MIZO CLAN

 
MIZORAM #Health Department-ah Promotion buai? (Misual.Com) #UDA candidate list a ‘leak-out’! (Misual.com) #Excise ruihtheih thil man zat (DIPR) #Fanu kaphlumtu in a dam rei ring lo sa (Buannel) #ZONET NATIONAL #Retired army officer, aide arrested for Malegaon blast(NDTV) WORLD #LTTE aircraft bombs Colombo power plant (TOI) # Jennifer Hudson IDs nephew's body; child shot, sources say (LA Times)
Shoutbox

Thuhriltu
Wednesday, September 12, 2007
1:1 Jerusalem lal, Davida fapa, Thuhriltu thute chu.
1:2 Thuhriltu chuan, Engmah lo mai mai, Thil zawng zawng hi engmah lo mai a lo ni, a ti a.
1:3 Mihringin a hnathawh, ni hnuaia a thawhah chuan hlawmna eng nge a hmuh?
1:4 Chhuan khat an liam a, chhuan dang an lo chhuak a, Lei hi erawh chu a awm reng mai.
1:5 Ni pawh chu a lo chhuak a, tin, a tla leh a, A chhuahna tûr lam panin a hmanhmawh thin.
1:6 Thli chu chhim zawngin a tleh a, hmâr hawiin a lo let leh a; A tleh vêl a tleh vêl a; tin, a bial ngaiah a kir leh thin a.
1:7 Lui zawng zawngte chu tuipuiah an luang lut a, Mahse tuipui chu a khat chuang lo; Luite chu an luanna thin lamah chuan an luang reng a.
1:8 Thil zawng zawng hi ninawm mai mai a ni; sawiin a siak lo ve: Mit chu a thil hmuhah a tlai lo va, Beng pawh a thil hriat a kham hek lo. Thil lo awm tawh chu lo awm tûr renga kha a ni a,
1:9 Thil tih takate chu tih tûr reng kha a ni: Ni hnuaiah hian thil thar rêng rêng a awm lo ve.
1:10 Miin, En rawh, hei hi a thar a ni, a tih theih rêng rêng a awm em ni?
1:11 Tun hma thil tuman an hre reng lo va. Nakinah pawh tun lai thil hi an hre reng lo vang.
1:12 Kei, thuhriltu hi Jerusalema Israel-te lal ka ni tawh.
1:13 Tin, van hnuaia thiltih tak zawng zawng chungchang chu finna hmangin fiah leh hmu chhuak tûrin ka Rilru ka lo hmang ta a: Pathianin mihring fate hnêna buaipui tûra a lo pêk hi hna hrehawm tak a ni.
1:14 Ni hnuaia thiltih tak zawng zawngte chu ka hmu ta a, tin, ngai rawh, thil zawng zawng hi engmah lo leh thil lothlawn mai a lo ni.
1:15 A kawi tawh kha chu tihngilh theih a ni lo va, A awm lo chu chhiar rual a ni lo.
1:16 Ka hmaa Jerusalema awmte zawng anwg aia nasain finna ka nei alawm maw! Ka rilru pawhin fina leh hriatna a nei nasa reng a ni, ka inti a.
1:17 Tin, ka rilru hi finna hre tûr leh âtna leh fin lohna hre tûr pawhin ka hmang a: hei pawh hi thil lothlawn mai a lo ni tih ka lo hre ta.
1:18 Finna a nasat poh leh buaina a tam a, Hriatna a pun poh leh manganna a pung.
2:1 Ka rilruin, "Khawi nge! Nuamsipbawl ka'n ching teh ang, a nuam teh reng emaw" ka ti a, mahse hei pawh hi eng a lo ni lo.
2:2 Nuih hi a âtthlâkzia ka chhar chhuak a, hlimhlawp lah eng ruai a ni lo.
2:3 Van hnuai mihring fate dam chhûng tawite hman ral dan the ber a ni law maw tin, finna zawngin uain-a intihhlima nuam tawl ka tum ta a.
2:4 Hna nasa tak ka thawk a; inte ka insak a, grêp huante ka insiam a,
2:5 huante leh ngaw nuamte ka insiam a, tah chuan theikung zawng zawngte ka phun a.
2:6 Ngawa thing thang laite chawm nân dilte ka siam a.
2:7 Chhiahhlawhpate leh chhiahhlawhnute ka lei a, ka ina piang chhiahhlawhte ka nei bawk a; bawng rualte leh berâm rualte pawh ka nei teuh va, ka hmaa Jerusalema lo awmte zawng zawng aia nasain.
2:8 Tangkarua leh rangkachakte leh lalte ro leh ram bial ro tha bikte ka la khâwm a; hmeichhe zai mi leh mipa zai mite ka siam a, mipa fate lawmzawng hmei tam tak nên.
2:9 Chutichuan, ka lo ropui a, ka hmaa Jerusalema awmte zawng anwg chu ka khum a: ka finna pawh a ngai reng a ni.
2:10 Tin, ka mit itzawng apiang chu ka hlah lo va, ka thinlung pawh eng lawmnaah mah ka sum lo; ka thawhrimna zawng anwg avângin ka thinlung a lawm si a; chu chu ka thawhrimna zawng zawnga ka lawmman a ni.
