| Wednesday, September 12, 2007 |
1:1 Juda lal Uzia lal lai leh Israel lal Joasa fapa Jeroboama lal laia, lirnghin hma kum hnihah khanin, Tekoa-ah ran rual vengtute zinga mi Amosa thu Israel chungchang a hmuh chu.
1:2 Tin, ani chuan, LALPA chu Zion tlang atangin a rum hum hum ang a, Jerusalem khua atangin a aw a chhuah ang a; beram vengtute ran tlatna hmunte chu an lungngai ang a, Karmel tlang chhip chu a vuai ang, a ti a.
1:3 LALPAN heti hian a ti: Damaska khaw bawhchhiatna pathum avângin, a ni pali avângin, a hremna chu ka tireh lo vang; Gilead ram chu buh râwtna thîrte chuan an râwt avângin:
1:4 nimahsela Hazaela inah mei ka tîr ang a, Benhadada lal inte a kâng zo vang.
1:5 Tin, Damaska khaw kawngkhâr thîr chu ka titliak ang a, Aven ruam ata a luahtute leh Eden in ata lal tiang kengtu chu ka tibo vang a; tin, suria ram mite chu Kir ramah salah an awm ang, LALPAN a ti a.
1:6 LALPA chuan heti hian a ti: Gaza khaw bawhchhiatna pathum avângin, a ni pali avângin, a hremna chu ka tireh lo vang; Edom hnêna pêk tûrin mi zawng zawng sala an hruai avângin:
1:7 nimahsela Gaza khaw kulh chungah mei ka tîr ang a, a lal inte chu a kâng zo vang:
1:8 Tin, Asdod khua ata a luahtu leh Askelon khua ata lal tiang keng tu ka tiboral ang a; tin, Ekron khaw chungah ka kut ka lek ang a, tin, Philistia mi la awmte chu an boral ang. Lalpa PATHIAN chuan a ti.
1:9 LALPAN heti hian a ti: tûra khaw bawh chhiatna pathum avângin, ani pali avângin, hremna chu ka tireh lo vang; Edom hnênah mi zawng zawng chu an pêk a, inunauna thu an thlun chu an hriat reng loh avângin:
1:10 nimahsela tûra khaw kulh chungah mei ka tîr ang a, a lal inte chu a kâng zo vang,a ti .
1:11 LALPAN heti hain a ti; Edom bawhchhiatna pathum avângin, a ni pali avângin, a hremna chu ka tireh lo vang; a unau chu khandaihin a ûm a, a khawngaihna zawng zawng a paih bo va, a thinurna chuan a pawh thlêr fo thîna, kumkhuain a thinrimna chu a vawn reng a vângin:
1:12 nimahsela Teman hmun chungah mei ka tîr ang a, Bozra khaw lal inte chu a kâng zo vang, a ti a.
1:13 LALPAN heti hian a ti: A mon fate bawhchhiatna pathum avângin, a ni pali avângin a hremna chu ka tireh lo vang: an ram an tihzauh theih nân, Gilead khaw hmeichhe nau paite an tai thlêr avângin:
1:14 nimahsela Raba khaw kulh chungah mei ka chhêm alh ang a, tin, indo nîa au nên, thâwngaleivir nîa thlîpui nên, a lal inte chu a kâng zo vang a; an lal chu salah an man ang a, a miliante nên arualin, LALPA chuan a ti.
2:1 LALPAN heti hian a ti: Moab bawhchhiatna pathum avângin, a ni pali avângin,a, hremna chu ka tireh lo vang;Edom lal ruhte chu chinai ang hialin a hâl avângin:
2:2 nimahsela Moab chungah mei ka tîr ang a, Kerioth khaw lal inte a kâng zo vang a; tin, Moab chu buaina leh au leh tawtawrâwt riin a thi ang a:
2:3 chumi zîng ata rorêltu chu ka ti bo vang a, a miliante zawng zawng chu, amah nên ka that ang, LALPA chuan a ti.
2:4 LALPA chuan heti hian a ti:Juda bawhchhiatna pathum avângin, a ni pali avângin,a hremna chu ka tireh lovang; LALPA dan chu an hnar a, a thupêkte an vawng lo va an pate biak thin pathian lemte khân a hruai bo avângin.
2:5 nimahsela Juda chungah mei ka tîr ang a. Jerusalem khaw lal inte chu a kâng zo vang.
