| Wednesday, September 12, 2007 |
1:1 Tin, Davida fapa Solomona chu a ram chhungah chuan tihchakin a awm a, LALPA a Pathian chu a hnenah a awm a, nasa takin a tiropui a.
1:2 Tin, Solomona chuan Israel-ho zawng zawng, sipai sâng hotu te, za hotu te, rorêltu te, Israel ram zawng zawnga milian, chhûngkaw puipa zawng zawngte chu a bia a.
1:3 Chutichuan Solomona leh inkhawmho zawng zawngte chu Gibeon khuaa hmun sângahchuan an kal a; chutah chuan LALPA chiahhlawh Mosian thlalera a siam Pathian biakna bûk kha a awm a ni.
1:4 Pathian bâwm erawh chu Davidan a lo buatsaih tawhna hmunah Kiriath-jearim atangin Davida chuan a lo la chho tawh a; Jerusalem-ah a dahna tûr puan in a lo zar sa taw reng a.
1:5 Tin, Hura fa Uria fapa Bezalela siam dar mâicham kha LALPA biakna bûk bula chuan a awm bawk a; tin, Solomona lehmipuihote chuan an va pan a.
1:6 Solomona chu ibiakna puan in bula dâr mâicham awmna LALPA hmaah chuan a han chho va, hâlral thilhlan sângkhat a han hlân a.
1:7 Chu mi zan chuan Solomona hnênah Pathian a inlâr a, a hnênah, "Eng nge ka pêk ang che mi dil rawh," a ti a.
1:8 Tin, Solomona Pathian hnênah, "Ka pa Davida hnênah khan khawngaihna nasa tak i lantir a, a aiawhin lalah mi lo siam ta a.
1:9 Tichuan aw LALPA Pathian, ka pa Davida hnêna i thutiam kha tipuitling ang che; nangin vaivut zat zet mipuite lalah mi lo siam ta a.
1:10 Tichuan heng mipuiho hmaa lût leh chhuaka ka awm theih nân finna leh hriatna mi han pe ang che; i mi heti zozai hi tunge rorêlsak thei ang le?" a ti a.
1:11 Tin, Pathianin Solomona hnênah, "Hetiang rilru i put a, sum leh pai te, hausakna te, chawimawina te, nangmah hawtu che nunna te dil lova, damreina te pawh dil lova, an chunga lala ka siamna che ka mite ro i relsak theihna tûra finna leh hriatnate mi dil zawk avângin,
1:12 finna leh hriatna chu pêk i ni tawh e: tin, i hmaa lalte pawhin an la neih ngai loh, i hnu pawha an nei hauh loh tûr sum leh pai te, hausakna te, chawimawina te ka pe bawk ang che," a ti a.
1:13 Chutichuan Solomona chu hmun sâng bula biak bûk awmna Gibeon khuaa a zin chu Jerusalem-ah a haw a, Israel-te chungah ro a rêl ta a.
1:14 Tin, Solomona chuan tawlailirte leh sakawr chungchuang mite a khâwm chiam a; tawlailir sângkhat leh zali leh sakawr chung chuang mi singkhat leh sânghnih a nei a, chung chu tawlailir dahna khuaah te, Jerusalem khuaa lal awmnaahte chuan a dah a.
1:15 Tin, lal chuan Jerusalem khuaah chuan rangkachak leh tangkaruate chu lung ang maia ngaih khawpin a dah teuh va, sidar thingte chu phaia theipui thing ang leka ngaih khawpin a da bawk a.
1:16 Tin, Solomona neih sakawr-te chu Aigupta ram ata rawn tawlh chhuah a ni a; lal sumdawngtute chuan chung chu a rual rualin an lo khar thin a, a ruala lei zel a ni.
1:17 Aigupta rama mi tawlailirte chu tangkarua sekel zaruk zelin an tithleng thin a, tin, sakawrte chu tangkarua sekel za leh sawmnga zelin; chutiang bawk chuan Hit-ho lal zawng zawngte leh Suria lalte pawh an tihthlensak thin a ni.
2:1 Tin, Solomonan LALPA hming atân in sak a tum a, lal in tûr nen.
2:2 Solomona chuan thil phur mi singsarih leh, tlânga thing kittu singriat leh anmahni vêngtu sângthum leh zaruk a ruat a.
2:3 Tin, Solomonan tûra lal Hurama hnênah, "Ka pa Davida thil i lo tihsak a, a awmna tûr in sak nân sidar te i lo thawh ang khan, min tihsak ve ta he.
2:4 LALPA ka Pathian tan in sak ka tum ta a. Chu in chu rimtui hala LALPA biakna hmun, Israelte hnêna tih tûr thupêk ding reng - chhangdah hlân te, chawlhni leh thla thar leh LALPA kan Pathian hminga kut ni tea zing leh tlaia hâlral thilhlan hlân rengna tûr a ni ang. Hengte hi Israelte tana kumkhaw thuruat chu a ni e.
2:5 Tin, ka in sak tum hi ropui tak tûr a ni a, kan Pathian hi pathian zawng zawng aia ropui a ni si a.
2:6 vân zau tak pawha leng lo Pathian chu tuman in an saksak thei lo vang a. Kei tehlul hian rimtui hala amah biak nân chauh lo chuan engtin nge in ka saksak theih ang le?
2:7 Chutichuan Judai ram leh Jerusalem-a mi themthiamte ka pa Davidan a lo rawih thin tuna ka hnêna awmte zinga thawk ve tûr hian mi pakhat, rangkachak te, tangkarua te, dar te, thir lam te khawih thei, puan senduk te, senlâr te, dumpawl te siam thiam, ziak eng ang pawh thiam mi rawn tirh ang che.
2:8 ,9 Lebanon-a mi sidar thing te, far thing te, algum thingte pawh mi han thawn ang che; i miten Lebanon-a thing kih an thiam hle tih ka hre si a; tichuan ngai teh, thing tam tak mi buatsaihsak tûrin ka mite chu i mite zingah tel ve rawh se; ka in sak tum hi in ropui tak tûr a ni si a.
2:9 ,8 Lebanon-a mi sidar thing te, far thing te, algum thingte pawh mi han thawn ang che; i miten Lebanon-a thing kih an thiam hle tih ka hre si a; tichuan ngai teh, thing tam tak mi buatsaihsak tûrin ka mite chu i mite zingah tel ve rawh se; ka in sak tum hi in ropui tak tûr a ni si a.
2:10 Tin, ngai teh, i mi, thing kittute chu chhangphut tehkhawng singhnih leh barli tehkhawng singhnih leh uain bath singhnih leh hriak bath singhnih ka pe ang e," tiin mi a tir a.
2:11 Tichuan tûra lal Hurama chuan, "LALPAN a mite a hmangaih avângin an lalah a siam che a nih hi," tiin Solomona chu lehkhain a chhâng a.
2:12 Hurama chuan, "LALPA, Israelte Pathian, lei leh vân siamtu, LALPA in leh lal in sa tûra finna leh hriatna nei fapa fing tak lal Davida petu chu fakin awm rawh se.
2:13 ,14 Mi themthiam, finna le hriatna nei, Dana thlaha mi hmeichhe pakhat fa, a hming Hurama ka rawn tir e, a pa chu tûra khuaa mi, rangkachak lam te, tangkaraw lam te, dar lam te, thir lam te, lung lam te, thing lam te, puan senduk te, dumpawl te, puan zai sin te, senlar te deh thiam, ziak eng ang pawh thiam, thiam tinreng thiam a ni a; i mi themthiamho leh ka pu i pa Davida themthiamho zinga chuan a rawn thawk ve ang.
2:14 ,13 Mi themthiam, finna le hriatna nei, Dana thlaha mi hmeichhe pakhat fa, a hming Hurama ka rawn tir e, a pa chu tûra khuaa mi, rangkachak lam te, tangkaraw lam te, dar lam te, thir lam te, lung lam te, thing lam te, puan senduk te, dumpawl te, puan zai sin te, senlar te deh thiam, ziak eng ang pawh thiam, thiam tinreng thiam a ni a; i mi themthiamho leh ka pu i pa Davida themthiamho zinga chuan a rawn thawk ve ang.
2:15 Chutichuan buh te, barli te, hriak te, uain thu te ka LALPAN a sawi chu chhiahhlawhte chu rawn thawn ang hmiang,
2:16 tichuan keinin Lebanon-a thing chu i duh zat zat kan lo kir ang a, tuifinriatah Jopa thlengin kan rawn tawlhsak ang chia; tin, nangin Jerusalem-ah i thiar cho dâwn nia," a ti a.
2:17 Tin, Solomona chuan Israel rama a pa Davidan a lo chhiar tawh si a, hnam dang mi zawng zawng chu a chhiar a, 1,53,600 an ni a.
2:18 Tin, thil phur mi 70,000 leh tlânga thingkittu 80,000 leh, mipuite thawh dan relbawlsaktu tûr 3,600 a ruat a.
3:1 Chutichuan Solomona chuan Jerusalem-ah, Moria tlâng, a pa Davida hnêna LALPA inlârna, Jebus mi Ornana hruihzawl, Davidan hmun a lo buatsaihsaah chuan LALPA in chu a sa tan ta a.
3:2 A lal kum li kum, thla hnihna, ni hnih niin a sa tan a.
3:3 Pathian in sak dan tûr Solomonan a han rêl dan chu hetiang a ni. A dung lam chu tawng teh dan hluiin tawng sawmruk a ni a, a vang lam chu tawng sawmhnih a ni.
3:4 A hma lama hulhliap dung lam chu in vang lam chen bawk tawng sawmhnih a ni a, a san lam chu za leh sawmhnih a ni a; a chhûng chu rangkachak hlir hlak tiin a luan a.
3:5 Tin, pindan lian zâwk bangah chuan far thing a bel a, chu chu rangkachak hlir hlak tiin a luan a, chutah chuan tum thing leh khaidiat lem a chuantir a.
3:6 Tin, a timawi tûrin in chu lunghlutein a chei a; rangkachak chu Parvaim rangkachak a ni.
3:7 In chu, kalkhang te, bang te, a chhuat te, a kawngkhârte chu rangkachakin a chuantir a.
3:8 Tin, hmun thianghlim ber a siam a; a dung lam chu in vâng lam che bawk, tawng sawmhnih a ni a, a vang lam chu tawng sawmhnih a ni a; rangkachak hlir hlak tiin a luan a, talent zaruk a tling a.
3:9 Tin, a kilhna rih lam chu rangkachak sekel sawmnga a ni. Tin, pindan chungnungte chu rangkachakin a luan a.
3:10 Tin, hmun thianghlim berah chuan cherub lem panih a siam a; chung chu rangkachakin a luan a.
3:11 Tin, cherub thlate chuan tawng sawmhni a awh a; cherub pakhat thla chu tawng nga a ni a, bang a va thleng a; tin, a thla lehlam pawh chu tawng nga bawk a ni a, cherub pakhat thla chu a va thleng a.
3:12 Tin, cherub pakhat thla pawh chu tawng ngaa ni a,bang chu a va thleng a; a thla lehlam chu tawng nga bawk a ni a; cherub pakhat thla chu ava thleng a.
3:13 Chung an thla an cherub-te chuan tawng sawmhnih awhin an thla an zâr a, an ding a, in chung lam hawiin an ding a.
3:14 Tin, puanzar tûr a dumpawl te, a senduk te, a senlâr te, la zai sin taktein a siam a, chuta chuan cherub lemte a chuantir a.
3:15 Tin, a hma lama chuan tawng sawmthum leh tawng ngaa sâng ban pahnih a phun a, chu mi chhip chu tawng nga ve ve a ni.
3:16 Chu mi hmunah chuan khaidait a siam a, ban chipte chu a zem a; tin, pawmgranet za a siam a, khaidiatah chuan a khai a.
3:17 Tin, biak in hma lama chuan bante chu a phun a, pakhat ding lamah, pakhat vei lamah; tin, ding lama mi chu Jakin a ti a, vei lama mi chu Boaz a ti a.
4:1 Tin, dar mâicham, a dung lam tawng sawmhnih, a vang lam tawng sawm hnih, a san la tawng sawm a siam bawk a.
4:2 Dar zem bial lian pui, a tlâng leh a tlâng inkâra tawng sawm tla, a san lam tawng nga a chung bawk a: a tlâng chu tawng sawmthum bial vêl a ni.
4:3 A tlâng hnuai chu kuhmum lemte hian a vêl chuak a, tawng khatah sawm zel, dar zel vêl chuan a awm a. Kuhmum lem chu tlar hnih a ni a, dar zema chun belhbâwm a ni.
4:4 Chu chu bâwngpa sâwm leh pahni chungah a innghat a, pathumin hmâr lam an hawi a, pathumin thlang lam an hawi a, pathumin chhim lam an hawi a, pathumin chhak lam an hawi a; hnung lam an inchhawn theuh a,
4:5 tuizêm chu kutphah bawka chhah a ni a, tin, 1200 dawng a ni, a tlâng chu no tlâng ang, lili pâr anga siam a ni.
4:6 Insilna tûr maihûn sawm a siam bawk a, ding lampangah panga a hung a, vei lampangah panga a hung a; chung hchu hâlral thillan silna tûr a ni a; dar zem eraw chu puithiamte insilna tûr a ni.
4:7 Tin, a siam dan tûra ruat angin rangkachak khawnvar dahna sawm chu a siam a, biak in chungah chuan ding lamah panga, vei lama panga a dah a.
4:8 Dawhkan sawm a siam bawk a, biak in chungah chuan ding lamah panga , vei lama panga a dah a. Tin, rangkachak maihûn za a siam a.
4:9 Chung lo pawh chu kawtzawl puithiamho ta leh a pâwn zâwka kawtzâwl zau a siam a, kawngkhârpui a siam bawk a, darin a luan a.
4:10 Tin, zem chu in ding lampangah chak lama chhim chhawngin a hung a.
4:11 Tin, Hurama chuan bel te, vutlawhna te, maihûnte a siam a. Chutichuan Pathian in atâna lal Solomona a siamsak chu Hurama chuan a peih ta a;
4:12 ban pahnih te, bel anga bawk te, ban chhipa bel anga bawk pahnih te, ban chhipa bel anga bawk pahnih tuamna tial chik chek pahnih te,
4:13 chu mi tuamna tial chik chek pahnih atâna pawmgranet zali te, ban chhipa bel anga bâwk pahnih tuamna tûr tial chik chek ve ve atâna pawmgranet tlar hnih te.
4:14 Hunchhan te, hunchhan chunga bêlte pawh a siam a;
4:15 zem pakhat leh a hnuaia sebâwngpa sâwm leh pahnihte nen.
4:16 Bel te, vutlawhna te, sathurna te leh a bungbêl zawng zawngte pawh chu Hurama chuan LALPA in atân dar nawtleta lal Solomonaa siamsak a ni.
4:17 Chungte hu Jordan phai zawla Sukoth le Zereda belei hmuna lal chuan a chhûng a.
4:18 Chutiang chuan Solomonan bungbêl tam tak a siam a; dar chu bûk sen rual a ni lo.
4:19 Tin, Solomona chuan Pathian ina bungbêl awm zawng zawng chu a siam a, rangkachak mâicham te, chhang chhiahna dawhkan te;
4:20 ruat anga hmun thianghlim hmaa chhit tûr khawnvar dahna te, a khawnvar chawpin, rangkachak hlir hlain a siam a;
4:21 tin, pangpâr te, khawnvarte leh chaichehte chu rangkachak, rangkachak hlir hlakin a siam a;
4:22 tin, khawnvar puan chehna te, maihûn te, fian te, mei lâknate chu rangkachak hlir hlak bawkin: tin, in chhûng luhna, in chhûng ril zâwk hmun thianghlim ber kawngkhârte leh a in, Biak in kawngkhâr te chu rangkachakin a siam a.
5:1 Tichuan Solomonan LALPA in atâna a sak chu a peih ta vek a; tin, Solomona chuan a pa Davidan thil alo hlân tawh zawng zawngte chu a la lût a; tangkarua te, rangkachak te, hmanrua zawng zawngte chu Pathian ina ro dahnaah a dah ta a.
5:2 Chutichuan Solomona chuan Israel upaho te, an hnam puipa, Israela thlahho chhûngkaw puipa zawng zawng chu, Davida khawpui Zion ata LALPA thuthlunna bâwm zawn chho tûrin Jerusalem khuaah a khaw chiam a.
5:3 Chutichuan Israel mi zawn zawngte chu thla sarihnaa kûtah chuan lal hnênah an kal khâwm chiam a.
5:4 Tin, Israel upaho zawng zawng chu an lo kal a, Levi-hote chuan bâwm chu an zawn a.
5:5 Tin, LALPA bâwm le, inbiakna puan in leh pua ina bungbêl thianghlim zawng zawngte chu an zawn chho va; chungte chu puithiam Levi-hote chuan an zawn cho va.
5:6 Tin, lal Solomona leh Israel-ho pungkhawm zawng zawng a hnêna rawn inkhawmte chu bâwm hmaah an awmho va, berâm leh bâwngpa sawi sen rual loh leh chhiar sen rual lohvin an inthawi a.
5:7 Tichuan puithiamte chuan LALPA thuthlunna bâwm chu a awma tûra an la lût a, in chhûnga biakna hmun, hmun thianghlim berah, cherub-te thla hnuaiah chuan.
5:8 Cherub-te chuan bâwm awmna chung zawnah chuan an thla an zar reng a, cherub-te chuan bâwm leh a zawnfungte chu an khuh vek a.
5:9 Tin, a zawnfungte chu a sei khawp a, a zawnfung hmawrte chu biakn ahma, hmun thianghlim atang chuan a hmuh theih a; amaherawhchu pawn lamah zawng a lang lo: tun thleng hian huta chuan a la awm reng a ni.
5:10 Aigupta ram ata an chhuah a, LALPAN Israela thlahte hnana thu a thlun laia Mosian Horeb tlânga lungphêk pahnih a dah chauh lo kha chu chu mi bâwm chungah chuan engmah dang a awm lo.
5:11 Tin, heti hi a ni a, puithiamhote chu hmun thianghlim ata an lo chhuah veleh chuan, (puithiam awmho zawng zawngte chu an intithianghlim a, apawlin an insiam chuang lo va;
5:12 Levi-ho hla satu zawng zawngte pawh an zavaiin Asapha te, Hemana te, Jeduthuna te, an fapate leh an unaute nen, puan zai sina intuamin darbenthek te, perhkhuang te, tingtang te nen, mâicham chak lampangah an ding a, an zingah chuan puithiam za leh sawmhnih tawtawrâwt hamin an awm bawk a ni:)
5:13 heti hi a ni a, tawtawrâwt hamtute le hla satuten LALPA fakna leh lâwm thu sawi nana an tum rik chu ri khat ang maiin a hriat a; tawtawrâwt leh darbenthek le thil tum rik nena an aw an han chauh a, "Ani chu a tha si a, a ngilneihna chu kumkhuain a awm dawn a ni," tiin Lalpa an han fak chuanin, Lalpa in chu chhumin a khat ta mup mup mai a,
5:14 tichuan chhum avâng haun puithiamte chuan rawng pawh an bâwl thei ta lo hial a; LALPA ropuinain Pathian in chu a khat ta vek si a.
6:1 Chutichuan Solomonan thu a sawi a: "LALPAN, 'Thim chhah mupah chuan ka awm ang,' a ti tak a,
6:2 nimahsela i chenna tûr in, kumkhuaa i awmna tûr chu ka lo saksak ta che a ni hi," tiin.
6:3 Tin, lal chu a lehkhawi a, Israel-ho pungkhawm zawng zawngte chu mal a sawm a; Israel-ho pungkhawm zawng zawngte chu an ding thup a.
6:4 Tin, ani chuan, "LALPA, Israelte Pathian, ka pa Davida hnêna ama kâ ngeia,
6:5 Aigupta ram ata ka mi Israelte ka hruai chhuah ni atangin Israel-ho hnam zinga khawii khua mah hi ka hming awmna tûr in sak nân ka la thlang ngai lo va; ka mi Israelte chunga hotu tûr mi tumah ka la thlang ngai hek lo;
6:6 amaherawhchu ka hming awmna tûrin Jerusalem hi ka lo thlang ta a, ka mi Israelte hotu atân Davida hi ka lo thlang ta a ni,' tia lo sawitu, ama kut ngeia rawn puitlintu hi fakin awm rawh se.
6:7 Ka pa Davida khan Israelte Pathian, LALPA hming atân in sak a rilru thin a.
6:8 Nimahsela LALPAN ka pa Davida hnênah, 'Ka hming atân in sak i rilruk thin a, hetiang rilru i lo pu hi i titha e;
6:9 nimahsela nang zawngin in chu i sa lo vang a; i fapa, i thalbea la chhuak tûra chuan ka hming atân in chu a la sa zâwk ang,' a lo ti tawh a.
6:10 Tin, LALPAN a thu sawi chu a rawn hlen ta a; LALPA lo tiam tawh ang ngeiin ka pa Davida hmun chu ka lo luah a, Israel lalthutthlengah chuan ka lo thu a, Israelte Pathian, LALPA hming atân in chu ka lo sa ta a ni.
6:11 Chutah chuan Israela thlahte hnana a lo thlun, LALPA thuthlunna bâwm chu ka dah ta a ni," a ti a.
6:12 Tin, LALPA maichâm bulah Israel pungkhawm zawng awng hmuhah chuan a ding a, a ban a phar a,
6:13 (Solomona dar dawhkan a sei lam tawng nga, a zau lam tawng nga, a san lam tawng thuma siam biak in kawtlai taka a hunah chuan a chuang a, Israel pungkhawm ho zawng awng hmaa chuan a thingthi a, vân lam hawiin a ban a par a._
6:14 "Aw LALPA, Israelte Pathian, lei leh vâna nangmah ang reng Pathian an awm lo, an thinlung zawng zawng i kawng zawhtu i chiahhlawhte chunga chuan thuthlung hlenin i khawngaih thin a;
6:15 I chhiahhlawh ka pa Davida hnêna i thutiam chu i hlen a; a ni, vawiin niah hian i kaa i lo sawi tawh chu i kutin i hlawhtlintir ta a.
6:16 Chutichuan aw LALPA, Israelte Pathian, i chhiahlawh ka pa Davida hnêna, 'I thlahte chu i awm anga awm ve tûra an awm dana an fimkhur pawht chuan, ka mithmuha Israelte lalthutthlenga thu tûr chu i hmai lo vang,' tia i lo tiam tak kha hlen ang che.
6:17 Chutichuan LALPA, Israel Pathian, i chhiahhlawh Davida hnêna i thu lo sawi chu hlawhtlintir ngei ang che.
6:18 Amaherawhchu nang Pathian chu lei mihringte zinga i chêng tak meuh dâwn êm ni le? Ngai teh, vân zau takah pawh i leng lo a ni a, he ka in sakah hian i va leng lo nasa lehzual awm êm!
6:19 Nimahsela aw LALPA ka Pathian, i chhiahhlawhin a auhna che leh a tawngtaina hi ngaihthlâksakin, i chhiahhlawh tawngtaina leh dilna hi rawn ngaihsak ang che:
6:20 he mi hmun lam hawia i chhiahhlawhin a tawngtaina chu ngaithla a, 'Chutah chuan ka hming chu a awm ang,' i tihna hmun ngei, in lamah hian chhun leh zana i mit i len reng thin theihna tûrin.
