MIZO CLAN

 
MIZORAM #Health Department-ah Promotion buai? (Misual.Com) #UDA candidate list a ‘leak-out’! (Misual.com) #Excise ruihtheih thil man zat (DIPR) #Fanu kaphlumtu in a dam rei ring lo sa (Buannel) #ZONET NATIONAL #Retired army officer, aide arrested for Malegaon blast(NDTV) WORLD #LTTE aircraft bombs Colombo power plant (TOI) # Jennifer Hudson IDs nephew's body; child shot, sources say (LA Times)
Shoutbox

Hosea
Wednesday, September 12, 2007
1:1 Judaho lal Uzzia te, Jothama te, Ahaza te, Hezekia te lal lai leh Israel-ho lal Jeroboama, Joasa fapa lal laia Beeria fapa Hosea hnena LALPA thu lo thleng chu.
1:2 LALPAN Hosea hminga Israelte hnena thu a sawi tan lai khan hetiangin Hosea hnenah a sawi: "Kal la, nupuiah nawhchizuar nei la; nawhchizuar lakah fa hring rawh; hetiang hian ka mite chuan min kalsan a, min uiresan ta a ni," tiin.
1:3 Tichuan a kal a Diblaima fanu Gomeri chu a nei ta a; tin, nau a pai a, fapa a hrinsak ta a.
1:4 Tin, LALPA chuan a hnênah, A hmingah Jezreela sa rawh; rei rial lovin Jezreel phuba chu Jehua chhûngte chungah ka la ang a, Israela chhûngte ram chu ka ti kin ang.
1:5 Tin, chumi niah chuan heti hi a ni ang a, Jezreel ruamah Israel ho thal ngul chu ka ti tliak ang, a ti a.
1:6 Tin, nau a pai leh a, fanu a hring a. Tin, LALPA chuan a hnênah, a hmingah Lo-ruhamai sa rawh: Israela chhûngte chu ka lainat ngai dâwn tawh lo, ka ngaidam thuai dâwn ta si lo va.
1:7 Juda chhûngte erawh chu ka lainat ang a, thal ngul emaw, khandaih emaw, indona emaw, sakawr emaw, sakawr chung chuang mi emawa anmahni chhandam lovin, LALPA an pathian chuan ka chhandam ang, a ti a.
1:8 Tin, Lo-ruhamai chu hnute hnêk a bântîr, tin, nau a pai leh a, fapa ahring a.
1:9 Tin, LALPA chuan heti hian a ti a: Ahmingah Lo-ammia sa rawh: nangni hi ka mite in ni si lo va, tin, kei in pathian ka ni dawn lo.
1:10 Amaherawhchu Israel fate chu tuifinriat tiau vaivut, teh rual loh leh chhiar rual loh zât an ni ang a; tin, heti hi a ni ang a, an hnêna, Ka mite in ni lo, tihna hmunah chuan, Pathian nung fate in ni e, tih a ni ang.
1:11 Tin, Juda fate leh Israel fate chu an pungkhâwm ang a, an lû tûr an ruat ang a, chu ram atang chuan an kal chho vang: Jezreel nî chu a ropui dâwn si a.
2:1 In unaupate hnênah chuan, Ammia, ti ula, in far nute hnênah chuan, Ruhamai, ti rawh u.
2:2 In nu hi bei rawh u, bei rawh u; Ani hi ka nupui a ni si lo va, kei pawh a pasal ka ni lo: A hmêl ata nawhchizawrh chîn hi paih thla sela, Atanglai ata a uire chîn hi paih thla rawh se;
2:3 Chutilochuan ka tisaruak ang a, A pian nîa a awm angin ka awmtîr ang a, Thlalêr angin ka siam ang a, Ramro angin ka awmtîr ang a, Tuihâlin ka tihlum ang.
2:4 A fate pawh ka lainat lo vang, Nawhchizuar fate an ni si a.
2:5 An nu chuan nawhchi a zuar thin a, Anmahni paitu chu zahpui awm takin a awm: Ka chaw te, ka tui te, ka sahmul te, ka la te, hriak te leh ka in tûr te mi petu, ka ngaihzâwngte ka ûm ang, a ti a ni.
2:6 Chuvângin ngai teh, i kawng chu hlîngin ka ping ang a, A mah dâlin dai ka theu vang a, A kawngte a hmu lo vang.
2:7 Tin, a ngaihzâwngte chu a ûm ang a, A ûm phâk lo vang; Anmahni a zawng anga, a hmu lo vang; Tichuan ka pasal hmâsa hnênah ka kîr teh ang, Tûn ai hian hmân kha ka tân a tha zawk si, a ti ang.
2:8 Buh te, uain te, hriak te hi,Tangka ka tihpun sak te hi, Rangkachak Baal tâna an hman te nên, Keima pêk a ni tih a hre si lo.
2:9 Chuvângin, ka buh chu a seng hunah,Ka uain pawh a sâwr hunah ka la kîr leh ang, Ka sa hmul leh ka la, a saruak khuhna tûr chu ka lak sak ang.
