|
| Wednesday, September 12, 2007 |
1:1 Israel lal Davida fapa Solomona thufing;
1:2 Finna leh zirtirna, hriat theihna tur te,Hriat thiamna thu ngaihruat dan thiamna te;
1:3 Felna te, rorêl te, hleih nei lova hmang hre taka zirtirna pawm dan thiamna te;
1:4 Mi mawlte remhriatna neihtir tûr te, Tlangvâlte hriana leh ngaihruat thiamna neihtirna tûr leh
1:5 Mi fingten an hriat a, an thiamna te a lo pun a, Thil ngai thiam miin rorêlna fingte a man a man thiamna tûr te,
1:6 Thufing leh a hrilhfiana te, mi fing thu leh an thuril sawite hriatthiamnâte chu.
1:7 LALPA tih hi finna bul a ni a; Nimahsela mi âte chuan finna leh zirtirna an hmusit thin.
1:8 Ka fapa, i pa zirtirna che chu ngaithla la, I nu zirtirna che chu hawisan suh.
1:9 I lu atân parthi mawi tak a ni ang a, I nghawng atân thi ang ani dawn si a.
1:11 Ka fapa, mi sualin an thlem che chuan zawm suh. "Hawh te, thisen chhuah tûrin i chang ang khai, A vang engmah awm lovin pawi khawih lote chu i chang ru teh ang;
1:12 Seol angin anung chungin i lem teh ang, An puma khuarkhuruma tla angin.
1:13 Thil hlu tak takte kan nei ang a, Râllâk sumin kan in kan tikhat dawn nia.
1:14 Kan zingah lo tel ve la, Tangka ip kan intawm dawn nia," te an tihin,
1:15 Ka fapa, an zingah chuan tel ve suh la, An kawng ata inthiarfihlim rawh.
1:16 An kete chu thil sual lamah an tlan a, Thisen chuah tûrin an hmanhmawh ruai thin.
1:17 Len chu a lo thlawn maia zar a ni, Eng sava mithmuhah pawh.
1:18 Chungte chuan anmahni thisen an chang a, An nunna chang ru an ni.
1:19 Chutiang chu a ni, hlawknaa duham apiangte kawng chu; A neitute nun a laksak thin.
1:20 Kawtthlêrah finna chu ring takin a au va, Kawtthlêr thuamahte chuan a aw a chhuah a;
1:21 Mipui inkhawmna lai berah a au va, Khawpuiah khaw luhna kawngkhâr bulah chuan a au chhuak a.
1:22 Nangni mi mawlte u, eng chen nge mawlna in ngainat dawn? Eng chen nge hmusittute hmuhsitnaah in hlim ang a, Mi âten finna in huat dawn?
1:23 Ka zilhna che u lamah hian lo hawi rawh u: Ngai teh u, in chungah ka thlarau ka leih ang a, Ka thu ka hriattir ang che u.
1:24 Ka ko che u a, in duh lo va, Ka kut ka phar a, tuman in ngaisâng lo va;
1:25 Ka remruat zawng zawng chu engmah lovah in ngai zawk a, Ka zilhna rêng rêng in pawm duh lo va.
1:26 Chuvangin kei pawh in vanduai ni chuan ka nui ang a, In hlauh hun a lo thlen chuan ka nuihsan ang che u,
1:27 In hlauhna thlipui anga a lo thlen a, In vanduaina thawngaleivir anga a lo thlen a, Hrehawmna leh manganna in chunga a lo thlen hunin.
1:28 Chutichuan min ko vang a, nimahsela ka chhâng lo vang: Zing takah min zawng ang a, nimahsela min hmu lo vang;
1:29 hriatna chu an huat a, LALPA tihna chu an thlan loh avângin:
1:30 Ka remruat pakhat te mah an duh lo va, Ka zilhna zawng zawngte chu an ngainep a.
1:31 Chuvangin anmahni kawng rah chu an ei ang a, Anmahni suangtuahnain an tlai ang.
1:32 Mi mawlte hnungtawlhna chuan anmahni a that ang a, Mi âte hlawhtlinain anmahni a tiboral ang.
1:33 Ka thu pawm apiangte erawh chu him takin an awm ang a, Thil tha lo hlau lovin an awm hle hle ang.
2:1 Ka fapa, ka thute i dawn a, Ka thupêkte i khawl khâwm a,
2:2 Finna lama i beng i chhit a, I thinlung hriatna lam atân i pêk chuan;
2:3 A ni, hriatna i auh va, Hriat thiam theihna pawh i auh chuan,
2:4 Tangkarua anga i zawn a, Ro phûm ruk anga i zawn chuan,
2:5 LALPA tih nanchang i lo hria ang a, Pathian hriatna chu i chhar chhuak ang.
2:6 LALPA chuan finna a pe thin a, A ka atanga chuan finna leh hriat thiamna a lo chhuak thin a ni:
2:7 Mi tluangte tan finna dik a chhek khâwm thin a, Rinawm taka awm thinte tan phaw a ni;
2:8 Rorêlna kawngte a ven a. A mi thianghlimte kawng a vawn that theih nân.
2:9 Tichuan felna leh rorêlna chu i lo hre thiam ang a, Hleih neih lohna nên, a ni, kawng tha tinreng pawh.
2:10 I thinlungah finna chu a lût ang a, I nunna atân hriatna chu tui tak a n ang;
2:11 Remhriatnain a veng ang chia, Hriatthiamnain a enkawl ang che;
2:12 Sual kawng ata chhan chuak tûr che leh Thil awihawm lo sawi mite laka chhanchhuak tûr chein;
2:13 Chungte chuan kawng thima kal tûrin kawng dik chu an kalsan a;
2:14 Thil tha lo tih chu an lawmzawng a ni a, Thil sual bengtla lo mai maiahte an lawm thin;
2:15 An kawngte chu a kawi a, An rintlâk loh.
2:16 Hmeichhe sual lakah chuan a chhan ang che, Kam thluma thlemtu che lakah;
2:17 A tleirawl lai thian kalsan a, A Pathian thuthlung theihnghilhtu lak ata chu.
2:18 A in chuan thihna lam a hawi a, A kawngte chuan mitthi lam
2:19 A hnêna kal rêng rêng chu an kir leh tawh ngia lo va, Nunna kawng an pawh ngai hek lo;
2:20 Mi tha kawng i zawh a, Mi fel kawng chu i zawh zel theih nân.
2:21 Mi tluangte chu leilungah hian an cheng ang a, Tha famkimte chu chutah chuan an awm reng a;
2:22 Mi suaksualte erawh chu leilung ata tihboral an ni ang a Vervek taka titute chu tihboral phiar an ni ang.
3:1 Ka fapa, ka dan chu theihnghilh suh la, I thinlungin ka thupêkte chu zawm reng zawk rawh se;
3:2 Dam ni leh kum te, Thlamuannâte a pêk belhchhahsak dawn che nia.
3:3 Khawngaihna leh thu tak chuan hnuchhawn che suh se, I nghawngah zem tlat la, I thinlung phêkah ziak rawh.
3:4 Tichuan pathian leh mihring mithmuhah Duhsakna leh hming thâtna i hlawh dawn nia.
3:5 I thinlung zawng zawngin LALPA ring la, Nangma hriatnaah innghat suh;
3:6 I kawng zawng zawngah amah hre reng la, I kawngte chu a kawhhmuh zel ang che.
3:7 Mahni ngaihin intifing suh la; LALPA chu tih la, sual kalsan rawh.
3:8 I lai atân hriselna a ni ang a, I ruh atân thling a ni ang.
3:9 I sumin LALPA chawimawi la. I thil lo pung hmasa ber zawng zawngte nên;
3:10 Tichuan i buh in chu a lo khat liam ang a, I sawrkhur uain tharin a luang liam ang.
3:11 Ka fapa, LALPA thununna che ngainep suh la, A zilhhauna che ning hek suh.
3:12 LALPA chuan a hmangaihte chu a zilhhau thin a ni, Pain fa a lawm apiangte a zilhhau thin ang hian.
3:13 Finna hmu chhuaktu chu a nihlawh a, Hriatthiamna hmu chhuaktu pawh.
3:14 Tangkaraw peipun aiin a peipun chu a tha zawk si a, A help pawh rangkachak tha mi ain.
3:15 Lunghlu sen mi aiin a hlu a; Thil i duhthusam theih ang zawng zawngin a hen lo.
3:16 A kut ding lamah dam reina a awm a, A kut vei lamah sum leh ropuina.
3:17 A kawngte chu nunkhaw nawmna kawng ani a, A kawng zawng zawng chu thlamuanna a ni.
3:18 A vuan apiangte tan nuna thing a ni a, A kawl reng apiangte chu an hamtha e.
3:19 LALPA chuan finnain leilung a din a, hriatnain vante a tinghet a;
3:20 A thiamnain tuifinriatte a sah a, Chhumte chuan dai a fartir a.
3:21 Ka fapa, i mit ata kiantir suh la, Finna leh ngaihruat thiamna dik tak chu vawng tlat rawh;
3:22 I nunna atân nunna a ni ang a, I nghawng atân khawngaihna.
3:23 Tichuan i kawngah him takin i kal ang a, I ke chu a petek lo vang.
3:24 I mut hunin i hlau lo vang a, A ni, i mu ang a, tui takin i muhil ang.
3:25 Hlauhna lo awm thutte chu hlau suh la, Mi suaksualte chunga tiauna a lo thlenin hlau hek suh.
3:26 LALPA chu i himna a ni si a, I ke chu awk lo tûrin a veng dawn a ni.
3:27 A phute tan thâtna ui suh, I kuta tih theihna a awm phawt si chuan.
3:28 I thenawm hnênah, "Kal leh ta rih la, lo kal leh rawh, Naktukah ka pe ang che," ti suh, I kawl reng si chuan.
3:29 I thenawm chungah thil tha lo suangtuah suh, Ngaihngam takin i kiangah a awm tih hre siin.
3:30 A vang awm lovin mi sual mai suh; I pawi engmah a khawih loh chuan.
3:31 Mi nunrawng awt suh la, A kawng a engamah thlang suh.
3:32 Mi kawhmawh chu LALPA ngaihin tenawm a ni si a; Mi tha famkim erawh chu a thian an ni.
3:33 LALPA ânchhia chu mi suaksual inah a awm a, Mi felte chenna erawh chu mal a sawm thin.
3:34 Mi hmusittute chu a hmusit thin a, Inngaitlâwmte erawh chu khawngaihna a pe thin.
3:35 Mi fing chuan ropuina an rochung ang a, Mi âte kaisanna erawh chu mualphona a ni ang.
4:1 Ka fapate u, pa zirtirna chu ngaithla ula, Hriat thiamna chu hre tûrin ngaithla rawh u;
4:2 Zirtirna tha tak ka fah si che u a; ka zirtirna hi hawisan suh u.
4:3 Ka pa fapa ka ni a, Ka nu fa, fapa mal duata duat ka ni a.
4:4 Min zirtir a, ka hnênah, "I thinlung chuan ka thute hi vawng reng sela; Ka thupêkte hi zawm la, nung rawh," a ti a.
4:5 Finna nei la, hriat thiamna nei rawh; Theihnghilh suh la,, ka kaa thu chhuakte hi chhiat lam pansan suh.
4:6 Hawisan suh la, a humhim ang che; Hmangaih la, a veng ang che.
4:7 Finna hi thupui ber a ni a; chuvangin fina hi nei rawh; A ni, i thil neih zawng zawng chan pawhin finna hi nei rawh.
4:8 Chawimawi la, anin a chawi sâng ang che; I lawm chuan zahawmah a siam ang che.
4:9 Khawngaihna lukhum i lu a khumtir ang a, Mawina lallukhum a pe ang che.
4:10 Aw ka fapa, ka thu ngaithla la, pawm rawh; Tichuan i dam chhûng kum a lo tam ang.
4:11 Finna kawngin ka zirtir chia, Thana kawngah ka hruai chia.
4:12 I kal laiin i pheichheh a zang ang a; I tlan pawhin i petek lo vang.
4:13 Zirtirna chu vuan tlat la, chhuah suh; Vawng tlat rawh, i nunna a ni si a.
4:14 Mi suaksual kawngah chuan lût suh la, Mi sual kawngah chuan kal suh.
4:15 Pumpelh la, a kiangah kal suh; Hawisan la, kal zel rawh.
4:16 Pawi an khawih phawt loh chuan an mu ngai lo va, Tute emaw tal chhiatna an thlensak loh chan an mut a chhuak thei lo.
4:17 Suahsualna chhâng an ei a, Nunrawnna uain an in thin.
4:18 Mi felte kawng erawh chu chhun en la tak pawha eng zual deuh deuh, eng fim tak ang a ni.
4:19 Mi suaksualte kawng chu a thim a, Eng nge an chhuih an hre lo.
4:20 Ka fapa, ka thu ngaithla la, Ka thu sawiah i beng dawh rawh.
4:21 I mithmuh ata chhuahtir suh; I thinlung lai takah pai rawh.
4:22 A hmutute tan nunna ani a, An tisa zawng zawng atân hriselan ani si a.
4:23 Thil dang bera aiin i thinlung veng tha rawh, Nuna lo chhuahna ani si a.
4:24 Tawng chaltlai bansan la, Mi bum ching suh.
4:25 I mitin hma lam en la, Ngil takin hma lam thlir rawh.
4:26 I ke atân kawng tirualrem la, I kawng zawng zawng tihngheh ni rawh se.
4:27 Ding lam emaw, vei lamah emaw peng suh; Sual ata i ke sawn rawh.
5:1 Ka fapa, ka finna ngaithla la, Ka hriatnaah i beng dawh rawh,
5:2 Ngaihruat thiamna i vawn a, I leiin hriana a vawn theih nân.
5:3 Hmeichhe sual hmui ata khawizu a far a, A hmui chu hriak aiin a nal si;
5:4 A tawpna erawh chu sai angin a kha a, Khandaih hriam tawn angin a hriam.
5:5 A ke chu thihnaah a chhuk a, A ke penin Seol lam a pan.
5:6 Chutichuan nunna kawng rualrem a hmu lo va, A kawngte chu anghet lo va, a hre si lo.
5:7 Chuvangin ka fapâte u, ka thu ngaithla ula, Ka kaa thu hi hawisan teh suh u khai.
5:8 I kawng chu a hnên ata sawn daih la, A kawngka va hnaih suh.
