MIZO CLAN

 
MIZORAM #Health Department-ah Promotion buai? (Misual.Com) #UDA candidate list a ‘leak-out’! (Misual.com) #Excise ruihtheih thil man zat (DIPR) #Fanu kaphlumtu in a dam rei ring lo sa (Buannel) #ZONET NATIONAL #Retired army officer, aide arrested for Malegaon blast(NDTV) WORLD #LTTE aircraft bombs Colombo power plant (TOI) # Jennifer Hudson IDs nephew's body; child shot, sources say (LA Times)
Shoutbox

Estheri
Wednesday, September 12, 2007
1:1 Lal Ahasuera a lal laiin (chu Ahasuera chu India atanga Ethiopia thlenga ram then za leh sawmhnih leh pasarih chunga lal a ni a) heti hi a ni a,
1:2 Lal Ahasuera a ram lalthutthleng lal khua Susan-a a thut lai,
1:3 a lal kum thum kum khan a mi liante zawng zawng leh a mite tan ruai a theh a; Persia leh Medai rama thu neitute, an ram then mi thate leh mi liante chu an awm vek a;
1:4 a ram ropui tak rote leh a lal ropui nasatzia, rei tak ni za leh ni sawmriat zet a entir a.
1:5 Tin, chung zawhah chuan mi lian leh mi te lal khua, Susan-a lo tel zawng zawng tan lal in huan hung chhûng kawtlaiah lal chuan ni sarih zet ruai a theh a;
1:6 puan, a vârte, a hringte, a dumpawl te, lazai sin sendukin tangkaraw khangah leh sailungvar banahte an thlung a; rangkachak leh tangkaraw thutphahte chu sailungvar, a sen te, a var te, a eng te, a dum tea rem chungah an hung a.
1:7 Rangkachak novin uain chu an sem a, (no chu chi hrang hrang inang lo thluah a ni,) lal chuan a ngah khawp a, uain chu a awm leng lung mai a ni.
1:8 Tin, uain chu dan angin an in a; tumah tihluih an ni lo va, mi tinin an duh anga an tih theuhna tûrin lal chuan a ina hotu zawng zawngte chu a hrilh a.
1:9 Tin, lalnu Vasti pawhin Ahasuera lal inah chuan hmeichheho tan ruai a theh a.
1:10 10-11, A ni sarih ni chuan lal rilru chu uain chuan a tihpuamsak ta a, pindan vengtu pasarih, lal Ahasuera hmaa rawngbawl thin Mehumana te, Biztha te, Harbona te, Bigtha te, Abagtha te, Zethara te, Karkasa te chu lalnu Vasti a lallukhum khum chunga mipuite leh mi liante a hmêl thatzia inentir tûra lal hmaa va hruai tûrin thu a pe a; a hmêl a tha hle si a.
1:11 10-11, A ni sarih ni chuan lal rilru chu uain chuan a tihpuamsak ta a, pindan vengtu pasarih, lal Ahasuera hmaa rawngbawl thin Mehumana te, Biztha te, Harbona te, Bigtha te, Abagtha te, Zethara te, Karkasa te chu lalnu Vasti a lallukhum khum chunga mipuite leh mi liante a hmêl thatzia inentir tûra lal hmaa va hruai tûrin thu a pe a; a hmêl a tha hle si a.
1:12 Nimahsela lalnu Vasti chuan pindan vengtuten kal tûra lal thupêk an hrilh chu a hnial a; chuvangin lal chu a thinrim ta hle mai a, a thinrim a alh ta a.
1:13 Chutichuan lal chuan thil hre mi, mi fingte hnênah chuan, (dan leh rorêl dan hria zawng zawngte chu chutiang chuan lalin a rawn thin reng a ni;
1:14 amah dawltute chu Karsena te, Sethara te, Admatha te, Tarsisa te, Meresa te, Medai ram mi lian pasarih, lal hmêl hmu fotu, an rama amah hnaih ber thinte an ni;)
1:15 "Pindan vengtuten an hriattir si, lal Ahasueran a tih anga a tih loh avângin lalnu Vasti chungah chuan dan anga ti tûrin engtin nge kan tih ang?" a ti a.
1:16 Memukana chuan lal leh mi liante hmaah chuan, "lalnu Vasti chuan lal chungah chauh a tisual a ni lo va, mi lian zawng zawng leh lal Ahasuera ram then zawng zawnga hnam tin, chungah pawh a tisual a ni.
1:17 He, lalnu thiltih hi hmeichhia zawng zawngin an han hre darh ang a, lal Ahasuera chuan lalnu Vasti a hmaa rawn hruai tûrin thu a pe a, nimahsela a kal lo tih thu a han than chuan an pasalte an hmusit phah mai ang.
1:18 Tin, vawiinah ngei pawh hian Persia leh Medai mi liannuho, lalnu thiltih hriate hian lal mi liante chungah an ti ve mai ang a. Chutichuan inhmusitna leh thinurna nasa tak a chhuak ang.
1:19 Lal tha tihzâwng a nih chuan, lal thupêk than chhuak sela, lalnu Vasti chu lal Ahasuera hmaah lo kal tawh hauh suh se, tih thu hi tihdanglam tawh hauh lo tûrin Persia leh Medai ram dan zingah ziak ni sela; tin, lalin amah aia tha zawk a lalnu nihna luahtir sela.
1:20 Tin, lal thupêk chu a ram zawng zawngah (zau teh mah sela) than chhuah a nih hunah chuan, an nupuiten ami lian ami tein an pasalte an pawisa ang," a ti a.
