| Wednesday, September 12, 2007 |
1:1 Rorêltute chuan ro an rêl laiin heti hi a ni a, chu mi ramah chuan tam a lo tla a.
1:2 Tin, Bethlehem-Juda-a mi pakhat Moab rama awm tûrin amah leh a nupui leh a fapate pahnih nen an kal a. Chu mi hming chu Emimeleka a ni a, a nupui hming chu Naomi a ni a, a fapate pahniha hming chu Mahlona leh Kiliona, Bethlehem-Juda-a Ephrath mi an ni. Moab ramah chuan an kal a, chuta chuan an awm ta reng a.
1:3 Tin, Elimeleka, Naomi pasal chu a thi a, ama leh a fapate pahnih chauh an ni ta a.
1:4 Tin, Moab ram hmeichhia nupuiah an nei a, a pakhata hming chu Orpi a ni a, a pakhata hming chu Ruthi a ni: Chutah chuan kum sâwm emaw lai an awm a.
1:5 Tin, Mahlona leh Kilona chu an thi ta ve ve a; tichuan chu hmeichhia chu a fate pahnih leh a pasal chuan an thihsan ta a.
1:6 Chuti chuan a mote nen chuan Moab ram ata chu haw leh tûrin an tho va, LALPAN ei tûr pein a mite chu a kan dan te Moab ram atanga a lo riat avângin.
1:7 Tichuan a awmna ata chu a mote pahnih nen chuan an chuak a; Judai rama haw leh tûrin an kal ta a.
1:8 Tin, Naomi chuan a mote pahnih hnênah chuan, "In nu in lam ve vea haw leh tûrin kal rawh u khai; mitthi chung leh ka chunga in tih ang hian LALPA chuan in chungah ngilnei takin ti ve rawh se.
1:9 LALPA chuan in pahnihin pasalte ina khawsakna in tawn theih nan khawngaih che u rawh se," a ti a. Tichuan a fawp a, tin, aw chuah meuhvin a tap ta chiam mai a.
1:10 Tin, a hnênah, "Kan kal lo vang, i chite hnêna i hawnnaah chuan kan tel ve zawk ang,"an ti a.
1:11 Tin, Naomi chuan, "Ka fanute u, haw leh zawk rawh u; engah nge ka hnênah chuan in kal ve tehlul ang le? In pasal tûr fapa ka pai leh thei dawn em ni?
1:12 Ka fanute u, haw leh ula kal raw u khai; pasal han nei tûrin ka upa lûtuk tawh si a. Tin, ka bei a la sei reng e ti mah ila, zaninah mai pawh hian pasal neiin fapate pawh nei mah ila,
1:13 an puitlin thlengin in awm dawn em ni ang? Ni kawng lo ve a, ka fanute u, nangmahni avâng hian ka lungngaihna a zualkai zawk a ni, LALPA kut chu ka chungah a tla ta a nih hi," a ti a.
1:14 Tin, an aw chhuahin an tap leh ta chiam mai a; tin, Orpi chuan a pi chu a fâwp a; Ruthi erawh chuan a vuan tlat a.
1:15 Tin, ani chuan, "Ngai teh, i mopuinu chu a chite nen leh a Pathian hnên lamah chuan a kir leh ta a; nang pawh i mopuinu umin haw ve taw aw," a ti a.
1:16 Tin, Ruthi chuan, "Nangmah then tûr leh nangmah zui lova haw leh tûr chuan min thlem lo hram hram rawh: i kalna apiangah ka kal ang a; i riahna apianga ka riak ang a, i chite chu ka chite an ni ang a, i Pathian chu ka Pathian a ni ang.:
1:17 i thihna apiangah chuan ka thi ang a, chutah chuan min phûm ve mai tûr a ni: nang leh kei hi thihna chauh lo chuan thil dangina min then dawn chuan LALPAN a tih tihin min ti mawi sela, chu aia nasa pawhin," a ti a.
1:18 Chutichuan a hnêna kal a tum tlat tih a lo hriat chuan a ngawihsan ta a.
1:19 Tichuan Bethlehem thlengin an kal dun ta a. Tin, heti hi a ni a, Bethlehem an thlen chuan a khuain an phu ta mur mur mai a, hmeichhiate chuan, "Hei, Naomi kha ni maw?" an ti a.
1:20 Ani chuan an hnênah, "Naomi min ti suh u, Maraii min ti zawk rawh u. Engkimtitheia chuan lungchiatthlak takin min ti ta si a.
1:21 Muk takin ka chhuak a, LALPA chuan kutbêngin mi hruai hawng leh a ni: LALPA chuan ka chungah a lungnih lohna a tilang a, Engkimtitheia chuan min tihreawm te hre reng siin angati nge Naomi min la tih cheu ni le?" a ti a.
