|
| Wednesday, September 12, 2007 |
1:1 Mipuia khat thin khawpui kha khawhara a thut tak chu.
1:2 Hnamte zinga ropui thin kha, hmeithai ang a lo ni ta a!
1:3 Juda chu saltan khur a lût ta a, hreawm leh sal chhawr tuarin; A chêng ta e, ânpai zîngah, chawlhna rêng a tawng lo ve; A ûm tu zawngten an nangchîng, a chêp lai takin.
1:4 Zion khawpui kawngte chu a ngui ruai, kûtpui urhsûn kal awm loh vângin; A kulh kawngkâ zawng zawng a ram zo, a puithiamte an rûm a. A nulaten an tuar a, ani lahin nâ a ti êm êm .
1:5 A hnehchhiahtute chu hotuah an chang zo ve, a hmêlmate an hlawhtling, LALPAN a tuartîr tâk hi, bawhchhiat tam avângin; Hnehchhiattu hmâah a hraichawite sal tân khur an lût ta e.
1:6 Tin, Zion fanu chu a mawina zawngin a bosan ta e, A hotute zukchal tlat hmun neilo ang an chang zo ta; Umtu hmâan an tlân e, tha leh zungzâm rêng nei lovin.
1:7 A hreawm mangan nîah Jerusalem chuan a hre reng a, A hmasâng thil hlu zawng zawngte; Hnehchhiahtu kuta a mite an tlûk laiin ani chu tumah rêngin an pui lo, Hnehchhiahtuten an en a, a chim chu an diriam a.
1:8 Jerusalem a sual ta êm, chuvang chuan thil thianghlim lo a lo chang ta; A zahtu zawngten an hmusit, a sa ruak an hmuh vângin; A ni, lungngaiin a ni a rûm a, lehlam a hawi.
1:9 A puan hmâwrah bawlhhlawh a kai; a hun tâwp tûr a ngaihtuah lo; Chuvâng chuan mak takin a tlâwm, thlamuantu rêng a nei lo ve. En teh, aw LALPA, mi hreawmna hi, hmêlma a intiropui si.
1:10 Hnehchhiattu chuan a kut a lek a, a thil hlu zawng zawng chungah chuan; A hmun thianghlimah chuan ânpaiho an lût a hmu e, Inkhâwmna hmuna luh i khapteho kha.
1:11 A mite zawng zawng an rûm e. ei tûr zawngin; An thil hlu zawng zawng an pe zo, nun tihharhna chaw atân. Aw LALPA, ngai la, en teh, hmusitawm ka nih tâk hi.
1:12 In tân engmah lo mai em ni, kawnga veivâk zawng zawngte u? Ngai ula, en teh mah u, ka chunga thleng ka lungngaihna ang lungngaihna a awm em ni? A thinrim nasat nîa LALPAN min tihhreawmna hi.
1:13 Chung lam ata mei a tir a, ka ruh chhûngah a luhtîr a; Ka ke atân lên a zâr a, mi tikîr a;Rilru bo rum rumin chau takin mi siam a.
1:14 Ka bawhchhiatna hi phurrit atân têl khâwm a ni a, Ama kut ngeia tel khâwm a ni; Mi phurhtir ta a, ka thâ a tichau zo ta; Ka do zawh lohte kutah min pe a, LALPA ngei chuan.
1:15 LALPAN ka mi chakte chu engmah lovan a siam, kan zîngah; Keima chungah pungkhâwm a ko ve, ka vâl rual tiral tûrin; Grêp sâwrna khur iangin LALPAN a chîl, Juda fanu thianghlim chu.
1:16 Hêng vang hian ka tap a, ka chhingmit tui ang luang e: Thlamuantu, min tiharhtu tûr awmna kar hlat vângin; Ka hraichawite awmkhua a har ngei, hmêlmain a hneh vângin.
1:17 Zion a kut a phar vêl, thlamuantu tûr awm lo ve; LALPAN Jakob-ho chungchangah a vêla awm zawng zawng hnehchhiattu ni tûrin a rel ta; Jerusalem chu an zîngah thil thianghlim lo a lo chang e.