2:6 LALPA chuan heti hian a ti: Israel bawhchhiatna pathum avângin, a ni pali avângin, a ni a hremna chu ka tireh lo vang; tangkaruaa mifel an hralh avâng leh, pheikhawk bun khatami tlachham a hralh avângin:
2:7 mi retheite lu chunga vaivut takngial pawh an ît a, pachhiate an rûksak a, pa leh a fapa chuan nula pakhat an zen tawm a, ka hming thianghlim an tibawlhhlawh a ni.
2:8 Maichâm awmna apiangah puan dahkham chungah an mu thîn a, an Pathian inah chuan mi an chawitîr mante chuan uain an in thîn a.
2:9 Nimahsela anmahni hmâah Amorho, sidar thing anga sâng leh sasua anga chak pawh kha ka tiboral a; a chung lam ata a rah leh a hnuai lam ata a zung pawh ka tibo va.
2:10 Tin, Amorho ram nei tûrin Aigupta ram atangin ka hruai chhuak che u a, thlalêr ah kum sâwmli chhûngin ka hruai che u a.
2:11 Tin, zâwlnei ni tûrin in fapate zînga mi leh Nazirit mi ni tûrin tlangvâlte ka siam a. Aw, Israel fate u, chutiangin a ni lo vem ni? LALPA thu chhuak chuan a ti.
2:12 Nimahsela Nazirit mi hnênah uain in tûr a pe a, zâwlneite hnênah, Thu hril suh u, tiin thu in pe a.
2:13 Ngai teh u, buhphala khat, tawlailîr chilh angin, in hmunah ka nem ang che u.
2:14 Tin, mi tlân chakte chakna a bo vang a, mi chakin tha a so thei hek lo vang: mi chak tak pawh a in hum thei lo vang a,
2:15 thal ngul hmangtu pawh a ding thei hek lo vang: kal chak mi pawh a inhum thei lo vang a, sakawr chung chuang mi pawh a inhum thei hek lo vang a:
2:16 chumi nîah chuan mi thiltithei tak zînga mi huaisen pawh chu saruakin a tlânbo vang, LALPA thu chhuak chuan a ti.
3:1 Aw, Israel fate u, Aigupta ram atanga ka hruai chhuah chhûngkuate u, LALPAN hetia a sawisêlna che u thu hi ngaithla rawh u,
3:2 Nangni chauh hi khawvêla chhûngkua zawng zawnga ka hriat in ni a: chuvângin in khawlohna zawng zawngahte chuan ka hrem ang che u, tiin.
3:3 An inrem chauh lo chuan mi pahnih an kal ang em ni?
3:4 Sakeibakneiin ngawah sa aman lai loh chuan, a rûm ngai em ni? Sakeibaknei vânglaiin engmah a man loh chuan, a pûk ata a rûm ang em ni?
3:5 A tân chah a awm loh chuan, sava chu lei chunga thangah a âwk lovin lei atangin a per ang em ni?
3:6 Khawpuiah mi hlauh lovin tawtawrâwt an hâm ang em ni? LALPAN a tirh loh chuan khawpuiah chhiatna a lo awm ang em ni?
3:7 Dik takin lalpa PATHIAN chuan a rawngbâwltu, a zâwlneite hnênah a thurûk hrilh lovin engmah a ti lovang.
3:8 Sakeibaknei a rûm a, tuin nge hlau lo vang? Lalpa PATHIAN chuan thu a sawi a, tuin nge hril lo thei ang?
3:9 Asdod khaw lal inahte leh Aigupta ram lal inahte chuan hril ulangin, Samari tlâng chungahte inkhâwm ulangin, tin, chuta buaina lian tak awmte leh chumi zînga hnehchhiahna awmte chu en rawh u, tiin.
3:10 Pâwngnêk leh tharum thawha an chhuhsakte chu an lal inahte an chhêk khâwm a, dik taka tih an tum hauh lo, LALPA thu chhuak chuan, An hmêlmaten an ram chu an rawn hual ang a, an kulhte an tichhia ang, a ti.
3:11 LALPA chuan heti hian a ti a: Berâmpuin sakeibaknei kâ ata a berâm ke pahnih emaw, bengthêm êmaw, a chhan chhuak angin, chutiangin Samari khuaa khum kilah leh khum maimaw puan phan lukham chunga Israel fa awmte chu an chhan chhuak ang a ti a.