2:11 Tichuan, ka kut chhuak zawng zawngte leh ka thawhrimnaa ka thiltih zawng zawngte ka han en hian, ngai teh, thil zawng zawng hi engmah lo leh thil lothlawn mai a lo ni a, ni hnuaiah hian hlawkna rêng rêng alo awm lo ve!
2:12 Tichuan, fin emaw, ât emaw, tlawktlaw emaw eng nge lem chuang tih ka ngaihtuah a; lal pawhin a hmaa lalte tih tawh bak eng nge a tih theih chuan?
2:13 thim aiin eng a tha angin ât ai chuan fin a tha;
2:14 mi fing chuan a kalna a hria a, mi â chuan a hre lo va, mahse khawrel thuhmun an zaa chungah a thleng tho tih ka hmu.
2:15 Ti ka rilruah chuan, Mi â chungah thleng ang bawk chu ka chungah pawh a thleng dawn a, eng atân nge ka fin bik le? ka inti a. Tichuan ka rilruah chuan, hei pawh hi engmah lo mai a lo ni, ka ti a.
2:16 Mi fing pawh, mi â pawh, kumkhuaa hriatrengna chu a awm si lo; ni lo la thleng tûrahte chuan an vaia theihnghilh daih an ni dawn si a. Mi â ang bawka mi fing pawh a thi tûrzia mai chu!
2:17 Tichuan, nun hi ka hua a ni; ni hnuaia thiltih rêng rêng hi mi tilungngaitu vek a nih avângin: thil zawng zawng hi engmah lo leh thil lothlawn mai a lo ni si a.
2:18 Tichuan, ni hnuaia ka thawhrimna zawng zawnga ka thiltihte chu ka haw ta: ka hnua lo awm tûr atân chuan ka hnutchhiah tûr a ni mai si a; mi fing a nih leh mi â a nih pawh tunge hria ang?
2:19 Mahse, ka thawhrimna zawng zawnga ka thiltihte chungah leh ni hnuaia finna hmanga ka thawhrim rah zawng zawng neitu a ni mai dawn si a. Hei pawh hi engmah lo mai a lo ni .
2:20 Chutichuan, ka han hawi vêl a, ni hnuaia ka thawhrimna zawng zawnga ka thawh takte chungchang chuan ka thinlung bei ka tidawng ta.
2:21 Mi, finna leh hriatna leh thiamnate nena thawkrimtu chuan, thawk ve hauh lo mi hnênah chuan rochun atân a hnutchhiah mai tûr a ni. Hei pawh hi engmah lo leh thil tha lo tak a ni.
2:22 Miin a thawh hahna zawng zawngah leh rilru rim taka ni hnuaia a thawhnaah chuan eng nge a hmuh?
2:23 A dam lai ni zawng zawngte chu tuarna hlir a ni a, a hnathawhte lah vuivaina mai a ni si a; zanah pawh a rilru a hahdam chuang hek lo. Hei pawh hi thil engmah lo mai a lo ni.
2:24 Mihring tan chuan ei leh inte leh a thawrimnaa a rilru tihnawm aliama tha a lo awm lo. Hei pawh hi Pathian kuta mi â ni tih ka lo hre ta.
2:25 Amah lovin tunge ei leh bar leh intinuam thei awm ang?
2:26 Amah tilungnitu hnênah chuan finna te, hriatna te, lawmnate a pe si a: mi sualte erawh chu,Pathian tilungnitu hnêna pêk chhawn tûr, lak khâwm leh chhak khâwm hna a pe zawk a ni. Hei pawh hi engmah lo leh thil lothlawn mai a lo ni.
3:1 Engkim tan hian hun ruat a awm a, van hnuaia thiltih zawng zawng tan hun remchâng a awm:
3:2 Pian hun a awm a, thih hun a awm: Phun hun a awm a, thil phun phawi hun a awm;
3:3 Tihhlum hun a awm a, tihdam hun a awm; Thiat hun a awm a, siam leh hun a awm;
3:4 Tah hun a awm a, nuih hun a awm; Sun hun a awm a, lam hun a awm.
3:5 Lung paih darh hun a awm a, lung lak khâwm hun a awm; Pawm hun a awm a, pawm loh hun a awm;
3:6 Zawn hun a awm a, tihbo hun a awm; Vawn that hun a awm a, paih bo hun a awm;
3:7 Tihthlêr hun a awm a, thui hun a awm; Ngawih hun a awm a, tawng hun a awm;
3:8 Hmangaih hun a awm a, huat hun a awm; Indo hun a awm a, muan hun a awm a ni. Hnathawktuin a thawhrimna ata eng hlawkna nge a hmuh?
3:10 Pathianin mihring fate hnêna buaipui tûra hna a lo pêk chu ka hmu ta.
3:11 Engkim hi an hun theuhvah chuan mawi takin a siam a; mihring rilruah chuan chatuan a dah bawk a;mahse, chuti pawhin anni chuan Pathianin a tir ata a tawp thlenga thil a tih chu an hmu chhuak thei chuang lo.
