|
| Wednesday, September 12, 2007 |
1:1 Judate lal Amona fapa Josia lal laia LALPA thu Zephania, Kusia fapa, Gedalia fapa, Amaria fapa, Hezekia fapa hnêna lo thleng chu.
1:2 Lei chung ata thil zawng zawng ka tiral vek ang, tih hi LALPA thu chhuak a ni.
1:3 Mihring leh sate ka ti râl ang a; Chunglêng savate leh tuipui sânghate ka tiral ang a; Misualte chu ka titlu ang a; Lei chung ata mihring ka ti bo daih ang, tih hi LALPA thu chhuak a ni
1:4 Juda te leh Jerusalem luahtu zawng zawng chungah Ka kut kalek anga; he hmun atang hian Baal la awm chhunte, Kemarim hming chu puithiamho chawpin,
1:5 In chung chhîpa vân lam thilho hnêna kûn thînte, LALPA hnêna chhehhama Malkama chhâla chham bawka kûn thînte,
1:6 LALPA hawisan tute leh LALPA zawng lova Amah râwn lo tute chu ka tibo daih ang.
1:7 LALPA pathian hmaah chuan ngawi reng rawh: LALPA ni chu a hnaih tâk avângin: LALPA chuan inthâwina a buatsaih tawh a,A mi sâwmte pawh atithianghlim tawh si a.
1:8 Tin, LALPA inthawina niah chuan heti hi a ni ang a, Hotute leh lal fapate leh hnamdang silhfêna Inthuamte zawng zawng chu ka hrem ang.
1:9 Tin, chumi nîah chuan kawngka zuan kahlen zawng zawng, An hotute inpawngnêkna leh bumna tikhattute chu ka hrem ang.
1:10 Chumi nîah chuan, sângha kawngka atanga au thâwm te, Misneh atanga chiau vak vak te, tlâng atanga ri hum hum te, a awm ang, tih hi LALPA thu chhuak a ni.
1:11 Maktes mite u, Kanaan mi zawng an boral avângin chiau vak vak rawh u! Tangkaraw phur tute zawng zawng an boral vek tawh a ni.
1:12 Tin, chumi hunah chuan heti hi a ni ang a, Khâwnvâr chhiin Jerusalem ka zawng chhuak ang a; Uain mawng nawi ang awm mai mai a, an rilru a, LALPA chuan a chhia atha tih a nei ngai nêm, titute chu ka hrem ang.
1:13 Tin, an sumte chu râllâkah a lo chang ang a, An in te chu a ram ang: a ni, inte an sa ang a, mahse an luah lo vang; Grêp huante an siam ang a, mahse a uain chu an in lovang.
1:14 LALPA ni ropui tak chu a hnai e, a hnai in a thleng thuai dawn a ni, LALPA ni thâwm chu rapthlâk tak a ni; Chutah chuan michak chu a chiau vak vak ang.
1:15 Chumi ni chu thinurna nî a ni a, mangan leh hreawm nî chhiatna leh tiauna nî, thimna leh khawdur nî, chhûm leh thim chhah mup nî a nia,
1:16 Kulha hung khawpuite chungah leh khaw kil kulh sângte chungah chuan tawtawrâwt leh ralbei thâwm rîkna nî a ni a.
1:17 Tin, mihringte chungah hreawmna ka rawn thlen ang a, mitdel ang maiin an kal ang a, LALPA chungah an sual avângin; an thisen chu vaivut angin ka leih bua ang a, an tisate pawh êkdûr ang maiin.
1:18 LALPA thinurna nîah chuan an rangkachak emaw, an tangkarua emaw pawhin anmahni a chhanchhuak thei lo vang a; Ram pumpui hi a thîkna meiah chuan a kâng bo vek ang. Rama chêngte zawng zawng a tibo dawn a, a ni, tihbona rapthlak tak a siam dawn si a.
2:1 ,2 Aw hnam zahna châng hre lo te u, thuruat a lo chhuah hma leh nî chu favâi ang mai a a râl hma leh LALPA thinrimna hlauhawm tak chu in chunga a lo thlen hma leh LALPA thinrimna nî chu in chunga a lo thlen hma hian tlân khâwm rawh u, a ni, tlân khâwm huai huai rawh u.
