| Wednesday, September 12, 2007 |
1:1 Uz ramah chuan mi pakhat a awm a, a hming chu Joba a ni; chu mi chu mi famkim, mi ngil tak, Pathian tih mi, thil tha lo laka insûm thei mi a ni a.
1:2 Tin, fapa pasarih leh fanu pathum a nei a.
1:3 A neihnunzia chu, berâm sângsarih, sanghawngsei sângthum, bâwngpa tuak zanga, sabengtungpui zanga leh chhiahhlawh tam tak a nei a ni: tichuan he mi hi khaw chhak fate zingah chuan mi ropui ber a ni a.
1:4 Tin, a fapate chuan an inah an hun zelah ruai intheh chhawkin an kal khâwm thin a, an farnu pathumte chu an hnêna ei leh in tûrin an sawm thin a.
1:5 Tin, chutia an ruai thehte an zawh hnuah chuan Joba chuan anmahni a ko va, a thian hlawm a; zing takah a tho va, an zaa hming kimin hâlral inthawi a hlan a: Joba chuan, "Ka fapate hian thil an lo tisualin Pathian an lo sawi chhia a ni mahna," a ti a ni. Joba chuan hetiang hian a ti fo thin a ni.
1:6 Tin, Pathian fapate LALPA hmaa an inlan ni a lo awm a, Setana pawh an zingah a lo tel ve a.
1:7 Tichuan LALPA chuan Setana hnênah chuan, "Khawi lam atanga lo kal nge i nih?" a ti a. Tin, Setana chuan LALPA chu a chhâng a, a hnênah, "Leia ka vahvelna atang leh ka chhohna atangin, " a ti a.
1:8 Tin, LALPA chuan Setana hnênah, "Ka chhiahhlawh Joba hi i ngaihtuah ngai êm? Lei chungah hian amah anga famkim, mi ngil, Pathian tih mi, thil tha lo laka insum thei mi tumah an awm lo asin," a ti a.
1:9 Tichuan, Setana chuan LALPA chu a chhâng a, a hnênah, "Joba chuan vang awm lovin a tih êm ni?
1:10 Amah chu a in nên, a neih zawng zawng nên, kil tinah i hung vêl a ni lâwm ni? A kut hnathawh mal i sawm a, he ramah hian a lo neinung sawt êm êm atin a ni.
1:11 Tunah hian i kut thawh la, a neih zawng zawng hi han khawihsak teh, i hmaichhan ngeiah a sawichhe mai ang che," a ti a.
1:12 Tin, LALPA chuan Setana hnênah chuan, "Ngai rawh, a neih zawng zawng chu i kutah a awm e, amah tak erawh chu khawih suh ang che," a ti a. Tichuan, Setana chu LALPA hma ata a chhuak ta a.
1:13 Ni khat chu a fanu a fapaten an u ber inah chaw an ei a, uain an in laiin,
1:14 Joba hnênah chuan zualko a lo tlan a, "bâwngpate chuan lei an hrut laia sabengtungte an kianga an tlat lain,
1:15 Seba miten an rawn bei a, an la a, chhiahhlawhte chu khandaihin an that a, keimah chauh hi hrilh tûr chein ka lo chhuak a ni," a rawn ti a.
1:16 A la sawi lai mek chuan mi dang a lo tlan leh a, van atangin Pathian mei a lo tla a, berâmte leh chhiahhlawhte chu a kang a, a tiral vek mai a, keimah chuah hi hrilh tûr chein ka lo chhuak a ni," a ti a.
1:17 A la sawi lai mek chuan mi dang a lo tlan leh a, "Kaldai-ho pâwl thumah an insiam a, sanghawngseite chu an rawn bei a, an la vek a; a ni, chhiahhlawhte pawh chu an that a, keimah chauh hi hrilh tûr chein ka lo chhuak a ni," a ti a.
1:18 A la sawi lai mek chuan mi dang a lo la tlan leh a, "I fanu te, i fapaten an u ber ina chaw an ei a, uain an in laiin,
1:19 Ngai teh, thlalêr atangin thlipui a lo thawk a, in chu kil liah a rawn nam a, nula-tlangvâlhote chu a delh a, an thi ta vek mai, keimah chauh hi hrilh tûr chein ka chhuak a ni," a ti a.
1:20 Tichuan, Joba chu a tho va, a puan a pawt thlêr a, a lu a ziat kawlh a, leiah a tlu a, Pathian a bia a.
1:21 "Ka nu pum ata saruakin ka lo chhuak a, saruak vekin ka kir leh dawn a nih hi; LALPAN a pe a, LALPAN a la leh ta a; LALPA hming chu fakin awm rawh se," a ti a.
1:22 Heng zawng zawngah hian Joba chu a sual lo va, Pathian chu a mawhchhiat hek lo.
2:1 Pathian fapate LALPA hmaa an inlan ni a lo awm leh a, Setana pawh LALPA hmaa inlan tûrin an zingah a lo kal ve a.
2:2 Tin, LALPA chuan Setana hnênah, "Khawi lam atanga lo kal nge i nih?" a ti a. Tin, Setana chuan LALPA chu a chhâng a, "Leia ka vahvelna atang leh ka chhuk ka chhohna atangin," a ti a.
2:3 Tin, LALPA chuan Setana hnênah chuan, "Ka chhiahhlawh Joba hi i ngaihtuah ngai êm? Amah anga mi famkim, mi ngil Pathian tih mi, thil tha lo laka insum thei mi hi leiah tumah an awm lo asin, vang awm lova mi tihchhiattir chung pawhin a ngai reng a la ni," a ti a.
2:4 Tin, Setanan LALPA chu a chhâng a, "Vun aiah vun tih a ni a, a ni, miin a neih zawng zawng a nunna atân a pe phal ang chu!
2:5 Tunah i kut thawh la, a ruh leh a tisa ngei khawihsak teh, i hmaichhan ngeiah a sawichhe mai ang che," a ti a.
2:6 Tin, LALPA chuan Setana hnênah, "Ngai rawh, i kutah a awm e, a nunna erawh chu zuah ang che," a ti a .
2:7 Chutichuan, Setana chu LALPA hma ata a chhuak a, Joba chu a kephah hnuai atangin a lu thlengin pânchhia a veitir a.
2:8 A inhiah nân lampei a la a, vut zingah a thu a.
2:9 Tichuan, a nupui chuan a hnênah, "I ngai rengin êm ni i awm dawn? Pathian chu sawichhia la, thi la a ni mai," a ti a.
2:10 Mahse, ani chuan ahnênah, "Nang hi hmeichhe a tawngin i tawng a nih hi. Eng nge, Pathian hnên ata thil tha kan hmu a, thil tha lo pawh kan hmu lo vang êm ni?" a ti a. Heng zawng zawngah hian Joba chuan thu sual a sawi lo.
2:11 Tin, Joba thian pathumte chuan heng thil tha lo a chunga lo thleng zawng zawng hi an hriat chuan mahni hmun theuh atangin an lo kal a; Elifaza temani mi leh Bildada Shuhi mi leh Zofara Naamathi mite chu: amah tuarpui tûr leh thlamuan tûra a hnêna lo kal hun an ruat tlang a.
2:12 Hla deuh atanga an han en chuan an hre lo va, an rawl an chhuah a, an tap a; an puante an pawt thlêr a, an lu chungah vaivut an vanvawrh a.
2:13 Chutichuan, ni sarih leh zan sarih leiah an thutpui a, tumahin a hennah thu kam khat mah an sawi lo; a natna chu na emin an hria a ni.
3:1 Hetih hnu hian Joba chuan a kâ a ang a, a pianna ni chu ânchhia a lawh ta a.
3:2 Tichuan Joba chuan, heti hian a sawi a:
3:3 "Ka pianna ni chu boral rawh se, Mipa fa a pai ta e, tihna zan nên chuan.
3:4 Chu ni chu thim lo ni se, Chung lam atangin Pathianin ngaihsak lo se; Eng pawh chu a chungah eng suh se;
3:5 Thim leh thihna hlim chuan an ta atân chuhse, Chhumin bawh reng mai sela; Chhun tithimtu zawng zawng khan tihlau rawh se.
3:6 Chu zan chu zawng thimin chelh reng mai sela, Chu kuma nite zingah chuan him ve lo sela; Thla chhiarna zingah pawh lo tel suh se.
3:7 Chu zan chu zan khawhar lo ni se, tah chuan hlim thawm leng suh se.
3:8 Ni ânchhelawh thiamte chuan ânchhia lawh rawh se, Leviathan chawh thawh thiamte chuan.
3:9 A vartian arsi chu thim sela, Eng lo nghak se, hmu si lo sela. Zing khawfingchat pawh hmu hek suhse:
3:10 Ka nu chhul kawngka a lo khar loh avâng leh Ka mithmuha buaina a thup hek loh avangin.
3:11 Engati nge chhula ka lo thih loh? Engati nge pum ata ka chhuaha ka thaw a lo tawp loh?
3:12 Engah nge mal chunga mi lo chawi? Engah nge ka hnek tûr hnutein mi lo hmuah?
3:13 Chutin ka mu ang a, ka reh riai tawh tûr; Ka muhil ang a, ka chawl tawh tûr:
3:14 Lei lalte leh remruatpuitute, Hmun ram lo indinsaktute nên chuan;
3:15 A nih loh leh, hotute rangkachak sum neia, Tangkaa an in tikhatute nên chuan:
3:16 A nih loh leh, a hun lova piang thup bo ang ka ni tawh tûr, Nausen eng hmu ngai lote ang mai hian.
3:17 Tah chuan mi suaksualten chawhbuai an bang a, Tah chuan mi chaute pawh an chawl a.
3:18 Tah chuan mi tangte an chawl hahdam hlawm a, Vengtu aw pawh an hre lo.
3:19 Tah chuan mi lian mi te an awm za a. Chhiahhlawh pawh a pu lakah a fihlim.
3:20 Engah nge hreawm tuar hnênah eng pêk a niha, Engah nge rilrua mangang hnênah nunna pêk a nih?
3:21 Thih chak êm êma, hmu si lo, Ro phûm zawn aia nasaa zawngtu,
3:22 Thlan an hmuha lawma, nasa taka hlim êm êm tûr hnênah chuan?
3:23 Mi a kawng thup bosaka hnênah engati nge eng pêk a nih ? Pathianin huang a hung hnan hnênah chuan?
3:24 Ka ei dawn pawhin ka thaw a pik a, Ka rum chu tui angin a luang chhuak a.
3:25 Ka tihzâwng tak ka chungah a lo thleng a, ka hlauhzawng tak ka hnênah a lo thleng.
3:26 Ka hahdam lo va, ka awm hle hle thei lo va, ka chawl thei hek lo; buaina a lo thleng zawk a ni.
4:1 Tichuan, Elifaza Temani mi chuan a chhâng a, heti hian a ti a:
4:2 I hnênah thu kam khat sawi ila, i hua ang êm? Mahse, tawng lovin tunge insum thei ang le?
4:3 Ngai teh, mi tam tak i lo zirtir a, Kut chak lote i tichak tawh a.
4:4 I thuin tlute a tungding a, Khup zawite chu i tichak a.
4:5 Tunah i chungah a lo thleng ve ta a, i chau va, A han khawih chia, i buai ta a ni.
4:6 I Pathian tih hi i rinchhan ber, I kawng ngilna hi i beisei chhan a ni lo vem ni?
4:7 Han ngaihtuah vang vang teh, pawi khawih lo tunge boral? Khawnge mi ngil tihbovin an awm ngai?
4:8 Keia hmuh dan chuan khawlohna lei leta, Buaina tuh chuan a ngai vek an seng leh thin.
4:9 Pathian thawah an boral thin a, A thinrimna chhemin an ral thin.
4:10 Sakeibaknei rum te, sakeibaknei kawlh awrawl te, Sakeibaknei vanglai ngho te a tliak e.
4:11 Sakeibaknei upa chu ei chhamin a boral a, Sakeibakneipui no hruaite chu an darh e.
4:12 Aruk tein ka hnênah thu a lo thleng a, Ka beng hian a phunru ser ser chu a hria.
4:13 Mi mut reh lai taka Zan inlârna chu ka ngaihtuah laiin,
4:14 Hlauhna ka chungah a lo thleng a, khurhna nên, Ka ruh zawng zawng a tinghing a.
4:15 Tichuan, ka hmai hmaah thlarau a kal a, Ka hmulthi a ding sung sung.
4:16 A ding a, mahse, a hmêl lan dan ka thlei thei lo; Riruang zawng ka hmaah a awm ngei mai; A reh thiap a, tin, aw ka hria a.
4:17 Pathian hmaah mihring thi thei a fel tawk êm ni? A siamtu hmaah mihring a thianghlim tawk êm ni?
4:18 Ngai rawh, a chhiahhlawhte pawh a ring zo lo va, A vântirhkohte pawh a a ti a ni:
4:19 Hlum ina chengte chu a va ring lo zual dawn êm, Vaivuta siam mai a ni a, Phengphehlep anga awngrawp mai te chu!
4:20 Zing leh tlai karah an boral a, Tukhaw ngaihsak lohvin an ral zel thin a ni.
4:21 An chhûnga puan in thlunna hrui pawh chah a nihin An thi mai a ni lâwm ni, finna nei lovin?
5:1 Han ko teh, chhâng tûr che an awm teh reng emaw? Mi thianghlim tu lam ber nge i hawi dawn?
5:2 Vuina hian mi a a tihlum thei a, Itsiknain mi mawl a that thei. Itsiknain mi mawl a that thei.
5:3 Mi a tak zung kai ka hmu a, Mahse, a chenna chu ânchhia ka lawh nghal a.
5:4 A fate chu an him awzawng lo, Kulh kawngka bulah chuan chil thlukin an awm a, Chhan chhuaktu tûr lah an awm hek lo.
5:5 A buh thar tûr riltamten an ei zo va, Hling kar ata pawh an la a, A neih zawng zawng chu tuihalten an hap zo va.
5:6 Tuarna hi vaivut ata lo chhuak a ni lo va, Buaina pawh hi lei atanga lo to chhuak a ni hek lo;
5:7 Buai tûrin mihring a lo piang ani zawk, Meisi chung lamah a chho angin.
5:8 Kei zawngin Pathian lam ka zawng ang a, Pathian hnênah ka chungthu ka kawltir ang.
5:9 Thil ropui tak zawn chhuah rual loh te, Thil mak tak mai chhiar sen lohte titu chu:
5:10 Ani chuan lei chungah ruah a rawn surtir a, Lo chungah tui a rawn luantir a:
5:11 Mi tlâwmte chu a chawisâng a, Lusunte chu himnaah a dah chho va,
5:12 Mi fingte remruat a phet chhia a, An kutin a tum a puitlin lo.
5:13 Mi fingte chu anmahni fin verveknain a awk a, Mi vervek remruat chu theh thlak der a ni.
5:14 Chhun engah thim an tawk a, Chhun laiah zan angin an dap thin.
5:15 An kaa khandaih lak ata retheite a chhan chhuak a, Mi chak kut ata tlachhamte pawh.
5:16 Chutichuan, retheite chuan beisei an nei a, Khawlohnain a ka a chip a.
5:17 Ngai rawh, Pathianin mi a thunun chu a eng a thawl ê, Chuvangin, Engkimtitheia thununa chu ngainep suh.
5:18 Ani chuan a tina a, a tuam leh a, A tihliam a, kutin a tidam leh a ni.
5:19 Buaina parukah a chhan chhuak ang chia, A ni, pasarihah, thil tha lo rêng rêngin a khawih lo vang che.
5:20 Tam tlakin thihna ata a tlan ang chia, Indonaah chuan khandaih thiltihtheihna lak ata.
5:21 Tawngkam tha lo lakah thup i ni ang a, Chhiatna a lo thlen pawhin i hlau lo vang.
5:22 Chhiatna leh tam chu i nuihsan ang a, leia sakawlhte i hlau hek lo vang.
5:23 Rama lungte chu i thurualpui dawn si a, Rama sakawlhte chuan an rem ang che.
5:24 Tin, i puan in chu a ralmuang tih i hria ang a, I huang chu i tlawh ang a, kim lo engmah a awm lo vang.
5:25 I thlahte chu tam tak an ni ang a, I rila rahte chu leia hlobet zat an ni tih i hria ang.
5:26 Kum tling takin i thlan i thleng ang a, A hun tea buhphal tel khâwm tak ang mai hian.
5:27 En teh, kan chhui chhuah tak hi, heti ngei hi a ni, Ngaithla la, i tana tha tûrin hre rawh.