1:22 Chutichuan Naomi chu a lo kir a, a monu Moab mi Ruthi nen Moab ram atang chuan an lo kir a ni: barli seng tan tirh laiin Bethlehem chu an thleng a ni.
2:1 Tin, Naoami chuan a pasala laichin, Elimeleka thlah, mi neinung tak laichin a nei a; a hming chu Boaza a ni.
2:2 Tin, Moab mi Ruthi chuan Naomi hnênah, "Lo lamah ka kal ang a, mi lo khawngaihtu apiang buhto ka va zawng ang e aw," a ti a. Tin, a hnênah, "Kal ta che, ka fanu," a ti a.
2:3 Tichuan, a kal ta a, buh sengtute seng hmaih chu a va zawng ta a: tichuan Elimeleka thlah Boaza lovah ngei chuan a va kal fu hlauh mai a.
2:4 Tichuan, ngai teh, Bethlehem atangin Boaza chu a va kal a, buh sengtute hnênah chuan,"In hnênah LALPA awm rawh se," a ti a. Tin, anni chuan, "LALPAN malsawm che rawh se," tiin an chhang a.
2:5 Chutichuan Boaza chuan a chhiahhlawh, buhsengtute chunga hotu hnênah chuan, "Hei khawi lam nula nge ni le?" a ti a.
2:6 Tin, a buh sengtute chunga hotu a chiahhlawh chuan, "Moab nula, Moab ram ata Naomi hnêna lo kal ve a ni:
2:8 Chutichuan Boaza chuan Ruthi hnênah chuan, "Ka fanu, ngai teh aw; lo dangah chuan buhto zawngin kal suh la, heta ta hi kal sawn suh, ka chhiahhlawh nulate hnênah hian awm reng rawh.
2:9 An buh seng hi en reng la, an hnu chhui zel rawh; tlangvâlte chu engmah tih loh tûr chein thu ka pe tawh diam e; tin, i tui a hal apiangin tui bela tlangvâlte ti chawi sa va in thin ang che," a ti a.
2:10 Chutichuan a kun a, lei siin a bawkkhup a, a hnênah, "Hnam dang ka ni si a, nangin hetianga min hriat duha min lo khawngaih hi eng tizia nge ni?" a ti a.
2:11 Tin, Boaza huan a chhâng a, a hnênah, "I pasal thih achina i pi chunga i thiltih dan zawng zawngte miin mi hril vek a; tin, i nu leh i pa leh i pianna ram kalsana tun hma lama i mi hriat ngai lohte hnêna i lo kal dante pawh hi.
2:12 LALPA chuan i thiltih chu rul sela, LALPA, Israelte Pathian, inhumhim nana a thlahnuai i rawn chuha chuan i that man pe teuh che u rawh se," a ti a.
2:13 Tin, ani chuan, "Ka pu, min khawngaih ang che; nangin mithlamuan a, i chhiahhlawh ulate zinga mi ni mah suh ila, i chhiahhlawhnu hi tha takin mi be ta si a," a ti a.
2:14 Tin, chaw ei hun chuan Boazan a hnênah, "Lo haw teh khai, chhangte hi han ei ve la, chhang themte chu uain thurah chiah ve rawh," a ti a. Chutichuan buh sengtue kiangah chuan a thu a; tin, chhangper chu a pe a, a ei a, a kham hnu pawhin a la ei bang ta cheu va.
2:15 Tin, buhto zawng tûra a thawh leh chuan, Boaza chuan a tlangvâlte hnênah, "Buhphal zinga mite pawh hi char zel sela, hau suh ang che u.
2:16 Tin, a tela mite pawh, pawh chuahsak ula, hnutchiah zel ula, chhar sela, hau suh u," tiin thu a pe a.
2:17 Chutichuan a zawng a; tin, a zawn sa chu a vua a, barli epha khat emaw lai a ni.
2:18 Tin, a phur a, khuaah chuan a haw ta a: tin, a pi chuan a buto zawng chu alo hmu a; tin, ani chuan a kham hnuah a ei bang chu a phawrh a, a pe a.
2:19 Tin, api chuan a hnênah, "Vawiinah hian khawi lama buhto nge i zawn? A lo hre duhtu che chu malsawmin awm rawh se," a ti a. Tin, ani chuan, tu hnênah nge a va thawh tih a pi chu a hrilh a. "Vawiina ka va thawhnpa chu a ming Boaza a ni," a ti a.
2:20 Tin, Naomi chuan a monu hnênah chuan, "LALPA, mi nung leh mitthi chunga a khawngaihna bang chuang ngai lova chuan amah chu malsawm rawh se," a ti a. Tin, Naomi chuan a hnênah, "chu mi chu, kan lamhnai, kan laichin bul a ni asin," a ti a.
