| Wednesday, September 12, 2007 |
1:1 Amittaia fapa jona hnenah LALPA thu a lo thleng a,
1:2 Tho la, Ninevi khua, khawpui ropui takah chuan kalla, a chung thu tlângaupui rawh; an suahsualna chu ka hmâah a lo thleng chho ta si a, tiin.
1:3 Nimahsela Jona chu LALPA hmâ ata Tarsis-ah tlânbo tûrin a tho ta a; tin, Joppa khuaah a kal chhuk a, Tarsis lawng pan tûr lawng a hmu a: tichuan a kal man chu a pe a, LALPA hma ata chu Tarsis pan tûrte nêna kal tûrin lawngah chuan a lût thla ta a.
1:4 Nimahsela LALPA chuan thli na tak mai tuifinriatah chuan a tlehtîr a, tuifinriatah chuan thlipui nasa tak a tleh a, tichuan, lawng chu a keh dâwn ang maiin a awm ta a.
1:5 Tin, lawng mite chuan an hlau va, mahni pathian an au theuh va; lawng chu an tân a zân nân lawng chhûnga bungruate chu tuifinriatah chuan an paih chhuak ta a. Jona erawh chu lawng chhûngril berah a lo lût tawh a ni a; a mu a, a lo muhîl dêr a.
1:6 Chutichuan lawng hotu chu a hnênah a lo kal a, Aw nang muhîl, eng tizia nge ni? Tho la, i Pathian ko rawh, Pathian chuan, kan boral loh nân, min ngaihtuah mahna, a ti a.
1:7 Tin, hawh u, he thil tha lo kan chunga lo awm hi tu vâng nge ni tih kan hriat theih nân, thum i vâwr ang u, tiin an in be hlawm a. Tichuan, thum an vâwr a, thum vâwr chu Jona chungah a tlu ta a.
1:8 Tichuan, a hnênah chuan, He thil tha lo kan chunga awm hi tu vâng nge ni, min hrilh rawh, kan ngên a che; i hnathawh eng nge ni? Khawi atanga lo kal nge i nih? Eng hnam mi nge i nih? an ti a.
1:9 Ani chuan an hnênah, Hebrai mi ka ni a; tuifinriat leh khawmual siamtu LALPA, vân Pathian chu ka hlau a ni, a ti a.
1:10 Tin, mite chuan an hlau nasa ta êm êm a, a hnênah chuan, Hei le, eng nge i lo tih ni? an ti a; a hrilh tawh avângin, mite chuan LALPA hma ata a tlânbo a ni tih an hre si a.
1:11 Tichuan, a hnênah chuan, kan tân tuifinriat hi a fâwn loh nân, i chungah eng nge kan tih ang? an ti a, tuifinriat chu a fâwn nasa telh telh si a.
1:12 Tin, a ni chuan an hnênah, Mi la kâng ula, tuifinriatah hian mi theh chhuak rawh u; tichuan tuifinriat hi in tân a fâwn tawh lo vang: keimah avângin in chungah he thlipui nasa tak hi a tleh a ni tih ka hre si a, a ti a.
1:13 Nimahsela mite chuan khawmualah kîr tûrin an kar vak vak a; amaherawhchu an thei lo va: tuifinriat lah chu an chungah a fâwn nasa telh telh si a.
1:14 Chuvâng chuan LALPA chu an au va, Aw LALPA, he mi nunna avâng hian min tiboral suh la, mithiam thisen mawh kan chunga nghat lul lo tûrin kan ngên a che, Aw LALPA, nangin i duh anga i tih a ni si a, an ti a.
1:15 Chutichuan Jona chu an la kâng a, tuifinriatah chuan an theh chhuak ta a: tin, tuifinriat chu a fâwn phûl bulh bulh a reh ta a.
1:16 Tichuan, mite chuan LALPA chu nasa takin an hlau ta a; LALPA hnênah chuan inthâwina an hlân a, thute an tiam ta a.
1:17 Tin, LALPA chuan Jona lem tûrin sângha lian tak a lo ruat tawh a; chu sângha kawchhûngah chuan Jona chu ni thum leh zan thum a awm a.
2:1 Tin, Jona chu, sângha kawchhûng atang chuan, LALPA a pathian hnênah a tawngtai a.
2:2 Heti hian a ti a; Ka hreawmna avângin LALPA chu ka ko va, Annin mi chhang a; Seol kawchhûng atangin ka au va, Nangin ka aw i hria a.
2:3 Thûk takah, tuifinriat chhûngrilah chuan nangin mi paih lût a, Tui tamtak chu ka vêlin a awm a; I tuifâwn leh i tui in chhawk zawng zawngte chuan mi vûr zêl a.
2:4 Tin, i mithmuh ata paih chhuah ka ni a; Nimahsela i biakin thianghlim lam ka hawi leh ang, ka ti a.
2:5 Tuite chuan ka nunna chenin mi hual vêl a; Tui thûk chu ka vêlin a awm a; Hnimte chuan ka lu a tuam vêl a ni.
2:6 Tlâng bul tâwp rêtahte chuan ka kal chhuk a; Lei chuan kumkhua atân a kalhnate chuan mi khâr khum a: Amaherawhchu nangin, Aw LALPA ka Pathian, khuarkhurum ata chu ka nunna i la chhuak a ni.
