| Wednesday, September 12, 2007 |
1:1 Daria lal kum hnihna, thla riatnaah chuan Idova fa Barakia fapa zâwlnei Zakaria hnênah chuan LALPA thu a lo thleng a:
1:2 LALPA chu in pate chungah khan a lungni lo êm êm a ni.
1:3 Chuvângin heti hian an hnenah va sawi rawh: Sipaihote LALPA chuan heti hian a ti e, Kan lam lo hawi ula, kei pawh in lam ka lo hawi ang, Tih hi Sipaihote LALPA thu chhuak a ni.
1:4 Zâwlnei hmasaten, Sipaihote LALPA chuan, In awm dan sual chu rawn hawisan rawh u, a ti e, Tia in pate an hrilh pawha ngaithla lo va, Bengkhawn lote ang khan awm suh u, Tih hi LALPA thu chhuak a ni.
1:5 In pate chu khawiah nge? Zâwlneite pawh chu an nung kumkhua ta êm ni?
1:6 Ka thu leh ka thu ruatte, ka chiahhlawh zâwlneite hnêna Ka pêk khan, in pate chu a nang ta mai pawh a ni lâwm ni? Tichuan, an lamlêt a, Sipaihote LALPA chuan Kan chungchanga tih a tum thin angin Kan awm dan ang zel leh kan thiltih ang zelin Kan lakah a ti ta a ni, an tih kha, tiin.
1:7 Daria kum hnihna, thla sâwm leh thla khatna, chu chu Sebat thla a ni a, ni sawmhnih leh ni linaa chuan Idova fa Barakia fapa, zâwlnei Zakaria hnênah chuan LALPA thu a lo thleng a;
1:8 zanah chuan sakawr sen chunga mipakhat chuang ka hmua, ruama lenhmui thing zingah hian a ding a; tin, a hnungah chuan sakawr, a sen te, a buang te, a varte an awm a.
1:9 Tah chuan kei chuan, Aw ka lalpa, heng hi eng nge ni? Ka ti a.
1:10 Tin, mi lenhmui thing zinga dingkhan a chhang a, Heng hi LALPAN lei zawng zawng fang chuak tûra a tirhte chu an nih hi, a ti a.
1:11 Tin, anni chuan, LALPA vântirhkoh lenhmui thing zinga ding chuan a chhâng a, Lei zawng zawng chu kan fang chuak tawh a, ngai rawh, lei chu a awm hle hle a, a awm mai mai a ni, an ti a.
1:12 Chutah LALPA vântirhkoh chuan a chhang a, Aw sipaihote LALPA, Jerusalem leh Juda khawpui chunga he kum sâwmsarih i thinurnate hi eng chen nge i khawngaih loh vang le? a ti a.
1:13 Tin, LALPA chuan, vântirhkoh, thu tha tak thu thlamuanawm taka mi betu chu a chhâng ta a.
1:14 Chutichuan vântirhkoh mi betu chuan ka hnênah, Heti hian va au rawh, a ti a: Sipaihote LALPA chuan heti hian a ti a ni: Jerusalem leh Zion hi vei tak meuh vin ka vei a.
1:15 Tin, hnam nuam leng mai maite lakah chuan ka lungni lo êm êm a ni; Ka lungni lo deuh chauh a ni na a, Anmahni tana thil tha lo chu an tizual ta a ni.
1:16 Chuvângin LALPA chuan heti hian a ti a ni: Zahngaihna nen Jerusalem lam ka hawi leh mek a. Tah chuan ka in chu sak ani ang, Tih Jerusalem chungah chuan tehna zamin a la awm ang, tiin.
1:17 Heti hian Sipaihote LALPA chuan a ti e, Ka khawpuite chu hmuingilna avângin an vul leh ang a, LALPA chuan Zion chu a thlamuan leh ang a,Jerusalem chu a thlang leh ang,Tiin va au leh rawh, a ti a.
1:18 Tin, ka mit ka han len chho va, ka'n en a, ki pali ka hmu a.
1:19 Vântirhkoh mi betu hnênah chuan, Heng hi eng nge ni? Ka ti a. Tin, ani chuan, heng hi Juda te, Israel te, Jerusalem te tidarhtu ki an nih hi,tiin mi chhang a.
1:20 Tin, LALPA chuan thirdeng pali mi entir a.
1:21 Tichuan kei chuan, Heng hi eng rawn ti tûr nge an nih? Ka ti a. Ani chuan, sawng saw tumah dak chhuak ngam reng awm tawh lo khawpa Judate tidarhtu ki chu an ni a; mahse heng hi, anmahni tizam tûr leh Juda ram tidarh tûra an laka an ki rawn hmangtu hnamte ki chu paih thla tûra lo kal an nih hi, tiin a sawi a.
2:1 Tin, ka mit ka han len cho va, ka'n en a, mi pakhat, a kuta tehna keng hi ka hmu a.
2:2 Tichuan, kei chuan, Khawiah nge i kal dâwn? Ka ti a. Ani chuan ka hnênah, Jerusalem hi a veng eng tia nge anih a, a dung eng chen nge a nih hre tûra teh tûrin, a ti a.
2:3 Tin, ngai teh, vantirhkoh mi betu kha a kal chhuak ta a; tin, vântirhkoh dang amah tawk tûrin a lo chhuak bawk a,
2:4 a hnênah, tlan la he tlangvâl hnênah hian, Jerusalem hi ami tam vang leh ran rual tam vangin Khaw hungna nei lo anga luahin a awm dâwn a ni.
2:5 Kei hi a vêlah mei kulh ka ni ang a, A laia ropui chu ka ni dâwn bawk si a, Tih hi LALPA thu chhuak a ni.
2:6 Hawh teh u, hawh teh u, hmâr ram ata tlan chhuak rawh u, Tih hi LALPA thu chhuak a ni. Vân thli pali ang maiin ka tidarh tawh si che u a, Tih hi LALPA thu chhuak a ni.
2:7 Hawh teh, Zion, Babulon fanu zinga la chêng, relh bo rawh.