3:12 Hlim taka awm a, an nun chhûnga thil tha an tih aliama an tana tha zawk engmah ka hre lo.
3:13 Tichuan, mi tin, ei leh in leh an thawhrimna zawng zawnga hlim taka an awm chu Pathian thilpek a ni.
3:14 Pathianin a tih apiang chu a awm hlen ang tih ka hria: engmah belh theih a ni lo vang a, lak then theih pawh a ni hek lo vang; mihringin amah an tih theih nân Pathianin chutiang chuan a ti a ni.
3:15 Thil awm mêkte hi lo awm tawh sa kha a ni a: thil lo awm tûrte chu lo awm tawh sa bawk kha a ni; Pathian chuan a bo tawhte kha a rawn la kir leh zel a ni.
3:16 Tin, chu lo pawh chu, ni hnuaiah rorêlna hmuna suahsualna awm leh dikna hmuna suahsualna awm chu ka hmu bawk a.
3:17 Ka rilruah chuan, Pathianin mi fel leh mi suaksualte ro pawha rel ang; thil tinreng atân leh hna tinreng atân hun a awm si a, ka ti a.
3:18 Mihring fate chung thu-ah chuan, ramsa mai an ni tih an inhriat theih nân Pathianin anmahni a fiah a ni, ka ti rilru a.
3:19 Mihring fate chunga khawvel leh ramsate chunga khawrel chu thuhmun a ni si a, khawrel thuhmun an chungah a tla a ni; pakhat a thih ang bawkin a dang pawh kha a thi a; an zain thawk dan thuhmun an ni a, mihring chu ramsa aiin a chungnung lem lo; thil zawng zawng hi engmah lo mai a lo ni si.
3:20 An zain hmun khatah an kal vek a; an zain vaivuta mi an ni vek a, an zain vaivutah an chang leh vek a ni.
3:21 Mihring fate thlarau chu chung lamah a chho emaw, ramsa thlarau chu hnuai lamah leiah a chhuk emaw tih tunge hria?
3:22 Chuvang chuan mihring chu a thiltihah a lawm aliama tha engmah a awm lo, tih ka hmu ani chu chu chanvo a ni mai a: a hnua thil lo awmte hmu tûrin tuin nge rawn hruai kir leh hlei ang?
4:1 Tin, ka han thlir leh a, ni hnuaia inhnehchhiahna zawng zawngte chu ka hmu a; tin, en teh, hnechhiaha awmte mittuite chu, thlamuantu an nei lo ve; anmahni hnehchhiahtute chuan thltihtheihna an nei a, anni zawngin thlamuantu reng an nei lo.
4:2 Chuvangin mi nung la damte aiin mitthi thi tawhte chu awhawm ka ti zawk;
4:3 tin, anmahni ve ve ai pawhin lo la piang lo, ni hnuaia thiltih tha lo la hmu lo nih chu a tha zawk.
4:4 Tin, thawhrimna zawng zawng leh themthiamna tinrengte hi thenawm elrelna avânga lo awm a ni tih ka hre ta. Hei pawh hi engmah lo leh thil lothlawn mai a ni.
4:5 Mi â chuan a kut a kuangkuah a, a intam hlum thin' tih a ni a.
4:6 A dik thei e, hahdama veikhat neih pawh hi buai philia thawka veihnih neih ai chuan a tha.
4:7 Tin, ka han thlir leh a, ni hnuaiah chuan engmah lo a ni ka hmuh ni.
4:8 Mi pakhat, mi mal tak a awm a, fapa emaw unaupa emaw pawh a nei hek lo; mahse, tawpintai awm lovin a thawkrim a, a hausaknate pawh a mit tlaina khawp a ni hek lo; mahni nawmsakna chan khawpa tu tana thawkrim ka ni nge pawh a inti ngai hek lo. Hei pawh hi engmah lo mai a lo ni a, thil hrehawm tak a ni bawk.
4:9 Pahnih chu pakhat ai chuan an tha zawk, an thawh chhuah that avângin.
4:10 An tluk pawhin pakhat chuan a thian chu a khaiding dawn si a; mahni chauva awm kha erawh chu a chung a pik e, a tluk chuan khaidingtu tûr a nei si lo.
4:11 Chu lo pawh, pahnih chu an mut dun chuan an inngheng lum thei a, pakhat erawh chu mah maiin engtin nge a lum theih ang?
4:12 Tin, amah maia awm kha chu miin hneh theih mah sela, pahnih chuan an lo dodal zo dawn ani hrui thum hrual chu a chat lawk lawk ngai lo ve.
4:13 Lal putar â tawh, thurawn dawngsawng duh lo ai chuan tleirawl rethei leh fing chu a tha zawk.
4:14 Tan in ata chu lal tûrin a lo chhuak ani si a; a ni, ama ram meuhvah pawh retheia piang ni mah sela.
4:15 Ni hnuaia leng mi nung zawng zawngte chu lal aiawh tûr tleirawl lampangah vek ka hmu a,
4:16 lalin chhiar sen loh chungah ro a rel thei e, mahse a hnuah chuan tumah a chungah an lawm lo. Hei pawh hi engmah lo leh thil lothlawn a lo ni ngei mai!