6:1 Tichuan, Joba chuan a chhâng a, heti hian a ti a,
6:2 Aw, ka manganna hi buk ni teh sela, Ka vanduaina hi buknaah dah ni teh sela!
6:3 Tuipui tiau aiin a rit dawn si: Chuvang chuan ka thu a bung a ni.
6:4 Engkimtitheia thal ka chungah a awm si a, A tûr chu ka thlarauvin a in zo va; Pathian tihbaiawmna chuan mi ep a.
6:5 Ram sabengtungin hlobet a peh laiin a hram êm ni? Bâwngpa pawh a buhpawl chungah a bu êm ni?
6:6 Tuina nei lo chu chi tel lovin a ei theih êm ni? Artui pawnvar pawh hian hanna a nei êm ni?
6:7 Ka nunna hian khawih pawh a duh lo ve, Ka tan ei tûr tenawm tak ang a ni.
6:8 Aw, ka dil chu hmu thei teh ila! Pathianin ka thil chak chu mi te pe teh se!
6:9 Pathianin mi rawtsawm mai duh teh se! A kut lekin mi tan chhum mai teh sela!
6:10 Chuti pawhin thlamuanna ka la nei cheu, A ni, ka lawm cheu vang, natna thlah loh chung pawhin, Mi thianghlima thu chu ka phat loh avangin.
6:11 Ka chakna hi eng nge nia, ka han nghah rengna tûr chu? Ka tawpna eng nge nia, ka han dawh rengna tûr chu?
6:12 Ka chakna hi lung chakna êm ni? ka tisa pawh hi dar êm ni?
6:13 Tha han so tûr reng ka nei lo va, Keimahah sawm khâwm tûr reng a awm lo.
6:14 Chau tep tawh chungah chuan a thian a ngilnei tûr a ni a. Engtimtithei tihna hawisantu chungah pawh.
6:15 Ka unaute chu kawrte rum anga bumhmang an ni a, Kawrte tui relhtu ang mai hi;
6:16 Tui khal avanga lo duma, Vur inthup thinna chu:
6:17 A lum hun chuan an kang thin a, A lo sat chuan an hmun ata an bo thin.
6:18 Sumdawng rualte chuan an kawng an rawn pensan a, Ram rovah an lût a, an boral a.
6:19 Tema sumdawng rualte chuan an en a. Seba khualzinte chuan an beisei a;
6:20 An beisei tak a, an hlawhchham a, An va kal a, an hrilhhai a.
6:21 Ka chungah chutiang chauh chu in ni, Ka chhiat tawh in hmu a, in hlau va.
6:22 'Mi pe teh u' emaw, 'In sum in pai mi hlan teh u' emaw
6:23 Hmêlma kut ata mi chhan chhuak teh u' emaw Hnehchhiahtute kut ata mi tlan teh u' emaw ka ti êm ni?
6:24 Mi zirtir ula, ka ngawi ang e; Ka bona lai mi hriattir rawh u.
6:25 Thu dik chu a chak êm êm! mahse, in thu hian eng nge a thawh?
6:26 Tawng mai mai hi zilh in tum êm ni? Mi mangang tawng hi thli ang mai a ni.
6:27 A ni, pa nei lo chungah thum in vawr duh a, Sumdawn nân in thian in hmang a.
6:28 Tunah mi en teh mah u, In hmai hmaah ka daw hauh lo vang.
6:29 Lamlet ula, mi dem mai teh suh u, Lamlet ula, ka thu rel fel a la ni hlei nem.
6:30 Ka leiah dik lohna a awm êm ni? Thil tha lo chu a thlei thei lo vem ni?
7:1 Leiah hian mihringin tawn tûr a nei reng a ni lâwm ni? A nite chu inhlawhfa ni ang a ni lâwm ni?
7:2 Chhiahhlawh daihlim chak êm êmtu ang. Leh inhlawhfa a hlawh thlir rengtu ang hian.
7:3 Engmah lo maiin thla tam ka lo hmang ral a, Zan ninawm takte ka tan ruat a ni.
7:4 Ka mutin 'Engtik takah tho ang i maw' ka ti a; Mahse, zan a rei êm êm; Khawfingchah thlengin ka let ka let a.
7:5 Ka tisa chu lung leh bawlhhlawhin a khat a, Ka vun chu a lo phui a, a keh thar leh a.
7:6 Ka nite hi puantahtu khawhthei aiin a liam rang a, Beiseina tel lovin an ral a.
7:7 Ka nunna hi thli mai a ni tih hre reng la, Ka mitin thil tha a hmuh tawh dawn loh hi.
7:8 Mi hmutu mit chuan mi hmu ngai tawh lawng, I mit ka chungah a fu ang a, mahse, ka awm tawh lo vang.
7:9 Chhum a kiang a, a boral angin Seola chhuk tawh an chhuak leh ngai lo.
7:10 A inah chuan a kir ngai tawh lo vang a, A hmunin amah a hre leh tawh hek lo vang.
7:11 Chuvang chuan ka kam ka sum lo vang; Thinlung lunghnurin ka sawi dawn e; Rilru na ngawih ngawihin ka phunnawi dawn e.
7:12 Tuipui nge maw ka niha, tuipui rulpui nge maw ka niha, Nangin mi enthlatu i dah ni?
7:13 Ka khumin mi tinuam ang a, Ka phunnawi chhan hi ka muthmunin a tinep ang, ka ti a;
7:14 Nang lah chuan mumangah mi tihthaih a, inlârnate hmangin mi tihlau va,
7:15 Ka nun hian rehhlum a thlang hial ta zawk a, He ka taksaa chen reng ai hian.
7:16 Ka ning hluah hluah, ka nung rei lo vang; Ka awm awmin ka awm ang e, ka nite hi engmah lo an nih hi.
7:17 Mihring hi eng nge maw a niha, i ngaihsana, A chunga i rilru i nghah tlata,
7:18 Tuk tin, amah i tlawh thina, eng lai pawha i fiah thin ni?
7:19 Eng chen nge khaw dang hawisan lovin i awm anga, Ka chil ka lem chhûngte pawh mi hlamchhiah lova i awm dawn?
7:20 Ka sual anih pawhin i chungah eng nge ka tih ni, Aw mihringte vengtu? Engah nge i chhinchhiah atân mi daha, Mahni tana phurrit ka nih tak hial hi le?
7:21 Engah nge ka bawhchiat i ngaihdam lohva, Ka khawlohna i lak bo loh le? Tunah vaivutah ka mu dawn ta si a, Mi zawng chiam ang, mahse, ka awm lo vang.
8:1 Tichuan Bildada Suhi mi chuan a chhâng a, heti hian a ti a:
8:2 Eng chen nge heng thil hi sawi dawn a, I kamchhuak chu thlipui ang a nih reng dawn?
8:3 Pathianin rorêlna a kailek ngai êm ni? Engkimtitheian a dik chu a kailek ngai êm ni?
8:4 I fate a chungah an sual a nih chuan An bawhchhiatna kutah a mantir a:
8:5 Pathian i zawn ngat ngata, Engkimtitheia hnêna i dil ngat ngat chuan,
8:6 Thianghlim leh ngil i nih chuan I tan bengvar a thawh ngei ang a, Dinhmun dik a pe ang che.
8:7 I bul lamah tê mah la, I tawp lamah i lian ang.
8:8 Hman lai hun kha zawt chhuak teh aw, An pi pute hmuh chhuah kha ngaihtuah teh,
8:9 Nimina mi lek kan ni, eng kan hre si lo. Leia kan awm chhûng hi hlimthla chauh a nih hi:
8:10 Chung chuan an zirtirin an hrilh chein An hriatna thate chu an sawi chhuak dawn lawm ni?
8:11 Dum lovah pumphir a to thei êm ni? Tui lovah phairuang a tha thei êm ni?
8:12 A la duah lai reng pawhin sahthluk lohvin. Thlai dangte aiin a uai hma thin.
8:13 Pathian theihnghilhtu kawng chu chutiang a ni, Pathian ngaihsak lo mi beiseina chu a bo vang.
8:14 A innghahna chu a chim darh ang a, A rinchhan chu maimaw ril mai a ni.
8:15 A in a ngheng a, mahse, a dawl lo, A vuan tlat a, mahse, a tuar lo vang.
8:16 Ni chhuah hma chuan a hring a, A chawrte chuan a huan a hliap a,
8:17 Sih tui sirah a zung a thlak a, Lung hmun a hmu a,
8:18 A hmun ata tihbo a nihin, Ka hmu ngai lo che, tiin a phat ang.
8:19 Ngai teh, hei hi a kawnga hlimna chu a ni mai, Lei atang chuan a dangte an lo to chhuak ang.
8:20 Ngai teh, pathianin mi tha a paih bo lo vang a, Thil sual titu a tungding hek lo vang.
8:21 I ka nuihnain a tikhat ang a, I hmui pawh hlim au thawmin.
8:22 A hawtu che chu zahnaa tuam an ni ang a, Mi suaksual puan in pawh a awm tawh lawng.
9:1 Tichuan, Joban a chhâng a, heti hian a ti a:
9:2 Chuti a nih zawng dik takin ka hria, Mahse, engtin nge Pathian hmaah mi a fel theih ang?
9:3 Amah hnial kalh duh ang se, Vawi sângah vawi khat pawh a chhâng thei lo vang.
9:4 Thinlunga fing, chaknaa engkimtithei, A laka inchhûngawng tunge hmuingil?
9:5 Tlangte a sawn a, an hre lo va, A thinrima a tihdanglam lai khan.
9:6 Lei a hmunah a sawi nghing a, A bante chu a nghing dur dur a.
9:7 Ni thu a pe a, a chhuak lo va, Arsite pawh chu a kharkhip a.
9:8 Mahni chauhva van tipharhtu leh Tuipui fawn chunga kal chu.
9:9 Zangkhua te, Chhohreivung te, Siruk te siamtu, Chhim lam pindante siamtu chu.
9:10 Thil ropui chhui chhuah rual loh te, A ni, thil mak tak chhiar sen rual loh titu chu.
9:11 Ngai teh, ka bulah a kal a, ka hmu si lo; A tlâng ta zel a, ka hre si lo.
9:12 Ngai teh, a la mai a, tunge khap thei? Eng nge i tih, tunge ti ang le?
9:13 Pathianin a thinrimna a sum lo vang a, Rahab puitute a hnuaiah an kun a.
9:14 Kei tehlulin engtin nge ani chu ka chhan ang a, Amah hnial nân thu eng nge in thlan chhuah ang?
9:15 Dik mah ila, ani zawng ka chhâng lo vang, Ka khinna chu ka dil zawk ang.
9:16 Ko ila, ani chuan mi chhâng sela, Ka thu a dawnsawn ka ring chuang lo.,
9:17 Thlipuiin mi tichia a, Vang awm lovin ka hliamte mi belhchhah a,
9:18 Thawk ka lak pawh mi phalsak lo va, Hrehawmin mi tikhat a.
9:19 Chakna thu-ah chuan, en teh, Chaka chu, rorêlna lam thu-ah ani chu tunge khâwm ang?
9:20 Dik mah ila, ka ka hian thiam loh mi chantir ang. Demawm lo mah ila, mi chantir ang.
9:21 Demawm lo ka ni, ka inngai sâng lo; Ka nun hi ka hmusit a ni.
9:22 A thuhmun vek mai, chuvang alawm Tha famkim pawh, suaksual pawh a tichhia, ka tih ni.
9:23 Chhiatnain thihna a thlen thut chuan, Mi nun tlâng tuarna chu a nuihzat ang.
9:24 Lei hi mi suaksual kutah pêk a ni a, A rorêltute hmai a khuh a,
9:25 Amah a nih loh chuan tu dang nge ni ang? ka hunte hi zualko tlan aiin a chak a, An thlawk bo va, thil tha reng an hmu lo.
9:26 An kal liam a, lawng chak tak angin, Mupui tum nei bir angin.,
9:27 Ka vuina hi ka theihnghilh ang a. Ka lungngai hmêl hi ka dah bo vang a, Ka intihlim ang, ka tihin,
9:28 Ka lungngaihna zawng zawng hi ka hlau va, Nangin mi tlângah mi ngai lo vang tih ka hria.
9:29 Thiam loh chang tûr ka ni a, Eng nge sawt lo tûra ka tan teh chiam ang?
9:30 Vurin inbual mah ila; Ka kutte chingalin sil mah ila;
9:31 Khuarkhurumah mi hnim tho vang a, Ka silhfente ngei pawhin mi ten ang.
9:32 Rorêlna hmaa ding duna ka chhan tûrin, Ani chu kei anga mihring a ni si lo.
9:33 Kan chunga kut nghat ve ve tûr, Kan kara thu titlutu reng an awm lo.
9:34 Ka lak ata a tiang la bo sela, A tihbaihawmnain mi tihlau suh se.
9:35 Tichuan, amah hlau lovin ka tawng ang, Mahni chuan chutiang ka ni si lo.
10:1 Ka thlain a ning e, ka nun hi,Ka nawmmakin ka phunnawi dawn e:Rilru na êm êm chungin ka tawng dawn hi.
10:2 Pathian hnênah heti hian ka ti dawn:Mi thiam lo suh, i mi demna mi entir zawk rawh.
10:3 Mi hnehchhiaha, i kut hnathawk hmusita,Mi suaksual remruat tih-en hi tha i ti êm ni?
10:4 Tisa mitte chu i nei vein Mihring hmuh angin i hmu êm ni?
10:5 I nite chu mirhing nite ang êm ni?I kumte pawh mihring kumte ang êm nia,
10:6 Ka khawlohnate i chhui teh chiama,Ka sualna pawh i zawn teh chiam ni?
10:7 Mi suaksual ka ni lo tih i hria.I kut ata chhan chhuak tûr lah chu an awm lo.
10:8 I kutin mi din a, mi siam a, kim biaiin,Mahse, nangin mi tiboral a.
10:9 Nangin hlum angin mi siam tih hre reng teh aw;Vaivutah mi chantir leh dawn êm ni?
10:10 Nangin hnute tui angin mi leih chhuakin Hnute khal angin mi hlawm ani lâwm ni?
10:11 Vun leh tisain mi tuam a,Ruh leh thatein mi phiar khâwm a,
10:12 Nangin nunna leh duhsakna mi pe a,I mi enkawlna chuan ka thlarau a zuah a.
10:13 Mahse, heng hi i thinlungan i lo thup a,Nangmahah hei hi a awm tih ka hria.
10:14 Lo sual ila, nangin mi chhinchhiah ang a,Ka khawlohna ata mi tichhuak lo vang.
10:15 Mi suaksual lo ni ta ila, ka chung a pik ang;Mi fel ni ila, ka inluling lo vang; Mualpho letder chungin leh ka hrehawm enin.
10:16 Lo indah sâng ila nangin sakeibaknei pelin mi pel a,Ka chungah mak takin i inentir leh a.
10:17 Ka chungah i thu i tharthawh a.Ka chungah i thinur i tipung a.A hlawp hlawpin mi bei a.
10:18 Eng vanga chhul ata mi la chhuak nge i nih?Tuma hmuh hmain lo thi tawh ila,
10:19 Awm lo ang mai ka lo ni ang a,chhul ata thlana lak ka lo ni mai tûr,
10:20 Ka nite hi rei lo te a ni lâwm ni?Chawl se, mi ngawihsan se, thaw han la hlek teh ila.
10:21 Kir tawh lohna tûr hmuna ka kal hma hian Thimna leh thihna daihlim ramah chuan,
10:22 Thim chhah mup ram, thim tak mai chu,Thihna daihlim, kawngzawng awm lo, Eng pawh thim a nihna hmunah chuan.
11:1 Tichuan, Zofara Naamathi mi chuan a chhâng a, heti hian a ti a:
11:2 Thu heti zozai hi chhan loh theih theih êm ni ang? Mi tawng tamin tham an chang êm ni?
11:3 I uan thu hian mi a tingawi ang êm ni? Tham lo taka i tawng hian tuman an tizak lo vang che maw?
11:4 Ka rin dan hi a dik a,I mithmuhah ka thiang a ni,' i ti si a.
11:5 Mahse, aw, Pathian chu han tawng teh se,I chungah a ka han ang teh se;
11:6 A finna thuruk a hriattir tûr chia,Finna thuah tam tak a ni si a,Chuvangin, hre ta che, i khawlohna aia nepinPathianin i chungah a tih hi.
11:7 Pathian chu i zawng chhuak zo vem ni?Engkimtitheia chu i hmu kim thei êm ni?