2:8 Sipaihote LALPA chuan heti hian a ti si a; Ropuinna tûr angzia zelin a tikhawlotu che u hnam hnênah chuan min tir a ni: Nangni khawihtu chuan a mit naute a khawih a ni mai.
2:9 Ngai rawh u, ka kut ka thin khum dâwn si a, Anmahni rawngbawltute râllâk an ni mai ang: Tichuan, Sipaihote LALPA chuan mi tir ani tih in la hre dâwn a ni.
2:10 Zion fanu, hlimin zai rawh; ngai rawh, ka lo kal e, I hnênah ka chêng dâwn si a, tih hi LALPA thu chuak a ni.
2:11 Chumi niah chuan hnam tam takin LALPA chu an rawn zawm ang a, a mite an ni ang: Tin, i hnênah chuan ka chêng ang a, Tichuan, Sipaihote LALPA chuan i hnênah mi tir a ni, tih i hre tawh ang.
2:12 Tin, LALPA chuan ram thianghlima a chanvo atân Juda chu a rochung ang a, Jerusalem chu a la thlang ang.
2:13 Mi zawng zawngte u, LALPA hmaah chuan ngawi thiap rawh u: Ani chu a hmun thianghlim ata a lo tho tawh si a, Tiin va sawi rawh, a ti a.
3:1 Tin, puithiam lalber Josua, LALPA vântirhkoh hmaa ding leh a dodaltu tûr Setana ama ding lampanga ding chu mi entir a.
3:2 Tin, LALPA chuan Setana hnênah, Aw Setan, LALPA chuan hau che rawh se: A ni, LALPA Jerusalem thlangtu chuan hau che rawh se: He mi hi thingthu mei ata phih chhuah chu ani lo vem ni? A ti a.
3:3 Tichuan Josua chu silhfên bawlhhlawh taka inthuamin vântirhkoh hmaah chuan alo ding a.
3:4 Tin, a hmaa dingte chu a han bia a, A silhfên bawlhlawh chu hlihsak rawh u, tiin. Tin, ama hnênah chuan, Ngai teh, i khawlohnate chu ka tibosak ta chia: tichuan silhfên hlu takin ka thuam ang che, a ti a.
3:5 Tin, kei chuan Lukhum mawi tak khumtir rawh se, ka han ti a. Tichuan lukhum mawi fe chu an khumtir ta a, silhfenin an thuam a, tin, LALPA vântirhkoh chu a kiangah a ding a.
3:6 Tin, LALPA vântirhkoh chuan Josua hnênah,
3:7 Sipaihote LALPA chuan heti hian a ti a ni: Ka kawngte i zawh zel a, ka thu tukte i tih chuan, Ka in chhûng ro i rêl ang a, Ka rorêl hmunte chu i vawng bawk ang a, Heng dinghote zingah hian tel ve theihna tûr ka pe ang che.
3:8 Tunah ngai teh, aw Josu, puithiam lalber, Nang leh i thiante i hmaa thute nen ngai rawh u, Thil tha thleng entir lâwkna an i si a: Ngai teh u, ka chhiahhlawh Chawr no chu ka rawn chhuah dâwn si a. Ngai teh mah u, Josua hmaa ka lung dah chu; Lung pakhatah chuan mit pasarih a awm a ni;
3:9 Ngai teh u, a chungah chuan thil ziakte ka ziak ang a, Churam khawlohnate chu ni khat thilah ka la bo vek mai ang, Tih hi Sipaihote LALPA thu chhuak a ni.
3:10 Chumi niah chuan mi tinin grêp hrui hnuaiah te leh Theipui hnuaiahte mahni thenawmte in sawm theuh tawh ang, Tih hi Sipaihote LALPA thu chuak a ni, tiin a tiam ta a,
4:1 Tin, vântirhkoh mi betu kha a lo kal leh a, mi muhil lai tihharh ang mai hian mi rawn tiharh a.
4:2 ka hnênah chuan, Eng nge i hmuh le? a ti a. Tin, kei chuan, Rangkachak khâwnvâr dahna, a chhîpa berhbu te leh chumia khâwnvâr pasarihte nen, tin, a chhîpa khâwnvar dawt pasarihte nei theuhte leh
4:3 Olive thing pahnih berhbu ding lama pakhat, vei lama pakhat awm ka hmu,ka ti a.
4:4 Tin, vântirhkoh mi betu hnênah chuan, Heng hi eng nge ni, ka pu? Tiin ka han ti leh ve a.
4:5 Tin, vântirhkoh mi betu chuan mi chhang a, ka hnênah, Heng hi eng nge an nih, i hre lo maw? a ti a. Kei chuan, Hre lo, ka pu, ka ti a.
4:6 Chutah ani chuan ka hnênah, Heng hi Jerubabela hnêna LALPA thu chu a ni a: Chakna ni lovin, thiltihtheihna ni hek lovin, Ka thlarau zawkin le, tiin Sipaihote LALPA chuan a ti e.
4:7 Tunge i nih? aw tlâng lianpui, Jerubabela hmaah chuan phaizawlah i chang maiang; Ani chuan a lung pawimawh ber chu A tana malsawmna nen, hlimna au aw nen a rawn thlen ang, Tiin mi chhâng ta a.
4:8 Chu lo pawh chu LALPA thu ka hnênah a lo tleng leh a:
4:9 Jerubabela kut chuan he in lungphûmte hi aphûm ta a. Ama kut bawkin a puitlin ang a, Tichuan, Sipaihote LALPA chuan in hnênah mi tir ani tih in hre tawh ang.
4:10 Thil tenau hun te hi tuin nge hmusit ni? Hlim takin an awm ang a, Jerubabela kuta dar mum khai chu an hmu dâwn si a; Heng pasarihte ngei hi LALPA mit chu an ni bawk a, Lei pum pui chungah hian an vak vêl thin, tiin.
4:11 Tin, kei chuan ka chhâng a, a hnênah, Heng olive thing pahnih, khawnvar dahna ding lam leh vei lama mi hi eng nge ni? ka ti a.