1:21 Chu thu chuan lal leh mi liante chu a tilawm hle a; tichuan lal chuan Memukana thu ang chuan a ti a;
1:22 Lal ram zawng zawngah, ram tinah anmahni lehkha theuhvin, hnam tin, anmahni tawng theuhvin, mipain mahni in chhûng theuhvah thu an nei tûr a ni tih thu a thawn ta a ni.
2:1 Chung thil hnua lal Ahasuera thinrim chu a la daih hnu chuan Vasti leh a thiltih leh a chungchanga thupêk chu a hre chhuak a.
2:2 Chutichuan lal chhiahhlawh, a rawngbawltute chuan a hnênah, "Lal tan nula hmêl tha zawn ni sela;
2:3 lal pindan enkawltu Hegaia, hmeichhe enkawltu hnuaiah, Susana lal hmeichhe dah khawmna inah nula hmêl tha zawng zawng ko khâwm tûrin lalin a ram chhûnga ram then zawng zawngah hotu ruat sela; tin, an intihthianghlimna tûrte pêk ni theuh sela;
2:4 lal tilawmtu ber nula chu Vasti aiah lalnu ni sela, " an ti a. Tichuan chu chuan lal chu a tilawm a, chutiang chuan a ti ta a.
2:5 Lal khawpui Susan-ah chuan Juda mi, mi pakhat a awm a, a hming chu Mordekaia a ni a, Benjamin mi Kisa fa Simeia fapa Jaira fapa a ni;
2:6 Babulon lal Nebukadnezaran Juda lal Jekonia sala a hruai laia Jerusalem atanga hruai a ni.
2:7 A pami fanu, Hadasi, Estheri an tih chu a enkawl seilian a; pa a nei lo va, nu a nei bawk si lo va, nula chu a nalhin a hmêl a tha hle mai a; anu leh a pa an thih hnu khan Mordekaia chuan a fanu a tan a awmpui ta a ni.
2:8 Chutichuan lal thupêk leh lal thurat chu an lo hriat a, nula tam tak, lal khawpui Susan-a Hegaia vennaah an kal khawm chiam lai chuan, heti hi a ni a, Estheri chu lal inah hmeichhe vengtu Hegaia vennaah chuan an hruai lut a.
2:9 Tin, nula chuan a tilawm a, a duhsakna a chang a, lal in ata a chanvo leh a intihthianghlimna tûr chu a pe thuai mai a, nula pasarih pêk awm deuh deuhte nên; amah leh a nulatpuite chu hmeichhe awmna hmun tha berah a hruai ta a.
2:10 Estheri chuan eng chi nge a nih leh tute nge a laichinte a hriattir hauh lo va; Mordekaia chuan hriattir lo tûrin thu a pe tlat a ni.
2:11 Estheri chuan eng nge a tih thin a, engtin nge a awm tih hre tûrin Mordekaia chu ni tin, hmeichhe awmna, kawt hung chhûngah chuan a kal thin a.
2:12 Tin, thla sâwm leh thla hnih hmeichhe tana dan anga an chungchanga thiltih hnua lal Ahasuera hnêna nulaho an kal hun a lo thlen chuan (chutiangah chuan an intihthianghlim hun a kim tawh thin a, hetiang hian an ti thin a ni, thla ruk chhûng mura hriakin an zut a, thla ruk dang leh chhûng rimtui leh hriak dangin an zut leh a),
2:13 hetiang hian an kal thin a, lal ina luhpui tûrin hmeichhe awmna ata an duh apiang an pe thin a ni.
2:14 Tlai lamah an kal a, atukah, hmei vengtu, lal pindan vengtu Saasgaza ven hmeichhe awmna pahnihnaah an let leh thin a; lalin a duh a, an hming lama a kohte chauh lo chu lal hnênah an kal leh tawh thin lo.
2:15 Chutichuan Mordekaia pami Abihaila fanu, a fanu atâna a awmpui Estheri chu lal hnêna a kal hun a thlen chuan, hmeichhe vengtu, lal pindan vengtu Hegaia ruat chauh lo chu engmah a duh lo va. Estheri chu a hmu apiangte duhzawng mi nih a kai a.
2:16 Chutichuan Estheri chu lal Ahasuera lal inah thla sawmna, Tebet thlaah kum sarih a lal kumah an hruai lut a.
2:17 Lal chuan hmeichhe dang zawng zawng aiin a hmangaih a, nula dang zawng zawng aiin khawngaihna leh duhsakna a hlawh a; tichuan lallukhum a khumtir a, Vasti aiah lalnuah a siam ta a.
2:18 Chutichuan Estheri hmingin lal chuan a mi liante leh a mite tan ruai ropui tak a theh a; a rama mite tan awm ni a khamsak a, lal tih awm rengin phal takin thilte a sem a.
2:19 Tin, nulaho an inkhawm leh lai chuan Mordekaia chu lal kawt hung kawngkaah a thu a.
2:20 Mordekaia thupêk avângin Estheri chuan tute nge a laichinte leh eng chi nge a nih a la hriattir lo fo va; Estheri chuan Modekaia thu chu a awmpui laia a zawm thin ang khan a la zawm reng a ni.
2:21 Tin, lal kawt hung kawngkaa Mordekaia a thut lai chuan lal pindan vengtu zinga mi pahnih Bigthana leh Teresa, kawngka veng thintute chu an lo thinur a, lal Ahasuera chungah kutthlakna remchâng an zawng a.