2:10 Chutichuan a ngaihzawngte mit hmuhah A saruak zahmawh ka ti lang ang, Ka kut ata tumân an chhanchhuak lo vang.
2:11 A hlimna zawng zawng, a kût te, a thla thar te, A chawlhni te leh a puipun hun zawng zawng te ka tireh bawk ang.
2:12 A grêp leh a theipui kûng, Hêng hi a ngaihzawng mi pêk ka hlawh chu a ni, A tih thina te chu ka tiram ang: Ramhnuaiah ka siam ang a, ramsa ten an ei ang.
2:13 Rimtui a halsak thin Baal nîte chu a chungah ka thungrûl ang, Chûnglai chuan a bengbehte leh a incheimawinate a inbel a, A ngaihzawngte a pan a, kei mi theih nghilh a ni, Tih hi LALPA thu chhuak a ni.
2:14 Chuvângin, ngai teh, ka thlem ang a, thlalêrah ka hruai ang a, ngaihawm takin amah ka bia ang.
2:15 Tin, chuta chinah chuan, a grêp huan te chu a hnênah ka pe ang, Akor ruam pawh beiseina kawngka atân: Chutah chuan a tleirâwl lai nite leh Aigupta ram atanga a lo chhuah ni ang khân a chhâng ang.
2:16 LALPA thu chhuak chuan heti hian a ti: Chumi ni-ah chuan ramsa te, chunglêng sava te, Leia rannungte nêna thuthlung an tân ka siam ang a: Thal ngûl te, khandaih te, indona te hi Lei ata ka tiboral ang a, him takin ka awmhotîr ang.
2:17 Kumkhuain ka tân ka hual tlat ang che; Felna te, rorêlna te, khawngaihna te, lainatna tein Ka tân ka hual ang che.
2:18 Rinawmnain ka tân ka hual ang che. Tichuan LALPA chu in hre tawh ang.
2:19 Chumi nî-ah chuan heti hi a ni ang a, Ka bia ang a,tin,annin lei an bia ang a;
2:20 Tin, lei chuan buh te, uain te, hriak te an bia ang;
2:21 Tin, annin Jezreel an bia ang.
2:22 Tin, ani chu ka tân leiah ka chîng ang a; Lainatdawnglovi chu ka lainat ang a, Kaminilova chu, Ka mi i ni, ka ti ang a, Tin, anin, Ka pathian i ni, a ti ang.
3:1 Tin, LALPA chuan ka hnênah, kal leh ta la, hmeichhia, midang duhlai, uirenu chu va hmangaih rawh, Israela thlahte chu pathian dang hnênlam hawiin grêp chhang ngaina mah se, LALPAN a hmangaih reng ang bawk hian, a ti a.
3:2 Chutichuan tangka sâwm leh panga leh barli homer khat leh homer chanvein amah chu ka lei a:
3:3 Tin, a hnênah, Ni tam tak chhûng chu ka tân i awm tûr a ni; nawhchi i zuar tûr a ni lo va, tuma nupui i ni tûr a ni lo: chutiang bawk chuan keipawh i lakah ka awm ang, ka ti a.
3:4 Israela thlahte chu ni tam tak lalber leh milian leh lungphun serh leh puithiam kawr emaw, milim te emaw nei lovin an awm dâwn si a:
3:5 chumi hunah chuan Israela thlahte chu an lamlêt ang a, LALPA an pathian leh an lalber Davida chu an zawng ang a; ni hnuhnungahte chuan LALPA leh a thatna chu khûr chungin an pan ang.
4:1 Israela thlahte u, LALPA thu chu ngai thla teh u; He ramah hian thutak leh khawngaihna leh Pathian hriatna awm loh avângin, Lalpa chuan ram luahtute beihna tûr a nei.
4:2 Chhechham te, in bum te, in thah te, rûkrûk te, Uire chîn te a punlun a, thisen a in phaman reng a ni.
4:3 Chuvângin ram chuan a sûn ang a, A chhûnga chêng tinrêng an chau vang, Ramsate, chunglêng savate nên; A ni, tufinriata sânghate chenin lâk bo an ni ang.
4:4 Amaherawhchu tumah inbei suh sela, Tumah inzilhhau hek suh se; I mite chu puithiam beitute ang an ni si a.
4:5 Chhûnah i tlû ang a, nangmah nên zâwlnei pawh zânah a tlû ang a, I nu pawh ka tiboral ang.
4:6 Ka mite chu hriatna tlakchham avângin tihboral an ni a, Hriatna i hnar avângin kei pawhin ka puithiam i nihna ata ka hnar tawh ang che. I pathian dân i theihnghilh vei a, Kei pawh hian i fate ka theihnghilh ve ang.
4:7 An pun poh leh ka chungah an sual tulh tulh vei a, An ropuina chu mualphonaah ka chantîr ang.
4:8 Ka mite sualna azârah an intihausa a, An khawlohnaah chuan an thinlung an nghat a,
4:9 A mipui a puithiamin ang khata hrem an ni ang a, An kawngte avâng chuan anmahni ka hrem ang a, An thiltihte ka thungrûl ang.
