|
| Wednesday, September 12, 2007 |
1:1 Obadia inlârna hmuh chu. Lalpa PATHIAN chuan Edom chung changah heti hian a ti: LALPA hnen ata thu kan hria a, hnamte zingah palai tirh a ni, Tho ula, indonaah amah do turin i thawk ang u, tiin.
1:2 Ngai teh, hnamte zingah ka titê tawh che a ni: nasa taka hmusitin i awm ta.
1:3 Aw nang, lungpui keh kâra chênga, hmunsâng luahtu, Tuin nge leiah mi tithla ang? ti rilrutu, i thinlung chaponain a bum ta che a ni.
1:4 Mu angin sâng takah thlâwkchho mah la, i bu chu arsi zînga chheh pawh ni mah sela, chuta ta chu ka la thla ang che, LALPAN a ti.
1:5 I hnênah rûkrute, phil hmangte zânah lo kal sela, (tihboral i va ni dâwn nasa êm!) an duh tâwkin an ru lo vang em ni? I hnênah Grêp sengkhâwm tute lo kal sela,grêp seng tûr thenkhatte an hnutchhiah lo vang em ni?
1:6 Esauva thilte zawnchhuah a nih tâk chu! A ro bâwm thuhrûkte dapchhuah a nih tâk chu!
1:7 I lam a tang ho te zawng zawngin ramri hial an rawn thlen che a: mi in rem taka i awmpuite khân an bum che a, an hneh tawh che a ni; i chhang eitute khân i hnuaiah thang an kam a: amah ah chuan hriatthiamna rêng a awm lo a ni.
1:8 Chumi nîah chuan Edom ata mi fingte ka tiboralin, Esauva tlâng ata hriat thiamna ka tiboral lo vang em ni? LALPAN a ti.
1:9 Aw Teman, Esauva tlâng ata mitin thah borala an awm vekna tûrin, i mi chakte chu nasa takin an zâm ang.
1:10 I unaupa Jakoba chunga i pâwngnêkna avângin zahnain a khuh ang che a, kumkhuaa tih boralin i awm ang.
1:11 Lehlama i din nîa, mikhualten a sum an lâk bo nîa, hnamdang mite a kulh kawngkhâra an lo luh a, Jerusalem chunga thum an vâwr lai khân, nang pawh an mahni zînga tel angin i awm kha.
1:12 Amaherawhchu i unaupa a chhiat laia a chhiatna nî chu thlîr suh la, Juda fate chungah an boral nîin lâwm suh la; hreawm niin chapo takin tawng hek suh.
1:13 Ka mite an vânduai nîin an kulh kawngkaah lût suh; a ni, an vân duai nîin an tuarnate thlîr suh la, an vânduai nîin an sum leh paite chungah in kutte nghat hek suh u.
1:14 A mi thenkhat tlân chhuakte that tûrin kawng thuamah ding suh la; hreawm nia a mi la awm chhunte chu mantîr suh.
1:15 Hnam zawng zawng chungah LALPA ni chu a hnai si a: i lo tih tawh ang bawkin i chungah tih a ni ang; i tih dan chu i lu chung ngeiah a lo lêt ang.
1:16 Ka tlâng thianghlima in in tâk ang khan, hnam zawng zawngte chuan an in fo dawn si a, a ni an in ang a, an lem ang a, piang lo ang maiin an awm ang.
1:17 Zion tlângah erawh chuan, tlan chhuakte chu an awm ang a, a thianghlim ang; tin, Jakoba chhûngte chuan an rochante chu an chang ang.
1:18 Jakoba chhûngte chu mei an ni ang a, Josefa chhûngte chu meialh an ni ang a, Esauva chhûngte chu buhpâwl an ni ang a, an mahni zîngah an alh ang a, an kâng ral vek ang: Esauva chhûngte chu a bâng rêng an awm lo vang; LALPA chuan a ti si a.
1:19 Chhim lam mite chuan Esauva tlâng chu an chang ang a; ram phaia mite chuan Philistia ram an chang ang: Ephraim lo leh Samari lo chu an chang ang: Benjamina chuan Gilead ram a chang ang.
1:20 Kanaan mite zinga he Israela thlah sal tang mipuite hian Zarephath ram thlengin an chang ang a; Sepharad rama Jerusalem khaw mite sal tang chuan Chhim lam khawpuite chu an chang ang.
1:21 Zion tlângah chuan Esauva tlâng rêlsak tûra chhan chhuaktute an lo chho vang a;tin, ram chu LALPA ta a ni ang. |
posted by zoblog @ 11:55 AM  |
|
|
|
|
|