2:22 Chu thil chu Mordekaian a lo hria a, lal nu Estheri chu a hrilh a, tin, Estheri chuan Mordekaia hmingin lal a hrilh a.
2:23 Tin, chu mi thu chu an dap vêl a, chutiang chu a lo ni ngei tih an hriat chhuah chuan an awhhlumtir ve ve a; chu chu la kawl, lal chanchin ziakna buah an ziak a.
3:1 Chung thil hnuah chuan lal Ahasuera chuan Agag mi Hamedatha fapa Hamana chu akaisantir a, a chawisâng a, a mi liante zawng zawng aiin a thut chungnungtir a.
3:2 Tin, lal kawt hung kawngkaa awm, a mite zawng zawng chuan Hamana chu an zah a, chibai an lo buk thin a; chutianga tih tûrin lalin thu a pe a ni. Nimahsela Mordekaia chuan ahmaa kunin chibai a bûk duh lo va.
3:3 Tin, lal mite, lal kawt hung kawngkaa awm zawng zawngte chuan Mordekaia hnênah,"Engati nge lal thupêk i bawhchhiat?" an ti a.
3:4 Tin, heti hi a ni a, ni tin, a hnêna an sawia a pawm chuan loh hnu chuan Mordekaia thu chu a ngaimawh nge ngaimawh lo tih hriat nân Hamana chu an hrilh a, Juda mi a ni tih a lo hrilh tawh hlawh si a.
3:5 Tin, Hamanan Mordekaia a hmaa kuna chibai a bûk loh a han hriat chuan Hamana chu thinrimin a khat ta teuh mai a.
3:6 Nimahsela Mordekaia chung chauhva kut han thlâk chu engmah thamah a ngai lo va, Mordekaia chi chu an hrilh tawh bawk si a; chuvangin Ahasuera ram chhûng zawng zawnga Juda-ho Mordekaia chipuite chu tihhlum vek a tum ta a.
3:7 Lal Ahasuera kum sâwm leh kum hnih a lal kum, thla khatna, Nisan thlaah Hamana hmaah ni tin, thla tin, thla sâwm leh pahnihna Adar thla thlengin Aienna thum an vawr reng a.
3:8 Tin, Hamanan lal Ahasuera hnênah, "I ram then chhûng tinah hnam eng emaw, hnam dang nên inang lo, intihrang an awm darh nuai a; an dante chu hnam dangte dan nên a inang lo riau mai a; lal dan pawh an zawm hek lo; chuvangin chutiang awmtir phal chu lal tan a manhla lo hle mai a.
3:9 Lalin rem a tih chuan tihlum vek tûr ani tih ziak tlat ni sela; lal sum ina dah tûrin lal sum enkawltute kutah tangkaraw talent sângsawm ka pe ang e," a ti a.
3:10 Tin, lal chuan a zungbun a phawi a, Judate hmêlma Agag mi, Hamedatha fapa Hamana chu a pe a.
3:11 Lal chuan Hamana hnênah, "Tangka leh chung mite pawh chu tha i tih ang anga tih tûra pêk i ni," a ti a.
3:12 Chutichuan thla khatna ni sâwm leh ni thum niin lal lehkhaziaktute chu an ko va, Hamana thupêk ang chuan lal upa te, ram then tin, awptute, hnam tin, puipate an thawn a, ram then tinah anmahni lehkhain, hnam tin, anmahni tawng theuhvin; lal Ahasuera hminga thawn a ni a, lal zungbuna nem a ni.
3:13 Tin, lal ram then tinah, Juda mi zawng zawngte chu, thalai leh tar te, naupang te te te, hmeichhia te, ni khatah, thla sâwm leh thla hnihna, Adar thla ni sâwm leh ni thum ni takin tihboral vek a, thah vek a, tihchimit vek a, an sum chu râllâka laksak tûrin lehkha an thawn darh a.
3:14 Chu mi ni atâna lo inpeih diam tûrin chu mi thupêk chu ram then tina pêka hnam tin hnêna puan tûrin chu mi lehkha chu an thawh a.
3:15 Lal thupêkin an kal hmanhmawhtir a, thupêk chu lal khawpui Susan-ah an puang a: lal leh Hamana chuan zu an in der der mai a; nimahsela Susan khua chu a mangang hle a.
4:1 Mordekaian chung an thiltih zawng zawng chu a hriatin, Mordekaia chuan a puan a pawt thlêr a, saiip puan leh vaivut a inbel a, khawlaiah a kal a, ring tak leh lungchhe takin a tap a,
4:2 lal kawt hung kawngka bul thlengin a kal a; tumah saiip puan sina lal kawt hung chhûng luh chu phal a ni si lo va.
4:3 Lal thupêk chu a thlenna ram tawh phawt maiah chuan Judate chu an tap ngawih ngawih a, chaw an nghei a, an chiau vawng vawng a, mi tam tak chu saiipah leh vaivut zingahte an mu a.
4:4 Tin, Estheri chu, a nulate leh apindan vengtute chuan an va hrilh a, tichuan lalnu chu a lungngai ta êm êm mai a, Mordekaia chu a saiip puan hlip a, a sin tûrin a puan a thawn a; nimahsela a lo duh lo va.
4:5 Chutichuan Estheri chuan lal pindan vengtu pakhat, amah vengtu atâna ruat Hathaka chu a ko va, chung chu eng nge ni a, eng tizia nge ni tih hriat nân Mordekaia hnênah a kaltir a.
