|
| Wednesday, September 12, 2007 |
1:1 Israel-ho hnena LALPA thu chhuak Malakia kut ziak chu.
1:2 LALPA chuan, ka hmangaih che u a ni, a ti a. Nangni erawh chuan, engah khan nge min hmangaih ni? in ti a. Esauva chu Jakoba unaupa a ni lo vem ni? Tih hi LALPA thu chhuak a ni: Jakoba chu ka hmangaih a;
1:3 Esauva erawh chu ka hua a, a tlângte chu hmun tiauvah ka siam a, a rochan chu thlalêr sihalte ka pe a.
1:4 Edom ho chuan, tihchhiatin ka awm na a, Kan lo kîr leh ang a, hmun ramte chu kan din leh ang, ti mah sela, Sipaihote LALPA chuan heti hian a ti: Anni'n an din leh nâ'nga, kei in ka thiat leh ang: Tin, mite chuan anni chu Suhsualna ram leh kumkhuaa LALPA thinrim êm êmnateho, an ti ang.
1:5 In mit ngeiin in hmu ang a, Israel ramri pêlin LALPA chu châwimâwiin awm rawh se, nangni ngeiin in la ti ang.
1:6 Fapa chuan a pa a châwimâwi thîn a, Bâwih chuan a pu: Kei hi pa ka nih chuan min châwimâwina chu khawiah nge? Kei hi in pu ka nih chuan min tihna chu khawiah nge? Aw puithiam, ka hming hmusittute u, sipaihote LALPA chuan a ti che u a ni. Nangni erawh chuan, engah khân nge i hming kan hmuhsit ni? in ti a.
1:7 Ka maichâmah chuan chhang bawlhhlawh in hlân a lawm. Nangnin, engah khân nge kan tihbawlhhlawh che? in ti a LALPA dawhkân hi hmuhsitawm a ni, in tih thin ah hian a ni.
1:8 Inthawi nân a mitdel in hlanin sualna a awm hek lo maw? A kebai leh a silawng in hlanin sualna a awm hek lo maw? In ram awptu pawh pe teh u; a lâwm dâwn che u em ni? A nih leh, a lo ngaisâng ang che u maw? Sipaihote LALPA chuan a ti.
1:9 Tûnah hian min khawngaih theih nân pathian tihlungawina zawng rawh u khai - Hetiang hi in kutkawih ngei a ni si a- A lo ngaisâng dawn che u em ni? Sipaihote LALPA chuan a ti.
1:10 Athlâwn maia ka maichâmah chuan mei in tihalh loh nan In zîngah mi, kawngkhâr khâr tûr awm teh sela aw! In chungah lawmna rêng ka nei lo va, In kut ata thilhlan chu ka pawm hek lo vang; Sipaihote LALPA chuan a ti.
1:11 Ni chhuahna atanga a tlâkna thleng pawhin Jentailte zîngah ka hming chu a ropui si a, hmun tinah ka hming atân rimtui hlan a ni, thilhlan thianghlim nên: Jentail te zîngah ka hming a ropui si a, Sipaihote LALPA chuan a ti.
1:12 Nangni erawh chu, LALPA dawhkan chu a bawlhhlawh a ni, a rah a chaw ngei chu a hmuhsitawm, in tih-ah khan a ni A tibawrhbângtu in nih ni.
1:13 Tin, ngai teh u, a va ninawm êm! In ti bawk a, In hnâr in tûm khum a, Sipaihote LALPA chuan a ti; hneh chhuha in thil lâkte, a kebai te, a silawng te in rawn la a; chutiangin thilhlan chu in rawn la a: Chûng chu in kut ata ka pawm dawn em ni? LALPA chuan a ti.
1:14 A ran ruala a pa awm reng a, thu pawh tiam a LaLPA hnêna a hmêlhem hlana bumtu chu an chhe dawng a ni: Kei chu lal ropui tak ka ni si a, ka hming pawh Jentailte zîngah A tihawm a ni, sipaihote LALPA chuan a ti.
2:1 Khai le, puithiamte u, he thupêk hi nangmahni tân a ni e.
2:2 Ka hming tiropui tûra in ngaihthlâk lohva, thinlunga in vawn loh chuan In chungah an chhia ka rawn thlentîr ang, Sipaihote LALPA chuan a ti, In malsawmna dawnte chu ânchhia ka lawh ang: A ni, in zîngah thinlunga vawng in awm loh avângin ânchhia ka lawh tawh rêng a ni.
2:3 Ngai teh u, nangmahni vângin in chite chu ka zilhhau va, In hmaiahte chuan êk ka tât pherh ang. In kûtna êk ngei chu; Chu mi nên chuan lâk bo in ni ang.