11:8 Van aia sâng a ni a, nangin eng nge i tih theih?Seol aia thuk a ni, nangin eng nge i hriat theih?
11:9 A tehna lei aiin a sei zawk a,Tuifinriat aiin a zau zawk.
11:10 A kal tlâng a, a khara,A koh khâwm chuan tunge dal thei ang?
11:11 Mi lawilo chu a hre si a,Khawlohna pawh a hmu, zawng lo mah sela,
11:12 Ram sabengtung no mihringa a pian hunah Mi lawilo chuan hriatna a nei chauh vang.
11:13 Nang chuan i thinlung i dah dik a,A lama kut i phar chuan;
11:14 I kuta khawlohna a awm chuan dah bo daih la,I puan inah fel lohna cheng suh sela;
11:15 Tichuan, hmêlhem lovn i dak chhuak ngei ang:A ni, i nghet ang a, i hlau lo vang;
11:16 I hrehawm i theihnghilh ang a,Tui luang bo tawh angin i hre reng ang:
11:17 I nun chhun chang aiin a eng ang.Thim pawh awm se, zing ang a ni ang.
11:18 Tin, muanawm takin i awm ang, beisei a awm vangin;A ni, i en vêl ang a, muang takin i chawl ang.
11:19 I mu ang a, tumah an tihlau lawng che,A ni, tam takin an be tlawn ang che.
11:20 Mahse, mi suaksual mit chu a thlawn ang a,Tlan chhuahna kawng reng an nei lo vang.An nghahfak ber pawh thih mai a ni.
12:1 Tichuan, Joba chuan a chhâng a, heti hian a ti a:
12:2 A ni ngei mai, mi fing zawng in lo nih hi,In rualin finna a thi ang.
12:3 Mahse, nangni angin hriatna ka nei ve bawk,In lakah ka neu bik lo ve,A ni, tunge thil hetiang hi hre lo awm?
12:4 Thiante nuihzabur ka ni.Kei, Pathian kova, a chhana ngei hi,
12:5 Mi fel, mi famkim si, nuihzabur ka ni.Mi nuamsa rilruah chuan vanduai hmusitna a awm;Rahbi tleute a chang reng a ni.
12:6 Suamhmang puan in a hmuingil a,Pathian tithinurtute an him a,An kuta an pathian rawn kengtute chu.
12:7 Rante pawh zawt teh khai, an zirtir ang che,Chunglen savate pawh zawt la, an hrilh ang che;
12:8 Lei pawh bia la, a zirtir ang che,Luipui sânghate chuan i hnênah an puang ang.
12:9 Heng thil zawng zawngah hian tunge hre lo awm,LALPA kut chuan hei hi a ti a ni, tih hi?
12:10 A kutah thil nung tin nunna leh Mihring chi zawng zawng thlarau a awm.
12:11 Bengin thu a chian lo vem ni.Kain ei tûr a tem ang hian?
12:12 Upa hnênah finna a awm a,Khuareiah hriat thiamna,
12:13 A hnênah finna leh chakna a awm a,Rem hriatna leh hriat thiamna a nei a.,
12:14 Ngai rawh, a thiat a, sak leh rual a ni lo,Mi a khar hnan a, hawn rual a ni lo.
12:15 Ngai rawh, tuite chu a chelh a, an lo kang a,A rawn tir chhuak leh a, leilung an tuam.
12:16 A hnênah chakna leh finna a awm a,Bum leh bumtu a ta an ni.
12:17 Remruattute ruakin a hruai bo va,Rorêltute a tiâ a.
12:18 Lalte phuarna chu a phelh a, An kawng chu kawnghrenin a hreng a.
12:19 Puithiamte ruakin a hruai bo va,Mi chakte a titlu a,
12:20 Mi rinte thusawi a sawn a,Upate hriatna a la bo.
12:21 Miliante chungah hmusitna a leihbua a,Mi chakte taihren a phelhsak a.
12:22 Thim ata thil thukte a dap chhuak a,Thihna hlim chu engah a la chhuak.
12:23 Hnamte chu a tipung a, a tiral a,Hnamte chu a tilian a, a hruai bo va,
12:24 Lei mipui hotute thinlung a la bo va,Thlalêr kawng awm lohnaah a vahvaihtir a.
12:25 Eng awm lovin thimah an dap a,Zu rui angin a paitir a.
13:1 En che u, heng zawng zawng hi ka mitin a hmu a,Ka bengin a hria a, a hre thiam a ni.
13:2 In hriat chu ka hre ve bawk e,In lakah ka neu bik lo ve,
13:3 Mahse, engkimtitheia hnênah chuan sawi ngei ka duh a,Pathian nena ngaihtuah dun ka chak a ni.
13:4 Nangni, dawt phuahchawptu in ni a,In zain daktawr hlu lo in ni e.
13:5 Ngawi hmiah mai teh ula aw!Fin in hlawh zawk tûr.
13:6 Ka ngaihtuah dan ngaithla ula,ka dilna kam chhuak bengkhawn rawh u.
13:7 Pathian tan khawlo takin in tawng ang maw?A tan dawtin in tawng ang maw?
13:8 Amah tanin hleih in neih ang maw?Pathian tan in pawng tan dawn êm ni?
13:9 Zawng chhuak che u sela, a tha dawm êm ni? Miin mihring a bum angin amah in bum dawn êm ni?
13:10 A ruka hleih in neih chuan A zilhhau ngei ang che u.
13:11 A ropuina chuan a tihlau lo vang che u maw? A tihbaiawmna in chungah a tla lo vang maw?
13:12 In upa thute chu thufing vaivut mai ani a,In invennate chu invenna hlum mai a ni.
13:13 Ka tawng theih nân lo ngawi teh u,Ka chungah engpawh lo thleng ang hmiang.
13:14 Ka tisa hi ka hain ka pet ang a,Ka nun hi ka kutah ka dah êm ni?
13:15 Mi tihlum hila mah sela, amah chu ka nghak cheu vang:Mahse, a hmaah ka kawng chu ka tan ang.
13:16 Hei hi ka chhandamna ani a,A hmaah Pathian hre lo mi an lo kal dawn loh hi.
13:17 Ka sawi hi ngun takin ngai ula,Ka puan chhuah hi in bengah lut rawh se.
13:18 Ngai teh u, ka thu ka rem fel tawh a,Thiam ka chang ang tih ka hria.
13:19 Tunge mi hnialtu tûr awm?Tichuan, ka ngawi ang a, thlarau ka thlah mai ang.
13:20 Ka chungah thil pahnih hi ti lo phawt la,Tichuan, i hmêl lakah ka inthup lo vang:
13:21 Ka hnên ata i kut la kir daih la,I tihbaiawmna hian mi tihlau suh se.
13:22 Tichuan, mi ko la, ka chhâng ang che,A nih loh leh, kei tawng ila, kmi chhâng thung ang che.
13:23 Ka khawlohna leh sualnate engtia tam nge ni? Ka bawhchiatna leh ka sualna mi hriattir rawh.
13:24 Engah nge i hmêl i thup a,I hmêlmaa mi ngaih le?
13:25 Hnahthel leng chu i chaih buai dawn êm ni? Buhpawl ro chu i um dawn êm ni?
13:26 Ka chungah na takin i ziak a, Ka tileirawl lai khawlohnate mi phurhtir a.
13:27 Ka keah kawl mi buntir a, Ka kawng zawng zawng i chhinchhiah a, Ka kephah hualin ramri i kham a,
13:28 Thil mawih tawih ral mai ang leh, Silhfen, thim ei ang lek ka ni chung hian.
14:1 Hmeichhe hrin tawh mihring phwt chu Rei lo te dam, buainaa khat a ni.
14:2 Pangpar angin a lo chhuak a, a vuai leh a,Hlimthla angin a thlawk bo va, a awm hlen lo.
14:3 Chutiang mi chungah chuan i mit i mengin,rorêlnaah i hnênah mi hruai êm ni le?
14:4 Tunge thianghlim lo ata Thianghlim la chhuak thei le? Tumahin.
14:5 A nite chu ruat sa anih a, a thla zat lah chu i hnêna a awm a,A pelh theih loh tûra ramri chu i ruat ahnuin,
14:6 Hawi bosan langin, a chawlh theih nân,Hlawhfa anga ni a tlingtlak thlengin.
14:7 Thing chu rawt pawh nise, a chawr leh ang,A chawrno a tawp lo vang tih beiseina a awm.
14:8 Leia a zung lo tar mah se,A bul chu lei chinah thi mah se;
14:9 Tui rimah a chawr thiam tiam ang a, Thil phun angin a lo buk chhuak ang.
14:10 Mahse, mihring chu a thi a, a riral a. A ni, mihring chuan a thlarau a thlah a, khawnge a awm tak?
14:11 Tuipui ata tui a kal bo va, Luipui a kang a, a ro char a;
14:12 Chutiangin mi an mu a, an tho leh lo: Van awm loh hma loh chuan an thangharh lo vang, An muhil kaihthawh an ni hek lo vang,
14:13 Seolah chuan mi thukru teh la, I thinur reh hma chu mi thukru teh la, Hun bik mi ruatsakin mi hre rehng teh la aw!
14:14 Mi a thih chuan a nung leh ang êm ni?ka hun ruat chhûng hi chuan ka nghak ang, Ka chhuahna a thlen thlengin.
14:15 Mi ko vang a, keiin ka chhâng ang che; I kut hnathawh i ngaina an i.
14:16 Mahse, nangin ka pente i chhia a, Ka sual i enthla lo vem ni?
14:17 Ipah ka bawhchhiatna chilh ani a, ka khawlohna i thui khâwm a.
14:18 Tlâng chim meuh pawh chu a riral a, Lungpui pawh a hmun ata sawn ani a;
14:19 Tui chuan lungte a hrut hek a, Tui lian chuan lei vaivut a len bo va; Chutiangin mihring beisei chu i ti bo va.
14:20 Ani chu i hneh kumkhua a,a ral ta a. A hmêl i tidanglam a, i tir bo va.
14:21 A fapaten an rawn chawimawi a, a hre lo va; Tihtlâwmin an awm a, a hre hek lo.
14:22 A taksa na chu a hre chauh va A thlarauvin amah a sûn a.
15:1 Tichuan, Elifaza Temani mi chuan a chhâng a, heti hian a ti a:
15:2 Mi fingin hriatna lothlawn hmangin a chhângin,Khaw chhak thliin a pum a tipuar ang êm ni?
15:3 Tawng tlaktlai lo hmangin emaw Thusawi thatna nei lo hmangin emaw a sawi dawn êm ni?
15:4 A ni, tihna chu i tibo va, Pathian hmaa inhlannai tineu va ni.
15:5 I khawlohna chuan i ka a thunun a, Fin vervek tawng i thlang a nih hi,
15:6 Kei ni lovin, nangma tawngkam ngeiin a thiam lo che a, A ni, i hmui ngeiin a hek che a ni.
15:7 Piang hmasa ber i ni êm ni? A nih loh leh, tlangte awm hmain i piang tawh êm ni.
15:8 Pathian thuruk chu i hria êm ni? Nangma tan chauh finna i khur khung êm ni?
15:9 Kan hriat loh eng nge i hriat bik? Kan hriat loh eng nge i hriat theim bik?
15:10 kan hnênah hian lua kelsam to tawhte leh upa takte, I pa aia upa daihte an awm a ni.
15:11 I tan Pathian tawng thlamuanna hi a neu lutuk êm ni? Nem taka a tihna thu che hi?
15:12 Engah nge i thinlungin a hruai bo che? Eng tizia nge i men tal tawp tawp ni?
15:13 Pathian chungah thaw i sâng a, I kaa chutiang thu a chhuah kha.
15:14 Thianghlim tûr chuan mihring hi eng nge a nih? Fel tûr chuan hmeichhe hrin hi eng nge a nih?
15:15 Ngai teh, a mi thianghlimte chungah rina a nghat lo va, A ni, a mithmuhah chuan van pawh a fai lo.
15:16 Mi tenawm leh bawlhhlawh sa, Khawlohna, tui ina in chu a va ni lo lehzual dawn êm!
15:17 Mi ngaithla la, ka entir ang che, Ka hmuh chu ka puang dawn e:
15:18 Mi fingten an hril thina chu, An pi puten an thup loh,
15:19 Anmahni chauh ram an lo pêk, Mi dang tumah tel lohna chu?
15:20 Mi suaksual chuan a dam chhûng zawng nâ a tuar a, Hnehchhiahtu tana kum tuk zatte pawh chu.
15:21 Hlauhawm thawmte chu a bengin a hria a, A hmuingil laiin rawktuin a rawn bei a.
15:22 Thim ata chhuah a inring lo va, A hmabak chu khandaih a ni.
15:23 Ei tûr zawngin a vakvai a, Khawnge? tiin, Thimna ni chu a kutah ngasa tih a hria:
15:24 Hreawmna leh thawpikna chuan a tihlau va; Lal inpeihsain indona a hneh angin amah an hneh a;
15:25 Pathian chunga a kut a lek leh Engkimtitheia chunga chapo taka a chet avângin;
15:26 Luhlul takin ama chungah a tlan a, A phaw lai pjnawg chhah pui nên chuan;
15:27 A thauvin a hmai atuam a, A kawngah thau a chheng a;
15:28 Khawpui tiau hnuahte a cheng a, Tuma luah loh inahte chuan.
15:29 A hausa lo vang a, a sum leh pai chu a awm hlen hek lo vang a, An neihte chu lei lamah an kur hek lo vang.
15:30 Thim ata a chhuak lo vang a, Meialhin a zarte a hliau lo vang a, A kaa a thawah a kal bo vang.
15:31 Mahni inhumin engmah lovah innghat suh se, A hmuh tûr chu engmah lo ani dawn si a.
15:32 A hun hmain a tlingtla ang a, A zar chu a hring lo vang.
15:33 Grêp hrui angin a rah hel a sawi til ang a, Olive thing angin a par a thing thla ang.
15:34 Pathian ngaihsak lo pawlte chu an cha der ang a, Thamna puan inte chu meiin a kang ral ang.
15:35 Pawi khawih an ngaihtuah a, Khawlohna an rawn chhuah a, An pumin bumna a buatsaih a ni.
16:1 Tin, Joba chuan a chhâng a, heti hian a ti a:
16:2 Chutiang thil chu tam tak ka hria a ni, In zain thlamuantu tuar hreawm in ni e.
16:3 Thu ruakin tawp anei ang êm? A nih leh, engin nge chawk tho chia i han chhan ni?
16:4 Kei pawh in tawng angin ka tawng thei a ni;
16:4 Ka ni ang hi ni ula chuan In chungah thu ka zamw khâwm chiam thei ang a, Lu ka thin khum thei ang che u.
16:5 Mahse, ka ka chuan ka tichak ang che u a, Ka hmuia thlamuanna thuin a tinuam ang che u.
16:6 Sawi mah ila, ka lungngaihna a dai lo va, Ngawi mah ila, eng nge ka naw chuan na?
16:7 Mahse, Aman mi tichau va, Ka pawlpuite zawng zawng chu i titiau va.
16:8 Nangin mi chelh bet a, chu chu ka chunga hretu a ni a, Ka cherna hian mi hek a. Chu chu ka hmai chhana hriattirtu a ni
16:9 A thinurin mi tai thlêr a, mi tiduhdah a, Ka chungah a ha a thial a, Ka khingpuiin ka chungah a mit a len a.
16:10 Ka chungah an ka an ang a, Dichim takin biangah mi beng a, Ka chungah an inhawr khâwm a.
16:11 Pathian ngaihsak lo kutah mi hlan a, Mi suaksualte kutah chuan mi theh lut a.
16:12 Nuamsa takin ka awm a, aman mi phel darh a, A ni, ka ringah mi la a, mi pawt sawm a: A tin tûr atân mi tar bawk a.
16:13 A thal kâptute chuan mi hual vel a, Ka kalte chu a then darh a, a dim lo, Lei chungah ka mit a leih bua a.
16:14 Chhiatna chunga chhiatnain mi tichhia a, Mi hrâng angin ka chungah a lo thawk a.
16:15 Ka vun chungah saiip puan ka bel a Ka ki chu vaivutah ka tal a.
16:16 Tah vangin ka hmêl a sen a, Ka mit vunah thihna hlim a awm;
16:17 Ka kutah pawngnekna a awm lo va, Ka tawngtaina a thianghlim chung pawhin.
16:18 Aw leilung, ka thisen chu khuh bo suh la, Ka tah hian chawlh hmun nei suh se.