3:12 Engkimtithei pathian lalpa PATHIAN thu chhuak chuan heti hian a ti: Ngaithla ula, Jakob chhûngte hriattîr rawh u.
3:13 An bawhchhiatna avânga Israel ka hrem ni chuan Bethel khuaa maichâm te ka tichim ang a, a kîte a tliak vek ang a, leiah atla ang.
3:14 Tin, thlasik in leh nipui in ka vaw chhia ang a; saingho inte chu a boral ang a, in ropui zawng zawng pawh tihchhiat an ni ang.
4:1 Nangni samari tlânga chêng nuho, Basan sebâwng châwm thau ang te u, retheite hnehchhiah a, tlachhamte nêk a, pasalte hnêna, Rawn la ula, i in ang u,’’ titute u, he thu hi hre rawh u.
4:2 Lalpa PATHIAN chuan ama thianghlimna chhâlin chhia a chham a: Ngai teh u, thîr kawmin a lâk bo che u a, in zînga awm chhun nghakuaiin a lâk bo ni che u a lo thleng ang.
4:3 Tin, bang pawpahte in kal chhuak ang a, mitin ngîl takin an kal ang; Harmon hmunah in paih ang, LALPA thu chuak chuan a ti.
4:4 Bethel-ah chuan lo kal ula, bawhchhe rawh u; Gilgalah chuan lo kal ula, bawhchhiatna tipung rawh u; tin, inthâwinate chu tûk tin rawn la ula, i sâwma pakhatte chu ni thum dan zêlah rawn la rawh u;
4:5 tin, dawidim telh lawmthu hrilh inthawina chu hlan ula, mahni duhzawng hlannate chu hril ula, puang rawh u: Aw Israel fate u, hei hi in duhzâwng ta a ni si, lalpa PATHIAN chuan a ti a.
4:6 Tin, kei pawhin in khawpui zawng zawngahte tamna leh in hmun zawng zawngahte tlâkchhamna ka pe che u a: chuti pawhin ka hnênah in lo kîr lo va, LALPA thu chhuak chuan a ti.
4:7 Tin, buh lâk hun tûr thla thum a la nih laiin in chunga ruah sûr tûr pawh ka chelh a: khawpui pakhat chunga ka sûrtîrin, khawpui dang chungah ka sûrtîr lo va: hmun khat chungah a sûr thîn a, a sûr lohna hmun chu a ro thîn a.
4:8 Chutichuan, khawpui pahnih emaw, pathum emaw chu khawpui pakhatah tui in tûrin an vâk a, a khawp lo va: chuti pawhin ka hnênah in lo kîr lo, LALPA thu chhuak chuan a ti.
4:9 Rona lal hmuarnain ka hrem che u a: in huante, in grêp huante, in theipui kûngte, in olive thingte zozai chu thingngêt pangang chuan a ei zo vek tawh a ni a: chuti pawhin ka hnênah in lo kîr lo, LALPA thu chhuak chuan a ti.
4:10 Aigupta ram angin nangni zîngah hripui ka tîr a: khandaihin in tlangvâlte chu ka that tawh a, in sakawrte ka hruai bo tawh a ni; tin in sipai hmun rimchhia chu in hnâra nam khawpin ka awmtîr a: chuti pawhin ka hnênah in lo kîr lo, LALPA thu chhuak chuan a ti.
4:11 Sadom leh Gomora khua chu pathianin a tihchim lai angin, in zîngah mi pawhin ka hnênah in lo kîr lo, LALPA thu chhuak chuan a ti.
4:12 Chuvângin, Aw, Israel, i pathian tâwk tûrin in peih rawh.
4:13 Ngai teh, tlângte din chhuak a, thli siam a, mihring hnênah chuan a ngaihtuahna eng nge ni tih sawi chhuah sak a, zîng chu tithim a, lei hmun sângte chîltu chu a hming LALPA, sipaihote Pathian chu a ni si a.
5:1 Aw, Israel chite u, he thu nangmahni sûn nâna ka sawi hi hre rawh u.
5:2 Nula thianghlim, Israel chu, a tlu tawh a; a ding leh tawh lo vang: a ram chungah paih thlâk a ni tawh a ni; amah tungding tûrin tumah an awm lo.