6:21 Tin, i chhiahhlawh leh i mi Israelte hian he mi hmun lam hawia an tawngtai hunin an dilnate lo ngaihthlâksak thin ang che, a ni, i chenna hmun vanan lo ngaithla la; tin, lo ngaithlain ngaidam ang che.
6:22 Mi tupawhin a vengte hungah thil tisualin, chhechhamtir hial lo tul sela, he mi ina i mâicham hmaah hian rawn chham sela,
6:23 nangin vanan lo ngaithla la, che la, mi sual chu a suam mana thiam lo chantirin, mi fel chu a fel mana thiam chantirin i chiahhlawhte rorêlsak ang che.
6:24 I mi Israelte hian i chunga thil an tihsual avânga hmêlmate laka an lo tlâwm a, i lam an lo hawi leh a, i hming an tan a, he mi ina tawngtaia thil an rawn dil che chuan,
6:25 nangin vanan lo ngaihthlâksak la, i mi Israelte sualna chu ngaidam la, anmahni leh an pi leh pute i pêk ramah chuan hruai leh ang che.
6:26 I chunga thil an tihsual avânga vân a lo pin a, ruahte a lo sur loh va, he mi hmun lam hawia an tawngtaia i hming an tan a, anmahni i tihhreawm avânga an sualte an sim chuan,
6:27 nangin vanan lo ngaithla la, an kalna tûr kawng tha kawhhmuhin i chhiahhlawhte leh i mi Israelte sualna hi ngaidamin i mite an rochan atân i pêk i ramah hian ruah han surtir ang che.
6:28 Kan ramah hian tam te a lo tlâk a, hrite a lo len a, rona emaw, tawihna emaw, khaukhuap emaw, pangang emaw a lo awm a, an hmêlmaten an khuate an rawn hual a, hri engpawh, natna engpawh a lo thlen chuan,
6:29 an hri vei emaw, an lungngaihna emaw hria apiangin, he in lam hawia ban phara mi mal emaw, Israel mipui hovin emaw tawngtaina leh dilna an rawn thlen chu
6:30 i awmna vanan lo ngaithla la, ngaidam la, mi tin, an awm dan ang theuh zelin hlawhtlintir ang che, an thilnung i hre theuh si a; (nangma chauh hi mihring fate thinlung hretu i ni si a;)
6:31 kan pi leh pute i pêk rama an awm chung zawnga i kawng zawh theihna tûra an tihna tûr chein.
6:32 Tin, i mi Israelte ni lo, hnam dang mi, i hming ropui tak leh i kut chak tak leh i ban phar avânga ram hla tak ata lo kal a, he mi in lam hawia an rawn tawngtai hunin
6:33 nangin i awmna vanan lo ngaithla la, hnamdangte pawh an koh dan che ang zelin an chunga ti ang che; tichuan i mi Israelte ang bawkin khawvela hnam tinin i hming an hria ang a, an tih ang chai, he in ka sak hian i hming apu tih an hre dâwn nia.
6:34 I miten an hmêlmate chu i tirhna lam apianga an beihin i khawpui thlan leh i hming atâna in ka lo sak lam hawia i hnêna an tawngtai chuan,
6:35 nangin an tawngtaina leh an dilna chu vanan lo ngaithla la, an thu-ah chuan pui zel ang che.
6:36 I chunga an lo sual a, (tumah sual lo an awm si lo) an chunga i thinur a, hmêlma kuta i pêk a, ram hla takah emaw, hna deuhvah emaw sala an hruai emaw pawha,
6:37 sala an ruaina rama an inngaihtuah chhuah a, an inchhir a,, 'Kan lo sual ta a, dik lo tak leh suahsualthlâk takin thil kan lo ti ta a ni,' tia
6:38 an tana rama dilna an rawn thlen a, sala hruaituten an hruai an tanna rama an thinlung tak leh an rilru tak taka i lam an lo hawi a, an pi leh pute ram lam leh i khawpui thlan leh i hming atâna ka in sak lam hawia i hnêna an tawngtai chuan,
6:39 an tawngtaina leh an dilna chu nangin i awmna vanan lo ngaithla la, an thu-ah chuan pui zel la, i chunga lo sual ta i mite chu ngaidam ang che.
6:40 Aw ka Pathian, khawngaih takin i mit lo meng la, he hmuna tawngtainaah hian i beng lo chhi ang che.
6:41 Aw LALPA Pathian, i awmna hmunah chuan cho rawh, nang leh i chakna bâwm nen; aw LALPA Pathian, i puithiamte chu chhandamnain thuam la, i mi thianghlimte chu thatnain tihlim rawh.
6:42 Aw LALPA Pathian, i hriak thiha hmêl chu hawi kirtir suh la, i chhiahlawh Davida thil tha tihte chu hre reng ang che," a ti a.
7:1 Tin, Solomonan a han tawngtai zaw chuan vân atangin mei a lo chuk a, hâlral thilhlan leh inthawinate chu a rawn kangral a a; tin, LALPA ropuinain in chu a lo khat ta a.
7:2 LALPA ropuinain LALPA in chu a tihkhah avângin LALPA inah chuan puithiamte chu an lût thei ta lo va.
7:3 Tin, Israela thlahte zawng zawng chuan vân atanga mei lo chhuk leh in chunga LALPA ropuina chu an en reng a, lung rem chunga chuan hmaia lei siin an bawkkhup a, "Ani chua tha si a, a ngilneihna chu kumkhuain a awm dawna ni," tiin chibai an bûk a, lâwm thu an sawi a.
7:4 Tichuan lal leh mipuite chuan LALPA hmaa inthawinate an hlân a.
7:5 Lal Solomona chuan inthawina bâwngpa singhnih leh sânghnih leh berâm nuaikhat leh singhnih a hlân a. Chutiang chuan lal leh mipuite chuan Pathian in chu an hlân a.
7:6 Tin, puithiamte chu an hmun theuhvah an ding a; tin, Levi-hote pawh chu LALPA hnêna lâwm thu sawi nana phuah, 'A ngilneihna chu kumkhuain a awm dâwn a ni,' tia LALPA fak nana Davidan a hman thin, thil ri thei nena LALPA hla sain an ding bawk a; tin, puithiamte chuan tawtawrâwt an ham a, Israel mi zawng zawng chu an ding thup a.
7:7 Tin, Solomona chuan LALPA in hma zawna hungchung kawtlai tak chu a tithianghlim bawk a; chutah chuan hâlral thinhlan te, remna thilhlan thau te a hlân a; Solomona dar mâicham siam chu hâlral thilhlan te, chhangphut thilhlan te, thau te hlân nân a tet luattuk avângin.
7:8 Chutichuan chu mi tum chuan Solomona leh Israel mi zawng zawng, mipi pungkhawm nasa tak chu Hamath kaw luhna atanga Aigupta ram lui thlenga mite nen ni sarih an kut a.
7:9 Tin, ni riat ni chuan inkhawmna ropui tak an nei a; mâicham lawmna atân ni sarih an awh a, kut ni atân ni sarih an awh a ni.
7:10 Tin, thla sarihna, ni sawmhni leh ni thum ni chuan mipuite chu a tintir a, LALPAN Davida leh Solomona leh a mi Israelte chunga a thatna a lantir avâng chuan hlim tak leh lâwm takin mite chu an in lamah an haw ta a.
7:11 Chutiang chuan Solomona chuan LALPA in leh lal in chu a puitlin ta a; Solomona chuan a rilrua a tum ang takin LALPA in leh ama in chu tluang takin a puitlin ta a.
7:12 Tin, zanah Solomona hnênah LALPA a rawn inlâr a, a hnênah, "I tawngtaina chu ka lo hria a, he hmun hi ka tana inthawina inah ka ruat tawh e.
7:13 Vante ka khâr a, ruahte a sur loh emaw, ka mite zinga hri ka lentir emaw a,
7:14 ka hming pu ka mite chuan inngaitlâwma an tawngtai a, min zawn a, an awm dan sualte an hawisan chuan, vân atangin ka lo ngaithla ang a, an sualte ka ngaidam ang a, an ram chu ka tidam leh ang.
7:15 He hmuna tawngtainaah hian ka mit ke len ang a, ka beng ka chhi ang.
7:16 Chutah chuan ka hming kumkhuaa a awm theih nân he in hi ka ruat a, ka tithianghlim tawh a ni: chutah chuan ka mit leh ka thinlung a awm kumkhua tawh ang.
7:17 Tin, nanga chungchâng thu-ah pawh, i pa Davida anga ka mithmuha i awm a, thu ka pêk ang zel chea i awm a, ka thuruatte leh ka rorêlte i pawm chuan,
7:18 Israelte zingah rorêltu i hmai lo vang,' tia i pa Davida hnêna thu ka thlun ang khan i ram lalthutthleng ka tinghet ang.
7:19 Amaherawhchu in hmaa ka zam, ka dante leh ka thupêkte i hawisan a, pathian dangte rawng in bâwl a, in biak chuan,
7:20 anmahni ka pêk a ram ata hi ka tiboral hlauh vang a; tin, he in ka hming atâna ka tihthianghlim tawh sa hi ka mithmuh phâk lova ka sawn bo daih ang a, hnam tin, zinga tihelna leh a chhe lama tehkhinnaah ka siam ang.
7:21 Tin, he in sâng tak hi a kianga kal apiangin mak an ti ang a, 'Engati nge he ram leh he in hi LALPAN hetianga a tih?' an ti ang a.
7:22 Tin, 'LALPA, an pi leh pute Pathian, Aigupta ram ata hruai chuaktu chu an hawisan a, pathian dangte an vuan a, an bia a, an rawngte an bâwl tak avângin he chhiatna zawng zawng hi an chungah a thlentir a nih hi,' an la ti ang," a ti a.
8:1 Tin, heti hi a ni a, Solomonan LALPA in le ama in a sak chhûng kum sâwmnih a lo vei chuan,
8:2 Huraman Solomona khua a pêkte chu Solomona chuan a din a, Israela thlahte a awmtir a.
8:3 Tin, Solomona chuan Hamath-zoba a bei a, a hneh a.
8:4 Tin, thlalera Tadmor a din a, Hamatha-a bungraw dahna khuate nen.
8:5 Tin, Beth-horon chhakta zâwk leh thlangta zâwk pawh, kulh te, kawngkhâr te, a kalhnate neiin a din bawk a;
8:6 tin, Baalath khua te, a bungraw dahna khua zawng zawng te, a tawlailir dana khua te, a sakawr chung chuang mite awmna khua te, Jerusalem le Lebanon leh a ram chung zawng zawngah Solomona chuan a duh ang angin a din a.
8:7 ,8 Tin, Israela thlahte ni ve lo, Hit-ho te, Jebus-ho te thlah, Israela thlahten an tiboral loh, chu rama la awmte chu Solomonan chiahlawh hnathawka rawih luih pâwlah a siam a, tun thleng hian.
8:8 ,7 Tin, Israela thlahte ni ve lo, Hit-ho te, Jebus-ho te thlah, Israela thlahten an tiboral loh, chu rama la awmte chu Solomonan chiahlawh hnathawka rawih luih pâwlah a siam a, tun thleng hian.
8:9 Israela thlahte erawh chu Solomonan a hnathawktu chhiahlawh atân a siam ve lo va, indo mi te, a sipai hotu te, puipa te, a tawlailir leh a sakawr chung chuang mi hotute an ni zâwk a.
8:10 Chungte chu mipuite ho thintu, Solomona puipa berte an ni a, zahnih leh sawmnga an ni.
8:11 Tin, Solomona chuan Pharaoa fanu chu Davida khawpui ata a puala in a saksakah huan a hruai chho va, "Ka nupui chu Israel lal Davida inah chuan a awm tûr a ni lo, LALPA bâwm lo thlenna hmun thianghlim a ni," a ti a ni.
8:12 Chutichuan Solomona chuan hulhliap hma lama a siam LALPA maichâmah chuan Mosia thupêk angin,
8:13 ni tin, atâna bituk tawk ang zelin chawlhniah te, thla thar niah te, kut bi nei, kum khatah vawi thum chang dawidim telh loh kutah te, chawlhkar kutah te, bawkte kutah te hâlral thilhlante a hlân a.
8:14 Tin, a pa Davida lo ruat ang khan puithiam pâwlte leh Levi-hote chu an chanpual theuhahva ni tina thawh tul ang zela fak tûr te, puithiamte hmaa rawngbawl tûr tein a ruat a;tin, kawngkhâr tinah a pâwl pâwla vêngtute a ruat bawk a; chutiang chuan Pathian mi Davida chuan a lo ruat a ni.
8:15 Lalin puithiam-ho te, Levi-ho te thu a pêk chu eng kawnga mah, sum thu-ah te pawh an ngaihthah ngai hauh lo.
8:16 Tin, LALPA in an din tantirh atanga an peih thlengin Solomona lo buatsaih ang chiah a ni. Tichuan LALPA in chu puitlin a ni taa.
8:17 Chutichuan Solomona chu Edom rama tuifinriat kama Ezon-geber-ah leh Eloth-ah a kal a.
8:18 Tin, Hurama chuan a chiahhlawh tuifinriata che thang mi, lawngte nen a kaltir a; Solomona chiahhlawhte nen Ophir-ah an kal a, chuta mi chu rangkachak talent zaali leh sawmnga an rawn hawn a, lal Solomona hnênah an rawn thlen a.
9:1 Tin, Solomona hmingthanzia Seba lalnuin a lo hriat chuan Solomona chu thu khirh tak taka fiah tumin hnung zuitu tam tak hruaiin sanghawngseitea englo rimtuite leh rangkachak tam tak leh lunghlute phurin Jerusalem-ah a han kal a; tin, Solomona hnên a han thlen chuan, a rilrua awm zawng zawng chu phawrh fai vekin a bi a.
9:2 Tin, Solomona chuan a thu zawzawng awng chu a chhâng vek a; Solomona chuan a chan theih loh rêng rêng a awm lo va.
9:3 3-4, Mi inawmpawlhho leh sumdawnghote rawn lak luhtiam hauh lovin Solomona hnêna kum khat chhûnga rangkachak lo lût rih lam chu rangkachak talen zaruk leh sawmruk leh paruk bûk a ni; tin, Arabia lal zawng zawngte lehram awptute chuan Solomona hnênah rangkachak te, tangkarua te an rawn la thin a.
9:4 3-4, Mi inawmpawlhho leh sumdawnghote rawn lak luhtiam hauh lovin Solomona hnêna kum khat chhûnga rangkachak lo lût rih lam chu rangkachak talen zaruk leh sawmruk leh paruk bûk a ni; tin, Arabia lal zawng zawngte lehram awptute chuan Solomona hnênah rangkachak te, tangkarua te an rawn la thin a.
9:5 Lal hnênah chuan, "I thiltihte leh i finzia thuthang ka rama ka lo hriat chu a dik ngei a lo nih hi le;
9:6 nimahsela keima mit ngeia ka rawn hmuh hma loh chuan an sawi mai chu ka awi thin lo va, ngai teh, i finna ropuizia zatve pawh min lo hrilh hlei nem le: i hmingthan ka lo hriat dan chu i khum daih mai a.
9:7 I mite chu an va nihlawhin, heng i chiahhlawh i bula awm fova i finna thu ngaithla fo thinte hi an va nihlawh êm!
9:8 LALPA i Pathian, i chunga lâwm, a lal atâna a lalthutthlenga thuttirtu che LALPA i Pathian chu fakin awm raw se; i Pathianin Israel-ho hi kumkhuaa tihngheh atân a hmangaih a, chuvângin fel taka rorêl tûrin an lalah a siam che a nih hi," a ti a.
9:9 Chutichuan lal chu rangkachak talent za leh sawmhnih le englo rimtui tam tak mai leh lunghlute a pe a, Seba lalnun lal Solomona englo rimtui a pêk ang rêng rêng hi a awm lo.
9:10 Tin, Solomona chhiahhlawhte leh Hurama chhiahhlawh te, Ophir atanga rangkachak va phurte pawh chuan algum thing leh lunghlute an rawn phur a.
9:11 Tin, lal chuan alfum thing chu LALPA in leh lal in hung nân leh hla satute tana tingtang leh perhkhuangah a siam a: chutiang chu Judai ramah tun hma lam chuan an la hmu ngai lo.
9:12 Tin, Seba lalnuin thil a pêk tiam lovin lal Solomona chuan a duh apiang a pe bawk a. Chutichuan a ram lama a hote nen an haw leh ta a.
9:13 13-14, Mi inawmpawlhho leh sumdawnghote rawn lak luhtiam hauh lovin Solomona hnêna kum khat chhûnga rangkachak lo lût rih lam chu rangkachak talen zaruk leh sawmruk leh paruk bûk a ni; tin, Arabia lal zawng zawngte lehram awptute chuan Solomona hnênah rangkachak te, tangkarua te an rawn la thin a.
9:14 13-14, Mi inawmpawlhho leh sumdawnghote rawn lak luhtiam hauh lovin Solomona hnêna kum khat chhûnga rangkachak lo lût rih lam chu rangkachak talen zaruk leh sawmruk leh paruk bûk a ni; tin, Arabia lal zawng zawngte lehram awptute chuan Solomona hnênah rangkachak te, tangkarua te an rawn la thin a.
9:15 Tin, lal Solomona chuan rangkachak den phekin phaw lian mi zahnih a siam a: phaw lian pakhatin rangkachak sekel zaruh a duh a.
9:16 Tin, rangkachak den phekin phaw zathum a siam a; phaw pakhatin rangkachak sekel zathum a duh a; chung chu Lebanon ngawpui inah chuan a dah a.
9:17 Tin, lal chuan saingho lalthutthleng ropui tak a siam bawk a, rangkachak hlir hlakin a luan a.
9:18 lalthutthlengah chuan a kai chhohna rahka paruk te, lalthutthleng nena zawmk, rangkachak te, nghahchhan te, thutthleng sir tuaka ban nghahna te, a ban nghahna bula ding sakeibaknei lem pahnihte a awm a.
9:19 Tin, rahka paruk sir tuak chungah chuan sakeibaknei sâwm leh pahnih a ding a; chutiang chu khawii ramah mah an siam ngai lo.
9:20 Lal Solomona no zawng anwg chu rangkachak vek a ni a, tin, Lebanon ngawpui ina bungbêl zawng zawngte pawh rangkachak hlir hlak vek a ni a; Solomona dam lai chuan tangkarua chu engah mah an ngai lo.
9:21 Lal chuan lawng rual, Hurama chhiahhlawhte Tarsis-a kal thin kawppui a nei a, kum thum dan zelah Tarsis lawng rual chuan rangkachak te, tangkarua te, saingho te, zawng te, arawn te ârâwn phur thin a.
9:22 Chutichuan lal Solomona chuan khawvel lal zawng zawngte chu hausakah leh finah a khum vek a ni.
9:23 Tichuan Pathianin a thinlunga a dah, a finna thu chu ngaithla tûrin khawvel lal zawng zawngte chuan Solomona chu an rawn pan huai huai thin a.
9:24 Tin, kum tin pêk bi neiin tangkaraw bungbêl te, rangkachak bungbêl te, puan te, râlthuam te, englo rimtui te, sakawr te, sabengtungte an rawn pe theuh thin a.
9:25 Tin, Solomona chuan sakawr leh tawlailir dahna hmun sângli a nei a, tin, sakawr chungchuang mi singkhat leh sânghnih a nei a, chungte chu tawlailir dahna khuaah te, Jerusalema lal hnênah te a awmtir a.
9:26 Tin, Lui atanga Philistia ram leh Aigupta ram thlenga lal zawng zawng chungah a lal a.
9:27 Tin, lal chuan Jerusalem khuaah chuan a tam êm avângin tangkaruate chu lung ang maia ngaih khawpin a awmtir a, sidar thingte chu phaia theipui thing ang leka ngaih khawpin a awmtir a.
9:28 Tin, Solomona tan sakawrte Aigupta atangte leh ram tin, atangtein an rawn la thin a.
9:29 Solomona chanchin dangte chu a bul atanga a tawp thlengin zâwlnei Nathana ziak chanchin buah te, Silo mi Ahija hrilhlawkna buah te, Nebata fapa Jeroboama chungchâng thua zâwlnei Idova inlârna buahte a chuang lo vem ni?
9:30 Tin, Solomona chu Jerusalem-ah Israel mi zawng zawng chungah kum sâwmli a lal a.
9:31 Tin, Solomona chu a pi leh pute hnênah a muhil a, a pa Davida khuaah an phûm a, a aiah a fapa Rehoboama a lal ta a.
10:1 Tin, Rehoboama chu Sekem khuaah a kal a; Israel-ho zawng zawng chu Sekem khuaah lala siam tûrin an kal tawh si a.
10:2 Tin, heti hi a ni a, Nebata fapa Jeroboaman chu mi thu chu a lo hriat chuan (lal Solomona hnên ata a tlan bona Aigupta rama la awm a ni si a) Aigupta ram ata Jeroboama chu a lo haw leh a.
10:3 Mi an tir a, an zu ko va; tichuan Jeroboama leh Israel-ho zawng zawng chu an lo kal a, Rehoboama hnênah chuan,
10:4 "I pa khan kan nghâwngkawl a tirit êm thin a; chuvângin i pain min chhawr rimna leh a nghâwngkawl rit tak kan chunga a nghah hi min tihzansak la, tichuan i rawng kan bâwl ang," tiin an sawi a.
10:5 Tin, ani chuan an hnênah, "Ni thum hnuah lo kal leh zâwk rawh u," a ti a. Tichuan mipuite chu an kal kiang ta rih a.
10:6 Tin, lal Rehoboama chuan, "Heng mipuite chhanna tûr hian rem eng nge min ruatpui dâwn le?" tiin a pa Solomona dam laia a bula awm thin upahote chu a rawn a.
10:7 Tin, anni chuan a hnênah, "Heng mipuite hi i khawngaih a, i tihlawm a, an hnêna thu tha tak takte i sawi chuan kumkhuain i mite an ni ang," tiin an sawi a.
10:8 Nimahsela upaho remruatpui chu a apwm lo va, ama rualpui tlangvâlho, a bula awm thinte chu a rawn ta zâwk a.
10:9 An hnênah chuan, "Heng mipuiho, ka hnêna, 'I pan kan chunga nghâwngkawl a nghah hi min tihzansak rawh,' tia sawitute hi ka chan dan tûr rem eng nge mi ruatpui le?" a ti a.
10:10 Tin, a rualpui tlangvâlhote chuan a hnênah, "Heng mipuiho, 'I pa khan kan nghâwngkawl a tirit êm thin a, nang chuan min tihzansak rawh khai,' i hnêna titute hnênah chuan hetiang hian ti la, hetiang hian an hnênah sawi ang che, 'Ka pa kawng ai chuan ka zungte hia lian zawk a,
10:11 Ka pa khan nghawngkawl rit tak a lo bahtir che u a, kei chuan in nghawngkawl chu ka belhchhah dawn asin: ka pan vuaknain a hring thin che u a, kei erawh chuan khawmual- kaikuangin ka hring dawn che u a ni.
10:12 Chutichuan Jeroboama leh mipuiho zawng zawng chu lalin, "Ni thum chinah lo kal leh ang che u," tia a hrilh ang khan a ni thum ni chuan Rehoboama hnênah chuan an va kal a.