4:10 An ei tak na’ng a, an tlai si lo vang, Nawhchizawrh an chîng na’nga, an pung lo vang, LALPA pawisakna an neih loh avângin.
4:11 Nawhchizawrh te, uain te, uain thar te chuan. Thinlung a la bo thin
4:12 Ka mite chuan an thing an râwn a, An tiang chuan an hril thin; Nawchizawrhna rilru chuan a hruai bo va, An pathian lak ata an hnar bo ta si a.
4:13 Tlâng chhîpahte chuan an inthâwi a, Mualah te chuan rimtui an hâl a, Sasua leh beraw leh hlai hnuaiahte chuan- A hlim a nawm avângin; Chuvângin in fanute chuan nawhchizawrh an chîng a. In fa-mote chuan uire an chîng a ni.
4:14 In fanuten nawhchi an zawrh a, In fa mote an uirein ka hrem lovang: Anmahni ngei pawh nawhchizuarte nên an kal hrang a, Maichâm-nawhchizuarte nên an in thâwi ho si a; Hrethiamlo mipuite chu an tlu chhia ang.
4:15 Israel, nang chuan nawhchizawrh chîng ta mah la, Juda zawngin chîng ve lul suh se, Gilgal-ah lo kal suh ula, Beth-even-ah chho hek suh ula, LALPA anun chhûng chu, tiin chhia chham hek suh u.
4:16 Bâwngla luhlul ang maiin Israel ho an luhlul a; Tûnah chuan LALPAN berâm no angin phûlah ka châwm thei ang em?
4:17 Ephraim chuan milem a zawmpui ta a, A awm awmin awm rawh se.
4:18 An zu in chu an tiak a, an inphalrai ta thin ; A rorêltute chuan thil zahpuiawm tih an ngaina êm êm a ni.
4:19 Thlîin a lak hunah an inthâwinate avângin an la zak ang.
5:1 Aw nangni puithiamte u, hei hi hria ula, Nangni Israel chhûngte u, ngaithla ula, Aw lalber chhûngte u, beng chhi rawh u, Rorêlna chu in tân a ni si a; Mizpah-a thang leh Tabor tlânga lên zâr in nih avângin.
5:2 Mi hel te chuan tihhlum an uar êm êm a, Kei erawh chu an vaia zilhhautu ka ni.
5:3 Ephraim ka hria a, Israel chu ka lakah thup a ni lo: Tûnah hian aw Ephraim, nawhchizawrh i chîn avângin. Israel chu tihbawrhbân a ni.
5:4 An pathian lama hawikîr tûrin An thliltih thinte chu an bansan lo va, Nawhchizawrh rilru an zîngah a awm si a, LALPA chu an hre lo a ni.
5:5 Israel chhuantawlawl chuan a hmai chhanah a hriattîr a, Chutichuan Israel leh Ephraim chu an khawlohnaah an tlu ang a, Juda pawh an hnênah a tlu ve ang.
5:6 An berâm rualte leh an sebâwng rualte nên. LALPA zawng tûrin an kal ang a, Nimahsela ani chu an hmu lo vang, An lak atangin a inla fihlîm tawh a ni.
5:7 LALPA chungah vervêk takin an ti a ni; Hnam dang fate an hring si a: Thlathar chuan an lote nên lama boralna a thlen ang.
5:8 Gibea khuah tawtawrâwt tum ula, Rama khuaah tawtawrâwt hâm rawh u; Beth-even-ah au tuar tuar rawh u, Aw Benjamin, i hnung lam kha, tiin.
5:9 Ephraim chu hremna niah chuan tihtiau a ni ang: Thil lo ni ngei tûr chu Israel chite zîngah ka hraittîr tawh a ni.
5:10 Juda milian te chu ramri sawntute ang an ni a: An chungah ka thinurna chu tui angin ka leihbua ang.
5:11 Ephraim chuan rah beh a chîng a, Dikna a palzût a, engmah lo a ûm ruai a.
5:12 Chuvâng in Ephraim tân chuan sûlrûl ang ka ni a, Juda chhûngkaw tân chuan mawihna ang ka ni.
5:13 Ephraim chuan a natna a hmu a, Juda chuan a hliam a hmu a. Tah chuan Ephraim chu Assuria hnênah a kal a, Lalber Jareba hnênah chuan mi a tîr a: Nimahsela ani chuan a tidam thei lo che u a, In hliam chu a tihdamsak thei hek lo che u.
5:14 Ephraim tân chuan sakeibaknei ang, Juda tân chuan sakeibaknei vanglai ang ka ni dawn si a; Keimah, keimah ngeiin ka hai thlêr ang a, Ka kal ang a, ka kal bopui ang a, Chhan chhuaktu tumah an awm lo vang.
5:15 An thiam lohna an inhriat a, ka hmêl an zawn hmâ chu. Ka kal ang a, ka hmunah ka kîr ang: An tuarnaah chuan mi zawng hmâ dâwn a ni.
6:1 Hawh u, LALPA hnênah i kîr ang u: Min lo pawt sawm tawh na a, min tidam leh dâwn si a, Min lo vaw tawh na a, min tuam leh dâwn si a.