16:19 Tunah pawh, ngai tawh, ka thu hretu vanah a awm ani e, Mi hriatpuitu chu van sângah a awm.
16:20 Ka thiante chuan mi nuihsan a, Mahse, Pathian hnênah ka mittui a sur a.
16:21 Pathian hnênah miin mihring hi tan teh sela aw! Mihring fapain a thenawm a tan ang hian.
16:22 Kum rei lote a lo ral hunah, Ka kir leh lohna tûr kawng chu ka zawh dawn si a.
17:1 Ka thlarau a rawih ta, ka nite a ral ta, Ka chapual chu thlan a ni ta.
17:2 Nuihsantute ka hnênah an awm zawng a nih hi, An thu thin tiurah huan ka mit a fu a.
17:3 I hnênah ka tan thutiam siam teh, Tunge ka tan zakhamna ni ang?
17:4 Hriat thiamna lakah an thinlung i thup a; Chuvangin, anni zawng i chawisâng lo vang.
17:5 Hlawkna atâna a thian thlauthlatua chu, A fate mit pawh a chuai ang.
17:6 Mite zinga kamram mai atân mi siam a, Tenawm langsar tak ka lo ni ta.
17:7 Lungngaih vangin ka mit pawh a thim a, Ka bung zawng zawng hi hlimthla ang a lo ni ta.
17:8 Mi ngil takte chuan hei hi mak an ti ang. Mi pawikhawih lo chu pathian nei lote chungah a thinur ang.
17:9 Mi fel chuan a kawng ngai a chelh tlat a, Kut fai nei chu a chak deuh deuh vang.
17:10 In zain lo kir ula, lo kal teh u, In zingah mi fing ka hmu chuang lo vang.
17:11 Ka nite a liam ta, ka thil tumte a thlawn zo ta, Ka thinlung ngaihtuah thinte ngei chu.
17:12 Zan chu chhunah a chantir a; Eng chuan thim a hnaih e, an ti a.
17:13 Seol chu ka in anga ka en a, Thim hnuaiah ka khum ka dawh a,
17:14 Chhiatna hnênah, "Ka pa i ni" ka tih a, Changpat hnênah, "Ka nu leh ka farnu in ni" ka tih chuan,
17:15 Ka beisei chu khawiah nge? Ka beisei chu tunge hmu ang?
17:16 Seol kawngkaah a chhuk ang a, Vaivutah kan chhuk dun ang.
18:1 Tichuan, Bildada, Suhi mi chuan a chhâng a, heti hian a ti a:
18:2 Eng chen nge thu remchâng in dap dawn? Ngaithua ula, chu mi hnuah kan sawi ang.
18:3 Eng tizia nge ran anga ngaih kan nih a, I mithmuha tenawm kan nih?
18:4 Nang mahni thinurnaa intai thlêrtu, Nangmah avângin lei kalsan a ni dawn êm ni? Lungpui pawh a hmun ata sawn a ni dawn êm ni?
18:5 A ni, mi suaksual eng chu timih a ni ang a, A meisei pawh a de lo vang.
18:6 A puan ina eng chu a thim ang a, A kianga khawnvar chu tihmih a ni ang. A ke pen chakna chu a chep ang a,
18:7 Ama remruat ngeiin a paih thla ang.
18:8 Ama ke ngeiin lenah a paih lut a, Hum chungah a kal a.
18:9 A kerekah thangin a hling ang a, Ani chu thlangin a man ang.
18:10 A tan leiah valh phûm ani a, Kawngah a tan thang kam a ni.
18:11 Kil tinah hlauhawmin a tihlau vang a, A hnungah chuan a um zel ang.
18:12 A chakna atamchhawl ang a, A kiangah chhiatna a inpeih reng.
18:13 A taksa bhung hrangte a ei zo vang a, Thihna fa tirin a bung hrangte a ei zo vang.
18:14 A rinpui pian in ata chu kar phawh a ni ang a, Hlauhawmho lal hnênah hruai ani ang.
18:15 A mi ni ngai lo a puan inah an cheng ang a. A chennaah kat theh darh a ni ang.
18:16 Chhûngrilah a zung a mawih ang a, Chung lamah a zar a vuai bawk ang.
18:17 Lei ata a hriat rengna a boral ang a, Kawtthlêrah hming a nei tahw lo vang.
18:18 Eng ata thimah len luh a ni ang a, Khawvel ata um chhuah a ni ang.
18:19 Ami tezingah tu leh fa a nei lo vang a, A chenanah chambang tûr a nei hek lawng.
18:20 Thlang lama miten ani hi mak an ti ang a, Chhak lama mite an thlabar ang.
18:21 Mi fel lo chenna zawng chutiang hchu a ni ngei a, Chu chu Pathian hre lotu hmun a ni e.
19:1 Tin, Joba chan a chhâng a, heti hian a ti a:
19:2 Eng chen nge mi tihhreawm ang a, Thutea mi vuak vual dawn?
19:3 Vawi sawm lai mi dem chhe ta a. Tha lo taka ka chunga tih hi in zak hek lo.
19:4 Dik lo pawh ni ta ila, Ka dik lohna chu keimahah ka pai ang.
19:5 Ka chunga intilian in nih a, Ka chhiatna hi mi hnialfunga hmang i nih chuan,
19:6 Hre ta che u, Pathianin mi paih thla a, A lenin mi tuam a nih hi.
19:7 Ngai teh u, Pawngnekna, tiin ka au chhuak a, Mahse, chhan ka ni lo va, tanpui dilin ka au va, mahse, rel dikna a awm lo.
19:8 Ka kawng dai atheu hnan a, ka pel thei lo, Ka kawngte chu thimin a khuh a ni.
19:9 Ka ropuina mi hlihsak a, Ka lua lallukhum chu a la a.
19:10 Kawng tinah mi tichhia a, ka ral a ni ta: Ka beiseina thing angin a pawt phawng a.
19:11 A thinurna ka chungah a mut kai a, A hmêlma angah mi chhiar a.
19:12 A sipai rual an kal khâwm a, Ka lamah kawng an thlak a, Ka puan in vêlah buk an khuar a.
19:13 Ka unaute ka lakah a tihla a, Ka hmêl hriatte ka lakah an mi hrang zo va.
19:14 Ka laichinten mi chu-kha ta lo va, Ka thian bulten mi theihnghilh zo va,
19:15 Ka in chengte leh ka in awm nulaten Mikhualah mi chhiar a, An mithmuhah hmêl hriat loh ka ni ta.
19:16 Ka chhiahhlawh ka ko va, mi chhâng lo va. Kam thlumin ka ngen tûr a lo ni ta.
19:17 Ka nupui tan ka rim a chhia a, Ka chhul khat kualpui tan ka tenawm a.
19:18 Naupangte lamin mi hmusit a, Ka han tho hi mi eu va.
19:19 Ka thian tha zawng zawngten mi ten a, Ka hmangaih thinte chu ka lakah an ner ta.
19:20 Ka vun leh ka tisa hi ka ruhah a bet a, Ka ha vun chu ka la chang a.
19:21 Aw, nangni ka thiante u, Mi khawngaih rawh u, mi khawngaih rawh u,
19:22 Pathian kutin mi khawih a nih hi. Engah nge Pathian ang ziazanga mi tihduhdah a, Ka tisa tuarna hi tawk in la tih loh ni?
19:23 Aw, ka thute chu ziak ni teh sela! Lehkhabuahte chuang teh sela aw!
19:24 Ziakna thir leh suanin, Lungpuiah kumkhua atân ziak ni teh sela aw!
19:25 Ka tlantu chu a nung tih ka hre si a, Nakinah chuan leiah hian a lo la ding ang.
19:26 Ka vun hi tihchhiata a awm hnuin, Ka tisain Pathian ka la hmu ang.
19:27 Keima tan ngei ka la hmu ang a, Ka mitin a la thlir ang a, mi dang ni lovin, Ka chhûngah ka rilru a chau ta.
19:28 Engtin nge amah chu kan tihduhdah ang, Thil bulte amahah hmu siin, in tih chuan,
19:29 Khandaih chu hlau rawh u, Thinurna chuan khandaih hremna a thlen si a, Rorêlna a awm tih in hriat theih nân.
20:1 Tin, Zofara, Naamathi mi chuan a chhâng a, heti hian a ti a:
20:2 Hei vang hian ka ngaihtuahnate chuan chhanna mi siam a, Ka chhûngah hmanhmawhna a awm avâng hian.
20:3 Zilhna mi tizaktu chu ka hre ta a, Ka hriatthiamna rilru chuan mi chhâng a ni.
20:4 Hmasâng ata leia mihring awm achin, Hei hi i hre lo vem ni?
20:5 Mi suaksual hlimna chu a tawi a, Pathian hre lo mi lawmna chu Mit khap kar chauh a ni, tih hi?
20:6 A ropuina chuan vante thleng chhovin, A lu chuan chhumte tawng mah se,
20:7 Ama zun ek angin a boral vang vang ang: Amah hmu tawhte chuan, Khawiah nge a awm tak? an ti ang.
20:8 Mumang ang maiin a thlawk bo vang a, Hmuh a ni lo vang: A ni, zan inlârna anga um bo ani ang.
20:9 Amah hmu thin mit khan a hmu tawh ngai lo vang a, A hmun pawhin a hmungai thaw hek lo vang.
20:10 A faten mi hretheite khawngaihna an dil ang a, A kutin a sum leh pai chu a theh kir ang.
20:11 A ruhte chu a tleirawl sualnain a khat a, Mahse vaivutah amutpui ang.
20:12 Suahsualna hi a kaah thlum mah se, A lei hnuaiah thukru mah se,
20:13 Zuat hliauvin thlah phal lo mah se, A kam chhûngah hmuam reng zawk mah sela,
20:14 A pum chhûngah alo danglam a, A chhûngah rul tûr kha tak ani ta a.
20:15 Hausaknate ch a lem a, a law chhuak leh a, pathianin a pum ata a paihchhuak a,
20:16 Rul tûr chu a fawp ang a, Rulrial tûr chuan amah a that ang.
20:17 Luipuite chu a thlir lo vang a, Khawizu leh bawnghnute khala luang luite chu,
20:18 A thawh chhuah chu a theh kir ang a, Hrawk tlai nân a hmang lo vang;
20:19 A lak khawmte hchu a chen lo vang. Reitheite chu ahnehchhiahin a hawi san a,
20:20 In, a sak loh chu, a chhuhsak a. A duhamna chu a kawchhûngah a awm hle hle thei lo va, A lawmna thilte chu engmah ahum lo vang.
20:21 A ei zawh loh engmah a awm lo va, Chuvangin, a sum leh pai chuan a tuar lo vang.
20:22 A hausak vanglai tak chu a chep hun ani ang a, Tlachhamte chuan a chungah kut an len huai huai ang.
20:23 A pum tipuar tûrin a thinur hlauhawm tak chu A chungah A tir ang a, A ei atân a chungah A surtir ang,
20:24 Thir hriamhrei chu a tlan bosâng ang a, Dar thlangul chuan amah a kap tlâng ang.
20:25 A han pawt phawi a, a taksa ata a lo chhuak a, A ni, a hmawr tle tak chu amit ata a lo chhuak a, Thil rapthlak a chungah ahtleng a ni.
20:26 A ro atân thim chhah mup khawl khawl a ni a, Chhem loh mei chuan a kang ral ang a, A puan in ata hnutchhiah apiang a tiral ang.
20:27 Vante chuan a khawlohna an puang ang a, Leiin amah a do vang.
20:28 A ina thil pungte chu an bo vang a, A thinur niah chuan a bungruate an luang ral ang.
20:29 Hei hi Pathian laka mi suaksual chanpual a ni a, Roluah tûr Pathianin a tan a ruat a chu a ni.
21:1 Tin, Joba chuan a chhâng a, heti hian a ti a:
21:2 Ka thusawi hi ngun takin ngaithla teh u, Hei hi in thlamuanna thu chu ni rawh se.
21:3 Mi ngaichang ula, ka han sawi phawt ang a, Ka sawi zawhah la nuihsan ang che u.
21:4 Keia phunnawina hi mihring chungah êm ni? Dawhthei rual ka ni êm ni?
21:5 Mi en ula, mak ti ula, kutin ka hup rawh u.
21:6 Ka han ngaihtuahin ka mang a ang a, Hlauhnain ka thauvah mi a man thin.
21:7 Eng tizia nge mi suaksualte chu an nun a, An lo upat a, a ni, an lo hmuingil theih ni?
21:8 An chi thlahte chu an henah an mithmuhah a tinghet a, An rila rahte chu an hmai hmaah.
21:9 An in lote chu hlauhawm lakah a him a, Pathian tiang chu an chungah a tla hek lo.
21:10 An bâwngpain chi a thlah a, a pelh ngai lo va, An bawngpuiin no a nei a, a chhiat ngai lo va,
21:11 Ran rual angin an fanaute na chhuahtir a, An fate chu an tualchai a.
21:12 An perhkhuang leh tingtang remin an zai a, An phenglawng thawmah an hlim za a.
21:13 An nite chu neinung takin an khawhral a, Seolah chuan thlamuang takin an liam a,
21:14 Tin, Pathian hnênah, "Min kalsan rawh, I kawngte hriat hi kan chak lo ve,
21:15 Engkimtitheia chu eng nge a nih, a rawng kan bawlna tûr chu, A hnênah kan tawngtaiin hlawkna eng nge kan hmuh ang?" an ti a.
21:16 A! an sum leh pai an kuta awm lo ni lo, Mi sualsualte remruatna chu ka lakah a hla a ni.
21:17 Mi suaksual meichher chu vawi engzat meuh nge a mih a, Vanduaina a chunga a thlen a, A thinurnain Pathianin lungngaihna a pêk hlawm?
21:18 Vawi engzat nge buhpawl thliin a chhem ang an nih a, Favai thlipui len bo ang an nih?
21:19 Pathianin khawlohna an fate tan a dah, in ti a, Anmahni chungah thlentir ang hmiang, an hriat theih nân.
21:20 Anmahni mit ngeiin an chhiatna chu hmu se, Engkimtitheia thinurna chu in an hmiang.
21:21 A bo hnuah a in chu a tan eng nge a nih, A thla zat tihtawp a nih hun chuan?
21:22 Pathian tunge hriatna zirtir ang? Mi chungnungte pawh rorêlsaktu chu?
21:23 A vanglai takin mi a thi a, Muang tak leh nuam taka awmin.
21:24 A taksa chu thauvin a khat a, A ruh thling pawh a hnawng a ni.
21:25 Tin, mi dang lungngai takin a thi a, Thatna rêng rêng tem ngai lovin.
21:26 Vaivutah ang khatin an mu a, Changpatin a bâwm khat hlawm a.
21:27 Ngai teh, in ngaihtuahte zawng ka hria alawm, Dik lo taka ka chunga in phiarte chu.
21:28 Khawnge hotu in chu a awm? Mi suaksual chenkualna puan in chu khawnge? in ti a.
21:29 Zin vêl mite in zawt ngai lo vem ni? An sawite chu in pawm lo vem ni?
21:30 Mi sual chu vanduai niah zuahin a awm a, Thinur niah hruai chhuah an ni, tih hi.
21:31 Tunge a hmai hmaah a kawng chu piang ang a, Tunge a thiltih chu thungrul ang?
21:32 Thlanah kalpui a ni a, A thlan chu ven a ni a.
21:33 Lei tlâng pawhin a delh na lo. Mi zawng zawngin a hnu an chhui a, A hmaa chhiar sen loh lo awm tawhte ang khan.
21:34 Tichuan, engtin nge thu engmah lo tak meuhva mi thlamuan dawn? In chhannaah hian dawt mai lo chu engmah a awm lo.
22:1 Tom E;ofaza Temani mi chuan a chhâng a, heti hian a ti a:
22:2 Mihrign hian Pathian tan tangkaina a nei êm ni? Miin a fin chu a tangkaipui ngei tak e,
22:3 Mi fel i nih chuan Engkimtitheia tan a hlu êm ni? I kawnge i tihfamkim chu a tan a hlawk êm ni?
22:4 Amah i tih nân êm ni a zilh che a, rorêlnaa a luhpui che?
22:5 I suahsualna a nasa a ni lo maw? I khawlohnain tawp reng a nei hek lo.
22:6 Engmah lovan i unau hnên ata dah kham i phût a, Saruakte chu an silhfen i hlihsak a.
22:7 Chaute hnênah tui in tûr i pe lo va, Riltamte tan chaw i ui a.