5:1 Pathian ina i kal laiin i ke veng tha rawh; mi âte inthawina ai chuan ngaithla tûra rawn hnaih hi a tha zawk si a: thil tha lo an tih an hre si lo.
5:2 I ka chu hmanhmawh suh se; Pathian hmaa thu engpawh chhak chhuak tûrin i thinlung pawh hmanhmawh suh se; Pathian chu vana awm a ni a, nang chu leia awm i ni si a: chuvang chuan i thu pawh tlem rhwa se.
5:3 Buaina tam tak chu mangphan a ni nge nge si a, thu tuitam vâk lah chu mi â aw chhuak a ni mai.
5:4 Pathian hnêna thu i tiam chuan ngaihthah suh: mi â chu a lawm si lo. I tiam chu hlen ngei rawh.
5:5 Thu tiama hlen si loh ai chuan tiam loh law law hi i tan a tha zawk.
5:6 I ka chuan tihsualtir che suh se; vântirhkoh hmaah pawh, Tiam sual palh anih kha, ti hek suh. Eng atân nge i awka chhuakah Pathian a thinur ang a, i kut chhuak thilte a tih boral ang le?
5:7 Mumang a tam poh leh thu lawilo a tam a ni si a, Pathian chu tih zawk rawh.
5:8 Ram bialah rethei hnehchhiahna te, pawngnekin rorêlna leh diknate a tibo a ni tih i hmuh pawhin mak ti suh; hotu sâng chu a sâng lehzualin a mit sir ru reng si a, anni aia sâng lehzualte pawh an awm zel a ni.
5:9 Tin, lei hlawkna chu mi zawng anwg tan a ni a, lal pawh thlawhhma ring mi bawk a ni.
5:10 Tangka sum ngainatu chuan tangka sumah duhtawk a hmu lo vang a, hausak ngainatu chuan duhtawk a help hek lo vang: hei pawh hi engmah lo mai a lo ni.
5:11 Sum leh pai a lo pun chuan eitute pawh an pung a, a neitu tan a mita hmuh mai loh chu eng eng a sawtna?
5:12 Thawkrimtu chu a ei tlêm êmaw, a ei tam emaw, a mut a tui thin a, mi hausa chuan angahna chu a muthilh loh phah zawk ang.
5:13 Ni hnuaia thil pawi tak ka hmuh chu, mahni tana sum khawl a,
5:14 a sum khawl chu peipun tum a, a chhe ta hlauh si, a fa hnutchhiah tûr pawh a nei ta lo hi a ni.
5:15 A nu pum ata a lo chhuaha saruaka a lo kal ang bawk khan a kal leh ang a, a thawhrim rah engmah a chhawm lo vang.
5:16 Hei pawh hi thil tha lo tak mai a ni, a lo kal lam ang chiah bawka a kal leh tûr hi: boruak atân maia a thawhrim hi eng nge a hlawkna?
5:17 A dam chhûng ni zawng zawngin thim hnuaiah a ei a, a lungni lo êm êm a, natna tuar leh thinur takin a awm bawk a.
5:18 Ngai rawh, thil tha leh mawi nia ka hmuh chu, miin a ei a, a in a, a thawhrimna Pathianin a pek, a dam chhûng ni zawng zawnga ni hnuaia a thawh thinna thil thate chu nuam ti taka a hman chu a ni: chu chu a chanvo ani mai.
5:19 Mi tu hnênah pawh Pathianin hausakna leh sum leh pai a pêka, chu mi chu chen tûrin theihna te, a chanvo pawm theihna te, a thawhrimna nuam tih theihnate a pêk hi, heng hi Pathian thilpêk a ni.
5:20 A dam chhûng nite chu a hre mang dawn si lo va, a thinlung lawmnaah chuan Pathianin a chhan avângin.
6:1 Thil tha lo ni hnuaia ka hmuh chu, mihring tana rit tak a ni:
6:2 mi, Pathianin hausakna te, sum leh pai te, zahawmnate a pêk chu a rilruin a chak zawng zawng chu engmah chham lovin a awm a; mahse, Pathianin chu mi chu chen tûrin theihna a pe lo va, mi dangin a chen ta zawk a: hei hi engmah lo mai a lo ni a, hrehawmna kulmut tak a ni.
6:3 Miin fa za pawh hring sela, kum tak tak damin, a dam kum nite chu tam hle mah se, a dam lai thil tha chen lova, phûm pawh a hlawh si loh chuan, ani ai chuan a hun lova pian pawh tha ka ti zawk.
6:4 Ani chu chhuak thlawn mai a ni a, thimah a lût a, a hming chu thimin a chhilh bo ta a:
6:5 chu lovah pawh ni a hmu lo va, a hre hek lo; a dang ai khan a nihlawh zawk a ni.
6:6 A ni, kum sâng let hnih pawh dam sela, thil tha a hmuh si loh chuan thuhmun an ni mai lawm ni?
6:7 Mihring thawhrimna zawng anwg chu a hrawk atân a ni mai a; mahse, a chak a daih chuang lo.