1:18 LALPA chu a fel a ni e, a thupêk chungah ka hel si; Mipui zawng zawngte u, ngai thla ula, ka lungngaihna hi en teh u; Ka nula thianghlim leh vâlrual saltân khur an lût ta e.
1:19 Mi ngainatute ka ko va, annni chuan mi bum ta zâwk a; Ka puithiam leh ka upate khawpuiah an boral ta; An nun tihharhna tûr chaw an zawn laiin.
1:20 Aw LALPA , ngai teh, ka hreawmzia mai hi, ka kawchhûng a buai zo ta; Ka thinlung a vai, ka chhûngah, sual takin ka hel ta si. Kawtthlêrah khandaihin a sûntîr a, in chhûngah pawh thihna ang a ni.
1:21 Ka rûm an hria, mi thlamuan tûr rêng an awm lo ve. Ka hmêlma zawngten ka buaina hi an hria e, I thil tih tâk hi an lâwm a ni. Nî i ruat tawh chu i thlentîr a, anni chu keimah ang ni ve rawh se.
1:22 An sualna zawng zawng i hmâah lo thleng rawh se; Ka bawhchhiatnate avânga ka chunga i tih ang hian an chungah ti ve ang che; Ka rûmna a tam ta si a, ka thinlung a chau ta.
2:1 LALPAN a thinrimin Zion fanu chhûmin a khuh tak chu! Vân ata leiah apaih thla e, Israel mawina chu; A ke nghahchhan a hre reng lo, thinrim nî-ah chuanin.
2:2 LALPA chuan a lem zo va, Jakob-ho chênnna zawng zawng a zuah lo ve, A thinurin a nghîng thlu a, Juda fanu kulh nghette chu; Lei thleng rawka tichimin a titlâwm e, ram leh a hotute chu.
2:3 Israel kî zawng zawng chu thinrim takin a tan chhum a; Hmêlma hmâan a kut dinglam a hnûk kîr e, Meialh a vêl kâng fâitu angin Jakob-ho zîngah a alh chhuak e.
2:4 Hmêlma angin thal ngul a kuai, hnehchhiahtu angin a kut dinglam a dintîr a; Zion fanu puan inah mit latu tha zawng a that zo va; Mei angin a thinur a leih bua a.
2:5 LALPA chu hmêlma ang a lo ni ta, Israel a lem zo ta; A in ropui zawng zawng a lem zo, a kulh nghette a tichhia! A tipung ta lusûn, tah hla, Juda fanu zîngah chuan.
2:6 A bûk chu a tichim ta, huan bûk ang maiin, A kûtpuite hmun a tichhia a; LALPA chuan Zionah kûtpui leh chawlhni a hlamchhiahtîr a, Lungawi lo takin lal leh puithiamte chu a hnâwl a.
2:7 LALPAN maichâm a paih bo va, a hmun thianghlim a lungten; Hmêlma kutah a pe ta e, a in ropui te kulh chu; Kûtpui nî ang maiin LALPA inah an au dur dur a.
2:8 LALPA chuan Zion fanu kulh chu tihchim a tum ta a, Tehnain a chhinchhiah a, tihchhiat nân a kut a sûm lo ve; Kulh hmatâwng leh kulhte chu lû sûntîr a, an ngui dûn e.
2:9 A kulh kawngkâte leiah an pil, a thîr tlâwn a tichhe bung rum e; A lalber leh a hotute ânpaiho zîngah an awm e, dân chu a awm ta lo; A zâwlneite lahin LALPA ata inlârna rêng an hmu lo.
2:10 Zion fanu upate chu leiah an thu, ngawi rengin; An lu-ah vaivut an phul a, saiip puan an sin a; Jerusalem nula lei siin an kaikûn e.
2:11 Ka mit ka tah chhe zo va, ka kawchhûng a buai zo ta; Ka thinlung a in leih bua leiah, ka mipui fanu boral vângin; Nautê leh hne laite chu khawpui tualah an chauh avângin.
