| Wednesday, September 12, 2007 |
1:1 Pethuela fapa Joela hnena LALPA thu lo thleng chu.
1:2 Putarte u, hei hi hre rawh u, he rama awm zawng zawngte u, beng chhi rawh u. Hei hi, in hun lai leh in pute hun lai pawhin a awm tawh ngai em ni?
1:3 Chu chu in fate hrilh ula, in fate chuan an fate hrilh sela, an fa lehte chuan chhuan dang hrilh zel rawh se.
1:4 Thingngêt pangangin a ei ban apiang chu khaukhuapin a ei a; khaukhuapin a ei ban apiang chu thingngetin a ei a, thingngetin a ei ban apiang chu pangangin a ei zo va.
1:5 Rûite u, harh ula, tap rawh u; uain in zawng zawngte u, a uain thlum avang chuan chiau vak vak rawh u; in ka ata lak bo a ni tawh si a.
1:6 Hnam chak tak, chhiar sen loh, ka ramah a lo chhuak ta si a, an ha chu sakeibaknei ha ang a ni a, sakeibaknei lian tak hapui ang an nei bawk a.
1:7 Ka grep hrui a tichhia a, ka theipui thing pil a hîk a: a hîk fai vek a, a paih bo va; a tangte chu a filh var vek a.
1:8 Nulain, saiip puan fenga, a that lai pasal a sun angin tap vak rawh u.
1:9 Chhangphut hlan te, in tur hlante chu LALPA in ata tihbo a ni a; puithiam LALPA rawngbawltute chu an lungngai a.
1:10 Lo chu tihchhiat a ni a, ram chu a lungngai a; buh chu tihchhiat a ni, uain thar chu a kang a, hriak chu a chau va.
1:11 Aw, ngangni, lo neitute u, zak ula; aw, nangni, grep hrui enkawltute u, buh leh buhsânghar avângin chiau vak vak rawh u; lova buh seng tur chu a boral ta si a.
1:12 Grep hrui chu a vuai a, theipui k1:13 Nangni puithiamte u, saiip puan veng ula, tap rawh u; nangni, maicham rawngbawltute u, chiau vak vak rawh u; nangni ka Pathian rawngbawltute u, lo kal ula, saiip puan sinin zankhuain mu rawh u: in Pathian in atang chuan chhangphut hlan leh in tur hlan chu khap a ni si a.
1:14 Chaw nghei hun serh thianghlim ula, inkhawmpui urhsun siam ula, LALPA in Pathian inah chuan putarte leh he rama chung zawng zawngte chu hruai khawm ula, LALPA chu au rawh u.
1:15 Chu ni chu a chung a pik e! LALPA ni chu a hnai si a, Engkimtitheia laka boralna ang a lo thleng ang.
1:16 Kan mithmuhah ei tûr tihbo a ni lo vem ni, a ni, kan hlimna leh lawmna chu kan Pathian in ata tihbo a ni lo vem ni?
1:17 Chite chu lei tlang hnuaiahte chuan a tawih a; zem te chu a ram a, buhin te chu thiat in a awm a; a buh chu a vuai ta si a.
1:18 Rante chu an va ram nasa em! Bawng rualte chu an mangang a, hlobet hring hmun an neih loh avângin; a ni, berâm rualte chu an tiau va.
1:19 Aw, LALPA, ka au va che: mei chuan thlaler ram hlobet hmun chu a kang fai ta a, meiah chuan ram thing zawng zawng chu a kang fai ta si a.
1:20 A ni, ram sate chu nangmah ngaiin an thaw huam huam a: lui tete chu a kang chat a, meialh chuan thlaler ram hlobet hmun chu a kang fai ta si a.
1:21 Khau rual chu LALPA ni tehkhinna
2:1 Zion-ah chuan tawtawrawh ham ula, ka tlang thianghlimah chuan inralrinna puang rawh u; he ram chhûnga mi zawng zawngte chu khur rawh se: LALPA ni chu a lo thleng mek a, a hnai tawh si a;
2:2 thimna leh khaw durna ni, thim chhah mup angin mi hrang rual tam tak, la hmuh ngai loh, engtik maha hmuh leh ngai tawh loh tûr an lo thawk anga, tlang chu khawfing chatin a tuam angin an rawn tuam ang.
2:3 An hma lam leh hnung lam chu a kang fai zel a; an hmabak ram chu Eden huan ang ni mahse an pelh hnu chuan thlaler ram ro a ni zel a, engmah zuah an nei lo.
2:4 An lan dan chu sakawr lan dan ang a ni; sakawr chuan mi angin an tlan a.
2:5 Indona tawlailîr ri angin tlang chungah an kat ri sup sup a, pawl kang alh hluah hluah ang leh indonaa mipui chak tak inpeih sa angin.