22:8 Tharum thawhin mi ram i la lui a, I duhsak zawngte i pe a.
22:9 Hmeithaite chu ruakin i tir bo va, Pa nei lote ban chu i titliak a.
22:10 Chuvang chuan i velin thang a awm a, Hlauhna chuan a tibuai ta thut che a ni.
22:11 I hmuh theih loh thimna leh Tui tam tak chuan a khuh che.
22:12 Van sângah Pathian a awm lo vem ni? Arsi sâng berte en la, an sanzia mai chu.
22:13 Pathianin eng nge a hriat? Thim chhah danah a rel thei êm ni?
22:14 A hmuh loh nân chhum chhah takin a khuh a, Van kual chhûngah chuan a kal vêl a, i ti a,
22:15 Kawng hlui chu i zawh dawn êm ni? Mi suaksualten an zawh thina kha?
22:16 Anni chu an hun hmaa lak bovin an awm a, An innghahna chu lui len bovin a awm a;
22:17 Pathian hnea Min kiansan rawh, Engkimtitheia chuan eng nge min tih theih? Titute chu,
22:18 Chuti chungin an inte thil thain a tikhat - Mi suaksualte remruat chu ka lakah a hla a ni.
22:19 Mi felte chuan an h mu a, an lawm a, Mi pawikhawih lote chuan anmahni an nuihsan a,m
22:20 Kan chunga lo dingte tihbovin an awm a, A bang meiin a kang ral a, tiin.
22:21 Nangmah ngeiin amah tlawn la, remna siam rawh, Richuan, i tan thil tha alo chhuak ang.
22:22 A kaa chhuak dan chu dawng ngei teh aw, I thinlungah a thu dah tha ang che.
22:23 Engkimtitheia hnêna i kir chuan tundin i ni ang a, I puan in ata fel lohna i dah bo daih phawt chuanin,
22:24 I rote chu vaivutah dah la, Ophir rangkachakte chu luite lung zingah dah rawh.
22:25 Engkimtitheia chu i ro a ni ang a, Tangkarua hlu takte chu i ta ani ang.
22:26 Tin, Engkimtitheiaah chuan i lawm tawh ang a, Pathian lam chu i hawi tawh ang.
22:27 A hnênah i tawngai ang a, a ngai thla ang che; Tin, i thutiamte chu i hlena ng.
22:28 Thil i ruat ang a, i tan a ding nghet ang a; Tin, i kawngte chu engin a chhun fo vang.
22:29 An paih thlak che pawhin, Din chhuahna a awm, i ti ang a, Mi inngaitlâwm chu a chhandam ang.
22:30 Pawikhawih lo ni lo pawh a chan chhuak ang a, A ni i kut thianghlimna azarah chhanchhuahin a awm ang.
23:1 Tichuan, Joba chuan a chhâng a, heti hian a ti a:
23:2 Vawiin pawh ka vuina hi a nasa e, Ka rum chung pawhin a kut chu a rit a ni.
23:3 Aw, amah ka hmuhtheihna tûr lam chu hria ila, A thut hmunah chuan ka kal tûr a!
23:4 Ka thu chu ahmaah ka thlena ng a, Ka ka tanfungin a khat ang.
23:5 A mi chhanna tûr thute ka hre duh a, ka hnêna a sawi tûr chu hriat thiam ka duh.
23:6 A thiltihtheihna ropui chuan mi khing dawn êm ni? Hnai lo ve, mi bengkhawn zawk ang.
23:7 Tichuan, mi fel chuan a hnênah a ngen ang a, Mi ngaihtuahtu hnên ata chu ka chhuak vang vang ang.
23:8 Ngai teh, hma lam ka han pan a, amah a awm si lo, Hnung lam ka pan a, amah ka hmu thei chuang lo.
23:9 Vei lama a thawh lai pawhin ka hmu thei chuang lo va, Ding lamah a nih leh, a biru a, ka hmu thei lo.
23:10 Ka kawng zawh chu a hria a, Mi fiah hunah rangkachak angin ka chhuak dawn si.
23:11 Ka ke hian hniakhnung tak a dai zel a, A kawng ka zawh a, ka peng lo ve.
23:12 A kamchhuak thupêk chu ka pensan lo va, A kaa thute chu ka dan aiin ka roh zawk a.
23:13 Mi nghet a ni a, tunge khawih ber thei ang? A duhzawng chu a ti mai a ni.
23:14 Ka chana ruat chu a ti a, A rilruah chutiang chu a awm teuh a ni.
23:15 Chuvang chuan ahmaah ka buai a, Ka ngaihtuahnain amah ka hlau.
23:16 Pathianin ka thinlung chu a tichau va, Engkimtitheia chuan mi tibuai a.
23:17 Thimna chuan mi hual vêl a, Thim chhah pui chuan ka hmai a khuh a.
24:1 Engkimtitheian engah nge hun a ruat loh.
24:2 Amah hretuten engah nge a nite an hmuh loh? Ri sawn chinge an awm a, Ran rual an man lui a, an vulh a.
24:3 Pa nei lote sabengtung an um bosak a, Hmeithai bâwngpa, dahkham atân an laksak a,
24:4 Tlachhamte kawng an botir a, Leia retheite an biru a.
24:5 Ngai teh, thlalêra ram sabengtungte angin Taima taka ei tûr zawngin an hna an va thawk a, An fate tan thlalerin chaw a tum a,
24:6 An chaw tûr ram ata an at a, Mi sual grêp huan hmaihthelh an vai,
24:7 Silhfen lovin zankhuain an mu a, Khaw vatah inkhuhna an nei lo.
24:8 Tlânga ruahpuiin a nân huh a, Phen tûr nei lovin lungpui an b el a.
24:9 Pa nei lo hnute hne lai pawhthlaksak chingte an awm a, Retheite hnên aa dahkhamah an la a.
24:10 Silhfen lovin saruakin an vakvai a, Rilram chungin buhphalte an pu a;
24:11 Hriak an siam a, chung mite hung chhûngah chuan, Uain sawrna an chil a, tuihal chungin.
24:12 Khawpui bip takah mite an rum a, Mi hliam rilru chu a au chhuak a; Pathian lahin thil dik lo chu a bengkhawn hek lo.
24:13 Eng lakah lo helte an awm a, A kawngte lah an hre lo va, A kawng takah pawh an awm lo.
24:14 Vartianah tualthtattu chu a tho va, Rethei leh tlachhamte a that a, Zanah chuan rukru ang mai a ni.
24:15 Uirepa mitin thimhmul a thlir a, Tuman mi hmu lo vang, tiin. Hmai khuhnain ahmêl a tuam a.
24:16 Thimah inte an lai pawp a, Chhunah an inkhar khung a, Eng reng an hre lo.
24:17 An za atân zing chu thihna daihlim ang a ni a, Thihna dailhlim tihbaiawm chu an nel a.
24:18 Tui chungah chuan chak taka len an ni a, Leiah hian an chanvo chu ânchhedawng a ni, Grêp huap kawng lam a hawi lo ve.
24:19 Khaw ro leh lumin vurtui a tiral a, Seolin thil tisualte.
24:20 Chhulin a theihnghilh a, changpatin tui takin a ei a, Hriat reng a ni tawh lo vang a, Suahsualna chu thing angin a tliang a.
24:21 Ching, fa hring lo chu a ei a, Hmeithai thil tha a tihsak lo.
24:22 Pathian chuan a chaknain thiltitheite nun chu a tisei a, Dam an beisei loh hnu pawhin an tho chhuak a.
24:23 Hlimna a siamsak a, tah chuan an chawl a, An kawngah chuan a mit a fu reng a.
24:24 Chawisan an ni a, rei loean an ral a; Mi dang angin an vuai a, an chuai a, Buh vui angah chhumin an awm ta a.
24:25 Tunah chuti ni suh sela, tunge daw mi ti thei ang a, Ka tawng kha engmah lovah sawi thei ang.
25:1 Tichuan, Bildada Suhi mi chuan a chhâng a, heti hian a ti a:
25:2 A hnênah chuan rorêlna leh hlauhawmna a awm a, A hmun sângahte chuan remna a siam a.
25:3 A sipai ruale chu chhiar rual êm ni? Tu chungah nge a eng a chhuah loh?
25:4 Engtin nge Pathian hmaah mi a fel theih ang le? Engtin nge hmeichhe hrin a thianghlim theih ang?
25:5 Ngai teh, thla meuh pawh khian enna a nei nem, Arsite pawh a mithmuhah chuan a thianghlim lo.
25:6 Mihring lek phei chu e, thil lung mai a ni! Mihring fapa chu changpat mai a ni.
26:1 Tichuan, Joba chuan a chhâng a, heti hia a ti a:
26:2 Chakna nei lo mi chu i va han pui ve le! Thahrui nei lo ban chu i va han chhan ve le!
26:3 Finna nei lo chu i han zilh fing a, Hriatna tha tak i sawi hnem teh e!
26:4 Tu hnênah nge thu i chhah chhuak a, Tu thlarau nge i hne ata lo chhuak ni!
26:5 Thi tawhte an khur a, Tuite leh a chhûnga chengte hnuaiah chuan
26:6 A hmaah chuan Seol chu saruak ani a, Abadon chuan khuhna anei lo.
26:7 Hmun ruakah chuan hmâr a tipharh a, Lei chu engmah lovah a khai kang a.
26:8 A chhum chah tak chuan tuite a fun khâwm a, An hnuaia chhum chu a keh lo va.
26:9 A lalthutthleng hma chu a khuh a, A chunah chhum a zintir a.
26:10 Tui ramri a siam a, Thim leh eng thlen chinte nên.
26:11 Van dona bante chu a nghing dur dur a, A zilhhauna chu mak an ti a.
26:12 A thiltihtheihnain tuipui a tingwai a A hriatthiamnain Rahab chu a tan chhum a.
26:13 A thawin van chu a tithiang a, A kutin rulpui tlan chak chu a thil tlâng a.
26:14 Ngai teh, heng hi a kawng pawn lam lek a ni, A chanchin kan hriat hi a va beithem êm! A thiltihtheihna ri thawm chu tunge hre zo thei ang?
27:1 Tin, Joba chuan a thusawi a chhunzawm a, heti hian a ti a:
27:2 Ka thiamna thu la botu, ka thlarau tilungngaitu Pathian, Engkimtitheia chu nung na pui!
27:3 (Keimahah hian ka thaw a la kim a, Ka hnarah Pathian thaw a la cham);
27:4 Ka hmuiin fel lohna thu a phuh chuak tawp lo vang, Ka leiin bumna thu a sawi hek lo vang,
27:5 Thiam ka chantir dawn teuh lo mei che u, Ka thih thlengin ka dikna ka dah bo lo vang.
27:6 Ka felna chu ka chelh tlat ang a, ka thlah lo vang: Ka nun chhûng hian ka thinlungin mi dem lo ve,
27:7 Ka hmêlma chu mi suaksual ni sela, Mi beitu chu mi fel lo ni teh se.
27:8 Pathian ngaihsak lo tan beiseina eng nge awm, Pathianin a sah chhuma a thlarau a lak si chuan?
27:9 Buainain a nân laiin Pathianin a au thawm a ngaithla ang êm?
27:10 Engkimtitheiaah chuan a lawm ang êm? Pathian chu eng lai pawhin a ko vang êm?
27:11 Pathian kut chungchang ka zirtir ang che u, Engkimtitheia hnêna awm chu ka zep lo vang.
27:12 Ngai ru, nangni ngeiin in vaiin in hmu a, Eng tiziaa khawlo cheu nge in nih?
27:13 Pathian hnêna mi suaksual chanvo chu hei hi a ni, Hnehchhiahtute rochan, Engkimtitheia hnêna an dawn chu.
27:14 A fate an pun chuan khandaih tuar tûr fang an ni; A rila rahten chaw kham khawp pawh an nei lo vang.
27:15 A hnua dam chhunte chu hriin a phûm ang a, An nupuite pawhin an sun lo vang.
27:16 Tangkaruate vaivut angin a khawl a, Hlum ang maiin a silhfente a tiang khâwm na a;
27:17 Tiang khâwm mah se, mi fel chuan a sinsak ang a, Pawikhawih lote chuan tangkarua chu an insem ang.
27:18 Maimawm angin a in chu a sa a, Vengtuin chhawl buk a siam ang lekin.
27:19 Hausain a mu a, mahse, a tho tawh lawng; A mit a han meng a, a awm tawh lo.
27:20 Tui lian angin hlauhawmin a nang a, Zanah thlipuiin a la a.
27:21 Khaw chhak thliin a len bo va, a bo ta a, A hmun ata a nuai bo ta.
27:22 Zahngai lovin a nuai ang a, A thiltihtheihna hmaah chuan a kat rawk rawk ang.
27:23 A kut a benkhum ang a, A chekkhum ang a, a hmun ata a um chhuak ang.
28:1 Tangkaraw laih chhuahna khur a awm a, Rangkachak tihthianghlimna hmun pawh a awm.
28:2 Lei ata thir lak chhuah a ni a, Lung ata dar rawh tui a ni.
28:3 Miten thim an titawp a, Hmun hla berte pawh an zawng chhuak a, Thim chhah tak leh thihna daihlima lungte pawh chu.
28:4 Mite chen lohnaah khur an lai a, A chunga kal velten an theihnghilh a, Mi hlatnaah an inkhat a, an inthen an inthen a.
28:5 Lei hi chaw lo chhuahna a ni a, A chhûng chu mei kan anga chawh leh a ni a.
28:6 Chuta lungte chu saphir hmun a ni a, Rangkachak nawite a awm a.
28:7 Chu kawng chu sa hel ei vaten an hre lo va, Mu mit pawhin a hmu bawk hek lo.
28:8 Ramsa ngeng ngalhte pawhin an rap ngai lo va, Tah chuan sakeibaknei kawlh a kal ngai hek lo.
28:9 Mi chuan lung chang takah a kut a thlak a, Tlâng lian pui pui, a bul nên lam a hnai let a.
28:10 Lungpuite a verh tlâng seng sung a, Thil hlu tinreng a mitin a hmu.
28:11 Put hauh lovin luite a khuap chat a, Thil inthupte engah a la chhuak a.
28:12 Mahse, khawnge finna hmuhna tûr chu? Hriatna awmna hmun chu khawiah nge?
28:13 Mihringin aman chin a hre lo va, Mi nung ramah hmuh a ni hek lo.
28:14 Thukna chuan, "Keimahah a awm lo," a ti a, Tuipui chuan, "Ka hnênah a awm lo," a ti bawk a.
28:15 Rangkachaka lei theih a i lo va, A man atân tangkarua buk chhuah mi a ni hek lo.
28:16 Ophir rangkachakin a tluk thei lo va, Oniks lunghlu emaw, saphir emaw pawhin a ltuk thei hek lo.
28:17 Rangkachak leh lung fimin a ltuk lo va, Rangkachak thianghlim cheimawiin thleng theih a ni lo.
28:18 Koral te, Krustal te, sawi rual a awm lo, A ni, finna man chu lunghlu aiin a chungnung.
28:19 Ethiopia topaz pawhin a khan lo va, Rangkachak thianghlim nên khaikhin rual a ni lo.
28:20 A nih, finna chu khawi ata nge? Hriata awmna hmun chu khawiah nge?
28:21 Thinlung zawng zawng mit lakah thup a ni a, Chungleng savate lakah khar tlat a ni.
28:22 Boralna leh Thihna chuan, "A tlâwm zawng kan bengin kan hria," an ti a.
28:23 Pathianin a kawng chu a hria a, A awmna hmun pawh a hria.
28:24 Lei tawp thlengin a thlir a, Van hnuai pum pui hi a hmu.
28:25 Thli chakna a pêk lai khan, A ni, tuite pawh tehnaa a teh chhuah lai khan,
28:26 Ruahtui tan dan a siam lai khan, Khawpi ri, kawlphe tan kawng a siam lai khan,
28:27 A ni chuan a hmu a, a puang a, A tinghet a, a ni, a zawng chhuak a.
28:28 Tin, mihring hnênah, "Ngai rawh, LALPA tih hi, hei ngei hi finna a ni, thil tha lo kalsan hi hriat thiamna a ni," a ti a.
29:1 Tin, Joba chuan a thusawi cha chhunzawm a, heti hian a ti a:
29:2 Aw, tun hma thla ral taahte khan awm ni ila, Pathianin mi ven lai niahte khan,
29:3 A khawnvar ka lu chungah a eng thin a, Thimah pawh a eng ringin ka kal tlâng a,
29:4 Ka vanglai nite ka hman laia, Pathian pawlna ka puan ina a awm lai khan,
29:5 Engkimtitheia ka hnêna a awm thin laia, Ka fate ka vêla an awm lai khan,
29:6 Ka kalnate hnute khala chulh a nih laia, Lungpuiin ka tan hriak a luang chhuahtir dul dul lai khan!
