmuh a duh hle reng a, a thilmak tih eng emaw tal hmuh pawh a beisei a.
23:9 Tin, thu tam tak a zawt a; nimahsela a engmah chu a chhang si lo.
23:10 Tin, puithiam lalte leh lehkhaziaktute chuan dingin nasa takin an hek chiam a.
23:11 Tin, Heroda leh a sipaite chuan Isua an hmusit a, nuihza siam nan an hmang a, tin, puan ropui tak sintirin Pilata hnenah a tir leh ta a.
23:12 Tin, chu mi ni tak chuan Heroda leh Pilata chu an inngeih ta a; chu mi hma zawng chu an intai thin a ni.
23:13 Tin, Pilatan puithiam lalte, hotute, mi zawng zawngte a ko khawm a,
23:14 an hnenah, “ ‘Mite a tikhawlo,’ tiin he mi hi ka hnenah in rawn hruai kha a ni a; tin, ngai rawh u, in hmaah ka chhuahchhal a, in hekna thu-ah khan he mi chungah hian engmah sual ka hmu lo a ni;
23:15 Heroda pawhin a hmu hek lo; kan hnenah a rawn tir leh ta mai a nih hi; ngai rawh u, thihna khawp meuhvin engmah a ti lo ve.
23:16 Chutichuan ka vel ang a, ka chhuah mai dawn a ni,” a ti a.
23:17 Kut niah chuan mi pakhat anmahni a chhuahsak ngei tur a ni si a.
23:18 Nimahsela rual takin an au va, “He mi hi chu tiboral la, Barabba kha min chhuahsak zawk rawh,” an ti a.
23:19 (Chu mi chu khawpuia helna eng emaw avang leh, tual a thah avanga tan ina tang a ni.)
23:20 Pilata erawh chuan Isua chhuah a duh a, an hnenah thu a sawi leh a;
23:21 nimahsela an au va, “Kraws-ah khengbet rawh, kraws-ah khengbet rawh,” an ti a.
23:22 Tin, ani chuan a vawi thumnaah an hnenah, “Engah maw? He mi hian engnge a tihsual ni? Thihna khawp meuh a chungah engmah ka hmu lo; chutichuan ka vel ang a, ka chhuah mai dawn a ni,” a ti a.
23:23 Anni erawh chuan aw ring takin kraws-a khengbet turin an ngen lui hram a. Tin, an aw chuan a vaudai ta a.
23:24 Tin, Pilata chuan an ngen anga ti turin thu a titlu ta a.
23:25 Helna leh tualthah avanga tan ina tang an dil kha, a chhuah a; Isua erawh chu an duh duha tihah a pe ta a.
23:26 Tin, an hruai bo laiin Simona, Kurini khuaa mi, ram lam ata lo kal an man a, Isua hnung lama pu turin a chungah kraws chu an nghat a.
23:27 Tin, mi naran leh hmeichhia awm chuma tap tap, mipui tam takin an zui a.
23:28 Isua erawh chuan an lam a hawi a, “Jerusalem fanute u, mi tah suh u, nangmahni leh in fate tan tap rawh u.
23:29 Ngai teh u, a ni a lo la thleng ang, chung niah chuan, ‘Hmeichhe chingte, nau pai ngai lohna pumte, nau hnek ngai loh hnutete chu a eng a thawl e,’ an la ti ang.
23:30 Chutih hunah chuan mitten tlang hnenahte, ‘Min delh rawh,’ an la ti ang a; mual hnenahte,‘Min khuh rawh,’ an la ti ang.
23:31 Thing hring maha hetiang an tih chuan a rovah chuan eng ti takin ti ang maw?” a ti a.
23:32 Tin, a hnenah mi dang pahnih, mi sual, tihhlum turin an hruai ve a.
23:33 Tin, Lu Ruh an tih hmun chu an thlenin, chutah chuan kraws-ah an khengbet a, mi sualte nen, a ding lamah pakhat, a vei lamah pakhat.