6:8 Mi fing chuan mi â aiin sawtna eng nge a hmuh chuanbik? A nih loh leh, mi rethei, mi nungdamte hmaa len thia chuan eng nge a hmuh?
6:9 Chakna chavai mai mai ai chuan mita hmuh sa ngei chu a tha zawk: hei pawh hi engmah lo leh thil lo thlawn mai a lo ni.
6:10 Thil lo awm apiang hi hming vuah tawh a ni a, mihring nihna pawh hi hriat sa a ni; amah aia ropui zawk chu a dodal thei lo.
6:11 Thu a tam poh leh engmah lo a tam mai a ni a, mihring tan eng nge a thatna?
6:12 Mi, a nun lothlawn ni rei lo te, hlimthla ral leh mai tûr anga a nun chhûng hian a tana the ber tûr chu tunge hria ang? Ni hnuaiah hian mi, a hnua thil lo awm tûr chu tunge hrilh thei ang?
7:1 A tha zawk e hming tha, hriak to aiin, Pian ni aiin thih ni.
7:2 Lusun ina kal a tha e, Ruaitheh ina kal ai chuan; Chu chu mi zawng zawng tawpna a ni si; Nungdamin thinlungah an vei chu.
7:3 A tha zawk e lungngaih, nuihza aiin; Hmêla lungngaih lo lang zarah Thinlung a lo tha si.
7:4 Mi fingte thinlung a cham reng - lusun inah, Mi âte thinlung erawh hlimhlawp ina'n.
7:5 Mi fing zilhna ngaihthlâk ât ha, Mi âte hla ngaihthlâk ai chuan.
7:6 Bel chhuan hnuaia hling alh ri ang Mi a ui ri chu a ni si: Hei pawh hi engmah lo mai a lo ni.
7:7 Hnehchhiahna hian mi fing a ti-â Thamna hian rilru a tichhia.
7:8 Thil tawpna chu a tha zawk thin, a tanna aiin, Rilrua chhel hi a tha zawk, rilrua chapo aiin.
7:9 I rilruah thinur hmanhmawh suh, Mi âte tang laiah a cham thin, thinurna hi.
7:10 Nang chuan zawt suh, hman lai nite that zawksia, tun lai aiin; Hemi i zawh hi, fin vang a ni si lo.
7:11 Finna a tha, roluah tlukin, Ni hmutute tan lah hlawkna a ni.
7:12 Finna hi himna a ni bawk; Tangka sum himna a ni bawk; Hriatna tangkaizia erawh chu, A neitu nun chu finnain a tiharh thin.
7:13 Pathian hnathawh hi ngaithuah teh, A tihkawih tawh chu tunge tingil thei ang?
7:14 Tha niah chuan lawm langin Chhiat niah chuan ngaihtuah rawh: Pathian chuan pakhata pawh chu A dang ang bawka a siam ani si a, Mihring chuan a hnu lam tûr a hriat chhuah loh nân.
7:15 Ka nun engmah lovah hian engkim ka lo hmu ta a: mi fel a fel chunga borala awma, mi suaksual thil tha lo ti chunga dam rei phian si angte hi.
7:16 Kherkhiap lutuk suh la, intifing lutuk hek suh: engah nge mahni i intih chhiat ang?
7:17 Suaksual lutuk suh la, a hek suh: i hun lo takah engah nge i thih ang?
7:18 Hei hi i chelh tlat a tha a, chu pawh chu thlah hlek suh: Pathian tihtu chuan a chhuahsan vek si thin a.
7:19 Khawpuia rorêltu sawm aiin finna chuan mi fing chu a tichak zawk.
7:20 thil tha titu, thil sual ti hauh lo khawpa mi fel chu lei chungah hian an awm lo takzet a ni.
7:21 Mi thusawi nazawng chu bengkhawn suh, i chhiahhlawh ânchhe lawh che i hre dah ang e:
7:22 nang ngei pawhin mi dange ânchhia i lawh thin tih i thinlung ngeiin a hre fo si a.
7:23 Heng zawng zawng hi finnain ka chian tawh a ni: "Ka la fing ang chu," ka ti thin a; mahse, a teuh lo mai.
7:24 Thil awmzia tak chu, hla tak, thuk tak, thuk êm êm a lo ni a, tuin nge hmu chhuak thei ang?
7:25 Finna leh thil awmzia hre tûr te, hmu chhuak tûr te, zawng tûrtein ka rilruin ka hawi vêl a, suahsualna hi âtna, âtna hi bawrawna a lo ni tih ka hria.
7:26 Tin, thihna aia kha zawk thil ka lo hriat chu, hmeichhia a thinlung, thang leh len ang nia, a kuta a vawn lah kawl bun ang mai ni chu a ni; tupawh Pathian tilawmtu chu alakah a him ang a, mi sual erawh chu aman ngei ang.
7:27 Thuhrilhtu chuan heti hian a ti: Ngai teh, thudik hre tûra ka han ngaihtuah khâwm ka hriat chhuah chu hei hi a ni, chu chu ka rilruin a zanw fo thin, ka hmuh theih loh chu a ni a.