10:13 Lal chuan chang takin alo chhang hlawm a, lal Rehoboama chuan upahote remruatpui kha a pawm lo va,
10:14 tlangvâlhote remruatpui ang khan, "Ka pan in nghâwngkawl a lo tirit a, keiin chu chu ka belhchhah zâwk dâwn a ni; ka pan vuaknain a lo hring thin che u a, kei erawh chuan khawmualkaikuangin ka hring dâwn che u a ni," a ti a.
10:15 Chutichuan lal chuan mipuite thu sawi kha a pawm ta lo va: chu chu Pathian vang a ni, LALPAN Silo mi Ahija hmanga, Nebata fapa Jeroboama hnêna a thu lo sawi tawh kha a tihngheh theih nân.
10:16 tin, lain an thu a pawm lo tih Israel-ho zawng zawngten an hriatin mipuite chuan, "Davida ah chuan chanvo enge kan neih le" Lesaia fapaah chuan roluah tur kan nei hek lo: Israel mite u, in puan in lamah haw theuh rawh u: David, i chhungkua ngaihtuah mai rawh," tiin lal chu an chhang a. Chutichuan Israel ho zawng zawng chu an puan in lamah ah haw ta a.
10:17 Israela thlah, Judai ram khuaa awmte erawh chu an chungah Rehoboama a lal a.
10:18 Tichuan lal Rehoboama chuan hnathawka rawih luihte hotu Hadorama a tir a; ani chuan Israel-ho zawng zawng chuan lungin an lo deng a, a thi ta a. Tin, lal Rehoboama chu Jerusalem khua a tlan tumin a tawlailirah a chuang ta thuai a.
10:19 Chutichuan Israel-hote chu Davida chhûngte chungah an lo hel ta a ni, tun thleng hian.
11:1 Tin, Rehoboama chuan Jerusalem a han thlen chuan, Israel-hote do va, Rehoboama ram la leh tûrin Juda leh Benjamina chhûng te, mi huaisen thiau thlan chhuah, nuaikhat leh singriat zet a khâwm a.
11:2 Nimahsela Pathian mi Semaia hnênah LALPA thu a lo thleng a,
11:3 "Judai ram lal Solomona fapa Rehoboama hnênah leh Judai ram leh Benjamin rama Israel mi zawng zawngte hnênah,
11:4 LALPAN heti hian a ti, In han kal tûr a ni lo va, in unaute chu han do hek suh u: mahni in lamah haw leh vek rawh u; hei hi keimah tih a ni e,' tiin sawi rawh," tiin. Chutichuan LALPA thu chu an awi a, Jeroboama do tûra an kal tûr chu an kir leh ta a.
11:5 Tin, Rehoboama chu Jerusalem khuaah a awm a, Judai ramah inven nân khuate a siam a,
11:6 Bethlehem khua te, Etam te, Tekao te,
11:7 Bethzur te, Soko te, Adulam te,
11:8 Gat te, Maresa te, Zip te,
11:9 Adoraim te, Lakis te, Azeka te,
11:10 Zora te, Aijalon te, Hebron khuate; chung chu Judai leh Benjamin rama kulh nei khuate a ni.
11:11 Tin, chung kulhte chu a tinghet a, hotute a dah a, ei tûr te, hriak te, uain te a chek khâwm a.
11:12 Tin, khawtinah chuan phaw te, fei te a dah a, khaw nghet takah a siam hlawm a. Tin, Judai leh Benjamin ram chu a ta a ni.
11:13 Tin, Israel ram zawng zawnga puithiamte leh Levi-hote chu an ram atang theuhvin a hnênah an kal a.
11:14 Levi-hote chuan an ram leh an awmnate an chuahsan a, Judai ram leh Jerusalem-ah an kal a: Jeroboama leh a fapaten LALPA tana puithiam hna thawk lo tûrin a bantir a,
11:15 a hmun sâng atân le kelpa leh bawng no lem a siam atâna puithiamte a ruat tak zâwk avângin.
11:16 Tin, Israel hnam, LALPA Israelte Pathian lama riltu thle zawng zawngte chuan an zui a, LALPA an pi leh pute Pathian hnêna inthawi tûrin Jerusalem-ah an kal a.
11:17 Chutichuan Judai ram chu an tinghet a, kum thuum chung chu Solomona fapa Rehoboama chu an tinghet a: kum thum chhûng chu Davida leh Solomona kawng chu an zawh a ni.
11:18 Tin, Rehoboama chuan Davida fapa Jerimotha fanu Mahalathi nupuiah a nei a, chu chu Jesea fapa Eliaba fanu Abihaili fanu a ni:
11:19 fapate a hrinsak a; Jeusa te, Semaria te, Zahama te.
11:20 Ani hnuah chuan Absaloma fanu Maakai a nei a; ani chuan Abija te, Ataia te, Ziza te, Selomitha te a rinsak a.
11:21 Tin, Rehoboama chuan Absaloma fanu Maakai chu a nupuite leh a hmeite zawng zawngah chuan a hmangai bik a; (nupui sâwm leh pariat leh hmei sawmruk a nei a, fapa sawmhnih leh pariat leh fanu sawmruk a nei a.)
11:22 Tin, Rehoboama chuan maakai fapa Abija chu a unaute zinga chungnung berah a dah a; lala siam a rilrûk nghe nghe a ni a.
11:23 Fing takin rem a ruat a, a fapate zawng zawng chu Judai ram leh Benjamin ram zawng zawnga kulh nei khuaahte a awm darhtir vek a: ei tûr tam tak a pe a. Nupui tam tak a zawn sak hlawm a.
12:1 Tin, Rehohoma chu a lo lal ngheh tak chinah chuan a lama tang Israel-ho zawng zawng nen, LALPA dan chu an hawisan ta a.
12:2 2-3, Tin, heti hi a ni a, lal Rehoboama kum nga a lal kum chuan LALPA chunga an sual avângin Aigupta lal Sisaka chuan tawlailir 1,200 leh sakawr chung chuang mi 60,000 nen Jerusalem a han bei a: Aigupta rama mi a hnêna kalte chu chhiar sen rual an ni lo; Lub-ho te, Suki-ho te, Ethiopia-ho te an ni a.
12:3 2-3, Tin, heti hi a ni a, lal Rehoboama kum nga a lal kum chuan LALPA chunga an sual avângin Aigupta lal Sisaka chuan tawlailir 1,200 leh sakawr chung chuang mi 60,000 nen Jerusalem a han bei a: Aigupta rama mi a hnêna kalte chu chhiar sen rual an ni lo; Lub-ho te, Suki-ho te, Ethiopia-ho te an ni a.
12:4 Judai rama kulh nei khuate a la a, Jerusalem a va thleng a.
12:5 Tin, zâwlnei Semaia chu Rehoboama leh Juda-ho puipa Sisaka avânga Jerusalem-a pungkhawmho hnêna chuan a han kal a, an hnênah, "LALPA chuan heti hian a ti, 'Mi hawisan ta a, chuvângin kei pawhin Sisaka kutah ka dah ta che u a ni,' tiin," a han ti a.
12:6 Chutichuan Israel-ho puipate leh lal chu an intihnuai a, "LALPA chu a fel a ni," an ti a.
12:7 Tin, LALPAN an intihnuai chu a lo hriat chuan LALPA thu Semaia hnênah a lo thleng a, "An intihnuai ta a; ka tiboral vek lo vang a, thenkhat ka chhanhim ang a, Sisaka hmangin Jerusalem chungah ka thinurna ka leih lo vang.
12:8 Amaherawhchu a chhiahhlawhte an ni ang, ka rawngbawl leh ram dang mi rawngbawl dan an hriat nân," tiin.
12:9 Chutichuan Aigupta lal Sisaka chu Jerusalem beiin a han cho va, LALPA ina rote leh lal ina rote a la a; a la zo vek a ni; Solomona siam rangkachak phawte pawh a la a.
12:10 Tin, lal Rehoboama chuan chung aia chuan dar phawte a siam a, lal in kawngkhâr vêngtu sipai hotute a kawltir a.
12:11 Tin, heti hi a ni a, lal chu LALPA ina a lu apiangin vengtute chuan an keng a, tin, vengtute pindanah chuan an dah leh zel thin a.
12:12 Tin, a han intihhnuai tak avâng chuan a tihboral hlauh loh nân a chunga LALPA thinurna chu akiang ta a; tin, Judai ram chu a la tha reng bawk a.
12:13 Chutichuan lal Rehoboama chu Jerusalem-ah chuan a intinget a, ro a rêl a: Rehoboama chu a la tantirhin kum sâwmli leh kum khat a ni a, LALPAN a hming awmtirna tûra Israel hnam zawng zawng zinga a thlan khua Jerusalem-ah kum sâwm leh ku sarih a lal a; a nu hming chu Naamai, Amon mi a ni,
12:14 LALPA zawn nân a rilru a hman loh avângin thil tha lo a ti a.
12:15 Tichuan Rehoboama chanchin chu a bul atanga a tawp thlengin zâwlnei Semaia ziak chanchin bua leh zâwlnei Idova ziak chanchin bua thlahte chanchin zingah ziak a ni lâwm ni? Rehoboama leh Jeroboama chu an indo reng mai a ni.
12:16 Tin, Rehoboama chu a pi leh pute hnênah a muhil a, Davida khuaah an pum a: a aiah a fapa Abija a lal ta a.
13:1 Jeroboama kum sâwm leh kum riat a lal kumin Juda-ho chunga Abija a lal tan a.
13:2 Jerusalem-ah kum thum a lal a; a nu hming chu Maakai, Gibea mi Urieal fanu a ni. Tin, Abija leh Jeroboama chu chu an indo va.
13:3 Tin, Abija chuan sipai indo mi, mi huaisen nuali thlan thiau nen an va bei a; tin, Jeroboama chuan mi chak huaisen thlan thiau nuairiat inzarin a lo do va.
13:4 Tin, Abija chu Ephraim tlâng rama Zemaraim tlângah a ding a, "Aw, Jeroboam, Israel-ho zawng zawng nen lo ngaithla rawh u;
13:5 LALPA Israelte Pathian chuan Israel ram chu Davida leh a fate chi thuthlungin kumkhua atân a pe tih hre awm tak in ni lâwm ni?
13:6 Nimahsela Nebata fapa Jeroboama, Davida fapa Solomona chhiahlawh chu a pu chungah a lo hel ta mai a.
13:7 Tin, Rehoboama a la naupan a, a rilru a la nem a, a lo dodal theih loh lai khan Solomona fapa Rehoboama kalhin mi bengtlaloho, Beliala fate an pung khâwm a.
13:8 Tin, Davida fapa-te lakah hian LALPA ram chu do theih in inring a: tam pawh in tam hle a, Jeroboaman pathian atâna a siamsak che u rangkachak bawng no lemte pawh in hnênah a awm bawk a.
13:9 LALPA puithiam, Arona fapate leh Levi-hote chu hnawtchuakin, ram dang mite tih dan angin puithiam in insiam a ni lâwm ni? Tichuan bawng tuai leh berâm pasariha rawn inhlan apiangte chu pathian ni lawi lo puithiam an ni thei zel mai a.
13:10 Nimahsela keini zawng, LALPA chu kan Pathian a ni a, amah chu kan hawisan lo va; LALPA tana rawngbawltu mahni hna theuh thawk Arona fapa puithiamte leh Levi-hote kan nei a:
13:11 tin, ni tin, leh zan tin, LALPA tan hâlral thilhlan te, rimtui te an hal thin a: chhang chiah pawh dawhkan thianghliman an dah fel diam thin a; tlai lam apianga hal tûrin rangkachak khawnvar dahna a khawnvarte nen: keini zawngin LALPA kan Pathian thupêk chu kan zawm reng a, nangni erawh chuan amah chu in hawisan a ni.
13:12 Tin, ngai teh u, Pathian chu kan hma hruaiin kan hnênah a awm a, tin, a puithiamte an tawtawrâwta nangmahni hnawt tûra ham tûrin an awm bawk a. Aw, Israela thlahte u, LALPA in pi leh pute Pathian chu do lul suh u, in hmuingil tawp hlei lo vang e," a ti a.
13:13 Nimahsela Jeroboama chuan an hnung lamah a chan ruktir a: tichuan Judate hma lamah an awm a, chang rutute chu an hnung lamah an awm a.
13:14 Tin, Judate chu an han lehhawi chuan râl chu an hnung lam leh an hma lamah an lo awm a, LALPA chu an au ta a, puithiamte chuan tawtawrâwt an ham a.
13:15 Chutichuan Judate chu an au ta dur dur a; chutia Judate an au dur dur chuan heti hi a ni a, Abija leh Juda-ho hmaah chuan LALPAN Jeroboama leh Israel-ho zawng zawng chu a titlâwm ta a.
13:16 Tichuan Israel thlahte chu Juda-ho hmaah chuan an tlânchhia a, Pathianin an kutah a pe ta a.
13:17 Chutichuan Abija leh ahote chuan an that ta chiam mai a: tichuan Israel mi thlan thiau nuainga an that a.
13:18 Chu mi tuma Israela thlahte tlâwm dan chu chutiang chu a ni, Juda thlahte chuan LALPA an pi leh pute Pathian an rin avângin an ngam ta a.
13:19 Tin, Abija chuan Jeroboama chu a um a, heng khuate hi a laksak -Bethel leh a khawper te, Jesana a khawperte nen, Ephron a khawperte nen.
13:20 Abija lal lai chhûng chuan Jeroboaman din chauh lehnaa nei ta lo; LALPAN a hrem a, a thi ta a.
13:21 Abija erawh chu a lo chak ta deuh deuh va, nupui sâwm leh pali a nei a, fapa sawmnih leh pahnih leh fanu sâwm leh paruk a hring a.
13:22 Abija chanchin dangte leh a awm dan te, a thu sawite chu zâwlnei Idova hrilhfiahna buah a chuang a ni.
14:1 Chutichuan Anija chu a pute hnênah a muhil a, Davida khawpuiah an phûm a, a aiah a fapa Asa a lal ta a: alal chhûng chuan an ram chu kum sâwm zet ralmuangin a aawm a.
14:2 Asa chuan LALPA a Pathian mithmuhah thil tha leh dik a ti thin a:
14:3 ram dang pathian maichâmte leh hmun sângte a thehthang bo va, lungphunte a tichim a, Aseri-te a kit a:
14:4 Juda-hote chu LALPA an pi leh pute Pathian zawng tûr leh a dan leh a thupêk zawm tûrin thu a pe a.
14:5 Tin, Juda-te khua zawng zawnga hmun sângte leh mi lemte a thehthang bo vek bawk a; a hnuaiah ram chu ralmuangin a awm a.
14:6 Tin, Judai rama chuan kulh nei khuate a siam a; ram chu ralmuangin a awm a, LALPAN ralmuanna a pêk avângin chung kum chuan tumah do a nei lo.
14:7 Judate hnêna chuan, "Heng khuate hii din tha ang u khai, kulhte in hung ila, in sâng te, kulh kawngkhâr te, akalhna te i siam ang u; LALPA kan Pathian hi kan zawn tak avângin ram chu kan huaiah a lo awm ta a; amah chu kan zawng a, ani chuan kil tin, kil tanga ralmuanga awmna min pe ta a ni," a ti a. Chutichuan an din tha a, an hmuingil ta zel a.
14:8 Tin, Asa chuan Juda mi, phaw leh fei keng mi sipai nuaithum anei a; tin, Benjamin mi, phaw leh thal hmang mi nuaihnih leh singriat: chung zawng anwg chu mi chak huaisen vek an ni.
14:9 Tin, Ethiopia mi Zera, sipai maktaduai leh tawlailir zathum nen anmahni bei tûrin a lo thawk a; Maresa a lo thleng a.
14:10 Tichuan Asa chu a bei tûrin a va thawk a, Maresa-ah Zephatha ruamah an va inzar a.
14:11 Tin, Asa chuan LALPA a Pathian a au va, "LALPA chauh lo chu mi chak tak laka chak lo tanpuitu an awm lo va; aw LALPA kan Pathian, min tanpui rawh khai; nangmah ringin i hmingin heng mipuiho hi kan rawn bei a ni a. Aw LALPA, kan Pathian i ni a, mihringin nang chu ngam suh se," a ti a.
14:12 Chutichuan LALPAN Asa leh Judate hmaah chuan Ethiopia mite chu a bei a; tichuan Ethiopia mite chu an tlânchhe ta a.
14:13 Tin, Asa leh a hote chuan Gerar thlengin an um a; Ethiopia mite chu thi an tam êm avângin tan an khawh thei ta lo va; LALPA leh a sipaite hmaa chuan tihtlâwm an ni ta a; râllâk sum tam tak an la a.
14:14 Gerar vela khua zawng zawngte chu an bei a, LALPA chu an hlau ta a, khua zawng zawng chu an rawk a, râllâk sum a tam hle mai a.
14:15 Ranpuho puan inte pawh an bei a, berâm leh sanghawngsei tam tak an kawl a, Jerusalem-ah an haw leh ta a.
15:1 Tin, Odeda fapa Azaria chungah Pathian thlarau a lo thleng a;
15:2 Asa hmuak tûrin a kal chhuak a, a hnênah, "Asa leh Juda mi zawng zawng leh Benhamin mite u, ka thu ngaithla teh u: a lama in tan chhûng zawng LALPA chu in lamah a tang a, amah in zawn chuan in hmu ang a, amah in hawisan chuan ani pawhin a hawisan ang che u.
15:3 Israel mite chu rei tak Pathian tak nei lo leh zirtirtu leh puithiam nei lo leh dan nei lovin an lo awm a:
15:4 amaherawhchu an mangana LALPA Israelte Pathian lam an hawi a, an zawn veleh an hmu a a ni kha.
15:5 Tin, chung lai chuan a chhuaklam leh a lût lamte tan ralmuanga awmna a awm lo va, ram chunga awm zawng zawngte tan manganna nasa tak hlir a ni zâwk a.
15:6 Hnam leh hnam, khua leh khua an intichhe rem rum a; Pathianinhreawm tinrengin a timangang anih kha.
15:7 Nimahsela nangni zawng chak takin awm ula, inthlahdah su u, in thiltih man chu in hmu dâwn a ni," a ti a.
15:8 Tin, Asan chung thute leh zâwlnei Odeda thu sawite chu a hriatin a inti huai a, Judai ram leh Benjamin ram zawng zawng ata leh Ephraim tlâng rama a khawlak ata thil tenawmte chu a thehthang bo vek a; LALPA hulhliap bula LALPA mâicham chu a din tha a.
15:9 Tin, Judai ram leh Benjamin rama mi zawng zawng, a hnêna khawsa ve Ephraim leh Manase leh Simeon rama mite nen a ko khâwm vek a: LALPA a Pathian a hnênah a awm tih an hratin Israel ram atangin an rawn bel ta huai huai mai si a.
15:10 Chutichuan Asa kum sâwm leh kum nga a lal kum, a thla thumnaah Jerusalem-ah an pung khâwm chiam a.
15:11 Tin, chu mi ni chuan an râllâk bâwngpa zasarih leh berâm sângsarihin LALPA hnênah an inthawi a.
15:12 Tin, an rilru leh an thinlung zawng zawngin LALPA an pi leh pute Pathian zawng tûr leh
15:13 tupawh LALPA Israelte Pathian zawng lo chu alian ate, a hmei apain tihhlum tûr thu an thlung a.
15:14 Tin, LALPA hnênah aw ring takin, au rawlin tawtawrâwt ri nen, tawtawrâwt bi nei ri nen chhia an chham a.
15:15 Juda mi zawng zawng chu lungsi taka chhechham an ni avângin an lâwm tlâng hle a, LALPA chu tihtakzetin an zawng a, hmuh pawh an hmu ta reng a, hmun tinah ralmuangin an awm ta a.
15:16 Tin, lal Asa nu Maakai pawh chu milem tenawm tak Aseri a siamsak avângin a lalnu nihna a ban a; tin, Asa chuan a milem chu a sat thlu a, a tisawm dep a, Kidron luiah a hal a,
15:17 amaherawhchu Israel ram ata hmun sângte chu thehthang bo a ni lo va; nimahsela Asa rilru chu a lal chhûng chuan a fel hle reng a.
15:18 Tin, a pan thil a lo hlân leh ama lo hlân tangkarua te, rangkachak te, bungbelte chu Pathianina a la lût a.
15:19 Tin, Asa lal lai kum sâwmthum leh kum nga chhûng chuan indo rêng rêng a awm lo va.
16:1 Asa kum sâwmthum leh kum ruk a lal kumin Israel lal Baasa chuan Judate a han bei a, Juda lal Asa hnênah lût tûr leh chhuak tûr dan nân Rama khua a siam a.
16:2 Chutichuan Asan LALPA in leh lal ina ro tangkarua leh rangkachakte chu a la chhuak a, Damaska-a Suria lal Benhadada hnênah,
16:3 "Ka pa le i pa kara thuthlung a awm ang bawkin kan kara thuthlung a awm a, ngai teh, tangkarua leh rangkachakte ka thawn a che; ti teh, Israel lal Baasa hian mi tinsanna tûrin a hnêna i thuthlun kha thiat leh teh mai," tiin a thawn a.
16:4 Tin, Benhadada chuan lal Asa thu chu a lo pawm a; tichuan Israel khuate chu bei tûrin sipai hotute a tir a; Ijon kua te, Dan khua te, Abelmaim khua te, Naphtali rama bungraw dahna khua zawng zawngte an bei a.
16:5 Tin, heti hi a ni a, Baasan chu mi thu chu a lo hriat veleh Rama khua a siam lai chu a chawlhsan a, a thiltih tum chu a thulh ta a.
16:6 Chutichuan lal Asa chuan Juda mi zawng zawng chu a hruai a, Baasan Rama khaw siam nana lung leh thing a hmante chu an la vek a, chu chuan Geba leh Mizpa khua a siam a.
16:7 Tin, chu mi lai chuan zâwlnei Hanania chu Juda lal Asa hnênaha lo kal a, a hnênah, "LALPA i Pathian ring lovin Suria lal i ring a, chuvângin Suria lal sipai rualte chu i chauh ta a ni.
16:8 Ethiopia-ho leh Lub-hoe chu sipa rual lian tak, tawlailir leh sakawr chung chuang mite tam tak an ni lâwm ni kha? Nimahsela LALPA i rin avâng khan i kutah a pe a nih kha.
16:9 A lama rilru dik tak pûtute chunga a chakzia tilang tûrin khawvel zawng zawngah LALPA mit chu a leng ruai ruai thin a ni. Âtthlâk takin thil i ti a nih hi; tun achinah chuan do i nei reng rawh ang," a ti a.
16:10 Chutichuan Asa chu zâwlnei chungah chuan a thinrima, tan ina a kung ta a;a thu sawi avângin a thinrim ta hle mai a ni. Tin, Asa chuan mi thenkhate pawh a tiduhdah leh ta nghal zel a.
16:11 Tin, ngai teh u, Asa chanchin chu a bul atanga a tawp thlengin Juda leh Israel lalte chanchin ziakna buah a chuang a ni.
16:12 Tin, kum sâwmthum leh kum kua a lal kumin Asa chu a ke a lo na ta a; a nâ chu nasa tak a ni; nimahsela a natnaah chuan LALPA ruai lovin damdawi thiamte a ruai zâwk a.