5:9 Chutilochuan i ropuina chu mi dang a pe ang a, I kumte chu mi nun chhia i pe dah ang a,
5:10 Ram dang mite chu i thahruiin i titlai ang a, I thawhrimna chu hmêl hriat loh inah a awm dah ang e.
5:11 Tin, i tisa leh i taksa a ral hunin I hun tawp lamah chuan i tap ang a,
5:12 "Engtiziaa zirtirna chu ka lo huat a, Ka thinlungin zilhhauna chu lo ngainep nge maw ni aw?
5:13 Mi zirtirtu thu lah ka lo awi ta hek lo va, Mi zirtirtute chungah ka beng ka lo dawh ta bawk hek lo;
5:14 "Mipuite leh pung khawmho zingah chuan ka lo thih teuh hle chu le!" i la ti ang.
5:15 Nangma tuibel ata tui in la, Nangma tuichhunchhuaha tui thar lam chu.
5:16 I tuihalnâte chu ram tina luang darhin Kawtthlêrahte lui tui a luang dawn êm ni?
5:17 I tân chauh ni sela, Ram dang mite tawmpui lohvin.
5:18 I tuichhunchhuah chu malsawmin awm sela, I tleirawl lai nupuiah chuan hlim rawh.
5:19 Zukpui duhawm tak leh zukchal nalh tak angin Englai pawhin a tang chhûng chuan tilungawi fo che sela, A hmangaihnaah chan lawm fo rawh.
5:20 Eng atân nge nang, ka fapa chuan hmeichhe sual i lawm ang a, A tang i pawm ang?
5:21 Mihring kawngte chu LALPA mithmuhah a awm a, A kawng zawng zawng a tihrualremsak thin.
5:22 Ama khawlohna ngeiin mi suaksual chu a man ang a, A sualna hruizena thlunin a awm ang.
5:23 Zirtirna tlakchham vangin a thi ang a, A ât êm avângin a bo vang.
6:1 Ka fapa, i thenawm tana mawhphurtua i lo tan a, Ram dang mi vuak nana i kut i hman chuan,
6:2 I tawngka chhuakah i awk a, I tawngka chhuakin a man che a ni:
6:3 Ka fapa, i thenawm kutah i awm tih inhriain hei hi ti la, intichhuak rawh; Kal la, itihuai la, i thenawm chu luh ngut ngut rawh.
6:4 I mit chu muthilhtir suh la, I mit chu muthluktir hek suh.
6:5 Sa peltu laka sakhi a tlan chhuak ang leh Sava vehtu laka sava a thlawk chhuak angin intichhuak rawh.
6:6 Nang, thatchhepa, fanghmir tih dante chhut la, fing rawh;
6:7 Anni chuan lal te, hotute, rorêltute nei lovin
6:8 Nipuiah chaw an chhek khâwm a, A seng hunin an ei tûrte an seng khâwm thin.
6:9 Aw, thatchhepa, eng chen nge i mut dawn? Eng tikah nge i muhil chu i thawh dawn?
6:10 I duh chuan mu hlek la, chhing hlek rawh, Kut kuangkuahin chawl hlek teh,
6:11 I mut hlanin i rethei hman ang a, Tlakchhamnain sipai angin a rawn nang thut ang che,
6:12 Mi tlâktlai lo, mi khawlo chu, Tawng chaltlai nên a vâk vêl a;
6:13 A mit a siai a, a kein thu a sawi a, A kut zungtangin a zaizir thin.
6:14 A thinlungah luhlulna a awm a, thil sual a suangtuah reng a, Inrem lohna a tuh thin.
6:15 Chuvangin a chhiatna a lo thleng thut ang a, Vawilehkhatah tihchhiatin a awm ang a, tihthat leh theih tawh lohvin.
6:16 Thil paruk LALPAN a huat thin a awm a, A ni, pasarih a tenzâwng tak a awm;
6:17 Mit chapo te, lei daw thei te, Pawi khawih lo thisen chhuahna kut te,
6:18 Thil tha lo suangtuah thin thunlung te, Pawi khawih tûra ngalchak te;
6:19 Hretu der dawt sawi thin te, Unau kara inrem lohna tuhtute hi.
6:20 Ka fapa, i pa thupêk chu zawm la, I nu zirtirna chu hawisan suh.
6:21 I thinlungah thlung reng la, I nghawngah awrh rawh.
6:22 I vah velin a hruai ang chia, I mut hunin a veng ang chia I thawh hunin a bia ang che.
6:23 Thupêk chu khawnvar a ni a, dan chu eng a ni si a; Tin, zirtirna zilhhauhna chu nunna kawng a ni;
6:24 Hmeichhe khawlo lakah leh Hmeichhe sual kam thlum lakah veng tûr chein
6:25 I thinlungin a mawina it suh la, A meng novin hip che suh se,
6:26 Nawhchizuarnu avângin pa chhâng themah a chang a, Uirenu chuan nunna hlu tak a zawng thin.
6:27 Mi a puan kang lovin mei a pawm thei êm ni?
6:28 Mi a ke kang lovin meiling a rap thei êm ni?
6:29 Chutichuan mi a thenawm nupui hnêna kal a, Tupawh amah va khawih chu hrem lohvin a chhuak lo vang.
6:30 Miin a riltam tihreh nana ruk a ruk chuan an hmusit thin lo va;
6:31 Nimahsela an hmuh chhuah chuan a lehsarihin a rul ang; A ina a sum zawng zawng a pe ang.
6:32 Mi nu uiretu chuan hriatna a nei lo a ni, Ama nunna tiche tûr thil a ti a ni,
6:33 Hliam a tuarin ahminghliau vang a, A hming a chhe hlen bawk ang.
6:34 Thikthuchhiatna chu mipa thinrimna a ni a, Phuba lak ni chuan a zuah lo vang.
6:35 Tlanna chu engtahmah a ngai lo vang a; Thilpêk tam tak pe mah la, a lung a awi chuang lo vang.
7:1 Ka fapa, ka thu pawm la, Ka thupêkte khawl khâwm rawh.
7:2 Ka thupêkte zawm la, nungdamin awm rawh; Ka dan chu mit naute angin vawng rawh.
7:3 I zungtangah bun la, I thunlung phekah ziak rawh.
7:4 Finna hnênah chuan, "Ka farnu i ni," ti la, hriatna chu i laichinnu vuah rawh.
7:5 Hmeichhe sual laka veng a, Hmeichhe khawlo thlemna laka veng tûr chein.
7:6 Ka ina tukverh zawngdaikalh awng atang chuan ka han thlir a,
7:7 Mi mawl tlangvâl zingah chuan Tlangvâl hriatna nei lo ka hmu a,
7:8 A awmna lam hnaih kawtthlêrah chuan a kal tan a, A in lam a pan ta a,
7:9 Tlai lam thimhmulah zan thim, thim tak hnuaiah.
7:10 Ngai teh, nawhchizuar inthuam leh fin vervek rilru pu hmeichhiain a tawk a.
7:11 A awm hle hle thei lo va, a tum a ruh a, A ke chuan a ina awm a duh lo va;
7:12 Kawtthlêrah te, peng thuam laiah te a awm a, Kil tin, kil tangah a chang thin.
7:13 Chutichuan a man a, a fawp a, Tlangnel tak hmêl puin a hnênah,
7:14 "Remna thilhlana inthawinate ka hlan tûr a ni a, Vawiinah ka thutiam ka hlen ta a.
7:15 Chuvangin nangmah tawh tum chein ka lo kal a ni, Ngun taka zawn tum chein, tin, ka hmu ta chia.
7:16 Ka khumah awngphah mawi tak ka phah a, Aigupta ram lazaia tial.
7:17 Ka khum chu beraw te, aloe te, thakthingtein ka tirimtui a.
7:18 Hawh teh, zankhuain hmangaihna duhtawkin i chen ang khai, Hmangaihnain inhnem ang.
7:19 In neitupa lah a awm si lo, Hla takah a zin a;
7:20 Tangka ip a keng a, Thla hlei nga hunah a lo haw dawn a ni," a ti a.
7:21 A tawngkam thiamin a thlem thlu a, A infak mawinain a hruai bo ta a.
7:22 A zui ta nghal mai a, Bâwng, a talhna hmuna a kal ang leh, Mi â tihfin tura kawl bun tûra a kal ang leh,
7:23 Savain a thihna tûr a ni tih hre lova Thlain a thin a dawh tlâng thlenga thang lam a pan angin.
7:24 Chuvangin ka fapate u, ka thu hi ngaithla ula, Ka kaa thu chhuakte hi pawm rawh u.
7:25 I thinlungin a kawngte chu awn suh sela, A kawngahte chuan kal bo suh.
7:26 Mi tam tak a hliam a, A ni, a thahte chu tam tak mai an ni.
7:27 A in chu Seol kawng a ni a, Thihna pindan a zuk chhun a.
8:1 Finna chu a auvin, hriatna chuan a aw a chhuah lo vem ni?
8:2 Kawng sir ko sâng chungah te, Kawng thuamahte a ding thin a;
8:3 Khaw tawntirh kawngkaah, Khaw luhna kawngka bulahte ring takin a au va.
8:4 Aw nangni mihringte u, Ka auh che u hi, Ka aw chu mihring fate tan a ni.
8:5 Aw, nangni mi mawlte u, Remhriatna hi lo hre thiam teh u; Nangni mi âte u, finna thinlung nei mi lo ni rawh u.
8:6 Ngaithla rawh u, thil tha tak mai ka sawi dawn a ni, Ka thil sawite chu thil dik hlir a ni ang.
8:7 Ka ka chuan thutak a sawi chhuak ang a, Suahsualna chu ka hmui tan thil tenawm a ni.
8:8 Ka kaa thu zawng zawngte chu a fel vêl vek a ni, Thu kawi leh bengtla lo rêng rêng a awm lo.
8:9 Hre thiamte tan a fiah vek a, Finna hmutute tan a dik vek a ni.
8:10 Ka zirtirnate dawng rawh u, tangkate ni lovin, Tin, finna chu rangkachak duhawm mai ai pawhin.
8:11 Finna chu lunghlu sen mi aiin a tha zawk si a. Duhthusam theih thil zawng zawng pawh a hen zo a awm lo.
8:12 Kei, finna chuan ka chennaa remhriatna ka siam a, Finna leh ngaihruat thiamna ka hre chhuak thin.
8:13 LALPA tih chu sual huat hi a ni; Chapona te, uanthuanna te, thil tha lo chinna te, Tawng chaltlai te hi ka haw takzet a ni.
8:14 Remruat leh hriatna dik hi ka ta ani a; Hriat thiamna ka ni a, chak tak ka ni.
8:15 Kei mi hmnagin lalin ro a rel a, Hotuten rorêlna felin thu an titlu thin a.
8:16 Kei mi hmangin hotuten ro an rel a, Mi lian te, leilunga rorêltute zawng zawng pawhin.
8:17 Mi hmangaihtu chu ka hmangaih a, thahnemngai taka mi zawngtute chuan mi hmu ang.
8:18 Sum leh ropuinate ka hnênah a awm a, A ni, sum leh felna tlo tak mai chu.
8:19 Ka rah chhuah chu rangkachak aiin a tha zawk a, a ni, rangkachak tha mi ai pawhin; Ka lak luh chu tangkaraw tha mi aiin.
8:20 Felna kawng ka zawh a, rorêlna kawng takah;
8:21 Mi hmangaihtute chu sum ka rochuntir theih nân leh An ro bâwmte ka tihkhah theih nân.
8:22 LALPA chuan a thil siam bul berah min din a, Hmasânga a thil siam bul berah.
8:23 Chatuan ata, a tir tea din ka ni, Leilung awm hma rengin.
8:24 Tuifinriat la awm hma daihin ka piang tawh a, Tuikhur tui tam tak la awm hma daihin.
8:25 Tlâng liante an din hma leh Tlâng tete awm hmain ka piang tawh a,
8:26 Leilung a la din hma leh ramte a din hma, Khawvela vaivut pawh a la awm tan hma daihin.
8:27 Vante a tihngheh laiin ka awm tawh a, Tuifinriat chunga kal hualna a siam laiin,
8:28 Chung lam van a tihngheh laiin, tuifinriat a lo nghe laiin;
8:29 Tuite chuan a thu pêk an bawhchhiat lohna tûra tuifinriat rite a siamsak a, Leilung nghahchhan a ruat lai khan;
8:30 Chutih lai chuan mi themthiam angin a kiangah ka awm a Ni tin, a lawmna ka ni a. A bulah ka hlim êm êm bawk thin.
8:31 Chen theihna a leilungah hlim taka awmin Ka lawmna chu mihring fate chungah a ni.
8:32 Khai le, ka fapate u, ka thu ngaithla rawh u, Ka kawng zawhtute chu mi nihlawh an si a.
8:33 Zirtirna chu ngaithla ula fing ula Duh lo suh u.
8:34 Ka kawngka bulah nghak a, Ka kawt hung kawngkaa nghak renga Ka thu ngaithlatu chu a eng a thawl e.
8:35 Mi hmu apiang chuan nunna a hmu a ni si a, LALPA duhsakna a dawng ang a.
8:36 Amaherawhchu ka chunga sual apiang chuan ama nunna a tikhawlo a ni.
9:1 Finna chuan a in a sa a, A ban pasarih a phun a;
9:2 A rante a talh a; a uainte a chawhpawlh a; A dawhkanah pawh ei tûr a hlui a.
9:3 A nulate a tir chhuak a, Khuaa hmun sângahte a au a,
9:4 "Mi mawl apiangte chu he lamah hian lo kal rawh se," tiin. Tin, hriatna nei lote chu,
9:5 "Lo kal ula, ka chhâng ei ula, ka uain chawhpawlh chu in rawh u.
9:6 Aw nangni mi mawlte u, âtna kawng chu chhuahsan ula, nung rawh u; Tin, hriatna kawngah chuan kal rawh u," a ti a.
9:7 Hmusit ching zilhtu chua tihtauh khumna a tawk thin a, Mi suaksual zilhtu chuan kut tuarna a insiam thin.
9:8 Hmuhsit ching mi chu zilh suh, a haw dah ang che, Mi fing zilh la, a hmangaih ang che.
9:9 Mi fing zilh la, a fing lehzual sauh dawn nia; Mi fel zirtir la, thiamnaah a lo pung dawn nia.
9:10 LALPA tih hi finna bul a ni a, Mi thianghlima hriatna hi hriat thiamna a ni.