2:6 An hmâah mipuite chu an thlaphang a: an hmêlte chu a lo dâng vek a.
2:7 Mi chak tak angin an tlan a; indo mi angin bangah an lawn a; mahni zawn theuhvah an kal a, an tlar dan an tibuai lo.
2:8 An innêk hek lo va; mahni kawngah an kal theuh va; hriamhreite an su tlang a, an kal peng lo.
2:9 Khawpui chungah an zuang a; kulh chungah an tlân a; in chhûngahte an lawn chho va; rukru angin tukverhahte an lût a.
2:10 An hmâah lei a khûr a; vânte a nghîng a; nî leh thlâ chu a thim a, arsiten an êng an thup a:
2:11 tin, LALPA chuan sipai rualte hmâah a aw a chhuah a; a riah bukte chu a ropui hlê si a; a thu hlentua a chak si a; LALPA nî chu a ropuiin a râpthlâk êm êm si a; tuin nge tuar thei ang?
2:12 LALPA chuan, Chuti chung pawhin tunah in thinlung zawng zawngin, chaw ngheiin, tapin, lungngaiin ka lam lo hawi ula:
2:13 in puan ni lovin in thinlung thlêr ula, LALPA in Pathian lam chu hawi rawh u: ani chu khawngaih thei tak leh lainatnaa khat, thin nel leh ngilneihna ngah, thil tha lo laka lemlêt thîn a ni, a ti a.
2:14 LALPA in pathian hnênah chhangphut hlan leh in tûr hlanahte pawh chuan, a kirin, rilru lamletin, malsawmna hnutchhiahin a awm lo vang tih tuin nge hria?
2:15 Zion-ah chuan tawtawrâwt ham ula, chaw nghei hun serh thianghlim ula, inkhawpui urhsun tak siam rawh u:
2:16 mipui khawm ula inkhawmho chu tithianghlim ula, putarte, naupangte, hnute hne laite khawm ula: mo neitu chu a pindan chhûngril ata lo chhuak tawh se.
2:17 Puithiam, LALPA rawngbawltute chu, hulhliap leh maichâm inkarah chuan tap sela; Aw LALPA, i mite zuah la, i rochante hi sawichhiata awma hnamten an chunga ro an relsak tûrin pe suh: An Pathian chu khawiah nge a awm tak, tiin an mipuite zingah chuan engah nge an tih ang? ti rawh se.
2:18 LALPA chuan a ram chu a hik a, a mite a khawngaih a.
2:19 LALPA chuan a mite hnênah, Ngai ula, in hnênah buh te, uain te, hriak te ka rawn thlen anga, chûng chuan in tlai ang a: hnam zîngahte chuan sawichhiatin ka awmtîr tawhhauh lo vang che u:
2:20 amah-erawhchu, in hnên ata hmâr lam atanga lo kal mi hrang rual chu ka ûm bo vek ang a; ram ro leh tiauvah ka kaltîr ang, a hmasa pawl chhak lam tuipuiah, a hnuhnung pawl thlang lam tuifinriatah; a lo uih chhuak ang a, rimchhe takin a lo nam ang, thil nasa tak a tih tak avângin, tiin a chhâng a.
2:21 Aw, ram, hlau suh la hlimin lawm rawh; LALPA chuan thil ropui takte a ti ta si a.
2:22 Rante u, hlau suh u; thlaler hlobet hmun a lo chawr a, thing chu a lo rah a, theipui kung leh grêp hruite chu a lo duah si a.
2:23 Nangni, Zion fate u, lawm rawh u, LALPA in Pathianah chuan hlim rawh u: ruah hmasa chu tâwk chiahin a pe si che u a, in tan ruah a sûrtîr a, thla khatnaa ruah hmasa leh ruah hnuhnung chu.
2:24 Hruite chu buhin a khat ang a, uain leh hriak khute chu a khat liam ang a.
2:25 In zinga ka sipai rual tamtak ka tirh, khaukhuap te, thingnget te, pangang te, thingnget pangangten an ei zawh kumte kha ka rul leh ang che u.
2:26 Tam tak in ei ang a, in tlai ang a, mak taka ngaihtuah thintu che u LALPA in Pathian hming chu in fak ang a: ka mite chu an mualpho rêng rêng lo vang.
2:27 Tin, Israelte zingah ka awm tih leh LALPA in Pathian ka ni a, tumah dang an awm lo tih in hria ang: ka mite chu an mualpho ngai lo vang.
2:28 Chumi hnuah chuan heti hi a lo ni ang a, mi zawng zawng chungah ka thlarau ka leih ang a; tichuan in fapate, in fanuten ka thu an hril ang a, in putarten mumangah an mang ang a, in tlangvâlten inlârnate an hmu ang a:
2:29 chung niahte chuan ka bawihpate, ka bawihnute chungah pawh ka thlarau ka leih ang a.