16:13 Tin, Asa chu a pi leh pute hnênah a muhil a, kum sâwmli leh kum khat alal kumin a ti a.
16:14 Tin, Davida khawpuia a ma puala a ker, ama thlanah an phûm a, rimtui tui tak, rimtui siamtuten rimtui chi hrang hrang an siama khat khumah an zalh a, a pualah meipui nasa tak an chhep a.
17:1 Tin, a fapa Jehosaphata a aiah a lal a, Israel mite do tûrin a indin nghet a.
17:2 Tin, Judai rama kulh nei khua zawng zawnga sipaite a dah a: Judai ram leh a pa Asan a lo lak Ephraim rama khuaahte chuan ralvengtute a dah a.
17:3 Tin, Jehosaphata hnêna chuan LALPA a awm a; aala te zawng lova a pu Davidan a zawh hmasak tawh kawng chu a zawh a,
17:4 an pi leh pute Pathian chu zawnga, Israel mite tih ang ti lova a thupêkte a zawm zâwk avângin.
17:5 Chuvângin LALPAN a ram chu a kutah a tinghet a, tichuan Judai rama mi zawng zawngin Jehosaphata chu lawmman te an rawn pe a, a lo hausain a lo ropui ta hle mai a.
17:6 Tin, a rilru chu LALPA lamah a thle a; tin, Judai ram aa hmun sângte leh Aserite a thehthang bo vek bawk a.
17:7 Tin, kum thum a lal kumin ami lian Benhaila te, Obadia te, Zekaria-te Nethanela te, Mikaiate chu, Judai ram khuatea mite zirtir tûrin a tir chhuak bawk a:
17:8 tin, Levi mi, Semaia te, Nethania te, Zebadia te, Asahela te, Semiramotha te, Jehonathana te, Adonija te, Tobija te, Tobadonija te an tel ve a, tin, puithiam Elisama leh Jehorama an tel bawk a.
17:9 Tin, LALPA dan bu an keng a, Judai ramah chuan an zirtir a, Judai ram khua zawng zawng an fang a, mite an zirtir a.
17:10 Tin, Judai ram vêl ram zawng zawnga mite chuan LALPA chu an hlau va, tumah Jehosaphata chu an do ngam lo va.
17:11 Tin, Philistia mi thenkhatin Jehosaphata chu lawmman an rawn pe a, chhia atân tangkaruate an pe bawk a; tin, Arabia mite pawhin ran rual, berâmpa sângsarih le zasarih le kelpa sângsarih le zasarih an rawn kaih a.
17:12 Tichuan Jehosaphat achu alo ropi ta hle mai a, Judai ramah kulhte leh thil dah khawmna khuate a siam a,
17:13 Judai ram khuaahte chuan hna tam tak a nei a; Jerusalem-ah sipai mi chak huaisente a ngah bawk a.
17:14 Tin, an chhûngkua kua zela an awm dan chu hetiang hi a ni. Juda chhûngkuaa sâng hotu te chu, hotu Adana chuan mi chak huaisen nuaithum a hova;
17:15 a dawttu Jehohananan nuaihnih leh singriat a ho va;
17:16 tin, a dawt lehtu Zikria fapa Amasia chu inphal taka LALPA tana inpein, mi chak huaisen nuaihnih a ho va;
17:17 tin, Benjamin chhûngkuate - mi chak huaisen Eliadan thal leh phaw hmang mi nuaihnih a ho va;
17:18 a dawttu Jehozabada chuan ralkâp tûra inpeih diam nuaikhat leh singriat a ho va. Heng zawng zawng hi Judai rama kulh nei khuaa lalin a dahte tiam lova lal hnêna awm rengte an ni.
17:1 Tin, a fapa Jehosaphata a aiah a lal a, Israel mite do tûrin a indin nghet a.
17:2 Tin, Judai rama kulh nei khua zawng zawnga sipaite a dah a: Judai ram leh a pa Asan a lo lak Ephraim rama khuaahte chuan ralvengtute a dah a.
17:3 Tin, Jehosaphata hnêna chuan LALPA a awm a; aala te zawng lova a pu Davidan a zawh hmasak tawh kawng chu a zawh a,
17:4 an pi leh pute Pathian chu zawnga, Israel mite tih ang ti lova a thupêkte a zawm zâwk avângin.
17:5 Chuvângin LALPAN a ram chu a kutah a tinghet a, tichuan Judai rama mi zawng zawngin Jehosaphata chu lawmman te an rawn pe a, a lo hausain a lo ropui ta hle mai a.
17:6 Tin, a rilru chu LALPA lamah a thle a; tin, Judai ram aa hmun sângte leh Aserite a thehthang bo vek bawk a.
17:7 Tin, kum thum a lal kumin ami lian Benhaila te, Obadia te, Zekaria-te Nethanela te, Mikaiate chu, Judai ram khuatea mite zirtir tûrin a tir chhuak bawk a:
17:8 tin, Levi mi, Semaia te, Nethania te, Zebadia te, Asahela te, Semiramotha te, Jehonathana te, Adonija te, Tobija te, Tobadonija te an tel ve a, tin, puithiam Elisama leh Jehorama an tel bawk a.
17:9 Tin, LALPA dan bu an keng a, Judai ramah chuan an zirtir a, Judai ram khua zawng zawng an fang a, mite an zirtir a.
17:10 Tin, Judai ram vêl ram zawng zawnga mite chuan LALPA chu an hlau va, tumah Jehosaphata chu an do ngam lo va.
17:11 Tin, Philistia mi thenkhatin Jehosaphata chu lawmman an rawn pe a, chhia atân tangkaruate an pe bawk a; tin, Arabia mite pawhin ran rual, berâmpa sângsarih le zasarih le kelpa sângsarih le zasarih an rawn kaih a.
17:12 Tichuan Jehosaphat achu alo ropi ta hle mai a, Judai ramah kulhte leh thil dah khawmna khuate a siam a,
17:13 Judai ram khuaahte chuan hna tam tak a nei a; Jerusalem-ah sipai mi chak huaisente a ngah bawk a.
17:14 Tin, an chhûngkua kua zela an awm dan chu hetiang hi a ni. Juda chhûngkuaa sâng hotu te chu, hotu Adana chuan mi chak huaisen nuaithum a hova;
17:15 a dawttu Jehohananan nuaihnih leh singriat a ho va;
17:16 tin, a dawt lehtu Zikria fapa Amasia chu inphal taka LALPA tana inpein, mi chak huaisen nuaihnih a ho va;
17:17 tin, Benjamin chhûngkuate - mi chak huaisen Eliadan thal leh phaw hmang mi nuaihnih a ho va;
17:18 a dawttu Jehozabada chuan ralkâp tûra inpeih diam nuaikhat leh singriat a ho va. Heng zawng zawng hi Judai rama kulh nei khuaa lalin a dahte tiam lova lal hnêna awm rengte an ni.
18:1 Tichuan Jehosaphata chu a lo hausain a lo ropui ta hle mai a; tin, Ahaba nena inkungkaihna a siam a.
18:2 Tin, kum eng emaw zat lai hnu chuan Samari-ah Ahaba hnênah a zuk kal a. Tin, Ahaba chuan amah leh a hote chu berâm leh bâwngpate tam tak a lo talh a, Ramoth-gilead khuaa han chhohpuiah a sâwm a.
18:3 Tin, Israel lal Ahaba chuan Juda lal Jehosaphata hnênah chuan, "Ramoth-gilead khuaah kan han chho dun dâwn lâwm ni," a ti a. Tin, ani chuan a chhâng a, "Kei leh nang, ka mite leh i mite chu pumkhat kan ni alawm, râl chu kan beiza ang chu," a ti a.
18:4 Tin, Jehosaphata chuan Israel lal hnênah chuan, "LALPA thu ngaichang rih phawt la maw le," a ti a.
18:5 Chutichuan Israel lal chuan, zâwlneiho mi zali a ko khâwm a, an hnehah, "Ramoth-gilead khua bei tûrin kan han thawk ang nge thawk lo vang?" a ti a. Tin, anni chuan, "Han thawk rawh khai, Pathianin lal kutah a pe dâwn a ni," an ti a.
18:6 Nimahsela Jehosaphata chuan, LALPA zâwlnei tu emaw kan han rawn tûr an awm lâwm ni aw?" a ti a.
18:7 Tin, Israel lal chuan Jehosapahta hnênah, "LALPA min rawnsak tûr mi pakhat chu a la awm kha maw; nimahsela ani chu zawng ka huatzawng tak a ni; ka chungchâng thu hi a chhe lam ngawt lo a tha lam rêng rêng a sawi ngai si lo va; chu mi chu Imla fapa Mikaia a ni," a ti a. Tin, Jehosaphata chuan, "Lal chuan chutiang chuan ti teh suh se a," a ti a.
18:8 Tichuan Israel lal chuan hotu pakhat a han ko va, "Imla fapa Mikaia han hruai thuai teh," a ti a.
18:9 Tin, Israel lal leh Juda lal chu Samari kulh kawngka luhna bul hmun thawl laiah an lal puana inthuamin an lalthutthleng ve veah an thu a; tin, zâwlnei zawng zawng chuan an hmaah thu an sawi a.
18:10 Tin, Kenaana fapa Zedekian thir kite a siam a, "LALPAN heti hian a ti, 'Hengte hian Suria-hote chu boral der khawpin i si ang,' tiin, " a ti a.
18:11 Tin, chutiang bawkin zâwlnei dangte pawh chuan, "Ramoth-gilead-ah chuan han cho la, han hmuingil rawh khai; LALPAN lal kutah hian a pe dâwn a ni," tiin an sawi a.
18:12 Tin, Mikaia ko tûra an tirha chuan, "Ngai teh khai, zâwlneite chuan thukhat vuain a tha lamin lal hnênah thu an sawi theuh va; chuvângin nang pawhin an sawi tak angin a tha lamin han sawi ve teh khai," tiin a sawi a.
18:13 Tin, Miakai chuan, "LALPA nunna chhalin ka sawi e, ka Pathianina sawi ang chiahin a ni ka sawi dâwn ni," a lo ti a.
18:14 Tin, lal hnên a han thlen chuan lalin a hnênah, "Mikai, Ramoth-gilead khua bei tûrin kan han thawk ang nge thawk lo vang?" a ti a. Tin, ani chuan, "Han thawk ula, han hmuingil rawh u, i kutah pêk a ni dâwn a ni," a ti a.
18:15 Tin, lal chuan a hnênah, "Thu tak ngawt lo chu ka hnênah LALPA hminga sawi lo tûrin vawi engzat nge maw chhia ka chhamtir dâwn che le?" a ti a.
18:16 Tin, a ni chuan, "berâm vêngtu nei lo angin Israel-ho zawng zawngte chu tlângahte darh vekin ka hmu a; tin, LALPAN, 'Hengho hian hotu an nei ta lo va, mahni in lamah thlamuang takin haw dial mai rawh se,' a ti a ni," a ti a.
18:17 Tin, Israel lal chuan Jehosaphata hnênah, "Ka chungchâng thu hi a chhe lam ngawt lo chu a tha lam rêng rêng zawng a sawi hlei lo vang e tih ka hrilh che ani lâwm ni kha?" a ti a.
18:18 Tin, Mikaia chuan, "Khai le, LALPA thu ngaithla teh u, LALPA chu a lal thutthlenga thua vân mipuiho zawng zawng a ding lam leh a vei lama dingin ka hmu a.
18:19 Tin, LALPA chuan, 'Israel lal Ahaba hi Ramoth-gilead a han chho va, han thi tûrin tuin nge thlem dâwn?' a tih hun chuan pakhatin, 'Chu tin, khatin, a ti a, mi dangin, Chutiang khatiang chuan, ' a ti a.
18:20 Tin, thlarau pakhat a lo chhuak a, LALPA hmaah a ding a, 'Keimahin ka thlêm ang e,' a ti a. Tin, lalpana hnênah, 'Engtin maw?" a ti a.
18:21 Tin, ani chuan, 'Ka va kal ang a, a zâwlneite zawng zawng kaaah chuan thlarau dawtheiah ka va chhâng ang,' a ti a. Tin, ani chuan, 'I va thlêm ngei ang a, hlawh pawh i hlawhtling bawk ang, va kal ta la, chutiang chuan va ti rawh le,' a ti a.
18:22 Chutichuan ngai teh, LALPA chuan heng i zâwlneite kaah hian thlarau dawthei a dah a; i chungchâng thu LALPAN a tha lo lamin a sawi ta a ni," a ti a.
18:23 Chu veleh chuan Kenaana fapa Zedekia chuan a va hnai a, Mikaia biangah a va beng a, "I hnênah thu sawi tûrin LALPA thlarau chuan khawi lamah nge mi chhuahsan?" a ti a.
18:24 Tin, Mikaia chuan, "Ngai teh, pindan chhûngrila biru tûra i luh niin i la hria ang," a ti a.
18:25 Chutichuan Israel lal chuan, "Mikaia hi hruai ula, khaw awptu Amona leh lal fapa Joasa hnênah kalpui leh rawh u;
18:26 tin, 'Lalin heti hian a ti, He mi hi lung inah khung ula, thlamuang taka ka lo haw leh hma loh chuan hreawm chaw leh hreawm tui lo pe rawh u, a ti,' ti ang che u," a ti a.
18:27 tin, Mikaia chuan, "Thlamuang taka i lo haw leh chuan kei mi hmangin LALPAN thu a sawi lo a ni ang le," a ti a. Tin, amah vekin, "Nangin mipui zawng zawng pawhin lo hre rawh u," a ti a.
18:28 Tin, Israel lal leh Juda lal Jehosaphata chu Ramoth-gilead khuaah chuan an han chho va.
18:29 Tin, Israel lal chuan Jehosaphata hnênah chuan, "Ka inbawl danglam ang a, inbeihnaah chuan ka kal ve ang a; nang erawh chu i lal puan inbel rawh," a ti a. Chutichuan Israel chu a inbawl danglam a, inbeihnaah chuan an han kal a.
18:30 Tin, Suria lal chuan a tawlailirte chunga hotute hnênah chuan, "Israel lal ngawt lo chu mi te pawh mi lian pawh bei suh ang che u," tiin ahtu a pe a.
18:31 Tin, heti hi a ni a, tawlailir chunga hotute chuan Jehosaphata an han hmuh chuan, "Israel lal anih saw maw," an ti a. Tichuan bei tumin an hual ta a; nimahsela Jehosaphata chu a au va, tin, LALPAN a pui ta a, tichuan Pathianin a tihkirsak ta a.
18:32 Tin, heti hi a ni a, tawlailir chunga hotuten Israel lal a ni lo tih an hriat chuan um lovin an kirsan leh ta a.
18:33 Tin, mi pakhat hian tum bik nei lem lovin a thlangul ahan kuai a, Israel lal chu a awmphaw inkarah akap a; tichuan tawlailir khaltu hnênah chuan, "Khalh let la mipui zing ata hi mi chhuahpui rawh khai, hliam na tak ka tawk a ni," a ti a.
18:34 Tin, chu mi ni chuan inbeihna chu a nasa hle mai a; tin, Israel lal chu Suria-hote lam hawiin a tawlailirah tlai lam thlengin a ding a; tin, ni tlâk dâwn vêlah a thi ta a.
19:1 Tin, Juda lal Jehosaphata chu thlamuang takin Jerusalem-a a inah a haw leh ta a.
19:2 Tin, zâwlnei Hanania fapa Jehua chuan alo hmuak a, lal Jehosaphata hnênah, "Mi suaksual chu i tanpuiin LALPA hawtute chu i hmangaih dâwn a ni maw? He mi avâng hian LALPA thinurna i chunga a lo awm ta a ni.
19:3 Amaherawhchu he ram ata Aseri i thehthang bo va, LALPA i zawn avâng hian thatna kawng eng emaw zawng i la nei cheu a ni," a ti a.
19:4 Tin, Jehosaphata chu Jerusalem-ah a awm a; tin, Beer-seba atanga Ephraim tlâng ram thlengin a mite zingah a kal leh a, LALPA an pi leh pute Pathian lamah a hruai kir leh hlawm a.
19:5 Tin, khaw tinah Judai ram kulh nei khua zawng zawngahte chuan rorêltute a dah a.
19:6 rorêltute hnênah chuan, "In thiltih chu ngun taka ngaihtuahin ti rawh u; mihring tana rorêl in ni lo va, LALPA tan a ni zâwk si a; rorêlnaa chuan in hnênah a tel zel a ni.
19:7 Chuvângin LALPA hlau ula, fimkhur takin ti rawh u; LALPA kan Pathianah chuan khawlohna leh thlei bik neihna leh tham einate a awm lo a ni,"a ti a.
19:8 Tin, Jehosaphata chuan Jerusalem-ah LALPA rorêl tûr leh thubuaite remtu atân Levi-hote puithiam te, Israel chhûngkaw puipate a dah bawk a.
19:9 Tin, "LALPA tih chungin rinawm takin, rilru dik tak puin in ti tûr a ni.
19:10 Khawii khuaa mi pawhin thubuai an rawn sawi a, tualthah te, dan leh thupêk thu-ah te, thuruat leh rorêl thu-ahte an rawn inkhin chuan, LALPA chunga thil an tihsual loh nân fimkhur tûrin hrilh ang che u, nangmahni leh in unaute chungah thinurna a lo thleng dah rual ang e; chutiang chuan ti ula, thiam loh in chang dawn lo nia.
19:11 Tin, ngai teh u, LALPA lam thu zawng zawngah chuan puithiam lalber Amaria chu in hotu a ni a; tin, lal lam thu zawng zawngah chuan Juda te chhûngkaw chunga rorêltu Ismaela fapa Zebadia a ni: Levi-hote pawh in hotute an ni ve ang. Huai takin ti ula, mi thate hnênah chuan LALPA chu awm rawh se," a ti a.
20:1 Tin, chu mi hnua chuan heti hi a ni a, Moaba thlahte leh Amona thlahte chu Meun-ho thenkhatte nen Jehosaphata bei tûrin an lo thawk a.
20:2 Chutichuan tuten emaw Jehosaphata hnênah, "Nangmah bei tûrin mipui tam tak mai, tuifinriat râl Suria atangin an lo thawk chiam mai; ngai teh, Hazazon-tarmar-ah an awm tawh," (Chu chu Engedi an ti bawk thin) tiin an hrilh a.
20:3 Tin, Jehosaphata chuan a hlau va, LALPA zawng tûrin a in pe a; Judai Ram zawng zawngah chaw nghei tûr thu a than vêl a.
20:4 Tichuan Judate chu LALPA tanpuina zawng zawngin an pung khâwm a; Juda khaw tin, atangin LALPA zawng tûrin an lo chhuak a.
20:5 Tin, Jehosaphata chu LALPA inah, kawt hung chung thar bulah Juda-ho leh Jerusalem-ho pungkhawm zingah chuan a ding a;
20:6 "Aw LALPA, kan pi leh pute Pathian, vâna Pathian i ni lâwm ni? Hnam tin chunga rorêltu i ni lâwm ni? I kutah chuan thiltihtheihna leh chakna a awm a, tuma chelhrual i ni lo va.
20:7 Aw kan Pathian, he rama chengte hi i mi Israelte i hnawchhuahsak a, i thian Abrahama thlahte chatuan atân i pe a ni lâwm ni?
20:8 8-9, Tin, he ramah hian an lo awm ta a, 'Kan chungah thil tha lo, khandaiha rorêlnate emaw, hri te emaw, tamte emaw a lo thlen chuan he in bulah leh i hmaah kan lo ding ang a (he inah hian i hming a awm si a) kan mangannnaah chuan kan au avâng chia, nangin min ngaihthlaksakin min chhandam ang chu,' tiin i hming atân hmun thianghlim an dinsak chia.
20:9 8-9, Tin, he ramah hian an lo awm ta a, 'Kan chungah thil tha lo, khandaiha rorêlnate emaw, hri te emaw, tamte emaw a lo thlen chuan he in bulah leh i hmaah kan lo ding ang a (he inah hian i hming a awm si a) kan mangannnaah chuan kan au avâng chia, nangin min ngaihthlaksakin min chhandam ang chu,' tiin i hming atân hmun thianghlim an dinsak chia.
20:10 Tichuan ngai teh, Amona thlahte leh Moab-ho leh Seir tlâng mi, Israel-ho Aigupta ram ata an lo chhuah laia beih i phal lova, an kirsana an tihboral tak lohhoten,
20:11 kan luah atân i ram min pêk atân hnawhchhuaha mi rawn thungrulh an tum dan hi lo hre teh.
20:12 Aw kan Pathian, an chungah ro i rêl dâwn lâwm ni? Mi chu zozai, mi rawn bei tûra lo thawkte chu lo han bei thei ziazang kan ni si lo va; a tih ngaihnarêng rêng kan hre bawk hek lo, i lam kan lo hawi mai zâwka nie," a ti a.
20:13 Tin, Judate zawng zawng chu an fanau te te, an nupuite an fate nen LALPA hmaah an ding a.
20:14 Chutichuan mipui zinga Jahaziela chungah chuan LALPA thlarau a lo thleng a, chu mi chu Zekaria fapa a ni a, chu mi chu Benaia fapa a ni a, chu mi chu Jeiela fapa a ni a, chu mi chu Asapha thlah Levi mi Matânia fapa a ni a:
20:15 tin, ani chuan, "Nangni Judai rama mi zawng zawng leh Jerusalem-a awm zawng zawngte leh nang lal Jehosaphat, lo ngaithla raw u: LALPAN in hnenah heti hian a ti, 'Hlau suh ula, chung mipui tam tak avâng chuan zam hek suh u; indona chu nangni indona a ni lo va, Pathian indona a ni zawk si a.
20:16 Naktukah zuk bei rawh u; ngai teh u, Ziz pan chhohnaah an lo cho va, Jeruel thlaler bul ruam tawp lamah chuan in zu hmu ang a.
20:17 He indona hi in beih a ngai lo vang: inzar ula, ding ngawt mai ula, in lama tang LALPA chhandamna chu en reng mai rawh u, aw Juda mite leh Jerusalem mite u: hlau suh ula, zam hek suh u, naktukah bei tûrin thawk rawh u, LALPA chu in lamah a tang si a," a ti a.
20:18 Chutichuan Jehosaphata chu a hmaia lei siin a kun a; tin, Juda mite zawng zawng leh Jerusalem mi zawng zawng chu LALPA chibai bûkin LALPA hmaah an kun a.
20:19 Tin, Kohata thlah leh Kora thlah Levi-hote chu aw ring taka LALPA Israelte Pathian fak tûrin an lo ding a.
20:20 Tin, a tukah chuan zing takah an tho va, Tekoa thlaerah an lût a; tin, an kal lai chuan Jehosaphata chu a ding a, "Aw, Juda mite leh Jerusalem mite u, ka thu hi ngaithla rawh u; LALPA in Pathian chu ring ula, nghet takin in awm dâwn nia; a zâwlneite chu ring ula, hmuingil takin in awm dawn nia," a ti a.
20:21 Tin, mipuite a fuih zawh chuan sipaite hmaa kal chunga LALPA chawimawina leh a thianghlim mawizia fak tûra hla satu tûrte a ruat a, "'LALPA hnênah lâwm thu sawi rawh u, a ngilneihna chu kumkhuain a awm dâwn si a,' ti rawh u," a ti a.