23:34 Tin, Isuan, “Ka Pa, anni hi ngaidam rawh; an thiltih hi an hre lo a nih hi,” a ti a. Tin, a silhfente chu an insemin thum an vawr a.
23:35 Tin, vantlangho chuan dingin an thlir a. Tin, hotute pawhin, “Mi dang mah a tidam thin alawm; Pathian thlan Krista a nih tak zet chuan amah pawh intidam ang hmiang,” tiin an tiel a.
23:36 Tin, sipaite pawhin amah chu nuihza siam nan an hmang a, a hnenah an lo kal a, zu thur an pe a,
23:37 “Judate lal i nih zet chuan, intidam rawh,” an ti a.
23:38 Tin, a chung lamah chuan, “He Mi hi Judate Lal a ni,” tiin lehkha a awm.
23:39 Tin, an mi sual khai pakhat chuan Isua a hau va, “Krista chu i ni lo vem ni? Intidam la, keini pawh min tidam ta che,” a ti a.
23:40 Nimahsela pakhat chuan chhan pahin a zilhhau va, “Pathian meuh pawh i hlau na nge? Thuhmun rengin an hrem che hi.
23:41 Keini zawng hremzia reng kan ni; kan thiltih man chauh hmu kan nih hi; he mi hi zawngin engmah a tisual si lo,” a ti a.
23:42 Tin, “Isu, i ram i thlen hunah mi hre reng ang che,” a ti a.
23:43 Tin, ani chuan a hnenah, “Tih tak meuhvin ka hrilh a che, vawiinah hian ka hnenah Paradis-ah i awm ve ang,” a ti a.
23:44 Tin, chawfak hun lai a lo ni a, chumi achin behliang mun hun thlengin khawvel a lo thim ta vek a,
23:45 ni eng a reh ta a; tin, Pathian biak in puan zar chu a laiah a lo thler ta a.
23:46 Tin, Isua aw ring takin a au va, “Ka Pa, i kutah ka thlarau ka kawltir e,” a ti a. Tin, chu chu a tih zawhin a thlarau a thlah ta a.
23:47 Tin, sipai za hotu chuan thil awmzia chu a hmuhin, “He mi hi matheilovin mi fel tak a ni phawt mai,” tiin Pathian a fak ta a.
23:48 Tin, chu ennawm chu thlir tura mipui rawn inkhawm zawng zawngte chuan thil awmziate chu an hmuhin an awmte chum chumin an haw leh ta a.
23:49 Tin, a hmelhriatte zawng zawng leh hmeichhia Galili ram atanga rawn zuite chu,chung thil chu thlirin hla takah an ding a.
23:50 Tin, ngai teh, mi pakhat a hming Josefa, roreltu, mi tha tak, fel tak a awm,
23:51 (an rorel leh an thiltih pawh kha a remti lo reng a ni) Judate khua Arimathaia mi a ni a, Pathian ram a beisei thin a.
23:52 Chu mi chu Pilata hnenah a kal a, Isua ruang a dil a.
23:53 Tin, a la thla a, puan zai sinin a tuam a, thlan, lung kerkuak, tumah la zalh ngai lohnaah a zalh a.
23:54 Tin, chu mi ni chu Inrinni a ni a, Chawlhni a lo ni lek lek tawh si a.
23:55 Tin, hmeichhia Galili ram atanga a hnena lo kalte khan an zui zel a, thlan leh a ruang zalhzia chu an hmu a.
23:56 Tin, an haw leh a, englo rimtuite leh hriak rimtuite an siam a.
24:1 Tin, Chawlhni chuan thupek angin an chawl ta a; ni sarih ni hmasa berah erawh chuan vartianah, englo rimtui an siamte chu kengin thlanah chuan an va kal a.
24:2 Tin, thlan ata lung chu lum sawnin an hmu a;
24:3 tin, an lut a, Lal Isua ruang chu an hmu si lo.