2:21 Tin, Moab mi Ruthi chuan, "A nih tak chu, ka hnênah pawh, 'Ka buh hi a seng zawh vek hma loh chuan ka tlangvâlho hnênah hian tel reng ang che,' mi ti nghe nghe asin," a ti a.
2:22 Tin, Naomi chuan a monu Ruthi hnênah chuan, "Ka fanu, lo danga an hmuh hauh lohna tûr chein a chhiahhlawh nulaho zingah hlir chuan kal la a tha ang," a ti a.
2:23 Chutichuan barli leh huit seng zawh thlengin Boaza chhiahhlawhnulaho zingah hlir chuan buhto zawngin a kal a; tin, a pi hnênah chuan a awm a.
3:1 Tin, a pi Naomi chuan a hnênah, "Ka fanu, i tana tha tûr khawsakna ka zawnsak dawn lawm che ni?
3:2 Kan laichinpa Boaza, a chhiahhlawh nulate nena hna i va thawhna kha a awm a ni lâwm ni? Ngai teh, zaninah hian barli hruiah a zâp fai dawn a.
3:3 Chutichuan, inbual la, inthih la, i incheina puan sin la, hruiah chuan zuk kal rawh; amaherawhchu chawte a eia a in zawh hma loh chuan a hnênah inhriattir hauh suh ang che.
3:4 Tin, heti hi a ni ang a, a mut hunah chuan a mutna chu chhinchiah la, tin, lut la, a ke hlim la, mu rawh; tin, ani chuan i tih tûr chu a lo hrilh ang che," a ti a.
3:5 Tin, ani chuan a hnênah, "I sawi apiang chu ka ti ang e," a ti a,
3:6 Tichuan hruiah chuan a zuk kal a, a piin a hrilh ang apiang chuan a ti a,
3:7 Tin, Boaza chuan chaw a ei a, a in zawh chuan a rilru a lo hlim ta êm êm a, buh vûm bulah chuan mu turin a kal ta a; tin, zawitein a va kal a, a ke chu a hlim a, a mu ve ta a.
3:8 Tin, heti hi a ni a, zanlai chuan chu pa chuan a hlau va, lehlam a hawi a; tin, ngai teh, a ke bulah chuan hmeichhia a lo mu reng mai a.
3:9 Tin, ani chuan, "Tunge i nih?" a ti a. Ani chuan, "I chhiahhlawhnu Ruthi ka ni; chutichuan i chiahhlawh hi i puan mi han zawn rawh, ka laichin bul i ni si a," a ti a.
3:10 Tin, ani chuan, "Ka fanu, Lalpain malsawm che rawh se: tlangvâl rethei emaw, hausa emaw i zui loh danah hian a tir ai mahin a hnu lamah hian thatna i tilang nasa ta zawk a
3:11 Chutichuan ka fanu, hlau suh aw; i sawi ang zelin i chungah ka ti ang: kan khuaa mi zawng zawngte hian hmeichhe fel tak i ni tih an hre vek si a.
3:12 Tin, laichin inhnai kan ni ngei mai a, amaherawhchu keimah aia hnai zawk a awm a.
3:13 Zanin chu awm phawt la, naktuk zingah chuan i chungah ani chuan a laichin tih tûr a tih duh chuan a tha a ni ang a; laichin pual chu ti ang hmiang: amaherawhchu laichin tih tûr i chunga a tih duh loh chuan, laichin tih tûr chu LALPA a nung ngei ang hian keiman ka ti ngei ngei ang: zing thlengin mu reng mai rawh," a ti a.
3:14 Tichuan zing thlengin a ke bulah chuan a mu ta a: tin, tumah la inhmuh chian theih hmain a tho va "Hruiah chuan hmeichhia chu a lo kal tih rêng rêng tumahin hre suh se," a ti reng a.
3:15 Tin, a hnênah, "I puan bah kha han la la, dawh rawh," a ti a; tichuan a dawh a; tin, barli hu tehkhawng rukin a teh a, a chhûng a, tin, khuaah a kal ta a.
3:16 Tin, a pi hnên a han thlen chuan, "Ka fanu, engnge i an le?" a lo ti a. Tin, ani chuan chu pain a chunga thil a lo tih zawng zawng chu a hrilh a.
3:17 "He barli tehkhawng ruk hi min pe a, 'I pi hnênah chuan kutbengin haw hauh suh ang che,' min ti a ni," a ti a.
3:18 Tin, ani chuan, "Ka fanu, eng angin nge thil a lo awm dawn i hriat hma loh chuan awm mai rawh: vawiin nia he thil hi a tih zawh hma loh chuan chu pa chu a ngawi mai dawn si lo va," a ti a.