2:4 Levia hnêna ka thuthlung hi a din zêl theih nân he thupêk hi in hnênah ka rawn chhuah a ni, tih in hria ang, Sipaihote LALPA chuan a ti.
2:5 Ka thuthlung chu a hnênah a awm a; nunna leh thlamuanna ka pe a, tih pawh mi tih a ni, ka hming chu hlauh namênin a hlau lo va.
2:6 Thutak dân chu a kâah a awm a, thu sual a hmuiah a awm lo: Thlamuang tak leh ngîl takin ka hmâah a lêng thîn a, mi tamtak an khawlohna ata a lamlêttîr a ni.
2:7 Puithiam hmuite chuan hriatna a vawng tûr a ni si a, a kâ atangin dân chu an zawng thîn tûr a ni; A ni chu sipaihote LALPA tirhkoh a ni si a.
2:8 Nangni erawh zawng kawng ata chu in lo pêng ta a; Dânah chuan mi tam tak in petektîr a; Levia thuthlung chu in tichhia a ni, Sipaihote LALPA chuan a ti.
2:9 Chuvângin kei pawhin, ka kawngte tumah zawh in awm lohva, dân thua mi thleibîk in neih zawk ang zêl hian, Mi zawng zawng hmâah hmuhsitawm leh tlâwmin ka siam che u a ni.
2:10 Kan vaiin pa hmun kan ni lo vem ni? Pathian pakhat siam pawh kan ni lo vem ni? Engatinge kan pate thuthlung tihbawrbânga, unau leh unau kan in bum thin?
2:11 Juda chuan bum a hmang a,Israel ram leh Jerusalem khuaah Thil tenawm tih a ni a; LALPAN a hmangaih thin hmun thianghim chu Juda chuan a tibawrhbâng ta si a, Ram dang pathian fanu a nei ta a ni.
2:12 Hetiang ti chu, a tua-pawh, Jakoba puan in ata LALPAN a tifihlim vek ang, Sipaihote LALPA hnêna thil hlan tu chenin.
2:13 Tin, hei pawh hi in ti leh pêk a; mittui leh tahna leh rûmnain LALPA maichâm chu in chhilh hneh khawp a, Thilhlan a ngaihsak rêng rêng tawh lo va, In kuta mi chu lawmawmah a ngai hek lo.
2:14 Nangni chuan, Eng vâng nge ni le? In la han ti a. Nang leh i nupui tawntirh inkâra thu hretu chu LALPA a ni a, i kawppui leh i thuthlung nupui a ni na chungin A chungah bumna thil i tih thin avâng a ni.
2:15 Nunna chi neiin, pumkhatah a siam lo vem ni? Engah nge pumkhata a siam? Chi thlah, Pathian ngaihsak a zawng a ni. Tichuan in nunna chu vêng tha ula, tumân mahni nupui tawntirh chu bum suh se.
2:16 In mâk hi ka haw si a, LALPA Israel-ho Pathian chuan a ti; Mahni silhfên hnehchhiahnaa khuhtu nên, Sipaihote LALPA chuan a ti. Tichuan, in nunna chu vêng tha ula, in bum suh u.
2:17 In thutein LALPA chu in tihah ta. Nangni erawh chuan, Engah khân nge kan tihhah? In ti a. Thilsual ti tu apiang LALPA mit hmuhah mi tha an ni a, An chungah pawh ani chu a lâwm thîn, in tih-ah te, Rorêl felna Pathian chu khawiah nge? In tih-ah te hian a ni.
3:1 Ngai teh, u, ka tirhkoh ka rawn tîr a, Ka hmâah kawng a buatsaih ang: Tin, in zawn LALPA chu a biakinah a lo kal phut ang; Ngai teh u, thuthlung tirhkoh in lawm êm êm chu a lo kal e, Sipaihote LALPA chuan a ti.
3:2 Amaherawh chu a lo kal ni chu tunge tuar zo vang: A lo lan hunah chuan tunge ding thei ang? Ani chu rawhtuina mei ang leh puan sutute sabawn ang a ni si a:
3:3 Tangkaraw rawhtuina leh tithianghlimtu angin a thu ang a, Levia fate a tithianghlim ang a, Rangkachak leh tangkarua angin an mahni a tifai ang a; LALPA tan chuan felnaa thilhlantute an ni ang.
3:4 Chutichuan hmâsâng nite leh hmâsâng kumte angin Judai ram leh Jerusalem thilhlan chu LALPA tan duhawm tak a ni leh ang.