4:6 Chutichuan, Hathaka chu lal kawt hung kawngka zawna mual zau laiah, Mordekaia hnênah chuan a va kal a.
4:7 Tin, Mordekaia chuan a chunga thil lo thleng zawng zawng leh Judate tihhlumna tûra lal sum zinga dah tûra Hamanan tangka pêk a tiam zat chiahte a lo hrilh a.
4:8 Tin, Estheri entir tûr leh a awmzia hrilhfiah tûrte leh lal hnêna dilsak tûrin an tir a, anmahni tihboralna tûra Susan-a an puan thupêk ziak chhawn a pe bawk a.
4:9 Tin, Hathaka chuan Mordekaia thuchahte chu Estheri a va hrilh a.
4:10 ,11 Tichuan Hathaka chu Estheri chuan a lo bia a, "Lal chhiahhlawhte lal ram then tina mite chuan, tu pawh hmeichhia pawh mipa pawh tihhluma a awm loh nâna lalin rangkachak tiang a lama a lehnate chauh lo chu lal hnêna a in chhûng rila lût chu tihhlum zel tûr ani tih dan awm chu an hre theuh va; hei, ni sawmthum chhûng chu lal hnêna lût tûrin koh ka la ni lo va," tiin Mordekaia hnêna sawi tûrin thu a chah a.
4:11 ,10 Tichuan Hathaka chu Estheri chuan a lo bia a, "Lal chhiahhlawhte lal ram then tina mite chuan, tu pawh hmeichhia pawh mipa pawh tihhluma a awm loh nâna lalin rangkachak tiang a lama a lehnate chauh lo chu lal hnêna a in chhûng rila lût chu tihhlum zel tûr ani tih dan awm chu an hre theuh va; hei, ni sawmthum chhûng chu lal hnêna lût tûrin koh ka la ni lo va," tiin Mordekaia hnêna sawi tûrin thu a chah a.
4:12 Tin, Estheri thuchah chu Mordekaia an hrilh a.
4:13 Tin, Mordekaia chuan Estheri a va chhantir leh a, "Juda mi zawng awngten an pumpelh loh tûr chu lal inna chuan i pumpelh dawn bik emaw tih inring suh.
4:14 Tun hun anga i ngawih mai mai chuan hmun danga Judate tan himna leh chhuahna a lo awm pawhin nang leh i pa chhûngte chu kan boral ang; lal nihna i lo chan hi hetih hun atân ngei hian a ni dawn lawm ni?" va ti tûrin a tir a.
4:15 Chutichuan Estheri chuan Mordekaia va chhâng leh tûr chuan a tir a,
4:16 "Susan-a awm Juda mi zawng zawng ko khâwm vek la, keimah avângin chaw nghei ula, ni thum leh zan thum engmah ei lo leh in lovin awm rawh u; kei leh ka nulahote pawhin kan nghei ve ang a; tin, dan lo angin lal hnênah ka lût ang a; tin, ka boral leh ka boral a ni mai ang," tiin.
4:17 Chutichuan Mordekaia chu a kal a, Estherin thu a pêk zawng zawng ang chuan a ti a.
5:1 Tin, ni thum ni chuan heti hi a ni a, Estheri chuan a lal silhfen a inbel a, lal rorêlna in zawn taka lal in hung chhûngah chuan a va ding a, lal chu lal thutthlengah a in luhna hawiin a thu a.
5:2 Tin, lalnu Estheri chu lal kawt hung chhûnga a ding lalin a han hmuh chuan a chungah a lawm a; lal chuan a rangkachak lal tiang ken chu Estheri lamah chuan a han lek a. Chutichuan Estheri chuan a va hnaih a, lal tiang hmawr chu a han khawih a.
5:3 Tin, lal chuan a hnênah, "Lalnu Esther, eng nge i duh le? Eng nge dil i duh? Ka ram zatve hial pawh ka pe ang che," a ti a.
5:4 Tin, Estheri chuan, "Lalin tha a tihzâwng a nih chuan, vawiin atâna ruai ka buatsaih ei tûrin lal leh Hamana lo kal teh se," a ti a.
5:5 Tin, lal chuan, "Estheri sawi ang chuan Hamana chu han ko thuai rawh u," a ti a. Chutichuan lal leh Hamana chuan Estheri ruai buatsaih chu ei tûrin an kal a.
5:6 Tin, an uain ruaiah chuan lalin Estheri hnênah, "Eng nge i dil dawn? Pêk i ni ang, eng nge ni i duh? Ka ram zatve hial pawh pêk i ni ang, " a ti a.
5:7 Tin, Estheri chuan, "Ka thil dil leh ka thil ngen chu,
5:8 lal mittlung ka nih a, ka thil dil chu lalin pêk rem a tihzâwng a nih a, ka thil ngen chu tih rem a tih zawng a nih chuan, lal leh Hamana chuan ka ruai buatsaih chu ei tûrin lo kal sela, lal tih ang chuan naktukah hian ka ti mai ang," a ti a, a chhâng a.
5:9 Chutihchuan Hamana chu chu mi ni chuan hlim tak leh lawm takin a chhuak ta a; nimahsela Hamana chuan lal kawt hung kawngkaa Mordekaia chu a hmaa lo ding leh che chang lo a han hmuh chuan, Mordekaia chungah chuan a thinur ta êm êm mai a;
5:10 amaherawhchu Hamana chu a insum hram hram a, a haw ta a; a thiante leh a nupui Zeresi chu a kohtir a.