29:7 Khawpui kawngka pana ka kal a, Kawttlera thutna ka buatsaih laite khan`,
29:8 tlangvâlten mi hmu a, an biru a, Upate an tho va, an ding a;
29:9 Hotute chu an tawng lai an chawl a, An kutin an ka an hup a;
29:10 Mi liante aw a reh a, An dang chungah an lei a bet a.
29:11 Benga hriaten nihlawh mi ti a, Mita hmuten mi hriatpui a;
29:12 Mi rethei tap ka chhan chhuah thin avângin, Pa nei lo, puitu nei lote pawh.
29:13 Boral dawn tepte malsawmna ka chungah athleng a, Hmeithai thinlung pawh hlimin ka zaitir a.
29:14 Felna chu ka inbel a, mi tuam vêl a, Ka tihdik thinzia hi kawrfual leh lukhum ang a ni.
29:15 Mitdel tan mit ka ni a, Kebai tan ke ka ni a.
29:16 Tlachham tan pa ka ni a, Ka hmêl hriat lohte pawh an thu ka buapui a.
29:17 Mi fel lo ngho chu ka titliak a, A haa a thil seh chu ka pawt chhuak a.
29:18 "Tichuan, ka bu zawlah ka thi ang a, Ka nite tiauvut angin ka tipung ang a,
29:19 Tui lamahte ka zung a zam darh ang a, Zankhuain ka zarah dai a cham reng ang a,
29:20 Ka ropuina hi keimahah a thar reng ang a, Ka kutah ka thalngul pawh a thar reng," ka ti rilru a.
29:21 Ka lamah mi'n beng an dawh a, an ngaithla a, Ka thu nghakin an ngawi thap thin.
29:22 Ka sawi zawhah an tawng ve tawh ngai lo; Ka thusawi chu an chungah a tla.
29:23 Ruahtui angin mi nghak reng thin, Ruah hnuhnung chak angin an ka an lo ang a.
29:24 An inrinhlelh laiin ka nuihpui a, Ka hmêl hlim chu an tihnual lo.
29:25 An kawng ka thlang a, hotuah ka thu a, Sipai rual zingah lalber angin ka awm a, Lusûnte thlamuantu angin.
30:1 Tunah zawng ka aia nauten mi nuihzat a, An pate kan ran rual vengtu ui zinga Telah pawh ka duh lohte khan.
30:2 A ni, chung thathum mite chu. An kut thahrui ka hnemhnanpui êm ni?
30:3 Tlachham leh riltamin an cher a, Ram ro leh kawlh chu an khel a.
30:4 Hnimbuk hnah nemte an thliak a, Juniper zunge an chaw a ni.
30:5 Mihring zing ata hnawh bovin an awm a, Rukru angin an au zui a.
30:6 Ruam kumkarahte an cheng a, Lei khuarkhurum leh lungpuipukahte.
30:7 Hnimbuk zingahte an chiau va,m Taiten hnuaiahte chuan an tawm khâwm a.
30:8 Mi âte fa an ni a, a ni, tlaktlai lo ber fate; Ram ata vuak chhuah an ni.
30:9 Tunah zawng an hla ka lo ni ta, A ni, an kamram mai ka ni ta.
30:10 Mi ten a, an inthiar fihlim a, Ka hmaa chil chhak pawh an tim lo.
30:11 A hruihrual chu a phelh a, mi nghaisak tak avângin, Ka hmaah insumkarna an thlah thak a.
30:12 Ka ding lamah mi ruraho an lo thawk a, Ka ke an nek per a. An tihchhiatna kawng chu ka chungah an din a.
30:13 Ka kawng an tichhia a, Ka vanduaina an tizual a, Tuman an dal lo.
30:14 A pawp zau laiah an lo kal a, A chim zingah mi hual a.
30:15 Tihbaiawm ka chungah athleng a, Ka roupna thli angin an um bo va, Ka mithatna chhum angin a riral ta.
30:16 Keimah ata ka thlarau leih chhuah a ni; Chhiatna nite chuan mi man ta e.
30:17 Zanah chuan ka ruhte a kher ngut ngut a, Ka na mi fep sup sup hi a chawl lo.
30:18 Ka na hian ka silhfente a tikhawlo ve, Ka kawrnghawng angin mi rek a.
30:19 Chirhdiakah chuan mi paih lut a, Vaivut leh vut ang mai ka ni ta e.
30:20 Nang ka au che a, mi chhâng lo va, Ka ding a, nangin mi hawi lo.
30:21 Ka lakah i nun a lo rawng ta a, I kut chakin mi tiduhdah a.
30:22 Nangin thliah mi chawi kang a, a chungah mi chuantir a; Nangin thlipuiah mi tiral ta.
30:23 Nangin thihna mi thlen ang tih ka hria asin, Mi nung zawng zawng tana ruat inah chuan.
30:24 Chim chhe vum chungah miin a kut aphar ngeiin A vanduainaah chuan tanpui dilin a au dawn lawm ni?
30:25 Buaina tawkte tan ka tap thin lawm ni? Chhamdalte tan ka lungngai thin lawm ni?
30:26 thil tha ka zawng a, thil chhia a lo thleng a, Eng ka nghak a, thim alo thleng a.
30:27 Ka thin aphu hlawp hlawp a, a reh thei lo va, Tuarna nite chu ka chungaha thleng a.
30:28 Ni êm vang ni lovin ka dum a, Pungkhawmho zinga dingin tanpui ka dil a.
30:29 Kawluite tan unaupa ka ni a, Ostrich-te tan thian ka ni a.
30:30 Ka vun chu a lo dum a, a khawk a, Ka ruhte chu a lum vut vut a.
30:31 Chuvang chuan ka perhkhuang ri chu sunnaah a chang a, Ka phenglawng chu taptu awah.
31:1 Ka mit atân thuthlung ka siam a, Engah nge nula ka melh ang?
31:2 Chunga Pathian laka chanvo leh Chungnung ber Engkimtitheia laka rochan tûr chu eng nge ni?
31:3 Mi fel lo tana vanduaina leh Khawlohna titute tana chhiatna a ni lo vem ni?
31:4 Ka kawngte chu a hmuin Ka ke pen zawng zawng a chhiar lo vem ni?
31:5 Dawt lama kal ka nih a, Bumna lama ka ke pen rang thin ka nih chuan.
31:6 (Bukna dik taka tehin awm ila, Ka dikna hi Pathianin a hriat nân)
31:7 Tin, kawng lova peng ka lo nih a, Ka mithmuh ang maia thinlung pu ka lo nih a, Ka kutah hian kaidum reng a bei phawt chuan,
31:8 Ka tuh chu mi dangin ei mai ang hmiang; Ka chin zawng pawh kar chhuah ni rawh se.
31:9 Ka thinlung hian hmeichhia a it a, Ka thenawm kawngkaah chang te ka nih chuan,
31:10 Ka nupui chuan mi dang sum deng sela, Mi dangte chuan tlâwm rawh se.
31:11 Chu chu sual huatthlala tak, Khawlohna, rorêltuten an hrem ngei tûr chu a ni si a.
31:12 Ral der khawpa kangtu mei a ni bawk a, Ka sum neih zawng zawng pawh a khawrh fai vek dawn a ni.
31:13 Ka chhiahhlawhnu emaw, ka chhiahhlawhpa emaw, Ka chunga an vuivaina thu thlen ka ngaihsak loh luih chuan,
31:14 Pathian a lo thawh hunah eng nge a rawn zawh chian hunah engtin nge ka chhan ang? A rawn zawh chia hunah engtin nge ka chhan ang?
31:15 Pum chhûnga kei mi siamtu khan a ni pawh a siam lo vem ni? Pum chhûnga mi dintu chu thuhmun a ni lâwm ni?
31:16 Tlachhamte duhzawng ka sum bosak a, Hmeithaite bei ka tihdawn a,
31:17 Ka chaw keimah maia ka ei a, Fahrahin a ei ve loh chuan,m
31:18 (A naupan lai atangin pa angin ka chawm lian a, A nu pum atangin ka kaihhruai a ni tawh si)
31:19 Tupawh silhfen lova boral emaw, Rethei intuamhlawmna nei lo emaw hmu ka nih a,
31:20 A kawngin mal mi sawm lo a nih chuan, Ka berâm hmual tuam lum a nih loh huan,
31:21 Kawngkaah chuan tanpuitu ka hmuh avânga Fahrah chunga kut lek ka nih chuan,
31:22 Ka kovi hi ka dar saipheng nên phawk hlawk sela, Ka ban hi khingkhangruh atangin thlawn hlauh rawh se
31:23 Pathian lak ata vanduaina chu ka tihzâwng tak a ni si a. A ropuina avângi eng ti rual ka ni lo.
31:24 Rangkachak chu ka nghahfaka ka hman a, Rangkachak tha mi chu ka rinchhana ka ngaih a,
31:25 Ka hausakna a nasat avâng leh Ka kutin a thawh chhuah nasat avânga lawm ka lo nih a,
31:26 Ni khi a en lai leh Thla kal ruau ruau lam ka hawi a,
31:27 Ka thinlung hi a ruk tea hip bo a nih a, Ka kut pawhin ka ka a hup chuan,
31:28 Chu pawh chu rorêltute hrem ngei tûr khawlohna a ni a, Chugna Pathian hnêna daw ka nih dawn avângin.
31:29 Mi hawtu chhiatna chunga lawm ka nih emaw a, thil tha lovin a tlakbuak laia lawm hlut ka nih emaw chuan,
31:30 (A ni, a nunna ânchhe lawh khawpa Sual ti tûrin kâ ka phal lo)
31:31 Ka puan ina mite chuan, A buhbala inhnangfak lo tunge awm? An tih loh chuan,
31:32 (Mikhualte kawtthlêrah an riak lo va, Mi zin vakte tan ka kawng ka hawng thin)
31:33 Mite tih dang anga ka bawhchhiatna zep a, Mahni awm chhûnga khawlohna thukruin
31:34 Mipui tam takte hlauh avâng leh chhûngkuate hmusit hlauh vanga Ngawi reng leh leng chhuak ngam lo ka nih chuan -
31:35 Aw, mi bengkhawntu nei teh ula aw! (En teh u, hei ka chhinchhiahna ka dah e, Engkimtitheian mi chhâng teh se) Ka khingpuipan mi hekna a ziak chu nei teh ila aw!
31:36 Ka koviah ka pu ang a, Lallukhum angin ka inbel tûr a!
31:37 Ka pheikhai zat pawh ka hriilh ang a, Mi lain ni ve angin amah ka pan tûr.
31:38 Ka ram chu mi duh lova au chhuak a nih a, A lei rutkhuarte an tap hlawm a nih chuan,
31:39 Man pe lova a rha chhuahte ei ka lo nih a, A neitute nun hlohtir emaw ka lo nih chuan,
31:40 Buh aiah hling to zawk sela, Tai aiah hlo har to rawh se, Joba thu chu a tawp ta.
32:1 Tin, heng mi pathumte hian Joba chu an chhâng zel ta lo va, fel a intih êm avângin.
32:2 Tichuan Barakela fapa Elihua, Buz mi, ram thlahho zinga mi chu a thinrim ta êm êm mai a; Pathian ai maha amah thiam a inchantir avângin Joba chungah chuan a thin arim a ni.
32:3 Joba thian pathumte chungah pawh chuan a thinrim bawk a, Joba chu thiam lo an ti chunga chhan ngaihna an hriat loh avângiin.
32:4 Anni chu a aia upa an nih avângin Elihua chu Joba hnênah thu sawi ve lovin a inkhek reng a.
32:5 Tin, Elihua chuan heng mi pathumte kaah hian chhanna reng a awm ta lo tih a hriatin a thinur ta hle mai a.
32:6 Tichuan, Barakela fapa Elihua, Buz mi chuan a chhâng a, heti hian a ti a: Ka naupang a, nangni in upa a, Chuvang chuan ka tim a, ka ngaihdan pawh ka hrilh ngam lo che u a,
32:7 Khuareiin hril sela, Kum tamin finna zirtir teh se, ka ti a:
32:8 Mahse, mi thil hriat thiamtirtu chu Mihringa thlarau awm, Engkimtitheia thaw chu a ni.
32:9 Kum tam hi an fing chuang lo va, Upaten thudik an hrethiam chuang lo,
32:10 Chuvang chuan mi ngaithla ula, Ka ngaih dan ka han sawi teh ang, ka ti a ni.
32:11 Ngai teh u, in thu ka nghak reng a, Sawi tûr in dap thleng khan, In tan danah beng ka lo chhi reng a.
32:12 A ni, ngun takin ka dawngsawng che u a, Ngai rawh u, Joba hnial hneh thei emaw, A thu letthla thei emaw in zingah tumah in awm lo.
32:13 Fimkhur rawh u; 'Fing tak kan tawk a lo ni a, Mihring ni lovin, Pathian chauhvin a hneh thei ang,' In ti rawk ang e.
32:14 A thuin kei mi la vawm ve lo va, In tih dan ang maiin ka chhâng dawn hek lo.
32:15 An inkhap thlu der a, an dan reng hi. Kam khat mah sawi tûr an nei ta lo.
32:16 Dang renga dinga an chhan tawh loh avâng hian Kei pawhin ka nghak ve reng dawn êm ni?
32:17 Keima pualin ka chang ang a, Ka ngaih dan ka han sawi teh ang.
32:18 Thu lah ka ngah hle si a, Chhûng lam rilruin mi tûr nasa a ni.
32:19 Ngai rawh u, ka thinlung hi uain hu chhuahna nei lo ang a ni a, Uain peng thar angin a puak dawn tep a ni.
32:20 Thuin ka inhri thla dawn e, Ka ka ka ang ang a, ka chang ang.
32:21 Tumah ka zahpah lo mai ang a, Tumah ka fek der hek lo vang.
32:22 Fak der ka thiam si lo va, Chutilochu, mi Siamtuin mi la bo thuai mai ang.
33:1 Engpawh ni se, Joba, ka tawng hi ngaithla la, Ka thu zawng zawngah hian beng lo chhi teh.
33:2 Ngai teh, hei ka ka ka ang ta a, ka leiin thu a sawi hi.
33:3 Ka thute chuan ka thinlung ngilzia a tilang a, Ka hmui chuan a thil hriat chu dik takin a sawi dawn e.
33:4 Pathian thlarau chuan mi siam a, Engkimtitheia thaw chuan nunna mi pe.
33:5 I theih chuan mi chhâng la, Tan khawh la, ka hmaah hian I thute chu siam rem rawh le,
33:6 Ngai teh, Pathian lam thuah chuan Nangmah ang bawk ka ni a, Hluma siam ve bawk ka ni.
33:7 Ngai teh, kei hi mi hlau suh la, Ka nawr lutuk lo vang che.
33:8 Ka beng hriatah i sawi tawh tak a, I thu ri chu ka lo hre tawh a.
33:9 Ka thiang a ni, bawhchhiatna nei lovin; Ka fihlim a ni, khawlohna nei lovin;
33:10 I e, ka chungah remchâng a dap chhuak a, A hmêlmaah mi chhiar a ni;
33:11 Ka keah kawl mi bun a, Ka kalna zawng zawng a chhui chhuak a ni,' i ti a.
33:12 Ngai teh, ka chhâng ang che, Hetah hian i fel zo zan lo ve; Pathian chu mihring aiin a ropui zawk a ni.
33:13 Thu khat mah a chan loh avângin Engah nge amah i beih le?
33:14 Pathianin kawng khatin thu a sawi thin a, A ni, kawng hnih pawhin, pawisak loh pawh ni se.
33:15 Mumangah, zan inlârnaah chuan Mite tui taka an muthilh a, Khum laizawla an mut chiah chiah laiin,
33:16 Mite beng chu a tihawng a, An thu dawn chu a tinghet a,
33:17 Mihring chu a thiltih thulhtir a, A chapona chu a thupsak theih nân;
33:18 Ani chu thlana liam lovin a vawng a, A nun pawh khandaih laka boral lovin.
33:19 A khum laizawlah natnaa thununin a awm a, A ruh zawng zawng na sup supin;
33:20 Tichuan, chaw te ka hua a, Sa tuihmêl takte pawha duh lo va.