4:12 Tin, ka han chhâng nawn leh a, a hnênah, rangkachak dawt pahnih kianga heng olive zar pahnih rangkachak hriak lo chhuahnate hi eng nge ni? ka ti a.
4:13 Tin, ani chuan mi chhâng a, Heng hi eng nge ni dâwn tih i hre lo maw? Min ti a. Tin, kei chuan Hre lo ve, ka pu, ka ti a.
4:14 Tin, anin, Heng fapa pahnih, hriak ngah takte hi, lei pum pui LALPA kianga dingte chu an nih hi, a ti a.
5:1 Tah chuan ka mit ka han len chho leh a, ka han en a, lehkhabu zial thlâwk duai duai hi ka hmu a.
5:2 Tin, ani chuan ka hnênah, Eng nge i hmuh le? A ti a. Kei chuan ka chhâng a, Lehkhabu zial thlawk duai duai ka hmu; a dung chu tawng sawmhnih a ni a, a vang chu tawng sawm a ni, ka ti a.
5:3 Tin, ani chuan ka hnênah, Hei hi ram pum pui chunga anchhe kal chhuak chu anih hi; a pang khing khat thu ang zelin rukru apiang pawh thenfai an ni bawk ang.
5:4 ka kal chuahtir ang a, rukru inah leh ka hming chhala dik lo taka chhechhamtu inah te chuan a lût ang a, an in chhûngah chuan a awm reng ang a, a thingphel te, a lungte chawpin a tiral vek ang tih hi Sipaihote LALPA thu chhuak a ni, a ti a.
5:5 Tin, vântirhkoh mi betu chu a kal chhuak a, ka hnênah, Tunah i mit han len cho la, kal chhuak ta kha eng nge ni? En teh, mi ti a.
5:6 Tin, kei chuan, Eng nge ni? Ka han ti a. Ani chuan, "Hei hi ani bâwm kal chhuak ta kha," a ti a. Amah vekin, "Hei hi ram pum puia an khawlohna chu ani" a ti a.
5:7 Suan talent khata rit a chhin chu a hawng a, bâwm chhûngah hmeiche pakhat a thu a.
5:8 Tin, ani chuan, Hei hi Suaksuali chu a ni, a ti a; Ephah chhûngah chuan a nem lût a; tin, suan rit ak chuan a chhin ta a.
5:9 Tah chuan ka mit chu ka han len chho va, ka han en a, hmeichhe pahnih lo kal chhuak ka hmu a, an thlaah chuan thli a awm a; thla chu vacha thla ang hi an nei a ni. Tin, Ephah chu lei leh vân karah an chawikang ta a.
5:10 Tin, kei chuan vântirhkoh mi betu hnênah chuan, Ephah chu hengte hian khawi lamah nge an kalpui dâwn? Ka ti a.
5:11 Ani chuan ka hnênah, sinar rama a tana in sakna tûr lamah chuan; tin, in chu peih anih hun chuan chutah chuan ama hmun ngeiah an dah ang, a ti a.
6:1 Tin, kei chuan ka mit ka han len chho leh a, ka han en a, tlâng pahnih kara sakawr tawlailir pali lo chhuak hi ka hmu a, tlangte chu dar hlâwm an ni a.
6:2 Tawlailir pakhatnaa mi chu sakawr sen an ni a, tawlailir pahnihnaa mi chu sakawr dum an ni a,
6:3 tawlailir pathumnaa mi chu sakawr var an ni a, talailir palinaa mi chu sakawr hmârsai, chak tak si hi an ni a.
6:4 Tah chuan ka chhâng a, vântirhkoh mi betu hnenah chuan Heng hi eng nge ni, ka pu? Ka ti a.
6:5 Tin, vântirhkoh chuan ka hnênah, "Heng hi vân thli pali, leilung zawng zawng LALPA hmaa ding thin, kal chhuakte chu an nih hi."
6:6 Sakawr dum awmna tawlailir chu hmâr lamah a kal chhuak a, a var awmna chuan a dawt a, tin, a hmârsai awmna chu chhim ram lamah a kal chhuak a.
6:7 Tin, a sente chu an han ding chhuak a, kal chhuah a, leilung awm dan endik an nghaklel hle a. Chutah vântirhkoh chuan, "kal ta ula; lei lung awm dan va endik rawh u" a ti a. Chutichuan vântirhkoh sawi ang chuan an ti a. Chutichuan lei chung zawng zawngah an vak vel ta a ni, tiin mi chhang a.
6:8 Tichuan ka hnênah, Ngai rawh, hmâr lama kalte khan hmâr ramah chuan ka rilru an tihahdam a ni, tiin mi au va.
6:9 Tin, LALPA thu chu ka hnênah a lo thleng a,
6:10 Sal tâng Heldaia te, Tobija te, Jedaia te laka thil chu la la, chumi ni vekah chuan lo kal la, Babulon atang an rawn pan Zepania fapa Josia inah chuan lût rawh.
6:11 A ni, an lak ata tangkarua leh rangkachak te la la, lallukhumte siam la, Jehozadaka fapa Josua, puithaim lal luah chuan khumtir rawh;
6:12 tin, a hnênah chuan, heti hian Sipaihote LALPA chuan a ti a ni:
6:13 Ngai rawh, mi a hming chawr no chu,
6:14 Ama hmun ata a lo to chhuak ang a,
6:15 LALPA biak in ngei chu a rawn sa dâwn a ni;
6:16 Ropuina chu a khum ang a.
6:17 A lalthutthlenga thuin ro a rêl ang:
6:18 A lalthutthlengah chuan puithiam ani ang a,
6:19 remna ro chu an pahniha karah a awm ang.
6:20 Tin, lallukhumte chu Helema te, Tobija te, Jedaia te, Zephania fapa Hena te tan LALPA inah hriat rengna tûr ani ang.
6:21 Tin, hla taka awmte kha an kal ang a, LALPA in chu an rawn sa ve ang a, Sipaihote LALPA chuan in hnênah mi tir a ni tih in la hre dâwn a ni. Tin, LALPA in Pathian aw chu ngun taka in bengkhawn thin chuan heng thil hi a lo la thleng ngei ang, a ti, tiin sawi rawh, a ti a.