20:22 Tin, hla an saka an han fak veleh chuan Amona thlah te, Moaba thlah te, Seir tlânga mite Juda-ho bei tûra lo thawkte chang rutu tûrte LALPAN a dah a; tichuan an tlâwm ta a.
20:23 Amona thlahte leh Moaba thlahte chuan Seir tlânga awmte chu thah chimih vek leh tihboral der tumin an bei ta mai a; tin, Seir tlânga mite an tiboral zawh chuan anmahni leh anmahni chu intihboral tumin an inbei ta chiam mai a.
20:24 Tin, Judate chuan thlaler thlirna hmun sâng an han thlen chuan mipui lam chu an han en a; tin, ngai teh, mitthi ruang chu leiah chuan a lum rum mai a, pakhat te mah tlan chuak an awm lo va.
20:25 Tichuan Jehosaphata leh a hote chu râllâk sum la tûrin an va kal a, an zingah chuan sum leh pai te, silhfên te, lunghlu te an va hmu ta teuh mai a, an phurh zawh loh khawpin an la a; a tam khawp a, ni thum zet râllâk sum chu an chhêk a.
20:26 Tin, a ni li ni chuan Beraka ruamah an inkhawm a, chutah chuan LALPA chu an chawimawi a; chu mi avâng chuan tun thleng hian chu mi hmun hminga chuan Beraka ruam an ti ta a ni.
20:27 Chutichuan Juda mi leh Jerusalem mi zawng zawng chu an haw leh ta a, tin, Jehosaphata chuan Jerusalem-a hlim taka haw tûrin an hma a hruai a; LALPAN an hmêlmate chungthuah hlim taka a awmtir tak avângin.
20:28 Tichuan perhkhuang te, tingtang te, tawtawrâwt-te nen Jerusalem-a LALPA in chu an han thleng ta a.
20:29 Tin, LALPAN Israel-te hmêlma a bei tih an han hriat chuan ram tina mite chuan Pathian chu an hlau ta a.
20:30 Tichuan Jehosaphata ram chu ralmuangin a awm ta a; a Pathianin an vela mite laka ralmuanna a pêk avângin.
20:31 Chutichuan Jehosaphata chu Judate chunga a lal ta a; kum sâwmthum leh kum nga mi a nihin a lal tan a; tin, Jerusalem-ah kum sâwmhnih leh kum nga a lal a; a nu hming chu Azubai, Silhia fanu a ni.
20:32 LALPA mithmuha thil tha tiin a pa Asa kawng chu pensan hauh lovin a a zawh a.
20:33 Amaherawhchu hmun sângte chu thehthang bo a ni lo va, mipuite pawhin an pi leh pute Pathian chungah an thinlung an la nghat bawk hek lo.
20:34 Tin, ngai teh u, Jehosaphata thiltih zawng zawngte chu abul atanga a tawp thlengin Hanania fapa Jehua chanchin ziaknaah a chuang a ni, chu chu Israel lalte chanchin buah a chuang a.
20:35 Tin, chu mi hnuahchuan Juda lal Jehosaphata chuan Israel lal Ahazia a thurualpui a; chu mi chuan tha lo takin thil a ti thin a:
20:36 Tin, Tarsis lama kal tûr lawng an siam tlâng a, Ezion-geber-ah lawngte chu an siam a.
20:37 Chutichuan Maresa mi Dodavahua fapa Eliezeran Jehosaphata hnênah, "Ahazia i thurualpui avângin LALPAN i thil tih tum hi a tihkhawlohsak ta che a ni," a ti a. Tichuan lawngte chu an chhe ta vek a, Tarsis-ah chuan an kal thei ta lo va.
21:1 Tin, Jehosaphata chu a pi leh pute hnênah a muhil a, a pute zinga a pu Davida khawpuiah an phûm a; tin, a fapa Jehorama a aiah a lal ta a.
21:2 Tin, ani chuan unau, Jehosaphata fapate a nei hlawm a, Azaria te, Jehiela te, Zekaria te, Azaria te, Mikaela te, Sephatia te an ni. Heng zawng zawng hi Israel lal Jehosaphata fapate vek an ni.
21:3 Tin, an pa chuan thil ropui tak tak a pe a, tangkarua te, rangkachak te, thil hlu tak tak te, Judai rama kulh nei khuate nen: nimasela ram chu Jehorama hnênah fa u ber a nih avângin a pe a.
21:4 Chutichuan Jehoraman a pa ram a han luah chuan a lo intichak ta a, a unaute zawng zawng chu Israelte zinga puipa tam takte nen khandaihin a tihlum vek a.
21:5 Jehorama chu kum sâwmthum leh kum hnih a nihin a lal tan a; Jerusalem-ah kum riat a lal a.
21:6 Ahaba chhungte tih angin Israel lalte kawng chu a zawm ve a: Ahaba fanu nupuiah a nei a ni: tichuan LALPA mithmuhah thil tha lo tak a ti thin a.
21:7 Nimahsela LALPAN Davida chhûngkua chu a tiboral duh lo va, Davida hnêna thuthlung avâng leh amah leh a thlahte chena khawnvar neihtir reng a lo tiam tawh avângin.
21:8 Ama chanah chuan Edom-ho chu Judate laka an hel a, lal an insiam chawp a.
21:9 TichuanJehorama chu a sipai hotute leh a tawlailir zawng zawngte nen a va thawk chhuak a, zanah a va thawk a, anmahni leh tawlailir chunga hotute hualtu Edom-hote chu a va bei a.
21:10 Chutichuan Edom-hote chu tun thlengin Judate lakah an la hel ta reng a ni; tin, LALPA, an pi leh pute Pathian chu a hawisan avângin, chu mi lai bawk chuan Libna khua pawh a lakah an hel ve a.
21:11 Tin, Judai ram tlângahte hmun sâng a siam a, Jerusalem mite chu a uiretir a, Judate chu a hruai bo va.
21:12 Tin, zâwlnei Elija atangin a hnênah lehkha a lo thleng a, "LALPA, i pu Davida Pathian chuan heti hian a ti, ' I pa Jehosaphata kawngte i zawh lo va, Judate lal Asa kawngte pawh zawh bawk hek lo va,
21:13 Israel lalte kawng i zawh zâwk a, Judate leh Jerusalem-a awmte Ahaba chhûngte anga i uiretir a, i unau, i pa chhûngte i aia tha zâwk i thah bawk avângin,
21:14 ngai teh, LALPAN i mi te, i fa te, i nupuite i rante hripuiin a hrem ang a;
21:15 tin, nangin ril natna nasa tak i nei ang a, ni tin, chu natna avânga i ril chu a tlâk a tlâk a, a tlâk zawh vek thlengin," tiin.
21:16 Chutichuan Ethiopia mite kiang vela mi Philistia-ho leh Arabia-ho rilru chu Jehorama bei tûrin LALPAN a chawk tho va:
21:17 tichuan Judate chu an han bei a, an ramah an lût a, lal ina thil zawng zawng chu an la vek a, a fapate, a nupuite pawh; chutichuan a fapa naupang ber Jehoahaza chauh lo chu a fa pawh an hnutchiahsak lo.
21:18 Tin, chu mi hnuah chuan LALPAN tihdam theih loh ril natnain a hrem a.
21:19 Tin, heti hi a ni a, a kum hnihna a lo vei hnuin a natna avâng chuan a ril chu a tla ta a, a natna rapthlak takin a lo thi ta a. A mite chuan a pa meipui an chhehsak ang khan an chhehsak ve lo.
21:20 A lal tirhin kum sâwmthum leh kum hnih a ni a, Jerusalem-ah kum riat a lal a; tuma ui hlawh lovin a thi a, Davida khawpuiah an phûm a, lalho thlanah erawh chuan a ni lo.
22:1 Chutichuan Jerusalem mite chuan a fapa naupang ber Ahazia chu a aiah lalah an siam a; a fa ute zawng zawng chu sipai rual, Arabia mite nena an tan hmuna lo kalho chuan an that ta vek si a. Chutichuan Juda lal Jehorama fapa Ahazia chu a lal ta a.
22:2 Ahazia chu a lal tantirhin kum sâwmli leh kum hnih a ni a; Jerusalem-ah kum khat a lal a; a nu hming chu Athali, Omria fanu a ni a.
22:3 Ani pawh chuan Ahaba chhungte kawng zawh chu a zaw veh a: a nu chu thil sual taka ti tûra kaihhruaitu a ni a.
22:4 Ahana chhûngkuate tih ang bawkin LALPA mithmuhah thil tha lo a ti a: a pa thih hnuin a chhiatna tûra kaihruaitu an ni.
22:5 An kaihhruai ang chuan a awm bawk a, Ramoth-gilead-ah Suria lal Hazaela do tûrin Israel lal Aaba fapa Jehorama hnêna a kal a; tichuan Suria ho chuan Jehorama chu an lo hliam a.
22:6 Suria lal Hazaela a va beinaa Rama-a an lo hliam tidam tûrin Jezreel-ah a kal a. Tichuan Juda lal Jehorama fapa Azaria chu Ahaba fapa Jehorama a dam loh avâng chuan a kan tûrin Jezreel-ah chuan a kal a.
22:7 Tichuan Ahazia Jehorama hnêna a kal a, a boralna chu Patian tih a ni a; Nimsia fapa Jehua bei tûrin Jehorama hnênah a kal avângin. Chu mi chu Ahaa chhûngte timang tûra LALPA ruat a ni si a.
22:8 Tin, heti hi a ni a, Ahaba chhûngte tichhe tûra a beih laiin Juda puipate leh Ahazia unau fapatehovin Ahazia rawng an bâwl lai a hmu a, a that ta hlawm a.
22:9 Ahazia chu an zawng a, an man a, (Samari-ah a biru a ni) Jehua hnênah an rawn hruai a, an that a; tin, "A thinlung zawng zawnga LALPA zawng thin Jehosaphata fapa a ni si a," an ti a, a phûmin an phûm a. Tichuan Ahazia chhûngte chuan an ramah thuneihna an nei ta lo va.
22:10 Tin, Ahazia nu Athali chuan a fapa a thi tih a lo hriat chuan a tho va, Juda lal zawng zawng chu a that ta vek mai a.
22:11 Ahazia fapa Joasa erawh chu lal fanu Jehosabeathi chuan lal fapa an thahte zing ata chu a hruai bo va, a enkawltu nen khum pindanah a thukru hlau mai a. Chutichuan lal Jehorama fanu Jehosabeathi, puithiam Jehoiada nupui (Ahazia farnu a ni a) Athali hmuh theih loh tûrin a thukru a, tichuan an that ta lo va.
22:12 Tin, an hnêna chengin Pathian inah kum ruk a rukin a awm a: tichuan Athali chu an rama chuan a lal ta a.
23:1 Tin, a kumsarih kumah chuan Jehoiada chu a intichak a, sipai za hotu, Jehorama fapa Azaria te, Jehanana fapa Ismaela te, Obeda fapa Azaria te, Adaia fapa Maaseia te, Zikria fapa Elisa phata te hnênah thu a thlung a.
23:2 Tin, Judai ram an fang a; Judai ram khaw tina Levi-hote leh Israelte chhûngkaw puipate an khâwm a. Jerusalem an han thleng a.
23:3 Tin, pungkhawmho zawng anwg chuan Pathian inah lal hnênah chuan thu an thlung a. Tin, an hnênah, "Ngai teh u, LALPAN Davida fapate chungchang thu a lo sawi angin lal fapa chu a lal tûr a ni.
23:4 In tih tûr chu hetiang hi a ni: Puithiamte leh Levi-ho chawlhnia lo kal thinte chu hmun thuma thena hmun khat kawngkhâr vêngtute in ni ang a.
23:5 Tin, hmun thuma thena hmun khat chu lal inah in awm ang a; tin, hmun thuma thena hmun khat chu kulh kawngkaah; tin, mipui zawng zawng chu LALPA in kawt hung chhûngah an awm ang.
23:6 Nimahsela puithiamte leh rawngbawltu Levi-hote chauh lo chu tumah LALPA inah lut suh se; anni chu an thianghlim avângin an lût ang a, mipui zawng zawng erawh chu LALPA ngaichangin an awm tûr a ni.
23:7 Tin, Levi-hovin an hriamhrei kengin lal chu an din hual ang a; tin, tupawh ina lo lût chu thah tûr a ni a; tin, lal chu a chauh leh a luhin a hnênah awm zel rawh u," a ti a.
23:8 Chutichuan Levi-ho leh Juda zawng zawngte chuan puithiam Jehoiada thupêk ang zawng zawng chuan an ti a; tin, mahni hote theuh chawlhnia lo kal tûrte leh chawlhnia tin tûrte chu an hruai a; puithiam Jehoiada chuan a tin tûr pâwl chu a la tintir si lo va.
23:9 Tin, puithiam Jehoiada chuan sipai za hotute chu LALPA ina awm lal Davida fei leh phawte leh phaw liante chu a pe a.
23:10 Tin, mite chu hriamhrei keng theuhvin in ding lampang atangin vei lampang thlengin mâicham leh In hualin lal a din hualtir a.
23:11 Chutichuan lal fapa chu an rawn hruai chuak a, lallukhum an khumtir a, thuhriattirna chu an pe a, lalah an siam a, Jehoiada leh a fapate chuan hriak an thih a, "Pathianin lal chu humhim rawh se," an ti a.
23:12 Tin, Athaliin mipui lal chawimawia an zi mur mur thâwm chu a hriatin LALPA inah mipui zingah chuan a va kal a;
23:13 tin, a han en a, ngai teh, kawngkaa ban bulah lal chu a ding a, a kianga sipai hotute leh tawtawrâwt hamtute nen; tin, chu mi rama mi zawng zawng chu an hlim êm êm a, tawtawrâwtte an ham dur dur a; tin, hla satute chuan an thil ri theite tumin fakna hla an saho va. Tichuan Athali chuan a puante a pawtthlêr a, "Phiar rukna! phiar rukna a ni ta le!" a ti a.
23:14 Tin, puithiam Jehoiada chuan sipaite chunga hotua ruat sipai za hotute chu a hruai chuak a, an hnênah, "Sipaihote karah chhuahtir ula, tin, tupawh a zui apiang chu khandaiha sahhlum ni rawh se," a ti a; puithiam chuan, "LALPA inah zawng thah tûr a ni lo ve," a lo ti tawh si a.
23:15 Chutichuan kawng an kian a, tin, sakawr luhna kawngkaah lal inah a kal a, chutah chuan an that a ni.
23:16 Tin, Jehoiada chuan amah leh mipui zawng zawng leh lal karah chuan LALPA mite ni tûrin thu a thlung ta a.
23:17 Tin, mipui zawng zawng chu Baala inah an kal a, an tichhia a, a mâicham te, a lemte an tisawm dep a, Baala puithiam Matâna chu mâicham bula an that a.
23:18 Tin, Jehoiada chuan, Mosia dan bua a ziak anga hlim tak leh hla sa chunga Davidan LALPA ina LALPA hnêna hâlral thilhlan hlân tûra a lo ruat puithiam Levi-ho hnuaia thawk tûrin Davida thupêk angin LALPA biak in vêngtu tûrte pêk angin LALPA biak in vêngtu tûrte chu a ruat a.
23:19 Thianghlim lo tawh phawt chu an luh loh nân LALPA in kawng khar vêngtute a ruat a.
23:20 Tin, za chunga hotu te, mi tha te, mipui awptute chu mi rama mi zawng zawngte chu a hruai a, LALPA ina lal chu an han hruai thla a; kawngkhâr chhakta zâwkah lal in lamah an kal a, lal chu an ram lalthutthlengah chuan an thuttir ta a.
23:21 Chutichuan chu rama mi zawng zawng chu hlim takin an awm a, khua chu ralmuangin a awm ta a: Athali chu khandaihin an that a.
24:1 Joasa chu a lal tantirhin kum sarih mi a ni a: Jerusalem-ah kum sâwmli a lal a; a nu hming chu Zibiai, Beer-seba a mi a ni .
24:2 Tin, Joasa chuan puithiam Jehoiada dam chhung chuan LALPA mithmuhin thil tha a ti a.
24:3 Tin, Jehoiada chuan nupui pahnih a neihsak a, fanu leh fapate a hring a.
24:4 Tin, heti hi a ni a, chu mi zawhah chuan Joasa chuan LALPA in siam that a rilruk a,
24:5 Puithiamte leh Levi-ho a ko khâwm a, Juda-ho khuaahte kal ula, kum tina in Pathian In siam that nân Israel mi zawng zawng hnênah tangka va khawn khâwm raw u khai, muangchang suh ang che u," a ti a. Nimahsela Levi-hote chu an hmanhmawh chuang lo va.
24:6 Tin, lal chuan puithiam lal ber Jehoiada chu a ko va, a hnênah, "Engati nge Levi-hote chu LALPA chhiahhlawh Mosia le Israel mipuite ruat hriattirna puan in atâna thawh bi ruat chu Juda mi leh Jerusalem=a mite thawh tûrin i phut loh?
24:7 Mi sualnu Athali fapate chuan Pathian in chu an tiche zo ta si a; tin, LALPA ina thilhlan zawng zawng chu Baala te an pe zo ta bawk si a," a ti a.
24:8 Chutichuan lalin thu a pe a, bâwm an siam a, LALPA in kawngka pawn lamah chuan an dah a.
24:9 Tin, thlalera Pathian chiahlawh Mosian Israel mite tih tûra thawh bi a ruat chu LALPA tana rawn thawh tûrinJudai ram zawng zawng leh Jerusalem=ah thu a than vêl ta a.
24:10 Tichuan miliante le mipuite chu an lâwm a, an tangkate an rawn la a, an khawn zawh hma chuan bâwmah chuan an rawn dah ta ruih ruih mai a.
24:11 Tin, Levi-hoten lal puipate hnênah bâwm chu an rawn lak a, tangka tam tak an awm tih an hriat chuan, lal lehkha ziaktu leh puithiam lal ruat puipa chuan bâwm ata chu an bun chhuak a, an la a, a hmunah chuan an dah leh a. Chutiang chuan ni tin, an ti a, tangka chu tam tak an khawlkhawm ta a.
24:12 Tin, lal Jehoiada chuan LALPA in hna thawktute kutah a pe a, LALPA in siam tha tûrin lung chhertute leh themthiamte an ruai a, tin, LALPA in siam tha tûrin thir leh dara themthiamte pawh.
24:13 Tichuan thawktute chuan an bei a, an thawk tha hle mai a, Pathian in chu a ngai chiahin an siam tha a, an din nghet leh ta a.
24:14 Tin, an zawh chuan tangka la awm zawng zawng chu lal leh Jehoiada hnênah an rawn la a, chu chuan LALPA ina rawngbawl nana bungbêl te, hlanna bungbêl te, thirfian te, rangkachak leh tangkaraw bungbêl te lamin an siam a. Tichuan Jehoiada dam chhung chuan LALPA inah hâlral thiLhlan chu an hlan reng a.
24:15 Nimahsela Jehoiada chu upa tak, tarkuna damin a thi ta a. A thih chuan kum Za leh sawmthum mi a ni.
24:16 Tin, Israelte zinga Pathian chungah leh a in chungchanga thil a tih that avângin Davida khawpuiah lalte zingah an phûm a.
24:17 Tin, Jehoiada thih hnu chuan Juda mi liante chu an lo thawk a, lal hnênah dawvan an rawn kai a. Lal chuan an thu chu a lo pawm a.
24:18 Tichuan a pi leh pute Pathian LALPA in chu an hawisan a, Aserite leh milemte rawng an bâwl ta a: tin, an sualna avângin Juda te leh Jerusalem chungah thinurna a lo thleng ta a.
24:19 Nimahsela LALPA hnêna hruai leh tûrin an hnêna zâwlneite a tir a, an thiam lohzia te an hriattir a, nimahsela an beng an chi duh chuang lo.
24:20 Tin, puithiam Jehoiada fapa Zekaria chungah Pathian thlarau a lo thleng a, ani chu mipui chung lamah a ding a, an hnênah, "Pathianin heti hian a ti. 'Engati nge hmuingil theih loh phaha LALPA thupêk chu in bawhchhiat? LALPA chu in hawisan avângin ani pawhin a hawisan che u a ni,'" a ti a.
24:21 Tin, ani chu an phiar ta a, lal thupêkin LALPA biak inhung chhungah chuan lungin an deng hlum ta a.
24:22 Chutiang chuan lal Joasa chuan a pa Jehoiada khawngaihna chu hre reng lovin a fapa chu a that ta a ni. Tin, a thih dâwn chuan, "LALPAN a rawn ngaihtuah ang a, phuba a la rawn laksak ang," a ti a.
24:23 Tin, heti hi a ni a, kum a lo vei chuan Suria sipaiten an rawn bei a; Judai ram leh Jerusalem-ah an lût a, an milian zawng zawngte chu an tihboralsak a, Damaska lal hnênah an râllâk sum zawng zawngte chu an thawn ta vek mai a.
24:24 Suria sipaite chu tlemte chauh an lo thawk a ni a; an pi leh pute Pathian LALPA chu an hawisan avângin LALPAN sipai tam tak maite chu an kutah a pe a ni. Chutiang chuan Joasa chungah hremna an thlensak a ni.
24:25 Tin, an hawnsan hnu chuan (natna nasa tak tuarin an hawnsan a ni) ama mite ngeiin puithiam Jehoiada fapate thisen avâng khan an phiar a, a khum mu lai chu an that a, a thi ta a: Davida khawpuiah chuan an phûm a; nimahsela lalte thlanah an phûm ve lo.
24:26 Hengte hi amah phiartute chu an ni; Amon mi Simeathi fapa Zabada leh Moab mi Simrithi fapa Jehozabada.
24:27 Tichuan a fapate chungchâng thu te, a chunga phurrit tak lo innghah chungchâng thu te chu, ngai teh, lal chanchin hrilhfiahna buah chuan ziak a ni. Tin, a aiah a fapa Amazia chu a lal ta a.
25:1 Amazia chu a lal tantir chuan kum sâwmhnih leh kum nga mi a ni a, Jerusalem-ah kum sâwmhnih leh kum kua a lal a; a nu hming chu Jehoada ni, Jerusalem mi a ni.
25:2 LALPA mithmuhin thil tha a ti a, amaherawhchu a rilru a pe famkim lo.
25:3 Tin, heti hi a lo ni a, a ram chu a lo din ngheh chuan a pa thattu, a chiahlawhte a that a.
25:4 Amaherawhchu an fate chu a that lo va, Mosia lehkhabu, dana chuang, "Fate avângin pate an thi tûr a ni lo va, pate avângin fate an thi tûr a ni hek lo, mi tin, mahni sual avângin an thi tûr a ni," tia LALPAN thu a pêk angin a ti a.
25:5 Tin, Amazia chuan Judate chu a khâwm chiam a, Juda leh Benjamin mi zawng zawng an chhûngkaw zir zelin sâng hotute hnuaiah te, Za hotute hnuaiah te a awm tir a; tin,kum sâwmhnih achin chunglam zawng a chhiar a, fei leh phaw lek thei, ralkai chin thlan thiau mi nuaithum an awm a.
25:6 Tin, Israel rama mi, mi chak huaisen nuaikhat tangka talent zain a ruai bawk a.
25:7 Nimahsela a hnênah Pathian mi, mi pakhat a lo kal a, "Aw LALPA, Israel sipaite chu i hnênah kal ve suh su, LALPA chu Israel mite (Ephraima thlahte zawng zawng huamin) hnênah chuan a awm si lo va.