2:2 ,1 Aw hnam zahna châng hre lo te u, thuruat a lo chhuah hma leh nî chu favâi ang mai a a râl hma leh LALPA thinrimna hlauhawm tak chu in chunga a lo thlen hma leh LALPA thinrimna nî chu in chunga a lo thlen hma hian tlân khâwm rawh u, a ni, tlân khâwm huai huai rawh u.
2:3 Nangni leia mi thuhnuairawlh zawng zawng, a thu awih tute u, LALPA chu zawng rawh u; Felna zawng ula, thuhnuairawlh tum rawh u: LALPA thinrimna nîah chuan thuhrûkin in awm thei mahna.
2:4 Gaza khua chu kalsanin a awm ang a, Askelon khua chu tihtiauvin a awm dâwn si a: Chhûn laiah Asdod khua an hnawt chhuak ang a, Ekron khua chu pawh chhuah in a awm ang.
2:5 Tuipui kama chêng kereth hnamte chu an chung a pik e! Aw kanaan, Philistia mite ram, LALPA thu chu i chungah a lo thleng a ni; Luahtu awm lo khawpin ka tiboral ang che.
2:6 Tin, tuipui kam te chu hnim hring hmun a ni ang a, berâmpute bûk khuarna leh berâmte huang a ni ang.
2:7 Tichuan, tuipui kam chu Juda chhûngtea la awm chhunte tân a ni ang a; chûngah chuan an berâm rualte chu an tla ang a, Tlai lamah chuan Askelon khaw inahte an riak ang; LALPA an pathian chuan a rawn tlawh ang a, An saltânna chu a lehlinsak ang.
2:8 Moab deuna leh Amon fate au khumna, ka mite an deuna leh An ramria an tihropuia chu ka hre tawh a.
2:9 Chutichuan, a nuna ka nun chhûng chu, Moab chu sadom ang a ni ang a, Amon fate chu Gomora ang an ni ngei ngei ang, Kângthai hmun leh chi khur leh kumkhaw luah loha ni ang: Ka mi la bângte chuan an mahni an râllâk ang a, Ka hnam la awm chhunte chuan an luah ang, tih hi Sipaihote LALPA, Israelte Pathian thuchhuak a ni.
2:10 Chu chu an chapona aiah an nei dâwn a ni, Sipaihote LALPA mite chungah an intihlen a, an cheksawlh avângin.
2:11 An tân LALPA chu tihbaiawm tak a ni ang a, lei pathiante chu a tam vek dâwn si a; Tin, miten amah chibai an bûk ang, mi tinin mahni hmun theuhvah, hnamte awmna zawng zawngah chuan.
2:12 Nangni Ethiopia mite pawh ka khandaiha thahin in awm ang.
2:13 Tin, hmâr lam ram chungah a kut a lek ang a, Assuria ram a tiboral ang a, Ninevi khua a titiau vang a,thlalêr angin a tiro vang.
2:14 Tin, a chhûngah chuan sa rual chitin, ramsate zawng zawng an mu ang: Tuivalawng leh sakuhte pawh a ban chhîp bâwkahte an chêng ang a: Tukverhahte zai an vawr ang; kawngka bulahte chuan chhiatna a awm ang: Sidar thinga siamte pawh phoruang a chang ta si a.
2:15 Hei hi khawpui hlim thei tak, mahni inring tak, a thinlunga, keimah, ka chuang ka liam hi tumah an awm lo, intirilru chu a ni: Sate mut hmun mai atân, a va ram nasa ta êm! A kal pêl apiangin an chek khum ang a, an kut an thin khum ang.
3:1 Hel hmang leh bawlhhlawh , hnehchhiah hmang khawpui chu a chung a pik e!
3:2 Aw chu a awih lo va; zilhna a pawm lo va; LALPA chu a ring lo va; a Pathian lam a hnaih duh lo.
3:3 A chhûnga a hotute chu sakeibaknei rûm lai an ni a; A rorêltute chu tlai lam chinghnia an ni a; A tûk thlenga thial tûr engmah an zuah lo.