24:4 Tin, heti hi a ni a, chung avanga an mangan lai chuan ngai teh, mi pahnih puan mi enkhalhthei sin an kiangah an lo ding a;
24:5 tin, an hlauhva an hmaia lei an sik laiin anni chuan an hnenah, “Engati nge mitthi zinga mi nung in zawn?
24:6 Hetah a awm tawh lo ve, a tho leh ta; Galili rama a awm laia in hnena a thusawi kha hre leh rawh u,
24:7 ‘Mihring Fapa hi mi sualte kuta mantirin a awm ang a, kraws-ah an khengbet ang a, ni thum niah chuan a tho leh tur a ni,’ a tih kha,” a ti a.
24:8 Tin, a thu chu an lo hre leh ta a,
24:9 thlan ata chu an haw leh a, sawm leh pakhatte leh mi dang zawng zawngte hnenah chuan chung thil zawng zawng chu an hrilh a.
24:10 (Chung hmeichhiate chu Magdalini Mari te, Joani te, Jakoba nu Mari te an ni a; an hnena hmeichhe dangte pawhin tirhkohte hnenah chuan chung thu chu an hrilh bawk a.)
24:11 Nimahsela chung thu chu thu mai maiah an ruat a, an awihsak lo va.
24:12 Nimahsela Petera chu a tho va, thlanah chuan a tlan ta a; tin, a kun a, a bih a, puan zai sin awmte chauh chu a hmu a; tichuan thil awmzia chu mak ti takin a inlamah a haw ta a.
24:13 Tin, ngai teh, chu mi ni tak chuan an zinga mi pahnih chu khaw pakhat Emmau an tihah an kal dawn a, chu mi khua chu Jerusalem khua atangin fing sawmruk a ni a.
24:14 Tin, thil lo thleng zawng zawng chu an sawi dun zel a.
24:15 Tin, heti hi a ni a, an sawia an inhnial lai chuan Isua ngeiin a rawn pan a, an hnenah a kal ve ta a.
24:16 Nimahsela amah chu an hriat theih loh nan, an mit chu tihvaihin a awm a.
24:17 Tin, an hnenah, “Kal paha in sawi dun kha, eng thu nge ni?” a ti a. Tin, ngui takin an ding ta a.
24:18 Tin, a hming Kleopa zawkin a hnenah, “Jerusalem khuaah nangmah chauhvin em ni i chen, tun laia thil awmzia hi i hriat loh ni?” a ti a, a chhang a.
24:19 Tin, ani chuan an hnenah, “Eng thil maw?” a ti a. Tin, anni chuan a hnenah, ‘Nazaret Isua,Pathian leh mi zawng zawng mithmuha a thu-ah leh a thiltiha zawlnei hmingthang tak chanchin thu;
24:20 puithiam lalte leh kan hotuten thah thu pek turin an hruai a, kraws-a an khenbehzia thute pawh kha.
24:21 Keinin Israelte tlantu tur kha a nih kan beisei tehlul nen. Engpawh ni sela, chung thil thlenna chin chu vawiin nen ni thum a ni tawh.
24:22 Chung lo pawh chu kan pawlte hmeichhia tute emaw, zingah a thlanah an va kal a, min rawn timangang a;
24:23 a ruang hmu si lovin, ‘Pathian vantirhkohte inlar kan hmu a, chu mite chuan a nung leh tih an sawi e,’ an rawn ti a.
24:24 Tin, kan awmpui zinga tute emaw thlanah chuan an kal a, hmeichhiate sawi ang ngeiin an hmu a; nimahsela amah chu an hmu si lo va,” an ti a.
24:25 Tin, ani chuan an hnenah, “Mi ate u! zawlneite thusawi zawng zawng awih kawnga ngawngte u!
24:26 Kristan chung thil chu tuarin a ropuinaah a lut tur a ni reng lo vem ni?” a ti a.