2:12 An nute hnênah chuan, "Khawiah nge buh leh uain?" tiin, Hliam ang maiin khawpui tualah an thidang a; An nute ângchhûngah an nun a chuai ral e.
2:13 Eng nge ka hriattîr ang chia, eng nge ka teh khin ang che, aw Jerusalem fanu? Eng ang nge i ni ka tih ang, ka han thlamuan theih nân che, aw Zion fanu thianghlim? I chiatna hi a zau ve tuipu angin; Tunge tidam thei ang che?
2:14 I zâwlneiten i tân inlârna lawilo leh âtthlâk an hmu a, Din tha leh tûr chein i khawlohnate an tilang lova; I tân thu lawilo leh bumnaa khat an hmu zâwk a ni.
2:15 Kawnga veivâk zawng zawngten an kut an ben khum che a, Jerusalem fanu an sîkhumin an lû an thin khum a; He khawpui hi maw mawina famkim, lei pumpui hlimna an tih chu, tiin.
2:16 I hmêlma zawng zawngten an ân khum che, An sîkhum a, an ha thialin, "Kan lem zo ta, He nî kan thlîr thin ngei kha a ni, Kan dawng ta a, kan hmu ta e," an ti.
2:17 LALPAN a tum chu a tizo va, a thu a hlen ta a; Hmâna a ruat angin a tichhia e lainat lovin; Hmêlma chu i chungah a lâwmtîr e, I hnehchhiahtute kî a chawisâng ta.
2:18 LALPA hnênah an thinlung a au ta a! aw Zion fanu kulhpui! Mittui a chhun a zanin luang zur zur rawh se; Nang châwl suh la, i mittui pawh hân suh se.
2:19 Tho la, zânah vên tantirhan au chhuak rawh, I thinlung chu tui angin leih chhuak ang che LALPA hmâan; Ama lamah i kut phar la, i fanau kawtthlêr tawntirh tina riltâma chaute nunna atân.
2:20 En la, aw LALPA , ngai teh, hetianga i tih tâkate hi! hmeichhiaten an rila rah, fanau an duat laite chu an ei tûr êm ni? Puithiam leh zâwlnei LALPA hmun thianghlimah chuan thahin an awm tûr em ni?
2:21 Tleirâwl leh putar kawtthlêr leian an thal phung e, Ka nula leh vâl rual khandaihin an tlu; Nangin i thinrim nîah chuan i that ta, I sâm buan e, lainat lovin.
2:22 Kûtpui nî angin ka râpzâwngte kil tin, ata i ko va, LALPA thinrim nîah chuan tlân chhuak leh zuah rêng an awm lo ve: Ka chawi leh ka kaihtlei tâkte chu ka hmêlmain a tiboral ta.
3:1 A thinurna talhtum hnuaia tihhreawmna hretu ka ni a:
3:2 Thimah mi khalh lutin mi kaltîr a, êngah ni lovin;
3:3 Keima chungah nilengin a kut a thlak a thlak ngei mai.
3:4 Ka ti leh vun a tisâwng a, ka ruhte a titliak a.
3:5 Ka lakah dai a theu va, khâkna leh hreawmnain mi hung;
3:6 Hmun thimah min chentîr a, thi daih tawhte angin.
3:7 Ka chhuah theih loh nân mi hung vêl a; ka khaidiat a tirit a.
3:8 A ni, tanpui ka ngena ka au pawhin ka dilna a khar hnan a.
3:9 Lungchherin kalkawngte a hnawh a, ka kawngte a tikawi a.
3:10 Ka lakah savawm mi chang ang, sakeibaknei tawm ru khiau ang mai a ni.
3:11 Ka kawngte mi hruai kawisak a, mi pawt sawm a, khawhar takin mi siam a.
3:12 A thal ngul a kuai a, a kah tumah mi dah a,
3:13 A bâwma thal fungte chu ka kawchhûngah a kâp lut a.