6:2 Ni hnih chinah min tinung ang a; Nithum niah min kaitho vang a, a hmâah kan awm ang.
6:3 LALPA hriatna chu i ûm zêl ang u khai, i hria ang u; Zîng anga khêl lovin a thawk chhuak ngei thin a ni: Kan hnênah ruah angin, ruah hnuhnung, lei tihuhtu ang maiin a lo thleng ang.
6:4 Aw Ephraim, engtin nge ka tih ang che? Aw Juda engtin nge ka tih ang che? Min hmangaihna chu zîng tiauchhûm leh dai ral ta thuai thin ang hi a ni si a.
6:5 Chuvângin zâwlneite hmangin anmahni ka râwt a; Ka kâa thutein anmahni ka tihlum a ni: I chunga rorêlnate chu êng kal chhuak zuai zuai ang a ni.
6:6 Inthawina duh lovin khawngaihna ka duh si a; hâlral thilhlan aite chuan Pathian hriatna ka duh zawk a ni.
6:7 Nimahsela Adama angin thuthlung chu an bawhchhia a, Chutah chuan vervek takin ka chungah an ti a ni.
6:8 Gilead chu khawlohna ti tute khawpui a ni a, Thisen a kai pheng phung a ni.
6:9 Suamhmang rualin mi an châng thin angin. Puithiam pâwlte chuan Sekem kawng ah mi an that thin; A ni, thil sual an ti ta a ni.
6:10 Israel chhûngkuaah chuan thil rapthlâk tak ka hmu, Ephraim-ah chuan nawhchizawrhna a awm a, Israel chu a bawrhbâng a ni.
6:11 Ka mite saltânna ata ka hruai kîr hunah chuan, Aw Juda, i tân pawh rah seng tûr ruat a ni.
7:1 Isrel tihdam ka tumin Ephraim khawlohna a lo lang a, Samari suahsualna nên: bum an chîng a, Chhûng lamah rûkru a lo lût a, Pâwn lamah suamhmang rualin an suam si a.
7:2 An suahsualna zawng zawng ka hre reng tih An thinlungin an ngaihtuah lo: Tûnah chuan an thiltihte ngeiin a chîm vêl tlat tawh a. Ka hmai hmâah an awm a ni.
7:3 An suahsualnain lalber a titlâwm a, An dâwt thuin mi liante an tilâwm bawk a.
7:4 An vâiin uire an ni a; Chhang siamtuin thuk a ur lum, Chhangphut a hmeh diak a thawh hmâa, Mei chhawm a chhawlhsan rih ang hi an ni.
7:5 Kan lalber nîah chuan mi liante chu uain rû takin an intirûi a; Ani chuan hmusittute rualin a kut a phar a.
7:6 Arûka an chân laiin an thinlung chu thuk ang maiin an siam tawh si a: An thinur chu zankhuain a dai a, Zîngah chuan meialh angin a alh a.
7:7 Thuk ang maiin an sa vek a, an rorêltute an tiboral a; An lalber apiangte chu an tlu a, An zîngah tumah mi au an awm lo.
7:8 Ephraim lah chu, hnam dangte zîngah a intelh a; Ephraim chu chhang leh lo a ni.
7:9 Mikhualte chuan a chakna an ei zawhsak a, Ani chuan a hre lo: Hmul tuakin a bâwm nual tawh a, Ani chuan a hre lo.
7:10 Israel ropuina chuan a hmâi hmâah a hriattîr thin a, Nimahsela, hêng zawng zawngah pawh hian LALPA an pathian lam chu an hawi lo va,A nichu an zawng hek lo.
7:11 Ephraim chu thuro lungmawl, hriatthiamna nei lo ang a lo ni a; Aigupta lam an au thûl a, Assuria lamah an kal thûl a.
7:12 An kal laiin an chungah ka lên ka vawrh ang a, Chunglêng sava manin ka man ang a, An inkhâwmhovin an hriat tawh ang in an mahni ka hrem ang.
7:13 An chung a pik e! ka hnên ata an kal bo ta si a, Boralna an chungah a thleng e! ka chungah an hel ta si a, Anni erawh chuan dâwt mi sawi khum a.
7:14 An thinlung takin mi au lo va An khum laizâwlah an chiau mai mai zâwk a ni: Buh leh uain atân an inkhâwm a, ka chungah chuan an hel si a.
7:15 Kei chuan ka hruai chhuak a, ka ti chak a, Mahse ka chungah thil tha lo an suangtuah a ni.
7:16 An hawi kîr a, Chungnungbera hnênah ni lovin; Thal ngul rul ang an ni a, An miliante chu an tawng chaltlai avângin khandaihi an tlu ang: Heihi Aigupta rama nuihzabûr an nihna a ni ang.
8:1 Tawtawrâwt chu i hmuiah chuktuah rawh. Lalpa chhûngte chungah mupui angin a lo kal e, Ka thinlung an bawhchhiata, Ka dân an helsan avângin.