5:11 Tichuan, Hamana chuan a sum leh pai ropuizia te, fa a ngahzia te, lalin a kaisantirna thil zawng zawng te, lal puipate leh a mite dang aia a tihchungnunna te an hnênah a sawi a.
5:12 Chuti chauh pawh ni lovin, "lalnu Estheri chuan le, a ruaithehah chuan keimah chauh lo chu tumah lal hnênah a teltir lo va; naktukah hian lal nên min sawm a ni.
5:13 Nimahsela Juda mi Mordekaia lal kawt hung kawngkaa thu ka hmuh chhûng chuan heng zawng zawng hi ka tan engmah hnemhnanna a awm lo," a ti bawk a.
5:14 Chutichuan a nupui Zeresi leh a thiante zawng zawng chuan a hnênah, "Tawng sawmngaa sângin awhhlumna siamtir la, tin, Mordekaia chu awhhlumtir tûrin zingah lal hrilh la; ruaithehnaah chuan lal hnênah hlim takin kal mai rawh," an ti a. Chu chuan Hamana chu a tilawm a, awhhlumna chu a siamtir a.
6:1 Chu mi zan chuan lal chu a muhil thei lo va; lal chanchin ziakna bu rawn la tûrin thu a pe a, a hmaah chuan an chhiar a.
6:2 Bigthana leh Teresa, lal pindan vengtu, kawngkhâr vengtu pahnihten lal Ahasuera chunga kutthlâk an tum thu Mordekaian a lo hriattir thu ziak chu an han hmu chhuak a.
6:3 Tin, lal chuan, "Chu mi thu avâng chuan Mordekaia hian eng ang chawimawina leh ropuina nge a hmuh phah le?" a ti a. Lal chhiahhlawh, a rawngbawl thinte chuan, "Engmah tihsak a hlawh lo," an ti a.
6:4 Tin, lal chuan, "Tunge ni kawt hung chhûnga awm saw?" a ti a. Chumi lai chuan Hamana chu a awhhlumna siama Mordekaia awhhlumtir tûr thu lal hnêna sawi tûrin lal kawt hung pawn zawk chhûngah chuan a lo kal a ni a.
6:5 Tin, lal chhiahhlawhte chuan a hnênah, "Ngai teh lal kawt hung chhûnga awm chu Hamana a ni," an ti a. Tin, lal chuan, "Lo lut rawh se," a ti a.
6:6 Chutichuan Hamana chu a lût a. Tin, lal chuan ahnênah, "Lalin mi chawimawi a duha chu eng tihsak nge tha ang le?" a ti a. Tichuan Hamana chuan, "Lalin keimah aia a chawimawi duhzawng tunge awm ang?" a tirilru a.
6:7 Tichuan Hamana chuan lal hnênah, "Lalin a chawimawi duh chu,
6:8 lain a inbel thin lal puan te, lal chuan thinna sakawrte, lallukhum, lalin a khum thin te rawn laksak ni sela;
6:9 tin, lalin a chawimawi duha chu thuam nân lal puan leh sakawr chu lal upa min ber kutah pêk ni sela, chuantir sela, kawtthlêr fanpui sela, a hmaah chuan, 'Lalin a chawimawi duha chu hetiang hian tih a ni ang,' tiin puang zel sela," a ti a.
6:10 Chutichuan lal chuan Hamana hnênah, "I sawi ang chuan lal puan leh sakawr chu va la thuai thuai la, lal kawt hung kawngkaa thu thin, Juda mi Mordekaia chungah chutiang tak chuan ti rawh; i sawi tak zawng zawng kha hmaih awm hauh suh se," a ti a.
6:11 Chutichuan Hamana chuan lal puan leh sakawr chu a va la a, Mordekaia chu a thuam a, kawtthlêrah a chuan veltir a, ahmaah chuan, "Lalin a chawimawi duha chu hetiang hian tih a ni ang, " tiin a puang a.
6:12 Tin, Mordekaia chu lal kawt hung kawngkaah chuan a lo kal leh a. Hamana erawh chu ngui takin inlukhuhin a in lamah a haw ta var mai a.
6:13 Tin, Hamana chuan a nupui Zeresi leh a thian zawng zawngte hnênah chuan a chunga thil lo awm dan zawng zawngte chu ahrilh a. Tichuan a mi fingte leh anupui Zeresi chuan ahnênah, "Tawh sual i tawhna Mordekaia chu Juda mi a nih chuan i chelh lo tawp ang a, a hmaah chuan i che sual ngei ang," an ti a.
6:14 Chutia a hnêna an sawi lai mek chuan lal pindan vengtute chu an va kal a, Estheri buatsaih ruai thehnaa kal tûr chuan Hamana chu hmanhmawh takin an hruai ta a.
7:1 Chutichuan lal leh Hamana chuan lalnu Estheri ruai chu an kilpui a.
7:2 Tin, a ni hnih nia uaiin an in lai chuan lal chuan Estheri hnênah, "Lalnu Esther, eng nge i duh le: Pêk i ni ang. Eng nge ni i dil dawn? Ram zatve hial pawh pêk i ni ang," a ti leh a.
7:3 Chutichuan lalnu Estheri chuan, "Aw lalpa, i mittlung ka nih a, lal remtihzâwng a nih chuan, ka duh chu ka nuna min zuahsak a ni a, ka dil chu ka chipuite nunna zuah a ni;
7:4 kei leh ka chipuite chu tihborala thah vek tûra tih kan ni a; ahmei apain bawihah hralh tûra tih ni lek ila chu engmah ka sawi lo tûr; mahse tihmang tûr kan ni a, lal tan a hek hle ang, hmêlmapa chuan a rul seng lo ang," a ti a, a chhâng a.