5:3 Lalpa PATHIAN chuan heti hian a ti si a: Israel chite hnênah chuan, khawpui, sâng chhuahna khân, za a hnutchhiah ang a, khawpui, za chhuahna khân, sâwm a hnutchhiah ang.
5:4 LALPA chuan Israel chite hnênah chuan heti hian a ti si a, Mi zawng ula, in nung ang:
5:5 nimahsela Bethel khua zawng suh ula, Gilgal-ah lût hek suh ula, Beerseba khuaah kai suh u: Gilgal khua chu matheilovin salah an man dâwn si a, Bethel khua chu a lo thlâwn ang.
5:6 LALPA chu zawng ula, in nung ang; chutilochuan, Josefa inah mei angin a chhuak ang a, a kâng zo vang a, Bethel khuaah timit tûr tumah an awm lo vang:
5:7 rorêlna sai thinga chantîra, felna chu leia paih thlate u;
5:8 Siruk leh Chhohreivûng siamtu leh thihna daihhlim zînga chantîrtu leh chhûn chu zanthima siamtu, tuifinriat tuite ko va, lei chunga luantîrtu chu, amah chu zawng ulangin; a hming chu LALPA a ni;
5:9 kulh chungah boralna lo thleng khawpa, michakte chunga boralna thlentu chu.
5:10 kulh kawngkaa dik taka rorêltu chu an hua a, thu dik tak sawitu chu.
5:11 Chuvâangin miretheite rap betin buh in lâk luihsaka: lungchher chuan inte in sa a, nimahsela a chhûngah in chêng lo vang; grêp huan nuamte in siam a, nimahsela a uain in in lo vang.
5:12 I bawhchhiatna te tamzia leh in sualna te a nasatzia ka hre si a; mifelte tiduhdaha, thamna la a, kulh kawng kâa tlachhamte chanpual ngêi pawh pe phal lote u.
5:13 Chuti chuan mifing chu chutiang hunah chuan a ngawi reng a, hun tha lo a nih avângin.
5:14 In nun thein nân that lohna zawng lovin, thatna zawng ula: tin in sawi angin, Lalpa sipai hote pathian chu in hnênah a awm ang.
5:15 Sualna chu hua ula, thatna ngaina ula, kawng kâah rorêlna chu tungding nghet rawh u: Josefho mi la awm chhunte chungah chuan LALPA, sipaihote pathian chuan khawngaihna a nei dah law maw.
5:16 Chuvângin LALPA, sipai hote pathian, Lalpa chuan heti hian a ti: Kawtlai zau zawng zawngah tah vak vakna a awm ang a; kawtthlêr zawng zawngah, A va pawi êm! an ti ang a; lungngai tûrin loneitute leh tap vak vak tûrin sûn thiamte an ko vang.
5:17 Tin, grêp huan zawng zawngah an tap vak vak ang a: in zîngah ka kal tlang dâwn si a, LALPAN a ti a.
5:18 LALPA nî duhte u, in chung a pik e! Engati nge LALPA nî chu in duh? Eng ni lo vin thim a ni zâwk e.
5:19 Sakeibaknei kal san a, savawm tâwk mi ang leh inah lût a, bang chungah kut nghat a, rûlin a chuk ang a ni.
5:20 LALPA nî chu êng ni lovin thim a ni dâwn lo vem ni? Thim chhah leh êng rêng rêng pawh nei lovin?
5:21 In kutte ka huain ka hmusit a, in inkhâwmpui urhsûnahte chuan ka lâwm hek lo vang a.
5:22 A ni, in hâlral thilhlan leh in buhhlan min hlân mah ula, ka pawm lo vang a, in ran thau remhlante pawh ka ngaihsak hek lo vang a.
5:23 I tingtang rimawi chu ka ngaithla lo vang; chuvângin ka lakah i hla beng chheng chu la bo rawh.
5:24 Nimahsela rorêlna dik chu lui angin luang sela, felna chu luipui kang ngai lo angin luang rawh se.
5:25 Aw Israela chhûnghote u, kum sâwmli chhûngin thlalêrah khân inthawina te leh thilhlante ka hnênah ka rawn la em ni?
5:26 A ni, in lalber Sikkuth leh in kaiuan milimte, in arsi pathian, mahni tâna in siam chu, in la ang a.