3:14 Ka mite zawng zawng tan nuihzabûr ka lo ni ta, nilenga an hla nên.
3:15 Ani chuan thil khain mi tikhat a, saiin mi tihnê a.
3:16 Lung thilah ka hâte mi tauh baltîr a, vaivutah mi vahtîr a.
3:17 Nangin muanna ata ka nunna i sawn daih a, thawvenna chu a eng a nih pawh ka hre ta lo.
3:18 Tin, "Ka ropuina leh LALPA laka ka beisei chu a bo zo ta" ka ti ta a ni.
3:19 Ka tuarna leh ka vahvaihna, sai leh mît khâ te chu hre reng ang che.
3:20 Ka nunna hian chûng angte chu a hre reng zel a, ka chhûngah hian a kun reng a ni.
3:21 Hei hi ka han hre chhuak leh ta a, chuvang chuan beiseina ka nei ta;
3:22 Tihborala ka awm lo hi LALPA zahngaihna a lo ni, a lainatnate chu a kang ngai loh avângin.
3:23 A thar zêl thin tûk tinin, i rinawmna a ropui e.
3:24 LALPA chu ka chanpual a ni, ka nunnain a ti a, Chuvangin amah chu ka beisei ang.
3:25 LALPA chu amah nghaktute tan a tha a, amah zawngtu tan chuan.
3:26 LALPA chhandamna beisei a nghah veng veng chu a tha a ni.
3:27 Mi, a tleirawl laia nghawngkawl bah chu a tha a ni.
3:28 A bahtîr tawh avângin, amah in thu sela, ngawi reng rawh se.
3:29 A kâ vaivutah dah sela, beisei a la awm dah law maw.
3:30 A bêngtu hnênah a beng dawh sela, sawichhiatin khat rawh se.
3:31 LALPA chuan kumkhuain a paih bo dawn si lo va;
3:32 Tilungngai mah sela, a zahngaihna nasa tak avângin a la khawngaih dawn a ni.
3:33 Mihring fate tihhreawm leh tihvui hi a duhzawng a ni si lo.
3:34 Lei saltang zawng zawng rah beh te,
3:35 Chungnungbera hmai hmâa mi dikna hnawlte,
3:36 Mi thu tihkhawlohsakte hi LALPA remtihzâwng a ni lo.
3:37 LALPAN thu a pêk lo chuan thusawi tithleng theitu chu tu a ni nge?
3:38 Thil tha leh tha lo hi chungnungbera kâ atanga chhuak a ni lo vem ni?
3:39 A sual hremnaah engatinge minung a phunnawi reng?
3:40 Kan kawngte chu fiahin en ngun ila, LALPA lam i hawi ang u.
3:41 Kan thinlung chu kan kutte nên vana Pathian lamah chuan i chawikâng ang u.
3:42 Kan bawhchhia a, kan hel a, nangin min ngaidam lo ve.
3:43 Thinrimnain in inkhuha, min ûm a, khawngaih lovin i that a.
3:44 Chhûmin i in khuh a, chutichuan tawngtaina a kal tlâng thei lo.
3:45 Mipuite zîngah hian bawlhlawh leh hnawmhnawkah min siam ta a.
3:46 Kan hmêlmate zawng zawng chuan kan chungah an ka an ang zau va.
3:47 Hlauhna leh khuarkhurumin mi nang a, chhiatna leh boralna nên.
3:48 Ka mipui fanu, boral avângin ka mit chu lui tui angin a luang ta e.
3:49 Ka mit chu chhum lo chat lovin, hân chuang lovin a luag chhuak ang a,
3:50 LALPAN vân atanga mi zuk en a, mit hmuh thlengin;
3:51 Ka khawpui fanute zawng zawng avângin ka mitin ka rilru a tilungngai e.
3:52 Vâng awm lova mi dotute chuan sava ngain mi ûm a;
3:53 Nung chungin khuarkhurumah mi theh thla ta a, Ka chungah lung an thlak a.