2:7 Ka nunna ka kawchhûng a chauh lai chuan, LALPA chu ka hre reng a: Ka tawngtaina chu i biakin thianghlimah i hnên a lo thleng a ni.
2:8 Thil lawilo dâwt mai mai ngaihsak tute chuan Anmahni ngilneihna chu an hawisan a ni.
2:9 Kei erawh chuan lâwm thu sawina aw nên i hnênah in thawina ka hlân ang a; Thu ka tiam tawh chu ka hlen ang. Chhandamna chu LALPA ta a ni, tiin.
2:10 Tin, LALPA chuan sângha chu a bia a, Jona chu khawmualah a law chhuak ta a.
3:1 Tin, LALPA thu chu Jona hnênah a lo thleng nawn leh a,
3:2 Tho la, Ninevi khua, khaw ropui takah chuan kal la, thu sawi tûr ka tuk che hi va tlângaupui rawh, tiin.
3:3 Tichuan Jona chu a tho va, LALPA thu ang chuan Ninevi khuaah a kal ta a. Ninevi chu khaw ropui zet, a zau zâwng ni thum kal a ni.
3:4 Jona chu ni khat kal chin khawpui chhûngah chuan a han lût tan phawt a, Tûn a chin ni sawmliah, Ninevi hi tih boral a ni dawn e, tiin a au va.
3:5 Ninevi mite chuan Pathian an ring ta a, Chaw nghei tûr tiin an puang a, an zînga a lian ber atanga a tê ber thlengin saiip puan an sin ta a.
3:6 Chûng thu chu Ninevi khaw lalber beng a lo thleng a, a lal thutphah atang chuan a tho va a lal puan chu a hlip thla a, saiip puan a sin a, vutah a thu ta a.
3:7 Lalber leh a milliante thupêkin lalber chuan Ninevi khawchhûngah thu a puangin a chhuah a, mihring emaw, ran emaw, bâwng rual emaw, berâm rual emawte chuan engmah tem suh se: eiin tui pawh in suh se:
3:8 Mihring leh rante chuan saiip puan sin zâwk sela, Nasa takin pathian au rawh se: a ni, mitinin mahni kawng tha lo leh an kuta pâwngnêkna chu hawisan rawh se.
3:9 Kan boral loh nân, Pathian chu kîrin, rilru lamlêtin, a thinrimna nasa tak atang chuan a lamlêt lovang tih tuin nge hria? tiin.
3:10 Tichuan pathianin an thil tihte chu en in, an kawng tha lo chu an hawisan tih a hmu a; an hnêna a sawi tawh, tih a tum thil tha lo chuPathian chuan a lamlêt a; a ti ta lo a ni.
4:1 Amaherawhchu, chu chuan Jona a ti lungni lo ta êm êm a, a thin rim a.
4:2 LALPA hnênah chuan a tawngtai a, Aw LALPA ka ngên a che, heihi kan rama ka laawm lai a ka sawi kha a ni lo vem ni? Hei vâng hian Tarsis lamah ka tlânbo thuai a nih kha: nang zawng khawngaih ngah, thil tha lo laka lamlêt thin i ni tih ka hria a ni.
4:3 Chuvâng chuan, Aw lalpa tûnah ka nunna hi mi lâksak tûrin ka ngên a che; kei atân hian dam aiin thih a tha zâwk si a, a ti a.
4:4 Tin, Lalpa chuan, i thinrim hi i ti dik em ni? a ti a.
4:5 Tichuan Jona chu khawpui ata chu a kal chhuak a, khawpui chhak lam pang ah chuan a thu a, chutah chuan chhâwl bûk a sa a, khawpui chhûnga thil lo thleng tûr chu hmuh tumin a hnuai hlimah chuan a thu ta reng a.
4:6 Tin, LALPA pathian chuan ûm a lo ruat a, chu chu Jona chungah a zâmtîr a, a hreawmna ata chhanchhuak tûra a lu zâr hliah tu a tân. Chutichuan, Jona chu ûm avâng chuan a lâwm nasa êm êm a.
4:7 A maherawhchu Pathianin, atûk khawfîng chah laiin, sûlrûl a lo ruat a, chu chuan ûm chu a kher a, a lo vuai ta a.
4:8 Tin, heti hi a ni a, nî a lo chhuah chuan Pathianin khaw chhak thli lum a lo ruat a; tin, ni chuhan Jona lu chu a êm a, a thi dang a, a tân chuan thih a dîl ta a, kei atân hian dam aiin thih a tha zâwk e, a ti a.
4:9 Tin, Pathian chuan Jona hnênah, ûm chungchâng thu ah i thinrim hi i ti dik em ni? a ti a.
4:10 Tin, LALPA chuan, I rinpui loh, i thantîr pawh ni hek lo, zankhat thila lo awm a, zankhat thila boral leh ûm hi i lainat a:
4:11 Ninevi khua, khaw ropui tak, a chhûnga mi nuaikhat lehsinghnih aia tam, an ding leh vei pawh thliar thei lote leh ran rual tam tak awmna hi, ka khawngaih lo vang em ni? a ti a. |
posted by zoblog @ 11:54 AM  |
|
|
|