9:11 Keimahin i nite chu tihpun a ni ang a, I dam chhûng kumte chu a pung ang.
9:12 I lo fin chuan, i tana fing i lo ni ang. Hmusittu i nih chuan nangmah chau vin i tuar ang.
9:13 Hmeichhe â chu a awm hle hle thei lo va, A mâwl a, engmah a hre lo.
9:14 A kawngkaah a thu thin a, Khua hmun sângtea thutphahah chuan, :15 Kawnga lo kal apiangte chu,
9:16 "Mi mawl apiangte chu he lamah lo kal rawh u," tia ko tûrin; Tin, hriatna nei lote hnênah chuan,
9:17 "Rûk tui chu a thlum a, A rûka chhâng ei chu a tui a ni," a ti a.
9:18 Nimahsela chutah chuan mitthi an awm tih leh A mi sawmte chu Seol rila awm an nih a hre lo.
10:1 Solomona thufing Fapa fingin pa lawm a siam a, Fapa â erawh chu nu rihna ni.
10:2 Suahsualna ro chuan hlawkna a nei lo va, Felna erawh chuan thina ata a chhan chhuak.
10:3 LALPA chuan mi fel nunna chu riltam a phal lo vang a, Mi suaksualte duhthusam erawh chu a paih bosak thin a.
10:4 Kut dawngdah chuan retheihna a thlen thin a, Mi taima kut erawh chu a hausakna a thlen thin.
10:5 Buh seng laia inchhek khawl chu fapa fing a ni a, A seng hun laia muhil erawh chu fapa, mualphona thlen thintu a ni.
10:6 Mi fel lu-ah chuan malsawmnate a awm a, Mi suaksual ka erawh chu nunrawnnain a tuam.
10:7 Mi fel hriat rengna chu malsawmna ani a, Mi suaksual hming erawh chu a tawih ral ang.
10:8 Mi fing chuan thinlungin thupêkte a dawng thin a, Mi â kamtam erawh chu a tlu ang.
10:9 Ngil taka kal chu, muanawm takin a kal thin a, A kawng tikhawlotu erawh chu hriat chhuahin a awm ang.
10:10 Mit siaitu chuan lungngaihna a thlen a, Mi â kamtam chu a tlu ang.
10:11 Mi fel ka chu nunna tuikhur a ni a, Mi suaksual ka erawh chu nunrawnnain a tuam.
10:12 Huâtnain inhauna ahchawk chhuak a, Hmangaihna erawh chuan bawhchhiatna zawng zawng a khuh thin.
10:13 Ngaihruat dik thiam mi kaah chuan finna hmuh a ni a; Amaherawhchu hriat thiamna nei lo mi hnungzang atân tiang a awm.
10:14 Mi fingte chuan hriatna an khawl khâwm a; Mi â ka erawh chu boral hnaih rengna a ni.
10:15 Mi hausa sum chu a khawpui nghet a ni a; Mi rethei boralna chu an pachhiatna a ni.
10:16 Mi fel thawhrimna chuan nuna a thlen a, Mi suaksual hlawkna chuan sualna.
10:17 Thununna pawm chu nuna kawngah a awm a, Zilhhauna hawisantu erawh chuan a tisual thin.
10:18 Huâtna zepte chu hmui dawthei nei mi â ni a, Mi rêlna thu chhak chhuak mi chu mi â a ni.
10:19 Thu tam takah chuan a bawhchhiatna a awm thin a, A ka sum thei mi erawh chuan fing takin a ti thin.
10:20 Mi fel lei chu tangkaraw tha mi ang a ni a, Mi suaksual thinlung erawh chu engmah hu a ni lo.
10:21 Mi fel ka chuan mi tam tak a chawm a, Mi â erawh chu hriat thiamna tlachhamin a thi.
10:22 LALPA malsawmna chuan a tihausa thin a, Lungngaihna a belhchhah thin lo.
10:23 Mi â tan chuan thil sual tih hi nuamsip bawlna ang a ni a, Chutiang bawk chuan hriat thiamna nei mi an chuan finna chu a ni.
10:24 Mi suaksual chu, a hlauh ang ngeiin a chungah a lo thleng ang: Mi fel duhthusam chu pêk a ni ang.
10:25 Thawngaleivir a lo virin mi suaksual chu a boral a, Mi fel rawh chu chatuan lungphûm a ni.
10:26 Ha tan uain thur leh mit tan meikhu angin Mi thatchhia chu a tirtu tan a ni ang.
10:27 LALPA tihna chuan dam chhûng ni a tisei a, Nimahsela mi suaksual kumte chu tihtawi a ni ang.
10:28 Mi fel nghahfak chu lawmna a ni ang a, Mi suaksual hmachhuan erawh chu a boral ang.
10:29 Mi dak tak tan LALPA kawng chu kulhbing a ni ang a, Thil tha lo titu tan erawh chuan boralna a ni ang.
10:30 Mi felte chu tihsawnin an awm lo vang a, Mi suaksualte erawh chu leilungah an awm lo vang.
10:31 Mi fel ka chuan fina a chhak chhuak a, Tawng chaltlai lei erawh chu tanchhum ani ang.
10:32 Mi fel ka chuan pawm tlak chu a hria a, Mi suaksual ka erawh chu chaltlai takin a tawngchhuak thin.
11:1 Bûkna dik lo hi LALPA mithmuhin thil tenawm ani a, Khin dik chiah erawh chu a lawmzawng a ni.
11:2 Chapona a lo awmin mualphovin a lo awm a, Inngaitlâwmte hnênah chuan finna a awm.
11:3 Mi fel rilru thâtna chuan anmahni a hruai ang a, Mi vervekte luhlulna erawh chuan anmahni a tiboral ang.
11:4 Thinur ni chuan sum leh paiin tangkaina a nei lo vang. Felna erawh chuan thihna ata a chhan chhuak ang.
11:5 Mi tha famkim felna chuan a kawng a kawhhmuh ang a; Mi suaksual erawh chu ama suahsualnain a titlu ang.
11:6 Mi dik tak felna chuan anmahni a chhan chhuak ang a, Vervek taka titute erawh chu anmahni pawi khawina ngeia manin an awm ang.
11:7 Mi suaksual chu a thihin a hmachhuan chu a boral ang a, Thil tha lo titute nghahfak chu a boral ang.
11:8 Mi fel chu manganna ata chhuakin a awm a, Mi suaksualin a hmun chu a luah thung a.
11:9 Pathian ngaihsak lo mi chuan a kain a thenawmte a tiboral a, Mi fel erawh chu hriatna avângin chhan chhuahin a awm ang.
11:10 Mi felte chunga thil a tluan laiin khua a hlim a, Mi suaksualte an thihin au dur durna a awm a.
11:11 Mi felte malsawmnain khua chawimawiin a awm a, Mi suaksualte ka erawh chuan a tichhia.
11:12 A thenawm hmusittu chua fina a nei lo va, hriatna nei mi erawh chu a ngawi thin.
11:13 Mi kamtam tei ruai mi chuan thurukte a tilang a, Mi rilru rinawm nei mi chuan thil a thup thin.
11:14 Inhruaina fing awm lohnaah chuan mite an tlu thin a, Remruat thiam tamnaah himna a awm.
11:15 Tupawh ram dang mi tana mawhphurtua insiam chuan lungngaihna a insiam ang a. Mawhphurtua insiam hawtu erawh chuan ngaihngam taka awmna a nei.
11:16 Hmeichhe tha chuan zahawmna a chang ang a, Pawng lâk ching miin sum a chang ang.
11:17 Zahngaithei mi chuan ama nunna atân tha a ti thin a, Mi nunrawng erawh chuan ama tisa buaina a thlen thin.
11:18 Mi suaksual chuan bumna hlawh a danwg thin a, Felna tuhtu erawh chua a taktak hlawh a dawng thin.
11:19 Felna nghet taka ding mi chuan nunna a chang ang a, Thil sual umtu chuan ama thihna.
11:20 Mi rilru kawhmawhte chu Lalpa tana tenawm an ni a, An kawnga mi fel famkimte erawh chu a lawmzawng an ni.
11:21 Inthurual mah sela, mi suaksualte chu hrem lohvin an chhuak lo vang a, Mi fel thlahte erawh chu chhan chhuahin an awm ang.
11:22 Hmeichhe hmêl tha ngaihruat thiamna nei lo chu Vawk hnara rangkachak khang vuah ang a ni.
11:23 Mi fel duhthusam chu thil tha chauh a ni a, Mi suaksual hmachhuan erawh chu thinurna a ni.
11:24 Sem darh chu pun lehzualna a ni a, Mamawh tawka liam kawmpui chu tlâkranna a ni.
11:25 Mi thilphal nunna chu tihthauvin a awm a, Tui leih thintu chuan mahni pawh a inleih a ni.
11:26 Buh kawmpuitu chu miin ânchhia an lawh ang a, A zuartu lu chungah erawh chuan malsawmna a awm ang.
11:27 thahnem ngai taka thâtna zawngtu chuan duhsakna a zawng a ni a, Pawikhawi tûr zawngtu erawh chu, ama chungah a thleng ang.
11:28 A sum ring mi chu a vuai ang a, Mi fel erawh chu hnim angin a duah ang.
11:29 Mahni chhûngkua tibuaitu chuan thli a rochung ang a, Mi â chu mi thinlung fing chhiahhlawhah a awm ang.
11:30 Mi fel rah chu nunna thing a ni a, Mi fing chuan mi rilru a hneh thin.
11:31 Ngai teh, mi fel mah leiah hian thungrulh an nih chuan, Mi suaksual leh thil tisualtu chu eng ang taka nasa lehzual ni ang maw!
12:1 Thunnuna ngaina mi chuan hriatna a ngaina thin a, Zilhhauna haw mi erawh chu ramsa ang mai a ni.
12:2 Mi tha chuan LALPA duhsakna a hlawh ang a, Suahsualna rilru pu mi erawh chu thiam loh a chantir ang.
12:3 Mihring chu suahsualnain tihngheh ani lovang a, Amaherawhchu mi fel dinhmun chu a nghing lo vang.
12:4 Hmeichhe khawsak tha chu a pasal tan lallukhum a ni a, Zahpuiawm tak thil ti erawh chu a ruh timawihtu a ni.
12:5 Mi fel ngaihtuahnate chu a fel a, Misuaksualte remruat erawh chu bumna a ni.
12:6 Misuaksual tawngkam chu thisen chhuah tûra channa a ni a, Mi dik tak ka erawh chuan anmahni a chhan chhuak ang.
12:7 Mi suaksualte chu paih thlakin an awm a, an bo thin a, Mi fel chhûng erawh chu an awm reng ang,
12:8 Mi â fin dan ang zela fakin a awm ang a, Mi luhlul erawh chu hmuhsit a ni ang.
12:9 Mahni inngaihlua chhâng pawh nei si lo ai chuan, Tuma ngaihsan loh chhiahhlawh nei chu a tha zawk.
12:10 Mi fel chuan a ran nuna a engto va, Nimahsela mi suaksual zahngaihna nem ber pawh hi a rawng a ni.
12:11 A lei lettu chuan chhâng a ngah ang a, Mi lelo tih dan zawmtu chu finna nei lo mi a ni.
12:12 Mi suaksualte chuan mi tha lote len an duh a, Mi felte bul erawh chuan rah an chhuah thin.
12:13 Mi sual chu ama hmuia chhuak ngeiin a awk thin a, Mi felte erawh chuan buaina an pumpelh.
12:14 Miin a tawngkam chhuak rah chu a seng ang a, Ama kut thiltih ngei chu a hnena hlan a ni ang.
12:15 Mi â kawng chu ama mitah chuan a dik a, Mi fing erawh chuan rorêl an ngaichang thin.
12:16 Mi â buaina chu a lang nghal a, Mi fing erawh chuan mualphona a thup thin.
12:17 Thu dik sawi chuan felna a entir a, Hretu dik lo erawh chuan bumna.
12:18 Khandaih chhun anga na taka mi chhun thu sawi an awm a, Mi fing lei erawh chu damna a ni.
12:19 Thu tak hmui chu kumkhuain tihngheh a ni ang a, Lei dawthei erawh chu rei lo te atân chauh a ni.
12:20 Thil tha lo suangtuahtue thinlungah chuan bumna a awm a, Remna rorêltute pawh chuan lawmna an nei.
12:21 Mi felte chungah chuan pawi khawihna a thleng lo vang a, Mi suaksualte erawh chu thl tha lovin an khat ang.
12:22 Hmui dawthei hi LALPA tenzawng tak ani a, Dik taka titute erawh chu a lawmzawng an ni.
12:23 Mi fing chuan fina a thup a. Mi â thinlung erawh chuan âtna a puang.
12:24 Mi taima kut chuan rorêlna a keng ang a, Mi thatchhia erawh chu hna rim tak thawk tûra tih a ni ang.
12:25 Lungkham neih hian mi â tihreawm a, Thu tha erawh hchuan mi â tilawm thin.
12:26 Mi fel chu a thenawm tan hruaitu a ni a. Mi suaksualte kawng erawh chuan bona a thlensak thin.
12:27 Mi thatchhia chuan ramvaka a kah rawh tûr a nei lo. Mihring sum hlu chu taihmak a ni.
12:28 Felna kawngah chuan nunna a awm a, Chu mi kawngah chuan thihna a awm lo.
13:1 Fapa fing chuan a pa thununna a pawisa thin a, Hmusit ching mi erawh chuan zilhhauna a ngaithla duh thin lo.
13:2 Mi tha chuan a kaa thu chhuak rah a dawng a, Bum hmangte duhzawng erawh chu tharum thawh a ni.
13:3 A ka veng tha chuan a nunna a veng tha a ni a, A ka zau tkaa ang erawh chuan boralna a chang ang.
13:4 Mi thatchhe rilru chuan thil a duh thin a, nimahsela engmah a nei chuang lo va, Mi taima rilru erawh chu tihtlai a ni ang.
13:5 Mi fel chuan dawt a hua a, Mi suaksual erawh chu a renawm a, mualphona a thlen thin.
13:6 Felna chuan dik taka awmte chu a veng thin a, Suahsualna erawh chuan mi sual a theh tlu thin.
13:7 Hausaa ingnai engmah nei lo an awm a, Retheia inngai hausa hle si an awm.
13:8 Mi hausa chuan intlanna a nei a, Mi rethei erawh chuan a nei ve lo.