7:28 Mipa sângkhat zingah chuan pakhat ka hmu thei a, hmeichhe zingah phei chuan ka hmu lo.
7:29 Ngai teh, hei hi ka hriat chhuah tak chu a ni: Pathianin tluang taka nung tûrin mihringte a siam a, anni erawh chuan an tikhirhkhan zo vek a ni tih hi.
8:1 Mi fing ang hi tunge awm? Thil hrilhfiahna pawh tunge hria? Finna chuan a hmêl a tiêng a, A hmêl pum chhuak pawh a dang ta.
8:2 Pathian hmaa i thutiam avâng chuan lal thupêk pawisa tûrin ka ti a che.
8:3 A hma ata chhuah hmanhmawh suh la, thil tha lo tilui suh: A duh duha ti thin a ni si a.
8:4 Lal thu chu thu tawp anih avângi tunge a hnênah, "Eng nge i tih ni?" ti thei ang?
8:5 Thupêk pawm apiang chuan engmah a tuar lo vang a, mi fing rilru chuan ningkhawng a hria a ni.
8:6 Thil tinreng hian ningkhawng a nei si thin a, mihring buaina chu a tan nasa hle mah se.
8:7 Thil lo awm tûr chu a hre si lo va, a lo awm dan tûr chu tunge hrilh thei ang le?
8:8 Mi thlarau chelh theihna leh thih ni chunga thuneihna nei tumah an awm lo; indo chhûngin chawlh a awm lo va, suahsualnain a neitute a chhan chhuak hek lo vang.
8:9 Ni hnuaia thiltih zawng zawng kim takin ka ngaihtuah a, hei zawng hi ka chhinchhiah a ni; mi, mi dang chungah pawi khawpin a intilal thin a.
8:10 Tin, mi suaksualte an phûm ka hmu thin a, an liam ta a, thil tidikte pawh hmun thianghlim ata chu an kal bo va, khawpuiah chuan hriat an ni ta lo va. Hei pawh hi engmah lo mai a lo ni.
8:11 Thiltih sual chungah hremna hlen nghal mai a nih thin loh avângin, mihring fate thinlung chu thil sual ti tûrin a lo ngampa tawh thin a ni.
8:12 Mi sual chuan vawi za pawh thil sual tiin dam rei bawk mah sela, Pathian tihtuten, amah ngei an tih avângin a tha tho vang tih ka hria:
8:13 mahse, mi suaksual tan kha chuan a tha lo vang a, a ni tihseite pawh kha hlimthla ang lek a ni si a, Pathian tihna a neih loh avângin.
8:14 Lei chungah hian engmah lo a lo awm a lo awm a, mi felte chuan mi suaksualte tawn awm tak an tawng a; mi suaksualte lahin mi felte tawn awm tak an tawng lawi si a. Hei pawh hi engmah lo mai a lo ni ka ti a ni.
8:15 Tichuan, ni hnuaiah hian ei leh in leh nuam taka awm aliama til tha engmah mihringin a neih loh avângin nawmna hi tha ka ti mai e: chu chu ni hnuaia a dam chhûng ni Pathianin a pêk zawng zawnga a thawhrimnaahte chuan a tel zel dawn si a.
8:16 Finna hre tûr leh lei chunga thiltih tak zawng zawng hre tûra chhun leh zan mu lo chhing lova ka rilru ka han hman chuan,
8:17 Pathian thiltih zawng zawng, ni hnuaia tih takte chu miin a hmu chhuak thei lo tih ka hmu ta a. Miin zawng eng ang mah sela, a hmu chhuak lo vang; mi fingin hriat inring teh mah se, a hmu chhuak thei bawk hek lo vang.
9:1 Heng zawng zawng dap chuak tûr hian ka vei êm êm thin a; mi fel leh mi fing leh an thiltihte chu Pathian kuta awm a lo ni a: hmangaihna a ni nge huatna tih mihringin an hre lo, an hmabak a ni vek si.
9:2 Mi zawng zawng chungah thil thuhmun a thleng a ni: khawrel thuhmun chu mi fel leh mi suaksual te, mi tha te, mi thianghlim leh thianghlim lo te, inthawi mi leh thawi lo mite chungah pawh, mi tha ang bawkin mi sual pawh chhehchham hmang ang bawkin chham duh lo mi pawh.
9:3 Hei hi a ni, ni hnuaia thiltih zawng zawnga thil tha lo chu, mi zawng zawng chunga khawrel thuhmun thleng hi; mihring fate thinlung lah chu Saula khat a ni a, an thinlung lah chu Saula khat a ni a, an dam chhûngin an thinlungah âtna a awm a, chutih hunah chuan mitthi hnênah an kal a.
9:4 Mi nungdamte zinga la telte tan chuan beiseina a la awm a: sakeibaknei thi ai chuan ui nung takngial pawh a tha zawk si.
9:5 Mi nungdamte chuan an la thi dawn tih an hre si a, mitthi erawh chuan engmah an hre lo va, lawmman an nei tawh ngai lo va, hriat reng pawh an hlawh tawh hek lo.