33:21 A tisa a lo cher deuh deuh va, hmuh tham a ni lo va, Ruh hlir ruh hlir a ni a.
33:22 A ni chuan thihna kotlang a hnaih a, A nun chuan tiboraltute a hnaih tawh a ni.
33:23 Mi hnêna a tana tha hriattir tûrin A tan vântirhkoh, palai pakhat, sâng zinga mi awm sela,
33:24 Tin, chu mi chuan amah duhsak takin, Thlana liam lovin chhanhimang che, Tlanna ka hmu ta e;
33:25 A taksa hi tleirawl thar leh sela, A vanglai chakna nite chu lo kir leh tawh se,' ti sela;
33:26 Chu mi chu pathian hnênah a tawngtai a, Ani chuan a lo pawm a. A hmêl chu hlim takin a hmu ang a, Anin a hnênah felna chu a pe leh ang.
33:27 Mite hmaah hla sain: Ka sual a, thil dik chu ka tikhawlo va, Mahse, mi thungrul lo ve:
33:28 Thlana liam lo tûrin mi chhanhim a, Ka nunin khaw eng a lo hmu ang, a ti a.
33:29 29-30, Ngai rawh, mihringin nunna eng a hmuh theih nana Thlan ata hrui kir tûrin Pathianin heng thil zawng zawngte hi Mihring hnênah vawi hnih vawi thum a ti a ni.
33:30 29-30, Ngai rawh, mihringin nunna eng a hmuh theih nana Thlan ata hrui kir tûrin Pathianin heng thil zawng zawngte hi Mihring hnênah vawi hnih vawi thum a ti a ni.
33:31 E, Joba, ngun takin mi ngaithla teh, Lo ngawi la, ka han sawi ang e.
33:32 Sawi tûr i neih chuan mi chhâng la, Sawi rawh thiam chantir che ka duh a ni;
33:33 Chuti a nih loh chuan, mi ngaithla rawh, Lo ngawi la, finna ka zirtir ang che.
34:1 Tin, Elihua chuan a sawi zel a: Nangni mi fingte u, ka thute ngaithla rawh ula, Nangni mi thiamte u, in beng dawh rawh u.
34:3 Kain ei mi a hria angin Bengin thu a thliar a ni.
34:4 Kan tana dik chu thlang ila, A tha chu keimahniin i chian ang u.
34:5 Joba, 'Fel zawng ka fel a ni, Pathianin ka thiamna mi hnawlsakin,
34:6 Ka thiam reng chung hi dawtheiah mi chhiar mai pawh a: Bawhchhiatna ka nei lo chungin Ka hliam chu tihdam rual a ni lo,' a ti si.
34:7 Joba ang hi tunge awm, Tui anga deuna ina,
34:8 Khawlohna titute pawla, Mi suaksualte nena leng thin chu?
34:9 Pathian chunga lawm hi Mihringin engah mah a sawtpui lo ve,' a ti vei nên.
34:10 Chuvangin, nangni, mi rilru neite u, Mi ngaithla rawh u, Pathian chuan thil suaksual tiin Engkimtitheia chuan thil dik lo chu a ti teuh lo vang.
34:11 Mite an thiltih ang zelin a thungrul ang a, Mi tin, an awm dan ang zelin an chungah a thlentir dawn si a.
34:12 A ni, Pathian chuan suaksual takin a ti lul lo vang a Engkimtitheia chuan a rel khawlo hek lo vang.
34:13 Tunge lei hi amah awptir a, Khawvel pum pui hi a hnêna kawltir ni?
34:14 Ama thlarau chu ahnea a lak kir a, Ama thaw chu a hnêna a lak khâwm leh chuan,
34:15 Mi nung zawng zawng an boral rual ang a, Mihring chu vaivutah a chang leh mai ang.
34:16 Hriat thiamna i neih chuan hei hi ngaithla la, Ka tawng ri hi bengkhawn rawh.
34:17 Thudik hawtu chuan ro a rel ang êm ni? Mi fel leh thiltitheia chu thiam loh i chantir ang êm ni?
34:18 Ani chu lalber hnêna, "Tlaktlailopa," Mi lian hnêna, "Suaksualpa," titu,
34:19 Hotute pawh duhsak bik lo leh Mi rethei aia mi hausak ngaihsak chuang lo ani a, An zain a kutchhuak an ni si a.
34:20 Mit khap kar lovah an thi a, Zanlaiah mite an khur a, an ral a, Mi chakte pawh kut lova lak bovin an awm.
34:21 Mihring awm dan chungah mit a len a, A pheikhai zawng zawnga a hmu vek si a.
34:22 Khawlohna titue an bihruk theihna tûr Thim a awm lo va, thihna daihlim a awm hek lo.
34:23 Pathianhmaa rorêlnaa kal tûrin Mihring tan hun bi a ruat si lo.
34:24 Mi chakte chu a titiau va- an thu rel lovin, An hmunah midangte a dah thin.
34:25 Chutiang chuan an thilte chu hriain Zanah anmahni a tichhia a, a nuai bo va.
34:26 Mite mithmuhah anni chu Mi sual hremin a hrem a,
34:27 Ama laka an pen bo avâng leh A dante an pawisak loh avângin;
34:28 A beng thleng khawp khawpion retheite an rumtir a, Ani chuan hnehchhiahte au thawm chu a lo hria a.
34:29 Ani chu lo ngawi sela tunge thiam loh chantir thei ang? A hmêl a thup laiin tuin nge hmu thei ang? Hnam tan emaw, mi mal tan emaw thuhmun a ni.
34:30 Pathian hre lo mi chuan ro a rel lohna tûr leh Mipui an awkai loh nân.
34:31 Miin Pathian hnênah chuan, Pawi ka khawih lo na a, hremna ka tuar si,
34:32 Ka hmuh loh chu mi zirtir la, Khawlohna ka tih pawhin, Ka ti tawh lo vang,' a ti ngei êm ni?
34:33 Pathian thungrulhna chu i duh ang kher êm ni dawn a, I lo hnial ni? Kei ni lovin nangin i thlang tûr a ni, Chuvangin, hriat chu sawi rawh khai
34:34 Mi rilru neite leh mi fingte Mi ngaithla apiang pawhin,
34:35 Joba hi chinchang hre lovin a tawng mai mai a ni e,m A thu-ah hian finna a awm lo ve, mi tihpui ang.
34:36 Joba hi mi sual tawnga a tawng avâng hian Fiah fai vekin awm se ka ti a ni.
34:37 A sual belhchhahin a hel a, Kan zingah a kut a beng a, Pathian chungah a thu a tui tam mai a nih hi.
35:1 Tin, Elihua chuan a sawi zel a:
35:2 Hei hi dikah i ngai êm, Pathian hmaah ka fel a ni,' i tih hi?
35:3 Thil tisual lo ila ka tan that chuanna eng nge awm a, Ka tan hlawkna eng nge awm chuan,' i tihte hi?
35:4 Ka han chhâng teh ang che, Nang leh i pawlpuite nên.
35:5 Van lam dak la, en teh, Chhumte khi en la, nang aia a san zawk khi.
35:6 Thil i tihsual pawhin, a tan eng nge pawi? I bawhchhiatna a pun pawhin, a tan eng nge pawi ang?
35:7 I fel pawhin a tan eng nge i hnemhnan? I kut ata eng nge a dawn?
35:8 I suahsualna chuan nang ang mihring chauh a khawih a, I felna chuan mihring fa chauh a khawih thei a ni.
35:9 Hnehchhiahna a tam avângin an rum a, Mi chakte ban avângin chhan ngaiin an au va,
35:10 Mahse, tuman, 'Min siamtu Pathian chu khawiah nge, Zana hla min saktirtu,
35:11 Hnuailengte aia min zirtir hnem zawktu, Chunglente aia finga min siamtu chu?' an ti lo.
35:12 Tah chuan an rum a, tuman an chhâng lo, Mi sualte chapona avângin.
35:13 Pathianin dilna lawilo chu a ngaithla lo vang a, Engkimtitheian a ngaihsak hek lo vang.
35:14 Nang lek phei chu e! 'Amah ka hmu lo ve, Thu rel tûr chu a hmaah a awm reng a, Amah ka nghak reng e,' i han tih hi:
35:15 Tunah hian, thinrima a rawn hrem mai loh avâng leh Uanthuanna a rawn pawisak mai loh avangin,
35:16 Joba hian a ka a ang mai mai a, Chinchang hre lovin a htu a tui tam mai a nih hi.
36:1 Elihua chuan a sawi zel a:
36:2 Ngawi rih la, ka kawhhmuh ang che; Pathian hmingin sawit ur ka la nei cheu a nia.
36:3 Ka hriatna ka han fawm khâwm vâk teh ang, Mi siamtu chu felna ka bel dawn a ni.
36:4 Ka thu a daw hauh lo ve, Hriatna famkim nei chu i kiangah a awm hi.
36:5 Ngai rawh, Pathian chu chak tak a ni a, Tumah a hmusit mai lo;
36:6 Rilru chaknaah chuan a ropui a ni. Mi suaksual chu a zuah lo va, Hnehchhiate erawh chu dik takin a relsak thin.
36:7 Mi felte chu a ensan lo va, lalthutthlenga lalte kiangah Kumkhuain a thuttir a, chawimawiin an awm zawk thin.
36:8 Kawl bun an lo nih a, Hnehchhiahna hruia phuar an lo nih chuan,
36:9 An thiltih leh an bawhchhiatnate a entir a, An lo chapo tawhziate nên.
36:10 Zirtirna lamah an beng a tivar a, Khawlohna lakah an lamlet nân thu a pe a.
36:11 An pawisaka a rawng an bâwl chuan, An nite chu hmuingil takin an hmang ral ang a, An kumte chu nuam takin.
36:12 An pawisak loh erawh chuan khandaihin an boral ang a, Hriatna lovin an thi a ng
36:13 Thinlunga Pathian zah lo mite chuan thinur an khawl a, Ama phuar an nih pawhin tanpui dilin an au lo.
36:14 Mi bawlhhlawhte zingah chuan An vanglaiin an thi a.
36:15 Ani chuan hreawm tuartu chu A hreawmna hmangin a ti chhuak a Hnechhiahna hmangin a beng a tivar a.
36:16 A ni, manganna ata chu hmun zau tak, Nekchep lohnaah chuan a hruai chhuak ang chia, I chawhlui chu thauvin a khat ang.
36:17 Mahse, nang chu mi suaksualte sawiselnain i khat a, Sawiselna leh rorêl dikna chuan a man che a ni.
36:18 Thinur avângin hmusitna rilru i pu dah ang e, Tlanna man nasatzia hian hruai bo che suh se.
36:19 Manganga i awm loh nân i awka emaw, I thahrui chakna emaw a tawk êm ni?
36:20 Zan chu chak suh, mite an hmun ata an boralna hun a ni e.
36:21 Fimkhur la, khawlohna lam hawi suh, Hei hi hreawm tuar aia i thlan a ni si.
36:22 Ngai rawh, Pathian chuan a theihnain zo takin a ti a ni; Tunge amah ang zirtirtu awm?
36:23 Tunge a tih dan tûr ruatsak? Tunge, 'I ti dik lo, ti thei?
36:24 A hnathawh tiropui tûrin hre reng rawh, Miten zaia an chawi thina chu.
36:25 Mi tinin chu chu an en a, Miten hla tak atangin an thlir a.
36:26 Ngai rawh, Pathian chu a ropui e, kan lo hre lo pawh a: A kum zatte chu zawn chhuah rual a ni lo.
36:27 Tui mal far te te chu a hip chho va, Tui hua intifimin ruahah a chang a,
36:28 Vanin a surtir a, Mihring chungah a tla buan buan thin.
36:29 A ni, chhum tai darh dante hi mirhingin a hre thei êm ni? A buk zar ri dur durte hi?
36:30 Ngai teh, a vêlah a eng a theh darh a, Tuifinriat mawngte a khuh a.
36:31 Heng hian mite thu a relsak a, Ei tûr tam takin a pe a.
36:32 Kawlphein akutte chua khuh a, A tum tak fuh tûrin a tir thin a.
36:33 Khawpui ri chuan a chungchang a puang a, Ran rualte pawhin thlipui lo thawkah chuan an puang a.
37:1 Hei vang hian ka thinlung a khur a, A phu hlawp hlawp asin.
37:2 Ngaithla ngun ula, a awrawlte leh A kaa lo chhuak rite chu.
37:3 Van pum pui hnuaiah a tir chhuak a, A kawlphe chu lei tawp thleng thlegin.
37:4 A hnuah chuan a awrawl a chhuah a, A ropuina aw chu a tiri dur dur a: A aw an hriat pawhin a chawlhtir chuang lo.
37:5 Pathian chuan mak takin a awm a tiri dur dur a, Thil ropui tak, kan hriat phak loh a ti a ni.
37:6 Vur hnênah chuan, 'Leiah tla rawh,' a ti a, Chutiang bawk chuan ruah leh ruahpuite hnênah pawh.
37:7 Mi tinreng kut chu a tikhawng zo va, A mi siam zawng awngten an hriat nân.
37:8 Tichuan, ramsaten bik bona an pan a, An bu zawlah an awm reng a.
37:9 Chhim lam pindan ata thli chhia a lo thawk a, hmâr lam ata khaw vawt.
37:10 Pathian thaw vangin tuikhal a lo awm a, Tui zau tak pawh a khal zo va,
37:11 A ni, chhum chhah puite chu hnawngin a tikhat a, Chhumah chuan kawlphe a tidarh a.
37:12 Ama hruaiin an vir zawr zawr a, Khawvel chen theihna zawng chungah hian, A thupêk apiang an tih theih nân.
37:13 Zilh nân emaw, a ram that nân emaw, Zahngaih vang emaw a rawn awm tir a ni.
37:14 Joba, hei hi ngaichang teh, Beng sikin Pathian thiltih makte chu ngaihtuah teh.
37:15 Chung chu Pathianin thu a pêk dan leh A chhuma kawl a phettir dante i hria êm ni?
37:16 Chhum a kan theih dan te, Hriatna famkim neitu thiltih makte hi i hria êm ni?
37:17 Chhim thli avânga lei a reh thiap a, I silhfen a lo lumzia te hi?
37:18 Ani chu van i kaih pharhpui thei êm ni? Darthlalang chhun khal ang maia khauh chu?
37:19 A hnêna ka sawi tûr chu min hriattir rawh le. Thimna avângin kan sawi thiam loh hi.
37:20 Ka sawi dawn tih amah hrilh tûr êm ni? Mahni intihboral miin a chak ngai êm ni?
37:21 Tunah, thli a lo thawh a, a chhem kianin Van zawla eng ropui chu miin an en ngam lo.
37:22 hmâr atangin rangkachak eng a lo zam a, Pathian chu ropui ralthlak takin a inthuam a.
37:23 Engkimtitheia chu kan hmu chhuak thei lo va, Thiltihtheihna leh diknaah a ropui a, Felna a ngah a, a hnehchhiah lo vang.
37:24 Chuvangin, miten amah an tih a, Intifingte chu tumah a pawisa chuang lo ve.
38:1 Tin, LALPA chuan thawngaleivir atangin Joba chu a chhâng a, heti hian a ti a:
38:2 Hriatna tel lo thua Thurawn tithimtu hi tunge ni?
38:3 Mipa takin i puan veng la, Thu ka zawt ang chia, mi hrilh ang che.
38:4 Leilung nghahchhan ka phûm lai khan khawiah nge i awm? I hriat thiam chuan sawi rawh.
38:5 A len lam bite tunge thliah, i hre meuh maw? A nih leh, a chung awl tehna tunge zam?
38:6 A nghahchhan chu khawiah nge a din ngheh a, Tunge a kil lung phûm ni,
38:7 Varparh arsite an zai khâwm a, Pathian fate zawng zawng an au lai khan?
38:8 Tuipui chu chhula a lo chhuah lai khan Tuin nge kawng lo khar hnan?
38:9 A silhfen atân chhum ka siam a, A tuam puanah thim chhah tak;
38:10 A chim chin tûrte ka siam a, A danna leh kharna tûr te;
38:11 Heti thleng chauh hian lo kal la, pel hauh suh, Tah hian i fawn vêl tawp rawh se,' ka ti a ni.
38:12 Lei khuna tikiang a, Mi suaksualte thing chhuak tûrin,
38:13 I pian achinah, zing hnênah, thu i pein, Khawfingchat hi ahmun tûr i hriat tir ngai êm?
38:14 Lei hi nemnaa hlum nem angin a tilang dang a, Silhfen ze hrang ang nukin a lang ta a.