13:9 Mi fel eng chu a eng tha hle a, Mi suaksual khawnvar erawh chu tihmih a ni ang.
13:10 Chapona chuan inhauna mai a tichhuak a, Thununna tha mi hnênah erawh chuan fina a awm.
13:11 Engmah lo mai maia sum deh chhuah chu tihriral a ni ang a; Thawhrimna khawl erawh chu a pung ang.
13:12 Beiseina tihkhawtlai hian thinlung a tina a, Duhthusam lo thleng erawh chu nuna thing a ni.
13:13 Thu chu ngai nep apiang chuan boralna an inthlen ang a, Thupêk tih apiang erawh chu lawmna pêk a ni ang.
13:14 Mi fingte zirtirna chu nuna tuikhur a ni, Thihna thang hawisanna tûrin.
13:15 hriatna tha chuan duhsakna a dawntir a, Mi vervek kawng eawh chu a bumboh.
13:16 Remhria zawng zawngin finnain an thawk a, Mi â erawh chuan âtna a zar darh thin.
13:17 Zualko suaksual chu thil sualah a tlu lut thin a, Palai rinawm chu damna a ni.
13:18 Thununna duh lotu chungah chuan pachhiatna leh mualphona a thleng ang a, Zilhhauna ngaisângtu erawh chu chawimawi a ni ang.
13:19 Duhthusam puitlina a lo awm chu rilru atân a thlum a, Mi âte tan chuan sual kalsan hi thil tenawm a ni.
13:20 Mi fing pâwl la, i lo fing ang a, Mi â pâwl erawh chu hrehawm tûra phahna a ni.
13:21 Thil sualin mi sual chu a zui zel thin a, Mifel erawh chu thil thaa thungrulh a ni ang.
13:22 Mi tha chuan a tute thlenga rochun tûr a hnutchhiah thin a, Mi sual sum chu mi fel tan khawlkhawm a ni.
13:23 Mi rethei leilehah chuan hchaw tam tak a awm a; Nimahsela rorêl dik lo awmna chu tihchhiatin a awm thin.
13:24 Tiang hmang duh lo chuan a fa a hua a ni, A hmangaihtu erawh chuan a thunun chawt thin.
13:25 Mi fel chuan a rilru tihtlai nân a ei thin a, Mi suaksual pum erawh chuan a tlachham ang.
14:1 Hmeichhe fing zawng zawngin in an sa a, A â erawh chuan anmahni kut ngeiin an thiat thin.
14:2 Dik taka awm mi chuan LALPA a tih a, Mi tihmawh erawh chuan a hmusit a ni.
14:3 Mi â kaah chuan chapona tiang a awm a, Mi fingte ka erawh chuan anmahni a hum thin.
14:4 Bâwngpa awm lohnaah chuan bawng chaw dahna a fai thin a; Amaherawhchu pun hle-na chu bâwngpa thahruiah a awm.
14:5 Hretu dik chu a daw lo vang a, Hretu dik lo erawh chuan dawt a phuh chhuak thin.
14:6 Hmusit ching mi chuan finna a zawng a, a hmu thin lo va; Hriat thiamna neitu tan erawh chuan fina hi awlsam tak a ni.
14:7 Mi â hnên ata chu kal chhuak rawh, Amahah chuan hriatna ka i hmu lo vang.
14:8 Remhre finna chu mahni awm dan hriat hi a ni a, Mi âte âtna erawh chu bumna a ni.
14:9 Mi âte chuan thiam loh channa hi an ngai lelo va, Mi dik zingah erawh chuan duhsakna tha a awm,
14:10 Mahni lungngaihna mahni chau hriat ani a, A lawmna pawh mi dangin an hriatpui lo.
14:11 Mi suaksual in chu tihchhiat a ni ang a, Mi dik puan in erawh chu a vul ang.
14:12 Mi ngaiha kawng dik ni awm taka lang A tawp chu thihna kawng ni si a awm.
14:13 Nuihnaha pawh rilru lungngaihna a awm a, Hlim tawpna chu rihna a ni.
14:14 Thinlunga hnungtawlh mi chu ama duh danin a khat ang a; Mi tha chu amah leh amah a intilungawi ang.
14:15 Mi mâwl chuan thu tin a ring a, Mi remhria erawh chuan a kalna a en tha thin.
14:16 Mi fing chuan a hlauthawng a, sual a kalsan thin a; Mi â erawh chu a intihuai a, mahni a inring thin.
14:17 Thinram mi chuan atthlak takin thil a ti ang a; Tin, thil sual suangtuah hmang mi chu huat a ni.
14:18 Mi mawl chuan âtna an rochung a, Mi remhria erawh chuan hriatna khumtirin a awm.
14:19 Sual chu mi tha hmaah a kun a, Mi suaksual chu mi fel kawngka bulah.
14:20 Mi rethei chu a thenawmte ngei pawhin an hua a, Mi hausa erawh chuan thian tam an nei.
14:21 Tupawh thenawmte hmusit chuan thil a tisual a ni; Mi rethei lainattu erawh chu a eng a thawl e.
14:22 Thil tha lo suangtuahtute chuan an tisual a ni lâwm ni? Thil tha suangtuah mi-ah erawh chuan zahngaihna leh thutak a awm ang.
14:23 Thawhrimna zawng zawngah hia hlawkna a awm a, Ka sawi mai mai erawh chuan tlakranna mai a thlen a ni.
14:24 Mi fing lallukhum chu a sum ani a, Mi âte âtna chu âtna ngawt a ni.
14:25 Hretu dik chuan mite a chhanchhuak a, Dâwt chhak chhuak mi chuan bumna a tichhuak thin.
14:26 LALPA tihnaah chuan rina chak tak a awm a, A fate chuan inhumhimna hmun an nei ang.
14:27 LALPA tihna chu nunna tuikhur a ni. Thihna thang hawisanna tûrin.
14:28 Mipui tamnaah chuan lal ropuina a awm a, Mi tlêmnaah erawh chuan lal fapa boralna a awm.
14:29 Thinur har mi chu finna nasa tak nei mi a ni a, Mi ti thawt thawt erawh chuan âtna a chawimawi.
14:30 Rilru dam chu tisa nuna a ni a, Itsikna erawh chu ruh mawihna a ni.
14:31 Mi rethei hnehchiahtu chu a siamtu hnehchhiah a ni a, Tlachhamte khawngaihtu chuan a chawimawi a ni.
14:32 Mi suaksual chu a thiltih sualah chuan theh luh a ni a, Mi fel erawh chuan a thihnaah nghahfâk a nei.
14:33 Ngaihthiamna nei mi thinlungah chuan finna a cheng thin a. Mi â chhûng lama awm erawh chu alang sa reng.
14:34 Felnain hnam a chawimawi a, Sualna erawh chu hnam tin, tan hmingchhiatna a ni.
14:35 Lal duhsakna chu fing taka titu chhiahhlawh chungah a awm a, A thinurna erawh chu mualphona thlentu chungah a awm ang.
15:1 Chhânna nemin thinur a tikiang thin a, Tawng huatthlala erawh chuan thinur a chawk tho thin.
15:2 Mi fing lei chuan fina thu dik a chhakchhuak thin a, Mi â ka erawh chuan thu atthlâk a chhak chhuak thin.
15:3 LALPA mit chu hmun tinah a awm a, Thil tha lo leh tha a enthla reng thin.
15:4 Lei dik tak chu nunna thing a ni a, Luhlulna awmna erawh chu thinlung lungchhiatna a ni.
15:5 Mi â chuan a pa thununa a ngainep thin a, Zilhhauna ngaisâng chuan hmang hre takin a ti thin.
15:6 Mi fel inah chuan sum tam tak a awm a, Mi suaksual hlawkna erawh chu buaina a ni.
15:7 Mi fing hmui chuan hriatna a tidarh a, Mi â thinlung erawh chuan chutiang chu a ti lo.
15:8 Mi suaksual inthawina chu LALPA tana tenawm a ni; Mi tah tawngtaina erawh chu a lawmzawng a ni.
15:9 Mi suaksual kawng chu LALPA tnaa tenawm ani a, Felna kawng zawhtu erawh chu a hmangaih thin.
15:10 Kawng pensantu thununa chu a nâ Zilhhau hawtu chu a boral ang.
15:11 Seol leh Abadon LALPA a hmu tlang a, Mihring thinlung chu a va hmu chiang dawn êm!
15:12 Hmusit ching mi chuan zilhhauva awm a ngaina lo va, Mi fing hnênah chuan a kal duh lo vang.
15:13 Thinlung hlimin hmêl hlim a siam a, Thinlung lungngaihna erawh chuan rilru a tilungchhe thin.
15:14 Hriathiamna thinlung neitu chuan hriatna a zawng a, Mi â ka erawh chu dawtin a inhrai thin.
15:15 Hrehawm tuartu tan ni zawng zawng mai hi a tha lo vek a, Thinlung hlim mie rawh chuan ruai a theh reng mai a ni.
15:16 LALPA hlauhna nên tlemte neih chu Tam tak neiha buaina neih ai chuan a tha zawk.
15:17 Hmangaihna awmnaa an hnah chawa rin chu Huâtna awmnaa bâwngpa chawm thau ei aiin a tha zawk.
15:18 Mi thinchhia chuan inhauna a chawk tho va, Mi thluak nem erawh chuan inhauna a tireh.
15:19 Mi thatchhe kawng chu hlingpal ang a ni a, Mi tluang kawng chu lamliana siam a ni.
15:20 Fapa fing chuan pa hlim a siam a, Mi â erawh chuan a nu a ngainep thin.
15:21 Finna nei lote chuan âtna hi an hlimna a ni a, Mi thil hre thiam mi erawh chuan a kawng a tingil thin.
15:22 Remruat lawk lova thil tih a hlawhtling duh lo. Remhria an tam chuan a hlawhtling thin;
15:23 A hun taka chhanna dik hriat hi A va lawmawm êm!
15:24 Mi fing tan chuan nunna kawng hi a chung lamah a kal a, Hnuai lama Seol chu a kalsan theih nân.
15:25 LALPAN mi chapo in chu a kar phawng ang a, Hmeithai hmun erawh chu a tinghet ang.
15:26 Remruâtna tha lo chu LALPA tana thil tenawm ani a, Mi thianghlim thu erawh chu benglut a ni.
15:27 Mi duham chuan ama chhûngkua a tibuai thin a, Tham hawtu erawh chu a hmuingil ang.
15:28 Mi fel thinlung chau ngun takin a chahng a, Mi suaksual ka erawh chuan thil tha lo a chhak chhuak thin.
15:29 LALPA chu mi suaksual lakah chuan a hla a, Mi fel tawngtai erawh chu a ngaithla thin.
15:30 Hlim hmêlin mi â tilawm a, Chanchin lawmawmin mi a tiharh.
15:31 Nunna zilhhauna pawm thin chu Mi fing zingah a tel ang.
15:32 Thununna duh lo chuan a thlarau a ngainep a ni, Zilhhauna pawm erawh chuan hriat thiamna a chang ang.
15:33 LALPA tihna chu fina zirtirtu ani a; Inngaihtlâwmna chu chawimawia awmna a ni.
16:1 Rilru lo ruahman lawkna chu mihring chan a ni a, Lei chhanna erawh chu LALPA atangin a ni.
16:2 Mi ama ngaihin a kawng zawng zawng a thianghlim a; Nimahsela LALPAN rilrute a bûk thin.
16:3 I hnate chu LALPA kawltir rawh. Tichuan i thil ruahmante chu tihnghehin a awm ang.
16:4 LALPAN thil zawng anwg hi chhan nei theuhvin a siam a, A ni tak e, mi suaksulate pawh hi ni tha lo atân.
16:5 Thinlunga chapo apiangte chu LALPA tana tenawm an ni; Inthurual mah se, hrem lohvin chhuah an ni lo vang.
16:6 Zahngaihna leh thutakin khawlohna chu tlenfai a ni a, LALPA tihnain miin sual a kalsan thin.
16:7 Mi, a awm danin LALPA a tihlawm chuan, A hmêlma nên lam inremin a awmtir thin.
16:8 Fel lo taka deh chhuah tam tak ai chuan Fel taka deh chhuah tlemte a tha zawk.
16:9 Mihring rilruin a kawng a ruahman a, A ke pen erawh chu LALPAN a hruai thin.
16:10 Lal kaah chuan Pathian thu tihtluk a awm a; A ka chuan a rêl sual lo vang.
16:11 Bûkna leh tehna dik hi LALPA ta a ni a, Ip rihzawngte chu a ngaihtuah thin.
16:12 Suahsualna thilti hi lalte tan tenawm ani a, Lalthutthleng chu felnaa tihngheh a ni si a.
16:13 Ka fel chu lal lawmna a nai a, Thu dik sawi chu an ngaina thin.
16:14 Lal thinurna chu thihna zualko ang ani a, Mi fing erawh chua a ne dai ang.
16:15 Lal hmêl êngah chuan nuna a awm a, A duhsakna chu ruahtui tla hnuhnung chhum ang a ni.
16:16 Rangkachak ai chuan finna neih hi a va tha nasa zawk êm! A ni, tangka ai chuan hriat thiamna chu thlan zawk tûr a ni.
16:17 Mi tluangte lamlian chu sual kalsan a ni; A kawng veng tha chuan a nunna a humim a ni.
16:18 Chapona chu boralna hmaah a kal a, Rilru intivei chu tlukna hmaah.
16:19 Mi chapote nên râllâk thil insem ai chuan Mi retheite nena mi rilru thuhnuairawlh mi nih a tha zawk.
16:20 Thu chik taka dawn mi chuan thil tha a dawng ang a, LALPA ring apiang chu an nihlawh a.
16:21 Rilrua fing chu mi remhria tih an ni ang a, tawngkam thlumna chuan thiamna a tipung.
16:22 Hriat thiamna hi a neitu tan chuan nuna tuikhur a ni a, Mi âte tan erawh chu thununna chu an âtna a ni.
16:23 Mi fing thinlung chuan a ka a zirtir thin a, A hmuiah thiamna a belhchhah thin.
16:24 Thu pai nuam chu khawithlar ang a ni a, Nunna âtna a thlum a, ruh tan hriselna a ni.
16:25 Mi ngaiha kawng dik ni awm taka lang, A tawp chu thihna kawng ni si a awm.
16:26 Hnathawk mi chu ei tûr avângin a rim a, A riltam reh nân a thawk rim thin.