3:54 Tuiin mi chim pil a, "Ka boral ta," ka ti a.
3:55 Khuarkhurum hnuaihnung ber atang chuan, aw LALPA i hming ka lam a.
3:56 Ka aw chu nangin i hria a, ka thawk laa ka au thawmah i beng hup suh ang che.
3:57 Nang ka auh che nîah khan i lo hnai a, " hlau suh u," i ti a.
3:58 Aw LALPA, ka thiamna thu mi sawisak a, ka nunna i tlan a.
3:59 Aw LALPA, ka chunga thil dik lote hi i hmu a, ka thu mi relsak ang che.
3:60 An phuba lakna zawng zawng leh an mi phiarna zawng zawngte chu i hmu a.
3:61 Aw LALPA, an mi sawichhiatna leh mi phiarna zawng zawngte chu i hria e.
3:62 Mi beitute hmui leh ngaihtuahnate chu nilêngin ka chungah a awm a.
3:63 An thu leh an dingte hi en teh, an hla ka ni mai.
3:64 Aw LALPA, an kut hnathawhte ang zêlin nang chuan i thungrûl ang.
3:65 Thinlung sak i neihtîr ang a, i ânchhia an chungah a tla ang.
3:66 Thinrimin i ûm ang a, LALPA van hnuai ata chu i tiboral ang.
4:1 Rangkachak chu a va thîm ta êm! Rangkachak thianghlim ber chu a va danglam êm! Hmun thianghlim lungte chu kawtthlêr tawntîr tinah paih darh a ni ta.
4:2 Zion fapa hlu tak, rangkachak tha mi nêna tehkhin theihte chu Hlum bel, bel vawtu kut chhuak ang maia ngaih lah ni ta!
4:3 Sihalte mahin an notê an hnute an pe, an hnektîr a; Ka mipui fanu erawh chu a nun a lo chhia, thlalêra, vanghawngsei ang maiin.
4:4 Nau hnute hne lai lei chu tuihal vangin a dangah a bet a; Naupang chuan chaw an ngen a, tumah rêngin an pe lo.
4:5 Chaw tha ei thinte chu kawtthlêrah an boral a; Puan senduk sina sei liante chuan ek dûrte an kuah a.
4:6 Ka mipui fanu khawlohna chu sodom sualna aiin a nasa a, kut rêng pawha khaih lohva mit khap kar lova tihchhiata kha.
4:7 A miliante chu vur aia thianghlim an ni a, hnute tui aia var an ni; Taksaah chuan rubi aiin an sâr zawk a, an mawizia chu saphir ang a ni.
4:8 An landan lungalhthei aiin a dum zawk a, kawtthlêahte chuan hriat an ni lo; An vun chu an ruhahte a bet a, hmawlh angin a ro va.
4:9 An tha zâwk e khandaiha thi, riltama thi ai zawngin, An râwp ral a, loa thlai tharte tlachhamin.
4:10 Lainattu hmeichhiate kut chuan mahni fate an chhûm a; Ka mipui fanu tihchhiatnaah chuan an chawah an chang ta e.
4:11 LALPAN thinur a hlen ta, a thinrim hlauhawm a leih chhuak; Zionah mei a tialh a, a lungphûmte lamin a kâng zo.
4:12 Lei lalte chuan an ring lo va, khawvêla cheng zawng zawng pawhin; Hnehchhiahtu leh hmêlma Jerusalem kulh kawngkâa an luh theih tûr chu.
4:13 Hei hi a zâwlneite thil tihsual leh a puithiamte khawloh vang a ni. A chhûnga mi dik thisen chuahtu chu.
4:14 Mitdelin kawtthlêrahte an vakvai a, thisenin an bawlhhlawh a; Miten an silhfente an khawih theih loh hial khawpin.