8:2 Ka pathian, keini Israel ho chuan ka hria a che, Tiin ka hnênah an au vang.
8:3 Israel ho chuan thil tha an hnâwl a, Hmêlmaten an ûm ang.
8:4 Ka tih ni lovin anmahnin lal an siam a; Ka hriat lohvin hotute an siam a; An boralna tûrin an tangkarua leh rangkachakin milim an insiam a.
8:5 Aw Samaria, i sebâwng no lim chu a hnâwl e; An chungah ka thinur êm êm a ni: Engtikahtak thianghlim leh ang maw?
8:6 Israel themthiamte milem siam chu, Pathian a ni lo. A ni, Samaria sebâwng no lim chu tihkeh sawm vek a ni ang;
8:7 Thlî an chîng a, thli chhia an seng dâwn si a: Kûng ding a nei lo va, a zîk chuan rah achhuah lo vang; Chhuah pawh ni sela, mikhualten an ei zo vang,
8:8 Israel ho chu lem zawhin an awm a ni: Bêl, a chhûnga lâwmna awm lo angin tûnah hian hnam dang zîngah an awm e.
8:9 Ram sabengtung mal tla angin Assuria ramah an chho si a, Ephraim chuan ngaihzawngte a tlawn e,
8:10 A ni, hnam dangte tlawn ruai mah se, ka khâwm ang a, Lal leh hotu hriak an tih thin ka tihbânsak rih ang.
8:11 Ephraim chuan maichâm a tipung hi an thiltih sualna lek a ni a, An tân maichâm rêng rêng chu sualna mai a ni.
8:12 Ka dân chu ka ziaksak rei rui a, Mahse thildang takah an ngai a ni.
8:13 Ka tâna thilhlan inthâwinate zawng! Sa an hlân a, an ei a; chûng chu LALPAN a pawm lo: Tichuan a khawlohna a hre reng a, an sual a hrem a, Anni chu Aigupta ramah an kîr leh ang.
8:14 Israel chuan a Siamtu a theihnghilh a, In ropuite a sa a; Juda chuan khawpui kulhte a tipung a, Mahse a khawpuiahte chuan mei ka tîr ang a, A in ropuite a kâng zo vang.
9:1 Aw Isrsel, hnam dangte angin hlim so bûng bûng khawpin lâwm suh; I pathian chu nawhchi zawrhsan a, Hruih zâwl tina aman chu i ngaina si a.
9:2 Hruih leh grêp sâwrna khurte chuan anmahni a titlai lo vang a, Uain thar tûr a hlawhchham ang.
9:3 LALPA ramah chuan an chêng lo vang a,Ephraim chu Aigupta lamah a kîr zâwk ang a, Assuria ramah chaw thiang lo an ei ang.
9:4 LALPA hnênah uain chu an bun chhuak lo vang a, An thilhlan te chu a tân lawmawm a ni hek lo vang; An chhangchu lusun te chaw ang a ni ang a, A ei apiang an bawrhbâng ang; An chhang chu an nunna atân mai a ni ang a, LALPA inah a lût lo vang.
9:5 Khâwmpui urhsun nîah leh LALPA kût nîah chuan Eng nge in tih tâk ang le?
9:6 Ngai teh u, chhiatna a lo thleng ang a, an darh ang a, Aigupta chuan anni chu a lo khâwm zâwk ang a, Memphis chuan a lo phûm ang: An tangkaraw thil duhawmte chu kângthaiin a bâwm ang a, An puan inahte chuan hnim hlîngnei a awm ang.
9:7 Hremna nîte chu a lo thleng a, Thungrulhna nîte chu a lo thleng e; Israel chuan chu chu a hria ang: I khawlohna chu a tamin intaina chu a nasat avângin. Zâwlnei chu a â a, thlarau nei mi chu mi â a ni.
9:8 Ephraim râlvêngtu chu ka Pathian hnêna awm a ni a, Zâwlnei lah chu a kawng tluanin thangkamtu thang a awm a, A pathian inah pawh intaina a awm.
9:9 Gibea khuaa awmlai nîte ang khân Nasa takin anmahni an intikhawlo va. An khawlohna chu a hre reng a, An sualnate chu a thungrûl ang.
9:10 Israel chu thlalêra grêp rah ang maiin ka hmu a. In pate chu theipui, hun hmasaa a hmin hmasa ngin ka hmu; Mahse anni chu Baal-peor hmunah an lo kal a, Thil zahthlak takah chuan an inpumpêk ta a, An ngaihnat tak milemte ang bawk chuan an tenawm a ni.
9:11 Ephraim lah chu, an ropuina sava angin a thlâwk bo vang a: Nau hring te, nau pai te, rai te an awm lo vang.
9:12 An fate puitlin mah sela mipa rêng rêng awm lo tûrin Ka sûntîr tho vang. Ani anmahni ka hawisan hunah chuan An chung a va pik zual dâwn em!
9:13 tûra ka hmuh ang bawkin Ephraim chu hmun nuam taka dahin a awm a: Mahse Epraim chuan a fate chu thattu hnênah a la hruai chhuak ang.