3:5 Rorêl tûrin ka rawn hnaih dawn a che u; Dawithiamte, uirete, dawta chhechhamtute chungah leh Hmeithai leh fahrah leh inhlawhfa hlawh tikhawlova hnehchhiahtute leh hnamdang lo sathlatute leh mi tih lotute chungah chuan Thu hretu tuantha tak ka ni ang, Sipaihote LALPA chuan a ti.
3:6 Kei LALPA hi ka danglam si lo, chuvângin nangni, aw Jakoba fate u, tihboral in ni lo ve.
3:7 In pute hun ata tawh ka thuruatte in kal pensan a, zawm pawh in zawm ngai lo. Ka hnênah lo kîr ula, Tichuan in hnênah ka lo kîr ang, Sipaihote LALPA chuan a ti. Nangni erawh chuan, Engahte hian nge kan kîr ang? In ti a.
3:8 Mihringin pathian ata chu a rûksak tûr em ni? Mahse nangni chuan min rûksak thin. Nangni erawh chuan, Engahte hian nge kan rûksak che? In ti a, Sâwma pakhat leh thilhlanahte hian.
3:9 Anchhia lawh in ni ta; nangni he hnam pumpui hian Kei hi min rûksak si thin a.
3:10 Ka inah eitûr a awm theih nân sâwma pakhat zawng zawng chu thawhlawm inah rawn la rawh u,Vân tukverhte chu hawnsak che uin Malsawmna dawn sên loh khawp hial ka vûr dawn che u nge dawn lo, mi han fiah teh rêng u, Sipaihote LALPA chuan a ti.
3:11 Eiraltu chu ka khapsak ang che u a, tichuan, in lei rahte chu a tihchhiatsak tawh lo vang che u a, Huana in grêp rah chu a hlam tla ral tawh hek lo vang, Sipaihote LALPA chuan a ti.
3:12 Tin, hnam zawng zawngin engthâwl an ti ang che u a, ram duhawm tak in la nih dawn avângin, Sipaihote LALPA chuan a ti.
3:13 Ka chunga in thute chu a paukhauh hle, LALPA chuan a ti. Nangni erawh chuan, engah khân nge i chungah chutiang thu kan sawi? In ti a.
3:14 Pathian rawngbawl hi a thlâwn a ni: A thuchah kan zawm leh Sipaihote LALPA hmâa intilunghnûr taka kan lêng thîn hi sawtna eng nge awm?
3:15 Tin, mi chapote chu an eng a thawl e, kan ti a; Thil suaksual titute chu an dingchang bawk a, Pathian an fiah a, chhanhim an ni bawk thin in ti a ni:
3:16 Tichuan, LALPA tihtute chu an in be tlâng a: LALPA chuan a lo ngaithla a, a lo hria a, LALPA tihtute leh a hming ngaihsak tute tân Hriatrengna lehkhabu chu a hmâah ziak a ni ta a.
3:17 Rochuam ka siam nîah chuan ka ta an ni ang, Sipaihote LALPA chuan a ti; tin, miin a fapa, a rawngbawlsaktu chu a zuat angin an ni chu ka zuat ang.
3:18 Tichuan, in lamlêt ang a, mifel leh mi suaksual, Pathian rawngbawltu leh bawl lo tu chu in thliar thei tawh ang.
4:1 Ngai teh u, nî chu a lo thleng e, Rawhtuina mei angin a kâng a ni; Mi chapo zawng zawngte leh sual titu zawng zawngte chu Buhpawl an ni ang: chu ni lo thleng chuan anmahni a kâng ang; Zung leh zâr chenin a zuah lo vang, Sipaihote LALPA chuan a ti.
4:2 Nangni ka hming tihtute tân erawh chuan Felna nî, thlaa tihdamna nên, a lo chhuak ang a, In kal chhuak ang a, bawng note hren lai Thaukhawh angin in tual chai ang.
4:3 Mi suaksualte chu in rapbet ang a; Ni ka ruatah chuan in kephah hnuaia meivap an ni dawn si a, Sipaihote LALPA chuan a ti.
4:4 Ka chhiahhlawh Mosia dân, Horeb tlânga a hnêna ka thupêk, Israel mi zawng zawng tâna thuruatte leh rorêlnate kha hre reng rawh u.
4:5 Ngai teh u, LALPA ni ropui leh râpthlâk tak a lo thlen hmâin Zâwlnei Elija chu ka rawn tirh ang che u.
4:6 Ani chuan pa leh fate inkârah Inrem lehna a thlentîr ang; Chuti lo chuan ka lo kal ang a, ânchhiain lei hi ka nghaisa dah ang e. |
posted by zoblog @ 11:47 AM  |
|
|
|
|
|