4:15 "Kal bo rawh u! Thianghlim lote u! Kal bo rawh u! Kal bo rawh u! Dek suh u!" tiin miten an au va. Tlânchhia leh vakvai an lo ni ta a, Miten hnamte zîngah, "Hetah an cheng tawh lo vang;
4:16 LALPA ngai chuan a thehdarh a, a ngaihsak tawh lo vang; Puithiamten zah an hlawh lo va, upaten duhsakna an hlawh hek lo.
4:17 Tanpuina thlawn thlirin kan mit a vai zo va; Chhandam theilo hnam chu nghah zawng kan ngak a ni.
4:18 Miin kan hnu an chhui, khawlai kan lêng thei lo ve; Kan tâwp a hnai, kan nî a kim; kan tâwpna a thleng ta si.
4:19 Mi ûm tute chu van mipuite aiin an chak zawk; Tlângahte chuan min ûm a, thlalêrahte chuan min chânga,
4:20 Kan hnâra thaw, LALPA hriak thih a chu an khurah manin a awm ta; Hnamte zîngah a zâr hnuaiah kan chêngve ang, kan tih thina kha.
4:21 Aw Edom fanu, Uz rama cheng chu hlimin lawm rawh se. No chu i hnên pawh a lo thleng ang a, i rui ang a, Saruakin i in siam ang.
4:22 Aw Zion fanu, i khawlohna hremna chu a kim ta e; Salah a hreng tawh lo vang che, Aw Edom fanu, i khawlohna chu a rawn hrem dawn a, I sualte chu a hmuchhuak ang.
5:1 Aw LALPA, kan chunga lo thleng chu hre reng ang che; Ngai la, kan mualphona hi en teh!
5:2 Kan roluahte chu hnamdang mite hnêna pk a ni zo ta a, Kan inte chu hmêlrhiatloh mite hnênah.
5:3 Fahrahte leh pa neilote kan ni ta a; Kan nute hmeithai ang mai an ni ta.
5:4 Kan tuisikte man neiin kan in ta a, Kan thingtuahte pawh kan hnênah hralh a ni ta.
5:5 Nghâwnga manin kan awm a; kan chau va chawlh rêng kan nei lo.
5:6 Aigupta leh Assuria hnênah kut kan dawh a; Kham khawp chaw hmu tûrin.
5:7 Kan pate zawng an sual a, an awm ta lo va; An khawlohnate kan phur a ni.
5:8 Bâwihte chu kan chungah an lal a; An kut ata min chhanchhuak tûr tumah an awm lo.
5:9 Nun chân hlauhawm khawpin kan chaw kan ei thîn; Thlalêra khandaih avâng chuan.
5:10 Kan vunte chu thuk ang maiin a sa a; tâm kâng sâ avângin.
5:11 Zion-ah hmeichhiate chu an pâwng sual a, nulate chu Juda khawpuiah te.
5:12 Lal fate an kutin an khai a, upate hmêl an zah lo.
5:13 Tlangvâlte buh her khâwl an hertîr a; Naupangte thingtuah têl hnuaiah an pai chawn chawn a.
5:14 Upaten kulh kawngka an kalsan a, tlangvâlten an hlasak.
5:15 Kan thinlung hlimna a chuai ta; kan lâm lusûnah a chang ta.
5:16 Kan lû ata lallukhum a tla ta; Kan chung a pik e, kan tisual ta si.
5:17 Hemi avâng hian kan thinlung a chau va, Hêng avâng hia kan mit a thim;
5:18 Zion tlâng chu a tiau tâk avângin, Sihalte a chhûngah an lêng.
5:19 Nang chu LALPA, kumkhuain i lal a; I lalthutthleng chu chhuan zawng zawng thlengin.
5:20 Eng vângin nge kumkhuaa min theihnghilha, Chu leh chen min kalsan le?
5:21 Aw LALPA, nagin i lam mi hawitîr la, tichuan kan lo hawi ang; Hmasâng angin kan nîte tithar ang che.
5:22 A nih leh, nangin mi paih thla dêr em ni? Kan chungah i thin a ur nasa hle êm ni? |
posted by zoblog @ 12:00 PM  |
|
|
|
|
|