4:1 Tichuan Boaza chu kulh kawngkaah chuan a han chho va, chutah chuan a thu a: tin, ngai teh, an laichin bul a chungchang thu Boazan a sawi kha alo kal a: chu mi hnênah chuan, "E! nang kha! Lo peng la thu teh khai," a ti a. Tin, ani chu a lo peng a, a thu ta a.
4:2 Tin, chu mi khuaa upaho zinga mi sawm a hruai a,a n hnênah, "Hetah hian thu teh u khai," a ti a. Tichuan an thu ta a.
4:3 Tin, an laichun bula hnênah chuan, "Moab rama atnaga lo kir Naomi chuan kan unaupa Elimeleka ram kha a zuar a;
4:4 tichuan i hnêna, 'Henga thute mithmuhah leh kan upateho mithmuhah hian lei rawh. I tlan duh chuan tlan la, amaherawhchu i tlan duh loh chuan ka hriat theih nan min hrilh ang che: nang lo chu tumah a han tlantu awm dang an awm si lo va;tin, kei hi i dawtah chuan ka ni a,' tia riattir che tulin ka hria," a ti a. Tin ani chuan, "Ka tlan ang e," a ti a.
4:5 Tin, Boaza chuan, "Naomi hnênah mi, chu mi ram i lei ni chuan, mitthi nupui, Moab hmeichhia Ruthi lakah mitthi hming dai lova a roluahtu tûr an awm zel theih nan i lei bawk tûr a ni," a ti a.
4:6 An laichin bulpa chuan, "Keima tan chuan ka tlan thei lo, chutilozawng keima roluah lam thu ka tikhawlo dah ang e, tlan phak ka nihna ai chu nangman chang mai rawh; kei zawngin ka tlan thei lo a nih hi," a ti a.
4:7 Hman laia Israelte zingah thil engkim an tihngheh nana an intlan dan leh an inthleng dan chu hetiang hi a ni:- Pheikhawk hlip a, an vengte an pe a, chu chu Israelte zinga an tihngheh dan a ni.
4:8 Chutichuan an laichin bul chuan Boaza hnênah, "Nangman i tan lei zawk rawh," a ti a. Tin, a pheikhawk a hlip a.
4:9 Tin, Boaza chuan pate leh mipui zawng zawng leh Kiliona leh Mahlona thil neih zawng zawng Naomi hnêna mi ka lei tih hretute in ni a.
4:10 Tin, chu chauh chu ni lovin, mitthi chu a hming dai lova ro luahtu siamsak tûr leh mitthi chu a unaute zingah leh a awmna hmun kulh kawngkaa a hming a bo loh nan, Moab hmeichhia Ruthi, Mahlona nupui chu ka nupui atân ka lei a; chu chu vawiinah hian nangniho hi a hretute in ni e," a tia.
4:11 Tin, kulh kawngkaa mipui zawng zawng leh upate chuan, "Hretute kan ni e. I ina hmeiche lo luta chu Rakili leh Leaii, Israel chhûngkaw dintu pahnihte ang khan LALPA chuan siam rawh se: tin, Ephrath-ah chuan chhuanawm takin ti la, Bethlehemah chuan hmingthang takin lo awm ang che;
4:12 tin, LALPAN he nula laka thlah a la siamsak tûr che avâng hian i chhûngkua chu Tamarin Juda a hrinsak Pereza chhûngkua ang lo ni rawh se," an ti a.
4:13 Chutichuan Boaza chuan Ruthi chu a hruai a, a nupui a lo ni ta a; tin, a pâwl a, LALPA chuan nau a paitir a, tin, fapa a hring a.
4:14 Tin, hmeichhiate chuan Naomi hnênah chuan, "Vawiin ngeia laichin hnai chham lova awmtirtu che LALPA chu fakin awm sela; Israelte zingah hian a hming lo thang rawh se.
4:15 Tin, ani chu i nunna a lo ni ang a; i monu nangmah hmangaihtu, fapa pasarih aia i tana tha chuan amah chu a hring ta si a," an ti a.
4:16 Tin, Naomi chuan nau chu a la a, a pawm a, a awm ta a.
4:17 Tin, a vengte hmeichhia chuan a hming an saksak a, "Naomi tan fapa a lo piang a," tiin a hmingah Obeda an sa a: ani chu Davida pa Jesaia pa a ni a.
4:18 Heng hi Pereza thlahte an ni; Pereza chuan Hezrona a hring a;
4:19 Tin, Hezrona chuan Rama a hring a; tin, Rama chuan Aminadaba a hring a;
4:20 tin, Salmona chuan Boaza a ring a, tin, Boaza chua Obeda a hring a;
4:21 tin, Obeda chuan Jesaia a hring a; tin, Jesaia chuan Davida a hring a ni. |
posted by zoblog @ 2:26 PM  |
|
|
|