3:4 A zâwlneite chu pawlawh leh bumhmangte an ni a: A puithiamten hmunthianghlim chu an tibawlhhlawh a, Dân chu a bawhchhe nasa a ni.
3:5 A chhûnga LALPA chu a fel a ni; khawlohna a ti lo vang; Tûktin a rorêlna chu a tilang a, a pelh ngai lo va; Mahse mifello chuan zahna chang reng a hre lo.
3:6 Hnamte chu ka tibo daih a, an kulhte a ram a; A kawtthlêrte chu tuma kal tlâng loh nân ka tiram a: An khawpuite chu an chhe ta; Chutichuan tumah an awm ta lo va, luahtu rêng an awm tawh lo.
3:7 Nangin mi hlau phawtla, zilhna hi lo pawm la; Tichuan ama chunngchânga ka ruat zawng zawngte ang khân A awmna chu tihbo daih a ni lo vang, ka ti a; Mahse zîngah an tho va, an thiltih zawng zawng an tikhawlo vek a.
3:8 Chuvângin râllâk la tûra ka thawh ni thlengin mi nghâk rawh u, tih hi LALPA thu chhuak a ni: Ka thil tum chu, an chunga ka thinurna, ka thinurna hlauhawm tak mai chu leih tûra Lalna ramte inkhâwmtîra hnamte koh khâwm hi a ni a; Lei zawng zawng hi ka thîkna meiah a la kâng fai dawn si a.
3:9 Chutih hunah chuan mipuite chu hmui thianghlim ka puttîr leh ang, LALPA hming chu an zaa an lama thukhatvuaa a rawng an bâwl tlân theih nân,
3:10 Ethiopia lui piah lam atangin ka hnêna diltute, ka mi darhte fanu chuan ka thilhlan an rawn la ang.
3:11 Chumi nîah chuan ka chunga i bawhchhiatna thiltih avângte chuan i zak tawh lo vang, chumi hunah chuan i chhûng ata i mi, chapona hlimpuitute chu ka la bo vang a, Ka tlâng thianghlimah hian chapo hmangin i awm tawh lo vang.
3:12 I chhûng ata mirethei te leh Tihduhdah tuarte chu ka zuah ang a, LALPA hming chu an ring ang.
3:13 Israel mi la awm chhunte chuan khawlohna an ti lo vang a, dâwt an sawi hek lo vang; An kâah pawh bumna tawng a awm hek lo vang a: An eiin an mu ang a, tumahin an tihlau tawh lo vang.
3:14 Aw Zion fanu, zai rawh; aw Israel, au vak vak rawh; Aw Jerusalem fanu, i thinlung zawng zawngin lâwm la hlim rawh.
3:15 LALPAN i chngchâng rêlnate chu a la bo ta a, i hmêlma a paih chhuak ta: Israel lalber, LALPA pawh chu i chungah a awm e: Thil thalo i hlau ngai tawh lo vang.
3:16 Chumi nîah chuan Jerusalem hnênah, hlau suh, aw Zion, ih kut pawh zawi suh se, an ti ang.
3:17 LALPA i Pathian chu i chungah a awm e, Chhandamtu tûr mi chak tak chu: Lâwmin i chungah a hlim ang a, a hmangaihna a tithar ang a, Hla sain i chungah a lâwm ang.
3:18 Nangmaha mi, inkhâwmpuia tel pha lova lungngaite chu ka hruaikhâwm ang a, nangmah avânga sawichhiatna phurrit phur tute chu.
3:19 Ngai rawh, chumi hunah chuan nghaisatu zawng zawng che kha kangaihtuah ang; Tin, kebai chu ka chhandam ang a, Hnawh bova awm chu ka hruai khâwm ang; Tin, lei chung zawng zawnga an lo mualphona chu Fakna leh hmingthannaah ka chantîr ang.
3:20 Chumi hunah chuan ka hruai khâwm ang che u: In hmuh ngeia in saltânna ka lam lêt hunah chuan Lei chung mi zawng zawngte zîngah Hmingthanna leh fakna ka siamsak dâwn si che u a, LALPAN a ti. |
posted by zoblog @ 11:51 AM  |
|
|
|
|
|