25:8 Kal pawh ni la, huai takin indonaah chuan che rawh: chuti lo chuan Pathianin hmêlma hmaah chuan a titlâwm mai ang che: Pathian chuan tanpui theihna leh tihtlâwm theihna a nei si a," a rawn ti a.
25:9 Tin, Amazian Pathian mi hnênah chuan, "A nih leh, Israel sipaite ka pêk tak talent za chu engtin nge kan tih tak ang?" a ti a. Tin, Pathian mi chuan, "LALPA chuan chu aia tam tak chu a pe thei che a ni," a ti a.
25:10 Tichuan Amazia chuan Ephraim rama atanga sipai lo kalte chu haw leh tûrin a tihrang a; chuvang chuan Judate chungah chuan an thin a rim hle mai a, thimrim engphiarin an haw leh ta a.
25:11 Tin, Amazia chuan zam lovin a mite chu a hruai chuak a, Chi Ruamah an kal a, Seira thlahte singkhat an that a.
25:12 Tin, singkhat dang chu Judaten a nungin an man a, lungpui chhipah an hruai a, lungpui chhip atang chuan an nam thla chiam mai a, an keh sawm ta rem rum mai a.
25:13 Amaherawhchu Amazian a hnêna ralkap tûra kal ve lo tûra a hawntir sipaite chuan Judai ram khua te, Samari atanga Beth-horon thlengin an lo bei a, mi sângthum an that a, râllâk sum tam tak an la a.
25:14 Tin, heti hi a ni a, Amazia chu Edom-ho thata a lo haw chuan Seira thlahteho pathiante a rawn hawn a, a pathian atân a din a, chibai a bûk a, rimtuite a halsak hlawm a.
25:15 Chuvang chuan Amazia chungah LALPA thin a alh ta a, a hnênah zâwlnei a tir a, chu mi chuan a hnênah, "I kut ata a mite pawh chhanchuak thei hlei lo hnam pathiante chu engah tehlul nge i zawn ni?" a ti a.
25:16 Tin, heti hi a ni a, a hnêna thu a sawi lai mek chuan lal chuan, "Lal rorêltuah kan siam che êm ni? Ngawi mai rawh; engah nge i nun i chan dâwn?" a ti a. Tichuan zâwlnei chuan, "Pathianin hetianga i tih avâng leh ka remruat i ngaihsan loh avângin tihboral che i rulruk tih ka hria a ni," a ti a, a ngawi ta a.
25:17 Chutichuan Juda lal Amazia chuan a remruat chu a pawm a, Israel lal Jehua fapa Jehoahaza fa Joasa hnênah, "Hawh teh, hmaichhanah i lo inen teh ang," tiin mi a tir a.
25:18 Tin, Israel lal Joasa chuan Juda lal Amazia hnênah, "Lebanon tlâng hlingin Lebanon tlanga sidar thing hnênah, "I fanu kha ka fapa nupuiah neitir teh khai, ' tiin a chah a; tin, Lebanon tlânga ramsa a lo kal a, hling chu a rawn chil thlu ta der mai a.
25:19 Nang hian, " Ngai teh, Edom chu ka hneh,' tiin i chapo a nih hi, i inah tawm hle hle mai rawh; nang leh Juda ram chawp chawpa chhiarna, i tana pawi tûr thil engah nge i chawh chhuah dâwn ni?" tiin mi a tir ve a.
25:20 Nimahsela Amazia chuan a lo ngaithla duh lo va; Edom-ho pathiante a zawn avânga Judai ram chu an hmêlmate kuta a pêk theihna tûra Pathian tih a ni a,
25:21 Chutichuan Israel lal Joasa chu a han chho va; Juda lal Amazia nen chuan Judai ram Beth-semes khuaah hmaichhanah an inen ta ngei a,
25:22 Tin, Judate chan chu Israelte ai chuan a lo chhe ta zâwk a; mi tin, mahni in lamah an tlan haw ta theuh va.
25:23 Tin, Israel lal Joasa chuan Juda lal, Ahazia fapa Jehoasa fa Amazia chu Beth-semes-ah chuan a man a, Jerusalem-ah a hruai a, Jerusalem kulh chu Ephraim kulh kawngka atanga kulh kil kawngka thlengin tawng zali zet a tichim a.
25:24 Tin, LALPA ina mi leh lal ina ro dah khawmnaa mi rangkachak leh tangkarua leh bungbêl zawng zawng a awm apiang a la a, hrenga tang tûrte nen, tin, Samari khaw lamah a haw leh ta.a
25:25 Tin, Juda lal Joasa fapa Amazia thih hnuin kum sâwm lehkum nga a la dam a.
25:26 Tichuan Amazia thiltih dangte chu a bul atanga a tawp thlengin, ngai teh, Juda lal leh Israel lalte lal lai thuziakna buah a chuang a ni lâwm ni?
25:27 Chutichuan Amazian LALPA zui a bansan veleh Jerusalem-ah chuan an phiar a, Lakis khuaah a tlan a; nimahsela Lakis khuaah chuan mi an umtir a, chutah chuan an that ta a.
25:28 Tin, a ruang chu sakawrin an phur a, a pi leh pute hnênah Juda khawpuiah an phûm ta a.
26:1 Tin, Juda mi zawng zawng chuan kum sâwm leh kum ruk mi Uzia chu an hruai a, a pa Amazia aiah lalah an siam ta a.
26:2 Ani chuan lal chu a pi leh pute hnênah a muthilh hnuah Elot khua chu a siam tha a. Judai ramah a telh leh a.
26:3 Uzia chu a lal tantirhin kum sâwm leh kum ruk mi a ni a, Jerusalem-ah kum sâwmnga leh kum hnih a lal a, a nu hming chu Jekoiliai, Jerusalem mi a ni a.
26:4 Tin, a pa Amazia thiltih ang apiang ti vein LALPA mithmuha thil tha tak a ti thin a.
26:5 Pathian inlârna hrethiam Zekaria dam chhung chuan Pathian zawng tûrin a insiam tlat a: Pathian a zawn chhûng zawng chuan Pathianin a tihmuingil zel a.
26:6 Philistia-ho rûn tûrin a thawk chuak a, Gat kulh te, Jabne kulh te, Asdod kulh te a tichim a; tin, Asdod ramah leh Philistia-ho zingahte khua a siam a.
26:7 Tin, Pathian Philistia hote lakah leh Gur-baal-a awm Arabia-ho leh Meun-ho lakahte a tanpui a.
26:8 Tin, Amon-hote chuan Uzia lakah chhiah an chawi thin a; tichuan a lo chak tak ema vangin Aigupta ram thlengin a hming a thang ta a.
26:9 Tin, Uzia chuan Jerusalem-ah Kil kawngkaah te, Ruam Kawngkaah te, kulh kawina lai kawngkaah te in sâng a sa bawk a, kulhin a hung a.
26:10 Tin, thlalerah pawh in sâng a sa a, ran tam tak a neih avângin tui te a lai chhuak thluah mai a, phai lam leh phai zawlahte pawh; tin, lo nei mite leh uain sawr mite tlâng lamah leh ram thaahte chuan a nei a, thlawhhma lam ngaina mi tak a ni.
26:11 Tin, Uzia chuan sipai indo mi, lal sipai hotu Hanania hnuaia mi, lehkha ziaktu Jeiela leh hotu Maaseia ten an ruat ang zela a pawl pâwla ralkap mi a nei bawk a.
26:12 Mi chak huaisen thiau, an chhûngkaw puipa zawng zawng chu 26,000 an ni a.
26:13 Tin, an hnuaia chuan sipai zir thiam sa thiau 307500 hmêlma laka lal tanpuitu râl bei mi tak tak an awm a.
26:14 Tin, Uzia chuan sipai zawng zawng tan phaw te, fei te, thir lukhum te, thir kawr te, thalngul te, virvawm atan lungte a buatsaih a.
26:15 Tin, Jerusalem-ah in sâng leh kulh kil tina daha thal lo kahna leh lung lian fe fea lo denna tûr, mi fingte hriat chhuah khawlte a siam a. A ming chu ram tin, ram tangah a thang ta a; a lo chak hle thlengin amaka maka tanpuiin a awm a.
26:16 Nimahsela a lo chak tak hnu chuan a rilru a lo sâng ta a, tha lo takin thil a ti a, LALPA a Pathian chungah thil a tisual ta a; mâicham rimtui hal tûrin LALPA biak inah a lût ta maia.
26:17 Tin, puithiam Azaria chuan a zui a, mi huai tak tak LALPA puithiam sawmriat an el ve a;
26:18 tin, lal Uzia chu an khap a, a hnênah, "Uzi, LALPA tana rimtui hal hi i tih tûr a ni lova, rimtui hal tûra tihhran Arona fapa puithiamte tih tûr a ni zâwk e; hmun thianghlim ata hi chhuak rawh; thil i tisual a nih hi, LALPA Pathian laka i ropuina tûr pawh a ni bawk lo," an ti a.
26:19 Chutichuan Uzia chu a thinur ta a; rimtui halna tûr mei lakna a keng a;tin, chutia puithiamte chunga a thinur lai tak chuan LALPA inah, rimtui halna bulah puithiamte hmaah chuan a chalah a lo phar chhuak ta a.
26:20 Tin, puithiam hotu Azaria leh puithiam zawng zawng chuan an han en a, ngai teh, a chalah chuan a lo phar a, chuta tang chuan an nam chuak ta thuai a: a ni, LALPAN a hrem avângin amah pawh hmanhmawh tak bawkin a chhuak ta a.
26:21 Tichuan lal Uzia chu a thih ni thlengin a lo phar ta a, a phar avângin in hrangah a awm ta a; LALPA in ata chu tihchhhuah a ni a, tichuan a fapa Jothama chu an rama mite rorêlin lal ina awptuah a awm ta a.
26:22 Tichuan Uzia thiltih dang zawng zawngte chu a bul atanga a tawp thlenga Amoza fapa zâwlnei Isaian a ziak a.
26:23 Chutichuan Uzia chu api leh a pute hnênah chuan a muhil a, lal inphûmna hmuna a pi leh a pute zingah an phûm a, "Ani zawng phar a ni si a," an ti a: tin, a fapa Jothama chu a aiah a lal ta a.
27:1 Jothama chu a lal tantirhin kum sâwmhnih leh kum nga mi a ni a, Jerusalem-ah kum sâwm leh kum ruk a lal a: a nu hming chu Jerusai, Zadoka fanu a ni.
27:2 Tin, a pa Uzia thiltih ang apiang ti vein LALPA mithmuha thil tha a ti thin a, LALPA biak inah erawh chuan a lût ve lo. Nimahsela mite chuan tha lo takin thil an la ti fo mai a.
27:3 LALPA ina kawngkhâr chhakta zâwk a siam a, tin, Ophel kulh chungah chuan in tam tak a sa bawk a.
27:4 Tin, Judai tlâng ramah khuate a siam a, ramhnuaiah inropui tak tak te, in sângte a sa bawk a.
27:5 Tin, Amona thlahte lal a do va; a hneh a. Tin, Amona thlahte chuan chu mi kum chuan tangka talent za leh buh phur sing leh barli phur singkhat an pe a. Chutiang bawk chuan Amona thlahte chuan a kum hnihna leh a kum thumnaah pawh an pe a.
27:6 Chutichuan Jothama chuan LALPA a Pathian hmaa a kawng a rêl fel avângin a lo chak ta a.
27:7 Tichuan Jothama thiltih dang zawng zawng, a râl do zawng zawngte, a awm dan zawng zawngte chu, ngai teh, Israel leh Juda lalte chanchin ziakna buah a chuang a.
27:8 A lal tantirhin kum sâwmhnih leh kum nga mi a n a, Jerusalem-ah kum sâwm leh kum ruk a lal a.
27:9 Tin, Jothama chu a pi leh a pute hnênah a muhil a, Davida khawpuiah an phûm a: tin, a fapa Ahaza chu a aiah a lal ta a.
28:1 Ahaza chu a lal tantirhin kum sâwmhnih mi a ni a; tin, Jerusalem-ah kum sâwm leh kum ruk a lal a: a pu Davida angin LALPA mithmuhah thil tha a ti ve lo va:
28:2 Israel lalte kawng a zawh zâwk a, Baala-te tan milem chhun chawpte a siam bawk a.
28:3 Hinoma fapa ruamah rimtuite a hal a. LALPAN Israela thlahte hmaa a hnawhchhuah tak hnamten thil tenawm tak an ti thin angin a fate meiah a luhtir a.
28:4 Tin, hmun sângah te, tlângah te, thing hring tin hnuaiah te a inthawi a, rimtuite a hal thin a.
28:5 Chuvângin LALPA a Pathianin Suria lal kutah a pe a; an bei a, a mite tam tak salah an hruai a, Damaska-ah an kalpui a. Tin, Israel lal kutah pêk a ni bawk a, ani chuan tam tak a that a,
28:6 Remalia fapa Pêka chuan Judai ramah nuaikhat leh singhnih ni khatah a that a, an za chuan mi huaisen theuh an ni; an pi leh pute lalpa Pathian chu an hawisan vang a ni.
28:7 Tin, Ephraim mi chhûng puipa Azrikama leh Elkana, lal dawttûr chu a that a.
28:8 Tin, Israela thlahten an unaute nuaihnih, hmeichhia te, an fapa te, an fanute salah an hruai a; râllâk tam tak an laksak bawk a, râllâk chu Samari-ah an thlen a.
28:9 Nimahsela chutah chuan LALPA zâwlnei a lo awm a, a hming chu Odeda a ni; Samaria lo kal tûr sipaite chu a va hmuak a, an hnênah, "Ngai teh u, LALPA in pi leh pute Pathian chu Judate chungah a thinur a, in kutah a pe che u a ni a, thinrima in thahna chuan van a han tawng ta a.
28:10 Tin, Juda leh Jerusalem mite chu bawihnu le bawihpaa siam in tum a: nimahsela nangni ngei pawh hian LALPA in Pathian chungah in tisual ve a ni lâwm ni?
28:11 Chuvângin ka thu hi pawm ula, in unau sala in mante hi hawntir leh rawh u, LALPA thinurna nasa tak mai chu in chungah a awm a ni," a ti a.
28:12 Tichuan Ephraim-ho hotu thenkhat, Johanana fapa Azaria te, Mesilemotha fapa Berekia te, Saluma fapa Jehizkia te, Haldaia fapa Amasa te chuan indona atanga lo hawte chu an lo khalh ve bawk a,
28:13 an hnênah, "Salte chu in rawn hruai lût tûr a ni lo; kan sual leh kan bawhchhiatna belhchhahin LALPA chungah bawhchhiatna min thlensak dâwn a ni; kan sualna chu a nasa hle si a, Israel mite chunga thinurna nasa tak a awm a ni," an lo ti a.
28:14 Chutichuan sipaite chuan mi liante leh mipi hmaah chuan salte leh râllâk sumte chu an hnutchhiah ta a.
28:15 Tin, an hming lam takhote chu an lo tho va, salte chu an hruai a, râllâk thil chuanin saruaka awm zawngte chu silhfên an ban a, an tuam a, pheikhawkte an buntir a, ei tûr leh in tûr an pe a, hriakte an thih a, a chhia thate zawng zawng chu sabengtungah an chuantir a, Tum khua Jerikova an unaute hnênah an kaltir ta a; tin anni chu Samari-ah an haw leh ta a.
28:16 Chu mi lai chuan lal Ahaza chuan Suria lalte tanpuia sawm tûrin mi a tir a;
28:17 Edom-ho chuan Juda-ho chu an han bei a, salah te an rawn man leh avângin.
28:18 Tin, Philistia-hote pawhin phai lamkhuate leh Juda Chhim te an rawn la a, Beth-semes te, Aijalon te, Gederot te, Soko te a khawperte nen, tin, Timna leh a khawper te, Gimzo pawh a khawperte nen an la a, chungah chuan an awm a.
28:19 Juda lal Ahaza khan Judate dik lo takin a timualpho fo va, LALPA chungah thil sual nasa tak a tih avâng khan LALPAN Judate chu a titlawm a ni.
28:20 Tin, Suria lal Tilgath-pilnesera a hnênah a kal a, tihchak ahnekin a timangang zawk a.
28:21 Ahaza chuan LALPA in leh lal in leh mi lian ina mi thilte a la a, Suria lal a pe a; nimahsela a sawt chuang si lo.
28:22 A mangan lai takte pawh chuan he lal Ahaza hian LALPA chungah thil a la tisual deuh deuh ta mai a.
28:23 Amah beitu Damaska-ho pathian hnêna te a inthawi a; "Suria lalte pathian chuan anmahni a puih avângin mi puih ve theih nân an hnênah ka inthawi dâwn a ni," te a ti a. Nimahsela amah leh Israel mi zawng zawng chhiatna a ni si a.
28:24 Tin, Ahaza chuan Pathian ina bungbêlte chu a khâwm vek a, Pathian ina bungbêlte chu a tisawm vek a, LALPA in kawngkarte chu a khar tlat a; tin, Jerusalem kil tinah mâicham a siam a.
28:25 Tin, Juda khaw tam takah chuan Pathian dangte tan rimtui hal nân hmun sângte a siam a, LALPA a pi leh pute Pathian a tithinur a.
28:26 A thiltih dang zawng zawng leh a awm dan zawng zawng a bul atanga a tawp thlengin, ngai teh, Judate leh Israelte lalte chanchin buah a chuang a.
28:27 Tin, Ahaza chu api leh a pute hnênah a muhil a, Jerusalem khawpuiah chuan an phûm a; Israel lalte thlanah chuan an da lo a ni: tin, a fapa Hezekia chu a aiah a lal ta a.
29:1 Hezekia chu kum sâwmhnih leh kum nga mi a nihin a lal tan a; Jerusalem-ah kum sâwmhnih leh kum kua a lal a: a nu hming chu Abijai, Zekaria fanu a ni a.
29:2 Tin, a pu Davida thiltih apiang ti vein LALPA mithmuhah thil tha a ti thin a.
29:3 Ani chuan a lal tan kum thla khatnaah LALPA in kawngkhârte chu a hawng a, a chei tha a.
29:4 Puithiamte leh Levi-hote a hruai lût a, chhak lampang hmun zau laiah a hruai kkawm a,
29:5 an hnênah, "Nangni Levi hote u, ka thu hi ngaithla rawh u; nangmahni intithianghlim phawt ula, tin, LALPA, in pi leh pute Pathian in hi tithianghlim ula, hmun thianghlim - ata bawlhhlawhte hi paih chhuak rawh u.
29:6 Kan pi leh pute chuan thil an lo tisual ta a, LALPA kan Pathian mithmuha thil tha lo chu an lo ti a, an lo hawisan a, LALPA awmna chu an hawisan a, an lo hnuchhawn ta a.
29:7 Hulhliap kawngkhârte chu an khar a, khawnvarte chu an timit a, Israelte Pathian hmun thianghlimah chuan rimtuite an hal lova, hâlral thilhlante an hlân lo bawk a.
29:8 Chuvâng chuan LALPA thinurna chu Judate leh Jerusalemte chungah a awm a, in mita in hmuh ang hian, ram tin, ram tanga tei tei tûr leh mak tih atân leh nuihzatbur atân a lo siam ta a ni.
29:9 Ngai teh u, kan pi le pute chu khandaiha tihtlâwmin an lo awm a, kan fanu leh kan fapte, kan nupuite chu, chung avâng chuan salah an lo awm a.
29:10 Ngai te u, a thinurna nasa tak chu a kian theih nân LALPA Israelte Pathian hnêna thuthlun ka tum a ni.
29:11 Ka naute u, ngur chuai suh u, LALPA chuan a rawngbawltu in ni a, a hmaa a rawngbawla awm tûr le rimtui haltuah a thlang tawh che u a ni," a ti a.
29:12 Chutichuan Levi mi Amasaia fapa Mahata te, Kohat mi Azaria fapa Joela te; Meraria fapate zinga Abdia fapa Kisa te, Jahalelela fapa Azaria te, Gersonmi Zima fapa Hova te, Jova fapa Edena te; Zima fapa Jova te, Jova fapa Edena te;
29:13 Elizaphana fapate zinga mi Simria leh Jeuela te; Asapha fapate zinga mi Zekaria leh Matânia te;
29:14 Hemana fapate zinga mi Jehuela leh Simeia te; Jeduthuna fapate zinga mi Semaia le Uziela te chu an thawk chhuak a.
29:15 An unaute an ko khawm a, an intithianghlim a, LAPA thua lal thupêk anga LALPA in tifai tûrin an lût a.
29:16 Tin, puithiamte chu a tifai tûrin LALPA in chhung ril lamah an lût a, LALPA biak ina thil bawlhlawh an hmuh zawng zawng chu LALPA in kawtah an la chuak a. Tin, Levi-hovin an la a, Kidron luiah an kalpui a.
29:17 Thla khatna ni khat niin an bei tan a, chu mi thla ni riat niin LALPA hulliap an bei tleng a; tichuan ni riatah LALPA in chu an tithianghlim a; thla khatna, ni sawm leh ni ruk niin an zo vek a.
29:18 Chutichuan lal Hezekia hnênah lal ina an lût a, "LALPA in chu kan tifai zo ta vek a, hâlral thillan hlanna mâicham te, chu mia bungbêl zawng zawng te, chhang chhiahna dawhkan te, chu mia hmanrua zawng zawngte pawh.
29:19 Tin, lal Ahazan a lal laia thil a tihsual a, a thehthang bo bungbêl zawng zawngte pawh kan din leh vek a, kan titianghlim bawk a; tin, ngai teh, LALPA mâicham hma lamah a awm e," a ti a.
29:20 Chutichuan lal Hezekia chu zing takah a tho va, khuaa mi lianhote chu a ko khâwm a, LALPA inah chuan an chho va.
29:21 Tin, ram leh hmun thianghlim leh Juda-hote tana sual thawina tûr bâwngpa pasarih leh berâmpa pasarih leh berâm no pasarih leh kelpa pasarih an kai chho va. Tin, Arona fapa puithiamte chu LALPA maichâma hlân tûrin thu a pe a.
29:22 Chutichuan bâwngpate chu an talh a; tin, puithiamte chuan thisen chu an la a, mâicham chu an theh a, tin, berâmpate pawh chu an talh a, a thisen chuan mâicham chu an theh a, tin, berâm note pawh chu an talh a, a thisen chuan mâicham chu an theh a.
29:23 Tin, kelpate chu sual thawi nân lal leh mipuiho kiangah chuan an rawn kai hnai a, an chungah chuan an kut an nghat a;
29:24 tin, puithiamte chuan an talh a, an thisen chuan Israel mi zawng zawng tana remna siam nân maichâmah sual thawina an hlân a; Israel mi zawng zawng tan hâlral thilhlan leh sual thawina siam tûrin lal chuan thu a pe a.
29:25 Tin, Davida leh lal zâwlnei Gada leh zâwlnei Nathana thupêk angin LALPA inah chuan Levi-ho chu dârbenthek te, perhkhuar te, tingtangte tum tum tûrin a dah a; thupêk chu a zâwlnei te hmanga LALPA pêk a ni si a.
29:26 Tin, Levi-ho chu Davida siam thil tumrik mi nen an ding a, puithiamte chu tawtawrâwt nen.