7:5 Chutichuan, lal Ahasuera chu a tawng ta a, lalnu Estheri hnênah chuan, "A rilru pawha chutiang han tingam chu tu nge a nih a, khawiah nge a awm?" a ti a.
7:6 Tin, Estheri chuan, "Taitu leh hmêlma a ni, he mi sualpa Hamana hi a ni," a ti a. Chutichuan lalnu leh LALPA hmaah Hamana chu a khur ta a.
7:7 Tin, lal chu a zu ruaithehna ata chu thinurin a tho va, lal huanah a lût a; tin, Hamana chu lalnu Estheri hnêna a nuna zuahsak dilin a ding a; lal chuan a chungah thil tha lo tih tum awm taka a hriat avângin.
7:8 Chutichuan lal chu lal huan ata chu uain ruaithehna hmunah chuan a kal leh a; Hamana chu Estheri thutna, thutthlengah chuan a tlu der mai a. Chutichuan lal chuan, "He inah ka mit hmuh ngeiah lalnu chu a tilui elo maw?" a ti a. Chutia lal a tawng veleh chuan Hamana hmai chu an khuh ta a.
7:9 Chutichuan lal pindan vengtu zinga pakhat lal hmaa lo awm Harbona chuan, "Ngai teh, lal tana thu tha sawitu Mordekaia awhhlum nana tawng sawmngaa sâng, Hamana siam sa diam awhhlumna Hamana inah a awm," a ti a. Tin, lal chuan, "Chu miah chuan awhhlumtir rawh u," a ti a.
7:10 Chutichuan Mordekaia awhhlumna tûra a buatsaihah chuan Hamana chu an awhhlumtir ta a. Tichuan lal thinurna chu a lo dai ta a.
8:1 Chu mi ni chuan Judate hmêlma Hamana in chu lal Ahasuera chuan lalnu Estheri a pe a. Tin, Mordekaia chu lal hmaah a lo kal a; Estheri chuan a eng nge a nih a lo hrilh tawh a.
8:2 Tin, lal chuan Hamana a laksak, a zungbun chu a phawi a, Mordekaia a pe a. Tin, Estheri chuan Mordekaia chu Hamana in chhûng hotuah a siam a.
8:3 Tin, Estheri chuan lal hmaah chuan thu a sawi leh a, a ke bulah abawk a, mittui tla chungin Agag mi aman thil tha lo tih tum Judate chunga a remruat chu tihbo a dil a.
8:4 Tin, lal chuan rangkachak tiang chu Estheri lamah chuan a han lek phei a. Chutichuan Estheri chu a tho va, lal hmaah chuan a ding a,
8:5 "Lal tha tihzâwng a nih a, a mittlung ka nih a, lal ngaiha a dik a, a lawmzawng ka nih chuan Agag mi Hamedatha fapa Hamana remruat lehkha, lal ram then zawng zawnga mi Judate tihboral vek tûr tih a ziak chu tih leh loh tûrin ziak ni sela;
8:6 engtin nge ka chipuite chunga thil tha lo, lo thleng han hmuh chu ka tuar zawh ang? Engtin nge ka laichinte boral han hmuh chu ka tuar zawh ang?" a ti a.
8:7 Chutichuan lal Ahasuera chuan lalnu Estheri leh Juda mi Mordekaia hnênah chuan, "Ngai teh u, Judate chunga a kut a thlâk avângin Hamana in chu Estheri ka pe e, amah pawh chu an awhhlumtir ta a.
8:8 Tin, Judate hnênah i duh ang takin lal hminga thawn tûr lehkha ziak bawk la, lal zungbuna nemin char rawh; lal hminga ziak leh lal zungbuna nem leh char chu tuman an tidanglam thei lo a ni," a ti a.
8:9 Chutichuan lal lehkha ziaktute chu chu mi lai la la, thla thumna, Sivan thla ni sawmhnih leh ni thum niin an ko va, Mordekaia thupêk ang chuan Judate hnênah te, hotute hnênah te, India atanga Ethiopia thlenga ram then hrang za leh sawmhnih leh pasariha ram awptute leh puipate hnêna thawn tûrin lehkha an ziak a, ram then tinah chuan anmahni lehkha theuhvin, hnam tin anmahni tawng theuhvin, Judate hnênah pawh an lehkha leh an tawngin an thawn a.
8:10 Lal Ahasuera hmingin a ziak a, lal zungbunin an nem a, lehkha chu sakawr an phurhtir a, ama vulh thiau, lal tana chhawr thin sabengtung chak mi chunga chuangin an tlanpui a.
8:11 Tin, chu mi lehkhaah chuan lal chuan Judahote khaw tina awmte chu inpunkhawma lo inveng him tûrin a ti a. Khawi rama mi pawh anmahni bei tûra lo thawk tawh phawt chu, lo beileta an fanaute leh an hmeichhiate pawh rawk tûrin a phalsak a.
8:12 Lal Ahasuera ram then zawng zawng chhûngah; chu thupêk chu thla sâwm leh thla hnihna, Adar thla ni sâwm leh ni thum ni, Juda zawng zawng thah vek tûra ruat niah chuan hman tûr a ni.