7:1 Tin, heti hi a ni a, Lal Daria kum lina, thla kuana, Chislev ni li ni takah chuan Zakaria hnênah LALPA thu chu a lo thleng a.
7:2 Tin, Bethel mite chuan Sarezera leh regemeleka leh an mite an rawn tîr a, LALPA khawngaihna chu an ngen a,
7:3 Sipaihote LALPA ina puithiamte hnênah leh zâwlneite hnênah chuan an sawi a: Tun hma kum tam fea ka lo tih tawh thin angin mahni intihrangin thla nganaah chuan ka tap thîn em ni ang? tiin.
7:4 Tah chuan Sipaihote LALPA thu chu ka hnênah a lo thleng a,
7:5 rama mi zawng awngte leh puithiamte hnênah chuan, Hêng kum sâwmsarih chhûng meuh pawha thla ngana leh thla sarihnaa chaw in nghei a, in lungngaih thinte khan, ka hming a, keima hming meuhva chaw nghei êm in nih?
7:6 Tin, in ei a, in in pawhin nangmahni tan in ei a, in in mai a ni lâwm ni?
7:7 Jerusalem leh a vela khawpuite miin an luah khaha an hmuingil êm êm lai leh chhim lam leh ram phaite pawh miin an luah khah laia zâwlnei hmasate hmanga LALPA thusawite kha in lo hre tawh tûr a ni lâwm ni? tiin sawi rawh, a ti a.
7:8 Tin, LALPA thu chu Zakaria hnênah a lo thleng a,
7:9 Sipaihote LALPA chuan heti hian a sawi a ni: rorêlna dik takin titlu ula, Mi tinin an unaute chungah zahngaihna leh Khawngaihna chhuah rawh se:
7:10 Hmeithai te emaw, fahrah te, mikhual te, Mi retheite emaw hnehchhiah hek suh u. Tumah rengin in thinlungah In unaute tana tha lo tûr chu suangtuah suh u, tiin.
7:11 Mahse an ngaithla duh lo va, An tukkhum chhah an chhawn a, An hriat loh nân an beng an chhu chhêt a.
7:12 A ni, Sipaihote LALPA chuan Zâwlnei hmasate kuta a thu thawn leh Dan thute chu An ngaihthlâk loh nân An thinlungte chu lung chang tak angin an tisak ta a; Chuvângin Sipaihote LALPA lak ata Thinurna nasa tak alo thleng ta a ni.
7:13 Tin, heti hi a lo ni a, anmahni a auh an ngaithla duh lo va, Chutiang bawkin an auvin ka ngaithla bik lo vang, Sipaihote LALPA chuan a ti a.
7:14 An mi hriat ngai loh zingah Thawngaleivirin anmahni ka tidarh zâwk dâwn a ni.Chutiangin an hnuah chuan tihtiau a ni tawh ang a, Tuma an veivak tawh lo vang, Ram nuam tak chu an titiau dâwn ta si a.
8:1 Tin, Sipaihote LALPA thu chu ka hnênah a lo thleng leh a,
8:2 heti hian Sipaihote LALPA chuan a ti a ni: Zion chu vei tak meuhvin ka vei a ni, A chunga thinur khawpin a nia ka thik ni, tiin.
8:3 LALPA chuan heti hian a ti a; Zion lam ka hawi leh ta a, Jerusalem chu Thudik khawpui tih a ni tawh ang; Tin, Sipaihote LALPA tlâng chu tlâng thianghlim tih a ni bawk ang.
8:4 Sipaihote LALPA chuan heti hian a ti a ni, Jerusalem kawtthlêrahte chuan pitar-te leh putar te, An kum tam avânga tiang hawl boh boh tawhte pawh chu an la chêng ang.
8:5 Tin, kawtthlêra infiamin khawpui kawtthlêrte chu Hmeiche naupang leh mipa naupangin An la khat nuai nuai ang.
8:6 Sipaihote LALPA chuan heti hian a ti a ni: Chung nîahte chuan heng mi la awm chhunte Mithmuhah hian mak a nih chuan, Keia mithmuhah a mak ve kher dâwn êm ni? Tih hi Sipaihote LALPA thu chhuak a ni.
8:7 Sipaihote LALPA chuan heti hian a ti a ni: Ngai rawh u, ka mite chu chhak lam ram ata te, Thlang lam ram ata te ka chhan chhuak ang a,
8:8 Tin, ka rawn hruai ang a, Jerusalem leh felnaah ka mite an ni ang a, Kei pawh an Pathian ka ni ang.
8:9 Sipaihote LALPA chuan heti hian a ti a ni: Temple ngei chu sak a nih theih nana Sipaihote LALPA in lungphûm phûm nîa Zâwlneite kaa thu chuak nangni tuna ngaithlatu hian In kutte tikhauh rawh u.
8:10 Tun hmate khan mihring tân inhlawhna a awm lo va, Ran rawihna tûr pawh a awm hek lo; hmêlma avângin a lût a chhuak tan Muanna engmah a awm hek lo: Mi zawng awng an thenawmte nen ka indotîr a ni si a.
8:11 Tunah erawh chuan hemi la awm chhunte hnênah hian Tun hma ang hu ka ni tawh lo vang, Tih hi Sipaihote LALPA thu chhuak a ni.
8:12 Remna chi a awm dâwn tawh si a, Grêp hruite chuan rah a chhuah ang a, Lein hlâwkna a chhuah bawk ang a, Vanin daifîm a tlaktîr ang; Hemi la awm chhunte hi chûng chu ka rochuntîr dâwn a ni.
8:13 Tin, heti a ni ang a, Hnam dangte zînga anchhe dawng in nih thin avângin, Aw Juda chhûngte leh Israel chhûngte u, Ka chhan chhuak ang che u a, Malsawmin in la awm ang: hlau suh ula, In kut erawh chu khauh rawh se.