2:30 Vanah leh leiah thilmakte ka hmuhtir ang a,thisen te, mei te,meikhu ding te nen.
2:31 Ni thimah a chang ang a, thla thisenah a chang ang a, LALPA ni ropui tak leh râpthlâk tak chu a lo thlen hmain.
2:32 Tin, heti hi a ni ang a, tupawh LALPA hming lam apiang chu chhanhim an ni ang: LALPAN a sawi ang khan tlan chhuakte chu Zion tlângah leh Jerusalem khuaah an awm si ang a, a la awm chhunte zingah chuan LALPAN kohte chu an awm ang.
3:1 Ngai teh u, chung nîahte leh chumi hunah chuan Juda leh Jerusalem tun din leh hunah chuan,
3:2 hnam zawng zawng ka khawm ang a, Jehosaphat ruamah ka hruai ang. Ka mi, ka rochan Israel chunga an thiltih avângin an chung thu ka rel ang; ram dangah ka mite an tidarh a.
3:3 Thum vawrin ka mite an insem a; naupangte chu ahmei apain nawhchizuar leh uain lei nan an hralh a.
3:4 Nangni tûra leh Sidon, nangni Philistia ram te u, ka chungah phuba lak in tum em ni? Ka chunga phuba lak in tum a nih zawngin rang takin in chungah phuba ka la lêt ve ang.
3:5 Ka tangkarua leh ka rangkachak in la a, ka thil tha tak duhawmte in biak in chhûngahte in keng lut ta vei a;
3:6 Juda fate leh Jerusalem fate pawh an ramri atanga hla takah in sawn bo theih nan, Grik fapate hnênah in hralh ta mai si a.
3:7 Ngai teh u, in hralhna hmun atang khân chawk thovin ka chhuahtîr ang a, in thungrulhna chu in lu chung ngeiah ka thungrûl ve ang;
3:8 in fapate, in fanute chu Juda fate kutah ka hralh ang, anni chuan hla takah Seba mite hnênah anmahni an hralh ang a: LALPA chuan a ti ta a ni.
3:9 Hei hi hnam zingah puang ula; indona buatsaih ula: mi chakte chawk tho ula; indo mi zawng zawngte lo hnai sela, lo chho rawh se.
3:10 In leilehna hmâwr zumte khandaihah chher ula, in thei kûngah chhumna chemtete chu feiah chher rawh u: mi chak lo pawhin, Ka chak a ni, ti rawh se.
3:11 A vêla hnam zawng zawngte u, hmanhmawh ula, lo kal ula, pung khawm rawh u: aw, LALPA, chutah chuan i mi chak takte kal chhuktîr rawh.
3:12 Hnamte chu inchawk tho sela, Jehosaphata kawr ruamah chuan lo kal chho rawh se: chutah chuan a vêla hnam zawng zawng chunga rorêl tûrin ka thu dawn a ni.
3:13 An sual êm mai a, buh seng angin ât ula, a khah hmâ chu a khura grêp rah sâwr angin rap sâwr rawh u
3:14 Mi sâng tam takte chu Jehosaphat ruamah an awm khâwm ta; chutah chuan a ni LALPA ni a lo thlen dawn.
3:15 Nî leh thlâ te an thim a, arsiten an êng an thup a.
3:16 Tin,LALPA chu Zion tlang atangin a rum hum hum ang a, Jerusalem khua atangin a aw a chhuah ang a; vân te leh lei an nghîng ang a: nimahsela LALPA chu a mite tan inhumhimna a ni ang a, Israel thlahte tan kulhbîng a ni ang.
3:17 Chutichuan LALPA in Pathian ka tlang thianghlim Zion-a chêng ka ni tih in hria ang: tichuan Jerusalem khua chu a thianghlim ang a, mikhual tumah an kal tlang leh tawh hauh lo vang.
3:18 Chumi nîah chuan heti hi a lo ni ang a, tlâng sângte chuan uain thlum a fartîr ang a, tlangte chu hnute tuiin a luang ang a, Judai ram lui tê zawng zawng te chu tuitein a luang ang a; LALPA in atangin tuikhur a lo chik chhuak ang a, Sittim kawr ruam a tihnâwng ang.
3:19 Juda fate chunga râwng taka tia an ramah mi thiam thisen an chhuah avângin, Aigupta ram chu a ram ang a, Edom ram chu thlaler ram ro a ni ang.
3:20 Judai ram erawh chu kumkhuain a awm reng ang a, Jerusalem khua chu chhuan atanga chhuan zel thlengin.
3:21 Tin, an thisen ka tleng fai ang a: LALPA chu Zion-ah a cheng reng si a. |
posted by zoblog @ 11:56 AM  |
|
|
|