9:14 Aw LALPA, neihtîr rawh: Eng nge i neihtîr ang le? Chhûl nau chhiat thin leh hnute vuai te chu neihtîr ang che.
9:15 An suahsualna zawng zawng chu Gilgalah an titan a, Chutah chuan anni chu ka haw si a: An thiltih suak sual avângte chuan ka in ata ka hnawtchhuak ang: Anni ho hi ka hmangaih tawh lo vang; An hotu zawng zawngte chu hel hmang an ni.
9:16 Ephraim chu vuakin a awm a, an zung chu a ro zo va, Rah an chhuah lo vang: A ni, chhuah mah sela, an chhûl rah duhawm tak chu Ka that tho vang.
9:17 Ka pathian chuan anni chu a paih bo vang Amah an bengkhawn loh avângin: Tichuan hnam dangte zînga vakvaiin an awm ang.
10:1 Israel chu grêp hrui duah tak, rah ngah tak a ni a: A rah tam hu ang zêlin a maichâm te a tipung a; A ram thatzia ang zêlin lungserhphun tha tak a siam a.
10:2 Rilru pahnih an nei a, Tûnah chuan thiam loh changin an awm tawh ang. An maichâmte chu LALPAN a vaw chim ang a, An lungserhphunte chu a tichhia ang.
10:3 Lal taktak kan nei lo ve, LALPA chu kan tih si lo va: Chu lal chuan eng nge min tih sak theih ang? tiin Tûnah chuan an sawi tawh ngei ang.
10:4 Thuthlung an siamna lamah dâwta chhechhamin Thu lawilo an sawi a: Chuvângin, leileh dura hnim tûr nei a to angin, Rorêlna a pung a ni.
10:5 Samari rama chêngte chu Beth-even sebâwng no avâng chuan thlaphângin an awm ang: A lak ata a bo tâk avângin chumia mite chu an lungngai ang a, Chumia puithiamho a ropuina chunga la lâwm thin te pawh.
10:6 Amah ngei pawh chu lalber Jereba hnêna pêk tûrin Assuria ramah kalbopui a ni ang:Ephraim chuan zah a hmu ang a, Israel chuan ama thurawt ngei chu a zahpui ang.0:7 Samari ram lah chu, tui chunga thingtang nawi ang mai hian A lal chu tihboral a ni a.
10:8 Israel sualna Aven hmun sângte pawh chu tihchhiat a ni ang a: An maichâmah te chuan hlîng leh hnimhlîng nei a lo to vang a; Tlâng hnênahte chuan, Min khuh rawh an ti ang a, Mual hnênahte chuan, Min delh rawh an ti ang.
10:9 Aw Israel, Gibea nî atang tawh khân i sual a ni: Chutah in la chhunzawm a; Khawlohna fate chunga dona chuan Gibea ngeiah chuan a ûm phâk hlawm lo vang maw?
10:10 Ka duh hunah chuan anmahni ka hrîng ang a; Tin, an bawhchhiah thuah hnih avânga hrem an nih hunah chuan An chungah mipuite chu an pungkhâwm ang.
10:11 Tin, Ephraim chu bâwngla zirtîr rawh, Buh chîl châk tak a ni a; Mahse kei ngei hian a nghâwng mawi takah chuan Nghâwngkawl ka bahtîr tawh ang a, Ephraim chungah mi ka chuantîr ang a, Juda pawh chuan lei a let ang, Jakoba chuan lei tlangte chu a ti sawm ang.
10:12 Mahni tân felna tuh ula, Khawngaihna seng rawh u; In lei khêkte let ula, LALPA zawn hun a ni a, A lokala malsawmna a vûr hma che u chuan.
10:13 Mahse suahsualna in tuha, Khawlohna in seng a: In dawtsawi rah in nei a ni.
10:14 Chuvâng chuan i mite zîngah buai mum mumna a lo chhuak ang a, Salmana chuan indo nîa Beth arbel a tihchhiat ang khân I kulh zawng zawngte chu tihchhiat a ni ang; Nu chu fate nên paih sawmin an awm a ni.
10:15 Nangni Bethel mite u, In sual nasa tak avângin Chûng thil chu in chungah a lo thleng dâwn, Israel lal pawh khawfîng chah hmâin a boral ang.
11:1 Israel hnam chu a naupan lai ata tawh ka hmangaih a, Aigupta ram ata ka fapa atân ka ko chhuak a ni.
11:2 Koh an nihin an hla sauh va, Baal ho hnênah an inthawi zâwk thin a, Milem siam chawpte hnênah rimtui an hâl a ni.
11:3 Kei erawh chuan Ephraim chu ka bâna dawmin kal ka zirtîr a, An mahni ka tihtîr a ni tih erawh chu an hre lo.
11:4 Mihring hruihrual, hmangaihna hruite chuan an mahni ka kai a; An tân chuan an khabea kawl hlihsaktute ang chu ka ni a, Duat takin an hmâah eitûr ka hlui a
11:5 Mahse an lamlêt duh loh avângin, Aigupta ramah ka tîr leh ang; Assuria chu an la ani ang.