8:14 Hetiang hian Sipaihote LALPA chuan a ti si a: In thlahtuten mi tihtinur laia In chunga thil tha lo tih ka ngaihtuah khan Ka lamlêt lo va;
8:15 Tunah hi chuan Jerusalem leh Juda chhûngte tan Thil tha ka ngaihtuah leh thung dâwn a ni, Hlau suh u, Sipaihote LALPA chuan a ti.
8:16 Heng hi in thil tih tûr chu a ni ang: Mi tinin mahni thenawm hnênah thudik tak sawi theuh ula, In kawngka bulah thudik leh remna ro rêl rawh u.
8:17 Tumah rengin in thinlungah in thenawmte tana Tha lo tûr chu suangtuah suh ula, Dâwta chhechham chu pawm suh u. Heng zawng awng hi ka thil huatte chu an ni. Tih hi Sipaihote LALPA thu chuak ani si a.
8:18 Tin, Sipaihote LALPA thu chu ka hnênah a lo thleng a,
8:19 Heti hian Sipaihote LALPA chuan a ti a ni: Thla lina chaw nghei leh thla ngana chaw nghei leh thla sarihna chaw nghei leh thla sawmna chaw ngheite chu Juda chhûngte tan chuan hlimna leh lawmna, ruai hlimawm takah a chang ang a; chuvângin thudik leh remna chu ngaina rawh u, a ti a.
8:20 Hetiangin Sipaihote LALPA chuan a ti a ni: Heti hi a la ni ang a, Mipuite leh khawpui tam taka mite chu an lo kal ang:
8:21 Tin, khawpui pakhat luahtute chu hmun dangah an kal ang a, Hawh u, LALPA duhsakna ngen tûrin i kal thuai ang u khai, Sipaihote LALPA chu i zawng ang u, an ti ang a, Kei pawh ka kal ve ang.
8:22 A ni, LALPA zawng tûr leh LALPA duhsakna chu ngên tûrin Mipui tam tak leh hnam chak takte Jerusalemah an lo kal ang, a ti a.
8:23 Sipaihote LALPA chuan heti hian a ti a ni: Chûng nîahte chuan heti hi a la ni ang a, Mi sawm, hnam ze tinreng atanga lo chhuakte chuan Juda mi pakhat fenfualah an vuanin an chelh ang a, I hnênah Pathian a awm tih kan hriat avângin I hnênah kan kal ve dâwn e, an ti ang, a ti a.
9:1 Hadrak ram laka LALPA thu phurrit leh Damaska chunga in nghat tûr chu: LALPA mit chu mite chungah leh Israel hnam zawng zawng chungah a fu si a.
9:2 Chumi rîtu Hamah khaw chungah pawh; Tuira leh sidon pawh, an fin êm avângin.
9:3 Tin, tûra chuan kulhpui a in siama, Tangkaruate chu vaivut ang maiin a chhêk a, rangkachak tha mi chu kawtthlêra chhirhdiak ang maiin A chhêk a ni.
9:4 Ngai rawh, LALPA chuan a ti tla ran ang a, Tuipuia a chakna a tichhia ang a, meia hal faiin a awm ang.
9:5 Askelon chuan a hmu ang a, a hlau vang; Gaza pawhin a hmu ang a, nâ a ti êm êm ang; Tin, Ekron chu a beiseina avâng chuan a zak ang a, Lalber chu Gaza ata a boral ang a, Askelon chu luah in a awm lo vang.
9:6 Tin, Asdod-ah chuan falakho an chêng ang a, Philistia mite chapona chu kati boral ang.
9:7 Tin, an ka ata an thisen ka la bo vang a, An ha kâr atangin an tenawmna ka la bo vang. Tin, anni pawh kan pathian tana awm chhun an ni ang a, Judai ramah chuan hotute pawh an la ni ang a, Ekron mite chu Jebus mite ang an la ni ang.
9:8 Tin, ka in chu sipai rual lakah ka vêng ang a, Tumah an kal tlangin an lêt vêl lovang a. Hnehchhiahtu tumah an kal tlâng tawh ngai lovang: Ka mitin ka hmu tawh si a.
9:9 Aw Zion fanu, nasa takin hlim la; Aw Jerusalem fanu, au chhuak rawh; Ngai rawh, i lal i hnênah a lo kal e; Mi fel a ni a, hnehtu a ni; Inngaitlâwm takin sabengtung chungah a chuang a, Sabengtung no chung ngeiah.
9:10 Tin, Ephraim lak ata tawlailir leh Jerusalem lak ata sakawr chu ka ti boral ang a, In dona thal ngul chu ka tan ang. Hnamte hnênah chuan remna thu a sawi ang a, A rorêlna chu tuipui ata tuipui thlengin, Luipui atang chuan kawlkil thlengin a ni ang.
9:11 Nangma thu-ah pawh, i thuthlung thisen avângin Khuarkhurum tui awm lohna ata i mi tângte chu Ka rawn tîr chhuak ang
9:12 Beiseina nei mitângte u, kulhpui ah chuan kîr ula, vawiin ngeiah hian a leh hnihin Ka pe dâwn che u tih ka puang a ni.
9:13 Juda chu ka thal ngûl atân ka kuai a, thal ngûlah chuan Ephraim ka vuah ta a ni, Aw Zion, Grik fate lakah i fate chu ka chawk tho vang a, Mi chak tak khandaih angah ka siam ang che.
9:14 Tin, LALPA chu an chungah a lang ang a, a thal chu kawlphe angin a chhuak ang. Tin, LALPA pathian chuan tawtawrâwt a hâm ang a, Chhimlam thâwngaleivir nên a kal ang.
9:15 Sipaihote LALPA chuan anmahni a hum ang a. An ni chuan an hmêlmate chu an ei zo vang a, Virvawm lungte pawh chu an rapbet tawh ang. An in ang a, uain rûi ang maiin an bengchheng ang. Berhbu khat ang maiin an khat ang a, Maichâm kîl ang maiin.
9:16 Tin, LALPA An pathian chuan an ran rualte angin chûng nîah chuan anmahni a chhanhim ang; Lallukhuma lungte angin he ram chungah hian a châwisâng dâwn si a.