8:13 Tin, chu mi lehkhaa thupêk chu, chu mi nia an hmêlmate chunga phuba an lak theihna tûra Judate chu inpeih diama an lo awm theih nân ram then zawng zawngaa thawn chhuah a, mi zawng zawng hnêna puan tûr, tih a ni.
8:14 Chutichuan hmanhmawh takin lal thupêkin lal tana chhawr thin sabengtung chak mi chunga chuang lehkha tlanpuitute chu an chhuak a; tin, thupêk chu lal khawpui Susan-a puan chhuah a ni.
8:15 Tin, Mordekaia chu lal puan, a dumpawl leh a var inbelin, rangkachak lallukhum ropui tak leh puan zai sin kawrfual senduk inbelin lal in ata chu a chhuak a; Susan khua chu an au dur dur a, an lawm êm êm a.
8:16 Juda-ho chuan eng te, lawmna te, hlimna te, chawimawina te an nei a.
8:17 Lal thupêk leh lal thu tihtluk thlenna ram then leh khua apiangah chuan lawmna leh hlimna an nei a, ruaite an theh a, awm nite an kham a. Tin, chung rama mite zinga tam tak chu Juda-ah an insiam a; Judate chu an lo hlau ta a.
9:1 Chutichuan, thla sâwm leh thla hnihna, Adar thla, ni sâwm leh ni thum ni, Juda-ho hmêlmaten an chunga rorêl an beisei ni, lal thupêk anga an tih ni tûr chu a lo hnai ta a; nimahsela a leh alingin Judaten anmahni hawtute chunga ro an relna a lo ni ta zawk a;
9:2 lal Ahasuera ram then zawng zawnga Judahote chu an chhiatna zawngtu chunga kut thlâk tûrin an khuaahte chuan an pungkhawm a; tuman an chelh ta lo va, anmahni chu mi zawng zawngin an hlau ta a.
9:3 Chu mi ram thena mi tha zawng zawng te, hotu te, ram awptu te, lal hnathawkutte chuan Judate chu an tanpui ta a, Mordekaia an hlauh avângin.
9:4 Mordekaia chu lal ina mi ropui tak a ni a, a hming chu an ram then zawng zawngah a thang ta bawk a; Mordekaia chu a ropui ta deuh deuh a ni.
9:5 Tin, Judate chuan an hmêlmate chu khandaihin an sam a, an that a, an tiboral a, anmahni hawtute chungah an duh ang angin an ti a.
9:6 Lal in Susan-ah chuan Judaten mi zanga an that a, an tiboral a.
9:7 7-10, Tin, Hamedatha fapa, Judate hmêlma Hamana fapate sawm, Parsandatha te, Dalphona te, Aspatha te, Poratha te, Adalia te, Aridatha te, Pernasta te, Arisaia te, Aridaia te, Vaizatha te an tihlum a; râllâk sum erawh chu an khawih lo.
9:8 7-10 Tin, Hamedatha fapa, Judate hmêlma Hamana fapate sawm, Parsandatha te, Dalphona te, Aspatha te, Poratha te, Adalia te, Aridatha te, Pernasta te, Arisaia te, Aridaia te, Vaizatha te an tihlum a; râllâk sum erawh chu an khawih lo.
9:9 7-10 Tin, Hamedatha fapa, Judate hmêlma Hamana fapate sawm, Parsandatha te, Dalphona te, Aspatha te, Poratha te, Adalia te, Aridatha te, Pernasta te, Arisaia te, Aridaia te, Vaizatha te an tihlum a; râllâk sum erawh chu an khawih lo.
9:10 7-10, Tin, Hamedatha fapa, Judate hmêlma Hamana fapate sawm, Parsandatha te, Dalphona te, Aspatha te, Poratha te, Adalia te, Aridatha te, Pernasta te, Arisaia te, Aridaia te, Vaizatha te an tihlum a; râllâk sum erawh chu an khawih lo.
9:11 Chu mi ni chuan lal khawpui Susan-a an thah zat chu lal hmaah an rawn thlen a.
9:12 Tin, lal chuan lalnu Estheri hnênah, "Judate chuan lal khawpui Susan-ah hian mi zanga leh Hamana fapate sawm an that a, an tiboral ta, lal ram then dangah chuan engtin tak ang maw! Eng nge i dil dawn le? Pêk i ni ang; eng nge i la duh leh dawn? tih ani ngei ang," a ti a.
9:13 Tin, Estheri chuan, "Lalin rem a tih chuan, Susan-a Judate hian vawiina thupêk ang bawk hian naktukah pawh ti sela. Hamana fapa sawmte chu awhhlumnaah khai kan ni rawh se," a ti a.
9:14 Tin, lal chuan chutianga ti tûr chuan thu a pe a; Susanah thupêk chu an puang a. Hamana fapa sawmte chu an khai kang a.
9:15 Tin, Susan-a Judate chu Adar thla, ni sâwm leh ni li ni pawhin an pung khâwm a, Susan-ah mi zathum an that a; nimahsela râllâk sum chu an khawih lo.
9:16 Tin, Juda dang lal ram then tina awmte pawh an pung khâwm a, inchhanhim tûrin tan an khawh a, an hmêlmate lakah ralmuangin an awm a, anmahni hawtute zinga mi singsarih leh sângnga an that a; nimahsela râllâk sum chu an khawih lo.
9:17 Adar thla ni sawm leh ni thu niin chu chu an ti a, tin, ni sawm leh ni li ni chuan an chawl a, ruaitheh ni leh hlimna niah an siam a.