16:27 Mi tlâktlai lo chuan pawi khawih tûr angaihtuah chhuak a, A kâah mei sa tak a awm.
16:28 tawng chaltlai mi chuan inhauna a theh darh a. Sesea thu sawi hmangin thian bulte a tithen thin.
16:29 Mi nunrawngin thenawmte a hruai sual thin a, Kawng tha lovah a hruai thin.
16:30 A mit maimitchhing chuan thil tha lo suangtuah nân a ti a ni a, A heh pettu chuan thil tha lo a thlen thin.
16:31 Lu tuak chu ropuina lallukhum a ni a, Felna kawngah hmuh a ni ang.
16:32 Mi thinnel chu mi chak aiin a tha zawk a. A rilru thunun hneh chu kaw latu aiin
16:33 Mal chungah thum an vawr a, Thil lo chhuak erawh chu LALPA tih a ni.
17:1 Insual bur bura ruaithehna in ai chuan Inrem taka chaw thing bâr khat eina a tha zawk.
17:2 Chhiahhlawh fing taka che chuan fapa, mualphona thlentu chungah chuan ro a rêl ang a, Unau ro zingah chanvo a nei ang.
17:3 Tihthianghlimna bel chu tangkaraw tan ani a rawhtuina chu rangkachak tan a ni a, Thinlung erawh chu LALPAN a fiah thin.
17:4 Thil tha lo titu chuan mi suaksual kamchang a bengkhawn thin a, Mi dawthei chuan pawikhawih hmang lei lamah beng a chhi thin.
17:5 Mi rethei hmusittu chuan a Siamtu a ngai nep a ni a, Mi vanduaina diriamtu chu hrem lohvin a awm lo vang.
17:6 Tu leh fate hi upate lallukhum an ni a, Fanaute ropuina chu an pate hi an ni.
17:7 Thu sawi ropui leh mi â a inmawi lo va, Hmui dawthei leh lal fa a inmawi lo lehzual.
17:8 A dawngtu mitah chuan thilpêk chu lunghlu ang a ni a, A hawina lam apiangah a hlawhtling thin.
17:9 Bawhchhiatna thuptu chuan inhmangaihna a zawng a, Thil sawi sawi hmang chuan thian bulte a tithen thin.
17:10 Mi â chunga vawi za vuak aiin Mi fingah chuan vawi khat zilhhauna pawh a lût thûk zawk.
17:11 Mi tha lo chuan helna ngawt a zawng thin a, Chuvangin a chungah zualko nunchhia tirh a ni ang.
17:12 Mi â ât lai tawh ai chuan Savawm, a no lâksak daih tawh a duhawm zawk.
17:13 thâtna suala thungrultu chu Thil tha lovin a in a chhuahsan lo vang.
17:14 Inhnial hi tuikhuah hnam tir ang a ni a, Chuvangin insualna a awm tan hmain inhnial bâng rawh.
17:15 Mi suaksual thiamtu leh mi fel thiam lotu chu LALPA tan angkhat rengin an tenawm ve ve.
17:16 Hriat thiamna nei si lo mi â kutah chuan Engah nge finna leina tûr man a awm ni?
17:17 thian chuan englai pawhin a hmangaih reng a, Mangan ni atâna unauva piang a ni.
17:18 Hriatna nei lo mi chuan a kut a beng a, A thenawmte hmaah mawhphurtuah a insiam thin.
17:19 Insual ngaina mi chuan bawhchhiatna a ngaina thin a, A in hung kawngkhâr tisâng chuan boralna a zawng thin.
17:20 Rilru luhlul nei mi chuan thil tha hmu thin lo va, Tin, lei bengtla lo neitu chu pawi khawihnaah a lût thin.
17:21 Mi â hringtu chuan ama lungngaihna a thlen thin a, Mi â pa chuan lawmna a nei lo.
17:22 Thinlung hlim hi damdawi tha tak a ni a, Thinlung lungchhia erawh chuan a ruh a tiro thin.
17:23 Mi suaksual chuan rorêlna kawngte tikawi tûrin Mi kut ata thiamna a la thin.
17:24 Finna chu hriat thiamna neitu hmaah a awm thin a, Mi â mit erawh chu kawlkilah a awm thin.
17:25 Fapa â chu a pa tilungngaitu a ni a, A hringtunu tan a kha a ni.
17:26 Mi fel hrem chu a tha lo va, Mi tha, an thatna avânga vuak a tha bawk hek lo.
17:27 A thu sawia insum thin chuan fina a nei a, Rilru dam mi chuan hriat thiamna a nei a,
17:28 Mi â pawh hi a ngawih reng chuan mi finga chhiar a ni a, A hmui a chip chuan mi remhriaa ngaih a ni.
18:1 Mi inkulh hrang mi chuan mahni duhzawng a zawng thin a. Finna dik zawng zawng a tai thin.
18:2 Mi â chuan hriatnaah lawmna a nei lo, Ama rilruin a tihlan chauh lo chu.
18:3 Suahsualna a lo awmin hmustina pawh a lo awm thin, Mualphona a lo awin zilhhauna.
18:4 Mi â kaah thu chu tui thûk tak ang, Finna lui, lui luang ang a ni a.
18:5 Mi suaksual duhsak chu a tha lo va, Rorêlnaa mi fel hnawl chu a tha bawk hek lo.
18:6 Mi â hmui chuan inhauna a thlen a, A ka chuan vuakna a ko.
18:7 Mi â ka chu a boralna a ni a, A hmui chu a nunna thang a ni.
18:8 Sesea thu sawi hmang mi thu chu chaw tui tak ang a ni a, Pum chhûngril berah a lût thin.
18:9 A hnathawha mi dawngdah pawh Tiboraltua unaupa a ni.
18:10 LALPA hming chu kulpui a ni a, Mi fel chu a tlan lût thin a, a him thin.
18:11 Mi hausa chuan a sum chu a kulhpui a ni a, A suangtuah danah chuan kulh sâng tak a ni.
18:12 Mihring rilru chapona chu boralna hmaah a kal a, Inngaihtlâwmna chu chawimawina hmaah.
18:13 Ngaihthlâka hmaa chhan chu A tan âtthlak nihna leh mualphona a ni.
18:14 Mi rilru nei chuan a chak lohna chu a tuar zo ang a, Mahse rilru hliam chu tunge tuar thei ang?
18:15 Remhre thinlung chuan hriatna a dawng thin a, Mi fing beng chuan hriatna a zawng thin.
18:16 Mi â thilpêkin kawng a tihkuaksak a, Mi ropuite hmaah a hruai lut thin.
18:17 A thiamna thu sawi hmasatu chu felin a lang thin a, Mahse a thenawmte an lo kal a, an rawn tilang thin.
18:18 thumvâwrin inhauna a tibang a, Mi chakte a tithen thin.
18:19 I unau pui la, kulhpui angin a hum ang che; In inhau erawh chuan, a inkhar hnan ang che.
18:20 Miina pumpui chu a ka rahin a tikhat ang a, A kaa thil hawngin a titlai ang.
18:21 Lei thiltihtheihnaah chuan thihna leh nunna a awm a, A ngainatute chuan chu mia rah chu an ei ang.
18:22 Nupui hmu chuan thil tha a hmu a ni, LALPA duhsakna a chang thin.
18:23 Mi rethei chuan a thlemin an them a, Mi hausa erawh chu rura takin an tawng thin.
18:24 Thian tam tak siam chuan mahni intihchhiatna a siam a ni a, Amaherawhchu unau aia nghet zawk thian an awm thin.
19:1 Mi, a hmuia tihmawh, â bawk si ai chuan Mi rethei, rilru tha tak pua awm chu a tha zawk
19:2 hriatna lova duhna ngawt pawh a tha lo va, Ke chhep rang ringawt chu a kal sual thin.Mi â âtnain a kawng a tihchhiatsak thin a,
19:3 Mi â âtnain a kawng a tihchhiatsak thin a, A rilru LALPA chungah a vui thin.
19:4 Sumin thian tam tak a neih belhtir a, Mi rethei erawh chu thianten an thlauthla ang.
19:5 Hretu der chu hrem lohvin a awm lo vang a, Dawt sawi chu a chhuak lo vang.
19:6 Mi tam takin mi thilphal duhsakna an ngen ang a; Thil pe thintu lakah chuan mi tin, mai hi thian an ni.
19:7 Mi rethei unaute zawng zawng chuan an vai huat thin a, thian maite chu a lakah an va hla lehzual dawn êm! Thuin a um a; nimahsela an kal daih tawh.
19:8 Fina dawngtu chuan ama nunna a hmangaih thin a, Hriatna vawngtu chuan thil tha a hmu ang.
19:9 Hretu der chu hrem lohvin a awm lo vang a, Dawt sawi chu a boral ang.
19:10 Nunkhaw nawm chu mi â nên a inhmeh lo va, Chhiahhlawhin lal fate chunga rorêl chu a inhmeh lo lehzual.
19:11 A ngaihruat thiamnain mi â thin a tihnelsak thin a, Bawhchhiatna haider chu a ropuina a ni.
19:12 Lal thinrim chu sakeibaknei rum ang a ni a, A duhsakna erawh chu hlobet chunga dai ang a ni.
19:13 Fapa a chu a pa vanduaina a ni a, Nupui an thinna chu englai pawha far reng ang a ni.
19:14 In leh sum leh pai chu pate laka roluah a ni a, Nupui remhria erawh chu LALPA laka mi â ni.
19:15 Dawngdahnain tui taka mutnaah a tilut a, Mi thatchhia chuan rilram a tuar ang.
19:16 Thupêk vawng tha chuan a nunna a vawng tah a ni a, A awm dana fimkhur lo erawh chu a thi ang.
19:17 Mi rethei khawngaih chan LALPA a puktir a ni a, A thiltih that chu a rul ang.
19:18 Beiseiawm a la nih laiin i fapa chuthunun la, Boral mai tûrah ngai suh.
19:19 Thinur tinasa mi chuan hrem a tuar ang, I chhanchhuah pawhin, chhanchhuah leh thin a ngai ang.
19:20 Atawp atawpa i lo fin theih nân zilhna pawm la, Thunnunna pawisa rawh.
19:21 Mihring thinlungah suangtuahna tam tak a awm a; LALPA remruat erawh chu a pangngai reng ang.
19:22 Mi â duhthusam chu a ngilneih dan tehna a ni a, Mi dawthei ai chuan mi rethei a duhawm zawk.
19:23 LALPA tihna chuan nunna a thlen a, A nei piang chu lungawi takin an awm ang a, Thil tha lo tlâkbuakin a awm lo vang.
19:24 Mi thatchhia chuan a kut thlengah a hnim a, A ka han thlen leh takngial pawh a peih lo.
19:25 Hmusit ching mi chu vua la, Tichuan mi mawlin remhriat a zir ang a; Ngaihthiamna nei chu zilh la, a hre thiam ang.
19:26 Pate tirethei a, nute hnawt chhuak chu Fapa, mualphona thlen a, hming chhiatna thlentu a ni.
19:27 Ka fapa, thil tidik lo tûra Finna zirtirna thu ngaihthlâk chu bang rawh.
19:28 Thuhretu tlâktlai lo chuan rorêlna ahmusit a ni a, Mi suaksual ka chuan khawlohna a lem.
19:29 Rorêlna chu hmusit chingtute tana buatsaih a ni a, Vuakna chu mi â hnungzang atân.
20:1 Uain hi nuihzatbura mi siamtu a ni a, zupui hi insual bung bungna a ni; Chu mi buma awmte chu an fing lo a ni.
20:2 Lal vauna chu sakeibaknei rum ang a ni a, Tupawh a thin tiur chu mahni nunna chunga thil tisual an ni thin.
20:3 Intihbuaina ata lo inthiarfihlim hi thil duhawm a ni a, Mi â apiangte chu an insual thin.
20:4 Mi dawngdah chuan thlasik avângin lei a let peih lo va; Chuvang chuan buh seng laiin kut a dawh ang a, engmah a nei lo vang.
20:5 Remruâtna chu mihring thinlungah tui thuk tak ang a ni a; Nimahsela hriat thiamna nei chuan a phawrh chhuak ang.
20:6 Rinawm tak niin an insawi theih a, Rinawm tak tak tunge hmu thei ang?
20:7 Mi fel, ama remruat thiama awm mi fate chu an nihlawh e.
20:8 Rorêlnaa lal thu chuan A mitin thil tha lo zawng zawng a tibo thin.
20:9 "Ka thinlung ka tithianghlim a, Ka sual lakah ka thianghlim," tunge ti thei?
20:10 Bukna dang dang te, tehna dang dangte hi LALPA mithmuhah angkhat rengin thil tenawm a ni ve ve.
20:11 Naupang takngial pawh a thiltihin a intilang thin, A thiltih chu a thianghlim leh a dik emawin.
20:12 Hriatna beng leh hmuna mit hi LALPA siam ve ve a ni.
20:13 Mut thlahlel suh, i lo pachhe dah ang e; I mit meng la, tichuan chhâng kham khawp i nei dawn nia.
20:14 "Engmah a nih loh hi, engmah a nih loh hi," thil leitu chuan a ti thin a, A kal hnu chuan a chhuang leh viau si thin.
20:15 Rangkachak te a awm a, lunghlu sente pawh a tam a; hriatna hmui erawh chu lungmawi hlu tak a ni.
20:16 Hnam dang tana mawhphurtua inpe silhfen chu la la, Tin, hnam dang tana inpe chu hrengah hmang rawh.
20:17 Bumna chhagn chu miin tui a ti a, Mahse a hnuah a ka chu lungtein a khat ang.
20:18 Mi rawnin i thil tum chu buk la. Fel taka relin hmêlma bei rawh.
20:19 Mi kamtam tei vêl ruai chuan thurukte a tilang thin a; Chuvangin a ka zau taka ang chu pâwl suh.
20:20 A nu emaw, a pa emaw ânchhe lawhtu chu, Thimtham lai berah a khawnvar tihmihsak a ni ang.
20:21 Sum hi atirah deh chhuah thuai theih mah sela, A tawpah malsawm a ni kher lo vang.
20:22 "Sual chu ka thungrul teh mai ang," ti suh la, LALPA ngaichang rih la, ani chuan a chhanhim ang che.
20:23 Bukna dang dang hi LALPA mithmuhah thil tenawm a ni a, Khin dik lo hi a tha lo a ni.