5:27 Chutichuan Damaska khaw piah lamah salah ka kaltîr ang che u a, Sipaihote lalpa PATHIAN chuan a ti.
6:1 Zion tlânga nuam lutuk a awmte leh Samari tlânga him taka awmte leh hnam lian ber miropuite, an hnêna Israela chhûngho an kalnate chung chu a pik e!
6:2 Kalneh khuaah kal ula, en rawh u; tin, chuta tangin Hamath khaw ropuiah chuan kal ula: tin, Philistia ram Gath khuaah chuan kal chhuak ula: hêng ramte ai hian an tha zâwk em?
6:3 Nangni ni tha lo hla taka dah leh nunrâwng thutna hnaihtîrte u,
6:4 sainghho khuma mu a, an thutthleng sei chungah te zi mar a, berâm rual zînga berâm note leh sebâwng awmna zîng ata sebâwng tuaite ei a;
6:5 tingtanga dâwng dahna hlate sa a, Davida anga mahni tâna hla thlûk hmanruate siam a;
6:6 berhbu liana uain in a, hriak tha bera in hnawihte chu; nimahsela Josef-ho hreawmna avângin an lungngai lo.
6:7 Chutichuan tûna sala kal hmasate nên salah an kal ang a, zi marte hlimna bûng bûng chu a bo vang.
6:8 LALPA, sipaihote Pathian chuan, lalpa PATHIAN chuan amah leh amah inchhâlin chhia a chham a: Jakoba chapona chu ka ten a, a lal inte ka hua a: chuvângin khua leh a chhûnga awm zawng zawngte chu ka mantîr dâwn a ni.
6:9 Tin, heti hi a lo ni anga, in pakhatah mi sâwm an la awm chuan an thi ang a.
6:10 Tin, mi pakhat pami a hâltu ngei pawhin a la a, in chhûng ata a ruh la chhuak tûrin, in chungnung bera awm hnênah, I hnênah tupawh an la awm em? a tih a, anin, Awm lo, a tih chuan; tin, a nin Ngawi tlat rawh; LALPA hming chu kan lam tûr a ni si lo va, a ti ang a.
6:11 Ngai teh u, LALPA chuan thu a pe si a; tin, in lian chu a chim rem rum ang a, in te pawh chu a khi chat rel rul ang a.
6:12 Sakawrte chu lungpui chungah an tlân ang em ni? Chutah miin sebâwngin lei an let ang em ni? Nangnin rorêlna chu thihna hlovah leh felna chu sai thinga in chantîr hi:
6:13 nangni thil thlâwn chunga lâwm a, Keimahni chaknain a a ni lâwm ni kîte kan lâk? tite u.
6:14 En teh u, Aw Israela chhûngte u, nangni do tûrin hnam ka din chhuahtîr ang a; tin, Hamath khaw kawt chhuah atangin Araba lui thlengin an tiduhdah ang che u a, LALPA sipaihote Pathian thu chhuak chuan a ti si a.
7:1 Lalpa PATHIAN chuan inlârna min hmuhtîr a. Chutah chuan khaukhuap rual tam tak a siamte chu ka hmu a. Hei hi lal fathang buh an seng hnua, buh tiah leh tan tirh lai takin a ni a.
7:2 Tin, heti hi a lo ni a, chumi rama hlobet chu an ei zawh hnuin, Aw lalpa PATHIAN, ngaidam rawh, ka ngên a che: Jakoba chu engtinnge a din theih ang; Amah a te si a, ka ti a.
7:3 He thu lamah hian LALPA chu a lamlêt a: LALPA chuan, A ni tawh lo vang, a ti a.
7:4 LALPA chuan inlârna mi hmuhtîr leh a, a mite hremnân mei a lo lai ka hmu a; mei chuan tui thûk tak chu a kâng vek a, ram pawh a kâng dâwn a.
7:5 Tin, keiin, Aw lalpa PATHIAN, bâng rawh, ka ngên a che: Jakoba chu engtin nge a din theih ang? Amah a te si a, ka ti a.
7:6 He thu lamah hian LALPA chu a lamlêt a; LALPA chuan, Hêngte pawh hi a lo thleng lo vang a ti a.
7:7 Hetiangin mi entîr leh a; chutah chuan, LALPA chu bang ngîl taka rem kianga ding ka hmu a, a kutah enremna a awm a.