24:27 Tin, Mosia leh zawlneite zawng zawng lehkhaah a tan a, Pathian Lehkha zawng zawnga ama chanchin ziak apiang chu anmahni a hrilhfiah zel a.
24:28 Tin, an kalna tur khua chu an thleng dawn ta a; tin, ani chu hla deuhva kal tum angin a awm a.
24:29 Tin, kain an chelh a, “Kan hnenah awm ta che; khua a tlai dawn ta a, ni pawh a tlak dawn tawh hi,” an ti a. Tichuan an hnena awm turin a lut ta a.
24:30 Tin, heti hi a ni a, an hnenah chaw kila a thutin chhang a la a, mal a sawm a, a phel a, an hnenah a pe a.
24:31 Tin, an mit a lo var a, a hmel an lo hre ta a; tin, ani chu a ral ta mai a.
24:32 Tin, anni chuan, “Kalkawnga min biak laia Pathian Lehkha Thute min hrilhfiah lai khan kan thinlung a harh huai reng lawm ni kha?” an inti a.
24:33 Tin, chu mi lai tak chuan an tho va, Jerusalem khuaah an kir leh a, sawm leh pakhatte leh an thiante awm khawm chu an hmu a,
24:34 “Lalpa chu a lo tho leh tak zet a ni, Simona hnenah pawh a inlar ta,” an lo ti a.
24:35 Tin, anni pawhin kalkawnga thil lo thleng leh, chhang a phel a, a hmel an lo hriat takziate chu an hrilh ve bawk a.
24:36 Tin, chung thu chu an sawi laiin amah ngei chu an zingah a lo ding a, an hnenah, “In chungah thlamuanna awm rawh se,” a ti a.
24:37 Nimahsela rapthlak an ti em em a, an hlau va, thlarau hmu-ah an inruat a.
24:38 Tin, ani chuan an hnenah, “Engati nge in mangan? Engah nge in rilruah rinhlelhna a lo awm?
24:39 Ka kutte, ka kephahte hi en rwh u, hei keimah ngei kha ka nih hi! Mi dek ula, en rawh u; mi hmuh ang hian thlarauvin tisa leh ruh a nei lo ve,” a ti a.
24:40 Tin, chu chu a sawi zawhin a kutte, a kephahte an hnenah a entir a.
24:41 Tin, an lawm luattuk avanga an la awih loh cheuva mak an tih chhungin an hnenah, “Hetah englo ei tur in nei em?” a ti a.
24:42 Tin, sangha rawh hrang khat an pe a.
24:43 Tin, a la a, an hmaah chuan a ei ta a.
24:44 Tin, an hnenah, “Heng hi ka thu kha a ni, Mosia Danahte, Zawlnei Lehkhabuahte, Fakna Hla Buahte ka chanchin ziak apiang a lo thlen turzia in hnena ka awm laia ka hrilh thin che u kha,” a ti a.
24:45 Tichuan Pathian Lehkha Thu hriat nan an thinlung a tifing ta a;
24:46 tin, an hnenah, “Hetiangin ziak a ni, ‘Krista chuan hrehawm a tuar ang a, ni thum niin mitthi zing ata a tho leh ang a,
24:49 Tin, ngai teh u, ka Pa thil tiam chu in chungah ka rawn tir dawn e; nimahsela chung lam ata thiltihtheihnaa an thuam hma loh che u zawng khawpuiah hian awm reng rawh u,” a ti a.
24:50 Tin, Bethani dai kiang thlengin anni chu a hruai chhuak a; tin, a ban a phar a, mal a sawmsak a.
24:51 Tin, heti hi a ni a, mal a sawmsak lai takin anni chu a then a, vana hruai chhohvin a awm ta a.
24:52 Tin, chibai an buk a, lawm em emin Jerusalem khuaah an kir leh ta a;
24:53 tin, Pathian biak inah chuan Pathian fakin an awm fo thin a. |
posted by zoblog @ 11:36 AM  |
|
|
|