20:24 Mihring kawngte chu LALPA ruat a ni a, Engtin nge mihringin a kawng an hriat theih ang?
20:25 Pathian tan thil pe tûrin intiam thut suh I inchhiar leh dah ang e.
20:26 Lal fing chuan mi suaksualte a zap kiang a, An chungah sisep a ruai thin.
20:27 Mihring rilru chu LALPA khawnvar a ni a, Pumpui chhungril lam zawng zawng pawh a en chhuak thin.
20:28 Zahngaihna leh thutakin lal a vawng tha a, A thutthleng chu zahngaihnaa tundinin a awm.
20:29 Tlangvâlte ropuina chu an chakna a ni, Putarte mawina chu an lu tuak a ni,
20:30 Pem khawpa vuakna chuan thil tha lo a tleng fai a, Vuakna chuan pumpui chhûngril lamte pawh a fan.
21:1 Lal thinlung chu LALPA kutah a awm a, tui luanna kawng angin, A duh duhnaah a tikawi thin.
21:2 Mi tin an awm dan hi mahni mitah chuan dik tih a ni a; Nimahsela LALPAN thinlung a buk thin.
21:3 Inthawina aiin dik tak leh fel taka rorêl chu LALPA tan a pawmawm zawk.
21:4 Mi indah chung leh rilru chapo, Mi suaksual khawnvar hi sual a ni.
21:5 Mi taima ngaihtuahna chuan neihnunna lam chauh a pan a. Mi thatchhia erawh chuan tlakchhamna lam chauh a pan a ni.
21:6 Lei dawthei hmanga sum deh chhuah chu Chhum thli chhem len chhem len a ni; a zawngtu chu thihna zawng a ni.
21:7 Mi suaksualte nunrawnna chuan anmahni a hnawl bo vang. Rorêlna fel an duh loh avângin.
21:8 Thiam lohna phurtu kawng chu a kawi êm êm mai a, Mi thianghlim erawh chu a thiltih a ngil a ni.
21:9 Hmeichhe inhau hmang tak nena in zau taka awm ai chuan In chung chhip kila awm a tha zawk.
21:10 Mi suaksual rilru chuan thi tha lo a duh a, A thenawmten a mitah duhsakna an hmu lo.
21:11 Hmusit ching mite hrema an awmin mi mawlte chuan an fin phah a; Tin, mi fing chu zirtira a awmin hriatna a dawng thin.
21:12 Mi fel chuan mi suaksual chhûngkuate a ngaihtuah thin a, Mi suaksualte an chhiatna tûra thehthang bo an nihzia te.
21:13 Mi rethei au thawma beng chhu ngawng chu, Ani pawh a au vang a, nimahsela ngaihthlâksak a ni bik lo vang.
21:14 A rûka thilpêkin thinur a tireh a, An chhûnga thilpekin thinrim nasa tak.
21:15 Rorêl fel hi mi fel lawmna a ni a, Khawlohna titu tan erawh chuan boralna a ni.
21:16 Hriatna kawng ata kal bo chu Mitthi awm khâwm zingah a chawl ang.
21:17 Nawmsakna thlahlel chu mi rethei a ni ang a, Uain leh hriak ngaina mi chu an hausa lo vang.
21:18 Mi suaksual chu mi fel tlanna an ni ang a, Mi bumhmang chu mi dik tak tlanna.
21:19 Hmeichhe an hmang leh phunchiar nena awm ai chuan Thlalêr rama awm a tha zawk.
21:20 Mi fing awmnaah chuan ro leh hriak hlu tak a awm a, Mi â erawh chuan an dawlh mai thin.
21:21 Felna leh zahngaihna zuitute chuan Nuna te, felna te, chawimawinate an hmu ang.
21:22 Mi fing chu mi chak khawpuiah a lo awm a, Chu mia na rinpui ber chakna chu a lak thlâksak thin.
21:23 Tupawh a ka leh a lei veng tha chuan Manganna lakah a nuna a veng tha a ni.
21:24 Mi chapo leh mi intivei chu a hming Hmusittua a ni; Inngaih ropui chaponain thil a ti thin.
21:25 Mi dawngdah duhthusam chuan amah a tihlum thin, A kutin hnathawh aduh loh avnaign.
21:26 Nilenga duham taka awh nei an awm a; Mi fel erawh chuan a pe a, engmah a sum lo.
21:27 Mi suaksual inthawina chu thil tenawm ani a, Rilru sual nena a rawn lak chu a va tenawm lehzual dawn êm!
21:28 Hretu der chu a boral ang a; Nimahsela hretu dik chuan tuma dodal lohvin thu a sai ang.
21:29 Mi suaksualin a hmêl a tiruh a, Mi fel erawh chuan a kawng a rel fel thin.
21:30 LALPA kalhzawng finna te, hriatna te, Remruatnate a awm lo.
21:31 Sakawr chu indo ni atân buatsaih a ni a, Hnehna erawh chu LALPA ta a ni.
22:1 Sum tak tak aiin hming tha hi thlan zawk tûr a ni a, Tangka leh rangkachak aiin duhsakna a ngainatawm.
22:2 Mi hausa leh mi rethei an awm za a, An vaia siamtu chu LALPA a ni.
22:3 Mi hmanghria chuan thil tha lo chu a hmuhin a biru thin a; Mi mawl erawh chuan a tawn mai thin a, a tuar phah thin.
22:4 Inngaihtlâwmna leh LALPA tih man chu Sum te, chawimawina te, nunna te a ni.
22:5 Mi bengtla lo kawngah chuan hling te, thangte a awm a, A nunna vawng tha chuan a hlat daih ang.
22:6 Naupang chu a kalna awm kawngah chuan zirtir ula, A upa hun pawhin a thlah lo vang.
22:7 Mi hausain mi rehtei ro an relsak a; Tin, pûktu chu apuktirtu chhiahhlawh a ni.
22:8 Khawlohna tuhtu chuan vanduaina a ât ang a, A thinurna talhtum chu a hlawhchham ang.
22:9 Mi thilphal chu malsawmin a awm ang, A chhâng mi rethei a pêk thin avângin.
22:10 Hmusit chin gmi chu paih chhuak ula, inhnialna chu a kiang ang, A ni, insualna te, inrunluinate a reh ang.
22:11 Thinlung thianghlimna ngaina chuan A tawngkam chhuak mawi avângin lal chu a thian a ni ang.
22:12 LALPA mit chuan hriatna nei mi chu a vawng tha thin a, Mi vervek thu erawh chu a paihthlaksak thin.
22:13 Mi thatchhia chuan, "Pawnah sakeibaknei a awm a, Kawtthlêrah ka tualthi ang," a ti.
22:14 Hmeichhe sual ka chu khuarkhurum thuk tak a ni, LALPA huatzawngte chu chutah chuan an tla ang.
22:15 Naupang thinlungah chuan âtna a bet tlat a, Mahse thununna tiangin hla takah a hnawt kiang ang.
22:16 A hlawkna tûra mi rethei hnehchhiah leh. Mi hausa tlawntu chuan tlâkranna mai a thlen ang.
22:17 I beng chhi la, mi fing thu ngaithla rawh; Tin, i thinlung chu ka finna dâwn nân hmang rawh.
22:18 I thinlung chhûnga i vawn a, I kaa i tihngheh bawk chuan thil duhawm tak a ni.
22:19 I rinna chu LALPA chungah a awm theih nân Vawiinah hian i hnên ngeiah ka hriattir che a ni.
22:20 ,21 I thutak nghehzia hriattir tûr che leh A rawn petu che hnêna thutak chu i letpui theih nân Remruat dan leh hriatna tha tak ka ziahsak che a ni lâwm ni?
22:21 ,20 I thutak nghehzia hriattir tûr che leh A rawn petu che hnêna thutak chu i letpui theih nân Remruat dan leh hriatna tha tak ka ziahsak che a ni lâwm ni?
22:22 Mi rethei chu rawk suh, a rethei si a, Kulh kawngkaah mi lungngaite hnehchhiah hek suh:
22:23 LALPAN an thu a sawipui dâwn si a, Anmahni rawktute nuna chu a rawk dâwn a ni.
22:24 Thinrim hmang mi chu thian suh la, Mi thinchhia chu kawp suh;
22:25 A tih dan i zir ang a, I nunna atân thang i tawng dah ang e.
22:26 Intiamkamte zingah tel suh la, Leiba atâna intiamkamtu zingah pawh.
22:27 Engmah pêk tûr i neih si loh chuan Engah nge i khum chu a laksak ang che?
22:28 In pi leh puten hma khawsânga Ramri an lo kham chu sawn suh u.
22:29 Mi a hnathawha taima chu i hmu thin ngai êm? Lal hmaahte a awm ang a, Mi naran hmaah chuan a awm lo vang.
23:1 Rorêltute nena chaw eia in thut dunin I hmaa mi chun takin en rawh.
23:2 I ril a tam hle chuan Insûm deuh ang che.
23:3 Bumna chaw mai a nih hre rengin A tuina ngawt it suh.
23:4 Intihausa tûrin intihah suh la, Nangma finna fin bang rawh.
23:5 Thil awm lo chungah i mit i nghat dawn êm ni? Sum chuan thla a insiam ngei ngei a, Mupui van lama thlawk thin ang hian.
23:6 Mi fir chhang chu ei suh la, A thil tuihnaite it hek suh.
23:7 A suangtuah ang chiah zelin a ni, a awm ni, "Ei rawh, i rawh," a ti ang chia; Mahse a rilru chuan ngaimawhna che a nei lo.
23:8 I chaw bar chu i luak chhuak ang a, I thu thlum tak chu i chan ang.
23:9 Mi â benghriatah chuan thu sawi suh, I thu fingte chu a ngainep dawn si a.
23:10 Hma khawsâng ramri lo kham chu sawn suh la, Pa nei lote lovah inrawlh suh.
23:11 Anmahni tlantu chu a chak a, I chungah an thu a sawipui dawn si a.
23:12 Zirtirna lamah i rilru nghat la, I beng chu hriatna thu lamah.
23:13 Naupang thunun tim suh, Tiangin vaw mah la, a thi dawn si lo va.
23:14 Tiangin i vua ang a, Tichuan Seol ata a nunna i chhanchhuak ang.
23:15 Ka fapa, i rilru a fin chuan Ka thinlung a lawm tak tak ang.
23:16 A ni, i kain thil dik a sawiin Ka rilru a hlim ang.
23:17 I thinlungin mi sual awt suh se; Nilengin LALPA tihin awm zawk rawh.
23:18 Lawmman a awm ngei dawn si a, I beisei chu tihgbovain a awm lovang.
23:19 Ka fapa, ngaithla la, fing la, Kawngah chuan i thinlung hruai rawh.
23:20 Uain heh mite zingah leh Sa heh mite zingah tel suh;
23:21 Zu rui mite leh sa heh mite chu an lo rethei dawn si a. Nguinain puan chhia a sintir ang.
23:22 I pa, a hringtu che thu pawm la, I nu chu a lo tarin hmusit suh.
23:23 Thu dik chu lei la, hralh leh tawh suh; A ni, finna te, zirtirna te, hriat thiamnate nên.
23:24 Mi fel pa chu nasa takin a hlim ang a. Fa fing hringtu chuan a chungah lawmna a nei ang.
23:25 I nu leh pa chu hlim takin awm sela, A hringtu che chu hlim takin awm rawh se.
23:26 Ka fapa, i thinlung min pe la, Ka awm danahte hian i mit tlung rawh se.
23:27 Nawhchizuar chu khuarkhurum thûk tak a ni a, Hmeichhe sual chu khuarkhurum zim a ni;
23:28 A ni, rukru angin mi an chang a, Mihring zingah vervekna an tipung thin.
23:29 Tute nge chungpik thin a, tute nge lungngai thin a, tute nge inhau thin? Tute nge thubuai nei thin a, tute nge a vang awm lova hliam tuar thin a, Tute nge mit sen rem rum thin le?
23:30 Zu hmuna awm reng thinte, Zu chawhpawlh in thinte an ni.
23:31 Uain a sen kak laiin en suh, Nova a zia a lan lai te, A luan thlâk zaih zaih lai tein;
23:32 A tawpah chuan rul angin a chu a, Rul tûr tha mi angin mi â chu thin.
23:33 I mitin thil mak takte a hmu ang a, I thinlungin thu chaltlai takte a chhahchhuak ang a.
23:34 A ni, mi tuifinriat lai taa mu ang emaw, Lawng puanzarna chhipa mu ang emaw i ni ang.
23:35 "Min vua a, a na si lo, Min vêl a, ka hre lo, Engtikah nge ka lo harh ang aw? Kan in leh bawk thin ang," i ti ang.
24:1 Mi sualte awt suh la, An zinga tel chak hek suh.
24:2 An thinlungin hnehchhiahna an zir a, An hmuiin pawikhawih lam thu mawlh an sawi thin a ni.
24:3 Finna in chu sak ani a, Hriat thiamnain tihngheh a ni.
24:4 Tin, hriatna avângi pindan chu Sum hlu tak leh duhawm taka tihkhahin a awm.
24:5 Chakna aiin finna a tha a, Awmkhauh aiin hriatthiamna.
24:6 Bei hmain ngun taka ral rel a tha, Rem i hriat poh leh i chak zawk ang.
24:7 Mi â tan finna chu a sâng lutuk a, Kulh kawngkaah a ka a ang lo.
24:8 Thil tha lo ti tûra remruat thin chu Miten pawikhawih hmang an ti ang.
24:9 Mi â ngaihtuahna chu sual a ni a, Tin, mi hmusit ching mi ch mihring tan tenawm an ni.
24:10 Mangan nia i chauh mai chuan I chakna a bei tham a ni.
24:11 Thi tûra hruaite chu chhan chhuak la. Thah mai tûrte chu chhan chhuak thuai rawh.
24:12 "Ngai teh hei chu ka hre lo" i tih mai chuan, Thinlung buktu chuan a ngaihtuah dawn lawm ni? I nunna vawngtu chuan a hre dawn lawm ni? Mi tin, an thiltih ang zelin a rul dawn lawm ni?
24:13 Ka fapa, khawizu in rawh, a tha si a, Khawithlâr i kaa tui tak chu.
24:14 Tichuan i nunna atân finna chu chutiang a ni tih i hria ang a; Tin, i hmuh chuan lawmman a awm ang a, I beisei chu tihbo a ni lo vang.