11:6 A khawpuiahte chuan khandaih a invilik ang a, A kulhte chu a tiboral ang a, A tiral ang, An mahni thu lo rawn avâng ngeiin.
11:7 Ka mite chuan min hawisan an tum reng a, An nghawngkawl rit tak avângin Chungnungbera an au ang a, Mahse tuman an chawikân sak lo vang.
11:8 Aw Ephraim, engting nge ka thlauh thlak theih ang che? Aw Israel, engtin nge ka thlah theih ang che? Engtin nge Adama angin ka siam theih ang che? Engtin nge Zeboim angin ka awmtîr theih ang che? Ka chhûngah ka thinlung a inlumlêt a, Ka khawngaihnate chu a in chhêm vâm ta zawk a.
11:9 Ka thinrimna nasa tak chu ka hlen lo vang a, Ephraim chu tihborala ka tin leh tawh lo vang a: Nangmaha awm Mithianghlima chu; Khawpui chu ka rawn luhkhung lo vang.
11:10 LALPA chu an zui ang a, Sakeibaknei anga rûm tûra chu: A ni, a rûm ngei ang a, Tin, khawthlang lam attangin fate chu An lo tlân dual dual ang.
11:11 Aigupta atang chuan chawngzawng angin, Assuria atang chuan chawngzawng angin thla zap siau siauvin an lo kal ang: Tin, an in lum ka luahtîr ang, tih hi LALPA thu chhuak a ni.
11:12 Ephraim chuan dâwt thuin mi hual a, Israel chhûngte chuan bumnain: Juda pawhin Pathian lam angaihsak lo va, Mithianghlim rinawma lakah pawh.
12:1 Ephraim chuan thli rinrawlah a neih a. Khawchhak thli chu a zui thin a: Dawt thu leh tiavaina thu a tipung tial tial a, Assuria nen thu an thlung a, Aigupta lamah hriak a phur lut a ni.
12:2 LALPA chuan Juda chungah pawh lungawilohna tûr a nei bawk, Jakoba chu a awmdan ang zia zêlin a hrem ang a; A thiltih ang zia zêlin a thungrul ang.
12:3 Chhûlah pawh khan a unaupa chu keartuiah a rawn man a; A lo puitlinin Pathian a bei a;
12:4 A ni, vântirhkoh a bei a, a hneh ta a: A tap a duhsakna a ngen a: Bethel hmunah chuan amah a hmu ta a, Tah chuan ka hnênah thu a sawi a;
12:5 LALPA ngei, sipai ho te Pathian chu, LALPA tih chu a chhinchhiahna a ni.
12:6 Chutichuan, nang chuan i pathian hnên lam hawi la; Khawngaihna leh rorêlna hmang la, I pathian ah chuan in nghat fo rawh.
12:7 Kanaanho angin Israel chuan bukna diklo a lek a. Bum mawlh a chak thin a ni.
12:8 Ephraim chuan, Ka hausa takzet ta mai, Ka intimuk tak meuh ta a ni: ka hnathawh zawng zawngahte lah chuan. Keimahah khawlohna thilsual an hmuhtûr a awm miah lo, a ti a.
12:9 Mahse kei hi Aigupta ram atang tawh khan LALPA i pathian chu ka ni a; kût hunlai ang khan puan inah ka la chentir leh ang che.
12:10 zâwlneite hnênah pawh thu ka sawi thin a, inlârnate ka tipung a; zâwlneite hmangin ka vau lawk a.
12:11 Gilead chu khawlohna a ni lo vem ni? Engmah lo mai an ni a lawm; Gilgalah chuan sebâwngpa an hlan thin a; A ni, an maichâmte chu leileh rinkhawh thlura Lung theh khawm ang mai an ni.
12:12 Jakoba chu Aram ramah a tlanbo va, Israela chuan nupui man a tuak ta a, Nupui man atân chuan berâm a veng a ni.
12:13 zâwlneite hmangin Israela chu Aigupta ram atangin LALPAN hruai chhuak a, zâwlnei vek hmang chuan a humhim bawk a.
12:14 Ephraima lah chuan a tithinrim nasa êm êm mai a, Chuvangin a thisen chhuah chu ama chungah a tla a; A sawichhiatna chu ama chungah LALPAN a tlaktir ang.
13:1 Ephraiman thu a sawi chuan khurhna khawp a tling hial thin, Israel mite zingah ngaih ropui a ni miau va, Baal hnêna a tluk chinah erawh chuan a thi ta a ni.
13:2 Tunah te hian an sual ta deuh deuh va, An tangkaruain milim chhun an insiam chawp a, anmahni ngaihdan angzia zêla milim chu: chung zawng zawng chu themthiamte kut chhuak a ni chungin, Inthawina hlantu apiangte chuan Bawng note chu fawp rawh se, an ti thin .
13:3 Chuvangin zîng tiauchhum ang leh Dai hma taka bo leh mai thin ang te, Meikhu chhhuahna meikhu ang te an ni ang.
13:4 Kei erawh hi chu Aigupta ram tang tawha LALPA i pathian chu ka ni a; Kei tih loh chu pathian dang i hre ngai lo va, kei lo hi chu chhandamtu dang an awm lo.