29:27 Tin, Hezekia chuan maichâma hâlral thilhlan hlân tûr chuan thu a pe a. Tin, hâlral thilhlan an han hlân tan chuan LALPA hla chu tawtawrâwt leh Israel lal Davida siam thil tum rik nen an sa tawn bawk a.
29:28 Tin, mipuite chuan Pathian chibai an bûk a, hla satute chuan hla an sa a, tawtawrâwt hamtute chuan an ham a, hâlral thilhlan hlân zawh hma loh chuan chutiang chuan an ti reng a.
29:29 Tin, thil hlân an hlân zawh chuan lal leh a hnêna awm ve zawng zawngte chuan kunin Pathian chibai an bûk a.
29:30 Tin, lal Hezekia leh mi liante chuan Levi-hote chu Davida leh zâwlnei Asapaha phuah fakna hla sa tûrin thu an pe a. Tin, hlim takin fakna hla an sa a, an kun a, Pathian chibai an bûk a.
29:31 Chutichuan Hezekia chuan, "LALPA tan in intithianghlim ta a, lo hnai ula, LALPA inah inthawina leh lâwm thu sawina thilhlan rawn hlân rawh u khai," a ti a. Tin mipuite chuan inthawina te, lâwm thu sawina thilhlante an rawn hlân a: a duh apiangin hâlral thillan an rawn hlan a.
29:32 Tin, mipuiin hâlral thilhlan an rawn hlân zat chu bâwngpa sawmsarih leh berampa za leh berâm no zahnih a ni: heng zawng zawng hi LALPA tana hâlral thilhlan vek a ni.
29:33 Thilhlan zawng zawng chu bâwngpa zaruk, berâmpa sângthum a ni.
29:34 Amaherawhchu puithiam an tlem lutuk a, hâlral thilhlan chu an lip seng lo va; chuvângin an unaute Levi-hovin an peih hma chuan puithiamte an intithianghlim thlengin an puibâwm a: (Levi-hote chu puithiamhote ai mahin intihthianghlim thuah an khermei zâwk mah si a)
29:35 Tin, hâlral thilhlante chu a tam êm a, hâlral thilhlan tin atâna remna thilhlan thau te, in tûr thilhlan atân te pawh a tam êm êm bawk a. Chutichuan LALPA in rawngbawl dan an tifel a.
29:36 Mipuite tana Pathianin a buatsaih thil avâng chuan Hezekia leh mi zawng zawng hhu an lâwm êm êm a; rin loh taka thil lo awm thut a ni lehnghal si a.
30:1 Tin, Hezekia chuan Israel ram leh Judai ram zawng zawngah mi a tir a, Ephraim ram leh Manase ramahte pawh LALPA Israelte Pathian tana kalhlen kut nei tûra Jerusalem-a LALPA ina lokal tûrin lehkha a thawn bawk a.
30:2 Lal leh a miliante leh Jerusalem-a mipui zawng zawngte chuan thla hnihnaa, kalhlen kut neih an rawt a.
30:3 Chumi lai chuan puithiam intithianghlimte an la tam tawk lo va, Jerusalem-a mipui an la pun khâwm loh avângin an la kut thei lo va.
30:4 An thil ruat chu lal leh mipuiho ngaihin a dik a.
30:5 Chutichuan Israel ram zawng zawng Beer-seba atanga Dan thlengin LALPA Israelte Pathian tana kalhlen kut nei tûra Jerusalem-a lo kal tûra puan tûrin thu an tinghet ta a: a dan ang tak chuan chutianga tam chuan an la ti ngai lo va.
30:6 Chutichuan lehkha tlanpuitute chu lal leh a mi lianhote lehkha kengin, Israel leh Judai ram zawng zawnga kal tûrin lal thupêk angin an chhuak a, "Nangni Israela thlahte u, Suria lalte kut ata chhuaka la dam chhunte lam chu a lo hawi leh theih nân LALPA, Abrahama te, Isaaka te, Israela te Pathian lam chu rawn hawi leh rawh u.
30:7 Nangni zawng in pi le pute leh in unaute, LALPA an pi leh pute Pathian chunga thil tisuala an awm a, tiau tûra a thlahthlam tak in hmuhte ang chuan awm ve suh u.
30:8 In pi leh pute ang khan tihmawh ve tawh suh ula, LALPA hnênah intulut zâwk ula, kumkhua atâna a tihthianghlim, a hmun thianghlimah chuan lo lût ula, LALPA in Pathian rawng chu bâwl rawh u, tichuan a thinurna nasa tak chu in lak ata a kiantir dâwn nia.
30:9 LALPA lam in lo hawi leh zawngin in unaute leh in fate chu sala mantute chuan an khawngaih ang a, he ramah hian an lo kal leh dâwn nia: LALPA in Pathian chu ngilnei tak leh zahngai thei tak a ni si a, a lam in hawi phawt chuan a hawisan lo vang che u," tiin.
30:10 Chutichuan lehkha tlanpuitute chu khaw tinah Ephraim leh Manase ram zawng zawngah Zebulun thlengin an kal a: nimahsela anni chuan an lo nuihzatbur a, an lo hmusit a.
30:11 Amaherawhchu Aser-ho le Manase-ho leh Zebulun-ho thenkhatin an bengkhawn a, Jerusalem-ah chuan an lo kal a.
30:12 Judai ramte phei chu LALPA thua lal leh milianhote thupek chu zawm tûrin Pathianin rilru hmun khat a puttir a.
30:13 Tichuan thla hnihnaah chuan chhang dawidim telh loh kut nei tûrin mi tam tak Jerusalem-ah chuan an lo pung khâwm chiam a, an tam ngei mai.
30:14 Tin, an tho va, Jerusalem-a maichâmte chu an la a, tin, rimtui halna maichâmte pawh an la a, Kidron luiah an paih a.
30:15 Tichuan thla hnihna ni sawm leh ni li ni chuan kalhlen kutna chu an talh a; tin, puithiamte leh Levi-ho chu an inzahpui a, an intithianghlim a, hâlral thilhlan chu LALPA inah an la lût a
30:16 Tin, Pathian mi Mosia dan ang takin an hmun theuhvah an ding a; tin, puithiamte chuan Levi-ho atanga an dâwn thisen chu an theh a.
30:17 Mipui zingah chuan intithianghlim lo an tam si a; chuvângin LALPA tana tithianghlim tûrin a thianghlim lo apiangte puala Levi-hote chuan kalhlen kutna an thlah a.
30:18 18-19, Ephraim mite, Manase mi te, Isakar mi te, Zeulun mite tam tak achu an intithianghlim lo na a, dan lo angin kalhlen kutna chu an ei ve a. Hezekian, "Tupawh an thinlunga Pathian LALPA, an pi leh pute Pathian zawngtu apiangte chu hmun thianghlim dan ang takin intithianghlim lo mah sela, lalpa ngilnei taka chuan ngaidam theuh rawh se," tiin a tawngtaisak a.
30:19 18-19, Ephraim mite, Manase mi te, Isakar mi te, Zeulun mite tam tak achu an intithianghlim lo na a, dan lo angin kalhlen kutna chu an ei ve a. Hezekian, "Tupawh an thinlunga Pathian LALPA, an pi leh pute Pathian zawngtu apiangte chu hmun thianghlim dan ang takin intithianghlim lo mah sela, lalpa ngilnei taka chuan ngaidam theuh rawh se," tiin a tawngtaisak a.
30:20 Tin, LALPAN Hezekia tawngtaina chu a ngaithla a, mipuite chu a tidam ta a.
30:21 Tin, Israel mi Jerusalem-a awmte chuan chhang dawidim telh loh kut chu hlim takin ni sarih an hmang a; tin, Levi-ho leh puithiam ho chuan tingtang ring tak nena LALPA chawimawia hla sain ni tin, LALPA an fak a.
30:22 Tin, Hezekia chuan thiam tak maia LALPA mawi taka faktu Levi-hote chu a lo thlamuan a. chutichuan LALPA an pi leh pute Pathian hnêna thupha chawiin remna thilhlante hlanin ni sarih chhung chu kut ruai an theh tumtla a.
30:23 Tin, mipui chuan ni sarih dang kut leh an rawt a; tichuan ni sarih dang hlim takin an kut leh a.
30:24 Tin, Juda lal Jezekia chuan mipuite chu bâwngpa sângkhat leh berâm sângsarih talh atân a pe a; milianhote pawhin mipuite chu bâwngpa sângkhat leh berâm singkhat an pe bawk a; puithiam tam takte an intithianghlim a.
30:25 Tichuan Juda mipui zawng zawng chu puithiamte nen Levi-hote nen, Israel ram atanga mipui lo kal zawng zawngte leh hnam dang Israel ram atanga lo kal Judai rama awmte chu an hlim êm êm mai a.
30:26 Chutichuan hlimna ropui tak Jerusalem-ah chuan a awm a: Israel lal Davida fapa Solomona china chutiang rêng rêng chu Jerusalem-ah a la awm ngai lo.
30:27 Chutichuan puithiam Levi-hote chu an tho va, mipuite chu mal an sawm a, an aw chu ngaihthlâkin a awm a, an tawngtaina chuan a awmna thianghlim vân chu a thleng ta a.
31:1 Tin, chung zawng zawng chu an tih zawh chuan chuta Israel mi awm zawng zawng chuan Judai ram zawng zawng leh Benjamin ram leh Ephraim leh Manase rama mi lungphunte an tisawm a, Aserite an kit a, hmun sângte leh maichâmte an tihchim vek hma loh chuan Judairam khuaahte an kal zel a. Tin Israela thlahte zawng zawng chu an ramah mahni khaw lam theuhvah an haw leh ta a.
31:2 Tin, Hezekia chuan puithiamte leh Levi-hote chu an pâwl dan ang zelin mi tin, puithiamte leh Levi-hoten an tlawh theuh tûrin, hâlral thilhlan leh remna thilhlan hlantu atân te, rawngbawltu atân te, lâwm thu sawitu leh LALPA awmna kawngkaa vêngtu tûrte pawl a siam sak hlawm a.
31:3 Tin, LALPA dana chuang angin zing lam leh tlai lam hâlral thilhlan atân te, chawlhni leh thla thar leh hunbi nei kut atân te lal chanvo atân ran a ruat bawk a.
31:4 Tin, Jerusalem-a mipuite chu LALPA dana an intihchak nân puithiamte leh Levi-hote chanpual pe tûrin thu a pe bawk a.
31:5 Tin, thupêk chu a han darh veleh chuan Israela thlahte chuan an bu te,uain te,hriak te, khawizu te, an lova thil haw hmasa berte an rawn pe chiam a; tin, an engkim sâwma pakhat an rawn pe chiam bawk a.
31:6 Tin, Israela thlahte leh Juda thlahte, Juda khuatea awmho chuan an bawng leh berâm sâwma pakhat te, LALPA an Pathian puala an voh sâwma pakhat te an rawn pe a, an dah khâwm teuh mai a.
31:7 Thla thumnaah an dah khâwm tan a, thla sarihnaa an dah khâwm zo va.
31:8 Tin, Jezekia leh an milianten an han hmuh chuan LALPA leh a mi Israelte chu an fak a.
31:9 Chutichuan Hezekian an thil dah khâwm chungchang thu chu puithiamho leh Levi-hote chu a zâwt a.
31:10 Tin, Zadok mi, puithiam hotu Azarian a chang a, "Miten LALPA ina thilpek an rawn lak tir atangin kan ei zel a, kan khawpkham hle a, a la awm rui mai a; LALPAN a mite mal a sawm zel a, he mi la awm rui hi kan ei bang a nih hi," a ti a.
31:11 Chutichuan Hezekian LALPA inah chuan pindante siam tûrin thu a pe a; tichuan an siam ta a.
31:12 Tin, thilpêk te, sâwma pakhat te, Pathian pualte chu rinawm takin an thiar lût a: tin, a hotu chu Levi mi Konania a ni a, a unau Simeia chu a dawttu a ni a.
31:13 Tin, Konania leh a unau Simeia hnuaiah chuan lal Jezekia leh Pathian ina hotu Azaria ruatin endiktu Jehiela te, Azria te, Nahatha te, Asahela te, Jerimotha te, Jozabada te, Eliela te, Ismakia te, Mahatha te, Benaia te an awm a.
31:14 Tin, Levi mi Imna fapa Korea, chhak lam kawngkhâr vêngtu chu Pathian hnêna mahni duh thua thilpek enkawltu leh LALPA tan thilpek leh thil thianghlim semtu a ni a.
31:15 Tin, ama hnuaiah, puithiam awmna khuaahte chuan Edena te, Miniamina te, Jesua te, Semaia te, Amaria te, Sekinia te, an awm leh a; chung chuan an unaute chu a pâwl pâwlin a lian leh a te te hnênah an chanvo tûr an sem bawk a:
31:16 thlahtua ngaih mipa kum thum achin chung lam, ni tina LALPA ina thawh tûr mamawh nei an pâwl dan ang zela kal thinte tiam lovin,
31:17 Puithiamte hna inchhawk dan tûr chu a chi chiin an ruat a, Levia chite erawh chu kum sâwmhnih achin chunglam a pâwl pâwlin a ruat a.
31:18 Puithiamte chu an nupui te, an fapa te, a fanu te leh an chhûngkuaa mi dangte nen rinawm taka an intihthianghlim reng avângin chhinchhiah vek an ni a.
31:19 Tin, Arona thlah, khaw tin, daifema awm puithiamte leh Levi-ho thlahte ziaknaa chuang apiangte chanvo pe tûrin mi ruat bik an awm.
31:20 Tin, chutiang chuan Judai ram zawng zawngah Jezekian a ti a. LALPA a Pathian mithmuha tha leh dik leh rinawm thil a ti thin a,
31:21 Pathian ina rawngbawl lam thuah te, dan lam thuah te, thupêk lam thuah te, a Pathian zawn thuah te a tih piangah a rilru zawng zawngin a ti a, a hmuingil ta zel a.
32:1 Chutianga rinawm taka thil an tih hnu chuan Asuria lal Senakeriba a lo thawk a, Judai ramah chuan a lo lût a, kulh nei khuate chu a rawn hual a, lak a rawn tum a.
32:2 Tin, Senakeriba a lo thawk a, Jerusalem rawn bei a tum tih Jezekian a hriat chuan,
32:3 khaw pawn lama tuite chu tihchah tûrin a mi liante leh a mi chakte chu a rawn a; tichuan an tanpui a.
32:4 Chutichuan mi tam tak an pung khâwm a, tui zawng zawg leh ram chunga luang tlâng luite chu an dang chat a, "Asuria lalte chu an lo luh a, tui tam tak engah nge an rawn neih tehlul ang," an ti a.
32:5 Tin, Benjamina thlahte chuan chutiang chuan an ti a, lamho zinga mi anmahni zat theuh nupuiah an man a, an kal bopui ta a: tin, an ram lamah chuan an hawng a, khawpui chu an chei leh a, chutah chuan an awm ta a.
32:6 Tin, indonaa mipui hotute a siam a, khawpui kawngkhâr hmun zau laiah a ko khâwm a,
32:7 "Chak takin, huai takin awm ula, Asuria lal leh a hote mipui chu hlau suh ula, zam hek suh u, kan lama tang chu a lama tang aiin a chak zâwk si a:
32:8 a lama tang chu tisa sipai an ni a, min pui tûr leh min dosak tûra kan lama tang erawh chu LALPA kan Pathian a ni si a," tiin thlamuanna thu a sawi a. Tin, mipui chuan Juda lal Jezekia thu sawite chu an ring a.
32:9 Chu mi hnuah chuan Asuria lal Senakeriba chuan (amah leh a sipaite chu Lakis-ah an awm a) Juda lal Jezekia leh Jerusalem-a Juda mi zawng zawngte hnênah chuan,
32:10 "Asuria lal Senakeriba chuan heti hian a ti,'Jerusalem lak chu eng nge ni in han rih lohna?
32:11 Hezekia chuan, LALPA kan Pathianin Asuria lal kut ata min chhanchuak ang, tiin riltam leh tuihala in thihna mai tûrin a thlem che u a ni lâwm ni?
32:12 Hezekia bawk hi a ni lâwm ni, a hmun sângte leh a maichâmte tichim a, Juda mi leh Jerusalem-a mite hnêna, Mâicham pakhatah Pathian in bia ang a, rimtui in hal ang, tia thu petu kha?
32:13 Kei leh ka puten ram tin, hnam tin, chunga kan thiltih te kha in hre lo vem ni? Eng hnam pathian mahin ka kut ata an ram chu an humsak thei lo a ni lâwm ni?
32:14 Tu hnam pathian nge ka puten an tihboral ka kut ata an mite chhanchuak thei awm a, nangni Pathian pawhin ka kut ata a han chhanchhuah theih bikna tûr che u?
32:15 Chuvângin Hezekia chuan bum che u suh sela, chutiang chuan thlem che u suh sela,amah chu ring suh u; eng hnam pathian leh eng ram pathian mah an mite ka kut ata leh ka pute kut ata chhanchuak thei an awm lo va; engtin nge in Pathian chuan ka kut ata a chhanchhuah theih bik tehlul ang che u?'" tiin Jerusalem-ah a mite a tir a.
32:16 Tin, a mite chuan chu aia nasa chuan LALPA Pathian leh a chhiahlawh Hezekia chungchang thu a tha lo lamin an sawi a.
32:17 Tin, Israelte LALPA Pathian chawk thinurzawng leh a sawi chhe zawngin lehkha a ziak bawk a, "Ram tin, hnam tin, pathianten ka kut ata an mite an chhanchhuak thei lo ang bawkin Hezekia Pathian pawhin ka kut ata a mite a chhanchhuak tawp lo vang," tiin.
32:18 Tin, khua chu an lak theih nân a rap tûr leh timangang tûrin Jerusalem-a kulha awmte chu Juda tawngin ring takin an au khum a.
32:19 Jerusalem Pathian chu mihring kuta siam, khawvel pathian ang lek fangin an sawi a.
32:20 Chutichuan lal Hezekia leh Amoza fapa zâwlnei Isaia chuan chu mi avâng chuan an tawngtai a, vâna mi an au va.
32:21 Tin, LALPAN vântirhkoh a tir a, chu chuan Asuria lal riahhmuna mi chak huaisen zawng zawng te, hma hruaitu hotute chu a tihlum a. Tichuan zak tak hmêl puin a ram lamah a haw leh ta a. Tin, a pathian ina a va kal chu ama rila rahte ngei khandaihin an lo tihlum ta a.
32:22 Chutiang chuan LALPAN Hezekia leh Jerusalem-a mite chu Asuria lal Senakeriba kut ata leh mi dang zawng zawng kut ata chu a chanhim a, an vela mite laka a veng a.
32:23 Tin, mi tam takin Jerusalem-ah LALPA tan thilpek an rawn la a, thil hlu tak takte Juda lal Hezekia chu an rawn pe a chuta tang chuan hnam tin, mithmuhah chawimawiin a awm ta a.
32:24 Chung lai chuan Hezekia chu thih ngamin a na a, LALPA hnêna a tawngtai a; tin, a lo chhang a, chhinchiahna a pe a.
32:25 Nimahsela Hezekia chuan a tana tha tûra tih ang chuan a ti lo va, a rilru a lo chapo tak avângin: chuvângin a chungah leh Judate leh Jerusalem chungah thinurna a lo thleng ta a.
32:26 Amaherawhchu Hezekia chuan a rilru chapona chu inchhirin a inngaitlâwm leh a, amah leh Jerusalem-a mite nen; tichuan Jezekia dam chhung chuan LALPA thinurna an chungah a lo thleng ta lo va.
32:27 Tin, Hezekia chuan sum leh pai a lo ngah a, a lo ropui ta hle mai a; tangkarua te, rangkachak te, lunghlu te, rimtui te, phaw te leh bungbêl tha tak tak dah khawmna in a sa a:
32:28 buh te, uain te, hriak te dah khawmna in pawh a sa bawk a, tin, ran tinreng dahna leh berâm huangte a siam a.
32:29 Tin, khuate pawh a siam bawk a, berâm rual leh bawng rual a ngah êm êm mai a; Pathianin neinung takin a siam a.
32:30 Hezekia bawk hian Gihon lui tui chhakta zâwk a tiping a, Davida khaw thlang lampangah a luan thlaktir bawk a. Tichuan Jezekia chu a thiltih zawng zawngah chuan a hmuingil zel a.
32:31 Babulon mi lianten palaia an tirha a rama thil mak an zawh thuah chuan a rilrua awm zawng zawng a hriat thei nân Pathianin thlahthlamin a fiah a.
32:32 Hezekia thiltih dang zawng zawng te, a thiltih that te chu, ngai teh, Amoza fapa zâwlnei Isaia inlârna bu, Juda lal leh Israel lalte chanchin buah a chuang a.
32:33 Tin, Hezekia chu a pi leh pute hnênah a muhil a, Davida fapate thlan hmun chhohnaah an phûm a; Judate zawng zawng leh Jerusalem-a mite chuan a thih ni chuan ropui takin an râl a. Tin, a fapa Manasea chu a aiah a lal ta a.
33:1 Manasea chu a lal tantirhin kum sâwm leh kum hnih a ni a; Jerusalem-ah kum sâwmnga leh kum nga a lal a.
33:2 Tin, LALPA mithmuhah thil tha lo, Israela thlahte hmaa LALPAN a hnawhchhuah Pathian hre lo hnamten thil tenawm tak an tih ang chu a ti ve thin a.
33:3 A pa Hezekian a tihchim hnu hmun sângte a din tha a, Baala te tan mâicham a din a, Aseri lemte a siam a, vâna awm zawng zawng khi a bia a, an rawng te a bâwl a.
33:4 Tin, "Jerusalem-ah kumkhuain ka hming a awm ang," LALPAN a tihna LALPA inah chuan maichâmte a siam a.
33:5 LALPA in hungchhung kawtlai pahnihah chuan vâna awm zawng zawng tan maichâmte a siam a.
33:6 Hinoma fapa ruamah meiah a fate chu a luhtir a; aiente a ching a, dawite a hmang a, ramhuai aienthiam zawlte leh dawithiamte a ruai thin a; LALPA tithinur tûrin a mithmuha thil tha lo a ti thin a.
33:7 7-8, Tin, Pathianin Davida leh a fapa Solomona hnêna, "He in leh Jerusalem khua, Israel chi zawng zawng zinga ka thlanah hian ka hming chu kumkhuain ka awmtir ang a; thu ka pêk zawng zawng leh dan zawng zawng te, thu ruat te, thiltih tûr te Mosia hmanga ka pêkte kha an zawm phawt chuan an pi leh pute ka pêk tawh ram ata chu Israel-hote ke chu ka pen chhuahtir tawh lo vang," a lo tih tawhna Pathian inah chuan ama siam, milem siam chawp a dah a.
33:8 7-8, Tin, Pathianin Davida leh a fapa Solomona hnêna, "He in leh Jerusalem khua, Israel chi zawng zawng zinga ka thlanah hian ka hming chu kumkhuain ka awmtir ang a; thu ka pêk zawng zawng leh dan zawng zawng te, thu ruat te, thiltih tûr te Mosia hmanga ka pêkte kha an zawm phawt chuan an pi leh pute ka pêk tawh ram ata chu Israel-hote ke chu ka pen chhuahtir tawh lo vang," a lo tih tawhna Pathian inah chuan ama siam, milem siam chawp a dah a.