24:15 Aw, mi suaksualpa, mi felte awmna chu châng suh.
24:16 Mi fel chu vawi sarih tlu mah sela, a tho leh zel thin; A awmna chu tihchhiatsak suh.
24:16 Mi fel chu vawi sarih tlu mah sela, a tho leh zel thin; Mi suaksual erawh chu chhiatnain a tiboral thin.
24:17 I hmêlma a tlûkin lawm suh la, Tihtlâwma a awm in i rilru lawm suh se;
24:18 Chutilochuan LALPAN a hmu ang a, a lawm lo vang a, A laka a thinrim a lamlet dah ang e.
24:19 Thil tha lo titute avângin intilungngai duh suh la, Mi suaksual awt hek suh.
24:20 Mi sual tan chuan lawmman a awm dawn si lo va, Mi suaksual khawnvar chu tihmih a ni dawn si a.
24:21 Ka fapa, LALPA leh lal chu tih la, Rilru danglam pu mite chu pâwl suh;
24:22 An chhiatna a lo thleng thut ang a, An boral kumte chu tunge hria?
24:23 Hengte pawh hi mi fing thu sawi a ni, Rorêlnaa mi zahzawng neih hi a tha lo a ni.
24:24 Mi suaksual hnênah, "I fel e," titu chu Mi tinin ânchhia an lawh an ang a, Hnam tinin an hua ang a;
24:25 A zilhhautute erawh chu an hlim ang a, An chungah malsawmna tha tak a lo thleng ang.
24:26 Dik taka chhângtu chu thian tha a ni.
24:27 Pawn lam thil buatsaih la, Lo lamah inpeih diam la, Chu mi zawhah i in sa rawh.
24:28 Avâng awm lovin i thenawmte chungchang thu-ah hretu ni suh la, I kain bum bawk suh.
24:29 "Ka chunga a tih angin a chungah ka ti ang a, A thawh dan ang zelin ka pe ang," ti suh.
24:30 Mi thatchhe lovah ka kal a, Hriatna nei lo mi grêp huanah nên;
24:31 Ngai teh, hlingin a hnim phui chuk mai a, A chhûng zawng zawng chu taitenin a phui chuk mai a, A hungna lungpalte chu a chim vek a.
24:32 Tichuan ka en reng a, ngun takin ka ngaihtuah ta a, A mi zirtir chu ka hmu a, ka pawm ta a.
24:33 I duh chuan mu hlek la, chhing hlek rawh, Kut kuangkuaihin chawl hlek teh,
24:34 I mut hlanin i rethei hman ang a, Tlakchhamnain sipai angin a nang thut ang che.
25:1 Heng pawh hi Solomona thufing, Juda lal Hezekia miten an ziak chhawn chu a ni.
25:2 Thil thup hi Pathia ropuina a ni a, Lal ropuina erawh chu thil zawn chhuah a ni.
25:3 Van hi a sâng êm a, lei hi a thuk êm a, Lalte rilru pawh hi chhui chhuah rual a ni lo.
25:4 Tangkaraw ekchhiah paih la, A chhertuin thil mawi a chher thei ang.
25:5 Lal hmaa mi suaksual chu sanw bo ula, A lalthutthleng chu felnaa tihngheh a ni ang.
25:6 Lal hmaah chawimawina chuh suh la, Mi ropuite hmunah ding suh.
25:7 I hmuh tawh thin mi lian hmaa tihhnuai i nih ai chuan "thutphah tha deuhvah lo thu rawh khai," i hnêna han tih chu a tha zawk si a.
25:8 Inbei tûrin hmanhmawh takin kal suh, A tawpah i thenawmten an tihmualpho hu chein, A tihngaihna i hre lo mai dah ang e.
25:9 I thubuai chu i thenawmpa nên sawi dun ula, Mi dang thuruk chu puang suh,
25:10 A hretu chuan a hau ang chia, I hmingchhiatna a reh lo dah ang e.
25:11 A awm tak thu sawi hi Tangkaraw bâwma rangkachak apple ang a ni.
25:12 Thu awi bengah chuan Zilhtu fing chu, rangkachak bengbeh leh rangkachak tha mi thi ang a ni.
25:13 A tirtute tana palai rinawm tak chu Buh seng laia vûr vawt ang a ni. A pute nunna a tihharh thin avângin.
25:14 A pêk loh pui pea insawi a, uangthuang chu Ruahtui pai lo chhum leh thli ang a ni.
25:15 Dawhtheihnain rorêltu thlem thluin a awm a, Thu nem chuan ruhte a titliak thin.
25:16 Khawizu i hmu thin êm? A tawk lekin in rawh, Chutilochuan i la lua ang a, i luak leh dah ang e.
25:17 I thenawm in tlawh cheh lutuk suh, A ning ang chia, a haw dah ang che.
25:18 Mahni thenawm chungchanga dawt sawi ching chu Tuboh te, khandaih te, thal hriam takte a ni.
25:19 Mangan laia mi rinawm lo rin chu Ha bal leh ke ruh pelh ang a ni.
25:20 Mi lungngai hnêna hla satu chu Khaw vawh nia silhfen hlih ang leh pema chingal leih ang a ni.
25:21 I hmêlma a ril a tam chuan ei tûr pe rawh, A tui a hal chuan in tûr pe rawh,
25:22 I tizak êm êm ang a, Tin, LALPAN a rul ang che.
25:23 hmâr thliin ruah a rawn thlen a, Chutiang bawkin mi rel hmang leiin thinur hmêl.
25:24 Hmeichha an hmang tak nena in zau taka awm ai chuan In chung chhip kila awm a tha zawk.
25:25 Ram hla taka chanchin chu Mi tuihal tak tana tui vawt ang a ni.
25:26 Mi fel, mi suaksual kawng kiantu chu Tuikhur hnuchhawn hnu leh tuihna tihkhawloh ang a ni.
25:27 Khawizu in tam hi a tha lo va, Chutiang bawkin miin mahni ropuina an zawng hi ropuina a ni lo ve.
25:28 Mahni rilru thunun zo lo mi chu Khawpui chim kulh nei lo ang a ni.
26:1 Nipuia vûr tla leh buh seng laia ruah sur a inhmeh lo angin Mi â chawimawina hi a inhmeh lo a ni.
26:2 Chawngzawng thlawk thlawk leh vamur leng lai angin Vang awm lova ânchhe lawh chu engmah lo a ni.
26:3 Vuakna hrui chu sakawr tan a ni a, thirbarh chu sabengtung tan a ni a, Tiang chu mi â hnungzang tan a ni.
26:4 Mi â chu a ât dan angin chhâng suh, Amah ang i lo ni hlauh dah ang e.
26:5 Mi â chu a ât dan azirin chhâng rawh, Chutilochuan mi fingah a inngai mai dah ang e.
26:6 Mi â thuchatu chu ama ke atân a ni a, Ama chhiatna a in a ni.
26:7 Kebai kete chu a then a then a, Chutiang chuan tehkhin thu chu mi âte kaah chuan a ni thin.
26:8 Mi â chawimawi chu Lung intiang khâwm chunga lunghlu ip ang a ni.
26:9 Mi âte kaa tehkhin thu chu, Zu rui mi kut hling chhun ang a ni.
26:10 Mi â leh mi veivak ruai thin chu Thal kah thiam mi hliam thintu ang hi a ni.
26:11 Mi â a âtzia tilang nawn leh thin chu Ui a luak hnu ei leh thin ang hi a ni.
26:12 Mahni ngaiha fing inti i hmu thin êm? Chu mi ai chuan mi âah beiseiawm a awm tam zawk.
26:13 Mi thatchhia chuan, "Kawngah sakeibaknei a awm, Kawtthlêrah sakeibaknei a awm," a ti thin.
26:14 Kawpzaa kawngkhâr a her vêl angin Mi thatchhia chu a khumah a her vêl thin.
26:15 Mi thatchhia chuan a kut thlengah ahnim a; A kaa thlen leh pawh a peih thin lo.
26:16 Mi pasarih thil chhût thiam ai pawhin Mi thatchhia chu ama ngaihin a fing zawk.
26:17 A inrawlh vena tûr pawh awm hauh si lova kal paha mi sual mai chu Ui kal lai a benga lo mantu ang a ni.
26:18 ,19 thenawmte bum a, "Ka fiamthu a ni lâwm ni?" titu chu Mi â, meichher te, thla te, thihna tea mi tihthaihtu ang a ni.
26:19 ,18 thenawmte bum a, "Ka fiamthu a ni lâwm ni?" titu chu Mi â, meichher te, thla te, thihna tea mi tihthaihtu ang a ni.
26:20 Thing a ral avângin mei chu a thi a, Sesea thu sawitu awm lohnaah chuan inhauna a reh thin.
26:21 Meiling chu meihawl tivamtu leh thing chu mei tialhtu a ni angin An hmang mi chu insualna tialhtu a ni.
26:22 Sesea thu sawi hmangte thu chu chaw tui tak ang a ni a, Pumpui chhûngrilah a lût thin.
26:23 Thu sawi tlawr hmui leh thinlung sual chu Hlumbel tangkaraw tuieka luan ang a ni.
26:24 Mi huat hmang a kain a thup a, A thinlungah erawh chuan bumna a vawng thin;
26:25 Tha taka thu a sawi pawhin ring suh, A thinlungah thil tenawm pasarih a pai si a;
26:26 A huatna chu bumnain thup mah sela, A suahsualna chu tlâng hriatah tihlan a ni ang.
26:27 Khuarkhurum lai apiang chu, a chhûngah chuan an tla ang a, Tupawh lung lum chu ama chungah a lo lum let leh ang.
26:28 Lei dawthei chuan ama hliamte chu a haw thin a, Fak derna ka chuan thil a tichhe thin,
27:1 Atuk lama thil lo awm tûr chhuang suh, Chu mi ni chuan eng nge a rawn chhuahpui dawn i hre si lo.
27:2 Nangma kaa infak lovin mi dangin fak zawk che sela; Nangma hmui ni lo, hmêl hriat loh mi hmuiin.
27:3 Lung hi a rit hle a, tiau vaivut pawh hi a khin hle a; Nimahsela mi ain mi an tihbuaina chu, chu mi pahnih ai pawh chuan a rit zawk.
27:4 Thinurna chu a râwng a, thinrimna chu a so va; Mahse itsikna chu tunge tuar zo awm?
27:5 Hmangaihna inthup ai chuan Alanga zilhhauna a tha zawk.
27:6 Thian min hliamna chu a tak a, hmêlma min fawhna erawh chu a der a ni.
27:7 Mi puar tan chuan khawithlar pawh a tenawm a, Mi riltam tan erawh chuan thil kha zawng zawng pawh a tui a ni.
27:8 Mi a hmun vah bosan chu, Sava a bu a thlawh bosan ang a ni.
27:9 Hriak leh rimtuiin rilru a tihlim tin, angin, Thinlung tak atanga lo chuak thian remhriatpuina chuan a tihlim thin a ni.
27:10 Nangmah ngeia thian leh i pa thia chu thlauhthla suh; I vanduai niin i unaupa inah kal suh; Lamhla taka unau aiin lamhnaia thenawmte chu an tha zawk.
27:11 Ka fapa, fing la, ka thinlung tilawm rawh; Mi sawi chhetute ka chhan theih nân.
27:12 Mi fing chuan thil tha lo a hmu a, a biru thin a, Mi mawl erawh chuan a tawn thin a, a tuar phah thin.
27:13 Hnam dang tan mawhphurtûra inpe silhfen chu la la, Ram dang hmeichhe tana mawhphurtua inpe chu hrengah hmang rawh.
27:14 Zing taka tho va, ring taka a thian malsawmtu chu, A tan ânchhiaa ngaih a ni ang.
27:15 Khawcheng leh hmeichhe an hmang chu Angkhat an ni;
27:16 Chutiang nu chu in khap bet thei dawn em ni? Thli huh beh leh hriak hum beh tum ang a ni.
27:17 Thirin thir a tihriam a, Chutiang bawkin miin a thian hmêl a tihriam.
27:18 Tupawh theipi kung nei chuan a rah a ei ang a, Tupawh a pu rawng bâwl chu chawimawi a ni ang.
27:19 Tuia hmêl ngai ngai a lang angin Mihring thinlung chu mihringah a lang.
27:20 Seol leh Abadan-in tawk tih lem a nei lo angin Mihring mitin tawk tih reng a nei lo.
27:21 Tihtianghlimna bel chu tangkaraw tan a ni a, rawhtuina mei chu rangkachak tan a ni a, Mihring chu a thil fak zawngah fiah a ni.
27:22 Mi â chu buh nên sumah sukin deng mah ula, a âtna chuan a thlah lovang.
27:23 I berâm rualte awm dan chu hriat tumin taihmak chhuah la, I ran rualte chu veng tha rawh:
27:24 Sum leh paite chu chatuan atân a ni lo va; Lallukhum chuan chhuan zawng zawng a daih a em ni?
27:25 Hlobet chu an ât a, hlobet no dep a lo lang a; Tlânga hlobet an la khâwm a.
27:26 Berâmte chu i silhfen atân a ni a, Kelte chu lo man atân;
27:27 Khawpkham tûr kel hnute chu a awm ang a, In chhûngkuaa ei atân, in nulate chawmnate nên.
28:1 Mi suaksualte chu tuma um lohvin an tlânchhia a, Mi felte erawh chu sakeibaknei angin an huai.
28:2 Ramin a bawhchhiat chuan puipate an inthlak zut thin, Mi thil ngaih dan thiam leh hriatna neitute avâng erawh chuan ram chuan a din rei phah ang.
28:3 Mi rethei hnehchiahtu mi renchham chu Ei tur engmah hnutchhiah nei lova thil len bo vek ruah ang a ni.
28:4 Dan hawisantute chuan mi suaksual an fak thin a, Dan zawmtute erawh chuan an kalh thin.
28:5 Mi tha lo chuan rorêl an hre thiam thin lo va; LALPA zawngtute erawh chuan engkim an hre thiam thin.
28:6 Mi hausa awm dan dik lova awm ai chuan Mi rethei awm dan dik taka awm chu a tha zawk.
28:7 Tupawh dan zamwtu chu fapa fing a ni a, Mi virte thian erawh chuan a pa mualphona a thlensak thin.
28:8 A pung uma a sum tipungtu chuan Mi rethei lainattu tan a khawlsak a ni.