38:15 Mi suaksualte eng chu chhuhsak ani a, An ban lek san chu tihtliah a ni.
38:16 Tuipui hnarahte i lut tawh ngai êm? A thukzia te i fang chhuak tawh êm ni?
38:17 Thihna kawngkate chu i hnênah tihlan a ni tawh êm? Thihna daihlim kawngka chu i hmu tawh êm ni?
38:18 Lei zauziate hi i hre phak êm ni? I hriat vek chuan sawi rawh.
38:19 An ramri i hruai theih a, An in lam kawng chin i hriat theihna tûr chuan,
38:20 Eng chena kawng chu khawiah nge? Thim pawh chu khawiah nge a hmun? I hria ang chu, chungah chuan i piang tawh a, I nite pawh a tam tawh alawm!
38:22 Vur dah khawlna hmunah i lut tawhin, Rial dah khawlna hmunah pawh i lut tawh êm ni?
38:23 Buai hun atân te leh Indo leh inbeih ni atân ka khek chu a ni.
38:24 Eng kawngin nge eng hi a tai darh a, Chhak lam thli pawh hi lei chungah a intheh darh?
38:25 Tuin nge ruahpui tana luan kawr leh Tek tana kawng siam?
38:26 Tuma awm lohna leh mihring chen lohna Thlalêra ruah surtir tûrte,
38:27 Ram ro leh pilril tihnawng tûr te Hlobet hring totir tûr tein?
38:28 Ruahin pa a nei êm ni? Daifimte hi tu hrin nge?
38:29 Tu chhul atangin nge tuikhal hi a lo chhuah? Vana vur lo tla thin hi tu hrin nge?
38:30 Tuite pawh lung ang maiin a sak a, Tuipui thuk chungte a khal a.
38:31 Siruk khi i phuar khâwm theiin Chhohreivung tlar khi i phelh darh thei êm ni?
38:32 Arsite khi a hun biah i hruai chhuak thei êm ni? Zangkhua hote khi i hruai thei êm ni?
38:33 Van thil ruatte chu i hriain Leiah hian thu i neihtir thei êm?
38:34 A nan tûr chein chhum ata Ruahpi vanawn i au thla thei êm ni?
38:35 Kawlphete chu i hnêna lo kal a, Heta hi ka awm,' ti tûrin i tir chhuak thei êm ni?
38:36 Tunge chhum dumahte khian finna dah a, Tunge arsi thlawkte hriat thiamna pe?
38:37 Tunge finnaa chhumte hi chiar thei a, Van tuithawl tunge leih baw thei?
38:38 Vaivutte a inhlawm khâwm a, Lei tlangte a inbelhbâwm hi.
38:39 Sakeibaknei tan ei tûr i zawnsakin Sakeibaknei vanglaite chak daih i pe thei êm ni,
38:40 An pûkahte an bawk a, Seh tûr an chan lai hian?
38:41 Choâk hi, a note ei tûr tlachham a, Pathian hnêna an hram lai leh An vahvaih laiin, tuin nge chaw pe?
39:1 Lung bang sathar no neih hun i hria êm ni? Sazuk no neih hun i chhinchhiah thei êm ni?
39:2 An pai chhûng thla zat i chhiarin, An hrin hunte i hria êm ni?
39:3 An bawk a, no an hring a, An vei zo mai a ni.
39:4 An note chu an pian a tlâng a, Ram palailengah an thang lian a, An kal darh a, an puite hnênah an kir tawh lo.
39:5 Ram sabengtung tuin nge zawl chhuah? Ram sabengtung chak thlunna tu phelh nge?
39:6 An awm nân thlalêr ka ruatsak a, An chen nân ram tau;
39:7 Khawpui hulum chu a hmusit a, Khaltu au ri a hre ngai lo
39:8 A tlatna tlangpui dung a ni a, Thil hring apiang a zawng chhuak thin.
39:9 I tan selepa chu chhawr theih êm ni ang? I ran inah a riak duh ang êm?
39:10 Lei lehnaah hrui i bahtir thei ang êm? I hnungah lei ruam a rawn chawk rual ang êm ni?
39:11 A chak êm avâng maiin i ring thei dawn êm ni? I hna chu i kawltir dawn êm ni?
39:12 I buhte i hruih zawla rawn dah khâwm tûrin I ring mai thei êm ni?
39:13 Ostrich thla uangthuang takin a inkhawng vêl a; mahse, a thla ki leh a hmulte chu an ngilnei êm ni?
39:14 Leiah a tui a hnutchhiah a, Vaivutah a khuh lum a,
39:15 Miin a rap keh thei a, Ramsaten an chil keh thei tih a hre leh tawh lo.
39:16 Ama no ni lo ang hrimin a note lakah a inchhu ngawng a, A thiltih chu a thlawn dawn emaw, a pawisa chuang lo.
39:17 Pathianin finna a haihchhamtir a, Hriatthiamna a pêk hek loh avângin.
39:18 Tlan bo tuma a han insingsak meuh chuan Sakawr leh a chungchuangte chu a tham lo mai.
39:19 Sakawr chaknate hi i pêk êm ni? A nghawngah thahrui i ban êm ni?
39:20 Khau anga kat tûrin i siam êm ni? A hnar tum dur dur hlauhawmzia te hi!
39:21 Phai ruamah a ke a phiat tlut tlut a, A tha a so va, indo hriamhrei hmachhawn tûrin a chhuak a;
39:22 Hlauh reng a hre lo va, a zam ngai lo va, Khandaih lakah a tim ngai hek lo.
39:23 A chungah thla bâwm a ri rawk rawk a, Fei leh thal a tle zawr zawr mai a.
39:24 Hlauhawm tak leh thinur takin a khawh puat puat a, tawtawrâwt thawmah a ding hle hle thei lo.
39:25 tawtawrâwt a rik phawt chuan, "Chei, Chei,' a ti a. Inbeihna chu hla takah a rim a hria a, Hotute rawl leh inbeihna hawhaw nên.
39:26 I finna avângin mu chu a thlawk chhovin Chhim lamah thla a zar êm ni?
39:27 Muvanlai thlawk chho leh sâng taka bu a chhep hi i thupêk êm ni?
39:28 Kham kovahte an cheng a, Lung tohlawt hmun him takah a riak thin.
39:29 chuta tang chuan ei tûr a bihthla a, A mit chuan hla tak a hmu.
39:30 A note pawhin thisen an dawt a, Saruang awmnaah chuan a awm zel a ni.
40:1 Tin, LALPA chuan Joba hnênah a sawi zel a:
40:2 Sawiseltu chuan Engkimtithei chu a hnial ang maw? Pathian hnialtu chuan chhâng ang hmiang! Tiin.
40:3 Tichuan, Joban LALPA chu a chhâng a:
40:4 Ngai teh, kei mi pawimawh tham lo te hian Engtin nge ka chan ang che? Ka ka ka hup mai a ni.
40:5 Vawi khat ka sawi tawh a, ka chhâng tawh lo vang che; A ni, vawihnih; ka chhunzawm tawh lo vang,' a ti a.
40:6 Tin, LALPA chuan Joba chu thawngaleivir atangin heti hian a chhâng a:
40:7 Mipa takin i puan veng la, Thu ka zawt ang chia, mi hrilh ang che.
40:8 Ka thurelte mi sutsak dawn êm ni? Thiam i chan theih nân, Thiam loh mi chantir dawn êm ni?
40:9 Pathian ban ang i nei êm ni? Amah angin khawpui ri aw i chhuah thei êm ni?
40:10 Lalna leh zahawmna han inbel la, Chawimawina leh ropuinain inthuam rawh khai.
40:11 I thinrimna khat liam chu leih chhuak la, Mi chapo apiang chu en bikin titlâwm teh khai.
40:12 Mi chapo apiang chu en bikin tihniam la, Mi suaksualte chu an dinhmunah rep bet rawh le.
40:13 Vaivutah phûmhlawm la, Hmun biruah an hmêlte phuar khâwm teh le.
40:14 Tichuan, i kut dinglam ngeiin a chhanhim thei che tih Kei ngei hian ka hria ang chu.
40:15 En teh, nangmah ang bawka Behemoth ka siam hi, Bawng anga hnim ring mi a ni.
40:16 Ngai teh mah, a chakna chu a kawngah a awm a, A thahrui chu a udl thuara awm a ni.
40:17 Sidar angin a mei a tikhauh va, A malpui thate chu a phiar tlat mai.
40:18 A ruhte chu ngen kawrawng ang a ni a, A fuke chu thir tlawn ang a ni.
40:19 Pathian siam u ber a ni a, A siamtu chuan a tan khandaih a siamsak a.
40:20 Tlângte chuan chaw an chhuahsak thin a, Chu chu ramsa zawng anwg tualchaina a ni.
40:21 Lotus buk hnuaiahte a bawk a, Pumphir hnuai leh dumahte pawh,
40:22 Lotus buk chuan a zar hlim a, Luia tuipuisuthlah chuan a hual vêl a.
40:23 Ngai rawh, tui a lo len buan buan pawhin a hlau ngai lo: A ka thleng pawhin Jordan lian mah se, a zuam zel..
40:24 A inralrin laiin miin an man thei êm ni? A hnarah an thil thei ang êm ni.
41:1 Nghakuaiin liviathan i hnuk chhuak thei êm ni? Hruihrualin a lei i phuar bet thei êm ni?
41:2 Phairuang hruiin a hnarah i thil thei êm ni? Nghakuaiin a khabe i thil tlâng thei êm ni?
41:3 I hnênah dilna tam tak a siam ang êm ni? I hnênah thu nemin a sawi ang maw?
41:4 Kumkhuaa rawngbawltua i hman tûrin I hnênah thuthlung a siam ang êm ni?
41:5 Sava ang lekin i khal thei dawn êm ni? I hmeichhiate kaih atân i hling thei ang maw?
41:6 sângha mantuhoten indawr nân an hmang ang êm ni? Sumdawng mite zingah an sem darh ang êm ni?
41:7 A vun khatin thir hling te, A luah nghafeite i riah thei êm ni?
41:8 A chungah kut han thlah teh, In inbeih edan tûr chu ngaihtuah rawh, I ti leh tawh ngai lo vang!
41:9 Ngai rawh, mihring beiseina chu a thlawna ni: A hmuh mai pawhin a beidawng nghal a ni.
41:10 Amah chawk tho tûrin tumah an rorum ngam lo: Chuti anih chuan tunge ka hmaah ding thei ang?
41:11 Tunge ka rulh leh tûra thil mi pe hmasa awm? Van hnuaia thil engkim hi ka ta a ni.
41:12 A fuke thu-ah ka ngawi reng lo vang a, A thahrui chakzia leh a taksa inphur tawkziaahte pawh.
41:13 Tunge a vun pawnlang chu hlip thei ang? A khabe thuah hnih chhûngah tunge lo lut ang?
41:14 Tuin nge a hmêl kawngkapui chu hawng thei ang? A ha kual vêl chu tihbaiawm taka ni.
41:15 A vun char chu a chhuan ber a ni a, Char ang maia phui tlat a ni.
41:16 A insik phui chiah avângin. A karah boruak pawh a lût thei lo.
41:17 An inzawm theuh va, an inphan tlat avângin. Kaih theh theih a ni lo.
41:18 A thaw chhuak chu a var sung sung a, A mitte chu khawfingchat ang ru mai a ni.
41:19 A ka atangin meialh a chhuak a, Meisite a tek ur ur a.
41:20 A hnaran meikhu a lo chhuak a, Sa so bel nghawr leh phairuang mut ang vut vutin.
41:21 A thawte chuan meihawl a tivam a, A kaan meialha chhuak a.
41:22 A nghawngah chakna a awm a, A hmaah tihbaiawmna a tualchai reng a.
41:23 A tang chhûng vun pawh khing rut, Taksa nena inbelhbâwm tlat, khawih chet rual loha ni.
41:24 A thinlung chu lung anga sak ani a, A ni, rawtsawmna lung hnuai zawk ang mai a ni.
41:25 Amah alo thawh chhuah meuh chuan Pasalthate pawhin an hlau va, An thlaphangin mahni pawh an inhre tawh thin lo.
41:26 Miin khandaihin bei mah sela, a hneh lo vang; Fei emaw, thal emaw, feitam emaw pawhin.
41:27 Thirte chu buhpawl ang lekah a ngai a, Ngen chu thing mawih angah.
41:28 Thalin a titlânchhe lo va, A lakah chuan virvawmte chu pâwl bul ang lek a ni.
41:29 Talhtumte chu pâwl bul anga ngaih a ni a, Feitam vungte chu a nuihsan mai a ni.
41:30 A hnuai lampangte pawh lampei hriam tak ang a ni a; Diakahte chuan buhchil khawl ang maiin a bawk a.
41:31 Tui thuk tak chu bel angin a tiso buah buah a, Tuipui chu hlo bur ang lekah a siam a.
41:32 A kalna hnu chu a eng ruak a, Miin tuipui chu var buahin an hmu thin.
41:33 Lei chungah hian amah ang reng an awm lo ve, Hlauh nei hauh lova siam chu.
41:34 Thil sâng apiang a en thin a, Inlulungte zinga a ber a ni.
42:1 Tin, Joba chuan LALPA chu a chhâng a:
42:2 Engkim i ti thei tih ka hria e, I tum dal rual engmah a awm lo.
42:3 Tu a ni nge, hriatna lova thurawn thup botu hi?' Chuvang alawm ka hriat thiam lohte, Ka tana mak lutuk, ka hriat loh thilte ka sawi ni.
42:4 Ngaithla rawh le, ka han sawi ang e; Thu ka zawt ang chia, mi hrilh ang che.'
42:5 Benga hriatna mai zawngin ka hre tawh chia, Mahse, tunah zawng ka hmu ta che;
42:6 Chuvang tak chuan ka inten a, Vut leh vaivuta thuin ka sim ta e, tiin.
42:7 Tin, LALPAN Joba hnênah heng thute a saiw hnuin LALPA chuan Elifaza Temani mi hnênah chuan, "I chungah leh i thian pahnihte chungah khan ka thinurna a nasa a ni: ka chhiahhlawh Joba angin ka chungchang thu dik takin in sawi si lo.
42:8 Chutichuan, tunah bâwngpa pasarih leh berâmpa pasarih kengin ka chhiahhlawh Joba hnênah va kal ula, in tan hâlral inthawi va hlan rawh u; tin, ka chhiahhlawh Joba chuan a tawngtaisak ang che u a, chu chu ka lo pawm ang a, in atzia ang zel chuan ka ti lo vang che u; ka chhiahhlawh Joba angin ka chungchang thu dik takin in sawi si lo va," a ti a.
42:9 Chutichuan, Temani mi Elifaza leh Shuhi mi Bildada leh Naamathi mi Zofara-te chu an va kal a, LALPAN thu a pêk ang zel chuan an ti a; tin, LALPA hchua Joba dilna chu a pawm ta a.
42:10 Tin, Joba chuan a thiante pathum tana a tawngtai chuan LALPAN Jona chan chu a titha leh ta a; LALPA chuan Joba chu ahmaa a neih let hnih a pe leh ta a.
42:11 Tichuan, a unau leh a farnu zawng zawngte leh tun hmaa a hmêlhriat zawng zawngte chu ahnênah an lo kal a, a inah chuan chawhluite an kil a; LALPAN a chunga thil tha lo a thlentir zawng zawng thu-ah chuan an tuarpui a, an thlamuan a; mi tinin hnênah chuan tangkaraw tlangteleh rangkachak zungbunte an pe theuh va.
42:12 Chutichuan, LALPA chuan Joba hun hnuhnung chu a tir aia nasa takin mal a sawm a: berâm singkhat leh sângli, sanghawngsei sângruk, sebâwng tuak sângkhat leh sabengtungpui sângkhat a nei a.
42:13 Fapa pasarih leh fanu pathum anei bawk a.
42:14 Tin, a hmasa bera hmingah chuan Jemima a sa a; pahnihna hmingah chuan Kezia; pathumna chu Keren-Hapuka.
42:15 Tin, ram zawng zawngah pawh Joba fanute anga hmeichhe hmêl tha an awm lo: an pa chuan anni chu an nutate zingah rochan tûr a pe ve hlawm a.
42:16 Tin, hetih hun hian Joba chu kum za leh kum sâwmli a dam a, a fapate, a fapaa fapate, chhuan li thlengin a hmu a.
42:17 Chutichuan, Joba chu tar tak, khup bihin a thi ta a. |
posted by zoblog @ 12:11 PM  |
|
|
|