9:17 A thatna te chu a nasain, a mawina te chu a va nasa êm! Buhbâlte chuan tlângvâlte a tihlawhtling ang a, uain thar chuan nulate a tihlawhtling dâwn si a.
10:1 Ruah hnuhnûng hunah hian LALPA chu ruah dîl rawh u, LALPA, kâwl tiphetu ngei chu; Tin, a nin lova hlebet tinrêngte tân ruahpui vânawn a sûrtîr ang
10:2 Milem pathian chuan engmah lo mai a sawi a. Aisanthiamte thil hmuh chu dawt a ni si a; Mumang diklote an sawi a,Mi an thlamuan thlawn a; Chuvângin berâm rual angin mahni kawng kawng an hawi a. berâmpu a awm loh avângin hreawm an tuar a,
10:3 Berâmpu chungah chuan ka thin a rim êm êm a, kêl pate chu ka hrem ang: Sipaihote LALPA chuan a ranrual, Juda chhûngte chu a rawn kan a, Indona sakawr tha tak angin a siam dâwn si a.
10:4 A lak ata kil lung te, kilhna thir te, indona thal ngûlte, Rorêl tute an lo chhuakho dâwn a ni.
10:5 Tin, michak tak ang an lo ni ang a, Indona kawtthlêr chirhdiakah chuan an hmêlmate an rapbet ang, LALPA chu an hnêna a awm avângin an bei nasa mai ang: Sakawr chungchuangte chu an mualpho dâwn a ni.
10:6 Tin, Juda chhûngte chu ka ti chak ang a. Josefa chhûngte chu ka chhanhim ang a, Ka hruai leh ang, anni chu ka lainat si a; Tin, ka paihthlak loh ang mai an la ni ang a, Kei LALPA an pathian chu ka ni si a, An mahni ka ngaithla tawh ang.
10:7 Tin, Ephraim mite chu mi chak tak ang an ni ang a, Uain tihlâwm angin an thinlung a lâwm ang: A ni, an fate chuan an hmu ang a, an hlim ang a, LALPA ah chuan an thinlung a lâwm ang.
10:8 Ka faifûk ang a, an mahni ka ko khâwm ang; Anni chu ka tlan tawh si a: An lo pun tawh ang ngeiin an pung zêl ang.
10:9 Ram dang dangah ka phun darh a, Ram hla takah pawh min hre reng ang; Tin, an fate nên an awm ang a, an lo kîr leh ang.
10:10 Aigupta ram ata pawh ka hruai leh ang a, Assuria ram atangin ka khâwm chhuak ang; Tin, Gilead ram leh Lebanon-ah chuan ka rawn hruai lût ang a, Tin, an tân hmun a awm sêng lo hial ang.
10:11 Tin, tihduhdahna tuipui chu a kal tlang ang a, Tuifawnte chu a vua ang a, Nile luipui thûkte chu a kang ang. Assuria chapona chu tihtlâwm a ni ang a, Aigupta ram lal tiang chu a bo daih ang.
10:12 Tin, LALPA ah chuan anmahni ka tichak ang a, ama hmingin an chhukin an chho vang, Tih chu LALPA thu chhuak a ni.
11:1 I kawngte hawng rawh, aw Lebanon, I sidarte meiin a kan fai theih nân.
11:2 Aw fâr thing, chiau vak vak rawh, Sidar chu a tlûk tawh avângin; A tha thate chu tihchhiat a ni tawh si a.Bansan sasuate u, chiau vak vak rawh u, ngaw dur puite pawh a rêm zo tawh si a.
11:3 Berâmpute chiau thâwm te tak chu! An ropuinate a chhe zo ta si.
11:4 LALPA kan pathian chuan heti hian a sawi a ni: Ran rual thah tûr ang mite chu enkawl rawh,
11:5 A neitute chuan an that thîn a, Thiam lovah an in ruat hek lo: Anmahni hralhtute chuan, LALPA chu fakin awm rawh se, Kan lo hausa ta si a, an ti a: Anmahni vêngtu ngei pawhin an khawngaih hek lo.
11:6 Ram luahtute chu ka khawngaih dâwn tawh si lo va, Tih chu LALPA thu chhuak a ni. Tin, ngai rawh u, mi tin mai chu A thenawmpa kutah leh a lalber kutah ka pe ang: Ram chu an suasam ang a, An kut ata ka chhanchhuak lo vang.
11:7 "Chutichuan ran rual thah tûr ang mi te chu ka enkawl a, ran rual zînga a rethei ngei chu. Tin, tiang pahnih ka la a, pakhat chu 'Duhsak' ka vuah a, a dang chu 'Pumkhatna', ka vuah a; tin, ran rual chu ka châwm a."
11:8 Tin, thla khat chhûngin berâmpu pathum te chu ka ti boral a, ka nunna hian anmahni ka ning tawh êm si a; anni nunna pawhin min haw bawk a.
11:9 Tin, keiin, ka châwm lo vang che u, a thi thi chu thi mai sela, tihboral tûr chu tihboral ni rawh se; tin, a bâng zawngte chu an tisa inei hlawm rawh se, ka ti a.
11:10 Ka thu thlung, mipuite hnêna ka thlun chu ka phelh theihna tûrin ka tiang duhsak chu ka la a, ka tan bung hmawk a.
11:11 Tin, chumi nîah chuan phelhin a awm ta a, ran rual zînga a rethei, mi pawisatute chuan LALPA thu a ni tih an hre ta a.
11:12 Tin, an hnênah chuan, =ha in tih chuan, ka hlawh chu min pe ula, in tih loh chuan, min pe suh u, ka ti a; chutichuan ka hlawh atân chêng sawmthum an bûk chhuak ta a.
11:13 Tin, LALPA chuan ka hnênah, ka man atâna tha awm tâwm tâwk an chhiar chu bêl vawtu pe mai rawh,a ti a. Tin, chêng sawmthum chu ka la a. LALPA inah chuan, bêl vawtu hnênah chuan ka pe ta mai a ni.