9:6 An hmangaihna te, an huatna te, an itsikna te a boral daih tawh a ni, ni hnuaia thiltihahte hian chanvo reng an nei tawh ngei hek lo.
9:7 Kal la, lawm takin i chaw ei la, thinlung hlimin i uain in rawh; Pathianin i thiltihte chu a pawm tawh si a.
9:8 I silhfente chu var reng sela, i lu pawh hram ngai suh se.
9:9 Ni hnauia a pêk che i hun engmah lo chhûng zawng chuan i nupui, i hmangaih hneha chuan nu nuam takin awm rawh; chu chu dam chhûnga i chanvo leh ni hnuaia i thawhrimnaa i chanvo chu a ni si a.
9:10 I kutin tih tûr a hmuh apiang chu theihtawpin ti rawh; thlan i kalna tûrah chuan thil tih tûr emaw, remruat tûrte emaw, hriatna emaw, finna emaw a awm si lo va.
9:11 Ka han thlir leh a, ni hnuaia intlansiaknaah mi chak chu a hlawhtling chuang lo va, indonaah mi huai a hlawhtling chuang hek lo; mi fingin ei tûr a hmu bik lo va, mi themthiamin duhsak an hlawh chuang hek lo, mi zawng zawng chungah hun leh khawrel ang angin a thleng mai zakw tih ka hmu a.
9:12 Mihringin ama hun pawh a hre si lo va; sângha, len hlauhawma man leh sava, thanga awk ang maiin, mihring fate pawh an chunga lo thleng phutin hun tha lovah an awk thin a ni.
9:13 Ni hnuaiah chuan hetiang fina hi ka hmu bawk a, ka tan ropui hlein a lang.
9:14 Khawpui te tak te a chhûnga mi tlemte awmna chu a awm a; lal ropui takin a rawn bei a, a hual a, hual dai nasa tak a theu hnan a;
9:15 tin, chu khuaah chuan mi rethei fing tak a awm a, a finnnai khawpui chu a chhan chhuak ta a; mahse, tumahin chu mi rethei chu an hre reng lo.
9:16 Mi rethei finna chu hmusita awmin, a thu pawh ngaihthlâk ni lo mahsela, kei chuan, "chakna aiin fina a tha zawk," ka ti tho a ni.
9:17 Mi fingte thusawi zawi te pawh, mi âte zinga rorêltu au vâk aiin a hriat that theih zawk.
9:18 Finna chu indona hriamhrei aiin a tha zakw a; mahse, mi sual pakhatin thil tha tam tak a tichhe thin.
10:1 Tho thiin a tichhia, Rimtui siamtu hriak rim; Chutiangin finna leh zahawmna pawh Âtna tlemtein a chilh bo.
10:2 Mi fing thinlung a hawi, a ding lamah, Mi â thinlung erawh a vei lama'n.
10:3 A ni tak e, mi â chu tual a len laiin A hriatnain a tlin lo va, Mi tin, hnênah, "A â a ni," a ti zel thin.
10:4 Rorêltu thin thawk mah sela, nangma chungah, I hmun kalsan suh ang che; Lungnih lohnate a tireh, zawldawhnain.
10:5 Ni hnuaia ka hmuh thin thil tha lo a awm, Rorêltua lo chhuak thiltih dik lo ang:
10:6 Mi â hmun sângahte dah a, Mi hausa hmun hniama an thute hi.
10:7 Chhiahhlawh ka hmu, sakawr chungah, Hotu a kal kein, chhiahhlawh angin.
10:8 Hum laitu chu a hum laihah a tla ang; Hungna tawn tlangtu a chu ang, rûlin.
10:9 Lung lai chhuaktu a inhliam ang; Thing ektu tan hlauhthawn a awm.
10:10 Thir a bil a, miin a tah hrima loh chuan Tha rum a ngai lehzual ang; Mahse a sawt ber mai, finna, hlawhtlin nân.
10:11 A chuk mai chuan rulin, dawi ât hmain, Dawi ât thiam sawtna a awm hlei nem.
10:12 Mi fing kamchhuak thu zawng a hlu. Mi â hmui erawh chuan mahni a indawlh zo vang.
10:13 A kamchhuak thu bul chu âtna a ni sa a, A kamchhuak tawpna chu âtna pawikhawih chi a ni.
10:14 Thu a tuitam thin, mi â chuan, Miin a hre lo, thil lo awm tûr chu, Tunge hrilh thei, mi hnu lama thil lo awm tûr?
10:15 Thawhrimnain a intichau thin, mi â chu, Khawpui kalkawng pawh a hre lo.
10:16 I chung a pik e, nang ram, lal naupang leh Hotute zinga ruaitheh thin neitu!
10:17 I nihlawh e, nang ram, lal chu lal chi fapa leh Hotute ruih nân ni lo, chakna tûra hun dik taka ei thin neitu!
10:18 Zawmthawt avângin a sawp, in chung. Kut dawngdah vangin a far,
10:19 Ruai siam a ni, hlimhlawp atân, Uain chu nun tihnawm nân, Tangkain engkim a si thlu.