13:5 Ram ro nasa tak thlalêra kawm thîntu che kha ka ni a.
13:6 An eitûr dawnah chuan an tlai a, An tlai chu an thinlungin a chapo phah a, Tichuan min theihnghilh ta a ni.
13:7 Chuvangin an tan sakeibaknei ang ka ni a, Keite ang in kawng lakah anmahni ka chang ang .
13:8 Savawm no chan angin anmahni ka bei ang a, An lung tuamtute ka hai thlêr vek ang a, chumi hmunah chuan sakeibaknei angin Anmahni ka ei zo vang; Ram sate chuan an phih darh zo dawn a nih chu.
13:9 Aw Israel, nangmah puitu mi do hi i chhiatna a ni e.
13:10 I khawpui zawng zawnga chhanhim thei tu tr che I lal chu tunah khawiah nge a awm le? Lal leh hotute mi pe rawh, i tihate I rorêl tûrte chu khawiah nge?
13:11 Ka thinrimin lal ka pe che a, Ka thinur in ka la bo leh ta a ni.
13:12 Ephraim khawlohna chu khawl khawm a ni a, A sualna chu chhek khawm a ni.
13:13 Hmeichhe nauvei lungngaihna ang chu a chungah a lo thleng ang: Amah chu fapa fing lo tak a ni e, A hun takah nau lo chhuahna hmunah a awm si lo.
13:14 Seol kut ata anni chu ka tlan ang em ni? Thihna ata ka chhan chhuak dawn em ni? Aw thihna, i hripuite chu khawiah nge? Aw seol, i tihchhiatna chu khawiah nge? Ka khawngaih dawn hauh lo, Sim mahse ka bengkhawn lo vang.
13:15 Aw unâute zînga a hmuingîl ber ni mah se, Khawchhak thlî a lo thawk a, Tlaler atanga LALPA thaw ngei chu a lo kal mek a ni; A tuihna te chu a kang ang a, A tuikhur te chu a ro zo vang; bungbêl tha zawng zawng,a ro chu a tichhe vek ang.
13:16 Samaria a tiau vang, A pathian chungah a hel si a; Khandaiha tihtlûkin an awm ang a, An nausente chu paih sawm an ni ang a, An hmeichhia, naupai laite chu tai thlêr an ni ang.
14:1 Aw Israel, LALPA i pathian lamah chuan kir leh rawh I khawlohna avâng ngeiin i tluk tak hi.
14:2 Thu keng chungin LALPA lamah kîr leh la, A hnênah chuan heti hian sawi rawh: Khawlohna zawng zawng chu la bo la, a tha apiang chu pawm ang che; Tichuan kan hmui rah te chu bâwngpa aiah ka rawn hlân ang e.
14:3 Assuria chuan min chhandam lo vang a, Sakawr chungahte chuan kan chuang lo vang; Kan kut chhuakte hnênah chuan, Kan pathian in ni e, kan ti tawh hek lo vang. Fahrahte chuan nangmahah hian Khawngaihna an lo hmu thin a ni si a.
14:4 An hnungtawlhna hi ka tidam ang a, An lak atanga ka thin rimna chu a kian tâk avângin, Anni chu ka hmangaih hrim hrim dawn a ni.
14:5 Israel lakah chuan daifîm ang ka ni ang a, Ani chu lili angin a lo vul ang a, Lebanon tlâng thingzung angin a zung a thlâk darh ang.
14:6 A zârte chu a tâwi luih ang a, A mawizia chu olive thing ang mai a ni ang a, Lebanon tlang angin a rimtui ang.
14:7 A hlima chêngte chu an lo kîr ang a, Buh angin an nung thar ang a, grêp hrui angin an lo duah ang: Lebanon uain angin an hming a thang ang.
14:8 Ephraim chuan milemte nen in zâwlna eng nge a neih tawh ang? Kei hi a tawngtaina chhangtu ka ni a, A tungdingtu pawh ka ni: Kei chu far thing hring dup ang ka ni a, I rah thate chu keima laka mi a ni e.
14:9 Tunge finga hêng hi hre thiam thei ang; Tunge fingvâra hre thei ang? LALPA kawngte chu a dik a, Mi dikte chuan an zawh dawn a ni si a; Bawhchhetute erawh chu chutah chuan An inchhuih thlu dâwn a ni.
posted by zoblog @ 11:56 AM  
0 Comments:
Post a Comment
<< Home
 
About

Name: zoblog
Home:
About Me:
See my complete profile
Previous Post
Archives
Mizo Websites
:bloremizo::buannel::chhawkhlei: :Dmzp::fartuah::hyderabadmizo: :khampat::lawrkhawm::lelte: :misual::mizobooks::mzbloggers: :mizomethodist::mizoramhouse: :mizoramuniversity::mizoserver: :mizoweaving::mumbaimizo: :samaw::sinlungnews::zawlbuk: :zomireunification::zonet::zoram: :zotalk:
© MIZO CLAN by Mizoclan Blog