7:8 Tin, ka hnênah LALPA chuan, Amosa, eng nge i hmuh? a ti a. Tin, keiin, Enremna, ka ti a, Tin LALPA chuan, ngai teh, ka mi Israelte zîngah enremna ka dah ang a; an mahni ka pêl leh tawh lo vang a:
7:9 Tin, Isaaka hmun sângte chu an lo ram ang a, Israel hmun thianghlimte chu tihchhiat a ni ang a; tin, Jeroboama chhûngte khandaihin ka do vang a.
7:10 Tin, Bethel khaw puithiam Amazia chuan Israel lal Jeroboama hnênah: Amosa chuan Israela chhûngte zîngah a phiar che a: ram chuan a thu zawng zawng chu a tuar thei lo.
7:11 Amosa chuan heti hian a ti si a, Jeroboama chu khandaihin a thi ang a, mathei lovin a ram atangin Israel chu chu salah a hruai chhuak ang a, tiin thu a thawn a.
7:12 Ti, Amosa hnênah Amazia chuan, Aw, nang zâwlnei, kal la, Judai ramah tlânbo la, chutah chaw ei la, thu hril rawh:
7:13 nimahsela Bethel khuaah thu hril leh tawh suh; lal hmun thianghlim leh lal in a nih avângin, a ti bawk a.
7:14 Tin, Amazia hnênah Amosa chuan, Zâwlnei ka ni lo va, zâwlnei fapa pawh ka ni hek lo; ran rual vêngtu leh theipui thing enkawltu ka ni zâwk e:
7:15 Tin, LALPA chuan berâm rual vênna ata chu mi la a, LALPA chuan ka hnênah, kal la, ka mi Israelte hnênah thu hril rawh, min ti a.
7:16 Chutichuan tûnah LALPA thu chu hre rawh: Nangin Israel kalhin thu hril suh la, Isaaka chhûngte kalhin i thu thlah suh la, i ti a;
7:17 chuvângin LALPA chuan heti hian, I nupui chu khawpuiah nawhchizuar a ni ang a, i ram chu tehna hruiin an sem ang a; tin, nangmah ngei chu ram thianglo chhûngah chuan i thi ang a, mathei lovin Israel chu a ram ata salah an hruai bo vang a, a ti a, tiin a chhâng a.
8:1 Lalpa PATHIAN chuan inlârna min hmuhtîr leh a, mipui thei bâwm ka hmu a.
8:2 Tin, anin Amosa, eng nge i hmuh? a ti a. Tin, LALPA chuan ka hnênah, ka mi Israelte tâwpna tûr a tuah ta, ka hêl tawh lo vang, a ti a.
8:3 Lalpa Pathian thu chhuak chuan, Chumi nîah chuan biak in hlate chu lusûn hlaah a chang ang a; mithi ruang a tam ang a, hmun tinah ngawi rengin an paih chhuak ang a ti a.
8:4 Heihi ngaithla rawh u, Aw! tlachhamte ei zo duh a, ram mirethei tibo duhte u,
8:5 Buh kan zawrh theih nân thla thar chu eng tikahnge a ral ang a, chhangphut buh kan hralh theih nân chawlhnî chu engtikah nge a ral ang, titu; ephah titêin sekel tirit a, dik lo taka bumna bûk hmang a;
8:6 tangkaruaa mirethei lei a, mi tlachhamte chu pheikhawk bun khata lei a, buhsî kan hralh theihnân, titute u.
8:7 LALPA chuan, jakoba ropuina chhâlin chhia a chham a, Mathei lovin an hnathawh rêng rêng ka theihnghilh hauh lo vang, tiin.
8:8 Hemi avâng hian ram chu a khûrin a chhûnga awm apiangte chu an lungngai dâwn lo vem ni? A ni, lui ang chuan a lo lian vek ang a; Aigupta ram lui angin a lo buaiin a kâm ang a.
8:9 Tin, Lalpa Pathian thu chhuak chuan, chumi nîah chuan, heti hi a lo ni ang a, chhûn laiah nî ka tlâktîr ang a, nisat lai chuan lei chu ka ti thim ang a.
8:10 In ruaithehte chu lungngaihnaah leh, a tâwpna chu khâkna nî angin ka siam ang a.
