|
| Wednesday, September 12, 2007 |
1:1 Ninevi khaw phur rit chu. Elkos mi Nahuma inlârna hmuh bu chu.
1:2 LALPA chu thikthuchhia Pathian leh phuba lak hmang a ni; Lalpa chuan phuba a la a, thinurnain a khat a ni; Lalpa chuan a dotute chungah a la a, a hmêlmate tan chuan thinurna a khawl khawm a ni.
1:3 LALPA chu a thin a nel a, nasa taka thiltithei a ni a, misual chu thiam a chantîr rêng rêng lo vang: LALPA chuan thâwngaleivirah leh thlipuiah a kawng a nei a, chhûmte chu a kea vaivut a ni.
1:4 Tuifinriat chu a zilhhau va, a tikang chat a, li zawng zawngte pawh a tikang zo va, Lebanon tlâng pangpâr chu a chuai a.
1:5 Tlâng liante chu amah avângin a nghîng a, tlâng te te chu an tui ral a; a hmâah chuan lei hi a khûr a, a ni, khawvêl leh a chhûnga awm zawng zawngte nên chuan.
1:6 A lungnih lohna hmâah chuan tu nge ding thei ang a, a thinrimna nasa takah chuan tu nge awm thei ang: A thinrimna chu mei anga leihbuak a ni a, lungpuite chu a tikeh sawm vek a ni.
1:7 LALPA chu a tha a, mangan nia kulh nghet a ni; amaha an rinna nghat tute chu a hria. A mah dotute erawh chu tui lian nasa tak hmangin a tiboral vek ang a, a hmêlmate chu khawthimah a ûm lût ang.
1:8 LALPA kalhin eng nge in suangtuah? Tâwp dêrna a thlentîr dâwn a ni, phuba lâk nawn a ngai lo vang.
1:9 An uain in chuan chiah huh hnêp mah sela hlîng bâwm ang leh buhpâwl ro ang maia tihboral vek an ni ang.
1:10 Nangmaha chhuak mi pakhat LALPA kalha thilsual ngaihtuahtu, suahsualna thu râwntu a awm,
1:11 LALPA chuan heti hian a ti: An chak theih tâwpin chak mah sela, tam pawh tam tak ni mah sela, chuti chung pawhin sâm thlûkin an awm ang a, an boral ang. Lo tihrehawm tawh che mah ila ka tihreawm leh tawh lo vang che.
1:12 Tûnah chuan i hnên ata a nghâwngkawl chu ka titliak ang, nangmah phuarna hruite chu ka tichat vek ang.
1:13 LALPA chuan i chungchâng thu-ah thu a pe a, i hming pu tûr thlah i nei lo vang. I pathian ho in ata milem siamchawp leh milem chhûnte chu ka tiboral ang a; i thlân ka siam ang; i sual si a.
1:14 Tlângah te chan chin tha thlena, remna thu tlângaupuitu kê chu en teh! Aw Juda, i kutte chu serh la, i thutiamte chu hlen rawh: mi suaksual chuan a palzût leh dâwn tawh si lo che; tihboral dêr a ni ta e.
2:1 Tikeh sawmtu chu i hmai hmaah a lo chhuak e: kulhbîng chu enkawl la, kawng chu vêng rawh; i kawng tikhauh la, i thiltihtheihna chu chak takin siam tha rawh.
2:2 Israelho ropuina ngin Jakobho ropuina chu LALPA chuan a tungding leh si a: tiruaktute chuan anmahni an tiruak zo tawh a, an grêp pêngte an tichhe tawh si a.
2:3 A mi chakte phaw chu thisen a ni a, mi huaisente chu a senlârin an inthuam a: a inbuatsaihna nîah chuan tawlailîrte chu kahpathîr tlêin a tlê zawr zawr a, fei te chu rapthlak takin a phe zawk zawk a ni.
2:4 Tawlailîrte chu kawtthlêrah an tlân bur bur a, lamlian zauvahte chuan an insu sawk sawk a: meichher angin an lang a, kâwl phe angin an tlân thuak thuak a ni.
2:5 A miliante chu a ko chhuak a: an kal rual chu a petek a; kulhbang lam pan chuan an hmanhmawh a, thil phên tûr an siam a.
2:6 Lui kawngkhârte chu hawn a ni a, lalin chu tihralin a awm a.
2:7 Tin, Huzzabi chu an hlîp a, an kal bo pui a, a bâwihnute chuan an âwm chûmin thuro hrâm ang maiin an tah a.
2:8 Hmâsâng ata Ninevi chu dîl ang a ni a, a sah ta hum hum a; Ding rawh u. ding rawh u, tiin an au va; mahse tumah an hawikîr lo.
2:9 Tangkaraw sumte chu lâksak ula, rangkachak sumte chu laksk rawh u: thil chhêk khâwm leh bungraw tha zawng zawng ropuizia chuan tâwp in tai a nei si lo.