9:18 Susan-a Judate erawh chu chu mi ni, ni sâwm leh ni thum leh ni sâwm leh ni li ni chuan an pung khâwm a; ni sâwm leh ni nga ni chuan an chawl a, ruaitheh ni leh hlimna niah an siam a.
9:19 Chuvang chuan a ni, kulh nei lo khuatea Judate chuan Adar thla ni sawm leh ni li chu hlimna leh ruaithehna ni leh ni ropui leh ei tûr inpek tawnna niah an siam ni.
9:20 Tin, Mordekaia chuan chung thil chu a ziak a, lal Ahasuera ram thente chhûnga Judate zawng zawng, lamhnai leh lamhlaa mite lehkha a thawn a,
9:21 21-22, Adar thla, ni sawm leh ni li ni leh ni sâwm leh ni nga ni chu kum tin, awm nia hman tûrin thu a pe a; chu mi ni chuan Judate chu an hmêlmate laka ralmuanga an awm tak avâng leh chu mi thlaa lungngaihna chu an tan lawmna a chan tak a, tahna ni chu lawmawm taka a lo chan tak avangin; tin ruaitheh ni leh hlimna ni leh chanvo inthawn ni leh mi retheite thilpêk ni atâna siam tûrin thu a pe bawk a.
9:22 21-22, Adar thla, ni sawm leh ni li ni leh ni sâwm leh ni nga ni chu kum tin, awm nia hman tûrin thu a pe a; chu mi ni chuan Judate chu an hmêlmate laka ralmuanga an awm tak avâng leh chu mi thlaa lungngaihna chu an tan lawmna a chan tak a, tahna ni chu lawmawm taka a lo chan tak avangin; tin ruaitheh ni leh hlimna ni leh chanvo inthawn ni leh mi retheite thilpêk ni atâna siam tûrin thu a pe bawk a.
9:23 Tichuan an lo tih tan tawh sa ang leh Mordekaian an hnêna a thawn angin Judate chuan tih an tum ta a;
9:24 Agag mi Hamedatha fapa Hamana, Judate hmêlma chuan Judate chu tiboral tûrin a phiar a, Aienna a lo siam tawh diam si a, chu chu anmahni timang tûr leh tiboral tûra aienna a ni:
9:25 nimahsela lal hmaa chu thu chu a lo thlen chuan suahsualthlâk taka Judate a phiarna chu ama lu chungah a let ang a, amah leh a fapate chu khaikan tûr ani tih lehkhain thu a pe a ni.
9:26 Tin, chu aienna avâng chuan chung nite chu Aien nite an ti a. Chutichuan chung lehkha thu zawng zawng avâng te, chung thil lo thleng an hmuh avâng te, an chunga thil lo thleng avângte chuan.
9:27 Judate chuan anmahni chhanah leh an thlahte leh anmahni rawn bel apiangte chhanah thlasik anga khel lovin chung nite chu lehkha thawna chuang ang leh a hun ruat ang tak chuan kum tin, awm nia hmang tûrin an ti a;
9:28 tin, chung nite chuan chhuan zawng zawng a chhûngkaw tinah, ram then tinah, khaw tinah, an hre rengin awm niah an hmang tûr a ni; tin, chung Aien nite chu Judate zingah ngaihthah mai tûr ani lo va, chu mi hriat rengna pawh an thlahteah tawp mai tûr ani lo an ti a.
9:29 Chutichuan Abihaila fanu, lalnu Estheri leh Juda mi Mordekaia chuan Aien chungchanga lehkha thawn pahnihna chu tinghet tûrin thu nei takin an ziak a.
9:30 Tin, Ahasuera ram then za leh sawmhnih leh pasariha Juda-ho zawng zawng hnênah chuan tha takin lehkha an thawn a.
9:31 "Juda mi Mordekaia leh Lalnu Estheri thupêk ang leh anmahni ngei pawhin anmahni leh an thlahte tana chaw nghei leh tah ni tûra an lo ruat angin heng Aien nite hi an hun ruatah an serh tûr a ni," tiin.
9:32 Aien kut hman dan chu Estheri thupêkin lehkhaah ziak a ni.
10:1 Chutichuan, lal Ahasuera chuan a ram leh tuifinriat thliarkarte chu chhiah a chawitir a.
10:2 A thiltihthiehna leh a chaknaa a thiltih zawng zawng leh Mordekaia ropuina chungchang, lalin a tihchungnun dan thu kimchang takin Medai leh Persia lalte lal lai chanchin ziakna buah a chuang a ni lâwm ni?
10:3 Juda mi, Mordekaia chu lal Ahasuera dawttu ani a, Judate zingah chuan mi ropui tak, a unaute tam tak lung tiawi a, a chipuite thatna zawng a, a hnampuite zawng zawng hnêna thlamuanna thu sawi thin a ni a.
posted by zoblog @ 12:12 PM  
0 Comments:
Post a Comment
<< Home
 
About

Name: zoblog
Home:
About Me:
See my complete profile
Previous Post
Archives
Mizo Websites
:bloremizo::buannel::chhawkhlei: :Dmzp::fartuah::hyderabadmizo: :khampat::lawrkhawm::lelte: :misual::mizobooks::mzbloggers: :mizomethodist::mizoramhouse: :mizoramuniversity::mizoserver: :mizoweaving::mumbaimizo: :samaw::sinlungnews::zawlbuk: :zomireunification::zonet::zoram: :zotalk:
© MIZO CLAN by Mizoclan Blog