8:11 Lalpa PATHIAN thu chhuak chuan, Ngai teh u, nîte chu a lo thleng mêk a ni; chûng nîahte chuan ramah chuan tam ka tîr ang a, chaw tamna ni lovin, LALPA thu hriatna tamna zâwk chu.
8:12 Tin, tuifinria atangin tuifinriatah leh hmâr atangin chhakah pawh an vakvâi ang a; LALPA thu chu zawng tûrin kil tinah an tlân ang a, an hmu lo vang.
8:13 Chumi nîah chuan nula leh tlangvâl thalaite meuh pawh tuihâlin an thi dang ang a.
8:14 Samari pathian lim chhâla chhechhham a, ‘Dan pathian hmingin’ titu emaw ‘Beersheba pathian hmingin’ titu emaw pawh chu an tlu ang a, an tho leh tawh lo vang.
9:1 Maichâm bula dingin LALPA chu ka hmu a: tin, anin, kawngka bulte an nghhîn theihnân a chhîp bâwkte chu vua la, an vaia lu chungah tikeh sawm vek rawh: tin,a thi bâkte chu khandaihin ka that ang a: pakhatmah an tlânbo lo vang a, pakhat mahin an pumpelh hek lo vang a.
9:2 Mitthi khaw thlengin lai tlang mah sela, chuta ta chu ka kutin ka la chhuak ang a; vânah lâwn mah sela, chuta ta chu ka hnûk thla ang.
9:3 Karmel tlângchhipah biru mah sela, ka zawng ang a chuta ta chu an mahni ka la chhuak ang a; tin, tuifinriat mawngah ka mit hmuh lovah biru mah sela, chuta ta rûl chu thu ka pe ang a, an mahni a chuk ang a.
9:4 An hmêlmaten sala an hruai chu thu ka pe ang a, khandaihin an sât hlum ang, tanpui ahnêkin an niho tihhlum hi ka tum a ni.
9:5 Ram chu tawk a, titui raltu chu Lalpa, sipaihote PATHIAN chu a ni si a; tin, chuta awm zawng zawngte chu an lungngai ang; tin, lui angin a lo lian ang a, Aigupta lui angin a lo kâm leh ang;
9:6 vâna pindante siam a, tufiriat tuite ko va, lei chunga leih bawtu, a hming chu LALPA a ni.
9:7 LALPA thu chhuak chuan, Aw Israel fate u, ka chungah Ethiopia fate angin in awm lo vem ni? Aigupta ram ata Israel leh Kaphtor ram ata Suria mite ka hruaichhuak lo vem ni? a ti a.
9:8 Ngai teh u, thu ka pe dâwn si; tin chhihrîa buh an hrîk angin, Israela chhûngte chu hnam zawng zawng zîngah ka hrî ang a; nimahsela fangte ber pawh lei chungah a tla lo vang a.
9:9 Ka mite mi sual zawng zawng, That lohna chuan min ûm phâk lo vang a, tite chu khandaihin a thi ang, a ti a.
9:10 Hêng thil titu LALPA thu chhuak chuan heti hian a ti: Chumi nîah chuan Davida bâwktê chim chu ka tungding ang a, a pawpte chu ka thawm ang a; a chhiate chu ka rem chho vang a, hmân laia a awm ang khân ka sa ang a;
9:11 Edom hmuna la awmte leh ka hminga koh hnam zawng zawngte chu an neih theih nân, a ti a.
9:12 LALPA thu chhuak chuan, Ngai teh u, nîte a lo thleng mêk a ni;
9:13 chung nîahte chuan lei lettu chuan buh âttu leh grêp chiltu chuan chi thehtu chu a ûm phak ang a; tin, tlâng sâng chuan uain thlum a fartîr ang a, tlang zawng zawng an tui ang a.
9:14 Tin, ka mi Israelte chu sal ata ka hruai kir leh ang a; tin, khaw ramte chu an siam leh ang a, an luah ang a; tin, grêp huante an siam ang a, a uain chu an in ang a: huante pawh an siam ang a, a rah chu an ei ang a.
9:15 Tin, an ramah anmahni ka ka phun ang a, an hnêna ka pêk an ram ata chu pawh chhuahin an awm leh tawh lo vang, LALPA Pathian chuan a ti a. |
posted by zoblog @ 11:55 AM  |
|
|
|