28:9 Dan ngaithla duh lova hnuchhawntu chu A tawngtaina pawh tenawm a ni.
28:10 Mi tha, kawng tha lova kal botirtu chu Ama hum laiah ngei a tla ang a, Mi tha famkimte erawh chuan thil tha an rochung ang.
28:11 Mi hausa chu ama ngaihin a fing a; Nimahsela mi rethei thil ngaih dan thiamte chuan an lai lang ang.
28:12 Mi fel hlawhtlinnaah chuan ropuina nasa tak a awm a; Mi sual an dinchan erawh chuan mite an biru thin.
28:13 Bawhchhiatna zeptute chu an hmuingil lo vang a, Zep lova inpuanga hawisantute chuan zahngaihna an hmu ang.
28:14 LALPA tih reng mi chu a nihlawh e, Thinlung tikhauhtu erawh chu vanduainaah a tlu lut ang.
28:15 Mi rethei chunga rorêltu suaksual chu Sakeibaknei rum ang leh savawm pawng vâk ruai ruai ang a ni.
28:16 Thil ngaih dan thiam lo hotu chu mi hnechhiahtu a ni thin a, Awhna hawtu erawh chuan a dam chhûng a tisei ang.
28:17 Mi thisen phurtu chu Khuarkhurumah a tlan lût ang a, tumahin hum suh se.
28:18 Tupawh dik taka awm chu chhanchhuahin a awm ang a, Dik lo taka awm erawh chu a tlu thuai ang.
28:19 A lei lettu chuan chhâng a ngah ang a, Mi lelo zuitu erawh chu a pachhe hle ang.
28:20 Mi rinawm chuan malsawmna a ngah ang a, Hausak thuai tum erawh chu hrem lohvin a chhuak lo vang.
28:21 Mi thlei bik neih hi a tha lo va, Miin chhâng them avângin an bawhchhe tûr a ni hek lo.
28:22 Mi fir chuan sum a um a, A chungah tlâkchhamna a lo thleng dawn tih a hre hek lo.
28:23 Leia mi fak dertu ai chuan Mi zilhtu chuan a hnua fak a hlawh tam zawk ang.
28:24 A nu emaw, a pa emaw rawk a, "Bawhchhiatna a ni lo ve," titu chu Tiboraltu thian a ni.
28:25 Mi rilru duham chuan inbeina a chawk chhuak a, LALPA-a rinna nghattu erawh chu tihthauvin a awm ang.
28:26 Mahni rilru ring maitu chu mi â a ni a, Fing taka chetla mi erawh chu chhan chhuah a ni ang.
28:27 Mi rethei thil petu chu a tlachham lo vang a, Maimitchhinsantu erawh chuan ânchhia nasa tak a dawng ang.
28:28 Mi suaksual an dinchanin mite an biru a, An boralin mi fel an pung thin.
29:1 Zilhhau fo pawha a ring tikhawng tlat chu Vawilehkhatah tihtliahin a awm ang a, tihdamna a awm lo vang.
29:2 Mi fel an lo pun hian mite an lawm thin a, Mi sualin rorêlna an chanin mite an rum thin.
29:3 Finna ngainatu chuan a pa lawmna a thlen a, Nawhchizuar pawltu chuan a sum a tiral thin.
29:4 Dik taka lalin ro a rêl chuan ram a phuisui a, Thamna a lâk chuan ram a chhe thin.
29:5 A thenawm fak dertu chuan A ke atân len a zam a ni.
29:6 Mi tha lote bawhchhiatnaah chuan thang a awm a, Mi fel erawh chu a zai a, a hlim.
29:7 Mi fel chuan mi rethei thu a hriatsak a, Mi suaksual erawh chuan hriatna tûrin ngaihthiamna a nei lo.
29:8 Hmusittu chuan khawpui a tialh a, Mi fing erawh chuan thinurna a tikiang thin.
29:9 Mi fingin mi â a hnial chuan, A thinur emaw, a nui emaw pawh ni sela, inremna a awm lo rêng rêng ang.
29:10 Thisen chhuah chak mite chuan mi tha famkim an hua a, Mi dik takte erawh chuan a nunna humhim an tum thin.
29:11 Mi â chuan a thinur thu zawng zawng a sawi chhuak a, Mi fing erawh chuan an thup a, an ngawihpui thin.
29:12 Rorêltuin dawt thu a ngaihsan chuan A chhiahhlawhte zawng zawng an sual thin,
29:13 Mi rethei leh hnechhiahtu an awm dun a, LALPAN an mit a tihvârsak ve ve a.
29:14 Mi retheite rinawm taka rorêlsaktu lal chu A lalthutthleng chu kumkhuaa tihngheh a ni ang.
29:15 Tiang leh zilhhaunain a tifing a, Naupang thlahthlam chuan a nu zahna a thlen thin.
29:16 Mi sual an lo punin bawhchiatna pawh a lo pung thin a, Mi fel erawh chuan an tlukna chu a la hmu ang.
29:17 I fapa chu thunun fel la, chawlhna a pe ang chia, A ni, i rilru lawmna a thlensak ang che.
29:18 Inlârna a awm loh chuan mipuite an tladah thin a, Dan zawmtu erawh chu a nihlawh thin.
29:19 Chhiahhlawh chu thu maia thunun mi â ni lo, Hre mah sela engah mah a ngai lo vang.
29:20 Thu sawi thuai thuai mi i hmu thin em? Chu mi ai chuan mi aah beiseiawm a awm tam zawk.
29:21 A naupan tet atanga chhiahhlawh duat chu A tawpah inro pawh a chuh ang.
29:22 Mi thinurin insualna a chawk chhuak a, Mi thinrimin bawhchhiatna a ngah thin.
29:23 Mi a chaponain a tilawm ang a, Mi rilru inngaitlâwm chuan chawimawi a hlawh ang.
29:24 Rukru kawppuitu chuan ama nunna a hua a ni; Chhechham ri a hria a, engmah a sawi si lo.
29:25 Midang ngaih dan pawisak luat a hlauhawm a, LALPAa innghah erawh chu a him.
29:26 Mi tam takin rorêltute duhsak hlawhna an zawng a, Mahse mihring chunga rorêlna chu LALPA hnên atanga lo chhuak a ni.
29:27 Mi fel lo chu mi fel ngaihin tenawm a ni a, Tin, dik taka awm mi chu mi suaksual tan tenawm a ni.
30:1 Jakeha fapa Agura thute: thufing chu. Miin Ethiela hnênah, Ethiela leh Ukala hnênah heti hian a ti,
30:2 "Mi ahluanah ka mâwl ber a, Mihringin hriatthiamna an neih hi ka nei lo va:
30:3 Finna ka zir lo va, Mi thianghlima hriatna ka nei hek lo.
30:4 Tunge ni vana chho tah a, lo chhuk leha chu? Tunge ni a kuta thli hum khawmtu chu? Tunge ni a puana tui funtu chu? Tunge ni kawlkil zawng zawngte tinghet? Tunge ni ahming, tunge ni a fapaa hming pawh i hria êm?"
30:5 LALPA thu zawng zawng chu fiah a ni tawh, Amah ringtu zawng zawngte tan ani chu phaw a ni.
30:6 A thute chu belhchhah suh, Chutilo chuan alai lang ang chia, Dawthei i lo ni dah ang e.
30:7 Thil pahnih ka dil chia, Ka thih hmain rem ti lul ang che.
30:8 Thil lawi lo leh dawtte chu mi tihsawnsak daih ang che. Pachhiatna emaw, neihnunna emaw mi pe hek suh. Ka tana mamawh chawin min chawm rawh;
30:9 Chutilochuan ka tlaipuar ang a, ka phat ang chia, "LALPA chu tunge ni? Ka ti dah ang e; A nih loh vek leh ka lo rethei ang a, rûk ka ru ang a, Ka Pathian hming ka tihliau dah ang e.
30:10 Chhiahhlawh chu a pu hnênah rel suh, Anchia a lawh ang chia, Thiam loh i hlawh dah ang e.
30:11 An pate ânchhia lawh a, An nute malsawm lo chhuan an awm a.
30:12 Mahni ngaiha thianghlim inti chhuan an awm a; Nimahsela an bawlhhlawhna tlen fai an ni si lo.
30:13 Tha inti êm emte an awm a, Tha an va inti teh reng êm!
30:14 An ha chu khandaih ang, an ha hnuai lam chemte ang chhuan an awm a, Leilung ata mi rethei leh mihring zing ata mi renchhamte ei zo tûrin.
30:15 "Mi pe rawh, mi pe rawh," tia au fanu pahih nei saihlit a awm a. Thil pathum, kham lem nei lo a awm a, E, thil pali, a ni, "A tawk e," ti ngai lote.
30:16 Thlan leh chhul ching, Tui khawpkham lo leilung leh "A tawk e," ti ngai lo, mei.
30:17 A pa hmusittu leh A nu thu awi nganeptu mit chu Phai choakin an kher chhuak ang a, Mupui noten an ei ang.
30:18 Thil pathum ka tana mak lutuk a awm a, E, thil pali a ni ka hriat loh chu.
30:19 Boruaka mupui kawng, Lung chunga rul kawng, Tuifinriata lawng kawng, Mipain nula a panna kawngte.
30:20 Chutiang chu a ni, hmeichhe uire hmang kawng chu; A ei a, a hmui a hru fai a, "Thil sual engmah ka ti lo," a ti thin.
30:21 Thil pathum avângin leilung a khur thin, Thil pali a ni, tuar theih lohte.
30:22 Chhiahhlawh chu lal a lo nih a, Mi â chu buh leh saa a lo tlai a;
30:23 Hmeichhe huatthlala takin pasal a lo neih a, Chhiahhhlawh nulain a pi ro a luahin.
30:24 Thil te tam te pali lei chungah hian a awm a; Mahse an fing hle reuh mai.
30:25 Fanghmir hi chak lo tak an ni a: Nimahsela thalah an chaw tûr an khawlkhawm thin.
30:26 Sazupui hi chhiatha tak an ni a; Nimahsela lungpuiahte an awmna an siam thin.
30:27 Khaute hian lal an nei lo va; Nimahsela arualin an kal thin.
30:28 Daidepte hi an kein an inham tang thin a; Nimahsela lal inah an awm thin.
30:29 Thil pathum an awm dana ropui tak an awm a, E, pali a ni, an awm dana ropui tak chu.
30:30 Sakeibaknei chu ram sa zingah a chak ber a, Engmahin a tilet zo lo va.
30:31 Ui sa thiam; kelpa pawh; Lal, tumah amah bei awm lo chu.
30:32 Nangmah inchawisâng tûra thil âtthlâk tak i lo tih tawh emaw, Thil tha lo i lo ngaihtuah tawh emaw anih chuan, I kâ hup rawh.
30:33 Hnute tui chawhin hnute khal a rawn tichhuak ang leh Hnar sawra thi a lo chhuak angin Tihthinur luinain inhauna a hring thin.
31:1 Lal Lamuela thu te, thufing, a nu zirtirte chu.
31:2 Ka fapa, aw ka rila rah, Aw ka chhechham fapa, lo ngaithla teh.
31:3 I chakna chu hmeichhia pe suh la, Lal tichhe thin hnênah i nunnate pawh.
31:4 Aw Lemuel, lalin uain in tûr a ni lo va, rorêltuten, "Khawiah nge rakzu?" an tih tûr a ni hek lo.
31:5 An in chuan, dan an theihnghilh ang a, Mi retheite chungah ro an rel dik lo dah ang e.
31:6 Boral dawn tepte chu rakzu pe ula, Mi lungngai chu uain pe rawh u.
31:7 In sela, a pachhiatna chu theihngilh sela, A hreawmzia hre reng lo rawh se.
31:8 Tawng thei lote tan i ka ang la, Hnuchhawnho zawng zawngte chungchang thu-ah te.
31:9 I ka ang la, fel takin ro rel la, Mi rethei leh renchhamte chungah ro rel rawh.
31:10 Hmeichhe khawsak tha tunge hmu thei ang? A man chu lunghlu sen mi aiin a sâng zawk daih si a.
31:11 A pasal thinlung chuan a ring a, Chhawrna a hmai lo vang.
31:12 A dam chhûngin Chhe lam ni lovin tha lam hlirin thil a tihsak thin.
31:13 Berâm hmul leh la a zawng a, A kutin lungawi takin a thawk thin.
31:14 Sumdawng lawng ang a ni a, Ram hla tak ata ei tûr a la thin.
31:15 Khaw var hmain a tho va, A chhûngte ei tûr ape thin a, A chhiahhlawh nulate hnênah an tih tûr te.
31:16 Huan tûr a ngaihtuah a, a lei a, A kutkawih chhuah ngeiin grêp huan a siam thin.
31:17 Chaknain a kawng a hreng a, A bante a tichak thin.
31:18 A sumdawnna a hlawk tih a hria a, Zanah pawh a khawnvar a mit ngai lo.
31:19 A kutin hmui kut a chelh a, A kutin hmuithla a vuan a.
31:20 A kut mi rethei lamah a phar a, A ni, renchhamte thlengin a ban phak a.
31:21 A chhûngte vur a hlausak lo va, A chhûngte zawng zawng chu puan sen lar sinin an awm si a.
31:22 Chhuatphah puan mawi a insiam a, A silhfen chu lazai sin mi leh puan senduk a ni.
31:23 Kulh kawngkaa an ram upate nên an thuthovin A pasal chu a hriat a ni.
31:24 Lazai sin silhfen a sia a, a zuar thin a, Sumdawngte hnênah kawnghrente a thawn thin.
31:25 A silhfen chu chakna leh ropuina ani a, Hun lo la thleng tûr atân pawh a nui a.
31:26 Finnain a ka a ang a, A kaah chuan ngilneihna thu a awm.
31:27 An chhûng khawsak dan a en tha a, Dawngdahna chhâng a ei lo.
31:28 A fate chu an tho va, Engthawli an ti a, A pasal pawhin a fak a.
31:29 "Hmeichhe tam tak khawsak tha an awm a. Mahse nang chuan i khum vek a ni," tiin.
31:30 Duhsakna hi bumna a ni a, hmêl thâtna chu engmah lo a ni. LALPA tihtu hmeichhia erawh chu fak a ni ang.
31:31 A kutkawih chhuah chu pe la, A thiltihin kulh kawngkaah chuan fak rawh se. |
posted by zoblog @ 12:08 PM  |
|
|
|
|
|