11:14 Chutichuan, Juda leh Israelte inkâra inunauna chu ka tihchah theih nân ka tiang dang pumkhatna ngei chu ka la a, ka tan chhum ta a.
11:15 Tin, LALPA chuan ka hnênah, 'berâmpu tlaktlai lo hriamhrei chu va la leh cheu vang che.
11:16 Ngai rawh, ramah chuan berâmpu ka din chhuahtîr ang a, chu chuan tihbo tûrte chu a kan lo vang a, tihdarh tawhte chu a zawng hek lo vang; Hliam tuar tawhte chu a tidam leh tawh lo vang a, a hrisel te pawh chu a châwm hek lo vang a, A thausa te chu a ei zâwkin An tinkawmte nên lam a thlâwnvek zâwk ang.
11:17 Berâmpu tlaktlai lo,ran rual kalsan tu chung chu a pik e!Khandaih chu a bânah leh a mit dinglamah a tla ang a, A mit dinglam chu a thim tlat ang, a ti a.
12:1 Israel chung thua LALPA thu phurrit chu. LALPA vân tipharhtu, leilung nghahchhan phûmtu, Mihring chhûnga thlarau siamtu thu chu heti hi a ni:
12:2 Ngai rawh u, Jerusalem chu a vêla mipui zawng zawngte tân Ruihna novah ka siam ang a, Jerusalem hualnaah chuan juda tân pawh a ni ve ang.
12:3 Chumi nîah chuan heti hi a lo ni ang a, Jerusalem chu mipui zawng zawng tân Lung rit takah ka siam ang: Chumi inphurhtîrtu zawng zawngte chu na takin an hliam ang: Tin, leia hnam zawng zawngte chu amah bel tûrin an pung khâwm ang.
12:4 Chumi nîah chuan sakawr tin mai chu ka thawng ang a, a chunga chuangte chu âtnain ka hrem ang, tih chu LALPA thu chhuak a ni: Tin, Juda chhûngte chungah chuan ka mit ka meng ang a, mipuite sakawrte chu mitdelnain ka hrem ang.
12:5 Tin, Juda hotute chuan, Jerusalem luahtute chu Sipaihote LALPA an pathian ah chuan Ka chakna an ni, an ti rilru ang.
12:6 Chumi nîah chuan Juda hotute chu Thing zînga meivâm angin ka siam ang a, buhphal zînga meichher angin ka siam ang: Tin, a vêla mipuite chu a kang fai ang-dinglam leh vei lamah; Tin, Jerusalem chu ama hmun ngei, Jerusalem-ah chuan a ding leh ang.
12:7 Davida chhûngte ropuina leh Jerusalem luahtute ropuina chu Juda khûma tihlena a awm loh nân LALPA chuan Juda puaninte chu a chhanchhuak hmasa ber bawk ang.
12:8 Chumi nîah chuan LALPA chuan Jerusalem luahtute chu a hum ang a; Chumi nîah chuan an zînga mi chhiathate pawh chu Davida ang chu an lo ni ang; Tin, Davida chhûngte chu Pathian ang an lo ni ang a, An hmâa LALPA vântirhkoh ang chu an lo ni ang.
12:9 Tin, chumi nîah chuan heti hi a lo ni ang a, Jerusalem beitu hnamte chu tihboralna ka zawng ang.
12:10 Tin, Davida chhûngte chungah leh Jerusalem luahtute chungah chuan khawngaihna leh dilna thlarau ka leih ang a, Tin, an chhuna chu min rawn en ang; Tin, miin a fapa neih chhun a sûn angin a sûn ang a, Miin a fatîr chunga a tuar ang in an tuar ang.
12:11 Chumi nîah chuan Jerusalem-ah sûnna nasa tak a awm ang a, Megido ruama Hadadrimmon hmuna sûnna ang mai kha.
12:12 Tin, ram chuan a sûn ang; chhûng kua kuain a hrangin; Davida thlah chhûngkua pawh a hrangin, an nupuite ahrangin,
12:13 Levia thlah chhûngkua ahrangin, an nupuite ahrangin; Simeia chhûngte a hrangin, an nupuite ahrangin;
12:14 Chhûngkaw dang zawng zawng pawh, Chhûngkaw tinreng ahrangin, an nupuite a hrang theuhvin.
13:1 Chumi nîah chuan sual leh bawlhhlawhna tlenfai nân Davida chhûngte leh Jerusalem luahtute hnênah tuikhur hawnin a awm ang.
13:2 Tin, chumi nîah chuan Sipaihote LALPA thu chhuak chu heti hi a ni ang: Ram ata milem hmingte chu ka tibo vang a, Hriatrengin an awm tawh lo vang: Tin, ram ata zâwlnei te leh thlarau bawlhhlawh chu Ka chhuah bo tîr ang.
13:3 Tin, heti hi a lo ni ang a, tu pawhin thu a la hril cheu chuan A nu leh a pa amah hringtute khân, a hnênah, I nung lo vang, LALPA hmingin dâwt i sawi si a, an ti ang: Tin, a nu leh a pa amah hringtute khân, thu a sawi laiin Amah chu an chhun tlâng ang.
13:4 Chumi níah chuan heti hi a lo ni ang a, zâwlneiin thu a hrilin A inlârna hmuh apiang chu a zahpui tawh ang: mi bum nân kawrfual hmulte an ha hek lo vang a,
13:5 Zâwlnei ka ni lo va, hlo thlo mi ka ni e Ka tleirâwl tirh ata bâwiha siam ka ni si a, a ti zawk ang.
13:6 Tin, mi tuin emaw a hnênah I bân inkara hliamte hi eng nge ni? A ti ang a, Tin, anin, hengte hi chu, ka thiante ina ka hliam a nih hi, Tiin a chhâng ang.
13:7 Aw khandaih, ka berâmpu leh ka kawppuipa chungah chuan harh rawh, tih chu Sipaihote LALPA thu chhuak a ni; Berâmpu chu vua la, berâm rual an darh ang, a note chungah chuan ka kut ka lek ang.