10:20 Lalber chu lawh suh la, ânchhia, i rilru pawhin; Ânchhia lawh suh, mi hausa chu, i khum laizawl hmunah; Chungleng savaten i awm chu an pu darh ang a,Thla neiten chung chu an hril mai ang.
11:1 I chhâng paih la tui chungah chuan, I hmu leh dawn si, nei rei hnuah.
11:2 Chan tûr pe la, mi pasarih, pariat hnênah, I hre si lo, lei chungah hian thil tha lo, lo tla tûr chu.
11:3 Tui a pai chuan chhumin, a intiruak thin, lei chungah; Thing a tluk chuan chim hawi emaw, hmâr hawi emaw, A awm ngei ang thing chu, a tluk hmunah.
11:4 Thli pawisatu'n chi a tuh lawng, Chhum enthlatu'n a seng hek lo vang.
11:5 Thli kalkawng chu i hre lo va, Hmeichhe pum chhûnga nau ruh than dan pawh i hre hek lo, Chutiang bawkin Pathian engkm titu thiltih chu i hre lo.
11:6 Zingah i chi tuh la, tlaiah i kut sum suh; I hre si lo, a thang tha tûr khawii nge, Hei hi nge, kha kha nge, an tha ve ve dawn.
11:7 A nuam ngei mai tak e, eng chu, Mi tan pawh ni hmuh a tha e,
11:8 A ni, mi kum tam tak a dam chuanin Heng zawngah hian lawm rawh se;Amaherawh, hre reng sela thimna nite, An tam hle mai dawn si a; Thil lo thleng zawng zawng hi engmah lo mai a lo ni.
11:9 Thalaite u, in that lai chen ula, I la naupang viau lai hian hlim rawh u, Amaherawhchu Pathianin in chungah Ro a rêl dawn tih hre reng ang che u.
11:10 Engmah engto nei suh ula, In pang tinatu awm hek suh se, In that lai hun a rei dawn lo.
12:1 Tin, i vanglai hian i siamtu hre reng rawh - Ni tha lote a lo thlen hma leh Lawmna rêng rêng ka nei lo ve," I tihna tûr kumte a lo hnaih hma hian;
12:2 Ni te, eng te, thla te, arsite a thim hma leh Ruah hnua chhum a lo kir leh hma hian.
12:3 In vengtu chu a lo khurh a, Mi chakte chu an kaikun a, An tlem avânga rawtsawmtu nute an ban a, Tukverha dak nute chu an thim a,
12:4 Kawtthlêra kawngte a inkhar ni chuan, Rawtsawmna ri a lo chuai a, Sava thawmah mi â thawh a, Zai nu zawng zawngte an lo zuai lai hian;
12:5 A ni, a sâng chu an hlau va, Kangah hlauhawm a awm a, Vai umkhal thing a par a, Khau chu hnawksak a ni a, Chakna a bo va, mi chu a chatuan in lamah a hawngin, Lusunte chu kawtthlêrah an vâk vêl si a;
12:6 Tangkaraw zai chu a chah a, Rangkachak berhbu chu a keh a, Hlumbêl chu tuikhurah a keh a, Tawlailir chu tuikhuah bulah a tliah hma hian
12:7 Vaivut chu a awm angin leiah a chang leh a, Thlarau chu a petu Pathian hnênah a kir leh a ni.
12:8 Thuhriltu chuan, "Engmah lo mai mai, Thil zawng zawng hi engmah lo mai a lo ni," a ti a.
12:9 Tin, a fing chauh pawh ni lovin, Thuhriltu chuan mite hriatna a zirtir a; a ni, thufing tawi tam tak a ngaihtuah a, a zawng chhuak a, a rem fel a.
12:10 Thuhriltu chuan thu pawm tlak hmu tûrin a zawng a, tlâng taka ziak, thutak thute chu.
12:11 Mi fing thu chu berâmputen an khalh nana an hman tiang zum ang a ni a, thufing lawrkhawm chu thir Kilhna khen bur tlat anga nghet a ni.
12:12 Chu chauh pawh ni lovin, hengah hian, ka fapa, zilhin awm ta che. Lehkhabu tam tak siam hi tawpintai a awm lo ve, nasa taka zir pawh hi tisa chauhna mai a ni.
12:13 Heng thu zawng zawng khaikhawmna hi i ngaithla teh ang: Pathian chuan thiltih zawng zawng chungah ro a la rêl dawn si a, thil inthup engkim, a chhia emaw, a tha emawte pawh, tih hi.
posted by zoblog @ 12:07 PM  
0 Comments:
Post a Comment
<< Home
 
About

Name: zoblog
Home:
About Me:
See my complete profile
Previous Post
Archives
Mizo Websites
:bloremizo::buannel::chhawkhlei: :Dmzp::fartuah::hyderabadmizo: :khampat::lawrkhawm::lelte: :misual::mizobooks::mzbloggers: :mizomethodist::mizoramhouse: :mizoramuniversity::mizoserver: :mizoweaving::mumbaimizo: :samaw::sinlungnews::zawlbuk: :zomireunification::zonet::zoram: :zotalk:
© MIZO CLAN by Mizoclan Blog