2:10 Tihruahin a awm a, a ruak dêr a, a ram a ni: thinlung chu a tituiral a, khûpte chu a inkhâwng a, kâwng zawng zawng a na ngawih ngawih a, an zavaia hmêl a dâng zo vek a ni.
2:11 Tuma tihtit lohva an awmna, sakeibakneipa te, sakeibakneipui te sakeibaknei no te an kal vêlna sakeibaknei bu zâwl leh sakeibaknei noten an eina hmun chu khawiah nge?
2:12 Sakeibakneipa chuan a note khamkhawp a pawtsawm a, sakeibakneipuite tân a seh hlum a, a pûkte chu sa sehin a tikhat a, a buzâwlte chu saruang pawh samin.
2:13 Sipaihote LALPA chuan, Ngai teh, ka do che a ni, a tawlailîrte chu ka hâl khu hluah hluah ang a, i sakeibaknei note chu khandaihin a tiboral ang: tin, leia i sa seh hi ka tikin ang a, i palaite aw chu hriat a ni tawh lo vang, a ti a.
3:1 Thisen chhuah hmang khawpui chu a chung a pik e! Dâwt leh inrawknain a khat vek a; an sa seh chu a chat lak lo.
3:2 Vuakin vai rîk te, tawlailîr ke in nghawr ri te, sakawr zuang te, tawlailîr tlân hlawk hlawk te nên;
3:3 Sakawr chung chuang mi sakawra chuangte, khandaih tlê zawk zawkte, fei tlê zawr zawrte nên; mi thah awm rem rumte, ruang awm rei rûite nên: ruangin kin tih rêng a nei lo; an ruangte chu an chhuih a:
3:4 Chûng chu, nawhchizuar hmêltha, dâwithiamnu, uirena avânga hnam hralh a, a dâwi chînna avânga chhûngkaw hralhtu uirena nasa tak avânga lo awm a ni.
3:5 Sipaihote LALPA chuan heti hian a ti: Ngai teh, ka do che a ni; i hmâi lamah i puan ka hlîm ang a; i saruakna hnamte hnênah leh i mualphona lal ramte hnênah ka entîr ang.
3:6 Bawlhhlawh tenawm takin ka theh ang che a, zahthlâk takin ka siam ang che a, ennawm atân ka dah ang che.
3:7 Tin, heti hi a ni ang a, a hmu apiang che i lakah an tlân bo vang a, Ninevi khua chu a lo ram ta a ni: tu nge sûn ang? Khawi ata nge i tân thlamuantute ka zawn tâk ang? an ti ang.
3:8 Nile lui luan hual No-amon, a kulh atân tuipui hmang a, a in hung nâna tuidîl hmang aiin i chak zâwk em ni?
3:9 Ethiopia leh Aigupta chu a chakna ani a, chu chu tâwp chin nei lo a ni; Put leh Lubim chu nangmah tanpuitute an ni.
3:10 Chuti chung pawh chuan lâk bovin a awm a, a salah a tâng a: kawtthlêr tin tâwpah a naupang te te chu an paih sawmsak a: a mitha te tân thum an vâwr a, a milian zawng zawngte chu khaidiatin phuar an ni.
3:11 Nangpawh i rûi bawk ang a, thuhrûkin i awm ang; hmêlma avângin kulh nghet i zawng bawk ang.
3:12 I kulh zawng zawngte chu theipui kûng, rah hmin hmasa pu ang an ni ang a: an nghîn phawtchuan eitu kâah an tla lût thin.
3:13 Ngai teh,i chhûnga i mipuite chu hmeichhia an ni a; i hmêlma te tân i ram kawng-ka chu a in hawng huai a: i in kalhna thîr tlâwnte chu meiin a kâng ral a ni.
3:14 Hual vêla i awm chhûng atân tui châwi la, i kulhte tinghet rawh; hlumawmnaah chuan kalla, lungchârna chu chîl la, leirawhchanna thuk chu tinghet rawh.
3:15 Chutah chuan meiin a kângral ang che a, khandaihin a sâthlum ang che a, thingngêt angin a tiboral ang che: thingngêt angin intitam la, khaukhuap angin intitam rawh.
3:16 I sumdâwngtute chu van arsi aia tamin i tipung a: thingngêtin a thla azâr a, a thlâwk bo ang hian an bo zo ta.
3:17 I mi lallukhum khumte chu khaukhuap ang an ni a, i sipaihotute chu khaw vawh nîa pala khau rual fu khâwm ang an ni, amaherawhchu nî a lo chhuak a, an thlâwk bo va, an awmna hmun rêng hriat a ni lo.
3:18 Aw Assuria lal, i berâm vêngtute chu an muthlu e: i miliante chu an châwl a: i mipuite chu tlângahte an darh zo va, hruai khâwmtu tumah an awm lo.
3:19 I nâ damna tûr a awm lo va; i hliam chu a nasa hle a ni: i thâwm hria apiangin kut an ben khum che; i suahsualnain a chîm fo loh tunge awm? |
posted by zoblog @ 11:52 AM  |
|
|
|
|
|