33:9 Tin, Manasea chuan Judate leh Jerusalem-a mite chu thil a tihsualtir a; tichuan LALPAN Israelte hmaa a tihboral tak hnamte ai mahin thil an tisual zâwk a.
33:10 Tin, LALPAN Manasea leh a mite hnênah thu a sawi thin a; nimahsela an ngaihsak lo va.
33:11 Chuvang chuan LALPAN Asuria sipai hotute a tir a, Manasea chu khaidiatin an hling a, kawl an buntir a, Babulonah an kalpui ta a.
33:12 Tin, mangang taka a awm lai chuan LALPA a Pathian chu a zawng a, a pi leh pute Pathian hmaah chuan nasa takin a intihnuai a.
33:13 A hnênah a tawngtai a, khawngaih a hlawh a, a dilna chu a ngaihthlâksak a, Jerusalem-ah a ramah chuan a hruai leh ta a. Tichuan Manasea chuan LALPA chu Pathian a nih a hre ta a.
33:14 Tin, chu mi hnuah chuan Davida khaw pawn lamah Gihon thlang lampang ruama sângha kawngkhâr luhna thlengin kulh a siam a, Ophel hualvelin sâng takin a din a: tin, Juda khua kulh nei zawng zawngah chuan hotu huaisen tak takte a dah a.
33:15 Tin, ram dang pathiante leh milem te, LALPA in ata chu a thehthang bo va, tin, LALPA in tlâng leh Jerusalem-a mâicham a siam zawng anwgte chu khua ata an paih vek a.
33:16 Tin, LALPA mâicham a siam a, remna thilhlan inthawina te, lâwm thu sawina te ahlan a, Judate chu LALPA Israelte Pathian rawng bâwl tûrin thu a pe a.
33:17 Mipuite chu hmun sângahte chuan an la inthawi reng a, amerawhchu LALPA an Pathian hnênah chauh a ni ta zâwk a.
33:18 Manasea chanchin dang zawng zawngte, a Pathian hnêna a tawngtai thu te, LALPA Israelte Pathian hminga zâwlneiin a hnêna thu a sawi thu te chu ngai teh, Israel lalte chanchin zingah a chuang a.
33:19 A tawngtaina te leh Pathian a khawngaihna leh a intihhnuai hmaa a sualna zawng zawng leh hmun sâng a siam a, Aseri leh milem siam chawp a dinna hmun zawng zawngte pawh, ngai teh, Hozaia chanchin ziakna buah a chuang vek a ni.
33:20 Chutichuan Mansea chu a pi leh pute hnenah a muhil a, ama inah an phûm a; tin, a fapa Amona chu a aiah a lal ta a.
33:21 Amona chu a lal tantirhin kum sâwmhnih leh kum hnih a ni a; Jerusalem-ah kum hnih a lal a.
33:22 A pa Manasea tih ang bawkin LALPA mithmuhah thil tha lo a ti a; a pa Manasean a siam milem siam chawp zawng zawng a henah Amona chu a inthawi a, an rawn a bâwl a.
33:23 A pa Manasea intihhnuai ang khan LALPA hmaah a intihnuai ve lo va. Amona hi chu a sual zual sauh sauh mai a ni.
33:24 Tin, a chhiahlawhten an phiar a, ama inah an tihlum a.
33:25 Nimahsela Amona phiartu zawng zawngte chu mipuiin an that ve vek a; tin, mipuite chuan a fapa Josia chu a aiah lalah an siam ta a.
34:1 Josia chu a lal tantirhin kum riat mi a ni a; Jerusalem-ah kum sâwmthum leh kum khat a lal a.
34:2 Tin, LALPA mithmuhah thil tha a ti thin a, a pu Davida kawngte a zawh a, ding lamah emaw vei lamah emaw a pensan lo va.
34:3 Kum riat a lal kum, naupang tak a la nih lai atang rengin a pu Davida Pathian a zawng tan a; tin, kum sâwm leh kum hnih a lal kumin Judai ram leh Jerusalem-a hmun sâng te, Aseri te, mi lem siam chawp te, milem chhun chawpte a thian fai a.
34:4 Baala maichâmte chu a mithmuhah an tichim a; tin, chung aia sânga ni lemte chu a kit a; tin, Aseri te, milem siam chawp te, milem chhun chawpte chu a tisawm dep a, an hnêna inthawitute thlan chungah a theh darh vek a.
34:5 Puithiamte ruh chu an maichâmahte a hal a, Judai ram leh Jerusalem chu a thianfai a.
34:6 Tin, chutiang bawk chuan Manase te, Ephraim te, Simeon te, Naphtali khua te lamin a ti vek a.
34:7 Tin, maichâmte a tichim a, Aseri te, milem siam chawpte chu a tisawm dep a, Israel ram zawng zawnga ni lemte chu a kit vek a, Jerusalem-ah a haw leh a.
34:8 Tin, a lal kum sâwm leh kum riat kum, a ram leh inte a then fai kum chuan Azalia fapa Saphana te, khaw awptu Maaseia te; Joaaza fapa, lehkha ziaktu Joa te chu LALPA a Pathian in siam tha tûrin a tir a.
34:9 "Ahaba ka hmaa a inngaihtlâwmzia hi i hmu em? Ka hmaa a inngaihtlâwm avâng hian ama chhanah hi chuan thil tha lo ka thlentir lo vang a, a fapa chhanah erawh chuan a chhûngte chungah thil tha lo ka thlentir ang," tiin.
34:10 Tin, LALPA in satu hnathawktute an pe a; tin, LALPA in hnathawktute chuan in siam thatute leh cheitute an pe a;
34:11 Juda lalten an lo tihchhiat tak in siam that nân lung chher te, a zawmna te leh a khanchhukte atâna thing lei nân themthiamte leh in satute chu an pe a.
34:12 Tin, mite chuan hna chu rinawm takin an thawk a; an hotu, hnathawh relbawltute chu, Mereria fapate zinga Levi mi Jahatha leh Obadia te, Kohat mi fapate zinga mi Zekaria leh Mesulama te an ni a; tin, Levi mi mi dang, thil tum thiam zawng zawngte nen.
34:13 A phurha phur mite hotu pawh an ni a, hna tinreng thawktute thawh tûr relbawltu an ni: lehkhaziaktute, hotu te, kawngkhâr vêngtute chu Levi mite zinga mi an ni.
34:14 Tin, Jehosaphata hnêna chuan, "Ramoth-gilead khua mi han beipui ve duh ang emaw chu?" a ti a. Tin, Jehosaphatan Israel lal hnêna chuan, "Kei leh nang, ka mite leh mite chu pumkhat kan ni a, ka sakawrte leh i sakawrte chu pumkhat an ni alawm," a ti a.
34:15 Tin, Hilkia chuan lehkha ziaktu Saphana nenah chuan, "LALPA ina dan bu kan hmu chhuak ta," a ti a. Tin, Hilkia chuan lehkhabu chu Saphana a pe a.
34:16 Chutichuan Israel lal chuan zâwlneiho mi zali lai a ko khâwm a, an hnênah, "Ramoth-gilead khua bei tûrin ka han thawk ang nge thawk lo vang?" a ti a. Tin, anni chuan, "Han thawk rawh, Lalpan lal kutah a pe dâwn a ni," an ti a.
34:17 LALPA ina tangka awm chu an bun chuak a, hotute leh hnathawktute chu an pe a," tiin thu a thlen a.
34:18 Tin, lehkha ziaktu Saphana chuan, "Puithiam Hilkia chuan lehkhabu mi pe," tiin lal chu a hrilh bawk a. Tin, Saphana chuan lal hmaah a chhiar a.
34:19 Tin, heti hi a ni a, lalin dan thute chu a han hriat chuan a puan a pawtthlêr a.
34:20 20-21, Tin, lal chuan, "Kal ula, dan thu in hmuh chhuah chungchang thuah hian keimah leh Israel leh Judai rama mite tan LALPA min va rawnsak teh u; kan pi leh puten he dan bua chuang ang hian LALPA thu chu an lo zawm loh avang hian kan chungah LALPA thinurna chu a lo awm nasa ta a ni si a," tiin, Hilkia te, Saphana fapa Ahikama te; Mika fapa Adona te, lehkha ziaktu Saphana te, lal chhiahlawh Asaia te chu thu a pe a.
34:21 20-21, Tin, lal chuan, "Kal ula, dan thu in hmuh chhuah chungchang thuah hian keimah leh Israel leh Judai rama mite tan LALPA min va rawnsak teh u; kan pi leh puten he dan bua chuang ang hian LALPA thu chu an lo zawm loh avang hian kan chungah LALPA thinurna chu a lo awm nasa ta a ni si a," tiin, Hilkia te, Saphana fapa Ahikama te; Mika fapa Adona te, lehkha ziaktu Saphana te, lal chhiahlawh Asaia te chu thu a pe a.
34:22 Tichuan lalin thu a pêkate leh Hilkia chu silhfên enkawltu Hasra fa Tokhatha fapa Saluma nupui zâwlnei Huldai hnênah chuan an va kal a, chu mi thuah chuan an va bia a. (Ani chu Jerusalem Misne-a awm a ni.)
34:23 Tin, a ni chuan an hnênah, "LALPA Israelte Pathian chuan heti hian a ti; 'Ka hnêna rawn tirtu che u chu hrilh ula,
34:24 LALPA chuan heti hian a ti, Ngai teh u, he hmun leh a chhunga awmte chunga hian thil tha lo ka thlentir ang a, Juda lal hmaa an chhiar chhuah tak lehkhabua chuang anchhia zawng zawngte pawh;
34:25 an kut thiltiha min tihthinur nana min hawisana pathian dangte tana rimtui an hal avângin he hmun chungah hian ka thinurna leih a ni a, tihdaih a ni lo vang, tiin.
34:26 26-27, Amaherawhchu, LALPA rawn tûra rawn tirtu che u Juda lal hnêna chuan hetiang hian sawi ang che u, LALPA Israelte Pathian chuan heti hian a ti, Chung thu i hriatte chuan i thinlung a tihnem avânga Pathian hmaa i intihhniam a, he hmun chungchâng thu leh a chhûnga awmte chungchang thu i hriat a, ka hmaa i intihnuai a, i pian i pawh thlêr a, ka hmaa i tah avângin kei pawhin i thu chu ka lo ngaithla a.
34:27 26-27, Amaherawhchu, LALPA rawn tûra rawn tirtu che u Juda lal hnêna chuan hetiang hian sawi ang che u, LALPA Israelte Pathian chuan heti hian a ti, Chung thu i hriatte chuan i thinlung a tihnem avânga Pathian hmaa i intihhniam a, he hmun chungchâng thu leh a chhûnga awmte chungchang thu i hriat a, ka hmaa i intihnuai a, i pian i pawh thlêr a, ka hmaa i tah avângin kei pawhin i thu chu ka lo ngaithla a.
34:28 Ngai teh, i pi leh i pute hnênah ka kaltir ang chia, i thlanah thlamuang takin i kal ang a, he hmun leh a chhûnga awmte chunga ka rawn thlentir tûr thil tha lo zawng zawngte chu i mitin a hmu lo vang,' tiin, ti rawh u," a ti a. Tin, lal hnênah thu chu an thlen ta a.
34:29 Tichuan lal chuan mi a tir a, Judai ram leh Jerusalem-a upa zawng zawng chu a ko khâwm a.
34:30 Tin, lal leh Juda mi zawng zawng Jerusalem-a mi zawng zawng te, puithiam leh Levi-ho te, mipuiho zawng zawng a lian a tein LALPA inah an cho va; LALPA ina an hmuh chhuah thuthlung bu-a thu zawng zawng chu an benghriatah a chhiar a.
34:31 Tin, lal chu a hmunah a ding a, chu mi lehkhabua chuang thuthlung thu chu tinghet tûrin a thinlung zawng zawng leh thlarau zawng zawnga LALPA zui tûr leh a thupêk te, a thuhriattir te, a thuruatte pawm tûrin LALPA hmaah chuan thu an thlung a.
34:32 Tin, Jerusalem leh Benjamin mi zawng zawngte chu chutianga awm tûrin a ti a. Tin, Jerusalem-a mite chuan Pathian, an pi leh pute Pathian thuthlung ang chuan an ti a.
34:33 Josia chuan, Israel ramin a huam zawng zawng ata thil tenawm zawng zawng chu a thehthang bo va, Israel rama awm zawng zawngte chu lalpa an Pathian rawng a bâwltir a. Tin a dam chhung chuan LALPA, an pi leh pute Pathian an zui chu an pensan lo.
35:1 Tin, Josia chuan Jerusalem-ah LALPA tan kalhlen kût a nei a; kalhlen kûtna tûr chu thla khatna, ni sâwm leh ni li niin an talh a.
35:2 Tin, puithiamte chu an hnathawh a ruatsak a, LALPA ina rawngbawl hna thawk tûrin a fuih a.
35:3 Tin, Israel mite zirtirtu, Pathian tana tihhran Levi-hote hnênah chuan, "Israel lal Davida fapa Solomona in sakah chuan bâwm thianghlim chu dah rawh u; in kokia zawn a ngai tawh lo vang; LALPA in Pathian leh a mi Israelte rawng bâwl tawh rawh u khai.
35:4 Tin, Israel lal Davida ziak ang leh a fapa Solomona ziak angin in chhûngkaw puipa zir zelin a pâwl pâwlin inbuatsaih rawh u.
35:5 Tin, in unauteho chhûngkaw puipa zir zelin Levi-hote puala chanvo neiin hmun thianghlimah chuan awm rawh u.
35:6 Kalhlên Kûtna tûr talh ula, intithianghlim ula, Mosia hmanga LALPA sawi anga ti tûrin in unaute tan buatsaih rawh u," a ti a.
35:7 Tin, Josian chuta mi awm zawng zawngte chu kalhlen kuta hlân tûrin ran rual zinga mi berâm no leh kêl no singthum leh bâwngpa sângthum a pe a: chungte chu lal sum zinga mi a ni.
35:8 Tin, a mi liante chuan mipui te, puithiam te, Levi-hote chu mahni duh thua hlân atân an pe a. Pathian in hotu, Hilkia te, Zekaria te, Jehiela te chuan Kalhlen kûta hlân tûrin ran no sânghnih leh zaruk leh bâwngpa zathum puithiamte an pe a.
35:9 Tin, Konania te, a unau Semaia leh Nethanela te, Levi-hote hotu Hasabia te, Zeiela te, Jozabada te pawhin kalhlen kuta hlân atân Levi-hote chu ran no sângnga leh bâwngpa zanga an pe a.
35:10 Tichuan rawngbawlna chu an buatsaih a, lal thupêk angin puithiamte chu an hmunah an ding a, Levi-hote chu an pâwl dan ang zelin.
35:11 Tin, kalhlen kutna tûr chu an talh a, puithiamte chuan thisen chu an theh a, Levi-hote chuan an lip a.
35:12 Tin, Mosia lehkhabua chuang anga an chhûngkaw then dan zir zela LALPA hnêna hlân atâna pêk tûrin hâlral thilhlante chu an la sawn a. bâwngpate pawh chu chutiang bawk chuan an ti a.
35:13 Tin, kalhlen kutna tûr a dan angin an hem hmin a; tin, thilhlan thianghlim sa chu, bel te, bel khaina nei te, bel rawng zautein an chhum kawi a, mi zawng zawngte hnênah an kalpui a.
35:14 Tin, chu mi zawhah chuan anmahni leh puithiamte tan an buatsaih a; Arona fa puithiamte chu hâlral thilhlan leh sa thau hlanin zan thlengin an buai si a; chuvângin Levi-hote chuan anmahni leh Arona fa puithiamte tan an buatsaih a ni.
35:15 Tin, Davida leh Asapha leh Hemana leh lal zâwlnei Jeduthuna te thupêk angin hla satu Asapha fapate chu an hmunah an ding a, tin, kawngkhâr vêngtute chu kawngkhâr tinah an awm a; an unau Levi-hoten an buatsaihsak avângin an hna kalsan a ngai lo va.
35:16 Chutichuan lal Josia thupêk anga kalhlen kut nei tûr leh LALPA maichâma hâlral thilhlan hlân tûrin chu mi ni vek chuan LALPA rawngbawlna thil zawng zawng chu an buatsaih a.
35:17 Tin, Israela thlah chuta awmte chuan chu mi ni chuan Kalhlen Kût an nei a, chhang dawidim telh loh kut pawh ni sarih an nei bawk a:
35:18 zâwlnei Samuela dam lai ata Israel rama kalhlen kut chutiang rêng rêng chu an nei ngai lova; Israel lal tumahin Josia leh puithiamte leh Levi-hote leh Juda zawng zawng leh Israelten an neih anga nei an awm hek lo.
35:19 Kum sâwm leh kum riat Josia a lal kumin chu Kalhlen Kût chu an nei a ni.
35:20 Chung zawng zawng hnua Josian biak in a buatsaih zawh chuan, Aigupta lal Nekova chu Karkemis bei tûrin Euphrates luiah a han chho va; tin, Josia chuan a han bei a.
35:21 Nimahsela ani chuan, "Nang Juda lal, kei leh nang eng nge kan intihna tûr awm? Nang bei tûrin ka lo kal lo va, ka do laite bei tûr zawkin asin ni ka lo kal, Pathianin hmanhmawh tûrin thu min pe a, ka lama tang Pathian chu dosal suh khai, a ti boral dah ang che," tiin palai a tir a.
35:22 Nimahsela Josia chuan a kirsan duh lo va, a do theih nân a inbawl danglam a, Pathian ka atanga Nekova thu sawi chu a pawm lo va, Megido ruama lo bei tûrin a kal a.
35:23 Tin, thal kâp mite chuan Josia chu an han kâp a; tin, lal chuan a chhiahhlawhte hnêna, "Min kal bopui rawh u, hliam nasa tak ka tawk ta," a ti a.
35:24 Chutichuan a chhiahhlawhte chuan tawlailir ata chu an la chhuak a, a tawlailir dangah chuan an dah a, Jerusalemah an kalpui a, a thi a, a pi leh pute thlanah an phûm ta a. Juda mi zawng zawng leh Jerusalem-a miten Josia chu an sun a.
35:25 Tin, Jeremia chuan Josia chu a tah a: tin, hla satu hmeichhia leh mipate chuan tun thlengin Josia an tah hla chu an la chham a. Israel ramah chuan danah an neih a, ngai teh, tah hlaah chuan a chuang ta a.
35:26 Josia thiltih dang zawng zawng, LALPA danah a chuang ang a, a thiltih tha te,
35:27 a hmasa ber leh a hnuhnung berte pawh, ngai teh, Israel lal leh Juda lalte chanchin buah a chuang a.
36:1 Tichuan chu mi rama mite chuan Josia fapa Jehoahaza chu an hruai a, Jerusalem-ah a pa aiah lalah an siam ta a.
36:2 Joahaza chu a lal tantirhin kum sâwmhnih leh kum thum a ni a, Jerusalem-ah thla thum a lal a.
36:3 Aigupta lalin Jerusalem-a a lalna a bansak a, an ram chu tangkaraw talent za leh rangkachak talent khat a chawitir a.
36:4 Tin, Aigupta lal chuan a unaupa Eliakima chu Juda leh Jerusalem-a lalaha siam a,a hming chu Jehoiakima tiin a thlaksak a. Tin, Nekova chuan a unaupa Joaza chu Aigupta ramah a hruai a.
36:5 Jehoiakima chu a lal tantirhin kum sâwmhnih leh kum nga a ni a, Jerusalem-ah kum sâwm leh kum khat a lal a: LALPA a Pathian mithmuhah thil tha lo a ti thin a.
36:6 Babulon lal Nebukadnezara chu amah bei tûrin a lo thawk a, Babulon-a hruai tûrin kawl a buntir a.
36:7 Nebukadnezara chuan LALPA in bungbêlte pawh Babulon-ah a la a, Babulon-a a pathian biak inah a dah a.
36:8 Jehoiakima chanchin dang te, a thil tenawm tih te leh a awm dante chu, ngai teh, Israel lal leh Juda lalte chanchin buah a chuang a; tin, a fapa Jehoiakina chu a aiah a lal ta a.
36:9 Jehoiakina chu a lal tantirhin kum riat a ni a, Jerusalem-ah thla thum leh ni sawm a lal a, LALPA mithmuha thil tha lo a ti thin a.
36:10 Tin, kum a lo vei chuan lal Nebukadnezara chuan mi a tir a, LALPA ina bungbêl tha tak takte nen Babulon-ah a hruaitir a, a unaupa Zedekia chu Judai ram leh Jerusalem-a lalah a siam a.
36:11 Zedekia chu a lal tantirhin kum sâwmhnih leh kum khat a ni a, Jerusalem-ah kum lâwm leh kum khat a lal a:
36:12 LALPA a Pathian mithmuhah thil tha lo a ti thin a; LALPA ka atanga thu sawitu zâwlnei Jeremia lakah chuan a intihnuai duh lo va.
36:13 Pathian hminga chhechhamtirtu lal Nebukadnezara chungah a hel bawk a, luhlul a chhuah a, LALPA Israelte Patian lam hawi lo tûrin a rilru a tikhauh va,
36:14 Puithiam hotu zawng zawngte leh miang bawk thil tenawm tak takte an ti a; Jerusalem-a a tihthianghlim LALPA inte pawh chu an tibawlhhlawh a.
36:15 Tin, LALPA, an pi leh pute Pathian chuan an hnênah theihpatawpa thahnemngaiin mi a tir a, a mite leh a awmna hmun chu alainat avângin;
36:16 nimahsela Pathian mi tirhte chu an hmusit a, a thute chu an ngainep a,a mite chunga LALPA thinurna chu a lo thawh a, tihlungawi lehna reng awm lo khawp hialin a zâwlneite chu an tinawmnah a.
36:17 Chuvângin Kaldai lal an chungah a thawhtir a, ani chuan an tlangvâlte chu an hmun thianghlimah khandaihin a that a. Nula leh tlangvâl pawh, tar pawh, tarchia pawh lainatna rêng rêng a nei lo va; a kutah a pe vek a.
36:18 Tin, Pathian ina bungbêl zawng zawng, a lian pawh, a te pawh, LALPA ina sum dah khâwm zawng zawng te, lal sum dah khâwm leh a mi liante sum dahkhawmte lamin Babulon-ah a la vek a.
36:19 Tin, Pathian inte a hal a, chuta bungbêl tha mi zawng zawngte chu an tiche vek a.
36:20 Khandaiha thah bang zawng zawngte chu Babulon-ah a hruai a, amah leh a fapate chhiahhlawhah Persia-ho lo len tlengin an awm ta a.
36:21 LALPAN zâwlnei Jeremia hmanga thu a lo sawi chawlhni serh thei lova an awm chhung kum sâwmsarih, chawlhni an serh leh theih thlengin, ram chu tihtiauvin a awm ang, a tih kha a lo thleng ta a ni.
36:22 Chutichuan Persia lal Kura lal tirh kumin Jeremia kaa LALPA thu chu a thlen kim theih nân a ram zawng zawnga than chhuak vek tûr leh a ziaka ziak tûr pawhin LALPAN Persia lal Kura thinlung chu a chawk tho va, |
posted by zoblog @ 12:22 PM  |
|
|
|