13:8 Tin, heti hi a ni ang a, ram zawng zawngah hmun hnih zêl tih chhiat a ni ang a, a thi ang: Hmun thumna erawh chu hnutchhiah a ni ang:
13:9 Tin, hmun thumna chu meiin ka fiah ang, tangkaraw thianghlim angin anmahni ka tithianghlim ang a, rangkachak fiaha awm angin anmahni ka fiah ang: Ka hming an lam ang a, an mahni ka ngaithla ang: Tin, anni chu ka mite an ni, ka ti ang a, annin, LALPA chu ka pathian a ni an ti ang, Tih chu LALPA thu chhuak a ni.
14:1 Ngai teh, LALPA ni a lo thleng dawn e, Chutah chuan in râllâkte in zîng ngeiah semdarh a ni ang.
14:2 Jerusalem do tûrin hnam zawng zawng ka khâwm dawn si a. Khawpui chu lâk a ni ang a, inte pawh chu rawk a ni ang a, hmeichhiate chu ngaihsak an ni ang, khawpui zâtve chu sala hruai chhuahin an awm ang a, mipui la awm chhunte chu khawpui ata tihbo an ni lo vang.
14:3 Chitih hunah chuan LALPA chu a chhuak ang a, Indona nîa a beih thin angin chûng hnamte chu a do vang.
14:4 Tin, chumi nîah chuan Olive tlâng chhak lama Jerusalem rawn chhawngah chuan, ke a nghat ang a, Tin, Olive tlâng chu chhak leh thlang zawngin A laiah a phel ang a, ruam nasa tak a awm ang: Tin, tlâng tiave chu hmâr lamah a insawn ang a, A tiave chu chhim lamah.
14:5 Tin, ka tlâng kâr ruamahte chuan in tlânbo vang a, tlâng kâr ruam chuan Azel hmun a thleng dawn si a: A ni in tlân bo vang, Juda lal Uzia lal laia Lirnghínga in tlanbo ang khân, tin, LALPA ka Pathian chu a lo kal ang a, a mi thianghlim zawng zawngte pawh i hnênah an lo kal ang.
14:6 Tin, chumi nîah chuan heti hi a lo ni ang a, a êng lutuk lo vang a, a thim lutuk lo vang;
14:7 Mahse chumi nî chu LALPA chauhvin a hria. Chhûn ni lo zân ni lo; tlai lamah erawh chuan êng a lo awm ang.
14:8 Tin, chumi nîah chuan heti hi a lo ni ang a, Jerusalem atangin tuinung a lo chhuak ang a; A zatve chhaklam tuipuiah, a zâtve thlanglam tuipuiah: Nipuiah leh thlasik-ah pawh chuti chu a ni ang.
14:9 Tin, lei chung zawng zawngah LALPA chu lalber a lo ni ang: Chumi nîah chuan LALPA chu pakhat a ni ang a.A hming pawh pakhat a ni ang a.
14:10 Ram zawng zawng chu Geba atanga Jerusalem chhim Rimon thlengin Arab-ah ang a lo ni ang. Tin, Jerusalem chu chawisânin a awm ang a, Benjamin kawngka an tih atanga kawngka pakhatna thlengin a kil kawngka thleng chuan, Tin, Hanalela in sâng atanga lalber uain sawr khur thlengin a hmun chuan a awh ang.
14:11 Tin, tah chuan mite an cheng ang a, ânchhia rêng rêng a awm tawh lo vang; Jerusalem chu him takin a awm zawk dawn a ni.
14:12 Tin, Jerusalem dotu mipui zawng zawng chunga LALPAN hripui a lêntîr tûr chu hei hi a ni: An kea an ding reng chungin an tisa chu a ral ang a, An mit khur chhûnga an mitte pawh chu a ral ang a, an ka chhûnga an lei pawh a ral ang a,
14:13 Tin, chumi nîah chuan heti hi a lo ni ang a, LALPA hnên ata buaina ropui tak an zîngah a awm ang a, Mi tinin a thenawm kut a chelh ang a, A thenawm kut chungah a kut a lekbawk ang.
14:14 Tin, Juda pawhin Jerusalem chu a bei ang; A vêla hnamte zawng zawng sum leh pai, Rangkachak te, tangkaruate, silhfente chu tam tak mai lâkkhawm a ni ang.
14:15 Tin, chutiang bawkin sakawr hri te, sabengtung hri te, sanghawngsei hri te, sabengtung te chi hri te a lo awm ang a, Tin, chûng bûka ran awm zawng zawng te vei chu Hripui ang bawk kha a ni ang.
14:16 Tin, heti hi a lo ni ang a, hnam zawng zawng Jerusalem rawn dotu hnutchhiaha la awm te chu Kum tin, bâwkte kût hmang tûr leh Lalber, Sipaihote LALPA chibai bûk tûrin an chho thin ang.
14:17 Tin, lei chunga chhûngkua zawng zawng, Lalber, Sipaihote LALPA chibai bûk tûra chho lo apiangte chungah chuan ruah a sûr lo vang.
14:18 Tin, Aigupta ram chhûngkua kal chho lova Lo kal ta lo te chungah chuan a sûr bîk hek lo vang a, Bâwkte kût hmang tûra kal chho lo hnamte LALPAN a hremna chi hripui chu a thleng ang.
14:19 Hei hi Aigupta ram hremna leh Bâwkte kût hmang tûra kal chho lo hnamte hremna chu a lo ni ang.
14:20 Chumi nîah chuan sakawr thi-ah te pawh LALPA TANA THIANGHLIM tih a chuang ang a, Tin, LALPA ina bungbêl na zawngte chu Maichâm hmâa maihûn ang hial an lo ni ang.
14:21 Ni e, Jerusalem leh Juda bungbêl zawng zawngte chu Sipaihote LALPA tâna thianghlim an lo ni tawh ang: Tin, inthawi zawng zawngte chuan an rawn la ang a, Chhum nân an hmang ang: Chumi nîah chuan Sipaihote LALPA inah chuan Kanaan mi rêng rêng an awm tawh lo vang. |
posted by zoblog @ 11:48 AM  |
|
|
|
